ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានប្រាប់មន្ត្រីជំនាញពាក់ព័ន្ធទាំងអស់ ឲ្យ​ចូលរួមសហការគ្នា ពង្រឹងការប្រមូលចំណូល លើវិស័យបរិស្ថាន ឲ្យស្របទៅតាមគោលការណ៍ ណែនាំរបស់ក្រសួង ដើម្បីបានថវិកាអភិវឌ្ឍក្នុងខេត្ត។

ការថ្លែងយ៉ាងដូច្នេះក្នុងកិច្ចប្រជុំស្ដីអំពីលទ្ធផលសកម្មភាពការងារទូទៅ និងការប្រមូលចំណូលមិនមែនសារពើពន្ធ របស់មន្ទីរបរិស្ថានខេត្ត​ នៅព្រឹកមិញនេះ។

អភិបាលខេត្តកំពង់ចាម បានចាត់ទុកថា វិស័យបរិស្ថាន បានចូលរួមយ៉ាងសកម្ម លើវិស័យមុខងារអនុវត្តក្នុងមូលដ្ឋានស្រុក ក្រុង បានយ៉ាងច្រើន នាពេលកន្លងមក​។ ប៉ុន្តែមានចំណុចខ្វះខាតមួយចំនួន ដែលត្រូវស្នើសុំ​ឲ្យ​មានការចូលរួមសហការបន្ថែម ពីសំណាក់អភិបាល និងក្រុមប្រឹក្សា ក្រុង ស្រុក ដើម្បី ឲ្យស្របទៅតាមគោលការណ៍កំណែទម្រង់វិមជ្ឈការ និងសហវិមជ្ឈការ និងការធ្វើប្រតិភូកម្មមុខងារ របស់ក្រសួងមកឱ្យរដ្ឋបាលក្រុង ស្រុក ដើម្បីអនុវត្ត។

លោកថានាពេលកន្លងមកនេះ វិស័យបរិស្ថាន បានជួបប្រទះនូវបញ្ហាមួយចំនួន ដោយសាររដ្ឋបាល ក្រុង ស្រុកខ្លះ មិនបានអនុវត្ត​ឲ្យ​បានពេញលេញ ទៅតាមសេចក្តីប្រកាសរួមរបស់ក្រសួងបរិស្ថាន និងក្រសួងសេដ្ឋកិច្ចហិរញ្ញវត្ថុ។ ដូច្នេះ ធ្វើឲ្យប៉ះពាល់ក្នុងការបាត់បង់ចំណូល សម្រាប់ធ្វើការអភិវឌ្ឍន៍ក្នុងខេត្ត។ តាមរយៈនេះ សូមឲ្យអាជ្ញាធរក្រុង ស្រុក និងមន្ត្រីពាក់ព័ន្ធ ចូលរួមសហការ ជាមួយមន្ត្រីបរិស្ថាន អនុវត្តឲ្យស្របទៅតាមគោលការណ៍ណែនាំ របស់ក្រសួង ក្នុងការប្រមូលចំណូល។

បើតាមលោក នួន គង់សល្យ ប្រធានមន្ទីរបរិស្ថានខេត្តកំពង់ចាម បានឲ្យដឹងថា ការប្រមូលចំណូលមិនមែនសារពើពន្ធ ជូនថ្នាក់ជាតិ ក៏ដូចជា រដ្ឋបាលខេត្ត តាមរយៈ សេវាសាធារណៈ និងវិភាគទាន របស់មន្ទីរបរិស្ថាន លើអាជីវកម្ម សិប្បកម្ម សហគ្រាស ដែលស្ថិតក្នុងដែនសមត្ថកិច្ច ថ្នាក់រាជធានី-ខេត្ត គឺមន្ទីរ ត្រូវទទួលខុសត្រូវ ប៉ុន្តែការអនុវត្តតួនាទីភារកិច្ចទាំងនេះ មន្ទីរបានជួបបញ្ហាប្រឈមមួយចំនួន ដូចជា ៖ ការចូលរួមពីស្ថាប័នពាក់ព័ន្ធ ក្រុមហ៊ុនអាជីវកម្ម និងសាធារណៈជន ជាម្ចាស់អាជីវកម្មមួយចំនួនធំ មិនសហការ និងព្យាយាមគេចវេស ពីការបង់សេវា លើអាជីវកម្មរបស់ខ្លួន ជាដើម។ ដូច្នេះ តាមរយៈកិច្ចប្រជុំនេះ នឹងបានជួយសម្របសម្រួល និងសហការដើម្បីមន្ទីរបរិស្ថានបានអនុវត្តតួនាទីភារកិច្ចនេះ ឲ្យទទួលបានលទ្ធផលល្អប្រសើរ ដើម្បីជាប្រយោជន៍ថវិកា ជូនរដ្ឋបាលខេត្ត និងក្រសួងបរិស្ថាន ក៏ដូចជា ក្រសួងសេដ្ឋកិច្ច និងហិរញ្ញវត្ថុផងដែរ៕SRP

ភ្នំពេញ៖សម្ដេច ហ៊ុន សែន នាយករដ្ឋមន្ត្រី បានលើកឡើងថានឹងបន្តចាក់វ៉ាក់សាំង ដូសទី៣ ឲ្យបានគ្រប់ៗគ្នា។ នៅលើគណនីហ្វេសប៊ុក របស់សម្ដេចនាយករដ្ឋមន្ត្រី បានសរសេរថា« ថ្ងៃនេះបានចាក់វ៉ាក់សាំងដូសទី៣ឬដូសជំរុញជាមួយភរិយាជាទីស្រឡាញ់»។(តែពីរនាក់បានហើយយាយនិងតា)។

នៅលើគណនីហ្វេសប៊ុកដដែលបានបន្តថា៖នៅទូទាំងប្រទេសចាក់ដូសទី៣ឬដូសជំរុញបានប្រមាណជិត៧៨ម៉ឺននាក់រួចទៅហើយ។ សំណេរបន្តថា៖យើងនឹងបន្តការចាក់ដូសទី៣ឲ្យបានគ្រប់ៗគ្នា សម្រាប់បងប្អូនដែលបានចាក់ដូសទី១ និងដូសទី២រួចរាល់ ទៅតាមពេលវេលា ដែលត្រូវចាក់ដោយគិតពីដូសទី២ ទៅដូសទី៣ក្នុងរយៈពេលពី៤ទៅ៦ខែ។ ជាមួយគ្នានេះដែរ សម្ដេចហ៊ុន សែន ក៏បានបញ្ជាក់ថា(សូមផុសឡើងវិញព្រោះការផុសលើកមុនត្រូវបានធ្វើឱ្យច្របូកច្របល់ដោយសារជំនួយការ)៕SRP

ភ្នំពេញ៖លោក វង្ស ពិសេស អគ្គមេបញ្ជាការនៃកងយោធពលខេមរភូមិន្ទ បានបញ្ជាឲ្យបញ្ឈប់រាល់ការស្នើប័ណ្ណខេមរភូមិន្ទ ដើម្បីបំពាក់លើរថយន្តឯកជន បើទោះបីជារថយន្តទាំងនោះ ចូលរួមផ្នែកណាមួយក្នុងការបម្រើការងារអង្គភាពក្តី។ ត្រូវយករថយន្តចង្កូតស្ដាំកែទៅជាចង្កូតឆ្វេង រីឯរថយន្ត ចង្កូតឆ្វេង ដែលមិនទាន់បង់ពន្ធនាំចូល ត្រូវប្រញាប់ទៅបង់ពន្ធជូនរដ្ឋ តាមការកំណត់របស់អគ្គនាយកដ្ឋានគយ និងរដ្ឋាករកម្ពុជា ដែលមានយន្តការកំណត់ដូចក្នុងសេចក្តីជូនដំណឹងលេខ១៩៨៣/២១.អ.គ.រ ចុះថ្ងៃទី១៩ ខែកញ្ញា ឆ្នាំ២០២១ ជាកំហិត។

ការបញ្ជាបែបនេះនៅក្នុងសេចក្ដីណែនាំនៅថ្ងៃទី១៤ ខែកញ្ញា ឆ្នាំ២០២១ ចុះហត្ថលេខាដោយ លោក វង្ស ពិសេស អគ្គមេបញ្ជាការ៕SRP សូមអានលិខិតខាងក្រោម៖

ខេត្តបន្ទាយមានជ័យ៖ករណីឃុបឃិតគ្នារំលោភយកដីផ្លូវ២០ម៉ែត្រគុណនិងបណ្តោយ៣០ម៉ែត្រ នៅភូមិអូរឬស្សីសង្កាត់ផ្សារកណ្ដាល ក្រុងប៉ោយប៉ែត ធ្វើជាកម្មសិទ្ធិ រហូតមកដល់ពេលនេះអាជ្ញាធរនៅមិនទាន់ដោះស្រាយបានជូនប្រជាពលរដ្ឋនៅឡើយ។

អាជ្ញាធរក្រុងប៉ោយប៉ែត និងមន្ត្រីសង្កាត់ផ្សារកណ្ដាលរួមនឹងលោកមេភូមិ អនុភូមិអូរឬស្សីសង្កាត់ផ្សារកណ្ដាល កាលពីថ្ងៃទី១០ ខែកញ្ញា ឆ្នាំ២០២១ បានហៅប្រជាពលរដ្ឋ ដែលជាប់ពាក់ព័ន្ធនិងការប្រើប្រាស់ផ្លូវ មកទីស្នាក់ការភូមិអូរឬស្សី ដើម្បីមកធ្វើការដោះស្រាយគ្នា ពីបញ្ហាការបិទផ្លូវដែលមានស្រាប់មិន ឱ្យប្រជាពលរដ្ឋធ្វើដំណើរជាច្រើនឆ្នាំកន្លងមក។

កិច្ចប្រជុំដោះស្រាយនេះ នៅទីស្នាក់ការភូមិអូរឬស្សី ដោយមានវត្តមានលោកកែវ ដារ៉ារស្មី អភិបាលរងក្រុងប៉ោយប៉ែតលោករស់ វណ្ណា ជំទប់ទី២សង្កាត់ផ្សារកណ្ដាល លោកសាំង ឃឺន មេភូមិអូរឬស្សី លោកកង វាសនា អនុភូមិអូរឬស្សីលោកធាប គឹមសាង និងប្រជាពលរដ្ឋប្រើប្រាស់ផ្លូវចំនួន៤នាក់ផងដែរ។

ប្រជាពលរដ្ឋបានឲ្យដឹងថា នៅក្នុងកិច្ចប្រជុំនោះ លោកសាំង ឃឺន មេភូមិអូរឬស្សី បានឡើងគូសវាសផ្លូវនៅលើក្តារខៀនអះអាងតែម្នាក់ឯង ដោយមិនមានអំណេះអំណាងនិងការទទួលស្គាល់ជាផ្លូវការ ពីនរណាម្នាក់ឡើយ។ ក្នុងនោះលោកមេ ភូមិ រូបនេះ ប្រាប់ប្រជាពលរដ្ឋថា ករណីបិទផ្លូវខាងលើនោះ គឺឱ្យតែ៤ម៉ែត្រតែប៉ុណ្ណោះក្នុងការបើកផ្លូវឡើងវិញ។

ចំណែក លោកកែវ ដារ៉ារស្មី អភិបាលរងក្រុងប៉ោយប៉ែត បានលើកឡើងថា ក្នុងនាមរដ្ឋបាលក្រុងប៉ោយប៉ែត លោកប្រគល់បញ្ហានេះឲ្យទៅលោកមេភូមិអនុភូមិ ដោះស្រាយជាមួយភាគី ដែលអះអាងថាខ្លួនជាម្ចាស់ដីនិងប្រជាពលរដ្ឋដែលជាប់ពាក់ព័ន្ធដើម្បីធ្វើការពិភាក្សាគ្នា។

គួរបញ្ជាក់ថាប្រជាពលរដ្ឋប្រមាណជាង២០ គ្រួសារមានទីលំនៅភូមិអូឬស្សី សង្កាត់ផ្សារកណ្ដាល បានស្នើសុំដល់អាជ្ញាធរក្រុងប៉ោយប៉ែត ជួយបើកផ្លូវចាស់ ឲ្យពួកគាត់អាចធ្វើដំណើរឡើងវិញ។

ការស្នើសុំដោយសារពួកគាត់ជាង ២០ គ្រួសារ បានដាក់ពាក្យបណ្ដឹងនិងលិខិតអន្តរាគមន៍ ជាច្រើនលើក មកហើយដើម្បីស្នើសុំ ឲ្យអាជ្ញាធរក្រុងប៉ោយប៉ែត ជួយអន្តរាគមន៍បើកផ្លូវ ដែលមានស្រាប់ មានទទឹង ២០ម៉ែត្រគុណនឹងបណ្ដោយ ៣០ ម៉ែត្រ តភ្ជាប់ទៅផ្លូវក្រុងលេខ៥០ ស្ថិតនៅក្នុងភូមិអូរឫស្សីសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

ប្រភពបានឲ្យដឹងថាករណីនេះដោយសារតែមានបុគ្គលបានរំលោភយកធ្វើជាកម្មសិទ្ធិ នៅក្នុងកំឡុងឆ្នាំ ២០០៩ រហូតមកដល់ពេលនេះ មានរយៈពេល១២ ឆ្នាំមកហើយ ប៉ុន្តែអាជ្ញាធរក្រុងប៉ោយប៉ែត បានត្រឹមតែសន្យា ជួយរកដំណោះស្រាយ ប៉ុណ្ណោះ។

លោកតា គឹម ហ៊ាន មានវ័យ៧០ ឆ្នាំមានទីលំនៅភូមិអូរឬស្សី សង្កាត់ផ្សារកណ្ដាល ក្រុងប៉ោយប៉ែតតំណាងឲ្យប្រជាពលរដ្ឋទាំង២០ គ្រួសារបានលើកឡើងថា ពួកគាត់កើតទុក្ខមិនសុខចិត្តចំពោះបុគ្គលចំនួនពីរនាក់ ទី១ ឈ្មោះធាប គឹមសាង អតីតមេភូមិអូរឬស្សីចាស់ និងបច្ចុប្បន្នជានាយសាលាបឋមសិក្សាអូរឫស្សីលើ មានទីលំនៅភូមិអូរឬស្សី សង្កាត់ផ្សារកណ្ដាល ក្រុងប៉ោយប៉ែត ទី២ឈ្មោះលីវ អ៊ីធី ភេទប្រុសអាយុ៤៧ ឆ្នាំ មានទីលំនៅបច្ចុប្បន្នភូមិទ្រា សង្កាត់ស្ទឹងមានជ័យ ខណ្ឌស្ទឹងមានជ័យ រាជធានីភ្នំពេញ។ ដោយបុគ្គលទាំងពីរនាក់នេះ ឃុបឃិតគ្នាធ្វើលិខិត ទិញលក់ នៅលើដីផ្លូវសាធារណៈរបស់រដ្ឋដើម្បីយកធ្វើជាកម្មសិទ្ធិរបស់ខ្លួន។ ករណីអាចមានការឃុបឃិតគ្នាពីអាជ្ញាធរមូលដ្ឋានភូមិ សង្កាត់ និងក្រុងប៉ោយប៉ែត ចាស់ផងដែរ៕SRP

ខេត្តសៀមរាប៖អគ្គស្នងការនគរបាលជាតិ លោក នេត សាវឿន បានថ្លែងជម្រុញឲ្យស្នងការថ្មីខេត្តសៀមរាប «ត្រូវតែធ្វើឲ្យបាន បើយើងសន្យាហើយ ដាច់ខាតយើងត្រូវតែធ្វើឲ្យបាន មិនមែនសន្យាចោលឡើយ ហើយបើយើងចង់ឲ្យខេត្តសៀមរាប ទទួលបានជោគជ័យនោះ ទាល់តែយើងទាំងអស់គ្នារួមរួមសាមគ្គីគ្នា ទើបសម្រេចបានលទ្ធផលល្អប្រសើរ ជាពិសេស គឺលើការអនុវត្តនៅភូមិឃុំមានសុវត្ថិភាព»។

លោកនេត សាវឿន បានថ្លែងថា ការសន្យាចិត្ត ប្តេជ្ញាចិត្ត គឺជាទ្រឹស្តី ប៉ុន្តែសំខាន់ចាប់ពីពេលនេះទៅយើងត្រូវអនុវត្តជាក់ស្តែង យើងជាបញ្ជាការជាន់ខ្ពស់សម្រាប់ខេត្ត យើងត្រូវចាត់ចែងគ្រប់វិស័យពាក់ព័ន្ធ និង សន្តិសុខសណ្តាប់ធ្នាប់ ត្រូវមានកិច្ចសហការណ៍ល្អ ជាមួយកម្លាំងក្នុងគណបញ្ជាការឯកភាពរដ្ឋបាលខេត្ត និង ដើម្បីធ្វើការទាំងអស់នោះ ឲ្យបានជោគជ័យយើងមិនអាចធ្វើការម្នាក់ឯងបាននោះឡើយ។

លោកនេត សាវឿន ថ្លែងប្រាប់ស្នងការថ្មីនៅខេត្តសៀមរាប យ៉ាងដូច្នេះ នៅថ្ងៃទី១៣ ខែកញ្ញា ម្សិលមិញ ក្នុងឱកាស ប្រកាសលោកតេង ច័ន្ទណាត អត្តលេខ ៦៥២១២ ស្នងការរងឲ្យចូលកាន់តំណែងជាស្នងការ ជំនួសលោកទិត្យ ណារ៉ុង៕SRP

ខេត្តរតនគិរី៖សកម្មភាពដឹកជញ្ជូនឈើប្រណិតៗ នៅក្នុងភូមិសាស្ត្រ ក្នុងភូមិការឡៃ៣ ឃុំការឡៃស្រុកអូរជុំ ខេត្តរតនគិរី នៅតែបន្តកើតមានយ៉ាងអនាធិបតេយ្យ ដោយពុំមានអាជ្ញាធរសមត្ថកិច្ចជំនាញធ្វើការទប់ស្កាត់បង្ក្រាបនោះឡើយ។

សេចក្ដីរាយការណ៍បានឲ្យដឹងថាទីតាំងបទល្មើសព្រៃឈើគឺនៅចំណុចភ្នំកាច់ចង្កេះស្ថិតក្នុងភូមិការឡៃបីឃុំ៣ ដោយមានក្រុមឈ្មួញដឹកតាមរថយន្តនឹងតាមម៉ូតូកែឆ្នៃជាច្រើនគ្រឿងចេញមកពីជើងភ្នំកាច់ចង្កេះ យកទៅលក់ឲ្យឈ្មួញ ចាំទិញនៅមាត់ផ្លូវលើភ្នំកាច់ចង្កេះរួចហើយឈ្មួញទាំងនោះ ដឹកបន្តទៅលក់នៅតាមរោងសិប្បកម្មមួយចំនួននៅក្រុងបានលុងខេត្តរតនគិរី យកឆ្នៃជាគ្រឿងសង្ហារឹមលក់ក្នុងខេត្តនឹងទៅក្រៅខេត្ត នឹងខ្លះទៀតដឹកទៅ
វៀតណាម តាមច្រកអូរយ៉ាដាវ។

សេចក្ដីរាយការណ៍បន្តថាការដែលពួកឈ្មួញដឹកជញ្ជូនឈើបានដោយរលូនបែបនេះប្រជាពលរដ្ឋមានការសង្ស័យថា ពួកគេមានការឃុបឃិតគ្នាជាមួយជំនាញពាក់ព័ន្ធ។

ពាក់ព័ន្ធទៅនឹងការដឹកជញ្ជូនឈើនេះ អង្គភាពសៀមរាបប៉ុស្តិ៍ នៅមិនទាន់ទទួលបានការបកស្រាយបំភ្លឺពីអាជ្ញាធរជំនាញនៅឡើយទេ។ ទោះជាយ៉ាងណាពលរដ្ឋសង្ឃឹមថាអាជ្ញាធរជំនាញនឹងធ្វើការទប់ស្កាត់បង្ក្រាបករណីដឹកជញ្ជូនឈើជាក់ជាពុំខានឡើយ៕SRP

ខេត្តព្រះវិហារ៖មនុស្ស៤នាក់ ត្រូវបាននគរបាល ការិយាល័យប្រឆាំងគ្រឿងញៀនស្នងការដ្ឋានខេត្តព្រះវិហារឃាត់ខ្លួន ពាក់ព័ន្ធករណីជួញដូរគ្រឿងញៀន។

សមត្ថកិច្ចបានឲ្យដឹងថាករណីនេះដកហូតបានវត្ថុតាងមួយចំនួនជាប្រភេទថ្នាំញៀន (មេតុំហ្វេតាមីន)។ ជនសង្ស័យទាំងនាក់ត្រូវបានកសាងសំណុំរឿងបញ្ជូនទៅតុលាការខេត្តព្រះវិហារដើម្បីអនុវត្ត តាមផ្លូវច្បាប់។

សូមបញ្ជាក់ថាការបង្ក្រាបធ្វើឡើង កាលពីថ្ងៃទី ១០ ខែ កញ្ញា ឆ្នាំ ២០២១ ស្ថិតនៅសង្កាត់កំពង់ប្រណាក ក្រុងព្រះវិហារ ក្រោមការដឹកនាំបញ្ជាផ្ទាល់ របស់លោក វុធសាវី ព្រះរាជអាជ្ញារង តំណាងលោកទី សុវិនថាល់ ព្រះរាជអាជ្ញាខេត្តព្រះវិហារវិហារ៕SRP

ខេត្តសៀមរាប៖លោកនេត សាវឿន អគ្គស្នងការនគរបាលជាតិ តំណាងដ៏ខ្ពង់ខ្ពស់ សម្តេចស ខេង បានអញ្ជើញប្រកាសលោកតេង ច័ន្ទណាត ស្នងការរងនគរបាលខេត្តសៀមរាប ជាស្នងការថ្មី។

ពិធីប្រកាសធ្វើឡើងថ្ងៃចន្ទ ទី១៣ ខែកញ្ញា ឆ្នាំ២០២១នេះ នៅសាលាខេត្តសៀមរាប ដោយមានការចូលរួមពីលោក អ៊ាន ឃុន ប្រធានក្រុមប្រឹក្សាខេត្តនិងលោកទៀ សីហា អភិបាលខេត្តសៀមរាប នឹងត្រូវបានធ្វើឡើងដោយអនុវត្តតាមវិធានសុខាភិបាល និងការធ្វើតេស្តរហ័ស (Rapid Test ) សម្រាប់សមាជិក សមាជិកា ដែលចូលរួមផងដែរ។

សូមជម្រាបថាកាលថ្ងៃទី០៩ ខែកញ្ញា ឆ្នាំ២០២១ សម្ដេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសម្រេចតែងតាំង លោកតេង ច័ន្ទណាត ស្នងការរងនគរបាលខេត្តសៀមរាប ទទួលផែននគរបាលចរាចណ៍ ជាស្នងការថ្មី នៃស្នងការដ្ឋាននគរបាលខេត្តសៀមរាប ជំនួសលោកទិត្យ ណារ៉ុង ដែលត្រូវចូលនិវត្តន៍៕SRP

ខេត្តសៀមរាប៖បុរសម្នាក់ត្រូវបានខ្សែភ្លើងឆក់ស្លាប់ខណ:តខ្សែភ្លើងដាក់ចង្រិត។

ហេតុការណ៍បានកើតឡើងនៅវេលាម៉ោង២០និង៣០នាទី ថ្ងៃទី១២ ខែកញ្ញា ឆ្នាំ២០២១ ស្ថិតនៅភូមិត្នោតកំបុត ឃុំកំពង់ភ្លុក ស្រុកប្រាសាទបាគង ខេត្តសៀមរាប។

សមត្ថកិច្ចមូលដ្ឋានបានឲ្យដឹងថាជនរងគ្រោះមានឈ្មោះ ឌៀន វ៉ាន់ថា អាយុ៣៣ ឆ្នាំ រស់នៅភូមិត្នោតកំបុត ឃុំកំពង់ភ្លុក ស្រុកប្រាសាទបាគង ខេត្តសៀមរាប។

សមត្ថកិច្ចបន្តថាមូលហេតុជនរងគ្រោះ តខ្សែភ្លើងដាក់ចង្រិតបណ្ដាលអោយឆក់ស្លាប់តែម្ដង។ ករណីនេះសមត្ថកិច្ចបានប្រគល់សាកសព អោយសាច់ញាតិយកទៅធ្វើបុណ្យតាមប្រពៃណី នៅភូមិតាត្រាវ ឃុំកន្រ្ទាំងស្រុកប្រាសាទបាគងមខេត្តសៀមរាប៕SRP

ភ្នំពេញ៖សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថា៖
ប្រតិបត្តិការបង្ក្រាបបទល្មើសគ្រឿងញៀន ក្នុងខែសីហា ឆ្នាំ២០២១ ដែលនៅក្នុងរយៈពេល១ខែនេះ សមត្ថកិច្ចបង្ក្រាបបានបទល្មើសគ្រឿងញៀនសរុបចំនួន ៤៤០ករណី កើនឡើង១១១ករណី ស្មើនឹង៣៣,៧ភាគរយ ធៀបនឹងខែកក្កដា ឆ្នាំ២០២១។ ករណីល្មើសដែលបង្ក្រាបបានទាំងនោះរួមមាន ករណីរក្សាទុកជួញដូរ និងរក្សាទុកមានចំនួន៣៥៥ករណី, ករណីប្រើប្រាស់មានចំនួន៨៤ករណី និងករណីសំយោគកែច្នៃ១ករណី។

សម្ដេច ស ខេង បានបន្តថាកិច្ចប្រតិបត្តិការខែសីហាកន្លងទៅនេះដែរ សមត្ថកិច្ចបានឃាត់ខ្លួនជនសង្ស័យចំនួន៨៦១នាក់។ ចំនួនជនសង្ស័យពាក់ព័ន្ធនឹងបទល្មើសគ្រឿងញៀនទាំងនេះ មានការកើនឡើងចំនួន១២នាក់ ធៀបនឹងខែកក្កដា ឆ្នាំ២០២១ ស្មើនឹង១,៤ភាគរយ។ ក្នុងចំណោមជនសង្ស័យទាំនោះ រួមមានជនសង្ស័យក្នុងករណីជួញដូរ និងរក្សាទុកមានចំនួន៦៥០នាក់, ជនសង្ស័យក្នុងករណីប្រើប្រាស់គ្រឿងញៀន២១០នាក់ និងជនសង្ស័យក្នុងករណីសំយោគ កែច្នៃ មាន១នាក់។ មានជនបរទេស២១នាក់ស្ថិតក្នុងចំណោមជនសង្ស័យទាំងនោះ។

ថ្វីដ្បិតថាករណីគ្រឿងញៀន និងចំនួនជនសង្ស័យដែលសមត្ថកិច្ចបង្ក្រាប និងឃាត់ខ្លួនបាន មានការកើនឡើងធៀបនឹងខែកក្កដា ប៉ុន្តែក្នុងកិច្ចប្រតិបត្តិការខែសីហានេះ ចំនួនគ្រឿងញៀនដែលសមត្ថកិច្ចចាប់យកបានថយចុះ១៦១គីឡូក្រាម និង៥៤៨,១៧ក្រាម ថយចុះ៧៣,៦ភាគរយ ពោលគឺសមត្ថកិច្ចយើងបានចាប់យកគ្រឿងញៀនសរុបចំនួន៥៧គីឡូក្រាម និង៩១២,៥៤ក្រាម ធៀបនឹងខែកក្កដា ដែលមានគ្រឿងញៀនចាប់យកជិត២២០គីឡូក្រាម។ កំណើនកាលពីខែកក្កដានោះ ក៏ដោយសារសមត្ថកិច្ចយើងបង្ក្រាបបានករណីធំៗ។

គ្រឿងញៀនដែលចាប់បានក្នុងខែសីហាឆ្នាំ២០២១នេះ រួមមាន មេតំហ្វេតាមីនក្រាមម្ស៉ៅជាង៣៧គីឡូក្រាម, មេតំហ្វេតាមីនគ្រាប់ជា៣៥គីឡូក្រាម, អ៊ិចស្រ្តាស៊ីជាង១២គីឡូក្រាម, កេតាមីនជាង៧គីឡូក្រាម, Ninetazepamជាង២០០ក្រាម និងកញ្ឆាស្ងួតជាង១គីឡូក្រាម។ ក្នុងចំណោមករណីបង្ក្រាបបាននេះដែរ បទល្មើសគ្រឿងញៀនចាប់ពី១គីឡូក្រាមឡើងទៅមាន៤ករណី ស្មើនឹង៤ក្រុម ក្នុងនោះឃាត់ខ្លួនជនសង្ស័យបាន៨នាក់ បណ្ដាញ៨នាក់ ព្រមទាំងមានគ្រឿងញៀនសរុបករណីនេះដល់ទៅជាង២០គីឡូក្រាម សាធាតុផ្សំសរុបជាង២គីឡូក្រាម និងកញ្ឆាស្ងួតជាង១គីឡូក្រាម។

ជនរួមជាតិជាទីគោរព! ក្នុងនាមសម្ដេចតេជោនាយករដ្ឋមន្រ្តី ក្នុងនាមក្រសួងមហាផ្ទៃ និងខ្លួនខ្ញុំផ្ទាល់ ខ្ញុំសូមផ្ញើនូវសេចក្ដីកោតសរសើរ និងការលើកទឹកចិត្តខ្ពស់ជាថ្មីម្ដងទៀត ជូនចំពោះថ្នាក់ដឹកនាំ និងមន្រ្តីពាក់ព័ន្ធទាំងអស់ ទាំងស៊ីវិល នគរបាល និងកងរាជអាវុធហត្ថ ដែលបានខិតខំរួមសហការគ្នាយ៉ាងល្អ ក្នុងកិច្ចប្រតិបត្តិការបង្ក្រាបបទល្មើសគ្រឿងញៀន ដើម្បីរួមចំណែកការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ជូនជាតិ និងប្រជាជនយើង។

ក្នុងឱកាសនេះដែរ ខ្ញុំក៏សូមផ្ញើសារជូនជនរួមជាតិ គ្រប់មជ្ឈដ្ឋានសង្គម និងកម្លាំងអនុវត្តច្បាប់ទាំងអស់ សូមចូលរួមគាំទ្រ និងអនុវត្តពាក្យស្លោកជាតិ ៣ការពារ ១រាយការណ៍ ដូចខាងក្រោម៖

– កុំពាក់ព័ន្ធ ៖ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន ។

– កុំអន្តរាគមន៍ ៖ កុំរារាំងការរអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫ មិត្តភក្កិក៏ដោយ ។

– កុំលើកលែង ៖ កុំបន្ធូរបន្ថយការអនុត្តច្បាប់ចំពោះឧក្រិដ្ឌជនគ្រឿងញៀន។ សមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវ:របស់ខ្លួន ហើយជនគ្រប់រូបត្រូវគោរព និងអនុវត្តច្បាប់ ។

មួយរាយការណ៍៖ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច ដើម្បីយើងអាចបន្តរួមកម្លាំងសាមគ្គីជាតិ ប្រយុទ្ធប្រឆាំងគ្រឿងញៀន ដែលជាសត្រូវនៃការអភិវឌ្ឍសេដ្ឋកិច្ច សង្គម និងធនធានមនុស្ស ជាពិសេសធនធានយុវជន ដែលជាសសរទ្រូងប្រទេសជាតិ៕SRP

ភ្នំពេញ៖សម្តេច ហ៊ុន សែន បានលើកបញ្ហាកសិផល ជាមួយ លោក វ៉ាង យី ស្ដីពីការនាំកសិផលកម្ពុជាត្រង់ទៅកាន់ប្រទេសចិន ដែលក្នុងនោះដូចជាមៀនប៉ៃលិនជាដើម។

លោក វ៉ាង យី ទីប្រឹក្សារដ្ឋ និងជារដ្ឋមន្រ្តីក្រសួងការបរទេសចិន បានអះអាងប្រាប់សម្តេចតេជោ ថា ចិននឹងនាំចូលផលិតផលកសិកម្មកម្ពុជា ទៅកាន់ទីផ្សារចិនឱ្យបានកើនតែច្រើន ដើម្បីប្រយោជន៍សម្រាប់កសិករខ្មែរ។

លោក វ៉ាង យី បានថ្លែងថា ការលំបាករបស់ប្រជាជនកម្ពុជា គឺជាការលំបាករបស់ប្រជាជនចិន យើងនឹងពួតដៃគ្នាជាមួយប្រទេសកម្ពុជា ដើម្បីជួយកម្ពុជាឱ្យបានកាន់តែច្រើន។

លោកអះអាងថា ចិននឹងគាំទ្រវិស័យកសិកម្មនៅកម្ពុជា។ ប្រទេសចិននឹងនាំចូលផលិតផលកសិកម្មពីប្រទេសកម្ពុជាទៅកាន់ទីផ្សារចិនឱ្យបានច្រើន ដើម្បីនាំមកនូវផលប្រយោជន៍កាន់តែច្រើនសម្រាប់កសិករកម្ពុជា។

ការលើកឡើងរបស់លោកលោក វ៉ាង យី និង​ សម្តេចហ៊ុន សែន នាល្ងាច ថ្ងៃទី១២ ខែកញ្ញា ម្សិលមិញ ក្នុងឱកាសជួបសំដែងការគួរសម និងពិភាក្សាការងារនៅវិមានសន្តិភាព។

បើតាមសម្តេច ហ៊ុន សែន មានប្រសាសន៍ថា ចិនកំពុងបើកទូលាយទីផ្សារ ហើយ នៅពេលដែលកិច្ចព្រមព្រៀងពាណិជ្ជកម្មកម្ពុជា- ចិន ដែលនឹងចូលជាធរមាននៅពេលខាងមុខ យើងនឹងអាចប្រើប្រាស់ទីផ្សាររបស់ចិន និងទទួលបានផលប្រយោជន៍ ពីទីផ្សាររបស់ចិន។រាជរដ្ឋាភិបាលកម្ពុជា នឹងប្រឹងប្រែងឱ្យអស់លទ្ធភាពជាមួយនឹងការប្តេជ្ញា
ជួយពីមិត្តចិន៕SRP

ភ្នំពេញ៖ឯកសារចំនួន០៦ ត្រូវបានកម្ពុជានិងចិន ធ្វើការចុះហត្ថលេខា នៅនៅល្ងាច ថ្ងៃអាទិត្យ ទី១២ ខែកញ្ញា ម្សិលមិញ។

ការចុះធ្វើការចុះហត្ថលេខា នៅវិមានសន្តិភាព ក្រោមវត្តមាន សម្តេចហ៊ុន សែន នាយករដ្ឋមន្ត្រីនិង ឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន។

ឯកសារចំនួន០៦រួមមាន៖

ទី១៖ លិខិតប្រគល់-ទទួល សម្ភារមនុស្សធម៌ក្នុងវិស័យបោសសម្អាតមីន ដោយ ឯកឧត្ដម ទេសរដ្ឋមន្ត្រី លី ធុជ និង ឯកឧត្ដម វ៉ាង វិនធៀន (WANG Wentian) ឯកអគ្គរដ្ឋទូតចិនប្រចាំកម្ពុជា។

ទី២៖ កិច្ចព្រមព្រៀងសហប្រតិបត្តិការស្តីអំពីការគាំទ្រមន្ទីរពេទ្យដៃគូរ រវាងគណៈកម្មាធិការសុខាភិបាលជាតិ នៃសាធារណរដ្ឋប្រជាមានិតចិន និងក្រសួងសុខាភិបាល នៃព្រះរាជាណាចក្រកម្ពុជា ដោយ ឯកឧត្ដម ម៉ម ប៊ុនហេង និងឯកឧត្ដម វូ ហ្សីនហាវ ( Wu Jianghao) ឧបការីរដ្ឋមន្ត្រីក្រសួងការបរទេស នៃសាធារណរដ្ឋប្រជាមានិតចិន។

ទី៣៖ លិខិតប្រគល់-ទទួលបរិក្ខារ ដើម្បីប្រយុទ្ធប្រឆាំងនឹងជំងឺរាតត្បាត រវាងរដ្ឋាភិបាល នៃសាធារណរដ្ឋប្រជាមានិតចិន និងរាជរដ្ឋាភិបាល នៃព្រះរាជាណាចក្រកម្ពុជា ដោយ ឯកឧត្ដម ម៉ម ប៊ុនហេង និង ឯកឧត្ដម គៀន ខឹមីង (H.E. Qian Keming) អនុរដ្ឋមន្ត្រីក្រសួងពាណិជ្ជកម្ម នៃសាធារណរដ្ឋប្រជាមានិតចិន។

ទី៤៖ កិច្ចព្រមព្រៀងសហប្រតិបត្តិការសេដ្ឋកិច្ច និងបច្ចេកទេសស្តីពីការផ្តល់ហិរញ្ញប្បទានឥតសំណងចំនួន១,៧៥០,០០០,០០០យ័នចិន (ប្រមាណ ២៧០លានដុល្លារអាមេរិក) ដោយ ឯកឧត្ដម វង្សី វិស្សុត និងលោក ដេង បូគិង (Deng Boqing) អនុប្រធានភ្នាក់ងារអភិវឌ្ឍន និងសហប្រតិបត្តិការអន្តរជាតិ។

ទី៥៖ លិខិតប្រគល់-ទទួលថវិកាចំនួន ២,៥លានដុល្លារអាមេរិក ជូនរាជរដ្ឋាភិបាលកម្ពុជា សម្រាប់ការងារបោសសម្អាតមីន និងយុទ្ធភ័ណ្ឌមិនទាន់ផ្ទុះនៅកម្ពុជា ដោយឯកឧត្ដម វង្សី វិស្សុត និងលោក ដេង បូគិង (Deng Boqing) អនុប្រធានភ្នាក់ងារអភិវឌ្ឍន និងសហប្រតិបត្តិការអន្តរជាតិ។

ទី៦៖ កិច្ចព្រមព្រៀងស្ដីពីគម្រោងកិច្ចសហប្រតិបត្តិការរបស់មូលនិធិពិសេសមេគង្គ-ឡានឆាង ដោយលោក សុខ សូកេន និងលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា៕SRP