សម្ដេចធិបតី៖ តើរាជរដ្ឋាភិបាលកម្ពុជាដាក់បណ្តឹងទៅ ICJ ដើម្បីបង្កើតសង្រ្គាមឬយ៉ាងណា?

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កម្ពុជាដាក់បណ្តឹងទៅតុលការយុត្តិធម៌អន្តរជាតិ( ICJ) មិនមែនដើម្បីបង្កើតសង្រ្គាមនោះទេ គឺចង់ដោះស្រាយបញ្ចប់បញ្ហាជាមួយមិត្តជិតខាងដោយស្មារតីសន្តិភាព សហប្រតិបត្តិការ គោរពគ្នា ឯកភាពគ្នា ផ្អែកទៅលើមូលដ្ឋានផែនទីជំនាន់បារំាងដែលភាគីទាំងពីរកម្ពុជា-ថៃ បានឯកភាពគ្នាកាលពីឆ្នាំ២០០០ ដើម្បីបញ្ចៀសសង្រ្គាម។

ក្នុងឱកាសសម្ពោធ «អគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានានៅក្នុងខេត្តរតនគិរី» នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត បានគូសបញ្ជាក់ថា អំឡុងពេលដាក់បណ្តឹងទៅ ICJ យើងក៏ត្រៀមលក្ខណៈការពារទឹកដីរប់សយើងគ្រប់មធ្យោបាយរួមទាំងកងទ័ព ប៉ុន្តែជំហររបស់យើងទោះជាយ៉ាងណាក៏ដោយក៏យើងមិនបោះបង់ការដោះស្រាយបញ្ហាបច្ចេកទេសទេ្វរភាគីនៅតាមកន្លែងដែលមិនពាក់ព័ន្ធនេះបន្តទៅទៀត។

សម្តេចធិបតី ហ៊ុន ម៉ាណែត បានលើកឡើងពីក្តីសង្ឃឹមថា ក្នុងកិច្ចប្រជុំថ្ងៃទី១៤ ខែមិថុនា ឆ្នាំ២០២៥ ខាងមុខនេះ រាជរដ្ឋាភិបាលថៃ និងកម្ពុជានឹងរកចំណុចរួមមួយដើម្បីបន្តដំណើរនៅក្នុងការចរចាបញ្ហាព្រំដែនដែលនៅសេសសល់ច្រើនរយគីឡូម៉ែត្រតទៅទៀត ទោះបី ៤ចំណុចនេះ កម្ពុជាបានយកទៅ ICJ ក៏ដោយ ប៉ុន្តែនៅមានច្រើនចំណុចទៀតដែលយើងត្រូវបន្តខណ្ឌសីមាបោះបង្គោលព្រំដែនតាមរយៈយន្តការទ្វេរភាគីផ្អែកទៅលើ MOU ឆ្នាំ២០០០។

ឆ្លៀតឱកាសនេះ សម្តេចធិបតី ហ៊ុន ម៉ាណែត បានអរគុណដល់ប្រជាពលរដ្ឋដែលបានចូលរួមផ្ដល់ជាសម្ភារៈស្បៀងអាហារដល់កងទ័ពនៅជួរមុខ ដើម្បីការពារបូរណភាពទឹកដី នេះជាការលើកទឹកចិត្តមួយយ៉ាងសំខាន់ដល់កងទ័ពរបស់យើង៕SRP

សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា កម្ពុជានៅតែប្រកាន់ខ្ជាប់នូវគោលជំហរក្សាសន្តិភាព មិត្តភាព និងកិច្ចសហប្រតិបត្តិ ការល្អជាមួយថៃ បើទោះបីជា កម្ពុជាបានលើកយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ (ICJ) ក៏ដោយ ដើម្បីធានាផលប្រយោជន៍សេដ្ឋកិច្ចរវាងប្រទេសនិងប្រជាជនទាំងពីរ។

ក្នុងពិធីសម្ពោធអគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានា នៅក្នុងខេត្តរតនគិរី នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត បានថ្លែងថា កម្ពុជានិងថៃមានព្រំដែនគោកជាប់គ្នាចំនួន ៨០៥គីឡូម៉ែត្រ ដែលមានប្រជាជនរស់នៅ ព្រំដែនរួមគ្នារាប់ម៉ឺនសែននាក់ ដែលកំពុងមានទំនាក់ទំនង ពាណិជ្ជកម្ម សេដ្ឋកិច្ច ជាមួយគ្នាទៅវិញ ទៅមក ប្រៀបដូចជាបងប្អូនទៅហើយ។

សម្តេចធិបតី ហ៊ុន ម៉ាណែត ក៏បានអំពាវនាវឱ្យប្រជាពលរដ្ឋកម្ពុជា រក្សាភាពស្ងៀមស្ងាត់ និងជឿជាក់លើរាជរដ្ឋាភិបាលក្នុងការដោះស្រាយបញ្ហាព្រំដែន ជាពិសេសគឺមិនត្រូវយកបញ្ហានេះ ទៅបង្កជាជម្លោះស្អប់ជាតិសាសន៍នោះឡើយ ដែលពុំបានផ្តល់ផលចំណេញអ្វីសម្រាប់ភាគីទាំងសងខាងនោះទេ៕SRP

សម្ដេចនាយករដ្ឋមន្ត្រី៖ ហេតុអ្វីបានជាកម្ពុជា លើកយកបញ្ហាតែ៤ចំណុចទៅកាន់តុលាការយុត្តិធម៌អន្តរជាតិ (ICJ)?

សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា មានមតិ មួយចំនួនលើកឡើងថា ហេតុអ្វីបានជាកម្ពុជាលើកយកតែ៤ចំណុចទៅតុលាការយុត្តិធម៌អន្តរជាតិ ហេតុអ្វីមិនយកទាំងអស់តែម្តង ដែលចំណុចនេះ ដោយសារកម្ពុជាទុកចំណុចផ្សេងៗទៀតដើម្បីដោះស្រាយទ្វេភាគីលើការកំណត់ខណ្ឌសីមាបន្តទៀត។

ក្នុងពិធីសម្ពោធអគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានា នៅក្នុងខេត្តរតនគិរី នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត បានថ្លែងថា ចំណុចទាំងបួន គឺប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ ៣ គឺជាតំបន់ដែលឈានដល់ចំណុចជាប់គាំងមិនអាចដោះស្រាយទ្វេភាគីបាន ដូច្នេះមានតែយើង ប្រើប្រាស់យន្តការភាគីទី៣ ដើម្បីចៀសវាងជម្លោះកាន់តែធ្ងន់ធ្ងរ។

សម្តេចធិបតី ហ៊ុន ម៉ាណែត បានគូសបញ្ជាក់ថា កម្ពុជា មានព្រំដែនគោកជាមួយប្រទេសថៃចំនួនជាង៨០០គីឡូម៉ែត្រ គឺយើងមិនអាចដាក់ទាំងអស់ទៅតុលាការយុត្តិធម៌អន្តរជាតិនោះទេ ដោយហេតុថា មានចំណុចខ្លះដែលយើងបានឯកភាពគ្នាចំនួន៤៤បង្គោល លើសរុប៧៣បង្គោលហើយ។ ម៉្យាងទៀត បើសិនយើងប្តឹងជារួមជាហេតុធ្វើឱ្យរាំងស្ទះដល់ដំណើរការចរចាទ្វេភាគីផងដែរព្រោះត្រូវទុកលទ្ធភាពឱ្យភាគីទី៣ដោះស្រាយតាមច្បាប់៕SRP

សម្ដេចធិបតីហ៊ុន ម៉ាណែត៖ តើរាជរដ្ឋាភិបាលប្រើប្រាស់យន្តការអ្វីខ្លះដើម្បីដោះស្រាយបញ្ហាជាមួយថៃ?

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កម្ពុជាប្រើប្រាស់អភិក្រមចំនួន ៣គឺ ទី១,យន្តការបច្ចេកទេស ទី២,តាមផែនទី ទី៣, ប្រើយន្តការអន្តរជាតិ ច្បាប់អន្តរជាតិ។

ក្នុងឱកាសសម្ពោធ «អគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានានៅក្នុងខេត្តរតនគិរី» នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត បានប្រកាសជំហរយ៉ាងម៉ឺងម៉ាត់ថា កម្ពុជានឹងបញ្ជូនសំណុំរឿងប្រាសាទតាមាន់តូច តាមាន់ធំ តាក្របី និងតំបន់មុំបី ទៅកាន់តុលាការ យុត្តិធម៌អន្តរជាតិ ICJឲ្យខាងតែបាន នាពេលឆាប់ៗខាងមុខនេះ ដើម្បីបញ្ចប់រឿងជាមួយប្រទេសថៃ ពោលគឺរាជរដ្ឋាភិបាលខិតខំដោះបញ្ចប់ដើម្បីកុំឱ្យកូនខ្មែររាប់រយឆ្នាំនៅតែប្រឈមមុខដាក់គ្នា និងវាយគ្នាជាមួយប្រទេសជិតខាង។

ឆ្លៀតក្នុងឱកាសនេះ សម្តេចធិបតី ហ៊ុន ម៉ាណែត បានអំពាវនាវដល់ប្រជាពលរដ្ឋទូទាំងប្រទេស កុំយកបញ្ហាទំនាស់ នៅចំណុចប្រាសាទតាមាន់ធំ ប្រាសាទតាមាន់តូច ប្រាសាទតាក្របី តំបន់មុំបី រុញច្រានបង្កើតសភាពការណ៍ នាំឲ្យរាលដាលទូទាំងប្រទេស ត្រូវរក្សាស្ថេរភាពភាព នឹងភាពស្ងៀមស្ងាត់ ត្រូវជឿទុកចិត្តមកលើរាជរដ្ឋាភិបាល ក្នុងការដោះស្រាយបញ្ហាព្រំដែនរវាងកម្ពុជា-ថៃ៕SRP

តើរាជរដ្ឋាភិបាលខិតខំធ្វើអ្វីខ្លះដើម្បីការពារបូរណភាពទឹកដី?

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអះអាងថា រាជរដ្ឋាភិបាលកម្ពុជា នឹងការពារនូវបូរណភាពទឹកដី អធិបតេយ្យភាពជាតិឲ្យខាងតែបាន និងខិតខំធ្វើយ៉ាងណារួមគ្នាអភិវឌ្ឍន៍ តំបន់ព្រំដែនជាមួយប្រទេសជិតខាង តាមរយៈការពង្រឹង និងពង្រីកកិច្ចសហប្រតិបត្តិការឱ្យកាន់តែស៊ីជម្រៅ ដើម្បីសំដៅកសាងព្រំដែន ជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍឲ្យកាន់តែខ្លាំងក្លាបន្ថែមទៀត។

ក្នុងឱកាសសម្ពោធ «អគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានានៅក្នុងខេត្តរតនគិរី» នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត ក៏បានផ្តាំទៅអ្នកនៅក្រៅប្រទេសមួយចំនួន ដែលតែងតែបារម្ភថា ខេត្តនៅតំបន់ភូមិភាគឦសាន្ត នឹងបាត់បង់តាមរយៈការអភិវឌ្ឍCLVនោះ សូមអញ្ជើញមកមើលខេត្តនៅតំបន់ឦសាន្តផងដែរ ខណៈខេត្តទាំងនោះ បាននឹងកំពុងធ្វើការអភិវឌ្ឍកាន់តែច្រើនជាបន្តបន្ទាប់នោះ។

ឆ្លៀតក្នុងឱកាសនេះ សម្តេចធិបតី ហ៊ុន ម៉ាណែត បានថ្លែងអំណរគុណដល់ប្រជាពលរដ្ឋខេត្តរតនគិរី ក៏ដូចជាអ្នកខេត្តទិសឦសាន្តដែលបានចេញសាររឿង CLV-DTA ដើម្បីរំងាប់អារម្មណ៍អ្នកភ្នំពេញ និងអ្នកខេត្តផ្សេងទៀតថា អ្នកខេត្តរតនគិរីមានភាពនឹងនរ គ្មានអ្នកណាមកដេញប្រជាពលរដ្ឋខ្មែរចេញទេ៕SRP

សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា ការលើកឡើងពីកត្តាសុខសន្តិភាព និងអរគុណសន្តិភាព របស់ឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី គឺពិតជាត្រឹមត្រូវណាស់ ព្រោះថា ប្រទេសយើងរួមទាំងខេត្តរតនគិរី បានឆ្លងកាត់ការលំបាកច្រើនណាស់ពីសង្រ្គាមនិងការបែកបាក់គ្នាដែលជាមូលហេតុធ្វើឱ្យយើងគ្មានឱកាសនៅក្នុង ការអភិវឌ្ឍប្រទេសជាតិឡើយ។

ក្នុងពិធីសម្ពោធអគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានា នៅក្នុងខេត្តរតនគិរី នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត បានថ្លែងថា បើសិនជាប្រទេសកម្ពុជាយើងថែរក្សាបាននូវសុខសន្តិភាពឱ្យបាន នោះក្នុងរយៈពេល១០-២០ឆ្នាំទៀត ប្រទេសយើងរួមទាំងខេត្តរតនគិរី ពិតជាមានការរីកចម្រើនខ្លាំងជាងនេះ ដូច្នេះយើងត្រូវរួបរួមគ្នាដើរទៅមុខទៀត កុំដើរថយក្រោយ។

សម្តេចធិបតី ហ៊ុន ម៉ាណែត បានគូសបញ្ជាក់ថា នៅក្នុងសម័យសង្រ្គាម ខេត្តរតនគិរី មានហានិភ័យ ក្នុងការធ្វើដំណើរ ដោយចំណាយពេលយូរ ជាពិសេសគឺការស្ទាក់បាញ់ប្រហារពីអតីតខ្មែរក្រហម ថែមទៀតផង ហើយពេលខ្លះ បើយើងធ្វើដំណើរមករាជធានីភ្នំពេញ ត្រូវសុំការអនុញ្ញាតឆ្លងកាត់តាមប្រទេសវៀតណាម មកតាមច្រកបាវិត មកកាន់រាជធានីភ្នំពេញ៕SRP

រដ្ឋមន្ត្រីក្រសួងការពារជាតិកម្ពុជា៖ កម្ពុជា មានបំណងទទួលយកតែសន្តិភាព ស្ថិរភាព និងតំកល់ប្រយោជន៍ប្រជាជនយើងទាំងសងខាងជាធំ

ឯកឧត្តមនាយឧត្តមសេនីយ៍ទៀ សីហាឧបនាយករដ្ឋមន្ត្រីរដ្ឋមន្ត្រីក្រសួងការពារជាតិកម្ពុជាបានបញ្ជាក់ថា នៅរសៀលថ្ងៃទី៥ ខែមិថុនា ឆ្នាំ២០២៥ ខ្ញុំបានជួបពិភាក្សាជាមួយឯកឧត្តម Phumtham Wechayachai ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិថៃ អំពីភាពតានតឹងតាមព្រំដែន ដែលបានប្រព្រឹត្តិទៅស្រុកអារញ្ញប្រថេត ខេត្តស្រះកែវ ព្រះរាជាណាចក្រថៃ ជាលទ្ធផលនៃកិច្ចប្រជុំ យើងបាន៖

– ឯកភាពកាត់បន្ថយភាពតានតឹង ដោយភាគីយើងទាំងពីរ បានរក្សាការប្រាស្រ័យទាក់ទងគ្នាទៅវិញទៅមក ការយោគយល់គ្នា និងរក្សាការសន្ទនាដោយសន្តិវិធីទៅថ្ងៃខាងមុខទៀត ក្នុងគោលបំណងជៀងវាងការប៉ះទង្គិចយោធាគ្នា កម្ពុជា-ថៃ។

– ចំនុចភាគីថៃ បានស្នើសុំឲ្យសម្រួលកងទ័ព ត្រលប់ទៅសភាពដើមមុនឆេះសាលារួមចិត្ត ឬសភាពដើមដូចកាលឆ្នាំ២០២៤ ភាគីកម្ពុជាបដិសេធ និងមិនទទួលយកការស្នើសុំនោះទេ ព្រោះទីតាំងខាងលើ ជាទីតាំងស្ថិតក្នុងដែនអធិបតេយ្យភាពរបស់កម្ពុជា ដែលបានឈរជើងជាអចិន្ត្រយ៍តាំងពីដើមរៀងមក ។ ភាគីកម្ពុជា មិនអាចថយពីទីតាំងឈរជើងបាននោះឡើយ។

– ដរាបណាភាគីថៃ នៅប្រើ ផែនទីខុសគ្នា មាត្រដ្ឋានខុសគ្នា នោះយើងនឹងមិនអាចរកចំនុចកណ្តាលក្នុងការថែរក្សាស្ថិរភាពព្រំដែនបានឡើយ។ ភាគីកម្ពុជា នៅតែប្រកាន់ស្មារតី នៃការគោរពអនុស្សរណៈ នៃការយោគយល់គ្នា ឆ្នាំ២០០០ (MOU 2000) ដូចដែលមានកន្លងមក។ ហេតុនេះហើយ បានជាភាគីកម្ពុជា សម្រេចចិត្ត រៀបចំសំណុំរឿងបញ្ជូនវិវាទតំបន់ទាំង៤ (តំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី) ទៅតុលាការយុត្តិធម៌អន្តរជាតិ(ICJ) នៅទីក្រុងឡាអេ ដើម្បីបញ្ចប់ជម្លោះ និងកំណត់ព្រំដែនជាក់លាក់។ កម្ពុជា មានបំណងទទួលយកតែសន្តិភាព ស្ថិរភាព និងតំកល់ប្រយោជន៍ប្រជាជនយើងទាំងសងខាងជាធំ ។ ក្នុងនោះភាគីថៃ ក៏បានបង្ហាញពីការគោរពសិទ្ធិកម្ពុជា ក្នុងការដាក់ចំនុចទាំង៤ ទៅតុលាការយុត្តិធម៌អន្តរជាតិ(ICJ) ។ យើងក៏បានឯកភាពគ្នាក្នុងការបន្តយន្តការចរចាក្នុងកិច្ចប្រជុំ GBC/JBC/RBC ទៅលើចំនុចដទៃៗទៀតនាថ្ងៃខាងមុខ។

ភាគីថៃ ក៏បានបញ្ជាក់ និងច្រានចោលរាល់ព័ត៌មានអុចអាល និងរុញស្ថានការណ៍ ដែលបាននឹងធ្វើឲ្យប៉ះពាល់សន្តិអារម្មណ៍កងទ័ពយើងទាំងពីរ និងប្រជាជនយើងទាំងពីរ ដូចជាការលើកឡើងពីការបិទច្រកព្រំដែនអន្តរជាតិ, ការលុបកិច្ចប្រជុំJBC និងព័ត៌មានផ្សេងៗទៀតក្រៅផ្លូវការ ។

#កម្ពុជា #Cambodia
-អរគុណសន្តិភាព !
-អរគុណនយោបាយឈ្នះឈ្នះ !
-ដឹងគុណស្ថាបនិក មគ្គុទ្ទេសក៍ឯក និងប្រតិបតិ្តករ នយោបាយ ឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ !

រាជធានីភ្នំពេញ៖អគ្គស្នងការនគរបាលជាតិ ឯកឧត្តម នាយឧត្តមសេនីយ៍ ស ថេត បានដាក់បទបញ្ជាដល់កម្លាំងជំនាញ នៃអគ្គស្នងការដ្ឋាននគរបាលជាតិ ពិសេសមន្ទីរប្រឆាំងគ្រឿងញៀន ត្រូវបន្ដប្រតិបត្តិការកុំបន្ធូរដៃលើការងារបង្ការ ទប់ស្កាត់ និងបង្ក្រាបបទល្មើសគ្រឿងញៀន។

ក្នុងឱកាសដឹកនាំកិច្ចប្រជុំត្រួតពិនិត្យ និងវាយតម្លៃលទ្ធផលការប្រយុទ្ធប្រឆាំងគ្រឿងញៀន ប្រចាំឆមាសទី១ នៅព្រឹកថ្ងៃទី៦ ខែមិថុនា ឆ្នាំ២០២៥ នៅទីស្តីការក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត ក៏បានជំរុញឲ្យផ្ដោតការយកចិត្តទុកដាក់លើការងារផ្សព្វផ្សាយអប់រំអំពីផលប៉ះពាល់នៃគ្រឿងញៀនដល់ប្រជាពលរដ្ឋ ពិសេសអាណាព្យាបាលត្រូវបន្ដយកចិត្តទុកដាក់ចំពោះកូនចៅរបស់ខ្លួន ដើម្បីជៀសឲ្យឆ្ងាយពីគ្រឿងញៀន។

ដើម្បីឲ្យការងារបង្ការ ទប់ស្កាត់ និងបង្ក្រាបបទល្មើសគ្រឿងញៀនកាន់តែមានប្រសិទ្ធភាព ឯកឧត្តម នាយឧត្តមសេនីយ៍ ស ថេត បានណែនាំដល់មន្ទីរប្រឆាំងបទល្មើសគ្រឿងញៀន ត្រូវសហការជាមួយគ្រប់ស្ថាប័ន អង្គភាព និងសមត្ថកិច្ចពាក់ព័ន្ធឲ្យបានស្អិតរមួត និងចាត់ទុកការងារប្រយុទ្ធប្រឆាំងគ្រឿងញៀន គឺជាទិសដៅរួមគ្នា។

ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានសង្កត់ធ្ងន់ថា បញ្ហាគ្រឿងញៀននៅតែជាក្តីកង្វល់របស់សកលលោក ប្រទេសនៅក្នុងតំបន់ ក៏ដូចនៅក្នុងប្រទេសកម្ពុជា។ ឯកឧត្តម នាយឧត្តមសេនីយ៍ អះអាងថា គ្រឿងញៀន គឺបានបំផ្លាញអនាគតរបស់យុវវ័យ ដែលជាទំពាំងស្នងឬស្សី ដូច្នេះត្រូវតែរួមគ្នាបង្ការ ទប់ស្កាត់ និងបង្ក្រាបឲ្យមានប្រសិទ្ធភាព៕SRP

គ្រាន់តែខ្ចីម៉ារវេនមិនបាន កូនប្រុសលើកដៃកាន់កាំបិតកាប់ឪពុកបង្កើតបណ្តាលឱ្យស្លាប់នៅខ្ទមស្រែ

ខេត្តព្រះវិហារ៖ទីបំផុតកម្លាំងគរបាលខេត្តព្រះវិហារ សហការជាមួយនគរបាលឧត្តរមានជ័យ ធ្វើការបំបែកសំណុំរឿងឃាតកម្ម ដោយឃាត់ខ្លួនបានជនសង្ស័យ ធ្វើសកម្មភាពយកកាំបិតផ្គាក់កាប់ទៅលើឪពុកបង្កើតរបស់ខ្លួនបណ្តាលឱ្យដេកស្លាប់ក្នុងខ្ទមស្រែ នៅភូមិកោះកេរ ឃុំស្រយង់ ស្រុកគូលែន ខេត្តព្រះវិហារ។

ការឃាត់ខ្លួននេះធ្វើឡើងនៅភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ នាថ្ងៃទី០២ ខែមិថុនា ឆ្នាំ២០២៥។

លោកវរសេនីយ៍ឯក ឱ សេង អធិការនគរបាលស្រុកគូលែន ជនសង្ស័យឈ្មោះ ស្រី ស៊ីណា ហៅ ណាវ វាសនា ភេទប្រុស អាយុ៣៤ឆ្នាំ ជនជាតិខ្មែរ របរកសិករ ទីលំនៅបច្ចុប្បន្នភូមិពពេលលិច ឃុំពពេល ស្រុកសូទ្រនិគម ខេត្តសៀមរាប ត្រូវជាកូនបង្កើតរបស់សពជនរងគ្រោះឈ្មោះ ដួង ស្រី ភេទប្រុស អាយុ៦០ឆ្នាំ។

លោក ឱ សេង បានបន្ថែមថា កាលពីថ្ងៃទី៣១ ខែឧសភា ឆ្នាំ២០២៥ វេលាម៉ោង៨ និង៣៥នាទីព្រឹក ប៉ុស្តិ៍នគរបាលរដ្ឋបាលស្រយង់ បានទទួលព័ត៌មានពីឈ្មោះ ហេង ហឿន ភេទប្រុស ជាប្រជាការពារភូមិថា មានករណីឃាតកម្មកាប់បង្ករឱ្យស្លាប់ដល់ជនរងគ្រោះម្នាក់ នៅថ្ងៃទី៣០ ខែឧសភា ឆ្នាំ២០២៥ វេលាម៉ោងប្រហែល១៩.៣០នាទី នៅចំណុចខ្ទមស្រែត្រពាំងប៉ាលហាល ស្ថិតនៅភូមិកោះកេរ ឃុំស្រយង់ ស្រុកគូលែន ខេត្តព្រះវិហារ។

ក្រោយពីទទួលបានព័ត៌មាននេះភ្លាម កម្លាំងប៉ុស្តិ៍នគរបាលរដ្ឋបាលស្រយង់ សហការជាមួយកម្លាំងជំនាញអធិការដ្ឋាននគបាលស្រុកគូលែន និងអាជ្ញាធរ ភូមិ ឃុំ កម្លាំងអាជ្ញាធរជាតិប្រចាំប្រាសាទកោះកេរ និងគ្រួសារសព បានចុះទៅដល់កន្លែងកើតហេតុនៅក្រោមសំយ៉ាបខ្ទមស្រែ៖ឃើញថា សពមានកម្ពស់១៥៥ស.ម ស្លៀកខោជើងខ្លីពណ៌ខ្មៅ គ្មានអាវ ស្ថានភាពសាកសពដេកផ្ងារ បើកភ្នែក ក្បាលទៅទិសខាងជើង សណ្តូកជើងទៅទិសខាងត្បូង។

លោក ឱ សេង បន្ថែមទៀតថា បើតាមការបំភ្លឺរបស់ឈ្មោះ វេត វង់ ភេទប្រសអាយុ៥៣ឆ្នាំ ដែលមានខ្ទមស្រែនៅមិនឆ្ងាយពីខ្ទមស្រែជនរងគ្រោះ បាននិយាយប្រាប់សម្ថកិច្ចថា មុនពេលកើតហេតុកាលពីថ្ងៃទី៣០ ខែឧសភា ឆ្នាំ២០២៥ វេលាម៉ោងប្រហែល១១ថ្ងៃត្រង់ ជនសង្ស័យឈ្មោះ ណាវ វាសនា ហៅ ស៊ីណា បានដើរមកសុំខ្ចីម៉ារវេន ដើម្បីបញ្ឆេះម៉ាស៊ីនគោយន្តកន្ត្រៃពីគាត់ តែគាត់មិនឱ្យទេ ហើយម៉ារវេនរបស់ជនសង្ស័យ ត្រូវឪពុកជាជនរងគ្រោះបានយកលាក់ទុកមិនឱ្យប្រើ ទើបធ្វើឱ្យជនសង្ស័យ ជាកូនខឹងនិងឪពុក ណាមួយកូនប្រុសជាជនសង្ស័យរូបនេះតែងផឹកស្រាស្រវឹងជាប្រចាំ ទើបឈានដល់ការយកកាំបិតកាប់ឪពុករបស់ខ្លួនឯងបែបនេះតែម្តង៕SRP

សម្តេចតេជោ៖ «អ្នកដែលជេរខ្លាំង មិនប្រាកដថាប្រឆាំងពិតប្រាកដនោះទេ»

សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាជរដ្ឋសភានិងព្រឹទ្ធសភា នៃព្រះរាជាណាចក្រកម្ពុជា បានគូសបញ្ជាក់ថា អ្នកដែលជេររាជរដ្ឋាភិបាល និងជេរគណបក្សប្រជាជនកម្ពុជាខ្លាំងបំផុត មិនប្រាកដថាបុគ្គលនោះ ជាអ្នកប្រឆាំងពិតប្រាកដនោះទេ ព្រោះថាជួនកាល បន្ទាប់ពីជេររួច គេនឹងចូលរួមជាមួយគណបក្សប្រជាជនកម្ពុជា ដែលនេះគឺជាអ្វីដែលសម្តេចហៅថា «យុទ្ធសាស្រ្តតេជោ»។

ក្នុងសមាជរដ្ឋសភា និងព្រឹទ្ធសភា លើកទី១ ដែលប្រារព្ធនៅវិមានរដ្ឋសភា នៅរសៀលថ្ងៃទី៣ ខែមិថុនា ឆ្នាំ២០២៥ សម្តេចតេជោ ហ៊ុន សែន បានថ្លែងថា សម្តេចបានប្រើយុទ្ធសាស្រ្តនយោបាយជាច្រើន រួមមានទាំងយុទ្ធសាស្រ្ត «រុញទូកបណ្តោយទឹក» ជាដើម តាមរយៈការបណ្តោយឱ្យសមាជិកទៅចូលរួមឈរឈ្មោះនៅក្នុងអតីតគណបក្សសង្រ្គោះជាតិ ដូចករណី ឯកឧត្តម ឡុង ប៊ុន្នី ជាដើម។ ដូចនេះ គេមិនអាចចោទថា ឯកឧត្តម ឡុង ប៊ុន្នី លក់ឧត្តមគតិបានទេ។

សម្តេចតេជោ ហ៊ុន សែន បានគូសបញ្ជាក់ថា សម្តេចបានដឹងថា ក្នុងបរិបទបច្ចុប្បន្ននេះ គណបក្សឆន្ទៈខ្មែរ និងគណបក្សកម្លាំងជាតិ ក៏កំពុងតែរៀបចំរចនាសម្ព័ន្ធផ្ទៃក្នុងរបស់ខ្លួនដើម្បីឈរឈ្មោះបោះឆ្នោត ហើយក៏កំពុងតែខ្វះមនុស្សផងដែរ ដូចនេះហើយ សម្តេចអាចនឹងប្រើប្រាស់យុទ្ធសាស្រ្តរុញទូកបណ្តោយទឹកបន្តទៀត៕SRP

បានចំណូលបានជាង $២៤លាន ពីការលក់សំបុត្រឱ្យភ្ញៀវទេសចរចូលទស្សនាអង្គរ

ខេត្តសៀមរាប៖គ្រឹះស្ថានអង្គរ បានលក់សំបុត្រឱ្យភ្ញៀវទេសចរអន្តរជាតិចូលទស្សនាអង្គរចំនួន ៥២ ៧៦៧នាក់ នៅក្នុងខែឧសភា ឆ្នាំ២០២៥ កើនឡើង ១១,៧១ ភាគរយ ធៀបនឹងឆ្នាំ២០២៤ នឹងរកចំណូល បានចំនួន ២៤ ៥៦៩ ០២៤  ដុល្លារអាមេរិក កើនឡើង ១០,៦៤ភាគរយ ធៀបនឹងរយៈពេលដូចគ្នា កាលពីឆ្នាំ២០២៤។

នេះបើយោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ដែលចេញផ្សាយនៅថ្ងៃទី១ ខែមិថុនានេះ ក៏បានបង្ហាញថា សម្រាប់ក្នុងខែឧសភា ឆ្នាំ២០២៥ មានភ្ញៀវទេសចរអន្តរជាតិទិញបណ្ណចូលទស្សនាអង្គរ មានចំនួន ៥២ ៧៦៧នាក់ បើធៀបនឹងខែឧសភា ឆ្នាំ២០២៤ កើនឡើងជាង ៣ភាគរយ និងរកចំណូលបានចំនួន ២ ៣៦០ ២១៤ដុល្លារអាមេរិក កើនឡើងជាង ៣ភាគរយ បើធៀបក្នុងរយៈពេលដូចគ្នាកាលពីឆ្នាំ២០២៤។

របាយការណ៍ដដែល បានបញ្ជាក់ទៀតថា ក្នុងខែឧសភា ឆ្នាំ២០២៥នេះដែរ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរ គឺភ្ញៀវទេសចរចិន ជាប់លំដាប់លេខ១, សហរដ្ឋអាមេរិកលេខ២, អង់គ្លេសលេខ៣, អូស្ត្រាលីលេខ៤, បារាំងលេខ៥ និងជប៉ុនលេខ៦។ ប៉ុន្តែរយៈពេល៥ខែ ពីខែមករាដល់ខែឧសភានេះ ភ្ញៀវទេសចរអន្តរជាតិដែលទិញសំបុត្រច្រើនជាងគេ គឺសហរដ្ឋអាមេរិកលេខ១, អង់គ្លេសលេខ២, ប្រទេសបារាំងលេខ៣, ចិនលេខ៤ និងលេខ៥ ប្រទេសកូរ៉េខាងត្បូង៕SRP

អត្ថបទ៖ លោក ឈិត សាវី
កែសម្រួល៖ លោក អ៊ុន ណារាជ្យ

លោកពុយ គា៖ ពេលប្រទេសមួយត្រូវបានឈ្លានពាន តើអ្នកព័ត៌មានធ្វើដូចម្តេច?

បើសិនជាប្រទេសមួយត្រូវបានប្រទេសជិតខាងរំលោភ ឬឈ្លានពាន អ្នកសារព័ត៌មានមានតួនាទីសំខាន់ណាស់ក្នុងការផ្តល់ព័ត៌មានដល់សាធារណជន ប៉ុន្តែត្រូវគោរពគោលការណ៍ដូចខាងក្រោម៖
១. ការពិត៖
• ផ្ទៀងផ្ទាត់អំពីការរំលោភ ឬឈ្លានពានទឹកដីជាមួយប្រភពដែលអាចជឿជាក់បាន (ឧ. សេចក្តីថ្លែងការណ៍ចេញពីក្រសួងការពារជាតិ ចេញពីរដ្ឋាភិបាលឬអ្នកនាំពាក្យ…)។
• ផ្តល់ទីតាំងកើតហេតុ ពេលវេលា ទំហំ (ឧ. ប៉ះទង្គិចតែចំណុចព្រំដែនមួយ ឬការរំលោភពេញលេញ) ការខូចខាត ស្លាប់ របួស ឬជនភៀសខ្លួន។
• ចៀសវាងចំណងជើងបង្កការភ័យខ្លាច (ឧ. “ការប៉ះទង្គិចត្រង់ព្រំដែនកើតឡើងកាន់តែធ្ងន់ធ្ងរ” មិនមែន “សង្គ្រាមផ្ទុះឡើងហើយ”)។

២. ការឆ្លើយតបរបស់រដ្ឋាភិបាល៖
• ផ្តល់ព័ត៌មានដល់សាធារណជនអំពីជំហរផ្លូវការដែលកំពុងអនុវត្ត៖ ការបង្រួបបង្រួមកងទ័ព ការតវ៉ាជាផ្លូវការទៅកាន់ប្រទេសដែលរំលោភឬឈ្លានពាន ទៅកាន់តុលាការអន្តរជាតិ ការអំពាវនាវឲ្យមានការចូលរួមជួយពីអន្តរជាតិ។

៣. ចៀសវាងព័ត៌មានមិនបានផ្ទៀងផ្ទាត់ ឬព័ត៌មានស៊ីអារម្មណ៍ ៖
• កុំផ្សាយព័ត៌មានចចាមអារ៉ាមចេញពីបណ្តាញសង្គម ឬប្រភពមិនផ្លូវការដែលមិនទាន់មានការផ្ទៀងផ្ទាត់។
• ចៀសវាងបង្ហោះរូបភាពសាហាវ ឬរាយការណ៍ពីចំនួនអ្នករងគ្រោះដែលមិនទាន់មានការបញ្ជាក់ត្រឹមត្រូវដែលអាចប៉ះពាល់ដល់អារម្មណ៍សាធារណជន។

៤. ប្រើភាសាដោយមានការទទួលខុសត្រូវ៖
• កុំប្រើពាក្យបញ្ឆេះកំហឹង និងបែបប្រកាន់ពូជសាសន៍ទៅកាន់ប្រជាជននៃប្រទេសជិតខាង ព្រោះប្រជាជនអាចមិនពាក់ព័ន្ធទេ។
• ប្រើភាសាអព្យាក្រិត៖ ប្រើ “កងកម្លាំងប្រទេសជាប់ព្រំដែន” ជំនួសឲ្យ “សត្រូវ ឬពួកឈ្លានពាន” លើកលែងតែរដ្ឋាភិបាលបានហៅនិងប្រើប្រាស់រួចហើយ។

៥. គាំទ្រឯកភាពជាតិ និងសុវត្ថិភាពសាធារណៈ៖
• ចែករំលែកសេចក្តីណែនាំសុវត្ថិភាពសាធារណៈ តំបន់សុវត្ថិភាព យុទ្ធសាស្ត្រជម្លៀស លេខទំនាក់ទំនងសម្រាប់ជួយបន្ទាន់។
• អំពាវនាវឲ្យប្រជាពលរដ្ឋរក្សាភាពស្ងប់ស្ងាត់ តាមដានការណែនាំផ្លូវការ។

៦. កិច្ចខិតខំផ្នែកការទូត ៖
• ផ្តល់ព័ត៌មានពីកិច្ចខិតខំរបស់រដ្ឋាភិបាល អង្គការអន្តរជាតិ (ឧ. អាស៊ាន អង្គការសហប្រជាជាតិ) ដើម្បីដោះស្រាយវិបត្តិតាមផ្លូវការទូត។

៧. កុំបង្ហាញព័ត៌មានដែលអាចប៉ះពាល់ដល់ប្រតិបត្តិការយោធា៖
• កុំបង្ហាញអំពីចលនាកងទ័ព ទីតាំងយុទ្ធសាស្ត្រ ឬប្រតិបត្តិការណាមួយដែលកំពុងអនុវត្តនៅតាមទីកន្លែងក្បែរព្រំដែន ឬក្បែរតំបន់ប៉ះទង្គិចគ្នា។
• សហការជាមួយអាជ្ញាធរ ឬយោធាដើម្បីធានាថាការផ្សាយព័ត៌មានមិនជួយទៅដល់ភាគីអ្នករំលោភ/ឈ្លានពាន ឬប៉ះពាល់ដល់ការពារជាតិ។

៨. ផ្សាយពីប្រវត្តិទីតាំង៖
• បញ្ហាព្រំដែនក្នុងបរិបទប្រវត្តិសាស្ត្រ ព្រឹត្តិការណ៍កើតឡើងកន្លងមក យោងតាមកិច្ចព្រមព្រៀង ឬច្បាប់អន្តរជាតិ។
• ចងក្រងព្រឹត្តិការណ៍តាមលំដាប់លំដោយពេលវេលា និងពន្យល់អំពីផលប៉ះពាល់ជាលក្ខណៈភូមិសាស្ត្រ។
• សម្ភាសអ្នកជំនាញ (អ្នកវិភាគយោធា អ្នកច្បាប់អន្តរជាតិ មន្ត្រីការទូត ជំនួសឲ្យអត្ថបទដែលបញ្ចេញមតិបែបផ្ទាល់ខ្លួន។

ដោយ៖ ពុយ គា (ថ្ងៃទី២ ខែមិថុនា ឆ្នាំ២០២៥)