ខេត្តកោះកុង៖លោកឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ឱ្យកសិករពង្រីកការចិញ្ចឹមត្រី ឱ្យបានកាន់តែច្រើនថែមទៀត ហើយរដ្ឋបាលជលផល គួរសិក្សាពីលទ្ធភាពយកពូជត្រីពីមជ្ឈមណ្ឌលស្រាវជ្រាវ និងអភិវឌ្ឍវារីវប្បកម្មសមុទ្រ នៅខេត្តព្រះសីហនុមកបំប៉ននៅកសិដ្ឋាននេះ។

លោកក៏បានណែនាំមន្រ្តីជំនាញឱ្យបន្តគាំទ្របច្ចេកទេស និងធ្វើផលិតកម្មតាមតម្រូវការទីផ្សារដើម្បីផ្សព្វផ្សាយពូជត្រីក្នុងស្រុក និងលក់ចែកចាយដល់អ្នកចិញ្ចឹមត្រីផ្សេងទៀតផងដែរ។

លោក បញ្ជាក់បែបនេះ ក្នុងឱកាស បានចុះពិនិត្យកសិដ្ឋានចិញ្ចឹមត្រីឆ្ពុង និងត្រីតុកែ មួយកន្លែងនៅឃុំប៉ាក់ខ្លង ស្រុកមណ្ឌលសីមា ខេត្តកោះកុង នៅថ្ងៃសៅរ៍ ម្សិលមិញ។

បើតាមលោក ឆេង ឈុន និងជាប្រធានបណ្តុំអាជីវកម្ម នៅឃុំប៉ាក់ខ្លង ស្រុកមណ្ឌលសីមា ខេត្តកោះកុង បានអនុវត្តការចិញ្ចឹមត្រីក្នុងបែ និងស្រះតាំងពីឆ្នាំ២០០២ មក ហើយបច្ចុប្បន្ន លោកទទួលបានការគាំទ្រ បន្ថែមពីកម្មវិធីASPIRE បានធ្វើឲ្យអាជីវកម្មរបស់គាត់កាន់តែរីកចម្រើនបន្ថែមទៀត៕SRP

ខេត្តកែប៖ប្រជាពលរដ្ឋនៅក្នុងភូមិដំណាក់ចំបក់ សង្កាត់អូក្រសារ ក្រុងកែប ខេត្តកែប បានឲ្យដឹងថា ដីព្រៃកោងកាង និងព្រៃលិចទឹក ជាជម្រកត្រីពង នៅចំណុចខាងលើនេះ ច្រើនហិកតា ត្រូវអ្នកមានលុយ ម្នាក់ធ្វើសកម្មភាព ទន្ទ្រានកាន់កាប់មិនទាន់ដឹងថា មានច្បាប់ឬអត់ច្បាប់យ៉ាងណានោះទេ។ ប៉ុន្តែនេះ មន្ត្រីអាជ្ញាធរ សង្កាត់អូក្រសារ ក៏ដូចជាមន្ត្រីអាជ្ញាធរ ក្រុងកែប ព្រមទាំងប្រធាន មន្ទីរកសិកម្មនៅខេត្តកែប នៅមិនទាន់ចាត់វិធានការទៅលើ​ក្រុមអ្នកធ្វើសកម្មភាព ទន្ទ្រានកាន់កាប់ដីព្រៃកោងកាង ដីព្រៃលិចទឹក យកធ្វើជាកម្មសិទ្ធិ នៅតំបន់ខាងលើនៅឡើយទេ។ ហេតុនេះហើយទើបប្រជាពលរដ្ឋលើកឡើងថា សង្ស័យមានការឃុបឃិតជាប្រព័ន្ធទើបសកម្មភាពទន្ទ្រានកាន់កាប់ដីព្រៃលិចទឹកនិងព្រៃកោងកាង នៅសង្កាត់អូរក្រសារ ក្រុងកែប  អាចប្រព្រឹត្តទៅយ៉ាងរលូន ដោយគ្មានការទប់ស្កាត់បែបនេះ។

ករណីនេះប្រជាពលរដ្ឋក្នុងសង្កាត់ អូរក្រសាបានអំពាវនាវឲ្យ អភិបាលខេត្តកែប ព្រមទាំងប្រធានមន្ទីរពាក់ ព័ន្ធក្នុងខេត្តកែប មេត្តាចាត់វិធានការទប់ស្កាត់ សកម្មភាពទន្ទ្រាន កាន់កាប់ដីព្រៃកោងកាង និងព្រៃលិចទឹក តាមតាមដងព្រែក  ជាបន្ទាន់ប្រកបដោយប្រសិទ្ធភាពពិតប្រាកដ។ ដោយហេតុថា​ មួយរយៈកន្លងទៅនេះ ដីព្រៃកោងកាង និងព្រៃលិចទឹកជាច្រើនហិកតា​ ត្រូវវិនាសហិនហោចស្ទើរអស់ហើយ បែជាលោកចៅសង្កាត់ អូរ ក្រសារ និង លោកអភិបាលក្រុង បែរជារក្សាភាពស្ងៀមស្ងាត់ទៅវិញ។

ប្រជាពលរដ្ឋ ក៏ដូចជាមន្ត្រីរាជការរស់នៅខេត្តកែប សូមសំណូមពរទៅដល់ លោក ឌិតទីណា រដ្ឋម ន្ត្រីក្រសួងកសិកម្មរុក្ខាប្រមាញ់ និងនេសាទ មេត្តាជួយដាក់មន្ត្រីចុះ មកស៊ើបអង្កេត បញ្ហាការកាប់ទន្ទ្រានដីព្រៃលិចទឹក នៅចំណុចភូមិឃុំខាង លើនេះផង៕SRP

ខេត្តសៀមរាប៖តៃឡានហាយលែនឌើរបានស្លាប់ខណ­​: បើករថយន្តទៅបុកត្រាក់ទ័រចំពីក្រោយពេញទំហឹង។

ហេតុការណ៍បានកើតឡើងនៅថ្ងៃទី២៧ ខែវិច្ឆិកា ឆ្នាំ២០២២ វេលាម៉ោង០២និង៤៥នាទី ព្រឹកនៅលើផ្លូវជាតិលេខ៦៨ ចន្លោះបង្គោលគីឡូម៉ែត្រលេខ(31-32) ស្ថិតនៅឃុំជ្រោយនាងងួន ស្រុកស្រីស្នំ ខេត្តសៀមរាប។

សមត្ថកិច្ចមូលដ្ឋានបានឲ្យដឹងថាគ្រោះថ្នាក់ចរាចណ៍នេះរវាងត្រាក់ទ័រដឹកម៉ាស៊ីនច្រូតស្រូវនិងរថយន្ត ក្នុងទិសដៅស្របទិសពីខាងត្បូងទៅទិសខាងជើង។ ត្រាក់ទ័រម៉ាកៈkubotaM-6040 ពណ៌ក្រហម ស៊េរី2012(គ្មានផ្លាកលេខ)។ បើកបរដោយឈ្មោះ សាញ់ ហុងចេង ភេទប្រុសអាយុ៣៦ឆ្នាំ មុខរបរធ្វើស្រែ។ ទីលំនៅបច្ចុប្បន្នៈផ្ទះលេខ០១៤ ក្រុមទី២ ភូមិសង្កែមានជ័យឃុំកំពង់ក្ដី ស្រុកជីក្រែង ខេត្តសៀមរាប (គ្មានរបួស)។ អ្នករួមដំណើរម្នាក់ឈ្មោះរឿន សុផល ភេទប្រុសអាយុ២៦ឆ្នាំ មុខរបរបើកបរម៉ាស៊ីនច្រូតស្រូវ ទីលំនៅបច្ចុប្បន្ន ភូមិស្វាយព្រៃ ឃុំល្វាស្រុកបរវេល ខេត្តបាត់ដំបង (គ្មានរបួស)។

ចំណែករថយន្តម៉ាក TOYOTA HiLANDER ពណ៌បៃតង ស៊េរី ២០០៣ពាក់ផ្លាកលេខ ព្រះវិហារ2A-4849 បើកបរដោយឈ្មោះ លី ពិសិដ្ឋភេទប្រុសអាយុ២៤ឆ្នាំ -ទីលំនៅបច្ចុប្បន្នភូមិ ប្រជាធម្មលិចសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បើកបរមានទិសដៅពីត្បូង ទៅជើង បុកត្រាក់ទ័រពីក្រោយបណ្តាលឲ្យស្លាប់នៅកន្លែង។ ករណីនេះបណ្ដាលឲ្យមានការខូចខាត ត្រាក់ទ័រ១គ្រឿងស្រាល និងរថយន្ត១គ្រឿងធ្ងន់ផងដែរ៕SRP

ខេត្តពោធិ៍សាត់៖ប្រជាពលរដ្ឋ បានប្ដឹងលោក កែវ សារិ អធិការនគរបាលក្រុងពោធិ៍សាត់ និងសហការី ករណីប្រើអំពើហិង្សាបង្ករបួសស្នាម។

ពាក្យបណ្ដឹងដែលដាក់ចូលស្នងការដ្ឋាននគរបាលខេត្តពោធិ៍សាត់ នៅថ្ងៃទី២៣ ខែវិច្ឆិកាឆ្នាំ២០២២ បានឲ្យដឹងថា ឈ្មោះប្លុង មករា និងសន ពុធសុធាវឌ្ឍ ជម្រាបជូនលោកឧត្តមសេនីយ៍ទោស្នងការនគរបាលខេត្តពោធិ៍សាត់ ឲ្យ បានជ្រាបថា៖ កាលពីរាត្រីថ្ងៃទី៨ ខែវិច្ឆិកា ឆ្នាំ២០២២ វេលាម៉ោង១១ និង៣០នាទីយប់ ដែលជាថ្ងៃនៃពិធីបុណ្យអុំទូក អកអំបុក សំពះព្រះខែ យើងខ្ញុំជិះម៉ូតូ១គ្រឿងមានគ្នា៣ នាក់សំដៅទៅទិញបង្អែម ជូនម្ដាយឪពុកដែលនៅឯផ្ទះ។ ប៉ុន្តែមិនទាន់ដល់គោលដៅទេ ប្រពន្ធរបស់ ប្លុង មករា បានទូរស័ព្ទមក ហើយពេលនេះ ប្លុង មករា ក៏បានលើកទូរស័ព្ទ ដោយឈប់ម៉ូតូអែបទៀត ត្រង់ចំណុចសួនច្បារថ្មីជិតស្ពានថ្ម ផ្លូវជាតិលេខ៥ ទីរួមខេត្តពោធិ៍សាត់។ ស្រាប់តែពេលនោះ មានសមត្ថកិច្ច៥នាក់ ដើរមករកពួក គេទាំង៣នាក់ ហើយបញ្ជាឲ្យចុះពីលើម៉ូតូសុំឆែកឆេរ។ ពេលនោះពួកគេទាំង៣នាក់ បានចុះពីលើម៉ូតូឲ្យសមត្ថកិច្ចឆែកឆេរ។ នៅក្នុងពេលឆែកនោះ ពុំមានរកឃើញអ្វីទេ។ ដោយនៅក្នុងកែបម៉ូតូមានតែកាបូបលុយ១ និងខ្សែសាកទូរស័ព្ទ១ប៉ុណ្ណោះ។ ពេលនោះសមត្ថកិច្ចបានសួរជនរងគ្រោះ ទាំងបីនាក់ថា ម្ដេចបានអត់សហការជាមួយ សមត្ថកិច្ច? ពេលនោះប្លុង មករា ឆ្លើយថា ខ្ញុំសហការ ហើយតើបង! បងសុំឆែកឆេរម៉ូតូ ខ្ញុំឲ្យបងឆែកហើយ។

ពាក្យបណ្ដឹង បានសរសេរទៀតថា ពេលនោះសមត្ថកិច្ច បានមើលមុខ ឈ្មោះប្លុង មករា មើលលើ មើលក្រោម ដោយនិយាយថា ពួកឯងមានភិនភាគ ដូចពួកអាកាប់គេយប់មិញ? ពេលនោះ ប្លុង មករា តបទៅវិញថា ខ្ញុំអត់ដឹង អីទេបង ខ្ញុំមិនដែលមានរឿងជា មួយនរណាទេ។ ស្រាប់ តែពេលនោះ សមត្ថកិច្ច បានវាយឈ្មោះប្លុង មករា មួយដៃហើយមួយដៃទៀត។ ហើយប្លុង មករា បានលើកដៃរង ដោយសួរថា បង ខ្ញុំខុសអីបានជាបងវ៉ៃខ្ញុំ? ស្រាប់តែពេលនោះសហការី នៃកម្លាំងសមត្ថកិច្ច ម្នាក់ ឈ្មោះសំណាង បានស្ទុះមកក្រៀកក ឈ្មោះប្លុង មករា បោកផ្ដួលទៅលើដី ហើយនគរបាល២នាក់ទៀតមកព្រួតវាយឈ្មោះ ប្លុង មករា បណ្ដាលឲ្យរងរបួសយ៉ាងដំណំ។

ពាក្យបណ្ដឹងបានសរសេរទៀតថា បន្ទាប់មកអ្នករួមដំណើរជាមួយ ប្លុង មករា គឺឈ្មោះសន ពុទ្ធសុធាវឌ្ឍ ឃើញហេតុការណ៍បែបនេះក៏ទាញទូរស័ព្ទមកថត។ ប៉ុន្តែមិនទាន់បានថតផង ក្រុមសមត្ថកិច្ចទាំងនោះ ស្ទុះទៅវាយឈ្មោះ សុធាវឌ្ឍ បណ្ដាលឲ្យរបួសនិងបានស្រែកថា អ្ហែងអ្នកកាសែតមែនឬ? ហើយអ្នកសារព័ត៌មានឬបានជាថត? ហើយក៏បន្តទៅវាយអ្នករួមដំណើរម្នាក់ ទៀតឈ្មោះដាប សុភ័ក្រ។

ពេលវាយរួចហើយ ក៏បាននាំឡើងរថយន្តសមត្ថកិច្ច ដើម្បីទៅកន្លែងរបស់ពួកគេ។ នៅពេលទៅដល់កន្លែង នគរបាលហើយសមត្ថកិច្ច បានប្រើអំពើហិង្សា ទៅលើអ្នករួមដំណើរជាមួយទាំងពីរនាក់នោះបន្ថែមទៀត ហើយបន្ទាប់មក ក៏ឲ្យពួកគេទាំងបីនាក់ ទៅដេកនៅក្នុងបន្ទប់ឃុំឃាំង ដោយប្រាប់ថា ចាំស្អែកទើបដោះស្រាយ។

លុះថ្ងៃទី៩ ខែវិច្ឆិកា ឆ្នាំ២០២២ វេលាម៉ោង ១០និង ៣០នាទីព្រឹក ទើបចាក់សោទ្វារ ឲ្យជនរងគ្រោះទាំងបីនាក់ ធ្វើកិច្ចសន្យាមួយច្បាប់។ នៅលើក្រដាសកិច្ចសន្យានោះ បានសរសេរថា ជាករណីក្មេងទំនើង,ប្រើពាក្យសម្ដីមិនគួរសមជាមួយសមត្ថកិច្ច និងថាមិនសហការ ជាមួយសមត្ថកិច្ច ពេលសមត្ថកិច្ចចុះប្រតិបត្តិការ។

ពេលនោះ ជនរងគ្រោះទាំងបីនាក់ មិនព្រមផ្តិតមេដៃលើកិច្ចសន្យានោះទេ។ លុះរសៀលម៉ោង៣ ទើបមន្ត្រីនគរបាល ដែលធ្វើកិច្ចសន្យាបានមកសម្របសម្រួល នៅកន្លែងអធិការរដ្ឋាននគរបាលក្រុងពោធិ៍សាត់ នោះ ដោយនិយាយថា៖ ពួកឯងព្រមធ្វើកិច្ចសន្យាទៅ ឆាប់បានចេញ ទៅផ្ទះ។ ពេលនោះពួកជនរងគ្រោះបានសួរថា បើខ្ញុំព្រមផ្តិតមេដៃ តើខ្ញុំអាចប្ដឹង លោកអធិការនិងបក្សពួក ដែលបានប្រើអំពើហិង្សា លើខ្ញុំបានដែរឬទេ? ពេលនោះមន្ត្រីធ្វើកិច្ចសន្យាបាននិយាយថា បាន ! កិច្ចសន្យានេះគ្រាន់ តែធ្វើឲ្យតែបានចេញពីកន្លែងនេះទេ។ សំខាន់ឲ្យតែពួកឯងបានចេញពីកន្លែងនឹងសិនទៅ។

ដោយហេតុនេះទើប ជនរងគ្រោះ ទាំងបីនាក់ផ្តិតមេដៃ លើកិច្ចសន្យាដើម្បីប្រញាប់មកដាក់ពាក្យបណ្ដឹង។

នៅក្នុងពាក្យបណ្ដឹង ពួកគេបានស្នើសុំ ឲ្យលោកឧត្តម សេនីយ៍ទោ ស្នងការនគរបាលខេត្តពោធិ៍សាត់ ពិនិត្យរបាយការណ៍ និងកំណត់ហេតុ របស់លោកវរសេនីយ៍ឯក កែវ សារិ អធិការរដ្ឋាននគរបាលក្រុងពោធិ៍សាត់ ឡើង វិញ, ស្នើសុំសំណងព្យាបាល របួសចំនួន១ម៉ឺនដុល្លារ និងសំណងជំងឺចិត្តប៉ះពាល់កិត្តិយសបាត់បង់ពេលវេលា បម្រើការងារច្រើន ,បដិសេធចំពោះកំណត់ហេតុ និងរបាយការណ៍ ដែលចោទប្រកាន់របស់លោកកែវ សារី ព្រោះមិនអាចទទួលយកបានឡើយ។

ទីភ្នាក់ងារសារព័ត៌មានសៀមរាប ប៉ុស្ដិ៍ ធីវី អនឡាញ នៅពុំទាន់ទទួលបានការបំភ្លឺ ពីលោក កែវ សារិ អធិការនគបាលក្រុងពោធិ៍សាត់ នៅឡើយទេ ជុំវិញរោងបណ្ដឹងនេះ៕SRP

ខេត្តសៀមរាប៖បុរសម្នាក់បានស្លាប់នៅនឹងកន្លែង ខណៈជិះម៉ូតូធ្លាក់ពីលើស្ពាន។ ហេតុការណ៍បានកើតឡើង ថ្ងៃទី 26 ខែវិច្ឆិកា ឆ្នាំ2022 នៅលេីផ្លូវជាតិលេខ6 ស្ថិតក្នុងភូមិសំរោងកញ្ចោច ឃុំឫស្សីលក ស្រុកជីក្រែង ខេត្តសៀមរាប។

ប្រភពបានឱ្យដឹងថា ករណីគ្រោះថ្នាក់ចរាចរណ៍បង្កដោយខ្លួនឯង ជិះម៉ូតូធ្លាក់ពីលេីស្ពាន ម៉ាកC125 ពណ៌ខ្មៅពាក់ស្លាកលេខកំពង់ចាម1U-2658 (ទិសដៅពីកេីតទៅលិច)។

ជនរងគ្រោះ ឈ្មោះ នួន ពិសិដ្ឋ ភេទប្រុសអាយុ 29ឆ្នាំ ទីលំនៅភូមិតារៀម ឃុំដងក្តារ ស្រុកស្ទឹងត្រង់ ខេត្តកំពង់ចាម៕SRP

ខេត្តតាកែវ៖គយខេត្តតាកែវ កំពុងត្រូវបានល្បីល្បាញប្រមូលលុយពីការអាជីវករដឹកជញ្ជូនទំនិញតាមរបៀបពុករលួយ ដោយមិនមានចេញវិក្កយបត្រអ្វីទាំងអស់។

យោងតាមប្រភពបានឲ្យដឹងថាក្រុមអាជីវករអ្នករកស៊ីដឹកទំនិញ មកពីប្រទេសវៀតណាមមានការមិនសប្បាយចិត្ត ដោយសារតែ ការបង់លុយច្រើនថ្នាក់ ច្រើនកន្លែង ទោះបង់លុយនៅច្រកហើយក៏ដោយ ក៏ត្រូវបង់លុយថ្លៃបាយតាមផ្លូវទៀត បើហ៊ានតែរំលង គឺត្រូវចាប់ឃាត់ទុកមិនខាន។ ករណីនេះប្រធានសាខាគយ និងរដ្ឋាករខេត្តតាកែវ ដែលមានលោក ស៊ុន ឆាយ ជាប្រធានសាខា បានបណ្ដែតបណ្ដោយឲ្យមន្ត្រីគយចល័តរបស់ខ្លួនធ្វើតាមអំពើចិត្ត។ដើម្បីប្រមូលលុយតាមរបៀបពុកលុយ។

អាជីវករ រកស៊ីដឹកផ្លែដូងទុំ មកពីប្រទេសវៀតណាម បានឲ្យដឹងនៅព្រឹកថ្ងៃទី២៤ ខែវិច្ឆិកា ឆ្នាំ២០២២ ថា គាត់ត្រូវបានគយចល័តខេត្តតាកែវ ចាប់ឃាត់រថយន្តដឹកដូងទុំ របស់គាត់ កាលពីយប់ថ្ងៃទី២៣ វិច្ឆិកា វលើផ្លូវជាតិលេខ៣ ចំណុចក្បែរផ្សារអង្គតាសោម ស្រុកត្រាំកក់ និងបានទារលុយ២លានរៀល ទើបអនុញ្ញាត ឲ្យដឹកចេញ ដោយគយថា គាត់ដឹកគេចមិនបង់ពន្ធ តែតាមការពិត គាត់បង់លុយទៅគយតាមកន្លែងដូចសព្វដងហើយ។ ក្រោយចាប់ឃាត់ភ្លាមៗ នោះ គាត់បានចរចារគ្នាដែរ តែមិនត្រូវរ៉ូវ ទើបគយចល័ត អូសយកមកទុកនៅស្នាក់ការក្បែររង្វង់មូលអូរចំបក់មួយយប់។ លុះ ព្រឹក ថ្ងៃទី២៤វិច្ឆិកា គាត់បានយកលុយ១លាន២០ម៉ឺនរៀល ទៅបង់គយចល័ត ទើបគេអនុញ្ញាត ឲ្យបើករថយន្តចេញ។

អាជីវករបានបញ្ជាក់ថា មួយខែៗ គាត់ដឹកដូងទុំមកពីច្រកកំពង់ផែកំពង់អំពិល ស្រុកបូរីជលសារ ពី ៣ ទៅ៤ជើង ដោយក្នុងមួយលើកគាត់ដឹកបានដូងទុំ៨០០ឡូតិ៍ និងបានបង់លុយនៅកំពង់ផែ ហើយនិងគយចល័ត នៅផ្លូវជាតិលេខ៣ មិនដែលខាននោះទេ តែលើកនេះ មិនដឹងយ៉ាងម៉េច បានជាគយចល័ត នៅផ្លូវជាតិលេខ២ ទៅចាប់នៅផ្លូវជាតិលេខ៣ដែរ។

ពាក់ព័ន្ធនឹងមន្ត្រីគយចល័តក្នុងខេត្តតាកែវ នេះ កន្លងមក ក៏មានក្រុមអាជីវករ នៅច្រកទ្វារអន្តរជាតិភ្នំដឹន ស្រុកគីរីវង់ បានប្រតិកម្មនិងធ្វើការតវ៉ាផងដែរ ដោយលើកឡើងថា ចាប់តាំងពីដូរមេគយ គឺលោក ស៊ុន ឆាយ មកជាប្រធានសាខាគយនិងរដ្ឋករខេត្តតាកែវមក ពួកគាត់ពិបាករកស៊ីណាស់ ព្រោះត្រូវបង់លុយជូនលោកគយគុណនិង២គុណ៣ ឯណោះ។ ក្រុមអាជីវករជាច្រើននៅតែទទួចសុំលោកមេគយថ្នាក់លើពិនិត្យករណីមន្ត្រីគយក្នុងខេត្តតាកែវនេះផងទាន។

ជុំវិញការចោទប្រកាន់បែបនេះ ទីភ្នាក់ងារសារព័ត៌មានសៀមរាប ប៉ុស្ដិ៍ ធីវី អនឡាញ នៅមិនទាន់ទទួលបានការបំភ្លឺ ពីលោក លោក ស៊ុន ឆាយ ប្រធានសាខា គយនិងរដ្ឋាករខេត្តតាកែវនៅឡើយទេ ដោយមិនមានលេខទូរស័ព្ទ៕SRP

ខេត្តកណ្ដាល៖យោងតាមបណ្ដាញសារព័ត៌មាននិងបណ្ដាញសង្គមបានចេញផ្សាយនៅថ្ងៃសុក្រនេះ ដោយបានលាតត្រដាងនៅរឿងភាពមិនប្រក្រតី របស់លោកស្រី ជី ថាវី ប្រធានមន្ទីរអភិវឌ្ឍន៏ជនបទខេត្តកណ្ដាល និងបក្ខពួក ករណីកេងចំណេញលុយរដ្ឋពីគម្រោងធ្វើផ្លូវច្រើនប៊ីលានរៀលស្មើនិងរាប់លានដុល្លា ចែកគ្នាធ្វើសេដ្ឋីស្ងាត់ៗ។

ប្រភពបានឱ្យដឹងថា រឿងមិនប្រក្រតី ស៊ីដាច់ដាច់ប្រាក់រាប់សិបប៊ីលានរៀល ស្នើនិងច្រើនលានដុល្លារ កំពុងបែកធ្លាយចេញហ៊ុយៗ ពីមន្ទីរអភិវឌ្ឍន៏ជនបទខេត្តកណ្ដាល ដែលមានលោកស្រី ជី ថាវី ជាប្រធានមន្ទីរ ព្រោះថា គម្រោងមួយចំនួនរបស់រដ្ឋបាលខេត្ត គឺមានតម្លៃខ្ពស់កប់ពពក ភារកិច្ចដែលត្រូវធ្វើតិច ដូច្នេះសល់ចំណេញប្រាក់មហាសាលទុកចែកម្ចាស់គម្រោងវិញ។

ជុំវិញករណីនេះ ទីភ្នាក់ងារសារព័ត៌មានសៀមរាបរាប ប៉ុស្តិ៍ tv online នៅពុំទាន់ទទួលបានការបំភ្លឺ ពីលោកស្រី ជី ថាវី ប្រធានមន្ទីរអភិវឌ្ឍន៏ជនបទខេត្តកណ្ដាល នៅឡើយទេ ដោយមិនមានលេខទូរសព្ទទំនាក់ទំនង៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា រដ្ឋបាលខេត្តបានទាក់ទាញអ្នកវិនិយោគធំ​ តូច បានសាងសង់រោងចក្រមានចំនួន ២៤មូលដ្ឋាន ស្ថិតក្នុងស្រុកបាធាយ ស្រុកជើងព្រៃ ស្រុកព្រៃឈរ ស្រុកកំពង់សៀម និងស្រុកស្ទឹងត្រង់ ដែលអាចស្រូបយកកំលាំងពលកម្ម កម្មករ កម្មការនី សរុប ៣៦០៤៧នាក់ ដែលជាចំណែកមួយ ចូលរួមក្នុងការកាត់បន្ថយភាពក្រីក្រ របស់ប្រជាពលរដ្ឋ ក៏ដូច ជាចូលរួមក្នុងកំណើនសេដ្ឋកិច្ចរបស់ខេត្តផងដែរ។

អភិបាលខេត្តកំពង់ចាម​ អះអាងថា​ ដូច្នេះក្នុងកិច្ចប្រជុំប្រកាសផ្សព្វផ្សាយ លទ្ធផលបឋមផលិតផលក្នុងស្រុកសរុប GDP និងសន្ទស្សន៍ថ្លៃទំនិញប្រើប្រាស់ CPI ខេត្តកំពង់ចាម នៅថ្ងៃព្រហស្បតិ៍នេះ។

លោកអ៊ុន ចាន់ដា បានថ្លែងថា​ ក្នុងរយៈពេលប្រមាណជាពីរទស្សវត្សកន្លងមកនេះ រាជរដ្ឋាភិបាលកម្ពុជាបានខិតខំ អភិវឌ្ឍប្រទេសឲ្យមានការ រីកចម្រើនជាលំដាប់។ ជាក់ស្ដែងខេត្តកំពង់ចាម មានហេដ្ឋារចនាសម្ព័ន្ធរូវន្ត មានការរីកចម្រើន ដូចជា​ ផ្លូវ ស្ពាន សាលារៀន មន្ទីរពេទ្យ សួនច្បារសាធារណៈ វត្តអារាម និង វិស័យឯកជន ជាពិសេស រង្វង់មូលវិមានឯករាជ ដែលជាតំបន់ទេសចរ ដ៏សំខាន់សម្រាប់ហាត់ប្រាណ និងធ្វើដំណើកម្សាន្ត ទាំងភ្ញៀវជាតិ និងអន្តរជាតិ។

លោកបានថ្លែងថា​ ក្រសួងផែនការ បានបើកកិច្ចប្រជុំប្រកាសផ្សព្វផ្សាយ លទ្ធផលបឋមផលិតផល ក្នុង ស្រុក សរុប GDP និងសន្ទស្សន៍ ថ្លៃទំនិញប្រើប្រាស់ CPI ខេត្តកំពង់ចាម ឆ្នាំ២០២១-២០២២ ដែលទិន្នន័យនេះ បានមកពីបណ្តាមន្ទីរ អង្គភាពជុំវិញខេត្ត រួមមាន វិស័យកសិកម្ម វិស័យឧស្សាហកម្ម និងវិស័យសេវាកម្ម ដែលនាយកដ្ឋានគណនេយ្យជាតិ នៃក្រសួងផែនការយកមកគណនា។ ទិន្នន័យនេះមានសារៈសំខាន់ សម្រាប់ធ្វើជាមធ្យោបាយ ក្នុងការវាស់វែង អំពីកម្រិតនៃការរីកចម្រើន របស់រដ្ឋបាលខេត្ត.តាមបណ្តាឆ្នាំនីមួយៗ និងចំណូលជាមធ្យមរបស់ប្រជាពលរដ្ឋម្នាក់ៗ តាមរយៈ ការវិភាគតាមបែបម៉ាក្រូសេដ្ឋកិច្ច។

លោកបាន​បញ្ជាក់​ថា​ លទ្ធផលគណនេយ្យជាតិសម្រាប់ថ្នាក់ខេត្ត គឺជា ឯកសារគន្លឹះ ដែលជាមូលដ្ឋានសម្រាប់ អនុវត្តសកម្មភាពអាទិភាព សំខាន់ៗ ស្របតាមគោល នយោបាយ ដែលមានសង្គតិភាពជាមួយនឹងគោលដៅ អភិវឌ្ឍន៍របស់ រដ្ឋបាលខេត្ត និងជាពិសេស ជាងនេះទៅទៀត គឺដើម្បីចូលរួមសម្រេចបាននូវយុទ្ធសាស្ត្រចតុកោណ ដំណាក់កាលទី៤.របស់ រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខដឹកនាំ។

គួរបញ្ជាក់ផងដែរថា ទិន្នន័យនេះវាមានសារៈសំខាន់ សម្រាប់ខេត្ត ដើម្បីបង្ហាញដល់ភាគីពាក់ព័ន្ធនានា ជាពិសេសដៃគូអភិវឌ្ឍន៍ ដែលមានបំណងចង់ មកវិនិយោគ នៅលើទឹកដីរដ្ឋបាលខេត្តកំពង់ចាម ហើយពួកគេអាចដឹងពីកំណើនសេដ្ឋកិច្ច និងការ រីកចម្រើនរបស់រដ្ឋបាលខេត្ត តាមរយៈលទ្ធផលផលិតផលក្នុងស្រុកសរុប GDP នេះ​៕SRP

ខេត្តព្រះវិហារ៖អ្នកសារព័ត៌មានចំនួន៣នាក់ ត្រូវបាន នគរបាលខេត្តព្រះវិហារ ឃាត់ខ្លួននៅក្នុងបន្ទប់ KTV ViP 2 យីហោ«ភោជនីយដ្ឋានផ្កាយព្រឹក2» ស្ថិតនៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ កាលពីវេលាម៉ោង១យប់ ឈានចូលថ្ងៃទី២២ វិច្ឆិកា ឆ្នាំ២០២២។

ការឃាត់ខ្លួនធ្វើឡើង តាមបណ្តឹងរបស់ឈ្មោះ សាត ណាក់ ភេទប្រុស អាយុ៣០ឆ្នាំ មុខរបរលក់ដូរ រស់នៅភូមិពោបាក់ក សង្កាត់ដំរីជាន់ខ្លា ក្រុងស្ទឹងសែន។

តាមប្រភពច្បាស់ការណ៍បានអ្នកសារព័ត៌មាន ថ្ងៃព្រហស្បតិ៍ នេះថា ដើមចោទក្នុងបណ្ដឹងមួយនេះ គឺតំណាងឱ្យ ក្រុមហ៊ុន ”ភីអិនធី PNT”។

ប្រភពបានបន្តថា នៅមុនពេលឃាត់ខ្លួន ក្រុមអ្នកសារព័ត៌មាន គ្នា៤នាក់ បានជិះរថយន្ត១គ្រឿង ចុះទៅយកព័ត៌មាន ជុំវិញភាពមិនប្រក្រតី របស់ក្រុមហ៊ុន ”ភីអិនធី PNT” ដែលមានការសង្ស័យប្រមូលទិញឈើ ពីពលរដ្ឋដោយខុសច្បាប់ នៅស្រុករវៀង ខេត្តព្រះវិហារ។

ករណីខាងនេះ តំណាងក្រុមហ៊ុន ក៏បានសម្រួលឱ្យប្រាក់ទៅក្រុមអ្នកព័ត៌មាន ចំនួន៥០០ដុល្លារ ជាថ្នូរនិងបិទព័ត៌មាន កុំឱ្យផ្សាយ រាល់សកម្មភាពទិញឈើខុសច្បាប់របស់ក្រុមហ៊ុន ប៉ុន្តែអ្នកព័ត៌មានមិនព្រម ដោយទារចំនួន៤ពាន់ដុល្លារ ព្រោះគ្នា៤នាក់ ហើយតំណាងឱ្យក្រុមហ៊ុន ”ភីអិនធី PNT” ក៏ប្រើឧបាយកល តថ្លៃគ្នា ដើម្បីបានសំឡេងរហូតត្រូវថ្លៃគ្នាចំនួន២១៥០ដុល្លារ ប្រគល់ឱ្យក្រុមអ្នកសារព័ត៌មាន
បន្ទាប់មកទៀត ដើមចោទនិងបក្ខពួក ក៏បានបញ្ឆោត ប៉ាវក្រុមអ្នកព័ត៌មាន ឲ្យទៅច្រៀងខារ៉ាអូខេត្រង់ចំណុចខាងលើ ក្រោមហេតុផលថា៖ យើងរាប់អានគ្នានិងដើម្បីឱ្យអ្នកសារព័ត៌មាន ភ្លេចខ្លួន ស្របពេលដើមចោទប្ដឹងរួចហើយ សមត្ថកិច្ចកំពុងធ្វើនីតិវិធី.!។

ប្រភពបានបន្តទៀតថា ខណៈកំពុងច្រៀងរាំសប្បាយមិនបានចាប់អារម្មណ៍ ក៏ស្រាប់តែសមត្ថកិច្ចប៉ូលិសខេត្តព្រះវិហារ ចុះចាប់ខ្លួនពួកគេ ក្នុងបន្ទប់ KTV តែម្ដង ទើបភ្ញាក់ខ្លួនខ្ញាកថា៖ ចុមអញចាញ់បញ្ឆោតឈ្មួញឈើហើយ ក៏នាំគ្នាស្រឡាំងកាំងសរភ្នែកព្រាត ស្របពេលអ្នកសារព័ត៌មានម្នាក់ទៀត រត់រួចខ្លួន។

ករណីនេះរហូតដល់ល្ងាចថ្ងៃទី២៣ ខែវិច្ឆិកា ម្សិលមិញ ចៅក្រមស៊ើបសួរ នៃសាលាដំបូងខេត្តព្រះវិហារ លោក យុត ពន្លឺ ចៅក្រមស៊ើបសួរបានសម្រេចចេញដីកាឃុំខ្លួនទាំង៣នាក់ជាបណ្ដោះអាសន្ន បទកំហែងយក។

អ្នកសារព័ត៌មាន ទាំង៣នាក់ទី១៖ ឈ្មោះ មុំ វិបុល ភេទប្រុសអាយុ៤៤ឆ្នាំ មុខរបរសារព័ត៌មាន”ប៉ុស្តិ៍លេខ៣”នៅភូមិជៀស ឃុំថ្មពូន ស្រុកត្បូងឃ្មុំ ខេត្តត្បូងឃ្មុំ។

២៖ ឈ្មោះ តិន ទ្រី ភេទប្រុស អាយុ២៩ឆ្នាំ មុខរបរសារព័ត៌មាន”រស្មីឆ្នាំងមាស”។

៣៖ ឈ្មោះ តិន ស៊ីថា ភេទប្រុស អាយុ២៧ឆ្នាំ មុខរបរសារព័ត៌មាន”ខេមមេឌៀ” អ្នកទាំ២នៅភូមិម៉ឺនរាជ ឃុំខ្យង ស្រុកជ័យសែន៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានលើក​ឡើង​ថា ជាគ្រោះអកុសល បន្ទាប់ពីប្រជាពលរដ្ឋយើង បានធូរស្រាលពីជំងឺកូវីដ ១៩ ក៏មកជួបប្រទះនឹងគ្រោះទឹកជំនន់។ ដូច្នេះហើយ ទើបអាជ្ញាធរ នៅតែបន្តធ្វើការដោះស្រាយ នូវបញ្ហានេះ ជូនបងប្អូនប្រជាពលរដ្ឋយើង ដោយមិនទុកបងប្អូនប្រជាពលរដ្ឋណាម្នាក់ចោលនោះឡើយ។

អភិបាលខេត្តកំពង់ចាម បានបន្តថា ក្នុងបរិបទជម្ងឺកូវីដ ១៩ អស់រយៈពេល ២ឆ្នាំ ដែលយើងពិតជាមានការលំបាកខ្លាំងណាស់ ទាំងអាជ្ញាធរ ក៏ដូចជាប្រជាពលរដ្ឋ ក្នុងមូលដ្ឋាន គឺយើងបានរួមគ្នា ដើម្បី ចូលរួមទប់ស្កាត់កុំឲ្យជំងឺនោះ កុំឲ្យឆ្លងរីករាលដាល ចូលក្នុងសហគមន៍ ហើយពេលនោះ ក្រុមអាជ្ញាធរក៏បានខិតខំដោះស្រាយ ស្បៀងអាហារ នានា ដើម្បី ចែកជូនដល់បងប្អូន នៅពេលដែលមានការបិទខ្ទប់ ឬអ្នកដែលបានឆ្លងជំងឺនោះ ផងដែរ។

អភិបាលខេត្តកំពង់ចាម​ មានប្រសាសន៍យ៉ាងដូច្នេះ ក្នុងឱកាស ចែកស្បៀងអាហារ របស់ រាជរដ្ឋាភិបាល ជូនដល់ប្រជាពលរដ្ឋ ក្រ១ ក្រ២ ដែលរងផលប៉ះពាល់ដោយទឹកជំនន់​ ក្នុង​ក្រុង​កំពង់ចាម​ និង​ស្រុក​កំពង់សៀម​ ចំនួន​៨០០គ្រួសារ​ នៅថ្ងៃព្រហស្បតិ៍នេះ។

លោកអ៊ុន ចាន់ដា បានបន្តថា ចំពោះ បងប្អូនប្រជាពលរដ្ឋប្រភេទ ក្រ១ ក្រ២ ត្រូវបានទទួលការឧបត្ថម្ភ ជាថវិកា ពី រាជរដ្ឋាភិបាល ជាប្រចាំខែ ផងដែរ។ ដោយកិច្ចការនេះ រដ្ឋាភិបាលមិនទាន់បញ្ចប់ នៅឡើយទេ បើទោះបីជាបច្ចុប្បន្ននេះ ជំងឺកូវីដ ១៩ បានធូស្រាលទៅហើយក្តី។ ក្រៅពីនោះ រាជរដ្ឋាភិបាល កម្ពុជា បានគិតគូរបន្តលើកម្មវិធីគាំពារសង្គម ដោយថ្មីៗនេះ មានកម្មវិធីថ្មី ២ បន្ថែមទៀត នៃផ្នែកសង្គមកិច្ច និងផែនការ គឺ៖ ទី១.ដោះស្រាយដល់ប្រជាពលរដ្ឋ ក្រ១ ក្រ២ ដោយទឹកជំនន់។ ទី២.ដោះស្រាយដល់ប្រជាពលរដ្ឋ ដែលទទួលរងនូវអតិផរណា ដោយសារមានសង្គ្រាម នៅក្រៅប្រទេស ដែលធ្វើឲ្យប៉ះពាល់ ដល់សេដ្ឋកិច្ចពិភពលោក ក៏ដូចជា ការប៉ះពាល់ដល់ជីវភាព របស់បងប្អូនប្រជាពលរដ្ឋ ផងដែរ។

គូសបញ្ជាក់ថា អំណោយស្បៀងអាហារ របស់រដ្ឋាភិបាលកម្ពុជា ដែល អភិបាលខេត្ត នាំទៅចែកជូនប្រជាពលរដ្ឋទាំង ៨០០គ្រួសារ ខាងលើ ក្នុង ១គ្រួសារទទួលបាន ៖ អង្ក ២៥គីឡូក្រាម មី ១កេស ទឹកត្រី ១យួរ ទឹកស៊ីអ៉ីវ ១យួរ និងត្រីខ ១យួរ ផងដែរ៕SRP

ភ្នំពេញ៖ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ ដំឡើងឋាន:ដល់ជំនួយការសម្ដេចតេជោហ៊ុន សែន នាយករដ្ឋមន្ត្រីចំនួន ៤ រូប៕SRP

ភ្នំពេញ៖គ្រូបង្រៀនម្នាក់ រស់នៅភូមិឫស្សីស្រុក ឃុំឈើទាល ស្រុកគៀនស្វាយ ខេត្តកណ្តាល បានសុំអន្តរាគមន៍ពី សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជួយអន្តរាគមន៍ករណីក្រុមហ៊ុនឯកជនមួយបានចាក់ដីរំលោភលើដីរបស់គាត់។ ចំណែកអភិបាលខេត្តកណ្តាលបានឲ្យប្រជាពលរដ្ឋ ម្ចាស់ដីយកឯកសារមករដ្ឋបាលខេត្ត ដើម្បីមន្ត្រីជំនាញពិនិត្យ។

គ្រូបង្រៀន ដែលជាម្ចាស់ដីឈ្មោះ សេក សិទ្ធិ បានរៀបរាប់ថា “កើតទុក្ខមិនសុខចិត្តដោយសារតែក្រុមហ៊ុន រំលោភយកដីរបស់ខ្ញុំ ហេតុអីបានខ្ញុំថារំលោភ ពីព្រោះខ្ញុំបានសុំអាជ្ញាធរភូមិ ឃុំ ស្រុក ខេត្ត និងមន្ត្រីដែនដីមន្ទីរខេត្តទៀតឲ្យចុះវាស់វែងដីឲ្យខ្ញុំ បានវាស់ពីរដងទៅបីដងដែរ តែចេះតែរំខានពីក្រុមហ៊ុន សន្តិសុខ ក្រុមហ៊ុនបានមកដេញស្ទាក់ពេលវាស់បាន ២ចំណុច ទៅ៣ចំណុច គឺសន្តិសុខមកដេញមិនឲ្យវាស់ និងដេញយើងមិនឲ្យចូលីតាំងដីរបស់យើងតែម្តង។ ហើយចុងក្រោយក្រុមហ៊ុនបានយកដីមកចាក់លើដីខ្ញុំ ពេលនោះខ្ញុំបានទៅឃាត់ ថែមទាំងបានប្តឹងទៅអាជ្ញាធរស្រុក ខេត្ត ក៏ផ្អាក ហើយបានមួយថ្ងៃពីរថ្ងៃគេចាក់ទៀត តែដោយសារបានចំណារ ពីអភិបាលខេត្តកណ្តាលគាត់ចារទៅបានជាគេលែងចាក់។ ជាដីរបស់ខ្ញុំពិតប្រាកដដោយខ្ញុំមានឯកដារត្រឹមត្រូវ…។ តែគេគ្មានដំណោះស្រាទេ ពេលចុះជាប្រព័ន្ធគាត់ថាចាំវាស់ជាប្រព័ន្ធ ដល់ពេលទៅចុះវាស់គេដេញ អយុត្តិធម៌ណាស់សម្រាប់ខ្លួនខ្ញុំ មានតែសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតទេ ដែលអាចជួយរកយុត្តិធម៌ ឲ្យកូនចៅដែលមានទុក្ខជាទម្ងន់ ដែលគេរំលោភលើដីខ្ញុំ។ ហើយមានចំណុចអ្វី បានជាគេហ៊ានរំលោភលើដីយើង ហើយអាជ្ញាធរដឹងឮហើយបែរជាមិនធ្វើឲ្យខ្ញុំ សូមសម្តេចជួយកូនចៅផង”។

គ្រូបង្រៀនរូបនេះបានបញ្ជាក់ថា ចំពោះករណីនេះ ផ្តើមចេញលើកទី១ គឺលោកបានដាក់ពាក្យស្នើសុំចុះបញ្ជីទៅឃុំ ស្រុក និងខេត្ត គឺសុំចុះបញ្ជីតាំងពីមុនចុះជាប្រព័ន្ធ តែគេគេចវេសថ្ងៃនេះថ្ងៃនោះ។ ហើយដីគេនៅជាប់ដីលោកគេធ្វើប្លង់បាន ហើយរឿងអីដែលលោកធ្វើប្លង់មិនបាន។ ហើយដោយសារក្រុមហ៊ុនបានចាក់នៅលើដីរបស់លោក លោកក៏បានប្តឹងសុំអន្តរាគមន៍ទៅសម្តេចតេជោ ហ៊ុន សែន និងក្រសួងរៀបចំដែនដីនគរូបនីយកម្ម និងសំណង់។

លោកបានអះអាងថា “ខ្ញុំការពារដីខ្ញុំដាច់ខាត ដីនឹងខ្ញុំទិញដោយញើសឈាមរបស់ខ្ញុំ ខ្ញុំត្រូវតែរក្សាដីខ្ញុំ ទោះត្រូវដាក់ជីវិតក៏ខ្ញុំត្រូវតែធ្វើដែរ ខ្ញុំនឹងសង់រោងនៅលើដីខ្ញុំ ហើយកុំមករំលោភយកដីខ្ញុំ ខ្ញុំអត់ឲ្យជាដាច់ខាត ទោះជីវិតស្លាប់ក៏ខ្ញុំមិនឲ្យដែរ”។

ចំណែកលោក គង់ សុភ័ណ្ឌ អភិបាលខេត្តកណ្តាល បានបញ្ជាក់កាលពីល្ងាចថ្ងៃទី២១ ខែវិច្ឆិកានេះថា “យកឯកសារមករដ្ឋបាលខេត្ត ដើម្បីមន្ត្រីជំនាញពិនិត្យ”។

គួរបញ្ជាក់ថា លោកសេក សិទ្ធិ បានដាក់លិខិតស្នើសុំសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជួយធ្វើអន្តរាគមន៍ ទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ជួយឲ្យមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្តាល ចុះវាស់វែងដីមួយកន្លែងទំហំ ៣ហិកតា ៧៣អា ៤៥ម៉ែត្រការ៉េ (៣៧៣៤៥ម៉ែត្រការ៉េ) មានទីតាំងនៅភូមិឫស្សីស្រុក ២ ឃុំឈើទាល ស្រុកគៀនស្វាយ ខេត្តកណ្តាល និងសុំជួយចេញវិញ្ញាបនបត្រ សម្គាល់ម្ចាស់អចលនវត្ថុ ដើម្បីមានសិទ្ធិកាន់កាប់ដីធ្លីស្របច្បាប់ជាធរមាន។
បន្ទាប់ទទួលបានលិខិតសុំអន្តរាគមន៍ ខុទ្ទកាល័យ សម្តេចតេជោ ហ៊ុន សែន បានធ្វើដីកាបញ្ជូនសំណើរបស់លោក សេក សិទ្ធិ ទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ពិនិត្យជាសមត្ថកិច្ចតាមការគួរ៕SRP