ខេត្តសៀមរាប៖ម្ចាស់រថយន្តដឹកដីក្រហមនិងថ្មចំនួន៨នាក់ បានព្រួតគ្នាប្តឹងម្ចាស់ក្រុមហ៊ុនម៉ៅការធ្វើផ្លូវឈ្មោះឆុន វាសនា ទៅតុលាការពីបទឆបោក រឿងជំពាក់លុយជាង១៤០០ដុល្លារមិនព្រមសង ព្រមទាំងទារសំណងជម្ងឺចិត្ត៥០០០ដុល្លារ។

ជនរងគ្រោះក្នុងអំពើឆបោក មានឈ្មោះទី១.គិត សុធា ភេទប្រុសអាយុ៣៣ឆ្នាំ.ទី២ឈ្មោះអ៉ឹម សំអាត ភេទប្រុសអាយុ៣៨ឆ្នាំ.ទី៣ឈ្មោះកាយ វណ្ណសរី ភេទ ប្រុសអាយុ៤៣ឆ្នាំ.ទី៤ឈ្មោះដែម ចាន់ឌីម ភេទប្រុសអាយុ២៥ឆ្នាំ.ទី៥ឈ្មោះស៊ឹម គីមអាន ភេទប្រុសអាយុ ៣៧ឆ្នាំ.ទី៦ឈ្មោះឡេង ធារិត ភេទប្រុសអាយុ៤៣ឆ្នាំ. ទី៧ឈ្មោះយុន យ៉ុន ភេទប្រុសអាយុ៤៥ឆ្នាំ.និងទី៨ ឈ្មោះម៉ី ថា ភេទប្រុសអាយុ៤៧ឆ្នាំ។ អ្នកទាំង៨នាក់ខាងលើត្រូវបានអះអាងថា សុទ្ធសឹងជានជនរងគ្រោះក្នុងអំឆបោកដោយឈ្មោះឆុន វាសនា តាមរយ:ដឹកដីនិងថ្មយកទៅចាក់ធ្វើផ្លូវចំនួន៣ខ្សែក្នុងស្រុកពួកនិងស្រុកអង្គរជុំហើយមិនទទួលបានប្រាក់ឈ្នួល។

យោងតាមពាក្យបណ្តឹងចុះថ្ងៃទី៩ ខែមីនា ឆ្នាំ២០២២ ដែលបានផ្តិតមេដៃដោយជនរងគ្រោះ៨នាក់ និងបានចុះលេខទទួលដោយស្ថាប័នតុលាការខេត្តសៀមរាប មានខ្លឹមសារថា សុំប្តឹងឈ្មោះឆុន វាសនា ភេទ ប្រុសទីលំនៅភូមិតាភុល សង្កាត់ស្វាយដង្គំុ ក្រុងសៀមរាប ពីបទឆបោក ប្រព្រឹត្តនៅខេត្តសៀមរាប កាលពីអំឡុងឆ្នាំ២០២១។

ក្នុងបណ្តឹងបង្ហាញថា អំឡុងឆ្នាំ២០២០ ឈ្មោះឆុន វាសនា បានជួលរថយន្តរបស់ពួកគាត់អោយដឹកថ្មនិងដីក្រហមយកទៅចាក់នៅការដ្ឋានធ្វើផ្លូវរបស់ខ្លួនចំនួន ៣ដែលមាន.SR-5 និងSR-6 ក្នុងស្រុកអង្គរជុំ និងការ ដ្ឋានក្រោយផ្សារពួក ក្នុងស្រុកពួកនៃខេត្តសៀមរាប។ ក្នុងការដឹកជញ្ជូនដំបូង ឈ្មោះឆុន វាសនា បានទូទាត់ ប្រាក់អោយតាមការព្រមព្រាង។ លុះចាប់ពីថ្ងៃទី១០ខែកុម្ភ:ឆ្នាំ២០២១ រហូតមកដល់បច្ចុប្បន្ន លុយថ្លៃឈ្នួល ១៤.០០៨.៤៩$ ឈ្មោះឆុន វាសនា មិនព្រមសង ដោយសន្យាខ្យល់ម្តងហើយម្តងទៀត បើទោះបីពួក គាត់ព្យាយាមទំនាក់ទំនង តែជនឆបោកព្យាយាមគេច វេសមិនព្រមសង ទើបពួកគាត់សម្រេចដាក់ពាក្យបណ្តឹងបែបនេះ។

ក្នុងពាក្យបណ្តឹងដែលចោទប្រកាន់ទៅលើឈ្មោះឆុន វាសនា ពីបទឆបោក លើទឹកប្រាក់ជាង១៤០០០$ ពួកគាត់(ជនរងគ្រោះ)ក៍បានទារសំណងជម្ងឺចិត្តចំនួន ៥០០០$ និងទទូចសុំអោយស្ថាប័នតុលាការខេត្តសៀមរាប ចាត់ការជនខាងលើតាមផ្លូវច្បាប់ផងដែរ។ដោយពួកគាត់រំពឹងថា តុលាការខេត្តសៀមរាប នឹងជួយផ្តល់យុត្តិធម៌ដល់ពួកគាត់ ជាជនរងគ្រោះក្នុងពេលដ៏ខ្លីខាងមុខនេះ ត្បិតករណីនេះមានរយ:ពេលយូមកហើយ។

ជុំវិញការចោទប្រកាន់បែបនេះ សៀមរាបប៉ុស្តិ៍
មិនអាចស្វែងរកជួប លោកឆុន វាសនា ដែលជាម្ខាស់ក្រុម ហ៊ុនម៉ៅការធ្វើផ្លូវទាំង៣ខ្សែខាងលើ ដើម្បីសុំការបក ស្រាយបានទេ៕SRP

ខេត្តបាត់ដំបង៖លោកសុខ លូ បានមានប្រសាសន៍លើកឡើងថា រដ្ឋបាលខេត្តបាត់ដំបងសង្ឃឹមថា រដ្ឋាភិបាលជប៉ុន នឹងបន្តជួយគម្រោងនេះឲ្យចេញជាសមិទ្ធផលជាក់ស្ដែង ហើយរដ្ឋបាលខេត្តបាត់ដំបង នឹងបន្តចូលរួមសហការជាមួយរដ្ឋាភិបាលជប៉ុនជានិច្ច ក្នុងន័យដើម្បីចូលរួមអភិវឌ្ឍន៍ខេត្តបាត់ដំបង ឲ្យក្លាយជាទីក្រុងឆ្លាត ដើម្បីទាក់ទាញវិនិយោគិនក្នុងស្រុក និងក្រៅស្រុកមកវិនិយោគកាន់តែច្រើនឡើង និងជាពិសេសដើម្បីឲ្យភ្ញៀវទេសចរមកទស្សនាខេត្តបាត់ដំបង កាន់តែច្រើនឡើងៗ។

លោកបានបន្តទៀតថា ទន្ទឹមនឹងនេះ រដ្ឋបាលខេត្តបាត់ដំបង ស្នើសុំដល់រដ្ឋាភិបាលជប៉ុន បន្តផ្សព្វផ្សាយដល់វិនិយោគិន ក្នុងប្រទេសជប៉ុនឲ្យមកវិនិយោគ ក្នុងខេត្តបាត់ដំបងឲ្យកាន់តែច្រើនឡើង ឬបង្កើតជាតំបន់សេដ្ឋកិច្ចពិសេសក្នុងខេត្តមួយ ព្រោះខេត្តបាត់ដំបង មានផ្ទៃដីធំទូលាយ ដែលបង្កលក្ខណៈងាយស្រួលក្នុងការបង្កើតតំបន់សេដ្ឋកិច្ចពិសេស ដែលអាចបង្កើតជារោងចក្រផ្សេងៗ ពិសេសរោងចក្រកែច្នៃផលិតផលកសិកម្ម ព្រោះខេត្តបាត់ដំបងជាខេត្តកសិកម្ម ហើយផលិតផលកសិកម្មជាច្រើនមិនទាន់មានរោងចក្រកែច្នៃ វេចខ្ចប់បានល្អច្រើននោះទេ។

លោកសុខ លូ មានប្រសាសន៍យ៉ាងដូច្នេះ ក្នុងកិច្ចប្រជុំគណៈកម្មាធិការចម្រុះលើកទី៣ (JCC) សម្រាប់គម្រោងការសិក្សាផែនការមេ ការអភិវឌ្ឍទីក្រុងឆ្លាតក្នុងខេត្តបាត់ដំបង នៅថ្ងៃសុក្រនេះតាមរយៈប្រព័ន្ធបញ្ជូនរូប និងសម្លេង Zoom ។

លោកបានបន្តទៀតថា បច្ចុប្បន្ននេះរដ្ឋបាលខេត្តកំពុងតែខិតខំប្រឹងប្រែង ក្នុងការរៀបចំសណ្ដាប់ធ្នាប់ក្នុងក្រុង បរិស្ថាន អនាម័យសាធារណៈ ដោយក្នុងនោះ ខេត្តបាត់ដំបងមានអាងសំរាម ដែលមានលក្ខណៈស្ដង់ដា នៅឃុំតាគ្រាម នៃស្រុកបាណន់ រៀបចំប្រព័ន្ធលូទឹកកខ្វក់ និងប្រព័ន្ធលូទឹកភ្លៀងដាច់ដោយឡែកពីគ្នា និងបង្កើតអាងប្រព្រឹត្តកម្មទឹកកខ្វក់ ឱ្យបានសមស្រប ដើម្បីប្រមូលនិងធ្វើប្រព្រឹត្តកម្ម សម្អាតទឹកកខ្វក់ មុននឹងបង្ហូរចូលទៅក្នុងប្រភពទឹកធម្មជាតិ និងធ្វើការរៀបចំសណ្ដាប់ធ្នាប់ ក្នុងក្រុង ការទប់ស្កាត់ការរំលោភយកដីចំណីផ្លូវរបស់រដ្ឋ ការរៀបចំសណ្ដាប់ធ្នាប់ជុំវិញផ្សារក្នុងក្រុងជាដើម៕SRP

ភ្នំពេញ៖សម្តេចតេជោហ៊ុន សែន បានមានប្រសាសន៍ទៀតថា គិតត្រឹមថ្ងៃទី១៥ ខែមីនា ឆ្នាំ២០២២ កម្ពុជាគឺជាប្រទេសមួយដែលទទួលបានជោគជ័យក្នុងយុទ្ធនាការ ជាតិចាក់វ៉ាក់សាំង ដោយសម្រេចបានអត្រាចាក់វ៉ាក់សាំងប្រមាណ ៩២,២៧% នៃប្រជាជនសរុប ប្រមាណ ១៦ លាននាក់ ។ ហេតុនេះហើយទើបកម្ពុជាបានអនុញ្ញាតឱ្យបើកប្រទេសឡើងវិញ និងរក្សាកិច្ចដំណើរការ នៃសកម្មភាពសង្គម-សេដ្ឋកិច្ចពេញលេញលើគ្រប់វិស័យ ទោះបីជាការឆ្លងរាលដាលចូលក្នុងសហគមន៍នៅបន្តមានក៏ដោយ។ កម្ពុជារំពឹងថានឹងអាចស្តារ និងជំរុញកំណើនសេដ្ឋកិច្ចឡើងវិញ តាមរយៈការកែលម្អនូវ ចន្ទល់សេដ្ឋកិច្ចសំខាន់ៗដែលរងផលប៉ះពាល់ពីជំងឺកូវីដ-១៩ និងការស្វែងរកចន្ទល់ថ្មីប្រកបដោយសក្តានុពល ពីវិស័យផ្សេង។ កម្ពុជាជឿជាក់យ៉ាងមុតមាំថា ចំណងមិត្តភាពរវាងកម្ពុជា និងហុងគ្រី នឹងកាន់តែរឹងមាំថែមទៀត ហើយកម្ពុជាត្រៀមខ្លួនរួចជាស្រេច ក្នុងការបន្តពង្រឹង និងពង្រីកកិច្ចសហប្រតិបត្តិការយ៉ាងជិតស្និទ្ធនាពេល អនាគត។

សម្តេចហ៊ុន សែន មានប្រសាសន៍យ៉ាងដូច្នេះ ក្នុងឱកាស អញ្ជើញទទួលវ៉ាក់សាំងកូវីដ-១៩ ចំនួនជាង ៥២ម៉ឺនដូស ជាជំនួយរបស់ហុងគ្រីនៅថ្ងៃសុក្រ នេះ៕SRP

ខេត្តកំពង់ចាម៖លោកហ៊ុន​ ម៉ាណែត​ បាន​បញ្ជាក់​ថា​ ប្រជាពលរដ្ឋកម្ពុជាមានភ័ព្វសំណាងដែលមាន សម្តេចតេជោនាយករដ្ឋមន្រ្តី ជាអ្នកដឹកនាំ ប្រទេសប្រកបដោយចក្ខុវិស័យខ្ពស់ ហើយដែលបំណងប្រាថ្នាដ៏ធំបំផុតរបស់ សម្តេចតេជោ គឺធ្វើយ៉ាងណាឱ្យប្រជាពលរដ្ឋ មានសេចក្តីសុខ និងភាពចម្រុងចម្រើនទាំងផ្លូវកាយ ដែលសំដៅទៅលើ ការរីកធំធាត់លូតលាស់រាងកាយ សុខភាព និងសមត្ថភាពបញ្ញា ក៏ដូចជាសេចក្តីសុខស្ងប់ផ្នែកផ្លូវចិត្ត គឺសំដៅទៅលើការមិនព្រួយបារម្ភអំពីបញ្ហាសង្គ្រាម និងអសន្តិសុខនានា ដោយសម្តេចតេជោ បាននាំមកនូវសុខសន្តិភាព និងសិទ្ធិសេរីភាពគ្រប់បែបយ៉ាង ព្រមទាំងបង្កលក្ខណៈឱ្យមានការជួយគាំទ្រ និងចែករំលែកជួយគ្នាទៅវិញទៅមក ដើម្បីភាពសុខដុមរមនានៅក្នុងសង្គម។

លោកហ៊ុន ម៉ាណែត អគ្គម បញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក​ មានប្រសាសន៍យ៉ាងដូច្នេះ ក្នុងឱកាសអញ្ជើញ​សម្ពោធ​ផ្លូវ​ជាង​២០គីឡូម៉ែត្រ​ ​ និង​បេីក​ការដ្ឋាន​សាងសង់​ស្ពាន​ ៩កន្លែង​ នៅ​ស្រុកស្រីសន្ធរ​ នៅថ្ងៃទី១៧ ខែមីនា ម្សិលមិញ។

លោកហ៊ុន​ ម៉ាណែត​​ បានថ្លែងថា​ សមិទ្ធផលទាំងនេះបានកើតចេញពីកម្លាំងរួបរួមសាមគ្គីភាព រវាងវិស័យឯកជនដែលមានក្រុមហ៊ុនប៉េង ហួត គ្រុប និងក្រុមហ៊ុន បុរីអង្គរ ភែលេស ចូលរួមចំណែកជាមួយរាជរដ្ឋភិបាលក្នុងការកសាងផ្លូវ និងស្ពានទាំងនេះទ្បើង ដើម្បីនាំមកនូវក្តីសង្ឃឹម ជួយសម្រួលការរស់នៅប្រកបរបរប្រចាំថ្ងៃ បម្រើឱ្យការអភិវឌ្ឍសេដ្ឋកិច្ច និងលើកកម្ពស់កម្រិតជីវភាពរបស់ប្រជាពលរដ្ឋក្នុងស្រុកស្រីសន្ធរឱ្យកាន់តែចម្រើនរុងរឿងថែមទៀត។ ទាំងនេះកើតមានទៅបាន គឺដោយឈរលើស្មារតី “សិល្បៈនៃការចែករំលែក” ក្រោមដំបូលនៃសុខសន្តិភាព និងវឌ្ឍនភាពនៃសង្គមជាតិ។

បេីតាម​សេចក្តី​រាយការណ៍​របស់​​ឯកឧត្តម​ អ៊ុន​ ចាន់ដា​ អភិបាលខេត្តកំពង់ចាម​ បានឲ្យដឹងថា​ ចំពោះ​វិស័យកសិកម្មនៅក្នុងខេត្ត ក៏កំពុងមានការប្រែប្រួលថ្មី តាមរយៈការយល់ដឹង ការប្រែប្រួលទម្លាប់អន់ថយ ការផលិតសម្រាប់តែផ្គត់ផ្គង់គ្រួសារទៅជាការផលិតសម្រាប់បម្រើឲ្យការនាំចេញ។ ដោយប្រជាពលរដ្ឋចេះប្រើប្រាស់ពូជ ជី ថ្នាំសម្លាប់សត្វល្អិត ការធ្វើស្រូវមួយឆ្នាំ២ ទៅ៣ដង ហើយផលិតកម្មកសិកម្មភាគច្រើនប្រើប្រាស់គ្រឿងចក្រ។ ចំពោះបណ្តាញអគ្គិសនី បានភ្ជាប់ឲ្យប្រើប្រាស់ ចំនួន ៩១៤លើ ៩២៣ភូមិ ស្មើនឹង ៩៩,០២% ចំណែកវិស័យទឹកស្អាត ក្នុងខេត្ត កំពង់ចាម ក៏មានវិសាលភាពគ្របដណ្តប់នៅទូទាំងខេត្តបានចំនួន ១០៧ លើ១០៩ឃុំ-សង្កាត់ ស្មើនឹង ៩៨,១៦% និងភូមិចំនួន ៨៧០ភូមិ លើ ៩២៣ភូមិ ស្មើនឹង ៩៤,២៥% ផងដែរ​៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានអំពាវនាវដល់ប្រជាពលរដ្ឋ ឲ្យចូលរួមគោរពច្បាប់ចរាចរណ៍។ លោកបានលើកឡើងថាបញ្ហាគ្រោះថ្នាក់ចរាចរណ៍ នៅតែជាហានិភ័យខ្ពស់ សម្រាប់ការរស់នៅប្រចាំថ្ងៃរបស់យើងទាំងអស់គ្នា ដូចនេះសូមឱ្យប្រជាពលរដ្ឋបន្តចូលរួមអប់រំណែនាំកូនចៅ របស់ខ្លួនឱ្យបានជាប់ជាប្រចាំ ក្នុងការគោរពច្បាប់ចរាចរណ៍ ពិសេសពេលបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាព រាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍។

លោកសុខ លូ ក៏បានធ្វើការអំពាវនាវដល់ប្រជាពលរដ្ឋទាំងអស់ បន្តចូលរួមសហការជាមួយអាជ្ញាធរ និងសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានាទាក់ទងនឹងការជួញដូរ ចែកចាយ និងប្រើប្រាស់គ្រឿងញៀននៅតាមសហគមន៍ ដើម្បីធ្វើការអន្តរាគមន៍បង្រ្កាបឲ្យបានទាន់ពេលវេលា។

លោកសុខ លូ មានប្រសាសន៍យ៉ាងដូច្នេះក្នុងឱកាសលោកនិងលោកជំទាវ អញ្ជើញចុះសំណេះសំណាលសួរសុខទុក្ខ និងចែកអំណោយជូនដល់ប្រជាពលរដ្ឋងាយរងគ្រោះចំនួន៤០០គ្រួសារក្នុងស្រុកចំនួន២នៃខេត្តបាត់ដំបងនៅថ្ងៃព្រហស្បតិ៍ ម្សិលមិញ។

លោកសុខ លូ បាននាំមកនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះ ប្រជាពលរដ្ឋដែលអញ្ជើញមកទទួលអំណោយទាំងអស់ ដោយក្តីនឹករឭកបំផុត ដែលជានិច្ចកាលសម្តេចតែងតែគិតគូរពីសុខទុក្ខរបស់ប្រជាពលរដ្ឋនៅពេលជួបការលំបាក អ្នកមានជំងឺ ជនចាស់ជរា ស្ត្រីមេម៉ាយកូនច្រើនក្នុងបន្ទុក ជនងាយរងគ្រោះ និងជនរងគ្រោះដោយគ្រោះមហន្តរាយផ្សេងៗដោយមិនប្រកាន់រើសអើង វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ពោលគឺទីណាមានទុក្ខលំបាក ទីនោះមានកាកបាទក្រហមកម្ពុជា ។ ឯកឧត្តម ក៏បានធ្វើការផ្តាំផ្ញើ ដល់ប្រជាពលរដ្ឋទាំងអស់ ប្រកាន់យកនូវអនាម័យល្អ ការរស់នៅស្អាត ហូបស្អាត ផឹកស្អាត និងខិតខំប្រឹងប្រែងប្រកបមុខរបរ បង្កបង្កើនផលដំណាំ ដើម្បីទ្រទ្រង់ជីវភាពគ្រួសារ ឱ្យបានប្រសើរឡើង។

លោកក៏បានធ្វើការផ្ដាំផ្ញើដល់ប្រជាពលរដ្ឋ រួសរាន់ទៅចាក់វ៉ាក់សាំងកូវីដ-១៩ ឱ្យបានគ្រប់ៗគ្នា ចាប់ពីដូសទី១ ដល់ដូសទី៣ឬដូសជំរុញ ដើម្បីកាត់បន្ថយការឆ្លង និងហានិភ័យនៃការស្លាប់ដោយមេរោគកូវីដ-១៩ ខណៈមេរោគបំប្លែងខ្លួនថ្មីអូមីក្រុង កំពុងផ្ទុះឆ្លង និងបន្តការ ចូលរួមអនុវត្តតាមវិធានការសុវត្ថិភាពរបស់ក្រសួងសុខាភិបាល និងគោលការណ៍ ៣កុំ ៣ការពារ ឱ្យបានត្រឹមត្រូវផងដែរ។

សូមបញ្ជាក់ថា អំណោយដែលផ្តល់ជូននាពេលនេះ ក្នុងមួយគ្រួសារៗទទួលបាន៖
-អង្ករ២៥គីឡូក្រាម
-ត្រីខ១០កំប៉ុង
-ទឹកបរិសុទ្ធ ១កេស
-មី១កេស
-ទឹកត្រី ទឹកស៊ីអ៊ីវ ១យួរ
-ជែលចំនួន១ដប៕SRP

ភ្នំពេញ៖សម្ដេចហ៊ុន សែន នាយករដ្ឋមន្ត្រី
បានសម្ដែងនូវសេចក្តីរីករាយជាមួយនឹងភាពជាដៃគូ SOS ដែលចំណងទាក់ទង ២០ឆ្នាំមិនមានការថយចុះនេះបង្ហាញ នូវភាពរឹងមាំ ភាពជាដៃគូរបស់អង្គការ SOS និងរាជរដ្ឋាភិបាលកម្ពុជា។ នៅក្នុងជំនួបនេះ សម្ដេចហ៊ុន សែន បានមានប្រសាសន៍ថា នៅលើពិភពលោកយើងនេះ មិនមានប្រទេសណា រងគ្រោះខ្លាំងជាងគេដូចប្រទេសកម្ពុជា នោះទេ ប៉ុន្តែយ៉ាងណាក៏ដោយកម្ពុជា មិនអនុញ្ញាតឲ្យកុមារ និងយុវជនកម្ពុជាអត់បាយនោះទេ។ សម្តេចបានបញ្ជាក់ថា ការិយាល័យល្អមិនមែនជាអាទិភាពរបស់កម្ពុជា សម្រាប់មន្ត្រីកម្ពុជានោះទេ ប៉ុន្តែជម្រកនឹងសេចក្តីត្រូវការរបស់កុមារទេ ដែលជាអាទិភាពរបស់កម្ពុជា។ សម្ដេចតេជោ បានឯកភាពជាមួយអង្គការ SOS ក្នុងការថែរក្សាកុមារ ដើម្បីឱ្យកុមារចេញទៅមានចំណេះវិជ្ជាអាចរកការងារធ្វើ អាចបម្រើការងារ ឬអាចប្រកបអាជីវកម្មតាមក្តីសុបិនរបស់ពួកគេ។

សម្ដេចហ៊ុន សែន មានប្រសាសន៍យ៉ាងដូច្នេះ
នៅវិមានសន្តិភាព នារសៀលថ្ងៃទី ១៧ ខែមីនាឆ្នាំ ម្សិលមិញ ក្នុងឱកាសបានទទួលជួបពិភាក្សាការងារជាមួយលោកបណ្ឌិត Wordofa Dereje ប្រធានអង្គការកុមារ SOS អន្តរជាតិ។

លោកប្រធានអង្គការ SOS បានគោរពសម្ដែង នូវការថ្លែងអំណរគុណចំពោះសម្ដេចតេជោ ហ៊ុន សែន ក៏ដូចជារាជរដ្ឋាភិបាលកម្ពុជាដែលបានអនុញ្ញាតឲ្យអង្គការSOS ធ្វើជាដៃគូកន្លងមក ហើយដៃគូនេះទៀតសោត បានអនុញ្ញាតឲ្យអង្គការ SOS មានដំណើរការកាន់តែខ្លាំងឡើងក្នុងរយៈពេល២០ឆ្នាំកន្លងមកនេះ ក្នុងការបំពេញបេសកកម្មជួយដល់កុមារ និងផ្ដល់ជូន កុមារ និងក្រុមគ្រួសារនូវ ក្តីស្រឡាញ់ ការថែទាំ និងជាពិសេសការអប់រំដើម្បីជួយដល់កុមារទាំងនោះឲ្យបានប្រែក្លាយសុបិនរបស់ពួកគេទៅជាការពិត។ លោកក៏បានប្ដេជ្ញាចំពោះសម្ដេចតេជោ ហ៊ុន សែន ថា អង្គការ SOS នឹងប្រឹងប្រែងបន្តទៀត ដើម្បីជួយដល់កុមារឲ្យកាន់តែច្រើនឡើង ក្នុងការសម្រេចបានក្នុងក្តីសុបិន្តរបស់ពួកគេ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានមានប្រសាសន៍ថា នៅពេលខាងមុខនេះរដ្ឋបាលខេត្តនឹងរៀបចំតំបន់មួយដែលស្រដៀងទៅនឹងPub Street នៅខេត្តសៀមរាប គឺជាតំបន់ដែលភ្ញៀវទេសចរអាចធ្វើដំណើរកំសាន្ត មានភោជនីយដ្ឋាន ឬអាហារដ្ឋានជាដើម ហើយរដ្ឋបាលខេត្តនឹងធ្វើការសហការជាមួយសមាគមន៍ហ្វារពន្លឺសិល្បៈ ដើម្បីរៀបចំការសម្ដែងសិល្បៈផ្សេងៗនៅក្នុងថ្ងៃណាមួយ ដើម្បីឲ្យប្រជាពលរដ្ឋ ភ្ញៀវទេសចរបានយល់ដឹង និងបានទស្សនាការសម្ដែងសិល្បៈពីសិល្បករក្នុងខេត្តរបស់យើង។ លោកសង្ឃឹមថា អង្គការហ្វារពន្លឺសិល្បៈនឹងបន្តធ្វើការបណ្ដុះបណ្ដាលដល់យុវជន យុវនារី ជាពិសេសគឺផ្នែកសិល្បៈនេះដើម្បីលើកស្ទួយវិស័យសិល្បៈនៅក្នុងខេត្ត និងដើម្បីលើកទឹកចិត្តដល់អ្នកដែលស្រឡាញ់សិល្បៈដែលមានសាលាបណ្ដុះបណ្ដាលវិស័យសិល្បៈបែបនេះ។

លោកមានប្រសាសន៍យ៉ាងដូច្នេះ នៅថ្ងៃពុធ
ម្សិលមិញក្នុងឱកាស អនុញ្ញាតទទួលជួបសម្ដែងការគួរសមជាមួយ លោកស្រី Aurelie Vincq អគ្គលេខាធិការសាលាសៀកអេសាក់តូ ដើម្បីរាយការណ៍អំពីសមាគមហ្វារពន្លឺសិល្បៈ ដែលកំពុងអនុវត្តន៍គម្រោងផ្លាស់ប្ដូរគរុកោសល្យរវាងសមាគមហ្វារពន្លឺសិល្បៈ និងសាលាសៀកបារាំង អេសាក់តូ នៅតំបន់អុកស៊ីតានី ប្រទេសបារាំង៕SRP

ខេត្តបាត់ដំបង៖លោកសុខ លូ បានមានប្រសាសន៍ថា នេះគឺជាសមិទ្ធផលមួយ ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងការឆ្លងកាត់ ដឹកជញ្ជូនពីភូមិសាស្រ្ដស្រុកសង្កែ មកស្រុកបាណន់ ដោយប្រើរយ:ពេលខ្លីជាងមុន ហើយទាំងអស់នេះគឺកើតចេញពីសុខសន្ដិភាព ព្រោះបើគ្មានសន្ដិភាពទេ ក៏គ្មានការអភិវឌ្ឍបែបនេះ មិនថាផ្លូវថ្នល់ ឬហេដ្ឋារចនាសម្ព័ន្ធនានាក្នុងខេត្ត ដូចនេះសូមប្រជាពលរដ្ឋទាំងអស់ មេត្តារក្សានូវសុខសន្ដិភាពទាំងអស់គ្នា ដើម្បីការអភិវឌ្ឍប្រទេសឲ្យកាន់តែរីកចម្រើនតទៅមុខ។ លោកបានបន្តទៀតថា នៅពេលខាងមុខ រដ្ឋបាលខេត្ត រដ្ឋបាលក្រុង ស្រុក នឹងរៀបចំវេទិកាសាធារណៈនៅតាមភូមិ ឃុំដែលប្រជាពលរដ្ឋរស់នៅ ហើយប្រជាពលរដ្ឋត្រូវតែមានភាពក្លាហានក្នុងការនិយាយ សំណូមពរ និងលើកជាបញ្ហាប្រឈមនានាដែលបានកើតឡើងនៅក្នុងសហគមន៍ដែលខ្លួនរស់នៅ ក្នុងន័យដើម្បីបង្កើនការដោះស្រាយជាមួយប្រជាពលរដ្ឋ ឬកែលម្អស្ថាបនាក្រោយពេលដែលទទួលបាននូវមតិរិះគន់ស្ថាបនាពីប្រជាពលរដ្ឋ ។

លោកសុខ លូ អភិបាលខេត្តបាត់ដំបង មានប្រសាសន៍យ៉ាងដូច្នេះ ក្នុងពិធីបើកការដ្ឋានជួសជុលផ្លូវក្រាលកៅស៊ូមួយខ្សែ ស្ថិតក្នុងឃុំបាយដំរាំ និងឃុំកន្ទឺ២ ស្រុកបាណន់ ខេត្តបាត់ដំបង នៅថ្ងៃពុធ ម្សិលមិញ។

សូមជម្រាបថាផ្លុវក្រាលកៅស៊ូ ប្រភេទ DBST ប្រវែង៣,២០០ម៉ែត្រ ទទឹង៧ម៉ែត្រ នៅកំណាត់ផ្លូវខេត្តលេខ ១៥៧A ស្ថិតក្នុងឃុំបាយដំរាំ និងឃុំកន្ទឺ២ ស្រុកបាណន់ ខេត្តបាត់ដំបង។

លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្ត បានលើកឡើងថា បន្ទាប់ពីការងារជួសជុលនេះរួច កំណាត់ផ្លូវមួយនេះជាចំណងដ៏ពិសិដ្ឋដែលឆ្លើយតបទៅនឹងសំណូមពររបស់ប្រជាពលរដ្ឋ ក្នុងការបម្រើឲ្យចរាចរណ៍ដឹកជញ្ជូនកសិផល និងការផ្លាស់ប្ដូរសេដ្ឋកិច្ចលើគ្រប់វិស័យ ឲ្យកាន់តែរីកចម្រើន សំដៅដល់ការរួមចំណែកជំរុញកំណើនសេដ្ឋកិច្ច និងការអភិវឌ្ឍសសង្គមឈានទៅរកកាត់បន្ថយភាពក្រីក្ររបស់ប្រជាពលរដ្ឋកម្ពុជាទូទាំងប្រទេស។ លោកបានធ្វើការសំណូមពរដល់ប្រជាពលរដ្ឋដែលរស់នៅតាមដងផ្លូវនេះ ជួយធ្វើការលះបង់ និងចូលរួមរុះរើរបង កាប់ដើមឈើ ឬកាប់ឆ្កាព្រៃដែលនៅជាប់នឹងចំណីផ្លូវ ដើម្បីបង្កលក្ខណៈឲ្យស្ថានភាពផ្លូវថ្នល់ កាន់តែមានភាពធំទូលាយ និងងាយស្រួលដល់ក្រុមការងារក្នុងការបំពេញភារកិច្ច៕SRP