ភ្នំពេញ៖សម្តេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី២៤ ខែមិថុនា ឆ្នាំ២០២១ បានដឹកនាំ សម័យប្រជុំរដ្ឋសភាលើកទី៦ នីតិកាលទី៦។

ជាលទ្ធផលសម័យប្រជុំរដ្ឋសភា បានអនុម័តរបៀបវារៈទំាង៩ ដែលបានគ្រោងទុក រួមមាន៖

– របាយការណ៍សង្ខេបស្តីពីសកម្មភាពការងាររបស់រដ្ឋសភា ចន្លោះសម័យប្រជុំរដ្ឋសភាលើកទី៥ និងលើកទី៦ នីតិកាលទី៦ ។

– ការសម្រេចអំពីសុពលភាពនៃអាណត្តិរបស់បេក្ខជនជាប់ឆ្នោតតំណាងរាស្រ្តនៃរដ្ឋសភា នីតិកាលទី៦ ចំនួនពីររូប ជំនួសសមាជិកដែលបានលាលែង៖ ឯកឧត្តម ខឹម ច័ន្ទគីរី តំណាងរាស្រ្តមណ្ឌលខេត្តកណ្តាល ជំនួស ឯកឧត្តម ង៉ោ សុវណ្ណ ដែលបានសុំលាលែង និងឯកឧត្តម ម៉ែន កួន តំណាងរាស្រ្តមណ្ឌលខេត្តត្បូងឃ្មុំ ជំនួស ឯកឧត្តម ប្រាជ្ញ ចន្ទ ដែលបានសុំលាលែង។

– បោះឆ្នោតទុកចិត្ត ឯកឧត្តម ប្រាជ្ញ ចន្ទ ជាប្រធានគណៈកម្មាធិការជាតិរៀបចំការបោះឆ្នោត។

– បោះឆ្នោតជ្រើសតាំង លោកជំទាវ ពៅ សុភាព ជាសមាជិកគណៈកម្មការនីតិកម្ម និងយុត្តិធម៌ នៃរដ្ឋសភា។

– អនុម័តជាឯកច្ឆន្ទ សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុនស្មេថេក ខូអិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីខេត្តបាត់ដំបង ទៅកាន់ព្រំដែនកម្ពុជា-ថៃ។

សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្មេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីរាជធានីភ្នំពេញ ទៅកាន់ព្រំដែនកម្ពុជា-ឡាវ។

សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន អគ្គិសនីវៀតណាមនៃសាធារណរដ្ឋសង្គមនិយមវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម និងសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ឆាយណា ណេសិនណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍវារីអគ្គិសនីស្ទឹងតាតៃលើ អានុភាព ១៥០មេហ្កាវ៉ាត់ ខេត្តកោះកុង។

សេចក្តីព្រាងច្បាប់ទាំងបួនខាងលើ ដែលរដ្ឋសភាបានអនុម័តនាពេលនេះ ឆ្លើយតបទៅនឹងការអភិវឌ្ឍសេដ្ឋកិច្ចសង្គមយ៉ាងឆាប់រហ័សដែលមានតម្រូវការថាមអគ្គិសនីកើនឡើងជាលំដាប់។ ក្នុងខណៈដែលប្រទេសជាតិមានសុខសន្តិភាព និងស្ថិរភាព នយោបាយ បាននាំឱ្យមានការអភិវឌ្ឍសេដ្ឋកិច្ចជាតិលើគ្រប់វិស័យ និងបានលើកកម្ពស់កម្រិតជីវភាពប្រជាពលរដ្ឋឱ្យកាន់តែល្អប្រសើឡើងជាលំដាប់។

វិស័យថាមពល ជាវិស័យអាទិភាពមួយដែលរាជរដ្ឋាភិបាលបានយកចិត្តទុកដាក់ខ្ពស់ និងជំរុញការអភិវឌ្ឍ ទាំងប្រភពថាមពលនិងបណ្តាញបញ្ជូនអគ្គិសនី សំដៅធានាការផ្គត់ផ្គង់អគ្គិសនីឱ្យបានគ្រប់គ្រាន់ មាននិរន្តរភាព ស្ថិរភាព ប្រសិទ្ធភាពនិងមានតម្លៃសមរម្យ៕SRP

ភ្នំពេញ៖ព្រះមហាក្សត្រ បានចេញព្រះរាជក្រឹត្យត្រាស់បង្គាប់បញ្ចប់មុខតំណែង លោក ស៊ិក ប៊ុនហុក និងតែងតាំង លោក ប្រាជ្ញ ចន្ទ ជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប)។ នេះបើយោងតាមព្រះរាជក្រឹត្យ របស់ព្រះមហាក្សត្រ ដែលអង្គភាពសៀមរាបប៉ុស្តិ៍ ទើបទទួលបាននៅព្រឹកនេះ។

ការចេញព្រះរាជក្រឹត្យនេះ បានធ្វើឡើង បន្ទាប់ពីរដ្ឋសភា បានបោះឆ្នោតផ្តល់សេចក្តីទុកចិត្តទាំងស្រុងលើ លោក ប្រាជ្ញ ចន្ទ នៅក្នុងសម័យប្រជុំពេញអង្គ នាព្រឹកថ្ងៃទី២៤ ខែមិថុនា ឆ្នាំ២០២១ ម្សិលមិញ។

លោក ប្រាជ្ញ ចន្ទ គឺជាបេក្ខជនមួយរូប ក្នុងចំណោម២រូប ដែលបានដាក់ពាក្យស្នើសុំធ្វើប្រធានគ.ជ.ប ទៅកាន់រដ្ឋសភា ហើយដែលត្រូវបានជ្រើសរើសដោយគណបក្សដឹកនាំរាជរដ្ឋាភិបាល គឺគណបក្សប្រជាជនកម្ពុជា ទៅតាម «ច្បាប់ ស្ដីពី ការរៀបចំ និងការ ប្រព្រឹត្ត ទៅ នៃគណៈកម្មាធិការជាតិ រៀប ចំការ បោះឆ្នោត»។ បន្ទាប់ពីទទួលបានការផ្តល់សេចក្តីទុកចិត្តដោយរដ្ឋសភាហើយនោះ លោក ប្រាជ្ញ ចន្ទ ក៏ត្រូវធ្វើស្បថចូលកាន់តំណែងផងដែរ។

លោកប្រាជ្ញ ចន្ទ ធ្លាប់ជាមន្រ្តីជាន់ខ្ពស់ក្រសួងមហាផ្ទៃ ចន្លោះពីឆ្នាំ១៩៩១ដល់២០០១ ជាអភិបាលខេត្តបាត់ដំបងពីឆ្នាំ២០០១ ដល់២០១៣ ជាអភិបាលខេត្តត្បូងឃ្មុំពីឆ្នាំ២០១៤ ដល់ឆ្នាំ២០១៧ និងជាតំណាងរាស្រ្ត និងជាប្រធានគណៈកម្មការទី១ នៃរដ្ឋសភា គឺគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា ពីឆ្នាំ២០១៧ រហូតដល់ក្លាយជាប្រធានគ.ជ.ប។

សូមបញ្ជាក់ថា លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានដាក់ពាក្យលាលែងពីតំណែង កាលពីថ្ងៃទី០១ ខែមិថុនា ឆ្នាំ២០២១ បន្ទាប់ពីមានបញ្ហាសុខភាព លោកស៊ិក ប៊ុនហុក ត្រូវបានរដ្ឋសភាបោះឆ្នោតជ្រើសតាំងជាប្រធានគ.ជ.ប កាលពីឆ្នាំ២០១៥ ក្រោយពេលការជាប់គាំងផ្នែកនយោបាយនៅកម្ពុជា ក្រោយការបោះឆ្នោតឆ្នាំ២០១៣៕SRP

ខេត្តកំពង់ចាម៖អាជ្ញាធរខេត្តកំពង់ចាម បានទទួល​អំណោយ​ជាស្បៀងអារហារ​ ​ពី​សមាគមសាសនាចក្រនៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ប្រចាំនៅកម្ពុជា​។​ពិធីទទួលនេះនៅល្ងាចថ្ងៃទី ២៣ ខែមិថុនា ម្សិលមិញ នៅរដ្ឋបាលខេត្តកំពង់ចាម​។

ក្នុង​ឱកាសទទួលអំណោយ លោក អ៊ុន​ ចាន់ដា អភិបាលខេត្តកំពង់ចាម​ និង​ជា​ប្រធាន​គណកម្មការ​ខេត្ត​ប្រយុទ្ធ​ប្រឆាំង​នឹង​ជំងឺ​កូវីដ​-១៩​បាន​ថ្លែងអំណរគុណ​យ៉ាង​ជ្រាលជ្រៅ​ ចំពោះ​ សមាគមសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ប្រចាំនៅកម្ពុជា​ ដែល​បាន​នាំយក​អង្ករ ចំនួន ៩៣,០២៥ គីឡូក្រាម​ មី ៣,៧២១កេស​ ត្រីខ ៣,៧២១យួរ​ ទឹកត្រី ៣,៧២១យួរ និងទឹកសុីអ៊ុីវចំនួន ៣,៧២១យួរ​ ប្រគល់​ជូន​គណៈកម្មការ​​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ខេត្តកំពង់ចាម​ សម្រាប់​យកទៅប្រេីប្រាស់​ជាប្រយោជន៍ ក្នុង​ការប្រយុទ្ធ ប្រឆាំងនឹងជំងឺកូវីដ១៩៕SRP

ភ្នំពេញ៖នៅក្នុងឱកាសរដ្ឋសភាបើកសម័យប្រជុំលើក ទី៦ នីតិកាលទី៦ នាព្រឹកថ្ងៃទី២៤ ខែមិថុនា ឆ្នាំ២០២១ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានផ្ញើព្រះរាជសារជូនសម័យប្រជុំរដ្ឋសភាដោយព្រះអង្គ បានសម្តែងការកោតសរសើរចំពោះកិច្ចប្រឹងប្រែងរបស់ស្ថាប័ននីតិប្បញ្ញត្តិ ដែលមានសម្តេចអគ្គមហាពញាចក្រី ហេង សំរិន ប្រធានរដ្ឋសភា ជាអ្នកដឹកនាំភារកិច្ចក្នុងការពិនិត្យ ពិភាក្សា អនុម័តនូវច្បាប់ជាច្រើនដើម្បីប្រើប្រាស់ជាឧត្តមប្រយោជន៍ជាតិ ក្នុងសកម្មភាពនៃការអនុវត្តតួនាទី និងភារកិច្ចប្រកបដោយប្រសិទ្ធភាព និងប្រសិទ្ធផលស្របទៅតាមសភាពជាក់ស្តែង និងសកលភាវូបនីយកម្ម។

ព្រះករុណាព្រះបាទសម្តេចព្រះបរមនាថ នរោត្តម សីហមុនី ទ្រង់បញ្ជាក់ថាថារដ្ឋសភាបានពិនិត្យសិក្សាសេចក្តីព្រាងច្បាប់ទាំងឡាយបានហ្មត់ចត់និងទាន់ពេលវេលាជាពិសេសសេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រូវបានអនុម័តជាការប្រញាប់ដើម្បីដាក់ឱ្យប្រើប្រាស់ក្នុងស្ថានការណ៍ពិសេស ដែលកម្ពុជាកំពុងរាតត្បាតដោយជំងឺឆ្លងក្នុងសហគមន៍ជាបន្តបន្ទាប់មកនេះ។

ព្រះករុណាជាអម្ចាស់ជីវិតលើត្បូង បានកត់សម្គាល់ថា ស្ថិតនៅក្នុងកាលៈទេសៈដ៏លំបាក ស្មុគស្មាញនាអំឡុងពេលដែលជំងឺកូវីដ-១៩ កំពុងរាតត្បាតយ៉ាងសាហាវទូទាំងសកលលោកនេះ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងថ្នាក់ដឹកនាំ សមាជិក សមាជិកាទាំងអស់ បានខិតខំយកកម្លាំងកាយចិត្ត ជាអាទិ៍ក្នុងឱកាសវិស្សមកាលកន្លងមកនេះ សុទ្ធតែបានចុះទៅមូលដ្ឋាន សួរសុខទុក្ខ ស្វែងយល់ និងជួយដោះស្រាយរាល់ការលំបាកនិងរាល់បញ្ហារបស់បងប្អូនប្រជាពលរដ្ឋ ជាពិសេសសម្តេច បានរួមចំណែកជាមួយរាជរដ្ឋាភិបាលយ៉ាងសកម្មក្នុងរាល់កិច្ចប្រតិបត្តិការដោះស្រាយ ទប់ស្កាត់ មានរួមទាំងការផ្សព្វផ្សាយរាល់វិធានការរបស់ក្រសួងសុខាភិបាលនិងការចាក់វ៉ាក់សំាងទៀតផង។

នៅព្រឹកថ្ងៃទី២៤ ខែមិថុនានេះ រដ្ឋសភានៃព្រះរាជាណាចក្រកម្ពុជា បានបើកសម័យប្រជុំរដ្ឋសភាលើកទី៦ នីតិកាលទី៦ បន្ទាប់ពីបានវិស្សមកាលអស់រយៈពេលប្រមាណជា៣ខែមក។ នៅក្នុងសម័យប្រជុំព្រឹកនេះ មានរបៀបវារៈចំនួន៩ នៅក្នុងនោះមានការបោះឆ្នោតផ្តល់សេចក្តីទុកចិត្តបេក្ខភាព ប្រធានថ្មី គណៈកម្មាធិការជាតិរៀបចំការបោះឆ្នោត ជំនួសប្រធានចាស់ដែលបានលាលែង ផងដែរ។

ព្រះរាជសារ ជូនសម័យប្រជុំរដ្ឋសភា លើកទី៦ នីតិកាលទី៦ ព្រះករុណាព្រះបាទសម្តេចព្រះបរមនាថនរោត្តម សីហមុនី បានថ្លែអំគុណសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី បណ្តាប្រទេសជាមិត្ត ដៃគូអន្តរជាតិនានា ដែលបានរួមសហការយ៉ាងល្អ នៅក្នុងការខិតខំប្រឹងប្រែងរួមគ្នាប្រយុទ្ធ និងទប់ស្កាត់ការឆ្លងរាលដាលជំងឺកូវីដ១៩។

ព្រះករុណាព្រះបាទសម្តេចព្រះបរមនាថ នរោត្តម សីហមុនី បានកោតសរសើរយ៉ាងក្រៃលែងចំពោះសម្តេចនាយករដ្ឋមន្រ្តី ដែលបានខិតខំប្រឹងប្រែងក្នុងការកៀរគរមូលនិធិនិងជំនួយវ៉ាក់សាំងកូវីដ-១៩ ចាក់ជូនពលរដ្ឋដោយឥតគិតថ្លៃ៕SRP

ខេត្តសៀមរាប៖នគរបាលព្រហ្មទណ្ឌកំរិតធ្ងន់ នៃស្នងការប៉ូលិសខេត្តសៀមរាប បានចាប់ខ្លួនបុរសម្នាក់ ពាក់ព័ន្ធករណី អំពើលួចមានស្ថាន ទម្ងន់ទោស។

ជនសង្ស័យ មានឈ្មោះ យ៉ែម សំណាង ភេទប្រុស អាយុ ៤៨ឆ្នាំ មុខរបរ គក់ជេ រថយន្ត បច្ចុប្បន្នរស់នៅភូមិក្រសាំង សង្កាត់ជ្រាវ ក្រុងសៀមរាប។

ហេតុការណ៍លួចវេលាម៉ោង ១០ និង០០នាទី ថ្ងៃទី ១៩ ខែមិថុនា ឆ្នាំ២០២១ ត្រង់ចំណុចភូមិខ្នារ សង្កាត់ជ្រាវ ក្រុងសៀមរាប។

ជនរងគ្រោះ ឈ្មោះ បឿ ឈុននី ភេទស្រី អាយុ ៣៦ឆ្នាំ មុខរបរ នៅផ្ទះ រស់នៅភូមិខ្នារ សង្កាត់ជ្រាវ ក្រុងសៀមរាប។

យោងតាមរបាយការណ៍របស់នគរបាលព្រហ្មទណ្ឌកំរិតធ្ងន់ ដែលអង្គភាពសៀមរាបប៉ុស្តិ៍ ទទួលបាននៅព្រឹកនេះបានបង្ហាញថា
នៅថ្ងៃទី ១៣ ខែមិថុនា ឆ្នាំ២០២១ ជនរងគ្រោះ បានចាក់សោទ្វារផ្ទះទុកចោល ហើយទៅមើលម្តាយឈឺ នៅខេត្តត្បូងឃ្មុំ លុះរហូតដល់ថ្ងៃ ទី ២៣ ខែមិថុនា ឆ្នាំ២០២១ ជនរងគ្រោះ បានត្រឡប់មកផ្ទះវិញ ក៏ឃើញផ្ទះមានស្នាមគាស់ និងរ៉ើកកាយ ក្នុងបន្ទប់ដេករបស់គាត់ ដោយបាត់បង់ ប្រាក់ដុល្លារ ចំនួន(១២៤០០)ដុល្លារ ខ្សែកមាស ០១ខ្សែ ទម្ងន់ 0១តម្លឹង (ទ្រព្យសម្បត្តិទាំអស់ ជនរងគ្រោះ ទុកក្នុងស្រោមខ្នើយក្នុងបន្ទប់ដេក )។

របាយការណ៍បន្តថាក្រោយពីទទួលពាក្យបណ្ដឹង
កម្លាំងនគរបាលបានធ្វើការស្រាវជ្រាវ និងស៊ើបអង្កេត ដោយសង្ស័យទៅលើ ឈ្មោះ យ៉ែម សំណាង ត្រូវជាប្តីចុង របស់ជនរងគ្រោះ នៅវេលាម៉ោង ១៥ និង ០០នាទី ថ្ងៃទី ២៣ ខែមិថុនា ឆ្នាំ២០២១ ដោយបាននាំខ្លួន ឈ្មោះ យ៉ែម សំណាង មកធ្វើការសាកសួរ។

តាមចម្លើយសារភាព របស់ជនសង្ស័យ ឈ្មោះ យ៉ែម សំណាង បានឆ្លើយសារភាពថា៖ គាត់ពិតជា បានធ្វើសកម្មភាព ករណីខាងលើនេះ ពិតប្រាកដមែន។ ដោយដោយឃើញជនរងគ្រោះមិននៅផ្ទះ ( ប្រពន្ធចុងរបស់គាត់ ) គាត់ក៏បានចូលធ្វើសកម្មភាពដោយយកដង្កាប់ កាត់ស័ង្កសីបង្អួច ហើយលូក ដៃបើកគន្លឹះទ្វារចូបន្ទប់ជនរងគ្រោះ ហើយធ្វើសកម្មភាព លួចយកប្រាក់ដុល្លាចំនួន ១១២០០ដុល្លារនិង ខ្សែកមាស ១ខ្សែមិនដឹងទម្ងន់ ដើម្បីយកប្រាក់ទៅទិញរថយន្ត ក្រោយពេលធ្វើសកម្មភាពហើយ គាត់បានយកប្រាក់ និងខ្សែក ទៅផ្ញើប្រពន្ធដើម នៅខេត្តត្បូងឃ្មុំ។

សូមជម្រាបថាប្រតិបត្តិការស្រាវជ្រាវចាប់ជនសង្ស័យនេះ ធ្វើឡើងតាមការណែនាំរបស់លោកទិត្យ ណារ៉ុង ស្នងការខេត្តសៀមរាប និងបញ្ជាផ្ទាល់ពីលោកភឹង ចិន្តារ៉េត ស្នងការរងទទួលផែនកណ្ដាលយុត្តិធម៌ និងមានការចង្អុលបង្ហាញពីលោកណុប សារ៉ាក់ ស្នងការរងទទួលជំនួយការព្រហ្មទណ្ឌកម្រិតធ្ងន់ ដោយដឹកនាំកម្លាំងបង្រ្កាបដោយ លោក សុខ ម៉េងអ៊ាង នាយការិយាល័យ នគរបាលព្រហ្មទណ្ឌកំរិតធ្ងន់ សហការជាមួយនគរបាលក្រុងនិងប៉ុស្ដិ៍ជ្រាវផងដែរ៕SRP

ភ្នំពេញ៖រដ្ឋមន្ត្រីក្រសួងមហាផ្ទៃ សម្ដេច ស ខេង បានថ្លែងថា បើទោះមានការឆ្លងជំងឺកូវីដ-១៩ ដល់ក្នុងពន្ធនាគារ រយៈពេលកន្លងមកនេះក៏ដោយ ក្រសួងមហាផ្ទៃ តែងតែយកចិត្តទុកដាក់ដោះស្រាយបញ្ហានេះបានយ៉ាងល្អផងដែរ។ សម្ដេច ស ខេង បានអះអាងថា ឥឡូវនេះ គឺទទួលបានជោគជ័យក្នុងការដោះស្រាយបញ្ហា នៃការឆ្លងជំងឺក្នុងពន្ធនាគារ ហើយមានវិធានការមួយចំនួនត្រូវបានអនុវត្តយ៉ាងមានប្រសិទ្ធភាព។

ករណីជំងឺកូវីដ-១៩ ក្នុងពន្ធនាគារ កន្លងមកនេះ សម្ដេច ក៏បានលើកឡើងថា ក្រសួងមហាផ្ទៃ បានធ្វើកិច្ចសហការយ៉ាងល្អជាមួយ ក្រសួងសុខាភិបាល ដើម្បីជំរុញដល់ការព្យាបាលជំងឺកូវីដ-១៩ ឱ្យបានទាន់ពេលវេលា។

សម្ដេច បន្ដថា ក្រសួងមហាផ្ទៃ កំពុងធ្វើកិច្ចសហការជាមួយ ក្រសួងយុត្តិធម៌ ដើម្បីពិចារណាទៅលើស្ថានភាពទោស របស់ជនជាប់ឃុំ ដើម្បីធ្វើយ៉ាងណា ឲ្យជួយសម្រួលដល់ស្ថានភាពចង្អៀតណែននៅពន្ធនាគារ ក្នុងស្ថានភាពប្រឈមជំងឺកូវីដ-១៩ នាពេលបច្ចុប្បន្ននេះ។

សម្ដេច ស ខេង មានប្រសាសន៍យ៉ាងដូច្នេះនៅថ្ងៃពុធទី២៣ ខែមិថុនា នេះ ក្នុងឱកាសអនុញ្ញាតឱ្យលោកជំទាវ Eva Nguyen Binh ឯកអគ្គរដ្ឋទូតសាធារណរដ្ឋបារាំងប្រចាំកម្ពុជា ចូលជួបសម្ដែងការគួរសម និងពិភាក្សាការងារ ក្នុងឱកាសដែលលោកជំទាវត្រូវចប់បេសកកម្មកាទូត នៅប្រទេសកម្ពុជា។

ក្នុងជំនួប លោកជំទាវ Eva Nguyen Binh បានវាយតម្លៃខ្ពស់ចំពោះកិច្ចប្រតិបត្តិការរវាងក្រសួងមហាផ្ទៃ និងស្ថានទូតបារាំង ដែលទទួលបានលទ្ធផលល្អប្រសើរ និងថ្លៃងអំណរគុណចំពោះការផ្ដល់ព័ត៌មាននានាក្នុងឱកាសនេះ។

លោកជំទាវ ក៏បានអះអាងថា ឯកអគ្គរដ្ឋទូតបារាំងថ្មី នឹងបន្ដកិច្ចសហប្រតិបត្តិការល្អជាមួយប្រទេសកម្ពុជា រួមទាំង ស្ថាប័នពាក់ព័ន្ធជាមួយរាជរដ្ឋាភិបាល ជាពិសេសជាមួយនឹងក្រសួងមហាផ្ទៃផងដែរ៕SRP

ខេត្តកំពង់ចាម​៖លោក ប៉ាទ្រីក ម័រហ្វី (W. PATRICK MURPHY) ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា​ បាន​ថ្លែង​ថា​ យេីង​ពិតជាមាន​មោទនភាព​ ចំពោះ​ការ​រីកចម្រើន​របស់​ខេត្ត​កំពង់ចាម​ យេីង​បាន​ដឹងអំពី​ប្រវត្តិសាស្ត្រ​ ​ប្រពៃណី​​ និង​ការ​ប្រឈម​នានា​ក្នុង​ខេត្ត​ ហេីយ​យើង​ក៏​​មាន​ដៃគូ​សហការ​ជាច្រើន​​ ដែល​ផ្តោត​ទៅលេី​​ការ​ធ្វើ​មុខជំនួញ​ការ​ជួប​ប្រាស្រ័យ​ទាក់ទង​​ជាមួយនឹង​យុវជន​និង​កម្មវិធី​ផ្សេងៗ​ជា​ច្រើន​ទៀត។

លោកថ្លែង​យ៉ាង​ដូច្នេះឱកាសចូលរួម​ជាវាគ្មិនកិត្តិយស​ ក្នុង​កម្មវិធីសន្ទនាមតិលើប្រធានបទ«ការពង្រឹងកិច្ចសហប្រតិបត្តិការ រវាងស្ថានទូតអាមេរិក ជាមួយខេត្តកំពង់ចាម ​»​​ នៃវិទ្យុជាតិភ្នំប្រុសភ្នំស្រី FM92.50MHz ខេត្តកំពង់ចាម​ នៅថ្ងៃទី​២៣​ ខែមិថុនា​ ព្រឹកមិញនេះ។

លោក ម័រហ្វី បាន​ថ្លែង​ថា​ ក្នុង​បរិបទ​កូវីដ-១៩​នេះ​ សហរដ្ឋ​អាមេរិក​​ ជា​ប្រទេស​ជំនួយ​ដ៏​ធំ​បំផុត​ ដែលបាន​ផ្តល់​វ៉ាក់សាំង​ តាម​យន្តការ​កូវ៉ាក់​ ដោយប្រធានាធិបតី​អាមេរិក​ ចូ បៃដិន​ បាន​ប្រកាស​ផ្ដល់​ជំនួយ​វ៉ាក់សាំង​ ទៅ​កាន់​ពិភពលោក​ ហើយ​ក្នុង​នោះ​ប្រទេស​កម្ពុជា​ ក៏​ជា​គោលដៅ​មួយ​ដែរ​ ​ក្នុង​ដំណើរ​ការ​នេះ​។

លោកបាន​ថ្លែង​បន្ត​ថា​ យេីង​មាន​យន្តការ​ជជំនួយសុខាភិបាល ទាក់ទង​នឹង​សុខភាព​សាធារណៈ​​ ជាច្រើន​ទៀត​ក្រោម​ឆត្រ​របស់​រដ្ឋាភិបាលអាមេរិក​ យេីង​មាន​មជ្ឈមណ្ឌល​គ្រប់គ្រង​អ្នក​ជំងឺ​ មជ្ឈមណ្ឌល​សេវា​សុខភាព​សាធារណៈ​ ដែល​កាល​ពី​ឆ្នាំ​កន្លងទៅ​ សហរដ្ឋអាមេរិក បាន​ផ្ដល់​ជំនួយ​ក្នុង​ការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ក្នុង​ទឹក​ប្រាក់​ចំនួន​១១លាន​ដុល្លារ​អាមេរិក​ ហើយ​យើង​សង្ឃឹម​ថា​ឆ្នាំ​នេះ​យើង​នឹង​បន្ត​ទៀត​ដែល​អាច​មាន​ចំនួន​ច្រើន​ជាង​មុន​ ដោយ​យន្តការ​សេវា​​សុខភាព​សាធារណៈ​ គឺ​មាន​វត្តមាន​​ស្រាប់​ក្នុង​ប្រទេស​កម្ពុជា​​​​រួចហើយ​។ ​

ប្រធាន​មន្ទីរ​ព័ត៌មាន​ខេត្ត​កំពង់ចាម​ លោកស្រី​ សម​ ផល្លា​ បាន​ថ្លែង​អរគុណ​ដល់ លោកឯកអគ្គរដ្ឋទូតសហរដ្ឋអាមេរិក ប្រចាំកម្ពុជា​ ដែល​បាន​អញ្ជើញ​ចូលរួម​ជាវាគ្មិនកិត្តិយស​ ក្នុង​កម្មវិធីសន្ទនាមតិ លើប្រធានបទ«ការពង្រឹងកិច្ចសហប្រតិបត្តិការ រវាងស្ថានទូតអាមេរិក ជាមួយខេត្តកំពង់ចាម ​»​​ នៃវិទ្យុជាតិភ្នំប្រុសភ្នំស្រី FM92.50MHz ខេត្តកំពង់ចាម​ ដេីម្បី​ឆ្លេីយតប​សំណួរ​ទាក់ទង​ នឹង​សេវា​សុខភាព​សាធារណៈ​ និង​ការ​ផ្ដល់​ជំនួយ​៕​SRP

ភ្នំពេញ៖ក្រសួងមហាផ្ទៃ ចេញសេចក្តីប្រកាសព័ត៌មាន ស្តីពីការអនុវត្តច្បាប់ទៅលើបណ្ដាញសកម្មជនខុសច្បាប់ជ្រកក្រោមផ្លាក នៃអង្គការមាតាធម្មជាតិ។ នេះបើយោងតាមលិខិតរបស់មហាផ្ទៃ ដែលបានចុះថ្ងៃទី ២៣ ខែមិថុនាឆ្នាំ ២០២១នេះ៕SRP

ភ្នំពេញ៖ទីស្ដីការគណៈរដ្ឋមន្រ្តី នឹងលើកសម័យប្រជុំពេញនាថ្ងៃសុក្រទី២៥ ខែមិថុនា ឆ្នាំ២០២១។ នេះបើយោងតាមសេចក្ដីជូនដំណឹងរបស់ទីស្ដីការគណៈរដ្ឋមន្រ្តី ដែលបានចុះហត្ថលេខាដោយ លោក ប៊ិន ឈិន៕SRP

ខេត្តបាត់ដំបង៖ទីតាំងរោងម៉ាស៉ីនអារឈើមួយកន្លែង នៅត្រង់ចំណុចភូមិកំពង់ឆ្លង ឃុំឈើទាល ស្រុកបាណន់ ខេត្តបាត់ដំបង សមត្ថកិច្ចជំនាញរដ្ឋបាលព្រៃឈើអះអាងថានឹងចុះបង្ក្រាប។

សេចក្ដីរាយការណ៍បានឲ្យដឹងថារោងម៉ាស៉ីនអារឈើខាងលើនេះ មានស្តុបឈើយ៉ាងច្រើនមិនដឹងថាមានច្បាប់ឬយ៉ាងណានោះទេ។

តាមប្រជាពលរដ្ឋបានឲ្យដឹងថា ទីតាំងខាងលើនេះគេដឹកយកមកស្តុបរាប់ឆ្នាំ មកហើយ ដឹកចេញចូល ទាំងយប់ទាំងថ្ងៃ ដើម្បីចែកចាយបន្តទៅកន្លែងផ្សេងទៀត។ ដោយរយៈពេលជាង២ខែមកនេះ គេទើបតែយកម៉ាស៉ីនរ៉ៃមកដាក់អារជ្រៀកយ៉ាងគគ្រឹកគគ្រេង ដោយមិនទាន់ឃើញសមត្ថកិច្ចឬមន្ត្រីជំនាញណាមកបង្ក្រាបនោះឡើយ។

សេចក្ដីរាយការណ៍បានបញ្ជាក់ថានៅទី២៣ ខែមិថុនា ឆ្នាំ២០២១នេះ មានរ៉ឺម៉កម៉ូតូមួយគ្រឿងបានដឹកឈើប្រភេទឈើដុំប្រហែលជិត២០ដុំដឹកចេញពីផ្លូវបាណន់ ចូលមកទុកនៅចំណុចក្បែរផ្សារលើ ដែលគេស្គាល់ថាជាផ្ទះអ្នកមានឥទ្ធពលនៅក្រុងបាត់ដំបង។

ពាក់ព័ន្ធទៅករណីនេះ លោកពិត ភារ: នាយខណ្ឌរដ្ឋបាលព្រៃឈើខេត្តបាត់ដំបង បានឲ្យភ្នាក់ងារបណ្ដាញសៀមរាបប៉ុស្តិ៍ ដឹងតាមប្រព័ន្ធតេលេក្រាមថា៖ ចំពោះម៉ាស៉ីនរ៉ៃនៅស្រុកបាណន់មិនមានច្បាប់ទេ។ លោកថានឹងនាំក្រុមការងារចុះទៅពិនិត្យទីតាំងខាងលើដើម្បីចាត់ការទៅតាមនិតិវិធីច្បាប់៕SRP

ភ្នំពេញ៖នាយកដ្ឋាននគរបាលប្រឆាំងបទល្មើសសេដ្ឋកិច្ច សូមធ្វើការបំភ្លឺនូវការផ្សព្វផ្សាយព័ត៌មានខុសពីការពិតមកលើមន្រ្តីនគរបាលប្រឆាំងបទល្មើសសេដ្ឋកិច្ច។ នេះបើយោងតាមលិខិតរបស់នាយកដ្ឋានប្រឆាំងបទល្មើសសេដ្ឋកិច្ច ដែលបណ្ដាញសៀមរាបប៉ុស្តិ៍ ទើបទទួលបាននៅមុននេះបន្តិច៕SRP

ខេត្តសៀមរាប៖សមត្ថកិច្ចបានឲ្យដឹងថាបុរសបុគ្គលិក អចលនទ្រព្យ ម្នាក់បើកឡានព្រូស ជិះគ្នា៣នាក់ គេចពីម៉ូតូរ៉ឺម៉ក មិនជាន់ហ្វាំង បែរជាជាន់ហ្គារ ថែម បណ្តាលឱ្យចូលទៅផ្ទះវេរលុយទាំងកំរោល។

ហេតុការណ៍នេះបានកើតឡើងនៅវេលាម៉ោង១០និង១០នាទីព្រឹក ថ្ងៃទី២៣ ខែមិថុនាឆ្នាំ២០២១ ស្ថិតនៅលើដងផ្លូវចាក់បេតុង ក្រោយផ្សារលើធំថ្មី (ហៅផ្លូវតាអុច) ក្នុងភូមិតាវៀន សង្កាត់សាលាកំរើក ក្រុងសៀមរាប។

ប្រភពពីសាក្សីបានប្រាប់ថា មុនពេលកើតហេតុ ឃើញមានរថយន្តព្រូស ពណ៌សមួយគ្រឿង បើកបរមកពីទិសខាងត្បូងបតមកទិសខាងកើត ខណៈពេលនោះបានគេចពី ម៉ូតូ រ៉ឺម៉ក ប្រហែលមិនជាន់ហ្វ្រាំង បែរជាជាន់ហ្គារ ចូលក្នុងផ្ទះវេរលុយ យីហោ អ៊ី ម៉ាននី បុក ខ្ទេចទ្វា កញ្ចក់ និង ទូរទស្សន៍ អស់ចំនួន៣គ្រឿង។

មន្ត្រីនគរបាលចរាចរណ៍ខេត្តសៀមរាប បានប្រាប់នៅកន្លែងកើតហេតុថា តៃកុងមានឈ្មោះ ប៊ិន ដូរិទ្ធ ភេទប្រុស អាយុ៣៦ឆ្នាំមុខរបរ បុគ្គលិកអចលនទ្រព្យ ក្នុងក្រុងសៀមរាប មានស្រុកកំណើតនៅភូមិកំពង់ចន្លុះ ឃុំពាង ស្រុកត្បូងឃ្មុំ ខេត្តត្បូងឃ្មុំ បានរថរថយន្ត ម៉ាកព្រូស ពណ៌ស ពាក់ស្លាកលេខភ្នំពេញ ២.BC.១៩៨២ ស៊េរី ឆ្នាំ២០១០ មកពីទិសខាងត្បូង បត់ មកកើត បំរ៉ុងទៅផ្ទះ មកដល់ចំណុចខាងលើ បើកចូលផ្ទះវេរលុយ យីហោ អ៊ី ម៉ានី វីរៈ តែម្តង។ ចំណែកម្ចាស់តូបជួល មានឈ្មោះ ឈើត វីរៈ ភេទប្រុស អាយុ៣៥ឆ្នាំមុខរបរ វេរលុយ យីហោ អ៊ី ម៉ាន់នី វីរៈ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប។

បច្ចុប្បន្នអ្នកបើករថយន្ត និងម្ចាស់ផ្ទះជនរងគ្រោះ បានសម្របសម្រួលគ្នា ចំនួន១០៥០ដុល្លារ ដោយមានចំនួន២តូប៖ តូបទី១/ម្ចាស់វេរលុយ ទាសំណង ចំនួន១០០០ដុល្លារ និង តូប ទី២/ម្ចាស់តូប ជាងជួសជុលទូរទស្សន៍ ត្រូវរថយន្តព្រូសបុកចូល ប៉ះពាល់ខូចខាតអស់ទូរទស្សន៍អស់ចំនួន៣គ្រឿង សំំណង ចំនួន៥០ដុល្លារ ដើម្បីបញ្ចប់រឿង។ ក្រោយបញ្ចប់រឿងនគរបាលបានប្រគល់ឱ្យរថយន្តព្រូសយករថយន្តទៅផ្ទះវិញ៕SRP