ខេត្តសៀមរាប៖អភិបាលខេត្តសៀមរាបបានអះអាងថា៖ស្ថានភាពកូវីដ-១៩ ក្នុងខេត្តសៀមរាបយើងកាន់តែធ្ងន់ធ្ងរក្នុងរយៈពេលប៉ុន្មានថ្ងៃចុងក្រោយនេះ។ ការអះអាងធ្វើឡើងនៅព្រឹកថ្ងៃទី១០ ខែកញ្ញានេះ តាមរយៈផេកហ្វេសប៊ុកផ្លូវការរបស់លោក។

លោក ទៀ សីហា អភិបាលខេត្តសៀមរាប បានបញ្ជាក់ថា អាជ្ញាធរខេត្តពិតជាមិនចង់ដាក់ចេញនូវវិធានការដើម្បីទប់ស្កាត់ការរីករាលដាលនោះទេ តែដោយហេតុថាបងប្អូនប្រជាពលរដ្ឋ អាជីវករ មួយចំនួននៅតែមិនអនុវត្តវិធានរបស់សុខាភិបាល អោយបានខ្ជាប់ខ្ជួន ទើបរដ្ឋបាលខេត្ត បានសម្រេចដាក់ចេញ៖ បម្រាមគោចរ, កំណត់តំបន់លឿងទុំ និងអនុវត្តការផាកពិន័យ ទៅលើបងប្អូនប្រជាពលរដ្ឋ នៅតាមទីសាធារណៈ។

លោកទៀ សីហា បន្តថក្នុងកាលៈទេសៈដ៏លំបាកនេះ ខ្ញុំសង្ឃឹមថា បងប្អូនប្រជាពលរដ្ឋ អាជីវករគ្រប់ប្រភេទនឹងយោគយល់ រួមគ្នាអនុវត្តវិធានសុខាភិបាល អោយបានគ្រប់ៗគ្នា យើងនឹងការពារបាន និងអាចកាត់បន្ថយនៃការចម្លងក៏កាន់តែមានប្រសិទ្ធភាព។

សូមជម្រាបថាអាជ្ញាធរខេត្តសៀមរាប បានសម្រេចដាក់ចេញនូវវិធានការរដ្ឋបាលបណ្ដោះអាសន្នសម្រាប់បម្រាមគោចរ រយៈពេល១៤ថ្ងៃទៀត នៅភូមិសាស្ត្រខេត្តសៀមរាប ដើម្បីទប់ស្កាត់ទំងឺកូវីដ១៩។ សេចក្ដីសម្រេចវិធានការបម្រាមគោចរ នេះធ្វើឡើងនៅថ្ងៃទី០៨ ខែកញ្ញា ឆ្នាំ២០២១ ចុះហត្ថលេខាដោយលោកទៀ សីហា អភិបាលខេត្តសៀមរាប៕SRP

ខេត្តត្បូងឃ្មុំ៖ក្រុមហ៊ុន រ៉ុករករ៉ែ រ៉ឺនេសង់ មីនើរ៉ល លីមីធីត ជាក្រុមហ៊ុនរ៉ុករករ៉ែ ខ្នាតធំអន្តរជាតិរបស់ប្រទេស អូស្ត្រាលី ដែលបានរុករ៉ែជាច្រើនប្រទេសមកហើយ ក្នុងនោះមាននៅកម្ពុជា ថៃ ម៉ាឡេស៊ី ជាដើម។ ដោយឡែកនៅកម្ពុជាក្រុមហ៊ុនមានអាជ្ញាប័ណ្ណចំនួន០៧ ក្នុងនោះ០១ជាអាជ្ញាប័ណ្ណអាជីវកម្ម និង០៦ទៀតជាអាជ្ញាប័ណ្ណស្វែងរ៉ុករក បូករួមទាំងខេត្តត្បូងឃ្មុំនេះផងដែរ។ ចំពោះក្រុមហ៊ុនរ៉ុករករ៉ែនេះ បានចាប់ដៃជាមួយរាជរដ្ឋាភិបាល ដោយផ្តល់ផលប្រយោជន៍ ទាំងសងខាង សំខាន់បំផុតផ្តល់ការងារដល់ប្រជាជន ក្នុងសហគមន៍ និងបណ្តុះបណ្តាល។

លោកជាម ច័ន្ទសោភ័ណ អភិបាលខេត្តត្បូងឃ្មុំ នៅព្រឹកមិញនេះ បានទទួលជួបពិភាក្សាការងារជាមួយតំណាងក្រុមហ៊ុនរ៉ុករករ៉ែ រ៉ឺនេសង់ មីនើរ៉ល លីមីធីត បន្ទាប់ពីក្រុមហ៊ុននេះទទួលបានសិទ្ធិរុករករ៉ែមាស ពីក្រសួងរ៉ែ និងថាមពល នៅតំបន់សំពៅលូន ក្នុងឃុំជាំតាម៉ៅ ស្រុកមេមត់ ខេត្តត្បូងឃ្មុំ ។

លោកជាម ច័ន្ទសោភ័ណ បានស្នើដល់ក្រុមហ៊ុនត្រូវរក្សាចំណុចណាមួយ សម្រាប់ប្រជាពលរដ្ឋ ដែលកំពុងរស់នៅនិងអាស្រ័យផលក្នុងតំបន់នោះ ដោយធ្វើយ៉ាងណាកុំឲ្យមានការថ្នាំងថ្នាក់ធ្ងន់ធ្ងរចំពោះប្រជាពលរដ្ឋ។

លោកជាម ច័ន្ទសោភ័ណ បានលើកឡើងថា៖ សព្វថ្ងៃមានប្រជាពលរដ្ឋមួយចំនួន បានកំពុងអាស្រ័យផលក្នុងតំបន់នោះ ដោយពួកគាត់ធ្វើសកម្មភាពរ៉ែងជាលក្ខណៈគ្រួសារ ដើម្បីរកប្រាក់ចំណូលទ្រទ្រង់ជីវភាពគ្រួសារ ក្នុងបរិបទនៃការរីករាលដាលជំងឺកូវីដ-១៩នេះ។ ដូច្នេះសូមខាងក្រុមហ៊ុនដែលទទួលបានអាជ្ញាប័ណ្ណពីក្រសួងមេត្តាយោគយល់ និងដោះស្រាយផលប៉ះពាល់ជូនប្រជាពលរដ្ឋ ឲ្យបានសមរម្យ ។ ក្នុងនោះខាងក្រុមហ៊ុនបើអាចសុំផ្តល់ការងារជូនប្រជាពលរដ្ឋក្នុងតំបន់នោះ ដើម្បីឲ្យពួកគាត់មានការងារធ្វើចៀសវាងការធ្វើចំណាកស្រុក ទៅរកការងារធ្វើឆ្ងាយឬចេញទៅក្រៅប្រទេសជាដើម។

ពាក់ព័ន្ធករណីនេះ តំណាងក្រុមហ៊ុន រ៉ុករករ៉ែ រ៉ឺនេសង់ មីនើរ៉ល លីមីធីត បានសំណូមពរដល់អាជ្ញាធរខេត្ត ស្រុក មេត្តាផ្តល់កិច្ចសហការ ដើម្បីធ្វើយ៉ាងណា ឲ្យដំណើរការរ៉ុករករ៉ែធ្វើទៅបានរលូន ព្រោះគឺជាផលប្រយោជន៍ទាំងអស់គ្នា ទាំងខាងក្រុមហ៊ុន និងរាជរដ្ឋាភិបាលកម្ពុជា៕SRP

ខេត្តសៀមរាប៖លោក ហ៊ុន គឹមជាតិ ក្មួយប្រុសរបស់សម្តេច ហ៊ុន សែន នាយករដ្ឋមន្ត្រី នៅថ្ងៃព្រហស្បត្តិ៍ ទី០៩ ខែកញ្ញា ឆ្នាំ២០២១នេះ បាននាំយកអំណោយផ្ដល់ជូនកងរាជអាវុធហត្ថខេត្តសៀមរាប និងមជ្ឈមណ្ឌលស្តានីតិសម្បទា បន្សាបគ្រឿងញៀន។

អំណោយដែល លោកហ៊ុន គឹមជាតិ ផ្ដល់ជូនសម្រាប់មជ្ឈមណ្ឌលស្តានីតិសម្បទា និង បន្សាបគ្រឿងញៀនខេត្តសៀមរាប រួមមាន៖ អង្ករ១តោន ម៉ាស២កេសធំ និង អាកុល ៦០លីត្រ។ ចំណែកបញ្ជាការដ្ឋានកងរាជអាវុធហត្ថខេត្តសៀមរាប ទទួលបានម៉ាស២កេសធំ អាកុល៦០លីត្រ ដើម្បីប្រើប្រាស់ក្នុងការទប់ស្កាត់ការរីករាលដាល ដោយសារជំងឺកូវីដ១៩។

ក្នុងឱកាសនោះដែរ លោក ហ៊ុន គឹមជាតិ ក៏បានពាំនាំនូវការសាកសួរសុខទុក្ខពីសំណាក់សម្តេច ហ៊ុន សែន ដល់កម្លាំងប្រដាប់អាវុធទាំងពីរប្រភេទផងដែរ៕SRP

ខេត្តកំពង់ចាម៖លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាប្រធានក្រុមការងា រាជរដ្ឋាភិបាល ចុះមូលដ្ឋានស្រុកកោះសូទិន
បាន​ថ្លែង​ថា​ រយៈពេលកន្លងមក ការលះបង់ របស់ក្រុមគ្រូពេទ្យ លើការព្យាបាលអ្នកជំងឺទូទៅ និងការចាក់វ៉ាក់សាំង ពិតជាដើរតួនាទីយ៉ាងសំខាន់ ដើម្បីការពារសុខុមាភាព សាធារណះ ជូនដល់ បងប្អូនប្រជាពលរដ្ឋ និងបាន ជួយសង្គ្រោះ អាយុជីវិតមនុស្ស បានយ៉ាងច្រើន។

លោករដ្ឋមន្ត្រី​ ក៏បានធ្វើការកោតសរសើរ និងលើកទឹកចិត្ត ដល់ក្រុមគ្រូពេទ្យ ដែលកំពុងបម្រើការ នៅតាមមន្ទីរពេទ្យបង្អែក និងនៅតាមមណ្ឌលសុខភាព ត្រូវបង្កើន ការយកចិត្តទុកដាក់ លើកកម្ពស់ ការពិនិត្យ និងព្យាលបាលជំងឺ ជូនដល់ប្រជាពលរដ្ឋ ប្រកបដោយក្រមសីលធម៌ វិជ្ជាជីវៈ ហើយរថយន្ត ដែលទើបទទួលបាន ថ្មីនេះ ត្រូវជួយថែរក្សា​ឲ្យ​បានល្អ ដើម្បីធានាដល់ការប្រើប្រាស់បានយូរអង្វែង។

លោក ខៀវ កាញារីទ្ធ​ ថ្លែងកោតសរសើរបែបនេះក្នុងឱកាសប្រគល់រថយនុ្ត​សង្គ្រោះ​បន្ទាន់​ ១គ្រឿង សម្ភារ​បរិក្ខាពេទ្យ និងថវិការ ៨លានរៀន ជូនដល់មន្ទីរពេទ្យបង្អែកស្រុកកោះសូទិន​ ខេត្តកំពង់ចាម​ នៅព្រឹកមិញនេះ។

គួរ​បញ្ជាក់​ថា អំណោយដែល​លោក ខៀវ កាញារីទ្ធ បានផ្តល់ជូនដល់មន្ទីរពេទ្យបង្អែកស្រុកកោះសូទិន រួមមាន៖ រថយន្តសង្គ្រោះបន្ទាន់ ចំនួន ១ គ្រឿង , ថវិកា ចំនួន ៨លានរៀល , សំលៀកបំពាក់ពេទ្យ ការពារកូវីដ-១៩ ចំនួន ៦០០សម្រាប់ , ម៉ាស ២០០០០ , ថ្នាំវីតាមីន ២០កំប៉ុង , សេរ៉ូម​ ចំនួន ១០០កំប្លោក , សៀវភៅសរសេរ ៩០ក្បាល ប្រែងម៉ាសូត ៥០០លីត្រ​ បុគ្គលិកពេទ្យ ចំនួន ៣២នាក់ ក្នុងម្នាក់ៗ ទទួលបាន ៥ម៉ឺនរៀល​ និងថវិកា ចំនួន ១,២១៥,០០០ រៀល សម្រាប់ទិញគ្រឿងឧបភោគ បរិភោគ ជូនដល់ប្រជាពលរដ្ឋ ដែលជាប់ធ្វើចត្តាឡីស័ក នៅឃុំល្វេ ១គ្រួសារ និង ឃុំព្រែកតានង់ ចំនួន៨គ្រួសារផងដែរ៕SRP

ខេត្តឧត្តរមានជ័យ៖អគារប៉ុស្តិ៍នគរបាលថ្មី១ខ្នងមានទំហំ៥ម៉ែត្រគុណ៦ម៉ែត្រ ធ្វើពីថ្មប្រក់គ្បឿង សម្រាប់ប្រចាំការ២៤ម៉ោង លើ២៤ម៉ោង នៅជិតរង្វង់មូលព្រះបាទជ័យវរន្ម័ទី៧ នឹងជាសមិទ្ធិផលផ្សេងៗទៀត ដែលអង្គភាពបានស្ថាបនាកសាងឡើងទាំងស្រុងក្នុងរយៈពេលតែ១ឆ្នាំ ស្ថិតក្នុងក្រុងសំរោង ត្រូវបានសម្ពោធដាក់ឲ្យដំណើរប្រើប្រាស់ជាផ្លូវការ។

ពិធីសម្ពោធនៅថ្ងៃទី៩ ខែកញ្ញា ឆ្នាំ២០២១នេះក្រោមវត្តមាន លោកប៉ែន កុសល្យ អភិបាលខេត្តឧត្តរមានជ័យ។

លោកហួត សុធី ស្នងការនគរបាលខេត្តឧត្តរមានជ័យ បានឲ្យដឹងថា៖ បន្ទាប់ពីរូបលោកបានទទួលមុខតំណែងជាស្នងការនគរបាលខេត្តឧត្តរមានជ័យ បានរយៈពេល១ឆ្នាំកន្លងមកលោកបានខិតខំអនុវត្តន៍តាមបទបញ្ជារដ៏ខ្ពង់ខ្ពស់របស់ឯកឧត្តមនាយឧត្តមសេនីយន៍សន្តិបណ្ឌិត នេត សាវឿន អគ្គស្នងការនគរបាលជាតិនឹងឯកឧត្តមអភិបាលខេត្ត ក្នុងការអភិវឌ្ឃន៍កសាងអង្គភាពរបស់ខ្លួន ចាប់ពីថ្នាក់ខេត្តរហូតដល់ថ្នាក់មូលដ្ឋាន ឲ្យមានភាពល្អប្រសើរបានលើគ្រប់វិស័យ ដើម្បីបម្រើប្រយោជន៍ ការងារសន្តិសុខ ភូមិ ឃុំមានសុវត្ថិភាព ជូនពលរដ្ឋ ឲ្យបានទាន់ពេលវេលា នឹងមានសុវត្ថិភាពសន្តិសុខសង្គមល្អ។

លោកបានបន្តថា ក្នុងនោះដែរអង្គភាពបានធ្វើការកសាងហេដ្ឋារចនាសម្ព័ន្ធនានាទាំងអស់របស់អង្គភាពឲ្យមានមុខមាត់ថ្មី ក្នុងទឹកដីខេត្តឧត្តរមានជ័យ ដើម្បីជាទុកជាប្រយោជន៍រួមដល់អ្នកដឹកនាំជំនាន់ក្រោយៗទៀត បានថែរក្សាបន្តរួមមានកសាងប៉ុស្តិ៍នគរបាលធ្វើអំពីថ្មបានចំនួន៥ប៉ុស្តិ៍ ក្លោងទ្វារអធិការបានចំនួន៣កន្លែងនឹងកែសម្រួលប៉ុស្តិ៍តូចៗបានចំនួន១៤ប៉ុស្តិ៍បន្ថែមទៀត ដែលជាអំណោយដ៍ថ្លៃថ្លារបស់ឯកឧត្តមនាយឧត្តមសេនីយន៍សន្តិបណ្ឌិតនេតសាវឿន បានចំណាយថវិកា រួមសរុបពីសប្បុរសជន អស់ចំនួន២១០៩០៩ដុល្លារ។

នៅចំពោះមុខកងកម្លាំងនគរបាល ក្នុងពិធីសម្ពោធនេះ លោកប៉ែន កុសល្យ បានធ្វើការកោតសរសើរយ៉ាងខ្លាំង ចំពោះលោកស្នងការថ្មីដែលមកកាន់តំណែងត្រឹមតែរយៈខ្លី១ឆ្នាំប៉ុណ្តោះបានកសាងអភិវឌ្ឃន៍អង្គភាពរបស់ខ្លួនបាននូវសមិទ្ធិផលយ៉ាងច្រើនក្នុងមូលដ្ឋានដែលខ្លួនដឹកនាំ។

អភិបាលខេត្តបន្តថា សមិទ្ធិផល ទាំងអស់នេះហើយគឺផ្តើមចេញឡើងពីទឹកចិត្តសប្បុរស ក្នុងការរួមចំណែកយ៉ាងសំខាន់ ពីបុគ្គលម្នាក់ៗ ដែលមានឆន្ទះមុះមុត ទើបមានការអភិវឌ្ឃន៍នេះលេចធ្លោឡើងយ៉ាងច្រើនដូច្នេះដើម្បីសុខសុវត្ថិភាពជូនដល់ប្រជាពលរដ្ឋ រស់នៅក្នុងខេត្តដោយមានភាពកក់ក្តៅផងដែរ៕SRP

ខេត្តសៀមរាប៖លោកស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាបនិងក្រុមការងារ នៅព្រឹកថ្ងៃទី០៩ខែកញ្ញា ឆ្នាំ ២០២១នេះ បានទទួលទ័យទាន ជាគ្រឿងឧបភោគបរិភោគ និងសម្ភារប្រើប្រាស់ផ្សេងៗពីព្រះគ្រូចៅអធិការវត្តប្រាសាទគោកចក។

ព្រះគ្រូវិចិត្រវង្សា ហែម គឹម សាន ព្រះចៅអធិការវត្តប្រាសាទគោកចក បានមានសង្ឃដីកាថាព្រះអង្គ មានការគាំទ្រ និងមានទឹកព្រះទ័យរីករាយ ចូលរួមចំណែកជាមួយសកម្មភាពមនុស្សធម៌ របស់កាកបាទក្រហមកម្ពុជា ក្នុងការជួយសង្គ្រោះក៏ដូចជាជួយ សម្រាលទុក្ខលំបាក របស់ញោមញាតិទីទ័លក្រនៅគ្រប់ទីកន្លែង។

ព្រះគ្រូចៅអធិការ មានសង្ឃដីកាបញ្ជាក់បន្ថែមថា គ្រឿងឧបភោគបរិភោគ ដែលប្រគល់ជូនដល់ សាខាកាកបាទក្រហមខេត្ត នាពេលនេះ គឺបានមកពីការប្រគេនរបស់ពុទ្ឋបរិស័ទក្នុងពិធីបុណ្យផ្សេងៗ នាពេលកន្លងមក ហើយក៏បានសន្សំ និងប្រមូលបម្រុងទុកសម្រាប់ ចែកជូនគ្រួសារ ឬអាជ្ញាធរមូលដ្ឋានណាដែលជួបហានិភ័យដោយប្រការផ្សេងៗ។

លោក ស៊ុ សំអន បានថ្លែងអំណរព្រះគុណ ចំពោះព្រះទ័យដ៏សប្បុរសធម៌ របស់ព្រះគ្រូវិចិត្រវង្សា ហែម គឹម សាន ក្នុងការយកព្រះទ័យទុកដាក់ ប្រទាន នូវទេយ្យទាន គ្រឿង ឧបភោគបរិភោគ នេះសបញ្ជាក់ ពីព្រះទ័យ ដ៏មនុស្សធម៌ ចំពោះបងប្អូនប្រជាពលរដ្ឋ រងគ្រោះ និងងាយរងគ្រោះ។

ទេយ្យទាន ដែលសាខាកាកបាទក្រហមខេត្តទទួលពីព្រះគ្រូចៅអធិការវត្ត ប្រាសាទគោកចក មានដូចជា៖ គ្រឿងបន្លុងចំនួន៣៦ឈុត .អង្ករចំនួន១០០គីឡូក្រាម និងមីចំនួន៥កេសតូចផងដែរ៕SRP

ខេត្តសៀមរាប៖រដ្ឋបាលព្រៃឈើ រួមទាំងស្ថាប័នពាក់ព័ន្ធ បានចុះពិនិត្យដើម្បីដកហូតនិងកាត់ក្រីដើមឈើបង្កហានិភ័យលើដងផ្លូវ៣៨ខ្សែរួមទាំងផ្លូវអមមាត់ស្ទឹង។

ការចុះពិនិត្យដើម្បីអនុវត្តផែនការនេះគឺ ក្រោយពីដើមឈើដ៏ធំ១ដើមដួលរលំសង្កត់រថយន្តសេរីទំនើប ១គ្រឿងបង្កការខូចខាតយ៉ាងដំណំ។

លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានអោយដឹងថា ឆ្លងកាត់ការពិនិត្យលក្ខណបច្ចេកទេសពេញមួយថ្ងៃ ឃើញមានដើមឈើចំនួន ៣២ដើមដែលកំពុងបង្កហានិភ័យ។ ក្នុងនោះមានដើមគគី.ដើមឈើទាល និងដើមចាន់គីរី។ ដើមឈើទាំង នោះគឺបានដាំតាំងពីសម័យអាណានិគមនិយមបារាំងក្នុងចន្លោះឆ្នាំ១៨៦៣ដល់ឆ្នាំ១៩៥៣ ដែលមកទល់ពេលនេះមានអាយុកាល ១២០ ទៅ១៦០ឆ្នាំ។

លោកម៉ុង ប៊ុនលីម បន្តថា ដោយសាអាយុកាលច្រើន និងមានកត្តាអាកាសធាតុ.ខ្យល់កន្ត្រាក់ ហើយដើមឈើមួយចំនួនមានជំងឺពុកផុយ និងមួយចំនួនទៀតរងផលប៉ះពាល់ដល់ការកសាងហេដ្ឋារចនាសម្ពន្ធ័ផ្លូវថ្នល់ផង ដើមមួយចំនួនចាំបាច់ត្រូតកាត់មែកចេញដើម្បីជួយបន្ថយទំម្ងន់ដើម ឯមួយចំនួនដែលងាប់ស្រាប់ត្រូវដកហូតចេញ។

ជុំវិញករណីនេះ លោកលី សំរិទ្ធ អភិបាលរងនិងជាអ្នកនាំពាក្យសាលាខេត្តសៀមរាប បានពន្យល់ថា៖ ជាការពិតហើយដែលអាជ្ញាធរសម្រេចកាត់ក្រីមែកឈើបង្កហានិភ័យ នៅក្នុងក្រុងសៀមរាប។ ធ្វើនេះគឺដើម្បីបញ្ចៀសការគ្រោះថ្នាក់ផ្សេងៗ។

លោកលី សំរិទ្ធ បន្តថាថ្មីៗនេះមានដើឈើដួលរលំសង្កត់ឡានរបស់ពលរដ្ឋបង្កការខូចខាតយ៉ាងខ្លាំង។ អីចឹងទេក្នុងនាមអាជ្ញាធរ សុំអំពាវនាយដល់ពលរដ្ឋ គ្រប់រូបមេត្តាប្រុងប្រយ័ត្នអោយបានខ្ពស់ទាំងការធ្វើដំណើរទាំងការឈប់ចតរថយន្តជាដើម។

សូមបញ្ជាក់ថា កាលពីព្រឹកថ្ងៃទី ៦ ខែ កញ្ញាឆ្នាំ ២០២១ ស្ថិតនៅមាត់ស្ទឹងសៀមរាប ជាប់នឹងកែងកាហ្វេប្រោន ក្នុងសង្កាត់សាលាកំរើក មានដើមឈើដ៏ធំ១ដើមបានដួលរលំសង្កត់រថយន្តសេរីទំនើប១គ្រឿង ម៉ាកឆែរ៉ូលែក ពណ៌សពាក់ស្លាកលេខ ភ្នំពេញ ២AÓ ៣២៥៨ ដែលមានម្ចាស់ឈ្មោះលឹម ឃាង ភេទប្រុសអាយុ៧១ឆ្នាំ បណ្តាលរងការខូចខាតយ៉ាងខ្លាំង ប៉ុន្តែមិនបង្កគ្រោះថ្នាក់ដល់មនុស្ស។ ក្រោយមានគ្រោះថ្នាក់នេះ រដ្ឋបាលព្រៃឈើ ចុះពិនិត្យដកហូតនិងកាត់ក្រីមែកឈើដែលបង្កហានិភ័យតាមដងផ្លូវនៃក្រុងសៀមរាប នៅពីថ្ងៃទី៧ ខែកញ្ញាឆ្នាំ២០២១នេះ៕SRP

ភ្នំពេញ៖មន្ត្រីអន្តរាគមន៍មួយរូបត្រូវបានឃាត់ខ្លួន បន្ទាប់ពីបង្កទៅលើស្ត្រីម្នាក់បណ្ដាលឱ្យរងរបួសកាលពីយប់មិញ។

ស្នងការនគរបាលរាជធានីភ្នំពេញបានចេញសេចក្ដីប្រកាសនៅព្រឹកថ្ងៃទី០៩ ខែកញ្ញានេះ ថា ដោយអនុវត្តតាមបទបញ្ជារបស់លោក នេត​ សាវឿន​ អគ្គស្នងការនគរបាលជាតិ​ និងលោក ស​ ថេត​ អគ្គស្នងការរង​ និងជាស្នងការនគរបាលរាជធានីភ្នំពេញ​ បានអនុវត្តដូចខាងក្រោម៖

១.​ មន្ត្រីអន្តរាគមន៍ដែលបានបង្កការរងរបួសដល់ស្ត្រីម្នាក់បណ្តាលឱ្យបែកក្បាលត្រូវបានឃាត់ខ្លួននៅអធិការដ្ឋាននគរបាលខណ្ឌ៧មករា​ បន្ទាប់ពីពេលកេីតហេតុ​រួច​។

២.​ បេីស្រាវជ្រាវហេីយឃេីញថាមានកំហុស​ មន្ត្រីបង្កនឹងត្រូវអនុវត្តបន្តតាមនីតិវិធីច្បាប់​ ក៏ដូចជាការអនុវត្តវិន័យកងកម្លាំង​ផងដែរ​។

៣.​ ចំពោះអ្នកបេីកបរល្មេីសច្បាប់​ បេីកបរគេចពីសមត្ថកិច្ចក៏នឹងត្រូវអនុវត្តតាមច្បាប់ផងដែរ​។

សេចក្តីបកស្រាយបំភ្លឺរបស់ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ​ នេះធ្វើឡើងបន្ទាប់ពីមានករណីដែលបានកេីតឡេីងនៅយប់ថ្ងៃទី០៨ ខែកញ្ញា​ ឆ្នាំ២០២១​ នៅខណ្ឌ៧មករា​ ក្នុងពេលសមត្ថកិច្ចបានចុះអនុវត្តរឹតបន្តឹងច្បាប់ចរាចរណ៍។ ទោះជាយ៉ាងណាសមត្ថកិច្ចមិនបានបង្ហាញអត្តសញ្ញាណមន្ត្រីនេះអន្តរាគមន៍បង្កនិងស្ត្រីដែលរងរបួសបែកក្បាលនោះនៅឡើយទេ៕SRP

ខេត្តកំពង់ឆ្នាំង៖ក្នុងពិធីសំណេះសំណាល និងប្រគល់បណ្ណសរសើរមេត្រីបរិស្ថានដល់មន្ត្រីឧទ្យានុរក្សឆ្នើមនៅមន្ទីរបរិស្ថានខេត្តកំពង់ឆ្នាំង នាថ្ងៃទី៨ ខែកញ្ញា ព្រឹកមិញនេះ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានថ្លែងថា៖ មន្ត្រីឧទ្យានុរក្ស បានដើរតួនាទីដ៏សំខាន់ ក្នុងការពារនិងអភិរក្ស ធនធានធម្មជាតិ។ ដូច្នេះ ហើយក្រសួង បរិស្ថានសូមអរគុណចំពោះមន្ត្រី ឧទ្យានុរក្ស ទាំងអស់ ដែលបានលះបង់កម្លាំងកាយ កម្លាំងចិត្តក្នុង ការបំពេញការងារប្រកបដោយមោទកភាពនេះ។

លោកបានថ្លែងថា មន្ត្រីឧទ្យានុរក្សមិនមែនត្រឹមតែបំពេញការងារតាមតួនាទីភារកិច្ចតាមឯកសណ្ឋាននោះទេ តែបានបំពេញតួនាទីជាឪពុកម្តាយ ជីដូនជីតាការពារធនធានធម្មជាតិ សម្រាប់កូនចៅរាប់ជំនាន់តទៅមុខទៀត។

សូមជម្រាបថា លោកបានប្រគល់ប័ណ្ណសរសើរមេត្រីបរិស្ថាន ដល់មន្ត្រីឧទ្យានុរក្សឆ្នើមចំនួន ៥ រូប ដែលនេះជាការទទួលស្គាល់ពីការបំពេញការងារ ប្រកបដោយ ការទទួលខុសត្រូវនិង វិជ្ជាជីវៈដើម្បីបុព្វហេតុបរិស្ថាននិងធនធានធម្មជាតិ។ លោកក៏បានប្រគល់នូវសម្ភារមួយចំនួន របស់ក្រសួងបរិស្ថាន សម្រាប់បម្រើឱ្យការងារ ចុះល្បាតក្នុងការការពារនិងអភិរក្ស ធនធានធម្មជាតិផងដែរ៕SRP

ខេត្តសៀមរាប៖អាជ្ញាធរបានណែនាំឲ្យសេវាកម្មទេសចរណ៍ ទាំងអស់ ក្នុងខេត្តសៀមរាប ត្រូវអនុវត្តតាមគន្លងថ្មី សម្រាប់ដំណើរការអាជីវកម្មរបស់ខ្លួន។

ការណែនាំធ្វើឡើង នាព្រឹកមិញនេះ នៅរដ្ឋបាលខេត្តសៀមរាប ក្នុងកិច្ចប្រជុំផ្សព្វផ្សាយអំពីបទដ្ឋានគតិយុត្តបច្ចុប្បន្នភាព វិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា សម្រាប់សេវាកម្ម ស្នាក់នៅទេសចរណ៍ ភោជនីយដ្ឋាន-អាហារដ្ឋានទេសចរណ៍ សហគមន៍-អេកូទេសចរណ៍ និងរមណីយដ្ឋានទេសចរណ៍ ក្រោមវត្តមានលោក ពៅ ពិសិដ្ឋ អភិបាលរង ខេត្តសៀមរាប តាមរយៈប្រព័ន្ធរូបភាពនិងសំឡេង Zoom។

កិច្ចប្រជុំនេះបានសម្រេចឲ្យ ១ អាជីវកម្ម សេវាកម្មទេសចរណ៍ និងសហគមន៍ទេសចរណ៍ ដែលកំពុងបើកដំណើរការទាំងអស់ត្រូវប្រត្តិបត្តិការអាជីវកម្មរបស់ខ្លួនឱ្យស្របតាមប្រកាស និងសេចក្តីណែនាំស្តីពីវិធានសុវត្ថិភាពទេសចរណ៍ និងស្តង់ដារអប្បរមា ដែលបានដាក់ចេញដោយក្រសួងទេសចរណ៍។

២ ក្រុមការងារត្រូវចុះផ្សព្វផ្សាយដោយផ្ទាល់ដល់ប្រតិបត្តិករទេសរណ៍ទាំងអស់ក្នុងខេត្តឱ្យយល់ដឹង និងអនុវត្តនូវប្រកាស និងសេចក្តីណែនាំរបស់ក្រសួងទេសចរណ៍ ស្របតាម “គន្លងប្រក្រតីភាពថ្មី”។

៣ សម្រាប់រមណីយដ្ឋាន និងសហគមន៍ទេសចរណ៍ត្រូវកំណត់ឱ្យបាននូវសមត្ថភាពផ្ទុកអតិបរមា ដែលអាចទទួលភ្ញៀវក្នុងពេលតែមួយ ដោយអនុលោមតាមស្តង់ដាគម្លាតសុវត្ថិភាព និងត្រូវធ្វើការចុះឈ្មោះភ្ញៀវចូលទស្សនាជាប្រចាំ ជាពិសេសអនុវត្តឱ្យបាននូវការស្កែន QR Code ទប់ស្កាត់កូវីដ-១៩ ។

៤ គ្រប់អាជីវកម្មសេវាកម្មទេសចរណ៍ទាំងអស់ដែលបើកដំណើរការនឹងទទួលបាននូវឡាប៊ែលបញ្ជាក់ពីសុវត្ថិភាពបន្ទាប់ការចុះវាយតម្លៃរបស់ក្រុមការងារអំពីការអនុវត្តនូវប្រកាស និងសេចក្តីណែនាំរបស់ក្រសួងទេសចរណ៍ ស្របតាម “គន្លងប្រក្រតីភាពថ្មី”៕SRP

ខេត្តកំពង់ចាម​៖លោក អ៊ុន ចាន់ដា អភិបាលខេត្តកំពង់ចាម នៅព្រឹកមិញនេះបាន​អញ្ជើញ​ចុះពិនិត្យផ្លូវតាមភូមិមួយចំនួន ក្នុងសង្កាត់បឹងកុក ក្រុងកំពង់ចាម ដើម្បី​លេីក​គម្រោង​ធ្វើការអភិវឌ្ឍ ជាពិសេស គឺផ្ដោតទៅលើស្ថានភាពផ្លូវ និងប្រព័ន្ធបង្ហូរទឹក។

មន្ត្រីរដ្ឋបាលខេត្តកំពង់ចាម ឲ្យដឹងថា
ផ្លូវមួយចំនួន ក្នុងសង្កាត់បឹងកុក បច្ចុប្បន្ន កំពុងធ្វើការស្ថាបនា ជាផ្លូវក្រាលបេតុង ដែលមានប្រវែង ប្រមាណជាង ១.៥០០ម៉ែត្រ និងប្រព័ន្ធលូបង្ហូរទឹក ផងដែរ។ ក្នុងនោះផ្លូវក្រាលបេតុង ១ខ្សែ ប្រវែងជាង ១.៣០០ម៉ែត្រ ទទឹង ៦ម៉ែត្រ និង ១ខ្សែ ទៀត ប្រវែងជាង ២០០ម៉ែត្រ ទទឹង ៥ម៉ែត្រ និងត្រូវស្ថាបនាលូរំដោះទឹក ប្រវែងជាង ១.០០០ម៉ែត្រ និងលូ ដែលត្រូវជួសជុល ប្រវែងជាង ៤០០ម៉ែត្រ ដោយគម្រោងផ្លូវទាំង ២ខ្សែនេះ ប្រើប្រាស់ថវិកា ឆ្នាំ២០២២ របស់រដ្ឋបាល ខេត្តកំពង់ចាម។

មន្ត្រីបានបន្តថា ទន្ទឹមនិងការអភិវឌ្ឍផ្លូវ និងលូ កំពុងស្ថាបនានេះ ឯកឧត្តម​អភិបាលខេត្ត ក៏បានចុះពិនិត្យដោយផ្ទាល់ នឹងមានគម្រោង បន្តស្ថាបនាផ្លូវបេតុង បន្ថែមទៀត នៅក្នុងសង្កាត់បឹងកុក នាពេលខាងមុខនេះ៕SRP

ខេត្តសៀមរាប៖លោក ដួង តារា ជំនួយការផ្ទាល់សម្ដេច ហ៊ុន សែន នាយករដ្ឋមន្ត្រី និងជារដ្ឋលេខាធិការទីស្ដីការគណៈរដ្ឋមន្ត្រី​ បានលើកឡើងថា«យើងត្រូវរួមគ្នាបញ្ឈប់ធ្វើរបាយការណ៍ភូតកុហកសម្តេច  ដើម្បីដោះស្រាយបញ្ហាវិវាទដីធ្លីជូនប្រជាពលរដ្ឋឆាប់ចប់ពិតប្រាកដ។

តាមរយៈផេកហ្វេសប៊ុក របស់លោក ដួង តារា បានសរសេរថា៖ ខ្ញុំចុះខេត្តមួយភ្លែតទៅប្រគល់បណ្ណកម្មសិទ្ធិដីធ្លី( ប្លង់រឹង)ជូនគូភាគីវិវាទ ដែលទទួលបានយុត្តិធម៌ក្រោមដំណោះស្រាយឈរលើគោលការណ៍ឈ្នះ-ឈ្នះសម្តេចតេជោ។

សំណេរបានបន្តថា៖យើងត្រូវរួមគ្នាបញ្ឈប់ធ្វើរបាយការណ៍ភូតកុហកសម្តេច  ដើម្បីដោះស្រាយបញ្ហាវិវាទដីធ្លីជូនប្រជាពលរដ្ឋឆាប់ចប់ពិតប្រាកដ  និងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង។

លោក ដួង តារា ត្រូវបានគេដឹងថា ជាមន្ត្រីមួយរូបជំនិតនឹងសម្ដេចតេជោ ហ៊ុន សែន លោកបានធ្វើការដោះស្រាយបញ្ហទំនាស់វិវាទដីធ្លី ក្រៅប្រព័ន្ទតុលាការ ដោយបានទទួលបានជោគជ័យ តាមគោលការ ឈ្នះ ឈ្នះ របស់សម្ដេច ហ៊ុន សែន ក្នុងការរកដំណោះស្រាយជូនគូភាគី។

ជាការកត់សំគាល់ បញ្ហាវិវាទដីធ្លីមួយចំនួន នៅតាមបណ្ដាខេត្តក្រុង បានអូសបន្លាយជាច្រើនឆ្នាំ ប៉ុន្តែដោះស្រាយមិនចេញ ទើបគូភាគីខ្លះ បានធ្វើលិខិតស្នើសុំសម្ដេចនាយករដ្ឋមន្ត្រី ហ៊ុន សែន ជួយអន្តរាគមន៍ ដល់ពួកគាត់។ ដូច្នោះទើប លោកដួង តារា បានធ្វើការរកដំណោះស្រាយ ឲ្យគូភាគីទទួលបានឈ្នះទាំងអស់គ្នា តាមគោលការណ៍ ឈ្នះ ឈ្នះ រប​ស់សម្ដេច តេជោ ហ៊ុន សែន៕SRP