លោក គន់ គីម បានសង្កត់ធ្ងន់ថា បងប្អូនអតីតយុទ្ធជនកម្ពុជា ជាអ្នកដែលមានគុណបំណាច់ធំធេង ចំពោះជាតិមាតុភូមិ ប៉ុន្តែកម្រិតជីវភាពមិនមែនសុទ្ធតែល្អប្រសើរនោះទេ ពោលគឺភាគច្រើន ជាអ្នកដែលមានជីវភាពទ័លក្រ លំបាក ខ្វះខាត ហើយសុខភាពមានការទ្រុឌទ្រោមទៀតផង។ ដូច្នេះសូមឱ្យមន្ត្រីពាក់ព័ន្ធ ទាមទារធ្វើយ៉ាងណា ត្រូវផ្តល់ប័ណ្ណក្រីក្រ ជូនដល់គ្រួសារអតីតយុទ្ធជន ដេីម្បីឱ្យប្រពន្ធ កូនរបស់គាត់បានប្រេីប្រាស់សេវាព្យាបាលនៅមន្ទីរពេទ្យរដ្ឋនានា ដោយមិនបង់ប្រាក់ផង ព្រោះបងប្អូនអតីតយុទ្ធជន យើងមានប័ណ្ណ ប ស ស រួចទៅហើយ ប៉ុន្តែប្រពន្ធ កូន របស់គាត់ មិនមាននោះទេ ដែលនៅតែជាបន្ទុកចំណាយសម្រាប់គ្រួសារគាត់។
អញ្ជើញបំពាក់គ្រឿងឥស្សរិយយសជូនបងប្អូនអតីតយុទ្ធជនកម្ពុជា ខេត្តកំពង់ចាម ចំនួន ២០០នាក់ ខណៈអតីតយុទ្ធជនក្នុងខេត្តកំកំពង់ចាម នៅ ថ្ងៃនេះ លោក គន់ គីម អអគ្គលេខាធិការសមាគមអតីតយុទ្ធជនកម្ពុជា បានថ្លែងថា ដើម្បីឆ្លើយតបទៅនឹងគុណបំណាច់ដ៏ថ្លៃថ្លារបស់បងប្អូនអតីតយុទ្ធជន ដែលកន្លងមក ហ៊ានពលីកម្មគ្រប់បែបយ៉ាង ដេីម្បីរំដោះប្រទេសជាតិឱ្យរួចផុតពីរបបប្រល័យពូជសាសន៍ ប៉ុល ពត ធ្វើឱ្យប្រទេសមានសុខសន្តិភាព និងមានការអភិវឌ្ឍរីកចម្រើនជាបន្តបន្ទាប់មកដល់សព្វថ្ងៃនេះ។ ដូច្នេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រធានសមាគមអតីតយុទ្ធជនកម្ពុជា បានក្រាបបង្គំទូលថ្វាយ ព្រះមហាក្សត្រ ប្រោសព្រះរាជទាននូវគ្រឿងឥស្សរិយយសដល់បងប្អូនអតីតយុទ្ធជនកម្ពុជា នៅទូទាំងប្រទេស ចំនួន៨៦,៩៣១នាក់។ ក្នុងនោះសម្រាប់ខេត្តកំពង់ចាម ទទួលបានមេដាយ ចំនួន៣,១៤៩នាក់ ដែលថ្ងៃនេះបានផ្តល់ជូនចំនួន២០០នាក់ បន្តទៀតថ្នាក់ដឹកនាំខេត្តកំពង់ចាម នឹងរៀបចំពិធីបំពាក់មេដៃជូនអតីតយុទ្ធជននៅតាមបណ្ដាស្រុក ដែលមិនទាន់ទទួលបានមេដៃនេះ។
លោកអ៊ុន ចាន់ដា ប្រធានកិត្តិយសសមាគមអតីតយុទ្ធជនកម្ពុជាខេត្តកំពងលចាម បានណែនាំដល់គណៈអភិបាលស្រុកទាំង៩ ឱ្យត្រៀមរៀបចំពិធីបំពាក់មេដៃគ្រឿងឥស្សរិយយស ជូនដល់បងប្អូនអតីតយុទ្ធជនកម្ពុជា ឱ្យបានគ្រប់ៗគ្នា នាពេលខាងមុខជាបន្តទៀត ខណៈបងប្អូនអតីតយុទ្ធជនក្នុងក្រុងកំពង់ចាម ចំនួន១២០នាក់ និងស្រុកកំពង់សៀមចំនួន៨០នាក់ ត្រូវបានឯកឧត្តមកិត្តិសង្គហបណ្ឌិត គន់ គីម បំពាក់ជូន មេដៃអស្សឫទ្ធិ ចំនួន ៤គ្រឿង មេដៃមាស ចំនួន ៩៨គ្រឿង និងមេដៃប្រាក់ ចំនួន៩៨គ្រឿង រួមនឹងថវិការចំនួន ៨ម៉ឺនរៀល។
លោកអ៊ុន ចាន់ដា បានអំពាវនាវដល់បងប្អូនអតីតយុទ្ធជនកម្ពុជា ឱ្យរួមកម្លាំងសាមគ្គីគ្នា ការពារសុខសន្តិភាព ដេីម្បីបន្តការអភិវឌ្ឍរីកចម្រើនទៅមុខទៀត ពោលគឺសូមនាំ ប្រពន្ធ កូន ឬបងប្អូនអ្នកជិតខាង ទៅបោះឆ្នោតឱ្យបានគ្រប់ៗគ្នា ផងដែរ៕ដោយនាគខៀវ
