ខេត្តបន្ទាយមានជ័យ៖ប្រជាពលរដ្ឋប្រមាណជាង២០ គ្រួសារមានទីលំនៅភូមិអូឬស្សី សង្កាត់ផ្សារកណ្ដាល បានស្នើសុំដល់អាជ្ញាធរក្រុងប៉ោយប៉ែត ជួយបើកផ្លូវចាស់ ឲ្យពួកគាត់អាចធ្វើដំណើរឡើងវិញ។

ការស្នើសុំនេះតាមរយៈផ្ដល់បទសម្ភាសន៍ដល់អ្នកសារព័ត៌មានកាលពីថ្ងៃទី០៧ ខែកញ្ញា ឆ្នាំ២០២១ម្សិលមិញ ដោយសារពួកគាត់ជាង ២០ គ្រួសារ បានដាក់ពាក្យបណ្ដឹងនិងលិខិតអន្តរាគមន៍ ជាច្រើនលើក មកហើយដើម្បីស្នើសុំ ឲ្យអាជ្ញាធរក្រុងប៉ោយប៉ែត ជួយអន្តរាគមន៍បើកផ្លូវ ដែលមានស្រាប់ មានទទឹង ២០ម៉ែត្រគុណនឹងបណ្ដោយ ៣០ ម៉ែត្រ តភ្ជាប់ទៅផ្លូវក្រុងលេខ៥០ ស្ថិតនៅក្នុងភូមិអូរឫស្សីសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

ប្រភពបានឲ្យដឹងថាករណីនេះដោយសារតែមានបុគ្គលបានរំលោភយកធ្វើជាកម្មសិទ្ធិ នៅក្នុងកំឡុងឆ្នាំ ២០០៩ រហូតមកដល់ពេលនេះ មានរយៈពេល១២ ឆ្នាំមកហើយ ប៉ុន្តែអាជ្ញាធរក្រុងប៉ោយប៉ែត បានត្រឹមតែសន្យា ជួយរកដំណោះស្រាយ ប៉ុណ្ណោះ។

លោកតា គឹម ហ៊ាន មានវ័យ៧០ ឆ្នាំមានទីលំនៅភូមិអូរឬស្សី សង្កាត់ផ្សារកណ្ដាល ក្រុងប៉ោយប៉ែតតំណាងឲ្យប្រជាពលរដ្ឋទាំង២០ គ្រួសារបានលើកឡើងថា ពួកគាត់កើតទុក្ខមិនសុខចិត្តចំពោះបុគ្គលចំនួនពីរនាក់ ទី១ ឈ្មោះធាប គឹមសាង អតីតមេភូមិអូរឬស្សីចាស់ និងបច្ចុប្បន្នជានាយសាលាបឋមសិក្សាអូរឫស្សីលើ មានទីលំនៅភូមិអូរឬស្សី សង្កាត់ផ្សារកណ្ដាល ក្រុងប៉ោយប៉ែត ទី២ឈ្មោះលីវ អ៊ីធី ភេទប្រុសអាយុ៤៧ ឆ្នាំ មានទីលំនៅបច្ចុប្បន្នភូមិទ្រា សង្កាត់ស្ទឹងមានជ័យ ខណ្ឌស្ទឹងមានជ័យ រាជធានីភ្នំពេញ។ ដោយបុគ្គលទាំងពីរនាក់នេះ ឃុបឃិតគ្នាធ្វើលិខិត ទិញលក់ នៅលើដីផ្លូវសាធារណៈរបស់រដ្ឋដើម្បីយកធ្វើជាកម្មសិទ្ធិរបស់ខ្លួន។ ករណីអាចមានការឃុបឃិតគ្នាពីអាជ្ញាធរមូលដ្ឋានភូមិ សង្កាត់ និងក្រុងប៉ោយប៉ែត ចាស់ផងដែរ។

លោកតា គឹម ហ៊ាន បន្តទៀតថា កាលពីថ្ងៃទី ២១ ខែកុម្ភៈឆ្នាំ ២០២១ ពួកគាត់ជាប្រជាពលរដ្ឋទាំង២០ គ្រួសារដែលមានរូបលោក ជាតំណាងបានដាក់ពាក្យបណ្ដឹងអន្តរាគមន៍ទៅ លោក គៀត ហ៊ុល អភិបាល ក្រុងប៉ោយប៉ែត ដើម្បីឲ្យលោកជួយរកដំណោះស្រាយ អន្តរាគមន៍បើកផ្លូវទទឹង២០ ម៉ែត្រនិងបណ្ដោយ៣០ ម៉ែត្រ ប្រយោជន៍ដល់ការប្រើប្រាស់ របស់ប្រជាពលរដ្ឋឡើងវិញ ព្រោះដីផ្លូវនេះគឺជាដីផ្លូវសាធារណៈរបស់រដ្ឋ ដែលមានក្នុងគំនូសបង្ហាញប្លង់ របស់ជំនាញសុរិយោដីផងដែរ ប៉ុន្តែរហូតមកដល់ពេលនេះ លោក អភិបាលក្រុងប៉ោយប៉ែត មិនទាន់មានដំណោះស្រាយ ឲ្យពួកខ្ញុំអាចធ្វើដំណើរ លើផ្លូវខាងលើនៅឡើយទេ។ ពលរដ្ឋបានបន្តថា ក្នុងករណីនេះ ប្រសិនជាលោកអភិបាលក្រុង មិនដោះស្រាយនោះទេ គួរតែលោកបញ្ជូនសំណុំរឿងនេះ ទៅរដ្ឋខេត្តបន្ទាយមានជ័យ ដើម្បីឲ្យអាជ្ញាធរខេត្តមានវិធានការ។

បើតាមលោកគឹម ហ៊ាន បានបន្ថែមថាដីផ្លូវទាំងនេះ គឺមានក្នុងគម្រោង របស់គណៈកម្មការបែងចែកដីឡូតិ៍ ជូនប្រជាពលរដ្ឋតាំងពីឆ្នាំ ២០០០មកម៉្លេះ ដោយនៅក្នុងកំឡុងឆ្នាំ ២០០៦ ពួកគាត់ ក្នុងភូមិអូឬស្សី បានចូលរួមឧបត្ថម្ភប្រាក់សាមគ្គីដើម្បីសាងសង់ផ្លូវបាន ៤ខ្សែ ដោយក្នុងមួយខ្សែដែលមានទទឹង ២០ម៉ែត្របណ្ដោយប្រវែង១៧៥ម៉ែត្រ ក្រោយពេលសាងសង់រួចហើយ ប្រជាពលរដ្ឋអាចធ្វើដំណើរចេញចូលបានធម្មតា។ ដោយឡែកផ្លូវលំខ្សែទីមួយនេះប្រជាពលរដ្ឋ បានសាងសង់នៅសល់ប្រមាណ ៣០ ម៉ែត្រ ត្រូវបានលោកមេភូមិថ្មីអូឬស្សី យកអេស្កាកាយដី លើកដីធ្វើបន្ត តែត្រូវបានឈ្មោះធាប គឹមសាង មករារាំងហាមឃាត់ មិនឱ្យមេភូមិថ្មី និងប្រជាពលរដ្ឋ បានសាងសង់ផ្លូវថ្មី លើផ្លូវចាស់នោះទេ ដោយលោកធាប គឹមសាង បានប្រាប់ថា ដីនេះខ្លួនបានទិញពីម្ចាស់ដើម គេមានលិខិតស្នាមត្រឹមត្រូវ។ ជាមួយគ្នានេះដែរ ឈ្មោះធាប គឹមសាង បានធ្វើរបងថ្មព័ទ្ធលួសបន្លាយ៉ាងខ្ពស់រឹងមាំ មិនឱ្យ ប្រជាពលរដ្ឋធ្វើដំណើរចេញចូល រហូតមកដល់សព្វថ្ងៃនេះ។ ដូច្នោះហើយទើបពួកគាត់ជាង២០ គ្រួសារ ស្នើសុំ ទៅអាជ្ញាធរក្រុងប៉ោយប៉ែត និងឯកឧត្តម អ៊ុំ រាត្រី អភិបាលខេត្តបន្ទាយមានជ័យ យអន្តរាគមន៍ បើកផ្លូវចំណុចខាងលើឲ្យពួកគាត់អាចធ្វើដំណើរបានវិញផង។

ជុំវិញការចោទប្រកាន់នេះ អង្គភាពសៀមរាបប៉ុស្ដិ៍ នៅមិនទាន់ទទួលបានការបំភ្លឺពីលោកឈ្មោះធាប គឹមសាង អតីតមេភូមិអូរឬស្សីចាស់ និងឈ្មោះលីវ អ៊ីធី បាននៅឡើយទេ ដោយមិនមានលេខទាក់ទំនង។

សូមបញ្ជាក់ថាអាជ្ញាធរខេត្តបន្ទាយមានជ័យ ធ្លាប់បាន ចេញសារាចរ អាជ្ញាធរស្រុក ក្រុង ក្នុងខេត្តបន្ទាយមានជ័យ ឲ្យចូលរួមទប់ស្កាត់ ការរំលោភយកដីចំណីផ្លូវ នឹងដីផ្លូវសាធារណៈរបស់រដ្ឋ ការចាក់លុបរំលោភយកធ្វើជាកម្មសិទ្ធិ ផ្ទាល់ខ្លួន ដោយមិនមានការលើកលែងចំពោះបុគ្គលណារំលោភយកនោះឡើយ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានតែងតាំង លោក ទូច សុខា ជាអភិបាលរងខេត្តកំពង់ធំ។ នេះបើយោងតាមអនុក្រឹត្យ ដែលចុះហត្ថលេខា ដោយសម្ដេចតេជោ ហ៊ុន សែន៕SRP

ភ្នំពេញ៖នាយករដ្ឋមន្ត្រី ហ៊ុន សែន បានចេញសារលិខិតរបស់ ក្នុងឱកាសប្រារព្ធទិវាអក្ខរកម្មជាតិ ៨ កញ្ញា ២០២១។ សូមអានលិខិតខាងក្រោម៖

ភ្នំពេញ៖អ្នកនាំពាក្យ កងរាជអាវុធហត្ថលើផ្ទៃប្រទេស បានសុំឱ្យផេកហ្វេសប៊ុក គណនីឈ្មោះ ហង្ស សំណាង ធ្វើការកែតម្រូវអំពីការផ្សព្វផ្សាយរបស់ខ្លួន ដូចមានចែងក្នុងមាត្រា១០ នៃច្បាប់ស្តីពីរបបសារព័ត៌មាន។ ក្នុងករណីមិនព្រមធ្វើការកែតម្រូវនោះទេ កងរាជអាវុធហត្ថ នឹងប្រគល់សិទ្ធិជូនមេធាវី ដើម្បីប្ដឹងទាម ទារសងជំងឺចិត្តទៅតាមផ្លូវតុលាការ។

នេះបើយោងតាមសេចក្តីប្រកាសព័ត៌មានរបស់កងរាជអាវុធហត្ថលើផ្ទៃប្រទេស ចុះនៅថ្ងៃទី ៧ ខែកញ្ញាឆ្នាំ ២០២១ ម្សិលមិញ៕SRP

ខេត្តស្ទឹងត្រែង៖កម្លាំងអាវុធហត្ថខេត្តស្ទឹងត្រែងបានឃាត់ខ្លួនអ្នកសារព័ត៌មានចំនួន១០នាក់នៅពីថ្ងៃទី០៧ ខែកញ្ញាឆ្នាំ២០២១ ព្រឹកមិញនេះ។

សមត្ថកិច្ចក្នុងហេតុការណ៍ បានឲ្យដឹងថាអ្នកសារ ព័ត៌មានចំនួន១១នាក់ជិះរថយន្ត៣គ្រឿងបានឃាត់រថយន្តយីឌុបដឹកឈើ ប្រភេទគ្រឿងផ្ទះមួយគ្រឿង នៅលើដងផ្លូវជាតិលេខ៩ ស្ថិតត្រង់ចំណុចផ្លូវចូលជាំធំឃុំស្រែឫស្សី ស្រុកថាឡាបរិវ៉ាត់ ខេត្តស្ទឹងត្រែង។

ប្រភពបន្តថា អ្នកសារព័ត៌មានទាំងនោះមិនមែនជាអ្នកនៅ ក្នុងខេត្តស្ទឹងត្រែងទេ គឺពួកគេមកពីតាមបណ្ដាខេត្តផ្សេងដែលបានចុះមកបំពេញ ការងារក្នុងភូមិសាស្ត្រខេត្តស្ទឹងត្រែង។ លុះពេលប្រទះឃើញរថយន្តដឹកឈើខាងលើ ក៏បានឃាត់និងរាយការណ៍ទៅសមត្ថកិច្ច។ បន្ទាប់មកមន្ត្រីកងរាជអាវុធហត្ថខេត្តស្ទឹងត្រែងក៏បានចុះទៅដល់ទីតាំង ដែលរថយន្តក្រុមអ្នកសារព័ត៌មានបានឃាត់រថយន្តដឹកឈើនោះ។ បន្ទាប់ពីមន្ត្រីអាវុធហត្ថចុះទៅដល់ទីតាំងស្រាប់តែអ្នកសារព័ត៌មានទាំងនោះ នាំគ្នាបើករថយន្តចេញអស់។ ខណ:នោះ អ្នកដឹកឈើក៏បានប្ដឹងចោទប្រកាន់ក្រុមអ្នកសារព័ត៌មានពីបទ កំហែងយកទារប្រាក់ចំនួន ៤០០០ដុល្លារ។

ក្រោយពីមានពាក្យបណ្ដឹងពីអ្នកដឹកឈើកម្លាំងកងរាជអាវុធហត្ថខេត្ត ក៏បានឃាត់រថយន្តកាមរីពណ៌ក្រហមមួយគ្រឿងនិងរថយន្ត ២គ្រឿងទៀតត្រូវកងរាជអាវុធហត្ថស្រុកឆែបខេត្តព្រះវិហារ ឃាត់បញ្ជូនមកខេត្តស្ទឹងត្រែង។

អ្នកសារព័ត៌មានចំនួន១១នាក់ត្រូវបានសមត្ថកិច្ចឃាត់ខ្លួន១០នាក់ ហើយម្នាក់ទៀតបានគេចខ្លួន។ ចំពោះរថយន្តដឹកឈើមួយគ្រឿងនោះក៏ត្រូវបានឃាត់ទុកផងដែរ។

ប្រភពបញ្ជាក់ថា រថយន្តដឹកឈើខាងលើនោះ មានទិសដៅចេញពីភូមិស្រឡៅ ឃុំអន្លង់ជ្រៃ ស្រុកថាឡាប រិវ៉ាត់ខេត្តស្ទឹងត្រែង ឆ្ពោះទៅកាន់ភូមិតារេនជោ ឃុំអង្កាញ់ ស្រុកទ្រាំង ខេត្តតាកែវ ដោយមានការអនុញ្ញាតពីជំនាញផ្នែករដ្ឋបាលព្រៃឈើស្រុកថាឡាបរិវ៉ាត់ ដើម្បីយកទៅសាងសង់លំនៅដ្ឋាននៅខេត្តតាកែវ។

ទោះបីយ៉ាងណាករណីនេះ សមត្ថកិច្ចមិនទាន់បញ្ជាក់ថា ក្រុមអ្នកសារព័ត៌មានខាងលើ នឹងត្រូវដោះលែងឬបញ្ជូនទៅតុលាការនោះទេ ត្បិតកំពុងធ្វើការសាកសួរនៅឡើយ៕SRP

ភ្នំពេញ៖នាយកដ្ឋានព័ត៌មានវិទ្យា បានឲ្យដឹងថា កន្លងមក នាយកដ្ឋានព័ត៌មានវិទ្យាធ្លាប់បានធ្វើការផ្សព្វផ្សាយនូវអត្តបទអប់រំ ស្តីអំពី “ហានិភ័យនៃកម្ចីអនឡាញខុសច្បាប់ (Loan Shark / Scam)” ដែលអត្ថបទនោះបានអធិប្បាយអំពីល្បិចកល ដែលជនខិលខូចបានអនុវត្តក្នុងការឆបោក ឬដាក់អន្ទាក់ទៅលើជនរងគ្រោះ ព្រមទាំងបរិយាយអំពីហានិភ័យពាក់ព័ន្ធមួយចំនួនផងដែរ។

នាយកដ្ឋានព័ត៌មានវិទ្យា បានបន្តថា ថ្មីៗនេះ ដោយទទួលបានសេចក្តីរាយការណ៍ជាបន្តបន្ទាប់ពីមហាជន ក្រុមការងារយើងខ្ញុំ សូមលើកយកនូវល្បិចកល និងបច្ចេកទេសថ្មី ដែលជនខិលខូចបានប្រើប្រាស់ក្នុងការអូសទាញជនរងគ្រោះឲ្យយល់ព្រមខ្ចីប្រាក់អនឡាញ ជាសង្ខេបដូចខាងក្រោម៖

១- ជនខិលខូចបានបង្កើតទំព័រហ្វេសប៊ុកផេក ឬគេហទំព័រ ដោយដាក់ឈ្មោះក្រុមហ៊ុនកម្ចីប្រាក់អនឡាញ។

២- ជនខិលខូចធ្វើការផ្សព្វផ្សាយទំព័រហ្វេសប៊ុកផេក ឬគេហទំព័រ (Ads) លើបណ្តាញទំនាក់ទំនងសង្គម ដើម្បីធ្វើការអូសទាញការចាប់អារម្មណ៍ពីជនរងគ្រោះ។

៣- ជនរងគ្រោះអាចធ្វើការស្នើសុំកម្ចីពីជនខិលខូច ជាមួយលក្ខខណ្ឌងាយៗ ដោយគ្រាន់តែផ្តល់នូវរូបថតអត្តសញ្ញាណប័ណ្ណ លេខទូរស័ព្ទ រូបភាព ឬវីដេអូអាក្រាតកាយរបស់ជនរងគ្រោះ។

៤- ជនខិលខូចនឹងប្រើប្រាស់ព័ត៌មានអត្តសញ្ញាណប័ណ្ណ រូបភាព ឬវីដេអូអាក្រាតកាយ ដើម្បីគំរាមកំហែងជនរងគ្រោះករណីពុំសងប្រាក់ ឬបង់ការប្រាក់ដ៏ច្រើនលើសលប់។

៥- ករណីមួយចំនួន ជនខិលខូចបានធ្វើការប្រើប្រាស់រូបភាព ឬវីដេអូអាក្រាតកាយជនរងគ្រោះគំរាមទារប្រាក់ ឬជួញដូរផងដែរ។

ជាថ្មីម្តងទៀតក្រុមការងារនាយកដ្ឋានព័ត៌មានវិទ្យា សូមធ្វើការក្រើនរំលឹកដល់បងប្អូនប្រជាពលរដ្ឋ មេត្តាប្រុងប្រយ័ត្នខ្ពស់ពាក់ព័ន្ធនឹងប្រភេទបទល្មើសខាងលើ និងត្រូវប្រុងប្រយ័ត្នក្នុងការរក្សាការពារព័ត៌មានបុគ្គល តួរយ៉ាងដូចជាអត្តសញ្ញាណប័ណ្ណ ប័ណ្ណធនាគារ លេខទូរស័ព្ទ អាសយដ្ឋានស្នាក់នៅ រូបភាព ឬវីដេអូផ្ទាល់ខ្លួន ចៀសវាងការចែករំលែក ឬផ្ញើឲ្យអ្នកណាម្នាក់ដោយមិនស្គាល់អត្តសញ្ញាណឬប្រភពច្បាស់លាស់៕SRP

ខេត្តបាត់ដំបង៖ក្មេងស្ទាវចំនួន​ ១០​ នាក់​ ត្រូវបានកម្លាំងនគរបាលខេត្តបាត់ដំបងចាប់ខ្លួន ពាក់ព័ន្ធប្រើហិង្សា​ដោយ​ចេតនា​មាន​ស្ថានទម្ងន់​ទោស​ ដោយសារ​មរណភាពនៃ​​ជនរងគ្រោះ​។

ការចាប់ខ្លួនធ្វើឡើង នៅ​ថ្ងៃទី​ ៦​ ខែ​ កញ្ញា​ ឆ្នាំ​ ២០២១​ ម្សិលមិញ នៅ​ចំណុច​ភូមិ​ព្រែកតាតន់​ សង្កាត់​ព្រែកព្រះស្តេច​ ក្រុង​បាត់ដំបង​ ដោយក្រុមអន្តរាគមន៍​ បង្ការ​ បង្ក្រាប។

លោក​ ឈឿង​ គឹមសុង​ នាយការិយាល័យ​នគរបាល​ព្រហ្មទណ្ឌ​កម្រិត​ស្រាល​ បានឲ្យដឹងថា៖ជនសង្ស័យ៖
ឈ្មោះ​ ថាវ​ វុត្ថា​ ភេទប្រុស​ អាយុ​២០​ឆ្នាំ​ មានទីលំនៅ​ភូមិ​ព្រែកតាតន់​ សង្កាត់​ព្រែកព្រះស្តេច​ ក្រុង​បាត់ដំបង​​។

២ឈ្មោះ​ សែម​ វិរ:​ ភេទប្រុស​ អាយុ​១៨​ឆ្នាំ​ មានទីលំនៅ​ភូមិ​អញ្ចាញ​ សង្កាត់​អូរចារ​ ក្រុងបាត់ដំបង។

៣ឈ្មោះ​ មាស​ គ្រឹស្នា​ ហៅ​ បារាំង​ ភេទប្រុស​ អាយុ​១៩​ ឆ្នាំ​ មានទីលំនៅ​ ភូមិ​រំចេក៤​ សង្កាត់​រតនៈ​​។

៤ឈ្មោះ​ វី​ ចិន្តា​ ហៅ​ ខ្មៅ​ ភេទប្រុស​ អាយុ​ ១៥​ ឆ្នាំ​ មានទីលំនៅ​ភូមិ​ត្រាង​ ឃុំ​អូរតាគី​ ស្រុក​ថ្មគោល​​។

៥ឈ្មោះ​ ដៀប​ សុខឡេង​ ភេទប្រុស​ អាយុ​ ១៧​ ឆ្នាំ​ មានទីលំនៅ​ភូមិ​ទួលតាឯក​ សង្កាត់​ទួលតាឯក​ ក្រុងបាត់ដំបង​​។

៦ ឈ្មោះ​ លី​ ថុនា​ ភេទប្រុសអាយុ​ ២៣​ ឆ្នាំ​ មានទីលំនៅ​ភូមិ​គោកក្តួច​ ឃុំ​តាពូង​ ស្រុក​ថ្មគោល​​។

៧ឈ្មោះ​ សុក​ ប៊ុន​ទិត្យ​ ភេទប្រុសអាយុ​ ១៧​ ឆ្នាំ​ មានទីលំនៅ​ ភូមិ​ទួលតាឯក​ សង្កាត់​ទួលតាឯក ក្រុងបាត់ដំបង។

៨ឈ្មោះ​ វ៉ាន់​ ហុកហេង​ ហៅ​ស្រួច​ ភេទប្រុស​ អាយុ​ ១៦​ ឆ្នាំ​ មានទីលំនៅ​ភូមិ​ទួលតាឯក​ សង្កាត់​ទួលតាឯក​ ក្រុងបាត់ដំបង​​។

៩ ឈ្មោះ​ ឆិល​ ឡង់ឌី​ ភេទប្រុស​ អាយុ​ ១៧​ ឆ្នាំ​ មានទីលំនៅ​ ភូមិ​ ទួលតាឯក​ សង្កាត់​ទួលតាឯក​ ក្រុងបាត់ដំបង។

១០ឈ្មោះ​ សឺន​ សិទ្ធិ​សក័​ ភេទប្រុស​ អាយុ​ ១៧​ ឆ្នាំ​ មានទីលំនៅ​ភូមិ​ អូរតាគាំ​២​ សង្កាត់​ទួលតាឯក​ ក្រុងបាត់ដំបង។

សូមជម្រាបថាកាល​ពី​ថ្ងៃទី​ ០៥​ ខែ​ កញ្ញា​ ឆ្នាំ​ ២០២១​ វេលាម៉ោង​ ប្រហែល​ ២២និង៤០​ នាទី​ នៅ​ចំណុច​ ក្រុមទី​២២​ ​ភូមិ​អញ្ចាញ​ សង្កាត់​អូរចារ​ ក្រុងបាត់ដំបង​ ខេត្ត​បាត់ដំបង​ ជនសង្ស័យ​ទាំង​២​ ក្រុមបាន​ធ្វេី​សកម្មភាព​ ប្រេីប្រាស់​កាំបិត​ ដំបង​ និង​ ដុំថ្ម​ កាប់​ វាយ​ និង​គប់​ទៅ​លេី​ ជនរងគ្រោះ​ឈ្មោះ​ អ៊ាង​ វិសាល​ ភេទប្រុស​ អាយុ​ ១៧​ ឆ្នាំ​ មានទីលំនៅ​ភូមិ​ ទួលតាឯក​ សង្កាត់​ ទួលតាឯក​ ក្រុងបាត់ដំបង​ ខេត្ត​ បាត់ដំបង​ បណ្តាល​ឲ្យ​ ស្លាប់​ នៅ​ពេល​ដែល​បញ្ជូន​ទៅ​សង្គ្រោះ​បន្ទាន់​នៅ​មន្ទីរពេទ្យ​។

ករណីនេះសមត្ថកិច្ច ដកហូត វត្ថុតារួម​មាន​៖​ដំបង​ដែក​មាន​រាង​បួន​ជ្រុង​ ប្រវែង​៧០សង់ទីម៉ែត្រ​១​ដេីម​។ កាំបិត​ដែក​ មាន​ដង​ឈេី​ ប្រវែង​៩០​សង់ទីម៉ែត្រ​ ១​ដេីម។
ម៉ូតូ​ម៉ាក​ហុងដា​ វេវ​ពណ៌ស​ គ្មា​ន​ស្លាកលេខ​១​គ្រឿង​។

បច្ចុប្បន្ន​កសាងសំណុំរឿង​ដេីម្បី​បញ្ជូន​ទៅ​សាលាដំបូង​ខេត្ត​បាត់ដំបង​ចាត់ការ​បន្ត​តាម​នីតិវិធី​។

សូមបញ្ជាក់ថា ប្រតិបត្តិការនេះ ដឹកនាំដោយលោក​ ឈឿង​ គឹមសុង​ នាយការិយាល័យ​នគរបាល​ព្រហ្មទណ្ឌ​កម្រិត​ស្រាល​ សហការ​ជាមួយ​នគរបាល​ព្រហ្មទណ្ឌ​កម្រិត​ធ្ងន់​ និងនគរ​បាល​ក្រុង​បាត់ដំបង​ តាមការណែនាំពី​លោក សាត​ គឹមសាន​ ស្នងការ​ ស្នងការខេត្តបាត់ដំបង​ ក្រោមបញ្ជារបស់លោក កែវ​ សុជាតិ​ ព្រះរាជអាជ្ញា​ អយ្យការ​អមសាលាដំបូងខេត្តបាត់ដំបង​៕SRP

ខេត្តសៀមរាប៖ប្រជាពលរដ្ឋ ដែលជួបការលំបាក ដោយសាររងផលប៉ះពាល់នៃជំងឺកូវីដ១៩ ចំនួន ៣០គ្រួសារ នៅក្នុងសង្កាត់ស្វាយដង្គំ បានទទួលអំណោយ ពីសមាគមចលនាយុវជនកម្ពុជា (ក្រុម១៥៧) ក្រុងសៀមរាប ។

ការផ្ដល់អំណោយ នៅថ្ងៃអង្គារ ទី០៧ ខែកញ្ញាឆ្នាំ២០២១នេះ ស្ថិតក្នុងបរិវេណវត្តចក ភូមិស្វាយព្រៃ សង្កាត់ស្វាយដង្គំ ក្រុងសៀមរាប ។

ពិធីនេះមានការចូលរួមពីលោក សឹង្ហ សំរឹទ្ធ អនុប្រធាន សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប លោក នួន ពុទ្ធារ៉ា អភិបាលក្រុងសៀមរាប និង លោកស្រី សួន មុលឡា ប្រធានសមាគមចលនាយុវជនកម្ពុជា (ក្រុម១៥៧) ក្រុងសៀមរាប សមាជិក សមាជិកា អាជ្ញាធរសង្កាត់ផងដែរ។

លោក សឹង្ហ សំរឹទ្ធិ ក្នុងនាមតំណាង លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប បានមានមតិសំណេះសំណាល ទៅកាន់ប្រជាពលរដ្ឋ ដោយឲ្យសូមយកចិត្តទុកដាក់ អោយបានខ្ពស់នូវអនាម័យ ដើម្បីចៀសផុតពីជំងឺកូវីដ-១៩។

លោក សឹង្ហ សំរឹទ្ធិ ក៏បានផ្ដាំផ្ញើដល់ប្រជាពលរដ្ឋទាំងអស់ត្រូវដេក ក្នុងមុង ការពារកុំអោយមូសខាំ ដោយហេតុថាពេលនេះជារដូវវស្សា ដើម្បីចៀសផុតពីជំងឺផ្សេងៗ និងជំងឺគ្រុនឈិកផងដែរ។

ក្នុងពិធីចែកអំណោយនេះដែរ លោក នួន ពុទ្ធារ៉ា បានថ្លែងអំណរគុណយ៉ាងជ្រាលជ្រៅ ចំពោះប្រមុខរដ្ឋាភិបាលកម្ពុជា សម្ដេចហ៊ុន សែន ដែលបានស្វែងរកវ៉ាក់សាំងចាក់ជូនប្រជាពលរដ្ឋបានគ្រប់ៗគ្នា។ ក្នុងនោះលោកក៏បានរំលឹកអរគុណ ដល់សម្ដេចទៀ បាញ់ ឯកឧត្តមទៀ សីហា ឯកឧត្តមសៀង ណាំ ដែលលោកតែងតែយកចិត្តទុកដាក់ចំពោះសុខទុកប្រជាពលរដ្ឋនៅតាមមូលដ្ឋានគ្រប់កាលៈទេសៈ មិនប្រកាន់និន្នាកានយោបាយឡើយ។

អភិបាលក្រុងសៀមរាប ក៏បានថ្លែងអរគុណនិងកោតសរសើរចំពោះ លោកស្រី សួន មុលឡា ប្រធានសមាគមចលនាយុវជនកម្ពុជា (ក្រុម១៥៧) ក្រុងសៀមរាប ដែលបាននាំយកនូវអំណោយចែកជូនប្រជាពលរដ្ឋ កំពុងជួបការខ្វះខាតនាពេលនេះ។

សូមជម្រាបថាអំណោយ របស់សមាគមចលនាយុវជនកម្ពុជា ក្រុម១៥៧ ក្រុងសៀមរាប ដែលត្រូវចែកជូនប្រជាពលរដ្ឋទាំង ៣០គ្រួសារ ក្នុង១គ្រួសារទទួលបាន៖ អង្ករ ១០គីឡូក្រាម .ទឹកសុទ្ធ ១កេស. មី ១កេស. ទឹកត្រី ៣ដប ទឹកសុីអុីវ ៣ដប. ស្ករស ១គីឡូក្រាម. អំបិល ១គីឡូក្រាម. សាប៊ូដុំ ១ដុំ និងថវិកា២ម៉ឺនរៀល៕SRP

ខេត្តត្បូងឃ្មុំ៖មានការលើកឡើងថាគយជាច្រើនក្រុមបានដាក់ប៉ុស្តិ៍ជជុះ ជាច្រើនកន្លែងនៅច្រកដូនរ័ត្ន ដើម្បីប្រមូលលុយពីអាជីវករដឹកទំនិញចេញទៅវៀតណាមឬមកខ្មែរ តាមពុករលួយ។

ប្រភពព័ត៌មានពីខេត្តត្បូងឃ្មុំបានដឹងថាក្រុមឈ្មួញនិងអាជីវករ ដែលរកសីដឹកជ័រកៅស៊ូ ត្រី ផ្លែដូង ទុរេន សត្វមាន់ និងឥវ៉ាន់ចាប់ហួយតាមច្រកតំបន់ដូនរ័ត្ន បានលើកដឹងថា៖រាល់ថ្ងៃនេះ នៅតាមផ្លូវចូលទៅច្រកដូនរ័ត្ន ចាប់ពីចំណុចផ្លូវជាតិលេខ៧អា ចូលតាមផ្លូវ វត្តតាសូត្រ ដល់ព្រំដែន កម្ពុជា .វៀតណាម ច្រកតំបន់ដូនរ័ត្ន មានប៉ុស្តិ៍ជជុះជាច្រើនកន្លែង ជាពិសេស របស់មន្រ្តីគយ ចាំគាបយកលុយពីពួកគាត់តាមអំពើចិត្តយ៉ាងចាស់ៗដៃមិនខ្វល់និងការតវ៉ារបស់ពួកគាត់ឡើយ។ ចំណែកមេគយធំៗនៅក្នុងខេត្តត្បូងឃ្មុំ បានពង្រាយកូនចៅនិងបណ្តែតបណ្តោយឲ្យក្រុមគយតាមប៉ុស្តិ៍ជជុះ ចូលទៅច្រកដូនរ័ត្ន ប្រមូលលុយមិនខ្វល់ពីការរិះគន់អ្វី?ទាំងអស់។

ប្រភពពីអាជីវករបានឲ្យដឹងទៀតថា ប៉ុស្តិ៍ជជុះទី១ របស់គយខេត្តត្បូងឃ្មុំ គឺនៅភូមិចំបក់ ឃុំរូង ស្រុកមេមត់ ហើយប៉ុស្តិ៍នោះនៅក្នុងផ្ទះថ្ម គ្មានដាក់សញ្ញាសម្គាល់ស្ថាប័នគយឡើយ គ្រាន់តែតំរៀបក្បាលឡានចាំដេញស្ទាក់ រថយន្តនិងរ៉ឺម៉កម៉ូតូ ប្រសិនអាជីវករណាមិនបានចូលបង់លុយតាមកំណត់របស់ពួកគេនោះទេ។ អ្នកប្រមូលលុយនៅប៉ុស្តិ៍ទាំងនោះភាគច្រើន ជាក្មេងៗ មិនមានស្លៀកពាក់ឯកសណ្ឋានសំគាល់ជាមន្ត្រីគយនោះទេ គឺស្លៀកពាក់ខោអាវស៊ីវិលធម្មតាពាក់ស្បែកជើងផ្ទាត់ មិនសមជាមន្រ្តីគយនោះទេ។ ពួកគេទាំងនោះតែងតែប្រើពាក្យសម្ដីមិនសមរម្យដើម្បីគាបយក លុយពីឈ្មួញ និងអាជីវករដឹកជញ្ជូនទំនិញ ចេញចូលតាមច្រកដូនរ័ត្ន ដោយគ្មានចេញបង្កាន់ដៃបង់ប្រាក់ឬវិក្កយបត្រត្រឹមត្រូវនោះឡើយ។

ចំណែកឯប៉ុស្តិ៍ជជុះទី ២ របស់គយចល័តខេត្តត្បូងឃ្មុំ ឬគយផ្ទៃប្រទេសតំបន់៦ ដែលគ្រប់គ្រងដោយ លោក ព្រាប គារ៉ាត់ ហៅគយសិទ្ធ គឺនៅចំណុចភូមិសូទៃ ឃុំរូង ស្រុកមេមត់ ហើយគេយកសមត្ថកិច្ច អាវុធហត្ថនិងប៉ូលិសមកសហការគ្នា ដោយមានដាក់រនាំងដែកដើម្បីស្ទាក់គាបយកលុយពីក្រុមឈ្មួញនិងអាជីវករស្រេចតែអំពើចិត្ត។ ដោយឡែកប៉ុស្តិ៍ទី៣ គឺប៉ុស្តិ៍គយនៅច្រកព្រំដែន ដែលមានស្នាក់ការត្រឹមត្រូវ និងដាក់សញ្ញាសម្គាល់ច្បាស់លាស់ដើម្បីឲ្យឈ្មួញនិងអាជីវករបង់លុយតាមការកំណត់ដូចគ្នា។ បញ្ហាទាំងនេះអាជីវករ បានសំណូមពរដល់លោក គុណ ញឹម អគ្គនាយកគយរដ្ឋាករ ជួយពិនិត្យមើលមន្ត្រី ក្រុមគយខាងលើផង។

សូមជម្រាបថែមថា ច្រកដូនរ័ត្ន មានក្រុមឈ្មួញនិងអាជីវករដឹកទំនិញចេញចូល ក្នុងនោះទំនិញខ្មែរ ដំឡូងមី. ជ័រកៅស៊ូស្រស់ និងកសិផលផ្សេងៗទៀត ដឹកទៅវៀតណាម។ ចំណែកទំនិញមកពីប្រទេសវៀតណាមចូលមកខ្មែរវិញ មានដូចជា
ដូង ត្រី ទុរេន ជាដើម។ក្រៅពីទំនិញខាងលើ ច្រកដូនរ័ត្ន ក៏មានការនាំចេញនាំចូល ទំនិញចាប់ហួយជាច្រើនមុខទៀតផងដែរ។

ជុំវិញការលើកឡើងរបស់អាជីវករនេះ សៀមរាបប៉ុស្តិ៍ មិនអាចទាក់ទងមន្ត្រីពាក់ព័ន្ធនៅច្រកដូនរ័ត្នបាននៅឡើយទេ ដោយពុំមានលេខទូរស័ព្ទទំនាក់ទំនង៕SRP

ខេត្តសៀមរាប៖គ្រួសារ ភរិយារបស់ប្រជាការពារភូមិខ្វៀន ដែលបានទទួលមរណភាពដោយគ្រោះថ្នាក់ចរាចរណ៍ បានទទួលអំណោយពី ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក និងលោក ទិត ឌីរ៉ា ចៅសង្កាត់គោកចក។

គ្រួសារជនរងគ្រោះ ដែលបានទទួលអំណោយ នៅថ្ងៃទី០៦ខែកញ្ញាឆ្នាំ២០២១នេះ។

លោក ទិត ឌីរ៉ា បានឲ្យដឹងថា ក្នុងនាមអាជ្ញាធរសង្កាត់គោកចក សូមចូលរួមសោកស្តាយ និងសូមចូល រួមរំលែកទុក្ខដ៏សែនក្រៀមក្រំ អាឡោះអាល័យ ជាមួយក្រុមគ្រួសារសាច់ញាតិរបស់លោកយ៉ាត សីហៈ ចំពោះមរណភាពរបស់ភរិយាលោកគឺជាការបាត់បង់ភរិយា ម្តាយ ជាទីគោរពស្រឡាញ់ប្រកបដោយព្រហ្មវិហារធម៌របស់កូនចៅ និងក្រុមគ្រួសារ។ សម្ភារនិងគ្រឿងឧបភោគបរិភោគ ដែលយកមកប្រគល់ជូនគ្រួសារសពនាពេលនោះមានដូចជា៖ ១-គ្រឿងបាឡុងមួយឈុត -អង្ករចំនួន៧៥គីឡូក្រាម-ទឹកត្រី-ទឹកស៊ីអ៉ីវ-មី -ម៉ាស រួមជាមួយនិងថវិកាមួយចំនួនផងដែរ។

សូមបញ្ជាក់ថា ករណីគ្រោះថ្នាក់ចរាចរណ៍នេះ បានកើតឡើងវេលាម៉ោងប្រមាណជាង ៨យប់ក្នុង ថ្ងៃទី០៥ កញ្ញា ២០២១ នៅចំណុច អតីតលក់សំបុត្រអង្គរ ផ្លូវចូលទៅអង្គរ វត្ត ក្នុងសង្កាត់គោកចក ក្រុងសៀមរាប រវាងរថយន្តនិងម៉ូតូ។

លោកជា វុទ្ធី នាយរងការិយាល័ចរាចរណ៍ជើងគោក ស្នងការនគរបាលខេត្តសៀមរាប បានឲ្យដឹងថា ស្រីរងគ្រោះ មានឈ្មោះ ឌិន សាម៉េត អាយុ៥៣ឆ្នាំ មានទីលំនៅភូមិខ្វៀន សង្កាត់គោកចក ក្រុងសៀមរាប ជិះម៉ូតូម៉ាកហុងដាពណ៌ខ្មៅ ពាក់ស្លាកលេខ សៀមរាប ១S ៧០៥២៕SRP

ភ្នំពេញ៖លោកខៀវ កាញារីទ្ធ រដ្ឋមន្រ្តី ក្រសួងព័ត៌មាន បានណែនាំដល់ ក្រុមមន្ត្រីប្រឆាំងព័ត៌មានក្លែងក្លាយ ដោយត្រូវធ្វេីការពិនិត្យ បូកសរុបមេីល តេីមានគេហទំព័រប៉ុន្មាន និងឈ្មោះអ្វីខ្លះ? ដែលបាននិយាយ ផ្សព្វផ្សាយព័ត៌មានក្លែងក្លាយ អំពីអ្វី និងប៉ុន្មានដង? ដោយកិច្ចការងារនេះ ធ្វេីការបូកសរុបរយ:ពេល ៣ខែម្តង។

លោកណែនាំបែបនេះ ក្នុងឱកាសកិច្ចប្រជុំសាមញ្ញ ប្រចាំសប្តាហ៍ថ្នាក់ដឹកនាំ ក្រសួងព័ត៌មាន នៅថ្ងៃទី៦ ខែកញ្ញា ឆ្នាំ២០២១នេះ ដែលមានការចូលរួមជុំផ្ទាល់ និងតាមរយៈប្រពន្ធ័ Zoom ជាលក្ខណៈHybrid។

លោកខៀវ កាញារីទ្ធ បានថ្លែងថា ក្រុមប្រឆាំងព័ត៌មានក្លែងក្លាយ ជាក្រុម ដែលពិនិត្យមេីលតែពីដំណឹងដែលបំពុលព័ត៌មាន ដែលមិនពិត បំភ្លៃសង្គម គឺ ខុសពី គណ:កម្មការតាមដានវាយតម្កៃនិង លេីកសរសេីរក្រមសីលធម៌ វិជ្ជាជីវ: សារព័ត៌មាន ហេីយគោលបំណងនៃការបង្កេីតគណ:កម្មការនេះឡេីងគឺ ដេីម្បីជាការលេីកនូវតម្លៃ សីលធម៌ និងតម្លៃតូនាទីសង្គម របស់អ្នកសារព័ត៌មានឡេីងវិញ។ លោកថាសម្រាប់ទៅថ្ងៃខាងមុខ រាល់អត្ថបទរបស់អ្នកសារព័ត៌មាន គឺ មានភាពស៊ីជម្រៅ ហេីយត្រូវបានគេយកចិត្តទុកដាក់ ដោយសារមានន័យគ្រប់គ្រាន់ និងត្រូវចំណុចនីមួយៗ។ ជាមួយនេះ គណ:កម្មការ ក៏មិនមែនវាយតម្លៃគ្រប់អត្ថបទនោះទេ គឺពិនិត្យនៅពេលមានបញ្ហា ហេីយក៏មិនមានសិទ្ធិ ដាក់ទោសកំហុសដល់អ្នកសារព័ត៌មាននោះទេ មានតែជួយលេីកតម្កេីង វិជ្ជាជីវ: សារព័ត៌មាន លេីកតម្កេីងតួនាទីសារព័ត៌មាននៅក្នុងសង្គម៕SRP

ខេត្តសៀមរាប៖ស្ត្រីម្នាក់កំពុងបើកម៉ូតូត្រូវបានរថយន្តបុកចំពេញទំហឹងបណ្ដាលឲ្យស្លាប់ភ្លាមៗ។

ហេតុការណ៍បានកើតឡើងវេលាម៉ោងប្រមាណជាង ៨យប់ក្នុង ថ្ងៃទី០៥ កញ្ញា ២០២១ នៅចំណុច អតីតលក់សំបុត្រអង្គរ ផ្លូវចូលទៅអង្គរ វត្ត ក្នុងសង្កាត់គោកចក ក្រុងសៀមរាប។

លោកជា វុទ្ធី នាយរងការិយាល័ចរាចរណ៍ជើងគោក ស្នងការនគរបាលខេត្តសៀមរាប បានឲ្យដឹងថា ករណីគ្រោះថ្នាក់ចរាចរណ៍នេះ រវាងរថយន្តនិងម៉ូតូ។ លោកថាស្រីរងគ្រោះ មានឈ្មោះ ឌិន សាម៉េត អាយុ៥៣ឆ្នាំ មានទីលំនៅភូមិ ខ្វៀន សង្កាត់គោកចក ក្រុងសៀមរាប ជិះម៉ូតូម៉ាកហុងដាពណ៌ខ្មៅ ពាក់ស្លាកលេខ សៀមរាប ១S ៧០៥២។

មន្ត្រីនគរបាលបានបន្តថា ចំណែកម្ចាស់រថយន្តបង្ក បានបើករត់គេចខ្លួនបាត់។ តែទោះជាយ៉ាងនេះក្ដីសមត្ថកិច្ចបានកំណត់ហេតុ អត្តសញ្ញាណ ម្ចាស់រថយន្តរួចហើយដើម្បី យកមកទទួលទោស តាមនិតិវិធីច្បាប់។
ដោយឡែកសាកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕SRP