ខេត្តសៀមរាប៖យ៉ាងហោចមនុស្សម្នាក់បានស្លាប់និងបីនាក់ទៀតបានរងរបួស ខណៈជិះម៉ូតូបុកម៉ូតូរ៉កង់បី។

ហេតុការណ៍បានកើតឡើង នៅម៉ោង១៩ លើផ្លូវជាតិលេខ៦  ចំណុចបង្គោលគីឡូម៉ែត្រ លេខខ៣៣៧- ៣៣៨ ភូមិប៉ាក់ប៉ាន់ ឃុំសសរស្តម្ភ ស្រុកពួកខេត្តសៀមរាប រវាងម៉ូតូ២គ្រឿង និងម៉ូតូកង់៣ ឈប់ចតនៅចញ្ចើមផ្លូវគ្មានភ្លើងសញ្ញា។

អាជ្ញាធរមូលដ្ឋាន បានប្រាប់សៀមរាប ប៉ុស្តិ៍ ថា
គ្រោះថ្នាក់ចរាចរណ៍ ម៉ូតូម៉ាកហុងដាឌ្រីមពណ៌ខ្មៅផលិត ឆ្នាំ2015 ពាក់ផ្លាក1លេខសៀមរាប 1T-7879 បើកបរដោយឈ្មោះ អឿ អាត ភេទប្រុសអាយុ២៣ឆ្នាំ នៅភូមិប្របម៉ៃ
ឃុំព្រៃជ្រូក ស្រុកពួក ខេត្តសៀមរាប មុខរបរ កសិករ (គ្មានមួកសុវត្តិភាព ស្លាប់នៅកន្លែងកាត់ហេតុ) បើកបរទិសដៅពីកើត ទៅលិច និងម៉ូតូ១គ្រឿងទៀតម៉ាកហុងដាឌ្រីមពណ៌ខ្មៅផលិត ឆ្នាំ2012ពាក់ផ្លាកលេខសៀមរាប 1M-7257 បើកបរដោយឈ្មោះ ហាវ សីហា ភេទប្រុសអាយុ១៨ឆ្នាំ នៅភូមិពង្រចាស់ ឃុំសសរស្ដម្ភ ស្រុកពួក ខេត្តសៀមរាបមុខរបរកសិករ (គ្មានមួកសុវត្តិភាព) ដឹកមនុស្ស២នាក់៖
១/ឈ្មោះ ទិន នាង ភេទប្រុសអាយុ២៥ឆ្នាំ នៅភូមិយាង ឃុំយាងស្រុកពួក ខេត្តសៀមរាប មុខរបរកសិករ(គ្មានមួកសុវត្តិភាព រងរបួស)
២/ឈ្មោះ សោម សំណាង ភេទប្រុសអាយុ៤០ឆ្នាំ នៅភូមិចុងថ្នល់ ឃុំយាង ស្រុកពួក ខេត្តសៀមរាប មុខរបរកសិករ (គ្មានមួកសុវត្តិភាពរងរបួស) បើកបរទិសដៅពីកើត ទៅលិច បានបុកនឹងម៉ូតូកង់បី ពណ៌ខៀវពាក់ផ្លាកលេខព្រៃវែង 1S- 5678 ដែលឈប់ចតនៅលើចិញ្ចើមផ្លូវ ចំហៀងខាងជើងបែរក្បាល ទៅទិសខាងលិច (បែកកង់មុខ) អ្នកបើកបរមិនស្គាល់់អត្តសញ្ញាណរត់គេចខ្លួនបាត់។

អាជ្ញាធរបានបន្តថា ករណីនេះបណ្តាអោយស្លាប់មនុស្សម្នាក់នាក់ឈ្មោះ អឿ អាត និងរបួសមនុស្សចំនួន០៣នាក់
១/ឈ្មោះ ហាវ សីហា(មធ្យម)
២/ឈ្មោះ ទិន នាង(មធ្យម)
៣/ឈ្មោះសោមសំណាង(ស្រាល)
ខូចខាត:ម៉ូតូ ០២គ្រឿង (ធ្ងន់)
និងម៉ូតូកង់បី១គ្រឿង(ស្រាល)។

បើតាមអាជ្ញាធរ ហេតុការណ៍នេះ មូលហេតុ ម៉ូតូកង់បីឈប់ចតដោយគ្មានភ្លើងសញ្ញា… និងអ្នកបើកបរម៉ូតូទាំង២គ្រឿងបើកបរក្នុងល្បឿនលឿនខ្វះការប្រុងប្រយ័ត្ន។ ក្រោយពេលកើតហេតុកម្លាំងផ្នែកជំនាញសហការជាមួយនគរបាលរដ្ឋបាលសសរស្តម្ភចុះទៅវាស់វែង និងសង្គ្រោះជនរងគ្រោះ យកទៅមន្ទីរពេទ្យ និងប្រគល់ឯសាកសព ជូនក្រុមគ្រួសារយកទៅធ្វើបុណ្យតាមប្រពៃណី។ វត្ថុតាង ត្រូវបានយកទៅរក្សាទុកនៅដើម្បីចាត់ការតាមនីតិវិធី៕ដោយនាគខៀវ

រដ្ឋមន្ត្រីក្រសួងមហាផ្ទៃ ឯកឧត្ដម ស សុខា បានលើកឡើងថានឹងមានការស្នើសុំទៅ ឯកឧត្តម រដ្ឋមន្រ្តី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងការសម្របសម្រួល ការផ្ទេរកម្មសិទ្ធិ ពីឪពុកម្តាយមកកូន តាមប្រព័ន្ធឌីជីថល ដោយប្រើពេលយ៉ាងយូរ៥នាទី ដោយមិនអស់ថវិកាអ្វីទាំងអស់។

រដ្ឋមន្រ្តីក្រសួងមហាផ្ទៃបន្តទៀតថា ការស្នើសុំនេះ ឯកឧត្តម សាយ សំអាល ក៏បានឯកភាព ដើម្បីធ្វើការងារនេះ ឱ្យបានលឿនហើយដែរ។

រដ្ឋមន្ត្រីក្រសួងមហាផ្ទៃ ស សុខា បានលើកឡើងផងដែរថា បច្ចុប្បន្ននេះ ប្រទេសនៅក្នុងពិភពលោក កំពុងតែមានការអភិវឌ្ឍជឿនលឿនផ្នែកបច្ចេកវិទ្យា។ ដូច្នេះ ប្រទេសកម្ពុជា ក៏កំពុងតែធ្វើការអភិវឌ្ឍផ្នែកបច្ចេកវិទ្យានេះដែរ។

រដ្ឋមន្ត្រីក្រសួងមហាផ្ទៃរូបនេះ បានអះអាងថា នៅថ្ងៃអនាគតយើងចង់ប្រែក្លាយប្រទេសកម្ពុជា ទៅជាប្រទេសឌីជីថល ដោយយើងត្រូវការប្រើកត្តាពីរសំខាន់៖ ទី១ កត្តាសម្ភារ ទី២ កត្តាធនធានមនុស្ស ឬបុគ្គល។ រដ្ឋមន្ត្រីបានថ្លែងទៀតថា ក្រសួងនឹងផ្ដល់ឱកាសជាអាទិភាព សម្រាប់ជ្រើសរើសមន្ត្រីរាជការផ្នែកឌីជីថលនាពេលខាងមុខឆាប់ៗនេះ។

ឯកឧត្ដម ស សុខា ក៏បានណែនាំឱ្យឯកឧត្តមអភិបាលខេត្តសៀមរាប ថ្មី ត្រូវយកចិត្តទុកដាក់ ក្នុងការដោះស្រាយ នូវបញ្ហាដែលកើតមានឱ្យបានលឿន ដោយយកកត្តាឈ្នះ ឈ្នះទាំងអស់គ្នាជាគោល។

ក្នុងពេលដែលចូលកាន់មុខតំណែងជាអភិបាលខេត្តសៀមរាប ឯកឧត្តម ប្រាក់ សោភ័ណ បានប្តេជ្ញាថា នឹងខិតខំអស់កម្លាំងកាយ កម្លាំងចិត្ត ចំណេះដឹង និងបទពិសោធន៍ ដើម្បីចូលរួមចំណែកពង្រឹង និងពង្រីកសាមគ្គីផ្ទៃ ក្នុងបង្កើនកិច្ចសហប្រតិបត្តិការ និងសហការឱ្យបានល្អប្រសើរជាមួយថ្នាក់ដឹកនាំ នៃគណៈអភិបាលខេត្ត ក្រុមប្រឹក្សាខេត្ត ក្រសួង ស្ថាប័នទាំងអស់ ដើម្បីរួមគ្នាកសាង និងអភិវឌ្ឍន៍ខេត្តសៀមរាប ទាំងមូលឱ្យមានការរីកចម្រើនថែមទៀតសំដៅកាត់បន្ថយភាពក្រីក្រ។

សូមជម្រាបថាពិធីប្រកាស ឯកឧត្តម ប្រាក់ សោភ័ណ ចូលកាន់មុខតំណែងអភិបាលខេត្តសៀមរាប ជំនួសឯកឧត្តម ទៀ សីហា ដែលបានឡើងមុខតំណែងជា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិនៅរដ្ឋបាលខេត្តសៀមរាបថ្ងៃម្សិលមិញ៕

ខេត្តសៀមរាប៖ឯកឧត្តម​បណ្ឌិត​ ស​ សុខា​ ឧបនាយករដ្ឋមន្រ្តី​ រដ្ឋមន្រ្តីក្រសួងមហាផ្ទៃ​ បានអញ្ជេីញជាអធិបតីដ៏ខ្ពង់ខ្ពស់​ ប្រកាសចូលកាន់មុខតំណែង ឯកឧត្តម ប្រាក់ សោភ័ណ ជាអភិបាល នៃគណៈអភិបាលខេត្តសៀមរាប។

ពិធីប្រកាសនេះធ្វើឡើង នៅរដ្ឋបាលខេត្តសៀមរាប
នៅរសៀល ​ថ្ងៃអង្គារ​ ទី០៥ ខែកញ្ញា ឆ្នាំ២០២៣​ ដោយមានការចូលរួមពីរដ្ឋលេខាធិការ​ក្រសួងមហាផ្ទៃ​ និងថ្នាក់ដឹកនាំគ្រប់លំដាប់ថ្នាក់ក្នុងខេត្តសៀមរាបជាច្រេីនរូបផងដែរ​៕ដោយនាគខៀវ

ភ្នំពេញ៖មនុស្សចំនួន២នាក់ត្រូវកម្លាំងនាយកដ្ឋាននគរបាលព្រហ្មទណ្ឌ បង្ក្រាបបានភ្លាមៗ ករណីកាច់កម៉ូតូបានសម្រេចភ្លាម   នៅខណ្ឌទួលគោក។

ការបង្ក្រាបធ្វើឡើង នៅថ្ងៃទី០៤ ខែកញ្ញា ឆ្នាំ២០២៣​ ក្នុងសង្កាត់ទឹកល្អក់ទី២​ខណ្ឌទួលគោក។

មន្ត្រីនគរបាលបានឲ្យដឹងថា
ជនសង្ស័យទី១៖ ឈ្មោះ​ ម៉ៅ​ រតនះ ភេទប្រុស អាយុ៣១ឆ្នាំ ជនជាតិខ្មែរ មុខរបរធ្វេីសំណង់ ទីកន្លែងស្នាក់នៅផ្ទះមិនពិតប្រាកដ (អ្នកចុះកាច់)។

*ទី២៖ ឈ្មោះ​ ហៀង​ លីហ័ង ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ ទីកន្លែងស្នាក់នៅភូមិរកាធំ ឃុំបែកចាន​ ស្រុកអង្គស្នួល​ ខេត្តកណ្តាល (អ្នកបេីក)។

មន្ត្រីនគរបាលបន្តថា ករណីនេះ
ដកហូតមាន៖
១.​ ម៉ូតូហុងដា​ ឃ្លីក ពណ៌ស ពាក់ស្លាក​លេខ​ ភ្នំពេញ​ 1HL-6412(របស់ជន​រងគ្រោះ)។
២.​ ម៉ូតូហុងដា​ឌ្រីម ពណ៌ខ្មៅ ពាក់ស្លាក​លេខ​ ភ្នំពេញ​ 1KC-6034(របស់ជនសង្ស័យ)។

បច្ចុប្បន្ន​ កម្លាំងជំនាញមបាននាំជនសង្ស័យ មកនាយកដ្ឋាននគរបាលព្រហ្មទណ្ឌ​ ដេីម្បីធ្វេីការសាកសួរ​ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី។

សូមជម្រាបថា ប្រតិបត្តិការនេះ ដោយលោកឧត្តមសេនីយ៍ត្រី ប៊ុត​ វណ្ណារដ្ឋ អនុប្រធាននាយកដ្ឋាន បានដឹកនាំកម្លាំងជំនាញការិយាល័យ​ព្រហ្មទណ្ឌកម្រិតធ្ងន់ ដែលមានលោកវរសេនីយ៍ឯក ញ៉ែម​ វ៉ន ជានាយការិយាល័យ ដោយមានការចូលរួមសហការពីលោក​វរសេនីយ៍ទោ ប៊ុត ស៉ីម៉េង ចុះល្បាតតាមផ្លូវ​លេខ២៦១ កែងផ្លូវលេខ២០៤​ ក្នុងសង្កាត់ទឹកល្អក់ទី៣ ខណ្ឌទួលគោក ក៏ប្រទះឃេីញជនសង្ស័យ​​ ជិះម៉ូតូ១គ្រឿង មានគ្នាចំនួន២នាក់ បានធ្វេីសកម្មភាព​កាច់កម៉ូតូ ដែលចតទុកចោលបានសម្រេច៕

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវ ពេជ ចន្ទមុន្នី ហ៊ុនម៉ាណែត នៅរសៀលថ្ងៃទី៤ ខែកញ្ញា ឆ្នាំ ២០២៣ នេះ បានដឹកនាំគណៈប្រតិភូជាន់ខ្ពស់​អញ្ជើញទៅដល់ទីក្រុងហ្សាកាតាប្រទេសឥណ្ឌូនេស៊ី ប្រកបដោយសុវត្ថិភាពហើយ ដើម្បីអញ្ជើញចូលរួម ក្នុងកិច្ចប្រជុំ​កំពូល​អាស៊ានលើកទី៤៣ និងកិច្ចប្រជុំកំពូលពាក់ព័ន្ធ តបតាមការអញ្ជើញរបស់លោក ចូកូ វីដូដូ ប្រធានាធិបតីឥណ្ឌូនេស៊ី ដែលជាប្រធានប្តូរវេនអាស៊ាន។

វត្តមាននៃការអញ្ជើញដល់ សម្ដេចមហាបវរធិបតី ហ៊ុន ម៉ាណែត និងលោកជំទាវ នៅអាកាសយានដ្ឋានអន្តរជាតិ នៃទីក្រុងហ្សាកាតា ប្រទេសឥណ្ឌូនេស៊ី ត្រូវបានទទួលការធ្វើគារវកិច្ចស្វាគមន៍រាក់ទាក់យ៉ាងកក់ក្តៅជាទីបំផុតពីសំណាក់ មន្ត្រីជាន់ខ្ពស់នៃប្រទេសម៉ាឡេស៊ី ក្នុងនោះ មានរដ្ឋមន្ត្រីក្រសួងទេសចរណ៍ និងច្នៃប្រឌិត អមដំណើដោយ ឯកឧត្តម ឯកអគ្គរាជទូតកម្ពុជា តំណាងអចិន្ត្រៃយ៍ ប្រចាំអាស៊ាន និងភារធារីស្តីទី នៃស្ថានទូតកម្ពុជា ប្រចាំសាធារណរដ្ឋឥណ្ឌូណេស៊ី និងបានត្រៀមខ្លួនរួចរាល់សម្រាប់កិច្ចប្រជុំកំពូលអាស៊ានលើកទី៤៣ ចាប់ពីថ្ងៃទី៤-៧ កញ្ញា ២០២៣។

ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា កិច្ចប្រជុំកំពូលខាងលើនេះ នឹងប្រព្រឹត្ត​ទៅ​នៅរដ្ឋធានីហ្សា​ការតា ពីថ្ងៃទី៤ ដល់ទី៧ ខែកញ្ញា ឆ្នាំ២០២៣។ អញ្ជើញអម​ដំណើរ​​សម្តេច​នាយករដ្ឋមន្ត្រី រួមមានឯកឧត្តម, លោកជំទាវ, ឧបនាយករដ្ឋមន្ត្រី រដ្ឋមន្ត្រី និងមន្ត្រី​សំខាន់ៗ​នៃរាជរដ្ឋាភិបាល ព្រមទាំងថ្នាក់ដឹកនាំផ្នែកឯកជនជាច្រើនរូបទៀត។

កិច្ចប្រជុំកំពូលអាស៊ាននៅឥណ្ឌូនេស៊ី នឹងធ្វើឡើង​ក្រោម​​មូលបទ «សារៈសំខាន់អាស៊ាន៖ ស្នូលនៃកំណើន» កិច្ចប្រជុំកំពូលនឹងផ្តោត​លើការជំរុញ​ចក្ខុវិស័យសហគមន៍អាស៊ានឆ្នាំ២០២៥ ដែលផ្តល់ជាផែនទីចង្អុលផ្លូវមួយដ៏សំខាន់​សម្រាប់ការ​ពង្រឹងឥទ្ធិពលអាស៊ាន តាមរយៈការបង្កើនប្រសិទ្ធភាពស្ថាប័ន ក្នុងគោលដៅស្វែងរកផល​ប្រយោជន៍​សម្រាប់ប្រជាជនរបស់ខ្លួននៅលើឆាកអន្តរជាតិ។ បន្ថែមពីនេះ ការពិភាក្សានឹងផ្តោតការយកចិត្តទុកដាក់លើការពូនជ្រុំ​សហគមន៍អាស៊ានប្រកប​ដោយបរិយាប័ន្ន ចក្ខុវិស័យវែងឆ្ងាយ និងយកប្រជាជនជាស្នូល ដែលជាកម្លាំងដ៏សំខាន់ ដើម្បី​សម្រេច​បាននូវអាស៊ានឆ្នាំ២០៤៥។

របៀបវារៈសំខាន់ៗនៅកិច្ចប្រជុំ រួមមានកិច្ចព្រមព្រៀងជាឯកច្ឆន្ទ ៥ចំណុច ស្តីពីមីយ៉ាន់ម៉ា និង​សេចក្តីសម្រេចផ្សេងៗទៀតរបស់ថ្នាក់ដឹកនាំអាស៊ាន។ ថ្នាក់ដឹកនាំអាស៊ាន ក៏នឹងពិភាក្សា​លើ​ទស្សន​វិស័យអាស៊ាន ស្តីពីឥណ្ឌូ-ប៉ាស៊ីហ្វិក និងផ្លាស់ប្តូរទស្សនៈស្តីពីបញ្ហាតំបន់ និងអន្តរជាតិ​ដែល​ជាក្តីបារម្ភរួម។

ក្នុងអំឡុងពេលទស្សនកិច្ចនៅរដ្ឋធានីហ្សាការតា សម្តេចមហាបវរធិបតី ហ៊ុន ម៉ា​ណែត នឹងចូល​ជួបសម្តែងការគួរសម និងពិភាក្សាការងារជាមួយលោកប្រធានាធិបតី ចូកូ វីដូដូ។ សម្តេច​នា​យ​ក​​រដ្ឋមន្ត្រី ក៏នឹងមានជំនួបទ្វេភាគីជាមួយ​សមភាគីអាស៊ាន និងថ្នាក់ដឹកនាំពិភពលោក​សំខាន់ៗ​មួយចំនួនទៀត៕

រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត មានការគាំទ្រយ៉ាងរឹងមាំទាំងផ្ទៃក្នុងជាតិ ក្នុងឆាកតំបន់និងលើឆាកអន្តរជាតិ

ទី១៖ ការចេញដំណើររបស់គណៈប្រតិភូជាន់ខ្ពស់កម្ពុជាដឹកនាំដោយសម្តេចមហាបវរធិបតីហ៊ុន ម៉ាណែត ដើម្បីអញ្ជើញចូលរួមកិច្ចប្រជុំកំពូលអាស៊ាន កិច្ចប្រជុំកំពូលអាស៊ានបូក និងកិច្ចប្រជុំកំពូលអាស៊ីបូព៌ា នៅទីក្រុងហ្សាការតា ប្រទេសឥណ្ឌូនេស៊ី គឺជាការចាប់ផ្តើមបើកទំព័របេសកកម្មក្រៅប្រទេសក្នុងនាមជានាយករដ្ឋមន្ត្រីកម្ពុជា។ នាឱកាសនោះ ប្រមុខរាជរដ្ឋាភិបាលកម្ពុជាដែលជាមេដឹកនាំក្មេងជាងគេក្នុងចំណោមមេដឹកនាំដែលចូលរួមប្រជុំនៅហ្សាការតាក៏គ្រោងជួបពិភាក្សាទ្វេភាគីជាមួយមេដឹកនាំប្រទេសធំៗជាច្រើនទៀតមានដូចជា ចិន ជប៉ុន កូរ៉េខាងត្បូង រុស្ស៊ី ឥណ្ឌា សហរដ្ឋអាមេរិក អូស្ត្រាលី និងនូវែលហ្សេឡង់ ជាដើម។ នៅមុនពេលចេញដំណើរនេះ សម្តេចធិបតី ហ៊ុន ម៉ាណែត ក៏បានជួបពិភាក្សាការងាររួចហើយជាមួយតំណាងប្រទេសមហាអំណាចធំៗដូចជា ឯកអគ្គរដ្ឋទូតសហភាពអឺរ៉ុបប្រចាំកម្ពុជា, គណៈប្រតិភូសភានិងតំណារដ្ឋាភិបាលសហរដ្ឋអាមេរិក និងរដ្ឋមន្ត្រីទំនាក់ទំនងអន្តរជាតិនៃគណៈកម្មាធិការមជ្ឈឹមបក្សកុម្មុយនិស្តចិន ជាដើម។

ទី២៖ រហូតមកទល់ពេលនេះ មានមេដឹកនាំ ដែលជាប្រធានាធិបតី នាយករដ្ឋមន្ត្រី និងថ្នាក់ដឹកនាំជាន់ខ្ពស់ មកពីជាង ៤០ ប្រទេស និងមកពីគ្រប់ជ្រុងជ្រោយនៃពិភពលោកបានផ្ញើសារអបអរសាទរជូនចំពោះសម្តេចធិបតី ហ៊ុន ម៉ាណែត ក្នុងនាមជានាយករដ្ឋមន្ត្រីរបស់កម្ពុជា។ មានប្រទេសខ្លះ បានផ្ញើរសារអបអរសាទររហូតដល់ពីរឬបីក៏មានពោលគឺសារអបអរសាទរពីនាយករដ្ឋមន្ត្រីឬប្រធានាធិបតីផង រដ្ឋមន្ត្រីការបរទេសផង និងមន្ត្រីជាន់ខ្ពស់ផ្សេងទៀតផង។ នេះសបញ្ជាក់អំពីសន្តានចិត្តនិងមនោសញ្ចេតនាគាំទ្រដ៏ជ្រាលជ្រៅរបស់ថ្នាក់ដឹកនាំនៃប្រទេសទាំងនោះមកលើសម្តេចធិបតី ហ៊ុន ម៉ាណែត ដែលបានក្លាយជានាយករដ្ឋមន្ត្រីបន្តវេនរបស់កម្ពុជាតាមរយៈការបោះឆ្នោតតាមបែបប្រជាធិបតេយ្យ។

ទី៣៖ ក្រឡេកទៅមើលការបោះឆ្នោតកាលពីថ្ងៃទី ២៣ កក្កដា ឆ្នាំ ២០២៣ អត្រានៃការចូលរួមបោះឆ្នោតមានរហូតដល់ជាង ៨៤% ក្នុងនោះមានអ្នកបោះឆ្នោតជាង ៨២% បានទម្លាក់សន្លឹកឆ្នោតគាំទ្រគណបក្សប្រជាជនកម្ពុជា។ មានន័យថា ប្រជាពលរដ្ឋខ្មែរគាំទ្រសម្តេចតេជោ ហ៊ុន សែន ជាបេក្ខជននាយករដ្ឋមន្ត្រី និងសម្តេចធិបតី ហ៊ុន ម៉ាណែត ជាបេក្ខជននាយករដ្ឋមន្ត្រីបន្តវេន។ បើធៀបនឹងការបោះឆ្នោតក្រុមប្រឹក្សាឃុំសង្កាត់ឆ្នាំ ២០២២ សំឡេងគាំទ្រគណបក្សប្រជាជនកម្ពុជាកើនឡើងពីជាង ៧៤% ដល់ជាង ៨២%។ នេះសបញ្ជាក់យ៉ាងច្បាស់ថា ពលរដ្ឋខ្មែរគាំទ្រយ៉ាងលើសលប់ដល់បេក្ខជននាយករដ្ឋមន្ត្រីបន្តវេនគឺសម្តេចមហាបវរធិបតី ហ៊ុន ម៉ាណែត។

ឈរលើមូលដ្ឋានដូចបានលើកឡើងខាងលើ គេអាចសន្និដ្ឋានបានប្របកដោយភាពសត្យានុម័តថា រាជរដ្ឋាភិបាលអាណត្តិទី៧ ដឹកនាំដោយសម្តេចធិបតី ហ៊ុន ម៉ាណែត ចេញដំណើរនៅលើមូលដ្ឋានគ្រឹះនៃការគាំទ្រយ៉ាងរឹងមាំពីសំណាក់ផ្ទៃក្នុងជាតិផង ពីសំណាក់ប្រទេសក្នុងតំបន់ផង និងលើឆាកអន្តរជាតិផង៕

(ដោយ ប៉ែន បូណា អ្នកនាំពាក្យរាជរដ្ឋាភិបាល)

ភ្នំពេញ៖សម្ដេចហ៊ុន សែន នៅថ្ងៃអាទិត្យនេះ បានប្រកាសប្រើប្រាស់ប្រព័ន្ធហ្វេសប៊ុកឡើងវិញ។ តាមរយៈសំណេរ ទៅលើផេក សម្ដេចហ៊ុន សែន បានសរសេរថា៖ បងប្អូនជនរួមជាតិជាទីស្រឡាញ់!

ខ្ញុំសម្រេចមកប្រើប្រាស់Facebook វិញគួបផ្សំជាមួយtwitter,YouTube,TikTok Telegram ,instagram,បន្ទាប់ពីក្រុមហ៊ុនFacebook ទាត់ចោលអនុសាសន៍របស់ក្រុមមនុស្សខូចនិងផ្តល់យុត្តិធម៍សម្រាប់រូបខ្ញុំ។

ខ្ញុំសង្ឃឹមថាក្រុមហ៊ុនFacebook នឹងប្រកាន់ខ្ជាប់នូវក្រមសីលធម៍មិនងងឹតងងុលដូចក្រុមមនុស្សខូចដែលជាមនុស្ស
មិនត្រូវបានស្វាគមន៍នៅកម្ពុជានោះឡើយ។

សង្ឃឹមថាក្រុមហ៊ុនFacebook នឹងទទួលបានប្រាក់ចំណេញលើស២០០លានដុល្លារក្នុងមួយឆ្នាំនៅកម្ពុជា
ឯរាជរដ្ឋាភិបាលទទួលបាន១០ភាគរយដែលមានទឹកប្រាក់ លើស២០លានដុល្លារក្នុងមួយឆ្នាំ(តួលេខផ្នែកពន្ធដារ)។

ក្រសួងប្រៃសណីយ៍និងទូរគនាគមន៍បានចេញសេចក្តីប្រកាសទទួលយកតំណាងក្រុមហ៊ុនFacebook ឲ្យចូលមកធ្វើការ
នៅកម្ពុជាវិញតែមិនស្វាគមន៍ក្រុមមនុស្សខូចដែលផ្តល់អនុសាសន៍មិនត្រឹមត្រូវនោះឡើយ។

ការសម្រេចប្រើឬមិនប្រើFacebook គឺជាសិទ្ធិផ្តាច់មុខរបស់ខ្ញុំ(only one Hun Sen)។ចាប់ពីពេលនេះទៅបងប្អូន
អាចរកខ្ញុំឃើញនៅគ្រប់បណ្តាញសង្គមតែភាគច្រើនខ្ញុំនៅជាមួយTikTok និងTelegram ។

សូមអំនាវនាវជាថ្មីម្តងទៀតចំពោះបងប្អូនដែលប្រើឈ្មោះខ្ញុំ បង្កើតFacebook,TikTokក្លែងក្លាយ សូមលុបចោលជាបន្ទាន់ដើម្បីជៀសវាងការភាន់ច្រឡំ៕ដោយនាគខៀវ

ខេត្តសៀមរាប៖បុរសម្នាក់បានលង់ទឹកស្លាប់បង្កឲ្យមានការភ្ញាក់ផ្អើល។

ហេតុការណ៍បានកើតឡើង ល្ងាចថ្ងៃទី ២ ខែកញ្ញា ឆ្នាំ ២០២៣ ចំណុចប្រឡាយខាងកេីតភូមិ ស្ថិតក្នុងភូមិកកោះ ឃុំគោកធ្លកក្រោម ស្រុកជីក្រែង ខេត្តសៀមរាប។

សមត្ថកិច្ចប្រាប់ថា ជនរងគ្រោះ ឈ្មោះ ជា ជៀង ភេទប្រុសអាយុ៣៤ឆ្នាំ។ តាមការបំភ្លឺរបស់សាច់ញ្ញាតិ្ត និងមានការធ្វេីកោសល្យវិច័យរបស់សមត្ថកិច្ច ជនរងគ្រោះ ស្រវឹងស្រាជាប្រចាំ ចុះក្នុងទឹកប្រឡាយ ធ្លាក់ទឹកជ្រៅហែលមិនរួច បណ្តាលអោយលង់ទឹកស្លាប់តែម្ដង៕ដោយនាគខៀវ

ខេត្តកំពង់ឆ្នាំង៖រថយន្តលុចស៊ិសបានបុកម៉ូតូបណ្ដាលឲ្យស្លាប់មនុស្សម្នាក់និងរបួសម្នាក់។

ហេតុការណ៍បានកើតឡើង នៅរសៀលថ្ងៃទី២ ខែកញ្ញា ឆ្នាំ២០២៣ នៅលេីកំណាត់ផ្លូវជាតិលេខ៥ ស្ថិតក្នុងភូមិក្បាលដំរី ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង។

សមត្ថកិច្ចបានប្រាប់ថា ករណីគ្រោះថ្នាក់ចរាចរណ៍ នេះ បង្កដោយរថយន្តម៉ាកលុចស៊ិស RX300 ពណ៌ខ្មៅ ពាក់ស្លាកលេខ ភ្នំពេញ2AE-5443 អ្នកបើកបរមិនស្គាល់អត្តសញ្ញាណ (រត់គេចខ្លួនបាត់) បេីកបរពីលិចទៅកើត ក៏បុកម៉ូតូ១គ្រឿង ជិះឌុបគ្នាពីរនាក់ ម៉ាកគុប90 ពណ៌បៃតង ពាក់ស្លាកលេខ កំពង់ឆ្នាំង 1B-1008 អ្នកបើកបរឈ្មោះ ស្រ៊ុន ភេទប្រុស អាយុ៤១ឆ្នាំ រស់នៅភូមិ ឃុំកើតហេតុខាងលើ (ក្នុងដំណើរខ្វែងទិសគ្នា) បណ្តាលអោយស្លាប់ និងរងរបួសមនុស្សធ្ងន់។

បើតាមសមត្ថកិច្ចហេតុការណ៍នេះ មូលហេតុ បណ្ដាលមកពីបើកបរក្នុងល្បឿនលឿនខ្វះការប្រុងប្រយ័ត្ន៕ដោយនាគខៀវ

ដោយ ប៉ែន បូណា អ្នកនាំពាក្យរាជរដ្ឋាភិបាល បានសរសេរថា៖ រាជរដ្ឋាភិបាលអាណត្តិទី៧ ដឹកនាំដោយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានដាក់ឲ្យអនុវត្តភ្លាមៗចាប់ពីឆ្នាំ ២០២៣ នេះតទៅនូវគោលនយោបាយអាទិភាព ៦ចំណុចដែលជាក្តីសង្ឃឹមដ៏រឹងមាំរបស់រដ្ឋ៖

ទី១៖ ពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសាកល ពោលគឺនៅពេលមានជំងឺ មន្ត្រីរាជការស៊ីវិល កម្លាំងប្រដាប់អាវុធ និងប្រជាពលរដ្ឋ ជាពិសេសពលរដ្ឋក្រីក្រនិងងាយរងគ្រោះ ត្រូវទទួលបាននូវសេវាថែទាំសុខភាពគ្រប់ៗគ្នា។

ទី២៖ យុវជនដែលជាកូនអ្នកក្រីក្រនិងងាយរងគ្រោះនឹងទទួលបានការបណ្ដុះបណ្ដាលជំនាញវិជ្ជាជីវៈដើម្បីពួកគេអាចយកទៅប្រកបរបរចិញ្ចឹមជីវិតបានងាយស្រួល។ ការបណ្ដុះបណ្ដាលនេះធ្វើឡើងដោយឥតបង់ប្រាក់ហើយថែមទាំងទទួលបានការឧបត្ថម្ភកំឡុងពេលបណ្ដុះបណ្ដាលបន្ថែមទៀត។

ទី៣៖ ពលរដ្ឋក្រីក្រនិងងាយរងគ្រោះនឹងទទួលបាននូវភាពកក់ក្តៅតាមរយៈកម្មវិធីជាតិជំនួយសង្គមដែលនឹងត្រូវពង្រឹងឲ្យទៅជាកម្មវិធីជាតិរឹងមាំមួយ ពោលគឺ នៅពេលពលរដ្ឋជួបវិបត្តិឫហានិភ័យផ្សេងៗ កម្មវិធីជាតិជំនួយសង្គមនិងរង់ចាំជួយពួកគេប្រកបដោយប្រសិទ្ធភាពខ្ពស់។

ទី៤៖ អ្នកប្រកបរបរក្រៅប្រព័ន្ធនិងទទួលបានការយកចិត្តទុកដាក់ ហើយពួកគេក៏អាចទទួលបានអត្ថប្រយោជន៍ដូចអ្នកប្រកបរបរក្នុងប្រព័ន្ធដែរនៅពេលដែលពួកគេជួបវិបត្តិឫហានិភ័យផ្សេងៗ។
ទី៥៖ ប្រជាកសិករនិងទទួលបាននូវការគាំពារតាមរយៈការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន (ការផ្ដល់ប្រាក់កម្ចីដើម្បីប្រកបមុខរបរកសិកម្ម) ជាពិសេសគឺទទួលបាននូវការការពារតម្លៃកសិផលឲ្យបានសមរម្យ ដោយមិនឲ្យកសិករខាតបង់ឡើយ។

ទី៦៖ រាជរដ្ឋាភិបាលនិងបញ្ជូនមន្ត្រីបច្ចេកទេសកសិកម្មទៅជួយកសិករនៅគ្រប់ឃុំសង្កាត់ដែលមានពលរដ្ឋប្រកបរបរកសិកម្ម និងបង្កើតសហគមន៍កសិករនៅទូទាំងប្រទេសដើម្បីការពារផលប្រយោជន៍របស់កសិករ។

សរុបមកវិញ គោលនយោបាយរបស់រាជរដ្ឋាភិបាលអាណត្តិទី៧ ដឹកនាំដោយឯកឧត្តមបណ្ឌិត ហ៊ុន ម៉ាណែត គឺជាគោលនយោបាយគាំពារប្រជាពលរដ្ឋ ជាពិសេសពលរដ្ឋក្រីក្រនិងងាយរងគ្រោះ។ គោលនយោបាយនេះគឺជាក្តីសង្ឃឹមយ៉ាងកក់ក្តៅរបស់ប្រជាពលរដ្ឋខ្មែរ បន្តពីរាជរដ្ឋាភិបាលសម្តេចតេជោ៕ដោយនាគខៀវ

មានការលើកឡើងថាក្រុមគយបានដាក់ប៉ុស្ដិ៍ តាមផ្លូវជាតិ លេខ៧ នៅឃុំក្រែក ស្រុកពញាក្រែក ខេត្តត្បូងឃ្មុំ កំពុងតែត្រូវប៉ាន់យ៉ាងខ្លាំង ពីក្រុមឈ្មួញដឹកទំនិញ ចេញចូលកម្ពុជា វៀតណាម។

ប្រភពបានរាយការណ៍ថាក្រុមនៅទីតាំងខាងលើ បានប្រឹងប្រមូលលុយពីក្រុមអាជីវករ ម្ចាស់រថយន្តដឹកទំនិញ ឆ្លងដែនពីប្រទេសវៀតណាម។

ប្រភពបន្តថាកម្លាំងគយមួយក្រុមដាក់នៅលើផ្លូវជាតិលេខ៧ ខាងឆ្វេងដៃ គេមិនដឹងថាតើគយចំណុចនេះជាអង្គភាពខាងណានោះទេ? គយខេត្ត? ឬមួយក៏គយចល័តចេញពីក្រសួងសេដ្ឋកិច្ចនិងហិរញ្ញវត្ថុ ចាំបង្ក្រាបបទល្មើស? គយនៅចំណុចនេះគឺកាប់ថ្លៃខ្ពស់ៗណាស់។

អាជីវករដឹកទំនិញបានប្រាប់ថា ក្នុងទំនិញ១រថយន្តសាំយ៉ុង បង់ឱ្យគយនៅទីតាំងខាងលើ ចំនួន៨០ម៉ឺនរៀល ឬ ១លានរៀល ដែលនាំទំនិញចូលពីវៀតណាម មកកម្ពុជា។ បណ្ដាទំនិញទាំងឡាយដែលឆ្លងពីប្រទេសវៀតណាម មកនោះសុទ្ធតែត្រូវបង់ពន្ធនៅព្រំដែនរួចហើយ។ ហេតុដូចម្ដេចបានជាមានពួកគយនៅមិនឆ្ងាយពីគយព្រំដែន១កន្លែងទៀត ដែលចាំយកលុយស្រួលៗយ៉ាងដូច្នេះ។ ករណីនេះ តើវាជាបទបញ្ជារបស់ក្រសួងសេដ្ឋកិច្ច និងហិរញ្ញវត្ថុ ឬអគ្គនាយកដ្ឋានគយ និងរដ្ឋាករមែនដែរឬទេ? បើវាជាគយស្របច្បាប់ គួរតែលើកផ្លាកទីស្នាក់ការឲ្យបានច្បាស់លាស់និងសមរម្យផងទៅ។

គួរបញ្ជាក់ថែមទៀតថា គយមួយកន្លែងនេះ គឺឃើញតែរថយន្ត១គ្រឿង ដែលបិទផ្លាកគយ តែមិនឃើញលើកផ្លាកទីស្នាក់ការឱ្យបានត្រឹមនៅទេ។ តែយ៉ាងណាក៏ ដោយគេឃើញតែរថយន្តដឹកទំនិញឆ្លងកាត់ ចូលបង់ ដោយមិនឃើញការត្រួតពិនិត្យឱ្យបានត្រឹមត្រូវនោះទេ។ រថយន្តដឹកទំនិញមិនថាតិច តួចឬច្រើននោះទេ សុទ្ធតែត្រូវចូលទៅជួបពួកមន្ត្រីគយតែប្រចាំការនៅទីនោះ។

ប្រជាពលរដ្ឋនៅក្បែរខាងទីតាំងនោះនិយាយថា គយនៅទីនេះមិនបានត្រួតពិនិត្យទំនិញ អ្វីឲ្យច្បាស់លាស់នោះទេ គឺយកតែលុយប៉ុណ្ណោះ។ ទំនិញដែលនាំចូលពីប្រទេស វៀតណាម ដូចជាគ្រឿងឧបភោគ បរិភោគបន្លែបង្ការ គ្រឿងសំណង់ ជារួមឲ្យតែទំនិញគ្រប់ប្រទគឺគយដឹងតែពីយកលុយ មិនបានត្រួតពិនិត្យអ្វីឡើយ។ ដូច្នេះវាបង្កហានិភ័យ និងគ្រោះថ្នាក់យ៉ាងខ្លាំងសម្រាប់សុខភាព ប្រជាពលរដ្ឋ។

ការលើកឡើងបែបនេះ អង្គភាពសៀមរាប ប៉ុស្តិ៍ នៅពុំទាន់ទទួលបានការបំភ្លឺ ពីមន្ត្រីគយនៅចំណុចខាងលើនៅឡើយទេ ដោយពុំមានលេខទំនាក់ទំនង៕ដោយនាគខៀវ