ខេត្តសៀមរាប

ខេត្តសៀមរាប៖នៅក្នុងកិច្ចប្រជុំគណៈកម្មាធិការសម្របសម្រួលបច្ចេកទេស របស់ក្រុមប្រឹក្សាខេត្តសៀមរាបអាណត្តិទី៣ នាព្រឹកមិញ នៅរដ្ឋបាលខេត្តសៀមរាប លោក ង៉ាន់ ភិរុណ អភិបាលរងខេត្ត បានថ្លែងថា នៅតាមក្រុងស្រុកមួយចំនួន អាជ្ញាធរភូមិ ឃុំ-សង្កាត់ មានការខ្វះចន្លោះ ក្នុងការតាមដាន ពីសកម្មភាពបទល្មើសនៅក្នុងមូលដ្ឋានរបស់ខ្លួន ដូចជាការកាប់ទន្ទ្រានដីព្រៃលិចទឹក ព្រៃការពាររបស់រដ្ឋ សាងសង់សំណង់មុនចេញលិខិតអនុញ្ញាត ការរំលោភដីទីទួលបុរាណដ្ឋាន ការលួចយកសាច់ដីធ្វើអាជីវកម្ម ក្រោមរូបភាពស្ដារប្រព័ន្ធធារាសាស្ត្របុរាណជាដើម។ លោកថាទាំងនេះ បានបង្ហាញពីកាខ្វះកិច្ចសហការគ្នា អាជ្ញាធរមូលដ្ឋានមន្ទីរ និងអង្គភាពពាក់ព័ន្ធ ក្នុងការការពារផលប្រយោជន៍សហគមន៍ រួមនិងទ្រព្យសម្បត្តិរដ្ឋ ពីក្រុមជនខិលខូចបានណែនាំដល់អាជ្ញាធរក្រុងស្រុក មន្ទីរ និងអង្គភាពពាក់ព័ន្ធទាំងអស់ ត្រូវសហការឃាត់ខ្លួនជនខិលខូច ហើយត្រូវតាមចាប់អ្នកដែលកាប់បំផ្លាញតំបន់ព្រៃការពាររបស់រដ្ឋ រំលោភយកដីតំបន់បុរាណដ្ឋាន ការសាងសង់សំណង់ខុសច្បាប់ រួមនិងទ្រព្យសម្បត្តិរដ្ឋដទៃទៀត មកផ្ដន្ទាទោសតាមច្បាប់។

តំណាងអភិបាលខេត្តលោកទៀ សីហា លោក ង៉ាន់ ភិរុណ បានណែនាំដល់ លោកអភិបាលក្រុងស្រុក ត្រូវបន្តណែនាំដល់មន្ត្រីក្រោមឱវាទ ធ្វើការរាយការណ៍ និងផ្អាករាល់សកម្មភាពខាងលើ ដែលពុំមានច្បាប់អនុញ្ញាត ជាពិសេសត្រូវសហការជាមួយ មន្ទីរ និងអង្គភាពជំនាញ ដើម្បីចុះពិនិត្យ អនុវត្តន៍ច្បាប់ និងឈានទៅដល់ការឃាត់ខ្លួន។
អភិបាលរងខេត្ត ក៏បានស្នើដល់មន្ត្រីជំនាញ របស់អាជ្ញាធរជាតិអប្សរា ដែលមានវត្តមានក្នុងកិច្ចប្រជុំនេះ សូមផ្ដល់នូវផែនទីទីតាំងបុរាណដ្ឋាន ក្នុងខេត្តសៀមរាប មកដល់អាជ្ញាធរខេត្ត ដើម្បីជាមូលដ្ឋាន ចៀសវាងធ្វើការអភិវឌ្ឍ ឬចេញបណ្ណសម្គាល់អចលវត្ថុ ជូនប្រជាពលរដ្ឋចំទីតាំងបុរាណទាំងនោះ។ មួយវិញទៀត ចំពោះការស្ដារប្រព័ន្ធធារាសាស្ត្របុរាណ ដូចជាប្រឡាយ ស្រះជាដើម ដែលអនុញ្ញាតដោយអាជ្ញាធរជាតិអប្សរា អាជ្ញាធរខេត្ត ពុំអនុញ្ញាតឲ្យក្រុមហ៊ុន ឬបុគ្គលណាមួយ ធ្វើអាជីវកម្មលើអាចម៍ដី ដែលបានស្ដារនោះឡើយ លើកលែងតែមានការអនុញ្ញាតពីអាជ្ញាធរខេត្ត៕SRP

ខេត្តសៀមរាប៖ អង្ករចំនួន៥០០គីឡូក្រាម របស់ក្រុមហ៊ុនទូរស័ព្ទមិត្តហ្វូនសាខាសៀមរាប ត្រូវបានផ្ដល់ជូន រដ្ឋបាលខេត្តសៀមរាប ក្នុងយុទ្ធនាការបង្ការ និងទប់ស្កាត់ការរីករាតត្បាតនៃជម្ងឺកូវីដ១៩។

ការផ្ដល់នេះនៅព្រឹកមិញក្រោមវត្តមានលោក ពិន ប្រាកដ អភិបាលរងខេត្ត តំណាងលោក ទៀ សីហា ខេត្តសៀមរាប។
លោកពិន ប្រាកដ ក្នុងនាមអាជ្ញាធរខេត្ត បានធ្វើការថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសរបស់ក្រុមហ៊ុនទូរស័ព្ទមិត្តហ្វូនសាខាសៀមរាប ក៏ដូចជាបណ្តាក្រុមហ៊ុននានា ក្នុងពេលកន្លងមក ដែលបានបរិច្ចាគនូវសម្ភារៈបរិក្ខាមួយចំនួន ចូលរួមជាមួយរាជរដ្ឋាភិបាល ក៏ដូចអាជ្ញាធរខេត្ត ក្នុងការប្រយុទ្ធប្រឆាំងនឹងជម្ងឺឆ្លង កូវីដ១៩នៅកម្ពុជា។

លោកបានបន្តទៀតថា កាយវិការដ៏សប្បុរសធម៌នេះ គឺជាចំណែកមួយក្នុងការពង្រឹងស្មារតីប្រយុទ្ធប្រឆាំងនិងជម្ងឺកូវីដ១៩ នៅកម្ពុជា ហើយកន្លងមកនេះក៏មានបណ្តាក្រុមហ៊ុន បងប្អូនសប្បុរសជនទាំងក្នុង និង ក្រៅប្រទេស បានផ្តល់ជាសម្ភារៈបរិក្ខាពេទ្យគ្រឿងឧបភោគបរិភោគ ដល់រដ្ឋបាលខេត្តសៀមរាប ដើមី្បយកទៅបម្រើការងារយុទ្ធនាការប្រយុទ្ធ ប្រឆាំងនឹងជម្ងឺកូវិដ១៩ នៅគ្រប់បណ្តាក្រុង ស្រុកទាំង១២របស់ខេត្តសៀមរាបផងដែរ៕SRP

ខេត្តសៀមរាប៖ ប្រជាពលរដ្ឋដែលវិលត្រឡប់មកពីក្នុង និងក្រៅប្រទេសចំនួន៨២នាក់ នៅមណ្ឌលចត្តាឡីស័កវិទ្យាល័យក្រឡាញ់ ខេត្តសៀមរាប ត្រូវបានបញ្ចប់ការធ្វើចត្តាឡីស័ក ការដាក់ឲ្យដាច់ដោយឡែករយៈពេល១៤ថ្ងៃ ប្រកបដោយជោគជ័យ ទៅតាមការណែនាំរបស់ក្រសួងសុខាភិបាល ដោយបានធ្វើការពិនិត្យជាប្រចាំទៅលើសុខភាពរបស់បងប្អូន ឃើញថាមានសុខភាពល្អធម្មតា ព្រមទាំងកំដៅក្នុងខ្លួនរបស់បងប្អូនគឺល្អ មិនមានករណីណាមួយកើតឡើង គួឲ្យព្រួយបារម្ភឡើយ។

លោកស្រី ម៉ននី រងី្ស អភិបាលស្រុកក្រឡាញ់នៅព្រឹកមិញបានចុះជួបសំណេះសំណាល ធ្វើការថ្លែងអំណរគុណដល់បងប្អូនប្រជាពលរដ្ឋ ដែលបានបញ្ចប់ការធ្វើចត្តាឡីស័ក ដាក់ឲ្យដាច់ដោយឡែករយៈពេល ១៤ថ្ងៃ ប្រកបដោយជោគជ័យ និងត្រូវបានវិលត្រឡប់ទៅកាន់ភូមិដ្ឋាន ជួបជុំក្រុមគ្រួសាររបស់ខ្លួន។ លោកស្រី ម៉ននី រងី្ស បានឲ្យដឹងថា ប្រជាពលរដ្ឋដែលចេញទៅធ្វើការនៅក្រៅ ប្រទេសទូទាំងស្រុកក្រឡាញ់ សរុប១២ពាន់៧៩នាក់ និង បានវិលមកវិញចាប់ពីថ្ងៃទី១០ មីនា មកដល់បច្ចុប្បន្នមានចំនួន២ពាន់៩៣៦នាក់ ក្នុងនោះអ្នកដែលបានចូលមកមណ្ឌលធ្វើចត្តាឡីស័ក នៃវិទ្យាល័យ ក្រឡាញ់មានចំនួន ២២០នាក់ និងនៅតែបន្តចូលមកជាបន្ត បន្ទាប់ ហើយបងប្អូនដែលបានអនុវត្ត ត្រូវបានបញ្ចប់ការធ្វើចត្តាឡីស័ក ការដាក់ឲ្យដាច់ដោយឡែករយ:ពេល១៤ មានចំនួន ១១១នាក់ ដោយបានវិលទៅកាន់ភូមិដ្ឋានទាំងពីរលើកក្នុងថ្ងៃនេះ ។  លោកស្រីបន្តថា ក្នុងនាមអាជ្ញាធរស្រុក បានធ្វើការថ្លែងអំណរគុណដល់បងប្អូនប្រជាពលរដ្ឋ ដែលមានការអត់ធ្មត់ តស៊ូ ក្នុងការអនុវត្តទៅតាមការណែនាំរបស់រាជរដ្ឋាភិបាល ដែលមានសម្ដេចតេជោ ហ៊ុន សែន នាយករដ្ឋមន្រ្តីកម្ពុជា និង ការណែនាំរបស់ក្រសួងសុខាភិបាល។ លោកស្រីក៏បានធ្វើការណែនាំ និងផ្តាំផ្ញើដល់បងប្អូនទាំងអស់ គឺត្រូវបន្តទៅទៀតក្នុងការធ្វើអនាម័យឲ្យបានជាប្រចាំ ទៅតាមការណែនាំរបស់ក្រសួងសុខភិបាល ចៀសវាងការឆ្លងជម្ងឺកូវីដ១៩ ។

ម៉្យាងទៀត ការដាក់ឲ្យបងប្អូនដាច់នៅដោយឡែករយៈពេល១៤ថ្ងៃនេះ មិន មែនជាការរើសអើងចំពោះបងប្អូនឡើយ គឺជាវិធានការដ៏ល្អ របស់ប្រមុខរាជរដ្ឋាភិបាល និង ក្រសួងសុខាភិបាល ក្នុងការបង្ការ ទប់ស្កាត់ ការពារកុំឲ្យមានការរីករាតត្បាតនៅក្នុងសហគមន៍ បើសិននៅក្នុងចំណោមបងប្អូន ដែលមានអ្នកណាម្នាក់បានឆ្លងជម្ងឺកូវិដ ១៩ ពីក្រៅប្រទេសនោះ នឹងធ្វើឲ្យក្នុងសហគមន៍មូលដ្ឋានខ្លួនទទួលរងគ្រោះជាក់ជាមិនខាន។  លោកស្រីអភិបាលស្រុក ក៏បានធ្វើការរំលឹកដល់បងប្អូន ត្រូវតែបន្តការតាម ដាននូវសុខភាពរបស់ខ្លួនឲ្យបានជាប្រចាំ បើសិនមានបញ្ហាសុខភាព ត្រូវប្រញាប់ធ្វើការទំនាក់ទំនង ផ្តល់ដំណឹងដល់អាជ្ញាធរមូលដ្ឋាន ឬ ធ្វើការទំនាក់ទំនងតាមរយៈលេខទូរស័ព្ទ ១១៥ ផងដែរ ។ លោកស្រីក៏បានធ្វើការផ្តាំផ្ញើដល់អាជ្ញាធរភូមិ ឃុំ នៅពេលមានបងប្អូននៅក្នុង មូលដ្ឋានខ្លួន ដែលបានវិលពីក្រៅប្រទេស ហើយមិនបានចូលមកធ្វើចត្តាឡីស័ក គឺត្រូវរាយការណ៍មកអនុគណៈកម្មការប្រយុទ្ធប្រឆាំងនិង ជម្ងឺឆ្លងកូវីដ១៩ស្រុក ដើមី្បនាំពួកគាត់មកធ្វើចត្តាឡីស័ក ដាក់ឲ្យនៅដាច់ដោយឡែករយៈពេល១៤ថ្ងៃ៕SRP

ខេត្តសៀមរាប៖បុរសស្ត្រីពីរនាក់ត្រូវបានកម្លាំងអាវុធហត្ថខេត្តសៀមរាប ធ្វើការឃាត់ខ្លួនតាមការអនុវត្តដីការបស់តុលាការ។ ការឃាត់ខ្លួន ធ្វើឡើងនៅវេលាម៉ោង១៣និង៣០នាទីថ្ងៃទី២២ខែមេសាម្សិលមិញ ដោយកម្លាំងមន្ទីរយុត្តិធម៌នៃបញ្ជាការអាវុធហត្ថខេត្តសៀមរាប។

ការចុះអនុវត្តដីកាបង្គាប់ឲ្យចាប់ខ្លួនលេខ៖៦២និងដីកាលេខ៖៦៣ចុះថ្ងៃទី០៧ ខែកុម្ភៈ ឆ្នាំ២០២០ ចេញដោយលោក គឹម សុគន្ធា ចៅក្រមសើបសួរនៃសាលាដំបូងខេត្តសៀមរាប ពីបទ៖មិនបំពេញកាតព្វកិច្ចចំពោះឧបករណ៍ដែលអាចជួញដូរបាន និងរំលោភលើទំនុកចិត្ត នៅចំណុចភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។ជនដែលឃាត់ខ្លួន០១.ឈ្មោះ ហ៊ួរ វត្ថា ភេទប្រុសអាយុ៤០ឆ្នាំ រស់នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។

០២.ឈ្មោះសុខ សុជាតា ភេទស្រី អាយុ២៧ឆ្នាំរស់នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។បច្ចុប្បន្ន កម្លាំងជំនាញបញ្ជូនជនត្រូវចោទទាំងពីរនាក់ ទៅសាលាដំបូងខេត្តសៀមរាប ដើម្បីអនុវត្តតាមនីតិវិធី៕SRP

ខេត្តសៀមរាប៖ជនសង្ស័យម្នាក់ត្រូវបានកម្លាំងអាវុធហត្ថខេត្តសៀមរាបបញ្ជូនទៅតុលាការ ពាក់ព័ន្ធករណីលួចម៉ូតូ។ ជនសង្ស័យរូបនេះ ត្រូវបានកម្លាំងស្នាក់ការសន្តិសុខ៦០១ នៃបញ្ជាការដ្ឋានកងរាជអាវុធហត្ថខេត្តកំពង់ធំ បានឃាត់ខ្លួនបាននៅវេលាម៉ោង ០៤និង០៨នាទីទាបភ្លឺ ថ្ងៃទី២២ខែមេសាម្សិលមិញ។

ជនសង្ស័យឈ្មោះកែវ ពិសិដ្ឋ ភេទប្រុស អាយុ២៩ឆ្នាំ មុខរបរសន្តិសុខ រស់នៅភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ ករណីនេះដកហូតវត្ថុតាងម៉ូតូហុងដាទ្រីម សេ១២៥ មួយគ្រឿង ពណ៌ខ្មៅ ផលិតឆ្នាំ២០១៩ លេខតួ/លេខម៉ាស៊ីន 5433225 (គ្មានផ្លាកលេខ), កាំបិតតាំងតោ០១, សាក់កាដូដាក់ខោអាវ០១, កូនសោរកុងតាក់០១ សោឆ្នៃអក្សT០១។

សមត្ថកិច្ចបានឲ្យដឹងថា ក្រោយពីសមត្ថកិច្ចជំនាញសាកសួរជនសង្ស័យបានសារភាពថារូបខ្លួនពិតជាបានប្រព្រឹត្តអំពើលួចម៉ូតូខាងលើ កាលពីវេលាម៉ោងប្រហែល ០៤ទាបភ្លឺ ចុងខែមីនាឆ្នាំ២០២០ នៅចំណុចផ្ទះជួល ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប។

សមត្ថកិច្ចបានបញ្ជាក់ទៀតថាដោយមានការអនុញ្ញាតពីលោក ឧត្តមសេនីយ៍ត្រី មេបញ្ជាការកងរាជអាវុធហត្ថខេត្តសៀមរាប និង ដោយមានការអនុញ្ញាតពីលោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្តកំពង់ធំ និងដោយមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប បានអនុញ្ញាតឲ្យសមត្ថកិច្ចជំនាញកងរាជអាវុធហត្ថខេត្តសៀមរាប ទៅទទួលយកជនសង្ស័យ និងវត្ថុតាង ពីការិយាល័យជំនាញនៃកងរាជអាវុធហត្ថខេត្តកំពង់ធំ ដើម្បីយកមកអនុវត្តតាមនីតិវិធី៕SRP