ខេត្តសៀមរាប៖លោកសាយ សំអាល់ ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានសន្យាថា នឹងប្រឹងប្រែងដោះស្រាយបញ្ហា របស់ប្រជាពលរដ្ឋ ជាច្រើន ដែលកំពុងតែរស់នៅក្នុងតំបន់ការពាររមណីយដ្ឋានអង្គរ ឱ្យទទួលបានផលប្រយោជន៍ជាមួយជីវភាពប្រសើរផង និងការពារនូវប្រាសាទបុរាណនានា ដែលជាកេរ្តិ៍ដំណែល របស់ដូនតាខ្មែរ ឱ្យគង់វង្ស និងមានតម្លៃលេចធ្លោ ជាសកលនៅលើពិភពលោកផងដែរ។

លោកថ្លែងសន្យាបែបនេះ នៅក្នុងពិធីបិទសិក្ខាសាលាពិគ្រោះយោបល់ ស្ដីពីការគ្រប់គ្រងតំបន់រមណីយដ្ឋានបេតិកភណ្ឌពិភពលោក (អង្គរ) នៅខេត្តសៀមរាប នាថ្ងៃអង្គារនេះ។

គួរបញ្ជាក់ថា ចាប់តាំងតែពីថ្ងៃទី១២ខែសីហា មក ក្រសួងរៀបចំដែនដី នគរូបនីយកម្មនិងសំណង់ បានរៀបចំធ្វើសិក្ខាសាលាពិគ្រោះយោបល់ ស្ដីពីការគ្រប់គ្រងតំបន់ រមណីយដ្ឋានបេតិកភណ្ឌពិភពលោក(អង្គរ) ដោយមានមន្ត្រីអាជ្ញាធរជាតិអប្សរា អាជ្ញាធរខេត្តសៀមរាប អាជ្ញាធរមូលដ្ឋានគ្រប់ជាន់ថ្នាក់ ព្រមទាំងស្ថាប័នពាក់ព័ន្ធជាច្រើនទៀត ព្រមទាំងព្រះសង្ឃនិងប្រជាពលរដ្ឋ មកចូលរួមផងដែរ។

បច្ចុប្បន្ននេះ នៅក្នុងតំបន់រមណីយដ្ឋានអង្គរ ដែលគ្រប់គ្រងដោយអាជ្ញាធរអប្សរា គឺតែងតែអនុវត្តន៍ច្បាប់ជាប្រចាំលើការទប់ស្កាត់ការទន្ទ្រានដីធ្លីធ្វើជាកម្មសិទ្ធិឯកជន និងទប់ស្កាត់ការកើនឡើងនូវសំណង់ខុសច្បាប់មិនឱ្យរីករាលដាល។ ក៏ប៉ុន្តែជាញឹកញាប់ ប្រជាពលរដ្ឋខ្លះ តែងបង្ហាញការមិនសប្បាយចិត្ត ជាមួយវិធានការរបស់អាជ្ញាធរជាតិអប្សរា ទេដោយសារតែពេលពួកគាត់ចង់សាងសង់ផ្ទះបន្ថែម ការធ្វើរបងការពារផលដំណាំនិងធ្វើ ផ្លូវចូលផ្ទះមិនបានជាដើម។

រដ្ឋមន្ត្រីសាយ សំអាល់ មានប្រសាសន៍ថា លោកទទួលស្គាល់ថា ការៀបចំ ដើម្បីការពាររមណីយដ្ឋានអង្គរ គឺមានបញ្ហាជាច្រើនជាមួយនិងប្រជាពលរដ្ឋ ខ្លះ ដែលរស់នៅក្នុងតំបន់ការពារ ទាំងនោះ ក៏ប៉ុន្តែទោះបីជាយ៉ាងណា គឺត្រូវតែការពារប្រាសាទបុរាណទាំងឡាយ ដែលជាកេរ្តិ៍មត៌ដូនតាខ្មែរ ឱ្យបានគង់វង្សបានយូរអង្វែងនិងមានសោភ័ណភាព។

លោកសាយ សំអាល់ បានសុំពេលមួយរយៈ ដើម្បីដោះស្រាយចំពោះបញ្ហាប្រឈមនានា នៅក្នុងតំបន់រមណីយដ្ឋានអង្គរ នេះ ធ្វើយ៉ាងណា ឱ្យប្រជាពលរដ្ឋអាចទទួលបានផលប្រយោជន៍ផង ហើយកិច្ចការពារតំបន់អង្គរ ឱ្យមានប្រសិទ្ធិភាព ក្នុងការទប់ស្កាត់ការរុករានដីធ្លី និងការរីករាលដាលនៃសំណង់ខុសច្បាប់ ក្នុងតំបន់ការពារបេតិកភណ្ឌ របស់ពិភពលោក បានដោយជោគជ័យផងដែរ៕SRP

រាជរដ្ឋាភិបាលកម្ពុជា ធានាការពារជាដាច់ខាត នូវសន្តិភាព ស្ថិរភាពនយោបាយ អធិបតេយ្យភាពជាតិ និងបូរណភាពទឹកដី ទោះក្នុងតម្លៃណាក៏ដោយ

ប៉ុន្មានថ្ងៃចុងក្រោយនេះ ខ្ញុំបានឆ្លើយសំណួរអ្នកសារព័ត៌មានជាច្រើនពាក់ព័ន្ធនឹងការអំពាវនាវរបស់ក្រុមប្រឆាំងជ្រុលនិយមមួយក្តាប់តូចនៅក្រៅប្រទេសដែលយកបញ្ហានៅប្រទេសបង់ក្លាដេសមកបំផុសឱ្យមានចលនាបដិវត្តន៍ពណ៌ផ្តួលរំលំរាជរដ្ឋាភិបាលស្របច្បាប់នៅកម្ពុជាតាមការស្រមើស្រមៃរបស់ខ្លួន។

ខ្ញុំសូមបញ្ជាក់ជូនជាថ្មីដូចតទៅ៖ ការប៉ុនប៉ងបំផុសចលនាបដិវត្តន៍ពណ៌នៅកម្ពុជាគឺជាអំពើប្រឆាំងនឹងច្បាប់ ប្រឆាំងនឹងសន្តិភាព ប្រឆាំងនឹងការបោះឆ្នោតតាមបែបប្រជាធិបតេយ្យ និងប្រឆាំងឆន្ទៈក៏ដូចជាបំណងប្រាថ្នារបស់ប្រជាពលរដ្ឋខ្មែរ។ ហេតុអ្វី?

ទី១. រាជរដ្ឋាភិបាលដឹកនាំដោយគណបក្សប្រជាជនកម្ពុជាកើតចេញពីការបោះឆ្នោត ស្របច្បាប់ដោយប្រជាពលរដ្ឋខ្មែរ។ ដូច្នេះ ការប៉ុនប៉ងផ្តួលរំលំរាជរដ្ឋាភិបាលស្របច្បាប់ដោយប្រើមធ្យោបាយហិង្សា មិនប្រជាធិបតេយ្យគឺជាអំពើល្មើសច្បាប់។ នេះសបញ្ជាក់ថា ក្រុមជ្រុលនិយមមួយក្តាប់តូចនេះតែងប្រព្រឹត្តខុសច្បាប់ជារៀងរហូតមក ហើយទោសដែលពួកគេមានជាប់ខ្លួនគឺជាឧទាហរណ៍ស្រាប់។

ទី២. ប្រទេសកម្ពុជាមានសន្តិភាពពេញលេញចាប់ពីឆ្នាំ ១៩៩៨ មកក្រោមនយោបាយឈ្នះៗរបស់សម្តេចតេជោ ហ៊ុន សែន។ សន្តិភាពមានតម្លៃខ្ពស់ណាស់មិនអាចកាត់ថ្លៃបានពីព្រោះវាបានអនុញ្ញាតឱ្យប្រទេសជាតិស្គាល់ការអភិវឌ្ឍមិនធ្លាប់មានពីមុន និងបានផ្តល់ក្តីសុខនិងអត្ថប្រយោជន៍ដល់ប្រជាពលរដ្ឋខ្មែរគ្រប់គ្នា។ ដូច្នេះ ការប៉ុនប៉ងអូសទាញប្រទេសឱ្យធ្លាក់ក្នុងសភាពវឹកវរ ហិង្សា បង្ហូរឈាម ដែលបើកផ្លូវឱ្យសង្គ្រាមស៊ីវិលកើតឡើងសារជាថ្មីគឺជាអំពើប្រឆាំងសន្តិភាពដែលអាជ្ញាធររាជរដ្ឋាភិបាលមិនអនុញ្ញាតជាដាច់ខាត។

ទី៣. កម្ពុជាពីអតីតកាលដែលរងការបំផ្លិចបំផ្លាញខ្ចេចខ្ទាំ រហូតដល់ធ្លាក់ចូលក្នុងរបបប្រល័យពូជសាសន៍ កាប់សម្លាប់គ្នាស្ទើរផុតរលត់ពីផែនដី ដោយសារអ្នកនយោបាយខ្មែរប្រើវប្បធម៌នយោបាយដណ្តើមអំណាចគ្នាដោយចុងកាណុង។ ប៉ុន្តែ ក្រោមការដឹកនាំរបស់រាជរដ្ឋាភិបាលដែលកើតចេញពីគណបក្សប្រជាជនកម្ពុជា វប្បធម៌នយោបាយនេះត្រូវបានផ្លាស់ប្តូរមកជាការជ្រើសរើសមេដឹកនាំតាមរយៈការបោះឆ្នោតតាមបែបប្រជាធិបតេយ្យវិញ។ ដូច្នេះ ការប៉ុនប៉ងណាមួយចង់ផ្តួលរំលំរាជរដ្ឋាភិបាលតាមមធ្យោបាយបដិវត្តន៍ពណ៌គឺជាអំពើប្រឆាំងនឹងការបោះឆ្នោតតាមបែបប្រជាធិបតេយ្យដែលមិនអាចទទួលយកបាន។

ទី៤. ប្រជាពលរដ្ឋខ្មែរបាននិងកំពុងទទួលផលពីសុខសន្តិភាពនិងការអភិវឌ្ឍហើយពួកគេដឹងច្បាស់ថា សន្តិភាពនិងការអភិវឌ្ឍគឺស្នាដៃដឹកនាំរបស់រាជរដ្ឋាភិបាលដែលកើតចេញពីគណបក្សប្រជាជនកម្ពុជា។ ហេតុនេះហើយបានជាពួកគេបោះឆ្នោតគាំទ្រគណបក្សប្រជាជនកម្ពុជាឱ្យដឹកនាំប្រទេសរហូតមក។ ជាក់ស្តែង ការបោះឆ្នោតចុងក្រោយនេះ គណបក្សប្រជាជនកម្ពុជាទទួលបានសំឡេងគាំទ្រជាង ៨២% នៃចំនួនអ្នកបោះឆ្នោតដែលជាអត្រាគាំទ្រខ្ពស់បំផុត។ ដូច្នេះ អំពើរបស់ជនជ្រុលនិយមមួយក្តាប់តូចដែលប៉ុនប៉ងផ្តួលរំលំរាជរដ្ឋាភិបាលគឺផ្ទុយស្រឡះពីឆន្ទៈនិងបំណងប្រាថ្នារបស់ប្រជាពលរដ្ឋខ្មែរដែលចង់រស់នៅក្នុងសុខសន្តិភាពនិងមិនចង់ភ្លក់រសជាតិនៃភាពវឹកវរ អសន្តិសុខ និងសង្គ្រាមស៊ីវិលម្តងទៀតឡើយ។

ទី៥. រាជរដ្ឋាភិបាលដឹកនាំដោយគណបក្សប្រជាជនកម្ពុជាដែលមានសម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្នមានគោលជំហរច្បាស់លាស់ ម៉ឺងម៉ាត់ ឥតងាករេ គឺការពារឱ្យបានជាដាច់ខាតនូវសុខសន្តិភាព ស្ថិរភាពនយោបាយ អធិបតេយ្យភាពជាតិ និងបូរណភាពទឹកដី ទោះជាក្នុងតម្លៃណាក៏ដោយ។ នេះគឺជាភាពកក់ក្តៅដែលរាជរដ្ឋាភិបាលធានាជូនជាតិនិងប្រជាពលរដ្ឋខ្មែរទាំងក្នុងអតីតកាល បច្ចុប្បន្ន និងតទៅអនាគត៕

អត្ថបទដោយ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល

ខេត្តកំពង់ធំ៖កម្លាំងនគរបាលខេត្តកំពង់ធំ នៅថ្ងៃទី១០ ខែសីហា ឆ្នាំ២០២៤ នេះ បានបញ្ជូនជនសង្ស័យជាក្មេងទំនើងប្រព្រឹត្តបទល្មើស ហិង្សាដោយចេតនាមានស្ថានទម្ងន់ទោស ទៅសាលាដំបូងខេត្ត។

លោកឧត្ដមសេនីយ៍ត្រី ទិត សំណាង ស្នងការរងខេត្តកំពង់ធំ ផែនការងារនគរបាលព្រហ្មទណ្ឌ បានឱ្យដឹងថា កាលពីថ្ងៃទី០៦ ខែសីហា ឆ្នាំ២០២៤ វេលាម៉ោង១៩:០០ នាទីយប់ មានករណី (ហិង្សាដោយចេតនាមានស្ថានទម្ងន់ទោស) កើតឡើងចំនួន០១លើក ស្ថិតនៅចំណុចសាលាឃុំសំបូរ ក្នុងភូមិជាយសំពៅ ឃុំសំបូរ ស្រុក ប្រាសាទសំបូរ ខេត្តកំពង់ធំ បង្កឡើងដោយក្មេងទំនើង១ក្រុម មានគ្នាចំនួន០៩នាក់ ធ្វើសកម្មភាពស្ទាក់ផ្លូវ កាប់ វាយ ទៅលើជនរងគ្រោះ ខណៈជិះម៉ូតូឌុបគ្នាទៅលេងបងប្អូន នៅស្រុកប្រាសាទបល្ល័ង្ក  ពេលមកដល់កន្លែងកើតហេតុខាងលើ  ត្រូវបានក្រុមជនសង្ស័យស្ទាក់ដេញកាប់បណ្ដាលឱ្យដួលម៉ូតូ នាំគ្នារត់ គេចខ្លួនអស់ ទើបក្រុមជនសង្ស័យ កាប់ ទៅលើម៉ូតូបណ្ដាលឱ្យខូចខាតម៉ូតូមួយគ្រឿង និងរបួសស្រាលម្នាក់។

លោកថា បន្ទាប់ពីទទួលបានព័ត៌មានក្រោមការដឹកនាំបញ្ជាផ្ទាល់ពីលោកឧត្តមសេនីយ៍ត្រី ហេង សុផល ស្នងការនគរបាលខេត្ត និងដោយមានការសម្របសម្រួលនីតិវិធី ពីឯកឧត្តម រស់ សារាំ ព្រះរាជអាជ្ញាអមសាលាដំបូងខេត្ត កម្លាំងនគរបាលការិយាល័យជំនាញ នៃស្នងការដ្ឋាននគរបាលខេត្ត សហការជាមួយនគរបាលស្រុកប្រាសាទសំបូរ បានប្រើប្រាស់វិធានការជំនាញ ឈានទៅឃាត់ខ្លួន ជនសង្ស័យចំនួន០៩នាក់÷ ១-ឈ្មោះ សេង ភារម្យ ភេទប្រុស អាយុ២០ឆ្នាំ។ ២-ឈ្មោះ ខឿន ខួច  ភេទប្រុស អាយុ២០ឆ្នាំ។ ៣-ឈ្មោះ ឡី លាស់  ភេទប្រុស អាយុ២៣ ឆ្នាំ។ ៤-ឈ្មោះ ឃី សុខឃុន ភេទប្រុស អាយុ ២២ឆ្នាំ។៥-ឈ្មោះ ជឿង ជ័យ ភេទប្រុស អាយុ២១ឆ្នាំ។ ៦-ឈ្មោះ ហូវ ហ៊ា ភេទប្រុស អាយុ២២ឆ្នាំ។ ៧-ឈ្មោះ ង៉ា ឃី  ភេទប្រុស អាយុ២០ឆ្នាំ។ ៨-ឈ្មោះ រ៉ែម សំរ៉េច ភេទប្រុស អាយុ២១ ឆ្នាំ។ ៩-ឈ្មោះ ឡុច ផល្លា ភេទប្រុស អាយុ២០ឆ្នាំ ជនសង្ស័យខាងលើនេះ រស់នៅក្នុងភូមិ-ឃុំកន្លែងកើតហេតុ។

ឯជនរងគ្រោះមានឈ្មោះ ១-ឈ្មោះ ផ..ន ស..ន ភេទប្រុស អាយុ២០ឆ្នាំ (របួសស្រាល)។ ២-ឈ្មោះ ហ..ថ.. ភេទប្រុស អាយុ២១ឆ្នាំ។ ៣-ឈ្នោះ ឃ..ស..ក្ត ភេទប្រុស អាយុ១៧ឆ្នាំ រស់នៅភូមិជីនាង ឃុំតាំងក្រសៅ ស្រុក ប្រាសាទសំបូរ ខេត្តកំពង់ធំ។

កម្លាំងនគរបាល ដកហូតវត្ថុតាងមាន÷ ដាវចំនួន០១ ដំបងឈើចំនួន០២ដើម ម៉ូតូ០៣គ្រឿង ជាមធ្យោបាយប្រព្រឹត្តបទល្មើស(ម៉ាកហុងដាឌ្រីម ពណ៌ខ្មៅ០២គ្រឿង ផ្លាកលេខ កំពង់ធំ 1I-5257 ផ្លាកលេខកំពង់ធំ 1Q-4704 និងម៉ាវ៉េវ ពណ៌ខ្មៅ ផ្លាកលេខកំពង់ចាម 1F-4287) កសាងសំណុំរឿង ចាត់ការតាមនីតិវិធី៕SRP

ខេត្តបន្ទាយមានជ័យ៖ក្មេងស្រីក្រមុំម្នាក់និងកុមារា២នាក់ បានស្លាប់យ៉ាងអណោចអាធម៌ ខណ:ពេល អ្នកទាំង៣នាក់ បាននាំគ្នាទៅលេងទឹកនៅរណ្តៅកាយអាចម៍ដីម៉ៃខូ១កន្លែង ក្រោយពី ទឹកលិច។

ហេតុការណ៍នេះកើតឡើងនៅ វេលាម៉ោង ១ល្ងាច ថ្ងៃទី ៩ ខែសីហា ឆ្នាំ២០២៤  សពបានរកឃើញ នៅវេលាម៉ោង៥ល្ងាចថ្ងៃ ស្ថិតនៅ៣០០ម៉ែត្រពីភូមិយាងឧត្តម ក្នុងឃុំណាំតៅ ស្រុកភ្នំស្រុក។

បើតាមអាអះអាង របស់ លោកទន់ ថុល មេឃុំណាំ តៅ បានប្រាប់អ្នកយកព៍ត័មានឲ្យដឹងថា មុនពេលកើតហេតុនោះជនរងគ្រោះ ទាំង៣នាក់ ត្រូវជាមីងនិងក្មួយ បាននាំគ្នាទៅដើរលេង ពេលទៅដល់កន្លែងរណ្តៅកាយអាចម៍ដីម៉ៃខូ១កន្លែង បាននាំគ្នា ចុះលេងទឹកដោយមិនដឹងថា ជារណ្តៅម៉ៃខូទឹកជ្រៅ ពេលហែលដល់ទឹកជ្រៅ ស្រាប់តែលង់ពេលនោះ មីងបានចុះទៅជួយ ក៏ត្រូវលង់ទឹកស្លាប់ទាំង៣នាក់ដោយគ្មានអ្នកជួយស្រង់បានឡើយ។

លោកទន់ ថុលបាននិយាយបន្តទៀត ថាជនទាំង៣មានឈ្មោះ១-.ឈ្មោះ បាន គិមអេង ភេទស្រី អាយុ១៩ឆ្នាំកើតនៅថ្ងៃទី២០ ខែមីនា ឆ្នាំ២០០៥ ឪពុកឈ្មោះមុំ សំអួន អាយុ៤២ឆ្នាំនិងម្តាយឈ្មោះ ប៉ៃ សំអៀត អាយុ៤០ឆ្នាំ ២ ឈ្មោះ កិក រីណា ភេទប្រុស អាយុ៥ឆ្នាំកើតថ្ងៃទី១៣ខែធ្នូឆ្នាំ២០១៩  មានឪពុកឈ្មោះកិក យន់ អាយុ២៣ឆ្នាំកើតឆ្នាំ២០០១និងម្តាយឈ្មោះ ហាវ ស្រីអូន អាយុ១៩ឆ្នាំ និង៣ ឈ្មោះ ចយ បញ្ញា ភេទប្រុស អាយុ៣ឆ្នាំ កើតនៅទី១៧ ខែសីហា ឆ្នាំ២០២១ មានម្តាយឈ្មោះ ហាវ ស្រីអឿង អាយុ២៥ឆ្នាំ។

លោកទន់ ថុលបានបញ្ជាក់ឲ្យដឹងបន្តទៀតថា ក្រោយពីព័ត៍មានថាមនុស្ស៣នាក់លង់ទឹកស្លាប់ សមត្ថកិច្ច អាជ្ញាធរ និងក្រុមគ្រួសារសព ចុះរាវរកលុះដល់ម៉ោង ៥ ល្ងាចទើបរកឃើញសពទាំង ៣ ហើយបានដឹកយកមកលំដ្ឋានផ្ទះជនរងគ្រោះ ដើម្បីរៀបចំធ្វើបុណ្យទៅតាមប្រពៃណី។

លោកទន់ ថុលបានបញ្ជាក់ឲ្យដឹងបន្តទៀតថានៅស្រុកភ្នំស្រុកនេះក្នុង១ឆ្នាំៗ មានមនុស្សស្លាប់ដោយសារលង់ទឹកជាច្រើននាក់ ដូច្នេះខែវស្សាចូលមកដល់ក្រុមគ្រួសារមានកូនតូចៗគួរប្រុងប្រយ័ត្នចំពោះកូនចៅ៕SRP

ខេត្តសៀមរាប៖លោកប្រាក់ សោភ័ណ អភិបាលខេត្តសៀមរាប បានចេញសេចក្ដីសម្រេចបង្កើត ក្រុមលេខាធិការដ្ឋានសណ្ដាប់ធ្នាប់ ដែលជាសេនាធិការសំរាប់ចុះ រៀបចំ អនុវត្តគោលការណ៍ សណ្ដាប់ធ្នាប់។

តាមសេចក្ដីសម្រេចបានបង្ហាញថា៖ ១.ត្រូវរៀបចំសណ្ដាប់ធ្នាប់ នឹងរបៀបរៀបរយសាធារណៈ ក្នុងក្រុងសៀមរាប ខេត្តសៀមរាប គឺត្រូវធ្វើយ៉ាងណា ឲ្យក្រុងសៀមរាបមានសណ្ដាប់ធ្នាប់ របៀបរៀបរយសាធារណៈ ដើម្បីធានាឲ្យបាននូវនិរន្តរភាពវិស័យទេសចរណ៍ មានគុណភាព និងភាពទាក់ទាញ នៅក្នុងតំបន់ ផ្សារភ្ជាប់ជាមួយការអភិវឌ្ឍ និងលើកកម្ពស់សេដ្ឋកិច្ចមូលដ្ឋានរបស់ប្រជាពលរដ្ឋ ស្របតាមគោលបំណងនៃ (ផែនការមេអភិវឌ្ឍទេសចរណ៍ខេត្តសៀមរាប ២០២១-២០៣៥ ,យុទ្ធនាការសៀមរាបផ្ទះខ្ញុំ និងផែនទីចង្អុលផ្លូវទីក្រុងឆ្លាតវៃនៃខេត្តសៀមរាប)។

២.រៀបចំការដាក់តាំងលក់ដូរដែលគ្មានសណ្ដាប់ធ្នាប់ អោយមានរបៀបរៀបរយតាមការចង្អុលបង្ហាញរបស់គណៈកម្មាធិកា ឬលេខាធិការដ្ឋានទៅលើទីតាំងមួយចំនួន។

៣.រៀបចំណែនាំម្ចាស់លំនៅដ្ឋាន ផ្សារឲ្យរៀបចំអនាម័យ បរិស្ថាន និងសណ្ដាប់ធ្នាប់ឲ្យល្អប្រសើរ ណែនាំឲ្យចូលរួមសម្អាតបរិវេណ និងទីធ្លាមុខទីតាំងរបស់ខ្លួនជាប្រចាំ ករណីមិនអនុវត្តតាមការណែនាំក្រុមការងារអាចអនុវត្តវិធានរដ្ឋបាល។

៤.ការលក់ដូរនៅលើចំណីផ្លូវសាធារណៈត្រូវបានហាម លើកលែងទីតាំងមួយចំនួនដែលក្រុមការងារត្រួតពិនិត្យនឹងធ្វើការរៀបចំអនុញ្ញាតហើយត្រូវតែចុះឈ្មោះស្ដាប់ការណែនាំរបស់ក្រុមការងារ ងាយស្រួលក្រុមការងារធ្វើការគ្រប់គ្រង។

៥.ត្រូវរៀបចំចំណតសំរាប់យានយន្ដ និងម៉ូតូនៅតាមតំបន់មួយចំនួនចៀសវាងការចតគ្មានសណ្ដាប់ធ្នាប់ នៅតាមផ្សារ ឬកន្លែងកំសាន្តមួយចំនួន។

គណៈកម្មាធិការ និងលេខាធិការដ្ឋានសណ្ដាប់ធ្នាប់ក្រុងសៀមរាប សូមអំពាវនាវជូនប្រជាពលរដ្ឋ និងសាធារណជន ឲ្យមានការចូលរួមស្ដាប់ការណែនាំរបស់ក្រុមការងារ ដែលចុះទៅអនុវត្ត ដើម្បីឲ្យក្រុងសៀមរាបយើងទទួលបានសណ្ដាប់ធ្នាប់ល្អ របៀបរៀបរយសាធារណៈ បរិស្ថាន អនាម័យល្អ និងជាពិសេសឲ្យសាកសមជាខេត្តទេសចរណ៍បេតិកភណ្ឌ វប្បធ៌ម ប្រវត្តិសាស្រ្ត និងកាន់តែទាក់ទាញភ្ញៀវទេសចរ វិនិយោគិនឲ្យមកបណ្តាក់ទុន និងពន្យាពេលស្នាក់ក្នុងក្រុងសៀមរាប យើងដែលនាំមកនូវកំណើនសេដ្ឋកិច្ច និងជីវភាពប្រជាពលរដ្ឋក្នុងក្រុងសៀមរាប ខេត្តសៀមរាបទាំងមូល៕SRP

ខេត្តសៀមរាប៖សាលាដំបូងខេត្តសៀមរាបបានសម្រេចចោទប្រកាន់ ទៅលើជនសង្ស័យ ជាក្មេងទំនើងចំនួន 10 នាក់ ករណីហិង្សាដោយ ចេតនាមានស្ថានទម្ងន់ ប្រព្រឹត្តនៅចំណុចការ៉ាស់សាំងស៊ូគីម៉ិច។

សាលាដំបូងខេត្តសៀមរាប នៅថ្ងៃទី 2 ខែសីហាឆ្នាំ 2024 ម្សិលមិញ បានចេញសេចក្ដីប្រកាសព័ត៌មាន ស្តីពី ចំណាត់ការលើសំណុំរឿងពាក់ព័ន្ធនឹងករណីក្រុមក្មេងទំនើងចំនួន ០៦នាក់ និងបក្ខពួក។

អ្នកនាំពាក្យអយ្យការអមសាលាដំបូងខេត្តសៀមរាប មានកិត្តិយសសូមជម្រាបជូនសាធារណជន ឲ្យបានជ្រាបថា៖ នៅថ្ងៃទី០១ ខែសីហា ឆ្នាំ២០២៤ អយ្យការអមសាលាដំបូងខេត្តសៀមរាប បានចាត់ការ លើសំណុំរឿងព្រហ្មទណ្ឌលេខ ១០៥៦ ចុះថ្ងៃទី០១ ខែសីហា ឆ្នាំ២០២៤ ទាក់ទងនឹងក្រុមក្មេងទំនើង ចំនួន ២ក្រុម ដោយក្រុមទី១ មានគ្នាចំនួន ៣នាក់ និងក្រុមទី២ មានគ្នាចំនួន ៧នាក់ សមត្ថកិច្ចបានឃាត់ ខ្លួនជនសង្ស័យសរុបចំនួន៦នាក់ និងបក្ខពួក៤នាក់ផ្សេងទៀត បានរត់គេចខ្លួន បានវាយគ្នាទៅវិញទៅមក មានគ្នាច្រើន បណ្តាលឱ្យរងរបួសចំនួន ២នាក់ បែកក្បាលដេរចំនួន ៥ផ្ទេរ និងបែកមាត់ចេញឈាម។

ក្រោយពីបានសួរចម្លើយជនសង្ស័យ និងពិនិត្យភស្តុតាងនានាក្នុងសំណុំរឿង តំណាងអយ្យការ បានសម្រេចធ្វើការចោទប្រកាន់លើជនសង្ស័យចំនួន ៦នាក់ និងបក្ខពួក៤នាក់ទៀត ពីបទ ហិង្សាដោយ ចេតនាមានស្ថានទម្ងន់ (វាយគ្នាទៅវិញទៅមកមានគ្នាច្រើន) ប្រព្រឹត្តនៅចំណុចការ៉ាស់សាំងស៊ូគីម៉ិច (ស្តុបឡាបប៉េ) ភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីថ្ងៃទី៣១ ខែកក្កដា ឆ្នាំ២០២៤ បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមបញ្ញត្តិមាត្រា ២១៨ នៃក្រមព្រហ្មទណ្ឌ តាមដីកាសន្និដ្ឋានបញ្ជូនរឿងឲ្យស៊ើបសួរលេខ ១៦៤៤ អយង ចុះថ្ងៃទី០២ ខែសីហា ឆ្នាំ២០២៤ បញ្ជូន ទៅចៅក្រមស៊ើបសួរនៃសាលាដំបូងខេត្តសៀមរាប ដើម្បីចាត់ការបន្តតាមនីតិវិធីច្បាប់៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានណែនាំឱ្យ រដ្ឋបាល ក្រុង ស្រុកត្រូវខិតខំបន្តការរុះរើស្លាកយីហោ ផ្សព្វផ្យាយស្រាបៀគ្រប់ប្រភេទ និងរៀបចំសណ្តាប់ធ្នាប់ ការលក់ដូរ តាមដងផ្លូវដែលបំពានលើ ចិញ្ចើមផ្លូវ និងផ្លូវថ្មើរជើង ជាដើម។

ដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបង នៅថ្ងៃព្រហស្បតិ៍ ទី១ ខែសីហា ឆ្នាំ២០២៤ នេះ លោកសុខ លូ ប្រធានគណៈបញ្ជាការឯកភាពរដ្ឋបាលខេត្តបាត់ដំបង ក៏បានជំរុញបន្ថែមទៀតឱ្យបន្តពង្រឹងវិធានការ បង្ការទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបញ្ហាល្បែងស៊ីសង ក្មេងទំនើង ការជួញដូរមនុស្ស ឱ្យកាន់តែខ្លាំងក្លាថែមទៀត ដោយយកចិត្តទុកដាក់ទប់ស្កាត់ និងបង្ក្រាបឱ្យមាន ប្រសិទ្ធភាព ក្នុងសកម្មភាពជួញដូរពលករឆ្លងដែន និងចំណាកស្រុកខុសច្បាប់។ បង្កើនការបង្ក្រាបបទល្មើសគ្រប់ប្រភេទ ដោយបង្កើនការដាក់កម្លាំងតាមគោលដៅ និងបង្កើនកម្លាំងល្បាត ដើម្បីធានាសន្តិសុខសុវត្ថិភាពជូនប្រជាពលរដ្ឋ។ បន្តពង្រឹងការអនុវត្តគោលនយោបាយភូមិ ឃុំ សង្កាត់មានសុវត្ថិភាព ការងារផ្សព្វផ្សាយវេទិកាសាធារណៈ និងចលនាប្រជាការពារឱ្យកាន់តែសកម្មផុលផុស។

អភិបាលខេត្តបាត់ដំបង ក៏បានធ្វើការជំរុញឱ្យរដ្ឋបាលក្រុង ស្រុក ឃុំ សង្កាត់នៃខេត្តបាត់ដំបង ត្រូវរួមសហការគ្នា ជាមួយសមត្ថកិច្ចពាក់ព័ន្ធ បន្តសកម្មភាពចុះអប់រំផ្សព្វផ្សាយ ពីអំពីបញ្ហានៃគ្រោះថ្នាក់ចរាចរណ៍ និងផលប៉ះពាល់ នៃការប្រើប្រាស់គ្រឿងញៀន ឱ្យដល់ប្រជាជនគ្រប់ស្រទាប់វណ្ណៈ នៅតាមសហគមន៍នានា ដើម្បីឱ្យពួកគាត់មានការយល់ដឹងកាន់តែស៊ីជម្រៅ អំពីផលប៉ះពាល់នៃគ្រឿងញៀន ក្នុងគោលដៅ ដើម្បីឈានទៅបញ្ឈប់ការប្រើប្រាស់គ្រឿងញៀន ក្នុងនោះត្រូវតាមដានស្វែងរកមេក្លោងជួញដូរ ចែកចាយគ្រឿងញៀន ដើម្បីយកមកផ្តន្ទាទោសទៅតាមផ្លូវច្បាប់។

នៅឯសាលប្រជុំអគារE សាលាខេត្តបាត់ដំបង ដោយ
ការអញ្ជើញចូលរួមពីលោកអភិបាលរងខេត្ត លោកនាយករដ្ឋបាលសាលាខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត លោក លោកស្រីអភិបាល អភិបាលរងក្រុងស្រុក ព្រមទាំងអ្នកពាក់ព័ន្ធមួយចំនួនទៀត លោកសុខ លូ បានធ្វើការក្រើនរម្លឹកដល់រដ្ឋបាលក្រុង ស្រុក និងកម្លាំងសមត្ថកិច្ចពាក់ព័ន្ធ ត្រូវបន្តការបង្រ្កាប និងផ្សព្វផ្សាយពីផលប៉ះពាល់នៃគ្រឿងញៀនដល់ប្រជាពលរដ្ឋគ្រប់ទីកន្លែង នៅតាមសហគមន៍ក្នុងខេត្ត ដើម្បីទប់ស្កាត់ការប្រើប្រាស់ និងជួញដូរគ្រឿងញៀន ខណៈការជួញដូរ ចែកចាយ រក្សាទុក និងការប្រើប្រាស់គ្រឿងញៀននៅតែជាបញ្ហាប្រឈម ដែលត្រូវប្រយុទ្ធប្រឆាំងឱ្យបានម៉ឺងម៉ាត់បំផុត ស្របតាមបទបញ្ជាដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាពេលថ្មីៗនេះ បានបញ្ជាឱ្យត្រួតពិនិត្យ និងបោសសំអាត​គ្រឿងញៀន​តាម​ខារ៉ា​អូខេ ក្លឹបរាត្រី ដោយទុកពេលឱ្យ១សប្ដាហ៍ក្នុងការអនុវត្ត៕SRP

ភ្នំពេញ៖ចំពោះការខកខានមិនទាន់ពេលកំណត់ខាងលើ ម្ចាស់អចលនទ្រព្យនឹងត្រូវរងនូវទណ្ឌកម្មរដ្ឋបាល តាមច្បាប់ស្តីពីសារពើពន្ធជាធរមាន។

នេះបើតាមអគ្គនាយកដ្ឋានពន្ធដារ បានចេញសេចក្តីជូនដំណឹង ស្តីពីការរំលឹកការបង់ពន្ធអចលនទ្រព្យ សម្រាប់ឆ្នាំ២០២៤ ដែលនឹងបិទបញ្ចប់នៅថ្ងៃទី៣០ ខែកញ្ញា ឆ្នាំ២០២៤ ខាងមុខនេះ៕SRP

មន្ត្រីមួយរូបនិងបក្សពួកត្រូវបានអង្គភាពប្រឆាំងអំពើពុករលួយ ចាប់ខ្លួន ករណីឈូសឆាយ ដីតំបន់ហាមឃាត់។

យោងសេចក្ដីប្រកាសព័ត៌មាន របស់អយ្យការអមសាលាដំបូងខេត្តកំពង់ធំ បានឲ្យដឹងថា កាលពីថ្ងៃទី២៨ កក្ដដា ឆ្នាំ២០២៤ តំណាងអយ្យការ បានទទួលចាត់ការសំណុំរឿង ព្រហ្មលេខ ៧៥១ ចុះថ្ងៃទី២៨ ខែកក្ដដា ២០២៤ ទាក់ទិននឹងករណី បំផ្លាញដោយចេតនា និងគៃបំបាត់ដោយទុច្ចរិត (ដីព្រៃលិចទឹក) ដែលអង្គភាពប្រឆាំងអំពើពុករលួយបញ្ជូនមក។ ក្រោយពីស្ដាប់ចម្លើយរបស់ជនសង្ស័យ និងពិនិត្យភស្តុតាង ព្រមទាំងឯកសារពាក់ព័ន្ធ ក្នុងសំណុំរឿងរួចមក តំណាងអយ្យការបានសម្រេចចោទប្រកាន់លើបុគ្គលពីររូប គឺទី១ ឈ្មោះ ហេ គឿន ភេទប្រុស អាយុ៥៨ឆ្នាំ តួនាទី ជាប្រធានការិយាល័យសេដ្ឋកិច្ច និងអភិវឌ្ឍន៍ ក្រុងស្ទឹងសែន ពីបទ បំផ្លាញដោយចេតនា និងគៃបំបាត់ដោយទុច្ចរិត និងទី២ ឈ្មោះ សែ សុងហេង ភេទប្រុស អាយុ៥៨ឆ្នាំ ទីលំនៅភូមិម្នាវ សង្កាត់ស្រយ៉ូវ ពីបទ សមគំនិតក្នុងអំពើបំផ្លាញដោយចេតនា និងគៃបំបាត់ដោយទុច្ចរិត ប្រព្រឹត្តទៅនៅចំណុចដីតំបន់ស្នងម៉ែន ជាតំបន់ហាមឃាត់ ក្នុងភូមិសាស្ត្រភូមិស្រយ៉ូវត្បូង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ កាលពីថ្ងៃទី២០ ខែមិនា ២០២៣ តាមមាត្រា២៩ និងមាត្រា៦០១ នៃក្រមព្រហ្មទណ្ឌឆ្នាំ២០០៩ និងមាត្រា៣២ នៃច្បាប់ស្ដីពីការប្រឆាំងអំពើរពុករលួយឆ្នាំ២០១០។

ករណីឈានដល់ការចាប់ខ្លួនបុគ្គលពីររូបនេះ ព័ត៌មានគួរឲ្យទុកចិត្តបានបញ្ជាក់ថា ឈ្មោះសែ សុងហេង គឺជាជនដៃដល់ម្នាក់ ក្នុងចំណោមច្រើននាក់ដែលបានចូលកាន់កាប់ ឈួសឆាយដីព្រៃលិចទឹក ចាប់ពីចំណុចទួលគោកព្រះ ព្រំប្រទល់ខេត្តកំពង់ឆ្នាំង កំពង់ធំ តំបន់ស្នងមែន រហូតដល់តំបន់ក្រពើគោះ និងចំណុចខាងត្បូងអាងស្នែងក្របី។ ប្រភពព័ត៌មានបានបង្ហើបថា ឈ្មោះ សែ សុងហេង គឺជាអ្នករៀបដីឲ្យបុគ្គលអ្នកមានលុយ និងមានអំណាចមួយចំនួន។

ការឃាត់ខ្លួនមនុស្សពីរនាក់ នេះ មហាជនក្នុងខេត្តកំពង់ធំ កំពុងរងចាំមើល ជោគវាសនារបស់បុគ្គល ដៃដល់មួយចំនួនទៀតដែលកំពុងសំងំលាក់ខ្លួន។ ដោយហេតុថា បញ្ហាឈួសឆាយហែករានទន្ទ្រានដីតំបន់បីក្នុងខេត្តកំពង់ធំ គឺចំណុចក្ដៅគគុក ដែលអូសបន្លាយពេលច្រើនឆ្នាំមកហើយ ហើយពុំទាន់មានស្ថាបប័នណាបំបែកសំណុំបានឡើយ បើទោះប្រមុខរដ្ឋាភិបាល ប្រកាសច្រើនលើកច្រើនសារក៏ដោយ។

សូមរំលឹកផងដែរថា កន្លងមក សម្ដេចហ៊ុន ម៉ាណែត បានដាក់បទបញ្ជារឲ្យរដ្ឋបាលខេត្ត ទាំង6ជុំវិញបឹងទន្លេសាប ការពារដីតំបន់បីឲ្យបានជាដាច់ខាត ហើយជាក់ស្ដែងកាលពីពេលថ្មីៗ កន្លងទៅនេះ លោក នួន ផារ័ត្ន អភិបាលខេត្តកំពង់ធំ គឺបានប្រកាសហាមឃាត់ មិនឲ្យមានការរុករានទន្ទ្រានដីតំបន់ហាមឃាត់យកធ្វើកម្មសិទ្ធនោះទេ៕SRP

ខេត្តកំពង់ឆ្នាំង៖ល្បែងស៊ីសងប្រភេទអនឡាញ បានកំពុងកើតមានយ៉ាងពេញបន្ទុកនៅក្រុងកំពង់ឆ្នាំងខណៈសមត្ថកិច្ចរក្សាភាពស្ងប់ស្ងាត់។

សេចក្ដីរាយការណ៍បានឲ្យដឹងថា នៅភូមិទី៧សង្កាត់ខ្សាម ក្រុងកំពង់ឆ្នាំង មានល្បែងជល់មាន់តាមអនឡាញ មិនទាន់ត្រូវបានអាជ្ញាធរសមត្ថកិច្ចធ្វើការទប់ស្កាត់បង្ក្រាបនៅឡើយ បើទោះបីជាប្រមុខរដ្ឋាភិបាលដាក់បទបញ្ជាឲ្យទប់ស្កាត់យ៉ាងណាក៏ដោយ។

ជុំវិញល្បែងស៊ីសងនេះ លោក អៀរ ប៊ុនធឿន ស្នងការរងនិងជាអ្នកនាំពាក្យស្នងការខេត្តកំពង់ឆ្នាំង បានបញ្ជាក់យ៉ាងខ្លី តាមប្រព័ន្ធតេឡេក្រាមថា ល្បែងស៊ីសងនេះ គឺមិនមានច្បាប់អនុញ្ញាតិនោះទេ៕SRP

ភ្នំពេញ៖លោក ព្រុំ ចាន់នី អគ្គនាយករងពន្ធនាគារដាក់ពន្ធនាគារ ត្រូវបានចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី២៩ ខែកក្កដា ឆ្នាំ២០២៤ នេះ បានចេញដីកាសម្រេចឃុំខ្លួន ក្រោយអង្គភាព ប្រឆាំងអំពើពុករលួយ (ACU) ចាប់ខ្លួនពីបទពុករលួយ ស៊ីសំណូក និងប្រកាសទ្រព្យសម្បត្តិមិនត្រឹមត្រូវ។

អ្នកនាំពាក្យសាលាដំបូងរាជធានីភ្នំពេញ លោក អ៊ី រិន បានប្រាប់បណ្តាញសារព័ត៌មានថា «ជនជាប់ចោទឈ្មោះ ព្រុំ ចាន់នី ត្រូវបានចៅក្រមស៊ើបសួរសម្រេចឃុំខ្លួន នៅមណ្ឌលអប់រំកែប្រែទី១ ជាប់ចោទពីបទ សមគំនិតក្នុងអំពើស៉ីសំណូក, រំលោភអំណាច និងបទ ប្រកាសមិនត្រឹមត្រូវនូវទ្រព្យសម្បត្តិ និងបំណុល»។ ជនជាប់ចោទ ព្រុំ ចាន់នី ត្រូវបានសមត្ថកិច្ចនាំខ្លួនទៅឃុំនៅពន្ធនាគារម១ នៅថ្ងៃចន្ទនេះ៕SRP

ខេត្តសៀមរាប៖មន្ត្រីជាន់ខ្ពស់នៃក្រសួងមហាផ្ទៃ បានថ្លែងណែនាំប្រាប់អាជ្ញាធរសមត្ថកិច្ចក្នុងខេត្តសៀមរាបឲ្យបន្តពង្រឹងបន្ថែមទៀតអំពីគោលនយោបាយភូមិ ឃុំ សង្កាត់ មានសុវត្ថិភាព។

នៅមុខមន្ត្រីសមត្ថកិច្ច ចំនួន ៣២០នាក់ លោក សួស អង្គារ៍ រដ្ឋលេខាធិការនៃក្រសួងមហាផ្ទៃ និងជាប្រធានក្រុមការងារទី៩​ បានថ្លែងយ៉ាងដូច្នេះថា –ត្រូវបន្តកិច្ចសហការអនុវត្តវិធានការច្បាប់ឱ្យបានតឹងរឹងម៉ឺងម៉ាត់បន្ថែមទៀត
-បន្តតាមដាន ក្ដាប់មុខសញ្ញា គ្រប់គ្រងសភាពការណ៍និងចាត់ប្រធានការបង្ក្រាបទប់ស្កាត់បទល្មើសនានាក្នុងគោលដៅរក្សាឲ្យបាននូវសន្តិសុខ សុវត្ថិភាពសណ្តាប់ធ្នាប់របៀបរៀបរយសាធារណ: និងស្ថេរភាពសន្តិភាពក្នុងខេត្តសៀមរាប ប្រកបដោយប្រសិទ្ធភាព មិនទាន់ពេលវេលា
-ត្រូវយកចិត្តទុកដាក់ស្រាវជ្រាវ និងបង្ការមុខសញ្ញាសង្ស័យ ការលួចលាក់ ប្រើប្រាស់ និងកែច្នៃអាវុធជាតិផ្ទុះ ការញុះញង់ប្រមូលផ្ដុំកម្លាំងចលនាដែលអាចជាបង្កអំពើអសន្តិសុខក្នុងខេត្តសៀមរាប
-ត្រូវបន្ត និងពង្រឹងផ្សព្វផ្សាយអំពីគោលនយោបាយ “ភូមិ-ឃុំ-សង្កាត់មានសុវត្ថិភាព” ឱ្យបានទូលំទូលាយ
-ស្នងការដ្ឋាននគរបាលខេត្ត និងមន្ទីរ អង្គភាពពាក់ព័ន្ធ ត្រូវពង្រឹងវិធានការអនុវត្ត និងផ្សព្វផ្សាយច្បាប់ស្តីពីចរាចរណ៍ផ្លូវគោក បង្ការ ការទប់ស្កាត់បទល្មើស បញ្ហាគ្រោះថ្នាក់គ្រឿងញៀន ក្មេងទំនើង នៅមូលដ្ឋាន និងសាលារៀនជាប្រចា
-ស្ដាប់ និងទទួលយកសំណើរសំណូមពរ បញ្ហាប្រឈមរបស់ប្រជាពលរដ្ឋ និងដាក់ពិធានការជួយដោះស្រាយឲ្យចំដៅ ទាន់ពេលវេលា និងមានប្រសិទ្ធភាព។

រដ្ឋលេខាធិការក្រសួងមហាផ្ទៃរូបនេះ ក៏បានជំរុញដល់គណៈបញ្ជការឯកភាពរដ្ឋបាលក្រុង ស្រុក ឃុំ សង្កាត់
-ត្រូវពិនិត្យរៀបចំធ្វើបច្ចុប្បន្នភាព សមាជិកភាព ពង្រឹងការអនុវត្តនូវតួនាទីប្រចាំថ្ងៃ និងគណៈបញ្ជាការ ឯកភាពក្នុងការអនុវត្ត គោលនយោបាយភូមិ-ឃុំ-សង្កាត់មានសុវត្ថិភាព” ឱ្យកាន់តែមានប្រសិទ្ធភាព
-ត្រូវរៀបចំផែនការការពារ និងពិនិត្យបញ្ហាប្រឈមរបស់ខ្លួន និងតម្រូវការប្រជាពលរដ្ឋ នៅមូលដ្ឋាន ដើម្បីដាក់ចេញនូវវិធានការ នៅវត្តសមស្រប និងទាន់ពេលវេលា ក្នុងគោលបំណងរក្សា ឱ្យបាននូវសន្តិសុខ និងសណ្ដាប់ធ្នាប់ ក្នុងគោលដៅមូលដ្ឋានរបស់ខ្លួន
-ត្រូវណែនាំដល់ប្រជាការពារ ឱ្យយល់ដឹងអំពីច្បាប់និងតួនាទីភារកិច្ចក្នុងការអនុវត្តការងារ របស់ខ្លួន ស្របតាមសេចក្តីណែនាំលេខ០៣៧​ ស្ដីពីការពង្រឹងចលនាប្រជាការពារ របស់ក្រសួងមហាផ្ទៃ
-ត្រូវអនុវត្តឱ្យបានម៉ឺងម៉ាត់ស្របតាមសេចក្តីណែនាំលេខ ០១៣ សណន ចុះថ្ងៃទី០៦ ខែតុលាឆ្នាំ២០១៧ ស្ដីពីការចាប់អនុវត្តការងារនគរបាលនិងសហគមន៍។

លោកថ្លែងបែបនេះ ក្នុងកិច្ចប្រជុំបូកសរុបរបាយការណ៍ ឆមាសទី១ ការអនុវត្តគោលនយោបាយភូមិ​ ឃុំ​ សង្កាត់មានសុវត្ថិភាព ឆ្នាំ២០២៤ ក្នុងខេត្តសៀមរាប នាថ្ងៃទី២៧​ ខែកក្កដា​ ឆ្នាំ២០២៤​ នៅសាលប្រជុំធំសាលាខេត្តសៀមរាប ដោយមានការចូលរួម ពីសំណាក់ លោកប្រាក់ សោភ័ណ អភិបាលខេត្តនិងជាប្រធានគណៈបញ្ជាការឯកភាពរដ្ឋបាលខេត្ត ដោយមានការអញ្ជើញចូលរួមពីឯកឧត្តម រាជអាជ្ញាអមសាលាដំបូងខេត្តឯកឧត្តមប្រធានសាលាដំបូងខេត្ត ស្នងការដ្ឋាននគរបាលខេត្តបញ្ជាការដ្ឋានកងរាជអាវុធហត្ថខេត្ត តំបន់ប្រតិបត្តិការសិស្សរងសៀមរាប មន្ទីរអង្គភាពជុំវិញខេត្ត រដ្ឋបាលក្រុងស្រុក មេឃុំចៅសង្កាត់ ប៉ុស្តិ៍រដ្ឋបាលនគរបាលឃុំសង្កាត់ផងដែរ៕SRP