ខេត្តកំពង់ចាម​៖លោក​ឧត្តមសេនីយ៍ឯក ហ៊ុន ម៉ាណែត បានថ្លែងថា​៖ ចំពោះ​ការជួបជុំសប្បាយរីករាយ និងឱកាសធ្វើបុណ្យធ្វើទាន ក៏ដូចជាការកសាងសមិទ្ធផលនានារួមគ្នា ដែលយើងកំពុងចូលរួមអបអរសាទរនាពេលនេះ គឺជាផ្លែផ្កានៃការអនុវត្តមាគ៌ានយោបាយ ដ៏ត្រឹមត្រូវរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា ដែលតាំងពីដើមរៀងមកតែងតែឈរនៅក្បែរប្រជាជន រួមសុខរួមទុក្ខជាមួយប្រជាជននៅក្នុងគ្រប់កាលៈទេសៈ ទាំងក្នុងបុព្វហេតុរំដោះជាតិ, ការពារជាតិ, ស្តារកសាងជាតិ, អភិវឌ្ឍជាតិ និងធានានរន្តរភាពនៃសន្តិភាពសម្រាប់ជាតិ។

លោក​ឧត្តមសេនីយ៍ឯក ហ៊ុន ម៉ាណែត បានថ្លែងបន្តថា​៖ទីវត្តអារាម ជាកន្លែងប្រមូលផ្តុំពុទ្ធសាសនិកជន ដែលមានជំនឿយ៉ាងមុតមាំលើ ព្រះពុទ្ធសាសនា សម្រាប់ជួបជុំធ្វើបុណ្យទានបំពេញកុសល, ជាទីពំនាក់អាស្រ័យសម្រាប់អ្នកគ្មានទីពឹងបង្អែក, ជាទីស្នាក់អាស្រ័យរបស់សិស្សានុសិស្សជាកូនចៅរបស់ប្រជាពលរដ្ឋក្រីក្រ, ជាទីបង្អែកខាងផ្លូវចិត្ត, ជាឃ្លាំងផ្ទុកចំណេះដឹង, ជាបណ្ណាល័យ ជាសារមន្ទីរនៃវប្បធម៌​ និងអក្សរសាស្រ្តជាតិ នាគ្រប់សម័យកាល​។

លោក​ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក ថ្លែងបែបនេះក្នុងពិធីសម្ពោធឆ្លងមហាកុដិភ្លោះ និងសមិទ្ធផលនានា នៅវត្តសុវណ្ណគិរីរតនៈ ភ្នំប្រុស ស្ថិត​ក្នុង​ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម នៅថ្ងៃសុក្រម្សិលមិញ។

លោកឧត្ដមសេនីយហ៊ុន ម៉ាណែត បាន​លេីកឡេីងថា​៖ ការដឹកនាំដោយធម៌ គឺ​ពិតជាសំខាន់ណាស់​ ដែល​រាជរដ្ឋាភិបាលសព្វថ្ងៃ បានដឹកនាំដោយផ្អែកលើគោលការណ៍នេះ សំដៅយ៉ាងណាឱ្យប្រជាពលរដ្ឋ ចេះរស់នៅដោយធម៌, ចេះគោរពគ្នា, ចេះស្រឡាញ់គ្នា, ចេះជួយយកអាសារគ្នា, មានគុណធម៌, មានសីលធម៌។​

លោក​ឧត្ដមសេនីយ៍ឯក​ ហ៊ុន​ ម៉ាណែត​​ បាន​បញ្ជក់​ថា​ សមិទ្ធផលទាំងនេះ ក៏ជាផ្នែកមួយនៃការចូលរួមចំណែកដោយមិនអាចខ្វះបានរបស់លោកយាយ លោកតា បងប្អូនប្រជាពលរដ្ឋ តាមរយៈការបំពេញនូវតួនាទីយ៉ាងសំខាន់ ក្នុងការអប់រំទូន្មានកូនចៅ និងបញ្ជូនពួកគាត់ឱ្យទៅសាលារៀនដើម្បីឱ្យពួកគាត់ក្លាយខ្លួនជាពលរដ្ឋល្អ មានមនសិការស្នេហាជាតិ និងស្មារតីទទួលខុសត្រូវលើជោគវាសនាខ្លួនឯង គ្រួសារ សង្គមជាតិ និងចូលរួមកសាងជាតិ ថែរក្សាការពារសន្តិភាព និងសមិទ្ធផលជាតិ និងខិតខំបំពេញកាតព្វកិច្ចជាពលរដ្ឋល្អតាមតួនាទីរៀងៗខ្លួន ជាពិសេស ការចូលរួមជ្រើសរើសអ្នកដឹកនាំប្រទេសបានត្រឹមត្រូវផងដែរ​៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងលោកជំទាវ និងក៏មានការអញ្ជើញចូលរួមពីឯកឧត្តម លោកជំទាវ លោក លោកស្រី គណៈកិត្តិយសសាខា គណៈកម្មាធិការសាខា អនុសាខា សប្បុរសជន នៅថ្ងៃសុក្រ នេះបានចុះសំណេះសំណាល សួរសុខទុក្ខ និងផ្ដល់ជូនអំណោយមនុស្សធម៌របស់សាខាកាកបាទក្រហមកម្ពុជា ផ្តល់ជូនប្រជាពលរដ្ឋដែលងាយរងគ្រោះបំផុត ចាស់ជរាឥតទីពឹង ជនមានពិការភាព ស្ត្រីមេម៉ាយកូនច្រើនមានជីវភាពខ្វះខាតចំនួន៦១០គ្រួសារ ក្នុងស្រុកចំនួន៣។

លោក សុខ លូ  បានសម្តែងនូវក្តីសប្បាយរីករាយ និបាននាំយកការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ដោយក្តីអាណិតស្រឡាញ់ និងតែងតែធ្វើការគិតគូរពីសុខទុក្ខ និងជីវភាពរស់នៅប្រចាំថ្ងៃ ព្រមទាំងបានផ្ញើនូវក្តីនឹករលឹកចំពោះលោកតាលោកយាយ បងប្អូនប្រជាពលរដ្ឋទាំងអស់ ដែលរស់នៅតំបន់ដាច់ស្រយាលនេះប្រកបដោយមនោសញ្ចេតនាដ៏ជ្រាលជ្រៅបំផុត។ 

លោក សុខ លូ បានអំពាវនាវដល់ប្រជាពលរដ្ឋទាំងអស់ សូមបន្តថែទាំសុខភាពឱ្យបានល្អ ពិសាទឹកដាំឆ្អិនល្អ មានអនាម័យ ក្នុងការរស់នៅ និងប្រុងប្រយ័ត្ន ចំពោះការប្រែប្រួល អាកាសធាតុ ដូចជាគ្រោះធម្មជាតិ ខ្យល់ព្យុះ ខ្យល់កន្ត្រាក់ រន្ទះបាញ់ជាដើម និងសូមបន្តចូលរួមទប់ស្កាត់ជំងឺកូវីដ-១៩ និងចូលរួមចាក់វ៉ាក់សាំងដូសទី៣ ឬដូសទី៤ ឱ្យបានគ្រប់ៗគ្នា ជាពិសេសត្រូវចេះសាមគ្គីគ្នា ស្រឡាញ់គ្នាដូចបងប្អូន កាត់បន្ថយអំពើហិង្សាក្នុងគ្រួសារ និងត្រូវថែរក្សាសន្តិភាពដែលបានមកយ៉ាងលំបាកឱ្យបានគង់វង្ស ។ លោកក៏បានបន្តអំពាវនាវដល់ប្រជាពលរដ្ឋទាំងអស់ចូលរួមសហការ ជាមួយអាជ្ញាធរមានសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានា ពីការជួញដូរ ចែកចាយ និងប្រើប្រាស់គ្រឿងញៀន នៅតាមសហគមន៍ ការចំណាកស្រុកខុសច្បាប់ ដើម្បីមានការអន្តរាគមន៍បង្រ្កាប បានទាន់ពេលវេលា ព្រមទាំងចូលរួមក្នុងការលុបបំបាត់ការប្រើប្រាស់ និងជួញដូរគ្រឿងញៀនខុសច្បាប់ ក្នុងនោះ បន្តអប់រំកូនចៅ របស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេកបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។ 

លោកសុខ លូ  បានថ្លែងអំណរគុណយ៉ាងជ្រាលចំពោះសប្បុរសជនគ្រប់មជ្ឈដ្ឋាន ដែលបានបរិច្ចាគធនធានថវិកា ក៏ដូចជាសម្ភារៈមួយចំនួន ដល់សាខាកាកបាទក្រហមកម្ពុជា ប្រកបដោយទឹកចិត្តជ្រះថ្លា ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីឱ្យសាខាកាកបាទក្រហមកម្ពុជាខេត្ត អាចចុះបំពេញប្រតិបត្តិការមនុស្សធម៌បានដូចនាពេលនេះ និងជាបន្តបន្ទាប់ទៀត។ 

សូមបញ្ជាក់ថាពិធីនេះរៀបចំឡើងនៅទីតាំងចំនួន៣កន្លែងផ្សេងគ្នារួមមាន៖ 

-ទីតាំងទី ១ នៅសាលាស្រុកកំរៀង មានចំនួន២០០គ្រួសារ។

– ទីតាំងទី២ នៅសាលាឃុំមានជ័យ នៃស្រុកសំឡូត មានចំនួន ២១០គ្រួសារ។

-ទីតាំងទី៣ នៅបរិវេណវត្តស្តៅខាងកើត ឃុំស្តៅ ស្រុករតនមណ្ឌល ចំនួន២០០គ្រួសារ ដោយ

គ្រួសារនីមួយៗនូវ ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកបរិសុទ្ធវីឃែរ១កេស,ទឺកត្រី១យួរ ទឹកស៊ីអ៊ីវ១យួរ និងជែល១ដបផងដែរ៕SRP

ខេត្តបាត់ដំបង៖ក្នុងពីធីប្រកាសចូលកាន់មុខតំណែងមន្រ្ដីរាជការ ចំណុះក្នុងរចនាសម្ព័ន្ធមន្ទីរអង្គភាពចំនួន៣ រួមមាន មន្ទីរព័ត៌មាន មន្ទីរផែនការខេត្ត និងមន្ទីរប្រៃសណីយ៍ និងទូរគមនាគមន៍ខេត្ត នៅក្នុងសាលប្រជុំអាគារE សាលាខេត្តបាត់ដំបង នៅរសៀលថ្ងៃព្រហស្បតិ៍ ម្សិលមិញ

លោក សុខ លូ អភិបាលខេត្ត បានថ្លែងថា៖ បញ្ហាសំរាមនៅក្នុងក្រុងបាត់ដំបង ត្រូវការចូលរួម និងមានឆន្ទៈទាំងអស់គ្នា ទើបក្រុងយើងគ្មានសំរាម ដោយផ្តើមចេញពីបុគ្គលខ្លួនឯងផ្ទាល់ ក្នុងនោះ មន្ត្រីរាជការនៅតាមមន្ទីរនានា ត្រូវជួយផ្សព្វផ្សាយ អនុវត្តទាំងអស់គ្នាថែមទៀតផង ទើបធ្វើឱ្យទីក្រុងរបស់យើង កាន់តែមានទេសចរចូលមកកម្សាន្តច្រើន ហើយសេដ្ឋកិច្ចជាតិក៏មានការរីកចម្រើនផងដែរ។

ជុំវិញអំពីបញ្ហាបរិស្ថាន លោក សុខ លូ ក៏បានលើកឡើងទៀតថា ដើម្បីឱ្យទីក្រុងបាត់ដំបង កាន់តែមានភាពស្អាត ក្នុងការឆ្លើយតបតាមគោលដៅទេសចរណ៍ ពិសេសបន្តយកពានរង្វាន់ជាទីក្រុងស្អាត របស់ ប្រទេសកម្ពុជា ក៏ដូចជាទីក្រុងស្អាតរបស់ អាស៊ាន ដែលក្រុងបាត់ដំបង ធ្លាប់ទទួលបានពានរង្វាន់ កន្លងមកនោះ គឺត្រូវរួមគ្នាគិតគូរពីបញ្ហាសំរាម ឱ្យអស់នៅតាមដងផ្លូវនានា ក៏ដូចជានៅតាមដងស្ទឹងជាដើម។ លោកថា ក្នុងនោះមន្ត្រីរាជការតាមមន្ទីរនានា ត្រូវមានភាពស្អាត នៅទីតាំងអង្គភាពរបស់ខ្លួនជាមុនសិន ទាំងការសម្អាត អនាម័យ ទាំងការសម្អាត បន្ទប់អនាម័យ ដែលនេះគឺជាគំរូសម្រាប់ឈានទៅធ្វើការអនុវត្តនៅតាមទីសាធារណៈ៕SRP

ខេត្តបាត់ដំបង៖លោកសុខ លូ បានថ្លែងបញ្ជាក់ថា សម្រាប់ខេត្តបាត់ដំបង បញ្ហាមន្ត្រីទំនើងមិនទាន់កើតមាននៅតាមស្ថាប័ន មន្ទីរណាមួយនៅឡើយទេ ដែលនេះគឺជាចំណុចល្អមួយសម្រាប់មន្ត្រីយើងទាំងអស់គ្នា ខិតខំប្រឹងប្រែងធ្វើការងារ ដើម្បីបម្រើប្រជាពលរដ្ឋ ដោយទទួលខុសត្រូវខ្ពស់។

លោក សុខ លូ ក៏បានណែនាំដល់មន្រ្ដីរាជការទាំងអស់ បន្តពង្រឹងសាមគ្គីភាពផ្ទៃក្នុង និងត្រូវមានទំនាក់ទំនងល្អ ជាមួយអ្នកដទៃ ដើម្បីធ្វើឲ្យដំណើរការ នៃការធ្វើការ ប្រកបដោយរលូន និងជាពិសេសបន្តការគោរពវិន័យអង្គភាព ពង្រឹងសមត្ថភាពរបស់ខ្លួន ទាំងបច្ចេកទេស និងភាសាឲ្យកាន់តែខ្លាំងជាលំដាប់។

លោកសុខ លូ បានមានប្រសាសន៍ ណែនាំបន្ថែមដល់មន្ត្រីរាជការ នៃមន្ទីរចំនួន៣ខាងលើ ក៏ដូចជាមន្ទីរអង្គភាពជុំវិញខេត្តបាត់ដំបង ត្រូវរួមគ្នាគិត រួមគ្នាធ្វើ និងត្រូវធ្វើការងារឱ្យបានសម្រេចជោគជ័យ ទើបយើងខ្លាំង ហើយត្រូវចៀសឱ្យបានការធ្វើជាមន្ត្រីទំនើង ព្រោះការធ្វើជាមន្ត្រីទំនើងនោះមិនបានយូរឡើយ។

លោក សុខ លូ អភិបាលខេត្តបាត់ដំបង មានប្រសាសន៍យ៉ាងដូច្នេះ នៅក្នុងសាលប្រជុំអាគារE សាលាខេត្តបាត់ដំបង នារសៀលថ្ងៃព្រហស្បតិ៍ ម្សិលមិញ ក្នុងពីធីប្រកាសចូលកាន់មុខតំណែងមន្រ្ដីរាជការ ចំណុះក្នុងរចនាសម្ព័ន្ធមន្ទីរអង្គភាពចំនួន៣ រួមមាន មន្ទីរព័ត៌មាន មន្ទីរផែនការខេត្ត និងមន្ទីរប្រៃសណីយ៍ និងទូរគមនាគមន៍ខេត្ត៕SRP

ខេត្តត្បូងឃ្មុំ៖អភិបាលខេត្តត្បូងឃ្មុំ លោក ជាម ច័ន្ទសោភ័ណ បានថ្លែងអំពាវនាវដល់ប្រជាពលរដ្ឋទាំងអស់ឲ្យបន្តគាំទ្រ និងផ្ដល់ការជឿជាក់មកលើដឹកនាំរបស់ គណបក្សប្រជាជនកម្ពុជា និងសម្ដេចតេជោ ហ៊ុន សែន ដែលតែងតែខិតខំលះបង់កំលាំងកាយចិត្តតស៊ូនាំយកសន្តិភាព ថែរក្សាសន្តិភាព និងបន្តអភិវឌ្ឍន៍រីកចម្រើនរហូតដល់សព្វថ្ងៃនេះ ជាបន្តទៀត នៅក្នុងការដឹកនាំរាជរដ្ឋាភិបាល ដោយត្រូវទៅបោះឆ្នោតជ្រើសរើសក្រុមប្រឹក្សាឃុំ សង្កាត់ នៅថ្ងៃទី ៥ មិថុនា ខាងមុខនេះឲ្យបានគ្រប់ៗគ្នា។

ការថ្លែងអំពាវនាវបែបនេះ ក្នុងឱកាស សួរសុខទុក្ខ ប្រជាពលរដ្ឋ រស់នៅក្នុងឃុំអំពិលតាពក និងក្រុមគ្រូពេទ្យបំពេញការងារចាក់វ៉ាក់សាំងជូនពលរដ្ឋ នៅមណ្ឌលសុខភាពអំពិលតាពក ស្ថិតក្នុងឃុំអំពិលតាពក ស្រុកអូររាំងឪ នៅថ្ងៃព្រហស្បតិ៍នេះ។

លោកក៏បានសម្ដែងនូវការកោតសរសើរ និងអំណរគុណជូនចំពោះក្រុមប្រឹក្សាឃុំ នៅក្នុងស្រុកអូរាំងឪ ទាំងមូល ដែលបានយកចិត្តទុកដាក់យកអស់ពីកម្លាំងកាយចិត្ត ប្រាជ្ញាស្មារតី បានចូលរួមបម្រើប្រជាពលរដ្ឋប្រកបដោយការទទួលខុសត្រូវ រួមគ្នាសម្រេចបាននូវលទ្ធផលដ៏ល្អ ក្នុងការអនុវត្តគោល នយោបាយ អភិវឌ្ឍន៍ឃុំ ក្នុងអាណត្តីទី៤ កន្លងមក ទទួលបានលទ្ធផលការងារល្អប្រសើរ ដែលទទួលបានការគាំទ្រពេញចិត្តពីប្រជាជន សប្បាយរីករាយនឹងសមិទ្ធផលថ្មីៗជាច្រើន និងមានជីវភាពរស់នៅកាន់តែប្រសើរ។​

លោក ជាម ច័ន្ទសោភ័ណ ក៏បានអំពាវនាវឲ្យពលរដ្ឋ និងអាណាព្យាបាលទាំងអស់ សូមនាំកុមារអាយុចាប់ពី០៣ឆ្នាំ រហូតដល់មនុស្សចាស់ដែលមិនទាន់បានចាក់វ៉ាក់សាំងដូសទី០១ ក៏ដូចជាដូសជំរុញ សូមមកចាក់ដោយឥតគិតថ្លៃ ដើម្បីទប់ស្កាត់ការឆ្លងរីករាលដាលជំងឺនេះ ដែលនឹងប៉ះពាល់ដល់សេដ្ឋកិច្ច និងអាយុជីវិតខ្លួន ក្រុមគ្រួសារ និងសហគមន៍​ផងដែរ​៕SRP

ខេត្តកំពង់ចាម​៖លោក អ៊ុន​ ចាន់ដា​ សមាជិកគណៈកម្មាធិការកណ្តាលគណបក្សប្រជាជនកម្ពុជា និង​ជាប្រធានគណៈកម្មាធិការបក្សខេត្តកំពង់ចាម បាន​ថ្លែងប្រាប់ប្រជាពលរដ្ឋថា​៖ ដល់រដូវ​ភ្លៀង​ធ្លាក់​​ហើយ​ ផ្សិត​ក៏ដុះ​ច្រើន​ដែរ ដូច្នេះ​សូមពុកម៉ែ​បងប្អូន​ ត្រូវ​គិត​ឲ្យ​បាន​ច្បាស់លាស់​​ មុន​នឹង​​​ជ្រើសរើស​យកមក​ធ្វើ​ម្ហូប​ ប្រយ័ត្ន​​ប៉ះ​ចំផ្សិត​ពុល​ នាំ​ឲ្យ​គ្រោះថ្នាក់​ដល់​សុខភាព​។

លោកបញ្ជាក់បែបនេះ ក្នុង​ពិធី​ប្រកាស​​បញ្ចូល​សមាជិក​​គណបក្សប្រជាជន​កម្ពុជា​ ឃុំ​រកាគយ​ ស្រុកកងមាស​ ចំនួន​៣៦៧នាក់​ នៅថ្ងៃព្រហស្បតិ៍នេះ។

លោកបន្តថា ការដែល​បងប្អូន​ជ្រេីសរេីស​ យក​គណបក្សប្រជាជន​កម្ពុជា​ នៅពេលនេះ​គឺ​ពិត​ជា​ត្រឹមត្រូវ​ណាស់​ ព្រោះ​គណបក្ស​នេះបាន​រំដោះ​ និង​ការពារ​អាយុជីវិត​ប្រជាជន​ ព្រមទាំង​​នាំមក​នូវ​ សុខ សន្តិភាព​ និង​ការ​អភិវឌ្ឍន៍​​ រីកចម្រើន​លើ​គ្រប់​វិស័យ​។

លោកអ៊ុន​ ចាន់ដា​​ ក៏បាន​ថ្លែង​នូវគោលនយោបាយ សំខាន់ៗ​ របស់គណបក្សប្រជាជនកម្ពុជា​ ដោយប្រកាន់ភ្ជាប់នូវចក្ខុវិស័យរបស់ខ្លួនជាយូរអង្វែង​ ដោយប្រមូល​កម្លាំង​គ្រប់និន្នាការ​ នយោបាយ​រួបរួម​គ្នា​ កសាងប្រទេស​ជាតិ​​ឲ្យ​កាន់តែមានភាព​រីកចម្រើន​ឡើង​ សំបូររុងរឿងស្ថិតស្ថេរគង់វង្ស​ ឲ្យ​ប្រទេស​យើង​ដែលស្ថិតក្នុងឯករាជ្យជាតិ អធិតេយ្យ បូរភាព អព្យាក្រឹត្យ វឌ្ឍនៈភាព​ នឹងទទួលបាននូវសុភមង្គលជាតិខ្មែរតែមួយ។​

គួរ​បញ្ជាក់​ថា​ សមាជិក​ថ្មី​ ចំនួន​៣៦៧នាក់​ ដែល​សុំ​ចូលរួម​ជីវភាព​នយោបាយ​ជាមួយ​គណបក្សប្រជាជន​កម្ពុជា​ ឃុំ​រកាគយ​ ស្រុកកងមាស​ ក្នុង​នោះ​សាខា​គណបក្ស​ភូមិ​រកាគយ​ (ក​)​ ចំនួន​២៩នាក់​ សាខា​គណបក្ស​ភូមិ​រកាគយ​ (ខ​)​ ចំនួន​៥៨នាក់​ សាខា​គណបក្ស​ភូមិ​ថ្មី​ (ក​)ចំនួន​១៣៦នាក់​ និងសាខា​គណបក្ស​ភូមិ​ថ្មី​ (ខ​)ចំនួន​១៤៤នាក់​៕SRP

ខេត្តសៀមរាប៖ពលរដ្ឋខ្លះ​រស់​នៅ​ក្នុងក្រុង​សៀមរាប និង​អ្នក​ខ្លះ​រស់​នៅ​រាជធានីភ្នំពេញ ចំនួន៨គ្រួសារ បានសម្តែង​នូវ​ការ​ខកចិត្ត​ស្ទើរ​យំមិនចេញ ក្រោយពីបានបង់លុយ​ទិញផ្ទះ​ល្វែង​ បែបអាជីវកម្ម​ របស់​លោក លី ហាំងសេង ដែលមួយ​ល្វែង​មានតម្លៃ​រហូត​ទៅ​ដល់ជិត៣០ម៉ឺនដុល្លារ តែមិនទទួលបានប្លង់កាន់កាប់ ខណៈ​សំណង់​នោះសាងសង់ក៏​មិនរួចរាល់ទៀត។

ទីតាំងគម្រោងផ្ទះល្វែង លី ហាំងសេង មានទីតាំងស្ថិត​នៅ​ភូមិ​ជន្លង់ សង្កាត់សាលាកំរើក ក្រុងសៀមរាប។«លោក លី ហាំងសេង ម្ចាស់គម្រោងដែលរងការចោទប្រកាន់»

យោងតាមប្រភពពីអ្នកទិញ បានប្រាប់អ្នកសារព័ត៌មានថា ពួកគាត់ខ្លះបានបង់ប្រាក់ចំនួន៥០ភាគរយ ហើយ​ខ្លះទៀត៧០ ភាគរយ និងមានអ្នកដែលបង់​ផ្តាច់១០០ភាគ​រយថែមទៀត ប៉ុន្តែគិត​ពីពេលដែលបានបង់ប្រាក់ទិញ​តាំងពីដើមឆ្នាំ​២០២០ មក​ទល់ពេលនេះ មានរយៈពេល​ប្រមាណ២ឆ្នាំទៅហើយ ផ្ទះ​នោះ​ធ្វើ​មិនទាន់រួចរាល់ ដោយ​បានត្រឹមតែចាក់ជាសរសេរ និង​ប្លង់សេប៉ុណ្ណោះ ខណៈដែលប្លង់ផ្ទេរ​កម្មសិទ្ធិ ក៏​លោក លី ហាំងសេង ដែលជាម្ចាស់គម្រោង ក៏​មិនបានកាត់ឲ្យ​ពួក​គាត់ទៀត។

ប្រភពបន្តថា តាមកិច្ចសន្យា​ទិញលក់ផ្ទះ ដែលបានផ្តិតមេដៃកាលពីខែមករា ឆ្នាំ​២០២០ និង​ដែលយើងទទួលបាន បានបញ្ជាក់យ៉ាងច្បាស់ថា៖ នៅ​ពេលភាគីអ្នកទិញទូទាត់ប្រាក់ដំណាក់កាលទី១រួច ពោលគឺប្រាក់៣០ភាគរយ នៃតម្លៃផ្ទះ ភាគីអ្នកលក់ ត្រូវ​ចាប់ផ្តើម​ធ្វើ​បែបបទ​ចុះបញ្ជី​ផ្ទេសិទ្ធិ ផ្ទះ និង​ដី ដែលបានលក់​នោះ​ទៅ​ឲ្យ​ភាគីអ្នកទិញ​ស្របទៅតាមច្បាប់។ ហើយ​ត្រូវ​សាងសង់ផ្ទះឲ្យចប់សព្វ​គ្រប់​ ១០០ភាគរយ ក្នុងរយៈពេល ១៨ខែ ដោយ​គិតចាប់ពីថ្ងៃចុះកិច្ចសន្យាតទៅ។កិច្ចសន្យាក៏បានលើកឡើងដែរថា ក្នុងករណីអ្នកលក់ផ្ទះ សាងសង់ផ្ទះមិនទាន់ពេលវេលា​ តាមការ​កំណត់ទេ គឺភាគីអ្នកលក់ ត្រូវទូទាត់​សងការ​ខូចខាត​ឲ្យ​ភាគីអ្នកទិញ។ ជាមួយ​គ្នានេះ ប្រសិនបើ​ភាគីអ្នកលក់ ឈប់លក់ផ្ទះ ឬ​បំពេញ​កាតព្វកិច្ច​តាមកិច្ចសន្យា​មិនបាន គឺភាគីអ្នកលក់ត្រូវទូទាត់​សងប្រាក់​ដែលបានទទួល​ពីភាគីអ្នកទិញ​ទាំងប៉ុន្មាន ក្នុងចំនួន​មួយ​ទ្វេរជាពីរ​ដងឲ្យ​ទៅភាគីអ្នកទិញវិញ។

ជុំវិញការលើកឡើងបែបនេះ អង្គភាពសៀមរាបប៉ុស្តិ៍ នៅ​មិន​ទាន់ទទួលបានការបំភ្លឺពីលោក លី ហាំងសេង បាននៅឡើយទេនៅរសៀលថ្ងៃនេះ៕SRP

ភ្នំពេញ៖សម្ដេចហ៊ុន សែន បានសំដែងនូវការស្វាគមន៍ ចំពោះការដំឡើងរោងចក្រ ដំឡើងរថយន្តនៅខេត្តពោធិ៍សាត់ ហើយបានលើកទឹកចិត្តឲ្យក្រុមហ៊ុនទាំងអស់បន្តវិនិយោគ និងស្វែងរកសក្តានុពលផ្សេងៗទៀត ដើម្បីវិនិយោគនៅកម្ពុជានាពេលខាងមុខ។

សម្ដេចហ៊ុន សែន ក៏បានអរគុណដល់សហរដ្ឋអាមេរិក ដែលបានផ្ដល់វ៉ាក់សាំងកូវីដ-១៩ John son &John son និង Pfizer ដល់កម្ពុជា ហើយបានជម្រាបជូនប្រតិភូទាំងមូល នូវស្ថានភាពថាមពល របស់កម្ពុជា ដែលក្នុងនោះកម្ពុជា កំពុងតែប្រើប្រាស់អគ្គិសនី ផលិតដោយវារីអគ្គិសនី សរុបទាំងអស់មាន ៦៤,៣៩% អំពីសូឡា៤.១% និងជីវឧស្ម័នចំនួន ០,២៨%។

សម្ដេចតេជោនាយករដ្ឋមន្ត្រី មានប្រសាសន៍យ៉ាងដូច្នេះ នៅវិមានសន្តិភាព នាថ្ងៃព្រហស្បតិ៍​ នេះ ក្នុងឱកាសពិភាក្សាការងារជាមួយក្រុមប្រឹក្សាធុរកិច្ចសហរដ្ឋអាមេរិក-អាស៊ាន ដឹកនាំដោយលោក ឯកអគ្គរដ្ឋទូត ឯកឧត្តម ម៉ៃខើល មីចាឡាក់ ( Michael Michlalk ) អនុប្រធានជាន់ខ្ពស់នៃនាយកគ្រប់គ្រងប្រចាំតំបន់ នៃក្រុមប្រឹក្សាធុរកិច្ចអាមេរិក-អាស៊ាន។

ក្នុងជំនួបនោះ លោក Michael Michlalk បានថ្លែងអំណរគុណជូនចំពោះសម្តេចតេជោ ដែលបានជួយគាំទ្រក្រុមប្រឹក្សាធុរកិច្ចសហរដ្ឋអាមេរិក-អាស៊ាន ហើយបានសម្តែងនូវការគាំទ្រ និងអបអរសាទរចំពោះការធ្វើជាប្រធានអាស៊ានរបស់កម្ពុជា។

លោក Michael Michlalk បានបន្ថែមថា ភាពដឹកនាំរបស់សម្ដេចតេជោ បានដើរតួនាទីបានយ៉ាងល្អសម្រាប់តំបន់ ជាពិសេសសម្រាប់បញ្ហានៅមីយ៉ាន់ម៉ា។ លោក បានវាយតម្លៃខ្ពស់ចំពោះការចាត់វិធានការទប់ស្កាត់ការរីករាលដាលជំងឺកូវីដ-១៩នៅកម្ពុជាដែលទទួលបានជោគជ័យ និងនាំទៅដល់ការបើកឡើងវិញនៃសេដ្ឋកិច្ចកម្ពុជា និងអនុញ្ញាតឲ្យមានជំនួបដោយផ្ទាល់នាថ្ងៃនេះ។

នៅក្នុងជំនួបនេះ លោក Michael Michlalk បានដឹកនាំក្រុមហ៊ុនចំនួន១៣ ហើយបានបែងចែកចេញជា០៣ក្រុម និងបានលើកមកពិភាក្សាលើបញ្ហាថាមពល ការបង្កើតរោងចក្រដំឡើងរថយន្តនៅខេត្តពោធិ៍សាត់ ការជំរុញសេដ្ឋកិច្ច ឌីជីថល និងវិស័យសុខាភិបាល៕SRP

ខេត្តសៀមរាប៖ក្មេងអាយុ ៦ឆ្នាំម្នាក់ ត្រូវបានរថយន្តដឹកដីបុកស្លាប់យ៉ាងអណោចអាធម៌។

ហេតុការណ៍បានកើតឡើង នៅល្ងាចថ្ងៃទី ៤ ខែឧសភា ឆ្នាំ២០២២ នៅលេីផ្លូវលេខ ២៦៦ ស្ថិតនៅភូមិគ្រាំង ឃុំពង្រលេី ស្រុកជីក្រែង។

សមត្ថកិច្ចបានឲ្យដឹងថាគ្រោះថ្នាក់ចរាចរណ៍នេះ បង្កឡើងដោយរថយន្តម៉ាកHyundai ពណ៌សរ ពាក់ស្លាកលេខ ត្បូងឃ្មុំ 3A- 1712 (ទិសដៅពីជេីងទៅត្បូង) បានបុកក្មេងដេីរ ស្របទិសគ្នាបណ្តាលអោយស្លាប់តែម្ដង។

សមត្ថកិច្ចបន្តថា ជនរងគ្រោះ ឈ្មោះ សឿន ទីន ភេទស្រី ទីលំនៅស្ថិតនៅភូមិគ្រាំង ឃុំពង្រលេី ស្រុកជីក្រែង។

សមត្ថកិច្ចបានបញ្ជាក់ថា អ្នកបេីកបររថយន្ត គេចខ្លួនបាត់ បន្សល់ទុកតែរថយន្ត។ ករណីនេះសមត្ថកិច្ចបានយករថយន្តទៅរក្សាទុកនៅអធិការនគរបាលស្រុកជីក្រែងដើម្បីធ្វើការស្រាវជ្រាវបន្ត៕SRP

ខេត្តសៀមរាប៖ ខេត្តសៀមរាប គឺជាខេត្តប្រវត្តិសាស្រ្តមួយរបស់ប្រទេសកម្ពុជា ហេីយក៏ត្រូវបានគេស្គាល់ទូទាំងពិភពលោកថា​ ជាខេត្តតាំងនៅនៃប្រាសាទអង្គរវត្ត ដ៏ល្បីល្បាញ និង ជាតំបន់ទេសចរណ៍ វប្បធម៌​ និងប្រវត្តិសាស្រ្តផងដែរ។ ហេីយថ្មីៗនេះ​ ក្រុងសៀមរាប កំពុងតែប្រែក្លាយរូបរាងទៅជាទីក្រុងទំនេីប តាមរយ:កំណេីន សណ្ឋាគារ ភោជនីយដ្ឋាន ហាងទំនិញ ផ្សារទំនេីប​ និងការកសាងហេដ្ឋារចនាសម្ព័ន្ធជាដេីម។អ្នកជំនាញអចលនទ្រព្យមួយរូប​ របស់គម្រោង សាលាកំរេីក​ រ៉េសុីដេន បានលេីកឡេីង ពីសក្តានុពលធំៗ ចំនួន៤របស់ ខេត្តសៀមរាបដែលអ្នកវិនិយោគ​ មិនគួរមេីលរំលង។ .1 សក្តានុពលទី១: ហេដ្ឋារចនាសម្ព័ន្ធ ៖​  ហេដ្ឋារចនាសម្ព័ន្ធផ្លូវចំនួន៣៨ខ្សែ និង ការកែលំអដងស្ទឹងសៀមរាប រួចជាស្ថាពរ​ និងបានដាក់ឲ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចតេជោហ៊ុន សែន នាយករដ្ឋមន្រ្តី កាល ពីថ្ងៃទី ៤ មេសា ឆ្នាំ ២០២២ កន្លងទៅនេះ ហេីយក៏ត្រូវ​បានប្រសិទ្ធិនាមថា ជា  “តារារះនាទិសឧត្តរ” ដោយសម្តេចផ្ទាល់ផងដែរ។  ហេដ្ឋារចនាសម្ព័ន្ធផ្លូវចំនួន៣៨ខ្សែ​ និងការកែលំអ​ដងស្ទឹងសៀមរាប នេះ​ កំពុងលេីកមុខមាត់ខេត្តសៀមរាប ជាពិសេសប្រែក្លាយក្រុងសៀមរាប ទៅជាទីក្រុងឆ្លាតវៃ ( Smart City ) ដែលជាគោលដៅ ទេសចរណ៍ វប្បធម៌ រម្មណីយដ្ឋាន ប្រវត្តិសាស្រ្ត និងធម្មជាតិ ប្រកបដោយសក្តានុពលសេដ្ឋកិច្ច យ៉ាងសម្បូរបែប​ ដែលរឹតតែជំរុញក្នុងការវិនិយោគ និងសម្រួលដល់ការធ្វេីដំណេីរ របស់វិនិយោគិនជាតិ និង អន្តរជាតិផងដែរ​។II. សក្តានុពលទី២:​ តំបន់រម្មណីយដ្ឋានប្រវត្តិសាស្រ្ត ៖​ ជាតំបន់ទេសចរណ៍ វប្បធម៌​ ប្រវត្តិសាស្រ្ត​ ដោយមាន​ ប្រាសាទអង្គរវត្តដ៏ល្បីល្បាញ, ប្រាសាទបុរាណ និងរម្មណីយដ្ឋានជាច្រេីនទៀត។ ម្យ៉ាង​ ក្រុងសៀមរាប​ កំពុងប្រែក្លាយជាទីក្រុងឆ្លាតវៃ ស័ក្កសម្ស ជាទីក្រុង បេតិកភណ្ឌ​ ទេសចរណ៍​ ប្រវត្តិសាស្រ្ត​ និងធម្មជាតិ កម្រិតអន្តរជាតិ ដែលអាចទាញភ្ញៀវទេសចរណ៍ និងវិនិយោគិនជាតិ​ និងអន្តរជាតិ ជាច្រេីនចូលមកទស្សនា ដែលនឹងជំរុញឲ្យសេដ្ឋកិច្ចខេត្ត​ រីកចម្រេីនថែមមួយកម្រិតទៀត។ III. សក្តានុពលទី៣: អាកាសយាន្តដ្ឋានអន្តរជាតិ​សៀមរាប-អង្គរ​៖​ អាកាសយាន្តដ្ឋានដ៏ធំនេះ​ មានទីតាំងស្ថិតនៅក្នុងស្រុកសូទ្រនិគម ខេត្តសៀមរាប ដែលអាចទទួលភ្ញៀវជាតិ​ និងអន្តរជាតិ​ បានរាប់លាននាក់ ក្នុងមួយឆ្នាំៗ​ ហេីយកំណេីននៃ​ ភ្ញៀវទេសចរណ៍​ និងវិនិយោគិនអន្តរជាតិ មកកាន់ ខេត្តសៀមរាបនឹងកាន់តែកើនឡើងជាលំដាប់​។IIII. សក្តានុពលទី៤: តម្លៃអចលនទ្រព្យមានតម្លៃទាប៖​យោងតាមព័ត៌មានពីភ្នាក់ងារវាយតម្លៃ​អចលនទ្រព្យ​មួយ​ បានអោយដឹងថា​ តម្លៃអចលនទ្រព្យ ក្នុងក្រុងសៀមរាប មានតម្លៃទាបនៅឡេីយ​ បេីធៀប​នឹងរាជធានីភ្នំពេញ ឬក្រុងកំពង់សោម ដែលជាឱកាសសម្រាប់វិនិយោគិន អាចទិញទុកចំណេញ​ សាងសង់​ជាសណ្ឋាគារ ផ្ទះសំណាក់ ប៊ូទិច ផ្សារទំនេីប​ ឬគម្រោងលំនៅដ្ឋានជាដេីម។អ្នកជំនាញបានបន្តទៀតថា​៖​ ដោយមេីលឃេីញពីតម្រូវការវិនិយោគ យ៉ាងច្រេីននៃ​ លំនៅដ្ឋាន​ និងចូលរួមអភិវឌ្ឍ ក្រុងសៀមរាប អោយទៅជា​ Smart City បានជា​ គម្រោង Sala Kamreuk Residence​ ដែលជាគម្រោង​អភិវឌ្ឍន៍​ ដ៏ធំមួយក្នុងក្រុងសៀមរាប​ កំពុងអភិវឌ្ឍជាលំនៅដ្ឋាន​ មានទីតាំងស្ថិតនៅភូមិសាលាកំរេីក សង្កាត់សាលាកំរេីក ក្រុងសៀមរាប ដែលជាតំបន់កំពុងអភិវឌ្ឍស្រាប់ ហ៊ុំព័ទ្ធ​ទៅដោយសណ្ឋាគារ ប៊ូទិច សាកលវិទ្យាល័យ កន្លែងកំសាន្ត និងតំបន់ពាណិជ្ជកម្ម​ជាច្រេីន​ ពិសេសចំងាយត្រឹមតែ​៣នាទីពីវិទ្យាល័យអង្គរ, ៥នាទីពីតំបន់ Pub Street ផ្សារចាស់ ឬ ៧នាទីពីផ្សារលេីធំថ្មី ដែលផ្តល់ភាពងាយស្រួលក្នុងការរស់នៅ ឬវិនិយោគទុកចំណេញ​ ព្រោះតម្លៃទាបជាងទីផ្សារស្រាប់ និងមានលក្ខខណ្ឌ បង់ប្រាក់ងាយស្រួលមែនទែន​ ឯម៉ូតផ្ទះរឹតតែពិសេស មានទាំងផ្ទះអាជីវកម្ម និងលីងហោសន៍ យ៉ាងប្រណិត អមជាមួយនិង​ រចនាបថថ្មី​ ស្រស់ស្អាត រឹងមាំ ទាន់សម័យ ដោយ​មានសួនផ្កា​ និងរុក្ខជាតិលំអ​បែបធម្មជាតិ​ ស័ក្តសម​បំផុត​ សម្រាប់ការរស់នៅបែបសម័យថ្មី​។ គម្រោង​ Sala Kamreuk Residence ក៏នឹង បេីក​លក់ជាផ្លូវការក្នុងពេលឆាប់ៗ​ ខាងមុខនេះផងដែរ​ ជាមួយនឹងការបញ្ចុះតម្លៃ​ និងប្រម៉ូសិនពិសេស​ៗ​ ជាច្រេីនផងដែរ​៕សូមទំនាក់ទំនង​ ព័ត៌មានផ្លូវការរបស់គម្រោងផ្ទាល់​ :  Facebook Page:h ttps://www.facebook.com/salakamreukresidence 👉 Google Map: https://goo.gl/maps/3V4sXoEa7tf36AfD6  Telegram Channel : https://t.me/salakamreukresidence 👉 Call Us: 017 711 956

ខេត្តសៀមរាប៖បែកធ្លាយ ភាពមិនប្រក្រតី របស់មីក្រូហិរញ្ញវត្ថុ មួយនៅក្រុងសៀមរាប ឈ្មោះ(CMK)។ នេះបើយោងតាមការបង្ហោះផ្សព្វផ្សាយតាមហ្វេសប៊ុករបស់លោកផ្លុង រ៉េត ចាងហ្វាងការផ្សាយសារព័ត៌មានកម្ពុជាសុវណ្ណភូមិ។

លោកផ្លុង រ៉េត ចាងហ្វាងការផ្សាយសារព័ត៌មានកម្ពុជាសុវណ្ណភូមិ នៅល្ងាចថ្ងៃទី ៣ ខែឧសភាឆ្នាំ ២០២២ ម្សិលមិញ បានបើកបង្ហោះថា៖ សូមរាយការណ៍: សូមលោកប្រធានធនាគារជាតិខេត្តសៀមរាប មេត្តាសិក្សាស្រាវជ្រាវអំពីមីក្រូហិរញ្ញវត្ថុមួយនេះ (CMK) កំពុងតែគេងបន្លំអតិថិជនរបស់ខ្លួន យ៉ាងធ្ងន់ធ្ងរបំផុត។ អាសយដ្ឋានគឺនៅខាងលិចគល់ស្ពានវត្តរាជបូព៌ ជាប់ធនាគារអេអិនហ្សិតរ៉ូយ៉ាល។ ព័ត៌មានបឋម

នៅព្រឹកថ្ងៃទី ៤ខែឧសភានេះ លោកផ្លុង រ៉េត បានបង្ហោះសារបន្ថែមទៀតថា៖ មីក្រូហិរញ្ញវត្ថុឈ្មោះ CMK នៅខាងលិចគល់ស្ពានវត្តបូព៌ ជាប់ធនាគារអេអិនហ្សិតរ៉ូយ៉ាល់ បង្ខំឲ្យអតិថិជនរបស់ខ្លួនបង់ប្រាក់ពិន័យជាង 1 ពាន់ដុល្លារ ខុសពីលក្ខន្តិកៈនៅក្នុងកិច្ចសន្យាខ្ចីប្រាក់។

ជនរងគ្រោះបានពឹងពាក់ឱ្យខ្ញុំបាទ ផ្លុង រ៉េត ទៅជួយដោះស្រាយជាមួយនឹងធនាគារខាងលើនេះ ទើបចុងក្រោយធនាគារនេះព្រមធ្វើការបន្ធូរបន្ថយ។ បើយោងតាមកិច្ចសន្យាខ្ចីប្រាក់ដែលខ្ញុំបាទទទួលបាន គ្មានចំណុចខ្វះខាតណាមួយដែលអតិថិជនត្រូវបង់ប្រាក់ពិន័យនោះទេ។

អ្វីដែលខ្ញុំសរសេរបង្ហោះនេះ គ្មានចេតនាធ្វើឱ្យធនាគារមួយនេះខូចកិត្តិយសនោះទេ តែវាគ្រាន់តែជាការព្រមាន ថ្ងៃក្រោយកុំឲ្យជិះជាន់គាបសង្កត់ ទារប្រាក់ពិន័យពីអតិថិជន ខុសពីកិច្ចសន្យាខ្ចីប្រាក់។

សំណួរសួរថា តើមានអតិថិជនប៉ុន្មាននាក់កន្លងទៅហើយ ដែលធនាគារមួយនេះបង្ខំទារប្រាក់ពិន័យ ខុសពីកិច្ចសន្យាខ្ចីប្រាក់?

សូមលោកប្រធានធនាគារជាតិខេត្តសៀមរាប សិក្សាស្រាវជ្រាវអំពីធនាគារ CMK ខាងលើនេះផង។ ដោយ: ផ្លុងរ៉េត

ជុំវិញការលើកឡើងបែបនេះ អង្គភាពសៀមរាបប៉ុស្តិ៍ នៅពុំទាន់ទទួលបានការបំភ្លឺ ពីមីក្រូហិរញ្ញវត្ថុឈ្មោះ CMK នៅឡើយទេ រហូតដល់ម៉ោង១២ ជាងនេះ៕SRP

ខេត្តសៀមរាប៖អ្នកជិះម៉ូតូចំនួន២ នាក់បានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍ដោយរថយន្តបុកចំពេញទំហឹង។

ហេតុការណ៍បានកើតឡើង វេលសម៉ោង២២ និង៥០នាទី ថ្ងៃទី៣ ខែឧសភា ឆ្នាំ២០២២ ត្រង់ចំណុចផ្លូវបំបែកជាបួនស្តុបសាលារៀនគ្រួស ចន្លោះគីឡូម៉ែត្រលេខ ៣១៦និ៣១៧ ស្ថិតនៅក្នុងភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប លើផ្លូវជាតិលេខ៦។

របាយការណ៍របស់នគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានឲ្យដឹងថា ករណីគ្រោះថ្នាក់ចរាចរណ៍ នេះរវាងរថយន្ត និង ម៉ូតូ ដែលបង្កឡើងរថយន្ត។ រថយន្តម៉ាក HYUNDAI AERO QUEEN (45កៅអី) ប្រភេទដឹកអ្នកដំណើរធុនធំ ពណ៌លឿង ពាក់ផ្លាកលេខភ្នំពេញ 3C.9774 បើកបរមានទិសដៅពីលិច ទៅកើត បានបុកម៉ូតូមួយគ្រឿងម៉ាក HONDA DREM ពណ៌ ខ្មៅពាក់ស្លាកលេខ សៀមរាប1Q.8289 អ្នកបើកបរឈ្មោះ អ៊ុយ សុភ័ក្រ្ត ភេទប្រុស អាយុ៤១ឆ្នាំ រស់នៅភូមិកន្ត្រក សង្កាត់ស្វាយដង្គុំ ក្រុងសៀមរាប ខេត្តសៀមរាប និងមានអ្នករួមដំណើរម្នាក់ ឈ្មោះសុខ ផាត់ ប្រុសអាយុ៦៦ឆ្នាំ រស់ នៅភូមិស្វាយព្រៃ សង្កាត់ស្វាយដង្គំ ក្រុងសៀមរាបខេត្តសៀមរាប បើកបរមានទិសដៅពីកើត បត់ឆ្វេងទៅត្បូង។

របាយការណ៍បន្តថា ករណីនេះបណ្តាលអោយស្លាប់មនុស្ស០២នាក់៖ ១.ឈ្មោះ អ៊ុយ សុភ័ក្រ្ត អ្នកបើកបរម៉ូតូ(អត់ពាក់មួកសុវត្ថិភាព) ស្លាប់នៅមន្ទីរពេទ្យ ២.ឈ្មោះ សុខ ផាត់ អ្នករួមដំណើរម៉ូតូ(អត់ពាកមួកសុវត្ថិភាព) ស្លាប់នៅកន្លែងកើតហេតុ។ ក្នុងនោះខូតខាតម៉ូតូធ្ងន់១គ្រឿង និងរថយន្តធ្ងន់ ១គ្រឿង។ មូលហេតុ៖ អ្នកបើកបររថយន្តបើកបរក្នុងល្បឿនលឿន។

របាយការណ៍បញ្ជាក់ថាក្រោយពេលកើតហេតុអ្នកបើកបររត់គេចខ្លួន ក្នុងនោះកម្លាំងជំនាញកំពុងស្រាវជ្រាវ និងកសាងសំណុំរឿងតាម នីតិវិធី ដើម្បីបញ្ជូនទៅតុលាការ។ ចំណែកវត្ថុតាងរក្សាទុកនៅការិយាល័យនគរបាលចរាចរណ៍ផ្លូវគោក៕SRP