ភ្នំពេញ៖រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ លោកវេង សាខុន បានឲ្យដឹងថា លទ្ធផលនៃការនាំចេញកសិផលកម្ពុជា ទៅកាន់គោលដៅ ៩០ ប្រទេស ក្នុងរយៈពេល ៩ខែ ឆ្នាំ២០២១ មានចំនួន ៥,៩៣។

លោកវេង សាខុន បានបញ្ជាក់ថាយោងតាមប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) របស់អគ្គនាយកដ្ឋានកសិកម្ម នៃកក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា លទ្ធផលនៃការនាំចេញកសិផលទៅកាន់ ៩០ប្រទេស នៅក្នុងរយៈពេល៩ខែ ឆ្នាំ២០២១ មានចំនួន ៥,៩៣ លានតោន ដែលក្នុងនេះការនាំចេញទៅកាន់៖
១. ប្រទេសវៀតណាម មានចំនួន ៦៤,១១%
២. ប្រទេសថៃ មានចំនួន ២១,៤៩%
៣. ប្រទេសចិន មានចំនួន ៩,៦៩%
៤. ទៅកាន់គោលដៅប្រទេសចំនួន ៨៧ ផ្សេងទៀតមានចំនួន ៤,៧១% តែប៉ុណ្ណោះ៕SRP

ភ្នំពេញ៖នាយករដ្ឋមន្ត្រីហ៊ុន សែន បានចេញសារាចរដោយធ្វើការណែនាំ ចំនួន ៤ចំណុច ដើម្បីទប់ស្កាត់ការវាយកម្ទេចនិងបំផ្លិចបំផ្លាញសំណង់អគារបេតិកភណ្ឌ៕SRP

ខេត្តរតនគិរី៖ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សម្ដេចក្រឡាហោម ស ខេង បានប្រាប់ដល់អាជ្ញាធររាជធានី-ខេត្ត ទាំងអស់ត្រូវបម្រើប្រជាពលរដ្ឋ ឲ្យបានល្អបំផុត ក្នុងការប្រកបរបរអាជីវកម្ម របស់ពួកគាត់ ដោយធានាឲ្យបាននូវសេចក្តីសុខ និងគ្មានការភ័យខ្លាច ព្រមទាំង ដោះស្រាយបញ្ហាជូនពួកគាត់ភ្លាមៗ បើសិនជួបបញ្ហាអ្វីមួយ។

សម្ដេចស ខេង ក៏បានណែនាំបន្តដល់អាជ្ញាធរទាំងអស់ ត្រូវពង្រឹងបញ្ហាសន្ដិសុខសណ្ដាប់ធ្នាប់ សាធារណៈ ដោយសម្តេចបានសង្ងត់ធ្ងន់ថា នេះគឺជាកិច្ចការយ៉ាងសំខាន់ចំពោះការអនុវត្តគោនយោបាយ ភូមិ-ឃុំ មានសុត្ថិភាព ដោយសារ សមស្របទៅនឹងស្ថានភាពជាក់ស្ដែង។

សម្ដេចមានប្រសាសន៍ថា «ការថែរក្សា និងការពង្រឹងសន្ដិភាព និងស្ថេរភាពនយោបាយ គឺបម្រើការបោះឆ្នោត ហើយបម្រើជីវិភាពរស់នៅប្រចាំថ្ងៃរបស់ប្រជាពលរដ្ឋ និងសង្គមកម្ពុជាយើង។ ចឹងទេ បញ្ហានេះ យើងមិនអាចបន្ធូរដៃ ហើយគេហៅថា សន្ដិភាពនិយម ស្ពឹកស្រពន់ មិនទទួលខុសត្រូវ ឬមិនដោះស្រាយទេ។ ចាំបាច់ត្រូវធ្វើយ៉ាងម៉េច? ដើម្បីប្រជាពលរដ្ឋ ឱ្យពួកគាត់រស់នៅប្រកបអាជីវកម្ម ដោយគ្មានការភ័យខ្លាច»។
សម្ដេចបានគូសបញ្ជាក់បន្ដទៀតថា រដ្ឋបាលរាជធានី-ខេត្ត ឬ ស្រុក-ក្រុង គឺជាតួអង្គដ៏មានសារសំខាន់ ក្នុងការគ្រប់គ្រងសន្ដិសុខនៅក្នុងតំបន់ ឬក៏ក្នុងដែនសមត្ថកិច្ចរបស់ខ្លួន ដែលបានគ្រប់គ្រង ធ្វើយ៉ាងណាឱ្យប្រជាពលរដ្ឋរស់នៅមានសេចក្ដីសុខ និងរីកចម្រើន។

សម្ដេច ស ខេង មានប្រសាសន៍បែបនេះ ក្នុងឱកាសអញ្ជើញជាអធិបតីដ៏ខ្ពស់ខ្ពស់ ក្នុងពិធីប្រកាសចូលកាន់មុខតំណែង អភិបាលអភិបាលខេត្តរតនគិរី ថ្មី នាថ្ងៃទី១២ ខែតុលា ម្សិលមិញ នៅសាលាខេត្តរតនគិរី៕SRP

ខេត្តសៀមរាប៖អាជ្ញាធរខេត្តសៀមរាប នៅថ្ងៃទី១២​ ខែតុលា ម្សិលមិញ បានចេញលិខិតមួយទំព័របំភ្លឺពាក់ព័ន្ធនឹងការលើកឡើងក្នុងបណ្តាញសង្គមហ្វេសបុកកាលពីថ្ងៃទី១១ ខែតុលា ឆ្នាំ២០២១ អំពីបញ្ហាដីធ្លីនៅភូមិដកពោធិ៍ សង្កាត់ស្លក្រាម ក្រុងសៀមរាប ខេត្តសៀមរាប។ សូមអានសេចក្តីបំភ្លឺដូចមានភ្ជាប់មកជាមួយខាងក្រោម៖

ខេត្តរតនគិរី៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំឱ្យខិតខំថែរក្សា និងការពារព្រៃឈើ ព្រមទាំងធនធានធម្មជាតិផ្សេងៗទៀតដែលមានក្នុងខេត្តឱ្យបានល្អ។

សម្ដេចស ខេង ក៏បានណែនាំអភិបាលខេត្តថ្មី រួមទាំងថ្នាក់ដឹកនាំមន្រ្តីរាជការស៊ីវិល និងកងកម្លាំង ពិសេសកម្លាំងការពារព្រំដែន សូមការពារឱ្យបានដាច់ខាតនូវបូរណភាពទឹកដី និងអធិបតេយ្យភាពជាតិ ពង្រឹងកិច្ចសហប្រតិបត្តិការជាមួយខេត្តជាប់ព្រំដែនដើម្បីជំរុញការអភិវឌ្ឍព្រំដែនឱ្យទៅជាព្រំដែនមានទាំងសន្តិភាព និងរីកចំរើនលើវិស័យសេដ្ឋកិច្ច និងពាណិជ្ជកម្ម ព្រមទាំងខិតខំពង្រឹងកិច្ចសហប្រតិបត្តិការទប់ស្កាត់បទល្មើសឆ្លងដែនគ្រប់ប្រភេទ។

សម្ដេចសខេងមានប្រសាសន៍នៅ ថ្ងៃអង្គារ៍ ទី១២ ខែតុលា ឆ្នាំ២០២១នេះ ក្នុងពិធីប្រកាសចូលកាន់មុខតំណែងអភិបាលខេត្តរតនគិរី។

សម្ដេចបានផ្ដល់អនុសាសន៍ណែនាំឱ្យរដ្ឋបាលខេត្តរតនគិរី បន្តខិតខំថែរក្សាការពារសុខសន្តិភាព និងសណ្ដាប់ធ្នាប់ ដែលជាគន្លឹះនៃធានាការអភិវឌ្ឍសេដ្ឋកិច្ច សង្គមផងដែរ។

សម្ដេចស ខេង ក៏បានផ្ដល់ទស្សនៈឱ្យថ្នាក់ដឹកនាំ និងមន្ត្រីចំណុះរដ្ឋបាលខេត្តទាំងអស់ ខិតខំប្រមូល និងដោះស្រាយបញ្ហាប្រជាពលរដ្ឋឱ្យបានល្អ បើកចិត្តឱ្យបានទូលាយដើម្បីទទួលយកមតិរិះគន់កែលម្អរ និងសំណូមពរនានាពីប្រជាពលរដ្ឋ និងពីមជ្ឈដ្ឋាននានា។ ជាមួយគ្នានេះ សម្ដេចបានណែនាំឱ្យយកចិត្តទុកដាក់ផ្ដល់ភាពកក់ក្ដៅជូនប្រជាពលរដ្ឋឱ្យបានល្អ ផ្ដល់សេវាសាធារណៈដោយគ្មានការរើសអើង និងប្រកាន់និន្នាការនយោបាយ។

សូមជម្រាបថាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំងលោក ញ៉ែម សំអឿន ជាអភិបាលខេត្តរតនគិរី ជំនួសលោក ថង សាវុន ដែលត្រូវបានត្រាស់បង្គាប់តែងតាំងជាអភិបាលខេត្តមណ្ឌលគិរី៕SRP

ខេត្តសៀមរាប៖នាយផ្នែករដ្ឋបាលព្រៃឈើបន្ទាយស្រី លោកឡុង សារ៉ា បានបញ្ជាក់ថា៖ពួកគាត់ទៅប្រមូលអាកាស្យានៅក្នុងចំការឈេីដាំរបស់រដ្ឋ​ រួចហេីយពួកគាត់ទៅលួចក្រៀវ​ ដេីមឈេីទុកអោយងាប់​ រួចហេីយពួកគាត់​ ទៅយកទៀត​ មិនមែនពួកាត់ទៅប្រមូលអុសពីក្នុងព្រៃទេ។

ចំណែកលោក ម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាបបានបញ្ជាក់ថា៖នេះមិនមែនជាឈើក្រាក់ទេ សូមពិនិត្យមើលអោយមែនទែន ឈើនេះជាដើមអាកាស្យាដែលខាងរដ្ឋបាលព្រៃឈើដាំនៅជើងភ្នំគូលេនត្រូវពួកគាត់ទៅយកមក។

សូមបញ្ជាក់ថា នៅម៉ោងប្រមាណ១១ និង២០នាទី ថ្ងៃទី១២ ខែតុលា ឆ្នាំ២០២១ នេះ មានរថយន្តចំនួន ២គ្រឿង ទី១លុចស៊ិសRX៣០០ ពណ៌ស្កពាក់ស្លាកលេខភ្នំពេញ ២AK ៤៥២៣ និងមួយគ្រឿងទៀតពណ៌ខ្មៅ ពាក់ស្លាកលេខភ្នំពេញ ២AE២៦៨៧ ដោយពួកគេស្លៀកពាក់ស៊ីវិលបានកាក់រ៉ឺម៉ករបស់ប្រជាពលរដ្ឋ ដឹកដើមក្រាក់ កាស្យា នៅខាងត្បូងរង្វង់មូល ស្រុកបន្ទាយស្រី។ មិនដឹងថាមានបំណងអ្វីពិតប្រាកដនោះទេ? ។ ទោះជាយ៉ាងណាករណីនេះ អ្នកឃើញហេតុការណ៍បានសុំ សំណូមពរ ដល់លោកទៀ សីហា អភិបាលខេត្តសៀមរាប និងលោកឃឹម ហ្វីណង់អភិបាលស្រុកបន្ទាយស្រី ជួយពិនិត្យមើលករណីនេះផង។

ពាក់ព័ន្ធទៅនឹងករណីនេះ ឆ្លើយតបទៅនឹងបណ្ដាញសៀមរាបប៉ុស្តិ៍ លោកទៀ សីហាអភិបាលខេត្តសៀមរាប បានបញ្ជាក់យ៉ាងខ្លីថា៖មិនមែនទេដឹង មេព្រៃណាទៅឃាត់ឈើបែបនេះ៕SRP

ខេត្តកំពង់ចាម​៖ក្នុង​កិច្ចប្រជុំសាមញ្ញលើកទី២៩​ អាណត្តិទី៣ របស់ក្រុមប្រឹក្សាខេត្តកំពង់ចាម​ នៅថ្ងៃទី១២ ខែតុលា ឆ្នាំ២០២១​នេះ​ លោក​ អ៊ុន​ ចាន់ដា​ អភិបាលខេត្តកំពង់ចាម​ បានបញ្ជាដល់​មន្ទីរ​កសិកម្ម​រុក្ខាប្រមាញ់​និងនេសាទខេត្ត​ ដាក់​ផែនការ​ឲ្យ​ខណ្ឌរដ្ឋបាលជលផល​ ត្រូវរៀបចំ​កម្លាំង​ជំនាញ​ចុះ​ល្បាត​ត្រួតពិនិត្យ​ជាប្រចាំ​​នៅ​តាម​ដង​ទន្លេ​មេគង្គ​ ក៏ដូចជា​តំបន់​អតីត​ឡូ​នេសាទនានា​ ក្នុង​ដែន​សមត្ថកិច្ច​របស់​ខ្លួន​ ដេីម្បី​ទប់ស្កាត់​បង្រាប​នូវ​ឧបករណ៍​នេសាទ​ខុសច្បាប់​ ដែល​ប្រព្រឹត្ត​ឡើង​ដោយ​ជន​ឆ្លៀតឱកាស​មួយចំនួន​​ ក្នុងរដូវទឹកឡេីងនេះ​ ដោយ​ក្នុង​អំឡុង​ខែតុលា​ ឆ្នាំ​២០២០​ កន្លងទៅនេះ​ ក៏មានទូកអូសយ៉ាំងកាវ បើកបុក​ទូក​ប្រជាពលរដ្ឋ​ នៅកណ្ដាលទន្លេ រវាងឃុំរំចេក និងឃុំកោះសំរោង ស្រុកកំពង់សៀម​ បណ្ដាលឲ្យស្លាប់​​មនុស្ស​ ៣នាក់ និងរងរបួស​ម្នាក់​ផងដែរ​។

លោកអ៊ុន​ ចាន់ដា​ ក៏បាន​ជំរុញ​ដល់មន្ទីរសាធារណការ​និងដឹក​ជញ្ជូនខេត្ត​ ក៏ដូចជា​មន្ត្រី​ពាក់ព័ន្ធ​ ឲ្យ​រៀបចំ​គម្រោង​ជួសជុល​ផ្លូវ​ក្រាល​កៅស៊ូ​មួយ​ចំនួន​ ដែល​រងការខូចខាត​ដោយសារ​បញ្ហា​ដក់​ទឹក​ ក្នុងនោះ​ក៏​មាន​ផ្លូវ​នៅ​តំបន់​ថ្មគោល​ ភូមិ​ចុង​ថ្នល់​ និង​ភូមិ​ឡឥដ្ឋ​ សង្កាត់​បឹងកុក​ ក្រុង​កំពង់ចាម​ ដែល​ត្រូវ​អនុវត្ត​នៅ​រដូវ​ស្ងួត​ទឹក​ភ្លៀង​ខាងមុខនេះ​។

​ក្នុង​កិច្ចប្រជុំនេះដែរ​ លោក​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ បាន​លើក​យក​សេចក្តី​ព្រាង​របៀបវារៈ​សំខាន់​ៗ​ មក​ពិភាក្សា​ រួមមាន​ ១-ការពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២៨ អាណត្តិទី៣ របស់ក្រុមប្រឹក្សាខេត្ត។
២-ការ​ពិនិត្យ ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារ ប្រចាំត្រី មាសទី៣ (កក្កដា សីហា កញ្ញា) និងទិសដៅការងារប្រចាំត្រីមាសទី៤ ឆ្នាំ២០២១ របស់ រដ្ឋបាលខេត្តកំពង់ចាម។
៣-ការពិនិត្យ ពិភាក្សា និងអនុម័តសេចក្តីព្រាងផែនការសកម្មភាពការងារត្រីមាសទី៤( តុលា វិច្ឆិកា​ ធ្នូ​ )​ ឆ្នាំ២០២១ របស់រដ្ឋបាលខេត្តកំពង់ចាម។
៤-ការ​ពិនិត្យ ពិភាក្សា និងអនុម័តសេចក្តីព្រាងសេចក្តីសម្រេចស្តីពីការបង្កើតគណៈកម្មការ រៀបចំគម្រោងខេត្ត​ ឆ្នាំ២០២២​៕SRP

ខេត្តកំពង់ធំ៖លោកលឹម ប៊ុនហេង ប្រធានការិយាល័យរៀបចំដែនដីនគរូបនីយកម្មសំណង់និងភូមិបាលស្រុកស្ទោង ត្រូវបានថ្នាក់ដឹកនាំសម្រេចដកចេញពីមុខតំណែង។

ការសម្រេចដកមុខតំណែងក្រោយពីមានព័ត៌មានលេចធ្លាយថា លោកលឹម ប៊ុនហេង ប្រធានភូមិបាលស្រុកស្ទោង បានប្រព្រឹត្តអំពើពុករលួយយ៉ាងធ្ងន់ធ្ងរ។

យោងតាមប្រភពពីមន្ត្រីរដ្ឋបាលស្រុកស្រុកស្ទោងបានឲ្យដឹងថាលោកលឹម ប៊ុនហេង បានឃុបឃិតគ្នាជាមួយនិង ឈ្មួញឲ្យសាងសង់ផ្ទះលើចំណីផ្លូវជាតិលេខ៦ និងកន្លែងតំបន់ហាមឃាត់ មិនឲ្យសាងសង់ផ្ទះឬសាងសង់សំណង់រ៉ឺង.ព្រោះជាចំណីផ្លូវសាធារណ: ដែលរាជរដ្ឋាភិបាលកម្ពុជាមិនអនុញ្ញាតឲ្យមានការសាងសង់ឡើយ។ ប៉ុន្តែលោក លោកលឹម ប៊ុនហេង បានឃុបឃិតគ្នាឲ្យមានការសាងសង់ផ្ទះលើដីហាមឃាត់ជាច្រើនកន្លែងផ្ទុយពីអនុក្រឺត្យណែនាំរបស់រាជរដ្ឋាភិបាល។

ប្រភពបានឱ្យដឹងទៀតថា ករណីខាងលើនេះប្រធានគណៈបញ្ជាការឯកភាពរដ្ឋបាលស្រុក និងមន្រ្តីសាលាស្រុក រួមទាំងប្រជាពលរដ្ឋផ្តិតមេដៃដកហូតតំណែង មនុស្សចំនួនពីរនាក់។
ទី១លោក លោក លឹម ប៊ុនហេង ប្រធានការិយាល័យភូមិបាលស្រុកស្ទោង មកជាមន្រ្តី ទី២ លោកភន សំហូត ស្មៀនឃុំបន្ទាយស្ទោង មកជាមន្រ្តីបំរើការងារនៅសាលាស្រុក។ ការដកតំណែងនេះ គឺបណ្តាលមកពីលោក ទាំងពីរមិនមកធ្វើការនៅការិយាល័យ បែរជាយកផ្ទះផ្ទាល់ខ្លួនធ្វើជាកន្លែងធ្វើការ និងប្រព្រឹត្តអំពើពុករលួយផងដែរ។

ប្រភពបានបញ្ជាក់ថា លោក លឹម ប៊ុនហេង ប្រធានការិយាល័យភូមិបាលស្រុកស្ទោង បានធ្វើឲ្យប្រជាពលរដ្ឋ មិនពេញចិត្ត បង្ករឲ្យមានការរិះគន់យ៉ាងច្រើនថា បានរត់ការដើម្បីកាត់ប្លង់ដី យកលើសពីកម្រៃសេវាដែលអន្តរក្រសួងបានប្រកាស បង្ករអំពើពុករលួយយ៉ាងខ្លាំង ដូចជាកាត់ប្លងដីមូយប្លង់ ត្រូវអស់លុយពី ៨០០ដុល្លាររហូតរាប់ពាន់ដុល្លាឡើង។ ចំណែកការសាងសង់ផ្ទះ យកពីគេ ៥០០ដុល្លារ ដល់៣០០០ដុល្លារ និងបានលុយក្រៅដែលជាថ្នូរនិងការឲ្យសាងសង់ផ្ទះលើដីចំណីផ្លូវ។

ប្រជាពលរដ្ឋរស់នៅក្នុងស្រុកស្ទោង ខេត្តកំពង់ធំ
បានសម្តែងនូវសេចក្តីត្រេតអរ ជាខ្លាំងបន្ទាប់ពីបានដឹងដំណឹងថា រដ្ឋបាលស្រុកស្ទោង បានប្រជុំគណៈបញ្ជាការឯកភាពរដ្ឋបាលស្រុក សម្រេចដកលោក លឹម ប៊ុនហេង ប្រធានការិយាល័យភូមិបាលស្រុកស្ទោង និងលោក ភន សំហូត ស្មៀនឃុំបន្ទាយស្ទោង៕SRP

ខេត្តសៀមរាប៖លោកស៊ុំ ម៉ាប់ ក្នុងនាមក្រសួងវប្បធម៌និងវិចិត្រសិល្បៈបានថ្លែងថា៖ ទីក្រុងសៀមរាប ត្រូវបានជ្រើសរើសជាទីក្រុងវប្បធម៌អាស៊ានសម្រាប់ឆ្នាំ ២០២១-២០២២ តាមរយៈកិច្ចប្រជុំលើក ទី៩ របស់ក្រុមរដ្ឋមន្រ្តីអាស៊ាន ទទួលបន្ទុកវប្បធម៌ និងសិល្បៈ ពីព្រោះក្រុងសៀមរាប គឺជាអតីតរាជធានីនៃចក្រភពខ្មែរ សម្បូរទៅដោយមរតក វប្បធម៌ទាំងរូបីយ និងអរូបីយ ដែលជាគោលដៅ ទេសចរណ៍វប្បធម៌ ធម្មជាតិដ៏ល្បីល្បាញក្នុងពិភពលោក។ លោកថា ដោយឡែកព្រឹត្តិការណ៍ដាំដើមឈើ និង ជិះកង់ក្នុងរមណីយដ្ឋានអង្គរជាបេតិកភណ្ឌពិភពលោកពេលនេះ ជាកម្មវិធីមួយដែលក្រសួងវប្បធម៌រៀបចំឡើង ដើម្បីបង្ហាញពីសក្ដានុពលរបស់ក្រុងសៀមរាប ដែលជាទីក្រុងវប្បធម៌ដ៏ល្បីល្បាញ របស់កម្ពុជា ទៅដល់ប្រទេសដែលជាសមាជិកផងដែរ។

លោកស៊ុំ ម៉ាប់ ថ្លែងយ៉ាងដូច្នេះធ្វើឡើងនៅមុខប្រាសាទអង្គរវត្ត ថ្ងៃទី១១ខែតុលា ឆ្នាំ២០២១ព្រឹកមិញនេះ ក្នុងឱកាស តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្នុងពិធី ក្រសួងវប្បធម៌និងវិចិត្រសិល្បៈ បានសហការជាមួយបណ្តាអង្គទូតអាស៊ាននិងប្រទេសដៃគូរួមគ្នា ដាំដើមឈើ និងជិះកង់ដើម្បីអបអរសាទរទីក្រុងសៀមរាបជាទីក្រុងវប្បធម៌អាស៊ាន។ សូមជម្រាបថា ក្រសួងវប្បធម៌ និងវិចិត្រសិល្បៈកម្ពុជាមាន តួនាទីជាប្រធានប្តូរវេនអាស៊ានទទួលបន្ទុកវប្បធម៌ និងសិល្បៈ សម្រាប់ឆ្នាំ២០២០-២០២២៕SRP

ខេត្តកំពង់ចាម​៖លោកអ៊ុន​ ចាន់ដា​ អភិបាលខេត្តកំពង់ចាម​ និងជា​ប្រធាន​គណៈកម្មាធិការគ្រប់គ្រង់គ្រោះមហន្តរាយខេត្ត​ នៅព្រឹក​មិញនេះ​ បាន​ដឹកនាំ​មន្ត្រី​ជំនាញ​ពាក់ព័ន្ធ​ និង​អាជ្ញាធរ​មូលដ្ឋាន​​ ចុះពិនិត្យ​ស្ថានភាព​ច្រាំង​ទន្លេ ដែលរងការបាក់ស្រុត បណ្តាលឲ្យ​ប៉ះពាល់​ដល់​លំនៅឋាន​ប្រជាពលរដ្ឋ​ ស្ថិតនៅក្នុងភូមិល្វាលេី​ ឃុំស្តៅ​ ស្រុកកងមាស​ ខេត្តកំពង់ចាម​។​

លោកអ៊ុន​ ចាន់ដា​ បាន​ជំរុញ​ដាក់​ផែនការ​ឲ្យ​មន្ទីរ​ធនធាន​ទឹក​និង​ឧតុនិយម​ រួម​នឹង​អាជ្ញាធរ​មូលដ្ឋាន​ ត្រូវ​ប្រមូល​ទិន្នន័យ​​ឲ្យ​បាន​គ្រប់​ជ្រុងជ្រោយ​ផង​ដែរ​ ដេីម្បី​ឈាន​ទៅ​ដល់​ បង្កើត​ផែនការ​ដោះស្រាយ​បញ្ហា​ចំពោះ​មុខ​ ព្រោះ​ក្នុង​១ឆ្នាំ​ៗ​ មាន​ប្រជាពលរដ្ឋ​ជា​ច្រើន​គ្រួសារ​ ដែលត្រូវ​ប្រឈម​ និង​រងគ្រោះ​ដោយ​ការ​បាក់​ច្រាំង​ ជាបន្តបន្ទាប់​។ អភិបាលខេត្ត ក៏បានផ្តល់​ប្រេង​ម៉ាស៊ូត​ ចំនួន​ ៣០០លីត្រ​ ជូនដល់​គណៈកម្មាធិការគ្រប់គ្រង់គ្រោះមហន្តរាយស្រុកកងមាស​ ដេីម្បីធ្វេីការបូមរំដោះទឹកចេញពីក្នុង​ភូមិឋាន ​របស់ពលរដ្ឋ​ ដែលជា​ជំនាន់​ទឹកភ្លៀង​ផងដែរ​។

បើតាមលោក ភោគ សាវុធ អភិបាលស្រុកកងមាស បាន​ឲ្យដឹងថា​ ក្នុងចំណោម​ប្រជាពលរដ្ឋ​ ១០គ្រួសារ កំពុងរងផលប៉ះពាល់ ដោយគ្រោះធម្មជាតិបាក់ស្រុតច្រាំងទន្លេនេះ​ មានប្រជាពលរដ្ឋ ១គ្រួសារ ប្រឈមខ្លាំងដែលត្រូវរុះរើជាបន្ទាន់។

លោកអភិបាលស្រុក បានថា គ្រោះធម្មជាតិបាក់ស្រុតច្រាំង នៅចំណុចខាងលើនេះ បណ្តាលឲ្យដាច់ផ្លូវប្រវែង១៥ម៉ែត្រ ។ ដោយឡែក ច្រាំងទន្លេដែលបានបាក់ស្រុតនោះមានទំហំ ទទឹង ១០ម៉ែត្រ បណ្តោយ ១០០ម៉ែត្រ មិនបណ្តាលឲ្យខូចខាត ផ្ទះ​សំបែង​ប្រជាពលរដ្ឋនោះទេ តែផ្ទះប្រជាពលរដ្ឋ​ ចំនួន ៥គ្រួសារ កំពុងរងផលប៉ះពាល់ ក្នុងនោះ ៤គ្រួសារ ប្រឈម​តិចតួច​ និង ១គ្រួសារ ប្រឈមខ្លាំងដែលត្រូវរុះរើ ជាបន្ទាន់។

លោកក៏បានអះអាងថា ផ្អែកតាមការចុះពិនិត្យជាក់ស្ដែង មូលហេតុដែលបណ្ដាលឲ្យបាក់ស្រុតនោះ គឺដោយសារមានផ្លូវទឹក ននៅខាងក្រោមដី៕SRP

ខេត្តបាត់ដំបង៖ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ សម្ដេចក្រឡាហោម ស ខេង បានបញ្ជាឱ្យថ្នាក់ដឹកនាំរដ្ឋបាលខេត្តទាំងអស់ បន្តភារកិច្ចការពារបូរណភាពទឹកដី ឱ្យបានជាដាច់ខាតជាមួយនឹងការខិតខំពង្រឹងកិច្ចសហប្រតិបត្តិការ ជាមួយខេត្តជាប់ព្រំដែនដើម្បីធានាព្រំដែនសន្តិភាព និងអភិវឌ្ឍន៍ ធ្វើយ៉ាងណាឱ្យពលរដ្ឋមានទីផ្សារលក់ផលិតផល ឱ្យបានកាន់តែច្រើន ជំរុញការចរាចរណ៍ផ្លាស់ប្ដូរទំនិញទៅវិញទៅមក ពង្រឹងកិច្ចសហប្រតិបត្តិការទប់ស្កាត់បទល្មើស ឆ្លងដែនគ្រប់ប្រភេទ ពិសេសបទល្មើសគ្រឿងញៀន និងបទល្មើសឆ្លងដែនខុសច្បាប់។

សម្ដេច ស ខេង ក៏បានរំលឹកឱ្យថ្នាក់ដឹកនាំ និងមន្ត្រីរាជការចំណុះរដ្ឋបាលខេត្តទាំងអស់ ខិតខំថែរក្សាការពារសន្តិភាព សន្តិសុខ សណ្ដាប់ធ្នាប់សាធារណៈ ជំរុញគោលនយោបាយភូមិឃុំមានសុវត្ថិភាព ដែលជាបន្ទាត់នយោបាយមួយក្នុងការពង្រឹងសន្តិសុខសាធារណៈ និងដោះស្រាយបញ្ហាប្រឈមនានានៅមូលដ្ឋាន ដោយគោលនយោបាយនេះ ត្រូវការការផ្សព្វផ្សាយ អនុវត្ត និងជំរុញការគាំទ្រពីប្រជាពលរដ្ឋ។

សម្ដេចស ខេង ថ្លែងយ៉ាងដូច្នេះនៅព្រឹកមិញនេះក្នុងឱកាសអញ្ជើញប្រកាសតែងតាំងលោក សុខ លូ ជាអភិបាលខេត្តបាត់ដំបង ជំនួសលោក ងួន រតនៈ ផ្ទេរទៅកាន់អភិបាលខេត្តកំពង់ធំ។

សម្ដេចក៏បានគូសបញ្ជាក់អំពីព្រឹត្តិការណ៍ធំៗនៅឆ្នាំ២០២២ ជាពិសេសព្រឹត្តិការណ៍ដែលមិនអាចរំលងបាន គឺការបោះឆ្នោតជ្រើសរើសសមាជិកក្រុមប្រឹក្សា ឃុំ សង្កាត់ ដែលជាផ្នែកមួយនៃការពង្រឹងលទ្ធិប្រជាធិបតេយ្យ ពង្រឹងការកសាងអំណាចរដ្ឋបាលនៅមូលដ្ឋាន ដើម្បីធានាប្រសិទ្ធភាពនៃការបំពេញភារកិច្ច បំរើជាតិ និងប្រជាជន តាមរយៈការដាក់ចេញគោលនយោបាយកំណែទម្រង់វិមជ្ឈការ និងវិសហមជ្ឈការ។ ដោយឡែកព្រឹត្តិការណ៍ជាតិធំមួយទៀត គឺកម្ពុជានឹងទទួលធ្វើជាប្រធានប្ដូរវេនកិច្ចប្រជុំអាស៊ាន ខណៈនៅឆ្នាំ២០២៣ កម្ពុជានឹងរៀបចំការបោះឆ្នោតជ្រើសតាំងតំណាងរាស្រ្ត និងធ្វើជាម្ចាស់ផ្ទះព្រឹត្តិការណ៍កីឡាអាស៊ី។

សម្ដេចបានបន្តគូសបញ្ជាក់អំពីការពង្រឹងទំនាក់ទំនងការងាររវាងក្រុមប្រឹក្សា និងគណៈអភិបាល ការងារកំណែទម្រង់មុខងារសាធារណៈ កំណែទម្រង់វិមជ្ឈការ និងវិសហមជ្ឈការ ដំណើរការពិនិត្យ និងចុះឈ្មោះបោះឆ្នោត ព្រមទាំងជំរុញការយកចិត្តទុកដាក់លើទឹកចិត្តដល់តួអង្គ៤នៅមូលដ្ឋាន រួមមានមេឃុំ ចៅសង្កាត់ ស្មើនឃុំស្មៀនសង្កាត់ មេប៉ុស្តិ៍នគរបាលឃុំសង្កាត់ និងមេភូមិ។

សម្ដេច ស ខេង ក៏បានលើកទឹកចិត្តថ្នាក់ដឹកនាំ និងមន្ត្រីទាំងអស់ ខិតខំយកចិត្តទុកដាក់រួមគ្នាដោះស្រាយ បញ្ហាជូនប្រជាពលរដ្ឋ ក្នុងនោះសម្ដេចផ្ទាល់ក៏បានបង្កើតយន្តការប្រមូលបញ្ហាយកមកដោះស្រាយតាមរយៈបណ្ដាញទំនាក់ទំនងសង្គមហ្វេសប៊ុកផងដែរ៕SRP

ខេត្តព្រះសីហនុ៖លោកសាយ សំអាល់ បានណែនាំដល់មន្ត្រីមូលដ្ឋាន ឲ្យបន្តបង្កើនធ្វើអំពើល្អ និងបម្រើពលរដ្ឋឱ្យកាន់តែប្រសើរឡើងថែមទៀតព្រោះជាមូលដ្ឋានគាំទ្រដ៏រឹងមាំរបស់គណបក្សប្រជាជនកម្ពុជា។

លោកថ្លែងណែនាំបែបនេះ នាថ្ងៃទី១០ ខែតុលា ម្សិលមិញ នៅខេត្តព្រះសីហនុ ក្នុងឱកាសដឹកនាំកិច្ចប្រជុំដើម្បីពិនិត្យលើវឌ្ឍនភាពការងារ សម្រាប់ការត្រៀមការបោះឆ្នោត នាពេលខាងមុខ ក្នុងក្របខណ្ឌឆ្ពោះទៅរកការបោះឆ្នោតជ្រើសរើសសមាជិកក្រុម ប្រឹក្សាឃុំសង្កាត់អាណត្តិទី៥ ឆ្នាំ២០២២។

លោកសាយ សំអាល់ ប្រធានក្រុមការងារបានបន្តជំរុញឱ្យសមា ជិកសមាជិកាក្រុមការងារបន្តកិច្ចខិតខំប្រឹងប្រែងបន្ថែមទៀតក្នុង ការចុះមូលដ្ឋានឱ្យបានខ្លាំងក្លា។

លោកសាយ សំអាល់ បានថ្លែងកោតសរសើរនិងវាយតម្លៃខ្ពស់ចំពោះការខិតខំប្រឹងប្រែងបំពេញភាកិច្ចរបស់គណ:កម្មាធិការគណបក្សខេត្ត ស្រុក និងឃុំកន្លងមកទាំងការងារនយោបាយ សតិអារម្មណ៍ ចាត់តាំងព្រមទាំងការចិញ្ចឹមចលនានៅតាមមូលដ្ឋាន។

លោកបានថ្លែងថា ចាប់តាំងពីថ្ងៃបដិសន្ធិ គណបក្សប្រជាជនកម្ពុជាបានពុះពារឆ្លងកាត់បណ្តាដំណាក់កាលធំៗ ជាប្រវត្តិសាស្ត្ររបស់ប្រទេសជាតិប្រកបដោយវីរភាព លើមូលដ្ឋានប្រកាន់ខ្ជាប់ឥតប្រែប្រួលនូវ គោលបំណង និងឧត្តមគតិរបស់ខ្លួន គឺឈរនៅខាងប្រជាជន ផ្សារភ្ជាប់រួមសុខទុក្ខជាមួយប្រជាជន គ្រប់កាលៈទេសៈ ប្រឹងប្រែងជម្នះគ្រប់ឧបសគ្គ ហ៊ានធ្វើពលិកម្មឥតរួញរា ដើម្បីប្រទេសកម្ពុជាមួយ ឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម។

លោកក៏បានណែនាំដល់សមាជិកសមាជិកាទាំងអស់យកចិត្តទុកដាក់ខ្ពស់ជំរុញប្រជាពលរដ្ឋដែលរស់នៅក្នុងភូមិឃុំសង្កាត់ដែលបានចុះឈ្មោះបោះឆ្នោតរួច ឱ្យទៅពិនិត្យឈ្មោះក្នុងបញ្ជីបោះ ឆ្នោត និងជំរុញអ្នកដែលមិនទាន់បានចុះឈ្មោះបោះឆ្នោត ឬទើបគ្រប់អាយុឱ្យចុះឈ្មោះបោះឆ្នោត នៅតាមឃុំសង្កាត់ដែលពួកគាត់រស់នៅចាប់ពីថ្ងៃទី១២ ខែ តុលា ដល់ថ្ងៃទី៣០ខែវិច្ឆិកាឆ្នាំ២០២១ និងត្រៀមសម្រាប់ទៅបោះឆ្នោតជូនគណបក្សប្រជាជនកម្ពុជានាថ្ងៃបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់នាថ្ងៃទី៥ ខែមិថុនា ឆ្នាំ២០២២ និងការបោះឆ្នោតជ្រើសរើសតំណាងរាស្ត្រឆ្នាំ ២០២៣ និងការបោះឆ្នោតនាអាណត្តិផ្សេងៗទៀតដើម្បីគណបក្សប្រជាជនកម្ពុជាបន្តដឹកនាំប្រទេស អភិវឌ្ឍជាតិឱ្យរីកចម្រើនខ្លាំងលើគ្រប់វិស័យបន្ថែមទៀត និងថែរក្សាការពារសុខសន្តិភាពដែលកម្ពុជារកបានដោយពិបាកនេះបានគង់វង្សស្ថិតស្ថេរជារយូអង្វែង៕SRP