ខេត្តសៀមរាប៖សមត្ថកិច្ចខេត្តសៀមរាប បានរាយការណ៍ថាមោ៉ង១២និង២០ ថ្ងៃទី០៩ ខែធ្នូ ឆ្នាំ២០២០ ត្រង់ចំណុច មុខសាលមហោស្រពអង្គរស្ថិតនៅភូមិត្រពាំងសេះ សង្កាត់គោកចកក្រុងសៀមរាប ក្រុមការងារដំឡើងទឹកស្អាត បានប្រទះឃើញប្រភេទគ្រាប់ ១២២MM មិនទាន់ផ្ទុះ០១គ្រាប់។

បច្ចុប្បន្នប្រគល់ជូនអង្គការសុីម៉ាកយកទៅកម្ទេសចោល៕SRP

ខេត្តសៀមរាប៖នគរបាលក្រុងសៀមរាប បាន ឃាត់ខ្លួនបុរសម្នាក់ ពាក់ពន្ធ័អំពើលួចម៉ូតូ។

ជនសង្ស័យ មានឈ្មោះ សារ សារី អាយុ៣៥ឆ្នាំ មុខរបរ ជាងផ្សារដែក មានស្រុកកំណើតភូមិជំុនីក ឃុំជុំនីក ស្រុកក្រូចឆ្មារ ខេត្តត្បូងឃ្មុំ បច្ចប្បន្ន សស្នាក់បន្ទប់ជួល ក្នុងភូមិវត្តស្វាយ សង្កាត់សាលាកំរើក ក្រុងសៀមរាប។

នគរបាលក្រុងសៀមរាបបានឲ្យដឹងថាជនសង្ស័យបាន លួចម៉ូតូ០១គ្រឿង កាលពីថ្ងៃទី៥ ខែធ្នូ ឆ្នាំ២០២០ នៅចំណុច មុខការដ្ឋានសំណង់មួយកន្លែង ស្ថិតនៅភូមិខ្នារ សង្កាត់ជ្រាវ ក្រុងសៀមរាប ហើយយកទៅបិតស្គុតពណ៌ខៀវ និងដោះស្លាកលេខចេញ ដើម្បីបន្លំភ្នែក។

ម៉ូតូ ដែលដកហូតបាន មកវិញ ពាក់ស្លាកលេខ សៀមរាប 1AH-3681 មានលេខតួនិង​ លេខម៉ាស៊ីន ៨១៧១៥៥៨ ជាម៉ូតូរបស់ជនរងគ្រោះ ឈ្មោះ ភួត សុភ័ក្រ ភេទប្រុស អាយុ១៧ ឆ្នាំ មុខរបរជាងពីដាន រស់នៅភូមិខ្នារ សង្កាត់ក្របីរៀល ក្រុងសៀមរាប។

បើតាមនគរបាលបានបញ្ជាក់ថាដោយមានការឯកភាពពីលោកឧត្តមសេនីយ៍ទោ ទិត្យ ណារ៉ុង ស្នងការ ខេត្តសៀមរាប និងលោកស្នងការរងទទួលផែនព្រហ្មទណ្ឌ បានប្រគល់ម៉ូតូជូនជនរងគ្រោះ យកទៅប្រើប្រាស់វិញ។

ចំណែក ជនសង្ស័យនិងវត្ថុតាង ត្រូវបានកសាងសំណុំរឿង បញ្ជូនទៅតុលាការដើម្បីផ្ដន្ទាទោសតាមផ្លូវច្បាប់ ។

សុំបញ្ជាក់ថាការឃាត់ខ្លួនធ្វើឡើងនៅថ្ងៃទី០៧ ខែធ្នូឆ្នាំ២០២០ នៅចំណុចភូមិខ្នារ សង្កាត់ជ្រាវ ក្រុងសៀមរាប ដឹកនាំដោយលោកវរសេនីយ៍ទោ ដា ចំរើន អធិការដ្ឋាននគរបាល ក្រុងសៀមរាប និងលោកវរសេនីយ៍ទោ នួន សក្តិ័ចំរើនរិទ្ធ អធិការរងទទួលការងារព្រហ្មទណ្ឌ សហការ ជាមួយនគរបាលប៉ុស្តិ៍ សង្កាត់ជ្រាវ។

ប្រជាពលរដ្ឋ បានសម្ដែងនូវសាទរ យ៉ាងខ្លាំង ចំពោះ សមត្ថកិច្ច នគរបាលក្រុងខេត្តសៀមរាប ដែលតែងតែ ទប់ស្កាត់បង្ក្រាបរាល់បទល្មើស ដែលកើតឡើងនៅក្នុងមូលដ្ឋាន។ ពួកគាត់សង្ឃឹមថានឹងកាត់បន្ថយនូវអំពើចោរកម្ម កាន់តែល្អប្រសើរនៅក្រុងទេសចរណ៍មួយនេះ៕SRP

ភ្នំពេញ៖សម្ដេច​ ស ខេង និងមនុស្សជំនិតៗ របស់សម្ដេច បានធ្វើតេស្តជាលើកទីពីរគឺអវិជ្ជមានទាំងអស់។

នេះបើយោងតាមការបញ្ជាក់ របស់ខុទ្ទកាល័យ របស់សម្ដេច។ ខាងក្រោមនេះ ជាការលើកឡើងរបស់ ខុទ្ទកាល័យ៖ ខុទ្ទកាល័យ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សូមជម្រាបជូនសាធារណជនមេត្តាជ្រាបជាថ្មីថា៖ តាមការបញ្ជាក់របស់ក្រសួង សុខាភិបាល សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្រុមគ្រួសារ កងការពារ ព្រមទាំងមន្ត្រីសំខាន់ៗទាំងអស់ដែលបានធ្វើតេស្តជំងឺកូវីដ-១៩ លើកទី២ គឺទទួលបានលទ្ធផលល្អប្រសើដោយអវិជ្ជមានទាំងអស់។

នៅពេលនេះ សម្ដេចក្រឡាហោម នៅតែធ្វើចត្តាឡីស័ក និងអនុវត្តតាមការណែនាំរបស់ក្រសួងសុខាភិបាល ជាបន្តទៀត ហើយ សម្ដេចក្រឡាហោម ក៏សូមអំពាវនាវដល់បងប្អូនជនរួមជាតិ ថ្នាក់ដឹកនាំមន្ត្រីរាជការស៊ីវិល នគរបាលជាតិនៃក្រសួងមហាផ្ទៃ សូមបន្តអនុវត្តតាមការណែនាំរបស់ក្រសួងសុខាភិបាលឱ្យបានខ្ជាប់ខ្ជួន៕SRP

ខេត្តកំពត៖ចាស់បុរាណតែងពោលថា ទីកន្លែងភ្នំនីមួយៗ តែងតែមានបុណ្យបារមី ស័ក្កិសិទ្ធិ ខ្ពស់ មិនងាយនរណាម្នាក់ អាចចូលទៅកាយកាប់បានទេ លើកលែងតែអ្នកនោះមានបុណ្យបារមីខ្លាំង។

ជាក់ស្ដែងប្រជាពលរដ្ឋ នៅ ភូមិត្រើយកោះ សង្កាត់ ត្រើយកោះ ក្រុងកំពត ខេត្តកំពត បានឲ្យដឹងថា ភ្នំដូង កំពុងត្រូវឈ្មួញ ជីកកកាយ ហើយមន្ត្រី មន្ទីរពាក់ព័ន្ធ ក៏ដូចជាមន្ត្រីអាជ្ញាធរ ថ្នាក់ក្រោមជាតិ មិនចាត់ វិធានការទប់ស្កាត់នោះទេ។  ហេតុនេះហើយទើប ប្រជាពលរដ្ឋ អំពាវនាវឲ្យ លោក ជាវ តាយ អភិបាល ខេត្តកំពត ក៏ដូចជាលោក ស៊ុយ សែម រដ្ឋមន្ត្រី ក្រសួងរ៉ែ និង ថាមពល ជួយចាត់វិធានការទប់ ស្កាត់ជាបន្ទាន់។

បើមិនដូច្នេះទេភ្នំដូង ត្រូវរលាយបាត់រូបរាង ក្នុងពេលឆាប់ៗជាមិនខាន ព្រោះច្រើនថ្ងៃ មកហើយដែលឈ្មួញជីកកកាយដីភ្នំ ធ្វើអាជីវកម្ម តាមអំពើចិត្ត។

បើតាមការបង្ហើប ពីមន្ត្រីរាជការក្នុង មន្ទីររ៉ែនិងថាមពលខេត្តកំពត មួយចំនួនបានបង្ហើបឲ្យដឹងថា ប្រសិនបើគ្មានការបើកដៃពីសំណាក់ អាជ្ញាធរ និងមន្ត្រីជំនាញទេ គ្មានឈ្មួញណាអាចជីកកកាយដី ភ្នំដូង បានឡើយ។

អ្នកសារព័ត៌មានបានភ្ជាប់ទូរស័ព្ទ ទៅ លោក សោម វិចិត្រ ប្រធានមន្ទីររ៉ែថាមពល ខេត្តកំពត ដើម្បីសុំការបំភ្លឺ ពាក់ព័ន្ធករណី កាយដីភ្នំ មួយកន្លែង ភ្នំដូង ទូរស័ព្ទរបស់លោក សោម វិចិត្រ បានដាក់ប្រព័ន្ធជាប់រវល់រហូត ព័ត៌មានមិនអាច សុំការបំភ្លឺបាននោះទេ។

ដោយឡែក លោក ជាវ តាយ អភិបាលខេត្តកំពត បានឲ្យដឹងថា លោកនឹងបញ្ជាឲ្យខាង សាលាក្រុងកំពត ចុះទៅពិនិត្យមើល គ្មាននរណា ចេញច្បាប់ឲ្យកាយដីភ្នំ នោះទេ៕SRP

ខេត្តព្រះវិហារ៖មេភូមិអន្លង់វែង កំពុងទទួលរងនូវការរិះគន់ថា បានបើករោងសិប្បកម្មកែច្នៃឈើ ដោយល្មើសច្បាប់ ដោយអាងអំណាចខ្លូនជាមេភូមិ។ ករណីនេះ មិនត្រូវបានសមត្ថកិច្ចឬជំនាញ ហ៊ានចុះទៅបង្ក្រាបនោះទេ បើទោះបីដឹងថាអត់ច្បាប់យ៉ាងក៏ដោយ។

សេចក្ដីរាយការណ៍បានឲ្យដឹងថាសិប្បកម្មកែច្នៃឈើអត់ច្បាប់ចំនួន៣កន្លែង នៅពីខាងក្រោយផ្ទះរបស់ លោក ណាង ថិន ស្ថិត ក្នុង ភូមិអន្លង់វែង ឃុំកន្ទួត ស្រុកជាំក្សាន្ត ខេត្តព្រះវិហារ កំពុងតែ ធ្វើសកម្មភាព យ៉ាងគគ្រឹកគគ្រេង។

សេចក្ដីរាយការណ៍បន្តថា លោក ណាង ថិន មេភូមិ នឹងជាម្ចាស់រោងសិប្បកម្មឈើ បានបើកទីតាំងរយ: ពេលជាច្រើនឆ្នាំមកហើយ ដែលសិប្បកម្ម មេភូមិរូបនេះ ក៏ជាប្រភពបំផ្លាញព្រៃឈើ យ៉ាងធ្ងន់ធ្ងរផងដែរ។

មានការលើកឡើងថា លោកមេភូមិ រូបនេះ មិនត្រឹមតែ ធ្វើសិប្បកម្ម ដោយខ្លួនឯងនោះទេ ថែមទាំងបាន គៀង គរ ហៅ បងប្អូនកូនក្មួយ នឹងបើកដៃ បណ្តោយអោយ ប្រជាពលរដ្ឋ រស់នៅក្នុងមូលដ្ឋាន បង្កើតរោងជាង ក្រឡឹងជាច្រើន រីកដូចផ្សិតនៅក្នុងមូលដ្ឋាន របស់គាត់ផងដែរ។

ពាក់ព័ន្ធទៅនឹងថាបើកសិប្បកម្មកែច្នៃឈើនេះ លោក ណាង ថិន បានប្រាប់សារព័ត៌មានថា៖ រូបលោកធ្វើការកែឆ្នៃ បានហូតមកដល់សព្វថ្ងៃនេះ ដោយសារលោកជាមេភូមិ តើមានអ្នកណា ហ៊ានចាប់លោកទៀតនោះ។  ចំណែករោងសិប្បកម្ម ផ្សេងៗ ទៀត ធ្វើបានដោយសារ តែម្ចាស់រោងសិប្បកម្ម នីមួយៗ បានទាក់ទង ជាមួយសមត្ថកិច្ច ជំនាញអស់ហើយ។

ជុំវិញទីតាំងសិប្បកម្មកែច្នៃឈើនេះ ពលរដ្ឋ នៅមូលដ្ឋានខាងលើ សង្ឃឹមថា លោក ពឹង ទ្រីដា ប្រធានមន្ទីកសិកម្ម នឹងលោក នួន សុខុម នាយខណ្ខរដ្ឋបាលព្រៃឈើ នឹងមន្ត្រីពាក់ព័ន្ធ ដទៃទៀត នឹងចុះទប់ស្កាត់បង្ក្រាបជាក់ជាមិនខាន៕SRP

ភ្នំពេញ៖រដ្ឋមន្ត្រីក្រសួងមហាផ្ទៃ សម្ដេច ស ខេង នៅព្រឹកថ្ងៃទី ១០ ខែធ្នូឆ្នាំ ២០២០ នេះ បានបង្ហាញលទ្ធផល មតិសំណូមពរ នានា នៅក្នុង page facebook របស់សម្ដេច ប្រចាំខែវិច្ឆិកា។

សម្ដេចស ខេង បានឡើងថា៖នេះជាលទ្ធផលការងារប្រចាំខែវិច្ឆិកា របស់ក្រុមការងារ តាមដានអំពីការដោះស្រាយ ចំពោះមតិយោបល់ ឬសំណូមពរ របស់មហាជនក្នុងគេហទំព័រ ហ្វេសប៊ុក របស់ខ្ញុំ ព្រះករុណាខ្ញុំ ដូចរបាយការណ៍ភ្ជាប់មកជាមួយខាងក្រោម។

ដូចជាពេលមុនៗដែរ ខ្ញុំព្រះករុណាខ្ញុំ សូមសម្ដែងការកោតសរសើរ និងវាយតម្លៃខ្ពស់ចំពោះកិច្ចសហការ ប្រកបដោយការទទួលខុស ត្រូវខ្ពស់របស់ថ្នាក់ដឹកនាំ និងមន្ត្រីនៃអង្គភាពចំណុះក្រសួងមហាផ្ទៃ ព្រមទាំងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ដែលតែងតែប្រឹងប្រែងធ្វើកិច្ចការក្នុងការឆ្លើយតបចំពោះមតិយោបល់ កង្វល់ និងសំណូមពរនានារបស់មហាជន ជាមួយក្រុមការងារទំព័រហ្វេសប៊ុករបស់ខ្ញុំព្រះករុណា ខ្ញុំ ក្នុងន័យរួមគ្នាដើម្បីបំរើជាតិ និងប្រជាពលរដ្ឋ៕SRP

ខេត្តសៀមរាប៖អ្នកបើកបររថយន្តម្នាក់បានស្លាប់បាត់បង់ជីវិត ដោយសារបុក ជាមួយរថយន្តកែច្នៃ។

ហេតុការណ៍បានកើតឡើងនៅថ្ងៃទី 09 ខែ ធ្នូ ឆ្នាំ 2020 នៅវេលាម៉ោង 15 និង 20 នាទី ត្រង់ចំណុចមុខផ្ទះឈ្មោះ វង្ស សារ៉ាត់ ចន្លោះគីឡូម៉ែត្រលេខ 30-31 ស្ថិតនៅភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប គ្រោះថ្នាក់បង្ករឡើងរវាង រថយន្ត និងគោយន្តឆ្នៃ ច្រាសទិសគ្នា។
រថយន្តម៉ាក mazda ពណ៌ត្រេអ៉ី ពាក់ស្លាកលេខ ខេមរភូមិន្ទ 2: 8065 អ្នកបើកបរឈ្មោះ ព្រឹក រ៉ែម ភេទ ប្រុស អាយុ 39 ឆ្នាំ រស់នៅភូមិ បន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប (ស្លាប់) បានបុកជាគោយន្តច្នៃពណ៌ ស្លាកលេខគ្មាន អ្នកបើកបរគេចខ្លួនបាត់។ ចំណែករថយន្តរងការខូចខាតផងដែរ។ តាមការសន្និដ្ឋានរបស់សមត្ថកិច្ច ការណីនេះអាចបើកបរក្នុងល្បឿនលឿន ហើយខ្វះការប្រុងប្រយ័ត្ន។

ករណីនេះកំលាំងជំនាញ បានចុះទៅវាស់វែង និងប្រគល់សាកសព ទៅអោយក្រុមគ្រួសារធ្វើបុណ្យតាមប្រពៃណី។ ចំណែកវត្ថុតាងបានយកមករក្សាទុកនៅអធិការដ្ឋាននគបាលស្រុក៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅរសៀលថ្ងៃទី៩ធ្នូនេះ បានអញ្ជើញចូលរួមនៅក្នុងកិច្ចប្រជុំកំពូល CLV លើកទី១១ តាមប្រព័ន្ធវីដេអូ។ នៅក្នុងកិច្ចប្រជុំនេះ ប្រមុខដឹកនាំប្រទេសកម្ពុជា-ឡាវ-វៀតណាម បានបង្ហាញការប្តេជ្ញាចិត្តយ៉ាងមុតមាំ ក្នុងការលើកកម្ពស់ការអភិវឌ្ឍតំបន់ត្រីកោណកម្ពុជា-ឡាវ-វៀតណាម (CLV DTA) ជាមួយនឹងទស្សនៈក្នុងការពន្លឿនកំណើនសេដ្ឋកិច្ច ការកាត់បន្ថយភាពក្រីក្រ និងវឌ្ឍនភាពសង្គម-វប្បធម៌ ដោយទាញយកនូវសក្តានុពល កម្លាំង និងធនធានរបស់ប្រទេសសមាជិកនីមួយៗ។

ប្រមុខដឹកនាំទាំងអស់ទទួលស្គាល់ថា ជំងឺកូវីដ-១៩ បាននាំមកនូវការរំខានយ៉ាងធំធេងដល់សុខភាពសាធារណៈ និងប៉ះពាល់ដល់សេដ្ឋកិច្ច-សង្គម ដូច្នេះការពង្រឹងកិច្ចសហប្រតិបត្តិការគ្រប់ជ្រុងជ្រោយរវាងប្រទេសសមាជិកទាំងបី គឺមានសារៈសំខាន់ និងចាំបាច់ ដោយផ្តោតលើទំនាក់ទំនងប្រពៃណី សាមគ្គីភាព ការយោគយល់ ការជឿជាក់ អត្ថប្រយោជន៍រួម និងការអភិវឌ្ឍប្រកបដោយចីរភាព។

ប្រមុខដឹកនាំទាំងកម្ពុជា ឡាវ វៀតណាម បានកត់សម្គាល់ជាវិជ្ជមានលើការងារគណៈកម្មាធិការសម្របសម្រួលចំរុះកម្ពុជា-ឡាវ-វៀតណាម ក្នុងការអនុវត្តផែនការមេដែលបានកែសម្រួលសម្រាប់ការអភិវឌ្ឍសេដ្ឋកិច្ច-សង្គមនៃការអភិវឌ្ឍតំបន់ត្រីកោណកម្ពុជា-ឡាវ-វៀតណាម សម្រាប់ឆ្នាំ២០១០-២០២០។ ប្រមុខដឹកនាំបន្តលើកទឹកចិត្តក្នុងការសហការដោយជិតស្និទរវាងប្រទេសសមាជិក CLV ក្នុងការជំរុញកិច្ចសហប្រតិបតិ្តការលើវិស័យពាណិជ្ជកម្មនិងវិនិយោគ ទេសចរណ៍ សាសនា កសិកម្ម ព័ត៌មានវិទ្យា អប់រំ ការស្រាវជ្រាវ ការអភិវឌ្ឍជំនាញ ការការពារ ព្រមទាំងទំនាក់ទំនងសហប្រតិបត្តិការរវាងកម្រិតនីតិប្បញ្ញត្តិជាតិ និងអាជ្ញាធរថ្នាក់ក្រោមជាតិ។

នៅក្នុងអំឡុងពេលនៃកិច្ចប្រជុំ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានគូសបញ្ជាក់ពីភាពចាំបាច់នៃការបន្តកិច្ចសហប្រតិបត្តិការរវាងប្រទេស CLV ក្នុងការប្រយុទ្ធប្រឆាំងនឹងការជួញដូរមនុស្ស និងគ្រឿងញៀន បទល្មើសឆ្លងដែន បទល្មើសព្រៃឈើ និងឧក្រិដ្ឋកម្មឆ្លងដែនផ្សេងទៀត រួមទាំងការបោសសំអាតមីន ព្រមទាំងការជួយសម្រួលដល់ការឆ្លងកាត់ព្រំដែនរបស់អ្នកធ្វើដំណើរផងដែរ។

កិច្ចប្រជុំកំពូលកម្ពុជា-ឡាវ-វៀតណាមលើកទី១១ ថ្ងៃនេះ បានអនុម័តលើឯកសារ មួយចំនួនដូចជា ១)សេចក្តីថ្លែងការណ៍រួមនៃកិច្ចប្រជុំកំពូល CLV លើកទី១១, ២)ផែនការអភិវឌ្ឍន៍សម្រាប់វិស័យទេសចរណ៍នៅក្នុង CLV DTA និង ៣) ផែនការអភិវឌ្ឍន៍លើវិស័យឧស្សាហកម្មកៅស៊ូប្រកបដោយចីរភាពក្នុង CLV DTA៕SRP

ភ្នំពេញ៖សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី៩ ខែធ្នូនេះ បានបន្តអញ្ជើញចូលរួមក្នុងកិច្ចប្រជុំ CLMV តាមប្រព័ន្ធវីដេអូ។ កិច្ចប្រជុំនេះ ដឹកនាំដោយ ឯកឧត្តម ថងលូន ស៊ីស៊ូលីត នាយករដ្ឋមន្ត្រីនៃប្រទេសឡាវ។

ប្រមុខរដ្ឋាភិបាលនៃប្រទេសទាំងបួនបានផ្លាស់ប្ដូរយោបល់ និងពិនិត្យមើលពីវឌ្ឍនភាពទៅលើកិច្ចសហប្រតិបត្តិការក្នុងចំណោមទាំង៤ កម្ពុជា ឡាវ មីយ៉ាន់ម៉ា និងវៀតណាម។ ក្នុងមូលបទ «ការពង្រឹងការតភ្ជាប់ដោយប្រសិទ្ធភាពកម្មក្នុងតំបន់» ប្រមុខរដ្ឋាភិបាលនៃប្រទេសទាំងបួនបានអនុម័តទៅលើឯកសារ៣ សំខាន់៖

ទី១-សេចក្ដីថ្លែងការណ៍រួមកិច្ចប្រជុំកំពូល CLMV ទី២-ការអនុម័តទៅលើឯកសារក្របខ័ណ្ឌសម្រាប់ការអភិវឌ្ឍនៃប្រទេសទាំងបួន នៅបញ្ជីគម្រោងអាទិភាពសម្រាប់ប្រទេសទាំងបួនកម្ពុជា ឡាវ មីយ៉ាន់ម៉ា និងវៀតណាម និង ទី៣-ផ្ដោតសំខាន់លើការជំរុញការតភ្ជាប់សមាហរណកម្មនៅក្នុងតំបន់ ហើយប្រមុខរដ្ឋាភិបាលបានអនុម័តទៅលើផែនការសកម្មភាព កម្ពុជា ឡាវ មីយ៉ាន់ម៉ា និងវៀតណាមដោយផ្អែកទៅលើកិច្ចសហប្រតិបត្តិការ ៥វិស័យ ៖

១) កិច្ចសហប្រតិបត្តិការទៅលើពាណិជ្ជកម្ម និងវិនិយោគ
២) ការអនុវត្តនៃឆន្ទៈសម្រាប់តំបន់
៣) ផែនការសម្រាប់ធ្វើឱ្យប្រសើរឡើងវិញក្រោយជំងឺកូវីដ១៩
៤) ការអភិវឌ្ឍន៍កម្មវិធីនៅក្នុងប្រទេសទាំង៤
៥) ការអភិវឌ្ឍន៍ធនធានមនុស្ស។

នៅក្នុងកិច្ចប្រជុំនេះ ថ្នាក់ដឹកនាំ CLMV ក៏បានជំរុញក្នុងក្របខ័ណ្ឌអភិវឌ្ឍន៍ ជំរុញការតភ្ជាប់គ្រប់ទាំងអស់ ទាំងប្រព័ន្ធដឹកជញ្ជូន ការសម្រួលពាណិជ្ជកម្មប្រព័ន្ធអ៊ីនធឺណិត និងប្រព័ន្ធឌីជីថល ការគាំទ្រការតភ្ជាប់តាមរយៈស្ថាប័នច្បាប់ និងកម្លាំងពលកម្មជាដើម ក្នុងការទាញយកអត្ថប្រយោជន៍ក្នុងកិច្ចសហប្រតិបត្តិការលើវិស័យកសិកម្ម ស្បៀងអាហារ និងទេសចរណ៍ផងដែរ។ លើសពីនេះទៅទៀតប្រមុខរដ្ឋាភិបាលទាំងបួនបានអនុម័តទៅលើការកៀងគរហិរញ្ញវត្ថុដៃគូអភិវឌ្ឍន៍នៃស្ថាប័នហិរញ្ញវត្ថុអន្តរជាតិ និងវិស័យឯកជន ដើម្បីជំរុញ ការអនុវត្តគម្រោងទាំងឡាយក្នុងប្រទេសទាំង៤នេះ។ ប្រទេសទាំង៤ ក៏បានអនុម័តលើបញ្ជីជាអាទិភាពនៃដៃគូអភិវឌ្ឍន៍ និងស្ថាប័នហិរញ្ញវត្ថុអន្តរជាតិ និងវិស័យឯកជនដើម្បីជំរុញការអនុវត្តនូវគម្រោងទាំងឡាយដែលជាការប្រឈមមួយនោះ ។ CLMV នឹងបន្តជំរុញកិច្ចសហការ និងគាំទ្រដល់ការធ្វើសមារណកម្មអាស៊ាន ក៏ដូចជាកាតបន្តការកសាងសង្គមមួយនេះអោយបានល្អប្រសើរ ។

ក្នុងកិច្ចប្រជុំនេះផងដែរ សម្តេចតេជោនាយករដ្ឋមន្ត្រី ក៏បានជំរុញកិច្ចសហការ CLMV ជាពិសេសបានឯកភាពក្នុងការ ជំរុញវិស័យពាណិជ្ជកម្ម និងការវិនិយោគ អោយមានភាពល្អប្រសើរ និងចូលរួមដោះស្រាយនូវឧបសគ្គទាំងឡាយណា ដែលរាំងស្ទះដល់ការធ្វើពាណិជ្ជកម្មនេះ។ សម្តេចតេជោនាយករដ្ឋមន្ត្រី ក៏បានគាំទ្រការលើកកម្ពស់ការតភ្ជាប់ ការដឹកជញ្ជូន និងថាមពល ការជំរុញកិច្ចសហការលើវិស័យបច្ចេកវិទ្យាព័ត៌មាន និងទូរគមនាគមន៍ និងការពង្រឹងធនធានមនុស្សផងដែរ ដើម្បីឲ្យប្រទេស CLMV កាន់តែមានការរីកចម្រើនជាបន្តទៀត៕SRP

ខេត្តសៀមរាប៖បុរសម្នាក់បានសម្រេចចិត្តចងក សម្លាប់ខ្លួន ព្រោះតែមានវិបត្តិស្នេហា។

ហេតុការណ៍បានកើតឡើងវេលាម៉ោង០៥និង ៣០នាទី ថ្ងៃទី០៩ ធ្នូ ឆ្នាំ២០២០ ស្ថិតនៅចំណុច រោងចាំបន្លែក្រុមទី០៨ ភូមិគោកបេង សង្កាត់គោកចក ក្រុងសៀមរាប។

សមត្ថកិច្ចក្រុងសៀមរាបបានឲ្យដឹងថាជនរងគ្រោះ មានឈ្មោះ គឹម កុសល អាយុ ១៨ឆ្នាំ មានទីលំនៅក្រុម០៨ ភូមិគោកបេង សង្កាត់គោកចក ក្រុងសៀមរាប ដោយយកខ្សែលីឡុង ចងកសម្លាប់ខ្លួនឯង។

សមត្ថកិច្ចបានបញ្ជាក់ថា ការពិនិត្យសាកសព ពុំមានពាក់ព័ន្ធនិងបទល្មេីសព្រហ្មទណ្ទឡេីយ។

តាមការសន្និដ្ឋាន ជាក់ស្តែង ជនរងគ្រោះ ពិតជាបានធ្វើអត្តឃាត ចងក ពិតមែន។
មូលហេតុ៖ មានវិបត្តិផ្លូវចិត្តរឿងស្នេហាសង្សារៀបការចោល។ករណីបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តកំពង់ធំ៖ដោយកត្តាជាភាពក្រីក្រ គ្រួសារមួយ បានទៅស៊ីឈ្នួលដកដំឡូងឱ្យគេ ហើយទុកកូនតូចចំនួន ៣នាក់ នៅផ្ទះ ជាអកុសលត្រូវបានលង់ទឹកស្រះស្លាប់ទាំង៣នាក់។

ហេតុការណ៍ដ៏រន្ធត់នេះ បានកើតឡើងកាលវេលាម៉ោង៤និង៣០នាទីល្ងាច ថ្ងៃទី០៨ ខែធ្នូឆ្នាំ២០២០ ចំណុចស្រះទឹក ខាងកើតផ្ទះឈាងខាងជើង ប្រមាណ៣០០ម៉ែត ស្ថិតនៅភូមិអណ្តោត ឃុំបាក់ស្នា ស្រុកបារាយណ៍ ខេត្តកំពង់ធំ។

យោងតាមរបាយការណ៍ របស់សមត្ថកិច្ចបានឲ្យដឹងថា៖មុនពេលកើតហេតុ ដោយសាតែភាពក្រីក្រ ឪពុកម្តាយទៅស៊ីឈ្នួលដកដំឡូងឲ្យគេ នៅចំការដោយទុកកូនតូចៗនៅផ្ទះ។ លុះត្រឡប់មកផ្ទះវិញ មិនឃើញកូននៅផ្ទះ ក៏នាំគ្នាដើរកស្រាប់តែប្រទះឃើញ ស្បែកជើងនិងខោអាវកូនកូនៗ ទាំងអស់នៅក្បែរមាត់ស្រះ ក៏ចុះរាវរក ស្រាប់តែឱបគ្នារមួរ ស្លាប់បាត់បង់ជីវិត ទាំងអស់។ ដោយឪពុកស្រង់មកលើគោក យំអោបសពទាំងប្តីទាំងប្រពន្ធ ស្ទើរគាំងបេះដូង។

ករណីនេះសមត្ថកិច្ចនិងក្រុមគ្រូពេទ្យពិនិត្យធ្វើកោសលវិច្ច័យក្មេងរងគ្រោះ ទាំង៣នាក់ បងបង្កើតពិត្យជាស្លាប់ ដោយលង់ទឹកប្រាកដមែន។

កុមារងគ្រោះទី១ ឈ្មោះ យ៉ិត សុខគីម ភេទប្រុសអាយុ៦ឆ្នាំ

ទី២ ឈ្មោះ យ៉ិត កញ្ញា អាយុ៦ឆ្នាំ

សូមបញ្ជាក់ថា យ៉ិត សុខគីម និងយ៉ិតកញ្ញា ជាបងប្អូនភ្លោះនិងគ្នា ទី៣ឈ្មោះយ៉ិត ហ៊ាន់ ភេទប្រុសអាយុ៤ឆ្នាំ កុមារងគ្រោះទាំង៣នាក់នេះមានទីលំនៅ ភូមិ ឃុំ កើតហេតុខាងលើ។

ចំណែកឪពុកឈ្មោះមាស លីម អាយុ៥០ឆ្នាំម្តាយឈ្មោះ យួង អ៉ិតអាយុ៣១ឆ្នាំ។ សពក្មេងប្រុសស្រី៣នាក់ សមត្ថកិច្ចប្រគល់ឲ្យគ្រួសារធ្វើបុណ្យតាមប្រពៃណី៕SRPអ៊ុងសំអាត