ភ្នំពេញ៖លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ក្នុងសន្និសីទស្តីពីសមិទ្ធផល សម្រេចបានរយៈពេល៥ឆ្នាំ របស់ក្រសួងកសិកម្ម កាលពីពេលថ្មីៗនេះ ថា ជំងឺដុំពកលើស្បែកគោ-ក្របី( LSD ) បានឆ្លងមកប្រទេស កម្ពុជា កាលពីខែឧសភា ឆ្នាំ២០២១ កន្លងទៅ ដោយក្រុមការងារពាក់ពន្ធ័បាន យកចិត្តទុកដាក់ ចុះអន្តរាគមន៍និងចាត់វិធានការចាំបាច់នានា ដូចជា ការព្យាបាលនិងទិញវ៉ាក់សាំង មកពីបរទេស ដើម្បីទប់ស្កាត់ការរាតត្បាតនៃជំងឺនេះ ដែលរហូតមកដល់បច្ចុប្បន្ន មានសភាពស្ងប់ស្ងាត់ទៅវិញហើយ។

លោកថា បើទោះបីជាជំងឺនេះបានស្ងប់ស្ងាត់ពីក្នុងប្រទេសកម្ពុជា ក៏ពិតមែន ក៏អគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ នៅតែបន្តធ្វើការណែនាំនិងដាស់តឿន ដល់មន្ទីរកសិកម្ម រាជធានីខេត្តទាំងអស់ ជាពិសេសការិយាល័យផលិតកម្ម និងបសុព្យាបាលរាជធានី-ខេត្ត ដែលនៅជាប់ព្រំដែន ត្រូវបន្តអនុវត្តនិងចូលរួមសហការជាមួយអង្គភាព និងអាជ្ញាធរមូលដ្ឋានពាក់ព័ន្ធជាបន្តទៀត ដើម្បីអាចអន្តរាគមន៍ បានទាន់ពេលវេលា ប្រសិនបើមានករណីផ្ទុះជំងឺសត្វណាមួយ។

ក្នុងនាមក្រសួងកសិកម្ម រុក្ខាប្រមាញ់ និង នេសាទ ក៏បានណែនាំដល់មន្ទីរកសិកម្មទាំង២៥រាជធានី-ខេត្ត ត្រូវបន្តតាមដានជំងឺដុំពកលើស្បែកគោ ក្របី ឱ្យបានជាប់ជាប្រចាំ បើទោះបីជាជំងឺនេះ មានសភាពស្ងប់ស្ងាត់ ហើយក៏ ដោយ ដើម្បីទប់ស្កាត់ការចម្លងឱ្យបានទាន់ពេលវេលា និងមានប្រសិទ្ធភាពខ្ពស់។

លោក បន្តថា «ចំពោះជំងឺដុំពកលើស្បែកគោក្របី LSD នេះ គឺជាជំងឺមួយថ្មី ដែលមិនធ្លាប់មាននៅក្នុងស្រុកដូចគ្នា ដែលវាបានកើតឡើងកាលពីឆ្នាំ២០២១ ហើយជំងឺនេះក៏បានស្ងប់ស្ងាត់ទៅវិញផងដែរ ប៉ុន្តែទោះជាយ៉ាងណាក៏ដោយ ក៏អគ្គនាយកដ្ឋានតែងតែដាស់តឿនទៅដល់មន្ទីរបណ្ដារាជធានីខេត្តទាំង២៥ ដែលមានការិយាល័យផលិតកម្មនិងបសុព្យាបាលរាជធានីខេត្ត គឺនៅតែតាមដានបន្ត បើក្នុងករណីថាមានការផ្ទុះជំងឺសត្វណាមួយ មិននិយាយតែជំងឺដុំពកលើស្បែកនេះទេ វាមានជំងឺផ្សេងៗ ជាច្រើនទៀត ដែលយើងត្រូវតែចុះអន្តរាគមន៍ឱ្យបានទាន់ពេលវេលា ។

សូមបញ្ជាក់ថា ជំងឺដុំពកស្បែកគោ ក្របី (Lumpy Skin Disease-LSD) ជាជំងឺបង្កដោយវីរុសក្នុងក្រុមPoxviridac នៃប្រភេទ Capripoxvirus ដែលបានផ្ទុះឡើងជាលើកដំបូងនៅប្រទេសហ្សំប៊ី (Zambia) នៅឆ្នាំ១៩២៩ ហើយវាបានឆ្លងរាលដាលពាសពេញពិភពលោក ក្នុងនោះ មានទ្វីបអាហ្វ្រិក មជ្ឈឹមបូព៌ា អឺរ៉ុបប៉ែកអាគ្នេយ៍ អាស៊ី កណ្តាល អាស៊ី ខាងត្បូង និងប្រទេសចិន ដែលបង្កផលប៉ះពាល់យ៉ាងធ្ងន់ធ្ងរ ដល់គ្រួសារកសិករចិញ្ចឹមសត្វ និងសេដ្ឋកិច្ចជាតិ៕SRP

ខេត្តក្រចេះ អភិបាលរងស្រុកឈ្នួលលោក នូ សុផល បានជួបគ្រោះថ្នាក់ចរាចរណ៍ ដោយបើករថយន្តខ្លួនឯង ក្រឡាប់ធ្លាក់ពីលើផ្លូវចូលប្រឡាយទឹក បណ្ដាលឲ្យស្លាប់បាត់បង់ជីវិត នៅកន្លែងកើតហេតុ។

ហេតុការណ៍នៅចំណុចផ្លូវជាតិលេខ៧​ (ស្នួល-ក្រចេះ)​ ចន្លោះបង្គោលគីឡូម៉ែត្រលេខ​ ២៦៨ ស្ថិតក្នុងភូមិឃ្សឹមក្រៅ ឃុំឃ្សឹម ស្រុកស្នួល​ ខេត្តក្រចេះ​ នៅវេលាម៉ោង២ និង៣០ ទាបភ្លឺ ឈានចូលថ្ងៃទី២៥ ខែកក្កដា ឆ្នាំ២០២២។

យោងតាមរបាយការណ៍នគរបាលចរាចរណ៍ បានឲ្យដឹងថា លោក នូ សុផល អាយុ ៤៥ឆ្នាំ ជនជាតិខ្មែរ​​ មានទីលំនៅភូមិវត្ត សង្កាត់ក្រចេះ ក្រុងក្រចេះ ខេត្តក្រចេះ ធ្វេីដំណេីរពីទិសខាជេីង ឆ្ពោះទៅទិសខាងត្បូង បើករថយន្ដម៉ាកហាយប្រ៊ីតពណ៌ទឹកប្រាក់​ ពាក់ផ្លាកលេខ ភ្នំពេញ 2R-5300 ដោយបើកបរបរក្នុងល្បឿនលឿន លុះមកដល់ចំណុចកើតហេតុ រថយន្តរបស់លោកបានរ៉េចង្កូតរអិលធ្លាក់ផ្លូវក្រឡាប់ធ្លាក់ចូលក្នុងប្រឡាយទឹក ក្នុងពេលនោះតែម្ដង។

បច្ចុប្បន្ន​ សាកសព ត្រូវបានសមត្ថកិច្ចដឹកបញ្ជូនតាមរថយន្តពេទ្យ ប្រគល់ជូនក្រុមគ្រួសារ នៃសពយកទៅធ្វេីបុណ្យតាមប្រពៃណី​៕SRP

ខេត្តសៀមរាប៖ករណីម្ដាយនិងកូនម្នាក់ដែលបានលង់ទឹកស្លាប់ នៅក្នុងទឹកស្រះ បន្ទាប់ពីបានជិះម៉ូតូធ្លាក់ បង្កឲ្យមានការភ្ញាក់ផ្អើល កាលពីថ្ងៃមិញ ការពិតត្រូវបានបង្ហាញតាមប្រភពរបស់សមត្ថកិច្ច។

យោងតាមរបាយការណ៍របស់នគរបាល ដែលអង្គភាពសៀមរាបប៉ុស្ដិ៍ ទទួលបាន បង្ហាញថា ជនរងគ្រោះ ទី១ឈ្មោះ ធឿង ឈីអឺ  ភេទស្រីអាយុ៣០ឆ្នាំ ជនជាតិខ្មែរ មុខរបរនៅផ្ទះ  មានទីលំនៅភូមិប្រយុទ្ធ សង្កាត់ទឹកវិល ក្រុងសៀមរាប ខេត្តសៀមរាប។ ទី២ ឈ្មោះ ធន់ សុវណ្ណបញ្ញា ភេទប្រុស អាយុ៩ឆ្នាំ ជនជាតិខ្មែរ មុខរបរ សិស្ស មានទីលំនៅភូមិប្រយុទ្ធ សង្កាត់ទឹកវិល ក្រុងសៀមរាប ខេត្តសៀមរាប។

របាយការណ៍បន្តថាយោងតាមការស្ដាប់បំភ្លឺពីប្រជាពលរដ្ឋបានអោយដឹងថា ជនរងគ្រោះថាចង់បានដើមឬស្សី មកធ្វើរបងហ៊ុំព័ទ្ធផ្ទះ ដើម្បីចងភ្ជាប់ជាមួយសំណាញ់ ក៏បានចេញទៅរកកាប់ឬស្សី នៅខាងកើតផ្ទះ ប្រហែល៦០០ម៉ែត្រ។

ប្រភពបន្តថា ជនរងគ្រោះបានបបួលកូន ទៅជាមួយពីរនាក់ ដើម្បីជួយលើកដើមឬស្សី តែកូនបងមិនចង់ទៅទេ ព្រោះមិនស្រួលខ្លួន  ប៉ុន្តែម្ដាយនៅតែ ចង់ឲ្យទៅជាមួយ ទើបកូនឡើងម៉ូតូ ទៅជាមួយ ដោយបានមកខ្ចីកាំបិតផ្គាក់ នៅផ្ទះបងបង្កើតយកទៅ ហើយក្រោយមកក៏បានជិះម៉ូតូ ឌុបកូនទៅកន្លែងកាប់ឬស្សីតែម្ដងទៅ។ ដោយខ្លាចកាប់ឬស្សី បានហើយ យកមកមិនរួច ក៏បាន ឈ្មោះម៉ី ភេទប្រុសអាយុ១២ ឆ្នាំ ទៅជួយសែង។ ប៉ុន្តែនៅពេលដែល ឈ្មោះម៉ី ទៅដល់ស្រាប់តែជនរងគ្រោះប្រាប់ថា កាប់មិនបានទេ ដោយសារផ្គាក់ដែលយកទៅ មិនមុតសោះ ទើបប្រាប់ឲ្យឈ្មោះ ម៉ី មកផ្ទះមុន ហើយឈ្មោះម៉ី ក៏បានជិះកង់មកមុន។ ចំណែកជនរងគ្រោះ ឡើងជិះម៉ូតូឌុបកូនពីរនាក់ ត្រឡប់មកផ្ទះវិញ ស្រាប់តែមកដល់ត្រង់ចំណុចត្រពាំងស្លាកែត ដែលជាត្រពាំងបុរាណទើបនឹងស្ដារ ក៏បានបើកម៉ូតូជ្រុលចង្កូតធ្លាក់ចូលទឹកត្រពាំងតែម្ដង។ តែដោយសារសំណាងល្អ ទើបកូនរបស់គាត់ម្នាក់ ដែលអង្គុយពីមុខបានស្រវ៉ា ឡើងគោកទាន់ ទើបរត់មកប្រាប់ខ្ញុំនឹងយាយថា ម៉ាក់នឹងបងដួលម៉ូតូធ្លាក់ទឹកស្លាប់ហើយ ទើបនាំគ្នាទៅមើលកន្លែងកូនធ្លាក់ ហើយបានទៅស្រវ៉ា រាវរកដែរតែមិនឃើញ ដោយសារមានការរំខានពីប្ដីជនរងគ្រោះទាញ ខ្វែវ ដេញកាប់។ លុះដល់ម៉ោង១០និង៣០នាទី ទើបមានសមត្ថកិច្ច និងប្រជាពលរដ្ឋ នាំគ្នា ផ្អើលទៅមើល និងជួយរាវរក តែនៅតែមិនឃើញ រហូតមកដល់ម៉ោង១២ និង០០នាទី ទើបបានរកប្រទះឃើញសាកសព។

ប្រភពបានបន្តទៀតថាកាលពីមុនជនរងគ្រោះ គឺជាមនុស្សល្អធម្មតាទេ តែពេល ចាប់តាំងពីគាត់មានគ្រួសារ បែកផ្ទះទៅនៅជុំគ្រួសារជាមួយប្ដីមក គាត់មានអាការៈ ចេះតែមិន ស្រួល ដោយសារមានគំនាប ពីប្ដីខ្លាំងពេក សូម្បីតែទៅលេងផ្ទះបងប្អូន ក៏មិនបានដែរ ទើបធ្វើឱ្យគាត់គិតច្រើន មិនហូបបាយទឹក។ ហើយខ្ញុំ ក៏បានយកគាត់ទៅមន្ទីរពេទ្យ ដោយគ្រូពេទ្យ បានប្រាប់គាត់ថា កូនរបស់ខ្ញុំ គិតច្រើនពេកបណ្ដាលឱ្យកើតជំងឺស្ត្រេស និងបូកផ្សំជាមួយនឹងប្ដីរបស់គាត់ធ្វើបាបផ្លូវចិត្តផងដែរ។

បើតាមរបាយការណ៍បញ្ជាក់ថា តាមការពិនិត្យស្លាកស្នាមសពទាំង២ យោងតាមការបំភ្លឺ សនិដ្ឋានរបស់លោកគ្រូពេទ្យ កោសល្យវិច័យខេត្តសៀមរាប  ជនរងគ្រោះស្លាប់ដោយសារ ឈ្លក់ទឹក(លង់ទឹកបណ្ដាលអោយស្លាប់) ប្រាកដមែន។

សូមបញ្ជាក់ថាករណីនេះបានកើតឡើងនៅវេលាម៉ោង១០ និង៥០នាទី ថ្ងៃទី ២៤ ខែកក្ដដា ឆ្នាំ២០២២ នៅចំណុចក្នុងត្រពាំងស្លាកែត ស្ថិតនៅភូមិប្រយុទ្ធ សង្កាត់ទឹកវិល ក្រុងសៀមរាប ខេត្តសៀមរាប៕SRP

ខេត្តសៀមរាប៖យោងតាមសេចក្ដីរាយការណ៍ព័ត៌មានបឋមបានឲ្យដឹងថា ម្ដាយនឹងកូនតូចម្នាក់ ជិះម៉ូតូធ្លាក់ទឹកស្រះ ស្លា..ប់ ទាំង២នាក់ បង្កឲ្យមានការភ្ញាក់ផ្អើល។

ហេតុការណ៍បានកើតឡើង នៅម៉ោងប្រមាណ ១១ជាងព្រឹកថ្ងៃទី ២៤ ខែកក្កដា ឆ្នាំ២០២២ ស្ថិតនៅភូមិប្រយុទ្ធ សង្កាត់ទឹកវិល ក្រុងសៀមរាប។

ប្រភពរាយការណ៍ថា ស្ត្រីរងគ្រោះ ឈ្មោះ ធឿង ឈីអឺ ភេទស្រី អាយុ៣០ឆ្នាំ ត្រូវជាម្តាយ។ ឯឈ្មោះ ធុន សុវណ្ណបញ្ញា ភេទប្រុស អាយុ៩ឆ្នាំ ត្រូវ ជាកូន។ អ្នកទាំង២មានទីលំនៅភូមិប្រយុទ្ធ សង្កាត់ទឹកវិល ក្រុងសៀមរាប ជិម៉ូតូហុងដា ពាក់ផ្លាកលេខ សៀមរាប ១O ៨១៦៩។ ជុំវិញករណីនេះ សមត្ថកិច្ចនៅពុំទាន់បញ្ជាក់មូលហេតុនៅឡើយទេ៕SRP

ខេត្តបាត់ដំបង៖លោក សុខ លូ អភិបាលខេត្តបាត់ដំបង បានលើកឡើងនៅព្រឹកនេះថា៖ សមិទ្ធផលថ្មីមួយបន្ថែមទៀតរបស់ខេត្តបាត់ដំបង គឺវេទិកាអុំទូកខេត្តបាត់ដំបង នឹងលេចរូបរាងនៅពេលខាងមុខឆាប់ៗនេះ។

លោក សុខ លូ បានបន្តថា៖ វេទិកាអុំទូកខេត្តបាត់ដំបងនេះ គ្រោងនឹងសាងសង់រួចរាល់នៅមុនពេលពិធីអុំទូកខេត្ត នៅថ្ងៃបុណ្យចេញព្រះវស្សា ឆ្នាំ២០២២ ខាងមុខនេះ។

សូមបញ្ជាក់ផងដែរថា វេទិកាអុំទូកខេត្តបាត់ដំបង មានបណ្តោយប្រវែង ៣៧ម៉ែត្រ ទទឹង ១៨ម៉ែត្រ និងកម្ពស់ ១៨.៣៥ ម៉ែត្រ មានហោជាង ៤ទិស និងមានជណ្តើរ២ ចុះឡើងសងខាងមុខវេទិកា ព្រមទាំងអាចផ្ទុកភ្ញៀវ និងអ្នកចូលរួមបានប្រមាណ ជិត៤០០នាក់ ផងដែរ៕SRP

ខេត្តព្រះសីហនុ៖លោកសាយ សំអាល់ សមាជិកគណៈកម្មាធិការ កណ្តាល និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តព្រះសីហនុ ថ្លែងក្នុងឱកាសអញ្ជើញជាអធិបតី​បើកកិច្ចផ្សព្វផ្សាយលទ្ធផល នៃសន្និបាតគណៈកម្មាធិការកណ្តាល វិសាមញ្ញរបស់គណបក្សប្រជាជនកម្ពុជា ជូនដល់ក្រុមការងារជាសមាជិកគណបក្សប្រជាជនកម្ពុជា ខេត្តព្រះសីហនុ ជិត១ពាន់នាក់ នៅថ្ងៃទី២៣ ខែកក្កដា ឆ្នាំ២០២២នេះ បានបញ្ជាក់ថា «គណបក្សប្រជាជនកម្ពុជា ធានាបាននូវសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈដ៏រឹងមាំ ក្នុងសង្គមកម្ពុជា»។

លោកបានលើកឡើងទៀតថា បន្ទាប់ពីការបោះឆ្នោតជ្រើសតាំងតំណាងរាស្ត្រឆ្នាំ២០១៨ គណបក្សប្រជាជនកម្ពុជា បានក្តាប់ពេញដៃទាំងស្រុងនូវអំណាចនយោបាយ។ ស្ថានភាពដ៏កម្រនេះបានផ្តល់អំណោយផលបំផុតសម្រាប់ ការដឹកនាំប្រទេស របស់គណបក្សប្រជាជនកម្ពុជា បើគិតពីឆ្នាំ១៩៩៣មក ធ្វើឱ្យសង្គមជាតិ បន្តរីកចម្រើនយ៉ាងខ្លាំងជាមួយនឹងការធានា បាននូវសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈដ៏រឹងមាំ។

លោក បានគូសបញ្ជាក់បន្ថែមថា គោលនយោបាយច្បាស់លាស់ ប្រាកដប្រជារបស់គណបក្សប្រជាជនកម្ពុជា ជាចក្ខុវិស័យវែងឆ្ងាយគឺឱ្យកម្ពុជា កាន់តែឈានឆ្ពោះរីកចម្រើន ទៅមុខបន្ថែមទៀត ហើយមានតែគណបក្សប្រជាជនកម្ពុជា មួយគត់ ដែលមានគោលនយោបាយច្បាស់លាស់ និងស័ក្តិសមបំផុតក្នុងការដឹកនាំនាវាកម្ពុជា ឆ្ពោះទៅកាន់ការអភិវឌ្ឍរីកចម្រើនមកដល់ពេលបច្ចុប្បន្ន។

លោក សាយ សំអាល់ បានបន្តថា ជាក់ស្តែង ជោគជ័យដ៏ធំធេងរបស់កម្ពុជា ក្រោមការដឹកនាំរបស់ប្រមុខគណបក្សប្រជាជនកម្ពុជា រហូតទទួលបានការគាំទ្រ និងកោតសរសើរពីបណ្តាប្រទេសជាច្រើនលើសកលលោក គឺវិធានការច្បាស់លាស់ក្នុងការបង្ការ និងទប់ស្កាត់នូវការរីករាលដាលនៃជំងឺកូវីដ១៩ តាមរយៈការដាក់ចេញនូវគោលនយោបាយ ចាក់ស្រោចវ៉ាក់សាំងបង្ការជំងឺកូវីដ១៩ លើប្រជាពលរដ្ឋទូទាំងប្រទេស គ្រប់ស្រទាប់វណ្ណៈ ហើយបានដឹកនាំនាវាកម្ពុជា ឆ្លងផុតពីគ្រោះមហន្តរាយមួយនេះយ៉ាងជោគជ័យ ជាមួយនឹងការបើកដំណើរការប្រទេសជាតិ និងសង្គម-សេដ្ឋកិច្ចឡើងវិញតាមគន្លងប្រក្រតីភាពថ្មី។

លោក សាយ សំអាល់ បានលើកឡើងនូវគោលនយោបាយជាអាទិភាពសំខាន់ៗ របស់គណបក្សប្រជាជនកម្ពុជា ក្នុងការបម្រើឧត្តមប្រយោជន៍ជាតិ និងប្រជាពលរដ្ឋ ក៏ដូចជាការអភិវឌ្ឍប្រទេសជាតិយ៉ាងឆាប់រហ័ស ជាមួយនឹងកិត្យានុភាព កិត្តិយស រដ្ឋឯករាជ្យ អធិបតេយ្យ មួយនៅក្នុងតំបន់ និងអន្តរជាតិ។

លោកក៏សូមថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែង លះបង់ កម្លាំងកាយ ចិត្ត ប្រាជ្ញា ស្មារតី របស់សមាជិក សមាជិកាគណបក្សទាំងអស់ ក្នុងអំឡុងពេលមុនបោះឆ្នោត ពេលបោះឆ្នោត និងក្រោយពេលបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ កន្លងទៅ ដែលធ្វើឱ្យគណបក្សទទួលជ័យជម្នះយ៉ាងត្រចះត្រចង់។

លោក សាយ សំអាល់ ក៏សូមថ្លែងអំណរគុណយ៉ាងជ្រាលជ្រៅចំពោះវីរៈភាពរបស់អាជ្ញាធរដែនដី កងកម្លាំងមានសមត្ថកិច្ចនៅគ្រប់លំដាប់ថ្នាក់ គ.ជ.ប ស្ថាប័នពាក់ព័ន្ធផ្សេងៗ ដែលបានសហការ សម្របសម្រួលសព្វបែបយ៉ាង ធ្វើឱ្យការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ប្រព្រឹត្តទៅប្រកបដោយលក្ខណៈសេរី ត្រឹមត្រូវ និងយុត្តិធម៌ ក្នុងបរិយាកាសអព្យាក្រឹត្យ សន្តិសុខ របៀបរៀបរយ គ្មានអំពើហិង្សា និងការគំរាមកំហែង៕SRP

ខេត្តកំពង់ធំ៖ទីតាំងបញ្ចាំម៉ូតូមួយកន្លែងត្រូវបានសមត្ថកិច្ចចុះបង្ក្រាប។

ការបង្ក្រាបធ្វើឡើងថានៅរសៀលថ្ងៃទី២២ ខែកក្តដា ឆ្នាំ២០២២ ស្ថិតនៅជាប់ផ្សាររំលង ភូមិរំចេក ឃុំទ្រៀល ស្រុកតាំងគោក ខេត្តកំពង់ធំ ដែលមានម្ចាស់ទីតាំង ឈ្មោះលឹមសេង។

ប្រតិបត្តិការចុះបង្ក្រាបដោយអធិការស្រុកតាំងគោកនិងកម្លាំងនគរបាលប៉ុស្តិ៍ ដឹកនាំបញ្ជាដោយ លោកសាយ វាសនា ព្រះរាជអាជ្ញារងអមសាលាដំ បូងខេត្តកំពង់ធំ។

ប្រភពបានឲ្យដឹងថាករណីខាងលើនេះ ទីតាំងបញ្ចាំសង្ស័យអត់ច្បាប់ ហើយអត់មានឯកសារ នានាពីម្ចាស់ម៉ូតូផងដែរ។ ក្នុងនោះកម្លាំងបានរកឃើញម៉ូតូ ចំនួន៣៣គ្រឿង ម៉ូតូដែលមានឯកសារត្រឹមត្រូវចំនួន១៥គ្រឿង និងអត់ឯកសារចំនួន១៨គ្រឿងផងដែរ។

បច្ចុប្បន្នម៉ូតូដែលអត់ឯកសារអត់ច្បាប់និងម្ចាស់ត្រូវបានបញ្ជូនទៅសួរនាំនៅប៉ុស្តិ៍ទ្រៀល ដើម្បីចាត់ការបន្ត។

នេះបើតាម លោកទិត សំណាង ស្នងការរងខេត្តកំពង់ធំ បានប្រាប់អ្នកសារព័ត៌មាន៕SRP

ខេត្តកំពង់ស្ពឺ៖រដ្ឋមន្ត្រីក្រសួងពាណិជ្ជកម្ម ឲ្យមន្ត្រីបញ្ចៀសដាច់ខាត ការទាមទារកម្រៃសេវាក្រៅផ្លូវការ ពីអាជីវករ ពាណិជ្ជករ ផលិតករ អ្នកនាំចេញ និងសេវាផេ្សងៗ។

ក្នុងប្រសាសន៍ណែនាំ របស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានប្រាប់មន្ត្រីទាំងអស់ ត្រូវបន្តបដិបត្តិឱ្យបានខ្ជប់ខ្ជួន ដើម្បីបំពេញការងារជូន ប្រជាពលរដ្ឋ ប្រកបដោយ ប្រសិទ្ធិភាពខ្ពស់ និងលទ្ធផលកាន់តែល្អប្រសើ។

ការងារសំខាន់ៗទាំងនោះរួមមាន៖ ទី១- មន្ត្រីទាំងអស់ត្រូវបន្តខិតខំពង្រីកចំណេះដឹងខ្លួនបន្ថែមទៀត ទាំងកម្រិតជំនាញ និងភាសាបរទេស តាមរយៈការសិក្សាបន្ថែម ការស្រាវជ្រាវ និងដកស្រង់នូវបទពិសោធន៍ពីមន្រ្តីដែលមានសមត្ថភាព និងជាពិសេសរួមសហការគ្នាចុះត្រួតពិនិត្យទំនិញដែលខូចគុណភាព នៅលើទីផ្សារឱ្យកាន់តែស្វាហាប់ ដើម្បីការពារសុខភាពរបស់ប្រជាពលរដ្ឋ ក៏ដូចជាការពារសុខភាពបងប្អូន កូនចៅរបស់ខ្លួនឯងដែរ។
ទី២- មន្ត្រីទាំងអស់ត្រូវបន្តបន្តធ្វើសហប្រតិបត្តិការឱ្យកាន់តែជិតស្និទ្ធជាមួយអាជ្ញាធរមូលដ្ឋាន ដើម្បីចូលរួមផ្សព្វផ្សាយឱ្យបានទូលំទូលាយនូវកម្មវិធីកែទម្រង់ស៊ីជម្រៅរបស់រាជរដ្ឋាភិបាល ជាពិសេសកំណែទម្រង់ស៊ីជម្រៅរបស់ក្រសួងពាណិជ្ជកម្ម ក្នុងការដាក់ចេញគោលនយោបាយពាណិជ្ជកម្ម សំដៅជួយសម្រួលពាណិជ្ជកម្ម ក្នុងការនាំចេញ និងសម្រួលដល់ការផ្តល់សេវាសាធារណៈជូនប្រជាពលរដ្ឋ។
ទី៣- បញ្ចៀសដាច់ខាតការទាមទារកម្រៃសេវាក្រៅផ្លូវការពីអាជីវករ ពាណិជ្ជករ ផលិតករ អ្នកនាំចេញ និងសេវាផេ្សងៗ ដែលផ្ទុយពីខ្លឹមសារប្រកាសរួមស្តីពីកម្រងសេវាសាធារណៈរវាងក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ។
ទី៤- ត្រូវបន្តជំរុញពង្រឹងបន្ថែមយន្តការតាមដាន និងត្រួតពិនិត្យការគ្រប់គ្រងអាជីវកម្ម សេវាកម្ម ពាណិជ្ជកម្ម ថ្លៃទំនិញ និងសន្និធិទំនិញចាំបាច់ ស្រូវ-អង្ករ ប្រេងឥន្ធនៈ និងការធ្វើពាណិជ្ជកម្មទំនិញនៅតាមព្រំដែន ដោយប្រើប្រាស់ប្រព័ន្ធបច្ចេកវិទ្យាព័ត៌មាន និងជំរុញយន្តការដោះស្រាយបញ្ហាដល់កសិករ ផលិតករ ដោយផ្តោតលើផលិតផលសក្តានុពលចំនួន ៥មុខ មាន់ស្រែ បន្លែ ដំឡូង ស្រូវប្រណិត និងសូត្រ ដោយបង្កើតផ្សារចុងសប្តាហ៍នៅតាមបណ្តាខេត្តទាំង ១៨ ព្រមទាំងឧបត្ថម្ភទុន ផ្តល់កម្ចី និងកសាងហេដ្ឋារចនាសម្ព័ន្ធគាំទ្រតាមរយៈគម្រោងជំរុញទីផ្សារសម្រាប់កសិកម្មខ្នាតតូច (AIMS) ដែលអនុវត្តដោយក្រសួងពាណិជ្ជកម្ម។
ទី៥- ពេលចុះអនុវត្តន៍ការងារក្នុងពេលប្រយុទ្ធប្រឆាំងនឹងជំងឺកូវីដ-១៩ នាពេលនេះ និងដើម្បីរក្សាគម្លាតសង្គម សូម ឯកឧត្តម លោក លោកស្រី មន្រ្តីរាជការយើងទាំងអស់ ត្រូវប្រុងប្រយ័ត្ន និងត្រូវអនុវត្តឱ្យបានត្រឹមត្រូវតាមការណែនាំរបស់ក្រសួងសុខាភិបាល។

លោកប៉ាន សូរស័ក្តិ មានប្រសាសន៍យ៉ាងដូច្នេះ ក្នុងឱកាស ជួបសំណេះសំណាលជាមួយមន្ត្រីមន្ទីរពាណិជ្ជកម្ម និងមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) ខេត្តកំពង់ស្ពឺ នៅថ្ងៃសុក្រម្សិលមិញ៕SRP

ខេត្តត្បូងឃ្មុំ៖សម្តេចអគ្គមហាពញាចក្រី ហេង សំរិន បានថ្លែងប្រាប់ឱ្យមន្រ្តីគណបក្សគ្រប់ជាន់ថ្នាក់ ការពារដាច់ខាតនូវសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម និងទប់ស្កាត់រាល់ការប៉ុនប៉ង បង្កចលាចលរបស់ពួកប្រឆាំងជ្រុលនិយម។

សម្តេចបានស្នើឱ្យមន្រ្តីគណបក្សទំាងអស់ ត្រូវបន្តរៀបចំការងារឱ្យបានល្អ និងឆាប់រហ័សសម្រាប់ការបោះឆ្នោតជ្រើស តាំងតំណាងរាស្រ្តនីតិកាលទី៧ ខាងមុខ ដោយត្រូវពិនិត្យ កែសម្រួលក្រុមការងារ គណបក្សចុះមូលដ្ឋាន ឱ្យមានបរិមាណ និងលទ្ធភាពសមស្រប និងមានទទួលការខុសត្រូវខ្ពស់ ចំពោះភារកិច្ច ដែលបានប្រគល់ឱ្យ រក្សាការផ្សារភ្ជាប់ជាមួយប្រជាជន ស្វែងយល់ពីទុក្ខលំបាក ប្រជាជន ខិតខំដោះស្រាយ និងសំណូមពររបស់ ប្រជាជន បន្តជួបសំណេះសំណាល ថ្លែងអំណរគុណប្រជាពលរដ្ឋ ដែលបោះឆ្នោតគាំទ្រគណបក្សជូនគណបក្សប្រជាជនកម្ពុជា។

ប្រសាសន៍លើកឡើងរបស់សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា បានធ្វើឡើងនៅក្នុងឱកាស អញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំបូកសរុបលទ្ធផល ការងារបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ របស់ខេត្ត និងការផ្សព្វផ្សាយខ្លឹមសារសន្និបាតគណៈកម្មាធិការកណ្តាល វិសាមញ្ញកាលថ្ងៃទី ១៦ និង១៧ ខែកក្កដា ឆ្នាំ២០២២ នៅមន្ទីរគណបក្សខេត្តត្បូងឃ្មុំ នៅថ្ងៃសៅរ៍នេះ។

នៅខេត្តត្បូងឃ្មុំ ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ បានដំណើរការ មិនខុសពីស្ថានភាពរួមនៃដំណើរការបោះឆ្នោតក្នុងទូទាំងប្រទេសនោះទេ ពោលគឺបានប្រព្រឹត្តទៅដោយសេរីត្រឹមត្រូវ និងយុត្តិធម៌ក្នុងបរិយាកាសអព្យាក្រឹត សន្តិសុខ របៀបរៀបរយ គ្មានអំពើហិង្សា និងការគំរាមកំហែងឡើយ។ ប្រជាពលរដ្ឋច្រើនកុះករបានទៅបោះឆ្នោត នៅតាមការិយាល័យនីមួយៗប្រកបដោយភាពថ្លៃថ្នូរ សប្បាយរីករាយតាមឆន្ទ:ដើម្បីជ្រើសរើសតំណាងរបស់ខ្លួនឱ្យបន្តដឹកនាំនៅឃុំ សង្កាត់ និងមូលដ្ឋានរបស់ខ្លួនសម្រាប់អាណត្តិ៥ឆ្នាំបន្តទៀត។

ប្រការនេះបានឆ្លុះបញ្ចាំងពីភាពចាស់ទុំនៃដំណើរការប្រជាធិបតេយ្យសេរី ពហុបក្សស្របតាមរដ្ឋធម្មនុញ្ញ និងច្បាប់របស់កម្ពុជា។ លទ្ធផលនៃដំណើរការបោះឆ្នោតសម្រាប់ខេត្តយើងគឺ គណបក្សប្រជាជនកម្ពុជា ទទួលបានអាសនៈចំនួន៤៣២ នៃអាសនៈសរុប៥៣៦ ស្មើនឹង៨០,៥៩% និងទទួលបានតំណែងមេឃុំ និងចៅសង្កាត់ ទាំងអស់ក្នុងទូទាំងខេត្ត។

សម្តេចហេង សំរិន ប្រធានក្រុមការងារគណបក្សចុះជួយខេត្តត្បូងឃ្មុំ បានវាយតម្លៃលទ្ធផលនេះបានបង្ហាញឱ្យឃើញច្បាស់ពីជ័យជំនះដ៏ធំធេងរបស់គណបក្សប្រជាជនកម្ពុជាក្នុងក្របខណ្ឌខេត្តដែលជាមូលដ្ឋានគ្រឹះដ៏រឹងមាំ សម្រាប់ឈានទៅរក ជ័យជំនះថ្មីទៀតក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ នាថ្ងៃទី ២៣ ខែកក្កដា ឆ្នាំ២០២៣។

សម្តេចបានសម្តែងនូវការកោតសរសើរដ៏ស្មោះស្ម័គ្រចំពោះ ឯកឧត្តម លោកជំទាវ លោក លោកស្រី ទាំងអស់ ដែលវត្តមាននៅទីនេះក៏ដូចជាមន្រ្តីយើងទាំងអស់ដែលនៅក្នុងក្រុមការងារគណបក្សចុះជួយមូលដ្ឋាន និងគណៈកម្មាធិការគណបក្ស គ្រប់ថ្នាក់ ពិសេសថ្នាក់ឃុំ សង្កាត់ និងភូមិ ក្នុងទូទាំងខេត្តដែលលះបង់អស់កម្លាំងកាយ ស្មារតី និងសំភារៈ ខិតខំបំពេញភារកិច្ច ដែលគណៈអចិន្រ្តៃយ៍បានដាក់ ចេញក្នុងសេចក្តីសម្រេចស្តីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ រហូតសម្រេចបាននូវជ័យជំនះដ៏ធំធេងជូនគណបក្ស សម្រាប់ជាមូលដ្ឋានគ្រឹះឆ្ពោះទៅដណ្តើមជោគជ័យថ្មីថែមទៀតនាពេលខាងមុខ។

សម្តេចហេង សំរិន បានគូសបញ្ជាក់ថា ដើម្បីសម្រេចការប្តេជ្ញាចិត្តជាយុទ្ធសាស្រ្តនេះ ត្រូវយកចិត្តទុកដាក់អនុវត្តន៍ភារកិច្ចមួយចំនួនដូចខាងក្រោម ៖ ការពារដាច់ខាតសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់សង្គម ទប់ស្កាត់រាល់ការប៉ុនប៉ងបង្កចលាចលរបស់ពួកប្រឆាំងជ្រុលនិយម។ បន្តជំរុញយុទ្ធនាការចាក់វ៉ាក់សាំងការពារជម្ងឺកូវីដ-១៩ ជូនប្រជាជនដោយឥតគិតថ្លៃ និងការអនុវតន៍វិធានការសុខភាពនានា ដើម្បីបង្កើនភាពសុំាក្នុងសហគម រាំងស្កាត់ការឆ្លងរាលដាលជាថ្មីនៃជំងឺនេះ ជំរុញការអនុវត្តក្របខណ្ឌយុទ្ធសាស្រ្តនៃកម្មវិធីស្តារ និងកំណើនជំរុញសេដ្ឋកិច្ចកម្ពុជា ក្នុងការរស់នៅជាមួយជំងឺកូវីដ-១៩តាមគន្លងប្រក្រតីភាពថ្មី។ ជំរុញការអភិវឌ្ឍគោលនយោបាយភូមិ ឃុំ មានសុវត្ថិភាពឱ្យបានល្អប្រសើរ និងខិតខំដោះស្រាយជម្លោះដីធ្លីក្រៅប្រព័ន្ធតុលាការឱ្យបានល្អឆាប់រហ័ស បន្តអនុវត្តន៍គោលនយោបាយ គាំពារសង្គម ជាពិសេសជួយគាំពារជនក្រីក្រ ជនងាយរងគ្រោះដោយជំងឺកូវីដ-១៩ ជាដើម៕SRP

ខេត្តកំពង់ចាម​៖លោកអ៊ុន ចាន់ដា អភិបាលខេត្តកំពង់ចាម រួមដំណើរជាមួយ លោក ខ្លូត ផន ប្រធានក្រុមប្រឹក្សាខេត្ត​ និងលោក លោក ជំទាវ សមាជិក សមាជិកាក្រុមប្រឹក្សាខេត្ត អភិបាលរងខេត្ត ព្រមទាំង ថ្នាក់ដឹកនាំ មន្ត្រីរាជការ មន្ទីរ អង្គភាព ជុំវិញខេត្ត និងអាជ្ញាធរមូលដ្ឋាន នៅថ្ងៃទី​២២​ ខែកក្កដា​ ឆ្នាំ​២០២២​ បាននាំយកទេយ្យទាន បច្ច័យ និងទៀនចំណាំព្រះវស្សា ប្រគេនព្រះសង្ឃគង់ចាំព្រះវស្សា ក្នុងវត្តចំនួន២ គឺ វត្តជ័យគិរី ហៅ ភ្នំហាន់ជ័យ ស្ថិតនៅក្នុងឃុំហាន់ជ័យ ស្រុកកំពង់សៀម និងវត្តសន្ធរង្សី ស្ថិតនៅភូមិអន្លង់សំឡី ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម។ ដោយក្នុង ១វត្តៗ មាន៖  ទៀនវស្សា ១គូ អង្ករចំនួន ១០០គក្រ ទឹកសុទ្ធ ៥កេស ទឹកក្រូច ៥កេស ត្រីខ ១កេស ទឹកត្រី ៥យួរ ទឹកស៊ីអ៊ីវ ៥យួរ មី ១កេសធំ ទឹកដោះគោខាប់ ១កេសធំ ស្កសរ ៥គក្រ តែ ៥គក្រ និងបច្ច័យ ៤.៣០០.០០០រៀល​។

ក្នុងឱកាសនោះ លោក អ៊ុន ចាន់ដា និងលោក ខ្លូត ផន ព្រមទាំង ក្រុមការងារ បានអញ្ជើញអុជទៀនធូប ថ្វាយបង្គំ ព្រះរតនត្រ័យ  និងវេរប្រគេន ទេយ្យវត្ថុ បច្ច័យ និងទៀនព្រះវស្សាដល់ព្រះសង្ឃ ទៅតាមកិច្ចសាសនា ដោយបានឧទ្ទិសបួងសួងកុសលផលបុណ្យ ទៅដល់ដួងវិញ្ញាណបុព្វការីជន មានមាតា បិតា ជីដូនជីតានិងញាតិការទាំង ៧សណ្ដាន ព្រមទាំង ដួងវិញ្ញាណក្ខន្ធអ្នកស្នេហាជាតិ ទាំងអស់ ដែលបានបាត់ជីវិត នៅក្នុងសម័យសង្គ្រាម ហើយបានចែកឋានទៅកាន់បក្សលោកខាងមុខ ផងដែរ។ ជាមួយគ្នានោះដែរ ក៏សូមបួងសួង ទៅដល់វត្ថុសក្តិសិទ្ឋិ ក្នុងលោក សូមជួយថែរក្សា ប្រទេសកម្ពុជា ឲ្យកាន់តែរីកចំរើន និងសុខសន្តិភាព គង់វង្សជានិរន្តរ៍ តរៀងទៅអនាគត ផងដែរ។

គួរកត់សម្គាល់ដែរថា តាមទំនៀមទម្លាប់ប្រពៃណីព្រះពុទ្ឋសាសនា ក្នុង ១ឆ្នាំ ព្រះសង្ឃត្រូវគង់ចាំព្រះវស្សាចំនួន ៣ខែ ក្នុងទីវត្តអារាម គឺ ចាប់ពីថ្ងៃទី ១រោច ខែអាសាឍ ដល់ថ្ងៃ ១៥កើត ខែ អស្សុជ ដោយមិនអាចនិមន្តបិណ្ឌបាត្រ ទៅទីណាបានឡើយ។ ហេតុដូចនេះហើយ ទើបពុទ្ធបរិស័ទដែលមានសទ្ធាជ្រះថ្លា ក្នុងព្រះពុទ្ធសាសនា តែងនាំនូវទៀនព្រះវស្សា បច្ច័យ និងទេយ្យវត្ថុផ្សេងៗ ទៅកាន់ទីវត្តអារាម ដើម្បី ប្រគេនព្រះសង្ឃ សម្រាប់អុជបំភ្លឺ និងមានចង្ហាន់ របស់របរប្រើប្រាស់មួយចំនួនទៀត សម្រាប់ផ្គត់ផ្គង់ព្រះសង្ឃ ក្នុងអំឡុងពេលកាន់ព្រះវស្សា រយៈពេល ៣ខែ នេះ ផងដែរ។

ដោយឡែក បើតាមជំនឿសាសនា អានិសង្ឃ នៃអ្នកដែលបានប្រគេនទៀនព្រះវស្សា គឺទទួលបានបុណ្យកុសលច្រើនណាស់ ដូចជា នឹងបានជាមនុស្ស ដែលមានរូបកាយ ពណ៌ សម្បុរល្អ ចិត្តល្អ និងមានទ្រព្យធន មិនខ្វះថែមទៀតផង៕SRP

ភ្នំពេញ៖លោក សេង ​ប៊ុនវេង​ ហៅ​អាចារ្យ ​អេ ត្រូវបានព្រះមហាក្សត្រ ចេញព្រះរាជក្រឹត្យ តែងតាំង និងផ្ដល់ឋានៈជាទីប្រឹក្សាផ្ទាល់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។ នេះបើយោងតាមព្រះរាជក្រឹត្យ របស់ព្រះមហាក្សត្រ ដែលអង្គភាពសារព័ត៌មាន សៀមរាបប៉ុស្ដិ៍ ទទួលបាននៅព្រឹកនេះ៕SRP

ភ្នំពេញ៖ក្រសួងប្រៃសណីយ៍ បានណែនាំដល់ប្រតិបត្តិករទូរស័ព្ទទាំងអស់ ត្រូវបញ្ឈប់ការប្រើប្រាស់សេវាខ្ចីលុយជូនអតិថិជនបន្តទៀត។ នេះបើយោងតាមសេចក្ដីប្រកាសរបស់ក្រសួងប្រៃសណីយ៍និងទូរគមនាគមន៍។

សូមជម្រាបថា កន្លងមកមានអតិថិជនអ្នកប្រើប្រាស់សេវាទូរស័ព្ទ ជាច្រើន បានធ្វើការរិះគន់យ៉ាងខ្លាំងទៅក្រុមហ៊ុនមួយចំនួន ដែលតែងតែកាត់លុយ របស់អតិថិជនដោយពុំដឹងមូលហេតុហើយក្រុមហ៊ុនមួយចំនួនទាំងនោះតែងតែភ្ជាប់កម្មវិធីជាច្រើន ដើម្បីកាត់លុយរបស់អតិថិជន ធ្វើឱ្យអតិថិជនមានការមិនសប្បាយចិត្ត ហើយឈានដល់ការឈប់ប្រើប្រព័ន្ធទូរស័ព្ទមួយចំនួនផងដែរ៕SRP