ខេត្តសៀមរាប៖ស្ត្រីម្នាក់កំពុងដេកត្រូវបានចោរចាប់បញ្ច្រកក្រដាសជូតមាត់ រួចយកកាវវិទ្យាសាស្រ្តចាក់ចូល ដោះយកយកខ្សែកមាស១ដំឡឹង គេចខ្លួនដោយសុវត្ថិភាព។

ហេតុការណ៍បានកើតឡើងវេលាម៉ោង13 និង30នាទី ថ្ងៃទី30 ខែមីនា ឆ្នាំ2021 នៅចំណុចភូមិតាសោម ឃុំតាសោម ស្រុកអង្គរជុំ។

សមត្ថកិច្ចស្រុកអង្គរជុំបានឲ្យដឹងថាករណីអំពើលួចដោយមានស្ថានទម្ងន់ទោសនេះបានបង្កឡើងដោយជនសង្ស័យមិនស្គាល់អត្តសញ្ញាណ បានធ្វើសកម្មភាពចាប់បញ្ច្រកក្រដាសជូតមាត់ចូលទៅក្នុងមាត់រួចយកកាវវិទ្យាសាស្រ្តចាក់ចូលទៅក្នុងមាត់ជនរងគ្រោះ ខណៈកំពុងដេកក្នុងអង្រឹង ហើយដោះយកខ្សែកមាសទម្ងន់1ដំឡឹង គេចខ្លួនបាត់តែម្ដង។

សមត្ថកិច្ចបានឲ្យដឹងថាជនរងគ្រោះឈ្មោះយ៉ម រួម ភេទស្រី អាយុ68ឆ្នាំ(រងរបួសស្រាល ) នៅភូមិ ឃុំកើតហេតុខាងលើ។ ករណីនេះសមត្ថកិច្ចបានចុះស្រាវជ្រាវតាមចាប់ជនសង្ស័យផងដែរ៕SRP

ខេត្តសៀមរាប៖លោកចាន់សុភាព បានជួបគ្រោះថ្នាក់ចរាចរណ៍ បណ្ដាលឲ្យស្លាប់នៅក្នុងរថយន្ត ខណ:បើកទៅបុករថយន្តធំ។

ហេតុការណ៍បានកើតឡើងនៅថ្ងៃទី ៣០ខែមីនា​ ឆ្នាំ២០២១ នៅវេលាម៉ោង ១១ និង០០នាទីរវាង រថយន្តនិងរថយន្ត នៅលើ ផ្លូវជាតិលេខ ៦៨ ត្រង់ចំណុចចន្លោះគីឡូម៉ែត្រលេខ ២១និង២២ ស្ថិតនៅភូមិតាស្រី ឃុំសែនសុខ ស្រុកក្រឡាញ់ ខេត្តសៀមរាប។

សមត្ថកិច្ចស្រុកក្រឡាញ់បានឲ្យដឹងថាគ្រោះថ្នាក់ចរាចរណ៍នេះ គឺរថយន្តម៉ាក ToYoTa CAMRY សេរី​ ១៩៩៥ ពណ៌ស្លែរពាក់ស្លាកលេខ ភ្នំពេញ 2B.7985 បើកបរដោយ ឈ្មោះ ចាន់ សុភាព ភេទប្រុស អាយុ៣៨ ឆ្នាំ រស់នៅ​ភូមិ​កំបោរ ឃុំមោង ស្រុកស្រីស្នំ ខេត្តសៀមរាប(ជនរងគ្រោះពិការជើងខាងឆ្វេង ធ្វើការនៅពេទ្យបង្អែកស្រុកក្រឡាញ់) ក្នុងទិសដៅពីត្បូង ទៅជើង ហើយរ៉េចង្កូតទៅឆ្វេង បានបុករថយន្តមួយម៉ាកហ៊ីយ៉ាន់ដាយ ពណ៌​ ខៀវ ពាក់ស្លាកលេខបន្ទាយមានជ័យ 3A1784 បើកបរ​ដោដោយឈ្មោះ មិនស្គាល់អត្តសញ្ញាណ ក្នុងទិសដៅពីជើង ទៅទិសខាងត្បូង តៃតុងបានចុះរត់គេចខ្លួនបាត់។

ករណីនេះរងការខូចខាតរថយន្តធ្ងន់២គ្រឿង។មូលហេតុបណ្តាលមកពីអ្នកបើកបររថយន្តម៉ាកTOYOTA CAMRY បើកមានល្បឿនលឿន​ និងមិនប្រកាន់ស្តាំ។ចំណែកវត្ថុតាងរថយន្ត ទាំងពីរគ្រឿងកម្លាំងជំនាញចរាចរណ៍ បានយកមករក្សាទុកនៅប៉ុស្តិ៍នគរបាលរដ្ឋបាលសែនសុខ ដើម្បីចាត់ការតាមនីតិវិធីច្បាប់៕SRP

ភ្នំពេញ៖រដ្ឋមន្ត្រីក្រសួងព័ត៌មានលោក ខៀវ កាញារីទ្ធ នៅរសៀល ថ្ងៃទី៣០ ខែមីនា ឆ្នាំ២០២១នេះ និងសហការី ព្រមទាំងតំណាង ក្រសួងសុខាភិបាល អញ្ជើញចុះត្រួតពិនិត្យការងាររៀបចំ

ចាក់វ៉ាក់សាំង នៅទីតាំងបរិវេណក្រសួងព័ត៌មាន សម្រាប់
ក្នុងយុទ្ធនាការចាក់វ៉ាក់សាំង ដែលនឹងមានចំនួនមន្រ្តីរាជការក្រសួង បុគ្គលិក អ្នកសារព័ត៌មាន ពីអង្គភាពសារព័ត៌មាន និងក្នុងវិស័យផ្សព្វផ្សាយ វិទ្យុ ទូរទស្សន៍ អនឡាញ ប្រមាណជាង ៥០០០ នាក់ ដែលបានចុះបញ្ជីស្ម័គ្រចិត្តទទួលចាក់វាក់សាំងបង្ការជំងឺកូវីដ-១៩ នាពេលដ៏ខ្លីខាងមុខនាបរិវេណទីស្តីការក្រសួងព័ត៌មាន៕SRP

ភ្នំពេញ៖នាយករដ្ឋមន្ត្រីហ៊ុន សែន បានចេញអនុក្រឹត្យ ស្តីពីការបង្កើតក្រុងបូកគោ នៃខេត្តកំពត។ នេះបើយោងតាមអនុក្រឹត បានចុះហត្ថលេខាដោយសម្ដេច ហ៊ុន សែន៕SRP

ខេត្តសៀមរាប៖អ្នកព័ត៌មានចំនួនពីររូប ត្រូវបានក្រុមអ្នកលេងល្បែងស៊ីសងមួយហ្វូងហ៊ុំព័ទ្ធព្រួតគ្នាវាយអោយរងរបួស ហើយដកយកកាមេរ៉ា។

ហេតុការណ៍នោះ បានកើតឡើងកាលនៅថ្ងៃ ទី២៩ខែមីនា ឆ្នាំ២០២១ ល្ងាចថ្ងៃម្សិលមិញ នៅចំណុចភូមិឈូក ឃុំខ្នារពោធិ៍ ស្រុកសូទ្រនិគម ជាប់ព្រុំប្រទល់ ភូមិសុភី ឃុំកន្ត្រាំង ស្រុកប្រាសាទបាគង។

ជនរងគ្រោះក្នុងហេតុការណ៍ ទី១ឈ្មោះឈិត សាវី ភេទប្រុស ជាបុគ្គលិកទូរទស្សន៍ប៊ីធីវី(BTV)ប្រចាំខេត្តសៀមរាប។ទី២ឈ្មោះប្រាក់ សុខឡេង ជាភ្នាក់ងារកាសែតរំដោះជាតិ។ អ្នកទាំងពីរត្រូវក្រុមអ្នកលេងល្បែងស៊ីសងមួយហ្វូងហ៊ុំព័ទ្ធវាយ អោយរងរបួស ព្រមទាំងដកយកកាមេរ៉ា វីដេអូទៀតផង។

ក្នុងករណីនេះលោកប្រាក់ សុខឡេង មិនបានឆ្លើយតបតាមទូរស័ព្ទនោះទេថា ទទួលរងរបួសក្នុងកម្រិតណានោះ។ ចំណែកលោកឈិត សាវី បានឆ្លើយយ៉ាងខ្លីថា មិនមានរឿងអីទេ។ តែលោកឈិត សាវី បានប្រាប់អ្នកកាសែតផ្សេងថា រូបលោកត្រូវបានរងរបួសដោយដំបងនិងកណ្តាប់ដៃជាច្រើនកន្លែង។

ជុំវិញករណីនេះ លោកលីវ សុខុន ប្រធានមន្ទីរព័ត៌មានខេត្តសៀមរាប បានថ្លែងតាមទូរស័ព្ទនៅថ្ងៃទី៣០ ខែមីនា ឆ្នាំ២០២១នេះថា ករណីខាងលើនេះ លោកបានធ្វើរបាយការណ៍ជូនថ្នាក់ដឹងនាំខេត្ត និងក្រសួងព័ត៌មានរួចហើយ។ លោកបន្តថា អ្នកកសែតក្នុងខេត្តសៀមរាប គឺចំណុះអោយមន្ទីរទាំងអស់ ចឹងទេក្នុង នាមប្រធានមន្ទីរ លោកបានផ្តល់យោបល់អំពីផ្លូវច្បាប់ដល់សាម៉ីខ្លួន ទាក់ទងនិងការដាក់បណ្តឹងហើយផងដែរ តែត្រង់ថាប្តឹងឬអត់ គឺជាការសម្រេចពីសាម៉ីខ្លួន។ លោកបានបន្ថែមថា អ្នកកាសែតមិនមានអាវុធក្នុងដៃនោះទេ គឺមានតែកាមេរ៉ា និងស្លាបប៉ាការ ចឹងទេមិនគួរអោយមានបុគ្គលណា ឬក្រុមជនណា ប្រើអំពើហិង្សាមកលើរាងកាយអ្នកកាសែតនោះឡើយ។

លោក លឹម សម្បត្តិ អធិការប៉ូលិសស្រុកប្រាសាទបាគង បានអោយដឹងថា ករណីប្រតាយប្រតប់រវាងអ្នកសារព័ត៌មាននិងពលរដ្ឋ ខាងលើមិនស្ថិតក្នុងមូលដ្ឋានស្រុករបស់លោកឡើយ។ តែក្រោយទទួលដំណឹង នៅល្ងាចកើតហេតុ លោកបានអោយប៉ូលិសចុះទៅអន្តរាគមន៍ទាន់ពេលវេលា ដោយរំដោះអ្នកសារព័ត៌មានពីរនាក់អោយចាកចេញពីហ្វូងពលរដ្ឋហើយដែរ។ លោកអធិការថា តាមដឹងពួកគាត់ «អ្នកសារព័ត៌មាន»ខាងលើបានទៅថតគេលេងបៀរ ហើយ ក៏ត្រូវក្រុមពលរដ្ឋព្រួតគ្នាប្រតាយ្រតប់ដណ្តើមយកកាមេរ៉ា។ លុះពេលអ្នកសារព័ត៌មានទាំងពីរនាក់ចាកចេញ ក្រុមពលរដ្ឋទាំងនោះ បានយកកាមេរ៉ា វីដេអូ មកប្រគល់អោយសមត្ថកិច្ច ខាងលោករក្សាទុក ហើយលោករងចាំប្រគល់អោយម្ចាស់វិញប៉ុណ្ណោះ។ ចឹងទេរឿងរ៉ាវយ៉ាងណាពិតប្រាកដនោះ គឺស្ថិតលើសមត្ថកិច្ចស្រុកសូទ្រនិគម។

ចំណែកលោកទេព ចាន់ណា អធិការនគរបាលស្រុកសូទ្រនិគម បានអោយដឹងថា ខាងលោកបានទទួលពាក្យបណ្តឹងហើយ ដោយពេលនេះកំពុងសាកសួរអំពីដំណើររឿង។ ចឹងទេក្រោយចុះពិនិត្យកន្លែងកើតហេតុ និងលម្អិតសាច់រឿង ទើបអាចដឹងថា ប្តឹងបទអីខ្លះ ហើយទាមទារអ្វីខ្លះ។

ទោះជាបែបនេះក្តី ប៉ុន្តែអ្នកកាសែតត្រូវបានមើលឃើញថា វាងាយនិងផុយស្រួយក្នុងការរងនូវអំពើហិង្សា ពីក្រុមប្រព្រឹត្តអំពើអសន្តិសុខក្នុងសង្គម  ក៏ដូចជាអំពើខុសច្បាប់ផ្សេងៗ។

សូមរំលឹកថាកាលពីនៅវេលាម៉ោង១២និង៣០នាទី ឈានចូលយប់ថ្ងៃទី១៤ខែមីនាឆ្នាំ២០២១ ម្ដុំមុខប្រាសាទបេងមាលា ក្នុងឃុំបេងមាលា ស្រុកស្វាយលើ លោកលោកប្រន ស៊ាន ចាងហ្វាងកាសែត “អាណាចក្រខ្មែរ” ក៏បានត្រូវបានក្រុមឈ្មួញរកស៊ីបទល្មើសព្រៃឈើលបវាយបណ្ដាលឲ្យរងរបួសធ្ងន់ធ្ងរផងដែរ ខណៈចុះយកព័ត៌មាន។

ទោះជាយ៉ាងណាអ្នកសារព័ត៌មានសង្ឃឹមថាអាជ្ញាថរសមត្ថកិច្ចនឹងទប់ស្កាត់បទល្មើសល្បែងស៊ីសង និងបទល្មើសព្រៃឈើ ឲ្យមានប្រសិទ្ធិភាព ជាពិសេសរំពឹងថានឹងរកយុត្តិធម៌ជូនដល់អ្នកសារព័ត៌មានដែលបានរងគ្រោះដោយអំពើហិង្សាខាងលើជាក់ជាមិនខាន៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សូមថ្លែងអំណរព្រះរាជគុណដ៏ជ្រាលជ្រៅបំផុត ថ្វាយសម្ដេចព្រះមហាក្សត្រី នរោត្តមមុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ដែលព្រះអង្គសព្វព្រះរាជហឫទ័យប្រោសព្រះរាជទានព្រះរាជទ្រព្យ ចំនួន ២០០.០០០ USD (ពីររយពាន់ដុល្លារសហរដ្ឋអាមេរិក) ដែលជាព្រះរាជូបត្ថម្ភដ៏ថ្លៃថ្លាជូនចំពោះរាជរដ្ឋាភិបាល សម្រាប់ជួយទ្រទ្រង់ដល់ដំណើរការក្នុងការរៀបចំ មន្ទីរពេទ្យ ហ្លួងម៉ែ៕SRP

ភ្នំពេញ៖សម្តេចព្រះមហាក្សត្រី នរោត្តមមុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះអង្គសព្វព្រះរាជហឫទ័យប្រោសព្រះរាជទានព្រះរាជទ្រព្យ ចំនួន ២០០.០០០ USD (ពីររយពាន់ដុល្លារសហរដ្ឋអាមេរិក) ជូនរាជរដ្ឋាភិបាល សម្រាប់ជួយទ្រទ្រង់ដល់ដំណើរការក្នុងការរៀបចំ »មន្ទីរពេទ្យ ហ្លួងម៉ែ»។

នេះជាព្រះរាជសារព្រះអង្គ នារសៀលថ្ងៃទី៣០ ខែមីនា ឆ្នាំ២០២១ថា, សម្តេចព្រះមហាក្សត្រី ព្រះវររាជមាតា នរោត្តម មុនិនាថ សីហនុ នៃព្រះរាជាណាចក្រកម្ពុជា ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា!

សម្តេចអគ្គមហាសេនាបតីតេជោ ជាទីរាប់អានដ៏ខ្ពង់ខ្ពស់បំផុត !

ខ្ញុំសូមចូលរួមជួយវិភាគទានព្រះរាជទ្រព្យ ចំនួន ២០០.០០០ USD (ពីររយពាន់ដុល្លារ សហរដ្ឋអាមេរិក) ជូនចំពោះរាជរដ្ឋាភិបាលកម្ពុជា សំរាប់ទ្រទ្រង់ដល់ដំណើរការក្នុងការរៀបចំ មន្ទីរពេទ្យ ហ្លួងម៉ែ ។

 ខ្ញុំសូមប្រសិទ្ធពរដ៏ល្អបវរ សូម សម្តេចអគ្គមហាសេនាបតីតេជោ នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងសមាជិក -សមាជិកាទាំងអស់ នៃរាជរដ្ឋាភិបាលកម្ពុជា ទទួលបានជោគជ័យក្នុងបេសកកម្មដ៏ឧត្តុង្គឧត្តមជូនជាតិមាតុភូមិ ។ សូម សម្តេចអគ្គមហាសេនាបតីតេជោ ទទួលនូវសេចក្តីរាប់អានដ៏ខ្ពង់ខ្ពស់បំផុត អំពីខ្ញុំ៕

ខេត្តសៀមរាប៖អ្នកនេសាទខុសច្បាប់ជនជាតិខ្មែរចំនួន៩នាក់ ត្រូវបានសមត្ថកិច្ច បានសម្រេច​បញ្ជូនទៅ តុលាការដើម្បីអនុវត្តតាមផ្លូវច្បាប់។

លោក ម៉ក់ ប្រុស ​អភិបាលស្រុក​សូទ្រនិគមបានថ្លែង​អោយដឹង​ថា ជន​ប្រព្រឹត្ត​បទល្មើស​នេសាទ​ខុសច្បាប់ទាំង​៩​នាក់ ដែល​បាន​ឃាត់ខ្លួន ក្នុងពេល​បង្ក្រាប​បទល្មើស​នេសាទ​នោះ សមត្ថកិច្ចបាន​រៀបចំ​សំណុំរឿង បញ្ជូនទៅ​តុលាការ នៅ​​ថ្ងៃទី​២៩ ខែមីនាម្សិលមិញ ក្រោយ​ថ្នាក់ដឹកនាំ​ខេត្ត ធ្វើការ​ពិចារណាយ៉ាងល្អិតល្អន់​។

​អភិបាលស្រុក​បន្តថា៖ដោយសារ​ជំងឺ​កូ​វីដ-១៩ រាតត្បាត​យ៉ាងគំហុក ទើប​គណ​:​បញ្ជាការឯកភាព​ខេត្ត ពិចារណា​ជាច្រើន​ម៉ោង​បែបនេះ​។ ប៉ុន្តែ​ដោយ​យល់ឃើញថា បើ​មិន​អនុវត្ត​ច្បាប់ ជន​ប្រព្រឹត្ត មិនអាច​រាងចាល ទើប​សម្រេច​បញ្ជូនទៅ​តុលាការ​តែម្ដង។​

សូមរំលឹកថានៅពី​រសៀលថ្ងៃទី​២៨ ខែមីនា ឆ្នាំ​២០២១ ​សមត្ថកិច្ចចម្រុះបាន​សហការគ្នា បើក​ការបង្ក្រាប​បទល្មើស​នេសាទ លើ​ផ្ទៃ​ទឹក​បឹង​ទន្លេសាប ក្នុងភូមិ​សាស្ត្រ​ឃុំ​កំពង់​ឃ្លាំង ស្រុក​សូ​និគម និង​ឃុំ​កំពង់​ភ្លុក ស្រុក​ប្រាសាទបាគង ខេត្តសៀមរាប​។ ជា​លទ្ធផល​ឃាត់ខ្លួនអ្នកនេសាទ៨នាក់ ដកហូត​កាណូត​ស្មាច់៨គ្រឿង​. សាច់​ស៊ី​ប៨​គ្រឿង មាន​ក្រឡា២​ទៅ​៣​ហ៊ុន​. ដង​ស៊ី​ប៨គូប្រវែង៦​ម៉ែត្រ​. ម៉ាស៊ីន​ម៉ាក​កា​វា កម្លាំង​១៨​សេស ២១​គ្រឿង​.និង​ត្រី​ចម្រុះ១៥០គីឡូក្រាម​។ លុះ​ព្រលប់​ថ្ងៃ​ដដែលបានឃាត់បាន​ម្នាក់ទៀត​។​

​ជុំវិញ​ការបង្ក្រាប​បទល្មើស រហូត​ឃាត់ខ្លួន​មនុស្ស ៩នាក់​នេះ សមត្ថកិច្ចក្នុង​ហេតុការណ៍បាន​បង្ហើប​ថាបទល្មើស​នេសាទ លើ​ផ្ទៃ​ទឹក​បឹង​ទន្លេសាប នាពេល​កន្លងមក រហូត​បច្ចុប្បន្ន គឺ​កើតមានយ៉ាងពេញបន្ទុក ហើយ​ឧបករណ៍ មាន​គ្រប់​រូបភាព សុទ្ធសឹង​ជា​ឧបករណ៍ ដែល​ត្រូវ​ហាមឃាត់​។​

​ប្រភពបាន​បន្តថា តាម​ការស្រាវជ្រាវ ជន​ប្រព្រឹត្ត គឺជា​ក្រុមមនុស្ស​ដដែលៗ មិនមាន​ការខ្លាច រអា​ចំពោះ​មន្ត្រី​ជំនាញ​ឡើយ​។ ពួកគេ​ហាក់បីដូច​ទទួល​បានកា​របើកភ្លើង​ខៀវ​អោយជាមុន​អីចឹង​។ បើ​មិន​ដូច្នេះ​ទេ យ៉ាងហោចណាស់ ក៏​ពួកគេ​លួច​ធ្វើ​ដោយ​កន្លែង មិនមែន​ស្ទើរតែ​ពេញផ្ទៃ​ទឹក​បែប​នេះឡើយ​។ នេះ​ប្រសិនបើ សមត្ថកិច្ច​ខាងលើ មិន​សហការគ្នាចុះបង្ក្រាប​ទេបទល្មើស អាច​នឹង​រីក​ដូច​ផ្សិត មិន​ថារដូវប្រាំងឬ​វស្សា​ឡើយ​។​

​ជាមួយនឹង​សកម្មភាព ដែល​បាន​បង្ក្រាបបទល្មើសនេសាទ​នេះ នាយ​ខណ្ឌ​រដ្ឋបាល​ជល​ផល ខេត្តសៀមរាប លោក ព្រិ​ន សា​វិ​ន មិនអាច​សុំ​ការពន្យល់​បន្ថែម​បានទេ ដោយ​ទូរស័ព្ទ​ហៅចូល​ច្រើនដង តែ​គ្មាន​អ្នកទទួល​៕SRP«លោកសរ ម៉ាប់ នាយរងផ្នែករដ្ឋបាលជលផលដំដែក»

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការ​ខេត្ត​​ប្រយុទ្ធ​ប្រឆាំងជំងឺកូវីដ-១៩ បាន​ថ្លែងអំណរ​ព្រះគុណ​ ដល់​ព្រះចៅ​អធិការ​ ​អាចារ្យ​ គណៈកម្មការ​វត្ត​ទាំង​៤​ ក្នុង​ក្រុង​កំពង់ចាម​ និង​ថ្លែង​អំណរគុណ​ចំពោះ​ ​លោកជំទាវ​អ្នក​តំណាងរាស្រ្ដមណ្ឌលកំពង់ចាម​ ទាំង​៣រូប​ ក៏ដូចជា​សប្បុរសជន​នានា​​ ដែល​បាន​គាំទ្រ​​ជួយ​ឧបត្ថម្ភ​ ទាំង​ថវិកា​ និងផ្នែកសម្ភារជូន​ដល់គណៈកម្មការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ នាពេលនេះ ដែលជាការរួមចំណែក យ៉ាងសំខាន់ ក្នុងសកម្មភាពនានា ដើម្បីប្រយុទ្ធ​ប្រឆាំង​នឹងជំងឺកូវីដ-១៩ នឹងជាការជួយរំលែកទុក្ខលំបាក​ ការខ្វះខាត របស់ពលករ​ចំណូល​ស្រុក​ត្រឡប់មកពីប្រទេស​ថៃ ក៏ដូចជា​អ្នក​ពាក់ព័ន្ធ​ព្រឹត្តិការណ៍​២០កុម្ភៈ​ ដែល​កំពុង​​ធ្វើចត្តាឡីស័ក​ ផង​ដែរ​។

អភិបាលខេត្តថ្លែងអំណរគុណយ៉ាងដូច្នេះក្នុងឱកាសទទួល ថវិកានិងសម្ភារ របស់ព្រះចៅ​អធិការ​ អាចារ្យ​ ​គណៈកម្មការ​វត្ត​​ ​ អ្នក​តំណាងរាស្រ្ដ​ និង​សប្បុរសជន​នានា​ ក្នុង​ខេត្តកំពង់ចាម​ នៅថ្ងៃ​ទី​៣០​ ខែមីនា​ ព្រឹកមិញនេះ​។

គួរ​បញ្ជាក់​ថា​ អំណោយព្រះចៅ​អធិការ​ អាចារ្យ​ គណៈកម្មការ​ វត្ត​សុទស្សនារាម​ ជ្រោយថ្ម​ បាន​ឧបត្ថម្ភ​ទឹក​បរិសុទ្ធ​ ចំនួន​៥២៧​យួរ​ .​
ព្រះចៅអធិការអាចារ្យ​ គណៈកម្មការ​ វត្ត​​ខេមវន្តបឹងស្នាយ​ ឧបត្ថម្ភ​ ទឹក​បរិសុទ្ធ​ ចំនួន​៥០យួរ​ .​
ព្រះចៅ​អធិការ​ អាចារ្យ​ គណៈកម្មការ​ វត្ត​បុទុម​រតន​ ដីដុះ​ ឧបត្ថម្ភ​ ទឹក​បរិសុទ្ធ​ ចំនួន​៧៥​យួរ​ .​
ព្រះចៅ​អធិការ​ អាចារ្យ​ គណៈកម្មការ​ វត្ត​ជោតនារាម​ បឹងកុក​ ឧបត្ថម្ភ​ទឹក​បរិសុទ្ធ​ ចំនួន​៥០​យួរ​ .​
លោកជំទាវ​ ខុង​ ស៊ុន​អេង​ អ្នក​តំណាងរាស្រ្ដមណ្ឌលកំពង់ចាម​ ឧបត្ថម្ភ​ ថវិកា​ផ្ទាល់ខ្លួន​ ចំនួន​១លានរៀល​ .​ លោកជំទាវ​ ស្រី​ គឹមឆយ​ អ្នក​តំណាងរាស្រ្ដមណ្ឌលកំពង់ចាម​ ឧបត្ថម្ភ​ ថវិកា​ផ្ទាល់ខ្លួន​ ចំនួន​១លានរៀល​ .​ លោកជំទាវ​ កុល​ ធារិន​ អ្នក​តំណាងរាស្រ្ដមណ្ឌលកំពង់ចាម​ ឧបត្ថម្ភ​ ថវិកា​ផ្ទាល់ខ្លួន​ ចំនួន​១លានរៀល​
លោក​ សន​ វុត្ថា​ និង​ភរិយា​ ដេប៉ូ​ស្រាបៀរ​កម្ពុជា​ខេត្តកំពង់ចាម​ ឧបត្តម្ភ​ ទឹក​បរិសុទ្ធ​កម្ពុជា​ ចំនួន​៦០​កេស​
លោក​ យាន​ គួង​ និង​ភរិយា​ សាខា​សាលា​បេីកបរ​យានយន្ត​ ហេង​ ចំណាន​ ឧបត្ថម្ភ​ ថវិកា​ ចំនួន​២០ម៉ឺនរៀល​ អាល់កុល​៦០លិត្រ​ និង​ម៉ាស​ចំនួន​១០ប្រអប់​​ ផងដែរ៕SRP

ភ្នំពេញ៖រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ​ លោកវេង សាខុន បានបង្ហាញនូវវឌ្ឍនភាពនៃការនាំចេញផលិតផលកសិកម្ម ដែលទទួលបានរបាយការណ៍ ពីមន្ទីរកសិកម្ម រុក្ខាប្រមាញ់ និងនេសាទខេត្តរតនគីរី តាកែវ កំពត និងបាត់ដំបង កាលពីថ្ងៃទី២៩ ខែមីនា ដែលបានបង្ហាញឲ្យឃើញអំពីបរិមាណកសិផលដែលបាននាំចេញ នៅក្នុងត្រីមាសទី១ ដើមឆ្នាំ ២០២១ ទៅកាន់ប្រទេសជិតខាងក្នុងនោះមាន៖ ស្រូវ ដំឡូង មីស្រស់ ក្រៀម ស្វាយកែវរមៀតស្រស់ គ្រាប់ស្វាយចន្ទី ចេកអំបូងលឿង ដូចខាងក្រោម៖

១- ខេត្តរតនគីរី៖

– ចេកអំបូងលឿង: ២៥ ៥៦០ តោន

– ចំណិតដំឡូងមីក្រៀម: ២០ ០៩៤ តោន

– ម្នាស់ស្រស់: ៥៩២ តោន

– គ្រាប់ស្វាយចន្ទី: ៨ ០៦២ តោន

– ស្វាយកែវរមៀតស្រស់: ៦៣៧ តោន

– ក្រូចថ្លុង: ៧៧ តោន

– ខ្នុរ: ២៤៨ តោន

២- ខេត្តតាកែវ៖

– ស្រូវ: ២០៦ ១៦២ តោន

– ស្វាយកែវរមៀតស្រស់: ២០ ៣០៨ តោន

៣- ខេត្តកំពត៖

– ស្រូវ: ៥៩ ៧១០ តោន

៤- ខេត្តបាត់ដំបង៖

– ដំឡូងមីស្រស់: ១១១ ៨២០ តោន

– ផ្លែស្វាយស្រស់: ១ ៥៤៣ តោន៕SRP

ភ្នំពេញ៖សម្ដេចហេង សំរិន ប្រធានរដ្ឋសភាជាតិ បានបង្ហោះសាររំលឹកសូមជនរួមជាតិចូលរួមប្រយុទ្ធប្រឆាំងកូវីដ-១៩ ដោយការទទួលខុសត្រូវខ្ពស់បំផុត។

សម្ដេចហេង សំរិន បានឡើងថា៖ «វ៉ាក់សាំងរួមនឹងការអនុវត្តវិធានការសុខាភិបាលឱ្យបានខ្ជាប់ខ្ជួនជាមធ្យោបាយដ៏សំខាន់ដែល អាចនាំឱ្យសង្គមជាតិយើងវិលទៅរកសភាពជាធម្មតាដូចមុនវិញបាន»។ ដូច្នេះសូមជនរួមជាតិចូលរួមអនុវត្តឱ្យបានខ្ជាប់ខ្ជួននូវរាល់វិធានការដែលរាជរដ្ឋាភិបាលបានដាក់ចេញ ជាមួយការទទួលខុសត្រូវខ្ពស់បំផុតចំពោះសុខុមាលភាពសង្គមជាតិរបស់យើង។

នៅក្នុងការប្រយុទ្ធប្រឆាំងជំងឺកូវីដ-១៩នេះ រាជរដ្ឋាភិបាលបានចេញនូវវិធានការបន្តបន្ទាប់ ទាំងយន្តការសម្រាប់ស្តារ ការងើបឡើងវិញនូវសេដ្ឋកិច្ចជាតិ ជីវភាពរស់នៅរបស់ប្រជាជនពលរដ្ឋ និងសុខភាពសាធារណៈ។ នៅក្នុងការទប់ស្កាត់ កុំឱ្យជំងឺកូវីដ-១៩ បន្តរាតត្បាតសុខុមាលភាពសង្គមជាតិទៅមុខទៀត រាជរដ្ឋាភិបាលបានកំពុងកៀរគរគ្រប់មធ្យោបាយដើម្បីទទួលបានវ៉ាក់សាំងមកចាក់ជូនបងប្អូនប្រជាពលរដ្ឋ ទាំងការទទួលជំនួយពីប្រទេសជាមិត្ត ស្ថាប័នដៃគូអន្តរជាតិ និងការបញ្ជាទិញ។

សម្ដេចហេង សំរិន បានបន្តថា៖ក្នុងនាមស្ថាប័ននីតិប្បញ្ញត្តិ ខ្ញុំសូមវាយតម្លៃខ្ពស់ចំពោះឆន្ទៈដ៍មុះមុតរបស់រាជរដ្ឋាភិបាលនៅក្នុងគម្រោងការចាក់វ៉ាក់សាំងជូនប្រជាពលរដ្ឋឱ្យបានរហូតដល់ជាង១០លាននាក់ ក្នុងចំណោមប្រជាពលរដ្ឋទូទាំងប្រទេស។ ជាពិសេសចាប់ពីពេលនេះ បើកយុទ្ធនាការចាក់វ៉ាក់សាំងជូនពលរដ្ឋឱ្យបានយ៉ាងតិច១លានដូសនៅក្នុងមួយខែ ពិតជាមានសារៈសំខាន់ដើម្បីទប់ស្កាត់ការរីករាលដាលជំងឺកូវីដ-១៩ ប្រកបដោយប្រសិទ្ធភាព និងស្តារសេដ្ឋកិច្ចដែលរងផលប៉ះពាល់ឱ្យងើបឡើងវិញបានឆាប់រហ័ស។

ឆ្លៀតឱកាសនេះ ខ្ញុំនៅតែទទូចអំពាវនាវដល់បងប្អូន កូនក្មួយ ប្រជាពលរដ្ឋទាំងអស់មេត្តាចូលរួមទប់ស្កាត់ ការពារជំងឺកូវីដ-១៩ ទាំងអស់គ្នា ដើម្បីបញ្ចៀសការបាត់បង់អាយុជីវិតដោយសារជំងឺរាតត្បាតដ៏កាចសាហាវនេះបន្តទៀត ជាពិសេសដើម្បីជម្រុញឱ្យសង្គមជាតិយើងឆាប់មានឱកាសវិលទៅរកជីវភាពដូចធម្មតាវិញ សំដៅស្តារនិង កសាងប្រទេសជាតិយើងឱ្យកាន់តែរីកចម្រើនឆាប់រហ័សឡើង។

សូមជនរួមជាតិទំាំងអស់បន្តអនុវត្តវិធានការ «៣ការពារ ៣កុំ»ឱ្យបានហ្មត់ចត់ជាទីបំផុត៕SRP

ភ្នំពេញ៖ប្រធានសហភាពសហព័ន្ធអ្នកសារព័ត៌មានកម្ពុជា លោក ហ៊ុយ វណ្ណៈ តាមរយ:ទំព័រហ្វេសប៊ុកផ្ទាល់ខ្លួនរបស់លោកបានសរសេរសំណេរមួយជុំវិញចម្ងល់របស់អ្នកកាសែត ដែលបានសួរលោកទាក់ទងទៅនឹង អ្នកកាសែតខ្លះត្រូវបានដកអាជ្ញាប័ណ្ណនិងជាប់បណ្ដឹងនៅតុលាការ។

លោកហ៊ុយ វណ្ណៈ បានសរសេរថា៖ បងប្អូនអ្នកកាសែត បានសួរសំណួរខ្ញុំ នៅថ្ងៃនេះ!
• សំណួរ៖ យល់ដូចម្តេចដែលមានអ្នកកាសែតខ្លះត្រូវបានដកអាជ្ញាប័ណ្ណ និងខ្លះជាប់ក្តីនៅតុលាការ សរុបទាំងអស់ជាង៧០ករណី?
• ចម្លើយ៖ តើអ្នកកាសែតដែលមានអង្គភាពផ្លូវការ មានការដឹកនាំត្រឹមត្រូវ និងមានវិជ្ជាជីវៈប៉ុន្មាននាក់នៅក្នុងចំណោមនោះ? គឺស្ទើតែគ្មាន។ យើងត្រូវយល់ពីភាពគ្រោះថ្នាក់នៃបច្ចេកវិទ្យា (Facebook/Online) ដែលជំរុញឲ្យខ្លះធ្វើខុសដោយមិនដឹងខ្លួន ឬដោយបំពានប៉ាតណាប៉ាតណី ហើយកំហុសរបស់គេបែរជាបង្កើតបន្ទុកយល់ច្រឡំធំ២ ទៅអ្នកដទៃទាំងអយុត្តិធម៌៖
១- មើលមួយភ្លែតថា សមត្ថកិច្ចបំពានពួកគេទៅវិញ។
២- ទង្វើរបស់ពួកគេ បានធ្វើឲ្យស្រអាប់ដល់អ្នកសារព័ត៌មាន ដែលមានអាជីពត្រឹមត្រូវ ហើយរឿងធំបំផុត គឺសង្គមទាំងមូល ទទួលព័ត៌មានបំពុល និងខុសស្រឡះ។ យើងត្រូវទ្រាំទទួលយកការពិតនេះ ហើយនាំគ្នាកែប្រែ ដោយ«ចេះក្រែង»។

សូមជម្រាបថារយ:ពេលប៉ុន្មានខែមកនេះជាពិសេសក្នុងខែមីនានេះ ក្រសួងព័ត៌មានបានសម្រេចលុបអាជ្ញាប័ណ្ណគេហទំព័រនិងកាសែត ជាច្រើនអង្គភាព ដែលអង្គភាពទាំងនោះបានផ្សព្វផ្សាយព័ត៌មានមិនពិតធ្វើឲ្យប៉ះពាល់យ៉ាងធ្ងន់ធ្ងរដល់វិជ្ជាជីវៈ និងបានធ្វើឲ្យប៉ះពាល់ដល់សង្គមផងដែរ៕SRP