ខេត្តកំពង់ចាម៖តំណាងប្រជាពលរដ្ឋ លោក សាំង ឆន មេឃុំសំរោង បានថ្លែងអំណរគុណចំពោះរាជរដ្ឋាភិបាល ក៏ដូចជាអាជ្ញាធរគ្រប់លំដាប់ថ្នាក់ ដែលមានការយកចិត្តទុកដាក់ក្នុងការកសាងទំនប់អាងទឹកតំបន់នេះឡើងវិញ ដែលអាចមានលទ្ធភាពរក្សាទឹកទន្លេមេគង្គទុកបានរហូតជាង១២លានម៉ែត្រត្រីគុណ សម្រាប់ស្រោចស្រពបន្ថែមលើផ្ទៃដីបង្កបង្កើនផលស្រូវវស្សា ៤៥២ហិចតា ស្រូវប្រាំង១.២៥០ហិចតា និងដំណាំរួមផ្សំ ៤០ហិចតា របស់ប្រជាពលរដ្ឋ ចំនួន១១ភូមិ ក្នុងឃុំសំរោង ស្រុកព្រៃឈរ និង៦ភូមិ ក្នុងឃុំព្រៃចារ ស្រុកជើងព្រៃ សរុប៤៧២៩គ្រួសារ ដែលបានពឹងអាស្រ័យលើអាងតំបន់នេះ។ ម្យ៉ាងវិញទៀត ខ្នងទំនប់អាងទឹកតំបន់ ជាមធ្យោបាយធ្វើដំណើរភ្ជាប់ពីមូលដ្ឋាន មកទីប្រជុំជន និងដឹកជញ្ជូនកសិផល កសិកម្ម យកទៅលក់នៅទីផ្សារ បានយ៉ាងល្អប្រសើរ ផងដែរ។
ចំណែកលោកលោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឲ្យដឹងថា ការជួសជុលទំនប់អាងទឹកតំបន់ខាងលើនេះឡើងវិញ ដើម្បីលើកកម្ពស់កម្រិតជីវភាពរបស់បងប្អូនប្រជាពលរដ្ឋ ក៏ដូចជាការចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រ តាមរយ:ការបង្កើនលទ្ធភាព នៃការបង្កបង្កើនផល របស់ប្រជាកសិករ ក្រោមការយកចិត្តទុកដាក់ពីសំណាក់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា។
លោកប្រធានមន្ទីរបានបន្តថា ក្នុងការជួសជុលទំនប់អាងទឹកតំបន់ និងជួសជុលសំណង់សិល្បការ រួមមានជួសជុលទំនប់អាងទឹកប្រវែង៣.៩០០ម៉ែត្រ និងទ្វារទឹកចំនួន០៣កន្លែងផងនោះ ដោយរដ្ឋបាលខេត្តកំពង់ចាម បានធ្វើការស្នើសុំទៅក្រសួងធនធានទឹក និងឧតុនិយម ដើម្បីធ្វើការជួសជុល កែលម្អសំណង់នេះឡើងវិញ។
សូមបញ្ជាក់ថានៅថ្ងៃទី១៨ ខែកក្កដា ឆ្នាំ២០២០នាព្រឹកមិញ លោក អ៊ុន ចាន់ដា អភិបាលខេត្តកំពង់ចាម និងលោក ឈា ប៊ុនរិទ្ធិ អគ្គនាយកកិច្ចការបច្ចេកទេសនៃក្រសួងធនធានទឹក និងឧតុនិយម អមដំណើរដោយថ្នាក់ដឹកនាំមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន បានអញ្ជើញចុះពិនិត្យទំនប់អាងទឹកតំបន់ និងសំណង់សិល្បការ ខាងលើនេះ ដែលទើបតែស្ថាបនារួចរាល់ក្នុងពេលថ្មីៗនេះ ហើយអជ្ញាធរក៏មានគម្រោងដាំដើមឈើ(កូនស្តៅ)នៅលើនៅលើខ្នងទំនប់នោះផងដែរ៕SRP
មន្ត្រី៖ទំនប់នេះ អាចស្តុកទឹកទុក ជាង១២លានម៉ែត្រត្រីគុណ សម្រាប់កសិករប្រើប្រាស់ចំនួនពីរឃុំ
