ខេត្តបាត់ដំបង៖ប៉ូលិសខេត្តបាត់ដំបង បានឆ្មក់បង្ក្រាបទីតាំងវង់ល្បែង ស៊ីសងអាប៉ោងមួយកន្លែង នឹងឃាត់ខ្លួនអ្នកពាក់ព័ន្ធចំនួន៧នាក់ បញ្ជូនទៅតុលាការ។ ប៉ុន្តែការបង្ក្រាបបែបនេះ ត្រូវបានពលរដ្ឋ នៅក្រុងបាត់ដំបង មើលឃើញថា ប៉ូលិសខេត្តបាត់ដំបង ចុះបង្ក្រាប រើស ទីតាំងវង់ល្បែងស៊ីសង។ ដោយហេតុថាវង់ល្បែង នៅភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង នៅតែដំណើរការបើកលេងយ៉ាងគគ្រឹកគគ្រេងបំផុត ដោយមិនមានការបង្ក្រាបនោះទេ។ វង់ល្បែងនៅចំណុចខាងលើ មានដូចជា បៀរ អាប៉ោងនិងធួរឬគ្រាប់អំពិល ដោយភ្នាល់គ្នាចាញ់ឈ្នោះរាប់ពាន់ម៉ឺនដុល្លារ។ ការដែលមានវង់ល្បែងស៊ីសង នៅភូមិចំការសំរោង២ អាចបើកលេងបានដោយរលូន មិនមែនជារឿងចម្លែកនោះទេ មានន័យថាប្រសិនគ្មានសែន ម្ចាស់ទឹកដី ត្រូវទេនោះ នឹងប្រឈមការបង្ក្រាបដូចនៅស្រុកថ្មគោល យ៉ាងដូច្នោះ។
សូមបញ្ជាក់់ថាមនុស្ស០៧នាក់ ត្រូវបាននគរបាលខេត្តបាត់ដំបង ឃាត់ខ្លួន នៅថ្ងៃទី ១១ ខែធ្នូ ឆ្នាំ២០២០ វេលាម៉ោង១៤និង៥០នាទី ម្សិលមិញ ក្នុងករណីបង្ក្រាបល្បែងអាប៉ោង។
ការបង្ក្រាបធ្វើនៅ ចំណុចភូមិអូរញ ឃុំបឹងព្រីងស្រុកថ្មគោល ខេត្តបាត់ដំបង ដោយលោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងជំនាញសហការជាមួយក្រុមអន្តរាគមន៍ បង្ការបង្រ្កាប រូមជាមួយនគរបាលស្រុកថ្មគោល តាមបញ្ជារបស់លោកឧត្ដមសេនីយ៍ទោសាត គឹមសាន ស្នងការខេត្តបាត់ដំបង និងតាមណែនាំរបស់លោកវរសេនីយ៍ឯកលឹម ពុទ្ធីឡា ស្នងការរងផែនការងារ នគរបាលព្រហ្មទណ្ឌ។
ប៉ូលិសខេត្តបាត់ដំបងបានបញ្ជាក់ថាប្រតិបត្តិការនេះ ដកហូតវត្ថុតាង
– បៀរចំនួន០៣ហ៊ូ
– គ្រាប់អាប៉ោងចំនួន០២ គ្រាប់
– ផ្តិលគ្របអាប៉ោងចំនួន០១
– ចានសម្រាប់បាញ់អាប៉ោងចំនួន០១
– ឈើឫស្សីសម្រាប់សង្កត់ប្រាក់ចំនួន០៥
– ចានដាក់ដីសម្រាប់ទ្រចានបាញ់អាប៉ោងចំនួន០១
– ឧបករណ៍សម្រាប់ កិប នឹងគ្រាប់កិបចំនួន ០១
– ម៉ូតូចំនួន០៤គ្រឿង
គួរបញ្ជាក់ថានៅក្រុងបាត់ដំបង តែងតែមានអំពើចោរកម្ម យ៉ាងរីករាលដាល បើទោះបីជាមានការរឹតបន្តឹងពីអាជ្ញាធរសមត្ថកិច្ច យ៉ាងណាក៏ដោយ។ ក្នុងនោះក៏អាចតែក្រុងបាត់ដំបង មានល្បែងស៊ីងជាច្រើនផងដែរ ជាពិសេស វង់ល្បែងនៅភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង តែម្ដង៕SRP
