ភ្នំពេញ៖លោកនាយឧត្ដមសេនីយ៍សន្តិបណ្ឌិត នេត​ សាវឿន​ អគ្គស្នងការ​នគរបាល​ជាតិ នៅរសៀលថ្ងៃទី ០៣​ខែ​ វិច្ឆិកា​នេះ បានថ្លែងប្រាប់PVNNថា​ បន្ទាប់​ពី​ទទួល​បាន​សេចក្ដី​រាយការណ៍​អំពី​ករណី​ ក្រុមហ៊ុន​ ស៉ីន​នីវ​ ទទួលបាន​អាជ្ញា​ប័ណ្ណ​ធ្វើ​អាជីវកម្ម​ឆ្នោត​ឡូតូ​ ហេីយបំប្លែងជាល្បែងស៉ីសង​តាម​អនឡាញ​ Keno online រួចមក​ លោកនាយឧត្ដមសេនីយ៍ បាន​បញ្ជាអោយ​នាយកដ្ឋាន​ជំនាញ​ចុះ​ស្រាវជ្រាវ​ដេីម្បី​មានចាត់វិធានការតាមច្បាប់​ ដោយមិនលេីកលែងឡេីយ​។

លោកឧត្ដមសេនីយ៍ឯក សៀង​ សេង​ ប្រធាននាយកដ្ឋាន​ប្រឆាំង​បទល្មើស​ល្បែង​ពាណិជ្ជកម្ម​ បានអោយដឹងដែរថា​ លោកបានទទួលបទបញ្ជាដ៏ម៉ឺងម៉ាត់ពី លោមនាយឧត្ដមសេនីយ៍អគ្គស្នងការនគរបាលជាតិ រួចហេីយ​នៅរសៀល​ថ្ងៃនេះ​ ដេីម្បី​ដឹកនាំ​កម្លាំង​ស្រាវជ្រាវ​ករណី​ក្រុមហ៊ុន​ ស៉ិន​ នីវ​ ដែល​ប្រជាពលរដ្ឋ​ រាយការណ៍ថា បាននឹងកំពុងបេីកល្បែងស៉ីសងតាមអនឡាញ Keno Online ជ្រកក្រោម​ស្លាក​ ឆ្នោត​ឡូតូ​។
លោកឧត្ដមសេនីយ៍ឯក បានបន្ថែមថា​ បេីក្នុងករណី​សមត្ថកិច្ច​របស់​លោក​ស្រាវជ្រាវ​រក​ឃើញ​ការពិត​ដូចប្រជាពលរដ្ឋរាយការណ៍​ លោកនឹងចាត់​ការតាមច្បាប់​តែម្ដង​ ។

គួរបញ្ជាក់ថា​ ករណី​ក្រុមហ៊ុន​ ស៉ិន​ នីវ​ ដែល​ទទួលបាន​អាជ្ញា​ប័ណ្ណ​ពី​រាជរដ្ឋាភិបាល​ និង​ ក្រសួង​សេដ្ឋកិច្ច​ និង​ ហិរញ្ញវត្ថុ​ អោយធ្វេី​អាជីវកម្ម​ឆ្នោត​ឡូតូ​ ត្រូវបាន​ប្រជាពលរដ្ឋ​ រាយការណ៍ថា ក្រុមហ៊ុន​នេះ​បានបំប្លែងឆ្នោតឡូតូ​ទៅ​ជា​ល្បែង​ស៉ីសង​តាមអនឡាញ​ បង្វក់ប្រជាពលរដ្ឋ​ ទូទាំងប្រទេសដោយគ្មានខ្លាចសមត្ថកិច្ចអ្វី​ទាំងអស់​ ។ ជាពិសេស​ក្រុមហ៊ុន​ បានដាក់​តាំង​ទូរទស្សន៍​តាម​ហាងនានាជាសាធារណៈថែមទៀតផង​។

ពាក់ព័ន្ធ​នឹង​ការចោទប្រកាន់នេះ​ តំណាង​ក្រុមហ៊ុន​ ស៉ីន​ នីវ​ មួយរូប​បានអោយដឹងថា​ ក្រុម​ហ៊ុន​ របស់​លោក​ ពិតជា​ទទួលបាន​អាជ្ញា​ប័ណ្ណ​ពី​រាជរដ្ឋាភិបាល​និង​ក្រសួង​សេដ្ឋកិច្ច​និង​ហិរញ្ញវត្ថុ​ អោយធ្វេី​អាជីវកម្ម​ឆ្នោត​ឡូតូ​មែន​ តែ​មិនបាន​បេីកល្បែងស៉ីសង​តាមអនឡាញ​នោះទេ​ ។

ទោះជាយ៉ាងណាក្ដី​ មន្ត្រី​ក្រសួង​សេដ្ឋកិច្ច​ និង​ ហិរញ្ញវត្ថុ​ មួយរូប​បានង្ហេីបអោយដឹងថា​ អាជ្ញា​ប័ណ្ណ​របស់​ក្រុម​ហ៊ុន​ ស៉ីន​ នីវ​ បានហួសសុពលភាពហេីយ​ ហេីយ​ក្រុម​ហ៊ុន​នេះ​នៅ​តែ​លួចលាក់​ធ្វើ​អាជីវកម្ម​ដោយមិនរាយការណ៍​ជូនក្រសួងនោះទេ​។
ពាក់ព័ន្ធ​នឹងការបំពានរបស់​ក្រុម​ហ៊ុន​នេះ​ ក្រសួង​កំពុង​ចាត់​ការ​តាមនិតិវិធី​ផងដែរ​ដោយ​ពិន័យ​ក្រុមហ៊ុន​តាមច្បាប់​កំណត់​។
ចំពោះ​ព័ត៌មាន​ដែល​ថា​ក្រុមហ៊ុន​នេះ​បានបំប្លែងឆ្នោតឡូតូ​ទៅ​ជា​ល្បែង​ស៉ីសង​តាមអនឡាញ​បង្វក់ប្រជាពលរដ្ឋ​ ទូទាំងប្រទេសនោះ បេី​ សមត្ថកិច្ច​ស្រាវជាវ​រកឃើញ​ ក្រុមហ៊ុន​នេះ​អាចប្រឈម​មុខ​ចំពោះ​ផ្លូវ​ច្បាប់​ផង​ និង​ អាចដកអាជ្ញាប័ណ្ណវិញផងដែរ​។

ពាក់ព័ន្ធករណីនេះ នៅក្រុងសៀមរាបឯណាវិញ ល្បែងឡូតូ ប្រភេទដូចខាងលើ បានបើកដំណើរការ ឲ្យពលរដ្ឋចាក់ស៊ីសង នៅតាមហាងកាហ្វេ សឹងគ្រប់កន្លែង យ៉ាងអនធិបតេយ្យដោយចំហតែម្ដង។ ទោះយ៉ាងណា ពលរដ្ឋ សូមគាំទ្រចំណាត់ការរបស់ លោកនាយឧត្ដមសេនីយ៍សន្តិបណ្ឌិត នេត​ សាវឿន​ អគ្គស្នងការ​នគរបាល​ជាតិ​ ដែល​បានដាក់​បទបញ្ជា​ដ៏ម៉ឺងម៉ាត់​ចាត់ការ​តាមច្បាប់​ចំពោះ​ករណីនេះ៕SRP

ខេត្តត្បូងឃ្មុំ​៖លោក កែវ វណ្ណៈ ទីប្រឹក្សាសម្តេចមហាពញាចក្រី ហេង សំរិន និងជាប្រធានមន្ទីរសុខាភិបាលខេត្តត្បូងឃ្មុំ និងលោក ផល ពន្លឺ អនុប្រធានមន្ទីរ នារសៀល​ថ្ងៃ​ទី​៣​ ខែវិច្ឆិកា​ នេះ បាននាំយកសម្ភារបរិក្ខារសុខាភិបាល យ៉ាងច្រើនសន្ធឹកសន្ធាប់ ទៅចែកផ្តល់ជូនដល់មន្ទីរបង្អែក និងប៉ុស្តិ៍មណ្ឌលសុខភាព ជុំវិញខេត្ត ដែលជាសម្ភារបំពេញបន្ថែម របស់រាជរដ្ឋាភិបាល កម្ពុជា តាមរយៈក្រសួងសុខាភិបាល ដើម្បីជួយជំរុញលើការពិនិត្យព្យាបាលជូនពលរដ្ឋ ក្នុងខេត្តត្បូងឃ្មុំ។

បើតាម លោក ផល ពន្លឺ អនុប្រធានមន្ទីរសុខាភិបាលខេត្តត្បូងឃ្មុំ បានឲ្យដឹងថា សម្ភារបរិក្ខារទាំងនេះ មានសរុប១២ឃីត ស្មើនឹង៤៩មុខ ដែលសរុបជាទឹកប្រាក់ប្រមាណជិត៤០០លានរៀល ដែលជាថវិការរបស់ រាជរដ្ឋាភិបាលកម្ពុជា ផ្តល់ជូនតាមរយៈក្រសួងសុខាភិបាល ដោយចែកជូនទៅមណ្ឌលសុខភាពទាំង៧១ មន្ទីរពេទ្យបង្អែក និងការិយាល័យស្រុកក្រុងទាំង០៧ ហើយជាសម្ភារ ដែលមិនមានក្នុងផែនការប្រចាំឆ្នាំទេគឺជាសម្ភារបំពេញបន្ថែម។

មានប្រសាសន៍នាឱកាសនោះ លោក កែវ វណ្ណៈ ប្រធានមន្ទីរសុខាភិបាលខេត្ត​ត្បូងឃ្មុំ​ បានឲ្យដឹងថា​ សម្ភារបរិក្ខារ ដែលបាននាំយកចែកពេលនេះគឺជាការផ្តល់ជូនបំពេញបន្ថែមរបស់រាជរដ្ឋាភិបាលកម្ពុជា ក្រោមការដឹកនាំ របស់សម្តេចតេជោ ហ៊ុន សែន ដែលបានលើកគម្រោងសម្ភារផ្ដល់ចែកជូនដល់មូលដ្ឋានសុខាភិបាលនៅក្នុងទូទាំងប្រទេសកម្ពុជា ជាពិសេសនៅក្នុងទឹកដីខេត្តត្បូងឃ្មុំ តាមរយៈក្រសួងស្ថាប័នសុខាភិបាល ធ្វើយ៉ាងណាឲ្យការបំរើសេវាវិស័យសុខាភិបាលនៅកម្ពុជាបានកាន់តែល្អ ទទួលបានទំនុកចិត្តពីពលរដ្ឋ ពិសេសបំពេញឲ្យបានកាន់តែប្រសើរ នាអំឡុងការរាតត្បាតជំងឺកូវីដ១៩។

លោក កែវ វណ្ណៈ ក៏បានណែនាំដល់ការិយាល័យស្រុកប្រតិបត្តិ មន្ទីរពេទ្យបង្អែក ប៉ុស្តិ៍មណ្ឌលសុខភាពទាំងអស់ ត្រូវប្រើប្រាស់ទុកដាក់ឲ្យបានល្អ បម្រើផលប្រយោជន៍សុខភាពសាធារណៈរបស់ប្រជាពលរដ្ឋនៅមូលដ្ឋាន​ឲ្យ​បានកាន់តែមានប្រសិទ្ធភាពខ្ពស់​៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី បានថ្លែងអំណរគុណ ចំពោះរដ្ឋាភិបាលក៏ដូចជាប្រជាពលរដ្ឋ ហុងគ្រី ដែលបានមកជួយដល់កម្ពុជាកាលពីជាង៤០ឆ្នាំមុន ក្នុងការកសាងប្រទេសឡើងវិញពីបាតដៃទទេ បន្ទាប់ពីកម្ពុជាងើបពីសង្គ្រាម។

សម្ដេចហ៊ុន សែន លើកឡើងយ៉ាងដូច្នេះនៅវិមានសន្តិភាព នារសៀលថ្ងៃទី៣ ខែវិច្ឆិកាឆ្នាំ២០២០នេះ ក្នុងឱកាស ទទួលជួបពិភាក្សាការងារជាមួយលោក ភីធើ ស៉ីចាតូ (Péter Szijjártó) រដ្ឋមន្រ្តីការបរទេស និងពាណិជ្ជកម្មហុងគ្រី។

នៅក្នុងជំនួបនេះ លោក ភីធើ ស៉ីចាតូ (Péter Szijjártó) ក៏បានអរគុណដល់ប្រជាពលរដ្ឋ ក៏ដូចជារដ្ឋាភិបាលកម្ពុជា ដែលទទួលស្វាគមន៍ លោកយ៉ាងកក់ក្តី នៅក្នុងដំណើរទស្សនកិច្ចរបស់លោកមកកាន់ ប្រទេសកម្ពុជា នាពេលនេះ។
លោកបានមានប្រសាសន៍ថា ដំណើរទស្សនកិច្ចរបស់លោកមកកាន់ប្រទេសកម្ពុជា នាពេលនេះ គឺ ទី១)ដើម្បីអបអរសាទរចំពោះខួបលើកទី៦៧ នៃបុណ្យឯករាជ្យជាតិរបស់ប្រទេសកម្ពុជា ទី២) គឺដើម្បីពាំនាំនូវការផ្ដាំផ្ញើសួរសុខទុក្ខពីសំណាក់លោកនាយករដ្ឋមន្ត្រី នៃប្រទេសហុងគ្រី និងទី៣) ដើម្បីពង្រឹង និងពង្រីកទំហំពាណិជ្ជកម្មរវាងប្រទេសទាំងពីរតាមរយៈការនាំមកនូវគម្រោងអភិវឌ្ឍន៍មួយចំនួនដូចជា ទី១) គម្រោងទឹកស្អាត និងចំរោះទឹក ទី២) គម្រោងបច្ចេកវិទ្យា (IT) និងទី៣) គម្រោងកសិដ្ឋានចិញ្ចឹមសត្វ និងសត្តឃាត និងទី៤)គម្រោងកសិកម្ម
និងនេសាទ។

សម្ដេចតេជោ ហ៊ុន សែន បានថ្លែងនូវអំណរគុណយ៉ាងជ្រាលជ្រៅចំពោះការផ្ដាំផ្ញើសួរសុខទុក្ខពីសំណាក់នាយករដ្ឋមន្ត្រីនៃប្រទេសហុងគ្រី លើសពីនេះទៅទៀត សម្ដេចតេជោ ក៏បានឯកភាពជាមួយនឹងការជំរុញលើកកម្ពស់ទំនាក់ទំនង រវាងប្រទេសទាំងពីរតាមរយៈគម្រោងទាំងបួនខាងលើផងដែរ។

លើសពីនេះទៅទៀត សម្ដេចតេជោនាយករដ្ឋមន្ត្រី ក៏បានសំដែងនូវការគោរព និងផ្ដាំផ្ញើសួរសុខទុក្ខជូនចំពោះនាយករដ្ឋមន្ត្រីនៃប្រទេសហុងគ្រី។ ហើយឆ្លៀតក្នុងឱកាសនោះ សម្ដេចតេជោក៏បានស្នើសុំ និងអញ្ជើញ នាយករដ្ឋមន្រ្តីហុងគ្រី មកបំពេញទស្សនកិច្ច នៅក្នុងប្រទេសកម្ពុជា ក្នុងឱកាសណាមួយនាពេលខាងមុខផងដែរ៕SRP

ភ្នំពេញ៖កិច្ចព្រមព្រៀង និងអនុស្សារណៈចំនួន៣ ត្រូវបានចុះហត្ថលេខា រវាងកម្ពុជា និងហុងគ្រី នៅវិមានសន្តិភាព នារសៀលថ្ងៃ០៣ខែវិច្ឆិកា នេះក្រោមវត្តមានរបស់សម្ដេចតេជោ ហ៊ុន សែននាយករដ្ឋមន្ត្រី។

កិច្ចព្រមព្រៀង និងអនុស្សារណៈ ដែលនឹងត្រូវចុះហត្ថលេខានោះរួមមាន៖

១- កិច្ចព្រមព្រៀងស្តីពីសេវាដឹកជញ្ជូនតាមផ្លូវអាកាសចរ រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលហុងគ្រី។

២- អនុស្សរណៈនៃការយោគយល់គ្នាស្តីពីការគ្រប់គ្រងធនធានទឹក រវាងក្រសួងធនធានទឹក និងឧតុនិយមនៃព្រះរាជាណាចក្រកម្ពុជា និងក្រសួងមហាផ្ទៃហុងគ្រី។

៣- អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យកសិកម្ម រវាងក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា និងក្រសួងកសិកម្មហុងគ្រី៕SRP

ខេត្តកំពង់ចាម៖លោក​​ ខៀវ​ កាញារីទ្ធ​ រដ្ឋមន្ត្រី​ក្រសួងព័ត៌មាន​ បានថ្លែងថាគិត​មក​ដល់​ពេល​នេះ​ គឺ​មាន​រយៈពេល​១៧ឆ្នាំ​ហើយ​ ដែល​លោក​​បាន​ជួយ​ទំនុកបម្រុង​ដល់​កុមារ​ពិការ​ភ្នែក​ គថ្លង់​ កំព្រា​ និង​លោកគ្រូ​ អ្នកគ្រូ​ នៅ​វិទ្យាល័យ​អប់រំ​ពិសេស​កំពង់ចាម​នេះ​ ដោយ​បាន​រៀបចំ​ពិធី​ជួបជុំ​គ្នានេះ​ឡើង​​ក្នុង​១ឆ្នាំ​២ដង​ រួមជាមួយការ​គៀងគរ​ដល់​សប្បុរសជន​នានា​ ដេីម្បី​ជួយ​​ផ្គត់ផ្គង់​ដល់​ការ​រៀនសូត្រ​របស់​ក្មួយៗ​ ប្រកប​ដោយភាព​ជោគជ័យ​។

រដ្ឋមន្រ្តីបន្តថា ថ្ងៃ​នេះ​ខ្ញុំ​ពិត​ជា​សប្បាយ​រីករាយ​ដោយ​​បាន​ឃេីញ​ក្មួយៗ​ មួយ​ចំនួន​ទទួល​បាន​ភាព​ជោគជ័យ​ ហើយ​បាន​​​ចេញ​ទៅ​ធ្វើការ​ងារ​ផ្សេងៗ​ ​និងបេីកមុខរបរ​ទទួលទាន​ ព្រមទាំង​​មាន​ក្រុម​គ្រួសារ​ និង​មាន​សុភមង្គល​ល្អ​ ដោយ​កន្លង​មក​ក្រសួង​ព័ត៌មាន​ ក៏បាន​ទទួល​ក្មួយៗ​ មួយ​ចំនួន​នៅ​ខេត្ត​បាត់ដំបង​ និង​មួយ​ចំនួន​នៅ​ខេត្ត​កំពង់ចាម​ ឲ្យ​ចូល​បម្រើ​ការងារផងដែរ​ តែ​អកុសល​ឆ្នាំ​នេះផ្ទុះ​នូវ​ជំងឺ​កូវីដ​១៩​ ដូច្នេះ​រាជរដ្ឋាភិបាល​បាន​សម្រេច​​ផ្អាក​ការ​​ជ្រើសរើស​មន្ត្រី​ថ្មី​មួយ​រយៈ​។

រដ្ឋមន្រ្តី ក៏​បាន​ក្រេីន​រំលឹក​ដល់​ក្មួយៗ​ទាំង​អស់​ ឲ្យ​រួបរួម​សាមគ្គី​គ្នា​ និង​ចេះជួយ​គ្នា​ទៅវិញទៅមក​ក្នុង​ការ​រៀនសូត្រ​ ជាពិសេស​ត្រូវ​ស្តាប់​​គ្រូ​បង្រៀន​ និង​គោរព​វិន័យ​សាលា​ឲ្យ​បាន​ខ្ជាប់ខ្ជួន​ តាំង​ពី​នៅ​តូចរហូត​ដល់​ធំ​ពេញវ័យ​ និង​ឈាន​ទៅ​ដល់​ទទួល​បាន​ភាព​ជោគជ័យ​។ ​

លោកថ្លែងយ៉ាងដូច្នេះក្នុងឱកាសអញ្ជើញជួបសំណេះសំណាល និង​សាកសួរសុខទុក្ខកុមារ​កំព្រា​ ពិការភ្នែក គរថ្លង់ និងលោកគ្រូ អ្នកគ្រូ នៅវិទ្យាល័យអប់រំពិសេសកំពង់ចាម​ នាថ្ងៃទី៣ ខែវិច្ឆិកា​ ឆ្នាំ​២០២០​នេះ។

សូមជម្រាបថា សិស្ស​ក្នុង​វិទ្យាល័យ​អប់រំ​ពិសេស​កំពង់ចាម​ សរុប​​​ ​ចំនួន​១៧១នាក់​ ក្នុងនោះ​មានសិស្ស​ពិការ​ភ្នែក​ ​៥៩នាក់​ និង​គផ្លង់​ ​១១២នាក់​ ចំពោះ​​បុគ្គលិក​ និង​គ្រូ​សរុប​​៣៦នាក់​។
ដោយឡែក​មណ្ឌល​កុមារ​កំព្រា​ខេត្ត​កំពង់ចាម​ មាន​សិស្ស​ ​ចំនួន​៥៧នាក់​ និង​បុគ្គលិក​សរុប​១២នាក់​។
រដ្ឋមន្ត្រីក្រសួងព័ត៌មាន និងលោកស្រី បានរៀបចំពិធីសំណេះសំណាល​២ដង​ ក្នុង​១ឆ្នាំ​ ដែលមាន​រៀបចំ​អាហារ​ថ្ងៃត្រង់ ជាមួយនឹងសម្ភារសិក្សា​ សម្លៀកបំពាក់ ផ្តល់ជា​ថវិកាសម្រាប់សិស្ស និងគ្រូ ​ផ្តល់សម្ភារប្រើប្រាស់ គ្រឿង​ឧបភោគបរិភោគ និងថវិកាសម្រាប់សាលា ព្រមទាំង​បានផ្តល់ជាអង្ករ​ ​ចំនួន​១តោនក្នុងមួយខែ ហេីយ​ក៏​បានឧបត្ថម្ភ​ ឧបករណ៍ប្រើប្រាស់​ ឧបករណ៍ភ្លេង សម្លៀកបំពាក់របាំ សម្ភារជំនួយដល់ការបង្រៀន និងរៀន កំព្យូទ័រលើតុ និងកំព្យូទ័រយួរដៃ ម៉ាស៊ីនថតសម្លេងសម្រាប់សិស្សរៀននៅសាកលវិទ្យាល័យ ក្រៅពីនេះរដ្ឋមន្ត្រីនិងលោកជំទាវ​ ក៏បានឧបត្ថម្ភគ្រឿងសង្ហារឹមផ្សេងៗមួយចំនួនទៀត ហើយបានជួយបង្គ្រប់ថ្លៃកសាងខ្លោងទ្វារសាលាចំនួន១៥០០ដុល្លារសហរដ្ឋអាមេរិក និងបានជួយបន្ថែមថវិកាសម្រាប់ធ្វើដំណើរកម្សាន្តប្រចាំឆ្នាំ ព្រមទាំងបានជួយសម្របសម្រួលក្នុងការចូលទស្សនារមណីយដ្ឋាននានាផងដែរ​។
សូមបញ្ជាក់ថាពិធីនេះលោក ខៀវ កាញារីទ្ធ និងលោកស្រី បានបាននាំយកនូវសម្ភារជាច្រើន រួមនឹង​ថវិកា​ ចំនួន​៣២៥០ដុល្លារ​អាមេរិក​ និង​១៤.៥០០.០០០រៀល​ សម្រាប់​ទ្រទ្រង់​ដល់​សាលា​ និនិងក្មួយៗកុមារផងដែរ៕SRP

ខេត្តបាត់ដំបង៖អ្នកកាសែតកោះសន្តិភាពម្នាក់ ប្រចាំខេត្តបាត់ដំបង បានរងការគំរាមបាញ់សម្លាប់ពីជនមិនស្គាល់មុខតាមបណ្ដាញសង្គម។

ពាក់ព័ន្ធករណីនេះលោកឧត្តមសេនីយ៍ត្រី សាត​ គឹមសាន​ បញ្ជាឱ្យផែនជំនាញ ធ្វេីការស្រាវជ្រាវ ជាបន្ទាន់ករណីគំរាមសម្លាប់អ្នកសារព័ត៌មានតាមបណ្តាញសង្គមនេះ។
នេះបើយោងតាម ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបង​ បានប្រកាសឲ្យដឹងនៅមុននេះបន្តិច។

ស្នងការប៉ូលិសខេត្តបាត់ដំបងបានឲ្យដឹងថា នៅពេលនេះស្នង ការដ្ឋាននគរបាលខេត្តបាត់ដំបង​ បានទទួលហេីយ នូវបណ្តឹងរបស់ លោក​ ឆោម​ ពិសម័យ​ ភ្នាក់ងារសារព័ត៌មាន(កោះសន្តិភាព)ប្រចាំខេត្តបាត់ដំបង ដែលលោកទទួលរងការគំ រាមកំហែងដល់ជីវិត​តាមបណ្តាញសង្គម។

នៅពេលនេះលោកឧត្តមសេនីយ៍ត្រី​ សាត​ គឹម សាន​ បានចាត់វិធានការជាបន្ទាន់ដល់ផែនជំ នាញឱ្យធ្វេីការ​ស្រាវ​ជ្រាវស៊េីបអង្កេតលេីករណី នេះហេីយ​ ករណីស្រាវជ្រាវរកឃេីញថាពិត ជា មានអំពេីល្មេីសច្បាប់ មែននោះសមត្ថកិច្ចនគរ​បាលនឹងចាត់​វិធានការតាមផ្លូវច្បាប់ចំពោះអ្នក ប្រព្រឹត្តិ។

ទាក់ទងករណីនេះ បណ្ដាញសៀមរាបប៉ុស្តិ៍ នៅមិនទាន់ទទួលបានការបំភ្លឺ ពីលោកឆោម ពិសម័យ​ ភ្នាក់ងាសារព័ត៌មាន កោះសន្តិភាព ប្រចាំខេត្តបាត់ដំបង នៅឡើយទេ៕SRP

ខេត្តព្រះវិហារ៖ទីតាំងអារច្រៀកឈើមួយកន្លែងត្រូវបានសមត្ថកិច្ចចុះបង្ក្រាប។

ហេតុការណ៍នេះធ្វើឡើងនៅថ្ងៃទី ០៣ខែ វិច្ឆិកា ឆ្នាំ ២០២០ នេះ នៅចំណុចភូមិព្យួរជ្រូក ឃុំគូលែនជើង ស្រុក គូលែន ខេត្តព្រះវិហារ ដឹកនាំដោយ លោកតូ សុថេត នាយរង ផ្នែករដ្ឋបាលព្រៃឈើត្បែងមានជ័យ រួមនឹងលោក យឹម ប៊ុនថេត នាយសង្កាត់រដ្ឋបាលព្រៃឈើ ស្រុកគូលែន ព្រមទាំង កម្លាំងសមត្ថកិច្ចស្រុកគូលែន ក្រោមបញ្ជារបស់ លោក ទី សុវិនថាល់ ព្រះរាជអាជ្ញារអមនៃសាលា ដំបូងខេត្តព្រះវិហារ។

ភ្នាក់ងារបណ្ដាញ«សៀមរាបប៉ុស្តិ៍»ប្រចាំខេត្តព្រះវិហារបានរាយការណ៍ថា ប្រតិបត្តិការបង្ក្រាប បង្ក្រាបទីតាំងសិប្បកម្មច្រៀក អារឈើអត់ច្បាប់ ខាងលើនេះសមត្ថកិច្ចរកឃើញឈើ៖

១.ឈើ ផ្ជឹកចំនួន៥៤ដុំ
២.តាបឈូសភ្ជាប់ផ្លែច្រៀកឈើ១គ្រឿង
៣.ម៉ាស៊ីន គោយន្តមួយគ្រឿង។

វត្ថុតាងទាំងអស់ត្រូវបានរឹបអូសយកទៅក្សារទុកនៅ ផ្នែករដ្ឋបាលព្រៃឈើត្បែងមានជ័យ ដើម្បីវាស់វែងនឹងដោះស្រាយតាមនិតិវិធី៕SRP

ខេត្តសៀមរាប៖អាជ្ញាធរស្រុកប្រាសាទបាគងបានរាយការណ៍ថាបុរសម្នាក់បានស្លាប់ភ្លាមៗដោយគ្រោះថ្នាក់ចរាចរណ៍រវាងម៉ូតូនិងរថយន្ត ក្នុងទិសដៅបញ្ច្រាស់គ្នា។
ហេតុការណ៍បានកើតឡើងនៅវេលាម៉ោង១៨និង៣០ថ្ងៃទី០២ខែវិច្ឆិកាឆ្នាំ២០២០ ត្រង់ចំណុចភូមិស្វាយជ័យ ឃុំត្រពាំងធំ ស្រុកប្រាសាទបាគង ខេត្តសៀមរាប។

សមត្ថកិច្ចបានឲ្យដឹងថាម៉ូតូម៉ាកHONDA.CB.500FA.ពណ៌ខ្មៅសេរី២០១៣ ម៉ូតូធំពាក់ស្លាកលេខសៀមរាប១S៥៩៦៤ បើកបរដោយឈ្មោះហេង វិសុទ្ឋ ភេទប្រុសអាយុ៣៣ឆ្នាំ រស់នៅភូមិបឹងធំ ឃុំគោគធ្លកក្រោម ស្រុកជីក្រែង ខេត្តសៀមរាប ស្លាប់នៅនឹងកន្លែង បើកបរពីកើតទៅលិច។

ចំណែកភាគីរថយន្តកហ៉្វតពណ៌ពាក់ស្លាកលេខភ្នំពេញ២Y០៧៥១របស់ក្រុមហ៊ុនឡាវីតា (អ្នកបើកបររត់គេចខ្លួនបាត់ បន្សល់ទុកតែរថយន្ត បើកពីរលិចទៅកើត។

សមត្ថកិច្ចបានបញ្ជាក់ថាសាកសពបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី។ចំណែករថយន្តនឹងម៉ូតូរក្សាទុកនៅអធិការនគរបាលស្រុកបាគងដើម្បីរងចាំដោះស្រាយ នៅពេលក្រោយ។

បើតាមសមត្ថកិច្ចថាករណីនេះកើតឡើងដោយសារមូលហេតុអ្នកបើកបរ រថយន្ដ បើកបរមានល្បឿនលឿនខ្វះការប្រុងប្រយ័ត្ន៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថានៅមុននេះបន្តិច វេលាម៉ោងជិត៨យប់ថ្ងៃទី២ ខែវិច្ឆិកានេះ មានករណីគ្រោះថ្នាក់ចរាចរណ៍មួយបានកើតឡើង នៅភូមិចុងកៅស៊ូ សង្កាត់ស្លក្រាម ក្រុងសៀមរាប នៅលើផ្លូវជាតិលេខ ៦ ត្រង់ចំណុចមុខផ្ទះសំណាក់សុខជា។
ប្រភពពីកន្លែងកើតហេតុបានឲ្យដឹងថាជនរងគ្រោះ សង្ស័យបើកឆ្លងផ្លូវ ដោយប៉ះជាមួយរថយន្ត មិនស្គាល់ម៉ាកបើកពីទិសខាងលិចទៅកើត មកដល់ចំណុចខាងលើបណ្ដាលឲ្យរងរបួសធ្ងន់ ត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យ។ ចំណែកភាគទីរថយន្តបើករត់គេចបាត់។
សុំបញ្ជាក់ថាករណីគ្រោះថ្នាក់ចរាចរណ៍នេះ ម៉ូតូម៉ាកហុងដា ពណ៌ខ្មៅសេរី២០១៩ ពាក់ស្លាកលេខ សៀមរាប ១AF៩៣៣៣ ដោយ
គេនៅមិនទាន់ស្គាល់អត្តសញ្ញាណអ្នកបើកបរម៉ូតូនៅឡើយទេ។ទោះយ៉ាងណាពាក់ព័ន្ធករណីនេះសមត្ថកិច្ចនៅមិនទាន់បញ្ជាក់លម្អិតនៅឡើយ សូមរង់ចាំព័ត៌មានពិស្ដារ៕SRP

ខេត្តសៀមរាប៖បុរសម្នាក់បានរងរបួសធ្ងន់ដោយសារជនដៃដល់កាប់ប្រហារគ្មានញញើតដៃ។ មន្ត្រីសមត្ថកិច្ចបានថ្លែងប្រាប់បណ្ដាញ«សៀមរាបប៉ុស្ដិ៍»នៅរសៀលថ្ងៃច័ន្ទទី២ខែវិច្ឆិកានេះថា៖ហេតុការណ៍ហិង្សាដោយចេតនាដោយមានស្ថានទម្ងន់ទោសនេះបានកើតឡើងនៅវេលាម៉ោង ២០និង៣០ នាទី ថ្ងៃទី៣១ ខែតុលា ឆ្នាំ២០២០ នៅឃុំដានរុន ស្រុកសុទ្រនិគម ខេត្តសៀមរាប។

មន្ត្រីបានថ្លែងបន្តថា៖កររណីនេះបង្កដោយជនសង្ស័យ ចំនួន ០២នាក់ ភេទប្រុស មិនស្គាល់ អត្តសញ្ញាណ រស់នៅភូមិរុនខាងត្បូង ឃុំដានរុន ស្រុកសូទ្រនិគម ខេត្តសៀមរាប​ បានធ្វើសកម្មភាពយកកាំបិតខ្វែវ និង ប៉ែល កាប់ និងវាយមកលើជនរងគ្រោះឈ្មោះ វី លីយ៉ា ភេទប្រុស អាយុ ២៧ឆ្នាំ ស្រុកកំណើតនៅស្រុកសូទ្រនិគម ខេត្តសៀមរាប បច្ចប្បន្នរស់នៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរ បុគ្គលិក«គ្រឹះស្ថានមីក្រូហិរញ្ញវត្ថុមិត្តភាពហ្វាយណាន់» បណ្តាលឲ្យរងរបួសធ្ងន់ដោយត្រូវត្រង់ ចង្កេះខាងស្តាំ ០១កាំបិត ដេរ ០៥ថ្នេរ, រលាត់ស្បែកដើមដៃខាងឆ្វេង, ត្រូវត្រង់ក្បាលផ្នែកខាងក្រោយ ចំនួន០២កាំបិត ដេរ១៧ថ្នេរ និង ដាច់ប្រអប់ដៃខាងស្តាំ ផងដែរ។

មន្ត្រីបានបញ្ជាក់ថាបន្ទាប់ពីធ្វើសកម្មភាពរួច ជនសង្ស័យបានរត់គេចខ្លួនបាត់។ ចំណែកជនរងគ្រោះ ត្រូវបានគេជួយដឹកបញ្ជូនមកសង្គ្រោះ នៅមន្ទីរមួយក្នុងខេត្តសៀមរាប។

បើតាមការបញ្ជារបស់សមត្ថកិច្ចថា៖មូលហេតុជនរងគ្រោះ បានឈ្លោះគ្នាជាមួយក្រុមជនសង្ស័យខាងលើ ពេលទៅលេងបុណ្យអកអំបុកនៅវត្តមុន្នីធ្យាង ស្ថិតនៅភូមិឃុំកើតហេតុខាងលើ។ទោះជាយ៉ាងណាជុំវិញហេតុការណ៍នេះកម្លាំងសមត្ថកិច្ចបានកំពុងតែចុះស្រាវជ្រាវតាមចាប់ជនដៃដល់យកមកផ្ដន្ទាទោសតាមផ្លូវច្បាប់ផងដែរ៕SRP