ខេត្តកំពង់ចាម – Page 84

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថាថ្ងៃនេះយើងបានបេីកការដ្ឋានស្ថាបនាផ្លូវក្រាលកៅស៊ូប្រវែងជិត៣គីឡូម៉ែត្រ គិតជាថវិកាប្រមាណ ៣១ម៉ឺនដុល្លារ ដើម្បីកាត់បន្ថយភាពក្រីក្រ របស់ប្រជាពលរដ្ឋ ស្របតាមគោលនយោបាយជាតិ។

ក្នុងពិធីបេីកការដ្ឋានស្ថាបនាផ្លូវក្រាលកៅស៊ូ ១ខ្សែ ប្រវែង២.៦៩៧ម៉ែត្រ ទទឹង៥ម៉ែត្រ ស្ថិតនៅក្នុងឃុំពង្រ និងឃុំមហាលាភ ស្រុកកោះសូទិន នៅព្រឹកមិញលោក អ៊ុន ចាន់ដាបានថ្លែងប្រាប់ប្រជាពលរដ្ឋថា សូមឲ្យមានការជឿទុកចិត្តលេីអាជ្ញាធរ ដែលបានខិតខំប្រឹងប្រែងធ្វើការបម្រើពុកម៉ែបងប្អូន ដោយមិនគិតពីការនឿយហត់ ដេីម្បីចូលរួមអភិវឌ្ឍន៍មូលដ្ឋានយេីងឲ្យមានការរីកចម្រើន។

លោក អ៊ុន ចាន់ដា បានថ្លែងថា គម្រោងស្ថាបនាផ្លូវកៅស៊ូនេះ ពិតជាសារៈប្រយោជន៍សំខាន់ខ្លាំងណាស់ សម្រាប់បងប្អូនប្រជាពលរដ្ឋនៅក្នុងមូលដ្ឋាន ក៏ដូចជាអ្នកប្រើប្រាស់ផ្លូវថ្នល់ទាំងអស់ ជាពិសេសបម្រើឲ្យការដឹកជញ្ជូនកសិផលទៅកាន់ទីផ្សារ ដែលងាយស្រួលក្នុងការធ្វើដំណើរ។ ដោយការស្ថាបនាផ្លូវក្រាលកៅស៊ូ ១ខ្សែនេះមានរយ:ពេល៥ខែ ដូច្នេះសូមឲ្យពុកម៉ែបងប្អូនមានការយោគយល់ និងចូលរួមដោះស្រាយបញ្ហាផលប៉ះពាល់ខ្លះៗផង។ លេីសពីនោះពេលដែលបានផ្លូវល្អប្រេីប្រាស់ហើយ សូមលោកយាយលោកតា ជួយអប់រំណែនាំដល់កូនចៅ ឲ្យគាត់បេីកបរដោយគោរពច្បាប់ចរាចរណ៍ផង ព្រោះប្រសិនបេីយេីងបេីកបរមិនគោរពច្បាប់ចរាចរណ៍ទេនោះ គឺផ្លូវនេះនឹងមិនបានកាត់បន្ថយភាពក្រីក្រទេ ព្រោះត្រូវចំណាយថវិកាព្យាបាលរបួស និងខាតបង់ទ្រព្យសម្បត្តិទៀតផង។

គួរបញ្ជាក់ថា នេះជាគម្រោងស្ថាបនាផ្លូវក្រាលកៅស៊ូពីជាន់ប្រភេទ(DBST) ប្រវែង២.៦៩៧ ម៉ែត្រ ទទឹង៥ម៉ែត្រ ឆ្លងកាត់៦ភូមិ ក្នុងឃុំពង្រ និងឃុំមហាលាភ ស្រុកកោះសូទិន ក្រោមក្របខ័ណ្ឌកាត់បន្ថយភាពក្រីក្រ និងអនុវត្តកសិកម្មខ្នាតតូច តំបន់ទន្លេសាបជំហាន២ ដែលមានអ្នកទទួលផល សរុប ៣.៤៥៩នាក់ ស្មើនឹង ៩៤៦គ្រួសារ៕SRP

ខេត្តកំពង់ចាម៖ប្រជាពលរដ្ឋ នៅក្នុងឃុំកោះសូទិន ស្រុកកោះសូទិន បានសម្តែងការត្រេកអរសាទរ ដោយលែងមានការព្រួយបារម្ភចំពោះបញ្ហាធ្វើដំណើរ មិនថាពេលយប់ឬក៏ពេលថ្ងៃ បន្ទាប់ពីទទួលបានការបំពាក់អំពូលភ្លើងបំភ្លឺផ្លូវខ្វាត់ខ្វែង ខណៈ រាជរដ្ឋាភិបាលបានកសាងស្ពានឆ្លងកាត់ទន្លេមេគង្គ និងផ្លូវយ៉ាងល្អប្រណិតនៅគ្រប់មូលដ្ឋាន។

ជាក់ស្ដែងនៅថ្ងៃទី១៩ ខែធ្នូ ម្សិលមិញលោកហ៊ាប សេរីវុធ សមាជិកក្រុមជំនួយការលេខាធិការដ្ឋាននៃយុវជនគណបក្សប្រជាជនកម្ពុជាថ្នាក់កណ្ដាល និងជាស្ថាបនិកអង្កការមូលនិធិគាំទ្រកុមារ សហការជាមួយអជ្ញាធរឃុំកោះសូទិន និងក្រុមយុវជន ស ស យ ក បានធ្វើការបំពាក់ អំពូលភ្លើងសូឡាបំភ្លឺផ្លូវ ជាច្រើនបង្គោល នៅភូមិទី ៥ និងភូមិទី ៦ ក្នុងឃុំកោះសូទិន។

លោកហ៊ាប សេរីវុធ បានឲ្យដឹងថា ដេីម្បីចូលរួមចំណែក ធ្វើការអភិវឌ្ឍន៍ជាមួយរាជរដ្ឋាភិបាល លោកបានបរិច្ចាគថវិកាផ្ទាល់ខ្លួន ដោយមានការចូលរួមពីសប្បុរសជន ក្នុងការដំឡើងបង្គោលសូឡា ចំនួន ៦២២ដេីម ដែលរហូតមកដល់ពេលនេះ ដាំបានចំនួន ៣៨៥ដេីមហេីយ ពោលគឺសម្រេចបានប្រមាណជា៦០% ហេីយ បង្គោលដែលនៅសេសសល់នឹងដាំនៅតាមភូមិជាបន្តបន្ទាប់ទៀត។

លោកហ៊ាប សេរីវុធ បានបន្តថា រាជរដ្ឋាភិបាលបានកសាងស្ពាន និងផ្លូវបេតុងខ្វាត់ខ្វែងហើយ តែបញ្ហាភ្លើងបំភ្លឺផ្លូវនៅមានកំរិត ដោយភ្លើងរបស់វត្តអារាមត្រូវបិទនៅម៉ោង៩យប់ ដូច្នេះក៏បានផ្តួចផ្តើមបំពាក់អំពូលភ្លើងសូឡា សម្រាប់បំភ្លឺពេញមួយយប់ ដេីម្បីជាការងាយស្រួលឲ្យបងប្អូនប្រជាពលរដ្ឋធ្វេីដំណើរ ជាពិសេសអ្នកជំងឺត្រូវការទៅរកសេវាព្យាបាលនៅមន្ទីរពេទ្យផងដែរ។

លោកស្រី ស៊ុន ចន្ថា មេឃុំកោះសូទិន ក៏បានអំពាវនាវដល់បងប្អូនប្រជាពលរដ្ឋ ឲ្យចូលរួមជួយថែរក្សាភ្លេងបំភ្លឺផ្លូវនេះ ប្រយោជន៍ដល់ការប្រើប្រាស់បានយូរអង្វែង ពោលគឺត្រូវចាត់ទុកជាទ្រព្យសម្បត្តិខ្លួនឯង និងបម្រើដល់ផលប្រយោជន៍រួមផងដែរ។

គួរបញ្ជាក់ថាការដាំបង្គោលភ្លេីងបំភ្លឺផ្លូវខាងលើនេះ ដោយមានការចូលរួមពីប្រជាពលរដ្ឋក្នុងមូលដ្ឋាន ក្នុងនោះ លោក សុទ្ធ ពុទ្ធិ ម៉ានីន ដែលធ្វើដំណើរឆ្លងកាត់ លោកក៏បានជួយឧបត្ថម្ភថវិកា៥០ម៉ឺនរៀល សម្រាប់ផ្គត់ផ្គង់ភេសជ្ជៈ ដល់ក្រុមការងារផងដែរ៕SRP

ខេត្តកំពង់ចាម៖លោក ហ៊ុន ណេង អ្នកតំណាងរាស្ត្រមណ្ឌលកំពង់ចាម និងជាប្រធានក្រុមការងារ រាជរដ្ឋាភិបាល ចុះមូលដ្ឋានស្រុកស្ទឹងត្រង់ និងលោកស្រី នៅព្រឹកមិញនេះ បានអញ្ជើញចុះពិនិត្យការសាងសង់ ផ្លូវបេតុង១ខ្សែ ប្រវែង២.១៥៨ម៉ែត្រ ស្ថិតនៅក្នុងភូមិដីលើ ឃុំពាមកោះស្នា ស្រុកស្ទឹងត្រង់។

លោក ហ៊ុន ណេង មានប្រសាសន៍ថា ក្រោមការដឹកនាំ របស់សម្ដេតេជោ ហ៊ុន សែន បានដាក់ចេញនូវគោលនយោបាយយុទ្ធសាស្ត្រចតុកោណ ជាអាទិភាព ៖ មនុស្ស ទឹក ភ្លើង និងផ្លូវ ។ «មានផ្លូវ គឺមានសង្ឃឹម» ។ យ៉ាងណាមិញ ដោយពិនិត្យ ឃើញការលំបាក និងឆ្លើយតបទៅនឹងតម្រូវការ របស់បងប្អូនប្រជាពលរដ្ឋ នៅក្នុងតំបន់ លោកផ្ទាល់ ក៏បានដឹកនាំក្រុមការងារ សម្រេចកសាងផ្លូវ ១ខ្សែ នេះឡើង ដើម្បី សម្រួលដល់ជីវភាពរស់នៅ និងការធ្វើដំណើរ របស់ប្រជាពលរដ្ឋ។

លោកក៏បានថ្លែងអំណរគុណយ៉ាងជ្រាលជ្រៅបំផុត ចំពោះ ការខិតខំប្រឹងប្រែង របស់អាជ្ញាធរគ្រប់លំដាប់ថ្នាក់ និងប្រជាពលរដ្ឋ នៅអមសង្ខាងផ្លូវ ដែលបានសហការគ្នាល្អ ហើយបានចូលរួមសម្បទានដីកម្មសិទ្ធរបស់ខ្លួន តាមស្ថានភាពជាក់ស្ដែង ធ្វើយ៉ាងណា ឲ្យកិច្ចដំណើរការសាងសង់ផ្លូវ ១ខ្សែនេះ បានរលូនទៅមុខ ដើម្បីយើងទាំងអស់គ្នា ទទួលបានសមិទ្ធផល ទុកប្រើប្រាស់ទាំងអស់គ្នា។

លោក ហ៊ុន ណេង ក៏បានផ្ដាំផ្ញើដល់ក្រុមជាង យកចិត្តទុកដាក់ខ្ពស់ ចំពោះ កិច្ចការរបស់ខ្លួន ដោយធ្វើយ៉ាងណា អនុវត្តទៅតាមបទដ្ឋានបច្ចេកទេស ដើម្បី ធានាដល់ការប្រើប្រាស់បានយូរអង្វែង៕SRP

ខេត្តកំពង់ចាម៖ក្នុងពិធីប្រគល់ពានរង្វាន់អក្សរសិល្ប៍ទន្លេមេគង្គ លើកទី១១ នៅព្រឹកមិមិញនេះលោក អ៊ុន ចាន់ដា អភិបាលខេត្តកំពង់ចាម បានថ្លែងប្រាប់ប្អូនៗសិស្សានុសិស្សថា បេីយើងខ្លាំងយើងរឹងមាំហេីយនោះ គ្មានបរទេសណាគេអាចដណ្តើមការងារពីយេីងបានទេ ដូច្នេះយើងត្រូវខិតខំប្រឹងប្រែងសិក្សារៀនសូត្រទាំងខ្មែរ និងបរទេសផង ដេីម្បីតម្រូវតាមទីផ្សារការងារបច្ចុប្បន្ន និងទៅថ្ងៃអនាគត នៅពេលបញ្ចប់ការសិក្សាហើយនោះ ត្រូវសម្លឹងមើលទៅមុខឲ្យបានវែងឆ្ងាយផងដែរ។

ក្នុងពិធីនោះដែរ លោក អ៊ុន ចាន់ដា បានថ្លែងថា ការរៀបចំប្រលងជ្រើសរើសពានរង្វាន់អក្សរសិល្ប៍ទន្លេមេគង្គ ពិតជាមានអត្ថន័យ យ៉ាងជ្រាលជ្រៅបំផុត ក្រៅពីការលើកកិត្តិយស និងសមត្ថភាពបុគ្គល គឺវាបានចូលរួមចំណែកបន្តរឹតចំណងសាមគ្គីភាព និងកិច្ចសហប្រតិបត្តិការល្អ រវាងប្រទេសនីមួយៗ ដែលនៅជាប់ដងទន្លេមេគង្គ។ ក្រៅពីនោះ វាបានចូលរួមចែករំលែកនូវបទពិសោធន៍ ដល់បញ្ញាវ័ន្ត ក៏ដូចជា អ្នកនិពន្ធ ទាំងឡាយ ដែលស្ថិតនៅជាប់ដងទន្លេមេគង្គ ផងដែរ។

អភិបាលខេត្តបានថ្លែងបន្តថា ការដែលឈានទៅដណ្ដើមបាននូវពានរង្វាន់អក្សរសិល្ប៍ ទន្លេមេគង្គកម្រិតអន្តរជាតិ នាពេលនេះ គឺកិច្ចការលំបាកបំផុត ពីព្រោះថា វាពុំមែនជាការប្រលងកម្រិតផ្ទៃក្នុង នៃប្រទេសយើង ប៉ុណ្ណោះទេ តែវាជាការប្រលងជ្រើសរើសសមត្ថភាព ពិតប្រាកដ ដោយមានការចូលរួមពី បញ្ញាវ័ន្ត កវីនិពន្ធ នៅតាមបណ្ដាប្រទេស ជាប់ដងទន្លេមេគង្គ ចំនួន ៦ រួមមាន ៖ប្រទេសចិន ភូមា ថៃ ឡាវ ប្រទេសកម្ពុជា និងវៀតណាម។ យ៉ាងណាមិញ ខេត្តកំពង់ចាម ក៏ជាខេត្តសាមី ក្នុងចំណោមអ្នកទទួលបានជ័យលាភី ទាំង២រូប របស់ប្រទេសកម្ពុជាទៀតផង។ ទាំងអស់នេះ គឺផ្ដើមចេញពីការខិតខំប្រឹងប្រែង ពីបុគ្គលផ្ទាល់ខ្លួន ជាពិសេស អ្នកដឹកដៃ ឬអ្នកបង្ហាត់បង្ហាញ ធ្វើឲ្យយើងមានមូលដ្ឋានច្បាស់លាស់ ក្នុងការសរសេរបានល្អ ពីព្រោះថា ការដែលពូកែខាងផ្នែកអក្សរសិល្ប៍ វាក៏ជាមូលដ្ឋាន នៃការសរសេរប្រវត្តិសាស្ត្របានយ៉ាងល្អ ផងដែរ។

គួរបញ្ជាក់ថា ការប្រកួតប្រជែងពានរង្វាន់អក្សរសិល្ប៍ទន្លេមេគង្គ លើកទី១១ ឆ្នាំ២០២០ គឺបានជ្រើសរើស យកប្រធានបទ «ជីវិត និងនិរន្តរភាពទន្លេមេគង្គ»។ ក្នុងចំណោមបេក្ខជន ប្រគួតប្រជែងជាច្រើនរូប នៃបណ្ដាប្រទេសទាំង៦ កម្ពុជាយើង ក៏មានបេក្ខនារី ចំនួន ២រូប ទទួលបានជ័យលាភីគឺ៖ ១-កញ្ញា លឹម ផាន់ណា និង២-លោកស្រី ឡុង លាភសុជាតា៕SRP