ខេត្តសៀមរាប៖ប្រជាពលរដ្ឋរស់នៅក្នុងឃុំត្បែងចំនួន៥០គ្រួសារ បានទទួលអំណោយជាអង្ករនិងក្រមា ពីក្រុមហ៊ុនបុរីកុមារមាស ឯ.ក។

ពិធីចែកអំណោយនេះធ្វើនាព្រឹកថ្ងៃទី២២ខែតុលាឆ្នាំ២០២០នេះ នៅគណបក្សប្រជាជនកម្ពុជា ឃុំត្បែងស្រុកបន្ទាយស្រី ខេត្តសៀមរាប ដោយមានការចូលរួមពីអាជ្ញាធរស្រុក និងមូលដ្ឋានផងដែរ។

លោកថាប់ សារ៉ន ប្រធានក្រុមប្រឹក្សាស្រុកបន្ទាយស្រីបានថ្លែងអំណរគុណ ចំពោះក្រុមហ៊ុន បុរីកុមារមាស ឯ.ក ដែលមានចិត្តធម៌មនុស្សធម៌ ចែកអំណោយដល់ពលរដ្ឋដែលកំពុងជួបការខ្វះខាត បើទោះបីជាអំណោយនេះបន្តិចបន្តួចក្ដី តែក៏ជាការចូលរួមរំលែកនូវលំបាករបស់ពលរដ្ឋផងដែរ។

លោកយូ ធុល នាយកក្រុមហ៊ុនបុរីកុមារមាស ឯ.ក បានមានប្រសាសន៍ថា ដោយមើលឃើញការលំបាក របស់ប្រជាពលរដ្ឋ មានការខ្វះខាតនិងដើម្បីចូលរួមចំណែកក្នុងស្មារតីជួយដល់រដ្ឋរាជរដ្ឋាភិបាល ក្រុមហ៊ុនរបស់លោក បានយកអំណោយជាអង្ករនិងក្រមា ចែករំលែកដល់បងប្អូនប្រជាពលរដ្ឋ ដែលមានជីវភាពខ្វះខាត ដើម្បីសម្រាលទុក្ខលំបាករបស់ពួកគាត់។

លោកយូ ធុល ក៏បានប្រាប់ពលរដ្ឋ ដែលមកទទួលអំណោយ ត្រូវអនាម័យឲ្យបានជាប្រចាំតាមការណែនាំរបស់ក្រសួងសុខាភិបាល ដើម្បីទប់ស្កាត់ជំងឺកូវិដ១៩ផងដែរ។

បើតាមការបញ្ជាក់របស់ក្រុមហ៊ុន បុរីកុមារមាស ឯ.ក ថា ប្រជាពលរដ្ឋដែលមានការខ្វះខាត បានមកទទួលអំណោយ ដោយមួយគ្រួសារទទួលបានអង្ករ៥គីឡូនិងក្រមាមួយ។ សូមជម្រាបថាក្រុមហ៊ុន បុរីកុមារមាស ឯ.ក មានស្នាក់ការលក់ផ្ទះល្វែង និងដីឡូតិ៍ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប៕SRP

ខេត្តសៀមរាប៖អាជ្ញាធរស្រុកប្រាសាទបាគងរាយការណ៍ថាបុរសម្នាក់បានលង់ទឹកស្លាប់នៅព្រឹកមិញនេះ។ហេតុការណ៍បង្កើតឡើង
នៅវេលាម៉ោង០៨និង៣០នាទីខែតុលាឆ្នាំ២០២០ នៅចំណុចភូមិដូរនំ ឃុំមានជ័យស្រុកប្រាសាទបាគង ខេត្តសៀមរាប។
អាជ្ញាធរបានបន្តថាជនរងគ្រោះមានឈ្មោះហួន គឹមហួរ ភេទប្រុសអាយុ៤៣ឆ្នាំរស់នៅភូមិឃុំខាងលើ។
បើតាមសមត្ថកិច្ចថាមូលហេតុជនរងគ្រោះមានជំងឺស្គន់ជាន់ នឹងផឺកស្រាជាប្រចាំ៕SRP

ខេត្តសៀមរាប៖លោកឧត្តមសេនីយ៍ត្រី ភឹង ចិន្តារ៉េត ស្នងការរង ទទួលផែនការងារនគរបាលព្រហ្មទណ្ឌ នៃស្នងការនគរបាលខេត្តសៀមរាប បានថ្លែងប្រាប់«បណ្ដាញសៀមរាបប៉ុស្ដិ៍» នៅមុននេះបន្តិចថាជនដៃដល់ដែលបានបាញ់សម្លាប់ប្រពន្ធនៅស្រុកក្រឡាញ់ កាលពីយប់មិញ ត្រូវបានសមត្ថកិច្ចចាប់ខ្លួនបានហើយ។

លោកឧត្តសេនីយ៍ថាជនដៃដល់ ត្រូវបានចាប់ខ្លួនបាននៅព្រឹកថ្ងៃទី២២ខែតុលាឆ្នាំ២០២០នេះ​ នៅស្រុកបវេល ដោយកម្លាំងនគបាលព្រហ្មទណ្ឌខេត្តសៀមរាប សហការណ៍ ជាមួយនគរបាលអធិការស្រុកបវេល ខេត្តបាត់ដំបង។

តាមរបាយការណ៍បានឲ្យដឹងថាហេតុការណ៍នេះបានកើតឡើងនៅយប់ថ្ងៃទី២២ខែតុលាឆ្នាំ២០២០វេលាម៉ោង០២និង៥០នាទី ទៀបភ្លឺ នៅផ្លូវជាតិលេខ៦ ស្ថិតនៅភូមិគោកចាស់  ឃុំស្រណាល  ស្រុកក្រឡាញ់ ខេត្តសៀមរាប។

ករណីផ្ទុះអាវុធនេះ បណ្ដាលឲ្យជនរងគ្រោះម្នាក់ ឈ្មោះ  សំអុល  សុដានី ភេទស្រីអាយុ២៧ឆ្នាំ មានទីលំនៅ ភូមិសាមគ្គី សង្កាត់ ឬស្សីកែវ (រាជធានីភ្នំពេញ) របួសដើម ដោះខាងឆ្វេង។

បើតាមលោកលោកឧត្តមសេនីយ៍ត្រី ភឹង ចិន្តារ៉េត បន្ថែមថាក្រោយពីបានទទួលព័ត៌មាន សមត្ថកិច្ចបានចុះទៅដល់កន្លែងកើតហេតុភ្លាមៗ នឹងបញ្ជូនជនរងគ្រោះ ទៅសង្រ្គោះនៅមន្ទីពេទ្យ។  ជាមួយគ្នានេះ នៅកន្លែងកើតហេតុសមត្ថកិច្វបានរកឃើញអាវុធខ្លី១ដើម ម៉ាក K59 ចំនួន១ដើម ផងដែរ។

តាមការបំភ្លឺរបស់ជនរងគ្រោះ  ជនសង្ស័យមានឈ្មោះ ចាន់ សុផល (ហៅពៅ) ភេទប្រុសមានអាយុ៥៧ឆ្នាំជិះរថយន្តម៉ាកនីសាន់ខ្មៅ២W៨៧៨៧។

ជុំវិញហេតុការណ៍នេះដែរ លោកឧកញ៉ា សៀង ណាំ តំណាងរាស្ត្រ មណ្ដាលសៀមរាប បានបញ្ជាក់នៅលើទំព័រហ្វេសប៊ុកថានៅព្រឹកថ្ងៃ ទី ២២ ខែតុលា ឆ្នាំ២០២០ ខ្ញុំបាទបានទៅសួរសុខទុក្ខ ជនរងគ្រោះ ភេទស្រី អាយុ២៧ឆ្នាំ ដែលបង្កដោយការផ្ទុះ អាវុធ នៅភូមិគោកចាស់ ឃុំស្រណាល ស្រុកក្រឡាញ់ ខេត្តសៀមរាប។

លោកឧកញ៉ា សៀង ណាំ បន្តថាតាមការរៀបរាប់ របស់ជនរងគ្រោះ បានឲ្យដឹងថា នៅវេលាម៉ោង ០២និង៥០នាទីព្រឹក នាថ្ងៃទី ២២ ខែតុលា រូបគាត់ត្រូវបាន ប្តី (ពុំបានរៀបការ) បាញ់សម្លាប់ក្នុងរថយន្ត ត្រូវចំណុចលើ សុដន់ ផ្នែកខាងឆ្វេង (បៀមគ្រាប់ជាប់ក្នុងសាច់) តែសំណាងល្អ រូបគាត់មិនស្លាប់ ហើយបានបើកទ្វារថយន្ត រត់ចេញក្រៅ ស្រែកឲ្យគេជួយ។

ខណៈនោះកម្លាំងនគរបាល និង កម្លាំងប្រជាការពារ ដែលការពារ សន្តិសុខ សុវត្ថិភាពជូន សម្តេចតេជោ ហ៊ុន សែន ដែលឈរជើងនៅទីនោះ ជួយសង្គ្រោះទាន់ពេលវេលា និង បានបញ្ជូនមកកាន់មន្ទីរពេទ្យ។

លោកឧកញ៉ា សៀង ណាំ បន្ថែមថាដើម្បីរួមចំណែក ក្នុងការព្យាបាល ជនរងគ្រោះ ខ្ញុំបាទបានឧបត្ថម្ភថវិកាចំនួន ៥០០ដុល្លារអាមេរិចផងដែរ។ ជាមួយគ្នានេះដែរលោកឧកញ៉ា សៀង ណាំ ក៏បានសូមជូនពរឲ្យក្មួយស្រី រួចផុតពីគ្រោះថ្នាក់ដល់ អាយុជីវិត និងឆាប់បានជាសះស្បើយ ពីមុខរបួស និងសូមអំពាវនាវដល់សមត្ថកិច្ច គ្រប់ជាន់ថ្នាក់ តាមចាប់ជនបង្ក(ជនសង្ស័យ មកផ្តន្ទាទោសតាមច្បាប់ ឲ្យខាងតែបាន។

បើតាមលោកឧត្តមសេនីយ៍ត្រី ភឹង ចិន្តារ៉េត បញ្ជាក់ថាករណីក្រោយបាញ់ប្រពន្ធ ជនដៃដល់បានយកកូនតូចម្នាក់ ដែលជាកូនជាមួយជនរងគ្រោះរងគ្រោះទៅជាមួយផងដែរ ពេលនេះសមត្ថកិច្ច បាននាំយកមកវិញបានទាំងអស់។

ប្រភពីសមត្ថកិច្ចបានបន្ថែមថា បន្ទាប់ពីធ្វើសកម្មបាញ់ទៅលើជនរងគ្រោះរួចមក ជនសង្ស័យខាងលើ បានជិះរថយន្តម៉ាក NISSAN FRONTIER ពណ៌ខ្មៅ ពាក់ស្លាកលេខ ភ្នំពេញ 2W-8787 គេចខ្លួន ជាមួយកូនស្រីឈ្មោះ គុជ សុខមេត្តា អាយុ ០៩ខែ ទៅតាមបណ្តោយផ្លូវជាតិលេខ៦ ហើយត្រូវបានចាប់ខ្លួន នៅចំណុច ភូមិអូរដូនពៅ ឃុំឃ្លាំងមាស ស្រុកបវេល ខេត្តបាត់ដំបង។

សមត្ថកិច្ចបានបញ្ជាក់ថាមូលហេតុ ទំនាស់ពាក្យសំដីគ្នាពេលកំពុងធ្វើដំណើរត្រឡប់មកពីខេត្តបាត់ដំបង ហើយពេលមកដល់កន្លែងកើតហេតុ ជនរងគ្រោះ និងជនសង្ស័យ បានចុះពីលើរថយន្ត ហើយក៏ប្រតាយប្រតប់គ្នា ទើបឈានដល់ការផ្ទុះអាវុធតែម្តង៕SRP

ខេត្តសៀមរាប៖ស្ត្រីម្នាក់បានរងរបួសធ្ងន់ករណីផ្ទុះអាវុធមួយកន្លែង។
សមត្ថកិច្ចបានឲ្យដឹងថាហេតុការណ៍បានកើតឡើងនៅវេលាម៉ោង០២និង៥០នាទីថ្ងៃទី២២ តុលា ២០២០ នៅចំណុចមុខសាលាបឋមសិក្សាសាមគ្គី ផ្លូវជាតិលេខ៦ ឃុំស្រណាល ស្រុកក្រឡាញ់ ខេត្តសៀមរាប។

សមត្ថកិច្ចបានបន្តឲ្យដឹងថាជនបង្កឈ្មោះ ចាន់ ផល ហៅពៅ ភេទប្រុសអាយុប្រហែល៥០ឆ្នាំ ទីលំនៅភូមិស្វាយធំ ឃុំកណ្ដែកស្រុកប្រាសាទបាគងខេត្តសៀមរាប ជិះរថយន្តពណ៌ខ្មៅមិនស្គាល់ម៉ាកស្លាកលេខ៨៧៨៧ (អាវុធកាំភ្លើងខ្លី K59 លេខ៣៧៦៣)។

សមត្ថកិច្ចបានបញ្ជាក់បន្ថែមថាក្នុងហេតុការណ៍នេះ បណ្តាលអោយរបួសស្ត្រីម្នាក់ ឈ្មោះ សំអុល សុខដានី ភេទស្រីអាយុ២៧ឆ្នាំ ទីលំនៅភូមិសាមគ្គី សង្កាត់ឫស្សីកែវ ភ្នំពេញ។ ដោយរបួសធ្ងន់ចំដើមដោះខាងឆ្វេង១គ្រាប់(បៀមគ្រាប់)។
ក្រោយមានការផ្ទុះអាវុធជនបង្កបានឡើងរថយន្តគេចខ្លួនបាត់។ ចំណែក ជនរងគ្រោះ ត្រូវបានសង្រ្គោះនៅមន្ទីពេទ្យខេត្តសៀមរាប។

ជុំវិញហេតុការណ៍នេះ សមត្ថកិច្ចនៅ បញ្ជាក់លម្អិតចំពោះមូលហេតុនោះទេ នឹងមិនទាន់ចាប់បានជនដៃដល់ផងដែរ។
ទោះយ៉ាងណាពាក់ព័ន្ធករណីផ្ទុះអាវុធនេះ អភិបាលខេត្តសៀមរាបលោក ទៀសីហា បានបញ្ជាក់ប្រាប់បណ្ដាញ សៀមរាបប៉ុស្តិ៍ ថាករណីនេះលោកបានទទួលព័ត៌មានហើយ និងកំពុងស្វែងរកជនបង្កផងដែរ៕SRP

សម្តេចតេជោ ហ៊ុន សែន នាយករដ្ឋមន្រ្តី
នៅព្រឹកថ្ងៃទី២២ ខែតុលា ឆ្នាំ២០២០នេះ
នឹងបន្តអញ្ជើញជួបសួរសុខទុក្ខ និងផ្តល់អំណោយជូនប្រជាពលរដ្ឋរងគ្រោះដោយទឹកជំនន់ ក្នុងស្រុកថ្មពួក និងក្រុងប៉ោយប៉ែត ខេត្តបន្ទាយមានជ័យប្រមាណ១ម៉ឺនគ្រួសារ ជាបន្តទៀត បន្ទាប់ពីម្សិលមិញផ្តល់ជូនប្រជាពលពលរដ្ឋ១ម៉ឺនគ្រួសារ នៅស្រុកមង្គលបូរី ខេត្តបន្ទាយមានជ័យ។

ខេត្តបន្ទាយមានជ័យ ជាខេត្តមួយក្នុងចំណោមរាជធានី-ខេត្តទាំង១៩ ដែលការជន់លិចដោយសារជំនន់ទឹកភ្លៀង។ ខេត្តបន្ទាយមានជ័យ ក៏ក្លាយជាខេត្តរងការលិចលង់ធ្ងន់ធ្ងរជាងគេមួយផងដែរ។ ក្រុង-ស្រុកចំនួន៦ របស់ខេត្តនេះបានរងការជន់លិចធ្ងន់ធ្ងររួមមាន៖ ក្រុងសិរីសោភណ ក្រុងប៉ោយប៉ែត ស្រុកមង្គលបុរី ស្រុកថ្មពួក ស្រុកអូរជ្រៅ និងស្រុកម៉ាឡៃ។

របាយការណ៍គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ជំនន់ទឹកភ្លៀងក្នុងខេត្តបន្ទាយមានជ័យ បណ្តាលឱ្យស្លាប់ពលរដ្ឋ ១៨នាក់, ធ្វើឱ្យប៉ះពាល់ប្រជាពលរដ្ឋ ២២ ១៧៨គ្រួសារ, ជម្លៀសទៅទីទួលសុវត្ថិភាព ៣ ៥៤៥គ្រួសារ, លិចសន្ទូង ៤៩ ៣៤៣ហិកតា, លិចដំណាំផ្សេងៗ ៩ ៦៤២ហិកតា និងធ្វើឱ្យខូចខាតហេដ្ឋារចនាសម្ព័ន្ធផ្លូវ ស្ពាន ទំនប់ទឹក និងសាលារៀនជាដើម៕SRP

ខេត្តព្រះសីហនុ៖លោកគួច ចំរើន អភិបាល ខេត្តព្រះសីហនុ រសៀលថ្ងៃទី២១ ខែតុលា ម្សិលមិញ បានដឹកនាំមន្ត្រីជំនាញ និងអាជ្ញាធរស្រុក ចុះពិនិត្យសង្វាក់ផលិតកម្មនៅក្នុងតំបន់សេដ្ឋកិច្ចពិសេស ចេ ជាង ស្ថិតនៅឃុំជើងគោ ស្រុកព្រៃនប់ ខេត្តព្រះសីហនុ។

តំបន់សេដ្ឋកិច្ចពិសេស ចេ ជាង មានផ្ទៃដីទំហំ ១៣០ហិកតា មានរោងចក្រសរុបចំនួន ៣៨ ក្នុងនោះ ២៨ កំពុងដំណើការរួមមានរោងចក្រផលិតចំណីសត្វ រោងចក្រផលិតថង់ផ្លាស្ទិក និងរោងចក្រផលិតគ្រឿងសង្ហារឹមជាដើម។ល។ ដោយឡែកក្រុមហ៊ុន អាយ តាវ ផេតសឹបផ្លាយ (ខេមបូឌា) មានអគារចំនួន១៧ កំពុងដំណើរការផលិតចំណីសត្វសុនខ នាំទៅអឺរ៉ុប អាមេរិក និងជប៉ុន ដោយក្នុងមួយថ្ងៃរោងចក្រនេះផលិតបាន ៣០តោន និងប្រើប្រាស់កម្មករ ១,២០០នាក់ ដោយឡែកវត្ថុធាតុដើមនាំចូលមកពីប្រទេសអូស្ត្រាលី។ ចំណែករោងចក្រផលិតថង់ប្លាស្ទិក ហ័រ កាង ផេកខេកជីង តិចណូឡូជី មាន ៤អគារ មានកម្មករប្រមាណ ៥០០នាក់ ផលិតបាន ២០ តោនក្នុងមួយថ្ងៃ ហើយថង់ប្លាស្ទិកទាំងនេះ គឺនាំចេញទៅ
បណ្តាប្រទេសនៅអ៉ឺរ៉ុប។

ក្នុងឱកាសនោះ លោក គួច ចំរើន ក៏បានទៅពិនិត្យទំនប់ទឹកស្អាត និងអាងប្រព្រឹត្តកម្ម (ទឹកកខ្វក់) របស់តំបន់សេដ្ឋកិច្ចពិសេស ចេ ជាង ផងដែរ។
សូមបញ្ជាក់ថាអាងប្រព្រឹត្តកម្ម (ទឹកកខ្វក់) របស់តំបន់សេដ្ឋកិច្ចពិសេស ចេ ជាង គឺបានធ្វើឡើងស្របតាមស្តង់ដារបច្ចេកទេសត្រឹមត្រូវ និងមានសមត្ថភាពច្រោះទឹកកខ្វក់បានល្អមុននឹងធ្វើការបង្ហូរចេញ ដែលបង្ហាញពីការយកចិត្តទុកដាក់ខ្ពស់លើការថែរក្សាបរិស្ថាន និងផលប៉ះពាល់ផ្សេងៗ៕SRP

ខេត្តព្រះវិហារ៖ការិយាល័យកសិកម្មធនធានធម្មជាតិ និងបរិស្ថានស្រុករវៀង នៅព្រឹកថ្ងៃពុធថ្ងៃទី២១ ខែតុលាម្សិលមិញ បានចែកសម្ភារកសិកម្មមាន មាន់ បន្លែ ត្រី និងកូនត្រីអណ្តែង ជូនដល់កសិករបណ្តុំអាជីវកម្មទៅរកទីផ្សារ ក្រោមវត្តមាន លោកពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ លោកមុយ វុន អភិបាលរងស្រុករវៀង លោក ប៉ែន វាសនា នាយខណ្ឌរដ្ឋបាលជលផល និង ទីប្រឹក្សាកម្មវិធី ASPIRE មន្រ្តីបច្ចេកទេសថ្នាក់ខេត្ត ថ្នាក់ស្រុក និងកសិករបណ្តុំអាជីវកម្មរបស់កម្មវិធី ASPIRE។
យកតាមអ្នកឆ្លើយឆ្លងបណ្ដាញ សៀមរាបប៉ុស្តិ៍ ប្រចាំខេត្តព្រះវិហារបានឲ្យដឹងថា
1/ •បណ្តុំអាជីវកម្មត្រី ៣៧នាក់ ទទួលបានកូនត្រី ២២២គីឡូក្រាមស្មើ ៥៥៥០០កូន(ក្នុង១នាក់ទទួលបាន ៦គីឡូក្រាមស្មើ ១៥០០កូន) រួមនឹងចំណីត្រី ៤៨១គីឡូក្រាម(ក្នុង១នាក់ទទួលបាន ១៣គីឡូក្រាម) ។
2/ •បណ្តុំអាជីវកម្មមាន់ស្រែ ៨នាក់ មានសម្ភារដូចជា សំណាញ់អួន ៥០គ.ក, ស្បៃខៀវ ១៥គ.ក, សំណាញ់ដែកបំបែកកូនមាន់ ២៣ដុំ) ។
3/ •បណ្តុំអាជីវកម្មបន្លែ ២៧នាក់ មានសម្ភារដូចជា ធុងទឹក ១០០០លីត្រ ៧ធុង, ធុងទឹក ១៥០០០លីត្រ ៣ធុង, ទុយោជ័រសម្រាប់ស្រោច ១ដុំ, ធុងបាញ់ថ្នាំ ១គ្រឿង, ស្បៃខៀវ ២ដុំ, សំណាញ់ទ្រើង ១០៩ដុំ, ម៉ូទ័របូមទឹកគោក ១គ្រឿង, ម៉ូទ័របូមទឹកទំលាក់ ១គ្រឿង, សំណាញជ័រ ៤៣ដុំ, ទុយោ PVC(34) ៨ដើម។
សូមបញ្ជាក់ថាពិធីខាងលើធ្វើនៅការិយាល័យកសិកម្មធនធានធម្មជាតិ និងបរិស្ថានស្រុករវៀង ដោយមានអ្នកចូលរួមសរុប ៨៧នាក់ ស្រី ៤០នាក់ គាំទ្រថវិកាដោយ រាជរដ្ឋាភិបាលកម្ពុជា និងកម្មវិធីផ្សព្វផ្សាយបច្ចេកទេសកសិកម្មថ្មីដែលធន់ទៅនឹងការប្រែប្រួលអាកាសធាតុ៕SRP

ភ្នំពេញ៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមថ្លែងអំណរគុណយ៉ាងជ្រាលជ្រៅចំពោះ «គ្រឹះស្ថានមីក្រូហិរញ្ញវត្ថុ​ អាក់ទីវភីភល​ ភីអិលស៊ី» ដែលបានជួយឧបត្ថម្ភថវិកាចំនួន ១០.០០០.០០០រៀល (ដប់លានរៀល) ដល់កាកបាទក្រហមកម្ពុជា ដេីម្បីជួយដល់ប្រជាពលរដ្ឋរងគ្រោះបង្កដោយទឹកជំនន់រហ័ស ឆ្នាំ២០២០នេះ។

ក្នុងស្ថានភាពគ្រោះទឹកជំនន់រហ័សនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ញេីសារអំពាវនាវដល់បងប្អូនជនរួមជាតិ៖

១. សូមក្រុមគ្រួសារដែលមានកូនចៅតូចៗ កុំបណ្តែតបណ្តោយឱ្យលេងទឹក ពីព្រោះវាអាចបណ្តាលឱ្យបាត់បង់ជីវិត ដោយសារលង់ទឹកបាន ដូចនេះត្រូវការពារពួកគេឱ្យបានល្អ ជៀសវាងមានវិប្បដិសារីនៅពេលបាត់បង់សមាជិកគ្រួសារដោយសារការធ្វេសប្រហែសនេះ។
២. សូមគិតគូរ និងយកចិត្តទុកដាក់ថែទាំសុខភាពឱ្យបានល្អ និងរក្សាអនាម័យ ព្រោះសុខភាពជាកត្តាចម្បងសម្រាប់យើងគ្រប់គ្នា ដូច្នេះសូមគ្រប់ក្រុមគ្រួសារត្រូវបរិភោគទឹកដាំឆ្អិនល្អ ដើម្បីការពារកុំឱ្យកើតមានជំងឺរាគរូស ឬជំងឺដង្កាត់នានា ដែលធ្វើឱ្យខាតបង់ពេលវេលា និងថវិកាក្នុងការព្យាបាលជំងឺ។
៣. នៅពេលទឹកស្រក មុនពេលត្រឡប់ទៅរស់នៅលំនៅដ្ឋានវិញ សូមសម្អាតផ្ទះ ឬបរិស្ថានជុំវិញផ្ទះឱ្យបានស្អាត មានអនាម័យ និងត្រូវប្រុងប្រយ័ត្នពីសត្វអាសិរពិសដែលវាបានទៅរស់នៅតាមដំបូលផ្ទះឬកន្លែងផ្សេងៗក្នុងផ្ទះរបស់យើង ដែលពួកវាអាចបង្កគ្រោះថ្នាក់ដល់ជីវិត ហេីយសូមបន្តប្រកបរបរចិញ្ចឹមជីវិតដេីម្បីស្តារសេដ្ឋកិច្ចគ្រួសារឡេីងវិញ។
៤. សូមបន្តទប់ស្កាត់ជំងឺកូវីដ-១៩ ត្រូវពាក់ម៉ាស់ លាងដៃនឹងសាប៊ូ និងមានស្មារតីប្រុងប្រយ័ត្នជានិច្ច ដោយអនុវត្តតាមវិធានការនានារបស់ក្រសួងសុខាភិបាល និងទម្លាប់រស់នៅតាមបែបគន្លងថ្មី៕SRP

ខេត្តកំពង់ធំ៖ពលរដ្ឋ២០០គ្រួសារដែលរងគ្រោះដោយសារទឹកជំនន់ ស្រុកប្រាសាទបល្ល័ង្ក បានទទួលអំណោយ ពីលោកសុខ លូ អភិបាលខេត្តកំពង់ធំនិងលោក ឃឹងនុភាព តំណាងរាស្ត្រខេត្តកំពង់ធំ ដោយមានការចូលរួមពីអភិបាលរងខេត្ត អភិបាលស្រុក ក្រុមប្រឹក្សាខេត្ត និងមន្ទីរពាក់ព័ន្ធ នានាផងដែរ។

ដោយមានការយកចិត្តទុកដាក់និងអាណិតអាសូរបងប្អូនប្រជាពលរដ្ន ពីសំណាក់រាជរដ្នាភិបាលនិងថ្នាក់ដឹកនាំខេត្ត ទោះបីភូមិត្រពាំងព្រីងនៅដាច់ស្រយាលពិបាកក្នុងការធ្វើដំណើរឆ្លងកាត់ទឹកហូរផ្ដាច់ផ្លូវ ផ្តាច់ស្ពាន ថ្នល់ ក៏មិនអាចរារាំងសកម្មភាពមនុស្សធម៌ ដោយមានការដឹកនាំ ពីលោកសុខ លូ អភិបាលខេត្តកំពង់ធំ បានឡើយ ក្នុងសកម្មភាពនេះចាំបាច់តម្រូវអោយសកម្មភាពមនុស្សធម៌ប្រើប្រាស់គ្រប់មធ្យោបាយ លើកលីអំណោយដើរឆ្លងកាត់ទឹកហូរជាច្រើនកន្លែង ប្រើប្រាស់ គោយន្ត កាណូត និងកម្លាំងថ្មើរជើង រួមចិត្ត រួមកម្លាំងពីបងប្អូនប្រជាពលរដ្ឋទើបអាចយកអំណោយមនុស្សធម៌ជូនដល់ពលរដ្នដែលរងគ្រោះបានទៅដល់គោលដៅប្រកបដោយជោគជ័យ។
លោកសុខ លូ បានកោតសរសើរដល់កម្លាំងសមត្ថកិច្ចទាំង៣ប្រភេទនិងកម្លាំងសហប្រតិបត្តិការទាំងអស់ដែលបានសាមគ្គីគ្នាបានល្អក្នុងការជួយសង្រ្គោះនិងជួយដឹកជញ្ចូនអំណោយចែកជូនពលរដ្នរងគ្រោះដោយសារទឹកជំនន់បានដោយជោគជ័យ និងទាន់ពេលវេលា។
លោកក៏បានអំពាវនាវដល់បងប្អូនប្រជាពលរដ្ឋ ឲ្យថែរក្សាសុខភាពអនាម័យ ដេកក្នុងមុង ហូបស្អាតផឹកស្អាត និងការពារពីសុវត្ថិភាពពីពួកសត្វអាសេរពិស ជាពិសេសការពារអាយុជីវិតក្មេងៗនិងមនុស្សចាស់ ចៀសវាងមានគ្រោះថ្នាក់ដោយសារទឹកជំនន់។
លោកក៏បានពាំនាំនូវការផ្តាំផ្ញើរសួរសុខទុក្ខបងប្អូនប្រជាពរដ្ឋពីសំណាក់សម្ដេចជោហ៊ុនសែន ដែលបានគិតគូរចំពោះសុខទុក្ខ របស់បងប្អូនប្រជាពលរដ្ឋ ខណៈ ពេលដែលទទួលរងគ្រោះដោយសារទឹកជំនន់ រួមទាំងបានចាត់ក្រុមការងារថ្នាក់ខេត្ត ក្រសួង និងស្ថាប័នពាក់ព័ន្ធ រួមទាំងសាខាកាកបាទក្រហម ចុះជួយប្រជាពលរដ្ឋឲ្យបានទាន់ពេលវេលានៅតាមមូលដ្ឋាន ដោយមិនទុកឱ្យបងប្អូនប្រជាពរដ្ឋណារងគ្រោះអត់អាហារដោយមិនបានដឹងឮពីអាជ្ញាធរនោះឡើយ៕SRP

ខេត្តបាត់ដំបង​៖​​ពលរដ្ឋ​ជន​រង​គ្រោះ​ដោយ​ជំនន់​ទឹកភ្លៀង​ចំនួន​៥០០​គ្រួសារ​ មក​ពី​ឃុំ​ចំនួន​៤​ ក្នុងស្រុក​សង្កែ​ ខេត្តបាត់ដំបង នៅថ្ងៃទី២១ខែតុលាម្សិលមិញ​ បានទទួលអំណោយរបស់ សម្ដេច​ស​ ខេ​ង​​ រដ្ឋមន្ត្រី​ក្រសួងមហាផ្ទៃ​ ប្រធាន​ក្រុមការងារ​រាជរដ្ឋាភិបាល​ចុះ​ជួយ​ខេត្តបាត់ដំបង​ តាមរយ:លោក​ជំទាវ​ ញ៉ែ​ម​ សា​ខន​ ស​ ខេ​ង​ និង​លោក​ជំទាវ​ ម៉ៅ​ ម៉ា​ល័យ​ កែ​ គឹ​ម​យ៉ា​ន​ ភរិយា​ លោកនិងលោក​ ស​ សុខា​ រដ្ឋ​លេ​ធិ​ការ​ក្រសួង​អប់រំ​យុវជន​ និង​កីឡា​ និង​លោក​ជំទាវ​ កែ​ សួន​សុ​ភី​ ស​ សុខា​។

ក្នុងឱកាសចែកអំណោយ លោក​ជំទាវ​ ញ៉ែ​ម​ សា​ខន​ ស​ ខេ​ង​ បាន​អញ្ជើញ​មាន​ប្រសាសន៍​សួរសុខទុក្ខ​ និង​ផ្ដាំផ្ញើ​នូវ​សេចក្ដី​នឹក​រំលឹក​ដ៏​ជ្រាលជ្រៅ​ និង​ការ​យកចិត្តទុកដាក់​ខ្ពស់​បំផុត​ ពី​សម្ដេច​ក្រឡាហោម​ ស​ ខេ​ង​ ជូន​ចំពោះ​បងប្អូន​ជនរួមជាតិ​ទាំងអស់​ដែល​រង​គ្រោះ​ដោយ​ជំនន់​ទឹកភ្លៀង​ និយាយ​ជា​រួម​ និង​ដោយឡែក​ចំពោះ​បងប្អូន​ប្រជាពលរដ្ឋ​ក្នុង​ខេត្តបាត់ដំបង​ ដែល​ក៏​បាន​ និង​កំពុង​រង​គ្រោះ​ដោយ​ទឹកជំនន់​បង្ក​ឡើង​ដោយ​ការ​ធ្លាក់​ភ្លៀង​ជា​បន្តបន្ទាប់​នោះ​ផង​ដែរ​។​

​គ្រួសារ​ប្រជាពលរដ្ឋ​រង​គ្រោះ​ទាំង​៥០០​គ្រួសារ​ដោយ​ផ្ទាល់​ ដោយ​ក្នុង​១​គ្រួសារ​ ទទួល​បាន​អង្ករ​ ២០​គីឡូក្រាម​,​ ទឹក​សុទ្ធ​១​យួរ​,​ ត្រីខកំប៉ុង​ ១​យួរ​,​ ទឹកត្រី​ ១​យួរ​,​ ស៊ី​អ៊ី​វ​១​យួរ​,​ មី​១​កេស​ និង​ថវិកា​មួយ​ចំនួន​ទៀត​។​

​នា​ឱកាស​នោះ​ដែរ​ លោក​ជំទាវ​ ញ៉ែ​ម​ សា​ខន​ ស​ ខេ​ង​ និង​លោក​ជំទាវ​ ម៉ៅ​ ម៉ា​ល័យ​ កែ​ គឹ​ម​យ៉ា​ន​ អមដំណើរ​ដោយ​ឯកឧត្តម​ ស​ សុខា​ និង​លោក​ជំទាវ​ បាន​បន្ត​អញ្ជើញ​ថ្វាយបង្គំ​ និង​ពិតទូល​ការ​សួរសុខទុក្ខ​ព្រះសង្ឃ​ រួម​ទាំង​ព្រះ​សមណ​សិស្ស​ ដែល​កំពុង​គង់​រៀន​ព្រះធម៌​ ក្នុង​ទី​អារាម​វត្ត​ធ​ម្មិ​កា​រាម​ ហៅ​វត្ត​ដំណាក់​ហ្លួង​ ទាំង​ស្ថានភាព​ជំនន់​ទឹកភ្លៀង​ សរុប​១០២​អង្គ​ និង​បាន​ប្រគេន​នូវ​អង្ករ​២​តោន​,​ មី​៥០​កេស​,​ ភេសជ្ជៈ​៥០​កេស​,​ ត្រីខកំប៉ុង​៥០​កេស​,​ ទឹក​សុទ្ធ​៥០​កេស​,​ ភួយ​ចំនួន​១០០,​ និង​បច្ច័យ​មួយ​ផងដែរ៕SRP