ខេត្តកំពង់ចាម​៖លោកអ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត នៅរសៀលថ្ងៃទី៣០ ខែមីនា ឆ្នាំ២០២៣ បានអញ្ជើញនាំអំណោយ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ផ្ដល់ជូនប្រជាពលរដ្ឋរងគ្រោះ ដោយខ្យល់កន្ត្រាក់ ចំនួន ៣៦គ្រួសារ នៅឃុំសំបូរ និងឃុំតាំងក្រាំង ស្រុកបាធាយ។

ឆ្លៀត​ក្នុង​ឱកាសនោះដែរ​ លោក អ៊ុន ចាន់ដា បានពាំនាំនូវប្រសាសន៍ផ្ដាំផ្ញើ ពីសំណាក់ សម្តេចតេជោ ហ៊ុន សែន ទោះបីសម្ដេច មិនបានអញ្ជើញ មកដោយផ្ទាល់ តែសម្ដេច លោក តែងតែមានក្តីនឹករលឹក គិតគូរអំពីសុខទុក្ខជាប្រចាំ ចំពោះ ប្រជាពលរដ្ឋ ទាំងអស់ ពិសេសប្រជាពលរដ្ឋ ដែលជួបការលំបាក រងគ្រោះ និងងាយរងគ្រោះ ហើយតែងបានចាត់តំណាង ចុះអន្តរាគមន៍ នាំយកនូវអំណោយសង្រ្គោះបន្ទាន់ ផ្ដល់ជូនទាន់ពេលវេលា។

បើតាម លោក ផេន សុផល អភិបាលស្រុកបាធាយ ឲ្យដឹងថា នៅថ្ងៃទី២៨ ខែមីនា ឆ្នាំ២០២៣ កន្លងទៅ មានភ្លៀងធ្លាក់ លាយឡំជាមួយខ្យល់បោកបក់យ៉ាងខ្លាំង បណ្តាលឲ្យប៉ះពាល់លំនៅដ្ឋាន របស់ប្រជាពលរដ្ឋចំនួន ៣៦គ្រួសារ ក្នុងនោះ នៅឃុំសំបូរ បានរងនូវផលប៉ះពាល់ចំនួន ៤ភូមិ ស្នើនឹង ចំនួន ៣៣ ខ្នង (រលំផ្ទះ ០៧ខ្នង របើកដំបូលផ្ទះ ២៥ខ្នង និងដំបូលសាលា ០១ខ្នង) និងនៅភូមិតាពយ រលំផ្ទះ ០៣ខ្នង និងរបើកដំបូលផ្ទះ ០៩ខ្នង និងនៅភូមិបាឡាំង រលំផ្ទះ ០១ខ្នង និងរបើកដំបូលផ្ទះ ០៣ខ្នង នៅភូមិសង្កើប រលំផ្ទះ ០៣ខ្នង របើកដំបូលផ្ទះ១០ខ្នង និងសាលារៀន ០១ខ្នង នៅភូមិវាលរបើកដំបូល ០៣ខ្នង ឃុំតាំងក្រាំង ប៉ះពាល់ ចំនួន ០១ភូមិ របើកដំបូលផ្ទះ ចំនួន ០៣ខ្នង និងភូមិជើងឆ្នុក របើកដំបូលផ្ទះ ៣ខ្នង។

សូមបញ្ជាក់ថា អំណោយដែលបានផ្ដល់ជូនប្រជាពលរដ្ឋ ដែលរងគ្រោះ ទាំង ៣៥គ្រួសារ ក្នុង១គ្រួសារ ទទួលបានអង្ករ ចំនួន ២៥គីឡូក្រាម មី ១កេស ទឹកត្រី ១យួរ តង់១។ ដោយឡែក គ្រួសារ ដែលរងគ្រោះធ្ងន់ធ្ងរ ចំនួន ០៧គ្រួសារ ក្នុង ១គ្រួសារ ទទួលបានថវិកាចំនួន ២០០.០០០រៀល គ្រួសារដែលរងគ្រោះមធ្យម ចំនួន ២៨គ្រួសារ ក្នុង ១គ្រួសារ ថវិកា ចំនួន ១០០.០០០រៀល ផងដែរ៕SRP

ខេត្តកំពង់ចាម​៖លោកអ៊ុន​ ចាន់ដា​ អភិបាលខេត្តកំពង់ចាម​ បាន​ថ្លែង​ប្រាប់​ថ្នាក់ដឹកនាំ​ធនាគារហ្វីលីព ភីអិលស៊ី​ ត្រូវ​បង្កើត​ជំនឿ​ ឱ្យ​អតិថិជន​ និង​បុគ្គលិក​របស់​ខ្លួន​ មាន​ការ​ជឿជាក់​ និង​ទទួលបាន​សុខមាលភាព​ សង្គម​ ពិសេស​ត្រូវ​ឈរ​លើ​គោលការណ៍​ ច្បាប់​ ក្រៅពី​នោះ​ត្រូវ​ចូលរួម​ជាមួយ​ រាជរដ្ឋាភិបាល​ និង​អាជ្ញាធរ​មូលដ្ឋាន​ ​ដេីម្បី​រួមគ្នា​ថែរក្សា សុខសន្តិភាព ស្ថិរភាពនយោបាយ ព្រោះ​ការ​បេីក​ធនាគារ​ទៅ​បាន​ដោយ​សារ​ប្រទេស​ជាតិ​យើង​​មាន​សុខសន្តិភាព​នេះ​ហើយ​។

លោកថ្លែង​បែប​នេះ​ក្នុងពិធីសម្ពោធដាក់ឱ្យប្រើប្រាស់ជាផ្លូវការ​នូវ​អគារការិយាល័យ ធនាគារហ្វីលីព ភីអិលស៊ី សាខាកំពង់ចាម នៅរសៀលថ្ងៃព្រហស្បតិ៍ ម្សិលមិញ។

អភិបាលខេត្តកំពង់ចាម​ ក៏បាន​សម្ដែង​នូវ​ការ​ស្វាគមន៍ ប្រកបដោយភាពកក់ក្ដៅ ចំពោះវត្តមានធនាគារ ហ្វីលីព ភីអិលស៊ី នៅលើទឹកដីខេត្តកំពង់ចាម ខណៈ​ធនាគារ ហ្វីលីព ភីអិលស៊ី បានខិតខំធ្វើការប្រែក្លាយទៅជា សាខាមួយដែលបើកបម្រើការសេវាធនាគារ និងបានចូលរួមចំណែកយ៉ាងសំខាន់ក្នុងសេវាកម្មហិរញ្ញវត្ថុ នៅកម្ពុជា តាមរយៈប្រតិបត្តិការនៅ៧០សាខាក្នុងប្រទេសកម្ពុជា ដោយឡែកខេត្តកំពង់ចាមក៏មាន៦ សាខា និងមានបុគ្គលិកកំពុងបម្រើការចំនួន​ ១៣០នាក់​ផងដែរ​។

លោកបានថ្លែងថា​ ដោយ​វឌ្ឍនភាពវិស័យកសិកម្ម ឧស្សាហកម្ម កសិឧស្សាហកម្ម និងទេសចរណ៍ វិស័យធនាគារ និងហិរញ្ញវត្ថុ ក្នុងខេត្តកំពង់ចាមក៏មានការីកចំរើនគួរឱ្យគត់សំគាល់ផងដែរ​ ដោយក្នុងនោះ គ្រឹះស្ថានធនាគារ និងហិរញ្ញវត្ថុដែលកំពុងប្រតិបត្តិការនៅក្នុងខេត្ត មានចំនួន ៥០គ្រឹះស្ថាន ជាមួយសាខាសរុប ចំនួន១៥៨ បានចូលរួមចំណែកគាំទ្រដល់ការអភិវឌ្ឍសេដ្ឋកិច្ចប្រកបដោយបរិយាបន្ន តាមរយៈការផ្តល់សេវាហិរញ្ញវត្ថុនានា​ ជូនប្រជាពលរដ្ឋ និងក្រុមហ៊ុន សហគ្រាស​។

លោក ចាន់ ម៉ាច អគ្គនាយកធនាគារហ្វីលីព ភីអិលស៊ីរ​ បានឱ្យដឹងថា​ ចាប់តាំងពីឆ្នាំ១៩៧៥​ មកបណ្តាញក្រុមហ៊ុន Phillip Capital បានរីកចម្រើនលើសកលលោក ដែលជាក្រុមហ៊ុនហិរញ្ញវត្ថុអាស៊ីរួមបញ្ចូលគ្នា ដែលមានបុគ្គលិកច្រើនជាង ៥,០០០នាក់ និង អតិថិជនច្រើនជាង មួយលាននាក់ នៅទូទាំងពិភពលោក ហើយទ្រព្យសម្បត្តិស្ថិតនៅក្រោម ការគ្រប់គ្រងលើស ៣៥ពាន់លានដុល្លារអាមេរិក និងមូលនិធិរបស់ម្ចាស់ភាគហ៊ុនលើសពី ១.៥ពាន់លានដុល្លារ​ ផងដែរ​៕SRP

ភ្នំពេញ៖ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានអនុញ្ញាតឱ្យ Dominic Williams ឯកអគ្គរាជទូតចក្រភពអង់គ្លេសប្រចាំព្រះរាជាណាចក្រកម្ពុជា ចូលជួបសម្តែងការគួសម និង ពិភាក្សាការងារ នៅទីបញ្ជាការកងទ័ពជើងគោកនៃកងយោធពលខេមរភូមិន្ទ នារសៀលថ្ងៃទី៣០ ខែមីនា ឆ្នាំ២០២៣។

នៅក្នុងជំនួបនេះ ឯកឧត្តម ឯកអគ្គរាជទូត បានលើកឡើងអំពីទំនាក់ទំនងកិច្ចសហប្រតិបត្តិការល្អរវាងប្រទេសទាំងពីរចក្រភពអង់គ្លេស-កម្ពុជា ជាពិសេសក្នុងវិស័យពាណិជ្ជកម្ម, ទេសចរណ៍, អប់រំ និងការបោសម្អាតមីន ហើយឆ្នាំ២០២៣ ប្រទេសទាំងពីរក៏គ្រោងរៀបចំព្រឹត្តិការណ៍មួយចំនួន ដើម្បីអបអរសាទរខួបលើកទី ៧០ឆ្នាំនៃចំណងការទូតផងដែរ។ ដោយទ្បែក ចំពោះវិស័យការពារជាតិវិញ ឯកឧត្តម ឯកអគ្គរាជទូត បានបង្ហាញនូវការប្តេជ្ញាចិត្តក្នុងការបន្តនូវកិច្ចខិតខំប្រឹងប្រែងដើម្បីពង្រឹងចំណងមិត្តភាព និងពង្រីកកិច្ចសហប្រតិបត្តិការរវាងកងទ័ពនៃប្រទេសទាំងពីរឱ្យកាន់តែសកម្ម ដូចដែលស្តែងឡើងតាមរយៈការចាប់ផ្តើមចូលចតនាវារបស់កងទ័ពជើងទឹកចក្រភពអង់គ្លេស កាលពីខែកុម្ភៈ ឆ្នាំ២០២៣ កន្លងទៅនៅកំពង់ផែស្វយ័តក្រុងព្រះសីហនុ។

ជាការឆ្លើយតប នាយឧត្តមសេនីយ៍ មេបញ្ជាការកងទ័ពជើងគោក បានធ្វើការវាយតម្លៃខ្ពស់ចំពោះកិច្ចសហប្រតិបត្តិការល្អរវាងប្រទេសទាំងពីរ ជាពិសេសការចូលរួមរបស់ចក្រភពអង់គ្លេសនៅក្នុងដំណើរការសន្តិភាព និងការអភិវឌ្ឍរបស់ប្រទេសកម្ពុជា ដូចជាតាមរយៈការបន្តផ្តល់ប្រព័ន្ធអនុគ្រោះពន្ធ GSP ជាដើម។ ជាមួយគ្នានេះ នាយឧត្តមសេនីយ៍ ក៏បានលើកឡើងផងដែរអំពីសក្តានុពលនៃកិច្ចសហប្រតិបត្តិការទ្វេភាគីលើវិស័យជាច្រើន រួមមាន៖ វិស័យយោធា, វិស័យសុខាភិបាល និងការភ្ជាប់ជើងហោះហើរត្រង់មកកម្ពុជា សំដៅធ្វើយ៉ាងណាជំរុញការភ្ជាប់ទំនាក់ទំនងឱ្យកាន់តែជិតស្និទ្ធរវាងប្រទេស និងប្រជាជនទាំងពីរបន្ថែមទៀត។

នាយឧត្តមសេនីយ៍ ហ៊ុន ម៉ាណែត ក៏បានថ្លែងអំណរគុណចំពោះរាជរដ្ឋាភិបាលនៃចក្រភពអង់គ្លេស សម្រាប់ចំណងមិត្តភាព និងកិច្ចសហប្រតិបត្តិការដ៏ល្អ និងសូមគាំទ្រចំពោះទិសដៅទៅមុខរបស់រដ្ឋាភិបាល និងក្រសួងការពារជាតិនៃប្រទេសទាំងពីរក្នុងការជំរុញបន្ថែមទៀតនូវទំនាក់ទំនងកិច្ចសហប្រតិបត្តិការលើវិស័យសន្តិសុខ និងការពារជាតិ ដែលជាកិច្ចសហប្រតិបត្តិការបែបយុទ្ធសាស្ត្រដ៏សំខាន់៕SRP

ខេត្តសៀមរាប៖មានការលើកឡើងថា ជាច្រើនខែមកហើយក្រុមឈ្មួញបានឃុបឃិតគ្នាធ្វើសកម្មភាព កាយដីបឹងធម្មជាតិ កន្លែងអភិរក្សពូជត្រី បឹងពារាំង ដឹកលក់រាប់រយឡានក្នុង១ថ្ងៃៗ យ៉ាងគគ្រឹកគគ្រេង មិនទាន់ឃើញមានអាជ្ញាធរជំនាញពាក់ព័ន្ធចុះទៅទប់ស្កាត់នៅឡើយ។ ករណីនេះត្រូវបានសារព័ត៌មានសៀមរាប ប៉ុស្តិ៍ ចេញផ្សាយ ប៉ុន្តែបែរជាសហគមន៍បឹងពារាំង ថាជាព័ត៌មានមិនពិតទៅវិញ។

ប្រការដែលឈ្មួញកាយយកអាចម៍ដី បឹងធម្មជាតិ បឹងពារាំង បានដោយលូនបែបនេះ គេមានការសង្ស័យថាក្រុមឈ្មួញជាមួយអាជ្ញាធរជំនាញពាក់ព័ន្ធ មានការឃុបឃិតគ្នាជាប្រព័ន្ធ ក្នុងការចែកផលប្រយោជន៍គ្នាទៅវិញទៅមក។

ករណីនេះ អាជ្ញាធរជំនាញពាក់ព័ន្ធ មិនគួរបណ្ដែតបណ្ដោយ ឲ្យមានអំពើកាយដីបឹងធម្មជាតិយ៉ាងគគ្រឹកគគ្រេងបែបនេះទេ។ ការកាយយកអាចម៍ដីលក់យ៉ាងអាណាធិបតេយ្យ បែបនេះ គេនៅមិនទាន់ដឹងថា មានលិខិតអនុញ្ញាតឬយ៉ាងណានោះឡើយ។

ដូច្នេះហើយទើបប្រជាពលរដ្ឋ តាមរយ: អង្គភាពសារព័ត៌មាន សៀមរាប ប៉ុស្ដិ៍ ស្នើសុំឲ្យអាជ្ញាធរជំនាញពាក់ព័ន្ធមេត្តាបើកស៊ើបអង្កេត និងចុះទៅទប់ស្កាត់ជាបន្ទាន់ បើពុំដូច្នោះទេ ដីបឹងធម្មជាតិ បឹងពារាំងនិងរងការបំភ្លេចបំផ្លាញយ៉ាងធ្ងន់ធ្ងរ សំណាក់ក្រុមឈ្មួញ ក្នុងនោះដីល្បាប់ផ្នែកខាងលើ ដែលមានជីវៈចម្រុះ អាចនាំឲ្យមានត្រីពងកូន ត្រូវបានឈ្មួញដឹកជញ្ជូនចេញមកក្រៅលក់ ដោយគ្មានការទប់ស្កាត់នោះទេ។

ជុំវិញករណីនេះ លោកអ៊ឹង សោភ័ណ្ឌ នាយកទីចាត់ការអន្តរវិស័យរដ្ឋបាលខេត្តសៀមរាប បានបញ្ជាក់តាមតេឡេក្រាមថា សូមយកព័ត៌មានអោយច្បាស់សិនចាំសរសេរបង ព្រោះពាក់ព័ន្ធនឹងគម្រោងស្តារ និងអភិរក្ស ដែលមានការឯកភាពពីក្រសួងរួចហើយ៕

ខេត្តសៀមរាប៖ពលរដ្ឋម្នាក់ ត្រូវបានរន្ទះបាញ់ សម្លាប់នៅល្ងាចថ្ងៃពុធម្សិលមិញ នៅចំណុចតាមផ្លូវរទេះក្នុងព្រៃសហគមន៍ ស្ថិតក្នុងភូមិត្បែងលិច ឃុំត្បែង  ស្រុកបន្ទាយស្រី ខេត្តសៀមរាប។

ជនរងគ្រោះ ឈ្មោះ  ពីង ហេ ភេទប្រុសអាយុ ៣៩ឆ្នាំ រស់នៅភូមិត្បែងលិច ឃុំត្បែង ស្រុកបន្ទាយស្រី ខេត្តសៀមរាប មុខរបរដើររកឃ្មុំ និងដុតធ្យូង។

ប្រភពបានអីដឹងថា ជនរងគ្រោះ មានស្នាមរន្ទះបាញ់ និងនៅលើសក់ក្បាល ស្នាមឆេះខ្លោចសក់ ហើយ
នៅកន្លែងកើតហេតុ នៅលើដើមឈើទាល មានដើមវល្លិ៍គុយឡើង ហើយដើមវល្លិ៍គុយ មានស្នាមដាច់រលាត់ ដោយសារគ្រាប់រន្ទះបាញ់ និងនៅនិងដីលើផ្លូវ ឃើញមានស្នាមរន្ទះបាញ់ឆូត មួយកន្លែង ចម្ងាយពីជនរងគ្រោះដួល ០៥ ម៉ែត្រ។

យោងតាមការធ្វើកោសល្យវិច័យរបស់ជំនាញនិងគ្រូពេទ្យមណ្ឌលសុខភាពត្បែង សន្និដ្ឋានថា រងគ្រោះបានស្លាប់ដោយសារ រន្ទះបាញ់ពិតមែន៕SRP

អភិបាលខេត្ត​កំពង់ចាម លោក អ៊ុន​ ចាន់ដា​ បានប្រាប់កម្លាំងនគរបាល និងសហគមន៍ ត្រូវពង្រឹងបន្ថែមសំដៅជំរុញ ការអនុវត្ត គោលនយោបាយភូមិ-ឃុំ-សង្កាត់មានសុវត្ថិភាពទាំង៧ចំណុច ដើម្បីលើកកម្ពស់ការចូលរួមរបស់ ប្រជាពលរដ្ឋ​ ក្នុងការបង្ការទប់ស្កាត់ និងបង្ក្រាបបទល្មើសនានានៅមូលដ្ឋាន ការជួញដូរចែកចាយ ប្រើប្រាស់គ្រឿងញៀនខុសច្បាប់ បទល្មើសលួច-ឆក់-ប្លន់ ល្បែងស៊ីសងខុសច្បាប់ អំពើហិង្សា ក្រុមក្មេងទំនើង និងបទល្មើសគ្រប់ប្រភេទ ផងដែរ​។

អភិបាលខេត្តកំពង់ចាម​ ក៏បានថ្លែងថា​ គណៈបញ្ជាការឯកភាពរដ្ឋបាលខេត្ត បានត្រៀមខ្លួនជាស្រេច​ ក្នុងការបន្តអនុវត្ត ដោយយកចិត្តទុកដាក់គោលនយោបាយ ភូមិ ឃុំ សង្កាត់ មានសុវត្ថិភាព តាមរយៈការចូលរួមថែរក្សា សុខសន្តិភាព ស្ថិរភាពនយោបាយ សំដៅបន្តការអភិវឌ្ឍខេត្តកំពង់ចាម ឱ្យ​មានការរីកចម្រើនលើគ្រប់វិស័យជាបន្តទៀត។

ក្នុងកិច្ចប្រជុំបូកសរុប លទ្ធផលការងារភូមិ ឃុំ-សង្កាត់ មានសុវត្ថិភាពរបស់ខេត្តកំពង់ចាម​ នៅថ្ងៃព្រហស្បតិ៍នេះ លោក អ៊ុន​ ចាន់ដា​ ក៏បាន​សម្តែង​នូវ​ការ​កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង​របស់ អាជ្ញាធរមូលដ្ឋានគ្រប់លំដាប់ថ្នាក់ និងកងកម្លាំងមានសមត្ថកិច្ច ដែល​បាន​ខិតខំប្រឹងប្រែង ការពារដល់ សុខ សន្តិភាព សន្តិសុខ សណ្តាប់ធ្នាប់សាធារណៈ នៅតាមមូលដ្ឋាន ពិសេសការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» រហូតដល់ខេត្តកំពង់ចាម ទទួលបានជ័យលាភីលេខ១ ទាំង១០៩ឃុំ​ សង្កាត់ ក្នុងចលនាប្រឡងប្រណាំងការអនុវត្ត គោលនយោយបាយភូមិ-ឃុំ-សង្កាត់ មានសុវត្ថិភាព។​

លោក តេង សាវង្ស រដ្ឋលេខាធិការក្រសួងមហាផ្ទៃ​ ក៏បាន​ណែនាំ​ដល់រដ្ឋបាលខេត្ត ក្រុង ស្រុក និងឃុំ សង្កាត់​ ត្រូវលើកកម្ពស់ការផ្តល់សេវាសាធារណៈ និងការអនុវត្តគម្រោង សកម្មភាពនានា ដែលពាក់ព័ន្ធនឹងការលើកកម្ពស់ជីវភាពរស់ នៅដោយផ្ទាល់ របស់ប្រជាពលរដ្ឋ ជាពិសេស គម្រោងសកម្មភាពផ្នែកសេវាសង្គម គ្រោះមហន្តរាយ និងជំងឺឆ្លងរាតត្បាតកាចសាហាវនានា។​ ហើយ​ត្រូវពង្រឹង​ សម្របសម្រួល និងកិច្ចសហការជាមួយអង្គការសង្គមស៊ីវិល វិស័យឯកជន និងសប្បុរសជននានា ដើម្បីកៀរគរធនធានសម្រាប់អនុវត្តគោលនយោបាយភូមិ-ឃុំ- សង្កាត់មានសុវត្ថិភាព​ ផងដែរ​៕SRP

ខេត្តកំពង់ចាម​៖អភិបាលខេត្តំពង់ចាម​ លោក អ៊ុន​ ចាន់ដា​ បាន​រំលឹក​​ដល់​ក្មួយៗ យុវជន​ ឱ្យ​ខិតខំកសាងខ្លួនប្រកបដោយគុណសម្បត្តិ ៣យ៉ាងគឺ បញ្ញា សីលធម៌ និងកាយសម្បទា ដែលជាមូលដ្ឋានគ្រឹះ​ដ៏​សំខាន់បំផុតនៃការអភិវឌ្ឍ ធនធានមនុស្ស ក្នុងនោះត្រូវរស់នៅ​ឱ្យ​ឆ្ងាយ ពីការប្រើប្រាស់គ្រឿងញៀន​ ផងដែរ។

លោកថ្លែង​បែប​នេះ​ក្នុងពិធីបិទការបោះជំរំយុវជនខេត្តកំពង់ចាម ក្រោមប្រធានបទ​ «​ បេះដូងយុវជនឌីជីថលក្នុងយុគសម័យតេជោសន្តិភាព »​ នៅល្ងាច​ថ្ងៃពុធម្សិលមិញ ក្នុងវិទ្យាល័យសម្ដេចជួនណាត ស្រុកកំពង់សៀម​ ខេត្តកំពង់ចាម​។

ថ្លែងក្នុងពិធី អភិបាលខេត្តកំពង់ចាម​ ក៏បាន​ដាស់តឿន​​ដល់​ក្មួយៗ ជាយុវជន​ទាំងអស់​ ត្រូវកាន់ខ្ជាប់នូវឥរិយាបថល្អ មានទំនុកចិត្តលើខ្លួនឯង ឧស្សាហ៍ព្យាយាម អំណត់ អត់ធន់ក្នុងការងារ មានសច្ចៈទៀងត្រង់ មានអធ្យាស្រ័យ ចេះជួយយកអាសារគ្នាទៅវិញទៅមក។ ត្រូវ​គោរពប្រតិបត្តិទៅតាមដំបូន្មានឪពុកម្តាយ ស្តាប់​គ្រូ​ពន្យល់ណែនាំ និង​ឧស្សាហ៍ព្យាយាមធ្វើការ សិក្សាស្រាវជ្រាវ ដោយ​ត្រូវ​បង្កើនការអានពង្រីកចំណេះដឹង ពិសេសត្រូវខិតខំប្រើប្រាស់សមត្ថភាព ផ្ទាល់ខ្លួនក្នុងការប្រឡង ដើម្បីរក្សាកិត្តិយស សេចក្ដីថ្លៃថ្នូរក្នុងនាមជាអ្នកសិក្សា និងជាយុវជន​គំរូ​ ហើយនៅពេលទំនេរកុំភ្លេចលេងកីឡា ចំពោះការលេងកីឡា គឺជាការរួមចំណែក​ ក្នុងការអភិវឌ្ឍសុខភាព និងបញ្ញាស្មារតី ព្រមទាំង​ចូលរួមក្នុងការគោរពច្បាប់ចរាចរណ៍ ឱ្យ​បខ្ជាប់ខ្ជួន។

អភិបាលខេត្ត​ បាន​បន្ត​ថា​ ការវិនិយោគលើយុវជន ជាតម្រូវការចាំបាច់ ដើម្បីប្រទេសជាតិ មានធនធានមនុស្ស គ្រប់គ្រាន់សម្រាប់ជាកម្លាំងកសាង និងការពារសង្គមជាតិ នា ពេលបច្ចុប្បន្ន និងទៅអនាគត តាមមាគ៌ានយោបាយ ប្រកបដោយគតិបណ្ឌិត របស់សម្តេចតេជោ ហ៊ុន សែន និងបន្តនិរន្តរភាពនៃបុព្វហេតុជាតិនេះ ជារៀងរហូត។

អភិបាលខេត្តកំពង់ចាម​ ក៏បាន​រំពឹងទុកថា​​ ការបោះជំរំយុវជនខេត្តកំពង់ចាម ​ឆ្នាំ២០២៣​ នាពេលនេះ​ ជាកម្មវិធីអភិវឌ្ឍ និងបង្កើនសមត្ថភាពយុវជន ដែលមិនអាចខ្វះ បាននៅក្នុងការងារអប់រំ ព្រោះការបោះជំរំនេះ ធ្វើឱ្យយុវជនចេះសង្កេត ចេះពិចារណាដោយ បង្កើនស្មារតីធ្វើការងារជាក្រុម ធ្វើសេចក្តីសម្រេចចិត្តជាសមូហភាព ចេះស្រឡាញ់ ថែរក្សា ការពារបរិស្ថាន ប្រកបដោយការទទួលខុសត្រូវ ក្នុងស្មារតីពង្រឹងមិត្តភាព និងសាមគ្គីភាពជាពិសេស ការចូលរួមថែរក្សាសន្តិភាព និងអភិវឌ្ឍសហគមន៍ របស់យុវជន​ ផងដែរ៕SRP

ខេត្តកំពង់ចាម​៖អភិបាលខេត្តំពង់ចាម​ លោក អ៊ុន​ ចាន់ដា​ បានថ្លែងអំណរគុណ​យ៉ាង​ជ្រាលជ្រៅ​ ចំពោះ សប្បុរសជន​មកពី​ខេត្ត​ Gyeonggi សាធារណរដ្ឋកូរ៉េ​ ដែល​បាន​ឧបត្ថម្ភរថយន្តសង្គ្រោះ​ ចំនួន​៣គ្រឿង​ ជូន​រដ្ឋបាល​ខេត្ត​ សម្រាប់​ប្រេីប្រាស់​ក្នុង​គ្រា​អាសន្ន​។

គួរ​បញ្ជាក់​ថា​ រថយន្ត​សង្គ្រោះ​ ចំនួន​ ​៣គ្រឿង​ ដែល​បាន​ទទួល​ពី​សប្បុរសជន​ មកពី​សាធារណរដ្ឋកូរ៉េ​ រួម​មាន​ រថយន្ត​ពន្លត់​អគ្គីភ័យ​ចំនួន​ ២គ្រឿង​ សម្រាប់​ជូន​បន្ត​ទៅ​ឱ្យ​ ស្នងការដ្ឋាន​នគរបាល​ខេត្ត​កំពង់ចាម​ និង​រថយន្ត​សង្គ្រោះ​បន្ទាន់ ១គ្រឿង ទៀត សម្រាប់​ជូន​បន្ត​ទៅ​ឱ្យ​មន្ទីរពេទ្យ​បង្អែក​ស្រុក​ស្រីសន្ធរ​ ដេីម្បី​ប្រេីប្រាស់ជាមធ្យោបាយដឹកបញ្ជូនអ្នកជម្ងឺ ទៅសង្គ្រោះនៅមន្ទីពេទ្យបង្អែកខេត្ត ក៏ដូចជាមន្ទីពេទ្យនានានៅរាជធានីភ្នំពេញ។

ក្នុង​ពិធី​ប្រគល់​ និង​ទទួល​ រថយន្ត​សង្គ្រោះ​មក​ពី​សាធារណរដ្ឋកូរ៉េ​ នៅសៀលថ្ងៃពុធ ម្ម្សិលមិញ អភិបាលខេត្ត​ ក៏បាន​​សម្ដែង​នូវការ​គោរព ជូនពរចំពោះទីស្នាក់ការ​ អគ្គីភ័យ​ខេត្ត Gyeonggi​ មូលនិធិសុខុមាលភាពសង្គម​ Go&D០ និង​លោក An Joong Hyun ព្រមទាំងសហការី​ ឱ្យ​ជួបប្រទះនូវពុទ្ធពរ ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ​៕SRP

លោកទៀ សីហា អភិបាលខេត្តសៀមរាប បានថ្លែងអំពាវដល់ពលរដ្ឋ ទៅលេងអង្គរសង្ក្រាន្ត ឱ្យបានច្រេីនកុះករ ដោយមានកម្មវិធីកម្សាន្តជាច្រើន។

ការអំពាវនាវរបស់លោក ទៀ​ សីហា​ ធ្វើឡើង ក្នុងកាស
ដឹកនាំប្រតិភូខេត្តសៀមរាប ចូលរួមសន្និសីទសារព័ត៌មាន ស្ដីពី “ភាពជោគជ័យក្នុងរយៈពេល ៥ឆ្នាំកន្លងមក” របស់រដ្ឋបាលខេត្តសៀមរាប​ ដែលរៀបចំដោយអង្គភាពអ្នកនាំពាក្យរាជរដ្ឋាភិបាល​ នៅទីស្តីការគណៈរដ្ឋមន្ត្រី នៅថ្ងៃពុធម្សិលមិញុំ

ថ្លែងក្នុងសន្និសីទសារព័ត៌មាន នេះ​ អភិបាលខេត្ត​ រូបនេះ ក៏បានបញ្ហាអំពីសមិទ្ធផលសំខាន់ៗ ដែលរដ្ឋបាលខេត្តសម្រេច បានគួរជាទីមោទកភាព​ ដោយក្នុងនោះលោក បានរំលេចនូវសមិទ្ធផលសំខាន់ៗ មានហេដ្ឋារចនាសម្ព័ន្ធរូបវ័ន្ត​ ប្រព័ន្ធធារាស្ត្រ​ ព្រលានយន្តហោះសៀមរាប​-អង្គរ​​ ការងារទេចរណ៍​ ការងារកសិកម្ម។ ល។

ថ្លែងបន្ថែមអភិបាលខេត្ត ក៏បានអំពាវនាវដល់ប្រជាពលរដ្ឋអញ្ជេីញចូលរួមទៅ កម្សាន្ដខេត្តសៀមរាប នាឱកាសខួប​ ១០ឆ្នាំ​ នៃការរៀបចំព្រឹត្តិការណ៍អង្គរសង្ក្រាន្ត នាពេលខាងមុខនេះឱ្យច្រេីនកុះករ៕SRP

អភិបាលខេត្តកំពង់ចាម បានស្នើឲ្យរួមគ្នាដោះស្រាយ ការវិវាទដីធ្លី ការគ្រប់គ្រងសំណង់ ការរៀបចំផែនទីរដ្ឋបាល ផែនទីប្រើប្រាស់ដីឃុំ សង្កាត់ ការសម្រេចលើប្លង់គោល ប្រើប្រាស់ដីក្រុងកំពង់ចាម និងសម្រេចលើផែនទីប្រើប្រាស់ដីខេត្តជាដើម។​

ក្នុងកិច្ចប្រជុំដើម្បីពន្លឿនការងារចុះបញ្ជីដីធ្លីមានលក្ខណៈជាប្រព័ន្ធខេត្តកំពង់ចាម​ នៅថ្ងៃពុធនេះ លោក អ៊ុន​ ចាន់ដា​ក្នុង​កិច្ច​ប្រជុំ​នោះ​ដែរ​ ឯកឧត្តម​ អ៊ុន​ ចាន់ដា​ ក៏បាន​ថ្លែង​ថា​ ក្នុងឆ្នាំ២០២៣នេះ​ យើងទាំងអស់គ្នា​ ត្រូវរួមគ្នាសម្រេច​ឱ្យ​បាននូវផែនការ មួយចំនួន​ ដែលមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត​ បានដាក់ចេញនោះគឺការផ្តល់ប័ណ្ណកម្មសិទ្ធិ ជូន​បងប្អូនប្រជាពលរដ្ឋ​ តាមរយៈ​ការចុះបញ្ជីដីធ្លីមានលក្ខណៈជាប្រព័ន្ធ។

អភិបាលខេត្តំពង់ចាម​រូបនេះ ក៏បាន​អះអាងថា​ ការគ្រប់គ្រងដី ការប្រើប្រាស់ ការបែងចែកដី និងការដោះស្រាយវិវាទដីធ្លី គឺជាកិច្ចការអាទិភាពមួយ​ ដែលអាជ្ញាធរខេត្ត យកចិត្តទុកដាក់បំផុត ព្រោះការងារដីធ្លី គឺជាការងារសំខាន់បំផុតដែលបានកំណត់ក្នុងយុទ្ធសាស្ត្រចតុកោណដំណាក់ទី៤ របស់រដ្ឋាភិបាល​កម្ពុជា។

អភិបាលខេត្ត​ ក៏បាន​ណែនាំ​ដល់​មន្ត្រី​ពាក់ព័ន្ធ​ ត្រូវ​បន្ត​អនុវត្តនូវការងារចុះបញ្ជីដីធ្លីមានលក្ខណៈជាប្រព័ន្ធ ជូនបងប្អូនប្រជាពលរដ្ឋ ឱ្យ​បានសម្រេច​មុន​ផែនការ​ ដែលបានកំណត់​។​ ដោយឡែក​លោក​អភិបាល​ស្រុក ត្រូវសហការណ៍ជាមួយលោកមេឃុំ ប្រធានវាល​ ដើម្បីជ្រើសរើស យកឃុំដែលមានលក្ខណៈងាយស្រួល និងមានទីផ្សាដីធ្លី មក​អនុវត្តមុន​ ដើម្បីប្រមូលទិន្នន័យ​បានលឿន និងចេញប័ណ្ណ ឱ្យ​បានច្រើន ម្យ៉ាងទៀតបើតំបន់នោះមានទីផ្សាដីធ្លី យើងអាចប្រមូលពន្ធពីការលក់ទិញ សម្រាប់​ចូលថវិកាជាតិ។

អភិបាលខេត្តកំពង់ចាម​ បាន​ក្រេីនរំលឹក​ដល់​អាជ្ញាធរគ្រប់ លំដាប់ថ្នាក់ មន្ទីរជំនាញ ឱ្យ​ចូលរួមអនុវត្ត និងជំរុញការដោះស្រាយបញ្ហាវិវាទដីធ្លីនៅទូទាំងខេត្តឱ្យ​មានការថយចុះ។ ចំពោះ​ទំនាស់ដែលនៅសេសសល់ទាំងប៉ុន្មាន នៅពេលបិទផ្សាយទិន្នន័យជាសាធារណះ សូម​ឱ្យ​គណៈកម្មការរដ្ឋបាលពន្លឿនការងារ ដោះស្រាយ​ឱ្យ​បានឆាប់ ដើម្បីបូកសរុបរបាយការណ៍រដ្ឋបាល សម្រាប់ចេញប័ណ្ណកម្មសិទ្ធិ​ ជូនប្រជាពលរដ្ឋ។ ចំពោះ​ការងារដោះស្រាយវិវាទនេះ​ដែរ​ ត្រូវ​យកតាមរយៈយន្តការដោះស្រាយវិវាទដីធ្លី ដែលមានស្រាប់ ចុះធ្វើការស្រាវជ្រាវ និងដោះស្រាយតាមគោលនយោបាយឈ្នះ-ឈ្នះ សំដៅបង្កើនសុខដុមរម្យនីយកម្មក្នុងសង្គម ផងដែរ​៕SRP

ខេត្តកំពង់ចាម​៖គណៈកម្មការសភា​ពាណិជ្ជកម្ម​មណ្ឌល​កំពង់ចាម​-មណ្ឌលគិរី​ បាន​រៀបចំ​ធ្វើ​ការបោះឆ្នោត អាណត្តិទី៣​ លើកទី១​ ដើម្បីជ្រើសរើស​សមាជិក​ មកបំពេញបន្ថែម ចំនួនសមាជិក ដែលផុតអាណត្តិ និងជ្រើសរើស​ប្រធាន​១រូប​ ដេីម្បី​បន្ត​ការ​ដឹកនាំ​។

ការ​បោះឆ្នោត​នេះ​បាន​ចាប់ផ្ដើម​ពី​ម៉ោង​៨ព្រឹក​ រហូត​ដល់​ម៉ោង​៣រសៀល​ ថ្ងៃ​ទី​២៨​ ខែមីនា​ ឆ្នាំ​២០២៣​ នៅ​មន្ទីរ​ពាណិជ្ជកម្ម​ខេត្ត​កំពង់ចាម​ ក្រោម​វត្តមាន​ លោក បួន សារៈមុនី រដ្ឋលេខាធិការ ក្រសួងពាណិជ្ជកម្ម​ លោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា​ និង​ឡោ​ ចាន់​លី​ អភិបាល​រង​ខេត្តកំពង់ចាម។

លោក បួន សារៈមុនី បាន​ថ្លែង​ថា រាជរដ្ឋាភិបាលកម្ពុជា បាន​បង្កើត​ឲ្យ​មាន​សភាពាណិជ្ជកម្ម ដើម្បី ធ្វើជាតំណាងឲ្យអាជីវករ ក្នុងការស្វែងរកអ្នកវិនិយោគទាំងក្នុង និងក្រៅប្រទេស មកបណ្ដាក់ទុន នៅតាមបណ្ដាខេត្តនីមួយៗ។

ជាក់ស្ដែង ការបោះឆ្នោតសភាពាណិជ្ជកម្មមណ្ឌលកំពង់ចាម មណ្ឌលគិរី អាណត្តិទី៣​ នាពេលនេះ គឺមាន​បេក្ខជនជាពាណិជ្ជករ អាជីវករ សេវាករដែលបានចុះឈ្មោះបោះឆ្នោត​ សរុប​ចំនួន​៤២១នាក់​ ក្នុងនោះមានបេក្ខជនឈរឈ្មោះ​ បោះឆ្នោតមានចំនួន១១រូប​ ដែល​ត្រូវ​ជ្រើសរើសយក​១០រូប​ ដេីម្បី​បំពេញបន្ថែមសមាជិក​ឲ្យ​គ្រប់​ចំនួន​ ១៥រូប​។ ជាមួយនោះ សមាជិកទាំងអស់បាន​បោះឆ្នោតជ្រើសរើស ប្រធាន ១រូប ដើម្បី បន្តការដឹកនាំផងដែរ។

រដ្ឋលេខាធិកា​ ក៏​បាន​បញ្ជាក់ដែរថា សភាពាណិជ្ជកម្ម ជាវិស័យឯកជនមួយ ស្ថិតនៅក្នុងច្បាប់ ដែលទទួលស្គាល់ដោយអនុក្រឹត្យពីរាជរដ្ឋាភិបាល ផ្ដល់អត្ថប្រយោជន៍យ៉ាងសំខាន់ សម្រាប់បងប្អូនអាជីវករ ដើម្បី ធ្វើការទំនាក់ទំនង ជាមួយដៃគូវិនិយោគគិន មកវិនិយោគ នៅកម្ពុជា។ ជាមួយនោះ សភាពាណិជ្ជកម្ម ក៏បានដើរតួយ៉ាងសំខាន់ និងជា​អាណាព្យាបាល​សម្រាប់បងប្អូនអាជីវកម្ម នៅតាមបណ្ដារាជធានីខេត្ត ក្នុងការធ្វើជំនួញផ្សេងៗ ផងដែរ។ ដូច្នេះហើយ បានជាក្រសួងពាណិជ្ជកម្ម តែងតែផ្ដល់នូវយន្តការគាំទ្រ សភាពពាណិជ្ជកម្ម នៅតាមបណ្ដារាជធានី ខេត្ត ក៏ដូចជា សភាពាណិជ្ជកម្មកម្ពុជា ទាំងកិច្ចការបោះឆ្នោត និងការបណ្ដុះបណ្ដាលបច្ចេកទេ ជាលក្ខណៈអន្តរជាតិ។

លោក ឡោ​ ចាន់​លី​ បានស្នើដល់សមាជិកសភាទាំងអស់ ត្រូវ​រៀបចំ​រចនាសម្ព័ន្ធដឹកនាំ ជាពិសេស ត្រូវមានតំណាងការិយាលល័យ ដើម្បី ងាយស្រួលធ្វើការទំនាក់ទំនងជាមួយ អាជ្ញាធរ និងអាជីវករនៅក្នុងមូលដ្ឋាន ក៏ដូចជា អាជីវករផ្សេងៗទៀត ដែលមានតម្រូវការ។ ជាមួយនោះអាជ្ញាធរខេត្ត នៅតែបន្តសកម្មភាព ជួយដល់សភាពាណិជ្ជកម្មខេត្តកំពង់ចាម-ខេត្តមណ្ឌលមណ្ឌលគីរី ដើម្បី បន្តបង្កើតនូវទំនាក់ទំនង ជាមួយដៃគូវិនិយោគ ឲ្យកាន់តែច្រើនឡើងថែមទៀត មកធ្វើការអភិវឌ្ឍ នៅខេត្តកំពង់ចាម។

គួរបញ្ជាក់ផងដែរថា ក្នុង​ដំណើរការបោះឆ្នោតជ្រើសរេីស សមាជិកសភាពាណិជ្ជកម្មមណ្ឌលខេត្តកំពង់ចាម-មណ្ឌលគិរី ជាលទ្ធផល បានជ្រើសរើសសមាជិកចំនួន ១០រូប ដើម្បី បំពេញបន្ថែមរចនាសម្ព័ន្ធ ជាមួយ​សមាជិក​មិន​ទាន់​ផុត​អាណត្តិ​ ចំនួន​៥រូប​។ បន្ទាប់មក សមាជិក សរុបទាំង​ ១៥រូប ក៏បានបោះឆ្នោតជ្រើសរើសប្រធានដឹកនាំ ១រូប ដោយ​បានឯកភាពលោក​ឧកញ៉ា​ ហួត​ ឈឿន ធ្វើជាប្រធាន ដើម្បី បន្តដឹកនាំសភាពាណិជ្ជកម្មមណ្ឌលខេត្តកំពង់ចាម-មណ្ឌលគិរី ក្នុងអាណត្តិទី ៣នេះ​ បន្តទៅទៀត​៕​SRP