ខេត្តកំពង់ចាម៖អាជ្ញាធរខេត្តកំពង់ចាមនៅថ្ងៃទី ១៦ ខែកញ្ញាឆ្នាំ ២០២១ នេះ បានចេញសេចក្ដីជូនដំណឹងស្តីពីការចាក់វ៉ាក់សាំងដល់កុមារចាប់ពីអាយុ ៦ឆ្នាំឡើងទៅ៕SRP

ខេត្តត្បូងឃ្មុំ៖អភិបាលខេត្តត្បូងឃ្មុំ លោកជាម ច័ន្ទសោភ័ណ បានប្រាប់ដល់មន្ត្រី​នគរបាល​ទាំងអស់​ ត្រូវបន្តធ្វើកិច្ចការពារ សុខសុវត្ថិភាព សណ្តាប់ធ្នាប់ សាធារណៈ ជូនប្រជាពលរដ្ឋ ឲ្យបានកាន់តែល្អប្រសើរ ស្របតាមគោលនយោបាល «ភូមិ-ឃុំមានសុវត្ថិភាព»។

អភិបាលខេត្ត ក៏បានអំពាវនាវដល់ប្រជាពលរដ្ឋ ត្រូវបន្តអនុវត្តបានម៉ឺងម៉ាត់ និងមានប្រសិទ្ធភាព នូវវិធានការ​ ៣ការពារ​ ៣កុំ​ ដើម្បីចៀសផុត​ពីជំងឺកូវីដ។

អភិបាលខេត្ត​ ក៏បានធ្វើការសំណេះសំណាលលើកទឹកចិត្ត ដល់អាជ្ញាធរ និងកងកម្លាំងកំពុងឈរជើង១២ គោលដៅ លេីទីតាំងបិទខ្ទប់២ សរុប៨៤នាក់ ដោយបានឧបត្ថម្ភ មី៦៥កេស ទឹកសុទ្ធ៣០កេស ម៉ាស២កេស អាកុល៣កាន និងថវិកាក្នុងម្នាក់២ម៉ឺនរៀល សរុប១,៦៨០,០០០រៀល​ផងដែរ។

លោកថ្លែងបែបនេះក្នុងឱកាសចុះពិនិត្យស្ថានភាព​ពលរដ្ឋ ធ្វើ​ចត្តាឡីស័ក​ ក្នុងតំបន់បិទខ្ទប់​ នៅក្រុងសួង​ និងស្រុកត្បួងឃ្មុំ នៅព្រឹក​មិញនេះ​។

សូមជម្រាបថាលោកជាម ច័ន្ទសោភ័ណ និងក្រុមការងារ​ ក៏បានចុះពិនិត្យផ្លូវមួយខ្សែដែលខូចខាតដោយទឹកភ្លៀងជន់លិច ក្នុងការវាយតម្លៃលើការងារជួសជុលឡើងវិញ។លោកក៏បានចុះពិនិត្យទីតាំងទីទួលសុវត្ថិភាព មានផ្ទៃក្រឡា១៥ហិកតា ត្រៀមសម្រាប់ពលរដ្ឋ​ ដែលរងគ្រោះដោយទឹកជំនន់ មកស្នាក់នៅបណ្តោះអាសន្ន ស្ថិតក្នុងឃុំទន្លេបិទ ស្រុក​ត្បូងឃ្មុំ​ ផងដែរ​៕SRP

ខេត្តសៀមរាប៖អាជ្ញាធរខេត្តសៀមរាប អំពាវនាវដល់ពលរដ្ឋចំនួន១៦នាក់ ឲ្យមកបង្ហាញមុខយកសំណាក ចៀសវាង ប្រឈមនឹងផ្លូវច្បាប់។

អាជ្ញាធរបានឲ្យដឹងថារដ្ឋបាលខេត្តសូមជូនដំណឹងដល់ប្រជាពលរដ្ឋចំនួន១៦នាក់ (ដែលមានឈ្មោះដូចខាងក្រោម) ដែលមិនបានបំពេញកាតព្វកិច្ច សហការជាមួយមន្ត្រីសុខាភិបាល ដើម្បីយកសំណាក។

សូមបញ្ជាក់ថា ពលរដ្ឋទាំង១៦នាក់បំពេញព័ត៌មានដើម្បីយកសំណាករួចហើយ ប៉ុន្តែដល់ពេលត្រូវយកសំណាកមិនបានបង្ហាញមុខយកសំណាក។

ទោះជាយ៉ាងណាអាជ្ញាធរសូមស្នើដល់បងប្អូនដូចមានរាយនាមខាងលើ សូមរួសរាន់ទំនាក់ទំនង ជាមួយអាជ្ញាធរមូលដ្ឋាន ដើម្បីមកយកសំណាក នៅតាមទីតាំងដែលមន្ទីរសុខាភិបាលខេត្តបានរៀបចំ។ ក្នុងករណី មិនរួសរាន់មកយកសំណាក តាមការជូនដំណឹងនេះ រដ្ឋបាលខេត្តនឹងចាត់ក្រុមការងារកសាងសំណុំរឿងតាមវិធានការច្បាប់ ស្របតាមខ្លឹមសារ មាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងមាត្រា២១ នៃអនុក្រឹត្យលេខ៣៧ អនក្រ.បក ចុះថ្ងៃទី១២ ខែមីនា ឆ្នាំ២០២១ ស្តីពីវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ រាល់ព័ត៌មានបន្ថែមសូមទំនាក់ទំនងទូរស័ព្ទលេខ ០១២ ៨២៣ ៤៥១។

អាជ្ញាធររដ្ឋសង្ឃឹមយ៉ាងមុតមាំថា ពលរដ្ឋទាំង១៦នាក់ខាងលើចូលរួមសហការយកសំណាកឱ្យបានទាន់ពេលវេលាកុំបីខាន៕SRP

ខេត្តសៀមរាប៖សណ្ឋាគារឡុទុសប្លង្គ ដែលមានទីតាំងស្ថិតនៅកណ្ដាលក្រុងសៀមរាប ត្រូវបានក្រសួងសុខាភិបាលអនុញ្ញាតឱ្យផ្ដល់សេវាថែទាំ និងព្យាបាលអ្នកជំងឺកូវីដ-១៩កម្រិតស្រាល រយៈពេល ២ឆ្នាំ។ នេះបើយោងតាមលិខិតអនុញ្ញាត របស់ក្រសួងសុខាភិបាលដែលចុះហត្ថលេខាដោយរដ្ឋមន្ត្រីម៉ម ប៊ុនហេង។

ក្នុងលិខិតបានបញ្ជាក់ថា អនុលោមតាមលិខិតលេខ ០២/២១ អបស.មព ចុះថ្ងៃទី១៥ ខែកញ្ញា ឆ្នាំ២០២១ របស់ក្រសួងសុខាភិបាល បានអនុញ្ញាតឱ្យសណ្ឋាគារឡុទុសប្លង្គ ស្ថិតនៅបណ្តោយផ្លូវជាតិលេខ៦ សង្កាត់ស្វាយដង្គំ ក្រុងសៀមរាប ផ្តល់សេវាថែទាំ និងព្យាបាលអ្នកជំងឺកូវីដ-១៩ កម្រិតស្រាល រយៈពេល ២ឆ្នាំ ដោយគិតចាប់ពីថ្ងៃទី១៥ ខែកញ្ញា ឆ្នាំ២០២១ ដល់ថ្ងៃទី១៥ ខែកញ្ញា ឆ្នាំ២០២៣៕SRP

ខេត្តកំពង់ចាម៖លោកអ៊ុន​ ចាន់ដា​ អភិបាលខេត្តកំពង់ចាម​ បាន​ប្រាប់ដល់​មន្ត្រី​អប់រំ​ និងលោកគ្រូ អ្នកគ្រូ ​ទាំងអស់ ឲ្យ​ណែនាំ​ដល់​សិស្សានុសិស្ស ត្រូវអនុវត្ត​ឲ្យ​បាន​ខ្ជាប់ខ្ជួន​ វិធានការ​៣ការពារ ៣កុំ​ ដេីម្បីចៀសសផុត​ពី​នៃ​ជំងឺ​កូវីដ​-១៩​។ លោកថា ក្នុងនោះ​សិស្សានុសិស្ស ដែលមានអាយុ ១២ឆ្នាំ ឡើងទៅ ត្រូវទៅ​ចាក់​វ៉ាក់សាំងបង្ការ​ជំងឺ​កូវីដ​-១៩ ឲ្យបានគ្រប់ៗគ្នា និងត្រូវប្រុងប្រយ័ត្ន​ឲ្យបានខ្ពស់ អំឡុងពេលសិក្សារៀនសូត្រ របស់លោកគ្រូ អ្នកគ្រូ និងក្មួយៗ​សិស្សានុសិស្ស​ នាពេលខាងមុខនេះ ដោយ​ហេតុ​ថា​ នៅថ្ងៃទី២០ ខែកញ្ញា នេះ រដ្ឋបាលខេត្តកំពង់ចាម នឹងសម្រេចបើកឲ្យដំណើរសាលាឡើងវិញ ចាប់ពីថ្នាក់កម្រិតអនុវិទ្យាល័យឡើង នៅក្នុងដំណាក់ទី១។ ដោយឡែក ក្នុងដំណាក់ទី២ ក៏គ្រោងឲ្យបើកដំណើរការរៀនសូត្រ នៅថ្នាក់កម្រិតបឋមសិក្សា នៅថ្ងៃទី១១ ខែតុលា ខាងមុខនេះផងដែរ។

លោកណែនាំបែបនេះនៅព្រឹកមិញនេះ​ ក្នុងឱកាសផ្ដល់​សម្ភារ​ការពារ​ជំងឺ​កូវីដ​-១៩​ រួមមាន​ ​ម៉ាស​ អាកុល​ សាប៊ូ​ និង​ថវិកា​ ជូនដល់សាលា​អនុវិទ្យាល័យ​ និង​វិទ្យាល័យ​ ខណៈ​សាលា​ ចំនួន​១២៤​ ក្នុង​ខេត្តកំពង់ចាម​​ត្រៀម​បេីក​ឲ្យ​សិស្ស​ចូល​សិក្សា​ឡេីង​វិញ​នៅ​ថ្ងៃ​ទី​២០​ ខែកញ្ញា​ ឆាប់ៗខាងមុខនេះ​។

គួរ​បញ្ជាក់​ផងដែរ​ថា​ សម្ភារ​ដែល​ត្រូវ​ផ្ដល់​ជូន​អនុវិទ្យាល័យ​ និង​វិទ្យាល័យ​​ទាំង​ ១២៤សាលា​ ដោយ​ក្នុង​១សាលា​ទទួល​បាន​ ​ម៉ាស​ ១០០០​ម៉ាស​ ទឹកអាកុល ៣០លីត្រ និង​សាប៊ូ ១៥ដុំ ចំពោះ​សាលា​ ដែលត្រូវ​យកធ្វើជាមណ្ឌលចត្តាឡីស័ក ចំនួន​ ២២សាលា​ ក្នុង​១សាលា​ ទទួល​បាន​ថវិកា​ ១លានរៀន។ ដោយឡែក វិទ្យាល័យ ព្រះសីហនុ ក្រុងកំពង់ចាមត្រូវយកធ្វើជាមន្ទីរពេទ្យព្យាបាលកូវីដ កម្រិតស្រាលទទួលបានថវិកា២លានរៀល​ផងដែរ​៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្ញើសារអបអរសាទរ គោរពជូន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាស សម្ដេចអគ្គមហាសេនាបតីតេជោ ទទួលបាន «មេដាយសហប្រធានកិច្ចប្រជុំកំពូលសន្តិភាពពិភពលោក២០២១» ពីមហាសន្និបាតនៃក្ដីសង្ឃឹមលើក ទី៧ ក្រោមប្រធានបទស្ដីពី សន្តិភាពនៅតំបន់អាស៊ីប៉ាស៊ីហ្វិក ។

សារអបអរសាទរបានបញ្ជាក់ខ្លឹមសារថា៖

សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រី នៃព្រះរាជាណាចក្រកម្ពុជា សម្តេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់!

តាងនាមថ្នាក់ដឹកនាំ មន្ត្រីនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារ នៃក្រសួងមហាផ្ទៃ ខ្ញុំសូម អនុញ្ញាតចូលរួមសម្ដែងអំណរសាទរ ប្រកបដោយ មនោសញ្ចេតនារំភើបរីករាយយ៉ាងក្រៃលែង ជាមួយជនរួមជាតិ កម្ពុជានៅទូទាំងប្រទេស ក្នុងឱកាស សម្ដេចអគ្គមហាសេនាបតីតេជោ ទទួលបាន «មេដាយសហប្រធាន កិច្ចប្រជុំកំពូលសន្តិភាពពិភពលោក២០២១» ពីមហាសន្និបាតនៃក្តីសង្ឃឹម លើកទី៧ ក្រោមប្រធានបទស្តីពី សន្តិភាពនៅតំបន់អាស៊ីប៉ាស៊ីហ្វិក។

ការទទួលបាននូវគ្រឿងឥស្សរិយយស ប្រកបដោយគុណតម្លៃជាសកល និងពោរពេញដោយអត្ថន័យដ៏ ជ្រាលជ្រៅនេះ ពិតជាសក្តិសមទៅនឹងគុណបំណាច់ដ៏ឧត្តុង្គឧត្តមរបស់ សម្តេចតេជោ នាយករដ្ឋមន្ត្រី ដែល បានតស៊ូប្ដូរផ្តាច់ និងលះបង់កម្លាំងកាយ ព្រមទាំងប្រាជ្ញាស្មារតី ក្នុងបុព្វហេតុជាតិ និងប្រជាជន នាំមកនូវ សុខសន្តិភាពពេញបរិបូរណ៍ ក្រោមគោលនយោបាយ ឈ្នះ-ឈ្នះ ដ៏ស័ក្ដិសិទ្ធិ ។ ខ្ញុំក៏សូមសម្តែងនូវការកោតសរសើរ ដ៏ស្មោះស្ម័គ្រចំពោះគំរូវីរភាពដឹកនាំដ៏ឈ្លាសវៃ និងប៉ិនប្រសប់ ប្រកបដោយការប្តេជ្ញាចិត្តដ៏អង់អាចមោះមុតរបស់ សម្តេចតេជោ នាយករដ្ឋមន្ត្រី ដែលបានជំនះរាល់ឧបសគ្គ និងការលំបាកគ្រប់បែបយ៉ាង ការពារបាន យ៉ាងរឹងមាំនូវឯកភាពជាតិ អធិបតេយ្យ និងបូរណភាពទឹកដី ព្រមទាំងកសាងនូវទំនាក់ទំនងដ៏ល្អជាមួយបណ្ត ប្រទេសជាមិត្តក្នុងតំបន់ និងលើសកលលោក រួមចំណែកលើកស្ទួយកិត្យានុភាពជាតិកាន់តែលេចធ្លោថែមទៀត លើឆាកអន្តរជាតិ។

ក្នុងឱកាសដ៏វិសេសវិសាលនេះ តាងនាមថ្នាក់ដឹកនាំ មន្ត្រីនគរបាលជាតិ មន្ត្រីរាជការស៊ីវិល និងមន្ត្រី ពន្ធនាគារ់ នៃក្រសួងមហាផ្ទៃ ខ្ញុំសូមប្រសិទ្ធពរជ័យ សិរីសួស្ដី ជ័យមង្គល វិបុលសុខ បវរមហាប្រសើរជូនចំពោះ សម្ដេចតេជោ និង សម្ដេចកិត្តិព្រឹទ្ធបណ្ឌិត ព្រមទាំងក្រុមគ្រួសារ សូមបានប្រកបដោយពុទ្ធពរទាំងបួន ប្រការគឺ អាយុ វណ្ណៈ សុខៈ ពលៈ និងចៀសផុតពីរោគាព្យាធិទាំងឡាយទាំងពួងកុំបីអាក់ខានឡើយ។

សូម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាទទួលនូវសេចក្តីគោរពដ៏ខ្ពង់ខ្ពស់ពីខ្ញុំ៕

ភ្នំពេញ៖នាយករដ្ឋមន្ត្រីហ៊ុន សែន បានអះអាងថា ការសម្រេចចាក់វ៉ាក់សាំងជូនកុមារអាយុពី៦ដល់១២ឆ្នាំដែលនឹងត្រូវធ្វើចាប់ពីថ្ងៃទី១៧ ខែ កញ្ញា ឆ្នាំ ២០២១ ខាងមុខនេះ គឺសំដៅធានានូវសិទ្ធិរស់រានមានជីវិត សិទ្ធិទទួលបានការថែទាំសុខភាព និងសិទ្ធិទទួលបាននូវការសិក្សារៀនសូត្រ។ល។

នាយករដ្ឋមន្ត្រីបានបន្តថា ប្រសិនបើយើងមិនអាចបើកសាលាបឋមសិក្សាឡើងវិញសម្រាប់កុមាររបស់យើងទេ ប្រៀបបានទៅនឹងការបាត់បង់គ្រឹះមូលដ្ឋាននៃវិស័យអប់រំរបស់យើង។ ម្យ៉ាងទៀត ការចាក់វ៉ាក់សាំងជូនកុមារពីអាយុ៦ឆ្នាំឡើង គឺជាផ្នែកមួយនៃការងារប្រយុទ្ធប្រឆាំងជាមួយជំងឺឆ្លងផងដែរ ព្រោះវានឹងនាំអោយមានភាពសាំក្នុងសហគមន៍ រហូតដល់ប្រមាណជាង៨០% ដើម្បីទប់ទល់នឹងការវាយលុកពីជំងឺឆ្លងកូវីដ-១៩ ដែលកំពុងរាតត្បាតក្នុងប្រទេសយើងនិងប្រទេសផ្សេងទៀតនៅលើពិភពលោកទាំងមូល។

នាយករដ្ឋមន្ត្រីកម្ពុជា នៅល្ងាចថ្ងៃទី១៥ ខែកញ្ញានេះ បានបង្ហាញនូវរូបភាពការហាត់ប្រាណ។ នាយករដ្ឋមន្ត្រីបានសរសេរថា បន្ទាប់ពីចាក់វ៉ាក់សាំងដូសទី៣ ឬដូសជំរុញបានប្រមាណ៣០ម៉ោង មកដល់ពេលនេះខ្ញុំហាត់ប្រាណបានជាធម្មតាឡើងវិញហើយ។

សប្តាហ៍នេះ មានកិច្ចការជាច្រើនដែលត្រូវធ្វើ ហើយកិច្ចការមួយដែលសំខាន់ជាងគេគឺអនាគតរបស់កុមារ ទាំងជីវិត ទាំងសុខភាព និងទាំងការសិក្សារបស់ពួកគេ។ សូមជូនពរលោកគ្រូ អ្នកគ្រូ ពិសេសចៅៗ ក្មួយៗជានិស្សិត និងសិស្សដែលបានវិលត្រឡប់ចូលសាលារៀនវិញនៅថ្ងៃនេះ៕SRP

ភ្នំពេញ៖លោកហ៊ុយ វណ្ណៈ រដ្ឋលេខាធិការ ក្រសួងមហាផ្ទៃ និងជាប្រធានសហភាពសហព័ន្ធអ្នកសារព័ត៌មាន កម្ពុជាបានទទួលបទសម្ភាសន៍ជាមួយកាសែត «សារព័ត៌មាន ជានហ្វា» ថា ទំនាក់ទំនងរវាងកម្ពុជា និងចិនមានទិដ្ឋភាពច្រើនយ៉ាង។ ភាគីទាំងពីរអាចរស់នៅ និងរស់នៅប្រកបដោយសុខដុមរមនា ហើយទំនាក់ទំនងកាន់តែជិតស្និទ្ធនិងរឹងមាំ។

លោកបានរំលឹកថា មិត្តភាពជាប្រពៃណីរវាងកម្ពុជានិងចិន គឺជាមិត្តភាពរវាងចិននិងកម្ពុជាដែលត្រូវបានបង្កើតរួមគ្នា និងចិញ្ចឹមបីបាច់យ៉ាងយកចិត្តទុកដាក់ដោយមេដឹកនាំជំនាន់មុននៃប្រទេសទាំងពីរ រួមមានលោកប្រធាន ម៉ៅ សេទុង នាយករដ្ឋមន្រ្តី ចូវ អេនឡាយ និង សម្តេច សីហនុ។ ទំនាក់ទំនង ដែលមុននេះទៅទៀត គឺអាចទៅដល់អតីតកាល លោក Zhou Da Quan ដែលជាមន្រ្តីរាជវង្សយាននៃប្រទេសចិន ពេលនោះគាត់បានមកដល់កម្ពុជា នឹងមានទំនាក់ទំនងល្អជាមួយប្រជាជនកម្ពុជា។

លោកបន្តថា តាមទស្សនៈវិស័យវប្បធម៌នៃប្រទេសកម្ពុជានិងប្រទេសចិនមានលក្ខណៈប្រហាក់ប្រហែលគ្នា ហើយភាគីទាំងពីរក៏បានប្តេជ្ញាចិត្តជួយគ្នាទៅវិញទៅមក ដូចលោកនាយករដ្ឋមន្ត្រី ហ៊ុន សែន បានមានប្រសាសន៍ថា ទំនាក់ទំនងមិត្តភាពរវាងកម្ពុជា និងចិន ត្រូវបានបង្កើតឡើងយូរណាស់មកហើយ មុនប្រទេសចិនចូលជា សមាជិករបស់អង្គការសហប្រជាជាតិ។ កម្ពុជាមិនមែនថា ចិនកាន់តែរឹងមាំហើយៗខិតខំជិតស្និទ្ធជាមួយចិននោះទេ ប្រទេសទាំងពីរបានខិតខំធ្វើការជួយគ្នាទៅវិញទៅមក និងគាំទ្រគ្នាទៅវិញទៅមក ហើយក៏បានរៀបចំផែនការចក្ខុវិស័យរយៈពេលវែងផងដែរ។

«ខ្ញុំធ្លាប់និយាយដោយត្រង់ៗ ជាមួយមិត្តអាមេរិកថា អ្នកមានទស្សនៈទាននយោបាយបើកចំហ ប៉ុន្តែទស្សនៈទាននយោបាយនេះគ្រាន់តែជាសន្យាខ្យល់ ផ្ទុយទៅវិញចិនកម្រនិយាយណាស់ ប៉ុន្តែធ្វើបានច្រើនជាងនេះ។ ឥឡូវអាគារដែលយើងកំពុងអង្គុយនេះ គឺជាអាគារសាងសង់ដោយចិន ខ្ញុំបានប្រាប់មិត្តអាមេរិកយ៉ាងនេះ ប្រហែលតាមរបៀបជាការនិយាយលេងសើច មិនជាការឌឺចំទេ»។

លោក ហ៊ុយ វណ្ណៈ មានប្រសាសន៍ទៀតថា ការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងកម្ពុជានិងចិន គឺជាការប្រមូលផលដ៏ធំមួយសម្រាប់កម្ពុជា ហើយកម្ពុជាអាចនាំចេញផលិតផលកាន់តែច្រើនទៅទីផ្សារប្រទេសចិន ជាពិសេសប្រែក្លាយវិស័យកសិកម្មទៅជាកសិ-ឧស្សាហកម្ម ។ មិត្តភាពរវាងប្រទេសទាំងពីរនឹងបង្កើតតម្លៃមនុស្ស ហើយក្លិនក្រអូបនៃតម្លៃមនុស្សនឹងសាយភាយទៅកាន់ប្រទេសផ្សេងទៀត និងពិភពលោកតែម្តង។

លោក ហ៊ុយ វណ្ណៈ៖ បញ្ហាតូចតាចនៅខេត្តព្រះសីហនុនឹងមិនប៉ះពាល់ដល់ការអភិវឌ្ឍរួមទេ ថ្មីៗនេះឆ្លើយតបទៅនឹងសារព័ត៌មានអវិជ្ជមានមួយចំនួននៅខេត្តព្រះសីហនុ លោក ហ៊ុយ វណ្ណៈ បាននិយាយថា ពេលដែលក្រឡេកមើលក្រុងព្រះសីហនុ វាចាំបាច់ត្រូវមើល និងវិភាគស្ថានភាពជាក់ស្តែង និងដំណាក់កាលនីមួយៗ។ ការអភិវឌ្ឍន៍ទីក្រុងមិនអាចជៀសផុតពីផលប៉ះពាល់ខ្លះនោះទេ នេះគឺជាការពិតដែលត្រូវទទួលស្គាល់។ ប៉ុន្តែបើគ្មានការវិនិយោគ តើមានការអភិវឌ្ឍន៍អនាគតមកពីណា។

លោកបានឡើងឧទាហរណ៍ថា ការអភិវឌ្ឍន៍ទីក្រុងពិបាកគេចផុតនឹងរងផលប៉ះពាល់ណាស់ ឧទាហរណ៍ការសាងសង់ផ្លូវនឹងបណ្តាលឱ្យធូលីហុយពេញមេឃ ក្នុងនោះក៏បូករួមទាំងភ្នំពេញ និងខេត្តព្រះសីហនុផងដែរ ប៉ុន្តែវានឹងមិនប៉ះពាល់ដល់ការអភិវឌ្ឍន៍រយៈពេលវែងនិងការអភិវឌ្ឍន៍ទីក្រុងឡើយនាពេលអនាគត។

លោកបានសង្កត់ធ្ងន់ដូច្នេះថា «តាមគំនិតរបស់ខ្ញុំ បញ្ហាតូចតាចទាំងនេះ បែរជាបានបង្កើនមិត្តភាពរវាងកម្ពុជានិងចិនកាន់តែល្អ ពីព្រោះនៅពេលនេះ វាអាចឆ្លុះបញ្ចាំងថាតើភាគីណាមួយកំពុងសើចចំអកឱ្យយើង ហើយភាគីណានៅតែជួយយើង។ កម្ពុជានិងចិនមើលឃើញពីមនោសញ្ចេតនាពិតក្នុងគ្រាលំបាក ហើយរួមគ្នាដោះស្រាយបញ្ហាទាំងនេះ ដើម្បីយើងកាន់តែមានសាមគ្គីភាពនិងកាន់តែជិតស្និទ្ធជាមុន»។

លោកបន្ថែមថា ប្រសិនបើគ្មានមិត្តចិនជួយសាងសង់តំបន់សេដ្ឋកិច្ចពិសេស និងទីក្រុងជឿនលឿន បូករួមទាំងផ្លូវថ្នល់និងស្ពាន វារីអគ្គិសនី និងហេដ្ឋារចនាសម្ព័ន្ធផ្សេងទៀត កម្ពុជាមិនចាំបាច់ទន្ទឹងរង់ចាំក្រុមហ៊ុនអន្តរជាតិដែលមកវិនិយោគនៅកម្ពុជាទេ។

«ខ្ញុំសូមលើកឧទាហរណ៍សាមញ្ញមួយ បើមានកាសាងសង់ផ្សារទំនើបឡើង ផលិតផលម៉ាកមកពីសហរដ្ឋអាមេរិក និងអឺរ៉ុប នឹងចូលផ្សារទំនើបក្នុងរយៈពេលមួយឬពីរឆ្នាំ។ ប៉ុន្តែបើគ្មានផ្សារទំនើបទេ ម៉ាកល្បីៗទាំងនេះនឹងមិនចូលមកកម្ពុជាទេ ហើយក្រុមហ៊ុនអន្តរជាតិទាំងនេះនឹងវិនិយោគនៅប្រទេសផ្សេងវិញ»។ លោកបានបកស្រាយយ៉ាងនេះ។

ជំនួយរបស់ចិនដើរតួយ៉ាងសំខាន់ក្នុងការអភិវឌ្ឍន៍មសេដ្ឋកិច្ចកម្ពុជា ផ្លូវកន្លងមកដែលប្រទេសកម្ពុជាដើរមានភាពរដិបរដុប មានតែទំនាក់ទំនងមិត្តភាពប្រពៃណីចិនប៉ុណ្ណោះ ដែលបាននាំមកនូវផលប្រយោជន៍ស្ថិរភាពដ៏ធំដល់កម្ពុជា។

លោក ហ៊ុយ វណ្ណៈបានរំលឹកឡើងវិញថា ទំនាក់ទំនងកម្ពុជាជាមួយសហគមន៍អន្តរជាតិមានបទពិសោធន៍ឈឺចាប់ជាច្រើន ឧទាហរណ៍ក្នុងកំឡុងពេលអាណានិគមបារាំងជិត១០០ឆ្នាំ ការមកដល់របស់ពួកគេមិនបានជួយកម្ពុជាក្នុងការកសាងហេដ្ឋារចនាសម្ព័ន្ធទេ ពួកគេនៅសល់តែ «ការត្រួតត្រា» ដែលជាកេរដំណែលនេះប៉ុណ្ណោះ។

«សហរដ្ឋអាមេរិក បាននាំគ្រាប់បែកមកអោយកម្ពុជា ប៉ុន្តែរហូតមកដល់ពេលនេះគ្រាប់បែកទាំងនោះមិនទាន់ត្រូវបានបោសសំអាតអស់ពីដីទេ ដែលបង្កអោយមនុស្សពាក់កណ្តាលលាននាក់បានស្លាប់បាត់បង់ជីវិត។ ពួកគេក៏បានបង្កឱ្យមានជម្លោះផ្ទៃក្នុងនៅក្នុងប្រទេសកម្ពុជា ដែលបណ្តាលឱ្យមនុស្សស្លូតត្រង់ជាង៣លាននាក់ស្លាប់ បន្ទាប់មកបាននាំឱ្យមានសង្គ្រាមស៊ីវិលជាង ២០ឆ្នាំនៅក្នុងប្រទេសកម្ពុជាដែលបានធ្វើឱ្យប្រជាជនរងទុក្ខវេទនា»។

លោកក៏បាននិយាយដែរថា រហូតដល់ឆ្នាំ ១៩៩៨ ទើបកម្ពុជាសម្រេចបាននូវការបង្រួបបង្រួមជាតិដោយសន្តិភាពនិងពេញលេញ។

លោកបន្តថា ឥឡូវនេះសន្តិភាពបានចូលមកដល់ ហើយប្រទេសកម្ពុជាបានយកអតីតកាលទុកមួយលែក ហើយកំពុងខិតខំបង្កើតទំនាក់ទំនងមិត្តភាពជាមួយសហគមន៍អន្តរជាតិ។ «កំណែទម្រង់ផ្ទៃក្នុងនិងការពង្រីកការទូត» ដែលត្រូវបានផ្សព្វផ្សាយដោយលោកនាយករដ្ឋមន្ត្រី ហ៊ុន សែន គឺជាគោលនយោបាយដ៏ឈ្លាសវៃ។

លោក ហ៊ុយ វណ្ណៈ ក៏បាននិយាយផងដែរថា ចំណងមិត្តភាពប្រពៃណីរវាងកម្ពុជានិងចិនបានផ្តល់ផលប្រយោជន៍យ៉ាងច្រើនដល់ភាគីកម្ពុជា។ គ្រាន់តែជំនួយកសាងស្ពានប៉ុណ្ណោះ វាបានជួយកម្ពុជាក្នុងការលើកកម្ពស់ជីវភាពប្រជាជន និងជំរុញការអភិវឌ្ឍន៍ផ្នែកកសេដ្ឋកិច្ចយ៉ាងឆាប់រហ័ស។

ម៉្យាងវិញទៀត លោកក៏បានលើកឡើងពីជំនួយរបស់ចិនចំពោះវ៉ាក់សាំងប្រឆាំងជំងឺកូវិទ១៩ដល់កម្ពុជា ហើយបាននិយាយថា បន្ទាប់ពីរបបខ្មែរក្រហម នេះគឺជាលើកទី២ ហើយដែលប្រជាជនកម្ពុជាកំពុងជួបវិបត្តិដែលគ្រោះថ្នាក់ដល់ជីវិត ហើយជំនួយរបស់ចិន បានការពារជីវិតរបស់ប្រជាជនកម្ពុជា។

លោក ហ៊ុយ វណ្ណៈ បានមានប្រសាសន៍ថាផ្អែកលើ «បងប្អូនដែកថែប» ដ៏រឹងមាំរបស់កម្ពុជានិងចិនកម្ពុជាអាចទទួលបានវ៉ាក់សាំងមួយចំនួនធំពីប្រទេសចិនសម្រាប់ចាក់បង្ការមេរោគកូវីដ១៩ ដល់ប្រជាជនបាន ជួយសង្គ្រោះអាយុជីវិតប្រជាជន និងស្តារសេដ្ឋកិច្ចជាតិយ៉ាងឆាប់រហ័ស ។

លោកបន្តថា ភាពជិតស្និទ្ធផ្នែកភូមិសាស្ត្រ នៃប្រទេសកម្ពុជានិងប្រទេសចិនក៏ផ្តល់នូវលក្ខខណ្ឌល្អប្រសើរសម្រាប់ភាគីទាំងពីរក្នុងការធ្វើឱ្យទំនាក់ទំនងកាន់តែស៊ីជម្រៅ។

លោកក៏ជឿជាក់ថា បើប្រៀបធៀបជាមួយគោលនយោបាយផ្សេងទៀតប្រទេសកម្ពុជាទទួលបានអត្ថប្រយោជន៍ច្រើនពីគោលនយោបាយ «ផ្លូវសូត្រសមុទ្រសតវត្សរ៍ទី២១» និង «ផ្លូវមួយ ខ្សែក្រវ៉ាត់មួយ» ដែលផ្តើមចេញដោយប្រទេសចិន។

លោកបានបន្ថែមថា គោលនយោបាយដែលផ្តើមចេញដោយប្រទេសចិនត្រូវបានអមដោយហិរញ្ញវត្ថុបានជំរុញយ៉ាងឆាប់រហ័សដល់ការការអភិវឌ្ឍន៍របស់ប្រទេសកម្ពុជា៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានប្រាប់ដល់ក្មួយៗ សិស្សានុសិស្ស ឲ្យខិតខំប្រឹងប្រែងរៀនសូត្រ នៅពេលបើកឲ្យដំណើរការសាលារៀនឡើងវិញ។ ក្រៅពីនោះ ត្រូវអនុវត្តនូវវិធានសុខាភិបាល «៣ការពារ និង៣កុំ»ផងដែរ។

ថ្លែង​យ៉ាង​ដូច្នេះ​ក្នុងឱកាសលោកបានជួបសំណេះសំណាល ជាមួយក្មួយៗ សិស្សានុសិស្ស ដែលទទួលបានអាហាររូបករណ៍ ចំនួន ៩៩នាក់ និងពិនិត្យការរៀបចំសាលាឡើងវិញ នៅវិទ្យាល័យ ជួន ណាត ស្ថិតនៅ​ក្នុង​ស្រុកកំពង់សៀម ខេត្តកំពង់ចាម
នៅព្រឹកមិញនេះ។

អភិបាលខេត្ត ក៏បានធ្វើការណែនាំឲ្យលោកគ្រូ​ អ្នកគ្រូ និងសិស្សានុសិស្ស ដែលមានអាយុ ១២ឆ្នាំ ឡើងទៅ ត្រូវអញ្ជើញទៅ​ចាក់​វ៉ាក់សាំងបង្ការ​ជំងឺ​កូវីដ​-១៩ ឲ្យបានគ្រប់ៗគ្នា និងត្រូវប្រុងប្រយ័ត្ន​ឲ្យបានខ្ពស់ នាអំឡុងពេលសិក្សារៀនសូត្រ របស់លោកគ្រូ អ្នកគ្រូ និងក្មួយៗ​សិស្សានុសិស្ស​ នាពេលខាងមុខនេះ ពីព្រោះថា នៅថ្ងៃទី២០ ខែកញ្ញា នេះ រដ្ឋបាលខេត្តកំពង់ចាម នឹងសម្រេចបើកឲ្យដំណើរសាលាឡើងវិញ ចាប់ពីថ្នាក់កម្រិតអនុវិទ្យាល័យឡើង នៅក្នុងដំណាក់ទី១។ ដោយឡែកក្នុងដំណាក់ទី២ ក៏គ្រោងឲ្យបើកដំណើរការរៀនសូត្រ នៅថ្នាក់កម្រិតបឋមសិក្សា នៅថ្ងៃទី១១ ខែតុលា ខាងមុខនេះ។

ដោយឡែក ក្នុងឱកាសដឹកនាំក្រុមការងារ អញ្ជើញចុះពិនិត្យឃ្លាំងពាណិជ្ជកម្ម ១កន្លែង ស្ថិតនៅចំណុចភូមិត្រពាំងចា ឃុំក្រឡា ស្រុកកំពង់សៀម ដែលត្រៀមរៀបចំធ្វើជាមណ្ឌលព្យាបាលអ្នកជំងឺកូវីដ-១៩ លោក អ៊ុន ចាន់ដា បានជម្រុញដល់ក្រុមការងារបច្ចេកទេស ធ្វើយ៉ាងណា ត្រូវពន្លឿនការងារនេះ ឲ្យរួចមុនថ្ងៃទី២០ ខែកញ្ញា នេះ ដើម្បីបញ្ជូនអ្នកជំងឺកូវីដ-១៩ កម្រិតស្រាល ដែលកំពុងសម្រាកព្យាបាល នៅវិទ្យាល័យព្រះសីហនុ មកសម្រាកព្យាបាលនៅទីនេះវិញ ក៏ព្រោះតែ វិទ្យាល័យព្រះសីហនុ ក្រុងកំពង់ចាម ត្រូវប្រគល់ទៅឲ្យសាលាវិញ ដើម្បីបើកឲ្យដំណើរការសិក្សា ដូចធម្មតា ឡើងវិញ។

គួរ​បញ្ជាក់​ថា​ ឃ្លាំងពាណិជ្ជកម្មនេះ មានចំនួន ៣អគារ ក្នុងមួយអគារៗ អាចដាក់អ្នកជំងឺ​បានចំនួន ២៥០នាក់ សរុបទាំង ៣អគារ អាចដាក់អ្នកជំងឺកូវីដ-១៩ បានសរុបចំនួន ៧៥០នាក់។​ ដោយ​នាបច្ចុប្បន្ននេះ ក្រុមការងារបច្ចេកទេស កំពុងរៀបចំទីតាំង នៃឃ្លាំងខាងលើ ជាពិសេស ការសម្រុករៀបចំតបណ្តាញភ្លើង ប្រព័ន្ធទឹក បង្គន់អនាម័យ ប្រព័ន្ធបង្ហូរទឹក បន្ទប់ពេទ្យ និងបន្ទប់ព្យាបាល ផងដែរ​៕SRP

ខេត្តកណ្ដាល៖លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បានឲ្យដឹងថា ជាមួយនឹងភាពជោគជ័យនេះ ខ្ញុំសូមបន្តអំពាវនាវឲ្យអាជ្ញាធរគ្រប់លំដាប់ថ្នាក់ គណៈគ្រប់គ្រងសាលា មាតាបិតា អាណាព្យាបាលសិស្ស និងសិស្សផ្ទាល់ បន្តចូលរួមគោរពនូវគោលការណ៏ ០៣ការពារ ០៣កុំ ឆ្ពោះទៅការបើកសាលាឲ្យសិស្សចូលរៀនដោយផ្ទាល់ឡើងវិញក្នុងទ្រង់ទ្រាយធំ និងដោយសុវត្ថិភាពនាពេលខាងមុខនេះ។

ការអំពាវនាវនេះធ្វើឡើង ក្នុងពេលលោកចុះទៅដល់វិទ្យាល័យហ៊ុន សែន ថ្នល់ទទឹង នៅថ្ងៃទី១៥ ខែកញ្ញា ព្រឹកមិញនេះ។

លោក ហ៊ុន ម៉ានី បានលើកថា ថ្ងៃនេះ ខ្ញុំបានចុះមកដល់វិទ្យាល័យ ហ៊ុន សែន ថ្នល់ទទឹង ដើម្បីសួរសុខទុក្ខ លើកទឹកចិត្ត និងស្វែងយល់ពីស្ថានភាពនៃការបើកសាលាឲ្យសិស្សចូលរៀនដោយផ្ទាល់ឡើងវិញក្នុងក្របខណ្ឌខេត្តកណ្តាល។ បើទោះពេលនេះ យើងមិនទាន់អាចបើកសាលាឲ្យសិស្សចូលរៀនដោយផ្ទាល់ក្នុងទ្រង់ទ្រាយធម្មតា នេះជាជំហ៊ានដ៏វិជ្ជមានមួយ ឆ្ពោះទៅការបើកសាលាគ្រប់កម្រិតក្នុងទ្រង់ទ្រាយធំ តាមបែបប្រក្រតីថ្មីនាពេលខាងមុខនេះ។

លោក ហ៊ុន ម៉ានី បន្តទៀតថា លទ្ធភាពរបស់កម្ពុជា ក្នុងការបើកសាលាឲ្យសិស្សចូលរៀនដោយផ្ទាល់នៅពេលនេះ ឆ្លុះបញ្ជាំងពីការអនុវត្តនូវគោលនយោបាយដ៍ត្រឹមត្រូវ និងជោគជ័យរបស់រាជរដ្ឋាភិបាល ក្នុងការគ្រប់គ្រងនូវការរីករាលដាលនៃជំងឺកូវីដ១៩ តាមរយៈការដាក់ចេញនូវវិធានការបានយ៉ាងទាន់ពេលវេលា និងមានប្រសិទ្ធភាព មានជាអាទិ៍ យុទ្ធនាការចាក់វ៉ាក់សាំងជូនមន្រ្តីជួរមុខ គ្រូបង្រៀន សិស្ស និងប្រជាពលរដ្ឋទូទៅនាពេលកន្លងមក។ ការបើកសាលាឲ្យសិស្សបានចូលរៀនដោយផ្ទាល់នៅពេលនេះ ក៏ជាការឆ្លុះបញ្ជាំងឲ្យឃើញពីការចូលរួមយ៉ាងសស្រាក់សស្រាំពីសំណាក់ស្ថាប័នពាក់ពាក់ព័ន្ធ ដែលក្នុងនោះរួមមានក្រសួងសុខាភិបាល ក្រសួងអប់រំ យុវជន និងកីឡា និងអាជ្ញាធរពាក់ព័ន្ធគ្រប់លំដាប់ថ្នាក់ ក៏ដូចជាការចូលរួមគោរព និងអនុវត្តនូវវិធានការការពារយ៉ាងហ្មត់ចត់ពីសំណាក់អាណាព្យាបាលសិស្ស សិស្សផ្ទាល់ និងប្រជាពលរដ្ឋទូទៅ៕SRP

ខេត្តសៀមរាប៖ប្រជាពលលរដ្ឋមួយចំនួន ក្នុងខេត្តសៀមរាប នឹងរងការផាកពិន័យ និងដាក់ទោសតាមច្បាប់ ចំពោះមិនគោរពវិធានការសុខាភិបាល។

លោក ទៀ សីហា អភិបាលខេត្តសៀមរាប បានលើកឡើងថា «ទៅមុខមិនរួច» ក្នុងកាលៈទេសៈដ៏លំបាកនេះហើយ បងប្អូនប្រជាពលរដ្ឋមួយចំនួននៅតែប្រហែស ខ្វះការប្រុងប្រយ័ត្ន បំពាន និងមិនមានការស្វែងយល់ពីហានិភ័យនៃជំងឺកូវីដ-១៩។

អភិបាលខេត្តសៀមរាបបន្តថា អាជ្ញាធរយើងខ្ញុំ បានខិតខំណែនាំហើយ ណែនាំទៀត អង្វរផង និងអំពាវនាវផង បងប្អូនប្រជាពលរដ្ឋមួយចំនួននៅតែមិនស្តាប់ មិនចូលរួម។ លោកថាខ្ញុំត្រូវបង្ខំចិត្ត អោយក្រុមការងារចាត់វិធានការចំពោះបងប្អូនមួយចំនួននេះ ក្នុងការផាកពិន័យ និងដាក់ទោសតាមច្បាប់។

អភិបាលខេត្តបន្តថា សូមបងប្អូនប្រជាពលរដ្ឋ កុំឆ្លៀតធ្វើអ្វីដែលខុសពីការណែនាំ ព្រោះ៖-បងប្អូនអាចប្រឈមនឹងផ្លូវច្បាប់
-បងប្អូនអាចត្រូវបិទ អាជីវកម្ម បិទហាង បាត់បង់ការងារ
-បងប្អូនអាច ឆ្លងកូវីដ-១៩ និងនាំយកជំងឺចូលផ្ទះ ឆ្លងដល់ ប្តីប្រពន្ធ ឆ្លងដល់កូន ឆ្លងដល់ ឪពុកម្ដាយ ដែលចាស់ជរា
-បងប្អូននឹងអាចធ្វើអោយបាត់បង់សមាជិកក្រុមគ្រួសារ ដោយសារតែទប់ចិត្តមិនបាន ជុំគ្នាផឹក សប្បាយក្នុងមួយគ្រា។

សូមអង្វរ និងអំពាវនាវម្តងទៀតដល់បងប្អូនប្រជាពលរដ្ឋ សូមចូលអនុវត្ត គ្រប់គ្រងកូនចៅឲ្យបានល្អ បើមិនមានការចាំបាច់ កុំចេញពីផ្ទះ ដើម្បីសុវត្ថិភាព ដោយផ្អាកការប្រមូលផ្តុំ ការជួបជុំ ផឹកស៊ី និងសកម្មភាពទាំងឡាយដែលផ្ទុយពីវិធានការការពាររបស់ក្រសួងសុខាភិបាល។ ជាមួយគ្នានេះដែរអភិបាលខេត្តក៏បានអំពាវនាវឲ្យពលរដ្ឋ រស់នៅតាមបែបគន្លងថ្មី គឺ៣ការពារ: ត្រូវពាក់ម៉ាស់, ត្រូវលាងដៃ, ត្រូវគម្លាតបុគ្គល. ៣កុំ: កុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល។

សូមជម្រាបថាសមត្ថកិច្ចខេត្តសៀមរាប បានចុះអនុវត្តលើបុគ្គល ឬ នីតិបុគ្គលទាំងឡាយណា ដែលមិនអនុវត្តតាមច្បាប់ ក្នុងការទប់ស្កាត់ការឆ្លងរាលដាល នៃជំងឺកូវីដ-១៩។ ប្រតិបត្តិការ ធ្វើឡើងនាល្ងាចថ្ងៃទី១៤ ខែកញ្ញា ឆ្នាំ២០២១ ស្ថិតនៅក្នុងភូមិតាវៀន សង្កាត់សាលាកំរើក ក្រុងសៀមរាប។

អាជ្ញាធរបានឲ្យដឹងថាបន្ទាប់ពីរដ្ឋបាលខេត្តសៀមរាបចេញសេចក្តីសម្រេចលេខ ១៥៤/២១សសរ ចុះថ្ងៃទី១១ ខែកញ្ញា ឆ្នាំ២០២១ ស្តីពីការកំណត់ជា “តំបន់លឿងទុំ” នៅក្នុងភូមិសាស្ត្រក្រុងសៀមរាប ដើម្បីទប់ស្កាត់ការឆ្លងរាលដាលជំងឺកូវីដ នៅក្នុងខេត្តសៀមរាបរួចមក រដ្ឋបាលខេត្តបានសង្កេតឃើញថា ពលរដ្ឋមួយចំនួនមិនអនុវត្តតាមខ្លឹមសារសេចក្តីសម្រេច និងច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតឡើយ។

សូមបញ្ជាក់ថា កន្លងមកសមត្ថកិច្ចធ្លាប់បានអប់រំ ផ្សព្វផ្សាយជា បន្តបន្ទាប់តាមគ្រប់រូបភាព ប៉ុន្តែបងប្អូននៅតែមិនចូលរួមអនុវត្តឱ្យបានហ្មត់ចត់ ឬមិនយកចិត្តទុកដាក់ស្តាប់ការណែនាំរបស់សមត្ថកិច្ចនោះទេ។ ដូច្នេះដើម្បីជាផលប្រយោជន៍សុខភាពសាធារណៈ និងទប់ស្កាត់ជំងឺកូវីដ ឱ្យមានប្រសិទ្ធភាព សមត្ថកិច្ចនឹងចុះល្បាតគ្រប់ច្រកល្ហកក្នុងភូមិសាស្ត្រក្នុងក្រុងសៀមរាប។ ករណីនេះអាជ្ញាធរសង្ឃឹមយ៉ាងមុតមាំថាប្រជាពលរដ្ឋនឹងចូលរួមក្នុងអនុវត្តសេចក្តីសម្រេចខាងលើដើម្បីកាត់ផ្តាច់ជំងឺកូវី ចេញពីសហគមន៍៕SRP

ខេត្តព្រះវិហារ៖កម្លាំងអាវុធហត្ថខេត្តព្រះវិហារ សហការជាមួយផ្នែករដ្ឋបាលព្រៃឈើឆែប បានបង្រ្កាប រថយន្តដឹកឈើមួយគ្រឿងម៉ាកស៊ាំងយ៉ុងពណ៌ បៃតងចាស់ពាក់ផ្លាកលេខកំពង់ស្ពឺ 2A- 3995 ដឹកជញ្ជូនឈើអារប្រភេទលេខ១ ដោយគ្មានលិខិតអនុញ្ញាត។

ការបង្ក្រាបធ្វើឡើងនៅភូមិឆែបលិច ឃុំឆែបមួយ ស្រុកឆែបខេត្ត ព្រះវិហារ នៅថ្ងៃទី១៣ ខែកញ្ញា ឆ្នាំ២០២១ ម្សិលមិញ។

សមត្ថកិច្ចអាវុធហត្ថបានដឹងថា ម្ចាស់រថយន្តដឹកឈើខាងលើ មានម្ចាស់ឈ្មោះ ហ៊ យ៉ាណូ ភេទប្រុសអាយុ២៦ ឆ្នាំទីលំនៅបច្ចុប្បន្នភូមិខ្ជាយខាងជើង ស្រុកដងទង់ ខេត្តកំពត។

សមត្ថកិច្ចអាវុធហត្ថបានបន្តថា ការបង្ក្រាបនេះបាននាំយកវត្ថុតាងរថយន្តគ្រឿង, ឈើអារប្រភេទលេខ១ (ផ្ចឹក)បង្គុំទ្ទាចំនួន ៩៤សន្លឹក ទៅរក្សាទុកនៅស្នាក់ការព្រៃឈើឆែប។ ករណីនេះម្ចាស់យល់ព្រមបង់ ប្រាក់ពិន័យអន្តរការណ៍៕SRP