ខេត្តបន្ទាយមានជ័យ

ខេត្តបន្ទាយមានជ័យ៖ពិតជាខ្លាំង និងមិនធម្មតាមែន ! លោក ឈឿន ក្រៃយ៉ុង អភិបាលរងខេត្តបន្ទាយមានជ័យ និងលោកសាំង គង់ មន្ត្រីទីចាត់ការវិនិយោគខេត្ត តំណាងឲ្យ ក្រុមហ៊ុន គង់ មាន បានគម្រាមកំហែង អ្នកសារព័ត៌មាន មិនឲ្យផ្សាយព័ត៌មានពីបាតុភាពមិនប្រក្រតី ដែលប្រជាពលរដ្ឋ តវ៉ា និងការប៉ះទង្គិចគ្នាជាមួយនឹងក្រុមហ៊ុន គង់ មាន ទៅចាប់ដីភ្នំដូងព្រះនៅក្រុងសិរីសោភ័ណ។

ការផ្ទុះការតវ៉ារបស់ប្រជាពលរដ្ឋ បានកើតឡើងបន្ទាប់ពីមន្ត្រីថ្នាក់ដឹកនាំ រដ្ឋបាលខេត្តបន្ទាយមានជ័យ រដ្ឋបាលក្រុងសិរីសោភ័ណ មន្ទីរបរិស្ថានខេត្ត មន្ទីររ៉ែនិងថាមពលខេត្ត មន្ទីររៀបចំដែនដី នគរូបនីយ៍សំណង និងសុរិយោដីខេត្ត ក្រុង និងមន្ត្រីពាក់ព័ន្ធជាច្រើននាក់ទៀត បានទៅពេលវាស់វែងចំណុចដីភ្នំដូងព្រះ ដើម្បីយកទៅឲ្យក្រុមហ៊ុន គង់ មាន របស់លោកសាំង គង់ ។

មន្ត្រីសាលាខេត្តបន្ទាយមានជ័យបានឲ្យដឹងថា លោក ឈឿន ក្រៃយ៉ុង អភិបាលរងខេត្តបន្ទាយមានជ័យ បានដឹកនាំប្រធាន អនុប្រធានមន្ទីរបរិស្ថានខេត្ត មន្ទីររ៉ែនិងថាមពលខេត្ត មន្ត្រីសូរិយោដីខេត្ត អភិបាលរង នៃរដ្ឋបាលសាលាក្រុងសិរីសោភ័ណ និងមន្ត្រីពាក់ព័ន្ធជាច្រើននាក់ទៀត រួមនឹងលោកសាំង គង់ មន្ត្រីទីចាត់ការវិនិយោគខេត្ត កាលពីថ្ងៃទី២៨-២៩ ខែវិច្ឆិកា ឆ្នាំ២០២២ បាននាំគ្នាឡើងទៅវាស់វែងដីជើងភ្នំ ចង្កេះភ្នំនៃភ្នំដូងព្រះ ឲ្យបានត្រឹមត្រូវដើម្បីប្រគល់ទៅឲ្យក្រុមហ៊ុន គង់ មាន យកទៅវិនិយោគជារមណីយដ្ឋានទេសចរណ៍។ ប៉ុន្តែសកម្មភាពនេះ បានធ្វើឲ្យប្រជាពលរដ្ឋ មានព្រួយបារម្ភ និងបាននាំគ្នាជំទាស់ប្រឆាំងតវ៉ា។

ប្រជាពលរដ្ឋបានអះអាងថា ក្រុមហ៊ុន គង់ មាន បានបង្កផលប៉ះពាល់និងរំលោភយកដីភោគ:របស់ពួកគាត់។ ចំណែកអ្នកសារព័ត៌មាន ដែលបានចុះទៅយកព័ត៌មាន នៅកន្លែងកើតហេតុ ត្រូវបានលោក ឈឿន ក្រៃយ៉ុង អភិបាលរងខេត្តបន្ទាយមានជ័យ និងលោកសាំង គង់ មន្ត្រីទីចាត់ការវិនិយោគខេត្ត តំណាងឲ្យក្រុមហ៊ុន គង់ មាន គំរាមកំហែង និងហាមឃាត់មិនឲ្យផ្សាយព័ត៌មាន ទាក់ទងបាតុកម្ម មិនប្រក្រតីនិងការតវ៉ារបស់ប្រជាពលរដ្ឋ។

លោក សាំង គង់ បានគម្រាមកំហែងអ្នកសារព័ត៌មានថា បើថតរូបនិងធ្វើការផ្សព្វផ្សាយព័ត៌មាននេះ នឹងមានបញ្ហា។ ឯលោកឈឿន ក្រៃយ៉ុង អភិបាលរងខេត្តបន្ទាយមានជ័យ បានដាក់សម្ពាធដល់អ្នកសារព័ត៌មាន មិនឲ្យផ្សាយព័ត៌មាន អំពីបាតុភាពមិនប្រក្រតី ដែលប្រជាពលរដ្ឋតវ៉ា ជាមួយនឹងក្រុមហ៊ុន គង់ មាន នោះទេ។ ដោយលោកបានអះអាងថា រដ្ឋបាលខេត្តបន្ទាយមានជ័យ បានអនុញ្ញាត ឬសម្រេចប្រគល់ដីភ្នំដូងព្រះ អោយក្រុមហ៊ុន គង់ មាន ធ្វើការអភិវឌ្ឍន៍ជារីសត។ ហើយករណី ដែលមានប្រជាពលរដ្ឋតវ៉ាថា ប៉ះពាល់និងរំលោភយកដីពួកគាត់ អាជ្ញាធរនិងជំនាញនឹងពិនិត្យ ផ្ទៀងផ្ទាត់ ហើយដោះស្រាយជាក្រោយ។

ប្រជាពលរដ្ឋជាច្រើនគ្រួសារ នៅជាប់ជើងភ្នំដូងព្រះក្នុងសង្កាត់អូរអំបិល និងក្នុងសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ កាលពីថ្ងៃទី២៨ ខែវិច្ឆិកា ឆ្នាំ២០២២ បាននាំគ្នាតវ៉ាជាមួយនឹងក្រុមហ៊ុន គង់ មាន ដែលបានឡើងទៅចាប់ដីភ្នំដូងព្រះ។ ពូកគាត់កាន់កាប់ដីនៅជើងនិងចង្កេះភ្នំដូងព្រះ ហើយត្រូវបានក្រុមហ៊ុន គង់ មាន ជីកចូកកាយ ចាក់លុបប៉ះពាល់រំលោភយកដី របស់ពួកគាត់។

ប្រជាពលរដ្ឋបានបញ្ជាក់ថា ដីតំបន់ភ្នំដូងព្រះនេះ កាលពីជំនាន់លោកសួន បវរ ជាអភិបាលខេត្តបន្ទាយមានជ័យ ដែលបានគ្រោងយកទីតាំដីភ្នំព្រះនេះទំហំជាង ២០ហិកតា សំរាប់គម្រោងសាងសង់ស្តាត ដោយរដ្ឋបាលខេត្ត បានប្រគល់អោយក្រុមហ៊ុនអ៊ី អិល អេច(ELH ) របស់លោក តាន់ គឹមហួត ធ្វើជាដៃគូអភិវឌ្ឍន៍ ដោយត្រួសត្រាយកាយពង្រាបភ្នំនិងចូកកាយដឹកដីចេញយកទៅលក់។ ប៉ុន្តែក្រៅពីកាយពង្រាប ចូលជីកដឹកដីរាប់រយពាន់ឡានលក់រួចហើយ គម្រោងសាងសង់ស្តាតខេត្ត អគារលេខាធិការដ្ឋាននៃគណ:កម្មាធិការខេត្តរៀបចំការបោះឆ្នោត ការសាងសង់មជ្ឈមណ្ឌលរដ្ឋបាលកីឡា អន្តេវាសិក ឬក្រុងរណបរផងនោះ បានក្ស័យធន៕SRP

ខេត្តបន្ទាយមានជ័យ៖មន្ត្រីជាន់ខ្ពស់ អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ បានឲ្យអ្នកសារព័ត៌មាន ដឹងថាថ្នាក់លើបាន រកឃើញមានចំណុចខ្វះខាតមួយចំនួន របស់ស្នងការដ្ឋាន នគរបាលខេត្តបន្ទាយមានជ័យ ពាក់ព័ន្ធការងារគ្រប់គ្រងហិរញ្ញវត្ថុ ខ្វះខាតក្នុងការរៀបចំ សៀវភៅបញ្ជីចំណូល ការចំណាយថវិកា ភូមិ-ឃុំ សង្កាត់ មានសុវត្ថិភាព និងការងារ គ្រប់គ្រងបញ្ជីសារពើភណ្ឌទ្រព្យសម្បតិ្តរដ្ឋ មិនទាន់គ្រប់ជ្រុងជ្រោយ នៅឡើយ។

អគ្គនាយករង នៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ លោកឧត្តមសេនីយ៍ឯក សុខ សារ៉េត បានបញ្ជាក់ថា៖ ស្នងការដ្ឋាននគរបាល ខេត្តបន្ទាយមានជ័យ បានធ្វើពិធីបិទសវនាកម្មផ្ទៃក្នុង សម្រាប់ការិយបរិច្ឆេទឆ្នាំ២០២១ និងបណ្តាឆ្នាំពាក់ព័ន្ធ ស្របតាមផែនការ សកម្មភាព របស់ អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ក្រោយពីធ្វើកិច្ចសវនកម្ម អស់រយៈពេល ៦ថ្ងៃ ចាប់ពីថ្ងៃទី២៥ ដល់ថ្ងៃទី៣០ ខែកក្កដា ឆ្នាំ២០២២កន្លងមក រកឃើញមាន ៣ ចំណុច ដែលខ្វះខាត៖
១-ការងារគ្រប់គ្រងធនធានមនុស្ស អនុវត្តមិនទាន់បានពេញលេញ តាមនីតិវិធីរដ្ឋបាល នៅឡើយ ។ ចំពោះប្រព័ន្ធលើកទឹកចិត្តមានភាពប្រសើរ ។
២-ការងារគ្រប់គ្រងហិរញ្ញវត្ថុ ខ្វះខាតតិចតួច ក្នុងការរៀបចំសៀវភៅបញ្ជីចំណូល ចំណាយថវិកា ភូមិ-ឃុំ សង្កាត់ មានសុវត្ថិភាព តែការគ្រប់គ្រងបើកផ្តល់ប្រេងឥន្ធនៈ និងទូទាត់តាមសញ្ញាចំណាយផ្សេងៗ បានត្រឹមត្រូវតាមនីតិវី ។
៣-ការងារគ្រប់គ្រងបញ្ជីសារពើភណ្ឌទ្រព្យសម្បតិ្តរដ្ឋ(ចលន អចលនភាពវត្ថុ) មិនទាន់គ្រប់ជ្រុងជ្រោយ នៅឡើយ។

លោកឧត្តមសេនីយ៍ឯក សុខ សារ៉េត បានបញ្ជាក់ទៀតថា៖ រាល់កំហុសឆ្គងដែលក្រុម ការងារ រកឃើញនោះ គឺដើម្បីជាការកែលម្អ សម្រាប់ទៅឆ្នាំក្រោយទៀត ឲ្យកាន់តែ មានភាពល្អប្រសើរ នៃការចងក្រងឯកសារ ដែលពាក់ព័ន្ធ។

សូមជម្រាបថា នៅស្នងការដ្ឋាននគរបាល ខេត្តបន្ទាយមានជ័យ បានរៀបចំពិធីបិទ សវនកម្មផ្ទៃក្នុង សម្រាប់ការបរិច្ឆេទ ឆ្នាំ២០២១ និងបណ្តាឆ្នាំពាក់ព័ន្ធ ក្រោមអធិបតីភាព លោកឧត្តមសេនីយ៍ឯក សុខ សារ៉េត អគ្គនាយករង នៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ និងមានការចូលរួមពី លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ លោក-លោកស្រី ឧត្តមសេនីយ៍ វរសេនីយ៍ ស្នងការរង នាយការិយាល័យ លោកអធិការនគរនបាលក្រុង ស្រុក ទាំង ៩ លោកមេបញ្ជាការ វរសេនាតូចការពារព្រំដែនគោក ទាំង៤ កាលពីថ្ងៃទី២៨ ខែតុលា ឆ្នាំ២០២២ កន្លងមកនេះ។

លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ បានធ្វើ សេចក្តីរាយការណ៍ថា៖ ខេត្តបន្ទាយមានជ័យ មានខ្សែបន្ទាត់ព្រំដែន ជាប់នឹងប្រទេសថៃ ប្រវែង ១៥៣ គីឡូម៉ែត្រ ព្រំប្រទល់ខាងជើង ជាប់ខេត្តឧត្តរមានជ័យ ខាងត្បូងជាប់ ខេត្តបាត់ដំបង ខាងកើតជាប់នឹងខេត្តសៀមរាប ខាងលិចជាប់នឹងប្រទេសថៃ មានស្រុក ចំនួន ៤ ក្រុង១ ជាប់នឹងប្រទេសថៃ និងមានច្រកទ្វារអន្តរជាតិ១ គឺច្រកប៉ោយប៉ែត និងច្រកទ្វារតំបន់ ២ គឺច្រកម៉ាឡៃ និងច្រកតំបន់បឹងត្រកួន។

លោកឧត្តមសេនីយ៍ទោ សិទ្ធិ ឡោះ បានបញ្ជាក់ថា៖ ទោះបីក្នុងបរិបទនៃការរាតត្បាត ជំងឺកូវីដ-១៩ ក៏មិនអាចបង្កនូវវិទ្ធង្សនា ដល់កិច្ចប្រតិបត្តិការនោះឡើយ ស្នងការដ្ឋាន នគរបាលខេត្តបន្ទាយមានជ័យ បានយកចិត្តទុកដាក់ ខិតខំប្រកបដោយស្មារតីទទួល ខុសត្រូវខ្ពស់ ក្នុងការចាត់តាំង និងជំរុញដល់ការងារជំនាញ ក្នុងដែនសមត្ថកិច្ចរបស់ខ្លួន ជាប្រក្រតី សំដៅធានាទាំងការផ្តល់សេវាសាធារណៈ និងសន្តិសុខ សុវត្ថិភាពសង្គម ដោយសម្រេចបាននូវលទ្ធផល គួរឲ្យកត់សម្គាល់៕SRP

ខេត្តបន្ទាយមានជ័យ៖មន្ត្រីគយចល័តតំបន់៥ បានចុះបង្ក្រាបរថយន្តចង្កូតស្ដាំ ១១គ្រឿង អត់ពន្ធ នៅក្នុងឌីផាតមិន មួយកន្លែង ក្នុងក្រុងប៉ោយប៉ែត។

ការបង្ក្រាបធ្វើឡើងថ្ងៃ ពុធ ម្សិលមិញនៅ ឌីផាតមិន មួយកន្លែង ភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដោយមន្ត្រីគយចល័តដំបន់៥ សហការជាមួយកម្លាំងប៉ុស្តិ៍នគរបាលរដ្ឋបាលអូរជ្រៅ ដោយមានការ សម្របសម្រួល ពី លោក លឹម ប៊ុនសុភ័ក្រ ព្រះរាជ អាជ្ញារង នៃអយ្យការ អមសាលាដំបូង ខេត្តបន្ទាយមានជ័យ។

ប្រភពព័ត៌មានបានឲ្យដឹងថារថយន្តទាំង១១គ្រឿងអត់ពន្ធនោះ មានចំនួន៤គ្រឿង
ម្ចាស់រថយន្តមិនបានប្រគល់រថយន្តអោយគយ
រឹបអូសនោះទេ។ ក្នុងនោះ
-Mazda2 =១គ្រឿង
-Mazda3 =១គ្រឿង
-Nissanmarch=១គ្រឿង
-Suzuki swiff= ១គ្រឿង។ ចំណែក
-ម្ចាស់ដែលបានប្រគល់រថយន្តអោយគយតំបន់៥ មានចំនួន ០៧គ្រឿង
-Mazda 2 = ៤គ្រឿង
-Mazda 3 = ១គ្រឿង
-Lexus 330 = ១គ្រឿង
-Lexus 400h =១គ្រឿង។

គួរបញ្ជាក់ថា បន្ទាប់ពីរដ្ឋាភិបាល បានប្រកាសអនុញ្ញាត ឱ្យរថយន្ដចង្កូតស្ដាំចូលបង់ពន្ធ ប្រថាប់ត្រា តាមបែបបទរដ្ឋបាល នៃសារពើពន្ធ ក៏មានរថយន្តជាច្រើនគ្រឿង បានចូលទៅដាក់ពាក្យស្នើសុំបង់ពន្ធ ជាច្រើនផងដែរ។ ក៏ប៉ុន្តែក៏នៅតែមានចំនួន នៅមិនទាន់បានទៅដាក់ពាក្យស្នើសុំបង់ពន្ធនោះទេ នៅតែបន្តគេចវេសមិនព្រមបង់ពន្ធ៕SRP

ខេត្តបន្ទាយមានជ័យ៖ ឯកឧត្ដម នាយឧត្តម សេនីយ៍ ខេង សុមេធ អគ្គស្នងការរង នគរបាលជាតិ និងជាប្រធាន កងវិស្វកម្ម សម្តេចតេ ជោ ខេត្តសៀមរាប ថ្លែង អោយដឹងនៅល្ងាច ថ្ងៃទី ០៣ ខែកក្កដា ឆ្នាំ ២០២២ បានអញ្ជើញ ចុះពិនិត្យ ទីតាំង គម្រោង សាងសង់ ស្ពាន ដែលជាអំណោយដ៍ថ្លៃថ្លា របស់សម្តេចតេជោ ហ៊ុន សែន នាយករដ្ឋមន្ត្រី នៃ រាជរដ្ឋាភិបាល កម្ពុជា សម្រេច ផ្តល់ អំណោយ កសាង ស្ពានបេតុង ព្រះពន្លា មាន បណ្តោយ ១២០ ម៉ែត្រ ទទឹង ១០ ម៉ែត្រ ឆ្លងស្ទឹង សិរីសោភ័ណ ម្តុំ វត្ត ព្រះពន្លា នាភូមិ៤ និងភូមិ ព្រៃ ឬស្សី សង្កាត់ព្រះពន្លា ក្រុង សិរីសោភ័ណ។ក្នុងឱកាស នោះ ក៏មាន វត្តមាន ឯកឧត្តម ខេង ស៊ុម ប្រធាន ក្រុមប្រឹក្សា ខេត្ត ឯកឧត្តម អ៊ុំ រាត្រី អភិបាលខេត្ត បន្ទាយមានជ័យ លោក ឡុង វុធ អនុប្រធានមន្ទីរ រៀបចំដែនៃដីនគរូប នីយកម្មសំណង់ និងសុរិយោដីខេត្ត លោក ហ៊ឹល រ៉ាយ៉ា អភិបាលក្រុង សិរីសោភ័ណ លោក នាង ហាវ អភិបាលរងនិង ពលរដ្ឋ ទទួលផលផងដែរ។

បើតាមនាយឧត្តមសេនីយ៍ ខេង សុមេធ បានឲ្យដឹងថា ឯកឧត្តម កែ គឹមយ៉ាន ឧបនាយករដ្ឋមន្ត្រី ប្រធាន ក្រុមការងារ រាជរដ្ឋាភិបាល ចុះជួយ ខេត្តបន្ទាយមានជ័យ ទើបបាន ស្នើ ទៅ សម្តេចតេជោហើយ សម្តេច ក៏ ឆ្លើយតបថា ត្រូវចាប់ផ្តើម សាងសង់ស្ពានមួយជាបន្ទាន់។

សូមបញ្ជាក់ថា សំណង់ ស្ពានបេតុង នេះ នឹងត្រូវ សាងសង់ ជំនួសស្ពានឈើចាស់ ទ្រុឌទ្រោម ដែលបានបាក់ ដួលរលំ ខូចខាត ដោយ ទឹកជំនន់ កាលពី ថ្ងៃទី ១៣ ខែតុលា ឆ្នាំ ២០២០ កន្លងមក។

ការសាងសង់នេះ ជាការឆ្លើយតបយ៉ាង ទាន់ចិត្ត បន្ទាប់ពី ព្រះសង្ឃ អាចារ្យ គណកម្មការ ពុទ្ធបរិស័ទ ពលរដ្ឋ នៅសង្កាត់ព្រះពន្លា និង ក្រុង សិរីសោភ័ណ បាន សំណូមពរ កាលពីអំឡុង យុទ្ធនា ការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិ ទី ៥ ដែល បាន បោះឆ្នោត កាលពី ថ្ងៃទី ៥ ខែមិថុនា ឆ្នាំ ២០២២ ថ្មីៗ ៕SRP

ខេត្តបន្ទាយមានជ័យ៖សម្តេចតេជោហ៊ុន សែន នាយករដ្ឋមន្ត្រីបានមានប្រសាសន៍ថា ការព្រលែងកូនត្រី និងត្រីមេពូជនាថ្ងៃនេះ គឺជារឿងល្អមួយសម្រាប់បង្កើនផលត្រីសម្រាប់ប្រជាពលរដ្ឋ ហើយការលែងត្រីមិនមែនធ្វើតែក្នុងទិវាមច្ឆជាតិ១កក្កដានោះទេ គឺអាចធ្វើរាល់ថ្ងៃ អោយតែមានកន្លែងព្រលែង(ទឹក) និងមានពូជត្រីសម្រាប់ព្រលែង។ ការដាំកូនឈើក៏ដូចគ្នាដែរ មិនមែនធ្វើតែនៅក្នុងរុក្ខទិវា៩កក្កដានោះទេ គឺអាចធ្វើបានរាល់ថ្ងៃ។

សម្តេចហ៊ុន សែន មានប្រសាសន៍បែបនេះក្នុងឱកាសអញ្ជើញព្រលែងកូនត្រី ក្នុងទិវាមច្ឆជាតិ១កក្កដា នៅអាងត្រពាំងថ្ម ខេត្តបន្ទាយមានជ័យ នៅថ្ងៃសុក្រ នេះ។

សម្តេចតេជោនាយករដ្ឋមន្ត្រីបានមានប្រសាសន៍ថា វត្តមានរបស់សម្តេចនៅអាងត្រពាំងថ្មនាពេលនេះ គឺជាវត្តមានលើកទី២ហើយ ខណៈលើកទី១ សម្តេចតេជោ បានអញ្ជើញសម្ពោធដាក់ឱ្យដំណើរការអាងនេះ បន្ទាប់ពីជួសជុល និងកែលំអររួចរាល់ កាលពីអំឡុងខែមីនា ឆ្នាំ២០០៦។

សម្តេចហ៊ុន សែន បានបន្តក្រើនរំលឹកដល់អភិបាលខេត្តជុំវិញបឹងទន្លេសាប ទាំងអស់ត្រូវអនុវត្តន៍ឱ្យបានច្បាស់លាស់លើការកាត់ឆ្វៀលដីតំបន់អភិរក្សនៅបឹងទន្លេសាប ជូនប្រជាពលរដ្ឋដែលកាន់កាប់យូរឆ្នាំមកហើយនោះ តាមអ្វីដេលសម្តេចបានដាក់ចេញនូវបទបញ្ជាកន្លងទៅនេះ។ សម្តេចតេជោ ក៏ថ្លែងនូវការអំពាវនាវអោយប្រជាពលរដ្ឋនៅបឹងទន្លេសាប កុំឱ្យមានការកាប់ទន្ទ្រានយកដីអភិរក្សតំបន់២ និង៣បន្តទៀត។

សម្តេចតេជោនាយករដ្ឋមន្ត្រី ក៏បានប្រកាស និងចេញបទបញ្ជាឱ្យអាជ្ញាធរមីន និងវិស័យឯកជន ក្នុងការដោះមីននៅឃុំប៉ោយចារ និងតំបន់អាងត្រពាំងថ្ម នេះ ដោយត្រូវដោះឱ្យអស់នៅចុងឆ្នាំ២០២២នេះ និងត្រូវប្រែក្លាយតំបន់នេះជាតំបន់ដែលគ្មានមីនតទៅទៀត។ ជាមួយគ្នានោះ សម្តេចតេជោ ក៏បានណែនាំឱ្យអាជ្ញាធរខេត្តបន្ទាយមានជ័យរៀបចំដាក់គម្រោងជួសជុលស្ពានដែលខូចខាតកន្លងមកដោយទឹកជំនន់នៅខេត្តបន្ទាយមានជ័យ នេះ ក្នុងកញ្ចប់ថវិកាសម្រាប់ក្រសួងអភិវឌ្ឍន៍ជនបទនៅឆ្នាំ២០២៣។

តាមរបាយការណ៍របស់ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កូនត្រី និងត្រីមេពូជប្រមាណ ១លានក្បាលដែលត្រូវលែងនាថ្ងៃនេះរួមមាន៖ ប្រភេទត្រីឆ្ពិន ត្រីព្រលូង ត្រីកាហែ ត្រីប្រា និងត្រីកន្ធរ រួមទាំងប្រភេទវារីសត្វជិតផុតពូជមានដូចជាត្រីគល់រាំង អណ្តើក កន្ធាយ និងកង្កែបជាដើម។ ក្រៅតែពីលែងកូនត្រី និងត្រីមេពូជហើយ កម្មវិធីនេះក៏មានការលែងកូនបង្កងទឹកសាបជាថ្មី ប្រមាណ ២០ម៉ឺនក្បាលបន្ថែមទៀតផងដែរ៕SRP