ខេត្តបាត់ដំបង

ខេត្តបាត់ដំបង៖បុរសពីរនាក់បើកគោយន្តត្រឡប់ពីចំការ តាមផ្លូវឡានចាស់សម័យសង្គ្រាម ជាន់មីនតោនផ្ទុះបណ្ដាលឲ្យស្លាប់១នាក់និងរបួសធ្ងន់ម្នាក់។

ហេតុការណ៍នេះបានកើតឡើងនៅវេលាម៉ោង ២និង៣០នាទីរសៀល ថ្ងៃទី ២៧ខែឧសភា នៅចំណុច ចំការចេកក្រោម ភូមិចំការចេក ឃុំ ស៊ុង ស្រុកសំឡូតខេត្តបាត់ដំបង។

លោក កែវ វិបុលនាយប៉ុស្ដិ៍រដ្ឋបាលឃុំស៊ុង បានអោយដឹងថាជនរងគ្រោះទាំង២នាក់ម្នាក់មានឈ្មោះ ប៊នសុគា ភេទប្រុសអាយុ២៧ឆ្នាំ ស្លាប់បាត់បង់ជីវីត និង ម្នាក់ទៀតឈ្មោះ ហង់ សីហ័រ អាយុ២៦ឆ្នាំ រងរបួសមុខ អ្នកទាំងពីររស់នៅភូមិឃុំកើតហេតុ។

ជនរងគ្រោះទាំងពីរបានជិះគោយន្តទៅកាត់ស្មៅចំការថ្មី ដែលទើបធ្វើឆ្នាំនេះ ស្ថិត ក្បែរទីតាំងកើតហេតុខាងលើ លុះមានភ្លៀង រលឹម ជនរងគ្រោះទាំងពីរ បានបើកគោយន្ត ត្រឡប់មកផ្ទះវិញ កាត់តាមផ្លូវឡានចាស់ក្នុងសម័យសង្គ្រាម ដែលផ្លូវនេះទុកចោលមិន មានអ្នកបើកឆ្លងកាត់នោះទេ ក៏បណ្តាលអោយជាន់មីនតោនផ្ទុះឡើងតែម្តង។

លោកបញ្ជាក់ថាខណៈដែលផ្ទះមីនតោននោះ តៃកុងគោយន្តបានស្លាប់បាត់បង់ជីវិតនៅនឹងកន្លែង។ ចំណែកអ្នកជិះពីក្រោយ ខ្ទាតធ្លាក់ពីលើគោយន្ត ហើយក្រោកប្រឹងរត់មកប្រាប់អ្នកភូមិពីហេតុការណ៍ រួចខ្លួនក៏ល្ងិត មុខដួលសន្លប់តែម្តង និងត្រូវបានបញ្ជូន ទៅសង្គ្រោះនៅមន្ទីរពេទ្យ ខេត្តបាត់ដំបង ។

លោកបញ្ជាក់ថាក្រោយកើតហេតុ ទាំងសមត្ថកិច្ចនិងអ្នកភូមិ បានទៅពិនិត្យទីតាំង ហើយបានបញ្ជូនសពជនរងគ្រោះ ទៅគ្រួសារដើម្បីរៀបចំធ្វើពិធីបុណ្យតាមប្រពៃណី៕SRP

ខេត្តបាត់ដំបង៖កម្លាំងការិយាល័យជំនាញនៃបញ្ជាការដ្ឋានកងរាជអាវុធហត្ថខេត្តបាត់ដំបង សហការ ជាមួយមន្ត្រីខណ្ឌរដ្ឋបាលព្រៃឈើ បានចុះរឹបអូសឈើប្រណិតជិត៣០ដុំ ខណៈឈ្មួញត្រៀមបំរុងដឹកចល័តចេញពីផ្ទះ។

ការបង្ក្រាបនេះធ្វើឡើងនៅថ្ងៃទី២៣ ខែឧសភា ម្សិលមិញនៅត្រង់ចំណុចភូមិ២០ឧសភា សង្កាត់ស្វាយប៉ោ ក្រុងបាត់ដំបង ក្រោមការបញ្ជាពីលោក មាស សុវណ្ណ មេបញ្ជាការអាវុធហត្ថខេត្ត។

មន្ត្រីអាវុធហត្ថខេត្តបានថ្លែងប្រាប់បណ្ដាញសៀមរាបប៉ុស្ដិ៍ នៅព្រឹកថ្ងៃទី២៤ឧសភានេះថា ប្រតិបត្តិការនេះ មន្ត្រីជំនាញបានដកហូតឈើប្រណិតសរុបចំនួន ២៨ដុំ។ ក្នុងនោះប្រភេទឈើបេងចំនួន ២១ដុំ និងប្រភេទឈើធ្នង់ចំនួន ០៧ដុំ ស្មើនិង ០,៧០៥ម៉ែត្រគូប។  ដោយមានម្ចាស់ឈើឈ្មោះ គឹម ចំរើន ភេទប្រុសអាយុ៤១ ឆ្នាំ មុខរបរលក់ដូរ រស់នៅភូមិ២០ឧសភា សង្កាត់ស្វាយប៉ោ ក្រុងបាត់ដំបង។

មន្ត្រីអាវុធហត្ថបញ្ជាក់ថាក្រោយពីបានដកហូតឈើប្រណិតខាងលើត្រូវបានមន្ត្រីជំនាញដឹកជញ្ជូនទៅរក្សាទុកនៅខណ្ឌរដ្ឋបាលព្រៃឈើខេត្តបាត់ដំបងដើម្បីចាត់ការតាមនីតិវិធី៕SRP

ខេត្តបាត់ដំបង៖សម្តេចស ខេង រដ្ឋមន្រ្តីក្រសួងមហាផ្ទៃ ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តបាត់ដំបង និងលោកជំទាវ បានផ្ដល់អំណោយ ជូនប្រជាពលរដ្ឋ មានការខ្វះខ្វះខាត.ក្នុងជីវភាពចំនួន១៧០គ្រួសារ រស់នៅស្រុករុក្ខគីរី ខេត្តបាត់ដំបង។

ការផ្ដល់អំណោយជូនពលរដ្ឋនេះ នៅថ្ងៃទី២១ ខែឧសភា ឆ្នាំ២០២១ ម្សិលមិញ តាមរយៈតំណាងរបស់រដ្ឋមន្ត្រីក្រសួងមហាផ្ទៃ។

អំណោយ របស់សម្ដេចស ខេង និងលោំទាវ ញ៉ែម សាខន ស ខេង ប្រគល់ពលរដ្ឋ ទាំង១៧០គ្រួសារ ក្នុង១គ្រួសារទទួលបាន អង្ករ១ការ៉ុង, មី១កេស, ត្រីខ១យួរ, ទឹកសុទ្ធ៥យួរ, ម៉ាស់ និងអាល់កុលមួយចំនួនទៀត។

សម្ដេចនិងលោកជំទាវ ក៏បានផ្តល់ជំនួយជាសង្កសីចំនួន៤០០សន្លឹក ជូនដល់រដ្ឋបាលស្រុករុក្ខគិរី ដើម្បីត្រៀមទុកសម្រាប់ ចែកជូនប្រជាពលរដ្ឋ ឱ្យបានទាន់ពេលវេលា នៅក្នុងករណីជួបគ្រោះមហន្តរាយធម្មជាតិ ដែលជារឿយៗបង្កឡើងដោយខ្យល់កន្រ្តាក់ផងដែរ៕SRP

ខេត្តបាត់ដំបង៖លោកណុប ដារ៉ា អភិបាលរងខេត្ត នៅព្រឹកមិញនេះ បានដឹកនាំកិច្ចប្រជុំពិភាក្សាស្តីពីការបង្រ្កាបបទល្មើសឆ្លងដែនខុសច្បាប់គ្រប់ប្រភេទ នៅក្នុងភូមិសាស្ត្រស្រុកកំរៀង ស្រុកភ្នំព្រឹក ស្រុកសំពៅលូន និងស្រុកសំឡូត។

កិច្ចប្រជុំនេះមានការចូលរួមពីអភិបាលស្រុកពាក់ព័ន្ធ និងប្រធានច្រកពាក់ព័ន្ធ និងកម្លាំងគ្រប់ប្រភេទប្រចាំការនៅតាមបន្ទាត់ព្រំដែនផងដែរ។

ថ្លែងក្នុងកិច្ចប្រជុំ លោកណុប ដារ៉ា បានក្រើនរំលឹក ដល់ មន្ត្រី ដែល មាន តួរនាទីភារកិច្ច នៅ ព្រំដែន ឱ្យ ពង្រឹង សមត្ថភាព ការងារ របស់ខ្លួន ជាពិសេស ត្រូវ គោរព ឱ្យ បាន នូវបទ បញ្ជាផ្ទៃក្នុងរបស់អង្គភាព និង ផែនការ របស់ ថ្នាក់ ដឹកនាំខេត្តដាក់ឱ្យ អនុវត្ត ក្នុង ការទប់ស្កាត់ ឱ្យបាន រាល់បទល្មើស ឆ្លង ដែន ខុសច្បាប់គ្រប់ប្រភេទ ជាពិសេសត្រូវ ចាប់ មេខ្យល់ ដែលនាំពលករ ចេញ -ចូលក្នុងប្រទេស និង អ្នកពាក់ព័ន្ធឱ្យបាន ដើម្បី ចូលរួម ជាមួយ រាជរដ្ឋាភិបាល ទប់ស្កាត់ ការរីករាលដាលនៃជំងឺកូវីដ-១៩។

លោកបានបន្តទៀតថា បើសិនជាលោកស្រាវជ្រាវ រកឃើញមន្ត្រីណាម្នាក់ដែលឈរជើងនៅទីនោះមានការឃុបឃិត ឬពាក់ព័ន្ធគ្នាជាមួយមេខ្យល់នាំពលករឆ្លងដែនខុសច្បាប់ លោកនឹងធ្វើរបាយការណ៍ ជូនថ្នាក់ដឹកនាំ ដើម្បីសុំការផ្លាស់ប្តូរមន្ត្រីនោះចេញ ឬ អាចនឹងត្រូវទទួលខុស ត្រូវចំពោះមុខច្បាប់ទៀតផង៕SRP

ខេត្តបាត់ដំបង៖ទីតាំងភ្នាល់ល្បែងទឹកភ្លៀងនៅចំណុចក្រោយផ្សារភូ ពុយ ស្ថិតក្នុងភូមិចំការសំរោង២ សង្កាត់ ចំការសំរោង ក្រុងបាត់ដំបង ខេត្តបាត់ដំបង ត្រូវបាននគរបាលបង្ក្រាប។ ការបង្រ្កាបធ្វើឡើងនៅល្ងាចថ្ងៃទី១៨ ខែឧសភា ឆ្នាំ២០២១ ម្សិលមិញ។

សមត្ថកិច្ចបានឲ្យដឹងថាការបង្ក្រាបល្បែងភ្នាល់ទឹកភ្លៀងនេះ សមត្ថកិច្ចបានឃាត់ខ្លួនមនុស្សម្នាក់ ឈ្មោះ ពេជ្រ សុធា ភេទប្រុស អាយុ ៤០ ឆ្នាំ មានទីលំនៅ ភូមិ កម្មករ សង្កាត់ ស្វាយប៉ោ ក្រុងបាត់ដំបង ខេត្ត បាត់ដំបង ជាមេល្បែងផងដែរ។

ក្នុងប្រតិបត្តិការនេះដកហូតវត្ថុតាង រួមមាន ៖

• ឧបករណ៍ កែច្នៃ សម្រាប់ ត្រង ទឹកភ្លៀង ០១
•  វិទ្យុ ទាក់ទង ចំនួន ០៣ គ្រឿង
•  រថយន្ត ម៉ាក TOYOTA RUSH ពណ៌ ខ្មៅ ពាក់ស្លាកលេខ ភ្នំពេញ 2AY 1982 ០១ គគ្រឿង។

បើតាមសមត្ថកិច្ចបានបញ្ជាក់ថា បច្ចុប្បន្នជនសង្ស័យនិងវត្ថុតាងជំនាញបញ្ជូនទៅកាន់តុលាការដើម្បីអនុវត្តតាមផ្លូវច្បាប់៕SRP