ខេត្តបាត់ដំបងឍ៖លោកសុខ លូ អភិបាលខេត្តបាត់ដំបង និងប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបងនៅរសៀលថ្ងៃអាទិត្យ នេះ បានបន្តដឹកនាំសហការី បន្តអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់ចំនួន៨៤គ្រួសារទៀត នៅស្រុកចំនួន២ គឺ
-ស្រុកគាស់ក្រឡ ចំនួន៤៤គ្រួសារ
-ស្រុកមោងឫស្សី ចំនួន ៤០គ្រួសារ ។

គួរបញ្ជាក់ថា គិតចាប់ពីថ្ងៃទី២១ខែមីនា ដល់ថ្ងៃទី០២ ខែមេសា ឆ្នាំ២០២៣ ខេត្តបាត់ដំបង រងផលប៉ះពាល់ដោយខ្យល់កន្រ្តាក់កើតឡើងលើស្រុកចំនួន១១ ក្នុងឃុំចំនួន៣៥ឃុំ និងភូមិចំនួន៧៣ភូមិបណ្តាលអោយប៉ះពាល់ផ្ទះប្រជាពលរដ្ឋ សរុបចំនួន៥៣២ខ្នង(៥៣២រួសារ) រន្ទះបាញ់ងាប់គោ៣ក្បាល និងប៉ះពាល់សម្ភារៈប្រើប្រាស់ជាច្រើនផ្សេងទៀត។

អំណោយមនុស្សធម៌ដែលបានផ្ដល់ជូន១គ្រួសារទទួលបាន៖ អង្ករ២៥គីឡូក្រាម ទឹកបរិសុទ្ធ១កេស មី១កេស ទឹកត្រី១យួ រ ត្រីខ១យួរ សំពត់ថង់១ និងមុង១ផងដែរ៕SRP

ខេត្តសៀមរាប​៖យុវជនម្នាក់បានសម្រេចចិត្តចងកសម្លាប់ខ្លួនបង្កឲ្យមានការភ្ញាក់ផ្អើល។ ហេតុការណ៍បានកើតឡើង នៅល្ងាចថ្ងៃសៅរ៍​ ទី០១​ ខែមេសា​ ឆ្នាំ​២០២៣ នៅចំណុចបន្ទប់ជួលលេខ E168 ក្រុម​ទី៥​ ភូមិ​ស្លក្រាម​ សង្កាត់​ស្លក្រាម​ ក្រុងសៀមរាប​។

ជនរងគ្រោះ​ឈ្មោះ​ សិទ្ធ​ ភេទប្រុស​ អាយុ​១៨ឆ្នាំ​ មានស្រុកកំណេីត​ ភូមិស្នូលកោង​ ឃុំបឹងព្រីង​ ស្រុកថ្មគោល​ ខេត្ត​បាត់ដំបង​។ ជនរងគ្រោះបានយកក្រម៉ាពណ៌ចម្រុះ ចងក របស់ខ្លួនភ្ជាប់នឹងគ្រែដែកពីរជាន់មានកំពស់​ ១,៩៤​ ស.ម​ ដេីម្បី​ធ្វើ​អត្តឃាត។

-ផ្អែក​តាម​ការពិនិត្យសាកសព​ និងគ្រូពេទ្យកោសល្យវិច័យ នៅកន្លែងកេីតហេតុផ្ទាល់​ បានបញ្ចាក់ថា​ ពិតជាបានស្លាប់ដោយសារចងក (ធ្វេីអត្តឃាត​)ពិតប្រាកដ​មែន។ បានប្រគល់សពអោយទៅលោកគ្រូតំណាងអង្គការកល្យាណមិត្ត ដេីម្បីធ្វេីបុណ្យតាមប្រពៃណី នៅឈាបនដ្ឋានវត្តដំណាក់​ រង់ចាំក្រុមគ្រួសារសពមកពីស្រុកកំណេីត៕SRP

លោកសុខ លូ អភិបាលខេត្តបាត់ដំបង និងប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង នៅថ្ងៃអាទិត្យ នេះ បានបន្តដឹកនាំសហការី អញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ជូនប្រជាពលរដ្ឋ រងគ្រោះដោយខ្យល់កន្ត្រាក់ចំនួន១០០គ្រួសារទៀត មកពី ឃុំចំនួន៣នៃស្រុកសំឡូត។ ក្នុងនោះឃុំតាសាញប៉ះពាល់ចំនួន៧២គ្រួសារ លើភូមិចំនួន៤ បណ្តាលអោយ (រលំទាំងស្រុង ២ខ្នងផ្ទះ និងរបើកដំបូល៧០ខ្នងផ្ទះ) ឃុំអូរសំរិល ប៉ះពាល់ចំនួន ២៥គ្រួសារ មកពីភូមិចំនួនចំនួន៣(រលំទាំងស្រុង២ខ្នង និងរបើកដំបូល២៣ ខ្នង) និងឃុំស៊ុងប៉ះពាល់៣គ្រួសារ លើភូមិចំនួន១ក្នុងនោះ (របើកដំបូល៣ខ្នង)។

ពិធីសំណេះសំណាល និងផ្ដល់អំណោយមនុស្សធម៌នេះប្រារព្ធនៅទីតាំងវត្តតាសាញ់ចាស់ ឃុំតាសាញ់ស្រុកសំឡូត។

គួរបញ្ជាក់ថា គិតចាប់ពីថ្ងៃទី២១-៣១ខែមីនា ឆ្នាំ២០២៣ ខេត្តបាត់ដំបង រងផលប៉ះពាល់ដោយខ្យល់កន្រ្តាក់កើតឡើងលើ ស្រុកចំនួន១១ ក្នុងឃុំចំនួន៣៣ឃុំ និងភូមិចំនួន៣៦ភូមិបណ្តាលអោយប៉ះពាល់ ផ្ទះប្រជាពលរដ្ឋ សរុបចំនួន៥២១ខ្នង(៥២១គ្រួសារ) ប៉ះពាល់វត្តអាម សាលារៀន និង រន្ទះបាញ់ងាប់គោខូចខាតសម្ភារ:ជាច្រើនផងដែរ។

អំណោយមនុស្សធម៌ដែលបានផ្ដល់ជូន១គ្រួសារទទួលបាន៖ អង្ករ២៥គីឡូក្រាម ទឹកបរិសុទ្ធ១កេស មី១កេស ទឹកត្រី១យួរ ត្រីខ១យួរ សំពត់ថង់១ និងមុង១ផងដែរ៕SRP

ខេត្តសៀមរាប៖ក្មេងស្រីម្នាក់បានលង់ទឹកស្លាប់វេលាម៉ោង១១និង០០នាទី នៅចំណុចស្រះទឹកចម្ងាយ៥០០ ម៉ែត្រ ខាងលិចភូមិយាយមុី ឃុំជ្រោយនាងងួន ស្រុកស្រីស្នំ ខេត្តសៀមរាប។

ជនរងគ្រោះ ឈ្មោះ កំសត់ មេសា ភេទស្រី អាយុ០៤ឆ្នាំ។ ករណីនេះមូលហេតុ ក្មេងៗដូចគ្នាបបួលគ្នា រត់លេងហើយនាំគ្នាចុះមុជទឹកស្រះបណ្តាលឲ្យលង់ស្លាប់ម្នាក់តែម្ដង៕SRP

អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញមលោកស ថេត បានបដិសេធថា ឈ្មោះ អ៊ិន សុវិជ្ជា មិនមែនជាជំនួយការរបស់លោកទេ ហើយបើឈ្មោះ អ៊ិន សុវិជ្ជា យកឈ្មោះលោកទៅធ្វើផ្តេសផ្តាស ឬធ្វើអ្វីខុស គឺលោកនឹងអនុវត្តតាមច្បាប់។ ហើយលោកបានឲ្យជំនាញស្រាវជ្រាវដើម្បីចាត់ការតាមផ្លូវច្បាប់។

ការបដិសេធនេះ បានធ្វើឡើងបន្ទាប់ពីបែកធ្លាយព័ត៌មានថា “លោក អិន សុវិជ្ជា (ហៅកាត់មេជា ក្រុមជំនួយការ) មិនមែនជានគរបាលជាតិ តែគឺជាជនស៊ីវិល …. ប្រមូលលុយពីផែននីមួយៗ ដូចជា ផែនសណ្តាប់ធ្នាប់ ផែនការិយាល័យចរាចរណ៍ និងផែនការិយាល័យព្រហ្មទណ្ឌ។ល។ លោកវិជ្ជា បានគំរាមមន្ត្រីណាដែលហ៊ានតតាំងមិនព្រមធ្វើតាមបញ្ជា ឬបង់ខែតាមការកំណត់ គឺគាត់ដកតួនាទៅមន្ត្រីនោះចោល”។

ព័ត៌មានដែលបែកធ្លាយនោះ ក៏បានបង្ហាញពីឈ្មោះមន្ត្រីមួយចំនួនផងងដែរ ដែលពាក់ព័ន្ធជាមួយនឹងឈ្មោះ អិន សុវិជ្ជា ក្នុងការប្រព្រឹត្តអំពើពុករលួយផងដែរ។

លោក ស ថេត បានមានប្រសាសន៍ប្រាប់រស្មីកម្ពុជាតាមមទូរស័ព្ទនៅថ្ងៃទី១ ខែមេសា នេះថា “ខ្ញុំបានណែនាំកាលពីម្សិលមិញហើយ (៣១ មីនា) ខ្ញុំបានព័ត៌មាននឹងមក ប៉ុន្តែខ្ញុំកំពុងតែឲ្យគេស្រាវជ្រាវសិន ជំនួយការខ្ញុំមានតែប៉ុន្មាននាក់ទេ ពីរបីនាក់ទេ ក្រៅពីនឹងខ្ញុំលុបចោលអស់ហើយ ប៉ុន្តែឈ្មោះ អិន សុវិជ្ជា មិនមែនទេ។ បើវាយកឈ្មោះខ្ញុំយកទៅធ្វើចឹង ខ្ញុំឲ្យគេអនុវត្តតាមច្បាប់ ខ្ញុំអត់មានគិតរឿងអ្នកណាមកពីណាទេ ។ ហើយបើទោះបីជាវាជាំនួយការពិតក៏មិនអាចទៅធ្វើចឹងបានដែរ។ ខ្ញុំបានឲ្យគេស្រាវជ្រាវហើយ ចាត់ការតាមផ្លូវច្បាប់។

បញ្ជាក់ លោកសាន សុខសីហា , លោក ហេង ហ៊ុយ , លោក អ៊ិន សុវិជ្ជា រួមទាំងមន្ត្រីមួយចំនួនទៀត បានរង់ការចោទប្រកាន់ក្នុងការប្រព្រឹត្តអំពើពុករលួយ។ ហើយក៏មានការស្នើឲ្យសម្តេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងនាយឧត្តមសេនីយ៍សន្តិបណញឌិត នេត សាវឿន អគ្គស្នងការនគរបាលជាតិ ពិនិត្យមើលករណីនេះផង។

លោកសាន សុខសីហា អ្នកនាំពាក្យស្នងការដ្ឋាននគរបារាជធានីភ្នំពេញ បានបញ្ជាក់ថា “ជារឿងពិតមិន មានក្រុមមួយកំពុងព្យាយាមបង្កើតរឿងបង្ខូចកិត្តិយស កំពុងស្រាវជ្រាវរកមុខក្រុមទាំងនេះ”។

ការបដិសេធនេះ បានធ្វើឡើងបន្ទាប់ពីមានការចែករំលែកព័ត៌មាននៅក្នុងគ្រុបតេឡេក្រាមឈ្មោះ ក្រុមប្រឆាំងព័ត៌មានក្លែងក្លាយ កាលពីថ្ងៃទី៣១ ខែមីនា ឆ្នាំ២០២៣។

ចំណែកមន្ត្រីជាន់ខ្ពស់ខុទ្ទកាល័យសម្តេចស ខេង បានប្រាប់រស្មីកម្ពុជា ថា ចំពោះព័ត៌មាននេះ បានបញ្ជូនឲ្យខាងស្នងការដ្ឋាននគរបាលរាជធានីភ្នំពេញ ពិនិត្យស្រាវជ្រាវដើម្បីរាយការណ៍មកក្រសួងមហាផ្ទៃវិញ៕SRP

លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង និងក៏មានការអញ្ជើញចូលរួមពីឧកញ៉ា ស៊ីន ឃីម អនុប្រធានកិត្តិយសសាខាព្រមទាំង គណៈកម្មាធិការសាខាអនុសាខា នៅ
ថ្ងៃសៅរ៍ នេះបានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់ចំនួន៧២គ្រួសារ ក្នុងឃុំចំនួន២ នៃស្រុកភ្នំព្រឹក ក្នុងនោះឃុំពេជ្រចិន្តា ប៉ះពាល់ចំនួន ៦៩គ្រួសារ មកពីភូមិចំនួនចំនួន៣(រលំទាំងស្រុង៩ខ្នង និងរបើកដំបូល៥៤ខ្នង) ឃុំអូរំដូល ប៉ះពាល់៣គ្រួសារ លើភូមិចំនួន២ក្នុងនោះ (រលំ២ខ្នង របើកដំបូល១ខ្នង) ដែលពិធីសំណេះសំណាលនេះ ប្រារព្ធនៅទីតាំងរងគ្រោះស្ថិតនៅចំណុចសៃឡុកូនភ្នំ ភូមិភ្នំតូច ឃុំពេជ្រចិន្តា ស្រុកភ្នំព្រឹក។

មានប្រសាសន៍នាឱកាសនោះ លោក សុខ លូ បាននាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយ ណាមួយឡើយ។

លោកប្រធានគណៈកម្មាធិការសាខាបានសំដែងនូវការសោកស្ដាយជាពន់ពេក ចំពោះការខូចខាត ផ្ទះសំបែង ទ្រព្យសម្បត្តិដែលនេះជាគ្រោះមហន្តរាយ ដោយធម្មជាតិ គ្មាននរណាម្នាក់ចង់ជួបប្រទះឡើយ ។

លោកបានបន្តថា ថ្វីត្បិតតែអំណោយមនុស្សធម៌ ដែលបាននាំយកមកចែកជូនបងប្អូននាពេលនេះ គ្រាន់ជាការសម្រាលទុក្ខលំបាក របស់បងប្អូន បានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋ គ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។

លោកសុខ លូ ក៏បានក្រើនរំលឹកដល់ លោកយាយ លោកតា អ៊ំពូមីងថា រដូវនេះ ជាចុងរដូវប្រាំងក្កៅហួតហែងខ្លាំង ពេលមានភ្លៀងធ្លាក់ម្ដងៗ គឺលាយឡំដោយខ្យល់កន្ត្រាក់ ផ្គររន្ទះ ហេតុនេះ សូមមេត្តាប្រុងប្រយ័ត្នឱ្យបានខ្ពស់។ ជាងនេះទៀតសុខភាពជារឿងសំខាន់ណាស់ សូមយកចិត្តទុកដាក់ខ្ពស់ចំពោះសុខភាពផ្លាល់ខ្លួន និងកុមារតូចៗដែលពួកគាត់ងាយនឹងកើតជំងឺផ្សេងៗណាស់ក្នុងរដូវនេះ។

អំណោយមនុស្សធម៌ដែលបានផ្ដល់ជូន១គ្រួសារទទួលបាន៖ អង្ករ២៥គីឡូក្រាម ទឹកបរិសុទ្ធ១កេស មី១កេស ទឹកត្រី១យួរ ត្រីខ១យួរ សំពត់តង់១ ផងដែរ៕SRP

មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកំពង់ចាម នៅថ្ងៃទី២៩ ខែមីនា ឆ្នាំ២០២៣ បានចេញសេចក្ដីប្រកាសជ្រើសរើស ឪពុកម្តាយធម៌  ដើម្បីថែទាំជំនួសទារកភ្លោះទាំង ២នាក់ ដែលត្រូវបានឪពុកម្តាយបោះបង់ចោល តាមផ្លូវ។

លោកស្រី​ ប៉ាង ដានី អភិបាលរងខេត្តកំពង់ចាម ក៏បានអំពាវនាវដល់ ប្រជាពលរដ្ឋ ដែលមានបំណងធ្វើជាឪពុកម្ដាយធម៌ ដែលមានចិត្តស្រឡាញ់កុមារ ជាពិសេស ស្ម័គ្រចិត្តក្នុងការ យក​ទារកខាងលើ ទៅចិញ្ចឹម ទំនាក់ទំនងមក មន្ទីរសង្គមកិច្ច ដោយធ្វើការទំនាក់ទំនងមកកាន់លេខទូរស័ព្ទលេខ ៖ ០៩២ ៧៧៩ ៦១៩ និង ០១២ ៨៣៧ ៩៧៣ ដើម្បី សាកសួរព័ត៌មានលម្អិត និងដាក់ពាក្យសុំ។

បើតាមលោក ទូច វឌ្ឍនា ប្រធានមន្ទីរសង្គមកិច្ច អតីតយុទ្ធជន និងយុវនិតិតសម្បទា ខេត្តកំពង់ចាម ឲ្យដឹងថា កាលពីថ្ងៃទី២៦ ខែមីនា ឆ្នាំ២០២៣ ឈ្មោះ លឹម សុខហ៊ុយ ភេទប្រុស សញ្ជាតិខ្មែរ រស់នៅភូមិតាអុក ឃុំបឹងណាយ ស្រុកព្រៃឈរ ខេត្តកំពង់ចាម បានរើសទារកភ្លោះ ០២នាក់(ប្រុស) ដែលត្រូវបានឪពុកម្តាយ បោះបង់ចោល នៅតាមផ្លូវក្បែរវត្តជយរាម (ហៅវត្តស្តើងជ័យ) ស្ថិតក្នុងភូមិស្តើងជ័យ ឃុំស្តើងជ័យ ស្រុកជើងព្រៃ ហើយបានយកទារកភ្លោះនោះ មកមើលថែទាំ នៅឯផ្ទះរបស់​ខ្លួន​។

លោក​បន្តថា នៅថ្ងៃទី២៧ ខែមីនា កន្លងទៅ លោកស្រី​ អនហេង លក្ខិណា បានអញ្ជើញចុះសួរសុខទុក្ខទារកភ្លោះទាំង ០២នាក់ នោះ​ ឃើញថា សុខភាពមិនសូវល្អ ដោយសារកើតមិនគ្រប់ខែ ក៏បញ្ជូនមកមន្ទីរពេទ្យកុមារខេត្តកំពង់ចាម បន្តការថែទាំ ហើយនៅថ្ងៃម្សិលមិញ លោកស្រី​ ប៉ាង ដានី អភិបាលរងខេត្តកំពង់ចាម បានចុះទទួលកូនភ្លោះទាំង២នាក់ កំពុងថែទាំ នៅមន្ទីរពេទ្យខេត្តកំពង់ចាម៕SRP

ខេត្តកំពង់ចាម​៖សម្តេចនាយករដ្ឋមន្ត្រីហ៊ុន​ សែន​ បានផ្ដល់អំណោយដល់ ប្រជាពលរដ្ឋ​រងគ្រោះ​ ដោយ​ខ្យល់​កន្ត្រាក់​ ខូចខាត​ផ្ទះ​សំបែង​ ចំនួន​៥៧គ្រួសារ​ នៅឃុំព្រែកកក់ ស្រុកស្ទឹងត្រង់ ខេត្តកំពង់ចាម​។

ការផ្ដល់អំណោយ​ តាមរយៈ​លោក​ អ៊ុន​ ចាន់ដា​ អភិបាលខេត្តកំពង់ចាម​ នៅ​សាលា​ស្រុក​ស្ទឹងត្រង់​ នៅរសៀលថ្ងៃទី​៣១​ ខែមីនា​ ឆ្នាំ​២០២៣​។ 

ក្នុងឱកាសចំណែកអំណោយលោក​ អ៊ុន​ ចាន់ដា​  បានពាំនាំនូវការផ្តាំផ្ញើ​ សាកសួរសុខទុក ពី​សំណាក់​ សម្តេចតេជោ​ ហ៊ុន​ សែន​ និង​ជា​ប្រធានគណៈកម្មាធិការជាតិគ្រប់គ្រងគ្រោះមហន្តរាយ​ បាន​ចូលរួម​សោកស្ដាយ​ ចំពោះ​ការ​ខូចខាត​ ផ្ទះ​សំបែង​ របស់​បងប្អូន​ប្រជាពលរដ្ឋ​ ដែល​បង្ក​ឡើង​​ដោយ​កត្តា​គ្រោះ​ធម្មជាតិ​នេះ​។

លោកអ៊ុន​ ចាន់ដា​ ក៏បាន​ក្រេីនរំលឹក​ដល់​បងប្អូន​ប្រជាពលរដ្ឋ​ ឱ្យ​បង្កេីន​ការ​ប្រុងប្រយ័ត្ន​ នៅ​ពេល​មាន​​ភ្លៀង​ខ្យល់​ផ្គរ​រន្ទះ​ ព្រោះ​មាន​ហានិភ័យ​ខ្ពស់​ដែល​អាច​បង្ក​គ្រោះថ្នាក់​ បាន​គ្រប់​ពេល​ ជាពិសេស​កូនចៅ​តូចៗ​ កុំ​ឲ្យ​ចេញ​ក្រៅផ្ទះ​ ឬ​នៅ​ទីវាល។

លោក អ៊ុន​ ចាន់ដា​ ក៏​បាន​ផ្តាំផ្ញេី​ដល់ប្រជាពលរដ្ឋ​ ឱ្យ​យក​ថវិកា​ ដែល​ទទួល​បាន​ក្នុង​ការ​ឧបត្តម្ភ​នេះ​ ទៅ​ទិញ​សម្ភារ​ ដេីម្បី​កសាង​លំនៅឋាន​ឡើង​វិញ​ ហើយ​ត្រូវ​បន្ត​ប្រកប​មុខរបរ​ទទួលទាន​ ឬ​ធ្វើ​ការ​ដាំដុះ​​ បង្កបង្កើនផល​ឡើង​វិញ​ផងដែរ​។

គួរ​បញ្ជាក់​ថា​ អំណោយដែលផ្ដល់ជូនពលរដ្ឋទាំងចំនួន ៥៧ គ្រួសារ ដោយ​ក្នុង១គ្រួសារ ទទួលបានអង្កចំនួន ២៥គីឡូក្រាម មី១កេស ទឹកត្រី១យួរ តង់១។​ ដោយឡែក គ្រួសារដែលរងគ្រោះធ្ងន់ធ្ងរ ចំនួន ៥គ្រួសារ ក្នុង​ ១គ្រួសារ ទទួលបានថវិកាចំនួន ២០០.០០០រៀល និង គ្រួសារដែលរងគ្រោះ មធ្យមចំនួន ៥២ គ្រួសារ គឺក្នុង ១គ្រួសារ ទទួលបានថវិកាចំនួន ១០០.០០០រៀល ផងដែរ​។

បេីតាម​លោក បាន ស្រេង អភិបាលរង ស្រុកស្ទឹងត្រង់ បានឱ្យដឹងថា កាលពី​ថ្ងៃទី២៨ ខែមិនា ឆ្នាំ២០២៣ កន្លង​ទៅ​នេះ​ មានភ្លៀងធ្លាក់ លាយខ្យល់យ៉ាងខ្លាំង​ បណ្តាល​ឱ្យ​ប្រជាពលរដ្ឋក្នុងភូមិចំនួន ៦ ដែល​មាន ៥៧គ្រួសារ ក្នុងនោះ រលំផ្ទះផ្ទះ ៥ខ្នង និងរបើកដំបូល ចំនួន ៥២ខ្នង តែមិនមានគ្រោះថ្នាក់ដល់មនុស្សឡេីយ​៕SRP

ខេត្តសៀមរាប៖មន្ត្រីរដ្ឋបាលព្រៃឈើខេត្តសៀមរាប បានឃាត់ខ្លួន ប្រធានសហគមន៍ការពារព្រៃឈើម្នាក់ និងអនុភូមិម្នាក់ ករណីកាប់រលំដើមឈើនិងការទន្ទ្រានដីព្រៃឈើនៅភូមិសាស្ត្រភូមិត្រពាំងពពេល ឃុំ តាសៀម ស្រុកស្វាយលើ ខេត្តសៀមរាប។

នាយសង្កាត់រដ្ឋបាលព្រៃឈើស្វាយលើ លោកមែន វុទ្ធី បានឲ្យដឹងនៅថ្ងៃសុក្រនេះថា ក្រោយទទួលព័ត៌មានពីការកាប់រលំដើមឈើ និងការទន្ទ្រានដីព្រៃឈើ នៅថ្ងៃទី ២៧ ខែ មីនា ឆ្នាំ ២០២៣ ក្រុមការងារ ខណ្ឌរដ្ឋបាលព្រៃឈើសៀមរាប ដឹកនាំដោយលោក ប្រាក់ ម៉ារីណា នាយរងខណ្ឌរដ្ឋបាលព្រៃឈើ និងដោយមានការចូលរួម ពីមន្ត្រីរដ្ឋបាលព្រៃឈើ សហការជាមួយអាជ្ញាធរមូលដ្ឋាន បានចុះធ្វើការស៊ើបអង្កេតដោយពិនិត្យជាក់ស្ដែងទីតាំងបទ ល្មើសព្រៃឈើ និងបានជួបប្រជុំជាមួយប្រជាពលរដ្ឋ ជាសមាជិក សហគមន៍ព្រៃឈើភូមិត្រពាំងពពេល ទទួលបានលទ្ឋផល ដូចខាងក្រោម៖១
ទីតាំងប្រព្រឹត្តបទល្មើសទីតាំងប្រព្រឹត្តបទល្មើសនៅភូមិសាស្ត្រភូមិត្រពាំងពពេល ឃុំតាសៀម ស្រុកស្វាយលើ ខេត្តសៀមរាប ដោយបទ ល្មើសប្រព្រឹត្តឡើងក្នុងដែនព្រៃសហគមន៍ និងតំបន់ទ្រនាប់ព្រៃសហគមន៍។

លោកមែន វុទ្ធី បានបន្តថា បទល្មើសព្រៃឈើនេះ កើតឡើងតាំងពីថ្ងៃទី២០ ខែ កុម្ភៈឆ្នាំ ២០២៣ ផ្តើមឡើងដោយការកសាងផ្លូវដីមួយខ្សែ ប្រវែង ៥ គីឡូម៉ែត្រ តាមព្រំប្រទល់ព្រៃសហគមន៍។ អ្នកផ្ដើមកសាងផ្លូវនិងមេក្លោង ប្រព្រឹត្តបទល្មើស មានឈ្មោះ ទិត សុខាក់ ជាប្រធានគណៈកម្មការគ្រប់គ្រងសហគមន៍ព្រៃឈើភូមិត្រពាំងពពេល និង ឈ្មោះ សរ ឈាន ជាអនុ ភូមិភូមិត្រពាំងពពេល។

បើតាម លោកទា គឹមសុទ្ធ ប្រធានមន្ទីរកសិកម្មរុក្ខាប្រម៉ាញ់និងនេសាទខេត្តសៀមរាប បានឲ្យដឹងនៅរសៀលថ្ងៃនេះថា សហគមន៍ព្រៃឈើភូមិត្រពាំងពពេល ឃុំតាសៀម ស្រុកស្វាយលើ ត្រូវបានបង្កើតឡើងនាឆ្នាំ ២០១៣ មានផ្ទៃដី ១១៣៦ ហិកតា ត្រូវបានក្រសួងកសិកម្ម រុក្ខាប្រមាញ់និងនេសាទចេញប្រកាសទទួលស្គាល់ជាផ្លូវការ នៅថ្ងៃទី ២៥ ខែមករា ឆ្នាំ ២០១៧។ ប៉ុន្តែដោយឃើញសក្តានុពលព្រៃឈើជាប់តំបន់ព្រៃសហគមន៍ មានលក្ខណៈល្អប្រសើរ រដ្ឋបាលព្រៃឈើ និងសមាជិក សហគមន៍ព្រៃឈើ បានឯកភាពគ្នាពង្រីកផ្ទៃដីជាតំបន់ទ្រនាប់ព្រៃសហគមន៍ ទំហំ១៣២ ហិកតាបន្ថែមទៀត ដោយបោះបង្គោលព្រំប្រទល់ និង ដាក់ស្លាកសញ្ញាតាមព្រំប្រទល់ផ្ទៃដីដែលបានពង្រីក។ បទល្មើសកាប់រលំដើមឈើ ភាគច្រើនកើតនៅតំបន់ទ្រនាប់ព្រៃសហគមន៍ ទំហំ១៣២ ហិកតា។

ករណីនេះបច្ចុប្បន្នជនសង្ស័យទាំង២នាក់ ត្រូវបានខណ្ឌរដ្ឋបាលព្រៃឈើខេត្តសៀមរាប កសាងសំណុំរឿងបញ្ជូនខ្លួនមកកាន់តុលាការ ដើម្បីចាត់ការបន្តតាមផ្លូវច្បាប់៕SRP

លោកគួច ចំរើន អភិបាលខេត្តព្រះសីហនុ បានប្រាប់ប្រធានសាខាគយ និងរដ្ឋាករកំពង់ផែស្វយ័តក្រុងព្រះសីហនុ ទើបឡើងថ្មីត្រូវប្រកាន់ភ្ជាប់នូវអភិក្រម របស់សម្តេចតេជោ ហ៊ុន សែន គឺ “ឆ្លុះកញ្ចក់, ងូតទឹក, ដុសក្អែល, ព្យាបាល, និងវះកាត់” និងបាវចនាពីរគឺ “កែទម្រង់ខាងក្នុង” និង “បង្កើតមិត្តខាងក្រៅ” ដោយស្មារតីឯករាជ្យ និងធ្វើឱ្យបាន ធ្វើឱ្យលឿន និងមានតម្លាភាព ។​​ -មន្រ្តីគឺជាអ្នកបម្រើប្រជាពលរដ្ឋដ៏ស្មោះត្រង់ មិនមែនជាចៅហ្វាយនាយនោះទេ។ -ការបម្រើសេវារដ្ឋបាល គឺជាសូចនាករដ៏តម្លាភាពបំផុត ក្នុងការវាយតម្លៃមន្រ្តី ។ -រដ្ឋបាលមូលដ្ឋាន គឺក្តីរំពឹងអំពីជីវភាពប្រចាំថ្ងៃ របស់ប្រជាជនយើង។

ក្នុងពិធីផ្ទេរ និងតែងតាំងប្រធានសាខាគយ និងរដ្ឋាករកំពង់ផែស្វយ័តក្រុងព្រះសីហនុ នៅរសៀលថ្ងៃព្រហស្បតិ៍ ម្សិលមិញ លោកគួច ចំរើន ក៏បានថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្រ្តីបុគ្គលិក នៃសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ដែលបានខិតខំប្រឹងប្រែងយកអស់កម្លាំងកាយចិត្ត ប្រាជ្ញា ស្មារតីក្នុងការដឹកនាំសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ទទួលបានលទ្ធផលល្អប្រសើរ។ ដូច្នេះលោកប្រធានថ្មី និងមន្ត្រីដែលបានតែងតាំងថ្មី ត្រូវបន្តនិរន្តរភាពដឹកនាំសាខាគយ និងរដ្ឋាករកំពង់ផែអន្តរជាតិ ខិតខំប្រមូលចំណូលពន្ធឱ្យទទួលបានជោគជ័យ បន្ថែមទៀត និងសម្រេចបានសមិទ្ធផលថ្មីៗ ស្របតាមគោលការណ៍ច្បាប់ និងលិខិតបទដ្ឋានគតិយុត្ត ដើម្បីអនុវត្តតាមតួនាទី ភារកិច្ច ដែលថ្នាក់ដឹកនាំប្រគល់ជូន បន្តអភិវឌ្ឍន៍ និងកិច្ចប្រតិបត្តិការល្អ ទន់ភ្លន់ ហ្មត់ចត់ ជាមួយកំពង់ផែស្វយ័តក្រុងព្រះសីហនុ រដ្ឋបាលក្រុង-ស្រុក ឱ្យកាន់តែល្អប្រសើរ ប្រកបដោយមនសិការវិជ្ជាជីវៈ មានការទទួលខុសត្រូវខ្ពស់។

បញ្ជាក់ លោក នង សុខុម អត្តលេខ១០៩៩ បច្ចុប្បន្នជាប្រធានសាខាគយ និងរដ្ឋាករខេត្តមណ្ឌលគិរី ត្រូវបានផ្ទេភារកិច្ចឱ្យទៅបំពេញការងារជាប្រធានសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ៕SRP

ភ្នំពេញ៖ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅរសៀលថ្ងៃទី៣០ ខែមីនា ឆ្នាំ២០២៣ បានទទួលជួបពិភាក្សាការងារជាមួយនឹង ឯកឧត្តម អ៊ូអិណុ អាស៊ឺស៊ិ (UENO Atsushi) ឯកអគ្គរាជទូតជប៉ុនប្រចាំកម្ពុជា នៅទីបញ្ជាការកងទ័ពជើងគោក នៃកងយោធពលខេមរភូមិន្ទ។

ក្នុងជំនួបនេះ ឯកឧត្តម អ៊ូអិណុ អាស៊ឺស៊ិ បានរំឭកអំពីទំនាក់ទំនងជាប្រវត្តិសាស្ត្រដ៏យូរលង់ជប៉ុន-កម្ពុជា ចាប់តាំងពីសតវត្សរ៍ទី១៧ ហើយបន្តរហូតមកដល់បច្ចុប្បន្ន ដោយឆ្នាំ២០២៣ នេះ ទំនាក់ទំនងរវាងប្រទេសទាំងពីរបានឡើងដល់កម្រិតល្អបំផុតក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ ស្របពេលនឹងការប្រារព្ធខួបលើកទី៧០ នៃការបង្កើតចំណងការទូតផ្លូវការ។

ឯកឧត្តម ឯកអគ្គរាជទូត ក៏បានថ្លែងអំណរគុណចំពោះការជ្រោមជ្រែងរបស់ នាយឧត្តមសេនីយ៍ ហ៊ុន ម៉ាណែត ក្នុងការលើកកម្ពស់កិច្ចសហប្រតិបត្តិការយោធាទ្វេភាគី រហូតមានវឌ្ឍនភាពរីកចម្រើនគួរជាទីមោទនៈ ហើយទំនាក់ទំនងដ៏ល្អនេះ ក៏នឹងត្រូវបន្តពង្រឹង និងពង្រីកជាមួយគ្រប់ប្រភេទទ័ព ទាំងជើងគោក, ជើងទឹក និងជើងអាកាស។

ឯកឧត្តម ឯកអគ្គរាជទូត ក៏បានបញ្ជាក់ផងដែរអំពីការប្តេជ្ញាចិត្តក្នុងការខិតខំប្រឹងប្រែងទាក់ទាញវិនិយោគិនជប៉ុនមកកម្ពុជាឱ្យបានកាន់តែច្រើនឡើងថែមទៀតនៅក្នុងអាណត្តិនៃបេសកកម្មការទូតរបស់ ឯកឧត្តម។

ជាការឆ្លើយតប នាយឧត្តមសេនីយ៍ ហ៊ុន ម៉ាណែត បានវាយតម្លៃខ្ពស់ចំពោះទំនាក់ទំនងដ៏ល្អជិតស្និទ្ធរវាងប្រទេស ប្រជាជន និងកងទ័ពកម្ពុជា-ជប៉ុន ដោយក្នុងនេះ ជប៉ុនបានដើរតួនាទីយ៉ាងសំខាន់ក្នុងដំណើរការសន្តិភាព និងការស្តារកសាងកម្ពុជាឡើងវិញក្នុងដំណាក់ទសវត្សរ៍ឆ្នាំ១៩៩០ ហើយរហូតមកបច្ចុប្បន្ននេះ នៅក្រោមការយកចិត្តទុកដាក់របស់ សម្តេចតេជោ នាយករដ្ឋមន្ត្រី និងប្រមុខថ្នាក់ដឹកនាំជប៉ុនជាច្រើនរូប, ប្រទេសទាំងពីរក៏នៅរក្សាបាននូវកិច្ចសហប្រតិបត្តិការស្អិតរមួតលើគ្រប់វិស័យ ទាំងផ្នែកនយោបាយ, ការពារជាតិ, សេដ្ឋកិច្ច, អប់រំ និងវប្បធម៌ ក៏ដូចជាការគាំទ្រគ្នាទៅវិញទៅមកក្នុងក្របខ័ណ្ឌតំបន់ និងអន្តរជាតិ។

ទន្ទឹមគ្នានេះ ឯកឧត្តម មេបញ្ជាការកងទ័ពជើងគោក ក៏បានលើកឡើងផងដែរអំពីសមិទ្ធផលកិច្ចសហប្រតិបត្តិការប្រកបដោយផ្លែផ្កា រវាងកងទ័ពជើងគោក នៃកងយោធពលខេមរភូមិន្ទ និងកងស្វ័យការពារជើងគោកជប៉ុន ក្នុងប៉ុន្មានឆ្នាំចុងក្រោយនេះ ជាពិសេសការសម្រេចបាននូវការចុះហត្ថលេខាលើឯកសារលក្ខខណ្ឌស្តីពីកិច្ចសហប្រតិបត្តិការ ដែលជាយន្តការអចិន្ត្រៃយ៍សម្រាប់បង្កើនសកម្មភាពកិច្ចសហប្រតិបត្តិការក្នុងកម្រិតកងទ័ពជើងគោកឱ្យមានភាពសកម្មជាក់ស្តែង និងរស់រវើក៕SRP