ភ្នំពេញ៖អង្គភាពអ្នកនាំពាក្យរាជរដ្ឋាភិបាល ស្នើឲ្យជនទាំងអស់បញ្ឈប់ជាបន្ទាន់នូវសកម្មភាពផ្សព្វផ្សាយបំផុសព័ត៌មានញុះញង់ និងបង្កើតចលាចល នៅក្នុងស្ថានភាពប្រជាជាតិកំពុងប្រឈមនឹងបញ្ហាជំងឺកូវីដ-១៩៕SRP

ភ្នំពេញ៖នាយករដ្ឋមន្ត្រីហ៊ុន សែន បានអះអាងថា ខ្ញុំពុំមានកូវីដ១៩នោះទេ។

នេះបើយោងតាមទំព័រ page ផ្លូវការរបស់នាយករដ្ឋមន្ត្រី ដែលបានបង្ហោះសារមុននេះបន្តិច។

ក្នុងសារលើទំព័រ page facebook របស់នាយករដ្ឋមន្ត្រីហ៊ុន សែន បានបង្ហាញថា៖ ថ្ងៃនេះខ្ញុំបញ្ចប់ការធ្វើចត្តាឡីស័ក រយ:ពេល១៤ថ្ងៃបន្ទាប់ពីគ្រូពេទ្យយកសំណាកទៅពិនិត្យនិងបញ្ជាក់ថាខ្ញុំពុំមានកូវីដ១៩នោះទេ។

នាយករដ្ឋមន្ត្រីបន្តថា៖ មុនទៅឥណ្ឌូនេសុីនិងក្រោយត្រឡប់មកវិញ ខ្ញុំត្រូវធ្វើតេស្តរហូត៤ដងនិងត្រូវរស់នៅម្នាក់ឯងរយ:ពេល១៤ថ្ងៃដែលនេះជាវិធានការសុខាភិបាលដែលគ្រប់គ្នាត្រូវតែគោរព៕SRP

ខេត្តសៀមរាប៖ចៅហ្វាយស្រុកប្រាសាទបាគង លោកសូរ ប្លាតុង បានអះអាងថានឹងបើកការស្រាវជ្រាវ រកជនល្មើស លួចឈូសឆាយទន្ទ្រានយកដីព្រៃលិចទឹក យកមកផ្ដន្ទាទោសតាមផ្លូវច្បាប់អោយបាន​។

ការអះអាងនេះនៅថ្ងៃទី០៥ខែឧសភា ម្សិលមិញ ក្នុងពេលលោកបានដឹកនាំក្រុមការងារចម្រុះចុះពិនិត្យទីតាំង នៃតំបន់ព្រៃលិចទឹក ដែលមានជនល្មើសមិនស្គាល់អត្តសញ្ញាណ លួចឈូសឆាយទន្ទ្រានយក នៅចំណុចស្បែកខ្លាក់ ​ភូមិគោកធ្លក និងនៅក្រោមចំណុច ទំនប់ទឹកថ្លា ស្ថិតក្នុងភូមិច្រេស ឃុំកណ្តែក ស្រុកប្រាសាទបាគង ខេត្តសៀមរាប។

លោកអភិបាលស្រុកបានបន្តថា ចំពោះករណីនេះ គណៈបញ្ជាការឯកភាពរដ្ឋបាលស្រុក នឺងរៀបចំ​ផែនការដាំដើមឈើ​ជួសឡើងវិញ កំណត់ទីតាំងនិងទំហំ ដើម្បីរក្សាផ្ទៃដីព្រៃលិចទឹក អោយបានគង់វង្ស ធ្វើជាជម្រកសម្រាប់ត្រីពងកូននារៀងរាល់រដូវវស្សាទឹកឡើង។

ចំណែកអាជ្ញារធរភូមិ ឃុំ ត្រូវរៀបចំក្រុមការងារ ធ្វើការ​ល្បាត​ ទប់ស្កាត់ និងបង្ក្រាបការកាប់ទន្ទ្រាន ឈូសឆាយព្រៃលិចទឹកនេះ​ អោយខ្លាំងក្លាជាងមុន ជាពិសេស​រួមគ្នា​រកវិធីបង្ការកុំអោយមានភ្លើងឆេះព្រៃនិងត្រៀមលក្ខណៈពន្លត់ផងដែរ។

ជាមួយគ្នានេះ អភិបាលស្រុកក៏បានស្នើអោយបងប្អូនប្រជាកសិករ ដែលអាស្រ័យក្បែរទីតាំងនេះ ជួយសហការណ៍ ផ្តល់ព័ត៌មាន មកអាជ្ញាធរ ក្នុងករណីបង្ក្រាបបាន រដ្ឋបាលស្រុកនឹងផ្តល់រង្វាន់លើកទឹកចិត្តជូនផងដែរ៕SRP

ខេត្តសៀមរាប៖ប្រធានសមាគមចលនាយុវជនកម្ពុជា (ក្រុម១៥៧) សាខាខត្តសៀមរាប អំពាវនាវសូមសមាជិក ចូលរួមអនុវត្ត ឲ្យបានម៉ឺងម៉ាត់ នូវវិធានការសុខាភិបាល។

នេះបើយោងតាមសេចក្ដីជូនដំណឹង របស់លោកហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម ១៥៧) សាខាខត្តសៀមរាប ដែលបណ្ដាញសៀមរាបប៉ុស្តិ៍ ទទួលបាននៅមុននេះបន្តិច។

សេចក្ដីជូនដំណឹងបានបញ្ជាក់ថា ការអនុវត្តនូវវិធានការ ដើម្បីទប់ស្កាត់ការឆ្លងរាលដាល នៃជំងឺកូវីដ -១៩។ ដើម្បីចូលរួមក្នុងការទប់ស្កាត់ការឆ្លងរីករាលដាលនៃជំងឺកូដ-១៩ ចូលក្នុងសហគមទ្រង់ទ្រាយធំ និង ដោយផ្អែកលើស្ថានភាពនៃការឆ្លងរីករាលដាលនៃជំងឺកូវីដ-១៩ ក្នុងព្រឹត្តិការ សហគមន៍ ២០កុម្ភៈនៅ មិនទាន់មានភាពធូរស្រាលនៅឡើយ។ ក្នុងកាល:ទេស:នេះដើម្បីធានាការពារអាយុជីវិតរបស់បងប្អូន ក្នុងសមាគមចលនាយុវជនកម្ពុជា(ក្រុម១៥៧)សាខាខេត្តសៀមរាបនិងបងប្អូនប្រជាពលរដ្ឋទាំងអស់។ សូមលោកលោកស្រី អនុប្រធាន ប្រធានតាមបណ្តាក្រុងស្រុក និង សមាជិកទាំងអស់ទូទាំងខេត្ត ព្រមទាំងបងប្អូនប្រជាពលរដ្ឋទាំងអស់ ត្រូវចូលរួមជាមួយរាជរដ្ឋាភិបាល និង រដ្ឋបាលខេត្ត ដោយអនុ វត្តឱ្យបានម៉ឺងម៉ាត់ និងខ្ជាប់ខ្ជួននូវវិធានការសុខាភិបាល ប្រកបដោយស្មារតីទទួលខុសត្រូវខ្ពស់ និង ត្រូវប្រកាន់ខ្ជាប់នូវវិធានការ (៣កុំ ពាការពារ) ដើម្បីក្រុមគ្រួសារនិងការពារសហគមន៍ឱ្យចៀសផុត ពីជំងឺកាចសាហាវនេះ។

ខ្ញុំសូមអំពាវនាវដល់បងប្អូនទាំងអស់ សូមកាត់បន្ថយអោយបានជាអតិបរមានូវការជួបជុំនានាដែលមាន ការប្រមូលផ្តុំមនុស្សច្រើន មិនត្រូវចេញទៅក្រៅផ្ទះប្រសិនបើមិនមានករណីចាំបាច់៕SRP

ខេត្តសៀមរាប៖មរណភាព គ្មាននរណាម្នាក់អាចគេចផុតបានទេ មានជីវិតតែងតែ លាចាករលត់ទៅវិញ នោះគឺជាច្បាប់នៃធម្មជាតិ ។
ប៉ុន្តែយើងលំបាកទទួលយក នៅពេលដែលយើងបាត់បង់ មនុស្សជាទីស្រលាញ់ គោរព រាប់អាន ជាពិសេស ការប្រព្រឹត្តអំពើល្អ ដល់មនុស្សជុំវិញខ្លួន ព្រមទាំងក្នុងសង្គមជាតិផងដែរ។

លោក ភន់ គៅ អាយុ 72 ឆ្នាំ ជាប្រធានភូមិ
ប្រម៉ា សង្កាត់ក្របីរៀល ក្រុងសៀមរាប បានទទួលមរណៈភាព នៅថ្ងៃទី4 ខែ ឧសភា ឆ្នាំ 2021 ដោយ រោគគាពាធ លោកបានបម្រើ ជាប្រធានភូមិ នៅក្នុងភូមិប្រម៉ា ដែលជា ទីកន្លែងដែលគាត់បានកើត និង ជាទីកន្លែងដែលលោក បានលះបង់ចូលរួម បម្រើពលរដ្ឋក្នុងភូមិរបស់លោក ដោយ ការស្រលាញ់ និងគោរព។
មរណៈភាពរបស់លោក បានបន្សល់នូវ ការស្ដាយស្រណោះ នៃទង្វើ ភាពជាឪពុកម្ដាយ ដល់ប្រជាពលរដ្ឋ ក្នុងភូមិទាំងមូល ។ ភាពអត់ធ្មត់ ភាពខន្តី សន្តោសប្រណី និងភាពស្ងៀមស្ងាត់ បានសម្រួល ឲ្យពលរដ្ឋ រស់នៅក្នុងភូមិ
ដោយភាពសុខសាន្ត មិនមានការប្រើអំពើហិង្សា ដាក់គ្នាទៅវិញទៅមក ព្រមទាំង គោរពនូវបែបបទ ការរស់នៅថ្លៃថ្នូរគោរពគ្នាទៅវិញទៅមក ជាពិសេសនោះ លោកតែងតែ បានបំផុស ឱ្យប្រជាពលរដ្ឋចូលរួមកិច្ចការផ្សេងៗ ដើម្បីអភិវឌ្ឍន៍ ភូមិរបស់លោក នៅក្រោមការដឹកនាំ របស់រាជរដ្ឋាភិបាល ដោយមោទនភាពចេញពីក្នុងខ្លួនរបស់លោក។
នៅចម្ងាយ ប្រមាណប្រហែល 10 គីឡូម៉ែត្រ ចេញពីតំបន់ប្រជុំជនក្រុង សៀមរាប នៃទិស និរតី យើង នឹងមកដល់ ភូមិប្រម៉ា ដែលស្ថិតក្នុងសង្កាត់ក្របីរៀល។ នៅគេហដ្ឋានរបស់សព យើងបានឃើញ ក្រុមការងារ របស់យុវជន ប្រចាំតំបន់ មិត្តភក្កិរួមការងារ សាលាសង្កាត់ និងក្រុង បានអញ្ជើញចូលរួម គោរពវិញ្ញាណក្ខន្ធ របស់លោក ភន់ គៅ និង ជាការដឹងគុណ ចំពោះកិច្ចការដ៏ថ្លៃថ្លា ដែលលោកបានបំពេញ។

អ្វីដែលបន្សល់នៅក្នុងភូមិប្រម៉ា គឺប្រជាពលរដ្ឋបានចងចាំ នៅភាពចាស់ទុំ ដែលលោក ភន់ គៅ បានបំរើពួកគាត់ ជាមួយនិង ជម្រៅនៃការស្រលាញ់ ភាពថ្លៃថ្នូរ អត់ធ្មត់ និងភាពអាធ្យាស្រ័យ ដល់គ្នាទៅវិញទៅមក សូមឲ្យវិញ្ញាណក្ខន្ធរបស់លោក ឆ្ពោះទៅកាន់សុគតិភពកុំបីឃ្លៀងឃ្លាតឡើយ៕
រាយការណ៍ជូនដោយ :
លោក សឿន តុលា

ខេត្តត្បូងឃ្មុំ៖លោក ជាម ច័ន្ទសោភ័ណ អភិបាលខេត្តត្បូងឃ្មុំ នៅថ្ងៃទី៥ ខែឧសភា ឆ្នាំ២០២១ នេះ បានអញ្ជើញចុះចែកអង្ករជំនួយសង្គ្រោះបន្ទាន់ របស់រាជរដ្ឋាភិបាលជប៉ុន ចំនួន៩តោន ដល់ប្រជាពលរដ្ឋ ដែលរងគ្រោះដោយគ្រោះធម្មជាតិ ៣០០គ្រួសារ ក្នុងមូលដ្ឋានស្រុកអូររាំងឪ ព្រមទាំងផ្តល់ថវិការលើកទឹកចិត្តដល់ក្រុមប្រឹក្សាឃុំ និងមេភូមិផងដែរ។

មានប្រសាសន៍សំណេះសំណាល លោក ជាម ច័ន្ទសោភ័ណ បានលើកឡើងថា យើងទាំងអស់គ្នាដឹងហើយថា ជំងឺកូវីដ-១៩ បានធ្វើឲ្យប៉ះពាល់យ៉ាងខ្លាំងដល់សង្គមជាតិ និងប្រជាជនគ្រប់ស្រទាប់វណ្ណៈ ពិសេសគឺជីវភាពប្រជាពលរដ្ឋ ដែលងាយរងគ្រោះ។ ដូច្នេះយើងត្រូវអនុវត្តឲ្យបានដាច់ខាតតាមការណែនាំរបស់ក្រសួងសុខាភិបាល និងវិធានការ ៣កុំ និង៣ការពារ ដើម្បីកាត់ផ្តាច់ខ្សែសង្វាក់នៃការឆ្លងរីករាលដាលក្នុងសហគមន៍ នៅខេត្តត្បូងឃ្មុំ។

លោក ជាម ច័ន្ទសោភ័ណ បានធ្វើការជម្រុញលើកទឹកចិត្តដល់ប្រជាពលរដ្ឋ ក្នុងស្រុកអូររាំងឳ ពិសេសក្នុងខេត្តត្បូងឃ្មុំទាំងមូល សូមបន្តដាំដំណាំរួមផ្សំ និងបន្លែបង្ការផ្សេងៗដោយយ៉ាងហោចណាស់ក្នុង១ភូមិ មាន២គ្រួសារ ក្នុងនោះមន្រ្តីជំនាញនៃមន្ទីកសិកម្ម ត្រូវជួយលើផ្នែកបច្ចេកទេស និងសិក្សាលើទីផ្សារ ដើម្បីឲ្យពួកគាត់អាចរកប្រាក់ចំណូលបន្ថែមសម្រាប់ទ្រទ្រង់ជីវភាពគ្រួសារ។

ឆ្លៀតក្នុងឳកាសនោះ លោក អភិបាលខេត្ត ក៏បានក្រើនរំលឹកផងដែរដល់មន្រ្តីគ្រប់លំដាប់ថ្នាក់ ត្រូវបម្រើសេវាសាធារណៈឲ្យបានល្អ និងទាន់ពេលវេលា ជូនប្រជាពលរដ្ឋក្នុងមូលដ្ឋានរបស់ខ្លួន ហើយប្រសិនបើមានបញ្ហាអ្វី ត្រូវរាយការណ៍ជូនថ្នាក់លើ ដើម្បីសិក្សាដោះស្រាយជូនពួកគាត់។

លោក ជាម ច័ន្ទសោភ័ណ ក៏បានចុះសួរសុខទុក្ខប្រជាពលរដ្ឋ ដែលកំពុងធ្វើចត្តាឡីស័ក និងក្រុមគ្រូពេទ្យ ចំនួន ២ទីតាំងក្នុងស្រុកអូររាំងឪ ដោយចែកជូនថវិការក្នុងម្នាក់២មុឺនរៀល និងសំណេះសំណាលកោតសរសើរដល់អាជ្ញាធរស្រុក ដោយក្នុងនោះឧបត្តម្ភលើកទឹកចិត្តដល់កងម្លាំងចំនួន៤០នាក់ អង្ករ៤បេ ត្រីខ២កេសធំ មី១០កេស ទឹកសុទ្ធ២០កេស ម៉ាសនិងអាល់កុល ៤០កញ្ចប់ ព្រមទាំងថវិការចំនួន៨០ម៉ឺនរៀលផងដែរ ៕SRP

ខេត្តសៀមរាប៖សមាគមចលនាយុវជនកម្ពុជា (ក្រុម១៥៧) នៅថ្ងៃពុធ ទី០៥ ខែឧសភា ឆ្នាំ ២០២១នេះ បានចុះសួរសុខទុក្ខ សំណេះសំណាល និងចែកអំណោយដល់ប៉ុស្ដិ៍រដ្ឋបាលបល្ល័ង្ក និងពលរដ្ឋដែលកំពុងធ្វើ ចត្តាទ្បីស័កចំនួន៨គ្រួសារ។

គោលដៅទី១ លោក រំ រាន់ ប្រធានរដ្ឋបាលសមាគមចលនាយុវជនកម្ពុជា(ក្រុម១៥៧) ស្រុកពួក បានដឹកនាំសមាជិកនឹងសប្បុរសជន នាំយកអំណាយ ជូនលោក សេីរ វណ្ណះ នាយប៉ុស្តិ៍នគបាលរដ្ឋបាលបល្ល័ង្ក នៃអធិការដ្ឋាននគបាលស្រុកប្រាសាទបាគង ដែលមានគោលដៅឈរជេីងនៅផ្លូវជាតិលេខ៦៧ (ហៃវ៉េ)ស្ថិតនៅភូមិត្រាច ឃុំបល្ល័ង្ក ស្រុកប្រាសាទបាគង ជាប់ព្រំប្រទល់នឹង ភូមិត្មាតពង ឃុំរុនតាឯក ស្រុកបន្ទាយស្រី តាមរយ:លោកនាយប៉ុស្តិ៍ដេីម្បីចែកជូនកងកម្លាំងតាមគោលដៅដេីម្បីទប់ស្កាត់ជំងឺកូវិត១៩។
អំណោយដែលត្រូវចែកជូនមានដូចខាងក្រោម
⁃ ជែលលាងដៃចំណុះ ៥០០ មល ចំនួន ១០ដប
⁃ ត្រី ខកំប៉ុង ៤ យួរ
⁃ មីម៉ាម៉ា ៤ កេស
⁃ ម៉ាស់ ២៥០ម៉ាស
⁃ ទឹកសុទ្ធ ៣០យួរ។
ដោយឡែកគោលដៅទី២ លោក ធី ប៊ុនថា អនុប្រធាន សមាគមចលនាយុវជនកម្ពុជា (ក្រុម១៥៧) ស្រុកជីក្រែង ព្រមជាមួយសមាជិក​ និងបានសហការណ៍ជាមួយ សម្ព័ន្ធយុវជនស្រលាញ់សន្តិភាព ដែលដឹកនាំដោយ លោក រ៉េន រក្សា បាននាំយកអំណោយប្រគល់ជូនពលរដ្ឋ ដែលកំពុងធ្វើ ចត្តាទ្បីស័កចំនួន៨ គ្រួសារ នៅភូមិចក និង ភូមិតាព្រំ។
អំណោយដែលចែកជូនក្នុង១គ្រួសារទទួលបាន៖
-មី១កេស
-ត្រីខ ១យួរ
-អំបិល ៥០០ក្រាម
-ស្ករ ៥០០ក្រាម
-ទឹកត្រី ១ ដប
-ទឹកសុីវអុីវ ១ ដប
-អង្ករ ១០ គ.ក
-ត្រកួន ១ គ.ក
-ត្រប់ ១ គ.ក
-ត្រសក់ ១ គ.ក
-ត្រទ្បាច ១ គ.ក
-ពងទា ១២ គ្រាប់ ។

ឆ្លៀតក្នុងឱកាសសំណេះសំណាលនិងសួរសុខទុក្ខនេះដែរ ក្រុមការងារ ១៥៧បានមានមតិផ្ដាំផ្ញើ ដល់កងកម្លាំងនិងពលរដ្ឋ ដែលធ្វើចត្តាទ្បីស័ក សូមចូលរួមអនុវត្តតាមប្រសាសន៍ណែនាំរបស់សម្ដេចតេជោ( ៣កុំ ៣ការពារ ) ឲ្យបានខ្ជាប់ខ្ជួន​ ដើម្បីចៀសផុតពីជំងឺកូវីដ-១៩ ទាំងអស់គ្មា៕SRP

ខេត្តកំពង់ធំ៖លោកសុខ លូ អភិបាលខេត្តកំពង់ធំ បានអំពាវនាវដល់ប្រជាពលរដ្ឋទាំងអស់ សូមមានការអត់ធ្មត់ អធ្យាស្រ័យ យោគយល់គ្នា ត្រូវជឿជាក់លើរាជរដ្ឋាភិបាលកម្ពុជា ក្នុងយុទ្ធនាការទប់ស្កាត់ការរីករាលដាលនៃជំងឺកូវីដ១៩។

ការអំពាវនាវនេះ ក្នុងឱកាសលោកចុះសាកសួរសុខទុក្ខ និងនាំយកអំណោយ ចែកជូនប្រជាពលរដ្ឋ ដែលកំពុងធ្វើចត្តាឡីស័ក នៅតាមផ្ទះ ក្នុងអំឡុងពេលនៃជំងឺកូវីដ១៩ នៅភូមិលាបទង ឃុំកំពង់ចិនត្បូង ស្រុកស្ទោង ខេត្តកំពង់ធំ នៅព្រឹកថ្ងៃទី៥ ខែឧសភា ឆ្នាំ ២០២១។

លោកសុខ លូ បានបន្ថែមទៀតថា ជំងឺកូវីដ១៩ កំពុងតែមានការឆ្លងរីករាលដាលនៅក្នុងប្រទេសកម្ពុជា រួមទាំងខេត្តកំពង់ធំផងដែរ ជាពិសេសនៅស្រុកស្ទោង ចំនួនអ្នកឆ្លងជំងឺកូវីដ១៩ មានការកើនឡើងជាបន្តបន្ទាប់ ហើយស្ថិតនៅក្នុងកាលៈទេសៈនេះ បងប្អូនប្រាកដជាមានការព្រួយបារម្ភយ៉ាងខ្លាំងជុំវិញការរីករាលដាលនៃជំងឺកូវីដ១៩ ប៉ុន្តែបងប្អូនមិនត្រូវភ្លេចនូវការអនុវត្តនូវវិធានការ ៣ ការពារ ៣កុំ របស់រាជរដ្ឋាភិបាល និងគោរពតាមការណែនាំរបស់ក្រសួងសុខាភិបាលឲ្យបានខ្ជាប់ខ្ជួន៕SRP

ខេត្តកំពង់ចាម៖នាយករដ្ឋមន្ត្រី ហ៊ុន​ សែន​ បានសម្រេចផ្ដល់អំណោយ ជូនគណៈកម្មការ ប្រឆាំងជំងឺកូវីដ ខេត្តកំពង់ចាម។

ការផ្ដល់អំណោយនេះដោយរដ្ឋមន្ត្រី​ក្រសួង​កសិកម្ម​រុក្ខាប្រមាញ់​និង​និងនេសាទ​ លោកវេង​ សាខុន​ និង​លោកជំទាវ​ ប្រគល់ជូន លោក អ៊ុន​ ចាន់ដា​ អភិបាលខេត្តកំពង់ចាម នៅព្រឹកនេះ។

ក្នុងនាមជា​ប្រធាន​គណកម្មការ​ខេត្ត​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ លោក អ៊ុន​ ចាន់ដា​ បានថ្លែងអំណរគុណយ៉ាងជ្រាលជ្រៅ​ ចំពោះសប្បុរសជន ជាពិសេស​ សម្តេច ហ៊ុន​ សែន​ ដែលបាន​ផ្តល់​ជាអំណោយ សម្រាប់​ឧបត្ថម្ភជូន​រដ្ឋបាល​ខេត្ត​ ដែលកំពុងត្រូវការជាចាំបាច់ក្នុង​ដំណាក់កាល​បិទខ្ទប់​ភូមិ​ និងការធ្វេី​ចត្តាឡីស័ក​​ ការផ្គត់ផ្គង់ដល់ប្រជាពលរដ្ឋ ដែលប្រឈមនឹងការខូចខាត និង​ពលករ​ចំណូលស្រុក​ ដែលកំពុង​​ធ្វើចត្តាឡីស័ក​ ក្នុង​ភូមិសាស្ត្រ​ខេត្តកំពង់ចាម​​។

អភិបាលខេត្ត ក៏បាន​ជូនពរ​ និង​សង្ឃឹមជឿជាក់ថា បងប្អូនសប្បុរសជន ឬម្ចាស់​ក្រុមហ៊ុននានា​ នឹងបន្តជួយឧបត្ថម្ភ គាំទ្រដល់រដ្ឋបាលខេត្ត ក្នុងការចូលរួមប្រយុទ្ធប្រឆាំងនឹងជំងឺឆ្លងកូវីដ-១៩។

គួរ​បញ្ជាក់​ថា ក្នុងពិធី​ប្រគល់​ និង​ទទួល​អំណោយ​នេះ​ តាម​រយៈ​ លោក វេង​ សាខុន​ និង​លោកជំទាវ​ សម្តេច​តេជោ​ ហ៊ុន​ សែន​​ បាន​ឧបត្ថម្ភ​ អង្ករ​ចំនួន​ ៥០តោន​​ មី​ ២ពាន់​កេស​ ត្រីខ​ ២ពាន់​យួរ​ និង​ម៉ាស​ចំនួន​៥ម៉ឺន​ម៉ាស​។ ក្រុមហ៊ុន​ ប៊ីហ្សឃែស​ សឹលូសិន​ ផនសប​ ឯ.ក​ បាន​ជួយឧបត្ថម្ភ​ ថវិកា​ចំនួន​ ១លានរៀល​ ទឹក​បរិសុទ្ធ​ ៥០០យួរ​ និង​ម៉ាស​ ២កេស​ធំ​។លោក​ ប៊ុត​ គីណែត​ និង​លោកស្រី​ អ៉ឹម​ ចរិយា​ ម្ចាស់​ផ្សារ​ត្រាស់មីត្រេីង​ បានជួយឧបត្ថម្ភ​ ​ថវិកា​ចំនួន​ ១០លានរៀល​ ផងដែរ៕SRP

ខេត្តសៀមរាប៖មន្ត្រីជំនាញបានអះអាងថា យានយន្តខុសលក្ខណៈបច្ចេកទេស ចំនួន​១០ គ្រឿង ត្រូវបានរកឃើញនៅស្រុកសូទ្រនិគម។

ការរកឃើញនាថ្ងៃ​ អង្គារ ទី​០៤ ខែ​ឧសភា ម្សិលមិញ នៅផ្លូវជាតិលេខ៦ នៅ ភូមិដូនហុង​ ឃុំដំដែក​ ស្រុកសូទ្រនិគម ខេត្តសៀមរាបដោយក្រុមការងារចម្រុះចុះរឹតបន្តឹងច្បាប់ចរាចរណ៍ផ្លូវគោក​ និងត្រួតពិនិត្យយានយន្តកែច្នៃខុសលក្ខណៈបច្ចេកទេស ដឹកនាំដោយ លោកពិន​ ប្រាកដ​ អភិបាលរងខេត្ត​ និងមានការចូលរួមពីលោក ជួត ច័ន្ទតារា អនុប្រធានមន្ទីរសាធារណការ។

មន្ត្រីជំនាញបានបញ្ជាក់ថា ការត្រួតពិនិត្យ
ទទួលបានលទ្ធផលដូចខាងក្រោម៖
-បានត្រួតពិនិត្យយានយន្តសរុបចំនួន​ ១៦៥រឿង យានយន្តត្រឹមត្រូវចំនួន ១៥៥គ្រឿង យានយន្តខុសលក្ខណៈបច្ចេកទេសចំនួន​ ១០ គ្រឿងមាន៖
-បានដោះភ្លេីងបំពាក់រយន្តខុសលក្ខណៈ
បច្ចេកទេសចំនួន​ ០៤ គ្រឿង
-ដោះស្លាកលេខក្លែងក្លាយ(ស្តាំ) ចំនួន០២គ្រឿង
-បានពិន័យរថយន្តដឹកទំនិញសំពឹងសំពោង ០១គ្រឿង
-បានពិន័យអាជីវកម្មហួសសុពលភាព ចំនួន០១គ្រឿង
-ត្រួតពិនិត្យរកសារធាតុញៀនសរុប​ចំនួន ២៣នាក់​ មានសារធាតុញៀនក្នុងខ្លួនចំនួន​ ០៤នាក់​ (អ្នកបើកបរ២នាក់ ព្រូ២នាក់)៕SRP

ខេត្តសៀមរាប៖នគរបាលប្រឆាំងបទល្មើសសេដ្ឋកិច្ច សហការ ជាមួយមន្រ្តីមន្ទីរបរិស្ថានខេត្ត និងអាជ្ញាធរមូលដ្ឋាន នៅរសៀលថ្ងៃទី០៣ ខែឧសភា ម្សិលមិញ បានចុះត្រួតពិនិត្យទីតាំងកាយយកអាចម៍ដី មួយកន្លែងដោយរកឃើញថាគ្មានច្បាប់អនុញាត ដោយ(កំពុងដំណើរការស្នើសុំច្បាប់)។

សមត្ថកិច្ចបានឲ្យដឹងថា ម្ចាស់ទីតាំងកាយដីឈ្មោះ ទន់ សុវណ្ណ ភេទប្រុស អាយុ៤២ឆ្នាំ ស្ថិតនៅភូមិត្រពាំងវែង សង្កាត់ក្របីរៀល ក្រុងសៀមរាប។

សមត្ថកិច្ចបានបញ្ជាក់ថា ប្រតិបត្តិការនេះ បានឃាត់គ្រឿងចក្រ និងមានចំណាត់ការមួយចំនួនៈ-អេស្កាវ៉ាទ័រ ចំនួន ០១គ្រឿង, -រថយន្តដឹកដី ចំនួន០៣គ្រឿង,-ផាកពិន័យអន្តរការណ៍ដោយអនុលោមទៅតាមច្បាប់ស្តីពីកិច្ចការពារបរិស្ថាន និងធនធានធម្មជាតិ,-ធ្វើកិច្ចសន្យាផ្អាកអាជីវកម្មជាបណ្តោះអាសន្ន ដោយរង់ចាំទទួលបានច្បាប់អនុញ្ញាតពីមន្ទីរជំនាញពាក់ព័ន្ធទើបអាចដំណើរការអាជីវកម្មឡើងវិញបាន៕SRP

ខេត្តត្បូងឃ្មុំ៖លោក ជាម ច័ន្ទសោភ័ណ អភិបាលខេត្ត ត្បូងឃ្មុំ និងជាប្រធានគណកម្មាធិការសាខាកាកបាទក្រហមខេត្ត បានដាក់ចេញនូវបទបញ្ជាដាច់ខាត អ្នកចំណូលថ្មី ត្រូវធ្វេីចត្តាឡីស័ក១៤ថ្ងៃ, ចំពោះអ្នកកំពុងធ្វើចត្តាឡីស័ក អ្នកកំពុងសង្ស័យ និងអ្នក វិជ្ជមាន កូវីដ-១៩ ត្រូវអនុវត្តន៍តាមវិធានសុខាភិបាល ជាពិសេសមិនអនុញ្ញាតឱ្យមានការចេញ-ចូល នៅក្នុងភូមិដែលបិទខ្ទប់ទាំងអស់ក្នុងខេត្ត ដើម្បីកាត់ផ្ដាច់ខ្សែចម្លងជំងឺកូវីដ-១៩ ចូលក្នុងសហគមន៍ខេត្តត្បូងឃ្មុំ។

ការដាក់ចេញនូវបទបញ្ជាធ្ងន់ៗបែបនេះរបស់លោក ជាម ច័ន្ទសោភ័ណ បានធ្វើឡើង កាលពី ថ្ងៃទី ០៣ ខែឧសភា ម្ម្សិលមិញ ក្នុងឱកាស ដឹកនាំក្រុមការងារសាខាកាបាទក្រហមខេត្ត ចុះ សួរសុខទុក្ខ ប្រជា ពលរដ្ឋកំពុងធ្វើចត្តាឡីស័ក ក្នុងស្រុកក្រូចឆ្មារ ដោយផ្តល់ថវិការក្នុងម្នាក់ ២០,០០០រៀល និងត្រួតពិនិត្យកងកំលាំងទីតាំងបិទខ្ទប់ក្នុងភូមិសាស្ត្រស្រុកក្រូចឆ្មារ និងស្រុកត្បូងឃ្មុំ សរុប ១៣០នាក់ ដោយឧបត្ថម្ភផ្តល់ជូន មី៣០កេស ត្រីខ៤កេសធំ ទឹកសុទ្ធ៤០កេស អាកុលនិងម៉ាស ១៣០កញ្ចប់ និងថវិការក្នុងម្នាក់ ២០,០០០រៀលផងដែរ។

លោកក៏បានណែនាំឲ្យអាជ្ញាធរក្តាប់ឲ្យជាប់នូវរាល់ពលរដ្ឋដែលក្រីក្រ ដោយសារកូវីដ-១៩ និងជនងាយរងគ្រោះទាំងអស់ ដើម្បីផ្តល់ជូននូវស្បៀងអាហារ និងថវិការ ក្នុងការដោះស្រាយជីវភាពជាក់ស្តែង ដោយមិនទុកឲ្យនរណាម្នាក់ ស្លាប់ដោយសារអត់អាហារនោះឡើយ។

បន្ថែមពីនេះអាជ្ញាធរ មូលដ្ឋាន ត្រូវបន្តផ្សព្វផ្សាយសារអប់រំ ឱ្យបានជាប់ជាប្រចាំ នូវកម្រិតការផាកពិន័យ និងទោសទណ្ឌ ដល់ប្រជាពលរដ្ឋនៅក្នុងមូលដ្ឋាន ពិសេសនៅភូមិសាស្ត្របិទខ្ទប់ភូមិ ដើម្បីជាការក្រើនរំលឹកដល់ប្រជាពលរដ្ឋ ក្នុងការចូលរួមអនុវត្តវិធានការការពារ និងប្រយុទ្ធប្រឆាំងនឹងជំងឺនេះ៕SRP