ខេត្តត្បូងឃ្មុំ​៖លោក កើត រិទ្ធ រដ្ឋមន្ត្រីក្រសួងយុត្តិធម៌ បានលើកឡើងថា៖ ការតែងតាំង ផ្លាស់ប្តូរ និងផ្ទេរភារកិច្ចរបស់ចៅក្រម -ព្រះរាជអាជ្ញា គឺជារឿងធម្មតាក្នុងអាជីពជាចៅក្រម- ព្រះរាជអាជ្ញា ក្នុងគោលបំណងដើម្បីធានា ឱ្យមានកិច្ចដំណើរការការងារកាន់តែមានភាពល្អប្រសើរ និងមានប្រសិទ្ធភាពខ្ពស់ សំដៅលើកកម្ពស់ ការបម្រើសេវាយុត្តិធម៌ជូន ប្រជាពលរដ្ឋ ប្រកបដោយភាពមិនលម្អៀង ភាពត្រឹមត្រូវ និងភាពយុត្តិធម៌។

លោក កើត រិទ្ធ មានប្រសាសន៍យ៉ាងដូច្នេះ នៅចន្ទនេះ ក្នុងពិធីប្រកាសផ្ទេរ​ភារកិច្ច​ លោក ជា វណ្ណៈ ចូលកាន់មុខតំណែងជាប្រធានសាលាដំបូងខេត្តត្បូងឃ្មុំ ជំនួស លោក ជុំ ស ដែលត្រូវបានផ្ទេរមុខតំណែងទៅជាប្រធានសាលាដំបូងខេត្តបាត់ដំបងវិញ។

ថ្លែង​ក្នុង​ពិធី​នេះដែរ​ លោករដ្ឋមន្រ្តី កើត រិទ្ធ បានសម្ដែងនូវការអបអរសាទរយ៉ាងកក់ក្តៅដល់ លោក ជា វណ្ណៈ អតីតប្រធានសាលាដំបូងខេត្តបាត់ដំបង ដែលត្រូវបានផ្ទេរមកជាប្រធានសាលាដំបូងខេត្តត្បូងឃ្មុំនាពេលនេះ។ ទន្ទឹមនេះលោកក៏បានធ្វើការកោតសរសើរ និងវាយតម្លៃខ្ពស់ចំពោះ លោក​ ជុំ ស ដែលបានខិតខំយកចិត្តទុកដាក់ដឹកនាំសាលាដំបូងខេត្តត្បូងឃ្មុំ ក្នុងការបម្រើសេវាយុត្តិធម៌ជូនប្រជាពលរដ្ឋប្រកបដោយស្មារតីទទួលខុសត្រូវ មានសាមគ្គីភាពផ្ទៃក្នុង និងមានកិច្ចសហប្រតិបត្តិការល្អជាមួយអាជ្ញាធរអនុវត្តច្បាប់ នាពេលកន្លងមក។

លោក កើត រិទ្ធ ក៏បានថ្លែងអំណរគុណជូនចំពោះ អភិបាលខេត្តត្បូងឃ្មុំ ថ្នាក់ដឹកនាំខេត្ត អង្គភាពពាក់ព័ន្ធ ព្រមទាំងមន្រ្តីរាជការ និងកងកម្លាំងប្រដាប់អាវុធគ្រប់ជាន់ថ្នាក់ទាំងអស់ ដែលបានផ្តល់ការគាំទ្រ និងកិច្ចសហការល្អជាមួយសាលាដំបូង និងអយ្យការអមសាលាដំបូងខេត្តត្បូងឃ្មុំ នាពេលកន្លងមក។

រដ្ឋមន្ត្រី កើត រិទ្ធ ក៏បានស្នើឱ្យបន្តផ្តល់កិច្ចសហប្រតិបត្តិការល្អនេះ ជាមួយសាលាដំបូង និងអយ្យការអមសាលាដំបូងខេត្តត្បូងឃ្មុំបន្តទៀត ជាពិសេសជាមួយ លោក ជា វណ្ណៈ ដែលជាប្រធានសាលាដំបូងខេត្តត្បូងឃ្មុំ ទើបនឹងចូលកាន់មុខតំណែងថ្មី ឱ្យអនុវត្តតូនាទីរបស់ខ្លួនដោយរលូន និងមានប្រសិទ្ធភាព ហើយឈានទៅសម្រេចបាននូវស្នាដៃ និងជោគជ័យថ្មីៗបន្ថែមទៀត៕SRP

ខេត្តសៀមរាប៖ឪពុកបង្កើតបានយកកាំបិតអារកកូនបង្កើតបណ្ដាលឲ្យរងរបួសធ្ងន់ធ្ងរ។

ហេតុការណ៍បានកើតឡើងវេលាម៉ោង ០៩និង៣០នាទី ថ្ងៃទី ២៣ ខែឧសភា ឆ្នាំ២០២២ នេះស្ថិតនៅភូមិជីក្រែង ឃុំជីក្រែង ស្រុកជីក្រែង។

សមត្ថកិច្ចខេត្តសៀមរាបបានឲ្យដឹងថា ករណី ប៉ុនប៉ងមនុស្សឃាត នេះ ដែលបង្កដោយ
ជនសង្ស័យ ឈ្មោះ សួង ណាក់ ភេទ ប្រុស អាយុ៣៦ឆ្នាំ ជាឪពុកបានយកកាំបិត (កូនកាំបិទចិត្តបន្លែ) អារកកូនប្រុសរបស់ខ្លួនបណ្តាលអោយរបួសធ្ងន់ ត្រងបំពង់ក ត្រូវបានដឹកយកមកព្យាបាលនៅមន្ទីពេទ្យបង្អែកខេត្តសៀមរាប។

ជនរងគ្រោះមាន ឈ្មោះ នី បូរ៉ា ភេទប្រុសអាយុ០៩ឆ្នាំ រស់នៅជាមួយគ្នា។ មូលហេតុ ដោយជនសង្ស័យជាឪពុកជាមនុស្សមានជម្ងឺសសៃប្រាសាទ។

ទោះជាយ៉ាងណា ជនបង្កត្រូវបានប្រជាពលពលរដ្ឋ ឃាត់ខ្លួនប្រគល់អោយនគរបាលដើម្បីអនុវត្តតាមផ្លូវច្បាប់៕SRP

ខេត្តឧត្តរមានជ័យ៖ជាពលរដ្ឋបានលើកឡើងថា ពួកគាត់ហាក់បីមានការព្រួយបារម្ភ រឿងបនល្បែងស៊ីសង បាញ់អាប៉ោង បាន
លេងយ៉ាងគគ្រឹកគគ្រេង ភូមិសាស្រ្តស្រុកត្រពាំងប្រាសាទ អាចបង្កឲ្យមានអំពើអសន្តិសុខកើតឡើង។ ប៉ុន្តែករណីល្បែងស៊ីសងនេះ មិនត្រូវបាន អាជ្ញាធរសមត្ថកិច្ចខេត្តនិងស្រុកត្រពាំងប្រាសាទធ្វើការបង្ក្រាបនោះទេ។

យោងតាមសេចក្តីរាយការណ៍បានឲ្យដឹងថា ទីតាំងបាញ់អាប៉ោង នៅចំណុចក្នុងចំការស្វាយចន្ទី ចូលតាមផ្លូវលំ (អង់តែន ០១១) ភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។

ជុំវិញព័ត៌មាន ថាមានល្បែងស៊ីសងអាប៉ោងបែបនេះ លោកហួត សុធី ស្នងការនគរបាលខេត្តឧត្តរមានជ័យ បានបញ្ជាក់ថា លោកនឹងអោយកម្លាំងស្រាវជ្រាវ៕SRP

ខេត្តសៀមរាប៖បុរសម្នាក់មុខសញ្ញាឆក់ទូរស័ព្ទ នៅក្រុងសៀមរាប ដ៏សកម្មត្រូវបានឃាត់ខ្លួន។

ការឃាត់ខ្លួនធ្វើឡើង នៅថ្ងៃទី២០ ខែឧសភា ឆ្នាំ២០២២ ស្ថិតនៅ ភូមិទក្សិណខាងត្បូង សង្កាត់គោកចក ក្រុងសៀមរាប ដោយ
នគរបាលសៀមរាប សហការជាមួយប៉ុស្តិ៍គោកចកប្រជាការពារ។

អធិការនគរបាលក្រុងសៀមរាប លោកដា ចំរើន បានឲ្យដឹងថាជនសង្ស័យ ឈ្មោះសូរ សៃ ភេទប្រុស អាយុ២៦ឆ្នាំមុខរបរមិនពីតប្រាកដ មានស្រុកកំណើតនៅភូមិសួង ឃុំត្រពាំងធំ ស្រុកប្រាសាទបាគង។ បច្ចុប្បន្ននៅភូមិវាល សង្កាត់គោកចក ក្រុងសៀមរាប ជាមុខសញ្ញាសកម្មពាក់ព័ន្ធឆក់ទូរស័ព្ទ។

លោកដា ចំរើន បានបន្តថា ជនសង្ស័យ បានធ្វើសកម្មភាពឆក់ទូរស័ព្ទ របស់ជនរងគ្រោះចែម សំនឿន ភេទស្រី អាយុ៣៧ឆ្នាំ ខណៈពេលដែរជនរងគ្រោះ បានឲ្យទូរស័ព្ទ ទៅកូនឈ្មោះហ៊ន់ តេកហុង ភេទប្រុស អាយុ១២ឆ្នាំដើម្បីសិក្សាតាមអនឡាញ។

លោក ដា ចំរើន បានបញ្ជាក់ថា ជនសង្ស័យ បានឆ្លើយសារភាពថារូបគេ ពិតជាបានជិះម៉ូតូមកឆក់ទូរស័ព្ទ ជនរងគ្រោះពិតប្រាកដមែន ហើយធ្លាប់បានធ្វើសកម្មភាពឆក់ នៅក្នុងក្រុងសៀមរាប បានចំនួន៥លើក ផងដែរ។

ក្រោយបានសាកសួរ សមត្ថកិច្ច បានបញ្ជូនសំណុំរឿងទៅតុលាការដើម្បីអនុវត្តតាមផ្លូវច្បាប់៕SRP

ខេត្តបាត់ដំបង៖សម្ដេច ស ខេង បានមានប្រសាសន៍ថា នៅលើពិភពលោក មិនអាច គណបក្សណាយកបានការគាំទ្រ ពីប្រជាពលរដ្ឋ មួយរយភាគរយនោះទេ ពោលគឺតែងតែមានសំឡេងភាគច្រើន និងភាគតិច។ យ៉ាងណាក៏ដោយ សម្ដេចបានសង្កត់ធ្ងន់ថា ការចុះជាប់ជាមួយប្រជាពលរដ្ឋ ដើម្បីដឹងសុខទុក្ខប្រជាពលរដ្ឋ គឺជាចំណុចខ្លាំងមួយក្នុងការទទួលបានការគាំទ្រពីពលរដ្ឋ។

សម្ដេចក្រឡាហោម​ ស ខេង ប្រធានស្ដីទីគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តបាត់ដំបង និងព្រៃវែង មានប្រសាសន៍យ៉ាងដូច្នេះ នៅរសៀលថ្ងៃសៅរ៍ ម្សិលមិញ ក្នុងឱកាសសំណេះសំណាល និងដឹកនាំយុទ្ធនាការឃោសនា បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅស្រុកបាណន់ ខេត្តបាត់ដំបង។
​​
សម្ដេចស ខេង បញ្ជាក់ថា ការបោះឆ្នោតនេះ គឺជាការកសាងលទ្ធិប្រជាធិបតេយ្យ ភាពសុខដុមរមនា នៅមូលដ្ឋាន ធ្វើឱ្យមូលដ្ឋានមានស្ថិរភាព ជំរុញការអភិវឌ្ឍសេដ្ឋកិច្ច សង្គមឱ្យកាន់តែរីកចំរើន តាមរយៈការផ្ទេរសិទ្ធិអំណាច ដើម្បីឱ្យ ក្រុមប្រឹក្សាឃុំ សង្កាត់មានការទទួលខុសត្រូវ មានទឹកចិត្ត មានមធ្យោបាយ និងធនធានដឹកនាំការអភិវឌ្ឍមូលដ្ឋានជាមួយ ប្រជាពលរដ្ឋ ពោលគឺពលរដ្ឋ នៅមូលដ្ឋានជាម្ចាស់ក្នុងការកំណត់ ជោគវាសនារបស់ខ្លួន តាមរយៈការជ្រើសរើសមេដឹកនាំ និងការរួមគ្នាសម្រេចចិត្តលើគម្រោងអភិវឌ្ឍជាក់ស្ដែង។

សម្ដេច បានមានប្រសាសន៍ទៀតថាតាមរយៈយន្តការ បោះឆ្នោតនេះ ក្រុមប្រឹក្សាឃុំ សង្កាត់ ត្រូវទទួលខុសត្រូវចំពោះមុខប្រជាជននៅមូលដ្ឋានមុនគេ ដ្បិតពលរដ្ឋជាម្ចាស់នៃអំណាច ហើយការគ្រប់គ្រងដឹកនាំឃុំ សង្កាត់ ល្អឬមិនល្អ ពលរដ្ឋនៅមូលដ្ឋានគឺជាអ្នកតាមដាន និងវាយតម្លៃដោយផ្ទាល់។ ជាមួយគ្នានេះ ក្រុមប្រឹក្សឃុំ សង្កាត់ ក៏មានការទទួលខុសត្រូវចំពោះរាជរដ្ឋាភិបាល ក្នុងការធានាឱ្យពលរដ្ឋក្នុងមូលដ្ឋាន របស់ខ្លួនគោរពច្បាប់ទម្លាប់ ឱ្យបានត្រឹមត្រូវ ដ្បិតថ្នាក់ជាតិជាអ្នកផ្ទេរនូវថវិកា សិទ្ធអំណាច និងការទទួលខុសត្រូវ ឱ្យរដ្ឋបាលឃុំ សង្កាត់ អនុវត្ត។

សម្ដេចស ខេង បានណែនាំឱ្យប្រមូលសមិទ្ធផល និងស្នាដៃសំខាន់ៗ ដែលសម្រេចបានយកទៅជម្រាបជូន ប្រជាពលរដ្ឋ ដោយបង្ហាញជូនពួកគាត់ឱ្យយល់ងាយៗ រួមទាំងផែនការថ្មីៗ បន្ថែមទៀត ដើម្បីផ្ដល់ភាពជឿជាក់ និងក្ដីសង្ឃឹមជូន ប្រជាពលរដ្ឋ ពោលគឺពលរដ្ឋនឹងបានដឹងថា តើពួកគាត់ទទួលបានផលប្រយោជន៍អ្វីខ្លះក្នុងរយៈកាល៥ឆ្នាំ កន្លងមក និងត្រូវទទួលបានអ្វីខ្លះទៀត សម្រាប់រយៈពេល៥ឆ្នាំបន្ត បន្ទាប់ពីបានបន្តបោះឆ្នោតគាំទ្រគណបក្សប្រជាជនកម្ពុជា សម្រាប់អាណត្តិថ្មីនេះ៕SRP

ខេត្តសៀមរាប៖នារីដ៏ស្រស់ស្អាតវ័យក្មេងម្នាក់ត្រូវបានការិយាល័យព្រហ្មទណ្ឌ កងរាជអាវុធហត្ថ ខេត្តសៀមរាប សហការជាមួយកងរាជអាវុធហត្ថក្រុងសៀមរាប ធ្វើការឃាត់ខ្លួន ពាក់ព័ន្ធករណីលួចលុយរបស់អាជីវករម្នាក់ជាង ៤ពាន់ដុល្លារ។

របាយការណ៍របស់លោក សៀក សោភា នាយការិយាល័យ ព្រហ្មទណ្ឌ កងរាជអាវុធហត្ថ ខេត្តសៀមរាប បានឲ្យដឹងថានៅវេលាម៉ោង៨:៣០នាទី ថ្ងៃទី២០ ខែឧសភា ឆ្នាំ២០២២​មានករណី រំលោភលើទំនុកចិត្ត កើតមាននៅចំណុចតូបលក់ចាបហួយ មួយកន្លែង ស្ថិតនៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។

របាយការណ៍បន្តថា ជនរងគ្រោះឈ្មោះ តាន់ សុផល ភេទប្រុស អាយុ៣៦ឆ្នាំ មុខរបរអាជីវករ រស់នៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប បានដឹកជនសង្ស័យ ម្នាក់ ឈ្មោះ វេត ចរិយ៉ា ភេទស្រី អាយុ១៨ឆ្នាំ មុខរបរបុគ្គលិកលក់ដូរ (លក់ចាបហួយ អោយខ្លួនគេ បានមកដាក់ពាក្យបណ្ដឹង ទៅលើជនសង្ស័យថា បានលួចប្រាក់របល់ខ្លួន ចំនួន៥៥០០ដុល្លារអាមេរិក។

របាយការណ៍បានបញ្ជាក់ថាកម្លាំងជំនាញបានធ្វើការស្ដាប់ចម្លេីយ ទៅលើ ឈ្មោះ វេត ចរិយ៉ា ភេទស្រី អាយុ១៨ឆ្នាំ ហើយជនសង្ស័យ បានឆ្លើយសារភាពថា ខ្លួនគេពិតជាបានយកប្រាក់របស់ឈ្មោះ តាន់ សុផល ជាមួយមិត្តភក្តិរបស់គេឈ្មោះ ម៉ុន ចាន់ធឿន ភេទស្រី ពិតប្រាកដមែន។ ដោយប្រាក់ដែលខ្លួនយកគឺជាប្រាក់លក់គ្រឿង ចាបហួយ បាន ជារៀងរាល់ថ្ងៃ ក្នុងរយៈពេល១ខែកន្លងមក សរុបទឹកប្រាក់ចំនួន៥៥០០ដុល្លារអាមេរិក​ ពិតប្រាកដមែន។

បើយោងតាមរបាយការណ៍បានបង្ហាញថា ករណីខាងលើត្រូវបានលោក ស្រី វ៉ា សក្កា ព្រះរាជអាជ្ញាស្តីទី បញ្ជាអោយការិយាល័យព្រហ្មទណ្ឌកសាងសំណុំរឿងបញ្ជូនទៅអយ្យការអមសាលាដំបូងខេត្ត៕SRP

ខេត្តកំពង់ចាម​៖សមាជិកគណបក្សប្រជាជន ជាង៤ពាន់នាក់ ​បានចូលរួម​​ប្រារព្ធ​ពិធី​បេីក​​យុទ្ធនាការ​ ឃោសនា​ ស្វែង​រកសំឡេងឆ្នោត នៅ​ក្នុង​ក្រុង​កំពង់ចាម​។

ពិធី​​បេីក​ការ​ឃោសនា​ នៅថ្ងៃ​ទី២១​ ខែឧសភា​ ឆ្នាំ​២០២២​នេះ​​ ក្រោមវត្តមាន លោក​​ អ៊ុន​ ចាន់ដា​​ សមាជិកគណៈកម្មាធិការកណ្តាលគណបក្សប្រជាជនកម្ពុជា និង​ជាប្រធានគណៈកម្មាធិការបក្សខេត្តកំពង់ចាម។

លោក​ អ៊ុន​ ចាន់ដា​​ បាន​ធ្វើ​ការ​ប្រកាស​បេីកយុទ្ធនាការ​ឃោសនា​ ស្វែង​រក​សំឡេង​ឆ្នោត​ ​ជ្រើសរើស​ក្រុមប្រឹក្សាឃុំ​-សង្កាត់​ អាណត្តិ​ទី​៥​ ព្រមទាំង​បានថ្លែងនូវគោលនយោបាយ សំខាន់ៗ​ របស់គណបក្សប្រជាជនកម្ពុជា​ ដោយប្រកាន់ភ្ជាប់នូវចក្ខុវិស័យរបស់ខ្លួនជាយូរអង្វែង​ ដោយប្រមូល​កម្លាំង​គ្រប់និន្នាការ​ នយោបាយ​រួបរួម​គ្នា​ កសាងប្រទេស​ជាតិ​​ឲ្យ​កាន់តែមានការ​អភិវឌ្ឍន៍រីកចម្រើន​ឡើង​ សំបូររុងរឿងស្ថិតស្ថេរគង់វង្ស​ ឲ្យ​ប្រទេសយើង​ដែលស្ថិតក្នុងឯករាជ្យជាតិ អធិតេយ្យ បូរភាព អព្យាក្រឹត្យ វឌ្ឍនៈភាព​ និងទទួលបាននូវសុភមង្គលជាតិខ្មែរតែមួយ។

គួរ​បញ្ជាក់​ផង​ដែរ​ថា​ ចំពោះ​គណបក្ស​នយោបាយ​ ដែលបាន​ចុះឈ្មោះ​ក្នុង​បញ្ជី​ គ.ជ.ប​ ដើម្បី​ធ្វើការ​ប្រកួតប្រជែង​ស្វែង​រក​សំឡេង​ឆ្នោត​គាំទ្រ​ជ្រើសរើស​ក្រុមប្រឹក្សាឃុំ​-សង្កាត់​ អាណត្តិ​ទី​៥​ ​នេះ​ ក្នុង​ខេត្តកំពង់ចាម​ គឺមាន​ចំនួន​១៣​ ​គណបក្ស​ ចំពោះ​យុទ្ធនាការឃោសនា​ស្វែង​រក​សំឡេង​ឆ្នោត​ គឺមាន​តែ​គណបក្ស​ប្រជាជន​កម្ពុជា​តែមួយ​គត់​ ដែល​បាន​ធ្វើ​ពិធី​ដង្ហែរ​ក្បួន​មាន​លក្ខណៈ​ទ្រង់ទ្រាយ​ធំ​ ជាង​គេ​ ដោយឡែក​ គណបក្ស​នយោបាយ​ ផ្សេងៗ​ទៀត​ មិន​​មាន​សកម្មភាព​អ្វី​ធំដុំ​គួរឲ្យ​កត់សម្គាល់​នោះ​ទេ​៕SRP

ខេត្តសៀមរាប៖ជនបរទេសម្នាក់ត្រូវបានកម្លាំងនគរបាលខេត្តសៀមរាប ធ្វើការឃាត់ខ្លួនភ្លាមៗ បញ្ជូនយកទៅសាកសួរនៅស្នងការដ្ឋាននគរបាលខេត្តសៀមរាប ពីបទហិង្សាដោយចេតនាមានស្ថានទម្ងន់ទោស (យកញញួរវាយជនរងគ្រោះ)។

ហេតុការណ៍អំពើហិង្សា បានកើតឡើង នៅវេលាម៉ោង១៧និង ២០នាទី ថ្ងៃទី១៨ ខែឧសភា ឆ្នាំ២០២២ នៅចំណុចមុខបន្ទប់ជួល ស្ថិតនៅភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប។

ស្នងការរងទទួលផែនការងារអន្តោប្រវេសន៍ លោក តូច សុគន្ធ បានថ្លែងប្រាប់សារព័ត៌មានសៀមរាប ប៉ុស្ដិ៍ ថា៖ ជនសង្ស័យឈ្មោះ JON LEON LOV ភេទប្រុស កើតថ្ងៃទី០៦-១០-១៩៦៥ ជនជាតិអង់គ្លេស គ្មានលិខិតឆ្លងដែនជាប់ខ្លួន គ្មានមុខរបរ ស្នាក់នៅទីតាំងកើតហេតុខាងលើ។

លោក តូច សុគន្ធ បានបន្តថា ករណីនេះជនសង្ស័យ បានធ្វើសកម្មភាព យកញញួរក្បាលដែកដងជ័រ វាយទៅលើជនរងគ្រោះ ឈ្មោះ អ៊ុយ សូរិយា ភេទស្រី អាយុ៣៨ឆ្នាំ ជនជាតិខ្មែរ ស្នាក់នៅបន្ទប់ជួលទីតាំងកើតហេតុខាងលើចំនួន០៣ញញួរ (១ញញួរ ត្រូវចំបបូរមាត់លើខាងស្តាំ បណ្តាលឲ្យបែកបបូរមាត់ហូរឈាម និងបាក់ឆ្អឹងថ្គាមខាងស្តាំ ២ញញួរទៀត ត្រូវចំក្បាលផ្នែកខាងក្រោយ បណ្តាលអោយហើមប៉ោង ត្រូវបានក្រុមគ្រួសារនិងសមត្ថកិច្ចបញ្ជូនទៅសម្រាកព្យាបាលនៅគ្លីនិកតាព្រហ្ម(ម្តុំផ្សារលើ)។

ទោះជាយ៉ាងណាពាក់ព័ន្ធនឹងករណីហិង្សាទៅលើស្ត្រីខ្មែរ បណ្ដាលឲ្យរងរបួសធ្ងន់ធ្ងរ
យ៉ាងដូច្នេះ មិនទាន់ដឹងមូលហេតុ
ចំពោះហេតុការណ៍ នេះនៅឡើយទេ ដោយជនសង្ស័យ មិនត្រូវបានសារភាព នៅពេលសមត្ថកិច្ចសាកសួរនៅស្នងការខេត្តសៀមរាប។

បើតាម លោក តូច សុគន្ធ រហូតដល់ល្ងាចថ្ងៃទី២០ ខែឧសភា ឆ្នាំ២០២២ ជនសង្ស័យ ត្រូវបានលោក ស៊ាង ណារ៉ា ចៅក្រមស៊ើបសួរនៃសាលាដំបូងខេត្តសៀមរាប សម្រេចចេញដីកាបង្គាប់អោយឃុំខ្លួនបណ្តោះអាសន្ន នៅពន្ធនាគារខេត្តសៀមរាប ដោយចោទប្រកាន់ពីបទហិង្សាដោយចេតនាមានស្ថានទម្ងន់ទោស៕SRP

ខេត្តព្រះវិហារ៖ក្រុមហ៊ុន PNT បានរងការរិះគន់ថាកំពុងបំផ្លាញព្រៃឡង់ យ៉ាងធ្ងន់ធ្ងរ។

សេចក្ដីរាយការណ៍បានឲ្យដឹងថាក្រុមហ៊ុន PNT បានធ្វើសកម្មភាព ដឹកជញ្ជូនឈើចេញពីទីតាំងនៅភូមិបង្កន ឃុំ រៀបរយ ខេត្តព្រះវិហារ ក្នុងតំបន់ ព្រៃឡង់ ឆ្លងកាត់ទៅអូងាវ ស្រុកសណ្ដាន់ ខេត្តកំពង់ធំ។

ប្រភពបន្តថាកាលពីថ្ងៃទី១៨ ខែឧសភា ឆ្នាំ២០២២ ក្រុមហ៊ុន PNT បានប្រមូលឈើ តាមរយ:ដឹកគោយន្តកន្ត្រៃ ហើយបន្តលើកដាក់ ក្នុងរថយន្តធំៗចំនួន ០៤គ្រឿង ដូចមាននៅក្នុងរូបភាពខាងក្រោមនេះ ចេញតាមក្រុមហ៊ុនចំការកៅស៊ូ ជាប់ខេត្តព្រះវិហារ។

ជុំវិញការលើកឡើងបែបនេះអង្គភាពសារព័ត៌មាន សៀមរាបប៉ុស្ដិ៍ នៅមិនទាន់ទទួលបានការបំភ្លឺពីអាជ្ញាធរជំនាញពាក់ព័ន្ធនិងតំណាងក្រុមហ៊ុននៅឡើយទេ៕SRP

ភ្នំពេញ៖សម្តេចតេជោហ៊ុន សែននាយករដ្ឋមន្ត្រី នៅរសៀលថ្ងៃព្រហស្បតិ៍នេះ បានបង្ហោះសារនៅលើគេហទំព័រហ្វេសប៊ុកផ្លូវការរបស់សម្ដេច ថានៅម៉ោង១ និង៣០ រំលងអាធ្រាតឆ្លងចូលថ្ងៃទី២១ ឧសភា២០២២ខានស្អែកនេះខ្ញុំនឹងដឹកនាំគណប្រតិភូកម្ពុជាដើម្បីចូលរួមវេទិការ សេដ្ឋកិច្ចពិភពលោកនៅទីក្រុង
ដាវ៉ូសប្រទេសស្វីស។

សម្ដេចបានសរសេរបន្តថា ខ្ញុំសូមអរគុណចំពោះ បងប្អូនជនរួមជាតិដែលកំពុងរស់នៅបណ្តាប្រទេសនៅទ្វីបអឺរ៉ុប ដែលបានចេញវីដេអូអបអរសាទរដំណើររបស់ខ្ញុំទៅកាន់តំបន់អឺរ៉ុប។

សម្ដេច បន្តថា តាមការគ្រោងទុកខ្ញុំនឹងជួបបងប្អូនខ្មែរយើងនៅសូរិក ប្រទេសស្វីសនៅល្ងាចថ្ងៃទី២១ឧសភា២០២២។
សូមជំរាបលាបងប្អូនជនរួមជាតិនៅក្នុងប្រទេសមួយរយ:ខ្លីហើយនិងជួបបងប្អូនជនរួមជាតិ នៅតំបន់អឺរ៉ុបក្នុងពេលប្រម៉ាណ៦០ម៉ោងទៀត៕SRP

ខេត្តបាត់ដំបង៖អភិបាលខេត្តបាត់ដំបង លោក សុខ លូ និងជាប្រធានក្រុមការងាររាជរដ្ឋាភិបាល ចុះមូលដ្ឋានក្រុងបាត់ដំបង

នៅថ្ងៃព្រហស្បតិ៍ នេះបានអញ្ជើញ ជួបសំណេះសំណាលជាមួយប្រជាពលរដ្ឋដែលរស់នៅភូមិអណ្ដូងចេញ សង្កាត់អូរចារ ក្រុងបាត់ដំបង ចំនួន ៨២៨នាក់ នៅផ្សារទំនើបភួពុយ។

ឆ្លៀតក្នុងឱកាសនោះដែរ លោកសុខ លូ បាននាំយក ប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តបាត់ដំបង និងលោកជំទាវ ដែលសម្ដេចតែងតែគិតគូរដល់សុខទុក្ខប្រជាពលរដ្ឋ នៅក្នុងខេត្តបាត់ដំបងជានិច្ច និងបានផ្ដាំផ្ញើដល់ប្រជាពលរដ្ឋទាំងអស់ ចូរថែរក្សាសុខភាពឱ្យបានល្អ តាមរយៈការហូបស្អាត រស់នៅស្អាត និងពិសារទឹកស្អាត និងត្រូវបន្តសំអាតបរិស្ថានសណ្ដាប់ធ្នាប់ផ្ទះឱ្យស្អាតជានិច្ច ។

លោក បានមានប្រសាសន៍បន្តទៀតថា សម្រាប់ការបោះឆ្នោតក្រុមប្រឹក្សា ឃុំ សង្កាត់ នាពេលខាងមុខនេះ សូមប្រជាពលរដ្ឋទាំងអស់ ចូលរួមបោះឆ្នោតឲ្យបានគ្រប់ៗគ្នាចំពោះប្រជាពលរដ្ឋគ្រប់អាយុបោះឆ្នោត ដើម្បីបំពេញតួនាទីក្នុងនាមជាប្រជាពលរដ្ឋគំរូសម្រាប់សង្គមជាតិ ។ ឯកឧត្តម បានបន្តទៀតថា សម្រាប់ប្រជាពលរដ្ឋណាដែលគ្មាន ឬបាត់អត្តសញ្ញាណប័ណ្ណ សូមរាយការណ៍មកអាជ្ញាធរមូលដ្ឋាន ដើម្បីរៀបចំធ្វើអត្តសញ្ញាណប័ណ្ណថ្មីជូន ឬដើម្បីរៀបចំឯកសារបញ្ជាក់អត្តសញ្ញាណប័ណ្ណ សម្រាប់ត្រៀមលក្ខណៈក្នុងការងារបោះឆ្នោតខាងមុខនេះ ព្រោះបើគ្មានអត្តសញ្ញាណប័ណ្ណទេ ក៏មិនអាចបោះឆ្នោតបានដែរ។

លោក សុខ លូ បានអំពាវនាវដល់ប្រជាពលរដ្ឋទាំងអស់សូមថែរក្សាសន្ដិភាព ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ដែលសម្ដេចខិតខំស្វែងរកមធ្យោបាយគ្រប់បែបយ៉ាងដើម្បីប្រទេសមានសុខសន្ដិភាព ហើយបើសិនជារក្សាបាននូវសុខសន្ដិភាពនេះ នឹងធ្វើឱ្យប្រទេសកម្ពុជាកាន់តែមានការរីកចម្រើន អភិវឌ្ឍន៍ឈានទៅមុខបន្តទៀត ជាពិសេសនឹងក្លាយជាប្រទេសអភិវឌ្ឍន៍នាឆ្នាំ២០៥០ ខាងមុខនេះ ។

លោក ក៏បានធ្វើការអំពាវនាវដល់ប្រជាពលរដ្ឋទាំងអស់ ដែលបានចាក់វ៉ាក់សាំងកូវីដ-១៩ដូសទី៣ ឬដូសជំរុញរួចរាល់ សូមរួសរាន់ទៅបន្តទទួលការចាក់វ៉ាក់សាំងកូវីដ-១៩ ដូសទី៤ ក្រោយរយៈពេល៣-៤ខែបន្ទាប់ពីចាក់ដូសទី៣រួចរាល់ នៅតាមមណ្ឌលចាក់វ៉ាក់សាំងកូវីដ-១៩ ដែលនៅជិតផ្ទះប្រជាពលរដ្ឋរស់នៅ ឬអាចមកទទួលការចាក់វ៉ាក់សាំងកូវីដ-១៩បានភ្លាមៗ ដោយរដ្ឋបាលខេត្តបាត់ដំបងបានធ្វើការរៀបចំក្រុមគ្រូពេទ្យចាក់វ៉ាក់សាំងកូវីដ-១៩ នៅទីកន្លែងសំណេះសំណាលផ្ទាល់តែម្ដង ដោយប្រជាពលរដ្ឋមិនពិបាកវិលត្រឡប់មកចាក់សារជាថ្មីម្ដងទៀត៕SRP

ខេត្តសៀមរាប៖សួនរុក្ខជាតិអង្គរដែលជាប្រភេទរមណីយដ្ឋានកែច្នៃ ទំហំជាង១៥ ហិកតារ ក្នុងក្រុងសៀមរាប ដោយអាចចាត់ទុកថាជាសួនមានលក្ខណៈពិសេស លើសសួនកំសាន្តដទៃទៀត នៅក្នុងប្រទេសកម្ពុជា បានបើកសម្ពោធជាផ្លូវការហើយ នៅថ្ងៃព្រហស្បតិ៍ ទី១៩ ខែឧសភា ឆ្នាំ២០២២នេះ។

ពិធីបើកសម្ពោធដាក់ឱ្យប្រើប្រាស់ជាផ្លូវការនេះ ធ្វើឡើងក្រោមអធិបតីភាព ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ លោកជា សុផារ៉ា ដោយមានការអញ្ជើញចូលរួមពីលោកជំទាវបណ្ឌិតសភាចារ្យ ភឿងសកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងអគ្គនាយកនៃអាជ្ញាធរជាតិអប្សរាព្រមទាំងអភិបាលខេត្តសៀមរាប ផងដែរ។

លោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈនិងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានថ្លែងដោយមោទនភាព នៅក្នុងឱកាសបើកសម្ពោធជាផ្លូវការសួនរុក្ខជាតិអង្គរនោះថាក្នុងរយៈពេល ១ខែ ឬ១ខែកន្លះ បន្ទាប់ពីបើកសម្ពោធជាផ្លូវការនេះ គឺអាជ្ញាធរអប្សរានឹងបើកឱ្យ សាធារណជនបានចូលទៅទស្សនាដោយឥតគិតថ្លៃ ។បន្ទាប់ពីនោះ គឺមានការលក់សំបុត្រ ឱ្យភ្ញៀវចូលទស្សនាសួនរុក្ខជាតិអង្គរក្នុងតម្លៃមួយដ៏សមរម្យដើម្បីបានថវិកា យកទៅថែរក្សានិងអភិវឌ្ឍន៍សួននេះ ឱ្យកាន់តែប្រសើរ។

សួនរុក្ខជាតិអង្គរជារមណីយដ្ឋានកៃច្នៃនៅក្នុងក្រុងសៀមរាប មានដាំរុក្ខជាតិចម្រុះរាប់ម៉ឺនដើម នៃពូជជាង៥០០ប្រភេទ ដូចជាដើមផ្កា ស្មៅ ឈើហូបផ្លែ ដោយអាចចាត់ទុកថាជាសួនមានលក្ខណៈពិសេសលើសសួនកំសាន្តដទៃទៀត នៅក្នុងប្រទេសកម្ពុជា ដោយសារតែសួននេះ ស្ថិតក្នុងរចនាបទបែបខ្មែរ មានដាំបន្លែចម្រុះជាច្រើនមុខ មានសួនរុក្ខជាតិធ្វើឱសថ សួនគ្រឿងទេស សួនអំបូរត្នោត សួនលំនៅដ្ឋានខ្មែរ សួនព្រៃឈើ និងបន្ថែមលើនេះ ក៏មានសួនសត្វជាច្រើនប្រភេទដូចជាអណ្តើក ក្ងោក ព្រាប ទន្សាយនិងសត្វស្លាបប្រវាំងជាដើមនៅក្នុងនោះដែរ។
កាលពីឆ្នាំ២០០៥ សួនរុក្ខជាតិអង្គរនេះ គឺជាសួនគ្រឿងទេស ដែលមានទំហំដីត្រឹមជាង២ហិកតាប៉ុណ្ណោះ។ នៅឆ្នាំ២០១០ អាជ្ញាធរជាតិអប្សរា បានរៀបចំពង្រីកសួននេះ ឱ្យកាន់តែធំដោយរៀបចំប្រព័ន្ធទឹក ដែលមានប្រភពពីស្ទឹងសៀមរាប ដើម្បីស្រោចស្រព រុក្ខជាតិទាំងនេះ ហើយនៅឆ្នាំ២០១៨ អាជ្ញាធរ ក៏បានដាក់បន្ថែមសត្វជាច្រើនប្រភេទ ដូចជាអណ្តើក ក្ងោក ព្រាប ទន្សាយជាដើម នៅក្នុងសួននេះថែមទៀត។

ក្រុមអ្នកជំនាញនៃអាជ្ញាធរជាតិអប្សរាឱ្យដឹងថា សួនរុក្ខជាតិអង្គរនេះ ត្រូវបានបំផុសគំនិតរៀបចំឡើងឱ្យមានភាពទាក់ទាញខុសប្លែកពីសួនដទៃទៀត ជាច្រើន ជាពិសេសគឺមានដាំដើមឈើនិងរុក្ខជាតិកម្រៗជាច្រើនប្រភេទ ដោយពូជឈើខ្លះ នាំមកពីក្រៅប្រទេ ប្រយោជន៍សម្រាប់ឱ្យកូនខ្មែរនិងអ្នកទេសចរណ៍ជំនាន់ក្រោយៗ បានស្គាល់ និងអាចមកសិក្សាស្រាវជ្រាវបាន។

សួនរុក្ខជាតិអង្គរនេះ បានបែងចែកទៅជា៥ផ្នែក គឺផ្នែកទី១ជាសួនគ្រឿងទេសនិងសួនរុក្ខជាតិឱសថ ផ្នែកទី២គឺជាសួនផ្កាស្មៅនិងផ្កាចម្រុះ ផ្នែកទី៣ជាសួនអំបូរត្នោត ដែលដាំរុក្ខជាតិអំបូរត្នោតច្រើនប្រភេទ។ ចំណែកផ្នែកទី៤ជាសួនខ្មែរ ដែលប្រមូលផ្តុំដោយឈើហូបផ្លែច្រើនប្រភេទមានទាំងឈើហូបផ្លែក្នុងប្រទេសនិងឈើនាំចូលពីបរទេសផង។ ចំពោះផ្នែកទី៥វិញ គឺសួនព្រៃឈើនិងសត្វព្រៃអង្គរ ដែលសួននេះជាផ្នែកមួយនៃព្រៃឈើ ក្នុងតំបន់រមណីយដ្ឋានអង្គរ ប៉ុន្តែវាត្រូវបានកែច្នៃ ឱ្យមានផ្លូវដើរមានទឹកដើម្បីឱ្យកាន់តែមានសម្រស់និងភាពទាក់ទាញថែមទៀត។

ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ បានគាំទ្រចំពោះក្រសួងវប្បធម៌និងវចិត្រសិល្បៈ ជាមួយនិងអាជ្ញាធរអប្សរាដែលបានបង្កើតជាសួនរុក្ខជាតិអង្គរដ៏មានសារសំខាន់មួយនេះឡើង។

លោកជា សុផារ៉ា មានប្រសាសន៍ថា៖ សួនរុក្ខជាតិអង្គរនេះ មានលក្ខណៈពិសេសណាស់ក្នុងការអភិរក្សរុក្ខជាតិខ្មែរសំខាន់ៗ ជាពិសេស គឺរុក្ខជាតិដែលអាចយកមកផ្សំធ្វើជាឱសថព្យាបាលរោគផងនោះ។ «សួនរុក្ខជាតិអង្គរនេះក្រៅតែពីដាំរុក្ខជាតិអាចផ្សំជាឱសថ ដែលជាគំនិតដ៏សំខាន់នោះ វាក៏មានប្រយោជន៍សំខាន់មួយទៀតគឺជួយដល់វិស័យបរិស្ថាន នៃដំណើរការប្រែប្រួលអាកាសធាតុ ដោយបានផ្ដល់ជាម្លប់និងបញ្ចេញអុកហ្ស៊ីហ្សែន Oxygen សម្រាប់ប្រព័ន្ធដកដង្ហើមផងដែរ»។

លោកជា សុផារ៉ាមានប្រសាសន៍ទៀតថាការផ្ដួចផ្ដើមគំនិតបង្កើតសួនរុក្ខជាតិអង្គរ ដើម្បីជួយដល់ការប្រែប្រួលអាកាសធាតុនៅតំបន់អង្គរនេះ ចាត់ទុកថាជាការលើកស្ទួយដល់វិស័យបរិស្ថានផងនិងលើកស្ទួយដល់សុខភាពសាធារណនិងភ្ញៀវទេសចរណ៍ផង។

លោមជា សុផារ៉ាក៏បានសំណូមពរឱ្យ ក្រសួងវប្បធម៌និងវិចិត្រសិល្បៈ តាមរយៈ អាជ្ញាធរជាតិអប្សរា គួរធ្វើការកិច្ចសហការ ជាមួយក្រសួងកសិកម្ម រុក្ខាប្រមាញ់និងនេសាទ ដើម្បីស្នើសុំឱ្យក្រសួងកសិកម្ម ជួយផ្ដល់ពូជឈើនិងរុក្ខជាតិព្រមទាំងអ្នកបច្ចេកទេសផង ដើម្បីធ្វើការពង្រីកនិងអភិវឌ្ឍន៍សួនរុក្ខជាតិអង្គរនេះ ឱ្យកាន់តែមានទំហំធំព្រមទាំងសំបូរបែប ដោយរុក្ខជាតិបន្ថែមទៀត។

មន្ត្រីអាជ្ញាធរជាតិអប្សរារំពឹងថាសួនរុក្ខជាតិអង្គរនេះ អាចនឹងផ្ដល់ជាផលិតផលទេសចរណ៍ថ្មីថែមទៀតក្នុងការទាក់ទាញភ្ញៀវទេសចរណ៍ដែលមកដល់ទឹកដីខេត្តសៀមរាប ឱ្យចាប់អារម្មណ៍និងចូលមកកំសាន្ត ដើរលំហែរកាយ ក៏ដូចជាការដើរហាត់ប្រាណបន្ទាប់ពីគេបានទៅទស្សនាតំបន់រមណីយដ្ឋានអង្គររួចហើយនោះ។

អាជ្ញាធរជាតិអប្សរាឱ្យដឹងថាសម្រាប់អនាគត គេនៅតែមានគំរោងពង្រីកសួនរុក្ខជាតិអង្គរមួយនេះឱ្យបានទំហំធំ រហូតដល់ ១៣០ហិកតារ គឺលាតសន្ធឹងផ្ទៃដី រហូតទៅដល់ព្រំប្រទល់ កស្សិណទឹកខាងត្បូងនៃប្រាសាទអង្គរវត្ត ដើម្បីព្រលែងសត្វព្រៃឱ្យរស់នៅក្នុងតំបន់សួននោះ បានកាន់តែច្រើន។

សូមជម្រាបថា សួនរុក្ខជាតិអង្គរ ស្ថិតនៅ ទល់មុខសាលាអេសអូអេស តាមបណ្ដោយផ្លូវទៅអង្គរវត្ត៕SRP