ខេត្តកំពង់ចាម៖អាជ្ញាធរខេត្តកំពង់ចាម​ ចាក់វ៉ាក់សាំងបង្ការជំងឺកូវីដ-១៩ជូនពលរដ្ឋ សម្រេចបានជាង៨២%ហើយ។

អាជ្ញាធរបានឲ្យដឹងថាលទ្ធផលការចាក់វ៉ាក់សាំង​បង្ការ​ជំងឺ​កូវីដ-១៩ របស់រដ្ឋបាលខេត្តកំពង់ចាម​ ចាប់​គិតពីថ្ងៃទី​១​ ខែមិនា​ ​ឆ្នាំ​២០២១ រហូតមកដល់​ពេលនេះ នៅទូទាំងខេត្ត សម្រេច​ចាក់វ៉ាក់សាំងបង្ការ​ជំងឺ​កូវីដ-១៩ ជូនប្រជាពលរដ្ឋបានចំនួន ៦៧២,៥១៥នាក់ ស្មើនឹង ៨២.៨០% នៃផែនការគ្រោង ប្រមាណជា ៨១២.១៣២នាក់។​ ក្នុងនោះ​ប្រជាពលរដ្ឋអាយុចាប់ពី ១៨ឆ្នាំឡើង នៅទូទាំងខេត្ត ដែល​ត្រូវ​ទទួល​វ៉ាក់សាំង​បង្ការ​ជំងឺ​កូវីដ​-១៩​ មាន​ចំនួន​ ៧០១,៧៣៨នាក់​ ក្នុងនោះ​ចាក់ដូសទី១​ រួចបាន ចំនួន ៣៨៨,៣៩២នាក់​ ស្មេីនឹង៥៥.៣៥%​ និង​ដូសទី២​ បានចំនួន​ ៣៥៤,០២៨នាក់​ ​ស្មេីនឹង៥០.៤៥%​។ ចំពោះ កុមារ និងយុវវ័យ​អាយុ​១២ ដល់ ១៨ឆ្នាំ ដែល​ត្រូវ​ទទួល​វ៉ាក់សាំង​បង្ការ​ជំងឺ​កូវីដ​-១៩​ មាន​ចំនួន​ ១១០,៣៩៤នាក់​ ក្នុងនោះ​ចាក់​​ដូសទី១ រួចបាន​ ចំនួន​ ១០៦,៦០៥នាក់​ ស្មើនឹង​៩៦.៥៧%​ និង​ដូសទី២​ បានចំនួន​ ៨០,៦៩៧នាក់​ ស្មើនឹង​៧៣.១០%​។

អាជ្ញាធរបានបញ្ជាក់ផងដែរថានឹងសម្រេចបិទបញ្ចប់យុទ្ធនាការចាក់វ៉ាក់សាំងកូវីដ-១៩ ជូនកុមារ និងប្រជាពលរដ្ឋ អាយុពី១២ឆ្នាំឡើង នៅទូទាំងខេត្ត និងបើកដំណើរការជាអចិន្ត្រៃយ៍ទីតាំងចាក់វ៉ាក់សាំងកូវីដ-១៩ នៅតាម មន្ទីរពេទ្យបង្អែកទាំង០៩កន្លែង ក្នុងខេត្តកំពង់ចាម ចាប់ពីថ្ងៃទី១៩ ខែកញ្ញា ឆ្នាំ២០២១នេះតទៅ​។

សូមជម្រាបថានៅព្រឹកមិញនេះលោមហ៊ុន ណេង អ្នកតំណាងរាស្ត្រមណ្ឌលកំពង់ចាម រួមនឹងសមាជិករដ្ឋសភា -ព្រឹទ្ធសភា បាន​ចាក់វ៉ាក់សាំង​បង្ការ​ជំងឺ​កូវីដ-១៩ អាស្រ្តាហ្សេនីកា (Astrazeneca) ដូសទី៣ ឬដូសជំរុញ នៅសាលាខេត្តកំពង់ចាម ដោយមានការចូលរួម ពីលោកអ៊ុន ចាន់ដា អភិបាលខេត្តកំពង់ចាម នឹង​មន្ត្រី​ពាក់ព័ន្ធ​ ជាច្រើនរូបទៀត៕SRP

ខេត្តសៀមរាប៖បើពុំមានអ្វីប្រែប្រួលនោះទេ លោកតេង​ ច័ន្ទណាត​ ស្នងការរងនគរបាលខេត្តសៀមរាប ទទួលផែននគរបាលចរាចរណ៍ ត្រូវបានតែងតាំងជាស្នងការថ្មីខេត្តសៀមរាប ជំនួសលោក ទិត្យ-ណារ៉ុង។

មន្ត្រីនគរបាលជាន់ខ្ពស់ខេត្តសៀមរាបបានថ្លែងប្រាប់អង្គភាពសៀមរាបប៉ុស្តិ៍ នៅព្រឹកនេះថាពិធីផ្លាស់ប្ដូរមុខតំណែងស្នងការថ្មីខេត្តសៀមរាបនេះ ធ្វើនៅបន្ទប់ប្រជុំសាលាខេត្តសៀមរាប នាថ្ងៃទី ១៣ ខែ កញ្ញា ឆ្នាំ២០២១ ក្រោមវត្តមានរបស់លោកនេត សាវឿន អគ្គស្នងការនគរបាលតំណាងដ៏ខ្ពង់ខ្ពស់របស់ សម្តេមស ខេង ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ។ នេះបើយោងតាមលិខិតចុះហត្ថលេខា ដោយលោកទិត្យ ណារ៉ុង ស្នងការនគរបាលខេត្តសៀមរាប នៅថ្ងៃទី១០ ខែកញ្ញាឆ្នាំ២០២១៕SRP

ខេត្តសៀមរាប៖មេប៉ូលិសខេត្តសៀមរាបនឹងត្រូវធ្វើការផ្លាស់ប្ដូរមុខតំណែងថ្មីនៅថ្ងៃទី ១៣ ខែ កញ្ញា ឆ្នាំ២០២១ នៅបន្ទប់ប្រជុំសាលាខេត្តសៀមរាប។

នេះបើយោងតាមលិខិតគោរពជូនអភិបាលខេត្តសៀមរាប ដែលចុះហត្ថលេខាដោយលោកទិត្យ ណារ៉ុង ស្នងការនគរបាលខេត្តសៀមរាប នៅថ្ងៃទី១០ ខែកញ្ញាឆ្នាំ២០២១។

ពិធីប្រកាសតែងតាំងមុខតំណែងស្មងការថ្មីនៃនគរបាលខេត្តសៀមរាបនេះ ក្រោមវត្តមានរបស់លោកនេត សាវឿន អគ្គស្នងការនគរបាលតំណាងដ៏ខ្ពង់ខ្ពស់របស់ សម្តេមស ខេង ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ៕SRP

ខេត្តសៀមរាប៖នៅមុននេះបន្តិចនាវេលាម៉ោងជាង៩យប់ថ្ងៃទី ១០ ខែកញ្ញាឆ្នាំ ២០២១នេះ បុរសម្នាក់បើកម៉ូតូត្រូវបានរថយន្តមួយគ្រឿងបុកចំពេញទំហឹងបណ្ដាលឲ្យស្លាប់ភ្លាមៗ។

ហេតុការណ៍បានកើតឡើងនៅលើដងផ្លូវជាតិលេខ៦ នៅខាងលិចក្បែរភោជនីយដ្ឋានអាប៉ូឡូប្លាហ្សា ខេត្តសៀមរាប។

ប្រភពពីសមត្ថកិច្ចនៅកន្លែងកើតហេតុបានឲ្យដឹងថា ករណីគ្រោះថ្នាក់ចរាចណ៍នេះ ជនរងគ្រោះជិះម៉ូតូម៉ាកហុងដាស្លាកលេខ ១V.៧០៨១ សេរី០១៦ពណ៌ខ្មៅ បើកបរដោយបុរសម្នាក់អាយុប្រហែលជាង២០ឆ្នាំ ស្លៀកខោខូវប៊យពណ៌ខៀវ ពាក់អាវយឺតពណ៌ទឹកមាស និងមានពាក់អាវភ្លៀងពណ៌ខៀវ ទិសដៅពីលិចទៅកើត(ស្លាប់)។ ចំណែកឯរថយន្តប្រភេទកាត់តពាក់ស្លាកលេខសៀមរាប២B ៦១៧៦ ក្បាលពណ៌ស ទិសដៅពីកើតមកលិច។

ពាក់ព័ន្ធករណីគ្រោះថ្នាក់ចរាចរណ៍នេះ សមត្ថកិច្ចបានយករថយន្តនិងម៉ូតូទៅរក្សាទុកនៅទីបញ្ជាការចរាចរណ៍មាត់ស្ទឹងសៀមរាប ដើម្បីរង់ចាំការដោះស្រាយ។

ទោះជាយ៉ាងណាសមត្ថកិច្ចនៅមិនទាន់បញ្ជាក់អត្តសញ្ញាណជនរងគ្រោះ និងលម្អិតនៅឡើយទេ៕SRP

ភ្នំពេញ៖ចំពោះរថយន្តចង្កូតស្តាំ ដែលជាប្រភេទរថយន្ត ហាមឃាត់នាំចូល ក្នុងករណីបង្ក្រាបបាននឹងត្រូវកម្ទេចចោល ឬដោះបំបែកជាគ្រឿងបន្លាស់។ អាស្រ័យហេតុនេះ សូមម្ចាស់យានយន្តគ្មានពន្ធទាំងអស់រួសរាន់ដោយស្ម័គ្រចិត្ត ចូលមកបំពេញកាតព្វកិច្ចពន្ធ និងអាករនាំចូលឲ្យបានទាន់ពេលវេលាតាមគោលការណ៍ និងយន្តការដូចមានក្នុងសេចក្តីជូនដំណឹងនេះ។ នេះបើយោងតាមសេចក្ដីជូនដំណឹង របស់ អគ្គនយកដ្ឋនគយនិងរដ្ឋករកម្ពុជា ចុះនៅថ្ងៃទី០៩ ខែកញ្ញា ឆ្នាំ២០២១។

ក្នុងសេចក្ដីជូនដំណឹងដដែលត្រង់ចំណុច១ផ្អាកសកម្មភាពបង្ក្រាបយានយន្ត នៅភូមិសាស្ត្រក្នុងប្រទេសមួយរយ: (លើកលែងតែតំបន់តាមព្រំដែន) ចាប់ពីពេលនេះតទៅ ដើម្បីទុកពេលឲ្យម្ចាស់យានយន្តជ្រកក្រោមផ្លាកលេខផ្សេងៗ និងមិនទាន់មានពន្ធនិង អាករនាំចូល រួសរាន់មកបំពេញកាតព្វកិច្ចពន្ធ និងអាករតាមច្បាប់ជាធរមាន៕SRP សូមអានលិខិតខាងក្រោម៖

រថយន្តពាក់ស្លាកលេខ ខ.មនិងន.ប ដែលស្ថាប័នគយចាប់បានកន្លងមក

ខេត្តកំពង់ចាម៖លោកអ៊ុន ចាន់​ដា អភិបាលខេត្តកំពង់ចាម​ បានសម្រេចបើក​ឲ្យ​សិស្សានុសិស្ស​ចាប់ពី​អនុវិទ្យាល័យ និង​សាលា​ពុទ្ធិកៈ ចូល​សិក្សា​នៅ​ថ្ងៃទី២០ ខែកញ្ញា​ ខាងមុខនេះ។ ដោយឡែក​ថ្នាក់បឋម​ ត្រូវ​បេីក​ឲ្យ​ចូលសិក្សា​នៅថ្ងៃទី​១១ ខែតុលា ឆ្នាំ​២០២១ខាងមុខ​នេះ​ផង​ដែរ​។

ការ​សម្រេច​យ៉ាង​​ដូច្នេះ​ ក្នុង​កិច្ចប្រជុំ​​​ពិនិត្យ និង​វាយតម្លៃ អំពី​ការបើក​គ្រឹះស្ថាន​អប់រំ​សាធារណៈ និង​ឯកជន​ឡើងវិញ ក្នុងភូមិ​សាស្ត្រ​ខេត្តកំពង់ចាម​ នៅព្រឹក​មិញនេះ។​​

លោកអ៊ុន​ ចាន់ដា​ បាន​ថ្លែង​ថា « រដ្ឋបាលខេត្ត​កំពង់ចាម នឹង​បើក​ឲ្យ​សិស្ស​ចូលរៀន​ចែកជា​ពីរ​តំណាក់កាល ដោយ​តំណាក់កាល ទី​១៖ ឲ្យ​សិស្ស​ចាប់ពី​ថ្នាក់​អនុវិទ្យាល័យ​ឡើងទៅ និង​សាលា​ពុទ្ធិក​: ចូលរៀន​នៅ​ថ្ងៃទី២០ ខែកញ្ញា និង​តំណាក់កាល ទី​២៖ ឲ្យ​សិស្ស​ថ្នាក់បឋមសិក្សា ចូលរៀន​នៅ​ថ្ងៃទី ១១ ខែតុលា ដែល​ការសម្រេច​ឲ្យ​សិស្ស​ចាប់ពី​អនុវិទ្យាល័យ​ចូលរៀន​មុននេះ ដោយសារ​ពួកគាត់ បាន​ចាក់​វ៉ាក់សាំង​ការពារ​ជំងឺ​កូ​វីដ​១៩ រួចហើយ ម្យ៉ាងទៀត ពួកគាត់ ស្ថិតនៅក្នុង​វ័យ​មួយ ដែល​ទទួលបាន​ការអប់រំ​ច្រើន អំពី​វិធានការ ការពារ ការឆ្លង​រាលដាល​នៃ​ជំងឺ​កូ​វីដ​១៩»។

លោកបាន​ថ្លែង​បន្ត​ថា​ ចំពោះ​សិស្ស​ថ្នាក់បឋមសិក្សា រដ្ឋបាលខេត្ត និង​រៀបចំ​បើក​ឲ្យ​ពួកគាត់​ចូលរៀន​វិញ នៅ​តំណាក់កាល​ទី​២ ដោយ​ទុក​ឱកាស​ឲ្យ​លោកគ្រូ អ្នកគ្រូ មន្ទីរអប់រំ ក៏ដូចជា​អាជ្ញាធរ​ដែនដី បានរៀបចំ​យុទ្ធសាស្ត្រ ដើម្បី​គ្រប់គ្រង​ពួកគាត់​ឲ្យ​បានល្អ​ប្រសើរ​ជាមុនសិន ដោយហេតុថាសិស្ស​ថ្នាក់​បឋមគឺ​នៅ​តូចៗ ដែល​ពិបាក​គ្រប់គ្រង។​

លោកបាន​សង្កត់​ធ្ងន់​ថា ចំពោះ​ស្រុក​ដែលមាន​ហានិភ័យ​ខ្ពស់ នៃ​ការឆ្លង​ជំងឺ​កូ​វីដ​១៩ ការបើក​ឲ្យ​សិស្ស​ចូលរៀន​ គឺ​ត្រូវ​មើល​ទៅតាម​ស្ថានភាព​នោះដែរ ពោលគឺប្រសិនបើ​ មូលដ្ឋាន​នោះ​មាន​ការឆ្លង​ច្រើន ក៏មិន​ត្រូវ​អនុញ្ញាត​ឲ្យ​បើក​សាលា​នោះឡើយ​៕SRP

ភ្នំពេញ៖ប្រធានរដ្ឋសភាជាតិកម្ពុជា សម្ដេចហេង សំរិន បានអំពាវនាវ សូមជនរួមជាតិទាំងអស់បន្តអនុវត្តវិធានការ “៣កុំ ៣ការពារ” និងចូលរួមអនុវត្តវិធានការរដ្ឋបាល និងសុខាភិបាលឱ្យបានហ្មត់ចត់ ទើបយើងចៀសឆ្ងាយពីជំងឺដ៏សាហាវនេះ ទទួលបានសេចក្តីសុខពេញលេញ ក្នុងពេលឆាប់ៗខាងមុខនេះ។

ការអំពាវនាវរបស់សម្ដេចប្រធានរដ្ឋសភា ក្នុងឱកាសអញ្ជើញមកទទួលវ៉ាក់សាំងកូវីដ-១៩ អាស្រ្តាហ្សេនីកា ដូសទី៣ ឬដូសជំរុញ នៅវិមានរដ្ឋសភា ជាមួយសមាជិក សមាជិការដ្ឋសភា នៅព្រឹកថ្ងៃទី១០ ខែកញ្ញា ឆ្នាំ២០២១ នេះ តាមការរៀបចំរបស់ក្រសួងសុខាភិបាលនិងអគ្គលេខាធិការដ្ឋានរដ្ឋសភា។

សម្ដេច ហេង សំរិន បានបន្តថារាជរដ្ឋាភិបាលបានកំណត់យកការចាក់វ៉ាក់សាំងជាយុទ្ធសាស្រ្តគន្លឹះកាត់បន្ថយការឆ្លងនិងឈឺធ្ងន់ ពិសេសសំដៅឈានទៅសម្រេចឱ្យបាននូវភាពសាំសហគមន៍ ដែលជាកត្តាជំរុញធានា ឱ្យបាននូវការវិលត្រឡប់ទៅរកប្រក្រតីភាពថ្មី នៃជីវភាពរបស់នៅជាទូទៅរបស់ពលរដ្ឋ ក៏ដូចជាការស្តារនូវបញ្ហាសេដ្ឋកិច្ច សង្គមឱ្យងើបឡើងវិញ។

កំណើនអត្រាពលរដ្ឋចាក់វ៉ាក់សាំងបានកើនឡើងជាលំដាប់ ពោលក្នុងចំណោមពលរដ្ឋដែលមានអាយុ១៨ឆ្នាំឡើងទៅ ដែលរហូតមកដល់ពេលនេះសឹងតែសម្រេចបាន១០០% ហើយនៃចំនួនគោលដៅ១០លាននាក់នោះ ។ ចំណែកកុមារនិងយុវវ័យដែលមានអាយុពី១២ដល់១៧ឆ្នាំវិញ មកដល់ពេលនេះសម្រេចបានជិត៩០% ហើយដែរ ដែលបានទៅចាក់វ៉ាក់សំាងកូវីដ-១៩ ក្នុងចំណោមជិត២លាននាក់។

ក្រសួងសុខាភិបាលបាននិងកំពុងបន្តយ៉ាងសកម្មក្នុងការចាក់វ៉ាក់សំាងដូសទី៣ឬដូសជំរុញជូនដល់ពលរដ្ឋដែលបានចាក់ដូសទី១និងទី២ ហើយនៅតែបន្តផ្តល់វ៉ាក់សាំងដូសដំបូងដល់ពលរដ្ឋដែលមិនទាន់បានទៅចាក់ សំដៅធ្វើយ៉ាងណាឱ្យពលរដ្ឋរបស់យើងដែលមានអាយុត្រូវចាក់បានចាក់គ្រប់ៗគ្នា។

ឆ្លៀតឱកាសនេះ ខ្ញុំសូមកោតសរសើរដល់មន្រ្តីសុខាភិបាល អាជ្ញាធរដែនដី កងយុទ្ធពលខេមរភូមិន្ទ ព្រមទាំងថ្នាក់ដឹកនាំគ្រប់ជាន់ថ្នាក់ ដែលបានខិតខំគ្រប់បែបយ៉ាងក្នុងយុទ្ធនាការចាក់វ៉ាក់សាំង និងធ្វើកិច្ចអន្តរាគមន៍តាមភារកិច្ច ព្រមទាំងការចូលរួមយ៉ាងពេញលេញពីប្រជាពលរដ្ឋរបស់យើង ដែលបានធ្វើឱ្យយុទ្ធសាស្រ្តាចាក់វ៉ាក់សំាងការពារសុខុមាលភាពសង្គមជាតិរបស់យើងទទួលបានជោគជ័យបែបនេះ។

ខ្ញុំសូមសម្តែងការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាល ក្នុងការកៀរគរស្វែងរកវ៉ាក់សាំងគ្រប់មធ្យោបាយ មកចាក់ជូនប្រជាពលរដ្ឋដោយឥតគិតថ្លៃបាន ក្នុងចំនួនយ៉ាងច្រើនជាទីមោទកភាពបំផុតនៅក្នុងការពារសុខុមាលភាពពលរដ្ឋនិងសង្គមរបស់យើងទប់ទល់នឹងជំងឺដ៏កាចសាហាវនេះ។ យើងនឹងអាចឈានទៅបើកដំណើរការសាលារៀន រមណីយដ្ឋានកម្សាន្តនានា ដោយត្រូវគោរពតាមស្តង់ដាវិធានការសុវត្ថិភាព ដើម្បីឱ្យចៅៗ កូនក្មួយរបស់យើងបានវិលទៅសិក្សានៅថ្នាក់រៀនដោយផ្ទាល់ ក៏ដូចជាស្តារវិស័យសេដ្ឋកិច្ចឡើងវិញ ជាបណ្តើរៗតាមរយៈការប្រកបកិច្ចការរកទទួលទានប្រចាំថ្ងៃផ្សេងៗនោះ។

ខ្ញុំក៏សូមថ្លែងអំណរគុណយ៉ាងជ្រាលជ្រៅដល់បណ្តាប្រទេសជាមិត្តរបស់កម្ពុជាទាំងអស់ រួមនឹងដៃគូអភិវឌ្ឍន៍ទាំងឡាយដែលបានចូលរួមយ៉ាងសកម្មក្នុងការបរិច្ចាគវ៉ាក់សាំង សម្ភារៈវេជ្ជសាស្រ្តនានាដល់កម្ពុជានៅក្នុងការប្រយុទ្ធប្រឆំាងជំងឺកូវីដ-១៩ ជារហូតមក៕SRP

ភ្នំពេញ៖សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១០ ខែកញ្ញា ឆ្នាំ២០២១ បានអញ្ជើញថ្លែងសុន្ទរកថា ក្នុងពិធីបើកពិព័រណ៍ចិន-អាស៊ាន លើកទី ១៨ ឆ្នាំ ២០២១ ក្រោមប្រធានបទ«ការចែករំលែកកាលានុវត្តភាព ដែលទទួលបានពីរបៀងថ្មីផ្លូវគោក និងផ្លូវសមុទ្រ ដើម្បីកសាងសហគមន៍ចិន-អាស៊ានមួយសម្រាប់អនាគតរួមគ្នា» តាមការថតវីដេអូ។
ខាងក្រោមនេះគឺជាសុន្ទរកថាទាំងស្រុងរបស់សម្ដេចតេជោ ហ៊ុន សែន ថ្លែងនៅក្នុង ពិធីបើកពិព័រណ៍ចិន-អាស៊ាន លើកទី ១៨ ឆ្នាំ ២០២១ ក្រោមប្រធានបទ«ការចែករំលែកកាលានុវត្តភាព ដែលទទួលបានពីរបៀងថ្មីផ្លូវគោក និងផ្លូវសមុទ្រ ដើម្បីកសាងសហគមន៍ចិន-អាស៊ានមួយសម្រាប់អនាគតរួមគ្នា»៕SRP

ខេត្តបន្ទាយមានជ័យ៖មានការលើកឡើងថាក្រុមឈ្មួញនៅតែអាចដឹកជញ្ជូនគ្រឿងក្នុងជ្រូក គ្រឿងក្នុងមាន់ ស្លាបមាន់ និងប្រហិត មកពីប្រទេសថៃ ចូលមកកម្ពុជាតាមច្រកបឹងត្រកួន បានដោយរលូនមិនមានការទប់ស្កាត់ពីស្ថាប័នគយនោះទេ។

ជាក់ស្ដែងរថយន្ត២គ្រឿងលួចដឹកសាច់ជ្រូក.ស្លាបមាន់.គ្រឿងក្នុងមាន់ និងប្រហិតចម្រុះចំនួន៣តោនដឹកចេញពីប្រទេសថៃ ចូលមកតាមច្រកបឹងត្រកួនយកមកលក់ចែកចាយក្នុងទីផ្សារក្នុងខេត្តបន្ទាយមានជ័យត្រូវសមត្ថកិច្ចបង្ក្រាបបាននៅថ្ងៃទី០៨ ខែកញ្ញា ឆ្នាំ២០២១ នៅចំណុចច្រកព្រំដែនបឹងត្រកួន ភូមិបន្ទាយមានរិទ្ធ ឃុំគោគរមៀត ស្រុកថ្មពួក ខេត្តបន្ទាយមានជ័យ។

ប្រភពពីខេត្តបន្ទាយមានជ័យបានឲ្យដឹងថារថយន្តដឹកទំនិញមកពីប្រទេសថៃ ម៉ាក ISUZU ពណ៌ស ជាប្រភទរថយន្ត Pickup ពាក់ស្លាកលេខ Thailand ក្រោយពីបានឆែកឆេររកឃើញ សាច់សត្វជ្រូក, ស្លាបមាន់, គ្រឿងក្នុងមាន់ និងប្រហិតចម្រុះ ចំនួន៣តោន ដោយពុំមានលិខិតអនុញ្ញាតអ្វីទាំងអស់។ វត្ថុតាងត្រូវបានយកទៅរក្សាទុកនៅមន្ទីរកសិកម្ម ខេត្តបន្ទាយមានជ័យ ដើម្បីអនុវត្តតាមនីតិវិធីច្បាប់។

សូមជម្រាបថារថយន្តដែលដឹកគ្រឿងក្នុងមកពីប្រទេសថៃខាងលើ គឺជារបស់ក្រុមឈ្មួញរកស៊ីនៅច្រកប៉ោយប៉ែត ប៉ុន្តែពួកគេបានប្ដូរទិសដៅទៅរកស៊ីដល់ច្រកបឹងត្រកួនវិញម្តង។ ការរកស៊ីដឹកជញ្ជូនពីសំណាក់ក្រុមឈ្មួញបែបនេះ បានធ្វើឡើងជាច្រើនលើកមកហើយមិនដែលមានជំនាញណាធ្វើការបង្ក្រាបនោះទេ ជាពិសេសស្ថាប័នគយច្រកបឹងត្រកួន ត្រូវបានគេសង្ស័យថាបានឃុបឃិតគ្នា ជាមួយក្រុមឈ្មួញឲ្យមានការដឹកសាច់សត្វជ្រូក, ស្លាបមាន់, គ្រឿងក្នុងមាន់ និងប្រហិត មកពីប្រទេសថៃ យ៉ាងអនាធិបតេយ្យ ក្នុងនោះក៏មានការដឹកជញ្ជូនទំនិញជាច្រើនមុខទៀតផងដែរ៕SRP

ភ្នំពេញ៖ប្រជាពលរដ្ឋដែលមានកង្វល់របស់ខ្លួន អាចខមិនចូលទៅក្នុងទំព័រផេកហ្វេសប៊ុកផ្លូវការរបស់ សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីក្រុមការងារតាមដានហ្វេសប៊ុករបស់សម្ដេចឆ្លើយតបនិងធ្វើការដោះស្រាយជូន។

សម្ដេច ស ខេង នៅព្រឹកនេះបានលើកឡើងថា៖ លទ្ធផលការងារប្រចាំខែសីហា ឆ្នាំ២០២១ របស់ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុករបស់សម្ដេច។

សម្ដេច ស ខេង បានបន្តថានៅក្នុងខែសីហា ឆ្នាំ២០២១នេះ ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុករបស់ខ្ញុំបានទទួលសំណូមពរ និងសំណួររបស់ប្រជាពរដ្ឋ ដែលស្ថិតក្នុងដែនសមត្ថកិច្ចក្រសួងមហាផ្ទៃគឺមានចំនួន ១៦២គណនី និងបានឆ្លើយតបនិងដោះស្រាយមានចំនួន៧២គណនី ក្រៅពីនោះគឺស្ថិតក្នុងដំណាក់កាលកំពុងដំណើរការដោះស្រាយ និងមានបងប្អូនដែលបានសំណូមពរ និងសំណួរ និងបញ្ហានានាខុសសមត្ថកិច្ច ក្រសួងមហាផ្ទៃ ជាច្រើនទៀត។

សម្ដេច បានបន្ថែមថា វឌ្ឍនភាពការងារនេះ អាចសម្រេចបានដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីក្រសួងមហាផ្ទៃ ស្ថាប័នថ្នាក់ជាតិ និងថ្នាក់ក្រោមជាតិ និងក្រុមការងារគេហទំព័រហ្វេសប៊ុករបស់ខ្ញុំ នៅពេលប្រឈមមុខនឹងបញ្ហាបង្កឡើងដោយជំងឺកូវីដ-១៩ក៏ដោយ។  ជាមួយគ្នានេះ ខ្ញុំសូមថ្លែងអំណរគុណបងប្អូនជនរួមជាតិ ដែលបានលើកជាមតិយោបល់ និងសំណូមពរនានាមកកាន់រូបខ្ញុំតាមរយៈទំព័រហ្វេសប៊ុកដើម្បីយើងរួមគ្នាដោះស្រាយនូវបញ្ហានានា និងរួមគ្នាអភិវឌ្ឍន៍សង្គមជាតិយើងឱ្យកាន់តែរីកចំរើន។  ខ្ញុំក៏សូមយកឱកាសនេះ ស្នើសុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី៕SR

«សម្ដេច ស ខេង ចុះជួបពលរដ្ឋ នៅតាមមូលដ្ឋានកន្លងមក»

ខេត្តសៀមរាប៖អភិបាលខេត្តសៀមរាបបានអះអាងថា៖ស្ថានភាពកូវីដ-១៩ ក្នុងខេត្តសៀមរាបយើងកាន់តែធ្ងន់ធ្ងរក្នុងរយៈពេលប៉ុន្មានថ្ងៃចុងក្រោយនេះ។ ការអះអាងធ្វើឡើងនៅព្រឹកថ្ងៃទី១០ ខែកញ្ញានេះ តាមរយៈផេកហ្វេសប៊ុកផ្លូវការរបស់លោក។

លោក ទៀ សីហា អភិបាលខេត្តសៀមរាប បានបញ្ជាក់ថា អាជ្ញាធរខេត្តពិតជាមិនចង់ដាក់ចេញនូវវិធានការដើម្បីទប់ស្កាត់ការរីករាលដាលនោះទេ តែដោយហេតុថាបងប្អូនប្រជាពលរដ្ឋ អាជីវករ មួយចំនួននៅតែមិនអនុវត្តវិធានរបស់សុខាភិបាល អោយបានខ្ជាប់ខ្ជួន ទើបរដ្ឋបាលខេត្ត បានសម្រេចដាក់ចេញ៖ បម្រាមគោចរ, កំណត់តំបន់លឿងទុំ និងអនុវត្តការផាកពិន័យ ទៅលើបងប្អូនប្រជាពលរដ្ឋ នៅតាមទីសាធារណៈ។

លោកទៀ សីហា បន្តថក្នុងកាលៈទេសៈដ៏លំបាកនេះ ខ្ញុំសង្ឃឹមថា បងប្អូនប្រជាពលរដ្ឋ អាជីវករគ្រប់ប្រភេទនឹងយោគយល់ រួមគ្នាអនុវត្តវិធានសុខាភិបាល អោយបានគ្រប់ៗគ្នា យើងនឹងការពារបាន និងអាចកាត់បន្ថយនៃការចម្លងក៏កាន់តែមានប្រសិទ្ធភាព។

សូមជម្រាបថាអាជ្ញាធរខេត្តសៀមរាប បានសម្រេចដាក់ចេញនូវវិធានការរដ្ឋបាលបណ្ដោះអាសន្នសម្រាប់បម្រាមគោចរ រយៈពេល១៤ថ្ងៃទៀត នៅភូមិសាស្ត្រខេត្តសៀមរាប ដើម្បីទប់ស្កាត់ទំងឺកូវីដ១៩។ សេចក្ដីសម្រេចវិធានការបម្រាមគោចរ នេះធ្វើឡើងនៅថ្ងៃទី០៨ ខែកញ្ញា ឆ្នាំ២០២១ ចុះហត្ថលេខាដោយលោកទៀ សីហា អភិបាលខេត្តសៀមរាប៕SRP

ខេត្តត្បូងឃ្មុំ៖ក្រុមហ៊ុន រ៉ុករករ៉ែ រ៉ឺនេសង់ មីនើរ៉ល លីមីធីត ជាក្រុមហ៊ុនរ៉ុករករ៉ែ ខ្នាតធំអន្តរជាតិរបស់ប្រទេស អូស្ត្រាលី ដែលបានរុករ៉ែជាច្រើនប្រទេសមកហើយ ក្នុងនោះមាននៅកម្ពុជា ថៃ ម៉ាឡេស៊ី ជាដើម។ ដោយឡែកនៅកម្ពុជាក្រុមហ៊ុនមានអាជ្ញាប័ណ្ណចំនួន០៧ ក្នុងនោះ០១ជាអាជ្ញាប័ណ្ណអាជីវកម្ម និង០៦ទៀតជាអាជ្ញាប័ណ្ណស្វែងរ៉ុករក បូករួមទាំងខេត្តត្បូងឃ្មុំនេះផងដែរ។ ចំពោះក្រុមហ៊ុនរ៉ុករករ៉ែនេះ បានចាប់ដៃជាមួយរាជរដ្ឋាភិបាល ដោយផ្តល់ផលប្រយោជន៍ ទាំងសងខាង សំខាន់បំផុតផ្តល់ការងារដល់ប្រជាជន ក្នុងសហគមន៍ និងបណ្តុះបណ្តាល។

លោកជាម ច័ន្ទសោភ័ណ អភិបាលខេត្តត្បូងឃ្មុំ នៅព្រឹកមិញនេះ បានទទួលជួបពិភាក្សាការងារជាមួយតំណាងក្រុមហ៊ុនរ៉ុករករ៉ែ រ៉ឺនេសង់ មីនើរ៉ល លីមីធីត បន្ទាប់ពីក្រុមហ៊ុននេះទទួលបានសិទ្ធិរុករករ៉ែមាស ពីក្រសួងរ៉ែ និងថាមពល នៅតំបន់សំពៅលូន ក្នុងឃុំជាំតាម៉ៅ ស្រុកមេមត់ ខេត្តត្បូងឃ្មុំ ។

លោកជាម ច័ន្ទសោភ័ណ បានស្នើដល់ក្រុមហ៊ុនត្រូវរក្សាចំណុចណាមួយ សម្រាប់ប្រជាពលរដ្ឋ ដែលកំពុងរស់នៅនិងអាស្រ័យផលក្នុងតំបន់នោះ ដោយធ្វើយ៉ាងណាកុំឲ្យមានការថ្នាំងថ្នាក់ធ្ងន់ធ្ងរចំពោះប្រជាពលរដ្ឋ។

លោកជាម ច័ន្ទសោភ័ណ បានលើកឡើងថា៖ សព្វថ្ងៃមានប្រជាពលរដ្ឋមួយចំនួន បានកំពុងអាស្រ័យផលក្នុងតំបន់នោះ ដោយពួកគាត់ធ្វើសកម្មភាពរ៉ែងជាលក្ខណៈគ្រួសារ ដើម្បីរកប្រាក់ចំណូលទ្រទ្រង់ជីវភាពគ្រួសារ ក្នុងបរិបទនៃការរីករាលដាលជំងឺកូវីដ-១៩នេះ។ ដូច្នេះសូមខាងក្រុមហ៊ុនដែលទទួលបានអាជ្ញាប័ណ្ណពីក្រសួងមេត្តាយោគយល់ និងដោះស្រាយផលប៉ះពាល់ជូនប្រជាពលរដ្ឋ ឲ្យបានសមរម្យ ។ ក្នុងនោះខាងក្រុមហ៊ុនបើអាចសុំផ្តល់ការងារជូនប្រជាពលរដ្ឋក្នុងតំបន់នោះ ដើម្បីឲ្យពួកគាត់មានការងារធ្វើចៀសវាងការធ្វើចំណាកស្រុក ទៅរកការងារធ្វើឆ្ងាយឬចេញទៅក្រៅប្រទេសជាដើម។

ពាក់ព័ន្ធករណីនេះ តំណាងក្រុមហ៊ុន រ៉ុករករ៉ែ រ៉ឺនេសង់ មីនើរ៉ល លីមីធីត បានសំណូមពរដល់អាជ្ញាធរខេត្ត ស្រុក មេត្តាផ្តល់កិច្ចសហការ ដើម្បីធ្វើយ៉ាងណា ឲ្យដំណើរការរ៉ុករករ៉ែធ្វើទៅបានរលូន ព្រោះគឺជាផលប្រយោជន៍ទាំងអស់គ្នា ទាំងខាងក្រុមហ៊ុន និងរាជរដ្ឋាភិបាលកម្ពុជា៕SRP