ខេត្តសៀមរាប៖មន្ត្រីជាន់ខ្ពស់នៃក្រសួងមហាផ្ទៃ បានថ្លែងណែនាំប្រាប់អាជ្ញាធរសមត្ថកិច្ចក្នុងខេត្តសៀមរាបឲ្យបន្តពង្រឹងបន្ថែមទៀតអំពីគោលនយោបាយភូមិ ឃុំ សង្កាត់ មានសុវត្ថិភាព។

នៅមុខមន្ត្រីសមត្ថកិច្ច ចំនួន ៣២០នាក់ លោក សួស អង្គារ៍ រដ្ឋលេខាធិការនៃក្រសួងមហាផ្ទៃ និងជាប្រធានក្រុមការងារទី៩​ បានថ្លែងយ៉ាងដូច្នេះថា –ត្រូវបន្តកិច្ចសហការអនុវត្តវិធានការច្បាប់ឱ្យបានតឹងរឹងម៉ឺងម៉ាត់បន្ថែមទៀត
-បន្តតាមដាន ក្ដាប់មុខសញ្ញា គ្រប់គ្រងសភាពការណ៍និងចាត់ប្រធានការបង្ក្រាបទប់ស្កាត់បទល្មើសនានាក្នុងគោលដៅរក្សាឲ្យបាននូវសន្តិសុខ សុវត្ថិភាពសណ្តាប់ធ្នាប់របៀបរៀបរយសាធារណ: និងស្ថេរភាពសន្តិភាពក្នុងខេត្តសៀមរាប ប្រកបដោយប្រសិទ្ធភាព មិនទាន់ពេលវេលា
-ត្រូវយកចិត្តទុកដាក់ស្រាវជ្រាវ និងបង្ការមុខសញ្ញាសង្ស័យ ការលួចលាក់ ប្រើប្រាស់ និងកែច្នៃអាវុធជាតិផ្ទុះ ការញុះញង់ប្រមូលផ្ដុំកម្លាំងចលនាដែលអាចជាបង្កអំពើអសន្តិសុខក្នុងខេត្តសៀមរាប
-ត្រូវបន្ត និងពង្រឹងផ្សព្វផ្សាយអំពីគោលនយោបាយ “ភូមិ-ឃុំ-សង្កាត់មានសុវត្ថិភាព” ឱ្យបានទូលំទូលាយ
-ស្នងការដ្ឋាននគរបាលខេត្ត និងមន្ទីរ អង្គភាពពាក់ព័ន្ធ ត្រូវពង្រឹងវិធានការអនុវត្ត និងផ្សព្វផ្សាយច្បាប់ស្តីពីចរាចរណ៍ផ្លូវគោក បង្ការ ការទប់ស្កាត់បទល្មើស បញ្ហាគ្រោះថ្នាក់គ្រឿងញៀន ក្មេងទំនើង នៅមូលដ្ឋាន និងសាលារៀនជាប្រចា
-ស្ដាប់ និងទទួលយកសំណើរសំណូមពរ បញ្ហាប្រឈមរបស់ប្រជាពលរដ្ឋ និងដាក់ពិធានការជួយដោះស្រាយឲ្យចំដៅ ទាន់ពេលវេលា និងមានប្រសិទ្ធភាព។

រដ្ឋលេខាធិការក្រសួងមហាផ្ទៃរូបនេះ ក៏បានជំរុញដល់គណៈបញ្ជការឯកភាពរដ្ឋបាលក្រុង ស្រុក ឃុំ សង្កាត់
-ត្រូវពិនិត្យរៀបចំធ្វើបច្ចុប្បន្នភាព សមាជិកភាព ពង្រឹងការអនុវត្តនូវតួនាទីប្រចាំថ្ងៃ និងគណៈបញ្ជាការ ឯកភាពក្នុងការអនុវត្ត គោលនយោបាយភូមិ-ឃុំ-សង្កាត់មានសុវត្ថិភាព” ឱ្យកាន់តែមានប្រសិទ្ធភាព
-ត្រូវរៀបចំផែនការការពារ និងពិនិត្យបញ្ហាប្រឈមរបស់ខ្លួន និងតម្រូវការប្រជាពលរដ្ឋ នៅមូលដ្ឋាន ដើម្បីដាក់ចេញនូវវិធានការ នៅវត្តសមស្រប និងទាន់ពេលវេលា ក្នុងគោលបំណងរក្សា ឱ្យបាននូវសន្តិសុខ និងសណ្ដាប់ធ្នាប់ ក្នុងគោលដៅមូលដ្ឋានរបស់ខ្លួន
-ត្រូវណែនាំដល់ប្រជាការពារ ឱ្យយល់ដឹងអំពីច្បាប់និងតួនាទីភារកិច្ចក្នុងការអនុវត្តការងារ របស់ខ្លួន ស្របតាមសេចក្តីណែនាំលេខ០៣៧​ ស្ដីពីការពង្រឹងចលនាប្រជាការពារ របស់ក្រសួងមហាផ្ទៃ
-ត្រូវអនុវត្តឱ្យបានម៉ឺងម៉ាត់ស្របតាមសេចក្តីណែនាំលេខ ០១៣ សណន ចុះថ្ងៃទី០៦ ខែតុលាឆ្នាំ២០១៧ ស្ដីពីការចាប់អនុវត្តការងារនគរបាលនិងសហគមន៍។

លោកថ្លែងបែបនេះ ក្នុងកិច្ចប្រជុំបូកសរុបរបាយការណ៍ ឆមាសទី១ ការអនុវត្តគោលនយោបាយភូមិ​ ឃុំ​ សង្កាត់មានសុវត្ថិភាព ឆ្នាំ២០២៤ ក្នុងខេត្តសៀមរាប នាថ្ងៃទី២៧​ ខែកក្កដា​ ឆ្នាំ២០២៤​ នៅសាលប្រជុំធំសាលាខេត្តសៀមរាប ដោយមានការចូលរួម ពីសំណាក់ លោកប្រាក់ សោភ័ណ អភិបាលខេត្តនិងជាប្រធានគណៈបញ្ជាការឯកភាពរដ្ឋបាលខេត្ត ដោយមានការអញ្ជើញចូលរួមពីឯកឧត្តម រាជអាជ្ញាអមសាលាដំបូងខេត្តឯកឧត្តមប្រធានសាលាដំបូងខេត្ត ស្នងការដ្ឋាននគរបាលខេត្តបញ្ជាការដ្ឋានកងរាជអាវុធហត្ថខេត្ត តំបន់ប្រតិបត្តិការសិស្សរងសៀមរាប មន្ទីរអង្គភាពជុំវិញខេត្ត រដ្ឋបាលក្រុងស្រុក មេឃុំចៅសង្កាត់ ប៉ុស្តិ៍រដ្ឋបាលនគរបាលឃុំសង្កាត់ផងដែរ៕SRP

ប្រសិនពុំមានអ្វីប្រែប្រួលនោះទេ លោកឧត្តមសេនីយ៍ទោ ម៉ែន លី ស្នងការខេត្តកំពង់ធំ និងផ្លាស់ទៅកាន់តំណែងជាស្នងការនគរបាលខេត្តតាកែវ ជំនួស លោកឧត្តមសេនីយ៍ទោ ឈាង ផាន់ណារ៉ា។

ប្រភពព័ត៌មានគួរឱ្យទុកចិត្តបានទម្លាយថា លោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំ នឹងត្រូវថ្នាក់លើផ្ទេរឱ្យមកកាន់តំណែងនៅខេត្តតាកែវ ជំនួសលោកឧត្តមសេនីយ៍ទោ ឈាង ផាន់ណារ៉ា។

ប្រភពបានបន្តថា លោកឧត្តមសេនីយ៍ត្រី ហេង សុផល ស្នងការរងនគរបាលខេត្តកណ្តាល នឹងត្រូវដំឡើងជាស្នងការនគរបាលខេត្តកំពង់ធំុ ជំនួសលោកឧត្តមសេនីយ៍ទោ ម៉ែន លី។ ការប្រកាសផ្ទេរតំណែងស្នងការប៉ូលីសខេត្តកំពង់ធំថ្មី នឹងត្រូវធ្វើឡើងនៅព្រឹកថ្ងៃទី៣០ ខែកក្កដា ក្រោមអធិបតីភាព នាយឧត្តមសេនីយ៍ ស ថេត អគ្គស្នងការនគរបាលជាតិ។ ចំណែក លោកឧត្តមសេនីយ៍ទោ ម៉ែន លី ប្រកាសជាស្នងការខេត្តតាកែវ ធ្វើឡើងនៅព្រឹកថ្ងៃទី៣១ ខែកក្កដា។

ជុំវិញព័ត៌មាននាៗ មានការផ្លាស់ប្ដូរស្នងការនគរបាលខេត្ត មួយចំនួន លោក ទូច សុឃ: (សុខ:) អ្នកនាំពាក្យរងក្រសួងមហាផ្ទៃ បានថ្លែងប្រាប់ពីភ្នាក់ងារសារព័ត៌មាន សៀមរាប ប៉ុស្តិ៍ ថា ការដោះដូរ ជាទូទៅតែងតែមាន ប៉ុន្តែការដោះដូរ បុគ្គល ក របុគ្គលខ មិនទាន់បញ្ជាក់ជូនបានទេ ការដែលបងប្អូនសង្ស័យថា អ្នកនេះឬអ្នកនោះ ដោះដូរពីនេះពីនោះ ជាការយល់ឃើញរបស់បងប្អូន អ្វីដែលខ្ញុំអាចបញ្ជាក់ជាផ្លូវការបាន គឺទៅនៅថ្ងៃប្រកាសតែម្ដង៕SRP

លោកពិន ប្រាកដ អភិបាលរងខេត្តសៀមរាប ត្រូវបានផ្ទេរមកប្រកាសចូលកាន់មុខតំណែងជាអភិបាលរង ខេត្តបាត់ដំបង ជំនួស លោក អ៊ូ ដារី ដែលត្រូវបានជាប់ឆ្នោតទៅជាសមាជិកក្រុមប្រឹក្សាខេត្ត។

ពិធីប្រកាសតែងតាំងនេះ បានរៀបចំធ្វើឡើងនៅសាលប្រជុំសាលាខេត្តបាត់ដំបងក្រោមអធិបតីភាពលោក ញ៉ែម សំអឿន រដ្ឋលេខាធិការក្រសួងមហាផ្ទៃ តំណាងលោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃនិងមានការអញ្ជើញចូលរួមពីលោក សុខ លូ អភិបាលខេត្ត, អភិបាលរង, លោក អ៊ុយ រី ប្រធានក្រុមប្រឹក្សាខេត្ត, សមាជិកក្រុមប្រិក្សាខេត្ត ប្រធានមន្ទីរ អនុប្រធានមន្ទីរ អភិបាលក្រុងស្រុក កងកំលាំងទាំង៣ប្រភេទ និងមន្រ្តីពាក់ព័ន្ធជាច្រើនទៀត។

លោក សុខ លូ បានឡើងធ្វើរបាយការណ៍ស្វាគមន៍ និងបានបញ្ជាក់ ពីការ កសាង អភិវឌ្ឍ ខេត្តបាត់ដំបងកន្លងមកមានការរីកចម្រើន និងបានអបអរសាទការប្រកាសចូលកាន់មុខតំណែងអភិបាលរង ខេត្តបាត់ដំបងនៅថ្ងៃនេះ។

ថ្លែងក្នុងឱកាសនោះលោក ញ៉ែម សំអឿន បានកោតសរសើរ និងវាយតម្លៃខ្ពស់ចំពោះក្រុមប្រឹក្សាខេត្ត គណៈអភិបាលខេត្តបាត់ដំបង អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងមន្ទីរ-អង្គភាពពាក់ព័ន្ធក្នុងខេត្តបាត់ដំបងទាំងអស់ ដែលបានរួមសាមគ្គីសហការគ្នាខិតខំប្រឹងប្រែងយ៉ាងសកម្មក្នុងការអនុវត្តកម្មវិធីនយោបាយ របស់រាជរដ្ឋាភិបាលកម្ពុជា ដោយបានជម្រុញការអភិវឌ្ឍខេត្ត ឲ្យមានការរីកចម្រើនលើគ្រប់វិស័យ និងរក្សាបាននូវសន្តិសុខ សណ្ដាប់ធ្នាប់សាធារណៈសង្គម បានល្អប្រសើរ នាពេលកន្លងមក។

លោកសង្ឃឹមថា អភិបាលរងដែលទើបប្រកាសចូលកាន់តំណែងត្រូវអនុវត្តតួនាទី ភារកិច្ច និងការទទួលខុសត្រូវរបស់ខ្លួនប្រកបដោយការសហការ សាមគ្គីភាព និងឯកភាពផ្ទៃក្នុងដើម្បីចូលរួមចំណែកធ្វើឱ្យការអនុវត្តការងារ ក្នុងជួរគណៈអភិបាលខេត្តកាន់តែមានប្រសិទ្ធភាពជាពិសេសការលើកកម្ពស់ការផ្ដល់ សេវាសាធារណៈជូនប្រជាពលរដ្ឋ និងការអភិវឌ្ឍខេត្តឲ្យកាន់តែមានការរីកចម្រើនថែមទៀត។

លោករដ្ឋលេខាធិការ បានផ្ដាំផ្ញើលោកអភិបាលរង ខេត្តបាត់ដំបងថ្មី ដែលទើបទទួលការតែងតាំងមុខតំណែងថ្មី ត្រូវប្រកាន់ខ្ជាប់នូវសាមគ្គីភាពផ្ទៃក្នុង និងត្រូវខិតខំប្រឹងប្រែងសហការ ចូលរួមក្នុងដំណើរការអភិវឌ្ឍន៍ខេត្តបាត់ដំបង ឲ្យមានការរីកចម្រើនបន្ថែមទៀត៕SRP

ខេត្តកំពង់ស្ពឺ៖ជនដៃដល់ត្រូវបានសមត្ថកិច្ចចាប់ខ្លួនករណីឃាតកម្ម ក្រោយគេចខ្លួនរយៈពេល៦ថ្ងៃ។

ការចាប់ខ្លួនធ្វើឡើង នៅថ្ងៃទី២៦ ខែកក្កដា ឆ្នាំ២០២៤ ដោយកម្លាំងការិយានគរបាលព្រហ្មទណ្ឌកម្រិតធ្ងន់ សហ
ការជាមួយនគរបាលស្រុកភ្នំស្រួចដោយមានការចង្អុលដឹកនាំផ្ទាល់ ពីលោកឧត្តមសេនីយ៍ទោឃឹម សុកខៃ ស្នងការនគរបាលខេត្តកំពង់ស្ពឺ និងការសម្របសម្រូលពីឯកឧត្តមស៊ិន វិរ: ព្រះរាជអាជ្ញា នៃអយ្យការអមសាលាដំបងខេត្តកំពង់ស្ពឺ នគរបាលខេត្តកំពង់ស្ពឺ។

សមត្ថកិច្ចបានឲ្យដឹងថា អំពើឃាតកម្មនេះ បានកើតឡើង នៅថ្ងៃទី២០ ខែកក្កដា ឆ្នាំ២០២៤ វេលាម៉ោង១៨ និង៣០នាទី ចំណុចក្នុងព្រៃមាត់ស្ទឹងព្រែកត្នោត ស្ថិតនៅ ភូមិថ្មី ឃុំតាំងសំរោង ស្រុកភ្នំស្រួច។

ជនរងគ្រោះឈ្មោះឡុង លី ភេទប្រុស អាយុ៦៦ឆ្នាំ (នៅភូមិថ្នី) មុខរបរ ធ្វើជាប្រជាការពារ ។

តាមការបំភ្លឺពីឈ្មោះឈួន ហៅ ភេទ
ស្រីអាយុ៦៦ឆ្នាំ(ប្រពន្ធសព) បានបំភ្លឺ
ថា: មុនពេលកើតវេលាម៉ោង១៤ និង៣០
នាទី ជនរងគ្រោះ បានកាន់កាំបិត និងខ្សែ
គោ ដើរទៅផ្លាស់គោឲស៊ីស្មៅ នៅវាល
ស្រែ មាត់ស្ទឹងក្រោយផ្ទះ រហួតដល់ម៉ោង
១៨និង៣០នាទី មិនឃើញត្រឡប់មកផ្ទះ មានការសង្ស័យ ទូរស័ព្ទចូលមិនលើក បានឲកូនដើររក ទើបប្រទះឃើញសាកសពនិងរាយការណ៍ប្រាប់សមត្ថកិច្ច។

តាមការពិនិត្យរបស់នគរបាលការិយា
បច្ចេកទេសវិទ្យាសាស្ត្រ ជនរងគ្រោះ
មានស្លាកស្នាម : កំភូនដៃសងខាង មាន
ស្នាមជាំហើម បាក់ខ្នងដៃឆ្វេង មុតបាត
ដៃឆ្វេង បែកចិញ្ចើមស្តាំ ស្នាមជាំលើជុំ
ចិញ្ចើម ដាច់ស្លឹងត្រចៀកស្តាំមួយកំណាត់
ខាងលើ ផុងលលាដ៏ក្បាលខាងស្តាំ(អាចបុកហ្នឹងវត្ថុរឹងមិនសូវមុតច្រើនដង) បែក
លលាដ៌ក្បាលខាងលើ ផ្នែកខាងឆ្វេង ។
-បន្សល់នៅកន្លែងកើតហេតុ កាំបិតផ្កាក់
ដងឫស្សី របូតផ្លែ (របស់ជនរងគ្រោះ) ។
-នៅខាងលិចសាកសព មានឫស្សី១
គុម្ព មានស្នាមជីកទំពាំងថ្មីៗ ។
យោងតាមការស្រាវជ្រាវស៊ើបអង្គេត
និងការពិនិត្យកន្លែងកើតហេតុ ។
សន្និដ្ឋានថា:ជនសង្ស័យ ដែលសម្លាប់
ជនរងគ្រោះ អាចជាអ្នកទៅជីកទំពាំង និងធ្លាប់មានទំនាស់ជាមួយជនរងគ្រោះ។

ជនសង្ស័យ សូត្រ ធន ភេទប្រុសអាយុ៣៧
ឆ្នាំ នៅភូមិថ្មី ឃុំតាំងសំរោង ស្រុកភ្នំស្រួច
ខេត្តកំពង់ស្ពឺ មុខរបរ:កសិករ។

ជនសង្ស័យបានសារភាពថា ពិតជាបានយកចប់ជីកដែក វាយ និងយកផ្លែចប់បុកលើក្បាល ជនរងគ្រោះបណ្តាលឲស្លាប់ ដោយមូលហេតុ ខឹងជនរងគ្រោះស្តី បន្ទោសឲពីរឿងលួចជីកទំពាំង ឯចប់ជីកដែក បានបោះចោលកក្នុងទឹក
ស្វឺង៕SRP

ខេត្តសៀមរាប៖លោកលី សំរិទ្ធ ប្រធានក្រុមប្រឹក្សាខេត្តសៀមរាប បានជម្រុញដល់មន្ត្រីជំនាញពាក់ព័ន្ធ និង អាជ្ញាធរមូលដ្ឋាន គឺមានការទទួលខុសត្រូវ ក្នុងការការដោះស្រាយវិវាទទាំងឡាយ នៅក្នុងដែនសមត្ថកិច្ចរបស់ខ្លួន ដើមី្បកុំឲ្យមានភាពស្មុកស្មាញ ដល់ថ្នាក់លើ ព្រមទាំងបានលើកឡើងពី នីតិវិធីរដ្ឋាបាល មួយចំនួនដល់មន្ត្រីរាជការផងដែរ។

លោកក៏បានរំលឹកថ្នាក់ដឹកនាំ ត្រូវតែខិតខំយកចិត្តទុកដាក់ ក្នុងការអនុវត្តឲ្យបានខ្ជាប់ខ្ជួន នូវរាល់ផែនការសកម្មភាព ដែលរាជរដ្ឋាភិបាល បានកំណត់ ក៏ដូចទិសដៅរបស់រដ្ឋបាលខេត្តផងដែរ។

លោកស្នើបែបនេះ នៅសាលប្រជុំសាលាខេត្តសៀមរាប នាថ្ងៃទី ២៥ ខែ កក្កដា ឆ្នាំ២០២៤ ក្នុងឱកាសដឹកនាំកិច្ចប្រជុំសាមញ្ញលើកទី២ របស់ក្រុមប្រឹក្សាខេត្ត អាណត្តិទី៤៕SRP

លោក ចែម ផានិត នាយការិល័យប្រឆាំងគ្រឿងញៀនខេត្តនិងនាយរងនគរបាលការិយាល័យគ្រឿងញៀនស្ទឹងត្រែង២នាក់ទៀត ត្រូវបានកម្លាំងប៉េអឹមចាប់ខ្លួននិងដកហូតបានគ្រឿងញៀនមួយចំនួន ប្រាក់ដុល្លាអាម៉េរិកសុទ្ធ៤ម៉ឹន និងប្រាក់ដុល្លាក្លែងក្លាយជាង១៧ម៉ឺន។

ប្រតិបត្តិការ ធ្វើឡើងនៅថ្ងៃទី២១កក្តដា ២០២៤ ក្រោយឡោមព័ទ្ធ ផ្ទះ នាយការិយាល័យនគរបាលប្រឆាំងគ្រឿងញៀន ខេត្តស្ទឹងត្រែង ស្ថិតនៅផ្លូវទំនប់បេតុងភូមិរាជានុកូល២ សង្កាត់ស្ទឹងត្រែង ក្រុងស្ទឹងត្រែង។

យោងតាមព័ត៌មានពីសមត្ថកិច្ចឲ្យដឹងថា កម្លាំកងរាជអាវុធហត្ថ ចុះឡោមព័ទ្ធនិងឃាត់ខ្លួន ប្រធានការិយាល័យគ្រឿងញៀន នៅគ្រានោះគឺយោងទៅតាមចម្លើយសារភាព របស់ជនសង្ស័យ ក្នុងករណីលួចនិងកាត់ខ្សែភ្លើងនិងប្រើប្រាស់គ្រឿងញៀន។ ចម្លើយសារភាពទាំងនោះ ក៏មានការពាក់ព័ន្ធអនុប្រធានការិយាល័យប្រឆាំងគ្រឿងញៀន ចំនួនពីរនាក់ថែមទៀតផង។ បន្ទាប់ការឃាត់ខ្លួនប្រធានការិយាល័យប្រឆាំងគ្រឿងញៀន រួមអនុប្រធាន២នាក់ផ្សេងទៀត កម្លាំងសមត្ថកិច្ចកងរាជអាវុធហត្ថខេត្តស្ទឹងត្រែង បានបន្តនីតិវិធីក្នុងការស្រាវជ្រាវស៊ើបអង្កេតយ៉ាងហ្មត់ចត់រយៈពេលបីថ្ងៃដើម្បីជៀសវាងប៉ះពាល់ដល់កិត្តិយស។

ក្រោយការស៊ើបអង្កេតកម្លាំងកងរាជអាវុធហត្ថ បានបញ្ជូនប្រធានការិយាល័យប្រឆាំងគ្រឿងញៀន រួមអនុប្រធានការិយាល័យចំនួនពីររូបទៀតទៅតុលាការហើយព្រះរាជអាជ្ញា ក៏បានចោទប្រកាន់និងបញ្ជូនបន្តទៅចៅក្រមស៊ើបសួរ និងបញ្ជូនបន្តទៅឃុំនៅពន្ធនាគារ។

ស្នងនគរបាលខេត្តស្ទឹងត្រែង លោក អូត ស៊ីវត្ថា បាននិយាយតាមប្រព័ន្ធតេឡេក្រាមប្រាប់សារព័ត៌មាន នៅថ្ងៃទី២៤ កក្តដា២០២៤ នេះថា ព្រោះនេះគ្រាន់តែជាចម្លើយសារភាព អាចោរលួចខ្សែភ្លើង ដែលវាប្រើប្រាស់គ្រឿងញៀនទេ បើភស្តុតាងពិតមិនពិត អាហ្នឹងអត់ទាន់មានទេ អញ្ចឹងបើមានភស្តុតាងពិតអាហ្នឹង ធ្វើតាមច្បាប់ចុះមានតែប៉ុនហ្នឹងទេ។

អ្នកនាំពាក្យសាលាដំបូងខេត្តស្ទឹងត្រែង លោក ឈុំ ស៊ាងហាក់ មានប្រសាសន៍ កាលពីព្រឹកថ្ងៃទី ២៤ កក្តដា ២០២៤ នេះដែរថា ក្នុងសំណុំរឿងខាងលើនេះ ព្រះរាជអាជ្ញានិងចៅក្រមបានចោទប្រកាន់រួចរាល់និងចេញដីកាឃុំខ្លួនរួចហើយ។ ចំណែកវត្ថុតាងរឹបអូសរួមមាន ប្រាក់ដុល្លារសុទ្ធចំនួន ៤ម៉ឺនដុល្លារ(បួនម៉ឺនដុល្លារ)ប្រាក់ដុល្លារក្លែងក្លាយ (លុយសែន) ចំនួន១៧៨.១០០ដុល្លារ (ដប់ប្រាំពីម៉ឺនប្រាំបីពាន់មួយរយដុល្លា) គ្រឿងគៀន ចំនួន៣,១៧ក្រាម ទូរស័ព្ទដៃ៥គ្រឿងរថយន្តម៉ាកហាយឡិនឌ័រ១គ្រឿង និងអាវុធខ្លី១ដើម គ្រាប់៣៤គ្រាប់៕SRP

ខេត្តបាត់ដំបង៖លោកឧត្តមសេនីយ៍ទោ​ ដាញ់អេង​ ប៊ុន​ចាន់​ ស្នងការនគរបាលខេត្តបាត់ដំបង បានដឹកនាំកងកម្លាំងសួរសុខទុក្ខលោក​ រតន៍​ ម៉ូរ៉ា​ អតីតស្នងការរង​ កំពុងសម្រាកព្យាបាលជម្ងឺដល់លំនៅដ្ឋាន។

ការដឹកនាំលោក​ លោកស្រីស្នងការរង​និងថ្នាក់ដឹកនាំព្រមទាំងកងកម្លាំងនគរបាល​ក្នុងស្នងការដ្ឋាន​ ទៅសួរសុខ​ទុក្ខលោក​ រតន៍​ ម៉ូរ៉ា​ អតីតស្នងការរងនៃស្នងការដ្ឋាននគរ​បា​លខេត្តបាត់ដំបង​ជានិវត្តន៍ជន​ ខ​ណៈដែល​លោកមានជម្ងឺកំពុងសម្រាកព្យាបា​ល​ ក្នុងលំនៅ​ដ្ឋានស្ថិតនៅសង្កាត់ចំការសំរោង​ ក្រុង​បាត់ដំបង​ ខេត្តបាត់​ដដំបង នៅព្រឹកថ្ងៃទី២៣ខែ​ កក្កដា​ឆ្នាំ​២០​២៤​នេះ ដោយអនុវត្តតាមអនុ​សា​ស​ន៍​ណែនាំផ្តាំផ្ញេីរបស់ឯកឧត្តម​ នាយឧត្តមសេនីយ៍​ ស​ ថេត​ អគ្គស្នងការនៃអគ្គ​ស្នងការដ្ឋាននគរបាលជាតិ​។

លោកឧត្តមសេនីយ៍ទោ​ស្នងការ បានពាំនាំនូវប្រសា​សន៍​ផ្តាំផ្ញេីសាកសួរសុខទុក្ខពីសំណាក់ឯកឧត្តម​ នាយឧត្តមសេនីយ៍​ ស​ ថេត​ អគ្គស្នងការ​នៃអគ្គ​ស្នងការដ្ឋាននគរបាលជាតិ​ ក៏ដូចជាថ្នាក់ដឹកនាំព្រមទាំងកង​កម្លាំងនគរបាលជាតិ​ចំណុះស្នង​ការដ្ឋាននគរបាលខេត្តបាត់​ដំបងទាំងអស់​ ជាពិសេសមិនភ្លេចនូវគុណបំណាច់របស់លោកនៅក្នុងពេលដែលលោករួមចំ​ណែកក្នុងការ​ បម្រេីជាតិ​ មាតុភូមិតាំងពីប្រទេសជាតិស្ថិតក្នុងគ្រា​ លំបាក​ឆ្លងកាត់ច្រេីនដំណាក់កាល​ រហូតមក​ដល់ពេលនេះ​។ បេីទោះបីលោកបានចូល​និវត្តន៍ពីការងារហេីយក្តីតែ​ គុណបំណាច់មិនអាចកាត់ថ្លៃបានរបស់លោកគឺជាវីរៈភាពសម្រាប់អ្នកបន្តវេននៅថ្ងៃនេះ​ និងសូមឱ្យអការៈជម្ងឺរបស់លោក​ បានធូរស្បេីយ​ ប្រសេីរឡេីងវិញ។

ជាមួយនឹងការ​សាក​សួរសុខទុក្ខនេះលោក​ស្នង​ការ​បាននាំ​យកនូវថវិកា ដែលបាន​ពីការចូលរួមរបស់បងប្អូនកងកម្លាំងនគរបាលចំណុះស្នងការដ្ឋាន​ ផ្លែផល្លានិងភេសជ្ជៈមួយចំនួន​យក​ទៅប្រគល់ជូនលោក​ រតន៍​ ម៉ូរ៉ា​និងក្រុមគ្រួសារផងដែរ។

លោករតន៍​ ម៉ូរ៉ា​ និងក្រុ​មគ្រួសារ​ បានថ្លែងនូវអំ​ណរគុណយ៉ាងជ្រា​លជ្រៅចំពោះទឹកចិត្តរបស់ឯក​ឧត្តម​ នាយឧត្តមសេនីយ៍​ ស​ ថេត​ អគ្គស្នងការនៃអគ្គ​ស្នងការដ្ឋាននគរបាលជាតិក៏ដូចទឹកចិត្តរបស់លោក​ឧត្តមសេនីយ៍ទោស្នងការ​ លោក​ លោកស្រីស្នងការរងនិងកងកម្លាំងនគរបាលទាំងអស់ដែលអញ្ជេីញមកសួរ​សុខទុក្ខនិងផ្តល់នូវថវិកា​ផ្លែផល្លានិងភេសជ្ជៈផង​ ដល់រូបលោក​និងក្រុមគ្រួសារក្នុងពេលដែលកំ​ពុងមានជម្ងឺ​ ជួបការលំបាក​ដល់លំនៅដ្ឋាន ជាមួយនេះលោកនិងក្រុមគ្រួសារ​សូមជូនពរដល់ឯក​ឧត្តមនាយឧត្តមសេនី​យ៍អគ្គ​ស្នង​ការនគរបាលជាតិលោកស្នងការ​ លោ​ក​​ លោកស្រីស្នងការរងព្រមទាំប​កងកម្លាំងនគរបាលទាំងអស់សូម​ប្រកបដោយសុខភាពល្អ​ ទ​ទួល​ បានជោគជ័យគ្រប់ភារកិច្ចក្នុងការបម្រេីជាតិ​ បម្រេីប្រជាពលរដ្ឋនិង មានសុខសុភមង្គល​ ក្នុងក្រុមគ្រួសារ៕SRP

ភ្នំពេញ៖ប្រមុខរដ្ឋាភិបាលកម្ពុជា បានសម្រេចហាមឃាត់ការបើកកាស៊ីណូ នៅខេត្តចំនួន ២ រួមមាន ១. ខេត្តកែប និង ២. ខេត្តកំពត លើកលែងតំបន់ភ្នំបូកគោ និងតំបន់ច្រកព្រែកចាក៕SRP

ជនជាតិវៀតណាមចំនួន៦០នាក់ ស្រី១០នាក់ត្រូវបានបណ្ដេញចេញពីប្រទេសកម្ពុជា ពាក់ព័ន្ធករណីលួចស្នាក់នៅធ្វើការងារខុសច្បាប់ គ្មានលិខិតឆ្លងដែន។

ការបណ្ដេញចេញ នៅថ្ងៃទី២២ ខែកក្កដា ឆ្នាំ២០២៤ នេះ ដោយនាយកដ្ឋានស៊ើបអង្កេត និងអនុវត្តនីតិវិធីតាមអនុសាសន៍លោកបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍។

ក្នុងនោះដែរ នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានទទួលពីខេត្តព្រះសីហនុ នឹងត្រូវបានបណ្តេញចេញពីព្រះរាជាណាចក្រកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិ ព្រែកចាក ខេត្តកំពត៕SRP

សម្ដេចនាយករដ្ឋមន្ត្រីអធិបតីហ៊ុន ម៉ាណែត ទៅព្រឹកថ្ងៃចន្ទទី 22 ខែកក្កដា ឆ្នាំ 2014 នេះ បានស្នើឱ្យគ្រប់ភាគីពាក់ព័ន្ធទាំងអស់ ចាយក្រដាសប្រាក់ដុល្លារ សភាពចាស់ ឬប្រឡាក់។

សំណេរលើបណ្ដាញទំនាក់ទំនងផ្លូវការ ប្រព័ន្ធតេឡេក្រាម សម្ដេចនាយករដ្ឋមន្ត្រីហ៊ុន ម៉ាណែត នៅព្រឹកនេះ បានសរសេរថា៖

ខ្ញុំសូមអរគុណនិងកោតសរសើរចំពោះ លោកជំទាវ ជា សេរី ទេសាភិបាលធនាគារជាតិនៃកម្ពុជា ចំពោះចំណាត់ការដ៏ឆាប់រហ័ស ក្នុងការដាក់ចេញនូវគោលការណ៍ពាក់ព័ន្ធ នឹងការសម្រួលលក្ខ័ណ្ឌ សម្រាប់ការចាយក្រដាស់ប្រាក់ដុល្លារអាមេរិក ដែលមានសភាពចាស់ ប្រឡាក់ ឬខូចខាតខ្លះ នៅខេត្តសៀមរាប។

សម្ដេចអធិបតីបានបន្តថា៖ បញ្ហាលំបាកពាក់ព័ន្ធ នឹងការចាយវាយក្រដាសប្រាក់ដុល្លារអាមេរិក ដែលមានសភាពចាស់ ប្រឡាក់ ឬខូចខាតខ្លះ បានបង្កការលំបាកសម្រាប់ការលក់ដូរ របស់ ប្រជាពលរដ្ឋ នៅក្នុងខេត្ត ដែលបញ្ហានេះ ត្រូវបានបងប្អូនអ្នកលក់ដូរប្រាប់ខ្ញុំផ្ទាល់ ពេលដែលខ្ញុំចុះទៅ Pub Street កាលពីយប់ថ្ងៃទី ១៧ កក្កដា ២០២៤ កន្លងទៅនេះ។

សម្ដេចហ៊ុន ម៉ាណែត បានបន្តថា៖ ខ្ញុំសង្ឃឹមថាចំណាត់ការរបស់ធនាគារជាតិនៃកម្ពុជា នឹងលប់បំបាត់បញ្ហាលំបាកពាក់ព័ន្ធនឹងការចាយក្រដាសប្រាក់ដុល្លារអាមេរិក និងជួយសម្រួលដល់ការលក់ដូរ របស់បងប្អូនប្រជាពលរដ្ឋ ក៏ដូចជាទេសចរណ៍ ដែលទស្សនាខេត្តសៀមរាបផងដែរ។

ក្នុងសំណេររបស់នាយករដ្ឋមន្ត្រីហ៊ុន ម៉ាណែត ក៏បញ្ជាក់ផងដែរថា៖ ខ្ញុំសូមឱ្យសាខាធនាគារជាតិនៃកម្ពុជាខេត្តសៀមរាប បណ្ដាធនាគារឯកជន ទាំងអស់ នៅក្នុងខេត្តសៀមរាប ក៏ដូចជាបណ្ដាអាជីវកម្មឯកជន និងបងប្អូនប្រជាពលរដ្ឋ អ្នកលក់ដូរទាំងអស់នៅក្នុងខេត្ត ចូលរួមអនុវត្តនូវគោលការណ៍ថ្មី របស់ ធនាគារជាតិនៃកម្ពុជាឱ្យបានស្រុះគ្នា ដើម្បីកុំឲ្យមានបញ្ហាពាក់ព័ន្ធនឹងការចាយក្រដាសប្រាក់ដុល្លារ ដែលមានសភាពចាស់ ឬប្រឡាក់បន្តទៀត៕SRP

ភ្នំពេញ៖ជនសង្ស័យម្នាក់ ត្រូវបាន កម្លាំងនាយកដ្ឋាននគរបាលព្រហ្មទណ្ឌ ចាប់ខ្លួនករណីឃាតកម្ម។

អំពើឃាតកម្មនេះ បានកើតឡើងនៅពីថ្ងៃទី២០ ខែកក្កដា ឆ្នាំ២០២៤ វេលាម៉ោង២១៖២០នាទី មានករណីឃាតកម្មមួយកើតឡើងនៅត្រង់ចំណុច ផ្លូវលំ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ។

ជនសង្ស័យឈ្មោះ លី ជីវ័ន្ត ហៅ ពយ ភេទប្រុស អាយុប្រហែល៣៣ឆ្នាំ ជនជាតិខ្មែរ បានធ្វើសកម្មភាពស្ទុះយកកាំបិតចាក់សម្លាប់ជនរងគ្រោះឈ្មោះ ចាន់ ឆៃយ៉ា ភេទប្រុស អាយុ៣២ឆ្នាំ ជនជាតិខ្មែរ ក្រោយពីបានទាស់ពាក្យសម្តី និងប្រតាយប្រតប់ ក្នុងវូងផឹងស៊ី។

ការចាប់ខ្លួនធ្វើឡើង នៅត្រង់ចំណុច ភូមិម័ល សង្កាត់ដង្កោ ខណ្ឌដង្កោ នៅថ្ងៃទី២១ ខែកក្កដា ឆ្នាំ២០២៤ វេលាម៉ោង១៦៖១០នាទី ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន, លោកវរសេនីយ៍ឯក ហែម បូណា និងលោកវរសេនីយ៍ឯក ឆាន់ គឹមលី អនុប្រធាននាយកដ្ឋាន សហការ ជាមួយនគរបាលខណ្ឌច្បារអំពៅ អនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ។

តាមការសាកសួរបឋម ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពចាក់ទៅលើជនរងគ្រោះប្រាកដមែន ក្រោយពីទាស់ពាក្យសម្តី និងប្រតាយប្រតប់គ្នាជាមួយជនរងគ្រោះ។ បច្ចុប្បន្ននាយកដ្ឋាន កំពុងអនុវត្តបន្ដតាមនីតិវិធី៕SRP

ក្រុមមន្ត្រីបានលាតត្រដាង ពីសកម្មភាពរបស់ប្រធានមន្ទីរសាធារណការដឹកជញ្ជូនខេត្តឧត្តរមានជ័យ ចំពោះ ផែនការរត់ការ ស្នើរសុំអន្តរាគមន៍ ឲ្យកូនរបស់ខ្លួនឡើងជាអនុប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ។

យោងតាមប្រភពដែលបានបង្ហោះតាមបណ្ដាញសង្គមហ្វេសប៊ុក បានបង្ហាញថា មន្ត្រីបម្រើការងារនៅមន្ទីរសាធារណការដឹកជញ្ជូនខេត្តឧត្តរមានជ័យ កំពុងធ្វើការរិះគន់ចំៗ ចំពោះលោក ឈឿង ផល្លាង ដែលមានតួរនាទីជាប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ បច្ចុប្បន្នកំពុងបានធ្វើការការរត់ការយ៉ាងដើម្បីស្នើរសុំអន្តរាគមន៍ ពីថ្នាក់ដឹកនាំឲ្យកូនប្រុសរបស់ខ្លួន ដែលមានឈ្មោះ ណា រ៉ា វិទូកល្បណ មានតួរនាទីជាមន្រ្តីនៃមន្ទីរសាធារណការនិងដឹកជញ្ជូនខេត្តឧត្តរមានជ័យ ថ្ងៃចូលបម្រើការងារនៅថ្ងៃទី៧ខែកក្កដាឆ្នាំ២០១៦ មានរយ: ពេល៦ឆ្នាំ ក្របខ័ណ្ឌ ក.២.៣. ត្រៀមឡើងជាអនុប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យនៅពេលខាងមុខនេះ ខណ:លោកប្រធានមន្ទីររូបនេះត្រៀមនិងចូលនិវត្តន៍នៅពេលខាងមុខបន្តិចទៀតនោះផងដែរ។

តាមប្រភពព័តមានដដែលពីមន្រ្តីក្នុងអង្គភាពនៃមន្ទីរសាធារណការនិងដឹកជញ្ជូនខេត្តឧត្តរមានជ័យ បានបង្ហើបឲ្យដឹងទៀតថា បច្ចប្បន្ននេះ មានមន្រ្តីមួយចំនួនដែលមានឈ្មោះបម្រើការងារ ក្នុងមន្ទីរស៉ីប្រាក់ខែរដ្ឋប៉ុន្តែមិនដែលឃើញមានមុខ ឬក៏មានវត្តមានមកបម្រើការងារនោះទេ។ បញ្ហាទាំងអស់នេះហើយធ្វើឲ្យផ្ទុះការរិះគន់ជាខ្លាំង ពីមន្រ្តីក្នុងអង្គភាពជាមួយគ្នាដែលមកបំពេញការងាររាល់ថ្ងៃ មានការរិះគន់មិនសប្បាយចិត្ត ពាក់ព័ន្ធនិងបញ្ហានេះ ដោយសារតែមន្រ្តីជាខ្សែនិងសាច់ញាតិ របស់ថ្នាក់ដឹកនាំមន្ទីរទើបបញ្ហានេះ ពុំមានមន្រ្តីណាហ៊ានបញ្ចេញយោបល់មតិអ្វីនោះឡើយបានត្រឹមតែ សម្ងំដោយការឈឺចាប់តែមិនហ៊ានស្រែកតែប៉ុណ្តោះ។

ជាក់ស្តែងដូចករណី លោកប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ បានរត់ការស្នើរសុំអន្តរាគមន៍ តែងតាំងកូនប្រុសរបស់ខ្លួន មកជាអនុប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ ដើម្បីត្រៀមខ្លួនឡើងជាប្រធានមន្ទីរនៅពេលខាងមុខ ខណ:ប្រធានមន្ទីរូបនេះ និងចូលនិវត្តន៍។

ជាហេតុករណីនេះហើយ ទើបធ្វើឲ្យ មន្រ្តីថ្នាក់ក្រោមជាច្រើននាក់ ដែលខំបម្រើបការងាររាប់ឆ្នាំ ក្នុងអង្គភាពមួយនេះ មានការរិះគន់មិនពេញចិត្តចំពោះលោកប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ ដោយលោកប្រើបក្សនិយម។

ទីភ្នាក់ងារ សារព័ត៌មានសៀមរាប ប៉ុស្តិ៍ មិនទាន់ទទួលបានការបំភ្លឺពី លោក ឈឿង ផល្លាង ប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ នៅឡើយទេរហូតដល់ម៉ោងថ្ងៃនេះ៕SRP