ខេត្តព្រះវិហារ៖លោកកង សៅគុណ មេបញ្ជាការកងរាជអាវុធហត្ថខេត្តព្រះវិហារនៅព្រឹកមិញនេះ បានដឹកនាំកម្លាំងក្រោមឱវាទនាំយកនូវសម្ភារមួយចំនួនទៅផ្តល់ជូនដល់ក្រុមការងារ ចាក់វ៉ាក់សាំងបង្ការជំងឺកូវីដ-១៩ ចំនួន០៣ទីតាំង ក្នុងក្រុងព្រះវិហារ។

ទីតាំងទី១: ស្ថិតនៅសាលាបឋមសិក្សាជា ស៊ីម ត្បែងមានជ័យ ឧបត្ថម្ភមាន៖-ទឹកបរិសុទ្ធ ២០កេស / ភេសជ្ជ:បាកាស ៤កេស/-ទឹកក្រូច ៦កេស។

ទីតាំងទី២: ស្ថិតនៅសាលាក្រុងព្រះវិហារ បានឧបត្ថម្ភមាន៖ទឹកបរិសុទ្ធ ១០កេស /ភេសជ្ជ:បាកាស ៣កេស/ ទឹកក្រូច ៣កេស។

ទីតាំងទី៣- ស្ថិតនៅសាលាបឋមសិក្សាប៉ាលហាល ឧបត្ថម្ភរួមមាន៖ ទឹកបរិសុទ្ធ ១០កេស /ភេសជ្ជ:បាកាស ៣កេស / ទឹកក្រូច ៣កេស។

លោកកង សៅគុណ មេបញ្ជារកងរាជអាវុធហត្ថខេត្ត បានមានមតិសំណេះសំណាង នឹងក្រុមគ្រូពេទ្យ រួមទាំងប្រជាពលរដ្ឋ ដែលបាន មកទទួលវាក់សាំង នាពេលនោះផងដែរ។

លោកក៏បានថ្លែងសរសើរដល់ ក្រុមគ្រូពេទ្យដែលតែងតែ សកម្ម ចុះយកសំណាកផង ព្យាបាលផង ផ្តល់វាក់សាំងផង ដោយមិនខ្លាចការហត់នឿយនោះឡើយ។

លោកក៏បានផ្តាំដល់ប្រជាពលរដ្ឋទាំងអស់ អោយមកទទួលចាក់វាក់សាំងបង្ការជំងឺកូវីដ១៩ ទាំងអស់គ្នា តាមគោការណ៍ របស់រាជរដ្ឋាភិបាល ដោយពុំមានបង់ប្រាក់នោះទេ។ ជាមួយគ្នានេះដេរត្រូវអនុវត្ត៣ កុំ៣ ការពារ ទាំងអស់គ្នាដើម្បីភូមិ ឃុំ គ្មានជំងឺកូវីដ១៩៕SRP

ខេត្តសៀមរាប៖លោក សឿន តុលា ស្ថាបនិកក្រុមហ៊ុនផាផាយ៉ា បាននិពន្ធនូវអត្ថបទមួយក្រោមចំណងជើងថា«ភាពស្មោះត្រង់ និង ក្លាហាន»។

លោក សឿន តុលា បានសរសេរថា” ភាពក្លាហាន មានន័យថាមាន ការប្រថុយ ទាំងអស់នោះកើតឡើងសម្រាប់សហគ្រិន ដើម្បីឱ្យ អាជីវកម្ម មានភាពការរីកចម្រើន” ជាទូទៅ គ្មាននរណាម្នាក់ ដឹងថា មានអ្វីខ្លះកើតឡើងចំពោះជាតិរបស់យើងក្នុងពេលអនាគតបានទេ   ពីព្រោះ អនាគត គឺជាអាថ៌កំបាំង សម្រាប់យើងគ្រប់គ្នា  នៅទីនេះ ការសម្រេចចិត្ត ក្លាហាន ដាក់គោលដៅ ហ៊ានចាប់យក ការដាក់វិន័យក្នុងខ្លួន  ដើម្បីអោយចេញផុត ពីទម្លាប់ធម្មតា ផ្លាស់ប្ដូរមកវិញ នៅទម្លាប់ថ្មី

សូមចងចាំថា សកម្មភាពដែលយើងធ្វើបច្ចុប្បន្ននេះត្រូវបានបែងចែកជាទម្លាប់ 2 ដែលបែងចែកផ្ទុយគ្នាដាច់ស្រឡះ 1 ទម្លាប់ប្រចាំថ្ងៃ  គឺជាថ្នាំបំពុលឲ្យយើងស្លាប់។ 2: ទម្លាប់ប្រចាំថ្ងៃ គឺជាអ្នកបម្រើដ៏ល្អសម្រាប់ជីវិតរបស់យើងភាពក្លាហានដែលល្អបំផុត គឺការយកឈ្នះទម្លាប់របស់យើង ហើយស្មោះត្រង់ចំពោះខ្លួនឯង។

យ៉ាងណាមិញ សម្រាប់អាជីវកម្ម ប្រសិនបើយើង ធ្វើរឿងដដែលៗ ហើយគ្មានការប្រថុយបន្ថែម និងមានភាពស្មោះត្រង់  ចំពោះចំនុចខ្សោយ  ដើម្បីរៀន បង្កើនសមត្ថភាព នោះទេ  គុណភាពការងារ ត្រូវបានធ្លាក់ ចុះ  ហើយលក្ខណៈសម្បត្តិនៃមនុស្សជុំវិញខ្លួនមិនអាចជះឥទ្ធិពលល្អ ដល់សាធារណៈបណ្ដោយ។

ប្រភពប្រាក់ចំណូល ដើម្បី និរន្តរភាពការងារនិងបង្កើនប្រាក់ចំណេញរបស់អាជីវកម្មប្រាកដណាស់  មិនអាចកើតឡើងបានទេ ”  និយាយរួមការប្រថុយប្រថានពិតប្រាកដ  គឺការយកឱ្យឈ្នះខ្លួនឯង ដោយស្មោះត្រង់និងជាមួយសមត្ថភាពរបស់ខ្លួន ឲ្យកើនឡើងមួយកម្រិតទៀតតាមរយៈធ្វើការសម្រេចចិត្ត  ដើម្បីឲ្យបានរីកចម្រើនទៅមុខ។

សូមចងចាំថា ” អ្នកដែលប្រថុយហើយបានជោគជ័យ ពួកគាត់ដក់ជាប់ក្នុងចិត្តថា : ” គ្មានទេបរាជ័យ   រឿងរ៉ាវដែលកើតឡើង គ្រាន់តែឧបសគ្គ បណ្ដោះអាសន្ន ដើម្បីឱ្យពួកគេ មានការគិត ធ្វើការពិចារណា ទៅលើវិធីផ្សេងៗ  ដើម្បីឲ្យបានសម្រេចគោលដៅតែប៉ុណ្ណោះ”

ពួកគាត់មិនងាកក្រោយមើលឃើញផ្លូវបរាជ័យ ដើម្បីឲ្យ ឱ្យមានលេសផ្សេងៗ ដោយមិនបានទទួលស្គាល់ អំពីចំនុចខ្វះខាតរបស់ខ្លួនឡើយ ពីព្រោះពួកគាត់គិតថា ការបរាជ័យ  គ្រាន់តែជារឿងបណ្ដោះអាសន្នតែប៉ុណ្ណោះ ហើយគ្មានថ្ងៃដែលពូគាត់ចាប់យករបរថ្មី នៅពេលដែលកិច្ចការដែលពួកគាត់កំពុងធ្វើ  កំពុងតស៊ូ ជំនះឧបសគ្គ បានឡើយ ពោលពួកគេ ទទួលខុសត្រូវនូវអ្វីដែលពួកគេបានចាប់ផ្ដើម ។

សំណួរដែលត្រូវសួរគឺថា: តើអ្នក ស្វែងយល់ ដើម្បីដាក់គោលដៅអ្វី  សម្រាប់ជីវិតរបស់ខ្លួន ដែរឬទេ ? នៅក្នុងលោកយើងនេះ  មនុស្សដែលមិនដាក់គោលដៅ  តែងតែធ្វើការឲ្យអ្នកដែលបានដាក់គោលដៅ។

ហើយមនុស្សដែលមានផែនការនិងគោលដៅ  ពួកគេមិនបោះបង់ឡើយ

ដូចនៅក្នុងសៀវភៅ ” Think And Grow Rich by Nepoleon Hill ” គាត់បានសរសេរថា ” អ្នកជោគជ័យមិនដែលបោះបង់  រីឯអ្នកបោះបង់មិនដែលជោគជ័យ” នោះដោយសារពួកគេ យល់ច្បាស់អំពីតំលៃ នៃការដាក់គោលដៅ និងតម្លៃការតស៊ូចំពោះការលំបាក។

សូមឱ្យការប្រថុយរបស់អ្នក គឺជាគ្រាប់ពូជដើម្បីឈានទៅរកភាពជោគជ័យ នៃសមត្ថភាពរឹងមាំ  សូមចងចាំថា នៅពីក្រោយឆាករបស់មនុស្សខ្លាំង  គឺពួកគេ មិនឲ្យខ្លួនឯង មានជម្រើសឡើយ ” ពួកគេមិនអាចប្រើពាក្យថា: ” ប្រសិនបើបរាជ័យ ..ខ្ញុំនឹង……” នោះទេ  គេស្មោះត្រង់ជាមួយនិងកំហុស ហើយពួកគេ មានភាពដាច់ខាត ចំពោះជ័យជំនះ៕

និពន្ធដោយលោក សឿន តុលា ស្ថាបនិកក្រុមហ៊ុន ផា ផាយ៉ា PAPAYA  NEXT STEP CO,.LTD.*PAPAYA REAL ESTATE (គម្រោងអភិវឌ្ឍន៍អចលនទ្រព្យ)*PAPAYA HOMESTAY(គម្រោងលើវិស័យទេសចរណ៍)*PAPAYA GARDEN  (គម្រោងលើវិស័យកសិកម្មនិងចែកចាយអាហារ)

ខេត្តព្រះវិហារ៖លោកទី សុវិនថាល់ ព្រះរាជអាជ្ញានៃអយ្យការអមសាលាដំបូង ខេត្តព្រះវិហារ នៅថ្ងៃទី១៩ ខែកក្កដា ឆ្នាំ២០២១ លោកបានចាត់តាំង អោយព្រះរាជ អាជ្ញារងចំនួនបួនរូបគឺ៖ លោក សេង ម៉េងស្រ៊ុន , លោក វុធ សាវី , លោក ថុល គឹមហុឹង , លោក គឹម សំលេង ជាព្រះរាជអាជ្ញារងនៃអយ្យការអមសាលាដំបូងខេត្តព្រះវិហារ ដើម្បីបើកយុទ្ធនាការ ថ្មីមួយដែលមានឈ្មោះថា (ខ្មែរតែមួយ បេះដូងតែមួយ) មានន័យដើម្បីជួយដល់ប្រជាពលរដ្ឋដែលខ្វះខាតក្នុងខេត្តព្រះវិហារ ក្នុងអំឡុងពេលបិទខ្ទប់ ការរីករាយដាលនៃ ជំងឺកូវីដ១៩ Covit-19។

ជាមួយគ្នានេះដែរសាលាដំបូងខេត្តព្រះវិហារ សូមអំពាវនាវ ដល់ឯកឧត្តម លោកជំទាវ អស់លោក លោកស្រី សប្បុរសជនដែល មានបំណងចូលរួមឧបត្ថម្ភ ឬចង់បរិច្ចាគដល់ប្រជាពលរដ្ឋដែល កំពុងខ្វះខាតក្នុងអំឡុងពេលបិទខ្ទប់នេះ អាចជួយឧបត្ថម្ភបានតាមរយៈ៖
លេខទូរស័ព្ទ 066 809555 Metfone/ គណនី ABA _097809555 ( LOEUT TOEKLY )/ ខ្មែរគណនី ABA _066809555 (លឿត តឹកលី ) ដុល្លារកម្មវិធីសប្បុរធម៌នេះចាប់ផ្តើមទទួលពីថ្ងៃ១៩ ខែកក្តដា រហូតដល់ថ្ងៃ២៥ ខែកក្តដា ឆ្នាំ២០២១ដូចតទៅ សូមអគុណ៕SRP

ភ្នំពេញ៖រាជរដ្ឋាភិបាលកម្ពុជា នៅព្រឹកថ្ងៃទី១៩ ខែកក្កដា ឆ្នាំ២០២១នេះ បានផ្ដល់អំណោយជាសម្ភារបរិក្ខារពេទ្យ ប្រើប្រាស់សម្រាប់ប្រយុទ្ធនឹងជំងឺកូវីដ១៩ របស់កម្ពុជា ជូនប្រទេសវៀតណាម ដើម្បីចូលរួមប្រយុទ្ធប្រឆាំងនឹងជំងឺកូវីដ១៩។

ការផ្ដល់អំណោយនេះដើម្បីចូលរួមចំណែកប្រយុទ្ធប្រឆាំងជំងឺកូវីដ១៩ ក្នុងប្រទេសវៀតណាម ដែលកំពុងរងការវាយលុកខ្លាំងនាពេលបច្ចុប្បន្ននេះ។

សូមជម្រាបថាសម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចឧបត្ថម្ភថវិកា ២០ម៉ឺនដុល្លារ ម៉ាសធម្មតាចំនួន ១លានបន្ទះ និងម៉ាសវេជ្ជសាស្ត្រ (N95) ចំនួន ១០ម៉ឺនបន្ទះ ព្រមទាំងម៉ាស៊ីនផលិតអុកស៊ីសែន ១០០គ្រឿង ជូនប្រទេសវៀតណាម។

ជាមួយគ្នានោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏បានជួយឧបត្ថម្ភថវិកាចំនួន ១០ម៉ឺនដុល្លារ ជូនដល់កាកបាទក្រហមប្រទេសវៀតណាម តាមរយៈស្ថានទូតវៀតណាមប្រចាំនៅកម្ពុជា។

ចំណែកលោកស្រី ម៉ែន សំអន ប្រធានសមាគមមិត្តភាពកម្ពុជា-វៀតណាម ក៏បានជួយឧបត្ថម្ភថវិកាចំនួន៥ម៉ឺនដុល្លារ ជូនដល់សមាគមមិត្តភាព វៀតណាម-កម្ពុជា តាមរយៈស្ថានទូតវៀតណាមប្រចាំនៅកម្ពុជាផងដែរ។

ដូចនេះ អំណោយដែលផ្តល់ជូនប្រទេសវៀតណាម ដើម្បីរួមចំណែកប្រយុទ្ធប្រឆាំងកូវីដ១៩ មានថវិកាសរុប ៣៥ម៉ឺនដុល្លារ, ម៉ាសធម្មតា១លាន និងម៉ាស N95 ១០ម៉ឺន ព្រមទាំងម៉ាស៊ីនផលិតអុកស៊ីសែន១០០គ្រឿង៕SRP

ខេត្តសៀមរាប៖លោក អៀម វ៉ាន់ដែត តំណាងក្រុមហ៊ុនអចលនទ្រព្យ E&T សៀមរាប ដែលមានទីតាំងស្ថិតនៅផ្លូវ(ហៃវេដុំគីឡូរ១៧) ក្នុងភូមិថ្នល់ ឃុំរុនតាឯក ស្រុកបន្ទាយស្រី ខេត្តសៀមរាប បានជួយឧបត្ថម្ភថវិកាចំនួន«២លានរៀល» និងលោក កា ធី ម្ចាស់ហាងសែនសប្បាយក្លាស៊ីក ជួយឧបត្ថម្ភទឹកសុទ្ធ ចំនួន១០០យួរ ជូនដល់ក្រុមការងារយុវជនស្រុកបន្ទាយស្រី ដើម្បីជួយសម្រួលដល់ការហូបចុក ក្នុងអំឡុងពេលចូលរួមយុទ្ធនាការ ចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ នៅទូទាំងស្រុកបន្ទាយស្រី។

សូមជម្រាបថាក្រុមហ៊ុនអចលនទ្រព្យ E&T សៀមរាប ស្ថិតនៅភូមិថ្នល់ ឃុំរុនតាឯក ស្រុកបន្ទាយស្រី។ ក្រុមហ៊ុនអចលនទ្រព្យ E&T សៀមរាប មានដីដឡូតិ៍ ប្លង់រឹង ៥គុណ២០ តម្លៃត្រឹម«២៧៧០ដុល្លារ»​តែប៉ុណ្ណោះ។ ចំណែកវីឡាកូនកាត់លំហែកាយ មានលក់តម្លៃពិសេស បញ្ចុះតម្លៃ​ ១០០០០ដុល្លារ មិនដែលមាន ២៣៧៧០ដុល្លារ គឺបានវីឡាប្រណិតមួយយ៉ាងស្អាត ដែលជាដី ស្របច្បាប់១០០% ប្លង់រឹង💌 លោកអ្នកចង់បានដីឡូតិ៍ឬវីឡាកូនកាត់បែបលំហែកាយ នៅខេត្តសៀមរាប ដែលបានបញ្ចុះតម្លៃពិសេស កុំភ្លេច ហ៊ុនអចលនទ្រព្យ E&T សៀមរាប តាមរៈទូរស័ព្ទលេខ 012 679 779/098 679 779/067 679 779

ខេត្តពោធិ៍សាត់៖លោក ម៉ៅ ធនិន សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណៈកម្មាធិការ គណបក្សប្រជាជនកម្ពុជា ខេត្តពោធិ៍សាត់ បានថ្លែងថាតួនាទីដែលផ្ដល់ជូននាពេលនេះ គឺជាអំរែក ម្ខាងរែករាស្រ្ត និងម្ខាងរែកច្បាប់។ នៅពេលដែលយើងទទួលបានតួនាទីហើយ ត្រូវធ្វើជាគំរូល្អដល់មន្ត្រីក្រោមឱវាទ ក៏ដូចជាប្រជាពលរដ្ឋ ក្នុងការដឹកនាំមូលដ្ឋាន ប្រកបដោយភាពថ្លៃថ្នូរ កុំឱ្យប្រជាពលរដ្ឋខកចិត្ត និងបាត់ជំនឿមកលើយើង។ ជាមួយគ្នានោះ ត្រូវមានវប្បធម៌ចែករំលែក នឹងត្រូវចងចាំពាក្យប៉ុន្មានឃ្លាថា «នៅពេលដែលយើងទទួលទានឆ្អែត យើងត្រូវស្រមៃឃើញអ្នកដែលកំពុងតែស្រេកឃ្លាន, នៅពេលយើងក្រយើងត្រូវរកឱ្យមាន នៅពេលដែលយើងមានយើងត្រូវជួយអ្នកក្រវិញ»។

លោក ម៉ៅ ធនិន ក៏បានណែនាំ និងដាក់ផែនការដល់អាជ្ញាធរមូលដ្ឋាន ក្នុងការបង្ការ និងទប់ស្កាត់ការរីករាលដាលជំងឺកូវីដ១៩ ព្រមទាំងដាក់ទិសដៅចំនួន៤ចំណុចធំៗ ដើម្បីឆ្ពោះទៅទទួលយកជ័យជំនះទៅថ្ងៃខាងមុខ៖

១-សូមឱ្យមានអ្នកប្រចាំការ នៅស្នាក់ការគណបក្សស្រុក/ឃុំ ដើម្បីរងចាំបំពេញតម្រូវការ ក៏ដូចជាសំណូមពររបស់ប្រជាពលរដ្ឋ

២-បេក្ខភាពឈរឈ្មោះ (ក្រុមប្រឹក្សាឃុំ) សូមពង្រឹង និងពង្រីកសមត្ថភាព ដោយយកតួនាទីទៅផ្សារភ្ជាប់នឹងសុខទុក្ខប្រជាពលរដ្ឋ

៣-បន្តចុះជាប់ដល់ខ្នងផ្ទះប្រជាពលរដ្ឋ ដើម្បីស្វែងយល់ ពីជីវភាព បញ្ហាប្រឈម និងសុខទុក្ខពួកគាត់ ធ្វើការដោះស្រាយ

៤-សូមជ្រើសរើស ភ្នាក់ងារសង្គេតការណ៍ កើតចេញពីកូនក្មួយយុវជនយើង ដែលមានសមត្ថភាព មានភាពត្រឹមត្រូវ ចេះច្បាប់ និងមានស្មារតី ឆន្ទះ ច្បាស់លាស់។

លោកមានប្រសាសន៍ ក្នុងឱកាសអញ្ជើញជាគណៈអធិបតី ក្នុងប្រកាសសេចក្តីសម្រេច តែងតាំងមន្ត្រីស្នាក់ការគណបក្សឃុំ ក្នុងស្រុកបាកាន ចំនួន២៧រូប និងសេចក្តីសម្រេច ស្តីពីការបង្កើតគណៈបញ្ជាការយុទ្ធនាការបោះឆ្នោតក្រុមប្រឹក្សាឃុំ អាណត្តិទី៥ ឆ្នាំ២០២២។ ពិធីនេះធ្វើនៅ ទីស្នាក់ការគណបក្សស្រុកបាកាន នៅថ្ងៃអាទិត្យ ទី១៨ ខែកក្កដា ព្រឹកមិញនេះ.

លោក ខៀវ ចែ អនុប្រធានគណៈកម្មាធិការគណបក្សស្រុក និងតំណាងឱ្យលោក លោកស្រី ជាប្រធាន អនុប្រធាន និងជំនួយការ គណបក្សឃុំ ក្នុងស្រុកបាកានទាំងមូល បានប្តេជ្ញាចិត្ត៖

១-បែងចែកភារកិច្ចទទួលបន្ទុកខុសត្រូវ តាមសេចក្តីកំណត់លេខ២២សណ.គក ចុះថ្ងៃទី០៥ ខែកញ្ញា ឆ្នាំ១៩៩៥ របស់គណៈអចិន្ត្រៃយ៍គណៈកម្មាធិការកណ្តាល គណបក្សប្រជាជនកម្ពុជា ស្តីពីមុខងារ ភារកិច្ច រចនាសម្ព័ន្ធ និងរបៀបរបបធ្វើការងាររបស់ស្នាក់ការគណបក្ស ខេត្ត ក្រុង ស្រុក ខណ្ឌ និងឃុំសង្កាត់។

២-រៀបចំការប្រជុំគណៈកម្មាធិការគណបក្សស្រុក និងគណបក្សឃុំឱ្យបានទៀងទាត់ប្រចាំខែ តាមប្រតិទិន ដែលបានអនុម័តរួចហើយ។

៣-រៀបចំការប្រជុំជាមួយគណៈកម្មាធិការគណបក្សឃុំចំណុះ និងគណៈគណកម្មាធិការសាខា តាមបណ្តាការិយាល័យ អង្គភាពចំណុះ ១ខែម្តង និងករណីចាំបាច់ ប្រជុំជាវិសាមញ្ញ។

៤-រៀបចំកសាងកម្មវិធីចុះជួយមូលដ្ឋានជាប្រចាំ ដើម្បីលើកទឹកចិត្តមូលដ្ឋាន និងជំរុញការងារ របស់មូលដ្ឋានឱ្យបានសកម្ម។

៥-រៀបចំពង្រឹង របបរាយការណ៍ជាប្រចាំ ជូនគណបក្សថ្នាក់លើរបស់ខ្លួនរៀងរាល់ខែ ក្នុងករណីចាំបាច់ ត្រូវរាយការណ៍ផ្ទាល់មាត់ ដើម្បីទាក់ទងថ្នាក់លើដោះស្រាយជាបន្ទាន់។

៦-រៀបចំពង្រឹងដល់គណៈជំនាញរបស់គណបក្សជាប្រចាំ ដូចជាការងារចាត់តាំងការងារឃោសនាអប់រំការងារត្រួតពិនិត្យគណបក្ស និងការងាររដ្ឋបាល ហិរញ្ញវត្ថុ។

៧-រៀបចំបែងចែកវេនប្រចាំការ នៅស្នាក់ការគណបក្សគ្រប់ថ្នាក់ ២៤ម៉ោង លើ២៤ម៉ោង ដើម្បីទំនាក់ទំនងការងារជាមួយគ្រប់មជ្ឈដ្ឋាន ជាមួយសមាជិកគណបក្ស ពិសេសក្នុងយុទ្ធនាការឃោសនាបោះឆ្នោតខាងមុខ៕SRP

ភ្នំពេញ៖លោកហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា សូមសម្តែងនូវសេចក្តីត្រេកអរ និងគាំទ្រទាំងស្រុងចំពោះអនុសាសន៍របស់សម្តេចតេជោហ៊ុន សែន នាយករដ្ឋមន្រ្តី ដែលសម្រេចផ្តល់វ៉ាក់សាំងបង្ការជំងឺកូវីដ-១៩ ដល់កុមារ និងយុវវ័យមានអាយុចន្លោះពី១២ឆ្នាំ ដល់១៧ឆ្នាំ ដែលមានចំនួនសរុបប្រមាណ២លាននាក់ នាពេលដ៏ខ្លីខាងមុខនេះ។ ជាមួយនេះ គណៈកម្មការទី៧ក៏សូមគាំទ្រចំពោះការដាក់ចេញជាបន្តបន្ទាប់របស់រាជរដ្ឋាភិបាលនូវយុទ្ធសាស្រ្ត និងវិធានការឆ្លើយតបនានា នាពេលកន្លងមក ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ផងដែរ ដែលទាំងអស់នេះបានឆ្លុះបញ្ចាំងឱ្យឃើញពីការទទួលខុសត្រូវ និងសមត្ថភាពក្នុងការដឹកនាំ វាយតម្លៃយ៉ាងហ្មត់ចត់របស់ប្រមុខរាជរដ្ឋាភិបាល ក្នុងការគ្រប់គ្រងស្ថានភាពរបស់កម្ពុជាលើគ្រប់ទិដ្ឋភាព មិនថាលើវិស័យសុខភាពសាធារណៈ អប់រំ សង្គម សេដ្ឋកិច្ច ឬនយោបាយនោះឡើយ។

បើតាម លោកហ៊ុន ម៉ានី គណៈកម្មការទី៧ យល់ឃើញថាក្នុងកាលៈទេសៈនៃការរីករាលដាលជំងឺកូវីដ-១៩ ការពង្រីកវិសាលភាពនៃការចាក់វ៉ាក់សាំងដល់កុមារ និងយុវវ័យនេះ គឺជាវិធានការមួយបន្ថែមទៀតដែលនឹងចូលរួមលើកកម្ពស់សុខភាព និងការបង្ការពីការឆ្លងរីករាលដាលនៃជំងឺកូវីដ-១៩ដល់កុមារ និងយុវវ័យនៅក្នុងសហគមន៍ ដោយធានាបាននូវការបន្ថយក្តីបារម្ភរបស់អាណាព្យាបាលសិស្សផង និងការឈានទៅដំណើរការសាលារៀនឡើងវិញប្រកបដោយសុវត្ថិភាពស្របតាមគោលនយោបាយជាតិ ស្តីពី សុខភាពសិក្សាផង។ ការយកចិត្តទុកដាក់យ៉ាងកក់ក្តៅពីសម្តេចតេជោនាយករដ្ឋមន្ត្រី ពិតជាការគិតគូរគ្រប់ជ្រុងជ្រោយ ដើម្បីធ្វើឱ្យសេដ្ឋកិច្ច និងសង្គមវិលទៅរកភាពប្រក្រតីឡើងវិញស្របទៅតាមបរិបទថ្មី ដោយកុមារ និងយុវជនកម្ពុជាបន្តទទួលបានការអប់រំប្រកបដោយគុណភាព ប្រសិទ្ធភាព មានសុខភាពល្អទាំងកាយសម្បទា ទាំងបញ្ញាស្មារតី ដើម្បីអភិវឌ្ឍសង្គមកម្ពុជាប្រកបដោយចីរភាព។ លើសពីនេះ ការសម្រេចចិត្តជាយុទ្ធសាស្រ្តនេះ នឹងបង្កើនលទ្ធភាពកាន់តែច្រើនថែមទៀតដល់ការត្រៀមបើកដំណើរការគ្រឹះស្ថានសិក្សាឡើងវិញជាជំហានៗ ក្រោយពេលការចាក់វ៉ាក់សាំងការពារជំងឺកូវីដ-១៩ រួចរាល់ នាពេលខាងមុខ។

សូមជម្រាបថាសម្តេចហ៊ុន សែន កាលពីថ្ងៃទី១៦ ខែកក្កដា ឆ្នាំ ២០២១នេះ បានផ្ញើសារពិសេស សម្រេចបើកដំណើរការ ចាក់វ៉ាក់សាំងបង្ការជំងឺកូវីដ-១៩ ជូនកុមារ និង យុវវ័យ ចាប់ពីអាយុ ១២ ដល់ ១៧ឆ្នាំ ដែលជំហានដំបូងដំណើរការចាក់ នៅរាជធានីភ្នំពេញ និងខេត្តកណ្ដាល។

មេដឹកនាំដ៏កម្ពុជាដ៏មានប្រជាប្រិយ៍ភាព សម្តេចហ៊ុន សែន ក៏បានអំពាវនាវដល់ មាតាបិតា និងអាណាព្យាបាល ឲ្យត្រៀមនាំកូនៗ ដែលមានអាយុចាប់ពី ១២ ដល់ ១៧ ឆ្នាំ មកចាក់វ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា តាមការជូនដំណឹង របស់ក្រសួងសុខាភិបាល នាពេលខាងមុខ៕SRP

ខេត្តសៀមរាប៖សមត្ថកិច្ចបានអះអាងថាបាន ប្រទះឃើញគ្រាប់បែកដៃ និងគ្រាប់កាំភ្លើងជាង៣០គ្រាប់ ចាស់ៗនៅផ្ទះប៉ូលិសម្នាក់ ក្នុងក្រុងសៀមរាប។

ការប្រទះឃើញនេះនៅវេលាម៉ោង០៨ និង៣០នាទី ថ្ងៃទី១៧ ខែកក្កដាឆ្នាំ២០២១នៅចំណុចផ្ទះរបស់ឈ្មោះ ចាន់ ភក្ត្រា មុខរបរ ប៉ូលិស មានអាសយដ្ឋាននៅភូមិត្រពាំងសេះសង្កាត់គោកចក ក្រុងសៀមរាប។

សមត្ថកិច្ចបានបន្តថាផ្ទះខាងលើឃើញមាន គ្រាប់បែកដៃប្រភេទNo-36 ចំនួន០៣គ្រាប់ និង គ្រាប់កាំភ្លើងមិនស្គាល់ប្រភេទចំនួន៣០គ្រាប់ ជារបស់ចាស់។បច្ចុប្បន្នបានប្រគល់ជូនកម្លាំងមន្ត្រីជំនាញអង្គការសុីម៉ាក់ យកទៅរក្សាទុកកន្លែងមានសុវត្ថិភាពរងចាំកម្ទេចចោល៕SRP

ខេត្តសៀមរាប៖លោកយាយ ចិន មៀច មានវ័យ១០២ឆ្នាំ រស់នៅភូមិនគរក្រៅ សង្កាត់គោកចក ក្រុងសៀមរាបបានស្ម័គ្រចិត្តមកទទួលចាក់វ៉ាក់សាំង បង្ការជម្ងឺកូវីត១៩ រួចរាល់ នៅមណ្ឌលចាក់វ៉ាក់សាំង វត្តប្រាសាទគោកចក នាថ្ងៃទី១៧ខែកក្កដាឆ្នាំ២០២១នេះ។ នេះបើតាមអាជ្ញាធរក្រុងសៀមរាប បានបញ្ជាក់នៅព្រលប់ថ្ងៃនេះ៕SRP

ភ្នំពេញ៖រដ្ឋាភិបាល និងប្រជាជនជប៉ុន បានសម្រេចផ្តល់រថយន្តគិលានសង្គ្រោះចំនួន ៣០គ្រឿងបន្ថែមទៀត ជូនដល់រាជរដ្ឋាភិបាលកម្ពុជា ដើម្បីចូលរួមក្នុងប្រតិបត្តិការប្រយុទ្ធប្រឆាំងនឹងជំងឺកូវីដ១៩។ ដោយបូកនឹងរថយន្តដែលបានផ្តល់នាពេលកន្លងទៅផងនោះ មកដល់ពេលនេះរដ្ឋាភិបាល និងប្រជាជនជប៉ុន បានផ្តល់រថយន្តគិលានសង្គ្រោះនេះសរុប ១០០គ្រឿងហើយ។

យោងតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា ដែលទទួលបាននៅថ្ងៃសៅរ៍ ទី១៧ ខែកក្កដានេះ បានគូសបញ្ជាក់ថា រថយន្តគិលានសង្គ្រោះទាំង ៣០គ្រឿងនេះ បានបញ្ជូនទៅកាន់មូលដ្ឋានសុខាភិបាលជាច្រើនក្នុងសប្តាហ៍នេះ៕SRP

ខេត្តកំពង់ចាម​៖ក្នុងឱកាសបេីក​ការដ្ឋានស្ថាបនាផ្លូវក្រាលកៅស៊ូ ១ខ្សែ​ ប្រវែង ២៧.៦០០ម៉ែត្រ ចាប់ពីចំណុចភូមិបឹងត្រាវ ឃុំសូរគង ឆ្លងកាត់ឃុំរាយប៉ាយ ឆ្ពោះទៅដល់ស្ពានអន្លង់គគីរ ឃុំព្រែកកុយ ស្រុកកងមាស​ នៅព្រឹក​មិញនេះ​ លោក អ៊ុន ចាន់ដា អភិបាលខេត្តកំពង់ចាម បានថ្លែងថា គម្រោងផ្លូវ ១ខ្សែនេះ គ្រោងចំណាយថវិកាស្ថាបនាក្នុងរង្វង់ប្រមាណជាង ៣លានដុល្លារអាមេរិក ហើយរំពឹងថា វានឹងផ្ដល់នូវអត្ថប្រយោជន៍យ៉ាងច្រើន ទៅដល់ប្រជាពលរដ្ឋ​ ចំណេញទាំងពេលវេលាក្នុងការធ្វើដំណើរ និងការដឹកជញ្ជូនកសិផល ពី​តំបន់​មួយ ទៅ​តំបន់​មួយ ដែលជាការចូលរួមចំណែក ក្នុងការអភិវឌ្ឍមូលដ្ឋាន ស្របតាមកម្មវិធីនយោបាយយុទ្ធសាស្ត្រ របស់ប្រមុខរាជរដ្ឋាភិបាល គឺ៖ ផ្លូវ ទឹក ភ្លើង និងមនុស្ស។ ក្រៅពីនោះ សមិទ្ធផលនេះ វាក៏បានចូលរួមចំណែកយ៉ាងសំខាន់ ដោយបានប្រែក្លាយស្រុកទេស ក៏ដូចជា មូលដ្ឋានសហគមន៍ ឲ្យមានសោភណ្ឌភាពល្អ ជាពិសេស បងប្អូនប្រជាពលរដ្ឋក្នុងតំបន់ស្រុកកងមាស​ រស់នៅប្រកបដោយផាសុខភាព និងធ្វើឲ្យកម្រិតជីវភាពគ្រួសារ កាន់តែប្រសើរឡើង ថែមមួយកម្រិតផងដែរ។

លោកអ៊ុន ចាន់ដា បានបញ្ជាក់ថា ក្រៅពីនោះគម្រោងនេះ ក៏ស្ថិតនៅក្រោមការខិតខំប្រឹងប្រែង ពីថ្នាក់ដឹកនាំគ្រប់លំដាប់ថ្នាក់ ទាំងថ្នាក់ជាតិ និងមូលដ្ឋាន។

លោកអ៊ុន ចាន់ដា ក៏បាន​អំពាវនាវដល់ប្រជាពលរដ្ឋ ឲ្យយកចិត្តទុកដាក់ ថែទាំសុខភាព តាមរយៈ ការអនុវត្តនូវវិធានការសុខាភិបាល «៣ការពារ ៣កុំ» និងចូលរួមទៅទទួលយកវ៉ាក់សាំងបង្ការជម្ងឺកូវីដ ១៩ ឲ្យបានគ្រប់ៗគ្នា ខណៈពេលនៅតាមបណ្ដាក្រុង/ស្រុកនីមួយៗ នៃខេត្តកំពង់ចាម កំពុងដំណើរការ ចាក់ជូនប្រជាពលរដ្ឋយើង ដោយឥតគិតថ្លៃ ដែលជាការចូលរួមចំណែកទាំងអស់គ្នា ដើម្បី បញ្ជៀសកុំឲ្យជម្ងឺកូវីដ ១៩ ឆ្លងចូលខ្លួនយើង ក្រុមគ្រួសារយើង និងសហគមន៍យើងផងដែរ​៕SRP

ភ្នំពេញ៖ក្រុមការងារហ្វេសប៊ុករបស់ សម្ដេច ស ខេង រដ្ឋមន្ត្រីក្រសួងមហាផ្ទៃក្នុងឆមាសទី១​ ដោះស្រាយមតិ ជូនប្រជាពលរដ្ឋ បានចំនួន២៥៩គណនី។

សម្ដេច ស ខេង បានបង្ហាញនៅលើទំព័រផេកហ្វេសប៊ុកថា៖ ថ្ងៃនេះខ្ញុំសូមបញ្ជាក់ជូនលទ្ធផលប្រចាំឆមាសទី១ ឆ្នាំ២០២១ អំពីការទទួលយកនិងការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុករបស់ខ្ញុំ ដែលខ្ញុំបានចាត់ចែងបញ្ជាទៅបណ្តា អគ្គនាយកដ្ឋាន និងអង្គភាពពាក់ព័ន្ធនានាធ្វើការដោះស្រាយជូនប្រជាពលរដ្ឋ មន្ត្រីរាជការ និងកងកម្លាំងនគរបាលជាតិក្នុងដែនសមត្ថកិច្ចក្រសួងមហាផ្ទៃ ។ សរុបមតិយោបល់ឬសំណូមពររបស់បងប្អូនប្រជាពលរដ្ឋទូទៅមានចំនួន៦៦៥គណនី នៅក្នុងនោះគឺបានទទួលយកពិនិត្យដោះស្រាយមានចំនួន៤២៤គណនី និងបានដោះស្រាយរួចរាល់ជូនប្រជាពលរដ្ឋមានចំនួន២៥៩គណនី។

មានបញ្ហាជាច្រើនផ្សេងៗគ្នាដែលមន្ត្រីនៃអង្គភាពជំនាញចំណុះក្រសួងមហាផ្ទៃបានធ្វើការដោះស្រាយដែលខ្ញុំសូមជម្រាបជូនបងប្អូនជនរួមជាតិដូចខាងក្រោម៖

អគ្គស្នងការដ្ឋាននគរបាលជាតិ បានពិនិត្យដោះស្រាយ និងឆ្លើយតបទៅប្រជាពលរដ្ឋចំនួន ១៧២ គណនី ដែលមានការពាក់ព័ន្ធនឹងការលក់ ការចែកចាយ និងការប្រើប្រាស់គ្រឿងញៀន, ល្បែងស៊ីសងគ្រប់ប្រភេទ, ការផ្ទុះអាវុធអាណាធិបតេយ្យ, ការចោទប្រកាន់លើមន្ត្រីអាជ្ញាធរ និងកងកម្លាំងមូលដ្ឋាន, បញ្ហាចរាចរណ៍, អំពើចោរកម្ម ដូចជាលួចសម្ភារៈប្រើប្រាស់ និងគោ ក្របី, ករណីប្លន់ឬអំពើលួចមានស្ថានទំងន់ទោស, បញ្ហាអសន្តិសុខ សណ្ដាប់ធ្នាប់, ការផ្ដល់សេវាបញ្ជាក់អត្តសញ្ញាណ, ការប្រើឧបករណ៍បំពងសំឡេងរំខាន, បញ្ហាក្មេងទំនើង, អំពើហិង្សា, ការឆបោកតាមប្រព័ន្ធបច្ចេកវិទ្យា, ការកែច្នៃយានយន្តខុសច្បាប់, វិវាទក្នុងអង្គភាពនគរបាល, ការក្លែងខ្លួនជាមន្រ្តីនគរបាល, ការអនុវត្តតួនាទី និងភារកិច្ច, ករណីរត់ការចូលក្របខណ្ឌរដ្ឋ, អំពើល្មើសវិធានការរដ្ឋបាលក្នុងការទប់ស្កាត់ជំងឺកូវីដ-19, ការកែច្នៃអាវុធខុសច្បាប់, ករណីបាត់ខ្លួនប្រជាពលរដ្ឋ ការនេសាទខុសច្បាប់ និងវិវាទនានាជាដើម។

អគ្គនាយកដ្ឋានរដ្ឋបាល បានពិនិត្យដោះស្រាយ និងឆ្លើយតបទៅប្រជាពលរដ្ឋចំនួន ៥៨ គណនី គឺមានពាក់ព័ន្ធនឹងការអនុវត្តគម្រោងអភិវឌ្ឍន៍មូលដ្ឋាន, ការគ្រប់គ្រងដីបឹងធម្មជាតិ, ទំនាស់ដីធ្លី, ការតាំងលំនៅលើដីសាធារណៈ, វិវាទរវាងសន្តិសុខផ្សារ និងអ្នកគ្រប់គ្រងផ្សារ, ការស្នើសុំចុះបញ្ជីដីធ្លី, វិវាទរវាងក្រុមហ៊ុន និងប្រជាពលរដ្ឋ, បញ្ហាទឹកស្អាត, ការស្នើពន្លឿនការផ្ដល់សេវាសាធារណៈនៅច្រកចេញចូលតែមួយ, បណ្ដឹងសុំដូរមេភូមិ, ការផ្ដល់ជំនួយសង្គម, ការជីកកាយយកដី និងយកខ្សាច់មាត់ស្ទឹង ព្រែក, សំណើរបើកផ្លូវសាធារណៈ, ការអនុវត្តភារកិច្ចរបស់ស្មៀន និងការស្នើសុំជួយពន្លឿនការផ្ដល់បណ្ណកម្មសិទ្ធិដីធ្លីជាដើម។

អគ្គនាយកដ្ឋានអត្តសញ្ញាណកម្ម បានពិនិត្យដោះស្រាយ និងឆ្លើយតបចំនួន ១០ គណនី ដែលពាក់ព័ន្ធនឹងការស្នើសុំចុះបញ្ជីអាពាហ៍ពិពាហ៍, ការកែតម្រូវឯកសារអត្តសញ្ញាណកម្ម, ការបញ្ជាក់លើឯកសារអត្តសញ្ញាណកម្មថតចម្លង, ការស្នើសុំធ្វើលិខិតស្នាក់នៅ និងការស្នើសុំធ្វើអត្តសញ្ញាណបណ្ណជាដើម។

អគ្គនាយកដ្ឋានអន្តោប្រវេសន៍ បានពិនិត្យដោះស្រាយ និងឆ្លើយតបចំនួន៣ គណនី មានជាអាទិ៍ ពាក់ព័ន្ធនឹងការបំពេញការងាររបស់មន្រ្តីតាមច្រកព្រំដែនគោក ច្រកទ្វារអាកាសយានដ្ឋាន និងការងារអនុវត្តន៍ច្បាប់អន្តោប្រវេសន៍លើជនបរទេស។

អគ្គាធិការដ្ឋានបានពិនិត្យដោះស្រាយ និងឆ្លើយតបចំនួន ១៥ គណនី ពាក់ព័ន្ធនឹងមន្ត្រីរាជការ និងកងកម្លាំងនគរបាលជាតិក្នុងក្របខណ្ឌក្រសួងមហាផ្ទៃដែលបានប្រព្រឹត្តិមិនត្រឹមត្រូវដូចជា ការចាប់ខ្លួនប្រជាពលរដ្ឋ, ការដោះស្រាយបញ្ហា និងវិវាទដីធ្លី, ការធ្វើលិខិតផ្ទេរសិទ្ធិប្រើប្រាស់ដីធ្លី, ភាពមិនប្រក្រតីនៅក្នុងការងារអភិវឌ្ឍមូលដ្ឋាន, វិវាទរវាងប្រជាពលរដ្ឋ និងស្មៀនឃុំ, ការផ្លាស់ប្ដូរមេភូមិ, ដំណើរការផ្ដល់សេវាសាធារណៈនៅច្រកចេញចូលតែមួយ និងអាជីវកម្មជីកដីជាដើម។

ចំណែកអគ្គនាយកដ្ឋានភស្តុភារ និងហិរញ្ញវត្ថុវិញបានពិនិត្យដោះស្រាយ និងឆ្លើយតបបានចំនួន១គណនីដែលពាក់ព័ន្ធករណីមន្ត្រីស្នើសុំតម្លើងតួនាទី និងឋានន្តរសក្ដិ។​ ជាមួយគ្នានេះក៏មានមតិយោបល់ចំនួន ៨៧ទៀត ខ្ញុំបានបញ្ជូនទៅ អង្គភាពពាក់ព័ន្ធនានាដើម្បីមុខការ និង ជាសមត្ថកិច្ច។

ក្រៅពីនោះខ្ញុំក៏បានទទួលយកនូវមតិយោបល់ និង ទស្សនៈល្អៗ របស់បងប្អូនប្រជាពលរដ្ឋបានផ្ញើមកខ្ញុំមានប្រមាណ១៥៤គណនី ដែលអាចធ្វើឲ្យខ្ញុំយកមកពិចារណា ដើម្បីប្រតិបតិបត្តិក្នុងកិច្ចការបម្រើជាតិ។

ខ្ញុំសូមបញ្ជាក់ថា វឌ្ឍនភាពការងារដូចបានជម្រាបខាងលើនេះ អាចសម្រេចបានដោយសារកិច្ចខិតខំប្រឹងប្រែង និងកិច្ចសហការគ្នាល្អរវាងថ្នាក់ដឹកនាំ និងមន្ត្រីអង្គភាពចំណុះក្រសួងមហាផ្ទៃ អង្គភាពពាក់ព័ន្ធនៅថ្នាក់ជាតិ និងថ្នាក់ក្រោមជាតិ ទោះជាក្នុងស្ថានភាពកំពុងប្រឈមមុខនឹងការរីករាលដាលនៃជំងឺកូវីដ-១៩។

ខ្ញុំក៏សូមថ្លែងអំណរគុណបងប្អូនជនរួមជាតិ ដែលបានលើកជាមតិយោបល់ និងសំណូមពរនានាតាមរយៈទំព័រហ្វេសប៊ុករបស់ខ្ញុំដើម្បីយើងរួមគ្នាដោះស្រាយនូវបញ្ហានានា និងរួមគ្នាអភិវឌ្ឍន៍សង្គមជាតិយើង។ ខ្ញុំសូមលើកទឹកចិត្តដល់បងប្អូនជនរួមជាតិឲ្យបន្តលើកជាមតិយោបល់ និងសំណូមពរនានាមកកាន់រូបខ្ញុំតាមរយៈទំព័រហ្វេសប៊ុក ហើយខ្ញុំនឹងទទួលយកដើម្បីពិនិត្យ និងធ្វើការដោះស្រាយដោយពុំមានការរើសអើងឡើយ ក្នុងដែនសមត្ថកិច្ចក្រសួងមហាផ្ទៃ។

ទន្ទឹមនឹងនេះ ខ្ញុំក៏សុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនដែលមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី៕SRP