ខេត្តសៀមរាប៖ក្រោយពីទទួលបានសេចក្ដីណែនាំរបស់ក្រសួងធម្មការ និងសាសនា ស្តីពីការវាយ គង ជួង រគាំង ទូងស្គរ តាមវត្តអារាម ដើម្បីចូលរួមទប់ស្កាត់ការរាលដាលនៃជំងឺកូវីដ១៩ ក្នុងសហគមន៍ នៃព្រឹត្តិការណ៍២០កុម្ភៈ កាលពីល្ងាចថ្ងៃទី២៣ ខែមីនា ឆ្នាំ២០២១រួចមក នៅព្រឹកថ្ងៃទី២៤ខែមីនា ឆ្នាំ២០២១នេះ នៅតាមវត្តអារាមនានាក្នុងខេត្តសៀមរាប បានចាប់ផ្តើមអនុវត្តចាប់ពីម៉ោង៥ទាបភ្លឺ ថ្ងៃទី២៤ ខែមីនា ឆ្នាំ២០២១នេះ រហូតដល់បញ្ចប់ព្រឹត្តិការណ៍សហគមន៍២០កុម្ភៈ។

ព្រះតេជគុណ វន ឡាំ គ្រូសូត្រឆ្វេង វត្តស្វាយរមៀត មានសង្ឃដីកាថា បន្ទាប់ពីទទួលបានសេចក្ដីណែនាំនេះហើយ នៅវេលាម៉ោង៥ទាបភ្លឺព្រឹកមិញនេះ វត្តស្វាយរមៀត បានអនុវត្តដោយការវាយគងផង វាយជួងផង និងទូងស្គរផង ដើម្បីចូលរួមរាជរដ្ឋាភិបាលកម្ពុជា ក្នុងការក្រើនរំលឹកដល់ពុទ្ធបរិស័ទគ្រប់ៗរូបឱ្យបង្កើនការប្រុងប្រយ័ត្នចំពោះការឆ្លងរីករាលដាលនៃមេរោគកូវីដ-១៩ ដោយអនុវត្តនូវវិធានការ “៣ការពារ” និង “៣កុំ” ។

ព្រះតេជគុណបន្តថា ជាទំនៀមទម្លាប់ខ្មែរពីបុរាណមកដល់បច្ចុប្បន្ននេះ ការវាយជួង និងទូងស្គរតាមវត្តអារាមនានានៅតែជាជំនឿមួយដែលព្រះសង្ឃ និងប្រជាពុទ្ឋបរិស័ទតែងតែជឿ និងអនុវត្តតៗមក ដើម្បីពញ្ញាក់ស្មារតីអ្នកភូមិស្រុក បានដឹងពីហេតុការណ៍មិនល្អ គ្រោះភ័យចោរចូលភូមិ ឬមានបញ្ហាអ្វីផ្សេងៗ រួមទាំងការអបអរសាទរនូវសមិទ្ឋផលនានា ឬក៍ជោគជ័យផ្សេងៗក្នុងមូលដ្ឋានស្រុកភូមិ និងទីអារាមនានាផងដែរ។

ព្រះតេជគុណបន្តថា ដើម្បីទប់ស្កាត់ ការឆ្លងរីករាលដាលនៃមេរោគកូវីដ-១៩នេះ នៅវត្តស្វាយរមៀតតែងតែបានណែនាំឱ្យព្រះសង្ឃក៏ដូចជាពុទ្ធបរិស័ទ្ធអនុវត្តជាប្រចាំនូវវិធានការ “៣ការពារ” និង “៣កុំ”៕SRP

«លោកអ៊ុន ចាន់ដា អភិបាលខេត្តកំពង់ចាម ឈរថ្លែងសារកន្លង ក្នុងពេលចុះតាមមូលដ្ឋាន»

ខេត្តកំពង់ចាម៖ករណីព័ត៌មានថាមានល្បែងស៊ីសងជល់មាន់  នៅភូមិព្រែករំដេង ឃុំព្រែករំដេង ស្រុកស្រីសន្ធរ អភិបាលខេត្តកំពង់ចាម បានបញ្ជាឲ្យប៉េអឹមចុះទៅបង្ក្រាបហើយ។

លោកអ៊ុន ចាន់ដា អភិបាលខេត្តកំពង់ចាម បានឲ្យដឹងថា« ខ្ញុំអោយមេប៉េអឹមឆែកដែរ  ប៉ុន្តែ ថាមិនមានដែរ» លោកថា«ដាក់កម្កាំងប៉េអឹមទៅម្តងទៀត»។

សូមរំលឹកថារយ:ពេលប៉ុន្មានថ្ងៃមុននេះ ស្នងការខេត្តកំពង់ចាម លោកឯម កុសល បានបញ្ជនគរបាលឲ្យចុះស្រាវជ្រាវ បង្ក្រាបទីតាំងជល់មាន់ភ្នាល់ដាក់ប្រាក់ នៅចំណុចខាងលើ។ ប៉ុន្តែកម្លាំងសមត្ថកិច្ចបានចុះទៅដល់ពិនិត្យឃើញថា ពុំមានសកម្មភាពលេងល្បែងជល់មាន់ ដូចការចុះផ្សាយរបស់គេហទំព័រ ម្ចាស់ទន្លេមេគង្គ នោះឡើយ ហើយតាមការពិនិត្យស្ថានភាពទីតាំងខាងលើ គឺមានសភាពចាស់យូរហើយ។

របាយការណ៍របស់អាជ្ងាធរពាក់ព័ន្ធបានឲ្យដឹងថា៖ កន្លងមកនៅចំណុចខាងលើ ធ្លាប់បានឃើញ គេមកលួចលេងល្បែង ជល់មាន់ ពីរមួយគូ ទៅពីរគូ  ហើយក៏ឈប់លេងទៅវិញ ដោយសមាសភាព ដែលមកលេង ភាគច្រើនជាអ្នកមកពីចម្ងាយ។ ប៉ុន្តែត្រូវបានសមត្ថកិច្ចចុះមកបង្ក្រាបជាច្រើនលើ។ រហូតដល់បច្ចុប្បន្ននេះពុំមានការលួចលេងល្បែងជល់មាន់ទៀតនោះទេ  ហើយទីតាំងនេះសមត្ថកិច្ចមូលដ្ឋាន បានដាក់កម្លាំងចុះល្បាតត្រួតពិនិត្យរៀងរាល់ថ្ងៃផងដែរ។

ពាក់ព័ន្ធនឹងកិច្ចប្រតិបត្តិការស្រាវជ្រាវ ខាងលើនេះ លោកសុខ យ៉េន អធិការនគរបាលស្រុក បានទូរស័ព្ទទៅម្ចាស់  គេហទំព័រ ម្ចាស់ទន្លេមគង្គ ដើម្បីស្នើសុំឲ្យមកចង្អុលបង្ហាញពីទីតាំង និងចូលរួមក្នុងកិច្ចប្រតិបត្តិការ ជាមួយសមត្ថកិច្ចប៉ុន្តែ ម្ចាស់គេហទំព័រ សារព័ត៌មាននេះ បានបដិសេធ ដោយឆ្លើយថា ជាប់រវល់នៅឆ្ងាយ មិនអាចចូលរួមបានទេ។

ប៉ុលិសខេត្តកំពង់ចាម  សុំអំពាវនាវដល់សាធារណជន ពិសេសបណ្ដាញទំនាក់ទំនងសង្គម សុំកុំមានការយល់ច្រឡំ ចំពោះព័ត៌មានក្លែងក្លាយផ្ទុយពីការពិតនេះ និងសូមចៀសវាងការចែករំលែកបន្ត ដែលអាចបង្កការលំបាកក្នុងការស្រាវជ្រាវរបស់ជំនាញ ដើម្បីនាំខ្លួនជនទុច្ចរិតខាងលើមកអនុវត្តនីតិវិធី និងក៏អាចប្រឈមមុខចំពោះការស្រាវជ្រាវ របស់មន្ត្រីជំនាញផងដែរ។

សូមជម្រាបថាសារព័ត៌មានគេហទំព័រ ម្ចាស់ទន្លេមេគង្គ កាលពីថ្ងៃទី១៨ ខែមីនា ឆ្នាំ២០២១ ចុះផ្សាយមានខ្លឹមសារថា៖ (សង្វៀនជល់មាន់មួយកន្លែង នៅភូមិព្រែករំដេង ឃុំព្រែករំដេង ស្រុកស្រីសន្ធរ ខេត្តកំពង់ចាម មានផ្លូវចូលពីភូមិវាលស្បូវ ឃុំឬស្សីស្រុក ស្រុកស្រីសន្ធរ ខេត្តកំពង់ចាម មានចម្ងាយប្រហែលជា៣គីឡូម៉ែត្រ បើកលេងរាល់ថ្ងៃគ្មានអ្នកណាហ៊ានចុះបង្ក្រាបឡើយ)។ បើទោះបែបនេះក្ដីស្នងការខេត្តកំពង់ចាម បានធ្វើការបដិសេធច្រានចោលនូវព័ត៌មានរបស់ម្ចាស់ទន្លេមេគង្គ ថាជាព័ត៌មានមិនពិត។

ទោះជាយ៉ាងណានៅថ្ងៃទី២៤ ​ខែមីនា ឆ្នាំ២០២១នេះ លោកគឹម ហ៊ាប ម្ចាស់ទន្លេមេគង្គ បានអះអាងថា តាមការពិត ស្នងការខេត្តកំពង់ចាម និងអធិការស្រុកស្រីសន្ធរ ជាការរៀបចំឆាកល្ខោន គឺទីតាំងខាងលើ នៅតែមានល្បែងជន់មាន់ដដែល។ សំឡេងលោកគឹម ហ៊ាប៖

«លោក សោ សវឿន មេបញ្ចាការកងរាជអាវុធហត្ថខេត្តកំពង់ចាម»«លោកឯម កុសល ស្នងការប៉ូលិសខេត្តកំពង់ចាម»

ភ្នំពេញ៖នាយករដ្ឋមន្ត្រីហ៊ុន សែន នៅថ្ងៃទី ២៤ ខែមីនា ឆ្នាំ ២០២១នេះ បានបន្តអំពាវនាវដល់ពលរដ្ឋឲ្យចូលរួមពាក់ម៉ាសគ្រប់គ្នា ហើយបើមិនមានការចាំបាច់កុំចេញពីផ្ទះ។

ទំព័រហ្វេសប៊ុកនាយករដ្ឋមន្ត្រីបានសរសេរថា៖អរគុណបងប្អូនជនរួមជាតិ ដែលបានធ្វើតាមការណែនាំ របស់ក្រសួងសុខាភិបាល ក្នុងការទប់ស្កាត់ជំងឺឆ្លងរាតត្បាតកូវីដ-១៩ និងអរគុណចំពោះការយោគយល់ របស់បងប្អូន ក្នុងពេលដែលប្រទេសជាតិយើង កំពុងស្ថិតក្នុងស្ថានភាពប្រុងប្រយ័ត្នខ្ពស់។

ក្នុងសារលើទំព័រហ្វេសប៊ុកដដែលបានបន្តថា «ដោយសារពេលនេះជំងឺកូវីដ-១៩ កំពុងវាយលុកក្នុងសហគម សូមបងប្អូនកុំចេញក្រៅផ្ទះប្រសិនបើគ្មានការចាំបាច់។ ត្រូវតែពាក់ម៉ាសដាច់ខាត និងត្រូវឧស្សាហ៍ដុសលាងសម្អាតដៃជាមួយសាប៊ូ, ចិល, ឬទឹកអាកុល។ ប្រសិនបើចាំបាច់ត្រូវជួបមនុស្សនៅខាងក្រៅ ត្រូវរក្សាគម្លាតអោយឆ្ងាយពីគ្នាយ៉ាងហោចណាស់ ១ម៉ែត្រកន្លះ។ ចំពោះអ្នកធ្វើចត្តាឡីស័កគឺត្រូវធ្វើអោយបានត្រឹមត្រូវហ្មត់ចត់បំផុតតាមការណែនាំរបស់ក្រសួងសុខាភិបាល»។

នៅក្នុងសារនេះនាយករដ្ឋមន្ត្រី ក៏បានសូមជូនពរបងប្អូនជនរួមជាតិ ចៀសផុតពីជំងឺឆ្លងកូវីដ-១៩ ហើយសូមបន្តអនុវត្តន៍តាមវិធានការ ៣ការពារ និង ៣កុំអោយបានត្រឹមត្រូវខ្ជាប់ខ្ជួនផងដែរ៕SRP

ភ្នំពេញ៖លោកឌី វិជ្ជា និងលោកជំទាវ ហ៊ុន ម៉ាណា ក្រោយពីបានទទួលដំណឹង ពីជីវភាពខ្វះខាតចំពោះមុខ ក្នុងរយៈពេលរដូវកូវីដ-១៩របស់លោកគ្រូតៃខ្វាន់ដូ នភនារសៀលថ្ងៃទី ២២ ខែមីនា ឆ្នាំ២០២១ បានចាត់អោយលោក ជិន ប៊ុនធឿននិងក្រុមការងារមនុស្សធម៌នាំយកអំណោយទៅប្រគល់ជូនលោក ឌួង គន្ធី អាយុ ៥៨ឆ្នាំ និងភរិយា ព្រមទាំងកូនៗចំនួន ០២នាក់ គឺកូនស្រីច្បងអាយុ១៦ឆ្នាំ កំពុងរៀនថ្នាក់ទី១១ និងកូនប្រុសអាយុ១៣ឆ្នាំ កំពុងរៀនថ្នាក់ទី៨ រស់នៅភូមិក្រពើហារខាងលិច សង្កាត់ព្រែកឬស្សី ក្រុងតាខ្មៅ ខេត្តកណ្ដាល។

សូមបញ្ជាក់ផងដែរថា តាំងពីឆ្នាំ២០០៨មក លោក ឌួង គន្ធី ទទួល បង្ហាត់សិស្សទទួលបានប្រាក់កម្រៃបន្តិចបន្តួច និងក្រៅពីនេះ គាត់រត់ម៉ូតូឌុបរកចំណូលបន្ថែម។ ចំណែកឯប្រពន្ធឈ្មោះ អ៊ុ សុចិន្តា ធ្លាប់ធ្វេីការក្រុមហ៊ុន តែដោយសារគាត់មានជំងឺស្ត្រីជាប់ជាប្រចាំមានការអាក់ខានទៅធ្វេីការមិនទៀងទាត់ក៏ត្រូវក្រុមហ៊ុនបញ្ឈប់ ។ បច្ចុប្បន្នគ្រួសារមួយនេះរស់នៅក្នុងផ្ទះឈើទ្រុឌទ្រោមខ្លាំងសង់ពីបំណែកក្តា ឈេី និងស័ង្កសីចាស់ៗតែប៉ុណ្ណោះ។
ម្យ៉ាងវិញទៀត ប្រាក់ដែលលោករកបាន គឺសម្រាប់ផ្គត់ផ្គង់ជីវភាពប្រចាំថ្ងៃ អោយកូនៗទៅរៀនសូត្រ ហើយត្រូវចំណាយមួយចំនួនលើការជួសជុលផ្ទះសំបែងផងដែរ។

អំណោយដែលផ្តល់ជូនគ្រួសារលោកនៅពេលនេះរួមមាន៖
០១-ថវិកា ២លានរៀល
០២-ត្រីខ ០១កេសធំ
០៣-មី ០៥កេសតូច
០៤-អង្ករ ១០០គីឡូ
០៥-ភួយ ០២
០៦-ខ្នើយ ០២
០៧-ម៉ុង ០២
០៨-សាប៊ូ ១២ដុំតូច
០៩-វិទ្យុ ១ និង ថ្មពិល ០៤គ្រាប់
១០-តែ ១០កញ្ចប់
១១-ស្កសរ ៥គីឡូ
១២-ពូក ០១
១៣-ឆ្នាំង ០២
១៤-កន្ទេល ០២
១៥-ខ្ទះ ០១
១៦-កំសៀវ ០១
១៧-កាធុន ០១

ឆ្លៀតក្នុងឱកាសនោះ លោកឌី វិជ្ជា និងលោកជំទាវ ក៏បានផ្តាំផ្ញើសាកសួរសុខទុក្ខ ជាពិសេសលោកក៏បានជំរុញអោយ លោកគ្រូ និងក្រុមគ្រួសារ ចូលរួមប្រយុទ្ធប្រឆាំង និងទប់ស្កាត់ការឆ្លងរីករាលដាលជំងឺកូវីដ-១៩ ដោយអនុវត្តឱ្យបានខ្ជាប់ខ្ជួននូវវិធានសុខាភិបាល របស់រាជរដ្ឋាភិបាល រួមអនុវត្ត «៣ការពារ និង៣កុំ» ដេីម្បីការពារខ្លួនយេីង គ្រួសារយេីង សង្គមជាតិយេីង និងប្រជាជនយេីង ។

ទន្ទឹមនឹងនេះ សូមប្រជាពលរដ្ឋ ចូលរួមអនុវត្តវិធានការចត្តាឡីស័កឱ្យបានម៉ឺងម៉ាត់ ដែលជាវិធានការមុតស្រួចដើម្បីទប់ស្កាត់ និងផ្តាច់ចរន្តនៃការឆ្លងជំងឺកូវីដ-១៩ចូលក្នុងសហគមន៍៕SRP

ភ្នំពេញ៖ប្រតិបត្តិការ រកឃើញគ្រាប់យុទ្ធភណ្ឌមិនទាន់ផ្ទុះ នៅនាវាដែលលិចក្នុងទន្លេ ស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ដែលរហូតមកដល់ពេលនេះសម្រេច បាន៩៥ភាគរយ គ្រោងនឹងបញ្ចប់ទាំងស្រុងនៅសប្ដាហ៍ទី៣ ខែមីនានេះ។

យោងតាមរបាយការណ៍ លោក នាង ផាត រដ្ឋលេខាធិការក្រសួងការពារជាតិ និងជាប្រធានក្រុមការងារ ចុះហត្ថលេខានៅថ្ងៃទី២២ ខែមីនាឆ្នាំ២០២១ ជូនសម្ដេច ស ខេង រដ្ឋមន្ត្រីក្រសួងមហាផ្ទៃ បានបង្ហាញថា រយៈពេល៥ខែកន្លងមក ក្រុមការងារស្រង់បានគ្រាប់កាំភ្លើងយន្ត១២,៧មម ជិត២ម៉ឺនគ្រាប់, គ្រាប់ត្បាល់៦០មមចំនួន៦៥១គ្រាប់, គ្រាប់ត្បាល់៨០មមចំនួន១០៥គ្រាប់, គ្រាប់ផ្លោង១០៥មមចំនួន១០គ្រាប់ និងគ្រាប់យុទ្ធភណ្ឌទទួលបានពីអាជ្ញាធរ ព្រមទាំងប្រជាពលរដ្ឋចំនួន១៥៣គ្រាប់ សរុបមានទំងន់ជាង១០តោន រួមទាំងបំណែកឆ្អឹងសពមនុស្ស ព្រមទាំងសម្ភារសឹកមួយចំនួនទៀត ។

របាយការណ៍បានឱ្យដឹងថា ក្រុមការងារបានបន្តស្រង់គ្រាប់យុទ្ធភណ្ឌទាន់ផ្ទុះ បានចំនួន៧៥៧គីឡូក្រាមបន្ថែមទៀត ធ្វើឱ្យបេសកម្ម សម្រេចបានលទ្ធផល ៩៥ភាគរយហើយ។ ដោយឡែកនៅមាន វត្តមានគ្រាប់មួយចំនួនទៀត នៅតំបន់ជុំវិញ នាវានឹងត្រូវបន្តស្រង់ជាបន្តបន្ទាប់ទៀត ដែលតាមគម្រោង នឹងត្រូវបញ្ចប់ទាំងស្រុងនៅចុងសប្ដាហ៍ទី៣នៃខែមីនា ឆ្នាំ២០២១នេះហើយ ។

លោកនាង ផាត ក៏បានរាយការណ៍ថា កិច្ចប្រតិបត្តិការ បោស សំអាត គ្រាប់យុទ្ធភណ្ឌមិនទាន់ផ្ទុះ លិចក្នុងទន្លេ ស្ថិតនៅឃុំបឹងគ្រំ ស្រុកល្វាឯម ខេត្តកណ្ដាល ដែលជាការដ្ឋានទី ២ បានប្រើប្រាស់កម្លាំងសរុប៣៣នាក់ និងមធ្យោបាយ ព្រមទាំងសម្ភារប្រើប្រាស់ មួយចំនួនទៀត។ ការដ្ឋានទី២នេះបានបើកដំណើរការ ជាផ្លូវការកាលពីថ្ងៃទី១៥ ខែមីនា និងមានវិសាលភាព៦ហិកតា៕SRP

ភ្នំពេញ៖នាយករដ្ឋមន្ត្រីហ៊ុន សែន បានស្នើឱ្យគ្រប់វត្តអារាម ទូទាំប្រទេស ទូងស្គរ វាយជួងព្រមគ្នា ក្នុង១ថ្ងៃ៥ដង
រហូតដល់ចប់ព្រឹត្តិការណ៍ ២០កុម្ភៈ ដើម្បីចូលរួមទប់ស្កាត់ស្កាត់ ការរាលដាលនៃជំងឺកូវីដ-១៩។ នេះបើយោងតាមលិខិតរបស់លោកឈិត សុខុន រដ្ឋមន្ត្រីក្រសួងធម្មការនិងសាសនា នៅថងៃទី ២៣ខែមីនាឆ្នាំំ ២០២១៕SRP

ខេត្តសៀមរាប៖នគរបាលចរាចណ៍បានឲ្យដឹងថាបុរសម្នាក់ស្លាប់ភ្លាមៗខណ:កំពុងបើកម៉ូតូ ត្រូវបានរថយន្តបុកចំពីក្រោយពេញទំហឹង។

ហេតុការណ៍បានកើតឡើងនាម៉ោងជិត១២ ថ្ងៃទី២៣ ខែមីនាឆ្នាំ២០២១ លើដងផ្លូវជាតិលេខ៦ ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប។

លោកអនុសេនីយ៍ឯក ផាំង ហួរ នាយផ្នែកនគរ បាលចរាចរណ៍ខេត្តសៀមរាប អោយដឹងថា ជនរង
គ្រោះ មានឈ្មោះផាត សេងខៃ អាយុ ២៤ឆ្នាំ រស់នៅភូមិជន្លង់ សង្កាត់សាលាកំរើក ក្រុងសៀមរាប បើកបរម៉ូតូសេ១២៥សេរីឆ្នាំ២០១១ ពាក់ស្លាកលេខសៀមរាប 1L 5811 ក្នុងទិសដៅពីកើតទៅលិច។ ចំណែករថយន្តបង្កម៉ាក អាលហ្វា ពណ៍៊៌ស មិនស្គាល់ស្លាកលេខ ក្នុងដំណើរស្របទិស។
លោកបន្តថា តាមការសាកសួរ សាក្សីគេឃើញជនរងគ្រោះជិះម៉ូតូ លើដងផ្លូវពីកើតទៅលិច លុះមក ដល់ចំណុចខាងលើ ត្រង់មុខមន្ទីរសម្រាកព្យាបាល ឯក ជនឈ្មោះ រួមពេទ្យយ:សូថន(ពេទ្យថៃ) រថយន្តបង្កបើកយ៉ាងលឿន ហើយក៏បុកពីក្រោយបណ្តាលអោយភាគីម៉ូតូស្លាប់តែម្តង។ ជាមួយគ្នានោះ រថយន្តបានបើករត់គេច តាមផ្លូវក្រវ៉ាត់ក្រុងឆ្ពោះទៅទិសខាងលិច បាត់ស្រមោល។

លោកនាយផ្នែកបញ្ជាក់ថា ក្រោយវាស់វែង និងប្រគល់សពអោយក្រុមគ្រួសារ។ ករណីនេះសមត្ថកិច្ចបន្តសហការតាមគោលដៅ ក៏ដូចជាតាមបណ្តាស្រុកផងដែរ ដើម្បីឃាត់រថយន្តបង្ក តែមិនមានការជួបប្រទះឡើយ៕SRP

ភ្នំពេញ៖រដ្ឋមន្ត្រីក្រសួងមហាផ្ទៃ សម្ដេច ស ខេង ចេញសេចក្ដីណែនាំ(លើកទី២)ស្ដីពីការពង្រឹងការអនុវត្តវិធានការនានាដើម្បីបង្ការទប់ស្កាត់ការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ ដល់ថ្នាក់ដឹកនាំ មន្ត្រីនគរបាលជាតិ មន្ត្រីរាជការសុីវិល និងមន្ត្រីពន្ធនាគារ នៃក្រសួងមហាផ្ទៃ៕SRP

ខេត្តកំពង់ចា៖លោក ស៊ុន ចាន់ថុល រដ្នមន្ត្រីក្រសួងសាធារណការ និងដឹកជញ្ជូន បាន​ប្រកាស​ថា​ ស្ពាន​ស្ទឹងត្រង់​-ក្រូចឆ្មារ​ ត្រូវ​បាន​សម្តេច​ហ៊ុន​ សែន​ អនុញ្ញាត​បេីក​ឲ្យ​ ប្រជាពលរដ្ឋ​ ធ្វើ​ដំណើរ​ឆ្លង​កាត់​ ជា​បណ្ដោះ​អាសន្ន​ ចាប់​ពី​ពេលនេះ​តទៅ​។

ថ្លែង​យ៉ាង​ដូច្នេះ​ក្នុង​ឱកាស​ចុះ​ពិនិត្យ​ស្ពាន​មិត្តភាព​កម្ពុជា​ចិន​ ស្ទឹងត្រង់​–ក្រូចឆ្មារ នៅថ្ងៃ​ទី​២៣​ ខែមីនា​ ឆ្នាំ​២០២១​ ព្រឹកមិញនេះ
ដោយ​មាន​ការចូលរួម​ពពី លោក អ៊ុន ចាន់ដា អភិបាលខេត្តកំពង់ចាម និង​លោក ជាម​ ចាន់សោភ័ណ អភិបាលខេត្តត្បូងឃ្មុំ​។

លោក ស៊ុន ចាន់ថុល បានមាន​ប្រសាសន៍​ថា​ ស្ពាន​មិត្តភាព​កម្ពុជា​-ចិន​ ស្ទឹងត្រង់​-ក្រូចឆ្មារ​ នេះ​ គឺ​មាន​គម្រោង​សម្ពោធ​ដាក់​ឲ្យ​ប្រេីប្រាស់​ជា​ផ្លូវការ​​នៅ​ថ្ងៃ​ទី​២៤​ ខែមីនា​ ឆ្នាំ​២០២១​ នេះ​ក្រោម​អធិបតីភាព​ដ៏​ខ្ពង់ខ្ពស់​សម្តេច​ហ៊ុន​ សែន​ នាយករដ្ឋមន្ត្រី​កម្ពុជា​ ប៉ុន្តែ​ដោយសារ​បញ្ហា​​ព្រឹត្តិការណ៍​២០កុម្ភៈ​ ដូច្នេះ​មិន​ត្រូវ​ប្រារព្ធ​​ពិធី​​សម្ពោធតាម​ការ​គ្រោងទុក​នោះទេ​ ទេីបលោកចុះ​មក​ពិនិត្យ​ ដេីម្បីគោរពស្នេីសុំទៅ សម្ដេច បេីក​ឲ្យ​ប្រជាពលរដ្ឋ​ប្រេីប្រាស់​ជា​បណ្ដោះ​អាសន្ន​ ចាប់ពី​ពេល​នេះ​តទៅ​ ចំពោះ​ស្ពាន​មិត្តភាព​កម្ពុជា​-ចិន​ ដ៏រឹងមាំ​នេះ​ ជាពិសេស​ គឺ​នៅពេល​ចូលឆ្នាំថ្មី​ប្រពៃណី​ជាតិ​ខ្មែរ​ នាពេល​ខាងមុខ​នេះ​ គឺលោមិន​ចង់​ឲ្យ​ប្រជាពលរដ្ឋ​ ប្រេីប្រាស់​សាឡាង​ទៀត​ទេ​ ព្រោះវា​អាច​មាន​ហានិភ័យ​ ខ្ពស់​តាម​រយៈ​ការ​កកស្ទះ​ផងដែរ​។

រដ្ឋមន្ត្រី​ បាន​បញ្ជាក់​ថា​ ស្ពាន​មិត្តភាព​កម្ពុជា​-ចិន​ ស្ទឹងត្រង់​-ក្រូចឆ្មារ​ នេះ​ គឺ​ធ្វើ​លឿន​ជាង​ការ​គ្រោងទុក​ រយៈពេល​២ខែ​ ចំពោះ​សាឡាង​ដែល​ធ្លាប់​បម្រើ​ការ​​នៅ​ទីនេះ​ គឺត្រូវ​បង្វែ​យក​ទៅ​ស្រុក​កំពង់លែង​ ខេត្ត​កំពង់ឆ្នាំង​វិញ​ ដោយសារនៅ​ទីនោះ​មិន​ទាន់​មាន​ស្ពាន​នៅឡើយ​។

លោកស៊ុន ចាន់ថុល​ ក៏បាន​អំពាវនាវ​ដល់​បងប្អូន​ប្រជាពលរដ្ឋ​ ឲ្យ​ខិតខំ​យកចិត្តទុកដាក់​​ថែទាំ​សុខភាព​ គឺ​ត្រូវ​អនុវត្ត​តាម​កន្លង​ថ្មី​
៣ការពារ​ ៣កុំ​ ដេីម្បី​ជៀសផុត​ពី​ជំងឺ​កូវីដ​-១៩​។

សូមរំលឹកថា ស្ពាន​ស្ទឹង​ត្រង់-ក្រូចឆ្មារ​នេះ ត្រូវបាន​បើកការដ្ឋាន​សាងសង់​ជាផ្លូវការ​កាលពីថ្ងៃទី៩ ខែកុម្ភៈ ឆ្នាំ​២០១៨​ ក្រោមអធិបតី​ភាព​ដ៏ខ្ពង់ខ្ពស់​​ សម្ដេច ហ៊ុន សែន​ ដោយស្ពាននេះ​មាន​ប្រវែង​សរុប ១១៣១ ម និង ទទឹង​១៣,៥០ ម ជា​ប្រភេទ​ស្ពាន​បេតុង​សរសៃ​ដែក គ្រោង​ចំណាយ​ថវិកា​សរុប ៥៦,៩៩៨ លាន​ដុល្លារ​សហរដ្ឋ​អាមេរិក ជា​ហិរញ្ញប្បទាន​សម្បទាន ពី​រដ្ឋាភិបាល​នៃ​សាធារណរដ្ឋ​ប្រជាមានិត​ចិន រួម​ជាមួយ​ថវិកា​បដិភាគ របស់​រាជរដ្ឋាភិបាល​កម្ពុជា​៕SRP

ភ្នំពេញ៖លោកជំទាវ ទាវ ឡាយចេង (Teo Lay Cheng) ឯកអគ្គរដ្ឋទូតថ្មីរបស់សិង្ហបុរីប្រចាំនៅព្រះរាជាណាចក្រកម្ពុជា បានថ្លែងអំណរគុណយ៉ាងជ្រាលជ្រៅជាទីបំផុតជូន សម្ដេចតេជោនាយករដ្ឋមន្រ្តី ដែលបានឆ្លៀតពេលវេលា ដ៏មមារញឹកនេះទទួលលោកជំទាវ។ ជាមួយគ្នានោះដែរលោកជំទាវក៏បានគោរពសំដែងនូវការអបអរសាទរ ជូនដល់សម្ដេចតេជោ ដែលបានដឹកនាំកម្ពុជាឆ្ពោះទៅរកការអភិវឌ្ឍ បានយ៉ាងឆាប់រហ័សជាទីបំផុត ដែលធ្វើអោយកម្ពុជា មានកំណើនសេដ្ឋកិច្ចជាច្រើនឆ្នាំមកហើយ។ រីឯការកាត់បន្ថយភាពក្រីក្រក៏មានល្បឿនលឿនគួរអោយកត់សម្គាល់ផងដែរ។

ចំពោះទំនាក់ទំនងរវាងប្រទេសទាំងពីរ លោកជំទាវ បានមានប្រសាសន៍ថា កម្ពុជា សិង្ហបុរី មានទំនាក់ទំនងនិងកិច្ចសហប្រតិបត្តិការល្អ ក្នុងនោះរួមទាំងវិស័យសេដ្ឋកិច្ច ពាណិជ្ជកម្ម វិនិយោគ បច្ចេកទេស និងវិស័យអភិវឌ្ឍន៍ធនធានមនុស្ស។ ទោះជាយ៉ាងណាក៏ដោយ លោកជំទាវបានមានប្រសាសន៍ថា ប្រទេសយើងទាំងពីរ នៅមានសក្ដានុពលច្រើនទៀត។

នៅក្នុងបេសកកម្ម របស់លោកជំទាវមកកាន់ព្រះរាជាណាចក្រកម្ពុជាពេលនេះ លោកជំទាវនឹងខិតខំប្រឹងប្រែង ឲ្យអស់ពីសមត្ថភាព ដើម្បីពង្រឹងនិងពង្រីកទំនាក់ទំនង រវាងប្រទេសទាំងពីរឲ្យកាន់តែរឹងមាំនិងរីកចម្រើនឡើងថែមទៀត។

លោកជំទាវ ជម្រាបជូនយ៉ាងដូច្នេះនៅវិមានសន្តិភាព ថ្ងៃអង្គារ ថ្ងៃទី២៣ ខែ មីនា ឆ្នាំ២០២១ ព្រឹកមិញនេះ ក្នុងឱកាសបានចូលជួបពិភាក្សាការងារជាមួយ សម្ដេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

សម្ដេច ហ៊ុន សែន បានស្វាគមន៍ និងអបអរសាទរជូនចំពោះលោកជំទាវ Teo Lay Cheng ដែលត្រូវបានតែងតាំងជាឯកអគ្គរដ្ឋទូតវិសាមញ្ញនិងពេញសមត្ថភាព របស់ប្រទេសសិង្ហបុរីប្រចាំនៅកម្ពុជា។

សម្ដេចតេជោក៏បានមានប្រសាសន៍បញ្ជាក់បន្ថែមថា ទំនាក់ទំនងរបស់ប្រទេសយើងទាំងពីរគឺមានជាយូរលង់ណាស់មកហើយ ដែលចាប់ផ្ដើមតាំងពីប្រទេសសិង្ហបុរីបានទទួលឯករាជ្យ ដោយបានភ្ជាប់ទំនាក់ទំនងការទូតជាមួយនឹងកម្ពុជាតាំងពីពេលនោះមក។

សម្ដេចតេជោ ក៏បានមានប្រសាសន៍បន្ថែមថាជំងឺកូវីដ- ១៩ បានបំផ្លាញយើងគ្រប់គ្នាដោយបានដាក់គម្លាតឲ្យយើងនៅឆ្ងាយពីគ្នា មិនតែប៉ុណ្ណោះទេ ថែមទាំងឲ្យយើងពាក់ម៉ាសនៅពេលសន្ទនាជាមួយគ្នាទៅវិញទៅមកទៀតផង។ ប៉ុន្តែទោះជាយ៉ាងណាក៏ដោយ សម្ដេចតេជោបានមានប្រសាសន៍ថា យើងត្រូវតែជំនះនូវបញ្ហានេះ គឺយើងត្រូវបន្តជំរុញទំនាក់ទំនងល្អរវាងប្រទេសទាំងពីរ និងជំរុញការអនុវត្តរាល់កិច្ចព្រមព្រៀង និងអនុស្សារណៈទាំងឡាយ ដែលបានចុះហត្ថលេខា កន្លងមក និងបន្ថែមជាមួយនូវកិច្ចសហប្រតិបត្តិការផ្សេងៗជាច្រើនទៀត ស្របតាមសក្កានុពលដែលប្រទេសយើងទាំងពីរមាន គឺយើងត្រូវខិតខំធ្វើ ទោះបីយើងត្រូវអនុវត្តការងារនេះតាមគន្លង បែបថ្មីដូចសព្វថ្ងៃយ៉ាងណាក៏ដោយ៕SRP

ខេត្តព្រះវិហារ៖លោក កង សៅគុណ មេបញ្ជាការកងរាជអាវុធហត្ថខេត្តព្រះវិហារ នៅថ្ងៃទី២២ ខែមីនា ម្សិលមិញ បានអញ្ជើញចុះសួរសុខទុក្ខ លោកស្រី ខាន់ ឡា ជំនួយការការិយាយល័យផែនការសេនាធិការ ដែលទើបសម្រាលកូនរួច (សម្រាលដោយធម្មជាតិ សុខភាពល្អទាំងម្តាយនិងកូន) ព្រមទាំងយកនូវអំណោយជា ថវិកា និងគ្រឿងឧបភោគ រួមមាន៖ មេបញ្ជាការខេត្ត ឧបត្ថម្ភ ថវិកាផ្ទាល់ចំនួន៥០ម៉ឺនរៀល
-មូលនិធិរបស់ក្រុមយុវជនអាវុធហត្ថខេត្តចំនួន ៤០ម៉ឺនរៀល
-ទឹកដោះគោឆៅ ២យួរ
-ទឹកផ្លែឈើ ១កេស
-ទឹកសុទ្ធ១កេស៕SRP

ខេត្តសៀមរាប៖លោក ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប នៅថ្ងៃច័ន្ទទី២២ ខែមីនា ឆ្នាំ២០២១ បានចាត់ លោក គុជ លីណា អនុប្រធានគណៈកម្មាធិការសាខា នាំយកអំណោយមនុស្សធម៌ ឧបត្ថម្ភដល់ក្រុមការងារត្រួតពិនិត្យសុខភាពបឋម នៅកំណត់ផ្លូវជាតិលេខ៦ ចំណុចព្រំប្រទល់ស្រុកក្រឡាញ់ខេត្តសៀមរាប និងខេត្តបន្ទាយមានជ័យ ដើម្បីរួមគ្នាទប់ស្កាត់ជំងឺកូវីដ-១៩ ដែលអាចនឹងរាតត្បាតកាន់តែធំឡើងៗបើគ្មានវិធានការទប់ស្កាត់បានទានពេលវេលាទេនោះ។

លោក គុជ លីណា បានលើកឡើងថា ចាប់តាំងពីព្រឹត្តិការណ៍២០កុម្ភៈ បានផ្ទុះឡើង យើងទាំងអស់គ្នាមានការព្រួយបារម្ភជាខ្លាំង អំពីលទ្ធភាព នៃការរីរាលដាលជាបន្តបន្ទាប់ នៅក្នុងសហគមន៍ ហេតុនេះក្នុងនាមជាជំនួយការឱ្យអាជ្ញាធរសាធារណៈ ក្នុងវិស័យមនុស្សធមម៌ សាខាកាកបាទក្រហមកម្ពុជា ខេត្តសៀមរាប បានយកចិត្តទុក្ខជាចម្បង ក្នុងការរួមចំណែកទប់ស្កាត់ការរីករាលដាលជំងឺកូវីដ-១៩នេះ ដោយក្រុមប្រតិបត្តិសាខា បានចុះអប់រំផ្សព្វផ្សាយ ជាហូរហែទាំងនៅក្នុងសហគមន៍ និងនៅតាមគ្រឹះស្ថានសិក្សា ព្រោះដូចយើងទាំងអស់គ្នាបានដឹងហើយថា នេះជាដំណាក់កាលដែលយើងទាំងអស់គ្នាត្រូវប្រុងប្រយ័ត្នខ្ពស់បំផុត ចំពោះជំងឺដ៏កាចសាហាវនេះ។
លោកក៏បានថ្លែងអំណរគុណ និងសូមសរសើរចំពោះមន្ត្រី និងក្រុមការងារប្រចាំការនៅទីនេះ ដែលបានលះបង់អស់កម្លាំងកាយចិត្ត និងពេលវេលាផ្ទាល់ខ្លួន មិនថាយប់ មិនថាថ្ងៃ ខិតខំបំពេញការងារយ៉ាងសកម្ម ដើម្បីទប់ស្កាត់ជំងឺកូវីដ-១៩ កុំឱ្យរីករាលដាលកាន់តែធំឡើង និងដើម្បីឈានទៅគ្រប់គ្រងឱ្យបាននាពេលខាងមុខ។

លោកសូមអំពាវនាវដល់ប្រជាពលរដ្ឋ ទាំងអស់ ពិសេសបងប្អូន ដែលធ្វើដំណើរលើដងផ្លូវជាតិលេខ៦ចូលមកកាន់ខេត្តសៀមរាប ត្រូវគោរពឱ្យបានខ្ជាប់ខ្ជួន នូវវិធានការ ៣ការពារ និង៣កុំ ព្រមទាំង២ចូលរួមបន្ថែមទៀត គឺចូលរួម Scan QR Code និងចូលរួមពិនិត្យកម្ដៅឱ្យបានគ្រប់គ្នា។

លោកបានបន្ថែមថា អំណោយដែលឧបត្ថម្ភនាពេលនេះ ទោះបីមានចំនួនតិចតួចក្ដី តែនេះជាការចូលរួម ក៏ដូចជាការលើកទឹកចិត្តដល់មន្ត្រី និងក្រុមការងារដែលកំពុងបំពេញភារកិច្ចយ៉ាងមមាញឹកនៅទីនេះ ដើម្បីសុខុមាលភាពសាធារណៈក្នុងសហគមន៍យើង។

អំណោយមនុស្សធម៌ដែលបានឧបត្ថម្ភរួមមាន៖ ទឹកបរិសុទ្ធ៥០កេស ទឹកផ្លែឈើ២០កេស ម៉ាស៥០០០ អង្ករ១តោន មី៣០កេស ត្រីខ ២០០កំប៉ុង។ទន្ទឹមនិងនេះមានសម្ភារមួយចំនួនដូចជា ទឹកបរិសុទ្ធ ២០កេស អង្ករ១តោនផ្តល់ជូនមណ្ឌលចត្តាឡីស័ក នៅវិទ្យាល័យក្រឡាញ់ផងដែរ៕SRP