ខេត្តកំពង់ចាម​៖ស្ត្រី​ឈ្មោះ​ ញ៉ សុខគា អាយុ ៣៩ឆ្នាំ ដែលបានរងគ្រោះ ដោយអគ្គិភ័យឆេះផ្ទះ ២ខ្នង ទំហំ ៦ម×១២ម ធ្វើពីឈើ ប្រក់ក្បឿង កាលពីវេលាម៉ោង ៩ និង៤០នាទីយប់ ថ្ងៃទី២៨ ខែសីហា ឆ្នាំ ២០២១ នៅភូមិអូរបេង ឃុំមេសរជ្រៃ ស្រុកស្ទឹងត្រង់ មូលហេតុដោយសារ តែឈ្មោះ បូ សុផា អាយុ ៤១ឆ្នាំ ត្រូវជាប្តី ញៀនថ្នាំ ញៀនស្រា បង្កជម្លោះ ហើយដុតបំផ្លាញផ្ទះខ្លួនឯង បណ្ដាល​ឲ្យ​ឆេះខូចខាតទាំងស្រុង បានទទួលមនុស្សធម៌ ពីសាខា​កាកបាទក្រហម​កម្ពុជា​ខេត្តកំពង់ចាម។

ការទទួលបានអំណោយ នៅព្រឹកមិញនេះ តាមរយៈ លោកជំទាវ ប៉ាង ដានី អនុប្រធានអចិន្ត្រៃយ៍សាខា តំណាងលោក អ៊ុន ចាន់ដា ប្រធានគណៈកម្មាធិការសាខា​កាកបាទក្រហម​កម្ពុជា​ខេត្តកំពង់ចាម​។

លោកជំទាវ ប៉ាង ដានី បានអំពាវនាវប្រជាពលរដ្ឋ ទាំងអស់ ត្រូវបង្កើនការប្រុងប្រយ័ត្នជានិច្ច ពីការថែទាំសុខភាពអនាម័យ និងសុវត្ថិភាពផ្ទាល់ខ្លួន តាមរយៈការចូលរួមអនុវត្តអោយបានខ្ជាប់ខ្ជួន តាមវិធានសុខាភិបាល “៣កុំ ៣ការពារ និងដើម្បីចៀសអោយផុតពីការឆ្លងរាតត្បាត នៃវីរុស ដែលតា បម្លែងថ្មី កូវីដ-១៩ ។

គួរ​បញ្ជាក់​ថា​ អំណោយមនុស្សធម៌ ដែលបានផ្ដល់ជូនរួមមាន៖ អង្ករ ៥០គក្រ ទឹកត្រី ១យួរ ទឹកស៊ីអ៉ីវ ១យួរ មី១កេស តង់ធំ១ ឃីត ១ ( មុង ភួយ សារុង ក្រម៉ា ) អាវយឺត៨ សម្ភារផ្ទះបាយ សម្ភារដំណេក  និងថវិកាចំនួន១លានរៀល។

ដោយឡែក លោក វង្ស ប៊ុន វិសុទ្ធ ឧបត្ថម្ភថវិកា ១លានរៀល និង អនុសាខា ស្រុកស្ទឹងត្រង់ បានផ្តល់ជូន នូវអង្ករ ៥០គក្រ មី ១កេស និងថវិកា ១០០.០០០រៀល ផងដែរ៕SRP

ខេត្តសៀមរាប៖លោកទៀ សីហា សមាជិកគណៈកម្មាធិការកណ្តាលគណបក្សប្រជាជនកម្ពុជា សមាជិកយុវជនថ្នាក់កណ្តាល និងជាប្រធានគណៈកម្មាធិការនៃគណបក្សប្រជាជនកម្ពុជាខេត្តសៀមរាបបានបង្ហាញថា «យុវជនជាសរសទ្រូងរបស់ជាតិ ជាកម្លាំងបន្តវេនប្រកបដោយសក្ដានុពលក្នុងការអភិវឌ្ឍសេដ្ឋកិច្ច សង្គម និងការពាររាល់សមិទ្ធិផលសង្គម»។ ភាពរឹងមាំរបស់យុវជនកម្ពុជាគឺតំណាងឱ្យអនាគតដ៏រុងរឿងរបស់ជាតិទាំងមូល”។ ដោយឈរលើទស្សនៈនេះ គណបក្សប្រជាជន បានយកចិត្តទុកដាក់បន្តការអភិវឌ្ឍយុវជនឱ្យមានការរីកចម្រើនលើគ្រប់ផ្នែកទាំងចំណេះដឹង ចំណេះធ្វើ ការបង្កើតការងារ ការពង្រឹងកាយសម្បទា និងថែទាំសុខភាព ព្រមទាំងអប់រំអំពីសីលធម៌រស់នៅប្រកបដោយសេចក្តីថ្លៃថ្នូរ ចៀសផុតពីអំពើហិង្សា និងអំពើអបាយមុខនានា ហើយបានប្តេជ្ញាចិត្តក្នុងការបំពេញភារកិច្ចរបស់ខ្លួនស្របតាមគោលការណ៍គោលនយោបាយរបស់គណបក្សបានយ៉ាងល្អប្រពៃ។

លោកទៀ សីហា ថ្លែងបែបនេះ ក្នុងពិធីប្រកាសសេចក្តីសម្រេច ស្ដីពីការកែសម្រួល និងបំពេញបន្ថែម សមាសភាព ក្រុមការងារយុវជនគណបក្សខេត្ត ផែនចំណុះ ក្រុមការងារយុវជន គណបក្សប្រជាជនកម្ពុជា ខេត្តសៀមរាប និងសម្ពោធស្នាក់ការយុវជន គណបក្សខេត្ត នៅថ្ងៃទី៣១ ខែសីហា ឆ្នាំ២០២១ ព្រឹកមិញនេះ។

លោកទៀ សីហា មានប្រសាសន៏ថា ចំពោះពិធីប្រកាសសេចក្តីសម្រេច ស្តីពីការកែសម្រួល និងបំពេញបន្ថែម សមាសភាពក្រុមការងារយុវជននៃគណបក្សខេត្ត ផែនចំណុះក្រុមការងារយុវជនគណបក្សខេត្ត និងសម្ពោធស្នាក់ការយុវជនគណបក្សខេត្តនេះ សូមកោតសរសើរចំពោះ ការចូលរួមប្រកបដោយ ស្មារតី សកម្ម ព្យាយាម និងការលះបង់ខ្ពស់របស់ឯកឧត្តម លោក លោកស្រី និងអ្នកនាងកញ្ញា ដែលបានធ្វើឱ្យសម្រេចបានលទ្ធផលការងារយុវជនរបស់ខេត្ត ឆ្លើយតបបានទៅនឹងសេចក្តីកំណត់របស់គណៈកម្មាធិការកណ្តាល នៃគណបក្សប្រជាជនកម្ពុជា និងសេចក្ដីណែនាំរបស់យុវជនគណបក្សថ្នាក់កណ្ដាលដែលបានដាក់ចុះកន្លងមក។

លោកបានបញ្ជាក់ទៀតថា ដើម្បីសម្រេចគោលបំណងនេះគណបក្សប្រជាជនកម្ពុជា ត្រូវតែបន្តលើកកម្ពស់ការអប់រំ និងបណ្តុះបណ្តាលវិជ្ជា ជីវៈចំណេះដឹងវិទ្យាសាស្ត្រ បច្ចេកទេស កម្មវិធីបំនិនជីវិតដល់យុវជនជាដើម។ ជាមួយគ្នានោះ គណបក្សប្រជាជនកម្ពុជា បានរក្សាការពារសុខសន្តិសុខ សុវត្ថិភាព និងយុត្តិធម៌ សម្រាប់យុវជនដោយយកចិត្តទុកដាក់បញ្ចូលតម្រូវការយុវជនក្នុងផែនការអភិវឌ្ឍគ្រប់កម្រិត ពង្រីកការបណ្តុះបណ្តាលភាពជាអ្នកដឹកនាំ និងជំរុញការអនុវត្តជាជំហានៗនូវទិសដៅយុវភាវូបនីយកម្ម ក្នុងការផ្តល់នូវការទទួលខុសត្រូវនៅគ្រប់លំដាប់ថ្នាក់ដល់យុវជនដើម្បីឱ្យយុវជនកាន់តែពង្រីកបាននូវឱកាស និងសមត្ថភាពរបស់ខ្លួនក្នុងការអភិវឌ្ឍប្រទេស លើកទឹកចិត្តពង្រឹងចលនាស្ម័គ្រចិត្តរបស់យុវជនចូលរួមក្នុងសកម្មភាពកសាងយុត្តិធម៌សង្គមការទប់ស្កាត់បាតុភាពអសកម្មតាមសហគមន៍និងក្នុងសកម្មភាពផ្សេងៗទៀត ដើម្បីបម្រើផលប្រយោជន៍ជូនប្រជាជននៅតាមបណ្តាមូលដ្ឋាន ក៏ដូចជាផលប្រយោជន៍សាធារណៈផងដែរ៕SRP

ខេត្តសៀមរាប៖ខ្ញុំបាទប៊ុត វិចិត្រ ចាងហ្វាងគេហទំព័រសៀមរាបប៉ុស្ដិ៍ និងសហការី ទាំងអស់ សូមគោរពជូនពរ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ក្នុងឱកាសនៃថ្ងៃខួបកំណើតរបស់ឯកឧត្ដម «៣១ សីហា ១៩៨០» « ៣១ សីហា ២០២១ »

អង្គភាពគេហទំព័រសៀមរាបប៉ុស្ដិ៍  www.srpostnews.com

ភ្នំពេញ៖លោក ស សុខា បានលើកឡើងថា៖ល្បែងប្រជាភិថុតិ របស់ក្រុមអ្នកនយោបាយប្រឆាំងមួយចំនួន គួរត្រូវបានបញ្ចប់ហើយ។

លោក ស សុខា ដែលគេបានស្គាល់ថាកូនប្រុសរបស់សម្ដេច ស ខេង បានបង្ហោះសំណេរមួយនៅលើទំព័រផេកហ្វេសប៊ុករបស់លោកថា៖ជាបន្តបន្ទាប់ក្រុមអ្នកនយោបាយប្រឆាំងមួយចំនួន ដែលធ្វើនយោបាយតែដើម្បីដូរបាយនោះ បាន និងកំពុងផ្តិតយក ឬភ្ជាប់ជាមួយសម្តេចក្រឡាហោម ស ខេង ដើម្បីស្តារស្ថានភាព និងប្រជាប្រិយភាពរបស់ខ្លួន ឃោសនាកុហកបោកប្រាស់បំភាន់ ក្នុងន័យបំបែកបំបាក់ផ្ទៃក្នុងគណបក្សប្រជាជនកម្ពុជា ដែលកំពុងមាននយោបាយល្អទាំងក្នុងប្រទេស និងលើឆាកអន្តរជាតិ ។

ជាមួយគ្នានេះអ្នកវិភាគមួយចំនួន បានលើកយកវត្តមានសម្តេចក្រឡាហោម អញ្ជើញទៅប្រទេសបារាំង ដើម្បីពិនិត្យសុខភាព ទាញចេញទៅជារឿងបែបនេះបែបនោះ បំភាន់មតិជាតិ-អន្តរជាតិ ឲ្យយល់ច្រឡំថា គណបក្សប្រជាជនកម្ពុជា កំពុងបែកបាក់ផ្ទៃក្នុង ផ្ទុយស្រឡះពីការពិត ។ គណបក្សប្រជាជនកម្ពុជា គឺជាគណបក្សតែមួយគត់ដែលមានជំហរ និងរក្សាបាននូវសាមគ្គីភាពផ្ទៃក្នុងល្អ រឹងមាំមិនអាចអ្នកណា ឬក្រុមណាមួយបំបែកបាន និងជាក្តីសង្ឃឹមតែមួយគត់របស់ប្រជាជនកម្ពុជា តរៀងទៅ ។

ក្នុងនាមជាយុវជនជំនាន់ក្រោយមួយរូប និងក្នុងនាមជាក្រុមគ្រួសាររបស់សម្តេចក្រឡាហោម ផងនោះ ខ្ញុំសុំទទូចឲ្យអ្នកនយោបាយប្រឆាំងទាំងនោះ ល្មមចប់សព្វគ្រប់ និងល្មមបញ្ឈប់អត្តចរិតរំលោភបំពានទៅលើគេ ពិសេសទៅលើសម្តេចក្រឡាហោម ស ខេង ដែលគ្រប់យ៉ាងមិនមែនជាការពិត ព្រោះថា “ល្បែងបោកប្រាស់តាមយន្តការប្រជាភិថុតិ” របស់ក្រុមអស់លោក គ្មានអ្នកណាជឿទៀតទេ ។

សូមបញ្ជាក់ថា សម្តេចក្រឡាហោម ក៏ដូចជាថ្នាក់ដឹកនាំគណបក្សប្រជាជនកម្ពុជា ផ្សេងៗទៀត គឺបាន និងកំពុងលះបង់ទាំងកម្លាំងកាយ ចិត្ត ដើម្បីកសាងប្រទេសជាតិ ដែលផ្ទុយស្រឡះពីក្រុមអ្នកនយោបាយប្រឆាំងមួយចំនួន បានត្រឹមតែស្រែកបំភាន់ ញុះញង់ បំបែកបំបាក់ ដើម្បីតែផលប្រយោជន៍ខ្លួនឯង និងបក្ខពួករបស់ខ្លួននោះ ។

ក្នុងនាមអ្នកនយោបាយជំនាន់មុន គួរគប្បីធ្វើជាគំរូវិជ្ជមាន សម្រាប់អ្នកនយោបាយជំនាន់ក្រោយ រៀនសូត្រតាម ពិសេសបណ្ដុះមនសិការស្រឡាញ់ជាតិ ជ្រោមជ្រែងជាតិពិតប្រាកដ ចៀសវាងការធ្វេីប្រជាភិថុតិយុវជន ប្រជាជន។

គួរបញ្ជាក់ថាក្រោយពីសម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានធ្វើដំណើរចាកចេញពីកម្ពុជា ទៅប្រទេសបារាំង ដើម្បីទៅពិនិត្យសុខភាពផ្ទាល់ខ្លួន ប៉ុន្តែត្រូវបានអតីតមន្ត្រីបក្សសង្គ្រោះជាតិនិងអ្នកវិភាគមួយចំនួនបានលើកឡើងថា សម្ដេច ស ខេង អាចនឹងជួបលោក សម រង្សី អតីតមេបក្សប្រឆាំង នៅប្រទេសបារាំង។ ទោះជាយ៉ាងណា ជុំវិញការលើកឡើងបែបនេះ ត្រូវបានខុទ្ធកាល័យ សម្ដេច ស ខេង បដិសេធចោលទាំងស្រុង ដោយបញ្ជាក់ថាការធ្វើដំណើរបស់សម្ដេច ស ខេង ទៅប្រទេសបារាំង គឺមិនមានអ្វីក្រៅពីពិនិត្យសុខភាពនោះទេ៕SRP

ភ្នំពេញ៖តាមរយៈវត្តមានវ៉ាក់សាំងដែលរកបាននេះ កម្ពុជាបានចាក់ជូនប្រជាពលរដ្ឋ អាយុចាប់ពី ១២ឆ្នាំឡើង សរុបជាង១០លាននាក់ហើយ។ ទន្ទឹមនឹងការចាក់វ៉ាក់សាំងជុំទី១ ជូនប្រជាពលរដ្ឋ ប្រមាណ១២លាននាក់ ជិតរួចរាល់ហើយនោះ កម្ពុជាក៏កំពុងដំណើរការចាក់ដូសជំរុញ ជូនប្រជាពលរដ្ឋ ក្រុមជួរមុខ ហើយក៏ត្រៀមចាក់ដូសជំរុញ នេះជូនប្រជាពលរដ្ឋ ទូទៅផងដែរ។

ប្រមុខរាជរដ្ឋាភិបាល សម្តេច ហ៊ុន សែន បានស្វះស្វែង និងប្រឹងប្រែងជាខ្លាំង ក្នុងការរកវ៉ាក់សាំងបង្ការជំងឺកូវីដ១៩ ចាក់ជូនប្រជាពលរដ្ឋ។ មកដល់ពេលនេះ កម្ពុជា មានវ៉ាក់សាំងបង្ការជំងឺកូវីដ១៩ ប្រមាណ ២៥លានដូសរួចហើយ។ វ៉ាក់សាំងនេះ គឺមានទាំងជំនួយពីប្រទេសជាមិត្ត និងការបញ្ជាទិញរបស់រាជរដ្ឋាភិបាល ពីក្រុមហ៊ុនរបស់ប្រទេសចិន។

សូមជម្រាបថានៅថ្ងៃអង្គារ ទី៣១ ខែសីហា ឆ្នាំ២០២១នេះ វ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) ចំនួន២លានដូសបន្ថែមទៀត បានដឹកមកដល់ប្រទេសកម្ពុជា ដើម្បីបម្រើដល់ដំណើរការចាក់ដូសជំរុញជូនប្រជាពលរដ្ឋ។

វ៉ាក់សាំងស៊ីណូវ៉ាក់(Sinovac) ដែលបានដឹកមកដល់ប្រទេសកម្ពុជា នៅថ្ងៃនេះ គឺជាវ៉ាក់សាំង ដែលរាជរដ្ឋាភិបាលកម្ពុជាបានបញ្ជាទិញ ដើម្បីយកមកបម្រើដល់ការចាក់ដូសជំរុញជូនប្រជាពលរដ្ឋ។​ វ៉ាក់សាំងបង្ការជំងឺកូវីដ១៩ គឺជាវិធីសាស្ត្រដ៏ចម្បងមួយ សម្រាប់ រាជរដ្ឋាភិបាលកម្ពុជា បន្ទាប់ពីវិធាននានារបស់ក្រសួងសុខាភិបាល ដើម្បីប្រយុទ្ធប្រឆាំងការរាតត្បាតជំងឺកូវីដ១៩៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប បានអះអាងថា ដើម្បីសម្រេចបាននូវការកសាងទីក្រុងឆ្លាតវៃក្នុងក្រុងសៀមរាប ឲ្យស្របតាមផែនការទីក្រុងឆ្លាតវៃ របស់សមាគមបណ្តាញទី ក្រុង ឆ្លាតវៃអាស៊ាន រដ្ឋបាលខេត្តក៏បានរៀបចំជាសំណើ (Proposal) ដើម្បីដាក់ស្នើសុំជូនទៅទីភ្នាក់ងារសហប្រតិបត្តិការ អន្តរជាតិជប៉ុន (JICA) ក្នុងការស្នើសុំជំនួយកិច្ចសហប្រតិបត្តិការបច្ចេកទេស សម្រាប់រៀបចំទីក្រុងឆ្លាតវៃក្នុងក្រុង សៀមរាប កាលពីឆ្នាំ២០១៩កន្លងទៅ។ លោកថា ជាការឆ្លើយតបតាមសំណើស្នើសុំរបស់ រដ្ឋបាលខេត្តសៀមរាប ទីភ្នាក់ងារ សហប្រតិបត្តិការអន្តរជាតិជប៉ុន (JICA) បានទទួលយកសំណើ (Proposal) រួចហើយ ដើម្បីជួយរៀបចំក្រុងសៀមរាបជាទីក្រុងឆ្លាតវៃអាស៊ាន។

លោកអះអាងបែបនេះ ក្នុងកិច្ចប្រជុំតាមរយ:ប្រព័ន្ធ Zoom ស្តីពីការរៀបចំគម្រោងទីក្រុងឆ្លាតវៃក្នុងក្រុងសៀមរាប។

លោក ទៀ សីហា បានបន្តថាក្រុងសៀមរាប ត្រូវបានដាក់បញ្ចូលទៅក្នុងសមាជិក នៃបណ្តាញទីក្រុង ឆ្លាតវៃអាស៊ាន កាលពីឆ្នាំ២០១៨ កន្លងទៅ រដ្ឋបាលខេត្តសៀមរាប ក៏ដូច ជារដ្ឋបាលក្រុងសៀមរាប បានធ្វើការរៀបចំផែនការក្នុងការបង្កើនការចំណាយសាធារណៈវិនិយោគ ទៅលើហេដ្ឋារចនា សម្ព័ន្ធ ក្នុង ក្រុង ដើម្បីបង្កលក្ខណងាយស្រួល ជាមួយប្រតិបត្តិការអន្តរជាតិជប៉ុន (JICA )និងក្រសួងដែនដី ហេដ្ឋារចនា សម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន។

លោកបានបញ្ជាក់ថា ការសិក្សាស្រាវជ្រាវរបស់ក្រុមការងារJICA ក្នុងរយៈពេលជាង ០១ឆ្នាំកន្លងមកនេះ គឺផ្តោតការសិក្សាលើគម្រោងចំនួនពីរ គឺគម្រោងប្រមូល និងវិភាគទិន្នន័យអំពីទីក្រុងឆ្លាតវៃ (Smart City Data Collection and Analysis) និងគម្រោងរៀបចំបណ្តាញកាំមេរ៉ាសុវត្ថិភាពក្នុងក្រុងសៀមរាប (CCTV System Introduction)។

គួរបញ្ជាក់ថា កិច្ចប្រជុំនេះ ធ្វើឡើងនៅថ្ងៃទី៣០ ខែសីហា ម្សិលមិញ នៅរដ្ឋបាលខេត្តសៀមរាប ដែលសហការរៀបចំឡើងដោយទីភ្នាក់ងារសហប្រតិបត្តិការអន្តរជាតិជប៉ុន (JICA) និង ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន ក្រោមវត្តមានលោក ទៀ សីហា អភិបាលខេត្តសៀមរាប៕SRP

ខេត្តសៀមរាប៖ព្រះចៅអធិការវត្តប្រាសាទគោកចក ព្រះគ្រូវិចិត្រវង្សា ហែម គឹមសាន បានប្រគល់គ្រឿងឧបភោគ បរិភោគនិងបច្ច័យមួយចំនួនចូលរួមបុណ្យសព ប្រជាពលរដ្ឋមួយគ្រួសារ ដែលមានជីវភាពខ្វះខាត។

ការប្រគល់ធ្វើឡើង នៅល្ងាចថ្ងៃទី៣០ ខែសីហា ឆ្នាំ២០២១នេះ តាមរយៈលោកស្រី លី គីមហៀក សមាជិកភូមិទក្សិណខាងត្បូង និងប្រជាការពារភូមិ ដោយគ្រឿងឧបភោគបរិភោគ មួយចំនួន មានដូចជា៖-គ្រឿងបាឡុងមួយឈុត-អង្ករចំនួន៥០គីឡូក្រាម-ទឹកត្រី១យួរ-ទឹកស៊ីអ៉ីវ១យួរ-មីចំនួន១កេស និងបច្ច័យចំនួន១០ម៉ឺនរៀល។

ពលរដ្ឋដែលទទួលមរណៈភាព ដោយសារដាច់សសៃឈាមនៅក្នុងមន្ទីរពេទ្យបង្អែកខេត្តសៀមរាប មានឈ្មោះ ញឹក នាង ភេទប្រុស អាយុ ៧៣ឆ្នាំ ដែលភរិយាឈ្មោះយិន សុខាអាយុ៧០ឆ្នាំ បានព្រមទាំងមានកូននៅក្នុងបន្ទុកចំនួន៥នាក់ ដែលបានរស់នៅលើដីចំណីផ្លូវស្ថិតក្នុងភូមិទក្សិណខាងត្បូង សង្កាត់គោកចក ក្រុងសៀមរាប៕SRP

ភ្នំពេញ៖ប្រមុខរាជរដ្ឋាភិបាលកម្ពុជា បានចេញអនុក្រឹត្យ តែងតាំង លោកឡុង ណារ៉ូ ជាអគ្គនាយករដ្ឋាករទឹកស្វយ័តក្រុងភ្នំពេញថ្មី ជំនួសលោក ស៊ឹម ស៊ីថា ដែលត្រូវចូលនិវត្តន៍។ នេះបើយោងតាមអនុក្រឹត្យ ចុះហត្ថលេខាដោយ នាយករដ្ឋមន្ត្រី ហ៊ុន សែន៕SRP

ខេត្តសៀមរាប៖បុរសម្នាក់ត្រូវបានខ្សែភ្លើងឆក់បណ្ដាលឲ្យរងរបួសធ្ងន់។ ហេតុការណ៍បានកើតឡើងនៅវេលាម៉ោង១១ ថ្ងៃទី ៣០ ខែសីហ ឆ្នាំ២០២១ ត្រង់ចំណុច ធ្វើសំយាបផ្ទះឈ្មោះ សុយ សង្វាត ភេទប្រុស អាយុ៤០ឆ្នាំ ក្នុងភូមិអូរតាប្រាក់ ឃុំពួក ស្រុកពួក ខេត្តសៀមរាប។

សមត្ថកិច្ចខេត្តសៀមរាប បានថ្លែងប្រាប់អង្គភាពសៀមរាបប៉ុស្ដិ៍ ថាជនរងគ្រោះ មានឈ្មោះ ញុង ញឹម អាយុ៤៤ឆ្នាំ រស់នៅ ភូមិព្រៃក្មេង ឃុំខ្នាត ស្រុកពួក ខេត្តសៀមរាប មុខរបរបើកបររថយន្តនៅមន្ទីរពេទ្យរ៉ូយ៉ាល់អង្គរ តែបាន សម្រាកពីការងារមកធ្វើជាងផ្សារដែក ធ្វើសំយាបផ្ទះនៅទីតាំងខាងលើ ហើយបានលើកដែក១ដើម (ដែកទំហំ២ហ៊ុន/កន្លះ,ប្រវៃង៦ម៉ែត្រ)ទៅប៉ះនឹងខ្សែភ្លើងស្រាតអមដងផ្លូវ ក្រុមហ៊ុនអគ្គិសនីខេត្តសៀមរាប បណ្ដាលឲ្យទុសេខ្សែភ្លើង(ឆក់)ខ្លួនធ្លាក់ពីលើកំពស់ប្រហែល៣,៥០ម៉ែត្រមកដី ដោយរងរបួសឆេះរលាកស្បែកលើដងខ្លួន បណ្តាលឲ្យរបួសធ្ងន់ ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យរ៉ូយ៉ាល់អង្គរ៕SRP

ខេត្តកំពង់ចាម​៖លោក ខ្លូត ចិន្តា អភិបាលរងខេត្ត នៅថ្ងៃទី​៣០​ ខែសីហា​ ព្រឹកមិញនេះ​ បានដឹកនាំក្រុមការងារចុះសួរសុខទុក្ខ គណ:អាជីវករ និងអាជីវករ ផ្សារ​បឹងកុក​ ក្រុង​កំពង់ចាម​ ដេីម្បី​អនុវត្តពីការពាក់ម៉ាស និងវិធានរដ្ឋបាល។

លោក ខ្លូត​ ចន្តា​ បាន​ក្រេីន​រំលឹក​ដល់​គណ:អាជីវករ និងអាជីវករ​ផ្សារ​បឹងកុក​ ទាំងអស់ ត្រូវ​​ខិតខំ​យកចិត្តទុកដាក់​ក្នុង​ការ​ថែទាំ​សុខភាព​ ទោះបីជា​បាន​ចាក់​វ៉ាក់សាំង​បង្ការ​ជំងឺ​កូវីដ​-១៩​ ​ហេីយ​ក្កី​។

អភិបាលរងខេត្ត​ ក៏បាន​សំណូមពរ​​ដល់​គណ:អាជីវករ និងអាជីវករ​ផ្សារ​បឹងកុក​ ទាំងអស់​ ឲ្យ​​បន្ត​ការ​អនុវត្ត​តាម​សេចក្តី​ណែនាំ​របស់​រាជរដ្ឋាភិបាល​កម្ពុជា​ ក៏ដូចជា​​រដ្ឋបាល​ខេត្ត​កំពង់ចាម​ ក្នុង​ការ​ប្រយុទ្ធ​ប្រឆាំង​នឹង​ជំងឺ​-១៩​ ដេីម្បី​កាត់ផ្ដាច់​ខ្សែ​ចម្លង​នៃ​ជំងឺ​ដ៏​កាច​សាហាវ​នេះ​ក្នុង​មូលដ្ឋាន​យេីង​ទាំង​អស់​គ្នា​៕​SRP

ខេត្តសៀមរាប​៖​ក្មេងស្ទាវចំនួន៤នាក់ ត្រូវបាននគរបាល​ក្រុង​សៀមរាប​ ឃាត់ខ្លួន​ករណី​បង្ក​ភាព​អនាធិបតេយ្យ​ វាយ​កាប់​ចាក់​គ្នា។

ការបង្ករហិង្សានេះ នៅ​វេលា​ម៉ោង​១២​និង​ ៣០​នាទី​ ឈាន​ចូល​ថ្ងៃ​ទី​ ២៩​ ខែសីហា​ ឆ្នាំ​២០២១​ នៅ​ត្រង់​ចំណុច​តាម​បណ្ដោយ​ផ្លូវ​កៅស៊ូ​ បុរីសៀងណាំ​២​ ស្ថិត​នៅ​ភូ​មិច​ន្លោ​ង​ សង្កាត់​ស្រ​ង៉ែ​ ក្រុងសៀមរាប។​

ប្រភពពីសមត្ថកិច្ចបានឲ្យដឹងថា ក្មេងស្ទាវ​ទាំង​៤​នាក់៖
១.​ឈ្មោះ​ យិ​ន​ សីលា​ ហៅ​ សិលា​ ភេទ​ប្រុស​ អាយុ​ ២០​ឆ្នាំ​ មុខរបរ​នៅផ្ទះ​ មាន​ទីលំនៅ​បច្ចុប្បន្ន​ភូមិ​កសិកម្ម​ សង្កាត់​ស្រ​ង៉ែ​ ក្រុង​សៀមរាប​។​
២.​ឈ្មោះ​ ស្រឿង​ ធា​រី​ ហៅ​ ឃ្លូ​ ភេទ​ប្រុស​ អាយុ​ ២០​ឆ្នាំ​ មុខរបរ​ សិស្ស​ មាន​ទីលំនៅ​បច្ចុប្បន្ន​ភូមិ​កសិកម្ម​ សង្កាត់​សង្កែ​ ក្រុង​សៀមរាប​។​
៣.​ ឈ្មោះ​ វុន​ ភុង​ឃី​ ភេទ​ប្រុស​ អាយុ​ ២១​ឆ្នាំ​ មុខរបរ​សិស្ស​ មាន​ទីលំនៅ​បច្ចុប្បន្ន​ភូមិ​កសិកម្ម​ សង្កាត់​ស្រ​ង៉ែ​ ក្រុង​សៀមរាប​។​
៤.​ឈ្មោះ​ រឿ​ន​ រ៉ុ​ង​សុ​ម៉ា​លុ​ច​ ហៅ​ យុយ​ ភេទ​ប្រុស​ អាយុ​ ១៩​ឆ្នាំ​ មុខរបរ​ នៅផ្ទះ​កសិកម្ម​សង្កាត់​ស្រ​ង៉ែ​ ក្រុង​សៀមរាប​។​

ជុំវិញការឃាត់ខ្លួននេះ លោក ភឹង​ ចិ​ត្តា​រ៉េ​ត​ ស្នងការ​រង​ទទួល​ផែន​ព្រហ្មទណ្ឌ​ បានអោយ​ដឹង​ថា​ ជនសង្ស័យពាក់ព័ន្ធ​ករណី​អំពើ​ហិង្សា​ដោយ​ចេតនា​មាន​ស្ថាន​ទម្ងន់ទោស​ (​ប្រើប្រាស់​អាវុធ​ផ្សេងៗ​)​ និង​បទ​ធ្វើ​ឲ្យ​ខូចខាត​ដោយ​ចេតនា​។​

ពាក់ព័ន្ធករណីនេះ​ សមត្ថកិច្ច​រក​ឃើញ​ និង​ដកហូត​វត្ថុ​តាង​បាន​រួម​មាន​៖ កាំបិត​ខ្វែវ​គ្មាន​ដង​ ១​ដើម​ ម៉ូតូ​ចំនួន​ ២​គ្រឿង​ ជា​មធ្យោបាយ​ ម៉ាក​ហុងដា​ឌ្រី​ម​ស៊េរី​ឆ្នាំ​២០១៤​ ពណ៌​ខ្មៅ​ ពាក់​ស្លាក​លេខ​សៀមរាប​1P-5760​ និង​ម៉ាក​ហុងដា​ឌ្រី​ម​ស៊េរី​ឆ្នាំ​ 2005​ ពណ៌​ខ្មៅ​ពាក់​ស្លាក​លេខ​សៀមរាប​1L-7023​។​ ​បច្ចុប្បន្ន​ត្រូវ​បាន​កសាង​សំណុំរឿង​បញ្ជូន​ទៅ​សាលាដំបូង​ខេត្ត​ដើម្បី​អនុវត្ត​ទៅ​នីតិវិធី​បន្ត​៕SRP

ភ្នំពេញ៖លោកស សុខា កូនប្រុសរបស់សម្ដេចស ខេង រដ្ឋមន្ត្រីក្រសួងមហាផ្ទៃ បានបញ្ជាក់ថា៖វត្តមានសម្តេចក្រឡាហោម ស ខេង ទៅប្រទេសបារាំង ដើម្បីពិនិត្យសុខភាពសុទ្ធសាធ ពុំមានជួបអ្នកនយោបាយណាម្នាក់ឡើយ។

លោកស សុខា បានសរសេរសារមួយនៅលើគណនីហ្វេសប៊ុក facebook របស់លោកនៅព្រឹកនេះថា ៖សូមជម្រាបជូន សាធារណជនទាំងអស់ មេត្តាជ្រាបថា ៖ វត្តមានសម្តេចក្រឡាហោម ស ខេងទៅប្រទេសបារាំង រយៈពេល ២សប្តាហ៍ ចាប់ពីថ្ងៃទី២២ សីហា ដល់ថ្ងៃទី៥ កញ្ញា គឺជាការអញ្ជើញទៅពិនិត្យសុខភាពសុទ្ធសាធ ពុំមានការជួបជាមួយអ្នកនយោបាយណាម្នាក់ ដូចការលើកឡើងរបស់អ្នកវិភាគ ក៏ដូចជាអ្នកនយោបាយមួយចំនួនតូច នៃអតីតគណបក្សសង្គ្រោះជាតិ នោះឡើយ។

ចំពោះការលើកឡើងទាំងមិនពិត របស់អ្នកនយោបាយទាំងនោះ វាគ្រាន់តែជាការប្រឌិតឡើងដើម្បីបំភាន់មតិជាតិ និងអន្តរជាតិ សំដៅកេញចំណេញផលប្រយោជន៍នយោបាយរបស់ខ្លួន និងបក្ខពួកប៉ុណ្ណោះ ពិសេសអាចគ្រាន់តែជាសារដង្ហើយរកផ្លូវចរចានយោបាយជាមួយគណបក្សប្រជាជនកម្ពុជា ពោលគឺផ្ទុយពីអ្វីដែលថ្នាក់ដឹកនាំ ក៏ដូចជា សាធារណជន បានធ្វើ និងមើលឃើញជាក់ស្តែង។

ក្រៅពីនេះការលើកឡើងរបស់អ្នកនយោបាយមួយចំនួនតូច នៃអតីតគណបក្សសង្គ្រោះជាតិ សំដៅមុតស្រួចក្នុងន័យបំបែកបំបាក់ផ្ទៃក្នុងគណបក្សប្រជាជនកម្ពុជា ដែលជាគណបក្សតែមួយគត់ បាន និងកំពុងប្រកាន់ខ្ជាប់ខ្ជួននូវសាមគ្គីផ្ទៃក្នុងយ៉ាងរឹងមាំ ពោលគឺមិនមែនអ្នកណាម្នាក់ ឬក្រុមណាមួយ អាចបំបែកបំបាក់ផ្ទៃក្នុងបានឡើយ។

ទង្វើរបស់អ្នកនយោបាយ ដែលធ្វើគ្រាន់តែដេីម្បីមហិច្ឆតាផ្ទាល់ខ្លួនរស់ទោះអ្នកដទៃស្លាប់ក៏ដោយចុះបែបនេះ​ បានឆ្លុះបញ្ចាំងយ៉ាងច្បាស់ពីចរិកអ្នកនយោបាយគ្មានក្រមសីលធម៌វិជ្ជាជីវៈ​ ក្នុងចេតនាទុច្ចរិតដដែលៗ បំភ្លៃរឿងមិនពិត ប្រឌិតបំពុលសង្គម និងបរិយាកាសនយោបាយនៅកម្ពុជា ជាពិសេសបាននិងកំពុងតែមួលបង្កាច់ទម្លាក់កំហុសយ៉ាងពិសពុលលើសម្តេចក្រឡាហោម ស ខេង ផងដែរ។

ដូច្នេះសូមសាធារណជនទាំងអស់ កុំជឿលើការលើកឡើង នៃក្រុមអ្នកនយោបាយអាត្មានិយម ដែលក្នុងចិត្តគំនិតគិតតែពីចង់បានអំណាច​ ផលប្រយោជន៍ផ្ទាល់ខ្លួន និងបក្ខពួក ដោយមិនគិតពីផលប្រយោជន៍ជាតិរួម មិនយកការពិតជាមូលដ្ឋាន នោះឲ្យសោះ។

ក្នុងនាមអ្នកនយោបាយជំនាន់មុន​ គួរគប្បីធ្វេីជាគំរូវិជ្ជមាន​ សម្រាប់អ្នកនយោបាយជំនាន់ក្រោយរៀនសូត្រតាម​ ពិសេសបណ្ដុះមនសិការស្រឡាញ់ជាតិ​ ជ្រោមជ្រែងជាតិពិតប្រាកដ​ ចៀសវាងការធ្វេីប្រជាភិថុតិយុវជន​ ប្រជាជន៕SRP