សេចក្ដីរាយការណ៍ព័ត៌មានបឋមបានឲ្យដឹងថា ករណីបាញ់ប្រហារនៅក្រុងសៀមរាប នៅព្រឹកថ្ងៃសុក្រទី 7 ខែមេសា ឆ្នាំ 2023 នេះបណ្ដាលល្អ​មនុស្សស្លាប់អ្នកនឹងរបួសម្នាក់។

ទីតាំងកើតហេតុនេះស្ថិតនៅភូមិតាវៀន សង្កាត់សាលាកំរើក ក្រុងសៀមរាប។ យោងតាមប្រភពបានឲ្យដឹងថា ករណីនេះបណ្ដាលឲ្យស្លាប់ម្នាក់នឹងកន្លែងកើតហេតុនិងរងរបួសម្នាក់ដែលកំពុងសង្គ្រោះបន្ទាន់នៅមន្ទីរពេទ្យ។ ទោះជាយ៉ាងណាសមត្ថកិច្ចមិនទាន់បញ្ជាក់ត្តសញ្ញាណជនរងគ្រោះនៅឡើយ៕SRP

ខេត្តសៀមរាប៖ក្រុមការងារបក្សចុះមូលដ្ឋានឃុំស្រណាល បានចុះសំណេះសំណាល និងសួរសុខទុក្ខ សមាជិក សមាជិកាបក្សភូមិ ក្នុងភូមិរវៀង ឃុំស្រណាល ចំនួន ១៣០នាក់។

ការចុះសំណេះសំណាល របស់ក្រុមការងារបក្សចុះមូលដ្ឋានឃុំស្រណាល នេះធ្វើឡើងនៅថ្ងៃ ព្រហស្បតិ៍ ទី ៦ ខែមេសា ឆ្នាំ ២០២៣ ដោយលោក សឹង្ហ សំរឹទ្ធិ ប្រធានក្រុមការងារបក្សចុះមូលដ្ឋានឃុំស្រណាល និងអនុប្រធានសមាជិក សមាជិកា គណបក្សឃុំ បក្សភូមិផងដែរ។

លោក សឹង្ហ សំរឹទ្ធិ បានអោយដឹងថា ការចុះសួរសុខទុក្ខនេះ ដោយមានការយកចិត្តទុកដាក់ និងចង្អុលបង្ហាញ ពី ឯកឧត្តម អ្នកឧកញ៉ា បណ្ឌិត សៀង ណាំ អនុប្រធានក្រុមការងារ គណបក្សប្រជាជនកម្ពុជាចុះមូលដ្ឋានខេត្តសៀមរាប និងជាប្រធានក្រុមការងារ ចុះជួយមូលដ្ឋានស្រុកក្រឡាញ់។

លោក សឹង្ហ សំរឹទ្ធិ ដែលបានដឹកនាំចុះសួរសុខទុក្ខផ្ទាល់ បញ្ជាក់ផងដែរថា ក្រុមការងារគណបក្ស បានផ្តល់ជូនសំពត់បត់ ដល់សមាជិក បក្សក្នុងភូមិរវៀង ម្នាក់មួយ និងឧបត្ថម្ភ បងប្អូនប្រជាការពារភូមិចំនួន២០ម៉ឺនរៀលផងដែរ។

បើតាមលោក សឹង្ហ សំរឹទ្ធិ ក្រុមការងារ ក៏បានលើកស្លាក គណបក្សប្រជាជន ចំនួន១ ផងដែរនៅមុខផ្ទះ លោក អ៊ាន ឡិត ស្ថិតនៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប៕SRP

នាយករដ្ឋមន្ត្រីកម្ពុជា សម្ដេចហ៊ុន សែន នៅថ្ងៃព្រហស្បតិ៍ទី ៦ ខែមេសាឆ្នាំ ២០២៣ នេះ បានចេញអនុក្រឹត្យតែងតាំងលោក ព្រាប កុយវឌ្ឍនៈ ជាអភិបាលក្រុងឧដុង្គម៉ែជ័យ និងលោក មួង ធី ជាអភិបាលស្រុកសាមគ្គីមុនីជ័យ នៃខេត្តកំពង់ស្ពឺ។

នេះបើយោងតាមអនុក្រឹត្យ សៀមរាប ប៉ុស្តិ៍ ទទួលបាននៅរសៀលថ្ងៃនេះ៕SRP

ខេត្តសៀមរាប៖បុរសម្នាក់ត្រូវបានសមត្ថកិច្ចរាយការណ៍ថាបានលង់ទឹកស្លាប់។ ហេតុការណ៍ រកឃើញសព នៅវេលាម៉ោង១១ ថ្ងៃទី៥ ខែមេសា ឆ្នាំ២០២៣ ត្រង់ចំណុច ទឹកប្រឡាយ ផ្កាប់មុខ ស្ថិតនៅភូមិព្រៃវែង ឃុំសំរោងយា ស្រុកពួក។ ជនរងគ្រោះ មានឈ្មោះ ពេជ្រ វឿន ភេទប្រុសអាយុ៥៤ឆ្នាំ មុខរបរកសិករ។

សមត្ថកិច្ចបានបញ្ជាក់ថា តាមការរៀបរាប់របស់កូន និងសាច់ញាតិថា ពួកខ្លួនបានបាត់ឪពុកតាំងពីម៉ោង២៣ ថ្ងៃទី៤ ខែមេសា ឆ្នាំ២០២៣ បន្ទាប់ពីកម្មវិធីបុណ្យក្នុងភុមិ បានបិទបាស់ (ជិតកន្លែងកើតហេតុ) ដោយមិនឃើញឪពុកមកផ្ទះ ក៏បាននាំគ្នាដើររកតែរកមិនឃើញ។ ឪពុកខ្លួនជាមនុស្សញៀនស្រាស្រវឹងជាប្រចាំផងដែរ។

សមត្ថកិច្ចបានបញ្ជាក់ទៀតថា តាមការពិនិត្យសាកសព ឃើញថាពុំមានស្លាកស្នាមអ្វីគួរសង្ស័យពាក់ព័ន្ធនឹងបទល្មើសឡើយ។ ការសន្និដ្ឋាន និងមូលហេតុ ជនរងគ្រោះស្លាប់ដោយសារស្រវឹងស្រាលង់ទឹកតែម្ដង៕SRP

អភិបាលខេត្តកំពង់ចាម បាន​អំពាវនាវ​សូម​ឱ្យ​មាតា បិតា អាណាព្យាបាលសិស្សទាំងអស់ ជួយជម្រុញ និងលើកទឹកចិត្ត ដល់កូន ចៅរបស់ខ្លួន ឱ្យ​ចូល​រៀន ដូចពាក្យស្លោកថា៖ «ការបញ្ជូនកូន ឱ្យ​ចូល​រៀន គឺជាការសន្សំទ្រព្យទុក» ហើយ​ឱ្យ​កូនរៀន ឱ្យ​ចប់ថ្នាក់បាក់ឌុប និងបន្តការសិក្សា ទៅកម្រិតឧត្ដម សិក្សា ដើម្បី ពួកគាត់ មានឱកាសចូលរួមប្រកួតប្រជែង នៅក្នុងទីផ្សារការងារ ដើម្បី ទទួលបានប្រាក់ខែ យកមកផ្គត់ផ្គង់ជីវភាពគ្រួសារ ក៏ដូចជា ចូលរួមចំណែកកសាងអភិវឌ្ឍប្រទេសជាតិ ឱ្យ​កាន់តែរីកចម្រើន ផងដែរ។

អញ្ជើញ​សម្ពោធដាក់ឱ្យប្រើប្រាស់​ជា​ផ្លូវការ​អគារសិក្សាថ្មី១ខ្នង ចំនួន៥បន្ទប់ នៃអនុវិទ្យាល័យត្រប់ ស្ថិត​ក្នុង​ឃុំត្រប់ ស្រុកបាធាយ ​នៅថ្ងៃទី៤ ខែមេសា ឆ្នាំ២០២៣​ លោក អ៊ុន ចាន់ដា អភិបាលខេត្តបាន​ថ្លែង​ថា​ រាជរដ្ឋាភិបាលកម្ពុជា ក្រោមការដឹកនាំ​ របស់ សម្ដេចតេជោ ហ៊ុន សែន បានយកចិត្តទុកដាក់កែទម្រង់ លើវិស័យអប់រំ ជាពិសេស លើគោលនយោបាយ បង្កើនការកសាងអគារសិក្សា​ឱ្យ​បានច្រើន និងនៅជិតផ្ទះ ប្រជាពលរដ្ឋ ងាយស្រួលដល់ពួកគាត់ បញ្ជូនកូនចៅ​ចូល​សិក្សារៀនសូត្រ។

អភិបាលខេត្ត បាន​បញ្ជាក់​ថា​ អគារសិក្សានេះត្រូវចំណាយ ថវិកាអស់ ៨៥,២៧២ ដុល្លាអាមេរិក ដែលជាគំនិតផ្តួចផ្តើមដឹកនាំកសាង ដោយព្រះទេព្វានុបាល ផល សុភាព ព្រះធម្ម ធរអនុគណស្រុក និងជាព្រះចៅអធិការវត្តប្រើមាស រួមជាមួយនឹងពុទ្ធបរិស័ទ សប្បុរសជន ជិតឆ្ងាយ ក្នុងនោះក៏មានជំនួយរបស់សាសនចក្រ​គ្រិស្ត​បរិស័ទ​ថ្ងៃ​ចុងក្រោយផងដែរ។

លោកបាន​បន្ត​ថា​ ការចូលរួមរបស់ព្រះសង្ឃ និងសប្បុរសជនទាំងនេះគឺពិតជាមានសារៈសំខាន់ណាស់ សម្រាប់ការចូលរួមអភិវឌ្ឍ សង្គមជាតិ របស់យើង ៕SRP

ខេត្តបាត់ដំបង៖លោក សុខ លូ អភិបាលខេត្តបាត់ដំបង បានធ្វើការណែនាំ ដល់លោកអភិបាលស្រុក និងប្រធានច្រកទ្វារអន្តរជាតិ និងច្រកទ្វារតំបន់ព្រំដែន ទាំងអស់ ត្រូវធ្វើការទប់ស្កាត់ការលួចឆ្លងដែនខុសច្បាប់ នៅតាមច្រកទ្វារអន្តរជាតិ និងច្រកទ្វារតំបន់នានាក្នុងភូមិសាស្រ្ដខេត្តបាត់ដំបង។ លោកថា បើករណីមានការលួចជួញដូរមនុស្សខុសច្បាប់ ត្រូវធ្វើការស្វែងរកឱ្យឃើញ នូវមេខ្លោងក្នុងការនាំមនុស្សចេញចូលខុសច្បាប់ ក៏ដូចជាត្រូវចូលរួមក្នុងការទប់ស្កាត់ ការនាំចូលទំនិញខុសច្បាប់ ដោយមិនមានការបង់ពន្ធ ធ្វើឱ្យបាត់បង់ចំណូលពន្ធចូលរដ្ឋផងដែរ។

ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបង ប្រចាំខែមីនា ឆ្នាំ២០២៣ នៅរសៀលថ្ងៃចន្ទ ម្សិលមិញ លោក សុខ លូ ក៏បានមានប្រសាសន៍ណែនាំ ដល់អាជ្ញាធរមូលដ្ឋាន កងកម្លាំងប្រដាប់អាវុធ និងប្រធានមន្ទីរពាក់ព័ន្ធ ត្រូវបន្តការយកចិត្តទុកដាក់ពាក់ព័ន្ធ ទៅនឹងបញ្ហាចរាចរណ៍ បញ្ហាគ្រឿងញៀន ល្បែងស៊ីសង ខុសច្បាប់ ដែលកើតមាននៅក្នុងភូមិសាស្រ្ដ របស់ខ្លួន ត្រូវធ្វើការទប់ស្កាត់ និងបង្ក្រាប ឱ្យបានមានប្រសិទ្ធភាពបំផុត។

លោកបានបន្តទៀតថា នៅសល់តែប៉ុន្មានថ្ងៃទៀតតែប៉ុណ្ណោះ នឹងមានព្រឹត្តិការណ៍សង្រ្កាន្ដឆ្នាំថ្មី ដូចនេះសូមលោក លោកស្រីអភិបាលក្រុងស្រុក កងកម្លាំងប្រដាប់អាវុធ ត្រូវរៀបចំក្រុមប្រចាំការឱ្យបានរួចជាស្រេច ក្នុងអំឡុងពេលពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ក្នុងការការពារសន្ដិសុខសុវត្ថិភាពជូនប្រជាពលរដ្ឋ ត្រូវត្រៀមរថយន្តពន្លត់អគ្គិភ័យឱ្យបានរួចជាស្រេច ព្រោះថាឥឡូវនេះ ជារដូវក្ដៅ ហើយអាកាសធាតុ ហាក់បីដូចជាកាន់តែមានកម្ដៅជាងមុន ដែលងាយនឹងបង្កឱ្យបានជាគ្រោះធម្មជាតិនានាដូចជា ខ្យល់កន្រ្តាក់ជាដើម ពិសេសគឺអាចបង្កឱ្យមានអគ្គិភ័យ ឆាបឆេះឡើង ដូចនេះត្រូវត្រៀម រួចជាស្រេចក្នុងការចេញអន្តរគមន៍សង្រ្គោះបន្ទាន់ ក្នុងករណីកើតឡើងណាមួយជាយថាហេតុ៕SRP

ខេត្តសៀមរាប៖បុគ្គលិកហិរញ្ញវត្ថុម្នាក់បានជួបគ្រោះថ្នាក់ចរាចរណ៍បណ្ដាលឱ្យស្លាប់ភ្លាមៗនៅកន្លែង ខណៈបើកម៉ូតូបុកគោយន្តកន្ត្រៃពីក្រោយ។

ហេតុការណ៍បានកើតឡើង នៅស្រុកពួកនៅថ្ងៃ ទី ៣ ខែមេសា ឆ្នាំ ២០២៣ វេលាម៉ោង ១៩និង ៥០ នាទី លើផ្លូវជាតិលេខ ០៦ ចំណុចចន្លោះបង្គោលគីឡូម៉ែត្រ លេខ 336 -337ភូមិដំណាក់ស្លាញ ឃុំសសរស្តម្ភ ស្រុកពួក ខេត្តសៀមរាប។

ប្រភពពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ ម៉ូតូម៉ាកហុងដា 2018ពណ៌ខ្មៅពាក់ផ្លាកលេខ សៀមរាប1Z-1761 បើបរដោយឈ្មោះឡូ ឡឹង ភេទប្រុស អាយុ ៣១ ឆ្នាំនៅភូមិដូនតុក ឃុំព្រៃជ្រូកស្រុកពួក ខេត្តសៀមរាប មុខរបរបុគ្គលិកមីក្រូហិរញ្ញវត្ថុ ណុងហិប (មានពាក់មួកសុវត្ថិភាព) បើកបរមានទិសដៅពីកើតទៅលិច បានបុកគោយន្តកន្ត្រៃម៉ាកគូបូតាពណ៌ក្រហមសណ្តោងរ៉ឺម៉កក្រោយព៌ណខ្មៅ (មានដឹកចំប៉ើងពេញ) ពីក្រោយបណ្ដាលឱ្យស្លាប់តែម្ដង។ ចំណែកអ្នកបើកបររគោយន្តកន្ត្រៃបានរត់គេចខ្លួនបាត់ក្រោយមានហេតុការណ៍។

ករណីនេះ បណ្ដាលឲ្យ ស្លាប់មនុស្សម្នាក់ខូចខាត ម៉ូតូ១គ្រឿងធ្ងន់និងគោយន្តកន្ត្រៃ១គ្រឿងស្រាល។ មូលហេតុ អ្នកបើកបរគោយន្តកន្ត្រៃ គ្មានភ្លើងបំភ្លឺក្រោយ អ្នកបើកបរម៉ូតូបើបរក្នុងល្បឿនលឿនខ្វះការប្រុងប្រយ័ត្ន៕SRP

ខេត្តត្បូងឃ្មុំ​៖គម្រោងមូលនិធិអភិវឌ្ឍន៍ ឃុំចំនួន ២ក្នុងស្រុកមេមត់ ត្រូវបានដាក់ដេញថ្លៃជាសាធារណៈ នៅថ្ងៃចន្ទនេះ ដើម្បីបន្តអភិវឌ្ឍន៍ហេដ្ឋារចនាសម្ព័ន្ធនានា ក្នុងមូលដ្ឋានឃុំ ក្រោមវត្តមាន លោក ស៊ឺង គិរីវណ្ឌី នាយកទីចាត់ការផែនការ និង វិនិយោគខេត្ត លោក អភិបាលរងស្រុកមេមត់ លោកមេឃុំទាំង២ និងដោយមានការចូលរួមពីគណកម្មការឃុំ មន្រ្តីបច្ចេកទេស តំណាងក្រុមហ៊ុនដេញថ្លៃ និងអ្នកពាក់ព័ន្ធ ផងដែរ។

លោក ស៊ឺង គិរីវណ្ឌី បានមានប្រសាសន៏សង្កត់ធ្ងន់ថា រាល់ការបើកសំណើរដាក់ដេញថ្លៃ លើគម្រោងមូលនិធិឃុំ ចាំបាច់ត្រូវអនុវត្តន៍គោរពតាមគោលការណ៏ អោយបានត្រឹមត្រូវ ទៅតាមនីតិវិធីលទ្ធកម្ម ដែលមានចែងក្នុងសៀវភៅណែនាំស្ដីពីការអនុវត្តន៏គម្រោងមូលនិធិឃុំ ជាធរមាន ធានាបានតម្លាភាព យុត្តិធម៌ គុណភាព ដែលរដ្ឋបាលមូលដ្ឋានទទួលយកបានទាំងអស់គ្នា។

បន្ទាប់ពីបានដំណើរការបើកឯកសារសម្រាប់ដាក់ដេញថ្លៃ របស់បណ្តាក្រុមហ៊ុនដែលបានចូលរួមដេញថ្លៃរួចមក តាមទិដ្ឋភាពជាក់ស្តែងការដេញថ្លៃ គម្រោងមូលនិធិឃុំនេះ គឺបានប្រព្រឹត្តទៅប្រកបដោយតម្លាភាព និងត្រឹមត្រូវតាមច្បាប់និងលក្ខខណ្ឌនៃការដេញថ្លៃ ខណៈប្រធានគណៈកម្មការលទ្ធកម្ម និងអ្នកចូលរួមទាំងអស់ យល់ព្រមទទួលយកគម្រោង។ ទន្ទឹមនេះ ក្រោយពីដំណើរការដេញថ្លៃ ត្រូវបានបញ្ចប់ សូមលោក-លោកស្រី ជាក្រុមហ៊ុនទទួលបានសិទ្ធទទួលការទាំងអស់ ត្រូវអនុវត្តន៏អោយបានត្រឹមត្រូវតាមបទដ្ឋានបច្ចេកទេស ដោយធ្វើយ៉ាងណា អនុវត្តគម្រោងសាងសង់ផ្លូវទាំងនេះ ប្រកបដោយគុណភាព បម្រើផលប្រយោជន៏ជូនប្រជាពលរដ្ឋបានយូអង្វែង។

សូមជម្រាបថា៖ ជាលទ្ធផលក្នុងកិច្ចដំណើរការបើកសំណើរដេញថ្លៃគម្រោងមូលនិធិអភិវឌ្ឍន៍ឃុំទាំង ២ រួមមាន ៖ ឃុំមេមងមានចំនួន១គម្រោងសាងសង់ផ្លូវបេតុងអាមេនិងដាក់អំពូលសូឡា ចំនួន ០១ ខ្សែរ បានទៅលើក្រុមហ៊ុន លី ឈួន។ ឃុំរំចេកមានចំនួន២គម្រោងទី១សាងសង់ផ្លូវក្រាលគ្រួសក្រហមធម្មជាតិចំនួន ០១ ខ្សែរ បានទៅលើក្រុមហ៊ុន ហ៊ន់ សោភណ័្ឌនិងគម្រោងទី២សាងសង់ផ្លូវបេតុងអាមេ ចំនួន ០១ ខ្សែរ បានទៅលើក្រុមហ៊ុន សេត មិថុនាដោយមានប៊ីតក្រុមហ៊ុនដាក់ចូលរួមដេញថ្លៃ សរុបចំនួន ៩ប៊ីត ផងដែរ៕SRP

ខេត្តកំពង់ចាម​៖លោកស្រី តោ ពិឡា ប្រធានក្រុមការងារចុះជួយមូលដ្ឋានឃុំបឹងណាយ តំណាងលោក ប៉ាន សូរស័ក្តិ ប្រធានក្រុមការងារចុះជួយមូលដ្ឋានស្រុកព្រៃឈរ និងស្រុកបាធាយ នៅថ្ងៃទី២ ខែមេសា ឆ្នាំ២០២៣ បានដឹកនាំក្រុមយុវជនគ្រូពេទ្យស្ម័គ្រចិត្ត ចុះពិនិត្យព្យាបាលជម្ងឺ សុខភាពភ្នែក មាត់ ធ្មេញ ដែលមាន លោកទន្ត.បណ្ឌិត តោ ប៊ូរផា និងលោកវេជ្ជបណ្ឌិតឯកទេសភ្នែក តោ រេមី ជូនប្រជាពលរដ្ឋ ឥតគិតថ្លៃក្នុងភូមិត្រពាំងធំ ក្នុងឃុំបឹងណាយ។

លោកស្រី តោ ពិឡា គូសបញ្ជាក់ថា នេះជាលើកទី៧ហើយ​ បើធៀបទៅនឹងផែនការគ្រោង ចំនួន ១៧លើក ស្មើនឹង ១៧ភូមិ ដែលយើងត្រូវ ដឹកនាំក្រុមយុវជនគ្រូពេទ្យស្ម័គ្រចិត្ត ចុះមកពិនិត្យព្យាបាលជម្ងឺសុខភាពភ្នែក មាត់ ធ្មេញ ជូនប្រជាពលរដ្ឋ ដោយឥតគិតថ្លៃ នៅទូទាំងឃុំបឹងណាយ នៃស្រុកព្រៃឈរ ខេត្តកំពង់ចាម។

លោកស្រី បានថ្លែងអំណរគុណ យ៉ាងជ្រាលជ្រៅបំផុត ចំពោះ ក្រុមយុវជនគ្រូពេទ្យស្ម័គ្រចិត្ត ដែលតែងតែបានចាត់បញ្ជូនក្រុមការងារ គ្រូពេទ្យជំនាញ ចុះបំពេញបេសកកម្ម មនុស្សធម៌ ក្នុងការជួយពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ នៅទីនេះផ្ទាល់ ក៏ដូចជា នៅក្នុងទូទាំងប្រទេស ផងដែរ។

លោកស្រី បានចាត់ទុកសកម្មភាពមនុស្សធម៌ដ៏ឧត្តុងឧត្តមនេះ ពិតជាបានរួមចំណែក ជាមួយរាជរដ្ឋាភិបាល កម្ពុជា ក៏ដូចជា អាជ្ញាធរដែនដីក្នុងខេត្តកំពង់ចាម ក្នុងការលើកកម្ពស់សុខភាព ប្រជាជន និងអាហារូបត្ថម្ភ ដើម្បី គាំទ្រដល់ការអភិវឌ្ឍធនធានមនុស្ស កំណើនសេដ្ឋកិច្ច និងវឌ្ឍនភាពសង្គម ប្រកបដោយចីរភាព ផងដែរ។

លោកស្រី ក៏បានអំពាវនាវ ដល់បងប្អូនប្រជាពលរដ្ឋទាំងអស់ សូមបន្តថែរក្សាសុខភាព ឲ្យបានល្អ ដោយហូបស្អាត ផឹកស្អាត និងរស់នៅស្អាត និងសូមបន្តយកចិត្តទុកដាក់ ៣កុំ ៣ការពារ ដើម្បី ការពារកុំឲ្យមានជំងឺកូវិដ-១៩ ឆ្លងចូលសហគមន៍ និងបង្ការនូវជំងឺឆ្លងផ្សេងៗ។ ជាមួយគ្នា​នោះ​លោកស្រី និងក្រុមការងារ បាននាំយកអំណោយ របស់ លោកប៉ាន សូរស័ក្តិ ចែកជូនស្ត្រីកូនខ្ចីចំនួន ២៤នាក់ នៅភូមិប្រវ៉ាស ភូមិអ្នកតាស្នឹង ភូមិទូលខ្វាវ ភូមិត្រពាំងបិទ នៃ​ឃុំបឹងណាយ ស្រុកព្រៃឈរ។

គួរ​បញ្ជាក់ថា ការពិនិត្យសុខភាព និងព្យាបាលជំងឺជូនប្រជាពលរដ្ឋ ដោយឥតគិតថ្លៃខាងលើនេះ គឺមានកិច្ចសហការ ពីក្រុមយុវជនគ្រូពេទ្យស្ម័គ្រចិត្ត ដោយមិនមានការរើសអើង ជាតិសាសន៍ សាសនា ឬនិន្នាការនយោបាយអ្វីឡើយ និងមានក្រុមគ្រូពេទ្យជំនាញចំនួន ១៨នាក់។ ក្រៅពីនោះ ក្រុមគ្រូពេទ្យជំនាញបានធ្វើការពិនិត្យ និងព្យាបាលជម្ងឺសុខភាពភ្នែក មាត់ ធ្មេញ និងជំងឺទូទៅ ជូនប្រជាពលរដ្ឋ ចំនួនសរុប ៦៧នាក់  ស្មើនឹង ១៧៨ករណី៕SRP

លោក អ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​​ សុខសន្តិភាព​ពិត​ជា​​បាន​មក​ដោយ​ការ​លំបាក​ណាស់​ ហើយការការពារសុខសន្តិភាព កាន់តែ​មាន​ការ​​​លំបាក​ទៅ​ទៀត​។ បច្ចុប្បន្ន​កម្ពុជា​មាន​សុខសន្តិភាព​ សុខ​ដុម​រម្យ​នីយ​កម្ម​ ស្ថិរភាពពេញលេញលេីផ្ទៃប្រទេស និង​មាន​ការ​អអភិវឌ្ឍន៍ រីកចម្រើន​ជា​បន្តបន្ទាប់​​​ ក្រោម​នយោបាយ​ឈ្នះ​ឈ្នះ​ ដែលបាន​នាំ​មក​នូវ​ការ​បង្រួបបង្រួម​ជាតិ​ ពី​សំណាក់​​​សម្តេច​ តេជោ​ ហ៊ុន​ សែន​ ប្រមុខ​រាជរដ្ឋាភិបាល​កម្ពុជា​ ដូច្នេះ​សូមឲ្យ​ ពុកម៉ែ​បងប្អូន​ ចូលរួម​ចំណែក​ថែរក្សា​ សុខសន្តិភាព​នេះ​ ​ឲ្យ​បាន​គង់វង្ស​ ដេីម្បី​បន្តការអភិវឌ្ឍន៍ឲ្យ​កាន់តែមានការរីកចម្រើន​បន្ត​ទៅ​ទៀត​។​

អភិបាលខេត្តកំពង់ចាម​ ថ្លែងបែបក្នុងឱកាសចូលរួម​ចែកកញ្ចប់អាហារស្រាយបួសរ៉ាម៉ាឌន​ ជូន​ពលរដ្ឋខ្មែរ-ឥស្លាម ៥៥០គ្រួសារ​ ​នៅ​ស្រុកកោះសូទិន នៅរសៀលថ្ងៃម្សិលមិញ។

លោក រ៉ូហ្វី អូស្មាន ក៏បានពាំនាំការសុខទុក្ខពីសំណាក់ លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈចលនាសាសនិកឥស្លាម របស់ គណបក្សប្រជាជនកម្ពុជា ដោយលោកបានលើកឡើង ពីសមិទ្ធិផលដែលសហគមន៍ឥស្លាមកម្ពុជា ទទួលបាន ក្រោមការដឹកនាំរបស់សម្តេច ហ៊ុន សែន និងសុំអោយបងប្អូនប្រជាពលរដ្ឋ បន្តបោះឆ្នោតគាំទ្រដល់ រាជរដ្ឋាភិបាល នៅគ្រប់អាណត្តិ ដើម្បីជាម្លប់សន្តិភាពដល់សង្គមជាតិទាំងមូល​ផងដែរ​។

គួរ​បញ្ជាក់​ថា​ ការ​ចែក​ជូន​កញ្ចប់អាហារស្រាយបួសសំរាប់ប្រជាពលរដ្ឋ ចំនួន ៥៥០គ្រួសារនេះ​ គឺ​មាន​ឯកសណ្ឋានថ្វាយបង្គំ​ ចំនួន២០០ឯកសណ្ឋានសំរាប់យុវជន ស.ស.យ.ក និង សម្ព័នយុវជន CMYA និងថវិការជូនដល់គ្រូបង្រៀន ស្ម័គ្រចិត្ត ខ្មែរឥស្លាម​ ចំនួន៣០រូប គម្រោង​នេះ​ក្រោមកិច្ចសប្រតិបត្តិកា​ជា​មួយ សប្បុរសជនពី ប្រទេសម៉ាឡេស៊ី ប្រទេសសិង្ហបុរី ប្រទេសព្រុយណេរ និងអូស្ត្រាលី សមាគមអាល់រ៉ហ៊ីមមូស្លីមកម្ពុជា ដែល​បាន​ចំណាយថវិកាសរុប ចំនួន ៤៦,០៥០,០០០ រៀល ស្មើរនឹង ១១,៣៧០ដុល្លា សហរដ្ឋអាមេរិក​៕SRP