ខេត្តសៀមរាប៖គ្រួសារកូនភ្លោះចំនួន៣នាក់ បានទទួលអំណោយដ៏ថ្លៃថ្លារបស់សម្ដេច ហ៊ុន សែន នាយករដ្ឋមន្ត្រី និងភរិយា។

លោក គុជ លីណា សមាជិកក្រុមប្រឹក្សាខេត្ត និងលោកជំទាវ តំណាងលោក សេង ទៀង ជំនួយការផ្ទាល់សម្ដេច ហ៊ុន សែន នៅថ្ងៃទី៤ ខែកញ្ញា ឆ្នាំ ២០២១ នេះបាននាំយកថវិកាចំនួន ៥ លានរៀល អង្គរចំនួន៥០គីឡូក្រាម .ទឹកដោះគោ២កេស. ស្ករស៥គីឡូក្រោម. ក្រម៉ា២ សារ៉ុង២ របស់សម្តេចតេជោ ជូនដល់ ក្រុមគ្រួសារប្រសូត្របានទារកភ្លោះបីនាក់។

គ្រួសារកូនភ្លោះនេះ មានម្តាយឈ្មោះ សុខ សៅ អាយុ ៣៣ឆ្នាំ មុខរបរកសិករ និងឪពុកឈ្មោះ ចិន ទ្រា អាយុ ៣០ ឆ្នាំ មុខរបរកសិករ រស់នៅ ភូមិគោគធ្លក ឃុំកណ្តែក  ស្រុកប្រាសាទបាគង ខេត្តសៀមរាប ដែលម្តាយបានសម្រាលធម្មជាតិកូនភ្លោះ៣នៅ មន្ទីរពេទ្យជ័យវរ្ម័នទី៧ នៅថ្ងៃទី២៩ ខែ សីហា ឆ្នាំ២០២១ នៅម៉ោង ១០ នឹង ៤០នាទីព្រឹក។

១.កូនទី១  អាយុ២០នាទី ភេទប្រុស ថ្ងៃខែឆ្នំាកំណើត ២៩ខែសីហាឆ្នាំ២០ ២១ ទង្ងន់២ គីឡូក្រាម។

២.កូនទី២  អាយុ២០នាទី ភេទប្រុស ថ្ងៃខែឆ្នំាកំណើត ២៩ ខែសីហា ឆ្នាំ២០២១ ទង្ងន់២ គីឡូក្រាម។

៣.កូនទី៣ អាយុ ២០នាទី ភេទប្រុស ថ្ងៃខែឆ្នំាកំណើត ២៩ខែសីហាឆ្នាំ ២០២១ , ទង្ងន់ ១,៧ គីឡូក្រាម៕SRP

ខេត្តកំពង់ធំ៖ដេប៉ូលក់ប្រេងឥន្ធនៈ មិនគ្រប់លីតចំនួន២កន្លែង ត្រូវបានមន្ត្រីផ្អាកសកម្មភាព។

ការចុះត្រួតពិនិត្យនឹងបិទផ្អាកសកម្មភាពការលក់ដូរចែកចាយដេប៉ូប្រេងឥន្ធនៈ ដែលលក់មិនគ្រប់លីតចំនួន២បន្លែង ក្រោយពេល បានពិនិត្យចាប់ពីថ្ងៃទី២ និងថ្ងៃទី៣ ខែកញ្ញា ឆ្នាំ២០២១ ដោយអគ្គនាយកដ្ឋានបង្រា្កបការក្លែងបន្លំដឹកនាំដោយលោក លៀង សុភា ប្រធានសាខាកាំកុងត្រូលខេត្តកំពង់ធំ សហការជាមួយមន្ទីរពាណិជ្ជកម្មខេត្តកំពង់ធំ ក្រោមការសម្របសម្រួលដោយអយ្យការអមសាលាដំបូងខេត្តកំពង់ធំ។

ប្រភពព័ត៌មានបានឲ្យដឹងថា ដេប៉ូលក់ប្រេងឥន្ធនៈចំនួនពីរដែលត្រូវបានបិទ ទី១. ដេប៉ូតេលា (DEPOT TELA)“ហេង សុធី” ស្ថិតនៅតាមបណ្តោយផ្លូវជាតិលេខ៦ ក្នុងបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ទី២. ដេប៉ូដេលា Depot TELA “ថន ចេងប៊ុនម៉ា” ស្ថិតនៅភូមិបែកចាន ឃុំទួលគ្រើស ស្រុកតាំងគោក ខេត្តកំពង់ធំ ស្ថិតនៅតាមបណ្តោយផ្លូវជាតិលេខ៦ ត្រង់ចំណុចទល់មុខផ្លូវបត់ទៅភូមិជីវភាព ឃុំអណ្តោងពោធិ៍ ស្រុកតាំងគោក ខេត្តកំពង់ធំ ដើម្បីធ្វើការផាកពិន័យតាមច្បាប់ និងតម្រូវឲ្យធ្វើការកែសម្រួលឲ្យបានត្រឹមត្រូវនូវរង្វាស់រង្វាល់តាមមាត្រាសាស្រ្ត (កែវក្រឹត្រ) ឡើងវិញ។

ជុំវិញករណីនេះ ប្រជាពលរដ្ឋ ដែលបានឃើញហេតុការណ៍នេះ ក៏បានសំណូមពរដល់អស់លោកខាងមន្ត្រីជំនាញ ក៏ដូចជាក្រសួងពាណិជ្ជកម្ម ធ្វើយ៉ាងដាក់ទោសទ័ណ្ឌឲ្យបានតឹងរឹងបំផុតចំពោះក្រុមជនខិលខូច ដែលតែងតែរកស៊ីគេងប្រវ័ញ្ញជញ្ជក់ឈាមរាស្រ្ត តាមរយៈនៃការលក់ប្រេងមិនគ្រប់លីត្រ និងប្រេងគ្មានគុណភាព ប្រេងមិនមែនស៊ុបពែ ដាក់ថាស៊ុបពែ ហើយលក់តម្លៃថ្លៃ ដែលជាហេតុនាំឲ្យពួកគេរកស៊ីមានបានកប់ពពកតាមរបៀបដ៏ថោកទាបនេះ ដោយមិនខ្វល់ពីទុក្ខលំបាក របស់ប្រជាពលរដ្ឋនោះឡើយ៕SRP

ខេត្តសៀមរាប៖កូនភ្លោះចំនួន៣នាក់ និងជាប្រុសទាំងបី ត្រូវបានកើតនៅភូមិគោកធ្លក ឃុំកណ្ដែក ស្រុកប្រាសាទបាគង ខេត្តសៀមរាប។

សូមបញ្ជាក់ថានៅរសៀលថ្ងៃទី០២ ខែកញ្ញា ២០២១ ម្សិលមិញ ក្រុមការងារចុះជួយភូមិគោកធ្លក បានចុះសួរសុខទុក្ខ នឹងនាំយកអំណោយ ចែកជូនដល់ស្រ្តីឈ្មោះ សុខ សៅ អាយុ៣៥ ឆ្នាំ ដែលសម្រាលបានកូនភ្លោះ៣នាក់ (ប្រុសទាំង៣) សម្រាលនៅថ្ងៃទី២៩ ខែសីហា ឆ្នាំ២០២១ វេលាម៉ោង ១១ ថ្ងៃត្រង់។

អំណោយរួមមានដូចជា៖ អង្ករ ៥៥គីឡូមី ៣កេស. ទឹកដោះគោឆៅ ២យួរ. ម៉ាស ៤ដុំ.ទឹកសុទ្ធ១កេស.ទឹកស៊ីអ៉ីវ ១យួរ. ប្រេងសណ្តែក១ដប. ត្រីខ ២យួរ.អំបិល ១គីឡូ. ស្ករស១គីឡូ.ថវិកា ៦៥០,០០០រៀល៕SRP

ភ្នំពេញ៖នាយករដ្ឋមន្ត្រីហ៊ុន សែន បានថ្លែង លើកទឹកចិត្តឱ្យមាន ការជួយគ្នាទៅវិញទៅមក ប្រកបដោយស្មារតីសាមគ្គីភាព ជាពិសេសតាមរយៈការផ្ទេរបច្ចេកវិទ្យា និងការផ្តល់ហិរញ្ញប្បទាន ជាពិសេសទៅដល់បណ្តាប្រទេសដែលមានធនធានទាប។ នេះបើយោងតាមសន្ទរកថារបស់នាយករដ្ឋមន្ត្រី ហ៊ុន សែន ថ្លែងក្នុងវេទិកាអភិវឌ្ឍន៍ថាមពលកាបូនទាប ថៃយាន ឆ្នាំ ២០២១ ក្រោមមូលបទ «ថាមពល អាកាសធាតុ បរិស្ថាន» រាជធានីភ្នំពេញ តាមរយៈការថតវីដេអូទុកជាមុន, ថ្ងៃទី ០៣ កញ្ញា ២០២១នេះ៕SRP

ខេត្តសៀមរាប៖លោក ឌឿន សារឿន អាជីវក បានឧបត្ថម្ភសុីម៉ង់ ១តោន ដល់អធិការក្រុងសៀមរាប ដេីម្បីកសាងអភិវឌ្ឍ សមិទ្ធិផលនាៗ ក្នុងអង្គភាពអធិការដ្ឋាននគរបាលក្រុងសៀមរាប។ ការឧបត្ថម្ភធ្វើឡើង នៅថ្ងៃសុក្រ ទី០៣ ខែ កញ្ញា ឆ្នាំ២០២១នេះ។

លោកដា ចំរើន អធិការនគរបាលក្រុងសៀមរាបបានថ្លែងអំណរគុណដល់ លោក ឌឿន សារឿន ដែលបានជួយឧបត្ថម្ភសុីម៉ង់១តោន ដេីម្បីកសាងអភិវឌ្ឍសមិទ្ធិផលនានានៅអធិការដ្ឋាននគរបាលក្រុងសៀមរាប ៕SRP

ខេត្តកំពង់ចាម៖លោក ជំទាវញូង ចរិយា អ៊ុន ចាន់ដា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ចាម រួមជាមួយក្រុមការងារនៅរសៀលថ្ងៃទី២ខែកញ្ញា ឆ្នាំ២០២១នេះ បានអញ្ជើញជួបសាកសួរសុខទុក្ខនិងនាំយកអំណោយផ្ដល់ជូនម៉ែដោះនិងកុមារកំព្រានៅមណ្ឌលកុមារកំព្រា ក្នុងក្រុងកំពង់ចាម។

ក្នុងឱកាសនោះដែរ លោកជំទាវ ញូង ចរិយា អ៊ុន ចាន់ដា បានមានប្រសាសន៍ផ្តាំផ្ញើដល់ម៉ែដោះ និងក្មួយៗកុមារកំព្រាឲ្យបង្កើនការប្រុងប្រយ័ត្នជានិច្ចពីការថែទាំសុខភាពអនាម័យនិងសុវត្ថិភាពផ្ទាល់ខ្លួន តាមរយៈការចូលរួមអនុវត្តអោយបានខ្ជាប់ខ្ជួនតាមវិធានសុខាភិបាល “៣ការពារ  ៣កុំ ” ដើម្បីចៀសអោយផុតពីការឆ្លងរាតត្បាត នៃវីរុសដែលតាបម្លែងថ្មីកូវីដ-១៩។

គួរបញ្ជាក់ថាអំណោយដែលបានផ្ដល់ជូនមណ្ឌលកុមារកំព្រារួមមានអង្ករ ២០០គីឡូ ក្រាម, ទឹកស៊ីអ៊ីវ ៥យួរ, ទឹកត្រី៥យួរ, ម៉ាសមួយកេសធំ ២៥០០ម៉ាស, ជែលមួយកេសតូច, មី ២០កេសតូច,ឃីត ៤កញ្ចប់ និងថវិកាជូនម៉ែដោះ និងកុមារកំព្រា សរុបចំនួន១លាន២៣ម៉ឺនរៀល៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម​ បានប្រាប់ប្រជាពលរដ្ឋ ឲ្យបង្កើនការប្រុងប្រយ័ត្ន ទាំងសុវត្ថិភាពខ្លួនឯង និងក្រុមគ្រួសារ ដោយត្រូវចូលរួមអនុវត្តនូវវិធានការពារ «៣ការពារ និង ៣កុំ» ដោយពាក់ម៉ាស ការលាងសម្អាតដៃ ការរក្សាគម្លាតសុវត្តិភាពបុគ្គល និងគម្លាតសង្គម ដើម្បី កាត់ផ្តាច់ខ្សែចម្លងជំងឺកូវីដ១៩ ទៅក្នុងសហគមន៍។​

លោកប្រាប់ពលរដ្ឋយ៉ាងដូច្នេះ នៅព្រឹកមិញនេះក្នុងឱកាសចុះពិនិត្យស្ថានភាពពលរដ្ឋ ធ្វើចត្តាឡីស័ក នៅតាមខ្នងផ្ទះ​ ក្រោយពីអាជ្ញាធរបិទខ្ទប់ភូមិ បន្ទាប់ពីពាក់ព័ន្ធនឹងអ្នកវិជ្ជមានកូវីដ ១៩ ស្ថិតនៅក្នុងភូមិ៣៣ ឃុំព្រែកកក់ ស្រុកស្ទឹងត្រង់ និងភូមិទទោល ឃុំគោករវៀង ស្រុកជើងព្រៃ។

បេីយោងតាម​សេចក្តីប្រកាសព័ត៌មានរបស់រដ្ឋបាលខេត្តកំពង់ចាម ក្នុង​​ថ្ងៃ​ទី​១​ ខែកញ្ញា​ ឆ្នាំ​២០២១​នេះ​ បច្ចុប្បន្នភាព​នៃ​ជំងឺ​កូវីដ​-១៩​ ដោយមានករណីជាសះស្បើយ​ ចំនួន ៣៧នាក់ និងករណីរកឃើញវិជ្ជមានកូវីដ-១៩​ ចំនួន ២២នាក់ ក្នុងនោះ ក្រុងកំពង់ចាម ២នាក់, ស្រុកកំពង់សៀម ១នាក់, ស្រុកកងមាស ១នាក់, ស្រុកកោះសូទិន ១នាក់, ស្រុកចំការលើ ២នាក់, ស្រុកជើងព្រៃ ២នាក់, ស្រុកព្រៃឈរ ៥នាក់, ស្រុកស្ទឹងត្រង់ ២នាក់ ដោយឡែក​មកពីខេត្តស្ទឹងត្រែង ៤នាក់, ខេត្តមណ្ឌលគីរី ១នាក់, ខេត្តកំពង់ធំ ២នាក់ និងខេត្តត្បូងឃ្មុំ ១នាក់​ផងដែរ​៕SRP

ខេត្តសៀមរាប៖លោក ចៅ ម៉ៅមុន្នី តំណាង លោក ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី នៅថ្ងៃព្រហស្បតិ៍ ទី០២ ខែកញ្ញា ឆ្នាំ២០២១នេះ បាននាំយក ទេយ្យវត្ថុ និងបច្ច័យ ប្រគេនដល់ព្រះសង្ឃ ព្រមទាំងបច្ច័យ ជូនលោកតាជី និងលោកយាយជី ដែលគង់និងស្នាក់អាស្រ័យ នៅតាមវត្តអារាមចំនួន៣ ក្នុងក្រុងសៀមរាប។ ក្នុងកាយវិការនេះគឺជាការចូលរួមរបស់សប្បុរសជន ជាមួយសកម្មភាពមនុស្សធម៌របស់កាកបាទក្រហមកម្ពុជា សាខាខេត្តសៀមរាបផងដែរ៕SRP

ភ្នំពេញ៖ទីស្ដីការគណៈរដ្ឋមន្ត្រី បានសម្រេចបញ្ឈប់ សំណើរបស់ក្រុមហ៊ុនសំណង់ «ឈ្នះ ឈ្នះ» តាមរយៈក្រសួងកសិកម្ម និងរដ្ឋបាលខេត្តកណ្តាល ដែលចង់ទិញដីបឹងជាង ១ពាន់ហិកតា នៅក្នុងឃុំបារុង ស្រុកល្វាឯម ខេត្តកណ្តាលសម្រាប់រៀបចំអភិវឌ្ឍជាទីក្រុងរណបបែបទំនើប និង ហេដ្ឋារចនាសម្ព័ន្ធសំខាន់ៗ។

នេះបើយោងតាមលិខិតរបស់ទីស្តីការគណៈរដ្ឋមន្ត្រី ចុះថ្ងៃទី ២៧ ខែសីហាឆ្នាំ ២០២១ ដែលបានចុះហត្ថលេខាដោយ លោក ហ៊ីង ថូរ៉ាក់ស៊ី រដ្ឋលេខាធិការប្រចាំការ៕SRP

ខេត្តសៀមរាប៖ជនជាតិម៉ាឡេស៊ី ម្នាក់ បានដេកស្លាប់ បង្កឲ្យមានការភ្ញាក់ផ្អើលដល់សមត្ថកិច្ច។ ហេតុការណ៍ភ្ញាក់ផ្អើលបានកើតឡើង នៅវេលាម៉ោង២១និង០០នាទី ថ្ងៃទី០១ ខែកញ្ញា ឆ្នាំ២០២១ នៅចំណុចក្រុមទី១០ ភូមិវត្ដដំណាក់ សង្កាត់សាលាកំរើក ក្រុងសៀមរាប។

សមត្ថកិច្ចមូលដ្ឋានបានឲ្យដឹងថាជនរងគ្រោះមានឈ្មោះ MEHRAN CHINNIAH ភេទប្រុស អាយុ៥២ឆ្នាំ ជនជាតិ ម៉ាឡេស៊ី។ ការដេកស្លាប់នេះមូលហេតុដោយសារគាំងបេះដូង ពុំមានពាក់ព័ន្ធរឿងឃាតកម្មឬជំងឺកូវីដ-១៩នោះទេ។

សមត្ថកិច្ចបានបន្តថាសាកសព ត្រូវបានបញ្ជូនទៅតម្កល់ទុក បណ្ដោះអាសន្ន នៅនាយកដ្ឋានបច្ចេកទេសវិទ្យាសាស្រ្ដ ដើម្បីរងចាំការសម្រេចពីក្រុមគ្រួសារ និងស្ថានទូត៕SRP

ខេត្តសៀមរាប៖អាជ្ញាធរមូលដ្ឋានសង្កាត់នគរធំបានឲ្យដឹងថា នៅថ្ងៃទី០១ ខែកញ្ញា ឆ្នាំ២០២១ នៅចំណុចភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប សមត្ថកិច្ចនគរបាលប៉ុស្តិ៍នគរធំ បានប្រទះឃើញគ្រាប់យុទ្ធភណ្ឌមិនទាន់ផ្ទុះ ចំនួន០៣គ្រាប់៖
-គ្រាប់បែកដៃប្រភេទ82-2 ចំនួន០២គ្រាប់
-គ្រាប់បែកដៃប្រភេទF1 ០១គ្រាប់។

អាជ្ញាធរសង្កាត់បានបន្តថា ករណីនេះសមត្ថកិច្ចបានរាយការណ៍ប្រាប់មន្ត្រីស៊ីម៉ាក់ឲ្យចុះមកពិនិត្យរួចហើយ។ បច្ចុប្បន្ន គ្រាប់យុទ្ធភណ្ឌមិនទាន់ផ្ទុះខាងលើ ត្រូវបានក្រុមការងារ មជ្ឈមណ្ឌល សកម្មភាពកំចាត់មីន កម្ពុជា យកទៅរក្សាទុកដើម្បីកម្ទេចចោល។

សូមរំលឹកថាកាលពីថ្ងៃទី៣១ ខែសីហា ឆ្នាំ២០២១ ស្ថិតនៅក្បែរផ្ទះចំណុចជើងភ្នំក្រោម ភូមិភ្នំក្រោម សង្កាត់សៀមរាប ក្រុងសៀមរាប ប្រជាពលរដ្ឋបានប្រទះឃើញគ្រាប់យុទ្ធភណ្ឌមិនទាន់ផ្ទុះ ចំនួន០៣គ្រាប់ ដែលបម្សល់ទុកពីសម័យសង្គ្រាមផងដែរ។ រួមមានគ្រាប់ត្បាល់(82mm) ១គ្រាប់. គ្រាប់(B40) ១គ្រាប់.គ្រាប់ផ្លោង(23mm)១គ្រាប់៕SRP

ភ្នំពេញ៖ក្រសួងសុខាភិបាលបានប្រាប់អាជ្ញាធរ រាជធានីភ្នំពេញ និងខេត្តសៀមរាប ស្ដីពីការអនុញ្ញាតឲ្យសណ្ឋាគារទទួលថែទាំ និងព្យាបាលអ្នកជំងឺកូវីដ-១៩ កម្រិតស្រាល។

នេះបើយោងតាមសេចក្ដីប្រកាសរបស់ក្រសួងសុខាភិបាល ដែលចុះហត្ថលេខាដោយលោកម៉ម ប៊ុនហេង នៅថ្ងៃទី០១ ខែកញ្ញា ឆ្នាំ២០២១៕SRP