ខេត្តសៀមរាប៖បុរសម្នាក់ត្រូវបានប៉ូលិសព្រហ្មទណ្ឌខេត្តសៀមរាប ឃាត់ខ្លួនតាមដីការបស់ព្រះរាជ្ញារងអមសាលាដំបូងខេត្តសៀមរាប លោក សំរិទ្ធ សុខុន។ ការឃាត់ខ្លួនធ្វើឡើងនៅថ្ងៃទី២៣ខែមេសាឆ្នាំ ២០២១នេះ។

ក្នុងដីកាបញ្ជាឱ្យចូលខ្លួន របស់លោលសំរិទ្ធ សុខុន តំណាងអយ្យការអមសាលាដំបូងខេត្តសៀមរាប បានបញ្ជាក់ថា៖កាលពីអំឡុងខែមករា ឆ្នាំ២០២១ នៅភូមិរំចេក ឃុំរំចេក ស្រុកបន្ទាយស្រី ឈ្មោះ លោ – ឡោះ បានទាក់ទំនងឈ្មោះ គើយ រដ្ឋា មុខរបរជាស្មៀនឃុំខ្នារសណ្តាយ អោយរៀបចំធ្វើឯកសារដូចជាកិច្ចសន្យា លិខិតផ្ទេរសិទ្ធិដីធ្លី និងពាក្យស្នើសុំកាន់កាប់ដីធ្លីអោយខ្លួនដោយបន្លំដាក់ប្រភពជាកេរ្តិ៍ឪពុកចែកឲ្យហើយបន្លំដាក់ កាលបរិច្ឆេទថយទៅថ្ងៃទី១៨ ខែវិច្ឆិកា ឆ្នាំ២០១៦ ដែលតាមការពិតដីនោះឈ្មោះ ណើម ផ្លិត ត្រូវជាឪពុករបស់ ឈ្មោះ លោ ឡោះ បានលក់អោយឈ្មោះ លី អ៊ុំអេង រួចហើយកាលពីពីថ្ងៃ២៦ ខែធ្នូ ឆ្នាំ២០០៣។ ក្នុងការធ្វើឯកសារនេះឈ្មោះ លោ ឡោះ បានអោយលុយទៅឈ្មោះ គើយ រដ្ឋា ចំនួន៣០០ដុល្លារអាមេរិក ឈ្មោះ ឆន គី មេឃុំខ្នារ សណ្តាយ ចំនួន៣០០ដុល្លារអាមេរិក និងឈ្មោះ ង៉ៅ ងឿម មេភូមិប្រិយ៍ ចំនួន២០០ដុល្លារអាមេរិក។ ក្រោយមក ដោយឈ្មោះ លី អ៊ុំអេង ជាម្ចាស់ដីប្ដឹងដាក់ពាក្យបណ្ដឹងនៅស្នងការរដ្ឋាននគរបាលខេត្តសៀមរាបរឿងមួយផ្សេងហើយពាក់ព័ន្ធនឹងឯកសារនេះដែរ ឈ្មោះ គើយ រដ្ឋា ជាស្មៀនខ្នារសណ្ដាយ មេភូមិ និងមេឃុំ ក៏រៀបចំអោយមានការមោឃភាពឯកសារក្លែងនោះហើយឈ្មោះ គើយ រដ្ឋា ជាស្មៀនឃុំបានព្យាយាមទារឯកសារក្លែងពីឈ្មោះ លោ ឡោះ មកវិញតែគាត់មិនអោយ។ ហើយកន្លងមកក្នុងអំឡុងឆ្នាំ២០២១ ឈ្មោះ លោ ឡោះ បានចូលទៅកាន់ កាប់នៅក្នុង ដីដែលធ្វើឯកសារក្លែងនោះ ហើយទាមទារអោយឈ្មោះ លី អ៊ុំអេង ជាម្ចាស់ដីប្រគល់លុយអោយគាត់ចំនួន ១០០០០ដុល្លារអាមេរិក ទើបគាត់ប្រគល់ដី បើពុំនោះទេគាត់នឹងលក់ដីនោះអោយអ្នកផ្សេង ឃើញដូចនោះឈ្មោះ លី អ៊ុំអេង ជាម្ចាស់ដីបានអោយឈ្មោះ ទុយ ទាំ យកលុយទៅកក់ឈ្មោះ លោ ឡោះ ចំនួន១០០០០ដុល្លារអាមេរិក ដើម្បីទប់ស្កាត់ហើយក៏ដាក់ពាក្យបណ្តឹងជាបន្តបន្ទាប់តាមនីតិវិធី។

យល់ឃើញថា ៖ ក្រោយពីទទួលបានពាក្យបណ្ដឹងរបស់ជនរងគ្រោះ និងមានការបើកការស៊ើបអង្កេតបឋមរបស់អយ្យការអមសាលាដំបូងខេត្តសៀមរាប កម្លាំងសមត្ថកិច្ចនៃការិយាល័យនគរបាលព្រហ្មទណ្ឌកំរិតធ្ងន់ នៃ
ស្នងការដ្ឋាននគរបាលខេត្តសៀមរាប បានធ្វើការស្រាវជ្រាវរកសាវតាជាតិរបស់ឈ្មោះ លោ ឡោះ។
-យល់ឃើញថា៖ ដើម្បីឱ្យជនសង្ស័យឈ្មោះ លោ ឡោះ ចូលបង្ហាញខ្លួននៅអយ្យការអមសាលាដំបូងខេត្ត សៀមរាប គប្បីចេញដីកាបញ្ជាឱ្យចូលខ្លួនលើឈ្មោះខាងលើ។

បញ្ជ

១.គោត្តនាម-នាម លោ ឡោះ ភេទប្រុស អាយុ២៧ឆ្នាំ សញ្ជាតិខ្មែរ ទីកន្លែងកំណើតភូមិរំចេក ឃុំរំចេក ស្រុកបន្ទាយស្រី ខេត្តសៀមរាប ទីលំនៅបច្ចុប្បន្នភូមិរំចេក ឃុំរំចេក ស្រុកបន្ទាយស្រី ខេត្តសៀមរាប ឱ្យចូលខ្លួននៅ អយ្យការអមសាលាដំបូងខេត្តសៀមរាប បន្ទប់លេខ “ក៧”។ ២.មន្ត្រីនគរបាលយុត្តិធម៌ អនុវត្តដីកានេះឱ្យបានសម្រេចក្នុងរយៈពេល១(មួយ)ខែ គិតចាប់ពីថ្ងៃចុះហត្ថ លេខានេះតទៅ។

ជុំវិញហេតុការណ៍នេះ ជនរងគ្រោះ លី អ៊ុំអេង ជាដើមបណ្ដឹង បានសំណូមពរដល់ចៅក្រម កាន់ក្នុងសំណុំរឿងនេះ មេត្តាជួយឃុំខ្លួន ឈ្មោះ លោ ឡោះ ដើម្បីលោកស្រីទទួលបានយុត្តិធម៌៕SRP

ខេត្តសៀមរាប៖លោកសឿន តុលា ស្ថាបនិកក្រុមហ៊ុន ផា ផា យ៉ា បានសរសេរអត្ថបទមួយដែលមានចំណងជើងថា៖«ជំហានដំបូង»។

លោកសឿន តុលា បានសរសេរថា៖  “ចំណេះវិជ្ជាគឺជាទ្រព្យដែលគ្មាននរណាម្នាក់វាស់បានឡើយ ប្រសិនបើអ្នកវិនិយោគ ត្រូវចាប់ផ្ដើមពីតូចទៅ ប៉ុន្តែ ឲ្យបានគ្រប់គ្រាន់ ”

រាល់ការធ្វើអាជីវកម្មទាំងអស់ ដែលទទួលបានភាព ជោគជ័យ មិនអាចកើតឡើង ដោយធម្មជាតិ ដោយភាពងាយស្រួល ឬដោយភាពចៃដន្យនោះទេ។គ្រប់យ៉ាងកើតឡើង ចេញពីភាពក្លាហាន ចេញពីការសម្រេចចិត្ត ការពិចារណា ព្រមទាំងកម្លាំងចិត្ត ដើម្បីដាក់ការប្រឹងប្រែងនិងការរៀនពីកំហុសជាប្រចាំ ” កុំហុសមិនអាចកើតឡើងចំពោះអ្នកដែលអង្គុយនៅស្ងៀមនោះទេ”។ ពីព្រោះគ្រប់ ការងារ ដែលសហគ្រិនជោគជ័យបានធ្វើគឺស្ថិតនៅក្នុងគោលដៅយ៉ាងច្បាស់ ដោយឈរលើខ្សែបន្ទាត់នៃគុណភាពទំនាក់ទំនង និងគុណតម្លៃនៃធ្វើការរួមគ្នា សូមចងចាំថា” កម្រិតគុណភាពរបស់សហគ្រិន អាស្រ័យទៅលើកម្រិតគុណភាពទំនាក់ទំនង និងគុណភាព នៃការថែទាំមនុស្សដែលធ្វើការជុំវិញខ្លួន ” ។

សហគ្រិនដែលបានទទួលជោគជ័យជានិរន្តរ៍ ពួកគាត់បានកំណត់ចក្ខុវិស័យយ៉ាងច្បាស់លាស់ដើម្បីឲ្យក្លាយជាអ្វីមួយនៅពេលខាងមុខ ហើយពួកគេជឿលើចក្ខុវិស័យរបស់ខ្លួន ” ប្រសិនបើអ្នកជឿលើខ្លួនឯង ជោគជ័យនិងចូលរួមជឿលើអ្នក” ។

ខាងក្រោមនេះ ជាគោលដៅចំបងចម្បង ៥ ចំណុច សម្រាប់សហគ្រិនដើម្បីពង្រីកសមត្ថភាពរលើកធុរកិច្ចរបស់ខ្លួន។

១. ហ៊ានសុបិន្តធំ
ខ្ញុំអាចធ្វើបាន …គឺជាកុងត្រា និងការដាក់វិន័យ ចំពោះខ្លួនឯង ដើម្បីឲ្យបានសម្រេចអ្វីមួយ ។

” ប្រសិនបើអ្នកគិតថា អាចធ្វើបាន អ្នកនឹងមើលឃើញនូវវិធីជាច្រើនដើម្បីឲ្យសម្រេចបានចំពោះការគិតនោះ ”

ការប្រកាន់នៅជំហរថា : គ្មានអ្វីដែលមិនអាចទៅរួចនោះទេ ” ភាគនេះល្អ សម្រាប់អ្នកក្លាហាន អ្នកតាំងចិត្តអភិវឌ្ឍន៍ខ្លួន និងអ្នកបន្តរៀនជាប្រចាំ ”

ប្រសិន បើអ្នកចាប់ផ្ដើមគិត អំពី ពាក្យពេចន៍ទាំងអស់នោះ នឹងធ្វើ អ្នកនឹងទទួល គុណតម្លៃលើសពីអ្វីដែលអ្នកបានគិត ក្នុងកម្រិតដែលអ្នកមានអំឡុងពេលពេលបច្ចុប្បន្ន ប៉ុន្តែអ្នកត្រូវ ចាប់ផ្ដើមធ្វើពីឥឡូវនេះទៅ ” ប្រសិនបើអ្នកនៅតែបន្តការប្រៀបធៀបការវាយតម្លៃមកលើខ្លួនឯងអ្នកមិនអាចមានចិត្តក្លាហានគិតធំបានឡើយ ។

” ប្រសិនបើអ្នកគិតតូច អ្នកនឹងបានផលតូច ប៉ុន្តែ ប្រសិនបើអ្នកគិតធំ អ្នកនឹងរកវិធី និង ដំណោះស្រាយ ដើម្បីឲ្យបានទទួលផលធំ អ្អ្វីៗ ដែលអ្នកបានទទួល អាស្រ័យលើការគិតរបស់អ្នកប៉ុណ្ណោះ”

២. ប្រកាន់យកការគិតវិជ្ជមាន:

សហគ្រិនជោគជ័យ មានមូលហេតុដែល ពួកគេជោគជ័យ ពីព្រោះ ពួកគេផ្លាស់ប្ដូរផ្នត់គំនិត អវិជ្ជមាន ទាំងឡាយ នៅក្នុងផ្នត់គំនិតចាស់ៗរបស់ពួកគេ ដោយបញ្ចូលឬជំនួសមកវិញនៅ នូវផ្នត់គំនិតវិជ្ជមាន ។

“ប្រសិនបើអ្នកមានការគិតអវិជ្ជមាន អ្នកនឹងមើលឃើញពីពន្លឺនៃភាពជោគជ័យរចេញពីក្នុងខ្លួនរបស់អ្នក ” ដូច្នេះហើយ សូមអ្នក ព្យាយាមកែប្រែគំនិតអវិជ្ជមានចោល ហើយទទួលយកឥរិយាបថល្អៗសម្រាប់ខ្លួនឯងវិញ ” ការ គិតអវិជ្ជមាន គឺជាឧបសគ្គរាំងផ្លូវរបស់អ្នកមិនឲ្យធ្វើដំណើរទៅ ដល់កន្លែងដែលអ្នកចង់ទៅ រីឯ ការគិតវិជ្ជមាន នឹងពាំនាំរូបអ្នក ទៅដល់ទីកន្លែងតើអ្នកចង់ទៅ ”

សូមចងចាំថា: វិជ្ជមានក្នុងចិត្ត កើតឡើង ដោយការគិត និងសន្សំជារៀងរាល់ថ្ងៃ មិនឱ្យកើតឡើង ចំពោះ អ្នកដែលមិនបាន សន្សំអនុវត្តជារៀងរាល់ថ្ងៃបានទេ។

៣. គិតអំពី ឈ្នះឈ្នះរួមគ្នា
” ប្រសិនបើខ្ញុំបាន អ្នកបាន យើងបាន ហេតុអ្វីយើងត្រូវខ្លាច ឬរារែកក្នុងចិត្ត? ”

សហគ្រិនដែលទទួលបានផលធំៗពីព្រោះពួកគេបានគិតធំ ពួកគេតែងតែប្រកាន់យកនូវកិច្ចសហប្រតិបត្តិការ ដែលជាស្នូលធំមួយក្នុងទិសដៅរួម ” ឈ្នះឈ្នះទាំងអស់គ្នា ” ប្រសិនបើខ្ញុំបានចំណេញ អ្នកក៏បានចំណេញ គឺគ្មានអ្នកណាខាតឡើយ ។

ក្រុមហ៊ុនមួយជោគជ័យទៅបាន មិនមែនអាស្រ័យទៅលើតែ អតិថិជន ក្នុងរយៈពេលខ្លីនោះទេ វាស្ថិតនៅលើកម្រិត សមត្ថភាពនៃមេដឹកនាំ ដែលចេះថែទាំមនុស្សជុំវិញខ្លួន ដើម្បីឱ្យពួកគេ បង្កើនគុណភាពការងារ ជូនដល់អតិថិជន។

តែអ្វីដែលសំខាន់នោះគឺ ការសហការជាមួយនឹងដៃគូផ្សេងៗ ដើម្បីរីកចម្រើនរយៈពេលយូរ ព្រមទាំងភាពរីករាយរបស់បុគ្គលិកគ្រប់ផ្នែកនៅក្នុងស្ថាប័នផងដែរ ដូច្នេះហើយ ការប្រកាន់យកភាពត្រឹមត្រូវ និង ការប្រកាន់យកភាពយុត្តិធម៌ គឺជាអ្វីដែលពួកគេត្រូវធ្វើ ក្នុងបុព្វហេតុនៃសហប្រតិបត្តិការ។

៤. ក្លាហានសារភាពចំពោះកំហុស

” កំហុសពិតប្រាកដរបស់សហគ្រិន គឺពួកគេមិនព្រមកែកំហុសដដែលៗ “កំហុសវាមិនមែនជារឿងធំដែលធ្វើឱ្យអ្នកបាក់មុខមាត់ដូចអ្នកបានគិតនោះឡើយ តាម ការពិតកំហុសគឺជាគ្រាប់ពូជ នៃភាពវាងវៃ នៃភាពត្រឹមត្រូវ សម្រាប់ជំហានបន្ទាប់ ប្រសិនបើអ្នកទទួលស្គាល់នូវកំហុសនោះ ។ នៅក្នុងលោកយើងនេះគ្មានអ្វីដែលល្អឥតខ្ចោះនោះឡើយសូម្បីតែផ្ទាំងគំនូរដ៏ល្អមួយត្រូវបានឆ្លងកាត់ការប្រើខ្មៅដៃ ដែលត្រូវលុបជាច្រើនដង ” ខ្មៅដៃដែលល្អ គឺខ្មៅដៃដែលមានជ័រលុប “។

៥. ផ្នត់គំនិតនិងការតាំងចិត្តត្រូវតែរឹងមាំ

” គ្មានផលធំទាំងឡាយណា កើតឡើងចំពោះអ្នកគិត ស្រាលៗ ឬលំៗ ដោយគ្មានការតាំងចិត្ត មុតមាំបានឡើយ ”

នៅពេលដែលអ្នកដឹងច្បាស់ថា អ្នកចង់បានអ្វីឲ្យប្រាកដនោះ គ្មានអ្វីដែលជាឧបសគ្គសំរាប់អ្នកទៀតឡើយ ពីព្រោះ ភាព ពិតប្រាកដ បានធ្វើឲ្យអ្នកក្លាហានជាងមុន បានធ្វើឲ្យអ្នកលះបង់ទម្លាប់ដែរអត់ប្រយោជន៍ ដើម្បីធ្វើកិច្ចការចាំបាច់ ៗ ហើយនៅពេលនោះ នឹងជួបមនុស្សជាច្រើន ដែល មានជំនាញនិងមានគំនិតជួយដល់អ្នក លើកស្ទួយអ្នកឲ្យទទួលបានជោគជ័យ។

ប៉ុន្តែរឿងទាំងអស់នោះ ” ពួកគេត្រូវការ ដំបូង គឺអ្នកត្រូវមានការតាំងចិត្តមុតមាំ”  នៅពេលដែលយើងតាំងចិត្តមុតមាំ ជោគជ័យ មុតមាំ នឹងស្ថិតនៅជាមួយយើង ។

និពន្ធដោយ លោក : សឿន តុលា

ស្ថាបនិកក្រុមហ៊ុន ផា ផា យ៉ា

PAPAYA NEXT STEP CO,.LTD

* PAPAYA REAL ESTATE

( គម្រោងអភិវឌ្ឍន៍អចលនទ្រព្យ)

* PAPAYA HOMESTAY

( គម្រោងលើវិស័យទេសចរណ៍)

* PAPAYA GARDEN

( គម្រោងលើវិស័យកសិកម្មនិងចែកចាយអាហារ)

ភ្នំពេញ៖សម្តេចហ៊ុន សែន នៅរសៀលមុននេះបន្តិច បានចាកចេញពីកម្ពុជាហើយ ឆ្ពោះទៅកាន់ទីក្រុងហ្សាកាតា ដើម្បីចូលរួមកិច្ចប្រជុំកំពូលអាស៊ានពិសេស។

សម្ដេចហ៊ុន សែន បានអះអាងថា៖២៣ មេសា ២០២១
នៅពេលនេះ ខ្ញុំកំពុងដឹកនាំគណៈប្រតិភូរាជរដ្ឋាភិបាលជាន់ខ្ពស់តាមជើងយន្តហោះកម្ពុជាពិសេសឆ្ពោះទៅកាន់ទីក្រុងហ្សាកាតា សាធារណរដ្ឋឥណ្ឌូនេស៊ី ដើម្បីចូលរួមកិច្ចប្រជុំកំពូលអាស៊ានពិសេស។ មេដឹកនាំអាស៊ានភាគច្រើននឹងទៅដល់ទីក្រុងហ្សាកាតានៅរសៀលនេះ។

តាមកម្មវិធីគ្រោងទុក នៅថ្ងៃទី២៤ ខែមេសា ឆ្នាំ២០២១ ខ្ញុំនឹងចូលរួមកិច្ចប្រជុំក្រៅផ្លូវការរបស់មេដឹកនាំអាស៊ាន និងជំនួបមួយចំនួនជាមួយបណ្ដាមេដឹកនាំអាស៊ានផ្សេងទៀត។ ក្រោយពីចប់កិច្ចប្រជុំពេញមួយថ្ងៃហើយ ខ្ញុំនឹងវិលត្រឡប់មកកម្ពុជាវិញនៅល្ងាចថ្ងែទី២៤ មេសា ដដែលនេះ។

ពេលមកដល់កម្ពុជាភ្លាម ខ្ញុំនិងគណៈប្រតិភូនឹងផ្ដល់សំណាកដើម្បីពិនិត្យកូវីដ១៩ នៅអាកាសយានដ្ឋានអន្តរជាតិភ្នំពេញតែម្ដងដើម្បីធានាសុវត្ថិភាពសុខភាពទាំងអស់គ្នា។

អរគុណដល់អាជ្ញាធរ សមត្ថកិច្ច និងកងកម្លាំងប្រដាប់អាវុធ ដែលបានយកចិត្តទុកដាក់ក្នុងការអនុវត្តវិធានការការពារកូវវីដ១៩ ដើម្បីថែរក្សាការពារអាយុជីវិតប្រជាពលរដ្ឋ ព្រមទាំងការផ្គត់ផ្គង់ស្បៀងអាហារជូនប្រជាពលរដ្ឋបានទាន់ពេលវេលា។ អរគុណសប្បុរសជនទាំងអស់ដែលបានចូលរួមជាមួយរាជរដ្ឋាភិបាលនិងចូលរួមឧបត្ថម្ភដោយផ្ទាល់ដល់ប្រជាពលរដ្ឋដែលកំពុងត្រូវការជំនួយស្បៀងអាហារ។

សូមបងប្អូនបន្តរស់នៅក្នុងផ្ទះ និងអនុវត្តវិធានការការពារកូវីដ១៩ អោយបានខ្ជាប់ខ្ជួនបំផុតតាមការណែនាំរបស់ក្រសួងសុខាភិបាល និង រាជរដ្ឋាភិបាល៕SRP

ភ្នំពេញ៖លោកនេត សាវឿន អគ្គស្នងការនគរបាលជាតិ បានចេញលិខិតថ្លែងអំណរគុណជូនចំពោះ សម្តេច ស ខេង ដែលបានផ្តល់ថវិកាដល់នគរបាល បេសកកម្ម ក្នុងការបិទខ្ទប់។

លោកនេត សាវឿន បានលើកឡើងថា ក្នុងនាមកងកម្លាំងនគរបាលជាតិ និងក្នុងនាមខ្លួនខ្ញុំផ្ទាល់ ខ្ញុំមានសេចក្តីសោមនស្សរីករាយឥតឧបមា សូមគោរពថ្លែងអំណរគុណយ៉ាងជ្រាវជ្រៅចំផុតជូនចំពោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានផ្តល់ថវិកាចំ នួន ៣៤៨,៣២០,០០០រៀល បន្ថែមលើគោលរបបដែលបានផ្តល់ជូននាពេលកន្លងមក ជូនកងកម្លាំងនគរបាលជាតិចំនួន ១,២៤៤នាក់ កំលុងពេលបំពេញបេសកកម្មតាមគោលដៅ និងប្រចាំការអន្តរាគមន៍អនុវត្តតាមបទបញ្ជារបស់រាជរដ្ឋាបាល ក្នុងការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល៕SRP

ភ្នំពេញ៖លោកវេង សាខុន រដ្ឋក្រសួងកសិកម្ម រុក្ខាប្រមាញ់ និងនេសាទ បានអះអាងថាក្នុងនាមថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះ រដ្ឋាភិបាល និងប្រជាជននៃសាធារណរដ្ឋប្រជាមានិតចិន ជាពិសេសឯកឧត្តមរដ្ឋមន្រ្តី ក្រសួងកសិកម្ម និងកិច្ចការជនបទ ដែលបានផ្តល់ជំនួយវ៉ាក់សាំងជំងឺ ជំងឺសាទឹក និងអ៊ុតក្តាម ចំនួន ២០០ ០០០(ពីរសែន) ដូស មកក្រសួងកសិកម្ម រុក្ខាប្រមាញ់ និងនេសាទ ដើម្បីចូលរួមប្រយុទ្ធប្រឆាំងនឹងជំងឺ សាទឹក និង អ៊ុតក្តាម (FMD) ដែលបាន និងកំពុងកើតមាននៅក្នុងប្រទេសកម្ពុជា។

ក្រសួងកសិកម្ម រុក្ខាប្រមាញ់ និងនេសាទ មានសេចក្តីរីករាយយ៉ាងខ្លាំង និងសូមជម្រាបជូនថា កាលពីថ្ងៃទី២០ ខែមេសា ឆ្នាំ២០២១ កន្លងទៅថ្មីៗនេះ ក្រសួងកសិកម្ម រុក្ខាប្រមាញ់ និងនេសាទ បានទទួលវ៉ាក់សាំងជំងឺអ៊ុតក្តាម FMD ចំនួន ១០០ ០០០ (មួយសែន) ដូស បន្ថែមទៀត ដែលជាការផ្តល់មកកម្ពុជាក្នុងដំណាក់កាលទី២ ។

សូមបញ្ជាក់ផងដែរថា កាលពីថ្ងៃទី១២ ខែមករា ឆ្នាំ ២០២១ ក្រសួងកសិកម្ម រុក្ខាប្រមាញ់ និងនេសាទ បានទទួល វ៉ាក់សាំងជម្ងឺសាទឹក ពីក្រសួងកសិកម្ម និងកិច្ចការជនបទ នៃសាធារណរដ្ឋប្រជាមានិតចិន ចំនួន ១០០ ០០០(មួយសែន) ដូស រួចមកហើយ ដែលជាការផ្តល់ដំណាក់កាលទី១ ។ រហូតមកដល់ពេលនេះវ៉ាក់សាំងជម្ងឺសាទឹក ដែលទទួលបានក្នុងដំណាក់កាលទី១ អគ្គនាយកដ្ឋានសុខភាពសត្វ និងផលិតកម្មសត្វ បានបើកផ្តល់និងចាក់វ៉ាក់សាំងដល់សត្វគោក្របីរបស់កសិករនៅតាមបណ្តារាជធានី/ខេត្ត អស់ចំនួន ៤៧ ០០០ ដូស រួចហើយ ដែលមកទល់ពេលនេះ គឺបានធ្វើឱ្យសត្វគោក្របីដែលបានចាក់វ៉ាក់សាំងហើយនោះ មានសុខភាពល្អប្រសើរ។ ទន្ទឹមនឹងនេះខ្ញុំក៏សូមបញ្ជាក់ផងដែរថា វ៉ាក់សាំងជំងឺសាទឹក និងអ៊ុតក្តាមនេះត្រូវបានផលិតយ៉ាងពិសេសសម្រាប់លក្ខខ័ណ្ឌអាកាសធាតុនៃប្រទេសកម្ពុជា ដូច្នេះយើងមានជំនឿជឿជាក់យ៉ាងមុតមាំថាវ៉ាក់សាំងទាំងនេះនឹងមានប្រសិទ្ធភាព និងគុណភាពល្អបំផុតដែលមិនធ្លាប់មានពីមុនមក៕SRP

ភ្នំពេញ៖សម្តេច ហ៊ុន សែន នៅរសៀលថ្ងៃទី២៣ ខែមេសា ឆ្នាំ ២០២១នេះ នឹងដឹកនាំគណៈប្រតិភូជាន់ខ្ពស់អញ្ជើញទៅចូលរួមដោយផ្ទាល់ក្នុងកិច្ចប្រជុំរបស់មេដឹកនាំអាស៊ាន នៅទីក្រុងហ្សាការតា ប្រទេសឥណ្ឌូនេស៊ី។

តបតាមការអញ្ជើញរបស់ប្រទេសព្រុយ ណេដារ៉ូសាឡឹម ជាប្រធានអាស៊ាននាពេលបច្ចុប្បន្ន សម្តេច ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា  នឹងដឹកនាំគណៈប្រតិភូជាន់ខ្ពស់អញ្ជើញទៅចូលរួមដោយផ្ទាល់ក្នុងកិច្ចប្រជុំរបស់មេដឹកនាំអាស៊ាន ដែលនឹងប្រព្រឹត្តិទៅនៅថ្ងៃទី ២៤ ខែមេសា ឆ្នាំ២០២១ នៅទីក្រុងហ្សាការតា ប្រទេសឥណ្ឌូនេស៊ី។

នៅក្នុងឱកាសកិច្ចប្រជុំនេះ មេដឹកនាំអាស៊ានរំពឹងថានឹងផ្តោតការយកចិត្តទុកដាក់ទៅលើប្រធានបទធំៗចំនួនបីគឺ ការជំរុញដំណើរការកសាងសហគមន៍អាស៊ាន រួមទាំងគំនិតផ្តួចផ្តើមនានាដើម្បីឆ្លើយតបជំងឺរាតត្បាតកូវីដ-១៩ និងកិច្ចប្រឹងប្រែងស្តារសេដ្ឋកិច្ច-សង្គមឡើងវិញ  ទំនាក់ទំនងអាស៊ានជាមួយដៃគូក្រៅតំបន់  និងការវិវត្តនៃស្ថានការណ៍អន្តរជាតិ និងក្នុងតំបន់ ដែលជាផលប្រយោជន៍ និងការបារម្ភរួម។ សូមជម្រាបថានៅថ្ងៃទី ២៣ ខែមេសា ឆ្នាំ២០២១នេះ លោក ប្រាក់ សុខុន នឹងអញ្ជើញចូលរួមកម្មវិធីអាហារស្វាគមន៍ពេលល្ងាច ដែលរៀបចំឡើងដោយលោកជំទាវ រ៉េតណូ ម៉ាស៊ូឌី រដ្ឋមន្រី្តការបរទេសឥណ្ឌូនេស៊ី នៅល្ងាចមុនថ្ងៃប្រជុំមេដឹកនាំអាស៊ាន៕SRP

ភ្នំពេញ៖សេចក្ដីអំពាវនាវ របស់ «ក្លិបអ្នកកាសែតកម្ពុជា»

ខេត្តកំពង់ចាម៖លោកអ៊ុន ចាន់ដាអភិបាលខេត្តកំពង់ចាម  នៅរសៀលថ្ងៃទី២២ខែមេសាម្សិលមិញបានអញ្ជើញ ចុះ ពិនិត្យស្ថានភាពជាក់ស្ដែងដល់លំនៅឋានរបស់ស្ត្រីឈ្មោះ ខៀវ ដាឡៃ អាយុ២៨ឆ្នាំជាមន្ត្រីស្ម័គ្រចិត្ត នៅមណ្ឌលសុខភាពសំបូរ រស់នៅភូមិសំបូរ ឃុំសំបូរ ស្រុកបាធាយ បន្ទាប់ពីរកឃើញវិជ្ជមានកូវីត-១៩ដោយមានមនុស្ស៨នាក់ បានប៉ះពាល់ដោយផ្ទាល់ និង១៨នាក់ ប៉ះពាល់ដោយប្រយោល។

ក្នុងដំណើរអញ្ជើញចុះពិនិត្យនេះលោកអ៊ុនចាន់ដា បានណែនាំដល់មន្ត្រីពាក់ព័ន្ធឲ្យក្តាប់មុខសញ្ញាដែលប៉ះពាល់ដោយប្រយោល និងដោយផ្ទាល់ ជាមួយអ្នកវិជ្ជមានកូវីដ -១៩ ដើម្បីជំរុញការធ្វើចត្តាឡីស័ក ឲ្យបានត្រឹមត្រូវតាមវិធានសុខាភិបាល ក្នុងនោះអាជ្ញាធររួមនឹងមន្ត្រីពាក់ព័ន្ធត្រូវពិនិត្យនិងតាមដានឲ្យបានជាប់ជាប្រចាំដើម្បីជួយឧបត្ថម្ភ គាំទ្រដល់ប្រជាពលរដ្ឋដែលមានជីវភាពខ្វះខាតឲ្យបានទាន់ពេលវេលា។

ជាមួយគ្នានោះអភិបាលខេត្ត ក៏បានអំពាវនាវដល់អ្នកពាក់ព័ន្ធជាមួយស្ត្រីខាងលើត្រូវទៅពិនិត្យសុខភាព និងយកសំណាកនៅមន្ទីរពេទ្យបង្អែក  ដែលស្ថិតនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋានជាបន្ទាន់ ក្នុង នោះ បងប្អូនប្រជាពលរដ្ឋដែលរស់នៅភូមិសំបូរ ឃុំសំបូរ ស្រុកបាធាយ ជាពិសេស មិត្តភ័ក្រ្តដែលធ្លាប់ប្រាស្រ័យ ទាក់ទង ជាមួយនឹងអ្នកជំងឺរូបនេះ ក៏ដូចជា បងប្អូនប្រជាពលរដ្ឋដែលមានហានិភ័យខ្ពស់ ត្រូវតែអនុវត្តយ៉ាងម៉ឹងម៉ាត់តាមការណែនាំរបស់មន្ត្រីសុខាភិបាល ប្រកបដោយស្មារតីទទួលខុសត្រូវខ្ពស់ ដើម្បីការពារក្រុមគ្រួសារ និងសហគមន៍ឲ្យចៀសផុតពីជំងឺឆ្លងដ៏កាចសាហាវនេះ។

គួរបញ្ជាក់ថានៅថ្ងៃទី២២ ម្សិលមិញ នេះ បន្ទាប់ពីរដ្ឋបាលខេត្តបានទទួលលទ្ធផលបញ្ជាក់ពីវិទ្យាស្ថានសុខភាពសាធារណៈពីករណីវិជ្ជមានកូវីដ-១៩ លើស្ត្រី ខាងលើនេះ អភិបាលខេត្ត ក៏បានចាត់ឲ្យមន្ទីរសុខាភិបាល ស្រាវជ្រាវរកអ្នកដែលប៉ះពាល់ ជាមួយ ករណីនេះ ដោយបានបញ្ជូនអ្នកដែលបានប៉ះពាល់ដោយផ្ទាល់មកធ្វើចត្តាឡីស័ក នៅមណ្ឌលចត្តាឡីស័ករបស់រដ្ឋបាលខេត្ត និងអ្នកពាក់ព័ន្ធដោយប្រយោលត្រូវបានណែនាំឲ្យធ្វើ ចត្តាឡីស័កនៅតាមផ្ទះរៀងៗខ្លួន។ ជាមួយគ្នានេះ រដ្ឋបាលខេត្ត ក៏បានសម្រេចផ្អាកជាបណ្ដោះអាសន្ននូវមណ្ឌលសុខភាពសំបូរ ភូមិសំបូរ ឃុំសំបូរ ស្រុកបាធាយ ដោយមានការពាក់ព័ន្ធផងដែរ៕SRP

ភ្នំពេញ៖រដ្ឋមន្ត្រីក្រសួងមហាផ្ទៃ សម្ដេចស ខេង បានសម្រេចឧបត្ថម្ភថវិកាជូនកងកម្លាំងនគរបាលការពារតាមគោលដៅ  និងប្រចាំការត្រៀមអន្តរាគមន៍ នៅតំបន់បិទខ្ទប់។​នេះបើយោងតាមលិខិតចុះហត្ថលេខាដោយសម្ដេចរដ្ឋមន្ត្រីក្រសួងមហាផ្ទៃ៕SRP

ខេត្តកំពង់ចាម៖អ៊ុន ចាន់ដា អភិបាលខេត្តកំពង់ចាម បានណែនាំ ដល់ មន្ត្រី ពាក់ព័ន្ធ ឲ្យ ក្តាប់មុខសញ្ញាដែលប៉ះពាល់ ដោយប្រយោល និងដោយផ្ទាល់ ជាមួយ អ្នក វិជ្ជមាន កូវីដ -១៩ ដើម្បី ធ្វើចត្តាឡីស័ក ឲ្យបានត្រឹមត្រូវតាមវិធានសុខាភិបាល ដោយត្រូវពិនិត្យ និងតាមដានឲ្យបានជាប់ជាប្រចាំ ដើម្បីជួយឧបត្ថម្ភ គាំទ្រដល់ប្រជាពលរដ្ឋ ដែលមានជីវភាពខ្វះខាត ឲ្យ បានទាន់ពេលវេល។

ការ ជំរុញ យ៉ាង ដូច្នេះ ក្នុង កិច្ចប្រជុំបន្ទាន់ពាក់ព័ន្ធករណីកម្មករ កម្មការីនី ប៉ះពាល់នឹងអ្នក វិជ្ជមាន កូវីដ-១៩ នាព្រឹក ថ្ងៃ ទី ២២ ខែមេសា ឆ្នាំ ២០២១ នៅ សាលា ស្រុក ស្រីសន្ធរ ។

ថ្លែង ក្នុងកិច្ចប្រជុំនេះ អ៊ុន ចាន់ដា បានបញ្ជាក់ថា បន្ទាប់ពីទទួលបានព័ត៌មានពីក្រសួងការងារ និងបណ្តុះបណ្តាលវិជ្ជាជីវៈ ពាក់ព័ន្ធករណីកម្មករ កម្មការីនី ប៉ះពាល់នឹងអ្នក វិជ្ជមាន កូវីដ-១៩ រស់នៅស្រុកពារាំង ខេត្តព្រៃវែង មកធ្វើការ នៅរោងចក្រ ក្នុងតំបន់សេដ្ឋកិច្ចពិសេស 7NG ស្រុកខ្សាច់កណ្តាល ខេត្តកណ្ដាល នោះ លោក បានចាត់ឲ្យរដ្ឋបាលស្រុក សហការជាមួយមន្ទីរសុខាភិបាល នាំយកកម្មករ កម្មរិនី ដែលពាក់ព័ន្ធ និងប៉ះពាល់ដោយផ្ទាល់ រស់នៅក្នុងស្រុកស្រីសន្ធរ ចំនួន៩នាក់ ឲ្យ មកយកសំណាកទៅពិនិត្យ និងនាំយកមកធ្វើចត្តាឡីស័កនៅមណ្ឌលចត្តាឡីស័ក របស់រដ្ឋបាលខេត្ត និងបន្តស្រាវជ្រាវ អ្នកដែលបានប៉ះពាល់ដោយផ្ទាល់ និនិងដោយប្រយោផងដែរ។

អភិបាលខេត្ត ក៏បានណែនាំដល់ អាជ្ញាធរ ពាក់ព័ន្ធ ត្រូវ បន្តពង្រីកការអនុវត្តន៍វិធានសុខាភិបាល និងពង្រីកការគ្រប់គ្រងកម្មករ កម្មការីនី ក្នុងភូមិសាស្ត្រស្រុកស្រីសន្ធរ ដោយត្រូវរង់ចាំលទ្ធផលសំណាក អ្នកដែលពាក់ព័ន្ធ នៅថ្ងៃ២៣ ខែមេសា ឆ្នាំ២០២១ ។ ក្នុង នោះ មន្ត្រីសុខាភិបាល ត្រូវសហការជាមួយអាជ្ញាធរស្រុក ស្រាវជ្រាវ និងនាំយកអ្នកពាក់ព័ន្ធនឹងអ្នកសង្ស័យដោយផ្ទាល់ ឬដោយប្រយោលឲ្យធ្វើចត្តាឡីស័ក ជា បន្ទាន់ ។ ជាពិសេស ត្រូវណែនាំដល់គណៈអាជីវករ ក៏ដូចជា អាជីវករ នៅតាមផ្សារនានា ត្រូវរៀបចំជាប្រដាប់វាស់កំដៅ អាកុលលាងដៃ និងពាក់ម៉ាស ឲ្យ បានជាប់ជាប្រចាំ។

គួរបញ្ជាក់ថា នៅស្រុកស្រីសន្ធរ រកឃើញករណីកូវីដ-១៩ ពាក់ព័ន្ធព្រឹត្តិការណ៍សហគមន៍ ២០-កុម្ភៈ ចំនួន០៤នាក់ កំពុងសម្រាកព្យាបាលនៅមន្ទីរពេទ្យខេត្តកំពង់ចាម។ ក្នុង នោះរដ្ឋបាលស្រុក បានរៀបចំមណ្ឌលចត្តាឡីស័ករបស់រដ្ឋបាលស្រុក ចំនួន០២កន្លែង ដែលអាចទទួលអ្នកធ្វើចត្តាឡីស័កចំនួន៦០នាក់ ផងដែរ ៕SRP

ខេត្តត្បូងឃ្មុំ៖លោកសៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងលោក ជាម ច័ន្ទសោភ័ណ អភិបាលខេត្តត្បូងឃ្មុំ នៅថ្ងៃទី២២ ខែមេសា ឆ្នាំ២០២១នេះ បានអញ្ជើញចុះត្រួតពិនិត្យ សំណង់អគារវេទិការសាលាសំណាក់ ព្រមទាំងសមិទ្ធផលនានា ដែលកំពុងដំណើការសាងសង់ នៅតំបន់X-១៦ ឃុំកោះថ្ម ស្រុកមេមត់ ខេត្តត្បូងឃ្មុំ និងពិភាក្សាការងារជាមួយភាគីវៀតណាម ដើម្បីរៀបចំទីនោះ ជាតំបន់ប្រវត្តិសាស្ត្ររបស់សម្តេចតេជោ ហ៊ុន សែន។

ដោយតំបន់X-១៦ គឺជាតំបន់ប្រវត្តិសាស្រ្តរបស់មគ្គុទេសក៍ឯក និងប្រតិបត្តិករនយោបាយ ឈ្នះឈ្នះ សម្តេច តេជោ ហ៊ុន សែន ដើម្បីឆ្ពោះទៅរកការរំដោះជាតិចេញភ្លើងសង្គ្រាម រហូតទទួលបានសន្ដិភាព។
តំបន់កោះថ្ម ចំណុចអាងដាច់ X16 ជាចំណុចនៃការចាប់ផ្ដើមដំណើរតស៊ូរំដោះជាតិ របស់សម្ដេចតេជោ ហ៊ុន សែន ឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុលពត (២០ មិថុនា ១៩៧៧-២០ មិថុនា ២០២០)។

ដោយឡែក «ទិវាចងចាំនៃដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត» គឺត្រូវបានធ្វើឡើងជារៀងរាល់ឆ្នាំ ហើយរាល់ឯកសារនានារបស់សមមិត្ត ហ៊ុន សែន ពាក់ព័ន្ធនឹងដំណើរ ការតស៊ូលះបង់ជីវិត ដើម្បីជាតិមាតុភូមិត្រូវបានឆ្លាក់នៅវិមានឈ្នះ-ឈ្នះ ដើម្បីទុកឲ្យកូនចៅ ជំនាន់ក្រោយបានសិក្សារៀនសូត្រ និងចងចាំនូវព្រឹត្តិការណ៍មួយនេះ។

សូមជម្រាបដែរថា ជាមួយនឹងការរៀបចំតំបន់ប្រវត្តិសាស្ត្ររបស់ សម្តេចតេជោ ហ៊ុន សែន នៅតំបន់X-១៦ ឃុំកោះថ្មនេះ ឯកឧត្តម ជាម ច័ន្ទសោភ័ណ អភិបាលខេត្តត្បូងឃ្មុំ បានផ្តួចផ្តើមរៀបចំឲ្យមានកម្មវិធីទស្សនកិច្ចសិក្សាដែលមានឈ្មោះថា «គុណធម៍ប្រវត្តិសាស្ត្រ» ជាទីតាំងដែលផ្តើមសន្តិភាពសម្រាប់ប្រជាជនកម្ពុជាទូទាំងប្រទេសផងដែរ។

បើតាម លោកជាម ច័ន្ទសោភ័ណ កម្មវិធី«គុណធម៍ប្រវត្តិសាស្ត្រ»នេះ ធ្វើឡើងដើម្បីឲ្យសិស្សានុសិស្សជាយុវជនជំនាន់ក្រោយ ជាសសរទ្រូងប្រទេសជាតិ បានយល់កាន់តែច្បាស់ពីប្រវត្តិសាស្ត្រពិតប្រាកដ និងដំណើរតស៊ូរបស់សម្តេចតេជោ ហ៊ុន សែន និងឥស្សរជនទាំងអស់ ក្នុងដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត ដែលបានតស៊ូលះបង់បូជាសាច់ស្រស់ឈាមស្រស់ ប្តូរយកសុខសន្តិភាពជូនជាតិមាតុភូមិ ជាគុណតម្លៃនៃសន្តិភាព ចារជាប់ជាប្រវត្តិសាស្ត្រ ក្នុងបេះដូងកូនខ្មែរគ្រប់រូប គ្រប់ៗជំនាន់៕SRP

ខេត្តសៀមរាប៖លោកសឿន តុលា ស្ថាបនិកក្រុមហ៊ុនផា ផា យ៉ា បាននិពន្ធអត្ថបទមួយមានចំណងជើងថា«ភាពរីករាយគឺជាជម្រើស»។

លោកសឿន តុលា បានសរសេរថា៖ ” ប្រសិនបើយើងគិតថា ទាល់តែមានឡានល្អ ផ្ទះធំ និងលុយច្រើនក្នុងកុងធនាគារ នោះយើងនឹងមានភាពរីករាយ ហើយមានសុភមង្គល យើងកំពុងតែ ធ្វើអោយបាត់ ភាពរីករាយ និងសុភមង្គល ក្នុងពេលបច្ចុប្បន្ននេះហើយ”។  រឿងសំខាន់បំផុតនៅក្នុងជីវិត មិនមែនវត្ថុទេ ហើយ វត្ថុ ដែលយើងទាមទារចង់បាន មិនអាចបង្កើត សុភមង្គល យូរអង្វែងបានឡើយ ” ប្រសិនបើ អ្នកស្រលាញ់ការងារដែលអ្នកកំពុងធ្វើ និង អ្វីដែលអ្នកកំពុងមាន អ្នកនឹងមានសុភមង្គល សូមចងចាំថា : សុភមង្គល នាំឲ្យអ្នក មានទ្រព្យ នឹងមានលុយ ច្រើនឡើងថែមទៀត ប៉ុន្តែ ការចង់បានតែលុយ និងទ្រព្យសម្បត្តិ អ្នកមិនអាច មានសុភមង្គលបានទេ។
ក្នុងអត្ថបទនេះ មានដប់ចំណុចត្រូវចាប់យកគិតនឹងអនុវត្តដើម្បីឲ្យមានភាពរីករាយ និងសុភមង្គល ៖

១- បើកចិត្តទូលាយ :
ការប្រកាន់ និយមតែគំនិតរបស់ខ្លួន យល់ថាខ្លួនជាអ្នកត្រឹមត្រូវ អ្នកនិងបាត់បង់ឱកាស រៀនពីអ្នកដែលមានគំនិតផ្សេងៗពីយើង ព្រមទាំង បាត់បង់ភាពទំនាក់ទំនង ស្វែងយល់ពីគ្នាទៅវិញទៅមក ដើម្បីស្វែងយល់ នៅបុព្វហេតុរួម ។

២- ប្រកាន់ជំហរម្ចាស់ការខ្លួនឯង:
សុភមង្គល ភាពរីករាយ មិនអាចកើតឡើងតែឯងបានទេ ប៉ុន្តែ យើងក៏មិនពឹងផ្អែក អ្នកដទៃ ផ្ដល់សុភមង្គលឲ្យយើងដែរ នៅក្នុងលោកយើងនេះ គ្មានអ្នកណាមួយ មិនជួបការលំបាក មិនជួបបញ្ហានោះទេ ដូច្នេះ ការមើលឃើញអ្នកដទៃ ប្រសើរជាងខ្លួន សប្បាយចិត្តជាងខ្លួន នោះពិតជាមិនត្រឹមត្រូវ សម្រាប់ខ្លួនយើងទេ ” សុភមង្គល គឺជាជម្រើសចេញពីក្នុងចិត្ត ដែលយើងចាប់ផ្ដើមគិត នឹងធ្វើ តែម្ដង ” អ្នកអាចអោយ សុភមង្គល ការលើកទឹកចិត្ត ដល់អ្នកដទៃ នៅពេលដែលអ្នក រៀនចាប់យក សុភមង្គល និង ចេះ ចាប់យក ការលើកទឹកចិត្តខ្លួនឯង ពីព្រោះ អ្នកអាចផ្ដល់ឱ្យអ្នកដទៃ នូវអ្វីដែលអ្នកមានប៉ុណ្ណោះ”។

៣- កុំប្រកាន់ខ្លួន:
នៅក្នុងលោកយើងនេះ មនុស្សជាច្រើន បានយល់ច្រឡំ ថាខ្លួនជាអ្នកចេះ ជាអ្នកមានលុយ ជាអ្នកមានឋានៈ ” ប៉ុន្តែ ភាពរីករាយ និងសុភមង្គល មិនយល់អំពីបញ្ហានោះទេ ពួកគេ ត្រូវការសប្បាយជុំគ្នា ត្រូវធ្វើកិច្ចការសាមញ្ញរួមគ្នា ត្រូវការចែករំលែកគ្នា តែប៉ុណ្ណោះ។

៤- រៀនបត់បែន :
ប្រសិនបើអ្នក ចេះរាំតែមួយបទ អ្នកមិនមានអារម្មណ៍ ល្អ នឹងសប្បាយចិត្តទេ ពីព្រោះ មានបទភ្លេងច្រើនណាស់ តើអ្នកត្រូវរាំបន្តទៀត..យើងអាចគ្រប់គ្រងខ្លួនយើងបាន យើងអាចមានវិន័យចំពោះខ្លួនយើងបាន យើងអាចទិញវត្ថុ ដែលយើងត្រូវការបាន ប៉ុន្តែក្នុងលោកយើងនេះ យើងមិនអាចគ្រប់គ្រង ឲ្យមានភាពសប្បាយ ពេញក្នុងដៃ របស់យើងបានដោយ ” សេដ្ឋកិច្ច មានឡើង មានចុះ ” ទំនាក់ទំនងក្នុងគ្រួសារឬមិត្តភក្កិក្នុងសង្គម មានល្អនឹងអត់ល្អ ទាំងអស់នោះ ទាមទារឲ្យយើង អត់ធ្មត់ និងបត់បែន ហើយចាប់យក ចំណុចល្អៗ ដើម្បីសន្សំក្នុងចិត្ត ហើយមានភាពរីករាយ ទោះស្ថិតក្នុង កាលៈទេសៈណាក៏ដោយ។ យ៉ាងហោចណាស់ អ្នកត្រូវសម្ដែងនូវអំណរគុណ ជាប្រចាំថ្ងៃ ដែលយើងបានដើរ ដែលយើងមានខួរក្បាលគិត ដែលយើងបានរស់រានមានជីវិត ដែលយើងមានលទ្ធភាព ប្រស្រ័យទាក់ទងគ្នាបាន មកដល់ថ្ងៃនេះ។

៥- រស់ក្នុងបច្ចុប្បន្នភាព:
ភាពស្ដាយស្រណោះ អ្វីដែលបានបាត់ ភាពឈឺចាប់ក្នុងអតីតកាល នឹងធ្វើឲ្យអ្នកបាត់បង់កម្លាំងចិត្ត និងសុភមង្គលក្នុងពេលបច្ចុប្បន្ន រីឯ ការគិត ត្រេកត្រអាលចំពោះអនាគត នឹងធ្វើឲ្យអ្នក បាត់បង់ភាពម៉ត់ចត់ និងភាពរីករាយ ក្នុងពេលបច្ចុប្បន្ន ។  អ្វីដែលយើងត្រូវធ្វើ គឺសប្បាយ រីករាយ ម៉ត់ចត់ ឲ្យអស់លទ្ធភាព ក្នុងពេលបច្ចុប្បន្ន ” ប្រសិនបើ យើង ធ្វើបានល្អ ក្នុងពេលបច្ចុប្បន្ន អនាគតយើង នឹងចាប់ផ្ដើម ពីថ្ងៃនេះទៅ”។

៦- គិតតែរឿងល្អ មើលតែចំណុចល្អ :
សូមចងចាំថា: លទ្ធផលដែលអ្នកបានទទួលមកដល់ថ្ងៃនេះ កើតចេញពីអ្វីអ្នកបានគិតក្នុងអតីតកាល ។
ប្រសិនបើអ្នកចាប់ផ្ដើមគិតល្អ ធ្វើតែរឿងល្អៗ អ្នកនឹងមានសុភមង្គល ដែលសុភមង្គលនោះ និងអ្នក ឲ្យមានទ្រព្យ មិនប្រាក់ កើនឡើង។

៧- រក្សាការលើកទឹកចិត្តខ្លួនឯង :
ពិភពលោក ឬពិភពខាងក្រៅ ពិតជាស្មុគស្មាញ អាចឱ្យយើង មានអារម្មណ៍ បាក់ទឹកចិត្ត និងអព្វមង្គល ប្រសិនបើយើង ទទួលយកលើសលប់ពេក ” មានផ្លូវតែមួយគត់ ដែលអ្នកត្រូវដើរ គឺកើតលើកទឹកចិត្តខ្លួនឯង ជាប្រចាំ ឲ្យបានច្រើនដង ជារៀងរាល់ថ្ងៃ ហើយក្លាយជា ” អ្នកជំនាញ ការលើកទឹកចិត្ត ឲ្យខ្លួនឯង”

៨- ទទួលយកការលំបាក:
ជម្លោះកើតឡើង ក្នុងគ្រួសារ ឬក្នុងក្រុមការងារ រឿងក្នុងចិត្តរបស់យើង ដោយសារតែ ភាគច្រើនបំផុត មនុស្សមិនចង់ទទួលការលំបាក សូមចងចាំថា: នៅក្នុងលោកយើងនេះ គ្មានអ្វីលំបាកនោះទេ លើកលែងតែមនុស្សលំបាកប៉ុណ្ណោះ ពីព្រោះ ពួកគាត់ខ្ជិលគិត ពូគាត់ខ្ជិលធ្វើ ដោយសារតែពួកគាត់ចង់បានភាពងាយស្រួល។

៩- ចេះគោរពខ្លួនឯង
ការរៀនគោរពខ្លួនឯង គឺជាតម្លៃ ថ្លៃជាងគ្រាប់ពេជ្រ ឬជាងអ្វីទាំងអស់ សូមចូលចាំថា ” នៅពេលដែលយើងបាត់បង់ការគោរពខ្លួនឯង គឺយើងបាត់បង់ការស្រលាញ់ខ្លួនឯង នៅសល់តែ ភាពស្អប់ ហ្នឹងជម្លោះតែប៉ុណ្ណោះ ” នៅពេលដែលស្អប់ចូលខ្លួន យើងចាប់ផ្ដើមមើលជ្រុងអាក្រក់ យើងចាប់ផ្ដើមកុំគួនសងសឹក និងការយកឈ្នះយកចេញ ” ការយកឈ្នះយកចាញ់ មិនអាចពាំនាំសុភមង្គលបានឡើយ ”

១០- ការជួយ និងអបអរ :
សុភមង្គល និងអារម្មណ៍សប្បាយចិត្ត នៅពេលដែលយើង បានជួយ ដល់អ្នកដទៃ នៅលើលោកយើងនេះ យើងមានកិច្ចការជាច្រើន ដែលត្រូវជួយ មិនត្រឹមតែ ជាលុយ ឬជារបស់តែប៉ុណ្ណោះទេ ពីព្រោះការជួយ មាននៅក្នុងទម្រង់ជាច្រើន..ដែលមិនអាចពណ៌នាអស់ ព្រមទាំង យើងរៀនត្រេកអរ នៅពេលដែលឃើញ អ្នកដទៃ ទទួលបានផលល្អ ឬល្អ កើតឡើងចំពោះពួកគេ។

និពន្ធដោយលោក សឿន តុលា ស្ថាបនិកក្រុមហ៊ុន ផា ផា យ៉ា

PAPAYA NEXT STEP CO,.LTD.

* PAPAYA REAL ESTATE

( គម្រោងអភិវឌ្ឍន៍អចលនទ្រព្យ)

*PAPAYA HOMESTAY

(គម្រោងលើវិស័យទេសចរណ៍)

*PAPAYA GARDEN

( គម្រោងលើវិស័យកសិកម្ម

និងចែកចាយអាហារ)