ភ្នំពេញ៖សហភាពសហព័ន្ធអ្នកសារព័ត៌មានកម្ពុជា ចេញសារលិខិតចូលរួមរំលែកទុក្ខ ជូនលោកស្រី ជយ ពៅ។

ក្នុងលិខិតបានបញ្ជាក់ថា សារលិខិតចូលរួមរំលែកទុក្ខ ជូន លោកស្រី ជយ ពៅ

​ខ្ញុំ និងថ្នាក់ដឹកនាំ ទីប្រឹក្សា ព្រមទាំងសមាជិក-សមាជិកា មានសេចក្ដីក្ដុកក្ដួលនិងស្ដាយស្រណោះ ជាពន់ពេក ចំពោះមរណភាពរបស់ លោក អៀត ដារ៉ាវុធ ជានាយកប្រតិបត្តិសារព័ត៌មាន Swift News និង Best TV និងជាប្រធានគណៈកម្មាធិការហិរញ្ញវត្ថុ នៃសហភាពសហព័ន្ធអ្នកសារព័ត៌មានកម្ពុជា នៅវេលាម៉ោង ៤:០០រសៀល ថ្ងៃព្រហស្បតិ៍ ទី២០ ខែឧសភា ឆ្នាំ២០២១ ក្នុងជន្មាយុ ៤៧ឆ្នាំ។

​មរណភាពរបស់ លោក អៀត ដារ៉ាវុធ គឺជាការបាត់បង់ធនធានមនុស្សដ៏កម្រមួយរូបនៅក្នុង វិស័យសារព័ត៌មាននៅប្រទេសកម្ពុជា។ លោកគឺជាសហការី មានសណ្តានចិត្តល្អ ស្មោះត្រង់ ចេះជួយយកអាសារមិត្តភក្តិ។ ជាមួយគ្នានេះ លោកបានលះបង់ពេលវេលា និងប្រាជ្ញាស្មារតីដ៏មានតម្លៃចូលរួមយ៉ាងសកម្មក្នុងសកម្មភាពការងារ សហភាពសហព័ន្ធអ្នកសារព័ត៌មានកម្ពុជា។ លើសពីនេះ យើងខ្ញុំកាន់តែនឹកស្តាយស្រណោះជាពន់ពេក ដែលលោកតែងតែបង្ហាញក្តីស្រឡាញ់និងមោទនភាព ចំពោះការងារស្ម័គ្រចិត្តនៅ សហភាពសហព័ន្ធអ្នកសារព័ត៌មានកម្ពុជា ហើយនៅថ្ងៃចុងក្រោយបំផុត លោកទទួលមរណភាពទៅជាមួយនឹងសម្លៀកបំពាក់មានស្លាកសញ្ញា ស.ស.ស.ក និងទង់ជាតិកម្ពុជា។

​ការចងចាំរបស់យើងខ្ញុំចំពោះ លោក អៀត ដារ៉ាវុធ គឺមានច្រើនរាប់មិនអស់ ហើយលោកប្រៀបបានជាសមាជិកនៃគ្រួសាររបស់យើងខ្ញុំ៖ «លោក អៀត ដារ៉ាវុធ គឺជានិមិត្តរូបនៃសហការី ដែលបានយក ភក្តីភាព ភាពស្មោះត្រង់ និង គុណធម៌ ជាតម្លៃនៃជីវិត»។ នេះគឺជាគុណតម្លៃដ៏ធំធេងមិនអាចកាត់ថ្លៃបាន ដែលយើងខ្ញុំគោរពនិងចងចាំជានិច្ច។

​នៅក្នុងឱកាសនៃការជូនដំណើរនាគ្រាចុងក្រោយនេះ ខ្ញុំ និងគ្រួសារ សហភាពសហព័ន្ធអ្នកសារព័ត៌មានកម្ពុជា សូមចូលរួមជាមួយ លោកស្រី ក្មួយៗ ជាទីស្រឡាញ់ ព្រមទាំងក្រុមគ្រួសារ សូមបួងសួង ដល់បុណ្យបារមីវត្ថុស័ក្តសិទ្ធជួយជ្រោងនាំដួងវិញ្ញាណក្ខន្ធ លោក អៀត ដារ៉ាវុធ បានសោយសុខក្នុងសុគតិភពកុំបីឃ្លៀងឃ្លាតឡើយ៕SRP

ភ្នំពេញ៖លោកវេង សាខុនរដ្ឋមន្ត្រីក្រសួងកសិកម្ម បានអះអាងនៅថ្ងៃទី ២១ ខែឧសភា ឆ្នាំ ២០២១នេះថា ការនាំស្វាយស្រស់របស់កម្ពុជាចេញទៅកាន់សាធារណរដ្ឋប្រជាមានិតចិន ត្រូវបានស្វាគមន៍ ពីសំណាក់មន្រ្តីអគ្គរដ្ឋបាលគយ មន្រ្តីពាក់ព័ន្ធ និងពិណិជ្ជករចិន ជាច្រើន នៅខេត្តហ្គ័ងស៊ី នៅ កំពុងផែឈីងចូវ ខេត្តហ្គ័ងស៊ី ( Qinzhou Port, Guangxi Province ) នៃសាធារណរដ្ឋប្រជាមានិតចិន នាថ្ងៃទី២០ ខែឧសភា ឆ្នាំ២០២១ កន្លងទៅនេះ។

សូមបញ្ជាក់ថា ក្រសួងកសិកម្ម រុក្ខប្រមាញ់ និងនេសាទ បានសហការជាមួយស្ថានទូតសាធារណរដ្ឋប្រជាមានិតចិន បានរៀបចំពិធីសម្ពោធជផ្លូវការ ក្នុងការនាំផ្លែស្វាយស្រស់ចេញពីកម្ពុជានៅថ្ងៃទី០៧ខែឧសភាឆ្នាំ២០២១ កន្លងទៅ ដោយត្រូវប្រើប្រាស់រយៈពេលនៃការដឹកជញ្ជូនចំនួន ១៣ថ្ងៃ ទើបទៅដល់គោលដៅ៕SRP

ភ្នំពេញ៖ក្រសួងកសិកម្ម រុក្ខាប្រមាញ់និងនេសាទ បានចេញសារាចរណែនាំ ស្តីពីវិធានការបន្ទាន់ដើម្បីត្រួតពិនិត្យ និងទប់ស្កាត់ការឆ្លងរាលដាលជម្ងឺដុំពកស្បែកគោ និងក្របី។ នេះបើយោងតាមសេចក្ដីប្រកាស របស់ក្រសួងកសិកម្ម ចុះហត្ថលេខាដោយ រដ្ឋមន្ត្រី វេង សាខុន ដែលបណ្ដាញ សៀមរាបប៉ុស្តិ៍ ទទួលបាននៅមុននេះបន្តិច៕SRP

ខេត្តត្បូងឃ្មំុ៖រថយន្តចំនួន២គ្រឿងបុកគ្នា បណ្ដាលឲ្យស្លាប់ម្នាក់ និងរបួស៤នាក់ ក្នុងទិសដៅបញ្ច្រាស់គ្នា។

ហេតុការណ៍បានកើតឡើងនៅថ្ងៃទី១៩ ខែឧសភា ឆ្នាំ២០២១ វេលាម៉ោង ២៣និង១០នាទី លេីផ្លូវលេខ៧៣ ចន្លោះគីឡូម៉ែត្រ៤៣/៤៤ ស្ថិតក្នុងភូមិថ្នល់កែង ឃំុសេដា ស្រុកតំបែរ ខេត្តត្បូងឃ្មំុ។

នគរបាលស្រុកតំបែរបានឲ្យដឹងថា គ្រោះថ្នាក់ចរាចណ៍នេះភាគីទី១ រថយន្តម៉ាក ហ៊ីយន់ដាយវេអង ពាក់ស្លាកលេខ ត្បូងឃ្មុំ 3A-0657 និងកន្ទុយរថយន្ត ស្លាកលេខ ព្រះសីហនុ 4A-2905 ពីត្បូងទៅជេីង បេីកបរដោយឈ្មោះ ឡេង ខ្លុយ ភេទប្រុស អាយុ ៣៥ឆ្នាំ រស់ភូមិស្ទឹងរាង ឃុំគងជ័យ ស្រុកអូរាំងឪ ខេត្តត្បូងឃ្មុំ ( ស្លាប់នៅនឹងកន្លែងកេីតហេតុ ) និងអ្នករួមដំណេីរម្នាក់ ឈ្មោះ រ៉ា ភេទប្រុស អាយុ២៥ឆ្នាំ(រងរបួសស្រាល)។

ចំណែកភាគីទី២ រថយន្តម៉ាក ហាន់ដាយ លីបឺរ៉ូ ពណ៌ស ពាក់ស្លាកលេខ ក្រចេះ 2A-8244 ពីជេីងទៅត្បូង បេីកបរដោយឈ្មោះ ហេង រ៉ា ភេទប្រុស អាយុ៣៨ឆ្នាំ រស់នៅភូមិស្រែត្រែង ឃុំក្បាលដំរី ស្រុកសំបូរ ខេត្កក្រចេះ (របួសបាក់ដៃខាងស្តាំ) និងអ្នករួមដំណេីរ៣នាក់៖
ទី១- ស៊ិន សាន់ ភេទប្រុស អាយុ៤១ឆ្នាំ (របួសស្រាល) រស់នៅភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ។ទី២- យ៉ស់ សុភ័ក្រ អាយុ១៩ឆ្នាំ (របួសស្រាល) រស់នៅភូមិគោកចារ ឃុំគោកស្រុក ស្រុកតំបែរ ខេត្តត្បូងឃ្មុំ។ទី៣- មិនស្គាល់ឈ្មោះ។

នគរបាលបានបញ្ជាក់ថាករណីនេះរថយន្តទាំងពីរខូចខាតកម្រិតធ្ងន់វត្ថុតាងទាំងពីរយកទៅរក្សាទុកនៅអធិការដ្ឋាននគរបាលស្រុកតំបែរ។ មូលហេតុ:ប្រេីប្រាស់់ល្បឿន៕SRP

ខេត្តកំពង់ចាម​៖លោក អ៊ុន​ ចាន់ដា​ អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ នៅព្រឹក​មិញនេះ បាន​អញ្ជើញ​ចុះ​ពិនិត្យ​ការ​ពង្រីកបន្ថែមមណ្ឌលចត្តាឡីស័ក របស់​រដ្ឋបាល​រដ្ឋបាល ស្រុកជេីងព្រៃ​ និង​ស្រុកបាធាយ​ ខណៈ​ករណី​វិជ្ជមាន​កូវីដ​-១៩​ និង​អ្នក​ពាក់ព័ន្ធ​បាន​កេីនឡេីង​ជាបន្តបន្ទាប់​ គួរឲ្យ​ព្រួយបារម្ភ​។

អភិបាលខេត្តកំពង់ចាម​ បាន​ណែនាំ​ និង​ដាក់​ចេញ​នូវ​យុទ្ធសាស្ត្រ​ ឲ្យ​មន្ត្រី​ពាក់ព័ន្ធ​ ធ្វេីយ៉ាងណា​ត្រូវ​បង្រួម​ និងទប់ស្កាត់កុំ​ឲ្យ​មាន​ករណី​វិជ្ជមាន​កូវីដ​-១៩​ រីក​ឆ្លង​បន្ត​ ដោយត្រូវ​រៀបចំ​មមណ្ឌលចក្តាឡឺស័ក ដោយប្រមូល​អ្នក​ដែល​ប៉ះពាល់​ដោយផ្ទាល់​ទាំងអស់​ ឲ្យ​​​​ចត្តាឡីស័ក​ ឲ្យបានត្រឹមត្រូវ ដោយ​មាន​ក្រុម​គ្រូពេទ្យ​ពិនិត្យ​​តាមដាន​សុខភាពនៅតាម​មណ្ឌល​នីមួយ​ៗ​។

គួរ​បញ្ជាក់​ថា​ ក្រោយ​ពី​រកឃើញ​ករណីវិជ្ជមាន​កូវីដ-១៩​ ជាបន្តបន្ទាប់​ ជាក់ស្ដែង​គិតត្រឹម​ថ្ងៃទី​២០​ ខែឧសភា​ ឆ្នាំ​២០២១​នេះ​ ​រដ្ឋបាលខេត្តកំពង់ចាម​បាន​ចេញ​សេចក្ដី​ជូនដំណឹង​ស្តីពីករណីរកឃើញវិជ្ជមានកូវីដ-១៩ ចំនួន ៥២នាក់ ក្នុងនោះ កម្មការិនី ចំនួន ៥១នាក់ (ស្រុកបាធាយ ០៩នាក់, ស្រុកជើងព្រៃ ២៨នាក់ ស្រុកព្រៃឈរ ១២នាក់ មកពីខេត្តកំពង់ធំ ០១នាក់ និងខេត្តកណ្តាល ០១នាក់) និងម្តាយអ្នកជំងឺកូវីដ-១៩ ស្រុកកងមាស ០១នាក់​ សរុប ៣០៧នាក់ ដែលបានសម្រាក​ព្យាបាល​នៅ​មន្ទីរពេទ្យ​មេគង្គ​កំពង់ចាម​ ក្នុងនោះក៏មានអ្នកជាសះស្បើយបានត្រឡប់ទៅផ្ទះវិញប្រមាណជាង ១០០នាក់​។ ចំពោះ​ករណី​នេះ​ ​រដ្ឋបាលស្រុកជេីងព្រៃបានកំណត់យក វិទ្យាល័យ ហ៊ុន សែន ស្គន់ សម្រាប់ធ្វើជាមណ្ឌលចាត្តាឡីស័ក ដោយឡែក​រដ្ឋបាល​​ស្រុក​បាធាយ​បាន​យក​​វិទ្យាលយ័ហោ ណាំហុងព្រៃញា ស្ថិតក្នុងភូមិព្រៃញា​ ឃុំផ្អាវ​ សម្រាប់​ធ្វេីជា​មណ្ឌល​ចត្តាឡីសក័​។ ជាមួយគ្នា​នោះ​ អភិបាលខេត្ត ក៏បាន​អញ្ជើញចុះពិនិត្យស្ថានភាព រោងចក្រ ជូហួយ ហ្វូតវែ ដែលមានកម្មករ​កម្មការិនី​ផ្ទុកវិជ្ជមានកូវីដ-១៩ រួមនឹងអ្នកពាក់ព័ន្ធដោយផ្ទាល់ និងប្រយោលជាច្រើននាក់ ស្ថិតនៅក្នុងឃុំខ្នុរដំបង ស្រុកជើងព្រៃ ដេីម្បី​ដាក់ចេញនូវវិធានការ​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​-១៩​ នេះផងដែរ​៕SRP

ខេត្តកំពង់ចាម៖លោក អ៊ុន​ ចាន់ដា​ អភិបាលខេត្តកំពង់ចាម​ នៅព្រឹកមិញនេះបានជួប​សំណេះសំណាល​ សាកសួរសុខទុក​ក្រុម​គ្រូពេទ្យ​កងយោធពលខេមរភូមិន្ទ​ ចាក់​វ៉ាក់សាំង​បង្ការ​ជំងឺ​កូវីដ​-១៩​ នៅ​មន្ទីរពេទ្យ​យោធា​ភូមិភាគ​២​ ​(​ 7D )​។
នាឱកាសនេះដែរ​ អភិបាលខេត្ត ក៏បាននាំយកអំណោយ ផ្តល់ជូន​ក្រុមគ្រូពេទ្យ​ចាក់ វ៉ាក់សាំងបង្ការ​ជំងឺ​កូ​វីដ-១៩ ចំនួន ១៨៤នាក់ ម្នាក់​ៗទទួលបាន​÷ អង្ករ ២៥គីឡូក្រាម មី ១កេស ត្រីខ ១យួរ និង​ថវិកា ៥០.០០០ រៀល​ ។ និងផ្តល់ជូន​ខាង​មន្ទីរពេទ្យ ភូមិភាគ​២ ម៉ាសចំនួន​ ១០.០០០​ម៉ាស​ និង​ជែ​ល​លាងដៃ ៥០កាន៕SRP

ខេត្តសៀមរាប៖សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប បានបើកកិច្ចប្រជុំវិសាមញ្ញលើកទី១ របស់ខ្លួន។

កិច្ចប្រជុំនេះធ្វើឡើងនៅ ថ្ងៃព្រហស្បតិ៍ ទី ២០ ខែឧសភា ឆ្នាំ២០២១ នៅសាលប្រជុំធំ ក្រុមហ៊ុនបាគង ជេសវិន (ផ្លូវចូលTop Town) ស្ថិតនៅក្រុងសៀមរាប ក្រោមវត្តមាន លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប លោក សឹង្ហ សំរឹទ្ធិ និង លោក ញ៉ែម សំណាង អនុប្រធាន ដោយមានការចូលរួមពីប្រធាន អនុប្រធាន ប្រធានផ្នែករបស់សាខាក្រុង ស្រុកទាំងអស់ក្នុងខេត្តសៀមរាបផងដែរ។

ក្នុងកិច្ចប្រជុំលើកដំបូងនេះ លោកប្រធាន ហ៊ុន ប៉ូគា និងលោកអនុប្រធាន លោក សឹង្ហ សំរឹទ្ធិ និង លោក ញ៉ែម សំណាង បានលេីកឡេីងពីលទ្ធផលការងារសង្គម និង ការងារមនុស្សធម៌ ដែលបានអនុវត្តនាពេលកន្លងមក និង លេីកទិសដៅការងារបន្ត សម្រាប់ការងារជួយសង្គម និង ការងារមនុស្សធម៌ ក្នុងក្រុងសៀមរាប និង តាមបណ្តាស្រុកផ្សេងៗក្នុងខេត្តសៀមរាប ផងដែរ។

ក្នុងពិធីបិទកិច្ចប្រជុំ លោក ហ៊ុន ប៉ូគា បានថ្លែងកោតសរសេីរដល់ អនុប្រធានសាខាខេត្ត និង ប្រធានសាខាក្រុង និង ស្រុកព្រមទាំងសមាជិកសមាជិកា ទាំងអស់ ដែលមានកិច្ចសហការគ្មាបានល្អ ក្នុងការអនុវត្តតួនាទីភារកិច្ចទទួលបានលទ្ធផលល្អ ក្នុងការងារមនុស្សធម៌ ក្នុងខេត្តសៀមរាប និងបានជម្រុញឲ្យខិតខំប្រឹងបន្ថែមទៀត ដេីម្បីអោយសាខាខេត្តសៀមរាបមានការរីកចម្រើនទៅមុខ និងបន្តកៀរគរដល់សប្បុរសជនជាតិ អន្តរជាតិ ក្រុមហ៊ុនឯកជន មន្ត្រីរាជការ ដើម្បីចូលរួមជាវិភាគទានទ្រទ្រង់គាំទ្រសកម្មភាព សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប ក្នុងការជួយសង្គ្រោះ ប្រជាពលរដ្ឋ ងាយរងគ្រោះ ដែលកំពុងជួបនូវបញ្ហាខ្វះខាត ក្នុងជីវភាពប្រចាំថ្ងៃ និងជួបនូវគ្រោះមហន្តរាយផ្សេងៗទៀត ដែលអាចកើតមានឡើងជាយថាហេតុ។

សូមជម្រាបថា ក្នុងកិច្ចប្រជុំនេះ លោកប្រធានអនុប្រធាន សាខាខេត្តសៀមរាប ក៏បានមានមតិដោះស្រាយនូវសំនួរ និង សំណូមពរមួយចំនួនពីសមាជិកនានាផងដែរ។ ក្នុងនោះផងដែរលោកក៏បានមានមតិផ្តាំផ្ញេី ក៏ដូចជាក្រេីនរំលឹកដល់សមាជិក សមាជិកា ទាំងអស់អោយថែរក្សា សុខភាព និង រក្សាអនាម័យ ដោយត្រូវចូលរួមអនុវត្តតាម ប្រសាសន៍របស់ សម្តេច (៣ការពារ ៣កុំ) ឲ្យបានខ្ជាប់ខ្ជួនដើម្បីចៀសផុតពីជំងឺ កូវីដ-១៩ ដ៏កាចសាហាវនេះ៕SRP

ភ្នំពេញ៖​​ក្រសួងកសិកម្ម ស្នើឱ្យ​អភិបាលខេត្ត​ជាប់​ព្រំដែន​ទប់ស្កាត់ការនាំចូលជ្រូក ខុសច្បាប់ពីវៀតណាម​ដែល​អាច​នាំឱ្យ​ឆ្លងជំងឺ​ប៉េស្ត​ជ្រូក​ អាហ្រ្វិក​។ នេះបើយោងតាមលិខិតរបស់ក្រសួងកសិកម្ម ដែលចុះហត្ថលេខាដោយ រដ្ឋមន្ត្រី វេង សាខុន៕SRP

ភ្នំពេញ៖សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃព្រហស្បតិ៍ ទី២០ ខែឧសភា ឆ្នាំ២០២១នេះ បានអញ្ជើញចូលរួមសន្និសីទអន្តរជាតិលើកទី២៦ ស្តីពី «អនាគតរបស់អាស៊ី» ដែលរៀបចំឡើងដោយក្រុមហ៊ុននីកេ (Nikkei) របស់ជប៉ុន តាមរយៈប្រព័ន្ធវីដេអូ។

ក្នុងសន្និសីទនេះ រៀបចំឡើងក្រោមប្រធានបទ «ការរៀបចំសម័យកាលថ្មីក្រោយវិបត្តិកូវីដ៖ តួនាទីរបស់អាស៊ីក្នុងការស្តារពិភពលោកឡើងវិញ» នេះ សម្តេចតេជោនាយករដ្ឋមន្ត្រី បានថ្លែងសុន្ទរកថាគន្លឹះ ហើយក៏បានឆ្លើយនឹងសំណួររបស់អ្នករៀបចំកម្មវិធីពាក់ព័ន្ធសេដ្ឋកិច្ចកម្ពុជា និងបញ្ហាតំបន់មួយចំនួនផងដែរ។

ខាងក្រោមនេះ ជាសុន្ទរកថារបស់ នាយករដ្ឋមន្ត្រីហ៊ុន សែន បានថ្លែងក្នុងសន្និសីទនាព្រឹកមិញនេះ៕SRP

ខេត្តសៀមរាប៖ប៉ូលិសស្រុកពួកបានធ្វើការបដិសេធថា ការបង្ហោះទីតាំងសង្វៀនជល់មាន់របស់សារព័ត៌មាន មួយចំនួនគឺរូបភាពចាស់។

យោងតាមរបាយការណ៍របស់នគរបាលស្រុកពួកដែលបណ្ដាញ សៀមរាបប៉ុស្តិ៍ ទទួលបាន បញ្ជាក់ថា អធិការដ្ឋាននគរបាលស្រុកពួក ខេត្តសៀមរាប សូមឆ្លើយបំភ្លឺជូនសាធារណៈជនក្នុងបណ្ដាញប្រព័ន្ធហ្វេសប៊ុកឲ្យបានជ្រាបថា កាលពីថ្ងៃទី១៨ ខែឧសភា ឆ្នាំ២០២១ មានសារព័ត៌មានឈ្មោះ “គេហទំព័រ រស្មីឧត្តរ” និង “សារព័ត៌មាន អាណាចក្រខ្មែរ” ព្រមទាំងសារព័ត៌មានមួយចំនួនទៀតក៏បានចំលងព័ត៌មាន និងរូបភាពផ្សព្វផ្សាយដូចៗគ្នាដែលមានខ្លឹមសារថា÷
“ពិតជាខ្លាំងមែនលោក ទេព្យ ពុំសែន អធិការស្រុកពួក ទោះបីក្រសួងសុខាភិបាលប្រកាសក្តែងៗផ្អាក់លែងអោយមានការជួបជុំគ្នា សង្វៀនជល់មាន់របស់ លោក ឆៃ ពៅ នៅតែបន្តយ៉ាងរលូន,
(សៀមរាប)នៅថ្ងៃទី១៨ខែឧសភាឆ្នាំ២០២១នេះមានសេចក្តីរាយការណ៍ពីពលរដ្ឋភូមិត្រពាំងធំ ឃុំ រើល ស្រុកពួកខេត្តសៀមរាប។…” (មានដាក់រូបភាពជល់មាន់ និងរូបលោកអធិការនគរបាលស្រុកពួក)។
សូមជម្រាបជូនសាធារណៈជនមេត្តាជ្រាបថាទីតាំងខាងលើមិនមានសៃវៀនជល់មាន់ទេដោយទីតាំងកន្លែងនោះយើងធ្លាប់បានបង្ក្រាបម្ដងរួចមកហើយគឺនៅថ្ងៃទី០៣ ខែឧសភា ឆ្នាំ២០២១ វេលាម៉ោង១៥រសៀល កម្លាំងរបស់អធិការដ្ឋាននគរបាលស្រុក និងប៉ុស្តិ៍នគរបាលរដ្ឋបាល មន្ត្រីសាលាស្រុក ដែលដឹកនាំដោយគណៈបញ្ជាការឯកភាពរដ្ឋបាលស្រុកពួកបានចុះបង្ក្រាបម្ដងរួចមកហើយនឹងធ្វើការរុះរើដុតកម្ទេចសីវៀននិងវត្ថុតាងមួយចំនួនឯអ្នកលេងជល់មាន់បានរត់គេចខ្លួនអស់។ ចំពោះរូបភាពមាន់ជល់ និងមនុស្សដែលសារព័ត៌មានបានផ្សព្វផ្សាយមិនមែនមាននៅក្នុងទីតាំងខាងលើនោះទេគឺជារូបភាពដែលយកពីកន្លែងផ្សេងមកផ្សព្វផ្សាយ។
ជាមួយគ្នានេះដែរអង្គភាពអធិការដ្ឋាននគរបាលស្រុកពួក សូមជម្រាបថាដើម្បីចូលរួមទប់ស្កាត់ការរីករាលដាលឆ្លងនៃជម្ងឺCOVID-19 និងការរក្សាសន្តិសុខសណ្ដាប់ធ្នាប់ និងសុវត្ថិភាពជូនប្រជាពលរដ្ឋនៅក្នុងភូមិសាស្ត្រស្រុកកងកម្លាំងពីអធិការដ្ឋាននគរបាលស្រុក និងប៉ុស្តិ៍នគរបាលរដ្ឋបាលបានសហការជាមួយបណ្ដាលកងកម្លាំងគណៈបញ្ជាការឯកភាពស្រុក និងគណៈបញ្ជាការឯកភាពឃុំដែលដឹកនាំដោយគណៈបញ្ជាការឯកភាពស្រុកពួកតែងតែយកចិត្តទុកដាក់ធ្វើការផ្សព្វផ្សាយជូនប្រជាពលរដ្ឋអនុវត្តនូវវិធានការការពារ ការរីករាលដាលនៃជម្ងឺCOVID-19 បីកុំ បីការពារ និងចុះតាមដាន និងត្រួតពិនិត្យតាមមូលដ្ឋានភូមិឃុំជារៀងរាល់ថ្ងៃ។ អង្គភាពអធិការរដ្ឋាននគរបាលស្រុកពួកពិតជាមានការសោកស្ដាយចំពោះការផ្សព្វផ្សាយនៅព័ត៌មានមិនពិតធ្វើឲ្យប៉ះពាល់កិត្តិយសសេចក្តីថ្លៃថ្នូរដល់បុគ្គលថ្នាក់ដឹកនាំ និងអង្គភាព។ អធិការដ្ឋាននគរបាលស្រុកពួកទទួលយករាល់សេចក្តីរាយការណ៍ ព័ត៌មានពិត និងសហការ ដឹកនាំកម្លាំងបង្ក្រាបបានទាន់ពេលវេលារាល់បទល្មើសជាក់ស្ដែង។សូមថ្នាក់ដឹកនាំគ្រប់លំដាប់ថ្នាក់ និងសាធារណ:ជនមេត្តាជ្រាបជាព័ត៌មាន៕SRP

ខេត្តសៀមរាប៖យ៉ាងហោចណាស់មនុស្សម្នាក់បានស្លាប់និង២នាក់ទៀតបានរងរបួសធ្ងន់ស្រាល ក្នុងករណីគ្រោះថ្នាក់ចរាចណ៍។

ហេតុការណ៍នេះបានកើតឡើងនៅវេលាម៉ោង១៣និង១០នាទីថ្ងៃទី១៩ខែឧសភាឆ្នាំ២០២១ ត្រង់ចំណុចខាងលិចស្ពានទឹកវិល លើផ្លូវ ជាតិលេច៦ ស្ថិតភូមិប្រិយ៍ថ្មី សង្កាត់ទឹកវិល ក្រុងសៀមរាប។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តម៉ាកលុចស៊ីសRX 330  ពណ៌ស ពាកស្លាកលេខ ភ្នំពេញ 2AW 8458 បើកបរមានទិសដៅ ពីកើតទៅលិច បានបុកអ្នកជិះកង់ប៉ើងធ្លាក់ចូលប្រឡាយបណ្តាលឲ្យស្លាប់ នៅនឹងកន្លែងរួច បើករត់ជ្រុលទៅបុកម៉ូតូ មានទិសដៅពីលិចទៅកើតបណ្តាលឲ្យប្តីបាក់ជើងនិងប្រពន្ធរបួសស្រាល។

សមត្ថកិច្ចបន្តថា សពអ្នកជិះកង់មាន ឈ្មោះ ម៉ី រដ្ឋា ភេទប្រុស អាយុ៣៧ឆ្នាំ មានស្រុកកំណើតនៅ ឃុំកោះសូទិន ស្រុកកោះសូទិន ខេត្តកំពង់ចាម។ បច្ចុប្បន្ននៅរាជធានីភ្នំពេញ។

ចំណែកអ្នកជិះម៉ូតូមានឈ្មោះប៊ុន ប៉ូ ភេទប្រុស អាយុ ៥១ឆ្នាំ មានដឹកប្រពន្ឋពីក្រោយ ពួកគាត់រស់នៅភូមិតាប៉ាង ឃុំអំពិល ស្រុកប្រាសាទបាគង។

សមត្ថកិច្ចបានដាក់ករណីនេះ សង្ស័យអ្នកបើកបររថយន្ត ងងុយដេក។បច្ចុប្បន្ននជំនាញ បានអូសយកវត្ថុតាង និងរៀបចំសំណុំរឿង ដើម្បីអនុវត្តតាមផ្លូវច្បាប់៕SRP

ខេត្តកំពង់ចាម​៖ក្នុងកិច្ចប្រជុំគណៈអភិបាលខេត្ត នារសៀលថ្ងៃទី១៩ ខែឧសភា ម្សិលមិញ លោកអ៊ុន​ ចាន់ដា​ អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងជំងឺកូវីដ-១៩ បានណែនាំដល់អាជ្ញាធរក្រុង-ស្រុក ត្រូវពង្រីកមណ្ឌលចត្តាឡីស័ក នៅក្នុងដែនសមត្ថកិច្ចរបស់ខ្លួនបន្ថែមដោយសារអ្នកពាក់ព័ន្ធនឹងអ្នកផ្ទុក​ជំងឺ​កូវីដ-១៩ ដែលកំពុងមានការផ្ទុះឡើងគួរឲ្យព្រួយបារម្ភ។

លោក អ៊ុន ចាន់ដា បានលេីកឡើងថា ខេត្តកំពង់ចាម បានរកឃើញវិជ្ជមានកូវីដ-១៩ ចំនួន ៣៥នាក់ ដែលបានឆ្លងកាលពីថ្ងៃទី១៨ ខែឧសភា​ ឆ្នាំ២០២១។ នេះគឺជាចំនួនឆ្លង ច្រើនជាងគេសម្រាប់ខេត្តកំពង់ចាមដែលពុំធ្លាប់មានពីមុនមក។​

អភិបាលខេត្តក៏បានរំលឹកថា គិតត្រឹមថ្ងៃទី១៩ ខែឧសភា ឆ្នាំ២០២១នេះ ខេត្តកំពង់ចាម បានរកឃើញវិជ្ជមានកូវីដ-១៩ លើប្រជាពលរដ្ឋសរុប ចំនួន ២៥៥នាក់ ក្នុងនោះមានអ្នកជាសះស្បើយបានត្រឡប់ទៅផ្ទះវិញប្រមាណជាង ១០០នាក់ និងសល់ជាង១០០នាក់ទៀត កំពុងសម្រាកព្យាបាលនៅមន្ទីរពេទ្យមេគង្គកំពង់ចាម៕SRP