ភ្នំពេញ៖នាយករដ្ឋមន្ត្រីហ៊ុន សែន នឹងអញ្ជើញ
ពិធីសម្ពោធដាក់ឱ្យប្រើប្រាស់ជាផ្លូវការវិមានកីឡដ្ឋាន នៃពហុកីឡដ្ឋានជាតិមរតកតេជោ នៅថ្ងៃទី១៨ ខែធ្នូ ឆ្នាំ២០២១។
នេះបើយោងតាម រដ្ឋបាលរាជធានីភ្នំពេញ ចេញសេចក្ដីជូនដំណឹង ស្ដីពីការបញ្ចៀសចរាចរយានយន្តគ្រប់ប្រភេទជាបណ្ដោះអាសន្ន ចាប់ពីម៉ោង ០៥:០០នាទី រហូតដល់បញ្ចប់កម្មវិធី៕SRP
សម្ដេចហ៊ុន សែន ចេញអនុក្រឹត្យស្តីពី ប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ ២០២២
ភ្នំពេញ៖ប្រមុខរាជរដ្ឋាភិបាល សម្ដេចតេជោហ៊ុសែន បានចេញអនុក្រឹត្យស្តីពី ប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ ២០២២៕SRP
ខេត្តសៀមរាប៖បុរសជាអ្នកបើកម៉ូតូម្នាក់ត្រូវបានរថយន្តស៊េរីទំនើបមួយគ្រឿងបើកចំពេញទំហឹងបណ្ដាលឲ្យស្លាប់ភ្លាមៗ។
ហេតុការណ៍បានកើតឡើងនៅ ថ្ងៃទី ១២ ខែ ធ្នូ ឆ្នាំ ២០២១ នៅវេលាម៉ោង ១០និង៤៥ នាទី ត្រង់ចំណុចផ្លូវបំបែកជាបួនសាលារៀនគ្រួស ស្ថិតនៅភូមិគ្រួស សង្កាត់ ស្វាយដង្គំ ក្រុងសៀមរាប។
របាយការណ៍របស់នគរបាលចរាចរណ៍ផ្លូវគោកខេត្តសៀមរាបបានឲ្យដឹងថា គ្រោះថ្នាក់ចរាចរណ៍នេះរវៀងរថយន្តនិងម៉ូតូ។ ម៉ូតូម៉ាក (ហុងដាឌ្រីម) ពណ៌ខ្មៅពាក់ផ្លាកលេខ (សៀមរាប 1AK-1308)បើកបរ ដោយឈ្មោះ បេង រតនា ភេទប្រុស អាយុ២៣ ឆ្នាំ រស់នៅភូមិ ទួលរវៀង ឃុំល្វា ស្រុកពួក ខេត្តសៀមរាប (ស្លាប់នៅកន្លែងកើតហេតុ) បើកបរក្នុងទិសដៅកើតទៅលិច។ ចំណែករថយន្តបេីកបរទិសដៅពីត្បូងទៅជេីង ក្រោយពីបុក បេីកគេចចេញពីកន្លែងកេីតហេតុរត់បាត់តែម្ដង។
មន្ត្រីចរាចរណ៍បានបញ្ជាក់ថាក្រោយពីកើតហេតុសមត្ថកិច្ចបានចុះទៅធ្វើការវាស់វែង និងប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី។ ក្នុងនោះម៉ូតូរបស់ជនរងគ្រោះរងការខូចខាតយ៉ាងធ្ងន់ធ្ងរផងដែរ៕SRP
ខេត្តសៀមរាប៖លោក យឹម ហ្វីណង់ ទឹង បានជួបគ្រោះថ្នាក់ចរាចរណ៍នៅមុខសាលាគ្រួសខណៈពេលបើករថយន្តប៉ះគ្នាជាមួយរថយន្តមួយគ្រឿងទៀត។
របាយការណ៍របស់ ការិយាល័យចរាចរណ៍បានបង្ហាញថាហេតុការណ៍បានកើតឡើងនៅ ថ្ងៃទី ១១ ខែ ធ្នូ ឆ្នាំ ២០២១ នៅវេលាម៉ោង ២៣និង៣០នាទី ត្រង់ចំណុចទល់មុខ ឪសថស្ថាន ណាណូឃ៊ែរ ស្ថិតនៅភូមិគ្រួស សង្កាត់ ស្វាយដង្គំ ក្រុងសៀមរាប ខេត្តសៀមរាប។
របាយការណ៍បន្តថា គ្រោះថ្នាក់ចរាចរណ៍នេះរវៀង រថយន្តម៉ាក (Starx) ពណ៌ទឹកប្រាក់ ពាក់ស្លាកលេខ (សៀមរាប2B 8434 ) បើកបរ ដោយឈ្មោះ វិន ឡូន ភេទប្រុសអាយុ៤១ឆ្នាំ រស់នៅភូមិវត្តបូព៌ សង្កាត់សាលាកំរើក ក្រុងសៀមរាប បើកបរក្នុងទិសដៅពីកើតទៅលិច
ជិះក្នុងរថយន្តចំនួន៦នាក់ របួស ស្រាលទាំងអស់ (ជនជាតិបរទេស៥នាក់រួមដំណើរ) បានបុកជាមួយរថយន្ត (Prius) ពណ៌ទឹកប្រាក់ ពាក់ស្លាកលេខ(សៀមរាប 2B4250) បើកបរដោយឈ្មោះយឹម ហ្វីណង់ ទឹង ភេទប្រុស អាយុ៤០ឆ្នាំ រស់នៅភូមិស្ទឹងថ្មី ឃុំស្វាយដង្គំ ក្រុងសៀមរាប បើកបរទិសដៅពីត្បូងទៅជើងជិះក្នុងរថយន្តចំនួន៣នាក់អ្នកបើកបររបួសធ្ងន់ អ្នករួមដំណើរធ្ងន់១នាក់ និងស្រាល១នាក់។បើតាមរបាយការណ៍បញ្ជាក់ថា មូលហេតុ រថយន្តស្តារិចល្បឿនលឿន។ ចំណែករថយន្តព្រូស ឆ្លងផ្លូវខ្វះការប្រុងប្រយ័ត្ន៕SRP
ខេត្តកំពង់ចាម៖ក្នុងពិធីបិទមហាព្រឹត្តិការណ៍ប្រកួតបាល់ទាត់ដណ្ដើមពានរង្វាន់ VIND សន្តិភាព ឆ្នាំ២០២១ (រដូវកាលទី១) នៅស្រុកស្ទឹងត្រង់ នៅរសៀលថ្ងៃទី១២ ខែធ្នូ ម្សិលមិញ លោក អ៊ុន ចាន់ដា អភិបាលខេត្តកំពង់ចាម បានថ្លែងថា ក្រុមកីឡាករនីមួយៗ ពិតជាមានការរីកចម្រើននិងលេងបានល្អ ទោះជាយ៉ាងនេះក្តីត្រូវខិតខំធ្វើការហ្វឹកហាត់បន្ថែមទៀត ដើម្បីត្រៀមខ្លួនចូលរួមប្រកួតកីឡាអូឡាំពិក ឆ្នាំ២០២៣ខាងមុខនេះ ខណៈកីឡានាំមកនូវសុខភាពល្អផងដែរ។
អភិបាលខេត្តបានថ្លែងថា នេះជាលេីកទី១ហើយដែលខេត្តយើងមានរៀបចំពិធីប្រកួតកីឡា ហើយក៏មានការជួបជុំគ្នាច្រើន បន្ទាប់ពីរងវិបត្តិដោយកូវីដ១៩មួយរយៈពេល អ្វីដែលយើងជួបជុំគ្នាសប្បាយរីករាយទៅបាននេះ គឺដោយសារតែប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន លោកបានខ្នះខ្នែងក្នុងការបញ្ជាទិញយកវ៉ាក់សាំងការពារជំងឺកូវីដ-១៩ចាក់ជូនប្រជាពលរដ្ឋយើងស្រោចស្រពពេញផ្ទៃប្រទេសដោយមិនខ្វះចន្លោះឡេីយ ។
អភិបាលខេត្តកំពង់ចាម ក៏បានអំពាវនាវដល់បងប្អូនប្រជាពលរដ្ឋ ឲ្យចូលរួមជាមួយរាជរដ្ឋាភិបាល ដេីម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ជាពិសេសត្រូវរួបរួមគ្នាថែរក្សាសុខសន្តិភាពឲ្យបានគង់វង្សយូរអង្វែង ដេីម្បីបន្តការអភិវឌ្ឍន៍ឲ្យកាន់តែរីកចម្រើនទៅមុខទៀត ព្រោះថាមានសន្តិភាព ទេីបមានការអភិវឌ្ឍន៍។
ក្នុងពិធីនេះដែរ លោកអភិបាលខេត្ត ក៏បានប្រគល់ពានរង្វាន់ចំណាត់ថ្នាក់លេខ ១ នូវថវិកាចំនួន ២០លានរៀល ជូនក្រុមកីឡាករ អធិរាជ ស កំពង់ទ្រាស ខេត្តត្បូងឃ្មុំ ពានរង្វាន់ចំណាត់ថ្នាក់លេខ ២ ថវិកា ១២លានរៀល ជូនក្រុមកីឡាករ ព្រាប ស ពាមជីលាំង ខេត្តត្បូងឃ្មុំ ពានរង្វាន់ចំណាត់ថ្នាក់លេខ ៣ ថវិកា ៦លានរៀល ជូនក្រុមកីឡាករ យុវជន ស ស យ ក ខេត្តកំពង់ចាម និងចំណាត់ថ្នាក់លេខ ៤ ថវិកា ២លានរៀល ជូនក្រុមកីឡាករ ពពកខៀវ ភូមិសយ ក្នុងនោះចំណាត់ថ្នាក់វ័យចំណាស់ មានពីរថ្នាក់ លេខ១ ថវិកា ១លានរៀល និងលេខ២ ថវិកា ៥០ម៉ឺនរៀល ព្រមទាំងរង្វាន់លើកទឹកចិត្តថវិកាមួយចំនួន សម្លៀកបំពាក់ និងសម្ភារកីឡា ជូនដល់ក្រុមកីឡាករ ទាំង១៦ក្រុម ដែលមកពីខេត្តត្បូងឃ្មុំ ក្រចេះ រតនគិរី និងខេត្តកំពង់ចាមផងដែរ៕SRP
ខេត្តសៀមរាប៖នគរបាលស្រុកសូទ្រនិគម ចុះបង្ក្រាបល្បែងជល់មាន់មួយកន្លែងឈានដល់ការឃាត់ខ្លួនអ្នកលេងចំនួន៣នាក់។
ការបង្ក្រាបធ្វើឡើងនៅថ្ងៃទី០៩ ខែធ្នូ ឆ្នាំ២០២១ នៅចំណុច ភូមិព្រះត្រពាំង ឃុំដំដែក ស្រុកសូទ្រនិគម។
ជនសង្ស័យទាំង៣នាក់រួមមាន៖
១ ឈ្មោះ ព្រាប សារ៉ន ភេទប្រុសអាយុ៥២ ឆ្នាំ អាសយដ្ឋាននៅភូមិរុនខាងត្បូង ឃុំដានរុន ស្រុកសូទ្រនិគម។
២ ឈ្មោះ មុី មុិញ ភេទប្រុសអាយុ៤៧ឆ្នាំនៅភូមិត្រពាំង ឃុំដំដែក ស្រុកសូទ្រនិគម។
៣ ឈ្មោះ តូច ប៊ុនយ៉ង់ ភេទប្រុសអាយុ២៨ ឆ្នាំនៅភូមិត្រពាំង ឃុំដំដែក ស្រុកសូទ្រនិគម។
ក្នុងនោះដកហូតម៉ូតូចំនួន៦គ្រឿងផងដែរ។
សមត្ថកិច្ចបានបញ្ជាក់ថាក្រោយពីធ្វើកិច្ចសន្យា និងបានធ្វើការអប់រំរួច បានអនុញ្ញាតអោយមនុស្សទាំង៣នាក់ ត្រឡប់ទៅផ្ទះវិញ៕SRP
ភ្នំពេញ៖សម្តេចតេជោហ៊ុន សែន នាយករដ្ឋមន្ត្រី បានអំពាវនាវដល់ថ្នាក់ដឹកនាំស្ថាប័នសារព័ត៌មាន និងបងប្អូនអ្នកសារព័ត៌មាន ទាំងអស់សូមប្រកាន់ខ្ជាប់នូវក្រមសិលធម៌វិជ្ជាជីវៈសារព័ត៌មាននិងមានសុចរិតភាពក្នុងការបំពេញភារកិច្ច ចៀសវាងការបំពានច្បាប់និងវិជ្ជាជីវៈដោយគិតតែប្រយោជន៍ផ្ទាល់ខ្លួនធ្វើឱ្យប៉ះពាល់ដល់កិត្តិយស សេចក្តី ថ្ងៃថ្នូរ កិត្យានុភាពសា្ថប័នសារព័ត៌មាន និងអ្នកសារព័ត៌មានអាជីពដែលអនុវត្តបានត្រឹមត្រូវតាមវិជ្ជាជីវៈ។
នេះបើយោងតាមលិខិតចំនួន៤ទំព័រ របស់សម្ដេចផ្ញើជូនជនរួមជាតិក្នុងឱកាសវេទិកានិពន្ធនាយកសារព័ត៌មានកម្ពុជាស្តីពី «កូវីដ-១៩ បញ្ហាប្រឈមនិងឱកាសសម្រាប់អ្នកសារព័ត៌មាន» ថ្ងៃទី១១ ខែធ្នូ ឆ្នាំ២០២១នេះ៕SRP
ខេត្តបាត់ដំបង៖សម្តេចស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង បានថ្លែងប្រាប់ឱ្យមានការយកចិត្តទុកដាក់ មុខសញ្ញាមនុស្ស៤ក្រុម ទី១គឺមេឃុំ ទី២គឺស្មៀន ទី៣មេប៉ុសិ៍ត និងទី៤មេភូមិ។
សម្តេច ស ខេង បានមានប្រសាសន៍ក្រើនរំលឹកបែបនេះ នៅក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបញ្ចុះបឋមសិលាសាងសង់ អគារសិក្សា ១ខ្នង កម្ពស់៤ជាន់ នៅវិទ្យាល័យព្រះមុនីវង្ស ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង នៅថ្ងៃម្សិលមិញ។
សម្តេច ស ខេង បានសង្កត់ធ្ងន់នឹងក្រើនរំលឹកថា សូមឱ្យមានការយកចិត្តទុកដាក់មុខសញ្ញាមនុស្ស៤ក្រុម ទី១មេឃុំ ទី២ស្មៀន ទី៣មេប៉ុសិ៍ត និងទី៤មេភូមិ ប្រសិនបើមនុស្សទាំង៤ក្រុមនេះ ធ្វើការងារបានល្អ នុះមូលដ្ឋានកាន់តែរ៉ឺងមាំ ការរស់នៅរបស់ប្រជាពលរដ្ឋក៏មានសុខសុវត្ថិភាព ហើយការអភិវឌ្ឍន៍មូលដ្ឋានកាន់តែមានភាពល្អប្រសើរផងដែរ។
សម្តេចមានប្រសាសន៍បន្ថែមថា ការរៀបចំកំណែទម្រង់ថ្នាក់ក្រោមជាតិមិនអាចមានតែនៅក្នុងផែនការនោះទេ គឺទាមទារឱ្យមានការត្រួតពិនិត្យឱ្យបានល្អិតល្អន់ដោយកំណែទម្រង់នេះធ្វើឡើងក្នុងន័យការពារសុវត្ថិភាព ជូនប្រជាពលរដ្ឋឱ្យគាត់មានភាពកក់ក្តៅ និងពេញចិត្ត។
សម្តេចក្រឡាហោម បានមានប្រសាសន៍លើកឡើងទៀតថា ក្នុងពេលដែលប្រទេសជាតិមានសុខសន្តិភាព មន្ត្រីទាំងអស់ត្រូវយកពេលវេលានេះដើម្បីបម្រើប្រជាពលរដ្ឋ បម្រើសេវាសាធារណៈជូនដល់ពួកគាត់ឱ្យកាន់តែល្អ ដោយបេសកកម្មយើងនាពេលនេះគឺធ្វើអ្វីៗដើម្បីប្រជាជន។
សម្តេចបានបញ្ជាក់ថា នៅខែឧសភាខាងមុខនេះនឹងមានការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលនេះជាព្រឹត្តការណ៍ដ៏សំខាន់សម្រាប់ជាតិយើង ក្នុងការបន្តពង្រឹងលទ្ធិប្រជាធិបតេយ្យសេរីពហុបក្ស ក៏ដូចជាការបន្តជំរុញលើកស្ទួយជីវភាពប្រជាពលរដ្ឋឱ្យកាន់តែប្រសើរឡើង ខណៈបេក្ខភាពដែលឈរឈ្មោះបោះឆ្នោតសុទ្ធសឹងតែជាធនធានដែលពោពេញទៅដោយសមត្ថភាព៕SRP
ខេត្តបាត់ដំបង៖ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សម្ដេចស ខេង បានបញ្ជាដល់ថ្នាក់ដឹកនាំនៃអង្គភាពនគរបាលជាតិ ឱ្យពិនិត្យឡើងវិញ ចំពោះមន្ដ្រីនគរបាលឡើងឋានន្តរស័ក្តិ មួយឆ្នាំម្ដង ខណៈមន្ដ្រីនគរបាលមួយចំនួន ៥ឆ្នាំទើបឡើងឋានន្តរស័ក្តិម្តង ការធ្វើបែបនេះមិនយុត្តិធម៌គ្នាឡើយ។
សម្ដេច ស ខេង ក៏បានណែនាំឱ្យពិនិត្យតាំងពី អនុប្រធានការិយាល័យឡើងទៅ រហូតដល់អគ្គស្នងការរងនគរបាលជាតិ តើអ្នកណាខ្លះ បានរៀនប៉ូលីសត្រឹមត្រូវ ឬអ្នកណាមិនទាន់បានរៀន? បើរកឃើញហើយ ត្រូវចាត់បញ្ជូលឱ្យពួកគាត់ទៅរៀនវគ្គផ្នែកប៉ូលីសឡើងវិញ។
សម្ដេច ស ខេង មានប្រសាសន៍ថា «ហើយស័ក្តិ ក៏ដូចគ្នាដែរ ត្រូវពិនិត្យឋានន្តរស័ក្តិនគរបាល អ្នកខ្លះឡើងមួយឆ្នាំម្ដង តែអ្នកខ្លះ បីឆ្នាំ បួនឆ្នាំ ប្រាំឆ្នាំ ឡើងម្ដង ចឹងអយុត្តិធម៌ហើយ ចឹងត្រូវមើលឡើងវិញ ត្រូវពិនិត្យទាំងអស់ រកឃើញហើយ ចាត់ការដើម្បីដោះស្រាយ បើមិនចឹងទេ គឺអយុត្តិធម៌ សម្រាប់បងប្អូនប៉ូលីស»។
សម្ដេចក៏បានណែនាំឱ្យពិនិត្យបន្ថែមទៀត ចំពោះមន្ដ្រីនគរបាលប៉ុស្ដិ៍ ដើម្បីដឹងពីចំណុចខ្លាំង ចំណុចខ្សោយ ហើយរៀបចំដាក់ផែនការពង្រឹងបន្ថែមទៀត តើពួកគាត់មានក្របខណ្ឌ ឬរៀនសូត្រត្រឹមត្រូវអត់? ដើម្បីរៀបចំគោលការណ៍កំណែងទម្រង់គុណភាពនគរបាលជាតិ ជាពិសេសនោះ ធ្វើយ៉ាងណាឱ្យនគរបាល ប្រជាជន កុំឱ្យជាសត្រូវប្រជាជន ព្រមទាំងកូនចៅប្រជាជន ហើយធ្វើយ៉ាងណាឱ្យប្រជាជនសប្បាយចិត្ត និងជឿទុកចិត្ត ក្នុងការរស់នៅ។
មានប្រសាសន៍យ៉ាងដូច្នេះក្នុងពិធីបញ្ចុះបឋមសិលាសាងសង់អគារសិក្សា ១ខ្នង កម្ពស់៤ជាន់ មាន៣០បន្ទប់ ក្នុងបរិវេណវិទ្យាល័យព្រះមុនីវង្ស ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង នៅថ្ងៃទី១០ ខែធ្នូ ម្សិលមិញ៕SRP
ខេត្តកំពង់ចាម៖លោក កៅ សុខអាន អភិបាលរងខេត្តកំពង់ចាម បានថ្លែងថា បេីចង់ពង្រីកបរិមាណអប់រំ គឺត្រូវបន្ថែមសាលារៀន បន្ថែមគ្រូបង្រៀន បន្ថែមសម្ភារសិក្សា ពីព្រោះកុមារដល់វ័យសិក្សាកាន់តែមានការកើនឡើង ពីមួយឆ្នាំទៅមួយឆ្នាំ ចំពោះតម្រូវការទីផ្សារ ក៏ដូចជាសង្គម សុទ្ធតែទាមទាររកធនធានមនុស្សប្រកបដោយគុណភាព និងសមត្ថភាពខ្ពស់ ដោយប្រការនេះ សម្ដេចហ៊ុន សែន និងសម្តេច កិត្តិព្រឹទ្ធបណ្ឌិត ប៊ុន រ៉ានី ប៊ុនសន លោកបានកសាងអគារសិក្សាចំនួន ៣៨០ខ្នង ស្មើនឹង ២,៣៨៦បន្ទប់ ក្នុងនោះ វិទ្យាល័យចំនួន ១១១ខ្នង ស្មើនឹង ៨៤៥បន្ទប់ អនុវិទ្យាល័យចំនួន៤៨ខ្នង ស្មើនឹង ២៩៩បន្ទប់ និងបឋមសិក្សាចំនួន ២២១ខ្នង ស្មើនឹង ១២៤២បន្ទប់ និងបានបំពាក់សម្ភារតុ កៅអី សម្ភារ បរិក្ខារ មានម៉ាស៊ីនដេរ កុំព្យូទ័រ ដល់គ្រឹះស្ថានសិក្សានៅទូទាំងខេត្តកំពង់ចាម ដើម្បីលើកកម្ពស់គុណភាពអប់រំឲ្យ មានតុល្យភាព សមស្របទៅនឹងការពង្រីកបរិមាណអប់រំផងដែរ។
លោក កៅ សុខអាន ថ្លែងបែបនេះ រសៀលថ្ងៃទី១០ ខែធ្នូ ម្សិលមិញ ក្នុងពិធីប្រគល់ពានរង្វាន់“ សម្តេច តេជោសែន “ សម្រាប់លាភីនាយកល្អ គ្រូបង្រៀនឆ្នើមភាសាខ្មែរ និងគណិតវិទ្យាថ្នាក់ទី១ដល់ថ្នាក់ទី៣ និងពានរង្វាន់សាលាស្អាតឆ្នាំសិក្សា២០២០-២០២១។
លោក ថោង បូរ៉ាន់ អនុរដ្ឋលេខាធិការក្រសួងអប់រំយុវជននិងកីឡា មានប្រសាសន៍ថា សម្តេចហ៊ុន សែន លោកមានចក្ខុវិស័យខ្ពស់ណាស់ ក្នុងការដឹកនាំបណ្តុះបណ្តាលធនធានមនុស្ស ដូច្នេះសូមឲ្យលោកគ្រូ អ្នកគ្រូ បន្តការយកចិត្តទុកដាក់បំពេញការងារប្រកបដោយមនសិការរបស់ខ្លួន ជាពិសេសត្រូវពង្រឹងគុណភាពអប់រំ បន្ថែមទៀត ដេីម្បីកសាងធនធានមនុស្ស ប្រកបដោយភាពជោគជ័យ។
លោកលី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា ពានរង្វាន់សម្តេចតេជោ សម្រាប់លាភីគ្រូបង្រៀនល្អ និងគ្រូបង្រៀនឆ្នេីម ជាប់ចំណាត់ថ្នាក់លេខ ៣ ទទួលបានថវិកាលេីកទឹកចិត្ត ចំនួន ៣លានរៀល មានចំនួន ៣នាក់ សម្រាប់លាភីអំណានចំណាត់ថ្នាក់លេខ ២ និងនិពន្ធរឿងប្រលោមលោកខ្លី ថ្នាក់លេខ ៣ ទទួលបានថវិកា ២លានរៀល ចំនួន ២នាក់ ចំពោះការប្រកួតប្រជែងស្នាដៃយុវជនសតវត្សទី២១ ជ័យលាភីលេខ ១ ទទួលបាន មេដាយមាស និងថវិកាលើកទឹកចិត្ត ៤លានរៀល បានទៅលើក្រុមយុវជននៅវិទ្យាល័យហ៊ុនសែនពាមជីកង ស្រុកកងមាស ដោយឡែកការប្រកួតប្រជែងសិស្សពូកែគណិតវិទ្យា ទទួលជ័យលាភីមេដាយប្រាក់ចំនួន ៤ មេដាយសំរឹទ្ឋ ៨ មេដាយកិត្តិយស ២២ បានទៅលើយុវសិស្សនៅវិទ្យាល័យហ៊ុនសែនកំពង់ចាម។
ការប្រកួតប្រជែងសិស្សពូកែគណិតវិទ្យាការីប៊ូជុំទី១ និងជុំទី២ ទទួលជ័យលាភីមេដាយមាស២ ប្រាក់ចំនួន៤ និងមេដាយសំរឹទ្ឋ១៦ បានទៅលើ សិស្សបឋមសិក្សា អនុវត្តហ៊ុន សែន ក្រុងកំពង់ចាម ៕SRP
ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថា សន្តិភាពត្រូវបានចាត់ទុកជាមូលដ្ឋានគ្រឹះនៃសិទ្ធិមនុស្ស និងការអភិវឌ្ឍ ហើយតម្លៃសន្តិភាពត្រូវបានចារិតទុកក្នុងក្រអៅបេះដូង និងជាសេចក្តីត្រូវការចាំបាច់បំផុតរបស់ប្រជាជនកម្ពុជាទាំងមូល។
លោកថ្លែងយ៉ាងដូច្នេះក្នុងអង្គសិក្ខាសាលាស្តីពីការផ្សព្វផ្សាយរបាយការណ៍ជាតិ និងអនុសាសន៍នៃយន្តការពិនិត្យជាសកលតាមការកំណត់(UPR) ដែលបានធ្វើឡើងនៅព្រឹកមិមិញនេះនៅសាលាខេត្តកំពង់ចាម ក្រោមវត្តមាន លោក កែវ រ៉េមី រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធមនុស្សកម្ពុជា និងលោក ខ្លូត ផន ប្រធានក្រុមប្រឹក្សាខេត្ត។
លោក អ៊ុន ចាន់ដា បានលេីកឡេីងទៀតថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់ក្នុងការការពារសន្តិភាព ការគោរពសិទ្ធិមនុស្ស និងការអភិវឌ្ឍលើគ្រប់វិស័យ ដែលកិច្ចការទាំងនេះមិនត្រូវកាត់ផ្តាច់ ឬរំលងពីការគោរពសិទ្ធិមនុស្ស និងការចូលរួមពីប្រជាពលរដ្ឋគ្រប់រូបនោះឡើយ ហេីយកិច្ចការទាំងនេះអាចប្រព្រឹត្តិទៅបាន គឺអាស្រ័យលើកត្តាសន្តិភាពផងដែរ។
ក្នុងឱកាសនោះដែរ លោកអភិបាលខេត្ត ក៏បានថ្លែងអំណរគុណ ចំពោះគណៈកម្មាធិការសិទ្ធិមនុស្សកម្ពុជាដែលបានជ្រើសរើសយកខេត្តកំពង់ចាម សម្រាប់ការរៀបចំសិក្ខាសាលានេះឡើង ក្នុងន័យផ្សព្វផ្សាយឱ្យយើងទាំងអស់គ្នាបានដឹងអំពីរបាយការណ៍ជាតិ និងអនុសាសន៍ នៃយន្តការជាសកលតាមកាលកំណត់ (UPR) ដែលជាយន្តការមួយនៃអង្គការសហប្រជាជាតិដែលពិនិត្យលើគ្រប់វិស័យពាក់ព័ន្ធនឹងសិទ្ធិមនុស្សនៅកម្ពុជារួមមាន សិទ្ធិស្រ្តី សិទ្ធិកុមារ សិទ្ធិសេរីភាពបញ្ចេញមតិ សិទ្ធិទទួលបានការអប់រំ និងសិទ្ធិទទួលបានព័ត៌មាន ជាដើម។
លោក កែវ រ៉េមី បានលើកឡើងថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា លោកយកចិត្តទុកដាក់ខ្លាំងណាស់ អំពីសិទ្ធិរស់រានមានជីវិត បន្ទាប់ពីរំដោះប្រទេសជាតិចេញពីភ្នក់ភ្លើងសង្គ្រាម ហើយបាននាំមកនូវសុខសន្តិភាព ដោយមានការអភិវឌ្ឍន៍លេីគ្រប់វិស័យ ព្រមជាមួយការការពារ និងលើកកម្ពស់សិទ្ធិមនុស្ស នីតិរដ្ឋ ផងដែរ៕SRP
ខេត្តសៀមរាប៖បុរសជាតៃកុងបានរងរបួស ខណៈបើករថយន្តទៅបុក បុកដើមប្រេងខ្យល់។
ហេតុការណ៍បានកើតឡើង នៅថ្ងៃទី៩ខែធ្នូ ឆ្នាំ ២០២១ វេលាម៉ោង០៦ នៅចំណុចចន្លោះគីឡូម៉ែត្រលេខ២៧៨.២៧៩ ផ្លូវជាតិលេខ ៦ ភូមិជីគាក ឃុំកៀនសង្កែ ស្រុកសូទ្រនិគម ខេត្តសៀមរាប។
របាយការណ៍របស់សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះគឺបង្កឡើងដោយខ្លួនឯង រថយន្ត ម៉ាកHYUNDAI ពណ៌ខៀវ ចាស់ពាក់ផ្លាកលេខ កណ្តាល2B.8809 បើកបរដោយឈ្មោះប៉ូច សុផាត ភេទប្រុស អាយុ ៣០ឆ្នាំ មានទីលំនៅភូមិចុង ឃុំពោធិ៍ទី ស្រុកស៊ីធកណ្តាល ខេត្តព្រៃវែង។បើកបររថយន្តក្នុងទិសដៅពី លិចទៅកើត បានជ្រុលចង្កូត ទៅបុកដើមប្រេងខ្យល់ នៅខាងជើងផ្លូវបណ្ដាលឱ្យអ្នកបើកបររថយន្តរងរបួសមធ្យម រថយន្តធ្ងន់។
របាយការណ៍បានបន្ថែមថា មូលហេតុគ្រោះថ្នាក់ចរាចរណ៍ អ្នកបើករថយន្តបើកបរល្បឿនលឿន បើកបរស្ថិតនៅក្នុងភាពងងុយដេក។ វត្ថុតាងត្រូវបានកំលាំងជំនាញបានយកមករក្សាទុកនៅអធិការដ្ឋានគរបាលស្រុកសូទ្រនិគម ដើម្បីចាត់ការតាមនីតិវិធីច្បាប់៕SRP
