ខេត្តបាត់ដំបង៖លោកសុខ លូ អភិបាលខេត្តបាត់ដំបង បានឲ្យដឹងថាទោះបីខេត្តបាត់ដំបង ជាខេត្តកសិកម្មពិតមែន តែក៏នៅមានបញ្ហាផងដែរ គឺមានការខ្វះខាតរោងចក្រ ឬសិប្បកម្មកែឆ្នៃផលិតផលកសិកម្ម ហើយនេះជាកង្វល់របស់ខេត្ត។

លោកបានស្នើដល់ ឯកអគ្គរដ្ឋទូតនៃសាធារណរដ្ឋសហព័ន្ធ អាល្លឺម៉ង់ប្រចាំនៅប្រទេសកម្ពុជា ជួយជំរុញផ្សព្វផ្សាយដល់អ្នកវិនិយោគទុន ឱ្យមកធ្វើការវិនិយោគទុនមកខេត្តបាត់ដំបង និងបន្តជួយ លើគំរោងផ្សេងទៀតនៅខត្តបាត់ដំបង។

ការស្នើនេះធ្វើឡើងនៅរសៀលថ្ងៃអង្គារទី១៥ ខែកុម្ភៈម្សិលមិញ ក្នុងឱកាសអនុញ្ញាត ទទួលជួបសម្ដែងការគួរសមជាមួយ លោក Christian Berger ឯកអគ្គរដ្ឋទូតនៃសាធារណរដ្ឋ សហព័ន្ធអាល្លឺម៉ង់ប្រចាំនៅប្រទេសកម្ពុជា ដើម្បីពិភាក្សាការងារ ទាក់ទងនឹងកិច្ចសហប្រតិបត្តិការ និងកម្មវិធីគាំទ្រដែលត្រូវបានកំពុង និងបន្តអនុវត្តជាមួយនឹងរដ្ឋបាលខេត្តបាត់ដំបង។

លោកសុខ លូ បានមានប្រសាសន៍ស្វាគមន៍ដល់ លោក ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ និងគណៈប្រតិភូ ដែលបានអញ្ជើញមកទស្សនៈកិច្ច នៅខេត្តបាត់ដំបង ហើយគណៈប្រតិភូមានការចាប់អារម្មណ៍ ថាជាខេត្តដែលមានសក្តានុពលលើវិស័យកសិកកម្ម ទេសចរណ៍ និងវិស័យមួយចំនួនទៀត។

លោក Christian Berger បានលើកឡើងផងដែរថា អាល្លឺម៉ង់ តាមរយៈអង្គការ GIZ បានធ្វើការងារជាច្រើននៅក្នុងខេត្តបាត់ដំបង ក្នុងនោះក៏មានកម្មវិធី វិមជ្ឈរកា និងវិសហមជ្ឈការ និងការផ្តល់សេវា ជូនប្រជាពលរដ្ឋ។

លោកក៏បានលើកឡើង និងមានការចាប់អារម្មណ៍ ទៅការៀបចំសោភ័ណភាព ក្នុងក្រុង ព្រោះខេត្តបាត់ដំបង មានលក្ខណៈពិសេសជាងខត្តដ៏ទៃ តាមខេត្តដែល លោក ធ្លាប់ទៅដល់ ហើយខេត្តបាត់ដំបងនេះ ជាខេត្តមរតក ដែលសម្បូណ៍ទៅដោយសំណង់អគារបុរាណប្រវត្តិសាស្រ្ត ជាច្រើន។

លោកសុខ លូ ក៏បានលើកឡើងអំពីផែនការរបស់ខេត្ត ក្នុងការរៀបចំសោភ័ណភាព អនាម័យ បរិស្ថាន និងសណ្តាប់ធ្នាប់ នៅក្នុងខេត្តបាត់ដំបង ជាពិសេសទៅលើការគ្រប់គ្រងកាកសំណល់រឹង គឺសំរាម ជនអាណាថា និងសំណង់អាណាធិបតេយ្យ ជាដើម៕SRP

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយ ឯកឧត្តម មិកាមិ ម៉ាសាហ៉ីរុ ឯកអគ្គរដ្ឋទូតជប៉ុនប្រចាំនៅកម្ពុជា នៅព្រឹកថ្ងៃពុធ ទី១៦ ខែកុម្ភៈ ឆ្នាំ២០២២ នឹងអញ្ជើញសម្ពោធដាក់ឱ្យប្រើប្រាស់ស្ពាន៧កន្លែង ស្ថិតនៅក្នុងខេត្តក្រចេះ និងព្រៃវែង ជាជំនួយរបស់រដ្ឋាភិបាលជប៉ុន តម្លៃប្រមាណ ៣៥លានដុល្លារអាមេរិក។

ស្ពានទាំង ៧កន្លែងនេះ គឺជាគម្រោងសាងសង់ស្ពានឡើងវិញបន្ទាន់នៅតំបន់ទាំងនោះដែលប្រឈមនឹងទឹកជំនន់ ស្ថិតនៅទីតាំងភូមិសាស្រ្តខេត្តក្រចេះ និងខេត្តព្រៃវែង ដែលស្ពានទាំងអស់មានប្រវែងសរុប ៦៧០ម៉ែត្រ និងផ្លូវតភ្ជាប់ស្ពានមានប្រវែងសរុប ៣,៤២៤ម៉ែត្រ។

ស្ពានដែលបានសាងសង់នេះ រួមមាន៖
– ស្ពានចំនួន៥កន្លែង ស្ថិតនៅក្នុងខេត្តក្រចេះ តាមបណ្តោយផ្លូវជាតិលេខ៧៣ រួមមាន៖ ស្ពានព្រែកសណ្តាន់ ប្រវែង ៣៥ម៉ែត្រ, ស្ពានព្រែកឬស្សី ប្រវែង ៦២ម៉ែត្រ, ស្ពានអន្លង់ឃ្លេ ប្រវែង ៤៨ម៉ែត្រ, ស្ពានព្រែកឆ្លូង ប្រវែង ១៤០ម៉ែត្រ, និងស្ពានពាមទេរប្រវែង ១៧៥ម៉ែត្រ។

– ស្ពានចំនួន២កន្លែង ស្ថិតនៅក្នុងខេត្តព្រៃវែង តាមបណ្តោយផ្លូវជាតិលេខ១១ រួមមាន៖ ស្ពានបាបោងលេខ១ ប្រវែង ១០៥ម៉ែត្រ និងស្ពានបាបោងលេខ២ ប្រវែង ១០៥ម៉ែត្រ។

គម្រោងខាងលើនេះ បានស្ថាបនាច្រាំងការពារការហូរច្រោះទឹកជំនន់ និងត្រូវបានស្ថាបនាជាប្រភេទស្ពានបេតុងក្រាលកៅស៊ូ AC កម្រាស់ ១០សង់ទីម៉ែត្រ។ គម្រោងសាងសង់ស្ពានទាំង ៧កន្លែងនេះ គឺជាហិរញ្ញប្បទានឥតសំណងពីរដ្ឋាភិបាលនៃប្រទេសជប៉ុន ជូនដល់រាជរដ្ឋាភិបាលកម្ពុជា។

សមិទ្ធផលថ្មីនេះ គឺជាចំណងដៃដ៏ថ្លៃថ្លាមិនអាចកាត់ថ្លៃបាន ដែលកើតចេញពីចំណងមិត្តភាព និងកិច្ចសហប្រតិបត្តិការរវាង រាជរដ្ឋាភិបាលកម្ពុជា និងរាជរដ្ឋាភិបាលនៃប្រទេសជប៉ុន ជូនដល់បងប្អូនប្រជាពលរដ្ឋ ខេត្តក្រចេះ ខេត្តព្រៃវែង ព្រមទាំងបងប្អូន ប្រជាពលរដ្ឋនៅទូទាំងប្រទេស ដើម្បីប្រើប្រាស់ជាប្រយោជន៍ទូទៅ និងយូរអង្វែង៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានព្រមានផ្ដាច់កុងត្រា ក្រុមហ៊ុនប្រមូលសំរាម បើសិនមិនគោរពគោលការណ៍។
អភិបាលខេត្តបានព្រមានថាបើសិនជាក្រុមហ៊ុនប្រមូលសំរាម មិនបានគោរពតាមគោលការណ៍ និងកាតព្វកិច្ចរបស់ខ្លួនទេ នឹងឈានទៅរកការផ្ដាច់កុងត្រា ទាំងស្រុងតែម្ដង។

លោកលើកឡើងថាក្រុមហ៊ុនសំរាមនៅក្នុងខេត្ត ក៏ត្រូវមានកាតព្វកិច្ចមួយ គឺយកសំរាមឲ្យបានទៀងទាត់ និងឲ្យអស់នៅតាមមន្ទីរអង្គភាព និងនៅតាមសាធារណៈនានា ឲ្យបានកាន់តែឆាប់រហ័ស និងស្អាតផងដែរ។ 

ការព្រមាននេះធ្វើឡើង នៅក្នុងឱកាស ដឹកនាំកិច្ចប្រជុំណែនាំអនុវត្តផែនការធ្វើឲ្យប្រសើរឡើងនូវសោភ័ណភាព បរិស្ថាន អនាម័យទូទាំងខេត្តបាត់ដំបង នៅថ្ងៃអង្គារ ទី១៥ ខែកុម្ភៈ ឆ្នាំ២០២២នេះ។

លោកសុខ លូ ក៏ប្រាប់អភិបាលក្រុង ស្រុក រៀបចំកិច្ចប្រជុំជាមួយជាមួយ គណៈអភិបាល ដើម្បីស្វែងរកក្រុមហ៊ុនវិនិយោគ ផ្នែកប្រមូលសំរាមក្នុងស្រុក និងស្វែងរកទីលាន ចាក់សំរាមដែលទំនេរ ហើយចំពោះស្ទឹង ប្រឡាយ អូរគឺដាច់ខាតមិន ត្រូវមានសំរាមឡើយ និងនាំគ្នាចូលរួមក្នុងការរើសសំរាម ជាប្រចាំ ដោយមិនចាំបាច់មានទិវាអនាម័យអ្វីឡើយ ដើម្បីជាគំរូដល់ប្រជាពលរដ្ឋ និងដើម្បីសហគមន៍ស្អាតទាំងអស់គ្នា។

លោកសុខ លូ បានលើកឡើងថា ចំពោះកិច្ចការងារសោភ័ណភាព បរិស្ថាន អនាម័យ មិនមែនសំដៅតែក្នុងក្រុងបាត់ដំបង តែមួយមុខប៉ុណ្ណោះទេ ពោលគឺត្រូវធ្វើទូទាំងខេត្តបាត់ដំបងតែម្ដង ក្នុងនោះមន្ទីរអង្គភាពជុំវិញខេត្ត ត្រូវតែមានកាតព្វកិច្ចមួយដ៏សំខាន់ គឺត្រូវតែមានការរៀបចំជាធុងសំរាម និងកន្លែងដាក់សំរាម បានត្រឹមត្រូវ ដើម្បីរៀបចំឲ្យក្រុមហ៊ុនប្រមូលសំរាមអាចប្រមូលសំរាមបានកាន់តែរហ័ស និងងាយស្រួល។ 

លោកសុខ លូ បានបន្តទៀតថា បច្ចុប្បន្ននេះ ចាប់ផ្ដើមមានផ្លែផ្កាជាបណ្ដើរៗហើយ ដោយមានការប្រែប្រួលច្រើន ជាពិសេសបរិស្ថានជុំវិញផ្សារធំបាត់ដំបង(ផ្សារណាត់) ចាប់ផ្ដើមមានការទុកដាក់សំរាម មានរបៀបរៀបរយ ជាងមុន។ ដោយលែងមានសំរាម សល់ទុកចោលរាប់ថ្ងៃដូចមុនទៀតឡើយ ដូចនេះប្រជាពលរដ្ឋ ត្រូវតែបន្តចូលរួមជាមួយអាជ្ញាធរ ដើម្បីសោភ័ណភាពទីក្រុងរបស់យើង ហើយឥលូវនេះ យើងកំពុងសិក្សាអំពីការដាក់កាម៉េរ៉ា តាមដងផ្លូវដោយក្នុងគោលបំណងទី១ គឺដើម្បីពិនិត្យមើលសុខសុវត្ថិភាពនៅតាមដងផ្លូវ ទី២ពិនិត្យមើលអ្នកចោលសំរាម នៅតាមទីសាធារណៈ ដើម្បីពិន័យអ្នកដែលចោលសំរាម ផ្ដេសផ្ដាសនៅតាមសាធារណៈ។

លោក ក៏បានក្រើនរំលឹកដល់អភិបាលក្រុងស្រុក ត្រូវតែមានការប្រជុំច្បាស់លាស់ជាមួយចៅសង្កាត់ មេឃុំ មេភូមិ ដើម្បីឲ្យមានការផ្សព្វផ្សាយដល់ប្រជាពលរដ្ឋ ស្ដីពីការចាក់វ៉ាក់សាំងកូវីដ-១៩ ដូសជំរុញ ហើយបើសិនជាអាច ត្រូវតែរៀបចំក្រុមគ្រូពេទ្យចុះទៅចាក់វ៉ាក់សាំងដល់លំនៅដ្ឋានរបស់គាត់ ព្រោះឥឡូវនេះ សញ្ញាណនៃជំងឺកូវីដ-១៩ ប្រភេទអូមីក្រុងកំពុងតែផ្ទុះជាសហគមន៍ធ្ងន់ធ្ងរ នៅឯរាជធានីភ្នំពេញ ដូចនេះយើងត្រូវត្រៀមលក្ខណៈជាបន្ទាន់ទប់ស្កាត់ឲ្យដោយនាំគ្នាចូលរួមចាក់វ៉ាក់សាំងដូសជំរុញទាំងអស់គ្នា៕SRP

តូក្យូ៖លោក HAYASHI Yoshimasa រដ្ឋមន្ត្រីការបរទេសនៃប្រទេសជប៉ុន បានបង្ហាញនូវចំណាប់អារម្មណ៍ និងទស្សនៈផ្ទាល់ខ្លួនថា លោក ហ៊ុន ម៉ាណែត មិនត្រឹមតែជាបញ្ញាវ័ន្តផ្នែកសេដ្ឋកិច្ចប៉ុណ្ណោះទេ ប៉ុន្តែក៏ជាអ្នកនយោបាយជាន់ខ្ពស់ប្រកបដោយទស្សនវិស័យផងដែរ ។

ការលើកឡើងបែបនេះក្នុងពេលដែលលោក HAYASHI Yoshimasa បានជួបជាមួយលោក ហ៊ុន ម៉ាណែត នៅទីស្តីការក្រសួងការបរទេសនៃប្រទេសជប៉ុន កាលពីរសៀលថ្ងៃទី ១៤ ខែ កុម្ភៈ ឆ្នាំ ២០២២ ម្សិលមិញនេះ ។

លោករដ្ឋមន្ត្រីការបរទេស ក៏បានបង្ហាញអំពីការប្តេជ្ញាចិត្តរបស់ជប៉ុនក្នុងការបន្តជួយដល់ដំណើរការកសាង និងអភិវឌ្ឍប្រទេសកម្ពុជាឱ្យបានរីកចម្រើនរុងរឿងតទៅមុខទៀត ទន្ទឹមនឹងការបន្តគាំទ្រកម្ពុជាក្នុងគ្រប់កាលៈទេសៈ ស័ក្ដិសមជាដៃគូយុទ្ធសាស្ត្រ ។ លើសពីនេះ លោក រដ្ឋមន្ត្រី ក៏បានបង្ហាញអំពីការគាំទ្រផងដែរចំពោះដំណើរការបោះឆ្នោតនៅកម្ពុជានៅឆ្នាំក្រោយនេះ ស្របតាមគោលការណ៍ប្រជាធិបតេយ្យ ។

ពាក់ព័ន្ធនឹងបញ្ហាមីយ៉ាន់ម៉ា លោក ហ៊ុន ម៉ាណែត បានជម្រាបជូន លោក រដ្ឋមន្ត្រី អំពីជំហរ របស់សម្តេចតេជោ នាយករដ្ឋមន្ត្រី ក្នុងនាមប្រធានអាស៊ានលើការដោះស្រាយវិបត្តិនៅក្នុងប្រទេសនេះ គឺធ្វើយ៉ាងណាបញ្ចៀសអំពើហិង្សា រៀបចំការផ្ដល់ជំនួយមនុស្សធម៌ និងការបើកច្រកសម្រាប់ការបំពេញភារកិច្ចរបស់ប្រេសិតពិសេសប្រធានអាស៊ាន ស្របតាមធម្មនុញ្ញអាស៊ាន និងចំណុចឯកច្ឆន្ទទាំង៥ របស់អាស៊ាន ក៏ដូចជាធ្វើយ៉ាងណាឱ្យអាស៊ានអាចរក្សាបាននូវមជ្ឈភាព និងពង្រឹងសាមគ្គីភាព ។ លោក ក៏បានបញ្ជាក់បន្ថែមអំពីគំនិតផ្ដួចផ្តើមរបស់កម្ពុជាក្នុងការបង្កើតយន្តការ Troika (កម្ពុជា ប្រ៊ុយណេ និងឥណ្ឌូណេស៊ី) ដើម្បីតាមដានបទឈប់បាញ់ និងវឌ្ឍនភាពនៃការអនុវត្តចំណុចឯកច្ឆន្ទទាំង៥ របស់អាស៊ាន ។

ជាការឆ្លើយតប លោក រដ្ឋមន្ត្រីការបរទេសជប៉ុន បានសម្តែងនូវការគាំទ្រចំពោះកិច្ចខិតខំប្រឹងប្រែងរបស់កម្ពុជា ក្នុងការដោះស្រាយបញ្ហានៅមីយ៉ាន់ម៉ា ក្នុងនាមជាប្រធានអាស៊ានឆ្នាំ ២០២២ ជាពិសេស បានវាយតម្លៃខ្ពស់ចំពោះភាពច្នៃប្រឌិតរបស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លើការកែច្នៃសភាពការណ៍ ដើម្បីស្វែងរកដំណោះស្រាយចំពោះវិបត្តិនេះ ដែលនេះគឺជាចំណុចគន្លឹះ និងជាជោគជ័យនៃសិល្បៈដឹកនាំរបស់ សម្តេច នៅក្នុងការបំពេញតួនាទីដោះស្រាយកិច្ចការអន្តរជាតិ ។

គួរបញ្ជាក់ផងដែរថា តបតាមការអញ្ជើញរបស់រាជរដ្ឋាភិបាលជប៉ុន តាមរយៈ សម្តេចតេជោ ហ៊ុន សែន លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយុទ្ធពលខេមរភូមិន្ទ មេបញ្ជាការកងទ័ពជើងគោក កំពុងដឹកនាំគណៈប្រតិភូជាន់ខ្ពស់កងទ័ពជើងគោក បំពេញទស្សនកិច្ចផ្លូវការរយៈពេល ០៤ ថ្ងៃ ចាប់ពីថ្ងៃទី ១៤ ដល់ថ្ងៃទី ១៧ ខែ កុម្ភៈ ឆ្នាំ២០២២ នៅក្នុងប្រទេសជប៉ុន ស្របពេលដែលប្រមុខរាជរដ្ឋាភិបាលនៃប្រទេសទាំងពីរ (កម្ពុជា-ជប៉ុន) បានឯកភាពគ្នាប្រារព្ធខួបទី៣០ ឆ្នាំ នៃប្រតិបត្តិការរក្សាសន្តិភាព (PKO) របស់ជប៉ុននៅកម្ពុជា ហើយដែលប្រតិបត្តិការនេះ ជាប្រតិបត្តិការក្រៅប្រទេសលើកទី១ របស់កងកម្លាំងស្វ័យការពារជប៉ុន ក្នុងក្របខ័ណ្ឌអង្គការសហប្រជាជាតិ ៕SRP

ខេត្តត្បូងឃ្មុំ​៖លោក ជាម ច័ន្ទសោភ័ណ អភិបាលខេត្តត្បូងឃ្មុំ បានប្រាប់ដល់ប្រជាពលរដ្ឋ ឲ្យបន្តទៅ​ចាក់វ៉ាក់សាំង ការពារជំងឺកូវីដ១៩ ដូសជំរុញបន្ថែមទៀត ឲ្យបានគ្រប់ៗគ្នា ដោយត្រូវបន្តអនុវត្តតាមវិធានការរបស់ក្រសួងសុខាភិបាល ៣ការពារ ៣កុំ​ ដើម្បីចៀសឆ្ងាយ ពីជំងឺដ៏កាចសាហាវនេះ។

លោកថ្លែង​បែប​នេះ​ក្នុង​ឱកាស​សម្ពោធដាក់ឲ្យប្រើប្រាស់ជាផ្លូវការ នូវមជ្ឈមណ្ឌលតះហ្វីសហ៊្សលគូរអាន់នូរ និងសាលាបឋមសិក្សារអាននូរ ស្ថិតក្នុងភូមិតាប៉ាវបំពេញទេស ឃុំរការពរប្រាំ ស្រុកត្បូងឃ្មុំ ខេត្តត្បូងឃ្មុំ នៅថ្ងៃទី១៤ ខែកុម្ភៈ ម្សិលមិញុំ

លោក ជាម ច័ន្ទសោភ័ណ បានលើកឡើងទៀតថា ដោយសារមានសុខសន្តិភាព ទើបយើងមានអ្វីៗ គ្រប់យ៉ាងមកដល់ពេលនេះ ទាំងវិស័យពុទ្ធចក្រ និងអាណាចក្រ ប្រកបដោយសេចក្ដីសុខ ជាមួយគ្នារហូតមកដល់បច្ចុប្បន្ននេះ មូលហេតុចម្បងនោះគឺ ពលរដ្ឋកម្ពុជា ចេះរគោរពស្រលាញ់គ្នា ទៅវិញទៅមក គ្រប់ជំនឿសាសនា។

លោកក៏បានជំរុញដល់សិស្សានុសិស្សខិតខំរៀនសូត្រ ទាំងចំណេះដឹងទូទៅ វិជ្ជាជីវៈ ជំនាញកំព្យូទ័រ ជាពិសេសផ្នែកពលករជំនាញ នានាឲ្យបានច្រើន ដើម្បីទទួលបាននូវជំនាញពិតៗ សម្រាប់អានាគតខ្លួន និងសង្គមជាតិយើងឲ្យបានរីកចម្រើនទៅមុខបន្តទៀត។

លោកក៏បានធ្វើការចែកកង់ ជូនសិស្សា នុសិស្ស ប្រគល់អណ្ដូងទឹក អំពូលសូឡា គម្ពីរអាល់គួរអាន និងចុះហត្ថលេខាលើសៀវភៅក្រាំងមាសផងដែរ​៕SRP

ខេត្តព្រះសីហនុ៖យោងតាម​លិខិត​បំភ្លឺ​របស់​គណៈកម្មការ​គ្រប់គ្រង ​អចលនទ្រព្យ​ កងទ័ពជើងទឹក មូលដ្ឋាន​សមុទ្រ នៅ​ថ្ងៃទី​១៤ ខែកុម្ភៈ ឆ្នាំ​២០២២​ បានឲ្យដឹងថាគណៈកម្មការ​គ្រប់គ្រង​ អចលនទ្រព្យ​ កងទ័ពជើងទឹក​មូលដ្ឋាន​សមុទ្រ​ បាន​បញ្ជាក់ថា ដី១.២០០​ ហិកតា​ គឺជា​ដី​របស់​រដ្ឋ​ស្ថិតក្រោម​ការគ្រប់គ្រង រ​បស់​ក្រសួងការពារជាតិ​ ដែល​បានសម្រេច​ប្រគល់ជូន​កងទ័ពជើងទឹក​មូលដ្ឋាន​សមុទ្រ​ គ្រប់គ្រង ​ទុក​សម្រាប់​សាងសង់​ជំរំ​ជម្រក​ទ័ព ​ធ្វើការ​អភិវឌ្ឍន៍​និង​ចែកជូន​ដល់​គ្រួសារ​កងទ័ព​ ដែល​ស្នាក់នៅ​ក្នុង​តំបន់​នេះ​។ ចំពោះ​ការឃុបឃិត ចាប់យក​ទិញ​-​លក់ និង​លួចលាក់​ចេញ​ប័ណ្ណកម្មសិទ្ធិ​របស់លោក តែ តាំង​ប៉ ក្នុង​ខែកក្កដា ឆ្នាំ​១៩៩៧ គឺជា​រឿង​ខុសច្បាប់ ធ្វើឡើង​ដោយ​ស្ងាត់កំបាំង​មិនមាន​ការដឹង​ឭ ពី​កងទ័ពជើងទឹក នឹង​ក្រសួងការពារជាតិ​នោះឡើយ​។

លិខិត​បំភ្លឺ​បាន​រៀបរាប់ថា គណៈកម្មការ​គ្រប់គ្រង អចលនទ្រព្យ កងទ័ពជើងទឹក មូលដ្ឋាន​សមុទ្រ សូម​ធ្វើការ​ស្រាយ​បំភ្លឺ ចំពោះ​ករណី លោក តែ តាំង​ប៉ ដែល​បានចេញ​លិខិត នៅលើ​គេហទំព័រ​សារព័ត៌មាន​ក្នុងស្រុក​កាលពី​ថ្ងៃទី​១១ ខែកុម្ភៈ ឆ្នាំ​២០២២ កន្លងទៅនេះ ស្ដីអំពី​ទំនាស់​ដីធ្លី ​ស្ថិតនៅ​ក្នុងភូមិ​អុង ឃុំ​រាម ស្រុក​ព្រៃនប់ ខេត្ត​ព្រះសីហនុ រវាង​លោក តែ តាំង​ប៉ ជាមួយ​ក្រុមគ្រួសារ​កង​ទ័ពជើងទឹក​(​រាម​)​។​

​គណៈកម្មការ​គ្រប់គ្រងអចលនទ្រព្យ កងទ័ពជើងទឹក មូលដ្ឋាន​សមុទ្របានធ្វើការ​ស្រាយ​បំភ្លឺ​ជូន​សាធារណៈជន និង​លោក តែ តាំង​ប៉ ថា​៖
១.​ចំពោះ​ដី ១.២០០​ហិកតា គឺជា​ដី​របស់​រដ្ឋ​ស្ថិតក្រោម​ការគ្រប់គ្រង របស់​ក្រសួងការពារជាតិ ដែល​បាន សម្រេច​ប្រគល់ជូន​កងទ័ពជើងទឹក មូលដ្ឋាន​សមុទ្រ គ្រប់គ្រង ទុក​សម្រាប់​សាងសង់​ជំរំ​ជម្រក​ទ័ពធ្វើការ​អភិវឌ្ឍន៍ និង​ចែកជូន​ដល់​គ្រួសារ​កងទ័ព ​ដែល​ស្នាក់​នៅក្នុង​តំបន់​នេះ​។​

-​ចំពោះ​ការឃុបឃិត ចាប់យក​ទិញ​-​លក់ និង​លួចលាក់​ចេញ​ប័ណ្ណកម្មសិទ្ធិ របស់លោក តែ តាំង​ប៉ ក្នុង​ខែកក្កដាឆ្នាំ​១៩៩៧ គឺជា​រឿង​ខុសច្បាប់ ធ្វើឡើង​ដោយ​ស្ងាត់កំបាំង មិនមាន​ការដឹងឭ ពី​កងទ័ពជើងទឹក នឹង​ក្រសួងការពារជាតិ​ នោះឡើយ ហើយ​ថ្ងៃខែ​ឆ្នាំ​នៃ​ការចុះ​អង្កេត​ដី និង​ចេញ​ប័ណ្ណកម្មសិទ្ធិ​នោះ​ទៀតសោធ គឺមាន​ភាពមិនប្រក្រតី ព្រោះ​ពេលនោះ​ប្រទេសជាតិ​កំពុងស្ថិត​នៅក្នុង​ភាពវឹកវរ ដែល​បង្កឡើង​ដោយ ក្រុមជ្រុលនិយម​ប្រដាប់អាវុធ​(​ព្រឹត្តិការណ៍​០៥-០៦/​កក្កដា​/១៩៩៧) ហើយ​នៅក្នុង​កាលៈទេសៈ​នោះ​ផងដែរ កងទ័ព ជើង​ទឹក​បានចេញ​បទបញ្ជា​ឱ្យ​មូលដ្ឋាន​សមុទ្រ បិទ​ការចេញ​-​ចូល និង​ធ្វើការ​ត្រួតពិនិត្យ​យ៉ាង​តឹងរ៉ឹង​បំផុត ព្រមទាំង​ពុំមាន​សមត្ថកិច្ច ឬ ​សា្ថ​ប័ន​ណាមួយ​ហ៊ាន​ចេញ​-​ចូល​ដោយ​គ្មាន​ការអនុញ្ញាត​ពី​អង្គភាព​ឡើយ (​អង្គភាព ប្រកាស​បិទ​ការចេញ​-​ចូល មុន​៣​ខែ និង​២​ខែក្រោយព្រឹត្តិការណ៍​០៥-០៦/​កក្កដា​/១៩៩៧)​។​ -​ម្យ៉ាងវិញទៀត រាល់​ការទិញ​-​លក់​ដី​ក្នុង​តំបន់​នេះ (​ដី​ចំនួន​១០៣​ហិកតា និង​១៧​ហិកតា​) របស់លោក​តែ តាំង​ប៉ គឺ​គ្មាន​បុគ្គល ឬ​នាយទាហាន​រូប​ណា មាន​សិទ្ធ​អំណាច លក់​-​ទិញ ដោះដូរ​បាន​នោះទេ ដោយហេតុ ថា​ដី​ចំនួន​១២០០​ហិកតា នេះ ជា​ទ្រព្យសម្បត្តិ​របស់​រដ្ឋ (​តាម​ប្រសាសន៍​ដ៏​ខ្ពង់ខ្ពស់​របស់​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ បានលើកឡើង​កន្លងមក​៖ ដី​១.២០០​ហិកតា​នេះ គឺជា ដី​របស់​រដ្ឋ មិនមាន​បុគ្គល​ណា​ម្នា​ក់មាន​សិទ្ធិអំណាច ​ក្នុងការ​ចាប់យក ទិញ​-​លក់ដូរ​បានឡើយ ហើយ​បុគ្គល ទាំងឡាយណា​ដែល​បាន​ឃុបឃិត​គ្នា រំលោភបំពាន​យក​ដោយ​ខុសច្បាប់ ត្រូវប្រគល់​ជូន​រដ្ឋ​វិញ​ជាដាច់ខាត​)​។​

២.​ចំពោះ​ករណី​ដែល​លោក តែ តាំង​ប៉ បាន​ចោទប្រកាន់​មកលើ​លោក អ៊ុក សីហា មេបញ្ជាការរងកងទ័ពជើងទឹកមេ​បញ្ជ​ការ​មូលដ្ឋាន​ស​មុទ ​ថា ​បាន​ឯកភាព​ដឹងលឺ​លើ​ការទិញ​-​លក់​ដី (​ចំនួន​១០៣​ហិកតា និង​១៧​ហិកតា និង​បានទទួល​ប្រាក់​មួយចំនួនទៀត​នោះ គឺជា​រឿង​ចោទប្រកាន់​មិន​ពិត និង​គ្មាន​មូលដ្ឋាន ច្បាស់លាស់ មានបំណង​បង្កាច់​បង្អួច​កិត្តិយស កេរ្តិ៍ឈ្មោះ លោក​មេបញ្ជាការ​មូលដ្ឋាន​សមុទ្រ​ ក៏ដូចជា​កងទ័ព ជើង​ទឹក​ទាំងមូល ដែល​ធ្វើឡើង​ជាច្រើនលើក​ច្រើនសា​រ​ តាម​គ្រប់រូប​ភាពជា​សាធារណៈ ​(​សារព័ត៌មាន បណ្តាញ សង្គម និង​ប្ដឹងទៅ​តុលាការ​)​។
​
៣.​ចាប់តាំងពី​ពេលដែល លោក តែ តាំង​ប៉ បានមក​ឃុបឃិត រំលោភបំពាន ទិញ​-​លក់ ធ្វើ​ប័ណ្ណកម្មសិទ្ធិ​លើដី​ក្នុង​តំបន់​នេះ លោក​តែងតែបាន​បង្កទំនាស់​ប្តឹង​ឡើង​តុលាការ ផ្សព្វផ្សាយ​ព័ត៌មាន​មិន​ពិត​ផ្សេងៗ និង បង្កើត​បញ្ហា​ជាច្រើន​មិនចេះចប់​មិនចេះហើយ មានដូចជា​៖
-​បាន​បិទផ្លូវ​សាធារណៈ ដែលជា​ផ្លូវ​អាស្រ័យ​ផល របស់​ប្រជាពលរដ្ឋ ក៏ដូចជា​គ្រួសារ​កងទ័ព -​ក្លែង​ឯកសារ​ស្តីពី​កសាង ជួសជុល៍​សាលារៀន ដោយ​ចាប់បង្ខំ​នាយិកា​សាលា អាជ្ញាធរ ឲ្យយទទួល​ស្គាល់​
-​បាន​ប្ដឹងទៅ​តុលាការ និង​បង្កទំនាស់​ជាមួយ​ថ្នាក់ដឹកនាំ ក្រុមហ៊ុនប្រជាពលរដ្ឋ និង​គ្រួសារ​កងទ័ព រួមមាន៖
+​ឯកឧត្តម នាយ​ឧ​ត្ត​ម​សេនីយ៍ មាស ថង រដ្ឋលេខាធិការ​ក្រសួងការពារជាតិ +​មេបញ្ជាការ​មូលដ្ឋាន​ស​មុ​ទ្រ ព្រមទាំង​ក្រុមគ្រួសារ​
+​ឃ្លាំង​ប្រេង​ឥន្ធ​នៈ ភី​ធី​ធី​, ក្រុមហ៊ុន​អា​ឡាំង​ដឺ​ង៉ុ​យ​, ក្រុមហ៊ុន​ស៊ី​ធី​ស្តារ +​ប្រជាពលរដ្ឋ​ក្នុង​តំបន់​ ដែលមាន​ដី​នៅ​ជិត​គាត់​លោក សួង រ័ត្ន​សា​រ៉ា​យ​, លោក ហ៊ាន ឈៀង​ឈុន​, លោកស្រី ងូ​ន អេង​, លោក អាំង លី​អេង​………+​គ្រួសារ​កងទ័ព​ចំនួន​៦០​គ្រួសារ ដែលជា​ការពិត ប្រជាពលរដ្ឋ និង​គ្រួសារ​កងទ័ព​ទាំងអស់នេះ បាន​តាំង​ទីលំនៅ​រស់នៅ អាស្រ័យ​ផល ដោយ​ស្របច្បាប់ ដែលមាន​ទទួលស្គាល់​ពី​អាជ្ញាធរ និង​អង្គភាព​មូលដ្ឋាន​ស​មុទ អស់​រយៈពេល​ជាង​៣០​ឆ្នាំ (​តាំងពី​ឆ្នាំ​១៩៨៩-១៩៩០) កន្លងមកហើយ តែ​ត្រូវបាន​លោក តែ តាំង​ប៉ ប្តឹង​ពួកគាត់​ទាំងនោះ​ថា កំពុង​រស់នៅ លើដី​របស់ខ្លួន​ទៅវិញ ថែមទាំង​បាន​ប្ដឹង​ពួកគាត់​ទៅ​តុលាការ​ជាច្រើនលើក​ច្រើនសារ​ថែមទៀត​។ ដោយ​មិនអាច​ទទួលរង​នូវ​ការឈឺចាប់​ទាំងនេះ​បាន ទើប​មកដល់​ឆ្នាំ​២០០៦ ពួកគាត់​បានសម្រេច​ចិត្ត​ដាក់ពាក្យ​គោរព ស្នើសុំ​ទៅ សម្តេច​តេ​ជោ នាយករដ្ឋមន្ត្រី នៃ​ព្រះរាជាណាចក្រ​កម្ពុជា ជួយ​អន្តរាគមន៍ ស្វែងរក​យុត្តិធម៌ ដើម្បីឱ្យ ពួកគាត់​បានរស់នៅ​មាន​សេចក្តីសុខ ​ដូច​ប្រជាពលរដ្ឋ​ដ៏ទៃទៀត​ដែរ។

ជាងនេះទៅទៀត ទោះបី​ជាមាន​ដីកា សម្រេច​ច្រាន​ចោលការ​ចោទ​ប្តឹង​របស់លោក តែ តាំង​ប៉ ពី​អយ្យការ​អម​សាលាដំបូង​ខេត្ត​ព្រះសីហនុ និង​មហាអយ្យការ​អម​សាលាឧទ្ធរណ៍​ក្តី ក៏​លោក តែ តាំង​ប៉ មិន​ទទួលស្គាល់ ហើយ​នៅតែ​បន្តសកម្មភាព​រំលោភបំពាន ប្តឹងផ្តល់ មកលើ​ពួកគាត់​ដដែល តាមរយៈ​ការ​ក្លែង​ឯកសារ​ប្ដឹង​ទៅជា​បណ្តឹងរដ្ឋប្បវេណី ទៅ​សាលាដំបូង​ខេត្ត ព្រះសីហនុ ដើម្បី​ធ្វើការ​ចោទប្រកាន់​ប្រជាពលរដ្ឋ​ថា កំពុង​រស់នៅ​លើដី​រប​ស់​គាត់​ទៅវិញ​។​

​ក្នុងនាម​គណៈកម្មការ​គ្រប់គ្រង អចលនទ្រព្យ កងទ័ពជើងទឹកមូលដ្ឋាន​សមុទ្រ សូម​ប្រកាស​ដល់​ថា​៖
១.​គណៈកម្មការ ប្តេជ្ញា​ការពារ​នូវ​ទ្រព្យសម្បត្តិ​ជាតិ មិន​អនុញ្ញាតឱ្យ​ជនខិលខូច និង​ឈ្មួញ​ទុច្ចរិត​ណា​ម្នាក់ ចូលមក​រំលោភបំពាន​យក​ធ្វើជា​កម្មសិទ្ធិ​របស់ខ្លួន​បានជា​ដាច់ខាត​

២.​ចូលរួម​សហការ ជាមួយ​អាជ្ញា​ធរមាន​សមត្ថកិច្ច​គ្រប់​ជាន់ថ្នាក់ ដើម្បី​ការពារ​ផលប្រយោជន៍​ស្របច្បាប់ សន្តិសុខ​សុវត្ថិភាព សណ្ដាប់ធ្នាប់​សង្គម និង​ការរស់នៅ​របស់​ប្រជាពលរដ្ឋ កងទ័ព និង​គ្រួសារ​កងទ័ព ដែល បាន​នឹង​កំពុង​រស់នៅ អាស្រ័យ​ផល ដោយ​ទទួល​បានមកពី​ការចែកជូន​របស់​អង្គភាពនិង​មានការ​ទទួលស្គាល់​ពីអាជ្ញាធរ​ដែនដីនិង​គណៈកម្មការ​អចលនទ្រព្យកងទ័ពជើងទឹកមូលដ្ឋាន​ស​មុទ​។​

​គណៈកម្មការ​គ្រប់គ្រង អចលនទ្រព្យ កងទ័ពជើងទឹក មូលដ្ឋាន​សមុទ្រ​បាន​សង្កត់ធ្ងន់ថា ទិដ្ឋភាព និង​សកម្មភាព​យ៉ង​គ​គ្លី​ន ក្នុង​ចេតនា​ទុច្ចរិត​បែបនេះ គណៈកម្មការ​គ្រប់គ្រង អចលនទ្រព្យ កងទ័ពជើងទឹក មូលដ្ឋាន​ស​មុទ សូម​ព្រមាន​ដល់​បុគ្គល​ទាំងឡាយណា ដែល​បានមក​ឃុបឃិត រំលោភបំពាន ទិញ​-​លក់ ធ្វើ​ប័ណ្ណកម្មសិទ្ធិ លើដី​ក្នុង​តំបន់​នេះ​ត្រូវ ៖ ១.​បញ្ឈប់​ជាបន្ទាន់​រាល់​សកម្មភាព កាង​ចាប់យក លួច​ទិញ​-​លក់ ធ្វើ​ប័ណ្ណកម្មសិទ្ធិ ខុសច្បាប់ ហើយ​ត្រូវប្រគល់​ដី​ទាំងនោះ​ឱ្យមក​រដ្ឋ និង​ក្រសួងការពារជាតិ​វិញ (​ដូច​ករណី​លោក តែ តាំង​ប៉ ជាអាទិ៍​)​។ ២.​បញ្ឈប់​ជាបន្ទាន់ រាល់​ការ​ញុះញង់ បរិហារកេរ្តិ៍ ផ្សព្វផ្សាយ​ព័ត៌មាន​មិន​ពិត ដែល​ធ្វើឱ្យប៉ះពាល់​ដល់ កិត្តិយស សេចក្ដីថ្លៃថ្នូរ របស់​កងទ័ព ដែល​បា​នប​មើ លះបង់​ដើម្បី​បុព្វហេតុ​ការពារជាតិ​មាតុភូមិ និង​សុខសន្តិភាព ស្ថិរភាព ជូន​ប្រជាពលរដ្ឋ​៕​SRP

ខេត្តកណ្ដាល៖មន្ត្រីឥណទានអម្រឹត ម្នាក់ត្រូវបានសមត្ថកិច្ចឃាត់ខ្លួន ករណី៖ ឆបោក និងរំលោភលើទំនុកចិត្តពិសេសដោយអភិបាល តាមបណ្ដឹងរបស់ប្រធានសាខាមីក្រូហិរញ្ញវត្ថុអម្រឹត។

ការឃាត់ខ្លួននៅថ្ងៃទី១៤ ខែកម្ភ: ឆ្នាំ២០២២ចំណុច៖គ្រឹះស្ថានមីក្រូហិរញ្ញវត្ថុអម្រឹត ភូមិទឹកឃ្លាំង ឃុំទឹកឃ្លាំង ស្រុកល្វាឯម ខេត្តកណ្ដាល។

ជនសង្ស័យ ឈ្មោះកល្យាណ ពិសុទ្ធ ភេទប្រុសអាយុ២២ឆ្នាំ ជនជាតិ ខ្មែរមុខរបរ មន្ត្រីឥណទានអម្រឹតទីលំនៅ ភូមិទឹកឃ្លាំង ឃុំទឹកឃ្លាំង ស្រុកល្វាឯម ខេត្តកណ្តាល។ ចំណែកដើមបណ្ដឹង ឈ្មោះសុខ សុទ្ធា ភេទប្រុស អាយុ៤២ ឆ្នាំ ជនជាតិខ្មែរ មុខរបរ ប្រធានសាខាមីក្រូហិរញ្ញវត្ថុអម្រឹតល្វាឯមទីលំនៅ ភូមិទឹកឃ្លាំង ឃុំទឹកឃ្លាំង ស្រុកល្វាឯម ខេត្តកណ្តាល។

សមត្ថកិច្ចបានឲ្យដឹងថា នៅថ្ងៃ១២ ខែកុម្ភ:ឆ្នាំ ២០២២ វេលាម៉ោង១១ព្រឹក ស្ថាប័នមីក្រូហិរញ្ញវត្ថុអម្រឹត សាខាល្វាឯម បានធ្វើការប្រជុំពិភាក្សាលើការអនុវត្តការងារ របស់បុគ្គលិកឈ្មោះកល្យាណ ពិសុទ្ធ មុខងារជាមន្ត្រីឥណទាន។ ក្នុងកិច្ចប្រជុំពិភាក្សានោះ សាខាមេក្រូហិរញ្ញវត្ថុអម្រឹត បានរកឃើញកំហុសរបស់បុគ្គលិក ឈ្មោះកល្យាណ ពិសុទ្ធ ដែលបានប្រព្រឹត្តខុស ក្នុងការងារមួយចំនួនដូចជាមានអតិថិជន ដែលបានខ្ចីប្រាក់ពីស្ថាប័នមេក្រូហិរញ្ញវត្ថុអម្រឹត ហើយពួកគាត់បានសងប្រាក់ផ្ដាច់វិញមកស្ថាប័ន មុនថ្ងៃកំណត់នោះ ត្រូវបានឈ្មោះកល្យាណ ពិសុទ្ធ មិនបានបង្វិលប្រាក់សងនោះជូនស្ថាប័នមេក្រូហិរញ្ញវត្ថុទេ ដោយលាក់ទុកប្រើប្រាស់ផ្ទាល់ខ្លួន ដោយបង់តែការប្រាក់ធម្មតា ដើម្បីបំភាន់ស្ថាប័ន ។

ចំណុចប្រព្រឹត្តខុសមួយទៀតនោះ គឺឈ្មោះកល្យាណ ពិសុទ្ធ បានធ្វើឯកសារក្លែងធ្វើជាមានអតិថិជនខ្ចីប្រាក់ តែការពិតពុំមានឈ្មោះអតិថិជនទាំងនោះបានខ្ចីពិតប្រាកដទេ គឺក្លែងបន្លំដើម្បីខ្ចីប្រាក់ពីស្ថាប័នយកទៅប្រើប្រាស់ផ្ទាល់ខ្លួន ហើយធ្វើជាសងប្រាក់ជូនស្ថាប័នមីក្រូហិរញ្ញវត្ថុអម្រឹត នេះវិញប្រចាំខែតាមរបៀបនៃការខ្ចី និងសងវិញធម្មតា ទំហំទឹកប្រាក់ដែលឈ្មោះកល្យាណ ពិសុទ្ធ បន្លំទុកដើម្បីប្រើប្រាស់ផ្ទាល់ខ្លួន ស្ថាប័នមីក្រូហិរញ្ញវត្ថុរកឃើញជំហានទី០១នោះចំនួន៧៣៥០០០០០រៀល(ចិតសិបបីលានប្រាំរយពាន់រៀលគត់)។ ដោយឃើញមានការប្រព្រឹត្តខុសក្នុងកិច្ចការការងាររបស់ស្ថាប័នមីក្រូហិរញ្ញវត្ថុដូច្នេះ ទើបនៅថ្ងៃទី១៤កុម្ភ: ឆ្នាំ២០២២ ប្រធានសាខាមេក្រូហិរញ្ញវត្ថុអម្រឹតល្វាឯម បានមកដាក់ពាក្យបណ្ដឹងនៅអធិការដ្ឋាននគរបាលស្រុកល្វាឯមដើម្បីឲ្យចាត់ការចំពោះ ឈ្មោះកល្យាណ ពិសុទ្ធ តាមនីតិវិធីច្បាប់។ នៅចំពោះមុខសមត្ថកិច្ចឈ្មោះកល្យាណ ពិសុទ្ធ បានសារភាពថា ពិតជាបានប្រព្រឹត្តខុសដូចដែលក្នុងអង្គប្រជុំរបស់ស្ថាប័នខ្លួនពិតមែន។ បច្ចុប្បន្នជនសង្ស័យនគរបាលស្រុកល្វាឯមដើម្បីបន្តចាត់ការតាមនីតិវិធី៕SRP

ខេត្តព្រះសីហនុ៖ប្រជាពលរដ្ឋដែលបានទិញផ្ទះល្វែងរបស់ក្រុមហ៊ុន បុរីវីអាយភី (VIP) ស្ថិតក្នុងភូមិអូរតាសេក ឃុំអូរឧកញ្ញ៉ាហេង ស្រុកព្រៃនប់ ខេត្តព្រះសីហនុ គ្រោងនឹងនាំគ្នាឡើងមកសុំអន្តរាគមន៍ពីសម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ឲ្យជួយរកយុត្តិធម៌ដល់ពួកគាត់ រឿងក្រុមហ៊ុន បុរីវីអាយភី (VIP) របស់លោក ហម រ៉ន និងលោក វន វណ្ណៈ មិនគោរពតាមកិច្ចសន្យា និងមិនព្រមសាងសង់ផ្ទះជូនពួកគាត់តាមកិច្ចសន្យា។

ការគ្រោងនាំគ្នាមកសុំអន្តរាគមន៍ពីសម្តេចតេជោ ហ៊ុន សែន បានធ្វើឡើងបន្ទាប់ពី ប្រជាពលរដ្ឋប្រមាណជា ៣០០នាក់ បាននាំគ្នាធ្វើការតវ៉ានៅមុខក្រុមហ៊ុន បុរីវីអាយភី ស្ថិតនៅឃុំអូរឧកញ្ញ៉ាហេង ស្រុកព្រៃនប់ កាលពីថ្ងៃទី១២ ខែកុម្ភៈ ឆ្នាំ២០២២ ម្សិលមិញ មិនទទួលបានដំណោះស្រាយ។ ដោយការតវ៉ារបស់ពួកគាត់ គឺទាមទារឲ្យទាមទារឲ្យ លោក ហម រ៉ន និងលោក វន វណ្ណៈ ដែលជាម្ចាស់ក្រុមហ៊ុនចេញមុខមកដោះស្រាយ ដោយផ្ទាល់ជាមួយពួកគាត់ ពីព្រោះពួកគាត់បានបង់លុយ គ្រប់ចំនួនអស់ហើយ ប៉ុន្តែក្រុមហ៊ុនមិនព្រមសាងសង់ផ្ទះតាមកិច្ចសន្យានោះទេ ដោយគេចវេសមិនព្រមចូលមកដោះស្រាយ។

ប្រជាពលរដ្ឋបានឱ្យដឹងថា ពួកគាត់បានទិញផ្ទះល្វែងរបស់ក្រុមហ៊ុន បុរីវីអាយភី អ្នកខ្លះបង់រំលោះ និងមួយចំនួនទៀតគេមានលុយបង់ផ្តាច់ ដោយមានធ្វើកិច្ចសន្យាត្រឹមត្រូវ ជាមួយភាគីខាងក្រុមហ៊ុន។ ហើយរហូតមកដល់បច្ចុប្បន្ននេះជាង២ឆ្នាំហើយ ពួកគាត់ដែលបានទិញផ្ទះប្រមាណ ៩០ភាគរយ នៅមិនទាន់ទទួលបានផ្ទះនៅឡើយទេ។ ពីព្រោះនៅទីតាំងដីឃើញមានសសរបង្គោលបុកគ្រឹះក្នុងមួយទីតាំង មានចំនួន៥ ទៅ ៦ដើម និងកន្លែងខ្លះអត់ទាន់មានបុកគ្រឹះនៅឡើយទេ។

ដោយសារតែលែងមានជំនឿទុកចិត្តលើភាគីក្រុមហ៊ុន បុរីវីអាយភី ដែលតែងតែសន្យាខ្យល់មិនព្រមដោះស្រាយ ប្រជាពលរដ្ឋ បានស្នើសូមដល់អាជ្ញាធរពាក់ព័ន្ធ អភិបាលខេត្តព្រះសីហនុ និងជាពិសេសសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត មេត្តាជួយអន្តរាគមន៍ដល់យុត្តិធម៌ និងការរកដំណោះស្រាយឲ្យពួកគាត់ផង ពីព្រោះពួកគាត់ភាគច្រើនខ្ចីលុយធនាគារយកមកទិញផ្ទះ ហើយមកដល់ពេលនេះ ផ្ទះក៏មិនបាននៅ លុយធនាគារក៏កាន់តតែច្រើន។

ករណីនេះ សៀមរាបប៉ុស្តិ៍ មិនអាចទាក់ទងលោក ហម រ៉ន និងលោក វន វណ្ណៈ ដែលជាម្ចាស់ក្រុមហ៊ុន បុរីវីអាយភី (VIP) អត្ថាធិប្បាយបាននៅឡើយទេ៕SRP

ភ្នំពេញ៖នាយករដ្ឋមន្ត្រីហ៊ុន សែន នៅព្រលប់ថ្ងៃទី ១៤ ខែកុម្ភៈ ឆ្នាំ ២០២២ នេះបានប្រកាសលើកពេលជួបជុំជាមួយសិស្ស និទ្ទេសA។ ការប្រកាសរបស់នាយករដ្ឋមន្ត្រីហ៊ុន សែន ធ្វើឡើងបន្ទាប់ពីរយៈពេលប៉ុន្មានថ្ងៃចុងក្រោយនេះ ជំងឺកូវីដ១៩ បម្លែងថ្មីអូមេក្រុង បានកំពុងរីករាលដាល នៅទីក្រុងភ្នំពេញ។

នៅក្នុងគណនីហ្វេសប៊ុកផេករបស់នាយករដ្ឋមន្ត្រីហ៊ុន សែន បានសរសេរថា៖ ដោយសារកូវីដ-១៩ មេរោគបម្លែងថ្មី ឈ្មោះថាអូមីក្រុងបាននឹងកំពុងរីករាលដាល នៅទីក្រុងភ្នំពេញ។ ដើម្បីសុវត្ថិភាពសម្រាប់ចៅៗសិស្សនិទ្ទេសA​ និងអ្នកចូលរួម​ ខ្ញុំសម្រេចចិត្តលើកពេលនៃការជួបជុំជាមួយសិស្សនិទ្ទេសAដែលគ្រោងធ្វើនៅថ្ងៃ២៨​ កុម្ភ:២០២២​ ទៅពេលក្រោយវិញ។

នាយករដ្ឋមន្ត្រីបានបន្តថា ក្សាជីវិត​ និងសុខភាព គឺកិច្ចការចម្បង របស់យើងទាំងអស់គ្នានាពេលនេះ។ រក្សាបានជីវិត និងមានសុខភាពល្អមិនខ្វះទេពេលវេលានៃការជួបជុំ។ សង្ឃឹមថាចៅៗនិងក្រុមគ្រួសារនឹងមានការយោគយល់នូវការលំបាកនេះ៕SRP

ខេត្តកំពង់ចាម​៖ក្នុងកិច្ចប្រជុំសាមញ្ញលើកទី៣៣ អាណត្តិទី៣ របស់ក្រុមប្រឹក្សាខេត្តកំពង់ចាម​ នៅថ្ងៃទី១៤​ ខែកុម្ភៈ​ នេះ​ អភិបាលខេត្តកំពង់ចាម​ លោក​ អ៊ុន​ ចាន់ដា​ បាន​ណែនាំ​ដល់មន្ទីរ​អប់រំ​យុវជន​និង​កីឡា​ខេត្ត​ ឲ្យ​ធ្វើការ​ត្រួតពិនិត្យ​ឡើង​វិញ​ ចំពោះ​បុគ្គលគ្រូដែល​បង្ខិតបង្ខំ​ ឬ​ដាក់​គំនាប​លើ​​សិស្សានុសិស្ស​ ​ឲ្យ​ចូលរៀន​គួរ​ ដេីម្បី​យក​ប្រាក់កម្រៃ​បន្ថែម​​។

ករណីបែបនេះអភិបាលខេត្ត​​បាន​លេីកឡេីងថា​ ចំពោះ​ការ​រៀនសូត្រ​​ បំប៉ន​ចំណេះវិជ្ជា​ វា​ពិត​ជារឿង​ល្អ​ត្រឹមត្រូវ​ណាស់​ ប៉ុន្តែចំពោះ​ការ​បង្ខិតបង្ខំ​កូន​សិស្ស​ វាជារឿង​មិន​សមស្រប​ ដែល​បង្ក​ឲ្យ​មាន​ការ​ថ្នាំងថ្នាក់​ ពី​សំណាក់​អាណាព្យាបាល​​ ​ព្រោះបេី​គ្រូ​ល្អ​ពូកែមែននោះ​ ​គឺ​មាន​សិស្ស​ គាំទ្រច្រើន​​ហើយ​នាំគ្នា​​ ចូល​រៀន​ពុំខាន មិន​ចាំបាច់​បង្ខិតបង្ខំ​ទេ​។​
ក្នុង​កិច្ចប្រជុំ​អភិបាលខេត្តកំពង់ចាម​ ក៏បាន​
ប្រាប់មន្ទីរ​សាធារណការ​ និង​ដឹកជញ្ជូន​ខេត្ត​ ​ឲ្យ​រៀបចំ​​បញ្ជូន​ក្រុម​ការងារ​ ចុះ​ធ្វើ​ការ​​ថែទាំ​ផ្លូវ​ថ្នល់​ ​ក៏ដូចជា​ការ​លុប​ក្រឡុក​សំបុកមាន់ នៅ​តាម​បណ្ដោយ​​ដង​ផ្លូវ​នានា​ ក្នុង​ក្រុង​កំពង់ចាម​ ដែល​រងការខូចខាត​ បន្ទាប់​ពី​សាងសង់​រួច​មួយ​រយៈពេល​ ដេីម្បីសម្រួល​ដល់​ការ​ធ្វើ​ដំណើរ​ ក៏ដូចជា​ការ​លេីក​ កម្ពស់​សោភ័ណភាព នៅតាមដងផ្លូវផងដែរ​។

លោក​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ បាន​លើក​យក​សេចក្តី​ព្រាង​របៀបវារៈ​សំខាន់​ៗ​ មក​ពិភាក្សា​ រួមមាន​៖​ ១-ពិនិត្យ​ និង​អនុម័ត​សេចក្តី​ព្រាង​កំណត់ហេតុ​នៃ​កិច្ចប្រជុំ​សាមញ្ញ​លេីក​ទី​៣២​ អាណត្តិ​ទី​៣​ របស់​ក្រុមប្រឹក្សាខេត្ត​។
២-ពិនិត្យ​ ពិភាក្សា​ និង​អនុម័ត​លើ​សេចក្ដី​ព្រាង​របាយការណ៍​បូកសរុប​លទ្ធផល​ការងារ​ប្រចាំ​ខែ​មករា​ និង​ទិសដៅ​ការងារ​ប្រចាំ​ខែកុម្ភៈ​ ឆ្នាំ​២០២២​ របស់​ក្រុម​ក្រុមប្រឹក្សា​ខេត្តកំពង់ចាម​។
៣-​ ពិនិត្យ​ ពិភាក្សា​ និង​អនុម័ត​លើ​សេចក្ដី​ព្រាង​សេចក្តី​សម្រេច​ស្តីពី​ការ​កែសម្រួល​ និង​ទទួល​ស្គាល់​សមាសភាព​គណៈកម្មាធិការ​ពិគ្រោះយោបល់​កិច្ចការ​ស្ត្រី​ និង​កុមារ​ខេត្តកំពង់ចាម​។ ៤-បញ្ហា​ផ្សេង៕SRP

ខេត្តបាត់ដំបង៖លោកសុខ លូ បានមានប្រសាសន៍ដល់ប្រជាពលរដ្ឋឲ្យបន្តចូលរួមគោរពច្បាប់ចរាចរណ៍ ស្រវឹងកុំបើកបរ ពាក់មួកសុវត្ថិភាព កុំបើកបរក្នុងស្ថានភាពងងុយជាដើម ដើម្បីលុបបំបាត់នៅអាត្រាគ្រោះថ្នាក់ចរាចរណ៍ ឲ្យកាន់តែកាត់បន្ថយជាងមុន និងឈានទៅរកការឈប់ទាំងស្រុងនូវការស្លាប់ដោយសារគ្រោះថ្នាក់ចរាចរណ៍ ។ លោកក៏បានបន្តជំរុញ ដល់លោកគ្រូ អ្នកគ្រូ ព្រមទាំងនិស្សិត ក៏ដូចជាបងប្អូនប្រជាពលរដ្ឋឱ្យទៅចាក់វ៉ាក់សាំង ដូសទី៣ ឱ្យបានគ្រប់ៗគ្នា ផងដែរ។

លោកសុខ លូ អភិបាលខេត្តបាត់ដំបង ថ្លែងបែបនេះក្នុងក្នុងពិធីសម្ពោធអាគារសិក្សាសាកលវិទ្យាល័យឥន្ទ្រវិជ្ជា (UI) សាខាខេត្តបាត់ដំបង នៅព្រឹកថ្ងៃចន្ទ ទី១៤ ខែកុម្ភៈ ឆ្នាំ២០២២នេះ។

លោកសុខ លូ បានមានប្រសាសន៍បន្តថា ចាប់តាំងពីឆ្នាំ១៩៧៩ ពោលគឺក្រោយរបបកម្ពុជាប្រជាធិបតេយ្យ អ្វីៗគ្រប់យ៉ាងត្រូវបានបំផ្លិចបំផ្លាញស្ទើរ តែទាំងស្រុង ទាំងផ្នែកហេដ្ឋារចនាសម្ព័ន្ធ និងធនធានមនុស្ស ក៏ប៉ុន្តែ ដោយសារតែនយោបាយឈ្នះៗរបស់សម្ដេច ហ៊ុនសែន បានកែប្រែប្រទេសកម្ពុជាឲ្យក្លាយជាប្រទេស ដែលមានសុខសន្ដិភាពពេញលេញ បានបង្កើតឱកាសដល់វិស័យឯកជននានា មកបណ្ដាក់ទុនវិនិយោគ នៅក្នុងប្រទេសកម្ពុជា ពិសេសវិស័យអប់រំ ដែលជាវិស័យមួយកំពុងតែរីកដុះដាលដូចផ្សិត ហើយវិស័យអប់រំនេះបានបណ្ដុះបណ្ដាលធនធនមនុស្ស ពីមួយឆ្នាំទៅមួយឆ្នាំកាន់តែមានការកើនឡើងជាលំដាប់ ។ 

លោកក៏បានធ្វើការក្រើនរំលឹកដល់លោកគ្រូអ្នកគ្រូ សិស្សនិស្សិត និងប្រជាពលរដ្ឋ ត្រូវបន្តការយកចិត្តទុកដាក់ក្នុងការថែរក្សាអនាម័យបរិស្ថាន សណ្ដាប់ធ្នាប់សាធារណៈ បូករួមទាំងផ្នែកសំណង់អាណាធិបតេយ្យ ដែលនេះជាកាតព្វកិច្ចរបស់ប្រជាពលរដ្ឋត្រូវតែអនុវត្ត ដើម្បីផលប្រយោជន៍ខេត្ត និងសណ្ដាប់ធ្នាប់ក្នុងខេត្តឲ្យមានរបៀបរៀបរយ គ្មានសំរាម។ 

លោកសាស្រ្ដាចារ្យបណ្ឌិត ឡាច សំរោង សាកលវិទ្យាធិការ នៃសាកលវិទ្យាល័យឥន្ទ្រវិជ្ជា(UI)បានមានប្រសាសន៍ថា សាកលវិទ្យាល័យនេះ ដើមឡើយមានឈ្មោះថា សាកលវិទ្យាល័យចំរើនពហុបច្ចេកវិជ្ជា (CUP)ដែលកកើតឡើងនៅឆ្នាំ២០០២ និងនៅឆ្នាំ២០១៨ក៏បានផ្លាស់ប្ដូរឈ្មោះជាសាកលវិទ្យាល័យឥន្ទ្រវិជ្ជា ដែលបច្ចុប្បន្ននេះមានចំនួន៤សាខាទូទាំងប្រទេសកម្ពុជា៕SRP

• លោកពៅ ពិសិដ្ឋ           លោក អ៊ឹង គីមលាង

ខេត្តសៀមរាប៖នាយករដ្ឋមន្ត្រី ហ៊ុន សែន បានចេញអនុក្រឹត្យ ​សម្រេចផ្ទេរភារកិច្ចលោក ពៅ ពិសិដ្ឋ ពីអភិបាលរងខេត្តសៀមរាប ទៅជាអភិបាលរងខេត្តពោធិ៍សាត់ និងផ្ទេរភារកិច្ចលោក អ៊ឹង គឹមលាង ពីអភិបាល​រង​ខេត្តពោធិ៍សាត់ ទៅជាអភិបាលរងខេត្តសៀមរាប​វិញ។ អនុក្រឹត្យរបស់ប្រមុខរាជរដ្ឋាភិបាលកម្ពុជា បានធ្វើឡើងនៅថ្ងៃទី០៣ ខែកុម្ភៈ ឆ្នាំ២០២១។

                       លោក ប្រាក់ សោភណ សូមជម្រាបថា នាយករដ្ឋមន្ត្រីហ៊ុន​ សែន​ នៅថ្ងៃទី០៧ កុម្ភៈ ក៏បានសម្រេចតែងតាំង លោក ប្រាក់ សោភណ ប្រធានសហភាពសហព័ន្ធយុវជនកម្ពុជាខេត្តសៀមរាប ជាអភិបាលរងខេត្តសៀមរាប និង ផ្ទេរភារកិច្ច លោក ង៉ាន់ ភិរុណ ពីអភិបាលរងខេត្តសៀមរាប ទៅកាន់មុខតំណែងជាអគ្គាធិការង នៃអគ្គាធិការដ្ឋានក្រសួងមហាផ្ទៃវិញ៕SRP                               លោក ង៉ាន់ ភិរុណ