ភ្នំពេញ៖សម្ដេច ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានមកដល់កម្ពុជាប្រកបដោយសុវត្ថិភាព ក្រោយពីទទួលការវះកាត់ដោយជោគជ័យពីវេជ្ជបណ្ឌិតបារាំង។

នេះបើយោងតាមលិខិតជូនដំណឹងរបស់ខុទ្ទកាល័យរបស់សម្ដេចស ខេង ដែលបណ្ដាញព័ត៌មាន សៀមរាបប៉ុស្តិ៍ ទទួលបាននៅមុននេះបន្តិច៕SRP

ខេត្តបាត់ដំបង៖យុវជនម្នាក់បានប្រើអំពើហិង្សា លើម្ដាយបង្កើត ដោយសំឡុតយកលុយទិញគ្រឿងញៀន ត្រូវបានចាប់ខ្លួន។

មន្ត្រីកងរាជអាវុធហត្ថខេត្តបាត់ដំបងបានបញ្ជាក់ថា ឈ្មោះ ជា គឹមឡេង អាយុ២១ ឆ្នាំ មានទីលំនៅភូមិអណ្ដូងចេញ សង្កាត់អូរចារ ក្រុងបាត់ដំបង។

មន្ត្រីអាវុធហត្ថបានបន្តថា ការឃាត់ខ្លួនយុវជននេះ តាមបណ្ដឹងឈ្មោះ លី ដាណា (ហៅវណ្ណា) ត្រូវជាម្តាយអាយុ ៤២ឆ្នាំ មុខរបរលក់ដូរមានទីលំនៅភូមិអណ្ដូងចេញ សង្កាត់អូរចារ ក្រុងបាត់ដំបង។

មន្ត្រីអាវុធហត្ថបានបញ្ជាក់បន្ថែមថា ជនសង្ស័យបានធ្វើសកម្មភាព យកកាំបិតប៉័ងតោភ្ជង់ករ និងវាយជាច្រើនដៃ ធ្វើឱ្យជនរងគ្រោះ ជាម្ដាយដួលទៅនឹងដី ហើយសំឡុតយកប្រាក់ចំនួន ២លានរៀល និងខ្សែកប្លាកទីន ០១ខ្សែ យកលក់ទៅទិញគ្រឿងញៀន។

ទោះជាយ៉ាងណា ក្រោយពីមានហេតុការណ៍ប្រើអំពើហិង្សាបែបនេះ ត្រូវបានកម្លាំងអាវុធហត្ថឃាត់ខ្លួន ពីបទហិង្សាដោយចេតនា ហើយកសាងសំណុំរឿងទៅតាមនីតិវិធី។

សូមជម្រាបថា ករណីហិង្សានេះ បានកើតឡើង នៅវេលាម៉ោង ១២ និង ៣០នាទីថ្ងៃទី០៤ ខែកញ្ញា ឆ្នាំ២០២១ នៅចំណុចផ្សារពូពុយ ស្ថិតនៅភូមិអណ្ដូងចេញ សង្កាត់អូរចារ ក្រុងបាត់ដំបង៕SRP

ភ្នំពេញ៖កម្លាំងអាវុធហត្ថទូទាំងប្រទេស បាននិងកំពុងចូលរួមយ៉ាងពេញទំហឹង ជាមួយស្ថាប័នគយដើម្បីប្រមូលថវិកាជូនជាតិ លើការអនុវត្តច្បាប់ចំពោះរថយន្ដឯកជន ដែលប្រើប្រាស់ផ្លាកលេខ ខ.ម និង ន.ប តាមបទបញ្ជា នាយករដ្ឋមន្ដ្រី ហ៊ុន សែន។

នេះបើតាមការឲ្យដឹងរបស់អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស សៅ សុខា
បានថ្លែងប្រាប់អ្នកសារព័ត៌មាន។

លោកសៅ សុខា បានលើកឡើងថា បទបញ្ជារបស់សម្ដេចហ៊ុន សែន គឺមានរួចជាស្រេចហើយ ក្នុងឱកាសពិធីអបអរសាទរខួបទី២០ នៃការបង្កើតកងទ័ពជើងគោក កាលពីពេលកន្លងទៅ ដែលសម្ដេចតេជោ បានណែនាំឲ្យមេបញ្ជាការកងកម្លាំងប្រដាប់អាវុធ ត្រូវសហការជាមួយស្ថាប័នគយ ដែលជាស្ថាប័នមួយមានតួនាទីប្រមូលចំណូលជូនជាតិ។

លោកសៅ សុខា បានបញ្ជាក់ថា បន្ទាប់ពីទទួលបានបទបញ្ជាយ៉ាងម៉ឺងម៉ាត់នេះ លោកក្នុងនាមជាមេបញ្ជាការកងរាជអាវុធហត្ថលើផ្ទៃប្រទេស ក៏បានណែនាំ និងកំពុងតាមដានបន្ដទៀត លើការអនុវត្តរបស់មន្ដ្រីអាវុធហត្ថនៅទូទាំងប្រទេស ជាមួយស្ថាប័នគយ លើការងារអនុវត្តច្បាប់ចំពោះរថយន្ដឯកជន ដែលជ្រកក្រោមផ្លាកលេខ ខ.ម និង ន.ប ដែលមិនបានបង់ពន្ធត្រឹមត្រូវ។

លោកបានលើកឡើងទៀតថា អាវុធហត្ថទាំងអស់ត្រូវតែស្គាល់ឲ្យច្បាស់អំពីតួនាទី និងភារកិច្ចរបស់ខ្លួន លើការងារអប់រំ និងការពារមន្ដ្រីអនុវត្តច្បាប់ គឺមន្ដ្រីគយតែម្ដង។ អ្វីដែលជាចំណុចសំខាន់ ត្រូវបង្ក្រាបភ្លាមៗ ក្នុងករណីមន្ដ្រីណា ឬបុគ្គលណារារាំងការអនុវត្តច្បាប់របស់មន្ដ្រីគយ លើការងារប្រមូលចំណូលនេះ។

លោកសៅ សុខា ក៏បានក្រើនរំលឹកដល់មន្ដ្រីអាវុធហត្ថទាំងអស់ មិនត្រូវភ្លេចនូវតួនាទីចូលរួមការពារសន្ដិសុខ សណ្ដាប់ធ្នាប់ និងការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោតរបស់ប្រជាពលរដ្ឋ។ បន្ថែមពីនេះ កម្លាំងអាវុធហត្ថ ក៏បានចូលរួមបង្ក្រាបបទល្មើសធំៗ មានទាំងបទល្មើសធនធានធម្មជាតិ និងការជួយសង្គ្រោះប្រជាពលរដ្ឋក្នុងគ្រោះធម្មជាតិ និងគ្រោះថ្នាក់ផ្សេងៗជាដើម។

ជាមួយគ្នានេះដែរលោកសៅ សុខា បានរំលឹកនូវពាក្យស្លោករបស់អាវុធហត្ថ គឺ «ប្រទេសត្រូវតែការពារ ប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប»។ ក្នុងករណីបុគ្គលអាវុធហត្ថណាប្រព្រឹត្តខុសត្រូវតែបង្ក្រាប និងចាត់វិធានការមុនគេ។

សូមជម្រាបថា ទីស្តីការគណៈរដ្ឋមន្ត្រី បានចេញលិខិតមួយ ជម្រាបជូនក្រសួងមហាផ្ទៃក្រសួងការពារជាតិ និងក្រសួងសេដ្ឋកិច្ចនិងហិរញ្ញវត្ថុ ដោយកម្មវត្ថុករណីសំណើសុំគោលការណ៍អនុវត្តវិធានការលើការប្រមូលពន្ធ លើមធ្យោបាយដឹកជញ្ជូននិងយានយន្តគ្រប់ប្រភេទប្រចាំឆ្នាំ ២០២១ ជាលើកចុងក្រោយ ចំពោះយានយន្តឯកជនដែលជ្រកក្រោមស្លាក ក្រសួងស្ថាប័នរដ្ឋជាពិសេស ស្លាកលេខ ខ.ម និង ន.ប ដើម្បីឲ្យម្ចាស់ចូលខ្លួនមកបំពេញកាតព្ធកិច្ចពន្ធ និងអាករនាំចូលស្របតាមច្បាប់និងបទប្បញ្ញត្តិ ស្ដីពីគយ។ លិខិតនេះចុះ ថ្ងៃទី ២ខែ កញ្ញាឆ្នាំ ២០២១ ហត្ថលេខាដោយ លោកហ៊ីង ថូរ៉ាក់ស៊ី រដ្ឋលេខាធិការប្រចាំការ៕SRP

ខេត្តសៀមរាប៖លោកគង់ សុគន្ធា មន្រ្តីបរិស្ថាន ប្រចាំឃុំខ្វាវ ខេត្តសៀមរាប បានដេកស្លាប់ក្នុងអង្រឹង។ ករណីនេះសមត្ថកិច្ចនៅមិនទាន់បញ្ជាក់មូលហេតុនៅឡើយ។

យោងតាមរបាយការណ៍ ដែលបណ្ដាញសៀមរាបប៉ុស្តិ៍ ទទួលនៅមុននេះបន្តិចបានបញ្ជាក់ថា នៅម៉ោង៥ ថ្ងៃទី០៥ ខែកញ្ញា ឆ្នាំ២០២១ នៅចំណុចអូរកំបោរ (ស្នាក់ការបរិស្ថាន ស្ថិតនៅភូមិស្រោង ឃុំខ្វាវ ស្រុកជីក្រែង មានករណីមនុស្សដេកស្លាប់ក្នុងអង្រឹងម្នាក់។

របាយការណ៍បានបញ្ជាក់ថាជនរងគ្រោះ មានឈ្មោះគង់ សុគន្ធា ជាមន្រ្តីបរិស្ថាន ភេទប្រុសអាយុ៥៣ឆ្នាំ នៅភូមិ ឃុំកេីតហេតុខាងលេី។

ការសន្និដ្ឋានរបស់សមត្ថកិច្ចបានបញ្ជាក់ថា
មូលហេតុ អាចមានជំងឺ ឡេីងឈាម អាចបណ្ដាលឲ្យគាំងបេះដូង។ ទោះជាយ៉ាងណាគ្រូពេទ្យបានពិនិត្យរកជំងឺកូវីដ១៩ គឺអវិជ្ជមាន។ សមត្ថកិច្ចបានប្រគល់សពឲ្យក្រុមគ្រួសារយកទៅធ្វេីបុណ្យតាមប្រពៃណី៕SRP

ខេត្តសៀមរាប៖សមត្ថកិច្ចស្រុកសូទ្រនិគមបានឲ្យដឹងថាបុរសម្នាក់បានលង់ទឹកស្លាប់ វេលាម៉ោង១៣និង៥០នាទី ថ្ងៃទី០៥ ខែកញ្ញា ឆ្នាំ២០២១ នៅចំណុចស្ទឹងរំដេង ក្នុងភូមិរំដេង ឃុំខ្នាពោធិ៍ ស្រុកសូទ្រនិគម ខេត្តសៀមរាប។

ជនរងគ្រោះ មានឈ្មោះក្រឹម សោម អាយុ៤៣ឆ្នាំ ទីលំនៅភូមិសំបាត ឃុំខ្នាពោធិ៍ ស្រុកសូទ្រនិគម។

សមត្ថកិច្ចស្រុកបានបន្តថាករណីនេះមូលហេតុ ជនរងគ្រោះជាមនុស្សញៀនស្រាហើយដើរគ្មានគោលដៅ ពុំសូវចូលផ្ទះនោះទេ។  បច្ចុប្បន្នគ្រូពេទ្យ បានយកសំណាក រកមេរោគកូវីដ១៩ ជាលទ្ធផល អវិជ្ជមាន។ តាមការ ធ្វើកោសលវិច័យ របស់សមត្ថកិច្ចជំនាញ ជនរងគ្រោះ ពិតជាលង់ទឹកស្លាប់ ប្រាកដមែន ពុំមានពាក់ព័ន្ធនិងបទល្មើសព្រហ្មទណ្ឌឡើយ ៕SRP

ខេត្តសៀមរាប៖អាជ្ញាធរខេត្តសៀមរាបបានរាយការណ៍ថាបានប្រទះឃើញ« M៧៩ មួយគ្រាប់ នៅមាត់ស្ទឹងសៀមរាប។ ហេតុការណ៍នៅ ថ្ងៃទី០៥ ខែកញ្ញា ឆ្នាំ២០២១ ព្រឹកមិញនេះ នៅចំណុចសួនមាត់ស្ទឹងខាងត្បូងស្ពានរ៉ោករ៉ាក ស្ថិតក្នុងភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប។

អាជ្ញាធរបានបន្តថាករណីនេះកម្មករបានកាយដី ក៏បានប្រទះឃើញគ្រាប់យុទ្ធភណ្ឌមិនទាន់ផ្ទុះ ១គ្រាប់ ប្រភេទM79 M381)USA។ បច្ចុប្បន្ន៖គ្រាប់យុទ្ធភណ្ឌមិនទាន់ផ្ទុះនេះ ត្រូវបានក្រុមការងារ មជ្ឈមណ្ឌល សកម្មភាពកំចាត់មីន កម្ពុជា យកទៅរក្សាទុកដើម្បីកម្ទេចចោល ក្រោយពីបានចុះទៅពិនិត្យដល់ទីតាំង៕SRP

ខេត្តសៀមរាប៖ស្រុកជីក្រែងបានជួបគ្រោះរាំងស្ងួត ច្រើនជាងគេ ក្នុងខែសីហា កន្លងមកនេះ បណ្ដាលអោយប៉ះពាល់ ស្រូវវស្សារបស់ប្រជាកសិករយ៉ាងច្រើនផងដែរ។

យោងតាមការណ៍របស់មន្ទីរកសិកម្ម រុក្ខាប្រមាញ់ និងនេសាទ បានឲ្យដឹងថា ការងារបង្កបង្កើនផលដំណាំ ស្រូវវស្សាឆ្នាំ២០២១នេះ បានជិត ១៩០ ពាន់ហិកតា ស្មើនឹងជិត១០០%នៃផែនការ ក៏ប៉ុន្តែនៅក្នុងអំឡុង ខែសីហានេះ គ្រោះរាំងស្ងួតបានបង្កឲ្យមានផលប៉ះពាល់លើដំណាំស្រូវទាំងនោះជិត ១៦ពាន់ហិកតា លើ៨ស្រុក ក្នុង ចំណោម១២ក្រុង-ស្រុក ស្មើនឹង៤១ឃុំ ៣២១ភូមិ ។ ក្នុងនេះដែរ ស្រុកជីក្រែងទទួលរងផលពាល់ច្រើនជាងគេស្មើនឹង ៦ពាន់៦០០ហិកតា លើផ្ទៃដីអនុវត្តបានជិត ៣៧ ពាន់ហិកតា ក្នុងនេះស្រូវស្រាលទំហំជិត ៣ ពាន់ហិកតា ត្រូវទទួលការ ខូចខាត ប្រជាកសិករប្រហែល ៣ ពាន់គ្រួសារ រស់នៅលើ១២ឃុំ ១៣៣ភូមិ បានទទួលរងនូវការខូចខាតនេះ។

របាយការណ៍បានបន្តថា ក្នុងអំឡុងដើមខែកញ្ញានេះ ខេត្តសៀមរាប មានភ្លៀងធ្លាក់ជាបន្តបន្ទាប់ ស្ថានភាពបែបនេះ នៅតែមានបន្តទៀត ស្រូវស្រែជិត ១៦ ពាន់ហិកតា នឹងត្រូវបានងើបចេញពីផលប៉ះពាល់ ហើយផ្ទៃដីស្រូវ ស្រាលដែលខូចខាតនៅស្រុកជីក្រែង ជិត ៣ ពាន់ហិកតា អាចនឹងមានលទ្ធភាព ស្តារដោយការសាបព្រួសឡើងវិញ ប្រហែលជាជិត ២ពាន់៣០០ហិកតា។ ការត្រៀមលក្ខណៈ ស្តារដំណាំស្រូវវស្សាចេញពីការខូចខាតសម្រាប់ឆ្នាំ២០២១នេះ ក្រសួងកសិកម្ម រុក្ខាប្រមាញ់ និងនេសាទ បានផ្តល់ស្រូវពូជសម្រាប់ខេត្តសៀមរាប ប្រមាណជា ២ពាន់តោនផងដែរ។

ប្រធានមន្ទីរធនធានទឹក និងឧត្តុនិយមខេត្តសៀមរាប លោក នួន ច័ន្ទគ្រឹះស្នា បានឲ្យដឹងថា អាងទឹកទំនប់ម្កាក់ អាចស្តុកទឹកបានប្រមាណជា ២០លានម៉ែត្រត្រីគុណ ដែលមានវិសាលភាពគ្របដណ្តប់ចំនួន៩ឃុំ លើ១២ឃុំ របស់ស្រុកជីក្រែង និងមានសមត្ថភាពស្រោចស្រពលើផ្ទៃដីស្រែប្រមាណ ២៥ ពាន់ហិកតា។ ឆ្នាំនេះប្រជាកសិករ បង្កបង្កើនផលស្រូវប្រាំងជាង ១ម៉ឺនហិកតា និង ធ្វើស្រែវស្សាជាង៣ម៉ឺនហិកតា ដែលទំហំចែកចាយនេះ វាលើសពីសមត្ថភាព របស់អាងស្តុក រួមទាំងមានជួបប្រទះគ្រោះរាំងស្ងួតបន្ថែមទៀត ទើបបញ្ហាផលប៉ះពាល់ស្រូវកណ្តាល-ស្រូវធ្ងន់ និង ការខូច ខាតផលស្រូវស្រាលត្រូវបានកើតឡើង។

លោកបានបន្តទៀតថា ១សប្តាហ៍ចុងក្រោយនេះ កម្ពស់ទឹកអាងម្កាក់ បានឡើងលើកូដបាតទ្វារទឹកប្រមាណ ៨៥០មីល្លីម៉ែត្រ និង សង្ឃឹមថា កម្ពស់ទឹកនេះនឹងបន្តមានកំណើនបន្ថែមទៀត សម្រាប់ការជួយសង្គ្រោះផលប៉ះពាល់។

ពាក់ព័ន្ធករណីនេះ លោកទៀ សីហា អភិបាលខេត្តសៀមរាប បានថ្លែងជំរុញឲ្យមន្រ្តីជំនាញ ប្រើប្រាស់ឲ្យអស់លទ្ធភាព អាងទឹកធារាសាស្រ្ត ទំនប់ម្កាក់ ដែលមានវិសាលភាពគ្របដណ្តប់ ទៅលើ៩ឃុំ នៃស្រុកជីក្រែង ជាពិសេសគឺការគ្រប់គ្រងចែកចាយទឹកដល់ សហគមន៍ ប្រកបដោយតម្លាភាព។ លោកថាវាមិនគួរឲ្យកើតមាននៅក្នុងតំបន់ដែលមានទំនប់ធារាសាស្ត្រនោះឡើយ។

អភិបាលខេត្តថ្លែងជំរុញបែបនេះក្នុងដំណើរបំពេញការងារចុះពិនិត្យមើលស្ថានភាពទឹក នៅអាងធារាសាស្រ្ត ទំនប់ទ្វារទឹកម្កាក់ ឃុំគោកធ្លកលើ ស្រុក ជីក្រែង នៅថ្ងៃទី០៤ ខែ កញ្ញា ម្សិលមិញ៕SRP

ខេត្តបាត់ដំបង៖លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានណែនាំដល់ម្ចាស់រមណីយដ្ឋានទាំងអស់ ត្រូវអនុវត្តឱ្យបានម៉ឹងម៉ាត់ទាំង៧ចំណុចរបស់ក្រសួងទេសចរណ៍ដូចខាងក្រោម៖

១/ត្រូវកែតម្រូវសម្បទាអាជីវកម្មរបស់ខ្លូនឱ្យស្របតាមនឹងលក្ខខណ្ឌតម្រូវ និងចំណុចណែនាំដូចកំណត់ក្នុងខ្លឹមសារប្រកាសលេខ០៨៥ ប្រក

២/ត្រូវគិតគូរពីសុវត្ថិភាពភ្ញៀវ សុវត្ថិភាពបុគ្គលិក និងសុវត្ថិភាពសង្គមជាតិជាអាទិភាពចំពោះមុខ និងជំរុញការគ្រប់គ្រង និងអភិវឌ្ឍរមណីយដ្ឋានក្នុងបរិបទ “គន្លងប្រក្រតីភាពថ្មី”

៣/ត្រូវកំណត់សមត្ថភាពផ្ទុកអតិបរមា ដែលអាចទទួលភ្ញៀវក្នុងពេលតែមួយអនុលោមតាមស្តង់ដាគម្លាតសុវត្ថិភាព

៤/ត្រូវអនុវត្តវិធានសុខាភិបាល និងវិធានសុវត្ថិភាពទេសចរណ៍ ជាពិសេសវិធានការ “៣ការពារ ៣កុំ”

៥/ត្រូវចូលរួមផ្សព្វផ្សាយរាល់វិធានការនានាដែលបានដាក់ចេញដោយរដ្ឋាភិបាល និងក្រសួងស្ថាប័នមានសមត្ថកិច្ចសំដៅបង្ការ និងទប់ស្កាត់ការរីករាលដាលជំងឺកូវីដ១៩

៦/ត្រូវអនុវត្ត និងប្រើប្រាស់ឱ្យបានត្រឹមត្រូវនូវការស្កេន QR Code ទប់ស្តាត់កូវីដ១៩

៧/ជម្រុញការចូលរួមរបស់រមណីយដ្ឋានទេសចរណ៍ ជាមួយរាជរដ្ឋាភិបាល ក្នុងការអនុវត្តនូវគោលនយោបាយ នានាតាមរយៈការដាក់ចេញនូវយុទ្ធសាស្រ្ត និងសកម្មភាពជាក់ស្តែងតែម្តង។

ការណែនាំនៅថ្ងៃទី៣និងទី៤ខែកញ្ញា ឆ្នាំ២០២១ ក្នុងពេលលោកដឹកនាំមន្ត្រីចុះផ្សព្វផ្សាយ និងដល់ម្ចាស់រមណីយដ្ឋាន និងអ្នកគ្រប់គ្រងរមណីយដ្ឋានទេសចរណ៍ទាំងអស់ស្តីពី បទដ្ឋានគតិយុត្តដាក់ឲ្យអនុវត្តបច្ចុប្បន្នភាពវិធានសុវត្ថិភាពទេសចរណ៍ និងនីតិវិធីស្តង់ដាអប្បបរមា (SOP) សម្រាប់រមណីយដ្ឋានទេសចរណ៍ និងប្រកាសលេខ ០៨៥ ប្រក ចុះថ្ងៃទី៣១ ខែសីហា ឆ្នាំ២០២១ របស់ក្រសួងទេសចរណ៍ ដើម្បីត្រៀមទទួលភ្ញៀវទេសចរឡើងវិញ។

សូមជម្រាបថាវិធានសុវត្ថិភាពនេះ មានចំណុចលំអិតចំនួន ៣០ ត្រូវវាយតម្លែស្នើនឹង ៣០០ ពិន្ទុ ចំពោះរមណីយដ្ឋានដែលទទួលបានពិន្ទុចាប់ពី ៩០ % ឡើងទៅនឹងទទួលបានលិខិតបញ្ជាក់ជូន ដែលមានសុពលភាព១ឆ្នាំផងដែរ៕SRP

ខេត្តត្បូងឃ្មុំ៖លោក ឌី វិជ្ជា និងលោក ស្រី ហ៊ុន ម៉ាណា បានឲ្យលោក ជិន ប៊ុន ធឿន តំណាងនិងក្រុមការងារមនុស្សធម៌ នៅថ្ងៃទី ០៤ ខែកញ្ញា ឆ្នាំ២០២១នេះនាំយកអំណោយមួយចំនួន ទៅប្រគល់ជូនលោកយាយ លោកតា ទុរគតជនពីរនាក់បងប្អូន
ដើម្បីដោះស្រាយជីវភាព ប្រចាំថ្ងៃរបស់គាត់បានមួយរយៈ។

ការផ្ដល់អំណោយពីសំណាក់លោកឌី វិជ្ជា និងលោកស្រី ហ៊ុនម៉ាណា ក្រោយពីបានទទួលដំណឹងអំពីការខ្វះខាតរបស់ទុរគតជនពីរនាក់បងប្អូនដែលរស់នៅក្នុងភូមិជួរកណ្តាល​ ឃុំកោះពី​ ស្រុកក្រូចឆ្មា​ ខេត្តត្បូងឃ្មុំ​ គឺលោកតា ដូង ញ័រ មានអាយុ ៧៩ឆ្នាំ​ និងយាយ​ ដូង​ ត្រាវ​ អាយុ៦៩ឆ្នាំ​។

អំណោយដែលប្រគល់ជូនគាត់ទាំងពីរនាក់នូវពេលនេះមានសម្ភារៈផ្ទះទេវតា ០១ ឈុតធំមានដូចជា:
១-អង្ករ ១០០គីឡូ
២-ទឹកដោះគោខាប់ ចំនួន៤៨កំប៉ុង
៣-វិទ្យុស្តាប់ ០១ គ្រឿង
៤-ស្ករសចំនួន ៥គីឡូ
៥-ប្រេងកូឡាចំនួន ០១ ប្រអប់ធំ
៦-ប្រេងខ្យល់ចំនួន ០១ ប្រអប់ធំ
៧-តែ ១០កញ្ចប់តូច
៨-មី ចំនួន ០៥កេសតូច
៩-ត្រីខ ចំនួន ១០០កំប៉ុង
១០-កន្ទេល ០២
១១-ខ្នើយ ០២
១២-ម៉ុង ០២
១៣-ភួយ ០២
១៤-ពូក ០១
១៥-ស្បែកជើង ០១គូរ
១៦-ទឹកស៊ីអុីវ ០៣យួរ
១៧-ឆ្នាំងបាយ ០២
១៨-កំសៀវទឹក ០១
១៩-កាធុនទឹកដែក ០១
២០-ខ្ទះឆា ០១
២១-ស្លាបព្រា និង សម ០១ ឈុត
២២-វែកបាយ ០១
២៣-ច្រាសដុសធ្មេញ ០៥ឈុត
២៤-សាប៊ូ ១២ដុំ
២៥-ថវិកាចំនួន ៥០ម៉ឺនរៀល។

សូមបញ្ជាក់ផងដែរថាៈ យាយតាជាបងប្អូនបង្កេីតនឹងគ្នា​ ហហេីយក៏នៅលីវទាំងពីរនាក់ ដែលពួកគាត់កំពុងរស់នៅលេីផ្ទះខ្ទមចាស់ទ្រុឌទ្រោមមួយដែលជាកេរ្តិ៍សល់ពីឪពុកម្តាយ​។ សព្វថ្ងៃលោកទាំងពីរមានមុខរបរជាកម្មករសុីឈ្នួលកាច់ថ្នាំជក់បានប្រាក់កំរ៉ៃសម្រាប់ចិញ្ចឹមជីវិត​។ ហើយជីវភាពរស់នៅសព្វថ្ងៃនេះ​ មួយផ្នែកទៀតបានអ្នកភូមិជិតខាង​ និងអាជ្ញាធរដែនដីជួយទំនុកបម្រុងជាស្បៀងអាហារខ្លះៗផងដែរ៕SRP

ខេត្តបាត់ដំបង៖ប្រជាពលរដ្ឋមានបញ្ហាក្នុងជីវភាព និងរងផលប៉ះពាល់ដោយជំងឺកូវីដ-១៩ ចំនួន៤៣០គ្រួសារ រស់នៅស្រុកកំរៀង ស្រុកភ្នំព្រឹក និងស្រុកសំពៅលូន ខេត្តបាត់ដំបង ទទួលបានអំណោយរបស់សម្ដេចស ខេង អ្នកតំណាងរាស្ត្រ និងជាប្រធានក្រុមការងារចុះជួយខេត្តបាត់ដំបង និងលោកជំទាវ ញ៉ែម សាខន ស ខេង។

ប្រជាពលរដ្ឋដែលបានទទួលអំណោយនៅថ្ងៃសុក្រ ទី៣ និងថ្ងៃទីសៅរ៍ ទី៤ ខែកញ្ញា ឆ្នាំ២០២១នេះ តាមរយៈក្រុមការងារក្រឡាហោមមនុស្សធម៌។

អំណោយសម្តេចស ខេង និងលោកជំទាវ ដែលបានផ្ដល់ជូនប្រជាពលរដ្ឋនាឱកាសនោះ រួមមានអង្ករ មី ត្រីខ ទឹកស៊ីអ៉ីវ ទឹកត្រី ទឹកសុទ្ធម៉ាស និងអាកុលមួយចំនួន៕SRP

ខេត្តសៀមរាប៖គ្រួសារកូនភ្លោះចំនួន៣នាក់ បានទទួលអំណោយដ៏ថ្លៃថ្លារបស់សម្ដេច ហ៊ុន សែន នាយករដ្ឋមន្ត្រី និងភរិយា។

លោក គុជ លីណា សមាជិកក្រុមប្រឹក្សាខេត្ត និងលោកជំទាវ តំណាងលោក សេង ទៀង ជំនួយការផ្ទាល់សម្ដេច ហ៊ុន សែន នៅថ្ងៃទី៤ ខែកញ្ញា ឆ្នាំ ២០២១ នេះបាននាំយកថវិកាចំនួន ៥ លានរៀល អង្គរចំនួន៥០គីឡូក្រាម .ទឹកដោះគោ២កេស. ស្ករស៥គីឡូក្រោម. ក្រម៉ា២ សារ៉ុង២ របស់សម្តេចតេជោ ជូនដល់ ក្រុមគ្រួសារប្រសូត្របានទារកភ្លោះបីនាក់។

គ្រួសារកូនភ្លោះនេះ មានម្តាយឈ្មោះ សុខ សៅ អាយុ ៣៣ឆ្នាំ មុខរបរកសិករ និងឪពុកឈ្មោះ ចិន ទ្រា អាយុ ៣០ ឆ្នាំ មុខរបរកសិករ រស់នៅ ភូមិគោគធ្លក ឃុំកណ្តែក  ស្រុកប្រាសាទបាគង ខេត្តសៀមរាប ដែលម្តាយបានសម្រាលធម្មជាតិកូនភ្លោះ៣នៅ មន្ទីរពេទ្យជ័យវរ្ម័នទី៧ នៅថ្ងៃទី២៩ ខែ សីហា ឆ្នាំ២០២១ នៅម៉ោង ១០ នឹង ៤០នាទីព្រឹក។

១.កូនទី១  អាយុ២០នាទី ភេទប្រុស ថ្ងៃខែឆ្នំាកំណើត ២៩ខែសីហាឆ្នាំ២០ ២១ ទង្ងន់២ គីឡូក្រាម។

២.កូនទី២  អាយុ២០នាទី ភេទប្រុស ថ្ងៃខែឆ្នំាកំណើត ២៩ ខែសីហា ឆ្នាំ២០២១ ទង្ងន់២ គីឡូក្រាម។

៣.កូនទី៣ អាយុ ២០នាទី ភេទប្រុស ថ្ងៃខែឆ្នំាកំណើត ២៩ខែសីហាឆ្នាំ ២០២១ , ទង្ងន់ ១,៧ គីឡូក្រាម៕SRP

ខេត្តកំពង់ធំ៖ដេប៉ូលក់ប្រេងឥន្ធនៈ មិនគ្រប់លីតចំនួន២កន្លែង ត្រូវបានមន្ត្រីផ្អាកសកម្មភាព។

ការចុះត្រួតពិនិត្យនឹងបិទផ្អាកសកម្មភាពការលក់ដូរចែកចាយដេប៉ូប្រេងឥន្ធនៈ ដែលលក់មិនគ្រប់លីតចំនួន២បន្លែង ក្រោយពេល បានពិនិត្យចាប់ពីថ្ងៃទី២ និងថ្ងៃទី៣ ខែកញ្ញា ឆ្នាំ២០២១ ដោយអគ្គនាយកដ្ឋានបង្រា្កបការក្លែងបន្លំដឹកនាំដោយលោក លៀង សុភា ប្រធានសាខាកាំកុងត្រូលខេត្តកំពង់ធំ សហការជាមួយមន្ទីរពាណិជ្ជកម្មខេត្តកំពង់ធំ ក្រោមការសម្របសម្រួលដោយអយ្យការអមសាលាដំបូងខេត្តកំពង់ធំ។

ប្រភពព័ត៌មានបានឲ្យដឹងថា ដេប៉ូលក់ប្រេងឥន្ធនៈចំនួនពីរដែលត្រូវបានបិទ ទី១. ដេប៉ូតេលា (DEPOT TELA)“ហេង សុធី” ស្ថិតនៅតាមបណ្តោយផ្លូវជាតិលេខ៦ ក្នុងបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ទី២. ដេប៉ូដេលា Depot TELA “ថន ចេងប៊ុនម៉ា” ស្ថិតនៅភូមិបែកចាន ឃុំទួលគ្រើស ស្រុកតាំងគោក ខេត្តកំពង់ធំ ស្ថិតនៅតាមបណ្តោយផ្លូវជាតិលេខ៦ ត្រង់ចំណុចទល់មុខផ្លូវបត់ទៅភូមិជីវភាព ឃុំអណ្តោងពោធិ៍ ស្រុកតាំងគោក ខេត្តកំពង់ធំ ដើម្បីធ្វើការផាកពិន័យតាមច្បាប់ និងតម្រូវឲ្យធ្វើការកែសម្រួលឲ្យបានត្រឹមត្រូវនូវរង្វាស់រង្វាល់តាមមាត្រាសាស្រ្ត (កែវក្រឹត្រ) ឡើងវិញ។

ជុំវិញករណីនេះ ប្រជាពលរដ្ឋ ដែលបានឃើញហេតុការណ៍នេះ ក៏បានសំណូមពរដល់អស់លោកខាងមន្ត្រីជំនាញ ក៏ដូចជាក្រសួងពាណិជ្ជកម្ម ធ្វើយ៉ាងដាក់ទោសទ័ណ្ឌឲ្យបានតឹងរឹងបំផុតចំពោះក្រុមជនខិលខូច ដែលតែងតែរកស៊ីគេងប្រវ័ញ្ញជញ្ជក់ឈាមរាស្រ្ត តាមរយៈនៃការលក់ប្រេងមិនគ្រប់លីត្រ និងប្រេងគ្មានគុណភាព ប្រេងមិនមែនស៊ុបពែ ដាក់ថាស៊ុបពែ ហើយលក់តម្លៃថ្លៃ ដែលជាហេតុនាំឲ្យពួកគេរកស៊ីមានបានកប់ពពកតាមរបៀបដ៏ថោកទាបនេះ ដោយមិនខ្វល់ពីទុក្ខលំបាក របស់ប្រជាពលរដ្ឋនោះឡើយ៕SRP