ខេត្តសៀមរាប

ខេត្តសៀមរាប៖អធិការដ្ឋាននគរបាលក្រុងសៀមរាបបានបញ្ជាក់ថា ដោយអនុវត្តតាមបទបញ្ជាដ៏ម៉ឺងម៉ាត់របស់ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប ក្រោមការដឹកនាំបញ្ជាដោយផ្ទាល់របស់លោក វរសេនីយ៍ឯក ដា ចំរេីន អធិការនគរបាលក្រុងសៀមរាប នៅថ្ងៃទី០៧,០៨ ខែមិថុនា ឆ្នាំ២០២៥ បានឃាត់ខ្លួនជនសង្ស័យ ចំនួន០៤នាក់ ពាក់ព័ន្ធនឹងករណីអំពើលួច (លួចម៉ូតូ ) និងប្រើប្រាស់ដោយខុសច្បាប់នូវសារធាតុញៀន។

អធិការនគរបាលបានបន្តថា នៅវេលាម៉ោង ០៦: ៣០ នាទីព្រឹក ថ្ងៃទី ០៧ ខែ មិថុនា ឆ្នាំ២០២៥ នៅចំណុច E-Sport club A7 ស្ថិតក្នុងភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប មានករណីអំពើលួច (លួចម៉ូតូ ) បង្កឡើងដោយជនសង្ស័យខាងលើ បានធ្វើសកម្មភាពជិះម៉ូតូ០១គ្រឿង រួចទម្លាក់គ្នាដើម្បីលួចម៉ូតូម៉ាកហុងដាឌ្រីម សេ១២៥ ពណ៌ខ្មៅ សេរីឆ្នាំ២០២០ ពាក់ផ្លាកលេខ សៀមរាប 1AJ- 2965 របស់ជនរងគ្រោះឈ្មោះ អ៊ួង ស្រីទូច ភេទ ស្រី អាយុ ៤១ឆ្នាំ ជនជាតិខ្មែរ មុខរបរ លក់ដូរ រស់នៅភូមិបឹងដូនប៉ា សង្កាត់ស្លក្រាម ក្រុង សៀមរាប ខេត្តសៀមរាប រួចគេចខ្លួន ក្រោយពីទទួលបណ្តឹងពីជនរងគ្រោះ សមត្ថកិច្ចយើងបានធ្វើការស្រាវជ្រាវ និងឃាត់ខួនជនសង្ស័យបានជាបន្តបន្ទាប់មានឈ្មោះដូចខាងក្រោម៖
០១-ជនសង្ស័យឈ្មោះ សុន សុភា ភេទប្រុស អាយុ១៦ឆ្នាំ មុខរបរមិនពិតប្រាកដ មានស្រុកកំណើត និងបច្ចុប្បន្ននៅភូមិបន្ទាយឈើ សង្កាត់ទឹកវិល ក្រុងសៀមរាប ក្រុងសៀមរាប ខេត្តសៀមរាប ។
០២-ជនសង្ស័យឈ្មោះ រឿន មិថុនា ហៅម៉ី ភេទប្រុស អាយុ១៩ឆ្នាំ មុខរបរមិនពិតប្រាកដ មានស្រុកកំណើត និងបច្ចុប្បន្ននៅភូមិបន្ទាយឈើ សង្កាត់ទឹកវិល ក្រុងសៀមរាប ក្រុងសៀមរាប ខេត្តសៀមរាប។
០៣-ជនសង្ស័យឈ្មោះ ហ៊ាញ រត្តនា ភេទប្រុស អាយុ១៧ឆ្នាំ មុខរបរមិនពិតប្រាកដ មានស្រុកកំណើតនៅភូមិពពែល ឃុំដំដែក ស្រុកសូទ្រនិគម ខេត្តសៀមរាប និងបច្ចុប្បន្ននៅភូមិវាល សង្កាត់គោកចក ក្រុងសៀមរាប ក្រុងសៀមរាប ខេត្តសៀមរាប។
០៤-ជនសង្ស័យប៉ោ បូលីហុង ភេទប្រុស អាយុ១៥ឆ្នាំមុខរបរមិនពិតប្រាកដ មានស្រុកកំណើតនៅភូមិវត្តដំណាក់ សង្កាត់សាលាកំរើក ក្រុងសៀមរាប ខេត្តសៀមរាប និងបច្ចុប្បន្ននៅភូមិវាល សង្កាត់សំបួរ ក្រុងសៀមរាប ខេត្តសៀមរាប។ ករណីនេះដកហូតបានម៉ូតូចំនួន០២គ្រឿង មានម៉ូតូជនសង្ស័យជិះធ្វើសកម្មភាពចំនួន០១គ្រឿង និងម៉ូតូជនរងគ្រោះចំនួន០១គ្រឿង។ នៅចំពោះមុខសម្ថកិច្ចជនសង្ស័យខាងលើបានឆ្លើយសារភាពថា ពិតជាបានធ្វើសកម្មភាពលួចយកម៉ូតូជនរងគ្រួសខាងលើពិតប្រាកដមែន។

បញ្ជាក់ថា ជនសង្ស័យឈ្មោះ វឿន មិថុនា ហៅម៉ី ជនសង្ស័យ ឈ្មោះសុន សុភា និងជនសង្ស័យឈ្មោះ ប៉ោ បូលីហុង មានផ្ទុកសារធាតុញៀនផងដែរ។ ជនសង្ស័យត្រូវបានកសាងសំណុំរឿង បញ្ជូនទៅកាន់ការិយាល័យជំនាញដើម្បីបន្តនីតិវិធី៕SRP

អំណោយមនុស្សធម៌ ចំនួន៥ម៉ឺនដុល្លារ និងគ្រឿងឧបភោគបរិភោគមួយចំនួន ជូនដល់មន្ទីរពេទ្យកុមារអង្គខេត្តសៀមរាប

ខេត្តសៀមរាប៖លោកជំទាវ ទុយ ជិ ប្រាក់សោភ័ណ និងលោកជំទាវ សុខ ណារ៉ូ ពៅហេង អនុប្រធានគណៈកម្មាធិការសាខា ព្រមទាំងសហការី នៅថ្ងៃទី ៧ ខែមិថុនា ឆ្នាំ២០២៥ បានអញ្ជើញអមដំណើរគណៈប្រតិភូកាកបាតក្រហមកម្ពុជា ដឹកនាំដោយលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បំពេញបេសកកម្មដោយនាំយកអំណោយមនុស្សធម៌ ដែលមានថវិកា.ចំនួន ៥ម៉ឺនដុល្លារ និងគ្រឿងឧបភោគបរិភោគមួយចំនួន ជូនដល់មន្ទីរពេទ្យកុមារអង្គរខេត្តសៀមរាប។

បន្ទាប់ពីសំណេះសំណាលជាមួយលោកគ្រូពេទ្យ អ្នកគ្រូពេទ្យ និងជូនថវិកាជូនមន្ទីរពេទ្យរួច គណៈប្រតិភូបានអញ្ជើញសួរសុខទុក្ខក្មួយៗ.កុមារដែលកំពុងសម្រាកនៅក្នុងមន្ទីរពេទ្យេនេះ ដោយម្នាក់ៗទទួលបានឃីត១កញ្ចប់ និងថវិកា៥ម៉ឺនរៀលផងដែរ។

មុននឹងបញ្ចប់បេសកកម្ម គណៈប្រតិភូបានអញ្ជើញជួបសួរសុខទុក្ខមាតា ទារក ដែលទើបសម្រាលកូនរួច នៅមន្ទីរពេទ្យគន្ធបុប្ផា ចំនួនជាង១៥០នាក់ផងដែរ ដោយម្នាក់ៗទទួលបានឃីត១កញ្ចប់ និងថវិកា៥ម៉ឺនរៀល៕SRP

ខេត្តសៀមរាប៖សមត្ថកិច្ចនគរបាលស្រុកប្រាសាទបាគងបានចាប់ខ្លួនមនុស្សពីរនាក់ពាក់ពន្ធ័ អំពើលួច (ម៉ូតូ) ជួញដូរ និងរក្សាទុក ដោយខុសច្បាប់នូវសារធាតុញៀន។

នគរបាលស្រុកប្រាសាទបាគងបានបញ្ជាក់ថា
បន្ទាប់ពីទទួលបានពាក្យបណ្តឹង ពីជនរងគ្រោះឈ្មោះ រ ស ន ភេទស្រី អាយុ២០ ឆ្នាំ នៅភូមិល្អក់ ឃុំកណ្ដែក ស្រុកប្រាសាទបាគង ខេត្តសៀមរាប និងក្រោមការចង្អុលបង្ហាញ ពីលោកឧត្តមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្តសៀមរាប កម្លាំងនគរបាលស្រុកប្រាសាទបាគង សហការណ៍ជាមួយ នគរបាលផែនការងារព្រហ្មទណ្ឌខេត្ត នៅថ្ងៃទី០៤ ខែមិថុនា ឆ្នាំ២០២៥ បានធ្វើការស្រាវជ្រាវ រហូតឈានដល់ធ្វើការឃាត់ខ្លួនជនសង្ស័យ ឈ្មោះ លៃ សៀកលេង ភេទប្រុស អាយុ២៥ ឆ្នាំ នៅភូមិគោកត្នោត ឃុំកណ្ដែក ស្រុកប្រាសាទបាគង ខេត្តសៀមរាប ជាមុខសញ្ញាចាស់ ទើបចេញពីពន្ធនាគារមកសាកសួរនាំ និងបានធ្វើការដកហូតម៉ូតូចំនួន០១ គ្រឿង ម៉ាកហុងដាZoomerx សេរីឆ្នាំ២០២១ ពណ៌ទឹកប្រាក់ (បាត់ស្លាកលេខ) មានលេខតួMLHJF 6206G- 5041777 លេខម៉ាសុីនJF62E- 0041777 ដែលជាម៉ូតូរបស់ ជនរងគ្រោះ បាត់កាលពីថ្ងៃទី០៤ ខែមិថុនា ឆ្នាំ២០២៥ កន្លងទៅ នឹងបាន ធ្វើការឆែកឆេក លើខ្លួនជនសង្ស័យរូបនេះ រកឃើញថ្នាំញៀន មួយកញ្ចប់តូច ប្រភេទម៉ាទឹកកក បន្ថែមទៀត។

នគរបាលបានបន្តថា បន្ទាប់មកនៅថ្ងៃទី០៥ ខែមិថុនា ឆ្នាំ២០២៥ មន្ត្រីជំនាញយើង បានបន្តនិតិវិធី ឈានដល់ការនាំខ្លួន បក្សពួកជនសង្ស័យ
បន្ថែមបានចំនួន០១ នាក់ទៀត ឈ្មោះ ផង់ ផុន ហៅ ញ ភេទប្រុស អាយុ១៨ ឆ្នាំ រស់នៅភូមិ ចំបក់ឃុំរលួស ស្រុកប្រាសាទបាគង ខេត្តសៀមរាប និងដកហូតវត្ថុតាងបាន កញ្ចក់ម៉ូតូ០១ គូរ កាងម៉ូតួចំនួន១ កាងម៉ាស៊ីនម៉ូតូចំនួន១ ដែលជនសង្ស័យ បានដោះចេញពីម៉ូតូរបស់ជនរងគ្រោះ យកទៅលាក់ទុក។ បន្ទាប់មកទៀត កម្លាំងជំនាញយើង បានធ្វើការតេស្តទឹកនោមជនសង្ស័យទាំង០២ នាក់ រកសារធាតុញៀន ជាលទ្ធផលវិជ្ជមាន(ប្រើប្រាស់ថ្នាំញៀនជាមួយគ្នា)។

បច្ចុប្បន្ន យោងតាមចម្លើយសារភាព ជនសង្ស័យ និងវត្ថុតាង ត្រូវកម្លាំងនគរបាលស្រុក សហការជាមួយការិយាល័យជំនាញ កសាងសំណុំរឿង បញ្ជូនទៅតុលាការ ដើម្បីចាត់ការ តាមនីតិវិធីច្បាប់៕SRP

ខេត្តសៀមរាប៖រថយន្តចំនួន២គ្រឿងបានបុកគ្នាពេញទំហឹងបណ្ដាលឲ្យតៃកុងរថយន្តធំជាប់ក្នុងកាប៊ិន។

ហេតុការណ៍បានកើតឡើងនៅថ្ងៃសៅរ៍ ទី៧ ខែមិថុនា ឆ្នាំ២០២៥ វេលាម៉ោង០៧ និង៤០ នាទីលើផ្លូវជាតិ  លេខ០៦ ចន្លោះគីឡូម៉ែត្រ៣៣៤.៣៣៥ ភូមិទួលរវៀង ឃុំល្វា ស្រុកពួក។

នគរបាលខេត្តសៀមរាប បានថ្លែងប្រាប់ទីភ្នាក់ងារសារព័ត៌មានសៀមរាប ប៉ុស្តិ៍ ថា គ្រោះថ្នាក់ចរាចរណ៍នេះ រវាងរថយន្តម៉ាកលុចស៊ីស 470 ពណ៌ទឹកមាស  ផលិតឆ្នាំ ១៩៩៩ ពាក់ ផ្លាកលេខ ភ្នំពេញ 2AK-0055 បើកបរដោយ ឈ្មោះ ប្រឿន សុវណ្ណ ភេទប្រុស អាយុ៥៨ឆ្នាំ និងអ្នករួមដំណើ ចំនួន ០១ នាក់ ឈ្មោះ ប្រម សុខៀម ភេទប្រុស អាយុ២ឆ្នាំ ត្រូវជាកូន  រស់នៅភូមិគោកកណ្តាល ឃុំសស្តម្ភ ស្រុកពួក ខេត្តសៀមរាប បើកបរទិសដៅពីកើតទៅលិច បានបុក ជាមួយរថយន្តម៉ាក ហ៊ីយាន់ដាយ ២.៥ តោន ពណ៌ស  ពាក់ផ្លាកលេខ សៀមរាប 3A-1959  បើកបរដោយឈ្មោះ តាប់ ចំរើន ភេទប្រុស អាយុ៣៥ ឆ្នាំនិងអ្នករួម ដំណើរ០១ នាក់ ឈ្មោះ អំ ថុនី ភេទស្រី អាយុ ៣៤ឆ្នាំ ត្រូវជាប្រពន្ធនៅភូមិតាត្រាវ ឃុំមុខប៉ែន  ស្រុកពួក ខេត្តសៀមរាប បើកបរក្នុងទិសដៅពីលិចទៅកើត។

នគរបាលបានថ្លែងបន្តថា ករណីខាងលើនេះ បណ្តាលអោយរងរបួស ០២ នាក់ :
១.ឈ្មោះ ប្រឿន សុវណ្ណ  រងរបួស (មធ្យម)
២.ឈ្មោះ តាប់ ចំរើន (មធ្យម)។
-ខូចខាតរថយន្ត ០២គ្រឿងធ្ងន់។

បើតាមនគរបាលខេត្តសៀមរាប មូលហេតុ:យោងតាមកាមេរ៉ាសុវត្ថិភាព បានឃើញរថយន្តម៉ាលុចស៊ីស បើកបរដោយមិនប្រកាន់ស្តាំ ឃើញដូចនោះរថយន្តម៉ាកហ៊ីយាន់ដាយ ក៍បានបើកគេចទៅឆ្វេង ដល់កន្លែងកើតហេតុ រថយន្តម៉ាកលុចស៊ីសក៍បាន បើកចូលទៅស្តាំវិញក៍បុកគ្នាតែម្តង។

ក្រោយពេលកើតហេតុ កម្លាំងផ្នែកជំនាញ សហការណ៍ ជាមួយប៉ុស្តិ៍នគរបាលរដ្ឋបាលល្វា ចុះវាស់វែងជួយសង្គ្រោះជនរងគ្រោះភ្លាមៗទៅមន្ទីរពេទ្យនិងប្រមូលវត្ថុតាងមករក្សាទុក្ខនៅអង្គភាព ដើម្បីបន្តនីតិវីធី៕SRP

សម្ដេចធិបតី៖ តើរាជរដ្ឋាភិបាលកម្ពុជាដាក់បណ្តឹងទៅ ICJ ដើម្បីបង្កើតសង្រ្គាមឬយ៉ាងណា?

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កម្ពុជាដាក់បណ្តឹងទៅតុលការយុត្តិធម៌អន្តរជាតិ( ICJ) មិនមែនដើម្បីបង្កើតសង្រ្គាមនោះទេ គឺចង់ដោះស្រាយបញ្ចប់បញ្ហាជាមួយមិត្តជិតខាងដោយស្មារតីសន្តិភាព សហប្រតិបត្តិការ គោរពគ្នា ឯកភាពគ្នា ផ្អែកទៅលើមូលដ្ឋានផែនទីជំនាន់បារំាងដែលភាគីទាំងពីរកម្ពុជា-ថៃ បានឯកភាពគ្នាកាលពីឆ្នាំ២០០០ ដើម្បីបញ្ចៀសសង្រ្គាម។

ក្នុងឱកាសសម្ពោធ «អគារសិក្សា អគារទីចាត់ការ អគារសយនដ្ឋាន និងអគារពិសោធន៍ ព្រមទាំងសមិទ្ធផលនានានៅក្នុងខេត្តរតនគិរី» នៅព្រឹកថ្ងៃសៅរ៍ទី៧ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត បានគូសបញ្ជាក់ថា អំឡុងពេលដាក់បណ្តឹងទៅ ICJ យើងក៏ត្រៀមលក្ខណៈការពារទឹកដីរប់សយើងគ្រប់មធ្យោបាយរួមទាំងកងទ័ព ប៉ុន្តែជំហររបស់យើងទោះជាយ៉ាងណាក៏ដោយក៏យើងមិនបោះបង់ការដោះស្រាយបញ្ហាបច្ចេកទេសទេ្វរភាគីនៅតាមកន្លែងដែលមិនពាក់ព័ន្ធនេះបន្តទៅទៀត។

សម្តេចធិបតី ហ៊ុន ម៉ាណែត បានលើកឡើងពីក្តីសង្ឃឹមថា ក្នុងកិច្ចប្រជុំថ្ងៃទី១៤ ខែមិថុនា ឆ្នាំ២០២៥ ខាងមុខនេះ រាជរដ្ឋាភិបាលថៃ និងកម្ពុជានឹងរកចំណុចរួមមួយដើម្បីបន្តដំណើរនៅក្នុងការចរចាបញ្ហាព្រំដែនដែលនៅសេសសល់ច្រើនរយគីឡូម៉ែត្រតទៅទៀត ទោះបី ៤ចំណុចនេះ កម្ពុជាបានយកទៅ ICJ ក៏ដោយ ប៉ុន្តែនៅមានច្រើនចំណុចទៀតដែលយើងត្រូវបន្តខណ្ឌសីមាបោះបង្គោលព្រំដែនតាមរយៈយន្តការទ្វេរភាគីផ្អែកទៅលើ MOU ឆ្នាំ២០០០។

ឆ្លៀតឱកាសនេះ សម្តេចធិបតី ហ៊ុន ម៉ាណែត បានអរគុណដល់ប្រជាពលរដ្ឋដែលបានចូលរួមផ្ដល់ជាសម្ភារៈស្បៀងអាហារដល់កងទ័ពនៅជួរមុខ ដើម្បីការពារបូរណភាពទឹកដី នេះជាការលើកទឹកចិត្តមួយយ៉ាងសំខាន់ដល់កងទ័ពរបស់យើង៕SRP