ខេត្តបាត់ដំបង៖ក្នុងប្រជុំបូកសរុបសភាពការណ៍ប្រចាំខែ​តុលា​ និងលើក​ទិសដៅភារកិច្ចខែ​វិច្ឆិកា​ឆ្នាំ​២០២០ របស់ស្នងការនគរបាលខេត្តបាត់ដំបង នៅព្រឹកថ្ងៃ​ ទី​២៨ខែ​ តុលា នេះ លោក​ឧត្តមសេនីយ៍ត្រី​ សាត​ គឹមសាន​ មេប៉ូលិសខេត្ត បានថ្លែងថា

មន្រ្តីនគរបាលរូបណា ដែលមិនបានដោះ​ស្រាយបញ្ហា ជូនប្រជាពលរដ្ឋ នៅមូលដ្ឋានបានទាន់ពេលវេលាទេ ត្រូវទទួលខុសត្រូវ។

ក្នុងកិច្ចប្រជុំលោកស្នងការ ក៏បានក្រើនរំលឹក​ដល់ថ្នាក់ដឹកនាំគ្រប់ផែនជំនាញ​ ការិយាល័យជំនាញ​ រួមទាំងអធិការន​គរបាលក្រុង​ ស្រុកត្រូវពិនិត្យពិចារណាឡើងវិញ​ ចំពោះករណីអ​សន្តិសុ​ខ​សង្គមដែលកើត​មាន​ក្នុងមូលដ្ឋាននា​ខែ​កន្លងទៅ​ ដូចជាករណី ចោរ​កម្ម​ ករណីគ្រឿងញៀន​និងក្រុមក្មេងបង្កអា​ណា​ធិបតេយ្យជាដើម​។

បើតាមស្នងការបាន​បញ្ជាក់ជូនថា ​កន្លងទៅលោក​បាន​ឱ្យធ្វើការផ្សព្វផ្សាយលេខ​ទូរ​ស័ព្ទ របស់លោកផ្ទាល់​ របស់លោក​ លោកស្រីស្នងការរង​ លោកអធិការនគរ​បាលក្រុងស្រុក​ រួមទាំងលេខទូរស័ព្ទរបស់នាយប៉ុស្តិ៍នគរបាលរដ្ឋបាលផង​ ដូច្នេះក្នុងពេលប្រជា​ពល​រដ្ឋ ទាក់ទងមកមន្រ្តីនៅមូលដ្ឋាន រូបណា ​មិនបាន​ដោះស្រាយបញ្ហានិងអន្តរាគមន៍ជូនគាត់​ទាន់​ពេល​វេលា​ទេ​ មន្រ្តីរូបនោះត្រូវតែទទួល​ខុស​ត្រូវចំពោះមុខថ្នាក់ដឹកនាំស្នងការ៕SRP

ខេត្តកំពត៖អ្នកភូមិជិត២០០គ្រួសារ រស់នៅក្នុងភូមិ ត្រពាំងគុយ ភូមិត្រពាំងថ្ម និង ភូមិត្រពាំងគគីរ ស្ថិតនៅឃុំល្បើក ស្រុកឈូក ខេត្តកំពត បានតវ៉ានឹងសុំអំពាវនាវដល់អាជ្ញាធរពាក់ព័ន្ធ ជួយដំណោះស្រាយជូន ពួកគាត់ ខណ: ដី ក្នុងសហគមន៍ របស់ពួកគាត់ត្រូវបានគេ ឆ្វៀលលក់ឲ្យទៅឈ្មួញតាមតែអំពើចិត្ត។ ដីសហគមន៍ ខាងលើ​ មានទីតាំងស្ថិតនៅ ចំណុចភ្នំត្នោត ក្នុងស្រុកឈូក ខេត្តកំពត។

ប្រភពបានឲ្យដឹងថាពលរដ្ឋ ចំនួន៦២គ្រួសារ និងមានការព្រមព្រៀងគ្នា ជាមួយនឹងអាជ្ញាធរដែនដី ដើម្បីបង្កើតជាសហគមន៍ នៅឆ្នាំ២០០៨ ប៉ុន្តែ២០២០ នេះទើបប្រជាពលរដ្ឋ មានការងឿងឆ្ងល់ សង្ស័យទៅលើអ្នកគ្រប់គ្រង និងអ្នក ការពារ ដីសហគមន៍ ដូចជាប្រធានសហគមន៍ និងលោកមេភូមិ លោកមេឃុំ បានគប់គិតគ្នាលក់ឲ្យទៅឈ្មួញមួយចំនួន។

តាមសេចក្ដីរាយការណ៍បានឲ្យដឹងថានៅថ្ងៃទី ២៧ខែ តុលាឆ្នាំ២០២០ម្សិលមិញ ក្រុមតំណាងសហគមន៍មួយចំនួនបាន ប្រមូលផ្ដុំគ្នាជាមួយ ប្រជាពលរដ្ឋ ជិត២០០គ្រួសារ ដើម្បីចុះបញ្ជីវត្តមាន ការជួយថែរក្សាដីសហគមន៍ ភ្នំត្នោត យកមក ថែរក្សាការពារ កុំឱ្យមាន បុគ្គលណា ម្នាក់ឈ្លានពាន រំលោភ បំពាន យកធ្វើជាកម្មសិទ្ធិផ្ទាល់ខ្លួន។ ដោយហេតុថា

ទំហំដីសហគមន៍ ភ្នំត្នោត ដែលមានផ្ទៃក្រឡាទំហំ៤៥៨ ហិកតា នេះ ឥឡូវត្រូវបានឈ្មួញបាន គប់គិតគ្នា ហ៊ុំព័ទ្ធយកដីមួយចំនួន ធ្វើឲ្យមានការបាត់បង់ ដោយគ្មានពលរដ្ឋ ណាម្នាក់ដឹងនោះឡើយ។

ជុំវិញពលរដ្ឋ បានចោទប្រកាន់លោក ប្រធានសហគមន៍ ជាអ្នកគ្រប់គ្រង និងថែរក្សាដីសហគមន៍ បែជាបណ្ដែតបណ្ដោយ ឲ្យពលរដ្ឋមួយចំនួននិង អាជ្ញាធរដែនដីមួយក្តាប់តូច យកទៅលក់ឱ្យក្រុមឈ្មួញ។

ដូច្នេះហើយទើបពលរដ្ឋទាំង៣ភូមិ ស្នើសុំដល់អភិបាល ខេត្តកំពតលោកជាវ តាយ ជួយរកយុត្តិធម៌ ក៏ដូចជាដំណោះស្រាយ ជូនពួកគាត់ ក្នុងការទាមទារយកដី សហគមន៍ ភ្នំត្នោត មកវិញ ដើម្បីទុកជាប្រយោជន៍រួម នឹងទុកជាសម្បត្តិរបស់រដ្ឋ។

ពាក់ព័ន្ធទៅនឹងការលើកឡើងរបស់ពលរដ្ឋនេះ«បណ្ដាញសៀមរាបប៉ុស្ដិ៍»នៅមិនទាន់ទទួលបានការបកស្រាយបំភ្លឺពីអាជ្ញាធរមូលដ្ឋាន និងប្រធានសហគមន៍ បាននៅឡើយទេដោយមិនមានលេខទូរស័ព្ទទំនាក់ទំនង៕SRP

ខេត្តសៀមរាប៖អាជ្ញាធរខេត្តនៅថ្ងៃ​ពុធ​ ទី២៧ ខែតុលា ម្សិលមិញ បាននាំគ្នាដាំកូនឈើប្រណិតចំនួន២ពាន់ដើម លើផ្ទៃដី​​២​ ០២០ហិកតា។

ការដាំនេះនៅក្បែរភ្នំហប់​ ​ ឃុំត្បែង​ ស្រុកបន្ទាយស្រីដោយ«គម្រោង​ជំរុញ​បរិយាកាស​អំណោយ​ផលសម្រាប់ការអភិវឌ្ឍដោយចីរភាព» ក្រោមវត្តមានលោក​ សៅ​ សុភាព​ រដ្ឋលេខាធិការក្រសួងបរិស្ថាន​ និង​លោក​ ង៉ាន់​ ភិរុណ​​ អភិបាលរងខេត្ត​ ដោយមានការចូលរួមពីមន្ត្រីជាច្រើនរូបនិងពលរដ្ឋជាង៣០០នាក់ផងដែរ។

សូមជម្រាបថាកូនឈើដែលត្រូវដាំ​មានចំនួន​ ២​ ០០០ដើម​ ក្នុងនោះមាន​ កូនឈើទាល​,​បេង, គ្រញូង​ និងធ្នង់​ ត្រូវបានរដ្ឋបាលព្រៃឈើ ស្រុកបន្ទាយស្រី មន្ទីរ​បរិស្ថាន​ខេត្ត​ រួមសហការជាមួយខណ្ឌរដ្ឋបាលព្រៃឈើសៀមរាប ដាំតាមព្រំប្រទល់មជ្ឍមណ្ឌលស្រាវជ្រាវ​ និងអភិរក្សកេសរកូល​ សុខ​ អាន​ ​ភ្នំគូលែន​ នៅឧទ្យាជាតិព្រះជ័យវរ្ម័ន​នរោត្តម​ «ភ្នំគូលែន​» ឧទ្យាន​នេះ​មានផ្ទៃដី​ ចំនួន​២​ ០២០ហិកតា។

គួរបញ្ជាក់ផងដែរថា​ ពិធីដាំកូនឈើគ្រប់ប្រភេទឡើងវិញនេះ ​ក្នុងគោលបំណងបំផុសចលនា ដាំដើមឈើគ្រប់ភូមិសាស្ដ្រឲ្យបានច្រើន​ និងអោយប្រជាពលរដ្ឋ ចូលរួមថែរក្សាសម្បត្ដិព្រៃឈើ ជាពិសេស ដើម្បីបណ្តុះគំនិតថែរក្សា ការពារ អភិរក្ស​ គំនិត​ស្រលាញ់ព្រៃឈើ និងបរិស្ថានធម្មជាតិរបស់ប្រទេស៕SRP

ខេត្តសៀមរាប៖លោក គុជ លីណា អនុប្រធានគណៈកម្មាធិការសាខា និងសហការី នៅរសៀលថ្ងៃអង្គារ ថ្ងៃទី២៧ ខែ តុលា ម្សិលមិញ បានជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ចែកជូនដល់ប្រជាពលរដ្ឋ រងគ្រោះដោយជំនន់ទឹកភ្លៀង នៅឃុំជីក្រែង ស្រុកជីក្រែង ចំនួន៥៣គ្រួសារ។

សូមបញ្ជាក់ថាពិធីជួបសំណេះសំណាលនេះធ្វើនៅសាលាឃុំជីក្រែង ក្នុងមួយគ្រួសារទទួលបាន៖ មុង១ ភួយ១ សារុង១ ក្រមា១ អាវយឺត២ កន្ទេល១ ចានស្រាក់១ឈុត សាប៊ូ២ដុំ អង្ករ៣០គីឡូក្រាម មី១កេស ត្រីខ១យួរ ទឹកស៊ីអ៊ី១ដប ទឹកត្រី១ដប ទឹកបរិសុទ្ធ១យួរ ទឹកក្រូច១យួរ និងថវិកា១សែនរៀល៕SRP

ខេត្តព្រះវិហារ៖ខណ:មន្ត្រីនានាកំពុងប្រឹងប្រែងជួយពលរដ្ឋ​ រងគ្រោះដោយសារជំនន់ទឹកភ្លៀង បែជា លោកពេជ្រ ភារុណ មន្ត្រីសាលាស្រុករវៀង មិនខ្វល់ខ្វាយ ជួយពលរដ្ឋនោះទេ បែជាប្រឹងរកស៊ីដឹកជញ្ជូនឈើដោយខុសច្បាប់មិនកោតញញើតអ្វីទាំងអស់។ ប្រការដែលលោក ពេជ្រ ភារុណ រកស៊ីដឹកជញ្ជូនឈើបានដោយសេរីបែបនេះ គេសង្ស័យថាឈ្មួញប្រើស្បែកជាមន្ត្រីរូបនេះ បានគប់គិតគ្នាជាមួយជំនាញពាក់ព័ន្ធមួយចំនួន ជាលក្ខណផលប្រយោជន៍តាមបែបអំពើពុករលួយជាប្រព័ន្ធ។

សេចក្ដីរាយការណ៍ពីខេត្តព្រះវិហារបានឲ្យដឹងថាលោក ពេជ្រ ភារុណ មន្ត្រីសាលាស្រុករវៀងនឹងបក្ខពួកបានធ្វើសកម្មភាពដឹកជញ្ជូនឈើ ចេញយ៉ាងគគ្រឹកគគ្រេង ចេញពីស្រុកជ័យសែន ជារៀងរាល់យប់ដោយ អាងខ្លួនជាមន្រ្តីនៅសាលាស្រុករវៀង ទើបសមត្ថកិច្ចមួយចំនួនមិនហ៊ានបង្ក្រាបបានត្រឹមតែលាបាទដៃ។

សេចក្ដីរាយការណ៍បានបន្តថាជាក់ស្តែងនៅយប់ ទី២៦ខែតុលាឆ្នាំ២០២០វេលាម៉ោង០ជាង៤ទៀបភ្លឺ រថយន្តសាំយ៉ុងណណ៌ស មួយគ្រឿងបានដឹកឈើពេញរថយន្តចេញពី ភូមិស្រែវាល ឃុំធ្មៀរ ស្រុកជ័យសែន ឆ្លងកាត់ស្រុករវៀង ទៅខេត្តកំពង់ធំ បានដោយរលូន បើទោះបីជានៅតាមផ្លូវមានស្នាក់ការរបស់មន្ត្រីជាច្រើនស្ថាប័ន បានដាក់ពង្រាយទប់ស្កាត់បទល្មើសព្រៃឈើយ៉ាងណាក៏ដោយ ក៏រថយន្តដឹកឈើរបស់លោកពេជ្រ ភារុណ មន្ត្រីសាលាស្រុករវៀងនឹងបក្ខពួក អាចដឹកជញ្ជូនបានតាមអំពើចិត្តដោយគ្មានការបង្ក្រាបនោះឡើយ។

មានការលើកឡើងថារថយន្តសាំយ៉ុងដឹកឈើនោះជារបស់លោក ពេជ្រភារុណ អោយ ឈ្មួញឈើម្នាក់ទៀត ឈ្មោះសិទ្ឋ ចេញមុខមើលតាមដងផ្លូវជំនួស នឹងសំអាង ថាលោក ពេជ្រភារុណ បានបិណ្ណបាត ជាមួយជំនាញពាក់ព័ន្ធតាមផ្លូវអស់ហើយ។ ដោយការដឹកជញ្ជូនឈើដោយមិនញញើតចំពោះច្បាប់បន្តិចសោះឡើយ។ ពាក់ព័ន្ធទៅនឹងការដឹកជញ្ជូនឈើរបស់ ពេជ្រ ភារុណ មន្ទីកសិកម្ម និងខណ្ឌរដ្ឋបាលព្រៃឈើព្រះវិហារ បានអោយដឹងថា មិនបានទទួលការបិណ្ណបាត ឬអនុញ្ញាតនោះទេ គឺលោកពេជ្រ ភារុណ រូបនេះ រកស៊ីឈើដោយខ្លួនឯង រួមនឹងបក្ខពួក ផ្សេងទៀត៕SRP

ខេត្ត​កំពង់ចាម​៖ពលរដ្ឋ រងផលប៉ះពាល់ដោយជំនន់ទឹកភ្លៀង ចំនួន​៣៧៨​គ្រួសារ​ មក​ពី​ស្រុក​ស្ទឹងត្រង់​ ​កងមាស​ ​កំពង់សៀម​ និង​ក្រុង​កំពង់ចាម​ ទទួល​បាន​អំណោយ​មនុស្សធម៌​របស់​ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក តាមរយៈ​លោក រិន វិរៈ រដ្ឋលេខាធិការក្រសួងផែនការ​ និង​លោក​ អ៊ុន​ ចាន់ដា​ អភិបាលខេត្តកំពង់ចាម និងលោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​។ ការចែកនេះធ្វើឡើងនៅមុខសាលាខេត្ត នារសៀល​ថ្ងៃ​ទី​២៧​ ខែតុលា​ ឆ្នាំ​២០២០​នេះ។

លោក អ៊ុន ចាន់ដា បានថ្លែងនូវអំណគុណ ចំពោះ លោក ហ៊ុនម៉ាណែត ដែលបានគិតគូអំពីសុខទុក្ខ របស់ប្រជាពលរដ្ឋ ដែលទទួលរងផលប៉ះពាល់ ដោយសារជំនន់ទឹកភ្លៀង ហើយបានចាត់តាំងតំណាង នាំយកអំណោយមនុស្សធម៌ របស់លោក ផ្ដល់ជូនដល់ដៃ របស់បងប្អូនប្រជាពលរដ្ឋ​ ៣៧៨គ្រួសារ​ នាពេលនេះ ។ ជាមួយ​គ្នា​នោះ​លោក​អភិបាលខេត្ត​ ក៏បានណែនាំដល់មន្ទីរ-អង្គភាពពាក់ព័ន្ធ ចុះធ្វើការវាយតម្លៃផលប៉ះពាល់ និងតម្រូវការចាំបាច់ របស់ប្រជាពលរដ្ឋដែលទទួលរងផលប៉ះពាល់ ដើម្បី រៀបចំការស្តារឡើងវិញបន្ទាន់ នូវហេដ្ឋារចនាសម្ព័ន្ធ និងការបង្កបង្កើនផល ដែលទទួលរងការខូចខាត ក្នុងអំឡុងពេលជំនន់ទឹកភ្លៀងផងដែរ។

លោក រិន វិរៈ សមាជិកអចិន្ត្រៃយ៍យុវជនគណបក្សថ្នាក់កណ្តាល បាន​ថ្លែង​ថា ឆ្នាំនេះ ប្រទេសកម្ពុជា មានគ្រោះដល់ទៅ២ គឺ ៖ ទី១.គ្រោះជម្ងឺកូវីដ១៩ និងទី២.គ្រោះដោយជំនន់ទឹកភ្លៀង ទោះជា​យ៉ាងណា​ក្រោមការដឹកនាំដ៏ឆ្លៀសវៃ របស់សម្ដេចតេជោ ហ៊ុន សែន ជានាយករដ្ឋមន្ត្រី បានខិតខំប្រឹងប្រែងបង្កាទប់ស្កាត់ជម្ងឺដ៏កាចសាហាវមួយនេះ មិនឲ្យឆ្លងចូលក្នុងសហគមន៍​នោះឡើយ​ ។ ដោយឡែក​ បច្ចុប្បន្ន​នេះ​ យើងកំពុងទទួលរងផលប៉ះពាល់ ដោយគ្រោះទឹកជំនន់ ដែលកន្លងមក ប្រមុខដឹកនាំកម្ពុជា ក៏បានចុះចែកដោយផ្ទាល់ដល់ប្រជាពលរដ្ឋរងគ្រោះ នៅតាមបណ្ដាខេត្តមួយចំនួន រួចមកហើយ ។

គួរបញ្ចាក់ថា អំណោយរបស់លោក ហ៊ុន ម៉ាណែត និងលោកស្រី ចែកជូនប្រជាពលរដ្ឋ ៣៧៨គ្រួសារ ក្នុងមួយគ្រួសារៗ ទទួលបានអង្ករ ២៥គីឡូ មី ១កេស ទឹកស៊ីអ៊ីវ ១យួរ ទឹកត្រី ១យួរ ទឹកសុទ្ធ ១កេស សាប៊ូ ១កញ្ចប់ និងថវិកាចំនួន ៤០.០០០រៀល ផងដែរ៕SRP

ខេត្តព្រះវិហារ៖យ៉ាងហោចណាស់មនុស្ស ១៧ នាក់ រងរបួសធ្ងន់ស្រាល និងស្លាប់ម្នាក់ ដោយគ្រោះថ្នាក់ចរាចរណ៍ក្រឡាប់រថយន្ត។

ហេតុការណ៍បានកើតឡើងនៅរសៀលថ្ងៃទី២៧ ខែតុលា ឆ្នាំ២០២០នេះ តាមផ្លូវជាតិលេខ៦២ ចន្លោះគីឡូមែត្រលេខ៤៨ ៊៊_៤៩ត្រង់ចំណុចចំការកៅស៊ូ ភូមិអូពោធិ៍ ឃុំរមណីយ៍ ស្រុករវៀង ខេត្តព្រះវិហារ។

សមត្ថកិច្ចបានឲ្យដឹងថារថយន្តជួបហេតុការណ៍ខាងលើ ម៉ាកស្តារិចពណ៌សពាក់ស្លាកកំពង់ឆ្នាំង 2C- 3339 ដឹកអ្នកដំណើរ ១៨នាក់ ទិសដៅពីជើងទៅត្បូង បានក្រឡាប់ដោយខ្លួនឯង។ ក្រោយកើតហេតុអ្នករងរបួសត្រូវបានរថយន្តដឹកយកទៅសង្គ្រោះនៅមន្ទីរពេទ្យបង្អែកខេត្តកំពង់ធំ។ ចំណែកតៃកុងរថយន្ដបានរត់គេចខ្លួនបាត់។

សមត្ថកិច្ចបានដឹងថាអ្នកធ្វើដំណើរទាំង ១៨នាក់ អ្នកនៅខេត្តកំពង់ឆ្នាំង។ ករណីនេះដោយសារតែកុងបើកបរក្នុងស្ថានភាព ងងុយដេក។ បើតាមសមត្ថកិច្ចថានៅក្នុងរថយន្តគ្រោះថ្នាក់នេះក៏ឃើញមាន ត្រីមួយចំនួន អាចពួកគាត់ទើបត្រឡប់មកពីរកត្រីនៅខេត្តស្ទឹងត្រែង៕SRP

ខេត្តសៀមរាប៖យោធិនពិការ និងពលរដ្ឋចំនួន ៥៣១គ្រួសារ រស់នៅក្នុងមជ្ឈមណ្ឌលអភិវឌ្ឍន៍យោធិនពិការគូលែន ៣១៧ ទទួលបានប័ណ្ណកម្មសិទ្ធិដីធ្លី ពីអាជ្ញាធរនៅថ្ងៃអង្គារទី២៧ ខែតុលា ព្រឹកមិញនេះ។

ការប្រគល់វិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធិ)នេះ ស្ថិតនៅភូមិស្នារតេជោ ឃុំបល្ល័ង្គ ស្រុកប្រាសាទបាគង ខេត្តសៀមរាប ក្រោមវត្តមានលោកមាស សាវ៉ន អគ្គនាយក នៃអគ្គនាយកដ្ឋានយុទ្ធសេវា ក្រសួងការពារជាតិ និងមានការចូលរួម ពីលោក លី សំរិទ្ធ អភិបាលរងខេត្ត។

លោក លី សំរិទ្ធ បានសម្តែងនូវការសាទរចំពោះយោធិនពិការ និងពលរដ្ឋ ក្នុងភូមិស្នារតេជោ ទាំងអស់ ដែលទទួលបានវិញ្ញបនបត្រសម្គាល់ម្ចាស់អចលនវត្ថុ នាពេលនេះ ដែលបងប្អូននឹងក្លាយជាកម្មសិទ្ធិករដ៏ពេញលេញ និងមិនអាចមានអ្នកណាមករំលោភបានឡើយ។ បងប្អូនអាចយកទៅប្រើប្រាស់តាមតម្រូវការតាមការចាំបាច់បាន។

លោក មាស សាវ៉ន បានមានប្រសាសន៍ថា សមិទ្ធផលដែល យោធិនពិការ និងពលរដ្ឋ ទទួលបានប័ណ្ណកម្មសិទ្ធិ នាពេលនេះ គឺជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី និងភរិយា ដែលតែងតែយកចិត្តទុកដាក់ខ្ពស់ អំពីសុខទុក្ខ របស់ យោធិនពិការ និងពលរដ្ឋ ដែលសម្តេចបានបង្កើតភូមិស្នារតេជោ និងបានបែងចែកដី និងសង់លំនៅដ្ឋានសម្រាប់ជូនដល់យោធិនពិការ ដែលជាការឆ្លុះបញ្ចាំងពីការដឹងគុណនូវវីរភាពរបស់បងប្អូន ឲ្យមានលំនៅដ្ឋានសមរម្យ និងមានដីសម្រាប់ដាំដុះដំណាំផ្សេងៗ ដែលបងប្អូន អាចប្រក មុខរបរដាំដំណាំ និងចិញ្ចិមសត្វ ដើម្បីលើកកម្ពស់ជីវភាពរស់នៅ ឱ្យកាន់តែប្រសើរឡើងថែមទៀត។

សុំបញ្ជាក់ថា តាមរយៈគណៈកម្មការ រដ្ឋបាលបានបញ្ចប់សព្វគ្រប់នូវនីតិវិធីនៃការចុះបញ្ជីដីមានលក្ខណៈជាប្រពន្ធ លើក្បាលដីចំនួន ៥៣១ក្បាលដី ក្នុងចំណោមក្បាលដីសរុប ៥៥១ក្បាលដី ដែលក្នុងនោះម្ចាស់ក្បាលដីទាំង២០ក្បាលដីទៀត មិនបានចូលរួមផ្តល់ទិន្នន័យក្នុងការចុះវាស់វែង៕SRP

ខេត្តឧត្ដរមានជ័យ៖សមត្ថកិច្ចបានឃាត់ខ្លួនកូនបង្កើតម្នាក់ក្រោយពីបានធ្វើសកម្មភាពយកដំបងឈើវាយឪពុកបង្កើតបណ្ដាលឲ្យរងរបួសធ្ងន់។

ការឃាត់ខ្លួនធ្វើឡើងនៅព្រឹកថ្ងៃទី ២៧ ខែ តុលា​​​ នេះ នៅភូមិគោកកី ឃុំបេង ស្រុកបន្ទាយអំពិល ដោយនគរបាលស្រុកបន្ទាយអំពិល។
សមត្ថកិច្ចបានឲ្យដឹងថាករណីហិង្សាដោយចេតនា មានស្ថានទំម្ងន់ទោស ប្រព្រឹត្តកាលវេលាម៉ោង ១៩និង០០ នាទី ថ្ងៃទី ២៦ ខែ តុលា ឆ្នាំ ២០២០ នៅភូមិគោកកី ឃុំបេង ស្រុកបន្ទាយអំពិល បង្កឡើងដោយជនសង្ស័យឈ្មោះ ធៀន ផល ភេទប្រុស អាយុ ៣៣ ឆ្នាំ បានយកដំបងឈើប្រវែង ៧១សងទីម៉ែត្រ វាយទៅលើជនរងគ្រោះ ឈ្មោះ ដុក ធៀន ភេទប្រុស អាយុ៦៨ឆ្នាំ រស់នៅភូមិកើតហេតុខាងលើ (ត្រូវជាឱពុកបង្កើត) បណ្តាលអោយរងរបួស ចញ្ចើម ចំនួន ០៣ កន្លែង។ មូលហេតុ ខឹងនិងឪពុកមិនធ្វើម្ហូប។
សមត្ថកិច្ចបានបញ្ជាក់ថាបន្ទាប់ពីមានហេតុការណ៍នេះ លោកស្នងការន គរបាលខេត្ត បានចាត់អោយអធិការស្រុក នាំជនរងគ្រោះ ទៅមន្ទីរពេទ្យនិងបានប្រគល់ថវិកាមួយចំនួនដល់ជនរងគ្រោះ។
ដោយឡែកជនដៃដល់ ត្រូវសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់៕SRP

ខេត្តកំពង់ចាម​៖ថ្លែងនៅក្នុងកិច្ចប្រជុំ បូកសរុបការងាររយៈពេល ៩ខែ និងលើកទិសដៅការងារ ត្រីមាសទី៤ ឆ្នាំ២០២០ របស់គណៈបញ្ជាការឯកភាពរដ្ឋបាលខេត្ត នាព្រឹកថ្ងៃទី២៧ ខែតុលា ឆ្នាំ២០២០នេះ លោក​ អ៊ុន ចាន់ដា​ អភិបាលខេត្តកំពង់ចាម បានណែនាំដល់ក្រុមមន្ត្រីឲ្យ បន្តការតាមដានអំពីស្ថានភាពអាកាសធាតុ និងត្រៀមលក្ខណៈរៀបចំស្បៀង និងសម្ភារៈ សម្រាប់ឆ្លើយតប និងអន្តរាគមន៍ ដល់ប្រជាពលរដ្ឋ ដែលរងគ្រោះដោយធម្មជាតិ ជាពិសេស​ត្រូវ​​ចុះពិនិត្យ​និង​វាយតម្លៃផលប៉ះពាល់ ដើម្បី​រៀបចំការស្តារឡើងវិញ នូវហេដ្ឋារចនាសម្ព័ន្ធ ដែលទទួលរងការខូចខាត ក្នុងអំឡុងពេលជំនន់ទឹកភ្លៀង។

ថ្លែង​ក្នុង​កិច្ច​ប្រជុំ​នោះ​ដែរ​ លោក​ អ៊ុន​ ចាន់ដា​ បានថ្លែងនូវការកោតសរសើរ ចំពោះមន្ត្រីទាំងអស់ដែលបានខិតខំ បំពេញការងារ សម្រេចបាននូវលទ្ធផលជាបន្តបន្ទាប់ ទាំងវិស័យសន្តិសុខសណ្ដាប់ធ្នាប់សាធារណៈ រក្សាបាននូវស្ថេរភាពនយោបាយ ដែលបានចូលរួមចំណែក ជាមួយរាជរដ្ឋាភិបាល ក្នុងការដោះស្រាយបញ្ហាមួយចំនួន ជាពិសេសការដោះស្រាយនូវទុក្ខកង្វល់ របស់ប្រជាពលរដ្ឋ ពាក់ព័ន្ធទៅនឹងបញ្ហាជំនន់ទឹកភ្លៀង ដែលបានធ្វើឲ្យខូចខាតដល់ហេដ្ឋារចនាសម្ព័ន្ធ និងប៉ះពាល់ដល់ការងារបង្កបង្កើនផល ក្នុងរយៈពេលប៉ុន្មានខែកន្លងមក​នេះ។​

តាមបាយការណ៍ ស្តីពីសន្តិសុខ សណ្តាប់ធ្នាប់ រយៈពេល ៩ខែ ឆ្នាំ២០២០​នេះ​ បទល្មើសព្រហ្មទណ្ឌ មានចំនួន៣៥លើក (ធៀបឆ្នាំ២០១៩ ថយថុះ១២លើក) ។ បង្ក្រាបបាន​ ចំនួន៣៤ករណី ឃាត់ខ្លួន៥៨នាក់ (ថយចុះ១០ករណី) ។ ចំពោះ​ករណីល្បែងស៊ីសងខុសច្បាប់ ៧៧ករណី ឃាត់ខ្លួន២០៩នាក់​ និង​ករណីជួញដូរគ្រឿងញៀន ២៣៧ករណី ឃាត់ខ្លួន៨៨៦នាក់ ក្នុង​នោះ​ករណីប្រើប្រាស់គ្រឿនញៀន ៥៣ករណី ព្រមទាំង​ឃាត់ខ្លួន២០៧នាក់។ ដោយឡែក​ករណី​គ្រោះថ្នាក់ ចរាចរកើតឡើង ចំនួន១៣៤លើក ស្លាប់មនុស្ស ៧១នាក់ របួស ១៩១នាក់ និងគ្រោះថ្នាក់ផ្សេងៗ កើតទ្បើង​ចំនួន​២៧៤លើក​ផង​ដែរ​៕SRP

ខេត្តស្ទឹងត្រែង៖អ្នកសារព័ត៌មានចំនួនពីរ រូប បានរង់ការគំរាមកំហែង និងឆក់យកទូរស័ព្ទដៃរបស់ពួកគេ ដើម្បីបំបាត់ភស្តុតាង ពីសំណាក់ក្រុមអ្នកលេងល្បែងស៊ីសង ខណៈពួកគេចូលទៅថត។

ជនរងគ្រោះទី១ឈ្មោះ ជា ទូច អាយុ៣៥ឆ្នាំ ចាងហ្វាងគេហទំព័រ ភ្នែកម្នាស់PNM ដែលមានទីលំនៅឃុំទឹកថ្លា ស្រុកស្វាយអន្ទរ ខេត្តព្រៃវែងរបួសស្រាល បាត់បង់ទូរស័ព្ទ៣គ្រឿង

ទី២ឈ្មោះ វុធ សុភ័ក្រ អាយុ៣៣ឆ្នាំភ្នាក់ងារព័ត៌មាន កូនខ្មែរម្ចាស់ប្រទេស មានទីលំនៅឃុំអូរគ្រឿង ស្រុកសំបូរ ខេត្តក្រចេះ របួសធ្ងន់បាត់បង់ទូរស័ព្ទដៃ១គ្រឿង។

ជនរងគ្រោះបានប្រាប់ឲ្យដឹងថា ក្រោយកើតហេតុរូបគេ បានបើករថយន្តទៅប្ដឹង នៅសមត្ថកិច្ចពាក់ព័ន្ធ ប៉ុន្តែគ្មាននរណាអើពើទទួលបណ្ដឹងឬរកដំណោះស្រាយអោយនោះទេដោយដេញពីមួយទៅមួយ។

ជនរងគ្រោះថា ក្រោយពួកខ្លួនត្រូវក្រុមអ្នកញៀនល្បែង វាយប្លន់យកទូរស័ព្ទ បានមកដាក់ពាក្យបណ្ដឹង នៅស្នងការខេត្តស្ទឹងត្រែង ភ្លាមៗ កាលពីរសៀលថ្ងៃទី២៥ខែតុលាឆ្នាំ២០២០ ប៉ុន្តែពុំមានអ្នកទទួលបណ្ដឹងឡើយ ដោយមន្ត្រីនៅទីនោះ ដេញអោយទៅប្ដឹងនៅអធិការនគរបាលក្រុងស្ទឹងត្រែង។ ពេលមកដល់កន្លែងអធិការ គឺពុំមានអ្នកទទួលបណ្ដឹងទៀត ដោយគេតម្រូវអោយទៅប្ដឹងនៅកន្លែងអាវុធហត្ថវិញ។

លោកបន្តថាពួកខ្លួនក៏ បានមកប្ដឹងនៅទី បញ្ជាការកងរាជអាវុធហត្ថខេត្តស្ទឹងត្រែងទៀត ស្រាប់តែមន្ត្រីនៅទីនោះ ដេញអោយទៅប្ដឹង នៅទីបញ្ជាការកងរាជអាវុធហត្ថក្រុងស្ទឹងត្រែងវិញ។
នៅពេលមកដល់អាវុធហត្ថក្រុងស្ទឹងត្រែង បែរជាគ្មានមនុស្សនៅ ដោយមន្ត្រីទាំងនោះ គេចពីពួកខ្លួនដែលមកប្ដឹង…!។

លោកបានបញ្ជាក់ថាដោយសារតែទៅប្ដឹង កន្លែងសមត្ថកិច្ច៤កន្លែងហើយ មិនមានអ្នកទទួលបណ្ដឹង ទើបនៅរសៀលថ្ងៃទី២៦ខែតុលាឆ្នាំ២០២០ ពួកខ្លួន សម្រេច មកដាក់ពាក្យប្ដឹង នៅអយ្យការអមសាលាដំបូងខេត្តស្ទឹងត្រែង ដោយទាមទារសំណងជំងឺចិត្តចំនួន៤ម៉ឺនដុល្លារ។

ជនរងគ្រោះបានបញ្ជាក់ថា ទីតាំងបនល្បែងដ៏ធំនោះ ស្ថិតនៅជិតផ្លូវបំបែកគីឡូ៤ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង បានបើកលេងជាប្រចាំ មិនទាន់មាន សមត្ថកិច្ចណាចុះបង្ក្រាបនៅឡើយទេ ដែលមានម្ចាស់សង្វៀនឈ្មោះ តៃ ប៊ុងគួង ហៅកង ភេទប្រុសអាយុ៤៩ឆ្នាំ មានទីលំនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង។

បើតាមជនរងគ្រោះបានឲ្យដឹងថា ពួកគេបានខ្លួនចូលទៅដល់ជិត វង់បនល្បែងនោះ បណ្ដាលឱ្យម្ចាស់ទីតាំងនិងក្រុមអ្នកញៀនល្បែងខឹងក៏ នាំគ្នាកាន់ដំបងមែកស្វាយចន្ទី មកព្រួតគ្នាវាយដំ នឹងឆក់យកទូរស័ព្ទតែម្ដង។

ពាក់ព័ន្ធករណីនេះ លោក ឈូក កុម៉ល់ អធិការក្រុងស្ទឹងត្រែង បានប្រាប់អ្នកសារព័ត៌មាន ថា៖ មិនមែន មិនទទួលបណ្ដឹងទេ គឺពួកគាត់មកប្ដឹង ចំពេលកឋិន របស់ឯកឧត្ដមអភិបាលខេត្ត កំលាំងចេញទៅត្រៀមការពារ ហើយពួកគាត់ថា ទៅពេទ្យសិនចាំព្រឹកបានមកប្ដឹងម្ដងទៀត ហើយក៏បាត់រហូតពេលនេះ មិនឃើញមកប្ដឹង។

ទោះជាយ៉ាងណា ជនរងគ្រោះ សង្ឃឹមថាតុលាការខេត្តស្ទឹងត្រែង នឹងបើកការស្រាវជ្រាវ ឈានដល់ចាប់ខ្លួនក្រុមជនដៃដល់ជាក់ជាមិនខាន៕SRP

ខេត្តសៀមរាប៖ក្រុមមន្ត្រីនៅរសៀលទី២៦ ខែតុលា ម្សិលមិញបានបើក សិក្ខាសាលា ផ្សព្វផ្សាយលទ្ធផល ការសិក្សាវាយតម្លៃហេតុប៉ះពាល់បរិស្ថាន និងសង្គមពេញលេញ (វ.ហ.ប.ស.ព) លើគម្រោងសាងសង់ផ្លូវជាតិតភ្ជាប់បាត់ដំបង-សៀមរាប ប្រវែង ៧២,១៥៤គីឡូម៉ែត្រ ស្ថិតក្នុងខេត្តបាត់ដំបង ខេត្តបន្ទាយមានជ័យ
និងខេត្តសៀមរាប របស់ក្រសួងសាធារណការ និងដឹកជញ្ជូន សហការជាមួយក្រុមហ៊ុន CHINA ROAD AND BRIDGE CORPORATION។

កិច្ចប្រជុំនេះធ្វើនៅសាលាខេត្តសៀមរាប
ក្រោមការដឹករបស់លោក ង៉ាន់ ភិរុណ អភិបាលរងខេត្ត ដោយមានការចូលរួមពីមន្ត្រីពាក់ព័ន្ធនានាផងដែរ។

អាជ្ញាធរខេត្តសៀមរាបបានឲ្យដឹងថាកិច្ចប្រជុំនេះ បានឯកភាពគ្នានូវចំណុចមួយចំនួនដូចខាងក្រោម៖
១-រដ្ឋបាលខេត្ត មន្ទីរ-អង្គភាព និងរដ្ឋបាលស្រុកពាក់ព័ន្ធ ឯកភាព និងសូមគាំទ្រចំពោះគម្រោងសាងសង់ផ្លូវជាតិតភ្ជាប់បាត់ដំបង-សៀមរាប ប្រវែង ៧២,១៥៤គីឡូម៉ែត្រ ស្ថិតក្នុងខេត្តបាត់ដំបង ខេត្តបន្ទាយមានជ័យ និងខេត្តសៀមរាប របស់ក្រសួងសាធារណការ និងដឹកជញ្ជូន សហការជាមួយក្រុមហ៊ុន CHINA ROND AND DRIDGE CORPORATION។
២-ក្រុមហ៊ុន PPIC ត្រូវរៀបចំនិងបញ្ជូលនូវធាតុចូលទាំងអស់ដែលនៅក្នុងអង្គប្រជុំបានលើកឡើង ដើម្បីអាចបន្តនីតិវិធីប្រជុំនៅក្រសួងបរិស្ថាន និងកិច្ចប្រជុំអន្តរក្រសួងដែលរៀបចំដោយក្រសួងបរិស្ថាន។
៣-ស្នើសុំអោយម្ចាស់គម្រោង និងក្រុមហ៊ុន CHINA ROND AND DRIDGE CORPORATION ធ្វើការពិចារណារាល់មតិយោបល់ និងសំណូមពររាល់ធាតុចូលដែលលើកឡើងក្នុងអង្គប្រជុំទាំងមូល៕SRP