ខេត្តកំពង់ចាម៖អភិបាលខេត្តកំពង់ចាម​ លោក​​ អ៊ុន​ ចាន់ដា​ បាន​ប្រាប់មន្ត្រី​ជំនាញ​ពាក់ព័ន្ធ​ឲ្យ​ចុះ​ពិនិត្យ​ និងដោះស្រាយ​ ករណី​រំលោភបំពាន​ដី​ចំណី​ផ្លូវ​ និង​ការសាងសង់​សំណង់មួយចំនួន​ធ្វេី​ឲ្យ​ប៉ះពាល់​ដល់​ ប្រឡាយទឹក​ ស្ថិត​នៅ​ក្នុង​ឃុំ​មេសជ្រៃ​ ស្រុក​ស្ទឹងត្រង់​ ខេត្តកំពង់ចាម​។

ការ​ណែនាំ​យ៉ាង​ដូច្នេះក្នុងកិច្ចប្រជុំសាមញ្ញលើកទី៣១​ អាណត្តិទី៣ របស់ក្រុមប្រឹក្សាខេត្តកំពង់ចាម​ ​នៅព្រឹកមិញនេះ។

លោក​​ អ៊ុន​ ចាន់ដា​ បាន​ថ្លែងថា​ ចំពោះ​ករណី​រំលោភបំពាន​ដី​ចំណី​ផ្លូវ​ និងការ​សាងសង់​សំណង់​មួយចំនួនធ្វេី​ឲ្យ​ប៉ះពាល់​ដល់​ប្រឡាតទឹក​ខាងលើ ដែល​លោក​​សមាជិក​ក្រុមប្រឹក្សាខេត្ត​​ បានលើកឡើងនេះ​ សូម​ឲ្យ​ លោក​​ ហេង​ វណ្ណនី​ អភិបាល​រងខេត្ត​ ដឹកនាំ​មន្ត្រី​ពាក់ព័ន្ធ​ ដែលមានមន្ទីរ​រ៉ែ​និង​ថាមពល​ មន្ទីរ​ធនធានទឹក​និង​ឧតុនិយម​ មន្ទីររៀបចំដែនដី នគរូបនីយកម្ម សំណង់ និងសុរិយោដី​ និង​មន្ទីរ​សាធារណការ​និង​ដឹកជញ្ជូន​ខេត្ត​ រួមនឹង​អាជ្ញាធរ​មូលដ្ឋាន​​ ចុះ​ពិនិត្យ​ ជាពិសេស​គឺត្រូវ​ធ្វើការ​ដោះស្រាយ​នៅនឹងកន្លែង​តែម្ដង​។ ប្រសិនជា​ពិនិត្យ​ទៅ​ឃេីញ​ថា​មាន​បញ្ហា​មិនប្រក្រតី​ណាមួយ​នោះ​ ហើយ​ក្នុងនោះ​ក៏ត្រូវ​អញ្ជើញ​គូរភាគី​ រវាង​ដេីម​បណ្តឹង​ និង​អ្នក​ពាក់ព័ន្ធ​ឲ្យ​ចូលរួម​ផង​ដែរ​។

ក្នុង​កិច្ចប្រជុំនេះដែរ​ លោក​​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ បាន​លើក​យក​សេចក្តី​ព្រាង​របៀបវារៈ​សំខាន់​ៗ​ មក​ពិភាក្សា​ រួមមាន​ ១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី៣០ អាណត្តិទី៣ របស់ក្រុមប្រឹក្សាខេត្ត។
២-ពិនិត្យ ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារ ប្រចាំខែ​វិច្ឆិកា និងលេីកទិសដៅការងារប្រចាំខែធ្នូ ឆ្នាំ២០២១ របស់រដ្ឋបាលខេត្តកំពង់ចាម។ ៣-ពិនិត្យ ពិភាក្សា និងអនុម័តសេចក្តីព្រាងកម្មវិធីវិនិយោគបីឆ្នាំរំកិល (២០២២-២០២៤)​ របស់រដ្ឋបាលខេត្ត។ ៤-ពិនិត្យ ពិភាក្សា និងអនុម័តសេចក្តីព្រាងប្រតិទិនការងារ កម្មវិធីវិនិយោគបីឆ្នាំរំកិល (២០២៣-២០២៥) របស់រដ្ឋបាលខេត្ត។ ៥-បញ្ហាផ្សេងៗ៕SRP

ខេត្តកណ្ដាល៖ក្នុងឱកាសអញ្ជើញចុះត្រួតពិនិត្យការដ្ឋានសាងសង់ អាកាសយានដ្ឋានអន្តរជាតិតេជោ ក្រុងតាខ្មៅ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកមិញនេះ សម្តេចតេជោ ហ៊ុន សែន បានថ្លែងថា ក្បាលម៉ាស៊ីនគណៈរដ្ឋមន្ត្រីថ្មីមួយបម្រុង សម្រាប់នាពេលអនាគត បានរៀបចំរួចហើយ ហើយនៅថ្ងៃទី២៤ ខែធ្នូ ឆ្នាំ២០២១ខាងមុខ នឹងរៀបចំធ្វើសន្និបាតរបស់គណៈកម្មាធិការកណ្តាលរបស់គណបក្សប្រជាជនកម្ពុជា។

សម្តេចហ៊ុន សែន បញ្ជាក់ថា គណៈរដ្ឋមន្ត្រីថ្មីបម្រុងដែលសម្តេចបានរើសនោះ ពាក់កណ្តាលជាថ្នាក់បណ្ឌិត ក្រៅពីនោះជាអនុបណ្ឌិត ដែលមានអាយុភាគច្រើនក្រោម៦០ឆ្នាំ៕SRP

ខេត្តកណ្ដាល៖សម្តេច ហ៊ុន សែន បានមានប្រសាសន៍ថា សម្ដេចមានបំណងប្រមូលទុនក្នុងស្រុកសម្រាប់សាងសង់សំណង់នានា។ សម្តេចតេជោចង់ឱ្យសំណង់នោះជាសមិទ្ធផលកើតចេញពី «បាតដៃខ្មែរ» ពោលទាំងប្រាក់ និងកម្លាំងពលកម្ម គឺកើតចេញពីខ្មែរទាំងអស់។ សម្តេចតេជោ បានរំលឹកថា ពាក្យ «ខ្មែរធ្វើបាន» ដែលសម្តេចបានលើកឡើងនោះ មិនមែនជារឿងលេងសើចទេ តែវាជាការបង្ហាញឱ្យឃើញពីសមត្ថភាពរបស់ខ្មែរគ្រប់សម័យកាល ក្នុងការសាងសមិទ្ធផលជាមរតកសម្រាប់ជាតិ។

សម្តេចតេជោ ហ៊ុន សែន បានបង្ហាញនូវក្តីមោទនភាពចំពោះដំណើរការនៃការសាងសង់អាកាសយានដ្ឋានអន្តរជាតិថ្មីនៅពេលនេះ ដែលបានសម្រេចបាននូវសមិទ្ធផលសំខាន់ៗជាច្រើន ដូចជាអ្វីដែលក្រុមហ៊ុនបានបញ្ជាក់ខាងលើ។ សម្តេចតេជោបានមានប្រសាសន៍ថា អាកាសយានដ្ឋានអន្តរជាតិថ្មីនេះ ត្រូវបានប្រសិទ្ធនាមថា «អាកាសយានដ្ឋានអន្តរជាតិតេជោក្រុងតាខ្មៅ»។ ពាក្យថា «តេជោ» ដែលបានដាក់នៅអាកាសយានដ្ឋានថ្មីនេះ មិនមែនដំដៅដល់សម្តេចម្នាក់ឯងនោះឡើយ គឺបានសំដៅដល់តេជោជាច្រើនរូបទៀត ជាពិសេសមាន តេជោមាស តេជោយ៉ត ជាដើម ពិសេសក៏ជាការបង្ហាញអំពីសមិទ្ធផលដែលកើតនៅក្នុងរបបរាជានិយមផងដែរ។
សម្តេចតេជោបញ្ជាក់ថា ការសាងសង់អាកាសយានដ្ឋានដែលមានសមត្ថភាពខ្ពស់បែបនេះ គឺវាពិតជាសំខាន់ណាស់ សម្រាប់ទទួលយន្តហោះធំៗ និងឆ្លើយតបនឹងកំណើននៃការធ្វើដំណើរតាមផ្លូវអាកាស ដែលនៅពេលខាងមុខកម្ពុជា នឹងមានជើងហោះហើរជាច្រើនធ្វើដំណើរមកកម្ពុជា។

សម្តេចហ៊ុន សែន មានប្រសាសន៍បែបនេះក្នុងឱកាសសអញ្ជើញពិនិត្យការដ្ឋានសាងសង់ “អាកាសយានដ្ឋានអន្តរជាតិតេជោក្រុងតាខ្មៅ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល
នៅថ្ងៃព្រហស្បតិ៍ ថ្ងៃទី៩ ខែធ្នូនេះ។

តាមការឲ្យដឹងពីអ្នកឧកញ៉ា ពុង ឃាវសែ ដែលជាប្រធានក្រុមហ៊ុន OCIC ទទួលការវិនិយោគលានយន្តហោះនេះបានឲ្យដឹងថា អាកាសយានដ្ឋានអន្តរជាតិភ្នំពេញថ្មីនេះសាងសង់ឡើងលើផ្ទៃដីទំហំប្រមាណ ២,៦០០ហិកតា ស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងដីខ្លះស្ថិតនៅក្នុងស្រុកបាទី ខេត្តតាកែវ។ អាកាសយានដ្ឋានអន្តរជាតិថ្មីនេះ ជាគម្រោងដ៏ធំនៅក្នុងប្រទេសកម្ពុជាដែលបានវិនិយោគក្នុងទឹកប្រាក់ប្រមាណ ១,៥០០លានដុល្លារ ដែលជាគម្រោងវិនិយោគរវាងក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) និងក្រុមហ៊ុននៃប្រទេសចិនផងដែរ។
ព្រលានយន្តហោះភ្នំពេញថ្មីនេះ ជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។
សំណង់ដែលកំពុងសាងសង់នាពេលបច្ចុប្បន្ននេះរួមមាន៖ ស្ថានីយអ្នកដំណើរ មានផ្ទៃក្រឡា ២៤៣គីឡូម៉ែត្រក្រឡា, មជ្ឈមណ្ឌលផ្គត់ផ្គង់ថាមពល, ទីលានចំណតយន្តហោះទំហំ ១៨៩ហិកតា, ស្ថានីយត្រួតពិនិត្យចរាចរណ៍ផ្លូវអាកាសកម្ពស់ ១១៨ម៉ែត្រ, ការងារតភ្ជាប់ផ្លូវពីអាកាសយានដ្ឋានអន្តរជាតិភ្នំពេញថ្មី ទៅមហាវិថីសម្តេចតេជោ ហ៊ុន សែន ដោយមានផ្លូវប្រវែងជាង ១១គីឡូម៉ែត្រ និងស្ពានបេតុងឆ្លងកាត់ស្ទឹងព្រែកត្នោតចំនួន២, ជីកប្រឡាយព័ទ្ធទំនប់ជុំវិញអាកាសយានដ្ឋានប្រវែង ២០គីឡូម៉ែត្រ, សាងសង់អគារផ្សេងៗចំនួន១៩ មានដូចជា៖ អគារស្ថានីយអ្នកដំណើរសម្រាប់ភ្ញៀវជាន់ខ្ពស់, ស្ថានីយកែច្នៃប្រព័ន្ធទឹកកខ្វក់, ស្ថានីយស្តុកសំណល់រឹង, ស្ថានីយជួសជុលយានយន្ត, ស្ថានីយស្តុកប្រេង, ស្ថានីយស្តុកទំនិញ, ស្ថានីយពន្លត់អគ្គិភ័យ និងអនុស្ថានីយអគ្គិសនី។ល។ គម្រោងក៏កំពុងដំណើរការលើការងារស្តារបឹងជើងលោក ដោយសម្រេចបានទំហំ ១៨ហិកតា ក្នុងជម្រៅពី ៥ម៉ែត្រ ទៅ២២ម៉ែត្រ។ ក្រុមហ៊ុនគ្រោងនឹងស្តារបឹងបន្ថែមក្នុងទំហំ ១០០ហិកតា៕SRP

ខេត្តកំពង់ចាម៖ក្រុមការងារត្រួតពិនិត្យការដាក់តាំងផ្ទាំងផ្សព្វផ្សាយផ្សេងៗខេត្តកំពង់ចាម នៅ

រសៀលថ្ងៃទី៨ ខែធ្នូ ម្ម្សិលមិញ បានចុះត្រួតពិនិត្យ និងណែនាំដល់មូលដ្ឋានអាជីវកម្មក្នុងក្រុងកំពង់ចាម ក្នុងគោលបំណងត្រួតពិនិត្យ របៀបសរសេរអក្សរលើផ្ទាំងយីហោ ផ្ទាំងផ្សាយពាណិជ្ជកម្ម និងផ្ទាំងសញ្ញាផ្សេងៗ។

ក្រុមការបានឲ្យដឹងថាការចុះត្រួតពិនិត្យដោយឲ្យអាជីវកម្មនានា ត្រូវគោរពតាមគោលការណ៍ដែលមានចែងក្នុងប្រកាសឲ្យបានត្រឹមត្រូវ ដោយត្រូវប្រើអក្សរជាតិ នៅខាងលើទំហំធំជាងអក្សរបរទេសពីរដង។ ចំណែកអក្ខរាវិរុទ្ធត្រូវគោរពតាមក្បួនវេយ្យាករណ៍​ និងវេចនានុក្រមខ្មែររបស់សម្តេចព្រះសង្ឃរាជព្រះមហា សុមេធាធិបតីជោតញ្ញាណោ ជួន ណាត រីឯគំនូររូបភាពដែលភ្ជាប់ជាមួយផ្ទាំងត្រូវរក្សាឲ្យមានសោភណ្ឌភាព និងលក្ខណៈថ្លៃថ្នូររបស់ជាតិផងដែរ។ 

ជាមួយគ្នានោះ​ក្រុម​ការងារ​ក៏បានជំរុញលើការលើកស្លាកអាជីវកម្ម ឲ្យបានត្រឹមត្រូវ តាមការកំណត់ ព្រមទាំងជំរុញឲ្យអាជីវកម្ម ដែលមិនទាន់មានអាជ្ញាប័ណ្ណ ឬវិញ្ញាប័ត្រចុះបញ្ជីពាណិជ្ជកម្ម ឲ្យមកសុំច្បាប់ឲ្យបានត្រឹមត្រូវ ព្រមទាំងផ្សព្វផ្សាយលិខិតបទដ្ឋានគតិយុត្តពាក់ព័ន្ឋផ្សេងៗ​។  

ក្រុមការងារបានបញ្ជាក់ថាជាលទ្ធផល បានចុះពិនិត្យអាជីវកម្មចំនួន៥ទីតាំង ដែលបានលើកស្លាកជាភាសាបរទេស ដោយបានពន្យល់ណែនាំអំពីច្បាប់ ការលើកស្លាកអាជីវកម្មអនុលោមតាមច្បាប់ ព្រមទាំងជំរុញឲ្យគាត់សុំអាជ្ញាប័ណ្ណប្រកបអាជីវកម្ម ឲ្យបានឆាប់ និងកែសម្រួលស្លាកយីហោអាជីវកម្ម ឲ្យបានត្រឹមឡើងវិញ​ផងដែរ​៕SRP

ខេត្តសៀមរាប៖លោកទៀ សីហា អភិបាលខេត្ត នៅសាលាខេត្តសៀមរាប នាថ្ងៃទី ០៨ ខែ ធ្នូ ព្រឹកមិញបានចុះហត្ថលេខាលើកំណត់ត្រាលើកិច្ចពិភាក្សានៃការអនុវត្តគម្រោងកិច្ចសហប្រតិបត្តិការ បច្ចេកទេសសម្រាប់គម្រោងទីក្រុងឆ្លាតវៃជាមួយប្រធានទីភ្នាក់ងារសហប្រតិបត្តិការអន្តរជាតិជប៉ុន(JICA) ប្រចាំនៅកម្ពុជា។

លោក ទៀ សីហា បានលើកឡើងថា បន្ទាប់ពីក្រុងសៀមរាប នៃខេត្តសៀមរាបរបស់ព្រះរាជាណាចក្រកម្ពុជា ត្រូវបានដាក់បញ្ចូលទៅក្នុងសមាជិកនៃបណ្តាញទីក្រុងឆ្លាតវៃអាស៊ានកាលពីឆ្នាំ២០១៨ កន្លងទៅ រដ្ឋបាលខេត្តសៀមរាប ក៏ដូចជារដ្ឋបាលក្រុងសៀមរាប បានធ្វើការរៀបចំផែនការ ជាមួយនឹងការបង្កើនការចំណាយសាធារណៈ ក្នុងការវិនិយោគទៅលើគម្រោងហេដ្ឋារចនាសម្ព័ន្ធក្នុងក្រុង ដើម្បីបង្កលក្ខណៈងាយស្រួលសម្រាប់ការធ្វើដំណើររបស់ប្រជាពលរដ្ឋ ការបង្កើនសោភ័ណភាពក្នុងក្រុង ក៏ដូចជាចូលរួមក្នុងការអនុវត្តនូវផែនការអភិវឌ្ឍទីក្រុងឆ្លាតវៃអាស៊ានសម្រាប់ក្រុងសៀមរាប នៃខេត្តសៀមរាប។ 

លោកបានបញ្ជាក់ថា ដើម្បីសម្រេចបាននូវការកសាងទីក្រុងឆ្លាតវៃក្នុងក្រុងសៀមរាប ឲ្យស្របតាមផែនការទីក្រុងឆ្លាតវៃរបស់សមាគមបណ្តាញទីក្រុងឆ្លាតវៃអាស៊ាន រដ្ឋបាលខេត្តក៏បានរៀបចំជាសំណើ (Proposal) ដើម្បីដាក់ស្នើសុំជូនទៅទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងការស្នើសុំគម្រោងកិច្ចសហប្រតិបត្តិការបច្ចេកទេស សម្រាប់រៀបចំទីក្រុងឆ្លាតវៃក្នុងក្រុងសៀមរាប នៃខេត្តសៀមរាប ឲ្យក្លាយជាទីក្រុងឆ្លាតវៃ កាលពីឆ្នាំ២០១៩កន្លងទៅ។ 

លោកបានបន្តថា ក្នុងរយៈពេលមួយឆ្នាំជាងនៃការសិក្សាទិន្នន័យបឋមអំពីគម្រោងទីក្រុងឆ្លាតវៃក្នុងក្រុងសៀមរាប (Basic Survey)នេះ ក្រុមការងារសិក្សានេះក៏បានរៀបចំជាសេចក្តីព្រាងផែនការមេចង្អុលផ្លូវសម្រាប់ការរៀបចំក្រុងសៀមរាប នៃខេត្តសៀមរាបជាទីក្រុងឆ្លាតវៃ ដោយនៅក្នុងសេចក្តីព្រាងផែនការមេចង្អុលផ្លូវនេះ គឺផ្តោតលើផ្នែកសំខាន់ៗចំនួន០៤ គឺ ការរៀបចំទេសចរណ៍ឆ្លាតវៃ(Smart Tourism) ការរៀបចំប្រព័ន្ធសន្តិសុខឆ្លាតវៃ (Smart Security) ការរៀបចំប្រព័ន្ធចល័តឆ្លាតវៃ(Smart Mobility) និង ការរៀបចំប្រព័ន្ធគ្រប់គ្រងកាកសំណល់ឆ្លាតវៃ (Smart Waste Management )។ 

អភិបាលខេត្តមានសង្ឃឹមយ៉ាងមុតមាំថា តាមរយៈគម្រោងនេះនឹងធ្វើឲ្យសមត្ថភាពមន្រ្តីរបស់រដ្ឋបាលខេត្តសៀមរាប និងរដ្ឋបាលក្រុងសៀមរាបត្រូវបានពង្រីកឲ្យបានកាន់តែបានស៊ីជម្រៅថែមទៀតពាក់ព័ន្ធទៅនឹងបច្ចេកវិទ្យាទីក្រុងឆ្លាតវៃ រួមជាមួយនឹងប្រព័ន្ធបច្ចេកវិទ្យា និងការគ្រប់គ្រងបែបឆ្លាតវៃ នឹងពិតជាចូលរួមចំណែកអភិវឌ្ឍន៍ខេត្តសៀមរាបឲ្យបានកាន់តែល្អប្រសើរឡើងថែមទៀត។ 

លោកស្រី Kamei Haruko ប្រធានទីភ្នាក់ងារសហប្រតិបត្តិការអន្តរជាតិជប៉ុន(JICA) ប្រចាំប្រទេសកម្ពុជា បានបញ្ជាក់ផងដែរថា ខេត្តសៀមរាប ជាខេត្តវប្បធម៌ប្រវត្តិសាស្ត្រនៃព្រះរាជាណាចក្រកម្ពុជា ដែលជាគោលដៅទេសចរណ៍ នៃសេដ្ឋកិច្ចជាតិ ហើយនៅពេលខាងមុខនឹងធ្វើឲ្យក្រុងសៀមរាប ក្លាយជាក្រុងគំរូក្នុងតំបន់អាស៊ាន ជាក្រុងឆ្លាតវៃ ប្រកបទៅដោយបច្ចេកវិទ្យាទីក្រុងឆ្លាតវៃ រួមជាមួយនឹងប្រព័ន្ធបច្ចេកវិទ្យា និងការគ្រប់គ្រងបែបឆ្លាតវៃ នឹងពិតជាចូលរួមចំណែកអភិវឌ្ឍន៍ខេត្តសៀមរាបផងដែរ។

សូមជម្រាបថា ជាការឆ្លើយតបតាមសំណើស្នើសុំរបស់រដ្ឋបាលខេត្តសៀមរាប ទីភ្នាក់ងារសហប្រតិបត្តិការអន្តរជាតិជប៉ុន(JICA) បានទទួលយកសំណើ (Proposal) របស់រដ្ឋបាលខេត្តសៀមរាប ដើម្បីជួយរៀបចំក្រុងសៀមរាបជាទីក្រុងឆ្លាតវៃអាស៊ាន៕SRP

ខេត្តសៀមរាប៖បុរសជាឪពុកត្រូវបានកម្លាំងនគរបាលស្រុកពួក ឃាត់ខ្លួនពាក់ព័ន្ធការចាប់រំលោភកូនស្រីបង្កើត។

របាយការណ៍របស់សមត្ថកិច្ចបានឲ្យដឹងថានៅល្ងាចថ្ងៃទី៧ ខែធ្នូ ឆ្នាំ២០២១ ជនរងគ្រោះនិងម្តាយបានដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសសរស្តម្ភ ដោយប្ដឹងចោទពីបទរំលោភសេពសន្ថវៈ (ឪពុកនិងកូន) កើតហេតុជាច្រើនលើក លើកចុងក្រោយនៅថ្ងៃទី៤ ខែធ្នូ ឆ្នាំ២០២១ វេលាម៉ោង៩ព្រឹក ចំណុចវាលស្រែស្ថិតនៅខាងត្បូងភូមិស្វាយ ឃុំសសរស្ដម្ភ ស្រុកពួក ខេត្តសៀមរាប។

របាយការណ៍បន្តថារងគ្រោះឈ្មោះណ. ព.ស អាយុ១៥ឆ្នាំ ជាសិស្សទី៨ នៅភូមិ-ឃុំកើតហេតុ នាងរៀបរាប់ឲ្យដឹងថា៖នៅថ្ងៃទីនាងមិនចាំ ប្រហែលអំឡុងខែកុម្ភៈ ឆ្នាំ២០២០ ឪពុកមានឈ្មោះ និវ ណាត អាយុ៣៦ឆ្នាំ រស់នៅជុំគ្នា មុខរបរជាកសិករ បានប្រព្រឹត្តគំរាមសម្លាប់និងរំលោភសេពសន្ថវ: លើរូបនាងចំនួនបី៣លើក ជាបន្តបន្ទាប់(២ថ្ងៃ-៣ថ្ងៃ ម្ដង) រាល់សកម្មភាពជាឪពុក គំរាមនាំនាងទៅច្រូតស្មៅនៅវាលស្រែស្ថិតនៅខាងត្បូងភូមិស្វាយ ដែលស្ងាត់មនុស្ស ចន្លោះពេលព្រឹកម៉ោង៨, ម៉ោង៩ រូបភាពបទល្មើសចាប់សម្រាតខោត្រឹម.កជើង រួចរំលោភសេពសន្ថវ: សម្រេចបញ្ចេញទឹកកាមខាងក្រៅ ហើយគំរាមមិនឲ្យប្រាប់ម្ដាយ។ ក្រោយមកទៀតរំលងចូលដល់ក្នុងខែមិថុនា ឆ្នាំ២០២០ នាងនៅផ្ទះតែ២នាក់ឪពុក ដោយម្ដាយទៅមង្គលការបងជីដូន១នៅជាយដែនបឹងត្រកួន ខេត្តបន្ទាយមានជ័យ ថ្ងៃនោះម៉ោងប្រហែល៩.០០នាទីព្រឹក ឪពុកបានគំរាមសម្លាប់បើមិនព្រម ដូចរាល់ដង នាំនាងទៅវាលស្រែច្រូតស្មៅទៀត រំលោភសម្រេចបញ្ចេញទឹកកាមខាងក្រៅ១លើកទៀត, លុះម្ដាយមកផ្ទះវិញនាងពុំទាន់ប្រាប់ទេ រយ:ពេល១០ថ្ងៃក្រោយទើបនាងប្រាប់រឿងដល់ម្ដាយពីទង្វើឪពុកពេលនោះរូបនាង.ម្ដាយ.ឪពុក បាននិយាយសន្យាលក្ខខណ្ឌឲ្យឪពុកឈប់ប្រព្រឹត្តលើកូនស្រីទៀត កុំប្រាប់រឿងបែកធ្លាយដល់អ្នកណា។ ក្រោយមកទៀតប្រហែលក្នុងខែកុម្ភៈ ឆ្នាំ២០២១ ម៉ោង១០ព្រឹក ឪពុកធ្វើសកម្មភាពគំរាមដូចមុនៗនាំនាងទៅច្រូតស្មៅវាលស្រែគោកដូងស្ថិតនៅខាងភូមិ រំលោភសម្រេចបញ្ចេញទឹកកាមខាងក្រៅ១លើកទៀត ហើយនាងបានប្រាប់រឿងដល់ម្ដាយ ពេលនោះឪពុកនិងម្ដាយបានបង្ករឿងជំលោះ ឪពុកតែងតែរកវាយធ្វើបាបម្ដាយ ក្រោយមួយទៀតចូលដល់ក្នុងខែឧសភា ឆ្នាំ២០២១ ម៉ោង៨ព្រឹក ឪពុកធ្វើសកម្មភាពដដែល១លើកទៀត ដឹងរឿងដល់ម្ដាយ ឪពុកបង្ករករឿងដេញវាយ ហើយពេលនោះឯងដែលនាងចាប់ផ្ដើមបាត់រដូវស្ត្រី(ខែ៥.២០២១)ទើបម្ដាយនាងទិញឧបករណ៍តេស្តទឹកនោមឃើញថានាងមានកូន(គំនូស២ឆ្នូត) ម្ដាយនាំនាងមកពិនិត្យនៅមន្ទីរពេទ្យបង្អែកពួក គ្រូពេទ្យប្រាប់ថានាងមានផ្ទៃពោះទារក(៣ខែ) ពេលនោះនាងនិងម្ដាយសម្រេចចិត្តយកកូនចេញ ធ្វើនៅពេទ្យឯកជន(សេរីរ័ត្ន)ស្រុកពួក ក្រោយបានឯកសារពីគ្រូពេទ្យ និងទារក នាងនិងម្ដាយបានដុតចោលឯកសារពេទ្យ និងកប់ទារក ក្នុងរឿងនេះនាងនិងម្ដាយបានលាក់មិនប្រាប់ដល់គ្រូពេទ្យទេ, ជនសង្ស័យជាឪពុកច្រើនបង្កនិងប្រើហិង្សាក្នុងគ្រួសារ។

របាយការណ៍បានបញ្ជាក់ថារហូតដល់លើកចុងក្រោយនៅថ្ងៃទី៤ ខែធ្នូ ឆ្នាំ២០២១ ម៉ោង៩ ព្រឹក ឪពុកគំរាមនាំរូបនាងទៅមើលក្របីនៅវាលស្រែខាងត្បូងភូមិ រំលោភសម្រេចបញ្ចេញទឹកកាមខាងក្រៅ១លើកទៀត។ ជាក់ស្ដែងនៅថ្ងៃទី៧ ខែធ្នូ ឆ្នាំ២០២១ ម៉ោង១រសៀល ឪពុកផឹកស្រាស្រវឹងមានបំណងគំរាមចង់រំលោភលើរូបនាង ត្រូវបានម្ដាយនាងស្ដីថា ទើបកើតជម្លោះហិង្សាក្នុងគ្រួសារ ឪពុកបានដេញវាយចាប់ទាញសក់នាង នឹងកាន់អាវុធកាំបិតខ្វែវដេញកាប់ម្ដាយ(គេចផុត) និងវាយសត្វគោ ដោយទ្រាំនឹងទង្វើជាឪពុកមិនបាន រូបនាងនិងម្ដាយសម្រេចចិត្តប្ដឹងសមត្ថកិច្ចប៉ុស្តិ៍តែម្ដង។

ជនសង្ស័យជាឪពុកឈ្មោះ និវ ណាត ត្រូវបានប៉ូលិសនាំខ្លួនមកប៉ុស្តិ៍ដើម្បីធ្វើការស្រង់ចម្លើយ ដោយរូបគេជាមនុស្សថ្លង់ហើយជជែស នៅចំពោះមុខសមត្ថកិច្ចគេបានប្រាប់ថា៖ ពាក់ព័ន្ធនឹងរឿងកូនស្រីឈ្មោះ ណ.ព.ស រូបគេពុំបានគំរាមសម្លាប់និងរំលោភសេពសន្ថវ: នោះទេ! គឺរូបគេបានរួមភេទជាមួយកូនស្រីសម្រេច១លើក នៅថ្ងៃទីមិនបានចាំ ថ្ងៃនោះពេលល្ងាច នាងមកពីសាលារៀន ដោះខោអាវសិស្ស នាងស្លៀកខោកីឡាខ្លី សម្រេច១លើក រយៈពេលប្រហែលបីខែក្រោយ ទើបរូបគេដឹងថាកូនស្រីមានផ្ទៃពោះត្រូវបានប្រពន្ធនាំទៅយកកូនចេញ។ សូមបញ្ជាក់ថាគ្រួសារជនរងគ្រោះ មានកូនស្រីចំនួន៣នាក់/ជនរងគ្រោះជាកូនបង(ទី១)៕SRP

ខេត្តសៀមរាប៖មន្ត្រីក្រសួងសារណការដឹកជញ្ជូន លោកស៊ុន ចាន់ថុល បានពិនិត្យឃើញ បញ្ហាកំហុស បច្ចេកទេសបន្តិចបន្តួចក្នុងអំឡុងពេលធ្វើការអ៊ុតកៅស៊ូ និង បានណែនាំឲ្យក្រុមការងារបច្ចេកទេសរបស់ អង្គភាពសាងសង់ ក៏ដូចជាអ្នកជំនាញបច្ចេកទេសពាក់ព័ន្ធធ្វើការកែតម្រូវឲ្យបានសមស្រប ទៅនឹងស្តង់ដាបច្ចេកទេសនៃការសាងសង់ ព្រោះគិតត្រឹមខែវិច្ឆិកា ឆ្នាំ២០២១ សម្រេចបាន៩២,៧២%នៃទំហំការងារសរុប។

ការរកឃើញនេះក្នុងឱកាសដែលលោកដឹកនាំមន្ត្រីជំនាញពាក់ព័ន្ធចុះពិនិត្យការសាងសង់ផ្លូវចំនួន៣៨ខ្សែរនៅក្រុងសៀមរាបនៅថ្ងៃទី ៧ធ្នូក្នុងម្សិលមិញ។

គួររម្លឹកផងដែរថា គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ខេត្តសៀមរាប ចំនួន៣៨ ខ្សែនេះ មានប្រវែងសរុប ១០៦,៤២គីឡូម៉ែត្រ ប្រើប្រាស់ថវិកាជាតិសរុបប្រមាណជាង ១៤៩លាន ២១៦ពាន់៥៩៥ ដុល្លារអាមេរិក ដោយក្នុងនោះចំនួន៩លានដុល្លារ ចំណាយលើការងារចាំបាច់ក្នុងការរៀបចំស្ថាបនាប្រព័ន្ធ បង្ហូរទឹកភ្លៀង និងទឹកកខ្វក់ ឋិតក្រៅគម្រោងសាងសង់ខ្សែផ្លូវទាំង៣៨នេះ ចំណាយពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១៕SRP

ខេត្តសៀមរាប៖ក្រុងសៀមរាបដែលជាក្រុងតំបន់ទេសចរណ៍ប្រវត្តិសាស្រ្ត មានប្រាងប្រាសាទសំបូរបែបកំពុងប្រែមុខមាត់ថ្មីក្រោយកសាងផ្លូវ។

អាជ្ញាធរខេត្តសៀមរាបបានឲ្យដឹងថា ការកសាងផ្លូវ៣៨ខ្សែ ក្នុងក្រុងសៀមរាប សម្រេចបាន ៩២,៧២ភាគរយ នឹងគ្រោងបញ្ចប់នៅចុងឆ្នាំ២០២១នេះ។

លោកស៊ុន ចាន់ថុល រដ្ឋមន្ត្រីក្រសួងសាធារការណនិងដឹកជញ្ជូន នៅថ្ងៃទី០៧ ខែធ្នូ ម្សិលមិញ បានចុះពិនិត្យ គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែនៅក្នុងក្រុងសៀមរាប។

ការចុះពិនិត្យផ្លូវនេះ មានការចូលរួមពី លោក
ទៀ សីហា អភិបាលខេត្ត និងមន្ត្រីជំនាញពាក់ព័ន្ធជាច្រើនរូបផងដែរ។

ក្នុងដំណើរចុះ ពិនិត្យរដ្ឋមន្ត្រីបានចុះពិនិត្យបច្ចេកទេសនៃការអ៊ុតកៅស៊ូបេតុង(AC) ការដាំកូនរុក្ខជាតិលម្អសោភ័ណភាពនៅតាមបណ្ដោយទ្រូងផ្លូវ ការអ៊ុតភ្ជាប់មុខតំណបេតុងកៅស៊ូ គំនូសសញ្ញាចរាចរណ៍ គំនូសចែកទ្រូងផ្លូវ រង្វង់មូលព្រះរាជដំណាក់ ខឿនចិញ្ចើមផ្លូវ គំនូសសញ្ញាចរាចរណ៍សម្រាប់អ្នកថ្មើរជើង និង ការដាំស្មៅនិងផ្កាលម្អរសួន និងការដាំបង្គោលភ្លើងបំភ្លឺផ្លូវសាធារណៈផងដែរ។ ម្យ៉ាងទៀតគឺពិនិត្យគុណភាពនៃការសាងសង់ជម្រុញឲ្យអង្គភាពសាងសង់ អនុវត្តតាមលក្ខណៈបច្ចេកទេស សៀវភៅបន្ទុកឲ្យបានត្រឹមត្រូវ និងស្តង់ដារ ដែលអាចទទួលយកបាន ពោលគឺធ្វើផ្លូវឲ្យមានគុណភាពរឹងមាំ អាចប្រើប្រាស់ជាប់បានយូរអង្វែង និង បញ្ចប់តាមផែនការគ្រោងទុក។

រដ្ឋមន្ត្រី បានណែនាំឲ្យក្រុមការងារជំនាញបច្ចេកទេសរបស់អង្គភាពសាងសង់ទាំងអស់ជិះកង់ ឬដើរត្រួតពិនិត្យគុណភាពផ្លូវដែលបានអ៊ុតកៅស៊ូរួច ដើម្បីធានាបាននូវគុណភាពរឹងមាំប្រើប្រាស់ជាប់បានយូរអង្វែង។

រដ្ឋមន្ត្រី ក៏បានសំណូមពរផងដែរឲ្យក្រុមការងារជំនាញបច្ចេកទេសពាក់ព័ន្ធ ពិនិត្យ លទ្ធភាពដាំផ្កាមុខផ្លូវចូលទៅកាន់ប្រាសាទអង្គរវត្ត ដើម្បីទាក់ទាញភ្ញៀវទេសចរណ៍ជាតិ-អន្តរជាតិ ស័ក្តិសមជាមជ្ឈមណ្ឌល វប្បធម៌ ប្រវត្តិសាស្រ្ត ក៏ដូចជាជួយបង្កើនសោភ័ណភាពថែមមួយកម្រិតទៀត និងត្រូវយកចិត្តទុកដាក់លើការដឹកជញ្ជូនកៅស៊ូ ស្រោចផ្លូវឲ្យបានហ្មត់ចត់ទៅកាន់ការដ្ឋាន ចៀសវាងកុំឲ្យស្រក់នៅតាមដងផ្លូវ ធ្វើឲ្យបាត់បង់សោភ័ណភាពផ្លូវ ដែលបាន ស្ថាបនារួច៕SRP

ខេត្តត្បូងឃ្មុំ​៖លោក​ ជាម ច័ន្ទសោភ័ណ អភិបាលខេត្ត និងជាប្រធានគណកម្មាធិកាសាខាកាកបាទក្រហមខេត្តត្បូងឃ្មុំ បានថ្លែងជំរុញលើកទឹកចិត្តដល់អ្នកស្ម័គ្រចិត្តទាំងអស់ ឲ្យបន្តសកម្មភាពដ៍ល្អមួយនេះកាន់តែខ្លាំងក្លាបន្ថែមទៀត ក្នុងប្រតិបត្តិការមនុស្សធម៌ជួយជនងាយរងគ្រោះ និងអ្នករងគ្រោះ តាមទិសស្លោក << កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា ដោយមិនឲ្យនរណាម្នាក់អត់អាហារស្លាប់នោះឡើយ>>។

លោក ជាម ច័ន្ទសោភ័ណ ក៏បានក្រើនរំលឹកដល់អ្នកស្ម័គ្រចិត្តទាំងអស់ ត្រូវរក្សាសុខភាពខ្លួនឲ្យបានល្អ បើយើងគ្មានសុខភាពរឹងមាំទេនោះ​ ម្តេចនឹងចុះជួយបងប្អូនពលរដ្ឋបាន ជាពិសេសក្នុងបរិបទកូវីដ១៩នេះតែម្តង។ ដើម្បីជាការលើកទឹកចិត្តលោកក៏បានចែកជូននូវប័ណ្ណសរសើរ ជែល ម៉ាស និងថវិកាមួយចំនួនដល់អ្នកស្ម័គ្រចិត្ត ទាំង១២០នាក់ផងដែរ។

លោកថ្លែងបែបនេះក្នុងឱកាសនាំយកអំណោយ របស់សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនអ្នកស្ម័គ្រចិត្តកាកបាទក្រហម និងចាស់ជរាគ្មានទីពឹង​ នៅ
ថ្ងៃទី៧ ខែធ្នូ ម្សិលមិញ នៅសាលាស្រុកពញាក្រែក​ ក្រោម​វត្តមាន​ លោក​ ស៊ាក ឡេង ប្រធានក្រុមប្រឹក្សាខេត្ត​។

ឆ្លៀតក្នុងឱកាសនោះ​ លោក​ ជាម ច័ន្ទសោភ័ណ បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្តីនឹករលឹកបំផុត និងថ្លែងការកោតសរសើរ និងថ្លែងអំណរគុណយ៉ាងជ្រាលជ្រៅចំពោះកម្លាំងឈានមុខរបស់អ្នកស្ម័គ្រចិត្តទាំងអស់ ដែលបានបរិច្ចាគធនធាន ពេលវេលា កម្លាំងកាយចិត្តចេញពីបេះដូងមនុស្សធម៌សុទ្ធសាធក្នុងការចូលរួមចំណែកជួយដល់ជនរងគ្រោះ និងជនងាយរងគ្រោះ នៅក្នុងសហគម៍របស់ខ្លួន។

គួរ​បញ្ជាក់​ថា​ អំណោយ​ដែល​ត្រូវ​ចែកជូនដល់លោកយាយលោកតាចាស់ជរា គ្មាន​ទីពឹង​ ក្នុងស្រុកពញាក្រែក ចំនួន៥០នាក់ ក្នុងម្នាក់ៗទទួលបានអាវរងារ​ ១ អង្ករ១បេ មី១កេស ទឹកត្រី ទឹកស៊ីអីវ​ ត្រីខ ប្រេងឆា និងថវិកាមួយចំនួនផងដែរ​៕SRP

ខេត្តកំពង់ចាម​៖អភិបាលខេត្តកំពង់ចាម​ អ៊ុន ចាន់ដា នៅថ្ងៃទី​៧ ខែធ្នូ​ ម្សិលមិញ បានវេរប្រគេនព្រះសង្ឃ និងប្រគល់ឈាបនដ្ឋានដល់គណៈកម្មការ អាចារ្យ វត្តជោតនារាមបឹងកុក ទុកសម្រាប់ប្រើប្រាស់ ទៅតាមតម្រូវការ នៃព្រះពុទ្ធសានា បន្ទាប់ពីបានជួសជុលកែលម្អ និងកសាង រួចរាល់ជាស្ថាពរ នូវឈាបនដ្ឋានថ្មី ១កន្លែង ស្ថិតក្នុងវត្តជោតនារាមបឹងកុក នៃសង្កាត់បឹងកុក ក្រុងកំពង់ចាម​។

លោក​ អ៊ុន ចាន់ដា មានប្រសាសន៍ថា ក្នុងរយៈពេលកន្លងមក យើងបានយកឈាបនដ្ឋាន វត្តបឹងកុកនេះ ធ្វើជាទីកន្លែង សម្រាប់បូជាសព ជូនដល់ប្រជាពលរដ្ឋ ដែលបានស្លាប់បាត់បង់ជីវិត ដោយសារជម្ងឺកូវីដ ១៩។ ប៉ុន្តែដោយឈាបនដ្ឋាន នៅក្នុងអារាមនេះ មានសភាពចាស់ទ្រុឌទ្រោម មិនអាចរាប់រងដល់កិច្ចការបូជាសព បានចំនួនច្រើនក្នុង១ថ្ងៃៗ ដែលជាការឆ្លើយតបទៅនឹងតម្រូវការតាមវិធានការណែនាំ របស់រដ្ឋាភិបាល លោកក៏សម្រេចចិត្តកសាងនូវឈបនដ្ឋានថ្មីបន្ថែមទៀត និងជួសជុលកែលម្អឈាបនដ្ឋានចាស់ ឡើងវិញ នៅលើទីតាំងចាស់ ដើម្បី ទុកជាប្រយោជន៍ ដល់ប្រជាពលរដ្ឋប្រើប្រាស់ ទៅតាមតម្រូវការជាក់ស្ដែង។ ទន្ទឹមនឹងនោះដែរ ដើម្បីសម្រួលដល់ប្រជាពលរដ្ឋ ក៏ដូចជាកិច្ចការអាជ្ញាធរ យើងក៏បានជ្រើសរើសយកទីតាំង ២កន្លែង គឺស្ថិតនៅវត្តតាមាង និងវត្តកោះប្រាក់ ដើម្បីធ្វើការបូជាសព អ្នកបាត់បង់ជីវិត ដោយសារជម្ងឺកូវីដ ១៩ ជាបណ្ដោះអាសន្នសិន ទម្រាំឈាបនដ្ឋានថ្មីនេះ បានជួសជុល និងសាងសង់រួចរាល់ជាស្ថាពរនោះ។ ដូច្នេះថ្ងៃនេះ ឈាបនដ្ឋានថ្មី បានស្ថាបនារួចរាល់ជាស្ថាពរហើយ ក្នុងនាមក្រុមប្រឹក្សាខេត្ត ក៏ដូចជា គណៈអភិបាលខេត្ត យើងក៏បានធ្វើពិធីវេរប្រគេន ឬប្រគល់ជូនព្រះសង្ឃ ក៏ដូចជា គណៈកម្មការអាចារ្យវត្តបឹងកុក ដើម្បី យកសមិទ្ធផលនេះ ទៅចាត់ចែងប្រើប្រាស់ តាមតម្រូវការ នៃព្រះពុទ្ធសាសនា តទៅថ្ងៃអនាគត។ ឆ្លៀតក្នុងឱកាសនោះដែរ លោក​អភិបាលខេត្ត ក៏បានថ្លែងអំណរគុណ និងអំណរព្រះគុណ ដល់ព្រះគ្រូចៅអធិការ និងគណៈកម្មការ អាចារ្យវត្តទាំង ៣ ដែលតែងតែសហការល្អ ជាមួយអាជ្ញាធរខេត្ត ក៏ដូចជា ប្រមុខរាជរដ្ឋាភិបាល ក្នុងការចូលរួមចំណែក ប្រយុទ្ធប្រឆាំងនឹងជម្ងឺកូវីដ ១៩ នៅក្នុងខេត្តកំពង់ចាម ក៏ដូចជា នៅក្នុងប្រទេសកម្ពុជាផងដែរ។

ព្រះចៅអធិការវត្តបឹងកុក ក៏បានសម្ដែងនូវទឹកព្រះទ័យ សប្បាយរីករាយ ក្រៃលែង ចំពោះ ឈាបនដ្ឋានថ្មី ខាងលើនេះ ក៏ព្រោះថា បើព្រះអង្គកៀងគរបច្ច័យពីពុទ្ធបរិស័ទ ក៏ត្រូវការ ពេលវេលាយូរ ទម្រាំងលេចចេញជាសមិទ្ធផល ដូចថ្ងៃនេះ។ ជាមួយគ្នានោះដែរ តាំងនាមព្រះចៅអធិការ វត្តទាំង៣ ព្រះអង្គ ក៏បានសម្ដែងនូវទឹកព្រះទ័យរីករាយ ចំពោះ សមិទ្ធផលជាច្រើនទៀត ដែលខេត្តកំពង់ចាមសម្រេចបាន ទាំងផ្នែកអាណាចក្រ និងផ្នែកពុទ្ធចក្រ នាពេលកន្លងមក ក្រោមការដឹកនាំ ពីអាជ្ញាធរគ្រប់ជាន់ថ្នាក់ តាមរយៈការរួមគ្នាគិត រួមគ្នាធ្វើ និងរួមគ្នាដោះស្រាយ ព្រមទាង ការរួមគ្នាទទួលខុសត្រូវ ដោយឈរលើស្មារតីសាមគ្គីភាព ជាធ្លុងតែមួយ៕SRP

ខេត្ត​សៀមរាប​៖​បុរសម្នាក់បានស្លាប់និងម្នាក់ទៀតបានរងរបួសធ្ងន់ខណៈបើកម៉ូតូទៅបុកនឹងគោយន្តឆ្នៃ។

ហេតុការណ៍បានកើតឡើងនៅថ្ងៃ​ទី​០៦​ ខែធ្នូ​ ឆ្នាំ​២០២១​  វេលា​ម៉ោង​ ១៩​និង​១០​នាទី​ លើ​ផ្លូវជាតិ​លេខ​៦​ ត្រង់​ចំណុច​ចន្លោះ​បង្គោលគីឡូម៉ែត្រ​លេខ​៣២៩​និង​៣៣០​ ភូមិ​គោក​ថ្មី​ ឃុំ​ពួក​ ស្រុក​ពួក​ ខេត្តសៀមរាប​។

 ​​អធិការនគរបាលស្រុកពួក លោក​ទេព​ ពុំសែន បានអោយ​ដឹង​ថា​៖​ គ្រោះថ្នាក់​ចរាចរណ៍​នេះរវាង​ម៉ូតូ​ម៉ាក​ហុងដា​ក្លិ​ច​ ផលិត​ឆ្នាំ​២០១៩​ ព៌​ណ​ស​ ពាក់​ស្លាក​លេខ​សៀមរាប​ 1AF9322​ បើកបរ​ដោយ​ឈ្មោះ​ប៉ក់​ ជើ​ប​ ភេទ​ប្រុស​ អាយុ​២៣​ឆ្នាំ​ នៅ​ភូមិ​ចាន់​តា​សាយ​ ឃុំ​សសរស្តម្ភ​ ស្រុក​ពួក​ ខេត្តសៀមរាប​ (​ពាក់មួក​សុវត្ថិភាព​)​ស្លាប់ ដឹក​ឈ្មោះ​នុប​ ថៃ​សាន់​ ភេទ​ប្រុស​ អាយុ​២២​ឆ្នាំ​ នៅ​ភូមិ​ដូន​ទ្រ​ ឃុំ​ល្វា​ ស្រុក​ពួក​ ខេត្តសៀមរាប​ (​គ្មាន​មួក​សុវត្ថិភាព​)​របួសធ្ងន់ បើកបរ​ទិស​ដៅ​ពី​លិចទៅ​កើត​ បាន​បុក​នឹង​គោ​យន្ត​កែ​ឆ្នៃ​ ព៌​ណ​បៃតង​ គ្មាន​ស្លាក​លេខ​ បើកបរ​ដោយ​ ឈ្មោះ​ រិ​ន​ រើ​យ​ ភេទ​ប្រុស​ អាយុ​៤១​ឆ្នាំ​ រស់នៅ​ភូមិ​គោក​ថ្មី​ ឃុំ​ពួក​ ស្រក​ពួក​ ខេត្តសៀមរាប​ ឈប់​នៅ​ជាយ​ផ្លូវ​ខាងត្បូង​ក្បាល​ទៅ​ទិស​ខាងកើត​បាន​រត់គេច​ខ្លួន​បាត់​។​

​មូលហេតុ​បណ្តាល​មក​ពី​អ្នក​បើក​ម៉ូតូ​បើកបរ​ក្នុង​ល្បឿន​លឿន​ខ្វះ​ការ​ប្រុង​ប្រយ័ត្ន​។​  ករណីនេះបានប្រគល់​សាកសពជូន​ក្រុម​គ្រួសារ​យក​ទៅ​ធ្វើបុណ្យ​តាម​ប្រពៃណី​។ ចំណែវត្ថុ​តាង​មក​រក្សា​ទុក​នៅ​អធិការដ្ឋាន​ស្រុក​ពួក​ដើម្បី​បន្ត​នីតិវិធី​៕SRP

ខេត្តសៀមរាប៖បុរសម្នាក់ត្រូវបានកម្លាំងការិយាល័យនគរបាលព្រហ្មទណ្ឌកម្រិតធ្ងន់ ដឹកនាំដោយលោកសុខ ម៉េងអ៊ាង ចាប់ខ្លួននៅថ្ងៃទី ៦ ខែធ្នូ ម្សិលមិញ ពាក់ព័ន្ទករណី អំពើលួច មានស្ថានទម្ងន់ទោស ប្រព្រឹត្តក្នុងក្រុងសៀមរាប ចំនួន៤ករណី។

មន្ត្រីនគរបាលព្រហ្មទណ្ឌកម្រិតធ្ងន់ខេត្តសៀមរាប បានថ្លែងប្រាប់សៀមរាបប៉ុស្តិ៍ នៅព្រឹកនេះថា ជនសង្ស័យ ឈ្មោះ យ៉ាន់ បូរី ភេទប្រុស អាយុ៣៨ឆ្នាំ មុខរបរគ្មាន រស់នៅភូមិកំព្រុំ ឃុំឃុនរាម ស្រុកបន្ទាយស្រី ខេត្តសៀមរាប។

មន្ត្រីនគរបាលបានបន្តថា នៅក្នុងអំឡុងខែ តុលា និង ខែ វិច្ឆិកា ឆ្នាំ២០២១ ជនសង្ស័យ ឈ្មោះ យ៉ាន់ បូរី បានធ្វើសកម្មភាពផ្លោះរបង ចូលលួច ទ្រព្យសម្បត្តិ ចំនួន ៤ដងខាងក្រោម៖

ករណីទី១ កាលពីវេលាម៉ោង ០២និង ៣០នាទី យប់ថ្ងៃទី១៨ខែតុលា ឆ្នាំ២០២១ ត្រង់ចំណុច ហាងលក់ទូរស័ព្ទរបស់ជនរងគ្រោះ ឈ្មោះ រ៉ែម រាប ស្ថិតវត្តបូព៌ ជនសង្ស័យលួចយកកូនសោទូចាក់ បើកយកទូរ ស័ព្ទម៉ាក oppo និង vivo ចំនួន៨គ្រឿង។

ករណីទី២ កាលពីវេលាម៉ោង១និង ៤០នាទី ថ្ងៃទី២០ ខែវិច្ឆិកា ឆ្នាំ២០២១ ត្រង់ចំណុចផ្ទះជនរងគ្រោះ ឈ្មោះ ចាន់ ធឿន ស្ថិតក្នុងភូមិគោកតាចាន់ បានផ្លោះរបងចូលលួចយកប្រាក់ដុល្លា ៧០០០$ និងទូរស័ព្ទ sumsung ១គ្រឿង។

ករណីទី៣ កាលពីវេលាម៉ោង២២ ថ្ងៃទី២៨ ខែវិច្ឆិកា ឆ្នាំ២០២១ លើជនរងគ្រោះ ឈ្មោះ ហេង សៀក ត្រង់ចំណុចភូមិសាលាកន្សែង ជនសង្ស័យ ចូលលួចយកទូរស័ព្ទ៤គ្រឿង ( iPhone 6plus ០១គ្រឿង, xs max ០១គ្រឿង, oppo ០១គ្រឿង និង reall me ០១គ្រឿង )។

ករណីទី៤ កាលពីវេលាម៉ោង២និង៥០នាទី យប់ឈានចូលថ្ងៃទី២៩ ខែវិច្ឆិកា ឆ្នាំ២០២១ លើជនរងគ្រោះ ឈ្មោះគុជ សុវណ្ណ ត្រង់ចំណុចភូមិខ្នារ បានយកឈើឆ្កឹះយកកាបូប របស់ជនរងគ្រោះទុកក្នុងបន្ទប់ ក្នុងកាបូបមានប្រាក់ដុល្លារ៥០០ ប្រាក់ខ្មែរ ៥ម៉ឹនរៀល។

មន្ត្រីនគរបាលបានបញ្ជាក់ថាតាមចម្លើយសារភាព របស់ជនសង្ស័យ ឈ្មោះ យ៉ាន់ បូរី បានឆ្លើយសារភាពថា ខ្លួនពិតជាបានធ្វើ សកម្មភាពករណីខាងលើនេះ ពិតប្រាកដមែន ប៉ុន្តែ ករណីទី១ ខ្លួនលួចបានទូរស័ព្ទ ០៦គ្រឿង ករណីទី២ លួចបានប្រាក់ដុល្លា ៣០០០$ និងទូរស័ព្ទ ០១គ្រឿង ករណីទី៣ មិនឆ្លើយសារភាពនោះទេ និងករណីទី៤ លួចបានប្រាក់ ៤ម៉ឺនរៀល។ ចំពោះប្រាក់ដែលលួចបាន ខ្លួនបានចាយអស់ ចំណែកទូរស័ព្ទ ខ្លួនបានលក់ឲ្យពួកម៉ូតូ ឌុបមុខផ្សារលើ យកប្រាក់ចាយអស់ហើយ។

សូមបញ្ជាក់ថាចំពោះករណីទាំង០៤ ខាងលើនេះគឺមាន video camera ថតអំពីសកម្មភាព របស់ជនសង្ស័យ ឈ្មោះ យ៉ាន់ បូរី នៅកន្លែងកើតហេតុ៕SRP