Siem Reap Post – Page 1086 – Siem Reap News, Cambodia News

ខេត្តសៀមរាប៖បុរស៣នាក់ត្រូវបានកម្លាំងអាវុធហត្ថខេត្តសៀមរាបសហការជាមួយអាវុធហត្ថខេត្តស្ទឹងត្រែង ចាប់ខ្លួននិងដកហូតនូវថ្នាំញៀនប្រភេទម៉ាទឹកកក ជាងមួយគីឡូក្រាម។

ប្រតិបត្តិការនេះ នៅវេលាម៉ោង០៨ និង ១៥នាទី ថ្ងៃទី ០៤ខែកុម្ភៈ ឆ្នាំ២០២១ នៅចំណុចគល់ស្ពាន មេគង្គ ស្ថិតក្នុងភូមិវអូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង ដោយកម្លាំងការិយាល័យ ប្រឆាំងគ្រឿងញៀន ខេត្តសៀមរាប សហការ ជាមួយកម្លាំងអាវុធហត្ថ ខេត្តស្ទឹងត្រែង ដឹកនាំដោយលោកវរសេនីយ៍ត្រី ធាវ ច័ន្ទតារា នាយការិយាល័យ ប្រឆាំងគ្រឿងញៀន នៃអាវុធហត្ថខេត្តសៀមរាប។

លោកវរសេនីយ៍ត្រី ធាវ ច័ន្ទតារា បានឲ្យដឹងថា ការបង្រ្កាប ពីបទរក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន នេះ ឃាត់បានមនុស្ស៣នាក់។

១.ឈ្មោះឃន ធារ៉ា ភេទប្រុស អាយុ ៤២ ឆ្នាំ ជនជាតិ ខ្មែរ មុខរបរកម្មករ រស់នៅភូមិអញ្ចាញ សង្កាត់នគរធំ ក្រុងសៀមរាប។

២.ឈ្មោះម៉ៃ ថៃ ភេទប្រុស អាយុ៣២ ឆ្នាំជនជាតិខ្មែរ មុខរបរធ្វើស្រែ រស់នៅភូមិវត្តកោះកី ឃុំកោះស្នែងស្រុកអូស្វាយសែនជ័យ ខេត្តស្ទឹងត្រែង។

៣.ឈ្មោះ ផិត ផៃមុន្ន ភេទប្រុស អាយុ ២១ ឆ្នាំជនជាតិខ្មែរ មុខរបរធ្វើស្រែ រស់នៅភូមិគីឡូ៨ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។

លោកបន្តថា ដកហូតវត្ថុតាង ថ្មាំញៀនម្សៅក្រាមពណ៌ចំនួន ៣ កញ្ចប់ទម្ងន់១០៨២.៧០ក្រាម។ទូរសព្ទ័ដៃចំនួន ៣គ្រឿង។ធ្វើតេស្តទឹកនោម ទាំង៣នាក់ ( វិជ្ជមានចំនួន ០១នាក់ អវិជ្ជមាន២នាក់ )។បច្ចុប្បន្ន ជនសង្ស័យ និងវត្ថុតាង កំពុងបន្តនីតិវិធី៕SRP

ខេត្តសៀមរាប៖លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានអះអាងថា មន្ត្រីជំនាញរបស់លោក បានកំណត់មុខសញ្ញា លួចដុតចំការព្រៃពូជឈើធ្នង់ បានខ្លះហើយ ដោយពេលនេះ កំពុងប្រមូលភស្តុតាង បន្ថែមដើម្បីដាក់បន្ទុក។

លោកម៉ុង ប៊ុនលីម បានប្រាប់អ្នកសារព័ត៌មានថា មុខសញ្ញា ដែលលួចដុតចំការព្រៃពូជឈើធ្នង់អស់ប្រហែល២០ហិកតា កាលពីរសៀលថ្ងៃទី៣ខែកុម្ភ: គឺជាមនុស្សចំនួន៣គ្រួសារ ដែលស្ថិតនៅក្បែរភូមិសាស្ត្រ កើតហេតុ។ ប៉ុន្តែយើងមិនទាន់ធ្វើការចោទ ប្រកាន់ទេ ដោយពេលនេះកំពុងប្រមូលភស្តុតាងបន្ថែម ដើម្បីដាក់បន្ទុក។

លោកបញ្ជាក់ថា ជនដែលប្រព្រឹត្ត អាចផ្តើមចេញដោយគំនិត២យ៉ាង ទី១ដុតព្រែដើម្បីចាប់សត្វ ដូចជា ឃ្មុំ.ពស់.និងអណ្តើក។ល។ ចំណែកឯទី២ គឺដុតព្រៃ ដើម្បីរានយកដី មកកាន់កាប់ធ្វើជាកម្មសិទ្ធិ។ ប៉ុន្តែជនទាំងនេះ យើងនឹងចាត់វិធានការផ្លូវច្បាប់ ក្រោយប្រមូលភស្តុតាងគ្រប់គ្រាន់។

សូមរំលឹកថាចំការពូជឈើធ្នង់ ដែលមានទីតាំងស្ថិតនៅភូមិអង្កាញ់ ឃុំស្វាយលើ ស្រុកស្វាយ លើ ឆេះអស់ទំហំប្រហែល២០ហិកតា ដោយសារជនខិលខូចលួចដុតកាលពីរសៀលថ្ងៃទី៣ ខែកុម្ភ: ឆ្នាំ២០២១។

ក្រោយមានការឆេះបែបនេះ គណ:បញ្ជាការឯកភាពស្រុកស្វាយលើ សហការ ជាមួយកំលាំងសង្កាត់រដ្ឋបាលព្រៃឈើ ស្វាយលើ ផ្នែករដ្ឋបាលព្រៃឈើជីក្រែង មន្ត្រីខណ្ឌរដ្ឋបាលព្រៃឈើសៀមរាប កំលាំងអធិការដ្ឋាននគរបាលស្រុកស្វាយលើ កំលាំងប្រជាការពារ ភូមិអង្កាញ់ ចុះអន្តរាគមន៍ ដោយប្រើប្រាស់រថយន្តពន្លត់អគ្គីភ័យ១គ្រឿង ប្រើទឹកអស់៣រថយន្ត បាញ់ពន្លត់ ដោយគ្រប់គ្រងការឆេះរាលដាលបានមកវិញ នៅវេលាម៉ោង៧និង៣០នាទីយប់នាថ្ងៃដដែល។

បើតាម លោកនាយខណ្ឌរដ្ឋបាលព្រៃឈើ
បញ្ជាក់បន្ថែមថា ក្នុងការអន្តរាគមន៍ ពន្លត់ភ្លើងឆេះព្រៃចំការពូជឈើធ្នង់នេះ ក្រុមមន្រ្តីសង្កាត់រដ្ឋបាលព្រៃឈើស្វាយលើ ចុះល្បាតក្នុងចំការព្រៃពូជ ដកហូតរណាយន្តបានចំនួន២គ្រឿងធំ១គ្រឿងតូច១គ្រឿង និងកាំភ្លើខ្យល់១ដើម ដែលជនខិលខូចលាក់ទុកក្នុងព្រៃ សម្រាប់ធ្វើសកម្មភាព បំផ្លាញព្រៃនិងសត្វផងដែរ៕SRP

ភ្នំពេញ៖តាមរយ:ទំព័រផេកហ្វេសប៊ុកផ្លូវការរបស់ សម្ដេចតេជោ ហ៊ុន សែន នៅព្រឹកនេះបានសរសេរថា៖ វ៉ាក់សាំងដែលជាជំនួយរបស់សាធារណរដ្ឋប្រជាមានិតចិនតាមរយៈក្រសួងការពារជាតិចិនមកកាន់ក្រសួងការពារជាតិកម្ពុជានឹងដឹកមកដល់កម្ពុជាចំនួន៦០ម៉ឺនដូសនៅល្ងាចថ្ងៃអាទិត្យទី៧កុម្ភៈ២០២១ដែលជាដំណាក់កាលដំបូងនៃជំនួយចំនួន១លានដូស។

សម្ដេចតេជោ ហ៊ុន សែន បន្តថាម៉ោង៨និង៣០នាទីថ្ងៃទី១០កុម្ភៈ២០២១ ដំណើរការចាក់វ៉ាក់សាំងនឹងចាប់ផ្តើមជាផ្លូវការនៅមន្ទីរពេទ្យកាល់ម៉ែត្រដែលខ្លួនខ្ញុំនឹងទទួលមុនគេជាមួយមន្ត្រីជាន់ខ្ពស់ផ្សេងទៀត លើកលែងតែ សម្តេចពិជ័យសេនា ទៀ បាញ់ ដែលគាត់បានចាក់វ៉ាក់សាំងនេះរួចហើយ។

ការចាក់វ៉ាក់សាំងនេះនឹងមានការផ្សាយផ្ទាល់និងបន្ទាប់ពីចាក់រួចខ្ញុំនឹងធ្វើសន្និសីទសារព័ត៌មាននៅមន្ទីរពេទ្យកាល់ម៉ែត្រតែម្តង។

សូមជំរាបជូនបន្ថែមថា ថ្ងៃនេះជាខួបមួយឆ្នាំនៃដំណើរទស្សនកិច្ចរបស់ខ្ញុំទៅកាន់សាធារណរដ្ឋប្រជាមានិតចិន(៥ កុម្ភៈ ២០២០ -៥កុម្ភៈ ២០២១)ដែលជាទស្សនកិច្ចមានអត្ថន័យដ៍ជ្រាលជ្រៅនៃចំណងមិត្តភាព សាមគ្គីភាពក្នុងដំណាក់កាលដែលប្រទេសចិនកំពុងផ្ទុះឡើងនៃជម្ងឺកូរ៉ូណា ដែលក្រោយនេះហៅថាកូវីដ១៩ ដែលពេលនោះខ្ញុំបានប្រើពាក្យថា(ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក)។

សូមអរគុណ ឯកឧត្តមប្រធានាធិបតី ស៊ី ជីនភីង ឯកឧត្តមនាយករដ្ឋមន្ត្រី លី កឺឈាង និងថ្នាក់ដឹកនាំចិនផ្សេងទៀតដែលបានទទួលរូបខ្ញុំនិងគណប្រតិភូ ជាពិសេសបានជួយដល់និស្សិតកម្ពុជាដែលកំពុងសិក្សានៅប្រទេសចិនរាប់ទាំងនៅទីក្រុងវូហានផងអោយចៀសផុតពីជម្ងឺឆ្លងនិងទទួលបាននូវការសិក្សាប្រកបដោយសុវត្ថិភាពនៅក្នុងប្រទេសចិនជាមិត្ត៕SRP