ខេត្តកំពង់ចាម៖អភិបាលខេត្ត បានប្រាប់លោកស្រីប្រធានមន្ទីរ ដែលទើបទទួលបានការប្រគល់ភារកិច្ចថ្មី ត្រូវខិតខំបំពេញការងារឲ្យអស់ពីសមត្ថភាព លទ្ធភាព ទេពកោសល្យ ការប៉ិនប្រសប់ និងគំនិតច្នៃប្រឌិតរស់រវើក ក្នុងស្មារតីយកចិត្តទុកដាក់ លេីការដឹកនាំ និងភាពទទួលខុសត្រូវខ្ពស់ផងដែរ។
លោក អ៊ុន ចាន់ដា អភិបាលខេត្តកំពង់ចាម បានលេីកឡើងថា បច្ចុប្បន្ននេះ រាជរដ្ឋាភិបាលកម្ពុជា បានកំពុងកំណែទម្រង់ស៊ីជម្រៅគ្រប់ជ្រុងជ្រោយនោះ ក្នុងនាមជាថ្នាក់ដឹកនាំមន្ទីរជំនាញ ត្រូវមានការធានារ៉ាប់រងនូវតួរនាទី និងភារកិច្ចស្នូលរបស់អង្គភាព គឺជាប្រការសំខាន់ ដែលត្រូវយកចិត្តទុកដាក់ និងបំពេញតួនាទី ភារកិច្ច ឲ្យបានខ្ជាប់ខ្ជួនគ្រប់ពេលវេលា និងហ្មត់ចត់បំផុត។
លោក អ៊ុន ចាន់ដា បានថ្លែងថា ពេលធ្វើជាថ្នាក់ដឹកនាំ ជាមេគេហើយ គឺពិតជាមានអម្រែកធ្ងន់ណាស់ ដូច្នេះត្រូវទាមទារឲ្យមានសិល្បៈនៃការចែករំលែក ទេីបមានសាមគ្គីភាពផ្ទៃក្នុង ព្រោះថាការយកចិត្តទុកដាក់ចំពោះមន្ត្រីក្រោមឱវាទ គឺជាគន្លឹះដ៏សំខាន់ធ្វើឲ្យមន្ត្រីរាជការគោរព និងមានស្មារតីចូលរួមបំពេញការងារប្រកបដោយឆន្ទៈខ្ពស់។
លោកថ្លែងយ៉ាងដូច្នេះក្នុងពិធីប្រកាសតែងតាំងលោកស្រី ស៊ាង វណ្ណលក្ខិណា ចូលកាន់តំណែងជាប្រធានមន្ទីរកិច្ចការនារីខេត្តកំពង់ចាម នៅព្រឹកមិញនេះក្រោមវត្តមាន លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងលោក ខ្លូត ផន ប្រធានក្រុមប្រឹក្សាខេត្តកំពង់ចាម៕SRP
