ខេត្តកំពង់ធំ – Page 4

ខេត្តកំពង់ធំ៖អ្នកលេងតន្រ្តីម្នាក់ត្រូវបានសមត្ថកិច្ចចាប់ខ្លួន កសាងសំណុំរឿងតាមនិតិវិធីនិងបញ្ជួនទៅសាលាដំបូងខេត្តករណីអំពើហិង្សាវាយឪពុក និងម្តាយបង្កើតរងបួសធ្ងន់។

ករណីហិង្សានេះ នៅថ្ងៃទី១ ខែមករា ឆ្នាំ២០២៥ វេលាម៉ោង២០ និង៣០នាទី នៅភូមិអូរធំ ឃុំបឹងល្វា ស្រុកសន្ទុក។

ជនសង្ស័យឈ្មោះ រ៉េត រាត្រី ភេទប្រុស អាយុ២៧ឆ្នាំ មុខរបរ អ្នកលេងតន្រ្តី។ ជនរងគ្រោះទី១ ឈ្មោះ ពេជ
សោភា (ម្តាយ) អាយុ៥៨ឆ្នាំ របួសលើក្បាល១កែន្លង របួសនិងបាក់ដើមដៃទាំងពីរ។ជនរងគ្រោះទី២ ឈ្មោះ សេង សរឿន(ឪពុក) អាយុ៥៩ឆ្នាំ របួសចំមុខលើចិញ្ចើមឆ្វេង
១កន្លែង និងក្រោមភ្នែកឆ្វេង១កន្លែង។

សមត្ថកិច្ចបានឱ្យដឹងថា ជនសង្ស័យមកពីផឹកស្រាស្រវឹង ហើយម្តាយក៏បានស្តីបន្ទោសហើយប្រាប់ឲ្យចូកដេក ប៉ុន្តែជនសង្ស័យខឹងក៏បានតមាត់និងរងរឿងជាមួយម្តាយ ពេលនោះជនរងគ្រោះ ជាឪពុក បានជេរហើយនិងវាយ១ដៃទៅលើជនសង្ស័យ ដែលជាកូនពេលនោះ ជនសង្ស័យ វាយឪពុកវិញនិងដៃចំមុខដួលទៅលើដី ភ្លាមនោះជនសង្ស័យ ត្រូវជាកូនស្ទុះទៅយកគីឡូភ្លើងក្បែរនោះ មកបោកសំដៅក្បាលឪពុកតែម្តាយឃើញទាន់បានចូលទៅអោប ពីលើប្តី ក៏ត្រូវចំក្បាលរងរបួស រួចហើយ ជនសង្ស័យបានយកឈើជ្រុងមកវាយជនរងគ្រោះ ជាម្តាយថែមទៀត ម្តាយយកដៃរងបណ្តាលឲ្យចំដៃបាក់តែម្តង៕SRP

ខេត្តកំពង់ធំ៖មន្ត្រីប៉ូលិសមួយរូបត្រូវបានបុរសម្នាក់កាប់បណ្តាលឲ្យស្លាប់ភ្លាមៗបន្ទាប់ពីមានជម្លោះពាក្យសម្តីគ្នា។

ហេតុការណ៍នៅម៉ោង ប្រមាណ១០និង៤០នាទីយប់ ថ្ងៃទី ២៧ ខែវិច្ឆិកា ឆ្នាំ២០២៤ នៅចំណុចទួលភ្នៀត ភូមិកំពង់ក្តី ឃុំកំពង់ចិនត្បូង ស្រុកស្ទោង។

សមត្ថកិច្ចបានប្រាប់ថាអំពើឃាតកម្មយ៉ាងព្រៃផ្សៃនេះបង្កដោយជនសង្ស័យ ឈ្មោះ ផន ប៊ុនរិត ភេទប្រុស អាយុ ៣៤ឆ្នាំ ដែលរស់នៅភូមិ/ឃុំកើតហេតុខាងលើ។ ក្រោយបានធ្វើសកម្មភាពរួចជនសង្ស័យបានរត់គេចខ្លួនបាត់ស្រមោល។ ដោយឡែកជនរងគ្រោះ ឈ្មោះម៉េង សេងទ្រី ភេទប្រុស អាយុ៣៧ឆ្នាំ (ជាមន្ត្រីនគរបាល) រស់នៅភូមិឃុំជាមួយជនសង្ស័យ បានស្លាប់នៅកន្លែងកើតហេតុតែម្ដង។

ប្រភពដដែលឲ្យដឹងថា មុនកើតហេតុ ជនរងគ្រោះ បានជិះម៉ូតូមកដល់ចំណុចមុខផ្ទះរបស់ វ៉ាន់ សុជាតិ ភេទស្រី ខណៈជនសង្ស័យកំពុងអង្គុយផឹកស្រាម្នាក់ឯង ពេលជនរងគ្រោះ ចុះពីម៉ូតូមកអង្គុយក្បែរជនសង្ស័យ មានការទាស់ទែងពាក្យសម្តី ជាមួយគ្នា ភ្លាមនោះ រត់ទៅយកផ្គាក់ពីផ្ទះរបស់ខ្លួន មកកាប់ប្រហាជនរងគ្រោះ បណ្តាលឱ្យស្លាប់នៅនឹងកន្លែងតែម្តង។

សមត្ថកិច្ចកំពុងសហការស្រាវជ្រាវបន្តស្វែងរកជនសង្ស័យ ដើម្បីនាំមកផ្តន្ទាទោសតាមនីតិវិធីច្បាប់៕SRP

ខេត្តកំពង់ធំ៖មានការលើកឡើងថាលោកស្រីពៅ មករា ភរិយា អធិការរងស្រុកបារាយណ៍បានសាងសង់សំណង់រឹងលើដីរដ្ឋនៅក្នុងផ្សារបារាយណ៍ បានដោយរលូន ករណីនេះអាជ្ញាធរជំនាញពាក់ព័ន្ធហាក់បីបណ្ដែតបណ្ដោយឲ្យលោកស្រីធ្វើតែអំពើចិត្តមិនហ៊ានទប់ស្កាត់នោះឡើយ។

សេចក្ដីរាយការណ៍ពីខេត្តកំពង់ធំបានអោយដឹងថាការសាងសង់សំណង់លើដីរដ្ឋ ពីសំណាក់លោកស្រីពៅ មករា បែបនេះ ក្រុមអាជីវករ បានបង្ហើបប្រាប់អ្នកសារព័ត៌មានថា ករណីនេះអាជ្ញាធរជំនាញពាក់ព័ន្ធធ្លាប់បានចុះមកហាមឃាត់នូវការសាងសង់សំណង់នេះដែរ ក៏ប៉ុន្តែមិនអាចហាមឃាត់បាននោះទេ ដោយបានត្រឹមតែចុះទៅមើលចុះមើលឡើង ហើយត្រឡប់វិញ ទុកបណ្ដោយឱ្យលោកស្រីពៅ មករា សាងសង់បែបចំហរបន្ថែមទៀត។

ក្រុមអាជីវករបានលើកឡើងទៀតថា ផ្សារបារាយណ៍ គឺអ្នកស្រីពៅ មករា ជាអ្នកដេញភាស៊ីបាន ដូច្នេះគាត់ប្រើអំណាចសាងសង់សំណង់រឹងនៅលើដីរបស់រដ្ធ នៅក្នុងផ្សារតែម្ដងដោយមិនខ្លាចអ្វីទាំងអស់ទោះបីតែមានការហាមឃាត់ពីសំណាក់អាជ្ញាធរមូលដ្ឋានជំនាញពាក់ព័ន្ធនិងអនុប្រធានមន្ទីរសេដ្ឋកិច្ចនិងហិរញ្ញវត្ថុខេត្តកំពង់ធំ យ៉ាងក៏ដោយ បុគ្គលនេះមិនខ្លាចញញើតនិងអាជ្ញាធរចំនាញពាក់ព័ន្ធនោះឡើយ។ ប្រការដែលលោកស្រីពៅ មករា មិនខ្លាចញញើតនឹងអាជ្ញាធរជំនាញពាក់ព័ន្ធក្នុងការសាងសង់សំណង់រឹងលើដីរដ្ឋបែបនេះគេនៅពុំទាន់ដឹងថាមានអ្វីនៅពីក្រោយខ្នងរបស់លោកស្រីឡើយ។

ករណីនេះត្រូវបានបណ្ដាញសង្គមបានធ្វើការផ្សព្វផ្សាយជាសាធារណៈចែករំលែកតៗគ្នាផងដែរ។ ទីភ្នាក់ងារសារព័ត៌មាន សៀមរាប ប៉ុស្តិ៍ នៅពុំទាន់ទទួលបានការបំភ្លឺពីលោកស្រីពៅ មករា បាននៅឡើយទេចំពោះការលើកឡើងរបស់ក្រុមអាជីវករ រហូតដល់ម៉ោងចេញផ្សាយនេះ។

ទោះជាយ៉ាងណា ក្រុមអាជីវករដែលលក់ដូរនៅក្នុងផ្សារបារាយណ៍សង្ឃឹមថាលោកប្រធានមន្ទីរសេដ្ឋកិច្ចនិងហិរញ្ញវត្ថុខេត្តកំពង់ធំ ដែលទើបនឹងតែងតាំងថ្មីនិង មានចំណាត់ការចំពោះបុគ្គលដែលបានសាងសង់សំណង់រឹងនៅលើដីរដ្ឋក្នុងផ្សារបារាយណ៍នេះជាក់ជាពុំខានឡើង៕SRP