ខេត្តកំពង់ចាម​៖លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម និងប្រធានក្រុមការងារថ្នាក់ជាតិចុះជួយឃុំបឹងណាយ តំណាង លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជ នឹងជាប្រធានក្រុមការងារថ្នាក់ជាតិចុះមូលដ្ឋានស្រុកព្រៃឈរ និងស្រុកបាធាយ បានថ្លែងថា​ ការជួយដល់ប្រជាជនដោយចិត្តស្មោះស យើងនឹងទទួលបានការស្រលាញ់ពីគាត់វិញ ដោយការបោះឆ្នោតជូនគណបក្សប្រជាជនកម្ពុជា​។

ថ្លែងបែបនេះក្នុងពិធីសំណេះសំណាល និងផ្សព្វផ្សាយសេចក្តីសម្រេចចិត្តនៃមហាសន្និបាតវិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា ជូនគណៈកម្មាធិការគណបក្សឃុំ សាខាបក្សភូមិ សកម្មជន និងយុវជនគណបក្សទូទាំងឃុំ នៅស្នាក់ការគណបក្សឃុំបឹងណាយ ក្នុងស្រុកព្រៃឈរ នៅសៀលថ្ងៃអាទិត្យ ម្សិលមិញ។

លោកជំទាវ តោ ពិឡា ក៏បានជម្រាបជូនពីលទ្ធផលអង្គមហាសន្និបាតដែលបានសម្រេចបន្ត គាំទ្រយ៉ាងពេញទំហឹង សម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រីនៅអាណត្តិបន្ទាប់ និងគាំទ្រ លោក ហ៊ុន ម៉ាណែត ជាបេក្ខភាពនាយករដ្ឋមន្រ្តីសម្រាប់ពេលអនាគត។ គណបក្សនឹងបន្តដឹកនាំប្រទេស ដើម្បីលើកកម្ពស់កិត្យានុភាពរបស់កម្ពុជាលើឆាកអន្តរជាតិ និងបន្តរក្សាលំនឹងសេដ្ឋកិច្ចដែលកំពុងបន្តភាពខ្លាំងរបស់ខ្លួនជាសារវន្ត ដែលតាមការរំពឹងទុកអាចនឹងកើនដល់ ៥,៦ ភាគរយ ក្នុងឆ្នាំ២០២៣។ មហាសន្និបាតដាក់ចេញនូវគោលដៅជាយុទ្ធសាស្រ្ត៥ចំនុច និងគោលនយោបាយធំៗជាអទិភាពសម្រាប់រយៈពេល៥ឆ្នាំបន្តទៀត។

លោកជំទាវ តោ ពិឡា បានលើកថា ការបំរើប្រជាជនដោយក្តីស្រលាញ់ ជាចំណែកមួយនៃការបំរើនូវសេចក្តីត្រូវការរបស់គាត់ដែលកំពុងតែជួបការលំបាក មិនថាឡើងការលំបាកនោះជាការកំបាកតូចក្តី ធំក្តី តែយើងត្រូវបំពេញអោយបានដើម្បីអោយគាត់មានជំនឿជឿជាក់ថា គណបក្សប្រជាជនកម្ពុជាមិនទៅណាឡើយគ្រប់ពេលដែលបងប្អូនជួបការលំបាក។

លោកជំទាវរដ្ឋលេខាធិការ​ ក៏បានថ្លែងអំណរអរគុណយ៉ាងជ្រាលជ្រៅបំផុតចំពោះក្រុមការងារគណបក្សចុះជួយមូលដ្ឋានឃុំ បឹងណាយ និងសកម្មជនគណបក្សប្រជាជនកម្ពុជាទាំងអស់ដែលបានចូលរួមយ៉ាងសកម្មក្នុងការសម្រេចជោគជ័យ នៃការបោះឆ្នោតក្រុមប្រឹក្សាឃុំកន្លងមក និងសង្ឃឹមយ៉ាងមុតមាំថាបងប្អូននឹងបន្តគាំទ្រ និងបោះឆ្នោតជូនគណបក្សប្រជាជនកម្ពុជាសម្រាប់អាណត្តិក្រោយៗបន្តទៀត។

លោកជំទាវ តោ ពិឡា ក៏បានអញ្ជើញដឹកនាំក្រុមការងារគណបក្សមូលដ្ឋានឃុំបឹងណាយ សហការណ៍ជាមួយ សមាគមក្រុមយុវជនគ្រូពេទ្យស្ម័គ្រចិត្ត(V.Y.D.A) ចុះពិនិត្យព្យាបាលជម្ងឺសុខភាពភ្នែក មាត់ ធ្មេញ ជូនប្រជាពលរដ្ឋ ឥតគិតថ្លៃចំនួន ៥ភូមិគឺ:ភូមិតាអុក ភូមិថ្មដា ភូមិឈើបាក់ ភូមិចន្លាត់ដៃ និងភូមិត្រើង ក្នុងឃុំបឹងណាយ​ ហើយ​ក៏​បានអញ្ជើញចុះពិនិត្យ និងសិក្សាគម្រោង ធ្វើផ្លូវបេតុង១ខ្សែដែលមានប្រវែងប្រមាណ១៤គីឡូម៉ែត្រ ស្ថិតនៅក្នុងឃុំបឹងណាយ ផងដែរ​៕SRP

ខេត្តត្បូងឃ្មុំ៖ដើម្បីរំលឹករក្សាអភិរក្សកេរ្តិ៍តំណែលពីបុរាណតរៀងមកក្នុងតំបន់ ជារៀងរាល់ឆ្នាំនៅក្នុងខែកុម្ភ: នេះ បន្ទាប់ពីបងប្អូនប្រជាកសិករបានប្រមូលផលកសិកម្មរួចរាល់អស់ហើយនោះ បន្ទាប់មកបងប្អូនប្រជាពលរដ្ឋ តែងតែធ្វើប្រារព្ធពិធី ចាប់ត្រី នៅរមណីយ៍ដ្ឋានបឹងត្រពាំងក្រម ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ។

ប្រជាពលរដ្ឋប្រមាណជាង៦ម៉ឺននាក់ មកពី ឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ ។ ហើយ ក៏បងប្អូនប្រជាពលរដ្ឋមានមកពីខេត្តក្រចេះ  កំពង់ចាម ខេត្តព្រៃវែង និងខេត្តស្វាយរៀង ក្នុងស្មារតីភាតរភាពសាមគ្គីភាព ស្រលាញ់រាក់ទាក់គ្នា ប្រកបដោយ សីលធម៌ សុជីវធម៌ យ៉ាងល្អផូរផង់ និងមានលក្ខណៈជាតិនិយមគួរជាទីមោទនៈ។

លោក រិន សំអឿន អាយុ៣៧ឆ្នាំ រស់នៅភូមិសាទុំ ឃុំជាំក្រវៀន ស្រុកមេមត់ បានបញ្ជាក់ឱ្យដឹងថា គាត់មានឧបករណ៍អង្រុតយកមកចុះរុតចាប់ត្រី រាល់ឆ្នាំ ឆ្នាំនេះត្រីសម្បូណ៍ជាងឆ្នាំ២០២០ ដោយទឹកបឹងត្រពាំងនៅច្រើនឆ្នាំនេះមានភ្លៀងច្រើន ហើយយើង ចាប់បានត្រីច្រើន   យកទៅធ្វើម្ហូបជាលក្ខណៈគ្រួសារ យ៉ាងសប្បាយ។

លោកយាយ ស្បោង អ៊ូច ក្នុងវ័យជាង៧៣ឆ្នាំ បានបញ្ជាក់ឱ្យដឹងដែរថា ពីដើមមុននឹងចុះចាប់គេធ្វើពិធីសែនសុំម្ចាស់ទឹក ម្ចាស់ដី សុំឱ្យត្រីដែលមានធ្មុងទាំឡាយ ដូចជាត្រីឆ្លាំង ត្រីអណ្តែង ត្រីកញ្ចុះ ជាដើម សូមឱ្យស្លូតដូចត្រីកំភ្លាញ ធ្វើដូចនេះ ពេលបងប្អូនប្រជាពលរដ្ឋចុះចាប់ត្រីមិនមានបញ្ហាមុតត្រីអ្វីនោះទេ នេះជាទំនៀមបុរាណយើង។

លោក អ៊ូច យឿន មេឃុំជាំក្រវៀន និងជាប្រធានគណៈកម្មការៀបចំកម្មវិធីចាប់ត្រីបឹងត្រពាំងក្រម បានបញ្ជាក់ឱ្យដឹងថា ថ្ងៃនេះជាថ្ងៃនក្ខត្តឫក្សដ៏ល្អត្រចះត្រចង់ ដែលបងប្អូនប្រជាពលរដ្ឋបាននាំគ្នាជាឯកច្ឆ័ន្ទប្រារព្ធពិធីចាប់ត្រីបឹងត្រពាំងក្រមរបស់យើង ជារៀងរាល់ឆ្នាំនៅក្នុងខែកុម្ភះនេះ រយៈពេល៤ថ្ងៃ និង៣យប់ គឺចាប់ពីថ្ងៃទី ១៥.១៦.១៧ និងថ្ងៃទី១៨ ខែកុម្ភ: នេះតែម្តង ។

នៅពីរថ្ងៃដំបូងគឺថ្ងៃទី១៥.១៦ និងថ្ងៃទី១៧ គឺបងប្អូនបានមកជួបជុំគ្នា ដើរលែងកំសាន្ត ទស្សនាទេសភាពស្ថិតនៅជុំវិញតំបន់់បឹងត្រពាំងក្រម ដែលមានកេរ្តិ៍ ដំណែលពីដូនតាយើង រួមមានៈ ថ្មតាជ្រូក ដីពណ៌ឈាម ក្បាលតាជក តាព្រាម កន្លែងឡស្រា និងស្រះទឹកនាងលើមជាដើម។ ក្រៅពីដើរទស្សនាកំសាន្តពីប្រវត្តិ និងកេរ្តិ៍ដំណែល យ៉ាងជក់ចិត្ត សប្យាយអឺងកង នាពេលថ្ងៃ និងពេលរាត្រី មានកម្មវិធី រាំច្រៀងតាមលក្ខណៈប្រពៃណីខ្មែរផងដែរ។ ហើយបន្ទាប់គឺ នៅថ្ងៃទី១៨ ខែកុម្ភ: នេះគឺជាថ្ងៃបងប្អូនប្រជាពលរដ្ឋយើង ប្រមាណជាង៦ម៉ឺននាក់ មកពីឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ ខេត្តកំពង់ចាម ខេត្តក្រចេះ  ខេត្តព្រៃវែង និងខេត្តស្វាយរៀង បានមកប្រារព្ធពិធីចាប់ត្រី នេះដែរ។

លោកមេឃុំបានបញ្ជាក់ទៀតថា បឹងត្រពាំងក្រំមានទំហំ១០០បួនជ្រុង ចំពោះបងប្អូនប្រជាពលរដ្ឋមកចាប់ត្រីនេះគឺ មានឧបករណ៍របៀបបុរាណរួមមានៈ អង្រុត ឈ្នាង ឆ្នុក ត្រក ទ្រូ លប ។ល។ នៅម៉ោងជាង៩ព្រឹកថ្ងៃទី១៨ នេះដែរ គឺបងប្អូននិងនាំគ្នាចុះចាប់ត្រីរួមគ្នាតែម្តង។ ឆ្នាំនេះត្រីមានដូចជា ត្រីរស់ ត្រីឌៀប  ត្រីក្រាញ់ ត្រីឆ្លូញ ត្រីទួក ត្រីអណ្តែង ត្រីកញ្ចុះ ត្រីកន្ត្រប់ ត្រីតាអោន និងត្រីកំភ្លាញ ។ល។ ហើយ ត្រីមិនសម្បូណ៍ជាងឆ្នាំ២០២០ឆ្ងាយណាស់។ ក្នុង១ឆ្នាំយើងអនុញ្ញាត បើកឱ្យបងប្អូនចាប់បានតែម្តងទេ។ ផុតពីថ្ងៃយើងប្រារព្ធពិធីចាប់ត្រី គឺយើងមានកម្លាំងប្រជាការពារភូមិ និងកម្លាំងប៉ុស្តិ៍ការពារ មិនឱ្យមានការនេសាទដោយយកឧបករណ៍ហាមឃាត់ល្មើសច្បាប់មករកនោះទេ ធ្វើបែបនេះ គឺដើម្បីការពារត្រីបឹងធម្មជាតិរបស់យើង៕SRP

ខេត្តសៀមរាប៖ឯកឧត្តមបណ្ឌិតអ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប និងឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានអញ្ជើញចូលរួមក្នុងពិធីបើកការដ្ឋានស្ថាបនាផ្លូវក្រាលកៅស៊ូ DBST ប្រវែង ២៥ គីឡូម៉ែត្រ ចាប់ពីកំណាត់ ផ្លូវជាតិលេខ៦ ដល់កំណាត់ផ្លូវជាតិលេខ៦៨ ឆ្លងកាត់ចំនួន ០៥ឃុំ រួមមាន ឃុំស្រណាល ឃុំរោងគោ ឃុំស្នួល ឃុំក្រូចគរ និងឃុំសែនសុខ ស្រុកក្រឡាញ់ ខេត្តសៀមរាប ដែលជាអំណោយដ៏ថ្លែថ្លារបស់សម្តេចតេជោ នាយករដ្ឋមន្រ្តី ជូនប្រជាពលរដ្ឋ រស់នៅស្រុកក្រឡាញ់។

ថ្លៃងក្នុងពិធីបើកការដ្ឋាននេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប សូមគោរពថ្លែងអំណរគុណចំពោះអំណោយដ៍ថ្លៃថ្លា របស់ សម្តេចតេជោ តាមរយៈ ឯកឧត្តម អ្នកឧកញ៉ា អ្នកតំណាងរាស្ត្រមណ្ឌលសៀមរាប អភិបាលខេត្ត បានផ្តល់ជូនផ្លូវ១ ខ្សែនេះជូនប្រជាពលរដ្ឋចំនួន ៥ ឃុំ នៃស្រុកក្រឡាញ់ ដែលផ្លូវមួយខ្សែនេះ នឹងចូលរួមកាត់បន្ថយការលំបាករបស់ ប្រជាពលរដ្ឋ ជួយសម្រួលដល់ការធ្វើដំណើរ និងការដឹកជញ្ជូនផ្សេងៗ បានងាយស្រួល ឆាប់រហ័ស និង ចំណាយតិច ដែលកត្តានេះ នឹងរួមចំណែក លើកកម្ពស់ជីវភាពរស់នៅ និង កាត់បន្ថយភាពក្រីក្ររបស់ប្រជាពលរដ្ឋ។

ជាមួយនឹង សមិទ្ធផលនេះ ឯកឧត្តម អ៊ាន ឃុន ក៏បានសូមអំពាវនាវដល់សាធារណជន និង បងប្អូនប្រជាពលរដ្ឋ ដែលរស់នៅតាមបណ្តោយផ្លូវនេះ សូមជួយថែរក្សា និងការពារផ្លូវ នេះឱ្យបានល្អ ដោយត្រូវគោរពច្បាប់ចរាចរណ៍ផ្លូវគោក ឱ្យបានម៉ឺងម៉ាត់ដើម្បីសុវត្ថិភាព និងបញ្ជៀសនូវ ការឆាប់ខូចផ្លូវដោយសារការដឹកជញ្ជូនលើសទំងន់ណាមួយដោយខានតែបាន។

សូមជម្រាបថា ពិធីបើកការដ្ឋាននេះរៀបចំនៅបរិវេណវត្តរតន:មុន្នីរោងគោ ហៅវត្តរោងគោ ស្ថិតនៅភូមិរោងគោ ឃុំរោងគោ ស្រុកក្រឡាញ់ នៅថ្ងៃសៅរ៍ម្សិលមិញ៕SRP

ខេត្តកំពង់ចាម៖លោកហ៊ុន ម៉ានិត បានមានប្រសាសន៍ថា គោលការណ៍របស់សម្តេចតេជោ គឺជំរុញឱ្យមានវប្បធម៌ចែករំលែក ជំរុញឱ្យមានភាពត្រជាក់ត្រជុំ​ ដើម្បីនាំមកនូវការអភិវឌ្ឍរីកចម្រើន ជូនប្រជាពលរដ្ឋ ជាក់ស្តែងដូចថ្ងៃនេះដែលយើងបានបើកការដ្ឋានស្ថាបនាផ្លូវបេតុង ២ខ្សែ ប្រវែង ជាង ១៨គីឡូម៉ែត្រ ពីឃុំព្រែករំដេង ដល់ឃុំបារាយណ៍ និងឃុំព្រែកដំបូក ស្រុកស្រីសន្ធ ដើម្បីបម្រើឱ្យការធ្វើ ដំណើរការផ្លាស់ប្តូរពាណិជ្ជកម្ម និងដឹកកសិផលទៅកាន់ទីផ្សារបស់ប្រជាកសិករ សំដៅជំរុញការ អភិវឌ្ឍន៍សេដ្ឋកិច្ចមូលដ្ឋាន លើកកម្ពស់កម្រិតជីវភាពប្រជាជននៅតាមជនបទ ដើម្បីបង្ខិតជនបទឱ្យ មានជីវភាពប្រហាក់ប្រហែល នឹងទីប្រជុំជនផងដែរ។​

លោក ហ៊ុន ម៉ានិត នាយករងខទ្ទកាល័យសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណចក្រកម្ពុជា និងជាអនុប្រធានទី១ក្រុមការងាររាជរដ្ឋាភិបាលចុះជួយខេត្តកំពង់ចាម អះអាងបែបនេះក្នុងឱកាសអញ្ជើញបើកការដ្ឋានស្ថាបនាផ្លូវបេតុង ២ខ្សែ ប្រវែង ១៨.២៤គីឡូម៉ែត្រ ខ្សែទី១ ប្រវែងជាង១១គីឡូម៉ែត្រ ចាប់ពីឃុំព្រែករំដេង ដល់ឃុំបារាយណ៍ និងខ្សែទី២ ប្រវែងជាង ៧គីឡូម៉ែត្រ ចាប់ពីឃុំព្រែកដំបូក ដល់ឃុំបារាយណ៍ ស្រុកស្រីសន្ធរ ខេត្តកំពង់ចាម នៅថ្ងៃសុក្រម្សិលមិញ។

មានប្រសាសន៍សំណេះសំណាល ក្នុងឱកាសនោះ លោក ហ៊ុន ម៉ានិត បានពាំនាំនូវប្រសាសន៍ផ្តាំ ផ្ញើសាកសួរសុខទុកពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះលោកយាយ លោកតា បង់ប្អូនប្រជាពលរដ្ឋទាំងអស់ ផងដែរ។

លោក អ៊ុន ចាន់ដា អភិបាលខេត្តកំពង់ចាម បានថ្លែងថា ផ្លូវទាំងពីរខ្សែនេះ ពិតជាមានសារៈសំខាន់ និងបានតភ្ជាប់ឃុំបារាយណ៍ ដែលជាឃុំដាច់ ស្រយាលមួយរបស់ស្រុកស្រី សន្ធរ និងជាសសៃឈាមសេដ្ឋកិច្ចដ៏សំខាន់មួយរបស់ស្រុកស្រីសន្ធរ ក្នុង ការដឹកជញ្ជូនកសិផល របស់ប្រជាកសិករពីផ្នែកខាងក្នុងមកកាន់ទីផ្សា។ ទន្ទឹមនេះ ជាបណ្តាញ​ គមនាគមន៍ដ៏សំខាន់មួយ ភ្ជាប់ទៅកាន់ដែនដីប្រវត្តិសាស្រ្តរបស់កម្ពុជា គឺរាជធានីបុរាណទូលបាសាន សតវត្សទី១៥ ដែលនឹងបង្ខិតរមណីយដ្ឋានប្រវត្តិសាស្ត្រមួយនេះ មកកាន់តែកៀក និងបង្កើនការ ទាក់ទាញទេសចរ ណ៍ជាតិ និងអន្តរជាតិទៅកាន់តំបន់ប្រវត្តិសាស្ត្រនេះបន្ថែមទៀត នៅពេលផ្លូវ ទាំងពីរខ្សែនេះបានស្ថាបនារួច។

អភិបាលខេត្ត បានសង្កត់ធ្ងន់ថា ការ​បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ កន្លងទៅនេះ បានបង្ហាញច្បាស់ថាប្រជាពលរដ្ឋគាំទ្រសន្តិភាព គាំទ្រការអភិវឌ្ឍ និងគាំទ្រសម្តេចហ៊ុន សែន ដើម្បីបន្តដឹកនាំការអភិវឌ្ឍន៍ និងលើកកម្ពស់កិត្យានុភាពជាតិ ឱ្យស្មើមុខស្មើមាត់ជាមួយបណ្តាប្រទេសនានាក្នុងតំបន់ និងក្នុងពិភពលោកផងដែរ៕SRP

ខេត្តកំពង់ស្ពឺ៖បងបង្កើតម្នាក់ត្រូវបាននគរបាលស្រុកថ្ពង ឃាត់ខ្លួនក្រោយពីឪពុកម្ដាយ ដាក់ពាក្យបណ្តឹងដោយសារតែបានបង្ខំចាប់រំលោភប្អូនស្រីបង្កើតខ្លួនឯង រហូតបានសម្រេចចំនួន៣ដង។

ការឃាត់ខ្លួនវេលាម៉ោង៧និង២០នាទីយប់ថ្ងៃទី១៦ ខែកុម្ភ: ឆ្នាំ២០២៣ នៅចំណុចភូមិព្រៃវែង ឃុំប្រាំបីមុម ស្រុកថ្ពង ខេត្តកំពង់ស្ពឺ។

អធិការនគរបាលស្រុកថ្ពង លោកហ៊ុន សុខហុន បាននិយាយឱ្យដឹងថា ជនសង្ស័យ ឈ្មោះ ថា ចំរើន អាយុ២៤ឆ្នាំ (មុខរបរកម្មកររោងចក្រ) ដែលមានឪពុកឈ្មោះអ.ន ..ប..ថ អាយុ៥៧ឆ្នាំ និងម្តាយមានឈ្មោះ ភ..ង គម..ហ.. អាយុ៦០ឆ្នាំ រស់នៅក្នុងបន្ទុក។

អធិការនគរបាលស្រុកថ្ពង បានបន្តថា យុវជនរូបនេះ
តែងតែប្រើប្រាស់គ្រឿងញឹកញាប់ ហើយក៏ចូលចិត្តមើលទូរស័ព្ទរឿងអាសអាភាស រួចហើយក៏មានអារម្មណ៍ចង់រួមភេទ ទើបសម្រេចចិត្ត ចាប់បង្ខំប្អូនស្រីខ្លួនឯងរំលោភតែម្តង។

អធិការនគរបាលស្រុកបានបញ្ជាក់ថា ជនសង្ស័យ ជាបងបង្កើត បានធ្វើសកម្មភាពចាប់រំលោភប្អូនស្រី
ដោយលើកទី១ នៅថ្ងៃ ខែ មិនចាំ ក្នុងឆ្នាំ២០២២ នៅប្រហែលម៉ោង១ជាងរសៀល ឃើញប្អូនស្រីជនរងគ្រោះ ឈ្មោះថ.. ភ.រ អាយុ១៥ឆ្នាំ អង្គុយមើលទូរស័ព្ទយកលេស ប្រើប្អូនស្រីខ្លួន ឲ្យឡើងទៅលើផ្ទះយកទុយសាកទូរស័ព្ទ ហើយខ្លួនឡើងតាមក្រោយបានគំរាមប្អូនស្រី ចាប់រំលោភបានសំរេច១លើក ខណ:ឪពុកម្តាយមិននៅផ្ទះ។ លើកទី២ ប្រហែលម៉ោង១២:ជាង នៅផ្ទះទាមខាងក្រោយ ប្រើជនរងគ្រោះ ឲ្យទៅយកដងសន្ទូច រួចខ្លួនដើរតាមក្រោយគំរាមចាប់រំលោភបានសំរេច១លើក ខណ:ឪពុកម្តាយមិននៅ។ លើកទី៣ នៅថ្ងៃទី១៦ ខែកុម្ភៈ ឆ្នាំ២០២៣ ម្សិលមិញនេះ ដោយបានប្រើជនរងគ្រោះ ឲ្យទៅដេញគោមកផ្ទះប៉ុន្តែគោរត់ចូលព្រៃ ពីក្រោយផ្ទះចំងាយ២០០ម៉ែត្រ ក៏ឈ្លាតឱកាស ឲ្យជនរងគ្រោះ ចូលដេញគោក្នុងព្រៃខ្លួនក៏ដើរក្រោយរួចមក៏បានចាប់រំលោភ បាន១លើកទៀត។ ដោយប្អូនស្រីបង្កើតទ្រាំនូវទង្វើរ របស់បងលែងបាន ពេលត្រឡប់មកផ្ទះវិញ ក៏បានប្រាប់រឿងទាំងអស់នោះទៅឪពុកម្តាយ រួចក៏ មកប្តឹងសមត្ថកិច្ចជំនាញ។

ជនសង្ស័យបានសារភាពថា ខ្លួនពិតជាបានរំលោភសេពសន្ថវ: លើជនរងគ្រោះ បាន៣លើកពិតប្រាកដមែន។ បច្ចុប្បន្ននគរបាលខេត្តកំពង់ស្ពឺ កសាងសំណុំរឿងចាត់ការតាមផ្លូវច្បាប់៕SRP

ក្រុមហ៊ុន PNT កំពុងទទួលរងការរិះគន់ថាបានទទួលទិញឈើដោយខុសច្បាប់ ដែលមេឈ្មួញម្នាក់ បានគៀងគរប្រជាពលរដ្ឋ ឲ្យចូល កាប់បំផ្លាញព្រៃឈេីនៅក្នុងតំបន់ ស្នូលព្រៃឡង់។

ប្រភពបានឲ្យដឹងថា មេឈ្មួញបានបំផុសបំផុលគៀងគរ ឲ្យ ប្រជាពលរដ្ឋចូលទៅកាប់បំផ្លាញព្រៃឈេី ក្នុងតំបន់ ស្នូលព្រៃឡង់រួមមានខេត្ត៤គឺ ខេត្តកំពង់ធំ ខេត្តព្រះវិហារ ខេត្តសឹ្ទងត្រែង និងខេត្តក្រចេះ ហើយបានដឹកជញ្ជូនឈើចេញតាមចំណុចច្រកអូរងាវ ប្រភេទឈេី(ឃ្លុំ) ដោយឡាន (វេអង)។

ប្រភពបានឲ្យដឹងថានៅថ្ងៃទី ១៥ ខែកុម្ភៈ ឆ្នាំ ២០២៣ ក្រុមអ្នកសារព័ត៌មាន ប្រទះឃើញឡាន (វេអងចំនួន ៥ គ្រឿងចេញ តាមច្រកអូរងាវ ស្ថិតក្នុង ឃុំមានឫទ្ធិ ស្រុកសណ្ដាន់ ខេត្តកំពង់ធំ ចេញមកតាមផ្លូវកាត់ព្រៃអង់តែន ដឹកកាត់តាមមុខស្នាក់ការមេព្រៃ(៤៤) ឆ្ពោះទៅកាន់ផ្លូវជាតិលេខ ៦ ទៅទីក្រុងភ្នំពេញ។

ប្រភពព័ត៌មាន ពីប្រជាពលរដ្ឋរស់នៅតាមដងផ្លូវច្រក(អូរងាវ) ឃុំមានរិទ្ធិ ស្រុកសណ្ដាន់ខេត្តកំពង់ធំ បានលួចបង្ហើបប្រាប់អ្នកសារព័ត៌មានឱ្យដឹងថា ឡានប្រភេទ វេអង នេះ គេដឹកឈើចេញពីព្រៃឡង់ជារៀងរាល់យប់ មិនទាន់មានមន្ត្រីជំនាញធ្វើការទប់ស្កាត់នោះទេ។

ជុំវិញការការរិះគន់ប្រកាន់បែបនេះ សៀមរាបប៉ុស្តិ៍ នៅមិនទាន់ទទួលបានការបំភ្លឺពីក្រុមហ៊ុនក្រុមហ៊ុន PNT នៅឡើយទេ។ ពាក់ព័ន្ធទៅនឹងក្រុមហ៊ុននេះ PNT កន្លងមក គណៈកម្មការបង្ក្រាបបទល្មើសធនធានធម្មជាតិបានចេញសេចក្ដីប្រកាសព័ត៌មាន ថា ក្រុមហ៊ុននេះ PNT មិនបានធ្វើការទទួលទិញឈើខុសច្បាប់ដូចព័ត៌មានបានចុះផ្សាយនោះឡើយ៕SRP

ក្នុងសាររបស់សម្ដេចហ៊ុន សែន តាមប្រព័ន្ធតេលេក្រាម ដែលបានបង្ហោះចែកចាយនៅរាត្រីថ្ងៃសុក្រយប់មិញ ដោយបានលើកឡើងថា តើអង្គការទាំង៤០នេះក្តាប់បានរឿងនេះឬទេ? បានជានៅស្ងៀមស្តាត់ឬមួយអង្គការទាំងនេះបង្កើតឡើងដើម្បីតែ ការពារអ្នកប្រឆាំង?

សម្ដេច ហ៊ុន សែន បានសរសេរថា៖ យប់នេះខ្ញុំបង្ហើយការងារខ្ញុំនៅរំលងអាធ្រាតទៅហើយតែខ្ញុំមិនទាន់សម្រាកទេព្រោះនៅមិនអស់ចិត្តរឿងស្តង់ដាពីរ។ ផែង វណ្ណះ ត្រូវបានអង្គការក្រៅរដ្ឋាភិបាលដែលភាគច្រើនសុីលុយបរទេសទាមទារឲ្យថ្កោលទោសដោយសារបាននិយាយអាក្រក់ពីស្ត្រីដែលនិយាយព័ត៌មាន រហូតដល់វិទ្យុវីអូឌីស្លាប់ ដែលគ្មានពេលចាប់ជាតិ។ (ខ្ញុំមិនកាន់ជើងផែង វណ្ណះទេ) តែអ្វីដែលខ្ញុំមិនអស់ចិត្ត គឺប្អូនថ្លៃស្រីខ្ញុំក្រោយនាងស្លាប់ ត្រូវបានគេប្រមាថច្រើនរាប់ពាន់រាប់មុឺនដងប្រៀបជាមួយការដែលផែង វណ្ណះ និយាយដល់នាងជាអ្នកនិយាយព័ត៌មានរបស់វីអូឌី។

សម្ដេច ហ៊ុន សែន បន្តថា ពួកគេមិនគ្រាន់តែប្រមាថប្អូនថ្លៃខ្ញុំទេ តែគេថែមទាំងប្រមាថ ភរិយាខ្ញុំក្រុមគ្រួសារខ្ញុំក្នុងពេលដែលក្រុមគ្រួសារនេះកំពុងបង្ហូរទឹកភ្នែកស្តាយស្រណោះប្អូនស្រីម្តាយជីដូនម្តាយមីង ដែលលាចាកលោកទៅ ដោយមិនបានលាសូម្បីមួយម៉ាត់។

តើអង្គការទាំង៤០នេះ ក្តាប់បានរឿងនេះឬទេ? បានជានៅស្ងៀមស្តាត់ឬមួយអង្គការទាំងនេះបង្កើតឡើងដើម្បីតែការពារអ្នកប្រឆាំង?។សូមចាំទុកនិងសូមឈប់និយាយពីស្តង់ដាពីរជាមួយរាជរដ្ឋាភិបាលតទៅទៀត៕ ម៉ោង1.49នាទីថ្ងៃ១៧កម្ភះ២០២៣

ខេត្តកំពង់ចាម៖ក្នុងពិធីប្រកាសខេត្តកំពង់ចាមជាខេត្តអស់មីន នៅថ្ងៃព្រហស្បតិ៍ នេះ លោក អ៊ុន ចាន់ដា អភិបាលខេត្តកំពង់ចាម បានថ្លែងថា តាមរយៈគម្រោង សម្តេចតេជោ សម្រាប់សកម្មភាពមីន “ផ្តល់ដីសុវត្តិភាព បង្កើតស្នាមញញឹម” ចាប់ពីខែសីហា ឆ្នាំ២០២២មក បានធ្វើការបោសសម្អាត ចម្ការមីនដែលនៅសេសសល់ ក្នុងទឹកដីខេត្តកំពង់ចាម ចំនួន ១១ចម្ការ ស្ថិតនៅ ក្នុងស្រុក ចំនួន៤ រួមមាន៖ ស្រុកបាធាយ ២ចម្ការ ស្រុកចំការលើ ២ចម្ការ ស្រុក ស្ទឹងត្រង់ ២ចម្ការ និងស្រុកកងមាស ៥ចម្ការ ដែលមានផ្ទៃដីសរុបជាង ១លានម៉ែត្រក្រឡា និងបានកម្ទេចចោល មីនប្រឆាំងមនុស្ស ចំនួន ៣៩គ្រាប់ និងគ្រាប់យុទ្ធភណ្ឌមិនទាន់ផ្ទុះចំនួន ២៣គ្រាប់។​

ក្នុង​ពិធី​ លោក លី ធុជ អនុប្រធានទី១ អាជ្ញាធរកម្ពុជា គ្រប់គ្រងសកម្មភាពកំចាត់មីន និងសង្គ្រោះជនពិការ ដោយសារមីន បានថ្លែងថា៖ នៅខេត្តកំពង់ចាម គិតត្រឹមខែធ្នូ ឆ្នាំ២០២២ ផ្ទៃដីសង្ស័យមានមីន និងយុទ្ធភ័ណ្ឌមិនទាន់ផ្ទុះ សរុបប្រមាណជាង ៤៦,២ គីឡូម៉ែត្រក្រឡា ស្មើនឹង ៣៤៩ចម្ការមីន /គ្រាប់ ត្រូវបានបោសសម្អាតរួចដោយរកឃើញ និងកំទេចចោលគ្រាប់មីន ប្រឆាំងមនុស្ស ចំនួន ១៤០៦គ្រាប់ មីនប្រឆាំងរថក្រោះ ១៤២គ្រាប់ និងយុទ្ធភ័ណ្ឌ មិនទាន់ផ្ទុះដទៃទៀត ៦៣ ៥៧៤គ្រាប់ ដោយប្រតិបត្តិករ ជាតិចំនួន ២ រួមមាន អង្គភាពស៊ីម៉ាក់ និងមជ្ឈមណ្ឌលជាតិរក្សាសន្តិភាព។

លោកលី ធុជ បានសង្កត់ធ្ងន់ថា ភូមិអស់មីន ឬខេត្ត អស់មីន មិនមែនជាភូមិ ឬជាខេត្ត អស់ការ គម្រាមពីយុទ្ធភណ្ឌមិនទាន់ផ្ទុះដទៃទៀតនោះទេ ពីព្រោះ​ថា​ខេត្តកំពង់ចាម នៅសល់ ផ្ទៃដីសង្ស័យមានគ្រាប់បែកចង្កោម និងយុទ្ធភ័ណ្ឌមិនទាន់ផ្ទុះដទៃទៀត ប្រមាណជាង ៦៧គីឡូម៉ ត្រក្រឡា ស្មើនឹង ៣៩០ចម្ការគ្រាប់ទៀត​។

មាន​ប្រសាសន៍​ក្នុង​ពិធី​ លោកហ៊ុន ម៉ានិត នាយករងខុទ្ទកាល័យ និងជាអគ្គនាយកនៃអគ្គនាយកដ្ឋានស្រាវជ្រាវចារកិច្ចក្រសួងការពារជាតិ តំណាង សម្តេចហ៊ុន សែន បានថ្លែងអំណរគុណដល់ក្រុមប្រតិបត្តិករវិស័យមីនទាំងអស់ ដែលបានចូលរួមយ៉ាងសកម្ម ក្នុងការជួយសង្គ្រោះជីវិត និងរំដោះផ្ទៃដី ជូនប្រជាពលរដ្ឋ សម្រាប់កសាងភូមិដ្ឋាន ធ្វើស្រែចំការ និងកសាងហេដ្ឋារចនា សម្ព័ន្ធសាធារណៈ ធានាដល់ ការអភិវឌ្ឍកម្ពុជាប្រកបដោយសុវត្ថិភាព ជាក់ស្ដែងនាថ្ងៃនេះបានរំដោះផ្ទៃដី និងប្រកាសខេត្តកំពង់ចាម អស់មីន។

លោក ហ៊ុន ម៉ានិត បានថ្លែងថា រាជរដ្ឋាភិបាលកម្ពុជា ក្រោមការដឹកនាំ ប្រកបដោយទស្សនវិស័យ របស់ សម្តេច តេជោ បានជំរុញឥតឈប់ឈរដល់កិច្ចខិតខំប្រឹងប្រែងក្នុងសកម្មភាពមីន និងតែងតែចាត់ទុកសកម្មភាពមីន ជាការងារអាទិភាពដ៏ចំបងនៅក្នុងសកម្មភាពស្តារ និងអភិវឌ្ឍន៍ប្រទេសជាតិ ពិសេសការឈានទៅសម្រេចបាននូវផែនការ យុទ្ធសាស្ត្រ កាត់បន្ថយភាពកីក្រ និងជំរុញកំណើនសេដ្ឋកិច្ច ដែលត្រូវបញ្ចប់ការងារបោសសម្អាតមីន ឲ្យអស់ត្រឹម ឆ្នាំ២០២៥ ដោយរយៈពេល ៣០ឆ្នាំកន្លងមកនេះ គឺសម្រេចបាននូវសមិទ្ធផលដ៏ធំធេងណាស់ ដោយយើងរំដោះផ្ទៃដី បានរាប់ពាន់គីឡូម៉ែត្រក្រឡា និងសំណល់ជាតិផ្ទុះពីសង្គ្រាមរាប់លានគ្រាប់ ដែលមានអ្នកទទួលផលប្រមាណជាង ៩លាននាក់។ ដូច្នេះកម្ពុជាគឺស្ថិតក្នុងចំណោមប្រទេស ក្នុងពិភពលោក ដំបូងគេ ដែលធ្វើការបោសសម្អាតមីនមនុស្សធម៌ជាទ្រង់ទ្រាយធំ ត្រូវបានទទួលស្គាល់ជាអន្តរជាតិ​៕SRP

ខេត្តសៀមរាប៖បុរសអ្នកជិះម៉ូតូម្នាក់បានស្លាប់បាត់បង់ជីវិតភ្លាមៗខណៈជិះម៉ូតូទៅបុកគោយន្តកន្ត្រៃ។

ហេតុការណ៍បានកើតឡើង ម៉ោង២០និង ៣០ ថ្ងៃទី១៥ ខែកម្ភ: ឆ្នាំ២០២៣ នៅលើផ្លូវជាតិលេខ៦៤ នៅភូមិត្រាចពក ឃុំពពេល​ ស្រុកសូទ្រនិគម ខេត្តសៀមរាប។

គ្រោះថ្នាក់ចរាចរណ៍នេះ ម៉ូតូ ហុងដា ពណ៌ក្រហម ​ ស្លាកលេខសៀមរាប 1B-7464 បើកបរក្នងទិសដៅពីជើងទៅត្បូង បានទៅបុកប៉ះពីក្រោយចំហៀងខាងឆ្វេងគោយន្តកន្ត្រៃ Kubota ពណ៌ក្រហម​ បើកបរស្របទិសគ្នាពីជើងទៅត្បូង ក្នុងនោះ
ខូចខាត ម៉ូតូ១ គ្រឿង ផងដែរ។ មូលហេតុ  អ្នកបើកបរម៉ូតូ បើកបរល្បឿនលឿនខ្វះការប្រុងប្រយ័ត្ន ។ វត្ថុតាង ត្រូវបានកម្លាំងសមត្ថកិច្ចយកទៅរក្សាទុកដើម្បីបន្តនិតិវិធី៕SRP

សម្ដេចតេជោ ហ៊ុន សែន នាយករដ្ឋមន្ត្រី បានថ្លែងអំណរគុណចំពោះការវាយតម្លៃ របស់ឯកឧត្តម យ៉ូស៊ីដា ហើយបានជម្រាប ជូនពីដំណើរការស្វែងរកសន្តិភាព របស់កម្ពុជា ដែលជាប្រទេសបានរងការបែកបាក់គ្នាអស់រយៈពេលជាច្រើនឆ្នាំកន្លងមក។

សម្ដេចតេជោបានមានប្រសាសន៍ថា នៅពេលនោះ ពិតជាពិបាកណាស់ កម្ពុជាបានរងនូវការបាត់បង់ស្ទើរទាំងអស់។ មួយចំណែកទៀត កម្ពុជារងនូវការកាប់សម្លាប់អស់ជាង ៣លាននាក់។ ក្នុងនាមជាយុវជនមួយរូប សម្ដេច គ្មានជម្រើសផ្សេងទេ មានតែការកសាងទ័ព តស៊ូ ចចារ និងយកជីវិតទៅប្ដូរ ដើម្បីសន្តិភាព។ មានសន្តិភាព ទើបមានអ្វីៗទាំងអស់ គ្មានសន្តិភាពទេ គឺគ្មានទេលទ្ធិប្រជាធិបតេយ្យ គ្មានទេសិទ្ធិមនុស្ស ព្រោះប្រជាធិបតេយ្យ និងសិទ្ធិមនុស្ស មិនជ្រកក្រោមសង្គ្រាមទេ ជាក់ស្ដែងដូចជា ស្ថានភាពនៅអ៊ុយក្រែន ជាឧទាហរណ៍ស្រាប់។

សម្ដេចហ៊ុន សែន ប្រសាសន៍យ៉ាងដូច្នេះ ក្នុងឱកាស
អនុញ្ញាតឱ្យឯកឧត្តម នាយឧត្តមសេនីយ៍ យ៉ូស៊ីដា យ៉ូស៊ីហ៊ីដេ (Yoshida Yoshihide) មេបញ្ជាការកងស្វ័យការពារជើងគោកជប៉ុន ចូលជួបសម្ដែងការគួរសម និងពិភាក្សាការងារ
នៅវិមានសន្តិភាព នៅថ្ងៃព្រហស្បតិ៍នេះ។

តាមការឲ្យដឹងពីឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ បានឲ្យដឹងអំពីលទ្ធផលជំនួប ថា ឯកឧត្តមបានជម្រាបជូនសម្ដេចតេជោថា ឯកឧត្តម នាយឧត្តមសេនីយ៍ បានដឹកនាំគណៈប្រតិភូមកបំពេញទស្សនកិច្ច នៅ ព្រះរាជាណាចក្រកម្ពុជា ស្របពេលនឹងការប្រារព្ធខួបអនុស្សារីយ៍លើកទី៧០ នៃការបង្កើតចំណងការទូតរវាងប្រទេសកម្ពុជា និងប្រទេសជប៉ុន នៅក្នុងឆ្នាំ២០២៣។

ឯកឧត្តម យ៉ូស៊ីដា បានសម្ដែងនូវការគោរពជូនសម្ដេចតេជោដែលបានកសាងទ័ព ដឹកនាំទ័ព និងដឹកនាំកិច្ចចរចានាំមកជូនកម្ពុជា នូវសុខសន្តិភាព ស្ថិរភាព និងការអភិវឌ្ឍយ៉ាងឆាប់រហ័ស។

ឯកឧត្តម យ៉ូស៊ីដា បានបន្ថែមថា បើសិនគ្មានសម្ដេចតេជោទេ គឺគ្មានទេសន្តិភាពឡើយ។ ឯកឧត្តម នឹងជំរុញពង្រីក ពង្រឹងកិច្ចសហប្រតិបត្តិការជាមួយកងទ័ពកម្ពុជា ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ ដោយស្មើភាព មិនមានអ្នកដើរពីមុខ ឬអ្នកដើរពីក្រោយ គឺដៃគូស្មើភាពគ្នា ដើម្បីបម្រើឱ្យការងារមនុស្សធម៌ផង និងរក្សាសុខសន្តិភាពផង។ ក្នុងន័យនេះ ឯកឧត្តម យ៉ូស៊ីដា បានគោរពស្នើសុំការគាំទ្រដ៏ខ្ពង់ខ្ពស់ពីសម្ដេចតេជោនាយករដ្ឋមន្ត្រី។

សម្ដេចហ៊ុន សែន បានថ្លែងអំណរគុណដល់ប្រជាជន និងរដ្ឋាភិបាលជប៉ុន ដែលបានជួយដល់កម្ពុជា ក្នុងដំណើរការចរចា និងប្រតិបត្តិការស្វែងរកសន្តិភាព និងតែងតែជួយដល់កម្ពុជាក្នុងការអភិវឌ្ឍ។

សម្ដេចនាយករដ្ឋមន្ត្រី បានលើកទឹកចិត្តឱ្យកងទ័ពទាំងពីរ សហការគ្នាក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ ដើម្បីបម្រើឱ្យសេចក្ដីសុខសន្តិភាព របស់ប្រជាជនទាំងពីរផង ទាំងក្នុងតំបន់ និងក្នុងពិភពលោកផងដែរ៕SRP