Siem Reap Post – Page 1109 – Siem Reap News, Cambodia News

ខេត្តកំពង់ចាម៖ក្នុងពិធីបេីកការដ្ឋានស្ថាបនាផ្លូវកៅស៊ូពីរជាន់ប្រភេទDBST ១ខ្សែ ប្រវែង៦.៥៥០ម៉ែត្រ ពីភូមិបឹងបាសាក់ សង្កាត់សំបួរមាស ក្រុងកំពង់ចាម ដល់ភូមិអូរឈ្លេីង ឃុំកោះរការ ស្រុកកំពង់សៀម និងសម្ពោធដាក់ឲ្យប្រេីប្រាស់ជាផ្លូវការ ផ្លូវក្រាលកៅស៊ូប្រភេទAC ចំនួន៤ខ្សែ ប្រវែង៤៤១៥ម៉ែត្រ ក្នុងក្រុងកំពង់ចាម នៅថ្ងៃទី២១ ខែមករា ព្រឹកមិញនេះ
លោក អ៊ុន ចាន់ដា អភិបាលខេត្តកំពង់ចាម បានថ្លែងថា មានផ្លូវមានក្តីសង្ឃឹម ទីណាមានការអភិវឌ្ឍ ទៅដល់ ទីនោះ តែងតែមានការរីកចម្រើន ដោយជីវភាព ប្រជាពលរដ្ឋ កាន់តែប្រសើរឡើង ព្រោះផ្លូវគឺជាសរសៃឈាម នៃសេដ្ឋកិច្ចយ៉ាងសំខាន់។

លោក អ៊ុន ចាន់ដា បានថ្លែងថា ដោយសារប្រទេសជាតិ យើងមានសុខសន្តិភាព ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន ទេីបមានការអភិវឌ្ឍ រីកចម្រើនជាបន្តបន្ទាប់។ ដូច្នេះទេសូមពុកម៉ែបងប្អូន ជឿទុកចិត្តគ្នា ទៅវិញ ទៅមក ជាមួយអាជ្ញាធរនៅទីនេះចុះ ដេីម្បីយេីងបន្តរួមគ្នា ធ្វើការអភិវឌ្ឍ រីកចម្រើន តទៅមុខទៀត ដោយមិនមានការភូតកុហកបោកប្រាស់ ឬមួយរត់ចោលពុកម៉ែបងប្អូននោះឡើយ។

អភិបាលខេត្ត បានធ្វេីការណែនាំ ដល់មន្ត្រីបច្ចេកទេស ក៏ដូចជាអាជ្ញាធរពាក់ព័ន្ធ ដោយលេីកឡើងថា ផ្លូវ១ខ្សែនេះយេីងអាចចាត់ទុកជាផ្លូវក្រវ៉ាត់ក្រុង។ ដូច្នេះត្រូវធ្វើឲ្យបានឆាប់រួចរាល់ មិនឲ្យផុតពីឆ្នាំ២០២១នេះទេ ហេីយធ្វើយ៉ាងណាត្រូវឲ្យបានស្អាតល្អ ទាំងមានគុណភាពរឹងមាំ ប្រយោជន៍ ដល់ការប្រេីប្រាស់ បានយូរអង្វែងផង ហេីយសូមធ្វើចលនា ដល់ប្រជាពលរដ្ឋ ឲ្យចូលរួមដាំដេីមឈេីលំអរតាមដងផ្លូវផងដែរ។

អភិបាលខេត្ត ក៏បានសំណូមពរ ដល់បងប្អូនប្រជាពលរដ្ឋថា ផ្លូវនេះជាផ្លូវរបស់ពុកម៉ែបងប្អូនហេីយ ដូច្នេះសូមប្រេីប្រាស់តាមតំរូវការចុះ តែសូមចូលរួមថែទាំផង ជាពិសេស ពេលបានផ្លូវល្អហើយ សូមអប់រំកូនចៅឲ្យបេីកបរ ដោយមានការប្រុងប្រយ័ត្នផងដែរ៕SRP

ភ្នំពេញ៖សម្ដេច ស ខេង រដ្ឋមន្ត្រីក្រសួងមហាផ្ទៃ បានលើកឡើងថា៖ថ្ងៃនេះខ្ញុំសូមជម្រាបជូនបងប្អូនជនរួមជាតិ អំពីលទ្ធផលរបស់ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋនៅក្នុងទំព័រហ្វេសប៊ុករបស់ខ្ញុំ រយៈពេល៦ខែក្នងឆ្នាំ២០២០។

តាមរយៈលទ្ធផលនេះ ខ្ញុំសូមសម្ដែងការកោតសរសើរ និងវាយតម្លៃខ្ពស់ចំពោះកិច្ចសហការប្រកបដោយការទទួលខុសត្រូវខ្ពស់របស់ថ្នាក់ដឹកនាំ និងមន្ត្រីនៃអង្គភាពចំណុះក្រសួងមហាផ្ទៃ ព្រមទាំងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ក្នុងការឆ្លើយតបចំពោះមតិយោបល់ កង្វល់ និងសំណូមពរនានារបស់មហាជន ជាមួយក្រុមការងារទំព័រហ្វេសប៊ុករបស់ខ្ញុំ។ ខ្ញុំសូមឲ្យមន្ត្រីនៃអង្គភាពចំណុះក្រសួងមហាផ្ទៃ ព្រមទាំងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិខិតខំបន្តសកម្មភាពនេះបន្ថែមទៅមុខទៀតដើម្បីសម្រួល ដល់ជីវភាពរស់នៅរបស់ប្រជាពករដ្ឋយើង ។

ខ្ញុំសូមថ្លែងអំណរគុណដល់បងប្អូនប្រជាពលរដ្ឋទាំងអស់ដែលបានលើកជាមតិយោបល់ និងសំណូមពរ តាមរយៈទំព័រហ្វេសប៊ុករបស់ខ្ញុំ និងបានទទួលយកនូវដំណោះស្រាយរបស់សមត្ថកិច្ច ដែលនេះបានបង្ហាញពីការចូលរួមរបស់បងប្អូនប្រជាពលរដ្ឋ ដើម្បីអភិវឌ្ឍន៍សង្គមជាតិយើង៕SRP

ខេត្តសៀមរាប៖អាជ្ញាធរជាតិអប្សរា មានកិត្តិយសសូមជម្រាបជូនដំណឹងដល់ឯកឧត្តម លោកជំទាវ លោក លោកស្រី មេត្តាជ្រាបថា អាជ្ញាធរជាតិអប្សរានឹងរៀបចំកិច្ចប្រជុំបច្ចេកទេសលើកទី៣៤ និងកិច្ចប្រជុំពេញអង្គលើកទី២៧ របស់គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ ហៅ កាត់ អាយស៊ីស៊ី-អង្គរ ( ICC-Angkor ) នៅថ្ងៃអង្គារ និងថ្ងៃពុធ ១៣កើត និង១៤កើត ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៦ និងទី២៧ ខែមករា ឆ្នាំ២០២១ នៅសណ្ឋាគារសូហ្វីតែល អង្គរ ភូគីត្រា ខេត្តសៀមរាប ក្រោមអធិបតីភាពដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួង វប្បធម៌ និងវិចិត្រសិល្បៈ និងសហប្រធានទាំងពីរ(បារាំង-ជប៉ុន)។

កិច្ចប្រជុំនេះនឹងរៀបចំតាមរយៈប្រព័ន្ធ Video Conference ។ របៀបវារៈនៃកិច្ចប្រជុំគឺពាក់ព័ន្ធនឹងការ ពិនិត្យវាយតម្លៃដោយអ្នកជំនាញការអន្តរជាតិនៃគណៈកម្មាធិការអាយស៊ីស៊ី-អង្គរ (ICC-Angkor) ទៅលើ ការងារអភិរក្ស និងអភិវឌ្ឍន៍នាពេលកន្លងមករបស់អាជ្ញាធរជាតិអប្សរា និងដៃគូអន្តរជាតិក្នុងតំបន់រមណីយដ្ឋាន អង្គរ ដើម្បីផ្តល់អនុសាសន៍សម្រាប់ការងារបន្តទៀតនាពេលខាងមុខ។

សេចក្តីដូចបានជម្រាបជូនខាងលើនេះ សូមឯកឧត្តម លោកជំទាវ លោក លោកស្រី មេត្តាជ្រាបជា ព័ត៌មានតាមការគួរ៕SRP

ភ្នំពេញ៖ទាក់ទងនឹងបញ្ហាវ៉ាក់សាំងកូវីដ១៩ សម្តេចតេជោ ហ៊ុន សែន នាយករដ្ឋមន្ត្រី បង្ហាញពីមូលហេតុ ដែលនាំឱ្យ សម្តេចសម្រេចចិត្តទទួលវ៉ាក់សាំង ពីប្រទេសចិន នាពេលនេះ ទោះបីអង្គការសុខភាពពិភពលោកមិនទាន់ប្រកាសជាផ្លូវការ។

សម្តេចតេជោ ហ៊ុន សែន បានថ្លែងថា ក្នុងកំលុងពេលកម្ពុជា កំពុងរងការយាយី ដោយជំងឺកូវីដ១៩នេះ គឺមិនអាចរង់ចាំទៀតទេ គឺត្រូវតែស្វះស្វែងរកវ៉ាក់សាំងចាក់ ជូនប្រជាពលរដ្ឋដោយឥតគិតថ្លៃ និងស្ម័គ្រចិត្ត។

សម្តេចតេជោ ហ៊ុន សែន បានថ្លែងថា សម្តេចបានសរសេរលិខិតទៅនាយករដ្ឋមន្ត្រីឥណ្ឌារួចហើយ ដើម្បីស្នើសុំវ៉ាក់សាំងមកចាក់ជូនប្រជាពលរដ្ឋ។

សម្តេចតេជោ ក៏បានពិចារណាសរសេរលិខិតស្នើសុំវ៉ាក់សាំងពីកូរ៉េខាងត្បូងផងដែរ។
សម្តេចតេជោ បានថ្លែងថា សម្តេចកំពុងពិចារណា និងសិក្សាលើវ៉ាក់សាំងរបស់ប្រទេសអង់គ្លេសផងដែរ។

សម្តេច ហ៊ុន សែន បានថ្លែងថា វ៉ាក់សាំងស៊ីណូហ្វាម នឹងមកដល់កម្ពុជាដំបូងនៅខែកុម្ភៈ ហើយសម្តេចនឹងចេញទៅទទួលវ៉ាក់សាំងដល់ព្រលានយន្តហោះតែម្តង។

សម្តេចតេជោ បានបញ្ជាក់ជាថ្មីថា ការចាក់វ៉ាក់សាំង គឺឈរលើគោលការណ៍ស្ម័គ្រចិត្ត ដូច្នេះនរណាចង់ចាក់ ក៏ចាក់ បើមិនចង់ចាក់ ក៏មិនបង្ខំឡើយ។

សម្ដេចថ្លែងយ៉ាងដូច្នេះ នាឱកាសអញ្ជើញសម្ពោធអគារទីស្តីការថ្មីក្រសួងសាធារណការ និងវិទ្យាស្ថាន «តេជោសែន សាធារណការ និងដឹកជញ្ជូន» នៅព្រឹកថ្ងៃសុក្រ ទី២២ ខែមករា ឆ្នាំ២០២១ នេះ ស្ថិតនៅតាមបណ្តោយវិថី៥៩៨ ដែលគេនិយមហៅវិថី «ជា សុផារ៉ា» ស្ថិតក្នុងសង្កាត់ច្រាំងចម្រេះ២ ខណ្ឌឬស្សីកែវ៕SRP