ខេត្តកំពង់ចាម៖ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ របស់គណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស គ.ខ.ប.ជ នៅព្រឹកមិញនេះ លោក អ៊ុន ចាន់ដា អភិបាលខេត្ត និងជាប្រធានគណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស បានណែនាំដល់ថ្នាក់ក្រុង-ស្រុក និងឃុំ-សង្កាត់ ឲ្យបន្តការសហការជាមួយប៉ុស្តិ៍នគរបាលរដ្ឋបាលឃុំ-សង្កាត់ធ្វើការផ្សព្វផ្សាយតាមរយៈគោលនយោបាយភូមិឃុំមានសុវត្ថិភាពទាំង០៩ ចំណុចជូនដល់ប្រជាពលរដ្ឋ ឲ្យបានទូលំទូលាយ ពីការធ្វើចំណាកស្រុកប្រកបដោយសុវត្ថិភាព ចៀសផុតពីការចាញ់បោកមេខ្យល់ ដែលអាចឈានដល់ការរងគ្រោះដោយការជួញដូរមនុស្ស។
លោក អ៊ុន ចាន់ដា បានលេីកឡើងថា រយៈពេល៦ខែដើមឆ្នាំ២០២០នេះ ពលករ ពលការិនី ជួបប្រទះនូវការចាញ់បោកមេខ្យល់ជាបន្តបន្ទាប់ ហើយក៏កំពុងប្រឈមទៅនិងហានិភ័យខ្ពស់សម្រាប់ការចេញទៅប្រកបរបរនៅក្រៅប្រទេស ជាពិសេសក្នុងប្រទេសម៉ាឡេស៊ី ឥណ្ឌូនេស៊ី និងប្រទេសថៃជាដើម។
លោកអភិបាលខេត្ត បានថ្លែងថា បញ្ហាទាំងអស់នេះ បើយើងទាំងអស់គ្នាមិនខិតខំពុះពារ ជម្នះនូវឧបសគ្គដើម្បីចូលរួមទប់ស្កាត់ ឲ្យបានទាន់ពេលវេលាទេនោះ ពលករ ពលការិនី យើងអាចនឹងទទួលរងនូវគ្រោះថ្នាក់ ទាំងគ្រោះថ្នាក់ការងារ ទាំងគ្រោះថ្នាក់សុខភាព មិនតែប៉ុណ្ណោះអាចនាំនូវបញ្ហាគ្រោះថ្នាក់សុខភាពមកដល់ក្រុមគ្រួសារ ដល់សហគមន៍ និងដល់សង្គមជាតិទៀតផង។
ដោយឡែកពាក់ព័ន្ធទៅនឹងបញ្ហាកុមារដើរសុំទាននៅក្នុងក្រុងកំពង់ចាម
អភិបាលខេត្ដ បានស្នេីឲ្យក្រុមការងារការពារជនរងគ្រោះ ដែលមានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តជាប្រធាន សហការជាមួយអាជ្ញាធរក្រុងកំពង់ចាម ចាត់វិធានការតាមនីតិវិធី ដើម្បីគ្រប់គ្រង មុខសញ្ញាទាំងអស់នេះឲ្យមានសណ្តាប់ធ្នាប់ និងអាចចៀសផុតពីការ ឆ្លងជំងឺកូវីដ ១៩ផងដែរ៕SRP