ខេត្តសៀមរាប៖មន្ត្រីក្រសួងកសិកម្មរុក្ខាប្រមាញ់និងនេសាទ លោកវេង សាខុន នៅព្រឹកថ្ងៃទី ២៩ ខែកញ្ញានេះ បានបង្ហាញ ពី “ភាពជោគជ័យរបស់សហគមន៍កសិកម្មសំបូរមានជ័យ ក្នុងការប្រកបរបរទីផ្សារបន្លែ និងឈើ ហូបផ្លែ”។

រដ្ឋមន្ត្រីវេង សាខុន បានឡើងថា៖
បច្ចុប្បន្ន សហគមន៍កសិកម្មបាននិងកំពុងបំពេញតួនាទីយ៉ាងសំខាន់ក្នុងការចូលរួមចំណែកយ៉ាងសកម្មអនុវត្តគោលនយោបាយ និងផែនការអភិវឌ្ឍវិស័យកសិកម្ម ជាពិសេសគោលនយោបាយរបស់រាជរដ្ឋាភិបាលស្តីពីការជំរុញផលិតកម្មស្រូវ និងការបង្កើនការនាំចេញអង្ករ ការជំរុញផលិតកម្មសាកវប្បកម្ម ការលើកកម្ពស់ផលិតភាព ពិពិធភាវូបនីយកម្មកសិកម្ម និងពាណិជ្ជូបនីយកម្មកសិកម្ម ក្នុងទិសដៅដ៏ចំបងមួយគឺការធានាសន្តិសុខស្បៀង ជំរុញការអភិវឌ្ឍន៍សេដ្ឋកិច្ចគ្រួសារ កសាងសុខដុមនីយកម្មក្នុងរង្វង់សមាជិកសហគមន៍ និងរួមចំណែកទ្រទ្រង់ខឿនសេដ្ឋកិច្ចជាតិ។

ស្ថិតនៅក្រោមម្លប់ដំបូលសុខសន្តិភាព ក្រោមការដឹកនាំរបស់សម្តេចតេជោ នាយករដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ ដែលមានអគ្គនាយកដ្ឋានកសិកម្មជាសេនាធិការ បានខិតខំជំរុញ គាំទ្រ និងលើកទឹកចិត្តឲ្យសហគមន៍ កសិកម្មទាំងអស់នៅទូទាំងប្រទេសធ្វើការចងក្រងសមាជិកដើម្បីបង្កើតបានជាកំលាំងផលិតមានជាអាទិ៍៖ ផលិតកម្មបន្លែ (បន្លែសុវត្ថិភាព-បន្លែសរីរាង្គ) ដំណាំឈើហូបផ្លែ ស្រូវចំណី ស្រូវពូជ និងដំណាំកសិ-ឧស្សាហកម្មមួយចំនួនទៀត។ល។ ក្នុងគោលបំណង ធានាឲ្យបាននូវបរិមាណផ្គត់ផ្គង់ ប្រកបដោយគុណភាពផលិត និងការផលិតផលតម្រូវតាមទីផ្សារ និងមានកិច្ចសន្យាទទួលទិញ និងតម្លៃត្រូវបានធានា ជាមួយនឹងទទួលបានបច្ចេកវិទ្យាផលិត ការប្រមូលផល និងការវេចខ្ចប់ល្អប្រសើរ រួមផ្សំនឹងការប្រើប្រាស់ធាតុចូលកសិកម្ម ឥណទានការប្រាក់ទាប មានរចនាសម្ព័ន្ធគ្រប់គ្រងដឹកនាំនិងរដ្ឋបាលបានត្រឹមត្រូវ និងត្រូវបានការពារដោយច្បាប់ស្តីពី “សហគមន៍កសិកម្ម”។

ផ្តើមចេញពីពាក្យថា “មានគំនិត និងមានកំណើត” បានធ្វើឲ្យសហគមន៍មួយនេះក្នុងចំណោមសហគមន៍កសិកម្មដែលទទួលបានជោគជ័យ គឺសហគមន៍ កសិកម្មសំបូរមានជ័យ ស្ថិតនៅភូមិសំបូរ ឃុំសូភាស ស្រុកស្ទឹងត្រង់ ខេត្តកំពង់ចាម បានបង្កើតឡើងនៅថ្ងៃទី២០ ខែធ្នូ ឆ្នាំ២០១០ មានសមាជិកសរុបចំនួន ៨៨គ្រួសារ (ស្រ្តី ៥០) មានទុនសរុបចំនួន ៨ ០១១ ០០០ រៀល។ បច្ចុប្បន្ន មានសមាជិកកើនដល់ចំនួន ៦៨៩ គ្រួសារ (ស្រ្តី ៣៩១) មានភាគហ៊ុនសរុបចំនួន ១៥ ២៧២ ហ៊ុន ហើយទុនសរុបកើនឡើងរហូតដល់ចំនួន ១ ៥៦៩ ៤៩៩ ៨០០ រៀល (ប្រមាណ ៣៩២,៣៧៤ ដុល្លារអាមេរិក)។ សហគមន៍នេះបាននិងកំពុងប្រតិបត្តិការធុរកិច្ចលើមុខរបរចំនួន០៤ ៖
១. ឥណទានសហគមន៍កសិកម្ម
២. ការផ្គត់ផ្គង់ជីកសិកម្ម
៣. ទីផ្សារស្រូវពូជ/ស្រូវចំណី បន្លែសុវត្ថិភាព ល្ហុង ស្លឹកគ្រៃ ប្រេងស្លឹកគ្រៃ និងឈើហូបផ្លែ និង
៤. សេវាកម្មដឹកទំនិញ និងសេវាកម្មផ្សេងៗទៀត។

លោក ឆេង ថុង ប្រធានក្រុមប្រឹក្សាភិបាលបានឲ្យដឹងថា ភាពរីកចម្រើនរបស់សហគមន៍បានមកដោយសារមានការជំរុញ គាំទ្រ និងលើកទឹកចិត្តពីក្រសួងកសិកម្ម រុក្ខាប្រមាញ់ និងនេសាទ ពិសេសឯកឧត្តមរដ្ឋមន្រ្តី វេង សាខុន ដែលលោកតែងតែឧស្សាហ៍ចុះទៅផ្តល់កំលាំងចិត្ត និងគំនិតណែនាំល្អៗ រួមជាមួយអគ្គនាយកដ្ឋានកសិកម្ម មាននាយកដ្ឋានអភិវឌ្ឍន៍សហគមន៍កសិកម្មបានជួយបណ្តុះបណ្តាលបច្ចេកទេស ការរៀបចំផែនការ ការគ្រប់គ្រងទីផ្សារ ការកត់ត្រាបញ្ជីស្នាម ការចង ក្រងក្រុមផលិត និងការរៀបចំកិច្ចសន្យាផលិតកម្ម។ ភាពជោគជ័យនេះ បានជាទុនទាំងកំលាំងកាយ ចិត្ត និងធនធាន ជំរុញឲ្យសហគមន៍ពង្រីកសក្តានុពលផលិតកម្មកសិកម្មរបស់ខ្លួនតាមរយៈទិញដីជិត ១០ហត សម្រាប់ពង្រីកផលិតកម្មបន្ថែមទៀតឆ្លើយតបតាមតម្រូវការទីផ្សារ។ ដើម្បី បំពេញតម្រូវការឲ្យសមាជិកសហគមន៍ សហគមន៍បានកសាងមានដូចជា ៖ ហេដ្ឋារចនា សម័្ពន្ធ ទីស្នាក់ការ មួយ; ឃ្លាំងស្តុកចំនួន បី; ឡសំងួតចំនួនមួយ; លានហាលកសិផល ១កន្លែង ; ម៉ាស៊ីនកែច្នៃប្រេងស្លឹកគ្រៃមួយ; រថយន្តដឹកទំនិញ ១គ្រឿង; ម៉ាស៊ីនព្រួសស្រូវចំនួន មួយគ្រឿង ម៉ាស៊ីនបោកស្រូវចំនួន មួយគ្រឿង; ម៉ាស៊ីនច្រូត និងម៉ាស៊ីនសំអាតគ្រាប់ពូជខ្នាតតូច ព្រមទាំងឧបករណ៍ផលិតកម្មកសិកម្មខ្នាតតូចជាច្រើនទៀត។ ក្រៅពីនេះ សហគមន៍ក៏មានផ្សារលក់កសិផលនៅក្នុងមូលដ្ឋានរបស់ខ្លួន មានតូបលក់កសិផលនៅផ្សារនាគមាស (រាជធានីភ្នំពេញ) ផងដែរ។

នៅឆ្នាំ២០២០ សហគមន៍បានធ្វើកិច្ចសន្យាជាមួយក្រុមហ៊ុន AMRU RICE លក់ស្រូវចំណីចំនួន ៥០០តោន/ឆ្នាំ ធ្វើកិច្ចសន្យាជាមួយអ្នកលក់គ្រាប់ពូជស្រូវក្នុងស្រុកស្ទឹងត្រង់ចំនួន ៣៦០តោន/ឆ្នាំ ធ្វើកិច្ចសន្យាជាមួយក្រសួងអប់រំ យុវជន និងកីឡា ដើម្បីផ្គត់ផ្គង់បន្លែ សាច់ និងអង្ករ ជូនសាលារៀនចំនួន០៨ ក្នុងស្រុកស្ទឹងត្រង់ ធ្វើកិច្ចសន្យាជាមួយអ្នកចែកចាយផលិតប្រេងស្លឹកគ្រៃចំនួន ៣០លីត្រ/ខែ និងធ្វើកិច្ចសន្យាជាមួយឈ្មួញបោះដុំស្លឹកគ្រៃចំនួន ៩៨០តោន/ឆ្នាំ។ល។ តាមរយ:ការធ្វើអាជីវកម្មនេះ សហគមន៍ទទួលបានប្រាក់ចំណូលចំនួន ៣ ១២៤ ៨០៦ ៥០០ រៀល ក្នុងនោះ ៖ ១២៨ ០៣៦ ៤០០រៀល បានមកពីសេវាឥណទាន ១ ០៦៣ ៧៦៨ ៩០០ រៀល បានមកពីការផ្គត់ផ្គង់ជីកសិកម្ម ១ ៧៦៨ ០៩០ ៨០០រៀល បានមកពីទីផ្សារ និង ១៦៤ ៩១០ ៤០០រៀល បានមកពីសេវាកម្មប្រើ ប្រាស់រួមគ្នា និងសេវាផ្សេងៗ

ទៀត។ ដោយសារភាពជោគជ័យនេះ សហគមន៍កសិកម្មសំបូរមានជ័យបានទទួលជ័យលាភីលេខ១ ទូទាំងប្រទេសប្រចាំឆ្នាំ២០១៧ លើប្រធានបទ “ភាពជោគជ័យក្នុងការដឹកនាំ និងគ្រប់គ្រងសហគមន៍កសិកម្ម” ដោយទទួលបានបណ្ណសរសើរក្រសួងកសិកម្ម រុក្ខាប្រមាញ់ និងនេសាទ និងជាពិសេស ទទួលបានពាន់រង្វាន់លេខ១ ពីសម្តេចអគ្គមហាសេនាបតីតេជោ នាយករដ្ឋមន្រ្តី នៅក្នុងពិធីបិទសន្និបាតកសិកម្មទូទាំងប្រទេសនៅក្នុងឆ្នាំនោះផងដែរ។

លោក ឆេង ថុង បានបញ្ជាក់ថា សហគមន៍ទទួលបានជោគជ័យក្នុងអាជីវកម្មរបស់ខ្លួនគឺដោយ សារចំណុចសំខាន់ៗមួយចំនួនដូចចាងក្រោម ៖
១. សមាជិកគ្រប់រូបមានការប្តេជ្ញាចិត្តខ្ពស់ និងមានឆន្ទៈរួមក្នុងការអនុវត្តការងារ;
២. មានបែងចែកតួនាទី និងការទទួលខុសត្រូវច្បាស់លាស់;
៣. មានសាមគ្គីភាពផ្ទៃក្នុងបានល្អរវាង ក្រុមប្រឹក្សាភិបាល និងសមាជិកសហគមន៍;
៤. មានប្រព័ន្ធគ្រប់គ្រងបញ្ជីគណនេយ្យច្បាស់លាស់ល្អ និងតម្លាភាព;
៥. ធ្វើផែនការផលិតកម្មដំណាំបានល្អរវាងសមាជិកសហគមន៍ និងតម្រូវការទីផ្សារ;
៦. មានការបង្កើតក្រុមផលិតកម្មនៅក្នុងសហគមន៍ ទៅតាមប្រភេទដំណាំ;
៧. មានការសិក្សាទីផ្សារបានល្អ មុនចាប់ផ្តើមធ្វើមុខរបរទីផ្សាររបស់សហគមន៍;
៨. ជ្រើសរើស ឱ្យមាននាយកគ្រប់គ្រង និងបុគ្គលិកទទួលខុសត្រូវទៅតាមមុខរបរនីមួយៗច្បាស់លាស់ និងមានមធ្យោបាយដឹកជញ្ជូនកសិផលទៅកាន់ទីផ្សារ ។

ចំពោះសហគមន៍កសិកម្មផ្សេងទៀតដែលមានបំណងចង់សិក្សាស្វែងយល់ និងដកស្រង់បទពិសោធន៍ ឬទទួលបានព័ត៌មានបន្ថែមសូមអញ្ជើញទំនាក់ទំនងលោក ឆេង ថុង ប្រធានសហគមន៍កសិកម្មសំបូរមានជ័យ តាមរយៈលេខទូរស័ព្ទ ០៧៧ ៩៩៦ ៧៦៨។

សូមអនុញ្ញាតជម្រាបជូនថាចាប់តាំងពីឆ្នាំ២០០៣ រហូតដល់ត្រឹមចុងឆ្នាំ២០២១ សហគមន៍កសិកម្មដែលបានបង្កើត និងកំពុងធ្វើសកម្មភាពយ៉ាងសកម្មក្នុងវិស័យផលិតកម្មកសិកម្ម មានចំនួន ១ ២០០សហគមន៍ មានសមាជិកសរុបចំនួន ១៤៤ ៣០៦នាក់ គិតជាគ្រួសារកសិករមានចំនួន ១៣១ ៦០៦គ្រួសារ និងមានដើមទុនសរុបប្រមាណ ៩៩ ៤៨៩ ៤៨៥ ០៥៩ រៀល (ស្មើ ២៤,៨ លានដុល្លារ) ហើយសហគមន៍កសិកម្មទាំងអស់នេះបានចុះបញ្ជីទទួលស្គាល់ដោយមន្ទីរកសិកម្ម រុក្ខាប្រមាញ់ និងនេសាទខេត្តសាមី។ ច្បាប់ស្តីពី “សហគមន៍កសិកម្ម” ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាសព្វព្រះរាជហរទ័យប្រកាសដាក់ឱ្យប្រើតាមព្រះរាជក្រមលេខ នស/រកម/០៦១៣/០០៨ ចុះថ្ងៃទី០៦ ខែមិថុនា ឆ្នាំ២០១៣៕SRP

ភ្នំពេញ៖ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ សម្ដេចក្រឡាហោមស ខេង សម្រេចអនុវត្តពិន័យចំពោះវរសេនីយ៍ឯក សឿន ប៊ុនធឿន អត្តលេខ ៦៤៨៦៨ ក្រុមរូបភាពដកហូតមុខតំណែង ពីអនុប្រធាននាយកដ្ឋាននគរបាលការពារព្រំដែនគោក «ឲ្យមកជាមន្ត្រី»។ នេះបើតាមសេចក្ដីសម្រេចរបស់ក្រសួងមហាផ្ទៃដែលចុះហត្ថលេខាដោយសម្ដេច សម្ដេចស ខេង៕SRP

ខេត្តសៀមរាប៖ពិតជាគួរអោយសង្វេគខ្លាំងណាស់ ប្រជាការពារភូមិចុងកៅស៊ូម្នាក់ ដែលតែងតែ ជួយធ្វើការសង្គម ជាពិសេសក្នុងការបិទខ្ទប់នៅច្រកភ្លើងស្តុបចុងកៅស៊ូ បេនឡានបានស្លាប់បាត់បង់ជីវិតនៅវេលាថ្ងៃត្រង់នាថ្ងៃនេះ។

ប្រភពពីសមត្ថកិច្ចបានដឹងថា ជនរងគ្រោះ មានឈ្មោះហ៊ន់ ទិត្យ ហៅ D1U (ដេមួយអ៊ុយ)ភេទប្រុស អាយុ៤២ឆ្នាំ បានស្លាប់បាត់បង់ជីវិត នៅវេលាម៉ោង ១២ៈ០០ នៅមន្ទីរពេទ្យបង្អែកខេត្តសៀមរាប នាថ្ងៃទី ២៨ ខែកញ្ញា ឆ្នាំ២០២១ នេះ បន្ទាប់ពីបានក្រុមសាច់ញាតិបញ្ជូនទៅដល់មន្ទីរពេទ្យ។

ប្រភពបានបញ្ជាក់ទៀតថា ជនរងគ្រោះ ជាប្រជាការពារភូមិចុងកៅស៊ូ រស់នៅបន្ទប់ជួលភូមិចុងកៅស៊ូ សង្កាត់ស្លក្រាម ក្រុងសៀមរាប។ មូលហេតុនៃការស្លាប់ ដោយជនរងគ្រោះមានអាការៈធ្ងន់ធ្ងរកកឈាមក្នុងខួរក្បាល។

បច្ចុប្បន្ន សាកសពត្រូវបានសាច់ញាតិបានមកទទួលយកទៅធ្វើបុណ្យនៅឯភូមិដំរីឆ្លង ស្រុកសូទ្រនិគម ខេត្តសៀមរាប៕SRP

ខេត្តកំពង់ធំ៖លោកហ៊ុន គឹមជាតិ ក្មួយប្រុសបង្កើតសម្តេចតេជោហ៊ុន សែន នាយករដ្ឋមន្ត្រីបានឧបត្ថម្ភនូវម៉ាសអាកុលទឹកសុទ្ធ ដល់អាជ្ញាធរសមត្ថកិច្ចខេត្តកំពង់ធំ។ ការឧបត្ថម្ភធ្វើឡើងនៅថ្ងៃទី ២៨ ខែកញ្ញាឆ្នាំ ២០២១ នៅខេត្តកំពង់ធំ ក្នុង៤ទីតាំងផ្សេងគ្នា។

សូមជម្រាបថាអំណោយប្រគល់ជូនរដ្ឋបាលខេត្តកំពង់ធំ. បញ្ជាការកងរាជអាវុធហត្ថខេត្តកំពង់ធំ .ស្នងការនគរបាលខេត្តនិង
សាលាដំបូលខេត្តកំពង់ធំ។

អំណោយដែលបានប្រគល់ជូនទាំង៤ទីតាំង ក្នុងមួយទីតាំងទទួលបាន ម៉ាសចំនួន៥០០០ម៉ាស.អាកុល៣កាន.និងទឹកបរិសុទ្ធចំនួន ៣០កេសផងដែរ៕SRP

ខេត្តកំពង់ចាម​៖លោកអ៊ុន​ ចាន់ដា​ អភិបាលខេត្តកំពង់ចាម​ បានថ្លែង​នូវ​ការ​កោតសរសើរ​ចំពោះ​កងកម្លាំង​ទាំង​៣ប្រភេទ​ ដែល​កន្លងមក​តែងតែ​ខិតខំ​ថែរក្សា​​ ការពារសន្តិសុខសណ្តាប់ធ្នាប់ សាធារណៈ​ ជូន​ប្រជាពលរដ្ឋ​ ជាពិសេស​ការ​ចូលរួម​យ៉ាង​សកម្ម​ក្នុង​ការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ក្នុង​ភូមិសាស្ត្រ​ខេត្តកំពង់ចាម​។

អភិបាលខេត្ត​ ក៏បាន​ណែនាំ​ដល់​កងកម្លាំង​ទាំងអស់​ ឲ្យ​មានការ​ប្រុងប្រយ័ត្ន​ខ្ពស់​ ក្នុង​ការ​ថែទាំ​សុខភាព​របស់​ខ្លួន​ និង​ក្រុមគ្រួសារ​ ជាពិសេស​ត្រូវ​ អនុវត្តតាមនូវ​វិធានការ​ ៣ការពារ​ ៣កុំ​។

លោកថ្លែងកោតសរសើរបែបនេះ នៅថ្ងៃទី​២៨​ ខែកញ្ញា​ នេះ​ ក្ក្នុងឱកាសផ្តល់​អំណោយ​ជា​ថវិកា​ និង​សម្ភារ​ ជូន​កងកម្លាំង​ស្នងការដ្ឋាន​នគរបាល​ខេត្ត​ យោធា​ខេត្ត​ និង​កងរាជអាវុធហត្ថ​​​ខេត្ត​ ដើម្បី​ទ្រទ្រង់​ក្នុង​យុទ្ធនាការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​។

គួរ​បញ្ជាក់​ថា​ អំណោយដែលអភិបាលខេត្ត​ ផ្តល់​ជូន​កងកម្លាំង​ប្រដាប់​អាវុធ​​ទាំង៣​ ក្នុង​ខេត្តកំពង់ចាម​ រួមមាន​ ស្នងការដ្ឋាននគរបាលខេត្ត​ ទទួល​បាន​ថវិកា​ចំនួន​​ ១០លានរៀល​​ ម៉ាស​ ២ម៉ឺន​សន្លឹក​ និង​ទឹក​អាល់កុល​ ១៥០លីត្រ​ យោធា​ខេត្ត​ ទទួល​បាន​ថវិកា​ ១០លានរៀល​ ​ម៉ាស​ ២ម៉ឺន​សន្លឹក​ និង​ទឹក​អាល់កុល​១៥០លីត្រ​ និង​កងរាជអាវុធហត្ថ​ខេត្ត​ ទទួល​បាន​ថវិកា​ ចំនួន​១០លានរៀល​ ​ម៉ាស​ ១ម៉ឺន​សន្លឹក​ និង​ទឹក​អាល់កុល​ ចំនួន​​១៥០លីត្រ​ ផងដែរ​​៕SRP

ខេត្តត្បូងឃ្មុំ៖លោកជំទាវ ឱ វណ្ណឌី រដ្ឋលេខាធិការក្រសួងសុខាភិបាល បានថ្លែងអំពីគុណតម្លៃនៃការចាក់វ៉ាក់សាំងបង្ការជំងឺកូវីដ-១៩ ដែលជួយមិនឲ្យវិវត្តន៍ទៅរកស្ថានភាពធ្ងន់ធ្ងរ ក្នុងករណីបុគ្គលនោះឆ្លងជំងឺកូវីដ។ ក្នុងន័យនេះ មិនមែនមានន័យថា ចាក់វ៉ាក់សាំងហើយមិនឆ្លងជំងឺកូវីដ-១៩នោះទេ ពោលគឺនៅពេលចាក់វ៉ាក់សាំងហើយក៏ដោយ ត្រូវតែអនុវត្តនូវវិធានការ៣ការពារ និង៣កុំ ដើម្បីការពារ​ខ្លួន​យេីង​។ លោកជំទាវ ក៏បានវាយតម្លៃខ្ពស់ចំពោះរដ្ឋបាលខេត្តត្បូងឃ្មុំសម្រេច ក្នុងផែនការចាក់វ៉ាក់សាំងជូនប្រជាពលរដ្ឋផងដែរ។​

លោកជំទាវ បានបញ្ជាក់អំពីការខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចហ៊ុន សែន ក្នុងការដឹកនាំរៀបចំផែនការ និងដាក់ចេញនូវអភិក្រមផ្ការីក ក្នុងការចាក់វ៉ាក់សាំងជូនប្រជាពលរដ្ឋ រហូតសម្រេចបានលទ្ធផល ជិត៩៩ភាគរយ នៃផែនការ១០លាននាក់ ចំពោះប្រជាពលរដ្ឋដែលមានអាយុចាប់ពី១៨ឆ្នាំឡើង​។

ជំទាវថ្លែងយ៉ាងដូច្នេះនៅព្រឹកមិញនេះ​ ក្នុងពិធីបិទយុទ្ធនាការចាក់វ៉ាក់សាំងកូវីដ-១៩ ជុំទី១ ជូនប្រជាពលរដ្ឋ ដែលមានអាយុ១៨ឆ្នាំឡើង​ នៅខេត្តត្បូងឃ្មុំ។

ក្នុងនាមអាជ្ញាធរខេត្តត្បូងឃ្មុំ លោកជាម ច័ន្ទសោភ័ណ បានប្រកាសបង្ហាញជំហយ៉ាងមុតមាំ ក្នុងការបន្តប្រយុទ្ធ​ប្រឆាំង​នឹង​ជំងឺ​កូវីដ​-១៩​ ឲ្យអស់ពីលទ្ធភាព។ ដោយឡែកទីតាំងចត្តាឡីស័កក៏បានត្រៀមទុកមុនជាស្រេចបន្ថែមទៀត ពិសេសទីកន្លែងព្យាបាលអ្នកជំងឺកូវីដ-១៩ បានឲ្យក្រុមគ្រូពេទ្យបន្តកិច្ចការងារនេះ ទាំងថ្ងៃទាំងយប់ រួមទាំងសម្ភារបរិក្ខារពេទ្យ ឲ្យមានគ្រប់គ្រាន់ផងដែរ។

លោកជាម ច័ន្ទសោភ័ណ្ឌ ថាគិតត្រឹមថ្ងៃទី២៧ ខែកញ្ញា ម្សិលមិញលទ្ធផលខេត្តត្បូងឃ្មុំ សម្រេចបានលើការងារចាក់វ៉ាក់សាំងរួមមាន៖
*ទី១៖ អាយុ០៦-ក្រោម១២ឆ្នាំ ចំនួន៨៧,៨៣៨នាក់
*ទី២៖ អាយុ១២-ក្រោម១៨ឆ្នាំ ចំនួន១០១,៦៥០នាក់
*ទី៣៖ អាយុ១៨ឆ្នាំឡើង ចំនួន៥១៨,១៣០នាក់
ក្នុងនោះ ចាក់បានដូសទី១ ចំនួន៥៧៣,០៣៩ ស្មើនឹង ៨០,៩៨%, ចាក់បានដូសទី២ ចំនួន៣២២,៣០១ ស្មើនឹង ៤៥,៥៥% និងចាក់បានដូសទី៣ ចំនួន១៦,៣៥៣ ស្មើនឹង២, ៣១%៕SRP

ភ្នំពេញ៖អគ្គនាយកដ្ឋានពន្ធដារនានចេញសេចក្ដីជូនដំណឹងមួយរំលឹកឲ្យបង់ពន្ធ លើមធ្យោបាយដឹកជញ្ជូននិងយានជំនិះគ្រប់ប្រភេទប្រចាំឆ្នាំ២០២១៕ សូមអានលិខិតនៅខាងក្រោម៖

ខេត្តសៀមរាប៖លោក អ៊ុច បូរិទ្ធ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិ និងជាតំណាងដ៏ខ្ពង់ខ្ពស់ សម្តេច ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នៅថ្ងៃទី ២៨ ខែកញ្ញា ឆ្នាំ ២០២១នេះ បានអញ្ជើញធ្វើពិធីប្រគល់ និងទទួលវ៉ាក់សាំង ជូនដល់ប្រជាជន និងរដ្ឋាភិបាលនៃសាធារណរដ្ឋប្រជាធិបតេយ្យប្រជាមានិតឡាវ នៅក្នុងកាល:ទេស:ដែលប្រជាជនឡាវ កំពុងប្រឈមនិងជំងឺរាតត្បាតកូវិដ-១៩ដ៏សាហាវ។

ពិធីប្រគល់ និងទទួលវ៉ាក់សាំងស៊ីណូវ៉ាក់ទាំង២០ម៉ឺនដូស ធ្វើឡើងនៅច្រកព្រំដែនអន្តរជាតិត្រពាំងក្រៀល ក្នុងខេត្តស្ទឹងត្រែង ជាប់ព្រំដែនខេត្តចម្ប៉ាស័ករបស់ឡាវ។

នៅក្នុងឱកាសនោះ លោក ប៊ុនហ្វេង ភូមិម៉ាឡៃស៊ិត រដ្ឋមន្ត្រីក្រសួងសុខាភិបាល ក្នុងនាមរដ្ឋាភិបាលនិងប្រជាជនឡាវ សូមថ្លែងអំណរគុណយ៉ាងជ្រាលជ្រៅបំផុត ចំនួនរាជរដ្ឋាភិបាល និងប្រជាជនកម្ពុជា ដែលបានបរិច្ចាគវ៉ាក់សាំងការពារជំងឺកូវីដ-១៩ ចំនួន ២០ម៉ឺនដូស នាពេលនេះ ស្របពេលដែលប្រទេសឡាវ ក៏មិនខុសពីប្រទេសដទៃទៀតដែរ ដោយមានការឆ្លងជំងឺកូវីត១៩បំប្លែង ថ្មីយ៉ាងឆាប់រហ័សនៅក្នុងសហគមន៍។

លោក អ៊ុច បូរិទ្ធ តាងនាមឱ្យរាជរដ្ឋាភិបាលនិងប្រជាជនកម្ពុជា សម្តេច ហ៊ុន សែន បានផ្តាំផ្ងើនូវការសាកសួរសុខទុក្ខនិងប្រសិទ្ធិពរជ័យជូនដល់ប្រជាជន និងរដ្ឋា- ភិបាលឡាវជាមិត្ត សូមជួបប្រទះតែសុខុមាលភាព សុភមង្គល សម្បូររុងរឿង និងទទួលបានជ័យជំនះក្នុងការ អភិវឌ្ឍន៍ របស់ខ្លួន។

លោកបានបញ្ជាក់ថា ការរាតត្បាតនៃជំងឺកូវិដ-១៩ បានធ្វើឱ្យប៉ះពាល់យ៉ាងធ្ងន់ធ្ងរដល់គ្រប់ទិដ្ឋភាពនៃជីវិតរបស់មនុស្ស ដោយបាននាំមកនូវបញ្ហាប្រឈមជាច្រើន មិនត្រឹមតែសុវត្ថិភាព សុខភាពសាធារណៈ ប៉ុណ្នោះទេ ប៉ុន្តែថែមទាំងធ្វើឱ្យខូចខាតយ៉ាងខ្លាំង ដល់ខ្សែសង្វាក់ផ្គត់ផ្គង់ និងការចល័តរបស់ប្រជាជន ដែលជាហេតុធ្វើឱ្យសេដ្ឋកិច្ចគ្រប់ប្រទេសនៅជុំវិញពិភពលោកធ្លាក់ចុះ។ នៅក្នុងបរិបទនេះ ការឆ្លើយតបជាសមូហភាព និងសាមគ្គីភាពនៅក្នុងក្របខ័ណ្ឌទ្វេភាគី និងពហុភាគីមិនអាចខ្វះបានទេដើម្បីដោះស្រាយផលប៉ះពាល់ដល់ធ្ងន់ធ្ងរនៃជំងឺដល់សាហាវនេះ និងធានាបាននូវការស្តារឡើងវិញយ៉ាងឆាប់រហ័ស និងប្រកបដោយប្រសិទ្ធភាពនៅដំណាក់កាលក្រោយជំងឺរាលត្បាត។

លោកថា អំណោយមនុស្សធម៏នៅក្នុងឱកាសនេះជាសក្ខីភាពនៃមនោសញ្ចេតនាដ៏ជ្រាជ្រៅ សាមគ្គីភាពស្និទ្ធស្នាល និងកិច្ចសហប្រតិបត្តិការល្អប្រសើជាប្រពៃណីដែលថ្នាក់ដឹកនាំបក្ស និងរដ្ឋាភិបាលទាំងពីរ កម្ពុជា-ឡាវ បានពូនជ្រំដើម្បីផលប្រយោជន៍សម្រាប់ប្រទេសជាតិទាំងពីរ។

ជាមួយនឹងសេចក្តីប្រាថ្នា និងការប្ដេជ្ញាចិត្តរួមគ្នារបស់ប្រជាជន និងរដ្ឋាភិបាលទាំងពីរ លោក មានជំនឿជឿជាក់យ៉ាងមុតមាំថា ទំនាក់ទំនងជិតស្និទ្ធនិងកិច្ចសហប្រតិបត្តិការប្រកបដោយផ្លែផ្កាដែលមានស្រាប់រវាងប្រទេសទាំងពីរនឹងត្រូវបាពង្រឹងនិងពង្រីកបន្ថែមទៀត ដើម្បីជាផលប្រយោជន៍ទៅវិញទៅមក សម្រាប់ប្រជាជនយើងទាំងពីរ ក៏ដូចជាដើម្បីសន្តិភាព ស្ថេរភាព និងវិបុលភាពរួមនៅក្នុងតំបន់ និងពិភពលោក។

សូមបញ្ជាក់ថា កាលពីពេលកន្លងទៅនេះ កម្ពុជា ធ្លាប់បានបរិច្ចាគបរិក្ខាការពារជំងឺកូវីដ១៩ ជូនប្រទេសមួយចំនួនផងដែរដូចជា ប្រទេសមីយ៉ាន់ម៉ា  ទីម័រខាងកើត  ឡាវ វៀតណាម និងប្រទេសនេប៉ាល់៕SRP

ភ្នំពេញ៖សហភាពសហព័ន្ធអ្នកសារព័ត៌មានកម្ពុជា នៅថ្ងៃទី២៨ ខែកញ្ញា ឆ្នាំ២០២១នេះបានចេញសេចក្តីថ្លែងការណ៍ ក្នុងឱកាសទិវាអន្តរជាតិស្តីពី «សិទ្ធិទទួលព័ត៌មាន» ឆ្នាំ២០២១។

ក្នុងសេចក្ដីថ្លែងការណ៍បានបង្ហាញថា៖ថ្ងៃនេះ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) សូមចូលរួមជាមួយអ្នកសារព័ត៌មាននៅប្រទេសកម្ពុជានិងនៅជុំវិញពិភពលោក អបអរសាទរទិវាអន្តរជាតិស្តីពី «សិទ្ធិទទួលព័ត៌មាន» ដែលត្រូវបានមហាសន្និបាតអង្គការសហប្រជាជាតិលើកទី៧៤ ប្រកាសនៅថ្ងៃទី២៨ ខែកញ្ញា ឆ្នាំ២០១៩ ហើយសម្រាប់ឆ្នាំ២០២១នេះ ទិវាអន្តរជាតិស្តីពីសិទ្ធិទទួលព័ត៌មានរំលេចចេញនូវប្រធានបទ «សិទ្ធិដឹង៖ កសាងឱ្យប្រសើរឡើងវិញជាមួយនឹងសិទ្ធិទទួលព័ត៌មាន» ដោយសង្កត់បញ្ជាក់ថា សាធារណជនត្រូវការព័ត៌មានដែលពិតត្រឹមត្រូវ។ សហភាពសហព័ន្ធអ្នកសារព័ត៌មានកម្ពុជា សូមចូលរួមជាស្មារតីដូចតទៅ៖

ស.ស.ស.ក សូមយកឱកាសនេះសម្តែងនូវការគាំទ្រចំពោះការខិតខំប្រឹងប្រែងរបស់ ក្រសួងព័ត៌មាន និងភាគីពាក់ព័ន្ធ ដែលបានរួមគ្នារៀបចំសេចក្តីព្រាងច្បាប់ស្តីពី«សិទ្ធិទទួលព័ត៌មាន»។ យើងយល់ឃើញថា សង្គមជាទូទៅនិងសម្រាប់បរិបទប្រទេសកម្ពុជាផង ការបណ្តុះបាននូវវប្បធម៌ «ប្រជាធិបតេយ្យចូលរួម» គឺសំខាន់ណាស់ ពីព្រោះការចូលរួមពីសំណាក់ប្រជាពលរដ្ឋទូទៅ តាមរយៈសារព័ត៌មាន មិនត្រឹមតែអាចបង្កើតបាននូវបរិយាកាសសុខដុមរមនាក្នុងសង្គមជាតិប៉ុណ្ណោះទេ គឺថែមទាំងធ្វើឱ្យសកម្មភាពនៃការអភិវឌ្ឍ ប្រទេសជាតិលើគ្រប់វិស័យប្រព្រឹត្តទៅបានលឿនថែមទៀតផង។ «ប្រជាធិបតេយ្យចូលរួម» គឺមានតម្លៃល្អចំពោះសង្គមជាតិ ផ្ទុយពី «ប្រជាធិបតេយ្យប្រឈមមុខ» ដែលបង្កការបែកបាក់សាមគ្គីជាតិកាន់តែធ្ងន់ ប្រសិនបើបរទេសជំរុញពីក្រោយបន្ថែមទៀតនោះ។ ដូច្នេះ តម្លៃរបស់សារព័ត៌មាន មិនត្រឹមតែស្ថិតនៅលើពាក្យឯករាជ្យនោះទេ គឺស្ថិតលើការផ្សាយការពិត ពីព្រោះមានតែ «ព័ត៌មានពិត» ដែលមានតម្លៃសម្រាប់ការសម្រេចចិត្តត្រឹមត្រូវ សម្រាប់ការសង្គ្រោះជីវិតមនុស្ស និងសម្រាប់ដោះស្រាយបញ្ហានានារបស់សង្គម។ សិទ្ធិនៃការទទួលព័ត៌មាន សិទ្ធិនៃការប្រើប្រាស់ព័ត៌មាន ពិតជាត្រូវតែផ្សាភ្ជាប់ជាមួយនឹងក្រមសីលធម៌នៃការផ្សព្វផ្សាយ ការទទួលខុសត្រូវ និងបុព្វហេតុជាតិផងដែរ។ យើងក៏ត្រូវមានស្មារតីជាតិថា យើងប្រើប្រាស់ «សិទ្ធិទទួលព័ត៌មាន» ដើម្បីបុព្វហេតុនៃប្រទេសជាតិរបស់យើង មិនមែនដើម្បីយកព័ត៌មានទៅបម្រើឱ្យមនោគមន៍វិជ្ជាបរទេសណាឡើយ។

ស.ស.ស.ក សូមទាញការចាប់អារម្មណ៍ថា នៅក្នុងបរិបទសេដ្ឋកិច្ចសកលឌីជីថល គឺប្រទេសអ្នកមាន កាន់តែមានលទ្ធភាពនៅក្នុងការស្រូបទាញយកយ៉ាងលឿននូវផលប្រយោជន៍គ្រប់យ៉ាង ពីបណ្តាប្រទេសកំពុងអភិវឌ្ឍន៍ តាមរយៈប្រព័ន្ធអ៊ីនធឺណិត និងបច្ចេកវិទ្យាព័ត៌មានវិទ្យា។ អ្នកនយោបាយនៃប្រទេសជឿនលឿនទាំងនោះ មិនចង់ឱ្យប្រទេសកំពុងអភិវឌ្ឍន៍មានច្បាប់ជាតិ ដើម្បីគ្រប់គ្រងផលប្រយោជន៍សេដ្ឋកិច្ច តាមរយៈអ៊ីនធីណិត និងអនឡាញនោះទេ ដោយគេខិតខំបង្វែរថា ការបង្កើតច្បាប់អ៊ីនធឺណិត ឬច្បាប់នានាទាក់ទិននឹងព័ត៌មានវិទ្យា គឺជាការរារាំងសិទ្ធិសេរីភាពព័ត៌មានទៅវិញ។ យើងទាំងអស់គ្នាអាចសាកល្បងវាយតម្លៃ ថាតើក្នុងមួយថ្ងៃៗ មានលំហូរហិរញ្ញវត្ថុ (លុយ) របស់ប្រជាជនកម្ពុជាចំនួនប៉ុន្មាន ដែលត្រូវចំណាយលើការប្រើសេវាអ៊ីនធឺណិតនិងអនឡាញ? គឺរាប់ម៉ឺនដុល្លារក្នុងមួយថ្ងៃៗ។ តើលុយទាំងនោះ ធ្លាក់ត្រង់ទៅចំណូលជាតិ ឬហូរចេញដោយផ្ទាល់ទៅបរទេសដោយគ្មានឆ្លងកាត់ការបង់ពន្ធ? លើសពីនេះ យើងទាំងអស់គ្នាក៏គប្បីស្វែងយល់បន្ថែមថា ទិន្នន័យរបស់យើងម្នាក់ៗដែលបានបញ្ចូលទៅក្នុងអ៊ីនធឺណិត និងបណ្តាញសង្គមនានា ដែលមានប្រព័ន្ធផ្ទុកទិន្នន័យនៅឯបរទេស គឺយើងមិនមានលទ្ធភាពគ្រប់គ្រងទាំងស្រុងបាននោះទេ ដែលនេះជាក្តីបារម្ភដ៏ធំលើសុវត្ថិភាពព័ត៌មាន និងអធិបតេយ្យព័ត៌មាន។ នេះមិនទាន់រាប់បញ្ចូលករណីក្លែងបន្លំអត្តសញ្ញាណតាមអ៊ីនធឺណិត ដើម្បីការបោកប្រាស់ ការប្រមាថកាតទាន និងអំពើអាណាចារ ដែលប៉ះពាល់តម្លៃសង្គមជាច្រើនករណីនោះផង។ យើងចេះប្រើប្រាស់អ៊ីនធឺណិត ក៏ប៉ុន្តែយើងមិនបានដឹងសព្វគ្រប់ពីភាពគ្រោះថ្នាក់របស់វានោះឡើយ។

ស.ស.ស.ក ក៏សូមទាញការចាប់អារម្មណ៍ដែរថា បច្ចុប្បន្ននេះ ពិភពលោកកំពុងប្រឈមបញ្ហាធំ២គឺ៖ ការបន្តយាយីដោយជំងឺសកលកូវីដ-១៩ និងការប្រកួតប្រជែងគ្នាខាងភូមិសាស្ត្រនៃមហាអំណាច ដែលទាមទារឱ្យយើងទាំងអស់គ្នា ត្រូវតាមដានជាប់ជាប្រចាំ អំពីសភាពការណ៍វិវត្តន៍ប្រែប្រួលឥតឈប់ឈរ នៃបញ្ហាតំបន់និងពិភពលោក។ បញ្ហាធំទាំងពីរនេះនឹងបន្តវិវត្តន៍ទៅមុខ មានលក្ខណៈស្មុគស្មាញពិបាកព្យាករណ៍ ហើយពិបាកនឹងវាយតម្លៃពីទីបញ្ចប់របស់វា។ សម្រាប់ម្ចាស់នៃប្រទេសជាតិ សេចក្តីត្រូវការរបស់យើងគឺ ព័ត៌មានពិតដើម្បីបញ្ចៀស ដោះស្រាយ និងកែលម្អជីវភាពសង្គម។ ផ្ទុយទៅវិញ សម្រាប់បរទេស គេមានលទ្ធភាពបង្កើតព័ត៌មាន និងមានលទ្ធភាពពង្រីកការផ្សព្វផ្សាយ មិនត្រឹមការយល់ដឹងប៉ុណ្ណោះទេ ប៉ុន្តែក៏មានលទ្ធភាពផ្សព្វផ្សាយដើម្បីបំភ័ន្តនិងបំផ្លាញផងដែរ ទាំងការបំផ្លាញនូវស្មារតីសាមគ្គីឯកភាពជាតិ និងអាចឈានទៅបំផ្លាញស្មារតីសាមគ្គីអន្តរជាតិផងដែរ។ នេះគឺជាសមរភូមិព័ត៌មានដ៏គ្រោះថ្នាក់ក្នុងបរិបទនៃសង្គ្រាមភូមិសាស្ត្រនយោបាយ និងបច្ចេកវិទ្យាព័ត៌មានវិទ្យា ដែលយើងត្រូវមានស្មារតីរលឹកដឹងជាប្រចាំ និងការពារផលប្រយោជន៍ជាតិរបស់យើងជានិច្ច។

ស.ស.ស.ក សូមលើកទឹកចិត្តដល់អ្នកសារព័ត៌មាន អ្នកនិយមប្រើប្រាស់បណ្តាញសង្គម និងសាធារណជន ឲ្យបន្តចូលរួមប្រើប្រាស់សិទ្ធិទទួលព័ត៌មាន ក្នុងឧត្តមគតិផ្សព្វផ្សាយដើម្បីរួមចំណែកបង្កើនចំណេះដឹងអំពី ការពារសុវត្ថិភាពអាយុជីវិតពីជំងឺកូវីដ-១៩ និងបន្តផ្សព្វផ្សាយដើម្បីបណ្តុះ «ស្មារតីជាតិនិយម» របស់ប្រជាជាតិយើងឱ្យកាន់តែរឹងមាំ។ សូមបន្តប្រើប្រាស់លំហរសេរីភាពព័ត៌មាន ដើម្បីចូលរួមផ្សព្វផ្សាយអំពីតម្លៃ «សន្តិភាព» និងមរតកវប្បធម៌ល្អប្រពៃថ្លៃថ្នូររបស់ប្រជាជាតិយើង ទៅកាន់ពិភពលោក។ សកម្មភាពរបស់យើងថ្ងៃនេះ មានគុណតម្លៃដ៏ធំធេងក្នុងការលើកតម្កើងតម្លៃជាតិរបស់យើង សម្រាប់យើងទាំងអស់គ្នាទាំងនៅបច្ចុប្បន្ន និងតទៅអ្នកជំនាន់ក្រោយរបស់យើង។

ស.ស.ស.ក សូមចូលរួមអបអរសារទរជាថ្មីម្តងទៀតជាមួយប្រជាជនកម្ពុជា ជាពិសេសសូមថ្លែងនូវការកោតសរសើរនិងសូមអរគុណចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ព្រមទាំងដៃគូពាក់ព័ន្ធ ដែលបានរួមគ្នាប្រកបដោយស្មារតីទទួលខុសត្រូវខ្ពស់ក្នុងវិធានការបង្ការ ទប់ស្កាត់ ព្យាបាល និងការផ្តល់វ៉ាក់សាំងប្រឆាំងជំងឺកូវីដ-១៩។ នៅប្រទេសកម្ពុជា ការខិតខំរបស់រាជរដ្ឋាភិបាលកម្ពុជា ដ៏គួរឱ្យកោតសរសើរនោះគឺ បានធ្វើឱ្យប្រជាជនជិត១០០% ទទួលបានវ៉ាក់សាំងការពារជំងឺកូវី-១៩។ លទ្ធផលនេះ គឺជាសក្ខីភាពបង្ហាញពីការចូលរួមរបស់ប្រជាជនរួមជាមួយ រាជរដ្ឋាភិបាល និងឆ្លុះបង្ហាញពី «សមត្ថភាពជាតិ យើងក្នុងការជម្នះការលំបាក» ដើម្បីអនាគតដ៏ប្រសើររួមគ្នាតទៅមុខ៕SRP

ខេត្តកំពង់ស្ពឺ៖លោកហ៊ុន ម៉ានី បានមានប្រសាសន៍ថាការបើកដំណើរការដំណើរការសាលារៀនមួយចំនួនទូទាំងប្រទេសនាពេលថ្មីៗនេះ គឺជាសញ្ញាវិជ្ជមានថ្មីមួយចំពោះសង្គមកម្ពុជា ដែលកើតឡើងដោយសារ៖

➢ ការអនុវត្តគោលនយោបាយដ៏ត្រឹមត្រូវរបស់រាជរដ្ឋាភិបាល ពិសេសការអនុវត្តយុទ្ធនាការជាតិចាក់វ៉ាក់សាំងជូនប្រជាជនទូទាំងប្រទេសដើម្បីបង្កើតភាពស៊ាំក្នុងសហគមន៍ ដែលគិតត្រឹមថ្ងៃទី២៤ ខែកញ្ញា ឆ្នាំ២០២១ មានប្រជាជនរាប់ចាប់ពីកុមារអាយុ ៦ឆ្នាំឡើងទៅចំនួនសរុប ១២,៩៥០,១៤៩ (ស្មើនឹង ៨០,៩៤% នៃប្រជាជនសរុប ១៦លាននាក់) បានទទួលវ៉ាក់សាំងបង្ការជំងឺកូវីដ១៩ យ៉ាងហោចណាស់១ដូស។

➢ ការខិតខំប្រឹងប្រែងរបស់រាជរដ្ឋាភិបាលក្នុងការប្រយុទ្ធនឹងជំងឺកូវីដ១៩ ក្នុងរយៈពេលប្រមាណ៧ខែមកនេះ (ព្រឹត្តិការណ៍សហគមន៍ ២០កុម្ភៈ) និងការចូលរួមយ៉ាងសស្រាក់សស្រាំពីមហាជន ប្រជាជន មន្ត្រីរាជការ និងកងកម្លាំងទាំងអស់ក្នុងការអនុវត្តវិធានការ «៣កុំ ៣ការពារ» ដែលបានផ្តល់ផ្លែផ្កាគួរជាទីកត់សម្គាល់រហូតការឈានទៅដល់ការបើកសាលារៀនមួយចំនួនឡើងវិញ ហើយ សង្ឃឹមថានាពេលខាងមុខ សង្គមកម្ពុជាទាំងមូលនឹងវិលត្រឡប់មកសភាពមុនការរីករាលដាលនៃជំងឺកូវីដ១៩ ដែលអាចអនុញ្ញាតឱ្យបងប្អូនប្រជាពលរដ្ឋអាចប្រកបរបរទទួលទានចិញ្ចឹមជីវិតដូចធម្មតាវិញ។

លោកថ្លែងបែបនេះក្នុងឱកាសដឹកនាំគណៈប្រតិភូគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា ចុះបំពេញបេសកកម្មទៅកាន់ខេត្តកំពង់ស្ពឺក្នុងគោលបំណង ពិនិត្យ ស្ថានភាពនៃការបង្រៀន និងរៀនតាមបណ្តុំនៅតាមគ្រឹះស្ថានសិក្សាសាធារណៈ និងឯកជនក្នុងខេត្ត នៅថ្ងៃទី ២៧ ខែកញ្ញា ឆ្នាំ ២០២១ម្សិលមិញ។

លោកហ៊ុន ម៉ានី ប្រធានគណៈកម្មការទី៧ ជំនួសមុខឱ្យថ្នាក់ដឹកនាំនៃរដ្ឋសភា បានថ្លែងកោតសរសើរ និងវាយតម្លៃខ្ពស់ចំពោះគណៈអភិបាល ថ្នាក់ដឹកនាំមន្ទីរអប់រំ យុវជន និងកីឡា ជាពិសេស លោកគ្រូ អ្នកគ្រូ ដែលបានខិតខំបំពេញភារកិច្ចការពារអាយុជីវិត សុខសុវត្ថិភាពប្រជាជន ជាពិសេសបន្តការងារបង្រៀនសិស្សទោះស្ថិតក្នុងកាលៈទេសៈលំបាកយ៉ាងណាក៏ដោយ។ ដោយសារស្ថានភាពនៃការឆ្លងរីករាលនៃជំងឺកូវីដ១៩ ស្ថិតក្នុងកម្រិតអាចគ្រប់គ្រងបាន ជាមួយនឹងការចាក់វ៉ាក់សាំងជូនដល់កុមារ និងយុវវ័យចាប់ពីអាយុ១២ ដល់១៧ឆ្នាំ និងថ្មីៗនេះបានចាក់ជូនកុមារចាប់ពីអាយុ៦ឆ្នាំ ដល់អាយុ១១ឆ្នាំ ដែលអាចបង្កើនបាននូវភាពស៊ាំនៅក្នុងសហគមន៍ ទើបរាជរដ្ឋាភិបាលបានសម្រេចអនុញ្ញាតឱ្យពិនិត្យពិចារណាបើកដំណើរការឡើងវិញជាដំណាក់កាលនូវគ្រឹះស្ថានសិក្សាចំណេះទូទៅ នៅតាមបណ្តា ក្រុង ស្រុក ខណ្ឌ តាមទីតាំងភូមិសាស្រ្តដែលមានហានិភ័យទាប ចាប់ពីថ្ងៃ១៥ ខែកញ្ញា ឆ្នាំ២០២១ ដោយតម្រូវឱ្យអាជ្ញាធររាជធានី ខេត្ត ធ្វើការវាយតម្លៃតាមស្ថានភាពជាក់ស្តែង និងត្រូវអនុវត្តឱ្យបាននូវគម្លាតសុវត្ថិភាព និងវិធានការសុខាភិបាលចាំបាច់នានា ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ នាយករដ្ឋមន្ត្រីនៃព្រះរាជាណាចក្រកម្ពុជា៕SRP

ខេត្តសៀមរាប៖ការស្ថាបនាផ្លូវនៅក្រុងសៀមរាប ដោយលោកខេង សុមេធ នៅតែសម្រេចតាមផែនការ បើទោះបីមាននៅខេត្តសៀមរាបបានជួបប្រទះនឹងបញ្ហាជំងឺកូវីដក៏ដោយ។

លោក វង់ សំអាត មន្ត្រីកងវិស្វកម្ម របស់លោកខេង សុមេធ បានឲ្យដឹងនៅព្រឹកថ្ងៃទី២៨ខែកញ្ញានេះថា ផ្លូវចំនួន៨ខ្សែ ដែលទទួលស្ថាបនា ដោយកងវិស្វ័កម្មតេជោហ៊ុន សែនសៀមរាប របស់នាយឧត្តមសេនីយ៍ខេង សុមេធហៅតាភ្នំ១០០លើសសម្រេចបានលទ្ធផលដូចខាងក្រោម ទោះស្ថិតក្នុងបញ្ហាប្រឈមនិងការបិទខ្ទប់ទូទាំងខេត្តដើម្បីការពារការឆ្លងរាតត្បាតនៃ កូវីដ១៩ក៏ដោយ ក៏កងកម្លាំងនៅតែជំនះធ្វើដើម្បីសម្រេចតាមផែនការ (ចូលសមរភូមិតែងតែមានរបួសខ្លះហើយ )។

ជាមួយនឹងការស្ថាបនាផ្លូវនៅក្រុងសៀមរាប ដោយកងស្វ័កម្មតេជោហ៊ុន សែនសៀមរាបនេះ លោកវង់ សំអាត បានបង្ហាញលទ្ធផលថា
-ផ្លូវ អ៊ីអ៊ិន ០១ សម្រេចបាន ៦៤,៩៤ភាគរយ។
-ផ្លូវ អ៊ីអ៊ិន ០២ សម្រេចបាន ៨១,៨៥ភាគរយ។
– ផ្លូវ អ៊ីអ៊ិន ០៣ សម្រេចបាន ២៥,៩៤ភាគរយ។
– ផ្លូវ អ៊ីអ៊ិន ០៤ សម្រេចបាន ៩០,០៧ភាគរយ។
– ផ្លូវ អ៊ីអ៊ិន ០៥ សម្រេចបាន៩៩,៦៥ ភាគរយ។
– ផ្លូវ អ៊ីអែស ០៤ សម្រេចបាន៧៧,៨១ភាគរយ។
– ផ្លូវ អ៊ីអែស ១៤ សម្រេចបាន៩១,២៩ ភាគរយ និង
– ផ្លូវ ដាប់ប៊ែលយូ ០៣ សម្រេចបាន ៥៦,២១ ភាគរយ។ លទ្ធផលសម្រេចទាំងនេះគិតត្រឹមពាក់កណ្តាលខែកញ្ញាប៉ុណ្ណោះ។

សូមរំឭកថាកាលពីថ្ងៃចន្ទ ទី៣០ ខែវិច្ឆិកា ឆ្នាំ២០២០ សម្ដេចតេជោ ហ៊ុន សែន នាយករដ្ឋមន្ត្រី បានអញ្ជើញបើកការដ្ឋានសាងសង់ និងកែលម្អផ្លូវទាំង ៣៨ខ្សែ ក្នុងក្រុងសៀមរាប ខេត្តសៀមរាប។

សូមជម្រាបថាផ្លូវទាំង៣៨ខ្សែនេះ មានប្រវែងសរុប ១០៨.៧៤គីឡូ ម៉ែត្រ ដោយ គ្រោង ប្រើប្រាស់ ថវិកាជាតិសរុបប្រមាណ ១៤០លានដុល្លារ អាមេរិក និងថវិកា ជាង ៩លានដុល្លារអាមេរិកទៀត សម្រាប់ ការងារ ចាំបាច់ ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ដែលនៅក្រៅ គម្រោង សាងសង់ ខ្សែផ្លូវ ទាំង ៣៨នេះ។

តាមរយៈគម្រោងសាងសង់ផ្លូវទាំង៣៨ខ្សែនេះ នឹងធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទេសចរណ៍ ដ៏មាន សក្តា នុពល ដែលត្រូវបានរាជរដ្ឋាភិបាលកម្ពុជាកំណត់ជាតំបន់ស្នូលនៃប៉ូល អភិ វឌ្ឍ ជាតិ ជា គោលដៅ ទេសចរណ៍ វប្បធម៌ ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរ ដល់ការពារ និងកែលម្អបរិស្ថាន ផាសុខភាពរបស់ប្រជាពលរដ្ឋ និងការរៀបចំ អភិវឌ្ឍ ទីក្រុងឆ្លាតវៃ (Smart City) ផងដែរ៕SRP

ខេត្តសៀមរាប៖មនុស្សជិត១០នាក់ត្រូវបានសមត្ថកិច្ចធ្វើការឃាត់ខ្លួនករណីល្មេីសវិធានការនឹងប្រេីប្រាស់សារធាតុញៀន ម្នាក់ប៉ូលិស និងអាជីវករលក់ដីឡូតិ៍ផងដែរ។

ការឃាត់ខ្លួនធ្វើឡើងនៅវេលាម៉ោង២២និង៣០នាទី ថ្ងៃអាទិត្យ ទី២៦ ខែកញ្ញា ឆ្នាំ២០២១ ស្ថិតនៅចំណុចភូមិស្វាយដង្គំ សង្កាត់ស្វាយដង្គំ ក្រុងសៀមរាប ខេត្តសៀមរាប ដោយកម្លាំងមូលដ្ឋានកងរាជអាវុធហត្ថ ក្រុងសៀមរាប ដឹកនាំផ្ទាល់ដោយលោកថា ដាលុច មេបញ្ជាការរងអាវុធហត្ថខេត្ត ទទួលការងារស្រាវជ្រាវ នឹងបង្រ្កាបបទល្មើស និងលោកប្រាក់ វណ្ណៈ មេបញ្ជាការមូលដ្ឋាន អាវុធហត្ថក្រុងសៀមរាប សហការជាមួយអធិការដ្ឋាននគរបាលក្រុងសៀមរាប តាមការណែនាំពីលោកប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប តាមបញ្ជា ព្រះរាជអជ្ញាសាលាដំបូងខេត្តសៀមរាប។

ប្រភពពីសមត្ថកិច្ចក្នុងហេតុការណ៍បានឲ្យដឹងថា ការចុះបង្រ្កាបករណីល្មេីសវិធានការរដ្ឋបាល(ជួបជុំផឹកស៊ី)នឹងប្រេីប្រាសនូវសារធាតុញៀននេះលទ្ធផលឃាត់ខ្លួនជនសង្ស័យមួយចំនួន៖ ១.ឈ្មោះ សេង រតនា ភេទប្រុស អាយុ៣៨ឆ្នាំ មុខរបរនគរបាល។

២.ឈ្មោះ សន ធា ភេទប្រុស អាយុ៣៤ឆ្នាំ មុខរបរលក់ដីឡូត៍។ ៣.ឈ្មោះ គង់ រតនា ភេទស្រី អាយុ២០ឆ្នាំ មុខរបរនៅផ្ទះ។ ៤.ឈ្មោះ ចាយ សុធា ភេទប្រុស អាយុ៣៨ឆ្នាំ មុខរបរលក់ដីឡូតិ៍ ៥. ឈ្មោះ ទី សីហា ភេទប្រុស អាយុ៣២ឆ្នាំមុខរបរនៅផ្ទះ។ ទី៦និងទី៧ មិនត្រូវបានបង្ហាញឈ្មោះនោះទេ។

ប្រភពបានបន្តថា ប្រតិបត្តិការនេះសមត្ថកិច្ចបានដកហូតវត្ថុតាងរួមមាន៖១.ម្សៅពណ៌សថ្លាសារធាតុញៀនK ចំនួន១កញ្ចប់តូច/២.ថ្នាំប្រភេទគ្រាប់សញ្ញាលេខ៥ចំនួន០១គ្រាប់ពណ៌ផ្កាឈូក/
៣.ថ្នាំគ្រាប់ក្រវីពណ៌ប្រផេះរូបខ្លាឃ្មុំចំនួនកន្លះគ្រាប់។ទូរស័ព្ទចំនួន១០គ្រឿង។

បច្ចុប្បន្ន:ជនសង្ស័យ នឹង វត្ថុតាងបានបញ្ជូនទៅការិយាលយ័ជំនាញកងរាជអាវុធហត្ថខេត្តសៀមរាប ដើម្បីបន្តនិតិវិធី៕SRP